Во святы́й и Вели́кій понедѣ́льникъ Страстны́я недѣ́ли.
Зау́тро на угото́ванное для мѵроваре́нія мѣ́сто прихо́дитъ митрополи́тъ, архимандри́ты и игу́мены, свяще́нницы и діа́коны, и облача́ются въ ма́лое облаче́ніе, и твори́тся нача́ло си́це:
Глаго́летъ протодіа́конъ: Благослови́, влады́ко.
Митрополи́тъ же глаго́летъ: Благослове́нъ Бо́гъ на́шъ всегда́, ны́нѣ и при́сно и во вѣ́ки вѣко́въ.
И глаго́лется отъ кли́ра: Ами́нь. Царю́ Небе́сный... Трисвято́е... Пресвята́я Тро́ице... Отче на́шъ...
Митрополи́тъ: Яко Твое́ е́сть Ца́рство...
Чте́цъ: Ами́нь. Го́споди, поми́луй, 12. [Сла́ва, и ны́нѣ.] Пріиди́те, поклони́мся.., три́жды.
Го́споди, услы́ши моли́тву мою́, [внуши́ моле́ніе мое́ во и́стинѣ Твое́й, услы́ши мя́ въ пра́вдѣ Твое́й и не вни́ди въ су́дъ съ рабо́мъ Твои́мъ, я́ко не оправди́тся предъ Тобо́ю вся́къ живы́й. Яко погна́ вра́гъ ду́шу мою́, смири́лъ е́сть въ зе́млю живо́тъ мо́й, посади́лъ мя́ е́сть въ те́мныхъ, я́ко ме́ртвыя вѣ́ка. И уны́ во мнѣ́ ду́хъ мо́й, во мнѣ́ смяте́ся се́рдце мое́. Помяну́хъ дни́ дре́внія, поучи́хся во всѣ́хъ дѣ́лѣхъ Твои́хъ, въ творе́ніихъ руку́ Твое́ю поуча́хся. Воздѣ́хъ къ Тебѣ́ ру́цѣ мои́, душа́ моя́, я́ко земля́ безво́дная Тебѣ́. Ско́ро услы́ши мя́, Го́споди, исчезе́ ду́хъ мо́й, не отврати́ лица́ Твоего́ отъ мене́, и уподо́блюся низходя́щимъ въ ро́въ. Слы́шану сотвори́ мнѣ́ зау́тра ми́лость Твою́, я́ко на Тя́ упова́хъ. Скажи́ мнѣ́, Го́споди, пу́ть въ о́ньже пойду́, я́ко къ Тебѣ́ взя́хъ ду́шу мою́. Изми́ мя отъ вра́гъ мои́хъ, Го́споди, къ Тебѣ́ прибѣго́хъ. Научи́ мя твори́ти во́лю Твою́, я́ко Ты́ еси́ Бо́гъ мо́й. Ду́хъ Тво́й благíй наста́витъ мя́ на зе́млю пра́ву. Имене Твоего́ ра́ди, Го́споди, живи́ши мя́, пра́вдою Твое́ю изведе́ши отъ печа́ли ду́шу мою́. И ми́лостію Твое́ю потреби́ши враги́ моя́, и погуби́ши вся́ стужа́ющія души́ мое́й, я́ко а́зъ ра́бъ Тво́й е́смь.
Сла́ва Отцу́ и Сы́ну и Свято́му Ду́ху, и ны́нѣ и при́сно и во вѣ́ки вѣко́въ, ами́нь.]
Аллилу́ія, [аллилу́ія, аллилу́ія, сла́ва Тебѣ́, Бо́же.] [Три́жды.]Пото́мъ пою́тъ пѣ́вчіе: Бо́гъ Госпо́дь, и яви́ся на́мъ...
Та́же тропа́рь, гла́съ 8:
Благослове́нъ еси́, Христе́ Бо́же на́шъ, Иже прему́дры ловцы́ явле́й, низпосла́въ и́мъ Ду́ха Свята́го, и тѣ́ми уловле́й вселе́нную, Человѣколю́бче, сла́ва Тебѣ́. [Два́жды.]
Сла́ва, и ны́нѣ, гла́съ 1:
Въ рождествѣ́ дѣ́вство сохрани́ла eси́, во успе́ніи мíра не оста́вила eси́, Богоро́дице, преста́вилася eси́ къ животу́, Ма́ти су́щи Живота́, и моли́твами Твои́ми избавля́еши отъ сме́рти ду́ши на́ша.
Пото́мъ псало́мъ 50:
Поми́луй мя́, Бо́же, [по вели́цѣй ми́лости Твое́й, и по мно́жеству щедро́тъ Твои́хъ очи́сти беззако́ніе мое́. Наипа́че омы́й мя отъ беззако́нія моего́, и отъ грѣха́ моего́ очи́сти мя. Я́ко беззако́ніе мое́ а́зъ зна́ю и грѣ́хъ мо́й предо мно́ю е́сть вы́ну. Тебѣ́ Еди́ному согрѣши́хъ, и лука́вое предъ Тобо́ю сотвори́хъ, я́ко да оправди́шися во словесѣ́хъ Твои́хъ и побѣди́ши, внегда́ суди́ти Ти́. Се́ бо въ беззако́ніихъ зача́тъ е́смь, и во грѣсѣ́хъ роди́ мя́ ма́ти моя́. Се́ бо и́стину возлюби́лъ еси́, безвѣ́стная и та́йная прему́дрости Твоея́ яви́лъ ми́ еси́. Окропи́ши мя́ иссо́помъ, и очи́щуся, омы́еши мя́, и па́че снѣ́га убѣлю́ся. Слу́ху моему́ да́си ра́дость и весе́ліе, возра́дуются ко́сти смире́нныя. Отврати́ лице́ Твое́ отъ грѣ́хъ мои́хъ, и вся́ беззако́нія моя́ очи́сти. Се́рдце чи́сто сози́жди во мнѣ́, Бо́же, и ду́хъ пра́въ обнови́ во утро́бѣ мое́й. Не отве́ржи мене́ отъ лица́ Твоего́, и Ду́ха Твоего́ Свята́го не отъими́ отъ мене́. Возда́ждь ми́ ра́дость спасе́нія Твоего́, и Ду́хомъ Влады́чнимъ утверди́ мя́. Научу́ беззако́нныя путе́мъ Твои́мъ, и нечести́віи къ Тебѣ́ обратя́тся. Изба́ви мя́ отъ крове́й, Бо́же, Бо́же спасе́нія моего́, возра́дуется язы́къ мо́й пра́вдѣ Твое́й. Го́споди, устнѣ́ мои́ отве́рзеши, и уста́ моя́ возвѣстя́тъ хвалу́ Твою́. Я́ко а́ще бы восхотѣ́лъ еси́ же́ртвы, да́лъ бы́хъ убо́, всесожже́нія не благоволи́ши. Же́ртва Бо́гу ду́хъ сокруше́нъ, се́рдце сокруше́нно и смире́нно Бо́гъ не уничижи́тъ. Ублажи́, Го́споди, благоволе́ніемъ Твои́мъ Сіо́на, и да сози́ждутся стѣ́ны Іерусали́мскія. Тогда́ благоволи́ши же́ртву пра́вды, возноше́ніе и всесожега́емая: тогда́ возложа́тъ на олта́рь Тво́й тельцы́].
И быва́етъ ма́лое освяще́ніе воды́, а по освяще́ніи моли́тва:
Го́споди Іису́се Христе́, Сы́не Единоро́дный Безнача́льнаго Твоего́ Отца́, Ты́ ре́клъ еси́ пречи́стыми усты́ Твои́ми, я́ко безъ Мене́ не мо́жете твори́ти ничесо́же. Го́споди мо́й, Го́споди, вѣ́рою объе́мъ въ души́ мое́й и се́рдцѣ Тобо́ю рече́нная, припа́даю Твое́й бла́гости: помози́ ми, грѣ́шному, сіе́ дѣ́ло, мно́ю начина́емо, о Тебѣ́ Само́мъ соверши́ти, во и́мя Отца́ и Сы́на и Свята́го Ду́ха, ами́нь.
И быва́етъ отпу́стъ. По отпу́стѣ же покропля́ются свято́ю водо́ю подлежа́щія къ мѵроваре́нію матеріа́лы. И влива́етъ митрополи́тъ святы́я воды́ ма́ло въ котлы́ мѵрова́рныя.
И пото́мъ влива́ютъ іере́и деревя́нное ма́сло, та́кже и вино́ виногра́дное; а ско́лько, о то́мъ значи́тъ въ приложе́ннномъ при се́мъ рее́стрѣ.
А митрополи́тъ, благословя́ о́ное руко́ю, глаго́летъ: Во и́мя Отца́, и Сы́на, и Свята́го Ду́ха, ами́нь.
И подкла́дывается подъ котлы́ у́гліе. И вари́тся о́ное по разсужде́нію иску́сство вѣ́дущаго. И ско́лько всего́ ма́сла и́мать бы́ти, ма́ло, или́ мно́го, по тому́ и вино́ церко́вное ли́ти подоба́етъ, что́бы его́ въ варе́ніи бы́ло на три́ дни́, и ни́зше бы ма́сла вино́ всегда́ бы́ло на пя́ть па́льцовъ. У того́ жъ варе́нія оставля́ются іере́и и діа́коны, и чту́тъ свято́е Ева́нгеліе премѣня́ющеся въ свяще́нныхъ оде́ждахъ.
Во святы́й и Вели́кій вто́рникъ.
Сѵнода́льный ри́зничій съ собо́рными ключаря́ми, еди́но виногра́дное вино́ покропя́ свято́ю водо́ю, полага́ютъ о́ное въ котлы́, и вари́тся, ка́къ вы́ше пока́зано, со чте́ніемъ Ева́нгелія жъ.
Во святу́ю же и Вели́кую сре́ду.
Таковы́мъ же о́бразомъ сѵнода́льный ри́зничій со собо́рными ключаря́ми поу́тру всѣ́ пріугото́ванныя къ мѵроваре́нію соста́вы [а какíя и́менно, о то́мъ значи́тъ въ приложе́нномъ при се́мъ рее́стрѣ, и поставля́ются о́ные на особли́вомъ мѣ́стѣ], покропя́ свято́ю водо́ю, полага́ютъ во о́ныя жъ котлы́, и влива́ютъ по пропо́рціи вино́ виногра́дное, и вари́тся въ то́тъ де́нь до четве́ртаго ча́са по полу́дни. Пото́мъ слива́ютъ о́ное мѵ́ро изъ котло́въ мѵрова́рныхъ во особли́во угото́ванный коте́лъ, и промѣ́шиваютъ. А когда́ осты́нетъ, тогда́ полага́ются во о́ное мѵ́ро благово́нная ма́сла [а какíя и́менно, о то́мъ значи́тъ въ приложе́нномъ при се́мъ рее́стрѣ] и мѣша́ются жъ во о́номъ котлѣ́, а перемѣша́въ, разлива́ется о́ное мѵ́ро въ сосу́ды для того́ угото́ванныя и о́ные сосу́ды поставля́ются на угото́ванный и окры́тый въ пала́тѣ сто́лъ. И оставля́ются за печа́тью сѵнода́льнаго ри́зничнаго до Вели́каго четвертка́.
Во святы́й же и Вели́кій четверто́къ.
Предъ литургíею, вше́дъ митрополи́тъ въ собо́рную це́рковъ, и облача́сь по обы́чаю, исхо́дитъ со всѣ́мъ собо́ромъ, предноси́му честно́му кресту́ со свѣща́ми, рипи́дами и со зво́номъ въ пала́ту, гдѣ́ стои́тъ мѵ́ро запеча́тано. И прише́дъ, раздае́тъ напо́лненныя сосу́ды протопо́помъ и про́чимъ іере́емъ, и несу́тъ о́ное мѵ́ро отту́ду въ собо́рную це́рковь, предходя́щимъ же тому́ діа́конамъ со свѣща́ми и кади́лами. А о́крестъ о́наго сю́ду и сю́ду рипи́ды діа́конами жъ но́сятся со зво́номъ же.
И пою́тъ вси́ тропа́рь, гла́съ 8:
Благослове́нъ еси́, Христе́ Бо́же на́шъ, Иже прему́дры ловцы́ явле́й, низпосла́въ и́мъ Ду́ха Свята́го, и тѣ́ми уловле́й вселе́нную, Человѣколю́бче, сла́ва Тебѣ́.
А вше́дше въ собо́рную це́рковь, поставля́ютъ о́ное мѵ́ро въ сосу́дѣхъ на же́ртвенникъ, и о́крестъ его́ на угото́ванныхъ мѣ́стѣхъ. По се́мъ митрополи́тъ и про́чіи вси́, ста́въ на свои́хъ мѣ́стѣхъ, начина́ютъ часы́.
Егда́ же твори́тся вели́кій вы́ходъ со святы́ми да́ры, а́біе но́ситъ первоіере́й со алава́стромъ, и про́чіе іере́и несу́тъ же мѵ́ро въ сосу́дѣхъ предъ Святы́ми Та́йнами, его́же провожда́ютъ діа́кони отсю́ду и отсю́ду нося́ще рипи́ды, предъиду́щимъ и діа́конамъ съ кади́лами, и иподіа́конамъ со свѣща́ми. И егда́ пріи́дутъ предъ святы́я две́ри, двѣ́ у́бо рипи́ды вхо́дятъ по обы́чаю, ины́я же спряже́нны стоя́тъ до святы́я трапе́зы отъ святы́хъ двере́й отсю́ду и отону́ду. Первоіере́й же, держа́ мѵ́ро, ожида́етъ митрополи́та предъ святы́ми две́рми, и изше́дъ митрополи́тъ, е́млетъ отъ того́ алава́стръ, и поставля́етъ на святѣ́й трапе́зѣ одесну́ю. И та́ко вхо́дятъ Свята́я, по обы́чаю.
Та́же діа́конъ глаго́летъ: Испо́лнимъ моли́тву на́шу Го́сподеви... и про́чая.
Егда́ же рече́тъ митрополи́тъ: И да́ждь на́мъ еди́нѣми усты́... И да бу́дутъ ми́лости Вели́каго Бо́га...
Діа́конъ у́бо стои́тъ молча́ на амво́нѣ. И быва́етъ освяще́ніе мѵ́ра, не затворя́я ца́рскихъ двере́й, та́къ ка́къ и Святы́я Да́ры въ служе́ніи архіере́йскомъ освяща́ются. Митрополи́тъ открыва́етъ свято́е мѵ́ро, и зна́менуетъ то́е три́жды, глаго́ля:
Во и́мя Отца́, и Сы́на, и Свята́го Ду́ха, ами́нь.
И па́ки низхо́дитъ, и протодіа́конъ глаго́летъ: Во́нмемъ.
Другíй же діа́конъ: Го́споду помо́лимся.
И вси́ во олтарѣ́ су́щіи: Го́споди, поми́луй.
Митрополи́тъ же надъ святы́мъ мѵ́ромъ моли́тву сію́ глаго́летъ:
Го́споди ми́лости и Отче свѣ́товъ, отъ Тебе́ вся́кое дая́ніе бла́го и вся́кій да́ръ соверше́нъ дае́тся. Да́руй на́мъ, недосто́йнымъ, благода́ть въ служе́ніе вели́каго сего́ и животво́рнаго та́инства, я́ко да́лъ еси́ Моисе́ю, вѣ́рному Твоему́ слузѣ́, и рабу́ Твоему́ Самуи́лу, и святы́мъ апо́столомъ, и низпосли́ Всесвята́го Твоего́ Ду́ха на мѵ́ро сіе́, сотвори́ е́ пома́заніе ца́рское, пома́заніе духо́вное, жи́зни храни́лище, освяще́ніе ду́шъ и тѣле́съ, еле́й ра́дованія, предте́кшій у́бо въ Зако́нѣ, и возсія́вшій въ Но́вомъ Завѣ́тѣ, и́мже ма́заху царе́й, іере́евъ, архіере́евъ, и проро́ковъ, и всѣ́хъ ба́нею па́ки бытія́ возражда́емыхъ чрезъ апо́столовъ, и су́щихъ по ни́хъ епи́скоповъ и пресви́теровъ додне́сь. Ей, Влады́ко Бо́же Вседержи́телю, покажи́ е́ наше́ствіемъ Свята́го покланя́емаго Твоего́ Ду́ха оде́жду нетлѣ́нія, печа́ть совершеннотво́рную, и на пріе́млющихъ святу́ю твою́ ба́ню, вообража́ющую Боже́ственное Твое́ именова́ніе, и Единоро́днаго Твоего́ Сы́на, и Свята́го Ду́ха, во е́же бы́ти ты́мъ предъ Тобо́ю зна́емымъ, домо́внымъ, гра́жданомъ, рабо́мъ Твои́мъ и рабы́нямъ освяща́емымъ душе́ю и тѣ́ломъ, премѣня́емымъ вся́кія зло́бы и вся́каго грѣха́, избавля́емымъ чрезъ покро́въ оде́жды пречи́стыя Твоея́ сла́вы, и познава́емымъ чрезъ свято́е сіе́ зна́меніе отъ святы́хъ а́нгелъ и арха́нгелъ, и отъ всея́ небе́сныя си́лы, и стра́шнымъ проти́ву всѣ́хъ лука́выхъ и нечи́стыхъ де́моновъ, да бу́дутъ лю́ди избра́нны, ца́рское свяще́ніе, язы́къ свя́тъ, запечатлѣ́нный пречи́стымъ Твои́мъ та́инствомъ си́мъ, Христа́ Твоего́ въ сердца́хъ свои́хъ нося́ще во обита́лище Тебѣ́, Бо́гу и Отцу́, о Святѣ́мъ Ду́сѣ. Яко Свя́тъ еси́, Бо́же на́шъ, и во святы́хъ почива́еши, и Тебѣ́ сла́ву возсыла́емъ, Отцу́ и Сы́ну и Свято́му Ду́ху, ны́нѣ и при́сно, и во вѣ́ки вѣко́въ, ами́нь.
Та́же митрополи́тъ: Ми́ръ всѣ́мъ.
Пѣвцы́: И ду́хови Твоему́.
Діа́конъ: Главы́ ва́ша Го́сподеви приклони́те.
Пѣвцы́: Тебѣ́, Го́споди.
Митрополи́тъ мо́лится та́йно, и чте́тъ моли́тву сію́:
Тебѣ́, Бо́гу всѣ́хъ и Царю́, вы́ю се́рдца благодаря́ще приклоня́емъ, я́ко досто́йныхъ на́съ служи́телей бы́ти Боже́ственнымъ си́мъ сотвори́лъ еси́ Та́йнамъ, и ми́лость проповѣ́дуемъ, ю́же на на́съ оби́льно излія́лъ еси́, и прія́ти освяще́ніе отъ Тебе́, я́ко мѵ́ро на главѣ́, мо́лимъ, зане́ мѵ́ро излія́нное (Пѣсн. 1, 2), и́мя Единоро́дному Твоему́ Сы́ну, Христу́ Бо́гу на́шему, въ не́мже благоуха́ется ве́сь ви́димый и неви́димый мíръ. Ты́ бо еси́ покланя́емый и прославля́емый, и Тебѣ́ сла́ву и поклоне́ніе возсыла́емъ, Отцу́ и Сы́ну и Свято́му Ду́ху, ны́нѣ и при́сно, и во вѣ́ки вѣко́въ, ами́нь.
Та́же, зна́менавъ па́ки то́е свято́е мѵ́ро три́жды, покрыва́етъ покро́вомъ въ сосу́дѣхъ.
Пото́мъ діа́конъ глаго́летъ ектенію́: Вся́ святы́я помяну́вше...
Рипи́ды же стоя́тъ до: Да испо́лнятся уста́ на́ша...
А по́слѣ оконча́нія литургíи, изно́сятъ свято́е мѵ́ро протопо́пъ со свяще́нниками въ сѵнода́льную сосудохрани́тельницу, и поставля́ется на угото́ванномъ мѣ́стѣ.
И, изходя́ще изъ собо́ру, пою́тъ псало́мъ 44:
Отры́гну се́рдце мое́ [сло́во бла́го, глаго́лю а́зъ дѣла́ моя́ Царе́ви, язы́къ мо́й – тро́сть кни́жника скоропи́сца. Красе́нъ добро́тою па́че сыно́въ человѣ́ческихъ, излія́ся благода́ть во устна́хъ Твои́хъ, сего́ ра́ди благослови́ Тя́ Бо́гъ во вѣ́къ. Препоя́ши ме́чь Тво́й по бедрѣ́ Твое́й, Си́льне. Красото́ю Твое́ю и добро́тою Твое́ю, и наляцы́, и успѣва́й, и ца́рствуй и́стины ра́ди, и кро́тости, и пра́вды, и наста́витъ Тя́ ди́вно десни́ца Твоя́. Стрѣ́лы Твоя́ изощре́ны, Си́льне, лю́діе подъ Тобо́ю паду́тъ въ се́рдцы вра́гъ царе́выхъ. Престо́лъ Тво́й, Бо́же, въ вѣ́къ вѣ́ка: же́злъ пра́вости, же́злъ Ца́рствія Твоего́. Возлюби́лъ еси́ пра́вду и возненави́дѣлъ еси́ беззако́ніе: сего́ ра́ди пома́за Тя, Бо́же, Бо́гъ Тво́й еле́емъ ра́дости па́че прича́стникъ Твои́хъ. Сми́рна, и ста́кти, и кассíя отъ ризъ Твои́хъ, отъ тя́жестей слоно́выхъ, изъ ни́хже возвесели́ша Тя́. Дще́ри царе́й въ че́сти Твое́й. Предста́ Цари́ца одесну́ю Тебе́, въ ри́захъ позлаще́нныхъ одѣ́яна, преиспещре́на. Слы́ши, Дщи́, и ви́ждь, и приклони́ у́хо Твое́, и забу́ди лю́ди Твоя́ и до́мъ отца́ Твоего́, и возжела́етъ Ца́рь добро́ты Твоея́: зане́ То́й е́сть Госпо́дь Тво́й, и поклони́шася Ему́. И дщи́ Ти́рова съ да́ры, лицу́ Твоему́ помо́лятся бога́тіи лю́дстіи. Вся́ сла́ва Дще́ре Царе́вы вну́трь, ря́сны златы́ми одѣ́яна и преиспещре́на. Приведу́тся Царю́ дѣ́вы въ слѣ́дъ Ея́. Искреннія Ея́ приведу́тся Тебѣ́, приведу́тся въ весе́ліи и ра́дованіи, введу́тся въ хра́мъ Царе́въ. Вмѣ́сто оте́цъ Твои́хъ бы́ша сы́нове Твои́, поста́виши я́ кня́зи по все́й земли́. Помяну́ и́мя Твое́ во вся́комъ ро́дѣ и ро́дѣ. Сего́ ра́ди лю́діе исповѣ́дятся Тебѣ́ въ вѣ́къ и во вѣ́къ вѣ́ка].
А отъ сѵнода́льнаго ри́зничнаго раздае́тся о́ное свято́е мѵ́ро по приказа́ніямъ Святѣ́йшаго Прави́тельствующаго Сѵно́да ту́не.
Рее́стръ подлежа́щимъ къ мѵроваре́нію соста́вамъ:
Ма́сла деревя́ннаго, бѣ́лаго прова́нскаго – два́дцать три́ пу́да; вина́ виногра́днаго, бѣ́лаго – се́мь ве́дръ; стира́ксы жи́дкой – оди́нъ пу́дъ;росна́го ла́дону, сіа́мскаго – трина́дцать фу́нтовъ; гу́мны, ла́дону че́рнаго – ше́сть фу́нтовъ; ла́дону проста́го, бѣ́лаго – ше́сть фу́нтовъ; ро́зовыхъ цвѣто́въ – оди́ннадцать фу́нтовъ; травы́ бази́лику – пя́ть фу́нтовъ; кардамо́ну – ше́сть фу́нтовъ; фіа́лковаго ко́рня – оди́ннадцать фу́нтовъ;имби́рнаго ко́рня – ше́сть фу́нтовъ; калга́ннаго ко́рня – пя́ть фу́нтовъ; и́рного ко́рня – пя́ть фу́нтовъ; масти́ки, са́мой бѣ́лой – трина́дцать фу́нтовъ;сандара́ку – три́ фу́нта; терпенти́ну венице́йскаго – пятна́дцать фу́нтовъ; бальса́му че́рнаго, перувіа́нскаго – де́сять фу́нтовъ; ма́сла мушка́тнаго густа́го – во́семь фу́нтовъ; ма́сла мушка́тнаго жи́дкаго – со́рокъ во́семь золотнико́въ; ма́сла кори́чневаго – со́рокъ во́семь золотнико́въ; ма́сла богоро́дской травы́ – шестьдеся́тъ золотнико́въ; ма́сла ро́зоваго – шестьдеся́тъ золотнико́въ; лигниро́дійнаго ма́сла – со́рокъ во́семь золотнико́въ;ма́сла помера́нцоваго, изъ цвѣто́въ – со́рокъ во́семь золотнико́въ; ма́сла маера́ннаго – со́рокъ во́семь золотнико́въ; ма́сла левенду́ловаго – девяно́сто золотнико́въ; ма́сла размари́ннаго – девяно́сто золотнико́въ; ессе́нціи баргамо́тъ – со́рокъ во́семь золотнико́въ; це́дры лимо́нной [ма́сла лимо́ннаго] – оди́нъ фу́нтъ де́сять золотнико́въ.
А каки́мъ поря́дкомъ о́ное все́ составля́ть, и что́ въ кото́рый де́нь въ мѵрова́рныя котлы́ полага́ть, о то́мъ значи́тъ ни́же сего́.
А и́менно:
Пе́рвое.
Изъ вышепи́саннаго деревя́ннаго ма́сла отдѣля́ се́мь пу́дъ, а изъ вина́ виногра́днаго два́ ведра́, и положа́ во особли́во угото́ванный коте́лъ, на Крестопокло́нной недѣ́лѣ свари́ть и, простудя́, нали́ть въ ба́нки, слѣ́дующія соста́вы истолча́ ме́лко:
Стира́ксы – оди́нъ пу́дъ; росна́го ла́дону, сіа́мскаго – трина́дцать фу́нтовъ; ро́зовыхъ цвѣто́въ – оди́ннадцать фу́нтовъ; гу́мны, ла́дону жъ че́рнаго – ше́сть фу́нтовъ; да ла́дону проста́го, бѣ́лаго – ше́сть фу́нтовъ; травы́ бази́лику – пя́ть фу́нтовъ; кардамо́ну – ше́сть фу́нтовъ; фіа́лковаго ко́рня – оди́ннадцать фу́нтовъ; имби́рнаго ко́рня – ше́сть фу́нтовъ; калга́ннаго ко́рня – пя́ть фу́нтовъ; и́рного ко́рня – пя́ть фу́нтовъ.
И пото́мъ поста́вя все́ о́ное, въ тѣ́хже ба́нкахъ, въ те́плое мѣ́сто на двѣ́ недѣ́ли. А по проше́ствіи дву́ недѣ́ль, о́ное ма́сло изъ ба́нокъ сли́ть въ сулеи́, гу́щу вы́жавъ отъ стира́ксы, полови́ну то́й гу́щи отдѣли́ть, про́чее все́ въ тѣ́хже ба́нкахъ нали́ть вино́мъ виногра́днымъ по пропо́рціи, и изъ ни́хъ, по проше́ствіи четы́рехъ дне́й, съ одни́хъ то́лько тра́въ и цвѣто́въ вино́ сли́ть въ сулеи́, а стира́ксу и ла́донъ въ винѣ́ оста́вить, въ тѣ́хже ба́нкахъ.
Второ́е.
Въ Вели́кій понедѣ́льникъ, при начина́ніи мѵроваре́нія, въ мѵрова́рныя котлы́ вли́ть все́ вышепока́занное оста́вшееся деревя́нное ма́сло, шестна́дцать пу́дъ, да виногра́днаго вина́, ненасто́яннаго положи́ть по пропо́рціи, и вари́ть.
Тре́тіе.
Въ Вели́кій вто́рникъ, во о́ныя жъ котлы́ полага́ется еди́но виногра́дное вино́ по пропо́рціи жъ, и вари́тся. Къ тому́ въ котлы́ полага́ется стира́кса изъ ба́нокъ и про́чія вещества́, на кото́рыхъ ма́сло наста́ивалось со среды́ Крестопокло́нной; та́кже ва́рится масти́ка и сандара́къ, напере́дъ мѣ́лко истолче́нные.
Четве́ртое.
Въ Вели́кую сре́ду, въ о́ныя жъ котлы́ полага́ется ма́сло, сли́тое на шесто́й недѣ́лѣ, съ веще́ствъ, ва́ренныхъ на Крестопокло́нной недѣ́лѣ, все́ безъ оста́тку, да ктому́жъ во вре́мя варе́нія кладе́тся, смотря́ по пропо́рціи, и вино́ виногра́дное, и вари́тся.
А по сли́тіи всего́ о́наго изъ мѵрова́рныхъ котло́въ, во особли́во угото́ванный коте́лъ, и по простуже́ніи полага́ется въ то́тъ сваре́ный мѵ́ръ вышепи́санные благово́нные ма́сла, та́кже, бальса́мъ перувіа́нскій, терпенти́нъ и ма́сло мушка́тное густо́е, распу́щенные въ насто́янномъ стира́ксовомъ ма́слѣ все́ безъ оста́тку.
Чи́нъ мѵроваре́нія. – М.: Въ Сѵнода́льной Тѵпогра́фіи, 1894. – 12 л.