Сказание об Иуде предателе

Сказание неложно от мужа праведна и свята. западния церкве. великаго учителя Иеронима. о Июде Предатели бывшем Господа нашего Иисус Христа.

(Из рукоп. Солов. библ. XVII в., в лист, «Великое Зерцало» № 240-й, лист. 238–240)

Бысть некий муж во Иерусалиме именем Рувим иже инако именовашеся Симон, от колена Данова, неции глаголют от колена Исахарова. Сей Симон имеяше жену именем Цыборию. И беста во едину нощ с собою. Зачат Цыбория сына. и уснувши сон виде. и воспрянувши страхом велиим одержима. со воздыханием и сетованием мужу своему начат поведати глаголя: видех ся рече рождьши сына зело злаго. иже явися всему роду нашему виною погибели. К ней же муж рече: пустошная и слышания недостойная глаголеши. лукавый бо дух устраши тя. К нему же жена: аще, рече, немедлевши зачну во чреве и рожду сына. без всякаго усумнения. не лукавый дух устраши мя. но токмо есть откровение истинно. И абие в то время зачат во чреве. Приспевшу же времени рождения. родися им сын. и бояхуся зело о нем. И что бы ему сотворили. мышляху в себе глаголюще: убили быхом сына наю ужасно есть. такожде и питати губителя рода своего и се не безбедно есть. Абие же написавши на хартии имя ему Июда купно с ним вложиша в ковчежец. и на море пустиша. Сего волны морския во остров нарицаемый Искариот принесоша. и от сего острова Июда Искариотский наречеся. Сего острова жена царева не имеяше чад. сия в то время изыде к морю утешитися. и видевши ковчежец влающийся при брегу моря. повеле и взяти и отверзти. хотя видети бывшее. И обрет в нем отроча красно. И воздохнувши в себе рече: увы мне неплодней! хотела бых и аз таковое имети чадо. да не останет тще без наследия царство мое! И сего ради тай повеле отроча сие доити. и себе быти непраздну лестно рече. по сих и родити младенца солга. И во все ея царство. слава велия изыде о сем яко царица роди сына. Муж же ея царь яко не знаяше о сем. в правду сие вменяше. радовашеся зело сына ради рождьшагося. И вси людие его с ним ликоваху. Сие отроча по чину царскому и благолепию питати царь повеле. Не по мнозе же времени царица заченши вправду от семени мужа своего во время свое сына породи. Егда же оба младенца подростоша. многажды бяху с собою. и Июда сына царева многажды уничижающи бияше. и множицею плакати отроча творяше. Царица же сие видя зело скорбяше на Июду. множицею биюще его. знающи, яко несть сын ея. По времени же не мале не утаися неправде дело, но яве всем открыся. яко Июда несть сын царев. но на море обретеся. Сие же Июда ощутивши. устыдеся зело и брата своего мнимаго сына царева тай убив. Оубоявши же ся надлежащия себе беды. да не и сам того ради убиен будет. гонзну убежати во Иерусалим с теми иже дань отдаяти несоша. И прилепися к слугам Пилата. бывша в то время игемона Иерусалимляном. И понеже вещи подобны себе удоб смеситися могут прииде к Пилату. и угоден ему бысть. Пилат же увиде Июду. яко нравом подобен ему. прият его в дом свой не по мнозе же времени начат зело любити его. И сотвори и старейшину и строителя дому своему. и вси слуги от мала даже и до велика послушаху его. Случи же ся во един от дней. Пилат взираше из дому своего на некий сад. не далече сущу сему от двора его. и виде в нем яблоки зело доброзрачны от нихже желаше ясти. Сей сад бяше Рувима отца Июдина. Июда же Рувима незнаяше такожде Июды Рувим не знаяше. яко сын ему бе. Но сие токмо мняше. и всегда в сердцы своем помышляше Рувим. яко сын его с ковчежцем потопе в мори. И Июда же отнюд не знаяше. кто есть отец его. и мати рождшая и. и где есть отечество его. По сем призвав и Пилат к себе и рече: сице желает душа моя плода вкусити от сада онаго. аще не снем от него смертию умру. Июда же слышав се слово тече скоро в сад и нача угодные ему яблоки урывати. По случаю же в то время прииде Рувим и виде Июду в своем саде яблока порывающа. разгневася нань зело. И друг другу начаша поношати и бранитися по сих битися. Един единому одолевающи последи же Июда взем камень и удари Рувима по выи и уби язвою смертною отца своего. Яблока же вземши принесе к Пилату. и вся приключившаяся ему возвести. Егда же к вечеру бысть надшедши нощи. Рувим в саде своем обретеся мертвый. и вси глаголаху напрасно⁴⁰⁶ сиречь. смертию нечаемою сему умрети приключися. Некоему же времени минувшу. вдаст Пилат все имение Рувима и Циборию. жену его. матерь Июдину. за жену. Июде возлюбленному отроку своему отдаде. Во един же от дней Цыбория тяжко сетующи воздыхаше. Муж же ея Июда. что ей бысть. прилежно о сем испытоваше. Рече же к нему жена: увы мне! всех жен аз окаяннейша. ибо отроча сына моего ввергох в море. мужа моего напрасно умерша обретох. Пилат же приложи ми, люте озлобленной, слезы к слезам. тебе мя совокупив и многим насилием за жену предаде. И егда сия вся о детищи своем изрече Цыбория. Июда такожде приключившаяся ему возвести. ей о всем. И тако обретеся Июда матерь свою привел себе во жену и живяше с нею. и отца своего уби. Сего ради, кающися по совету Цыбории, матере и жены своея, прииде к Господу нашему Иисус Христу. учащу в то время. и вся недужные исцеляющу во всей Иудеи. и прощения от него о гресех своих сподобися. Сего Господь по недоведомых божественных судбах своих. тако возлюби. яко и на апостольство себе избра. и попечение ему о себе. и о прочиих апостолех. еже к требованию телесному. испоручи. он бо ковчежец имеяше и вметаемая Христова в милостыню ношаше. Той же по сих, бысть и предатель Господу и Владыце своему. Сей скорбяше и во время страсти Господни о мире. яко могущее на трех сот пенязь продатися. и датися нищим в требование. не продано бысть. но туне пролияно на главу Христову. не яко бо о нищих печашеся. но яко тать бе. по писанию святаго Иоанна Евангелиста. в главе. 12. Сего ради шед предаде Господа Иисуса иудеом. на 30 сребреницех. иже кождо в себе содержаще 10 пенязей. пенязь же имеет в себе 10 грошей полских. и тако тщету мира трехсот пенязей наполни себе или яко инии глаголют: иже всего того еже Христу приношашеся. от сих десятую часть всегда крадяше. и того ради за десятую часть. еже погуби в мире многоценном. сиречь за 30 сребренник Иисуса продаде. ихже посем раскаявся жидом паки вспят возврати. и повергши сребренники в церкви шед и на древе обесившися удавися. и проседеся посреде излияся вся утроба его. Подобаше бо чреслом раздратися и утробе всей излиятися. в ней же зачатся и родися ков. и предателство на Господа своего. Належаше же, и ужем срамотным завязатися гортани его. отнюдуже изыде сложение цены бесценнаго Господа и слово лукаво. Добре сеи на воздусе погибе. иже ангел и человек оскорби. от предел ангельских и человеческих изгнану. нигде инде токмо на воздусе с демоны сему водворятися и погибнути належаше. Нас же чтущих и слышащих сие беззаконное его житие и деяние от таковаго злаго нрава сохрани всех Христе Боже наш. и сподоби небесному царствию твоему славимый со Отцем и Святым Духом во веки. Аминь.