Слово в великую субботу Св. Епифания, архиепископа Кипрского

(Из ркп. Солов. библ., Ефрема Сирина поучения и Иоанна Лествичника, под № 168, лист. 288–300)³⁸⁸

Иже во святых отца нашего Епифаниа архиепископа Кипрскаго. слово в святую великую суботу. о погребении тела Господа нашего Иисуса Христа. и о Иосифе. иже от Аримафеа. и о Никодиме. и о успении Господа нашего Иисуса Христа гробнем. по спасительнои страсти дивне бывшую³⁸⁹.

Что се днесь безмолвие много на земли. что се безмолвие много и молчание много. Безмолвие много, яко царь спит. Земля убояся и умолче. яко Бог в плоти успе. Бог в плоти успе. и ад ужасеся. Бог в мале успе. и спящаа от века от ада воскреси. Где ныне вчерашниа молвы и гласи и говори бывающии на Христа от законопреступник. Где народи и кови и чини. и оружиа. и дреколиа. Где царие и священници и судиа осуженныа. Где свеща и мечи. и говори безсчисленнии. Где людие и шатаниа и собор неправедный. Воистинну убо, зело воистину люди поучишася тщетным и суетным. поткоша бо ся о краеуголныи камень Христа. и сами сокрушишася. Приврьгошася в твердый камень. но пены влъны их разыдошася. Поткошася о наковале непобедимем. но сами сотрени быша. Вознесоша на древо камень и сошед умертви я. связаша великаго Сампсона солнца Христа. но разреши вечныа узы. иноплеменники и законопреступники погуби. Заиде Бог солнце Христос под землю. и тму премрачную июдеом сотвори. Днесь спасение сущим на земли. и от века сущим под землею. днесь спасение всему миру. елико видимых и елико невидимых. Сугубо днесь пришествие Господне. сугубо смотрение. сугубо человеколюбие. сугубо снитие вкупе же и смерение. сугубо человеком посещение. От небесе на землю, от земли под землю. Бог приходит. врата адова отверзаются, иже спящии от века радуитеся. седящеи в тме и сени смертне великыи свет приимете. С рабы Господь. с мертвыми Бог. с умершими живот. с повинными неповинный. с сущими в тме невечернии свет. с пленеными свободитель. с преисподними иже превышнии небес. Христос на земли веровахом. Христос в мертвых. с ним снидем. да увемы тайны яже тамо. яко ту да разумеем Божию таину под землею. и чудеса да увемы. научимся, како сущим в аде просветил есть проповедь. Что убо, вся ли тако просто спасает явлься в аде Бог? Ни, но и ту верующая. вчера яже смотреливнаа творя. а днесь владычняа. вчера плотскаа. а днесь господьскаа делаа. вчера человеческаа. а днесь божественаа являет. вчера за ухо ударен бываше. а днесь же блистанием божественым адово жилище бьет. вчера связан бываше. а днесь же блистанием божественым связает губителя. вчера слуги Пилатовы ругахуся ему. днесь вратници адови видевше того исчезоша. Но убо услыши о христовнеи муце вышшее слово, услыши и воспои, слыши и прослави, слыши и проповеждь Божиа велиа чудеса. како закон отступает. како благодать процветает. како образи мимоходят. како истинна проповедается. како сень мимоходит. како солнце вселенную исполняет. како ветхыи закон обетша. како новыи извещается. како древняа преидоша. како новаа процветоша. Двои людие в Сионе во времени христовнеи муце. приидоша евреисти же купно и поганьстии. два царя Пилат и Ирод. два архиереа Анна и Каиафа. да обе пасце вкупе будета ова престающиа. христова же начинающиа. две жрътве в тъ вечер деастеся. понеже и спасение глаголю живым и мертвым бывааше. Июдеи убо связующа агнец закалааху и жряху. а иже от язык в плоти Бога. и ови в сень взирааху. овии же к солнцу и к Богу притекааху. и овии убо связавше Христа отринуша. А иже от поган единодушно его приимаху. и овии скотную жрътву. овии же боготелесную жрътву приношаху. Но Июдеи исхожение (из) Египта поминаху. а иже от поган избавление от прелести проповедаху. И се где. в Сионе граде царя великаго, в немже сотвори спасение посреде земля. посреде двема животома познан бысть. Иисус Сын Божии посреде Отцу и Духу обема животома живот от живота истинен живот являашеся. посреде ангел и человек в яслех ражаася. и посреди двоих люди камень краеуголныи лежа. и посреде закона и пророк вкупе проповедаем. и посреде Моисиа и Илии на горе являася. и посреде обема разбойникома Бог разумному разбойнику являася. и посреде настоащеи жизни и грядущеи. судии вечныи седя. и посреде днесь живых и мертвых являася. сугубу пакы жизнь дает. сугубо родство. вкупе и порожение. И слышав речи Христова сугубаго рожества вещи. и въсплещи чудеса. ангел Марии матери Иисусове рожество его благовествова. и ангел Марии Магдалыни. еже по рожении его от гроба востание благовествова. нощию Христос в Вифлеоме ражается. нощию же пакы воскрес из мертвых. пораждается в Сионе. вертеп же камень идеже Христос родися. вертеп камень идеже Христос распятся. пелены бо в рожество приат. пеленами же и зде распятся. змирну рожесь приат. змирну же и погребение и алои приат. тамо Иосиф безмужныи муж Мариин. зде же Иосиф иже от Аримафеа. В Вифлеоме в яслех рожество но и в гроб яко в ясли место. Прьвии пастырие благовестуют Христово рожество. но и прьвие всем пастырие Христови ученици. благовестиша Христово из мертвых воскресение. Ту радуися ангел Девеи възопи. зде же радуитеся великому совету ангел Христос женам вопиаше. В прьвое рожество Христос. по 40 тех днех. вниде в земныи Иерусалим в церковь. и принесе яко прьвенец два горличища Богу. но и по рожестве его еже от мертвых Христос. по 40 тех днех взыде в вышний Иерусалим, отнюдуже не разлучися в истиннаа святаа святым. Яко прьвенец неистленен из мертвых и приведе Богу и Отцу два горличища. душу и плоть нашу. егоже приат. яко Симеон некий Ветхыи деньми Бог яко в руце свои. в своих ядрех неописанных. Аще ли ветьвьски³⁹⁰ се неверно слышиши. обличают тя недвижими печати Господьскому поражению Христову гробу. яко бо знаменаном печатем девственым Христос от Девы родися. тако неотврьстым сущим гробным печатем Христово воскресение бысть. Како же в гроб и когда от кыих Христос жизнь полагается. святых словес послушаим. Позде же бывшу, рече. прииде человек богат именем Иосиф. сеи дръзну вниде к Пилату и проси от него тела Иисусова. Вниде к человеку человек проси приати человека. Бога человеком прошаше же берьнии и у берниа. приати зижителя всем, сено от сена. приати небесныи хлеб. капля мала от капля приати бездну. Кто виде или кто слыша. где когда человека человеку творца человеком. дарствующа. безаконник. праведника и творца законом. обещевается дарьствовати. судии осужен яко осужена судию судиам в погребение дает. Позде бывшу, прииде человек богат именем Иосиф. Воистину богат всесложеное тело Господне приат. воистинну богат, яко сугубую сию Христову от Пилата приемлет благодать. и богат яко безсценнаго бисера достоин бысть приати. въистинну бысть богат, влагалище бо понесе полно божественаго богатьства. Како бо не богат Иосиф. всему миру жизнь и спасение стяжав. како бо не богат Иосиф. дар прием питающаго вся. и всем обладающа. Позде же бывшу. бе бо уже зашло в ад праведное солнце. темже человек прииде богат. именем Иосиф от Аримафеа. иже бе крыяся страха ради июдеиска. прииде же и Никодим пришедый к Иисусови нощию. Таиныи таинам потаеныи два потаена ученика. скрыти Иисуса в гробе грядета сокровеную в аде таину. потаенна плотию Бога. и своим сокровением учаше. друг друга преспеваа в Божию любовь. Никодим бо змирну и аллои щедрыи. а Иосиф же дръзновение. еже к Пилату с восхвалением. се бо всяк страх отверг. дръзну вниде к Пилату. прося тела Иисусова. И вшед премудро отнуду начат. да возлюбленнои мысли не погрешит. темже не зачинает к Пилату великими речми некими. да не в гнев сего раздраж отпадет прошения. ни глаголет к нему: дай же ми тело Иисусово. омрачившаго солнце преже мала времени. и камение раздробльша и землю потрясша. и гробы отверзшаго. и катапетазму церковную раздравша. ничтоже к Пилату таковаго глаголет. но что прошение некое мало прося рек: о судии, отнуд мала прося к тебе пришед. дай же ми тело мертво на погребение оного осуженнаго тобою. Иисуса Назореа. Иисуса нищаго Иисуса безхрамника. Иисуса сего висящаго нага смеренаго. Иисуса тектонова сына. Иисуса узжника. Иисуса окровавленнаго. странного Иисуса. и в странных незнаема. Иисуса сего неведомаго. и удобь небрегомаго всеми и висящаго. Дай же ми сего Назореа страннаго от далечня або страны прииде зде. да спасет страннаго. дай же ми сего страннаго. тъ бо есть един странен. дай же ми сего страннаго. емуже страны несвемы страннии. дай же ми сего страннаго. емуже места и жилища несвемы страннии. дай же ми сего страннаго. сниде бо в темнаа возвести страннаго. дай же ми сего страннаго, емуже отца не знаем страннии. дай же ми сего страннаго. жившаго странно житие в странных. дай же ми сего страннаго. сему же рожества не свемы страннии. дай же ми сего волнаго странна неимущаго нигде главы подклонити. дай же ми сего страннаго в странных яко странна безхрамника. от ясли яко странна от Ирода бежавшаго. дай же ми сего страннаго. бежавшаго от самех пелен. в Египет. иже ни града ни веси ни храма ни обители. ни рода имать, но в чужеи стране с материю имяше житие и содржаща всяческаа. Дай же ми, о игемоне, сего висящаго нага на древе. да покрыю покрывшаго наготу моего состава. дай же ми сего мертваго и Бога да покрыю покрывшаго моа безакониа. дай же ми сего мертваго да погребу погребшаго в Иордани моя грехи. О мертвем молю от всех обиду приемшу. от друга предану бывшу. от ученика продану. от братиа изгнану. от своих раб за ухо ударену. о мертвем молю осуждену бывшу. от осужденых им от работы избавльшему я. от приимших от него пищу. оцта напоену. от исцелевших от него язву приемшу. от ученик оставлена. от своеа матере лишену. О мертвем, о Пилате, молю на древе висящу. несть бо сему отца на земли. ни друг кто ныне. ни ученик ни ужика ни погребатель. но сам един единому единороден в всем мире Бог и ин никтоже. Сим же от Иосифа к Пилату реченым. повеле Пилат вдати ему пресвятое тело Иисусово. И пришед на Голгофино место. снят Бога в плоти от древа. и полагает на земли в плоти Бога нага. но ни паки нага. И видит лежащ низ. возведшаго вся горе. и бывает вмале без духа. жизнь всех и дух и видит без очию. создавшаго многоочителнаа. и лежит в знак воскресение всем. и умерщвлен бывает Бог в плоти воскрешаа и мертвыа. и млъчит в плоти гром Божию слову. и воздвижен бывает дланьми содержаи всю землю рукою. Темже убо, о Иосифе, испросивши и прием, веси ли кого убо приат. приступль к кресту и снем Иисуса. веси ли кого понесе. аще убо веси. егоже дръжиши. ныне бысть богат. како же убо Божию телу сему страшному. твориши погребение. похвалена убо есть ти любы. но паче похваление души твоей дръзновение. убо не трепещеши ли уже. на руку нося. егоже трепещут херувимы. коею бо дръзостию божественеи плоти той совлачеши лентии. кацем же благоговением. приат очи трепеща взирати и открыти тела Богу. смирившуся волею. темже убо рци ми о Иосифе. И к востоку яко мертва погребаеши Иисуса. востока востоком. уже бо и своима прьстома. яко мертву Иисусови затворяеши очи. отврьзшему своим прьстом слепому очи. убо же и уста смыкаеши отверзшему уста гугнивому. уже бо и руце слагаеши простръшему усохшиа руце. или по закону нозе мертвых вяжеши. давшему хождение недвижимому ногама. убо и на одре восклоняеши повелевшаго ослабленому жилами: возми одр свои и ходи. убо и хризму возливаеши и небеснеи хризме пролиавшися и весь мир освящьши. ибо крови текущи из язвы Божию телу. смееши истискати ю. исцелившему кровоточивую Богу убо и водою омываеши тело Богу. измывшему вся. и очищение давшу. Киа же убо и свеща вожжеши истинному свету просвещьшему всякого человека. киа же и воспоеши погребению песни. приемлющему присно от небесных сил песни. убо и слезы испущаеши яко над мертвым прослезившемуся и мертва Лазаря воскресившу. уже бо и плач твориши давшему радость всем. и скорбь от Евги отъемшу. Обаче блажу руце твои. о Иосифе. послужши. и осягши и еще кровь пущающу Божию Слову и свесть руце и нозе. блажу руце твои прикоснувшиися божественым ребром. преже Фомы невернаго. верна же и похвалена опасива. блажу уста твоа без сытости насыщшася. и приложша к устом Иисусовем. и Духа Свята оттуде наполньшимся. блажу очи твои приложьшиися Иисусовема очима. и свет истинный оттуде приемшиим. блажу лице твое приложшемуся к лицу Божию. блажу раме твои понесши носящаго всяческаа. блажу главу твою в неиже прикоснуся Христос глава всем. Блажу Иосифа и Никодима. быста бо преже херовим. херовима Бога на себе носяща. и преже суща быста. преже шестокрыльных Богу слузе быста. не крылы. но плащаницею Бога покрывше и почетше трепещут. сего Иосиф и Никодим носиста на раму с свободою. яко и вси бесплотных чини с нима носят. Идеже бо Иосиф и Никодим. не ту ли собрашася весь божиих ангел народ. и варяют херувимы и притекают серафимы. и с ними носят престоли. и покрывают шестокрылнии. и трепещут многоочитаа видящи Иисуса в плоти без очию. и покрывают силы и поют владычства. и трепещут чини и дивятся ужасающиися к себе. И стязающися в себе и недоумеющи. глаголют. что се странное слово и боязнь и трепет и ужас и образ. что се великое и преславное и непостижимое и дивное чудо. невидимый нам бесплотным выспрь Бог. низу человек мертв и наг видим удобь. емуже предстоят херувими с благоговением. и сего Иосиф с Никодимом. погребаета без сомнения. когда сниде не оставль вышняа. како изыде сыи внутрь. како на землю прииде. исполняа всяческая. како сниде. не чувшу ни единому. сыи выспрь с отцем. яко Бог неоскуден. доле смертию яко человек воистинну неоскуден. неявлеися нам нигде же человек яко человек. вкупе же и человеколюбец явися. како невидимыи виден бывает. како бесплотныи воплотися. како немучимыи муку приат. како судии на судищи ста. како живот смерти вкуси. како в гроб невместимыи вмещается. како обита в гробе неоставлеи престола отча. како в врата врьтпа входит. не овръзыи врат небесных. но врата раю отверз. а врат девственых не отврьз. но врата адова сокрушь. и двери при Фоме не отверз. но врата царствиа человеком отврзе. и врата гробнаа и печати неврежены сохраняа. како же в мертвых причитается свободь быв в мертвых. како свет безмрачныи. в темных и сени смертне приходит. камо грядет. и камо сходит. егоже удръжати смерть не может. Что есть слово. что коварство. что есть смысл снитию его. еже в ад. Негли Адама связана и нам креврета возвести. сходит воистинну прьвозданнаго овчати погибшаго взыскати грядет. убо и седящих в тме и сени смертнеи посетити хощет. ибо плененаго Адама и плененую Евгу от страсти разрешити грядет. яко Бог и сын има. Но да снидем с ним. но да с ним ликоствуем. но да взыграемся. да потщимся. но да проводим. но да воспоем. но да подвигнемся Богу. пременение к человеком видяще. и связанем отпущение от блага Господа бывающе. грядет бо и святыи человеколюбец извести вечныа ужники. мужеством и со областию великою. живущаа в гробех. яже умучи обидливыи непобедимый мучитель. и от Бога яко противник украд и собра живущая выспрь. Ту бо связан Адам созданыи преже и умерыи. преже всех связан в преисподних. ту Авель пожрен преже и пръвыи праведник. пастырь Христу пастырю. в образ быв неправедному заколению. ту Ное. Христов образ велиему ковчегу. Божии церкви зижитель. спасши жестосердыа вся языки от потопа нечестиа голубем. Святому Духу темнаго врана диавола из неа изгнавши. ту Авраам праотец Христу жрец. иже божественную жрътву Богу пожерл есть. ту связаный Исаак. связаны преже от Авраама. в Христов образ. ту Иаков низу. опечален сыи преже и оскорблен за Иосифа выспрь. ту Иосиф свазан бывши в Египте в образ Христов в темници связан и владыка. ту Моиси в темных низу. якоже бе в крабици выспрь в темных. ту Данил в гробе преисподнем адове. ту Иеремиа яко в рове тимениа. в адстем гробе и смертнем тлении. ту в чреве адсте лежит Иона в образ Христу. вечному и превечному Ионе. живущему в веки и в веки веком и на веки. и еще ту Давид отец Божии, из негоже родися по плоти Господь. И что глаголю Давида и Иону и Соломана. Ту сам Иоанн великыи болии всех пророк, яко в темных ложеснах Христа проповедает гробным всем сугубыи предтеча, и проповедник живым и мертвым. посланыи от темница Иродовы в темницу душевную адову. умръшим о века праведником. Пророци же и праведници вси. молитвами присно непрестающими Бога оттуду моляху избавления просящи прескръбного того и умилена. обладания вражиа и омраченна претемнаго мрака. И ов от них глаголаше к Богу: из чрева адова вопль мои. и услыши глас мои. ов же из глубины возвах к тебе Господи. Господи услыши глас мои. и другии: просвети лице свое. и спасени будем. и ин: седяй на херувиме явися. воздвигни силу твою и прииди, да ны спасеши. и другии: скоро да варяют ны щедроты твоя Господи. и другии: избави душу мою от ада преисподняго. и ин: Господи возведи от ада душу мою. и другии: не остави душа моеа во аде. и ин: да изыдет от истлениа живот мои к тебе Господи Боже мои. Сиа же вся услышав прещедрыи Христос. смотрив не токмо умрьшим при нем и по нем. дати свое человеколюбие. но и дръжимым от ада преже пришествиа его. и седящим в тме и сени смертнеи. Темже убо в плоти сущаа плотию одушевленою Бог и Слово посетил есть. душа же безплотны суща божественою пресвятою своею душею и в аде явлься. просветил есть плоти а не божества разлучена сущи.

Темже потщимся мыслию в ад идем. да видим како ту тогда дръжавою крепкою отнюдь дръжит держащаго мучительство и воины. всяческим своим блистанием. не умирающим онем полком чины без руку вяжет двери бездворныа. взем от среды и врата бездверныа крестом Христос. и гвоздьми вереа вечныа сокруши и сломи. и узами своима рукама ему. нераздрушимаа ужа железная яко воск. раствори. и копием пронзившим божественаа ребра бесплотное сердце мучителево пронзе. ту сокруши дръжаву луком ему. егда крест яко лук божиама рукама. узами яко тетивою наляче. Темже аще безмолствием в след Христа идеши. и ныне видиши. где убо мучителя связа. где главу его въстъче. како же темницу его раскопа. како же связаныа изведе. како змиа попра и где клятву обеси. како же Адама свободи. како Евгу воскреси. како посреднюю стену разори. и где лютаго змиа осуди и како непобедимыа победы постави. како смерть умертви. и како нетление истли. и человека постави в прьвыи владычьскии сан. Отметаа убо вчера владычьскы легионы ангелом. и глаголя Петрови, яко могу ныне пред собою поставити боле 12 легионы ангелом. днесь боголепно вкупе же и храборьскы и владычьскы находит на ада и на смерть и на мучителя смертию смерти. и безплотные безплотным воином и чином невидимом. не 12 токмо легиона. но и тмы тем и тысяща тысящам имея ангелом. и архангелам. властем и владычьствиам. силам и престолом. шестокрылатым и многоочитым небесным чином приводяща. яко своего Господа и царя и дары приносяща и поющи Господа. не пособиа творяще. не достойно бо есть се Богу (ни)которых пособии требует всемогыи Христос. но по длъгу почести с любовию присно своему Господу выну предстоати и Богу. Получивы етери оруженосци. такоже и копеиници скори. господатеи брани. по маанию токмо двизанием Божии скорости друг друга варяющи вкупе. в дело скончавающи. повелением содетеля и победное устроение к врагом. и к мучителем ополчение. темже и снидоша тогда текуще вкупе. и последствующе Богови и гласа громнаго. и всей земли глубочаиша. умершим от века. под землею лежаща. извести окованыа. и от века спящаа. и яко убо врата безсличнаа. и примрачнаа аду жилища. жилища же и темница, и скровища же и врьтпы Божие посещение светлое постиже. Варяет же всех Гавриил архистратиг. якоже по обычаю яко обычен сыи радости. благовещение приносити человеком и глагол некыи крепок и архангельскы и воеводьски светел. и левскы и к противным силам велиим гласом глаголет. возмете врата князи ваши. с нимже вопиет Михаил. и возметеся врата вечнаа. таже силы реша. отступите вратници и законопреступници. такоже и владычьствиа с областию. съкрутитеся ужа железнаа нераздрушимаа. и до конца посрамитеся с противоборци. и ин: постыдитеся противнии супостати. и другыи: убоитеся мучителе законопреступници. И якоже се при цари храбре царьскы оплъчающеся и побежающе. гроза некаа и трепет вкупе же и смущение. и страх пристранен нападает. в непобедимаго владыкы враги. такоже и в адьское оно и дивное пришествие Господне. иже в преисподних внезаапу бысть свыше. блистанию мрак. в лици противных. аду силам и громогласным некоим слышааху ся. вопиа и воем веселящимся и глаголющим. возмете врата князи ваши. возмете врата. не отврьзете же но от самех основании возмете искорените. преставите не затворятися им ктому. возмете врата князи ваши. не яко не могущу присношедшему владыце, и вратом затвореном. егда волит входити. но владычьскы вам. яко убегом и отступным велящу взятие вечным вратом. и преставление и сокрушение. темже ни народом вашим. но мнящим кязем вашим быти. повелевает глаголя. возмете врата князи ваши. себе а не инем некоим суща князи. аще бо и доселе умрьшими зле от века владели есте. но ктому уже не обладаете ими. но ни вам самем будете князи. возмете врата. прииде бо Христос. небесныа двери путь сотворите. вшедшему на адскиа запады. Господь имя ему и Господу исходы смертном вратом входы бо сотворите вы смертныа. и исходы сам сотворити прииде. темже возмете врата князи ваши. возмете и не медлите. возмете скоро возмете. и не ждете. аще ли медлити мните. самем вратом безрукы особе отврьстися велим. возмете врата вечнаа. вкупе же силы воскликнуша вкупе врата взяшися. вкупе вереа сокрушишася. вкупе основаниа темници поколебашеся. вкупе противныа силы бегу ся яша. друг друга реюще, и друг друзе претыкающеся. и ин иному бежати глаголя. и устрашишася подвизашася. и ужаснушася. смутишася обледеша сташа вкупе. и дивишася недоумеша вкупе и вострепеташа. ов зиая стояше. ов же коленома лице закрываше. а другыи ниц задхняшеся. и ин яко мертвец оцепенеаше. а другыи ужасом одръжим бе. и ин обледев лежаше. а другыи внутрених прибежищех исчезааше. ту бо тогда съсече Христос. ужасом главы силных ту сотрясошася о нем. ту разверзоша узды своа. глаголюще. кто се есть царь славе. кто се есть таковыи. иже таковаа с толицими содеваа чудеса. кто се есть царь славе. кто се таковыи творя сиа ныне в аде. кто се есть еже не бываше никогдаже во аде. кто се есть изводяи окованныа отсюду яже от века. кто се есть раздрушивыи нам непобедимую силу и мужество. К ним же отвещеваху Господняа силы глаголющи. уведети ли хощете. кто се есть царь славе. Господь крепок и силен Господь силен и дръжавныи. и непобедим в бранех. се он есть отврьгыи вас от небесных мест. и к земли послав окаяннии законопреступници мучителе. он истыи есть. сокруши и в ерданьскых водах главы змием вам³⁹¹. и сеи истыи есть обличивыи вас крестом. и позор сотворь и ослабль жилы ваша. и тъ истыи есть связавыи и омрачив и в бездну пославыи вас. сеи истыи есть посылаа и вас в огнь вечный в геону. темже не медлите не ждете но подвигнитеся и узникы изведите яже доселе пожрасте. ваша бо дръжава убо уже раздрушися. ваше мучительство уже преста. ваше шатание люте яко раздрушися ваша гордыни до конца ослабе. ваша крепость изнеможе и погибе прочее. сиа Господня силы противным силам глаголаху. вкупе же и тщахуса. и овии темницу от самех основании раскоповаху овии же противныа силы ткаху от внешних сокровищ в внутрених бежаща. и ини преисподняа сокровища и нырища и пещеры искаху и оп(б)тецаху. и инии друг друга связаныя³⁹² Господу приношаху. и инии мучителя вязаху и друзии вечныа связанныя испущаху. и овии же последоваху. и друзии слышааху вскоре. исполняаху повеленнаа. ови же входяще внутрьуду Господеви предтицаху. ови же яко Богу и царю и победителю предстоаху. Сим же убо тако. но и паче сих в аде пребывающим и говорящим и трясущимся яко Господне есть пришествие. сама преисподняа преисподним достиже. Адам же прьвозданныи созданныи преже всех человек³⁹³ и умерыи преже внутрьуду всех. с многою твердынею связан дръжим. слыша Господьскима ногама входящу к связаным шум: и позна глас входящу в темницу. и обращься к всем сущим с ним от века свазаным рече. глас ногама некоему слышу к нам грядуща. Аще тъ в истинну зде приити изволил есть от уз мы свободимся. аще в истинну оного с нами видим, мы от ада избавляемся. Сиа и подобнаа сим Адаму глаголющу к всем сущим с ним связаным. вниде Господь к ним победное оружие крест дръжа. Его же видев Адам созданныи преже и ужасом возопи. и възби в прьси своа, к всем спящим от века рече: Господь мои с всеми³⁹⁴. И отвещав Христос глагола Адаму: и с духом твоим³⁹⁵. И ем его за десную руку воскрешает глаголя востани спяи воскресни из мертвых и освети тя Христос твои. Аз Бог твои бывыи тебе ради сын тебе и ныне глаголю. и по области³⁹⁶ повелеваю связаным изыдете и сущим в тме просветитеся. и лежащим востанете. тебе бо повелеваю востани спяи. не сего бо ради тя сотворих. да в аде связан еси. воскресни из мертвых. аз бо есмь живот человеком и воскресение. создание мое воскресни. зраче мои. бывыи по образу моему. востани поиди отсюду. ты бо в мне и аз в тебе. един и неразделим есмы образ. тебе ради Бог твои бых. сын твои тебе ради Господь сыи приах зрак рабий. тебе ради сыи превыше небес приидох на землю. и под землю. тебе ради человек бых. яко человек без помощи свободив в мертвых. тебе ради исшедшаго от врьтограда людеом предан бых от вертограда и распят бых. и в врьтпе осужен бых. Вижь лицу моему заплеваниа. яже тебе ради приах. да тя устрою в прьвое дуновение. вижь ми ланитама ударение. яже приах. да твои развращьшиися зрак исправя в образ прьвыи. вижь ми плещема раны яже приах. да размещу бремя твоих грехов лежащее на плещу твоею. вижь ми пригвожденеи руце. иже прострох на древе добре. тебе ради простершаго к древу руце зле. вижь ми пригвождениа и прибиениа к древу нозе твоею ради ногу текшую к древу зле. в шестыи бо день твое осужение бысть. в шестыи же день твое посужение и раю отврьстие сотворих. вкусих тебе ради желчь. да исцелю тя от снеди оноа сладкыа. горкою сластию вкусих оцта да разорю твоей смерти оцтеную и лютую чашу. приях губу да омыю рукописание твоего греха. приах трость да напишу свободу роду человечу. уснух на кресте и копием прободен бых в ребра тебе ради уснувшаго в раи. и Евгу от ребра изведшаго. мое ребро исцелило есть болезнь твоего рода и мои сон изведет тя от смертнаго сна. мое копие уставило есть обращающееся на тя копие. темже востани поиди отсюду изведох бо тя от земли раискыа. устраяю же тя уже не в раи но на небесныи престол. возбраних ти древу животному образу по себе аз весь живот прелагаютися. повелех рабскы херувимом стрещи тя створю же ти херувимом рабскии боголепне поклонятиса. скрылся еси от Бога яко наг но се скрыл еси в себе Бога нага. оболкся еси в срамную ризу кожную. но облечеся Бог в плотскую кровавую одежду. темже востанете поидите отсюду от истлениа в нетление. от смерти в жизнь. востанете поидите отсюду. от тмы в свет вечный. востанете идете отсюду от смерти в веселие. востанете идете отсюду. от работы в свободу. от темница в вышний Иерусалим. от уз к Богу. от болезни в раискую пищу. от земля на небо. на се бо умрох и воскреснух. да и живыми и мертвыми обладаю. темже востанете. поидите. Отец бо небесныи погибшее восприемлет овча. девятьдесятыа и девятыа ангельскыа бо овца креврета ждут Адама. когда воскреснет когда взыдет и к Богу приидет. украсися херувимскыи престол. уготовил есть возносящее скоро приносящи скори же и готови (?). трапеза уготовися брашна готова. вечнии крови и жилища благих отверзошаса. небесное царствие преже век уготовися иже око не виде и ухо не слыша благая. и на сердце человеку не взыдоша. яже человека ждут. Сиа и подобная сим глаголющу Господу. воскресает с ним сыи в нем вкупе Адам. воскресает же с ним и Евга. но и многа телеса умерших от века святых воскреснуша. проповедующи тридневное Господне пришествие егоже светло приимем. и видимь и обоимем. с ангелы ликоствующи. и с архангелы празднующи вкупе. воскресившаго нас от истлениа Христа ему же слава и дръжава. с Отцем и Святым Духом. ныне и присно. и в веки веком. Аминь.

(Из Сборн. Солов. библ. № 848, лист. 326–332)

Слыши небо. внуши земле. яко Господь глаголаше. сыны породих и вознесох. теже мене отвергошася. людие мои не познаша мене. а и осля ясли позна Господина своего. и се Аз иному славы своея не дам. но пущу слово Мое на землю. да спасу люди моя от льсти сотонины³⁹⁷...

Ему же³⁹⁸ глаголаше Давид. во преисподнем аде седя. накладая очитыя перьсты на живые струны. и воспоем песни тихи и веселыя. О друзи мои. днесь положим плача и скорбь. оутешимся Господем и Богом нашим. уже бо светлый день. а время благоприятно. уже бо слышим топот перъских коней, несут дары небесному царю. на земли рождьшемуся. егоже мати пречистая девица повивающе пеленами. прикладающися к нему любезно глаголющи. О высокий и страшный. и бесмертный Царю. что восхоте к нам к нищим снити на землю. пещеры ли восхоте. или в яслех полежати пеленами повиваем. а Ты Господи небеса и облаки Сам обвивая. Тебе бо Господи небо престол. а земля подножие. егоже Ирод безумный скрегташе зубы своими. Господи хотя Тя убити. Но приидете пророки и приидете праведници. Исайя. Иеремее ругающеся аду. отвещаста глаголюще. о немощный дияволе. Давиде глаголи. кто от нас на ны изнесе(т) речь. на живый свет ко Владыце Христу. Тогда Давид рече ясным гласом. Исайя. Еремей. Арон. Езекей. Соломон. Адам. Авраам. Исак. Иаков. Самоил. Данил, и вся. 17 пророк. послушайте гласа моего. Тогда услышав, первозданный, Адам. вопияше биюще в перси своя и в лице руками и глаголаше. Лазорю друже Господень. изнеси на мя речь на живый свет ко Владыце Христу. на се ли мя еси Господи создал. кратко мне во свете твоем жити. да сего ли ти ради Господи землю наплодих человекы. да мене жаль ли Ти Господи. или не жаль. аз бо Господи согреших в делех своих. но того Господи жаль еже Твоим созданием. ад. посмехаетца. и поругаетца. аще аз Адам³⁹⁹, а се Твои изволници⁴⁰⁰ Авраам. с сыном своим. Исаком. Иаковом внуком. в работе седя(т). во преисподнем аде. сниди Господи. Авраама ради. или ти Господи. и Авраам согрешил. а се твой пророк Моисей провел жидове въскъвозе Чермное море, и глаголав с Тобою на Синайстеи горе в купине. лицем к лицу. и той ти Господи с нами во аде. или ти Господи. и Моисей согреших. а се Господи Твой пророк Исайя. из чрева матери. но вознесен на небеса и той сниде во чрево матерьне⁴⁰¹ и ты Господи сниде во чрево девице святыя Богородицы. а той ти Господи с нами во аде. или ти Господи Исайя что согрешил. и се Твой великий пророк Данил сын Езекея пророка поразил тело златое в Вавилоне. и вверьжен ко львом в ров. а тот Господи с нами во аде. или ти Господи. и Данил что согрешил. носивый древян козел на раме пробразова божественыя твоя страсти⁴⁰²... или ти Господи и пророци что согрешиша. а се Господи сын Давидов. Соломон. созда тобе дом. во Иерусалиме. и сковав 2 орла злата. подобна херувимом. и серафимом. и глаголаше. аще будет Бог на землю, то снидет Дух Святый во орла. а орла же ся поносивше по церкви и вознесостася на небо. уже бо Господи. не видим светозарнаго Твоего солнца. ни благодарнаго (?) Твоего совета. но тугою содеръжимы есмы. жаления нашего... уныли есмы.

И услыша Господь приде (к) сестре Лазореве. к Марии. и к Марфе. в Вифанию. слышавше Мария и Марфа. скоро текши. падши на ногу Его. и власы своими отирающе нозе Его. и глаголюще. Господи аще бы зде был. не бы оумерл брат наю Лазорь. И глагола Господь Марфе и Марии. воскреснет брат ваю.

И глагола ад. ко дияволу. слышу. прискорбна ми есть душа. отпустити Лазоря и нудим есмь отринути Адама. И рече Господь. к Марии и к Марфе. где положисте его. и идоста на гроб. и повеле Господь отвалити камень. от дьверии гробу. и рече Мария и Марфа. Господи уже смердит. четверодневен бо есть. и рече Господь. аще веру имате, узрите славу Божию. И возрев на небо и прослезися. рече. Лазоре гряди вон. и абие воста Лазорь укроем обязан. и рече Господь. раздрешите и.

И егда воскресл Лазорь изо ада. и глагола ко Господу. Господи вопию(т) ти пророци во аде. первозданный Адам. и патриарх Авраам. и с сыном Исаком и со внуком. Ияковом. Давид же ти вопиет о сыну своем Соломоне. изведи Господи из ада. и глагола Господь к Лазорю. аще бы не Давида ради раба Моего. возлюбленаго. а Соломона бых во аде искоренил. И сниде Господь духом на ада. и множество небесных вой с Ним. Исемиел⁴⁰³ и Рагуил. Измаил. Нанаил⁴⁰⁴. Тартар. Гаврил. Михаил. и вси ангели идуще со крестом на ада. и рекуще. возмете врата вечная. и да возмутца врата плачевная. и внидет царь славы. и глаголаша ангели. со пророки. Господь силен и страшен во бранех. той бо есть царь славы. да возмутца. тогда царь великий Давид глаголет. коли бех жив⁴⁰⁵... да сокрушатца врата медная. и верея железная сломятца. и тогда сокрушит Господь врата медная. и верея железная сломит. И глагола Адаму: сия тя десница создала от века. сия же тя изведет из тля. И тогда воскресе Иисус. и глагола своим апостолом. шедше проповедайте по всей земли. крестяще и во имя Отца и Сына и Святаго Духа. учаще я соблюсти... а Сам Господь вознесеся на небеса и седе одесную Отца и по всей земли слава Его. о Христе Иисусе Господе нашем.