Сказания о сошествии Иисуса Христа во ад. Слово Евсевия, Епископа Александрийского о вшествии Иоанна Предтечи во ад

В святый, великий Пяток страстные недели. слово святаго отца нашего Евсевиа. епископа Александрийскаго. о вшествии Иоанна Предтечи во ад. Господи благослови. отче³⁶⁹.

(Из Сборн. XVI–XVII в. Солов. библ. № 848, лист. 304–326)

Возлюблении добро есть рещи. каково есть благовещение Предтечево во аде. и како и воспросиша сущии во аде. Бе бо пущал ученики своя ко Господу из темници глаголющи. ты ли еси грядый. или иного чаем. не неведый его пусти. како не ведяше. а перстом кажа глаголаше. се Агнец Божий вземля грехи всего мира. и паки глаголаше Иоанн. аз вы крещаю водою. посреде же вас бе, егоже вы не весте. той вы крести(т) Духом Святым и огнем. не тогда убо увесть его, да не будет. но слыши страшнейшую тайну. понеже бяше зде Предтеча Господень. темже и во ад хотяще предтекущи ему. ибо во аде сущии вопрашати его хотяще о Господе. яко идет ли извести нас отсюду. или несть его. и неведаи. что хотяще отвещавати им. Сего ради пусти ученики своя ко Господу. глаголя: Ты ли еси грядый. и шед ответ принесе. и тогда Ирод пусти воина в темницу. и усекну Иоанна.

Скончав же Предтеча Господень течение свое и сниде во ад. и ту познаша и сущии во аде. Ту бо бяше Авраам. Исак. Иаков. и Исайя пророк. и Давид царь и прочее множество святых пророк. и вопрошаху Иоанна, о Господе. глаголюще: идет ли убо свободити нас от скорбий сих. или ни. И скончася пророчествованная о Нем. и инии глаголаху. егда како не хощет нас ради прияти смерти. пророци же крепляху(ся) глаголюще. яко смерть ему есть прияти. и разумехом хотящая быти нам явлено. и тако пророчествовахом всему миру. отвещав же Иоанн Предтеча и рече. приидете молю вы. что прорицасте миру о Христе, повежте ми. да слышавши вси подвижнее будут. отвещав же первый и великии пророк Давид, рече. аз разумех, яко без молвы тихо сходит Христос с небеси. яко туча на руно³⁷⁰. и потом Исайя рече. аз видех, яко от девы хощет родитися. и рех. се девая во чреве приимет. и родит Сын. и нарекут имя Ему Еммануил³⁷¹ и другии рече. аз разумех, яко во двою надесять место патриарх. 12 ученик хощет Ему служити. и рех: во отец своих место быша сынове твои³⁷². и потом ин отвещав рече. и мне явлено Духом Святым. яко дела и чудеса яже хотя творити. и разумех и рех. тогда всему миру. яко отверзутца очеса слепых. и уши глухих услышат³⁷³. и потом ин рече. аз разумех, яко ученик Его хощет предати Его, и рех слово. ядыи хлеб мои. возвеличил есть на мя клевету³⁷⁴. ин рече. аз разумех, яко на 30 сребреницех хотяше предати. и рех. поставиша цену. 30 сребренник³⁷⁵. Исаия паки рече. аз разумех, яко на судище хощет веден быти, и рех. Сам Господь приидет со старци людскими на суд. и отвещав Иеремея глагола. аз разумех. на кресте хотяху и распяти. и рех. приидете вложим древо в хлеб его. возмем живот его³⁷⁶. другий рече. аз разумех, яко во гробе хотяху и положити. и рех. положиша мя во рве преисподнем в темных. и в сени смертней³⁷⁷.

Сице пророком веселящимся. о благовещении Предтечеве. еже исповеда съшествие Христово во ад. слышав же то ад. глагола к дияволу. о ком си глаголют. высокомыслении. кто же ли им радость принесе. о ком сии благовествуют. не сведе. токмо сих и вижу велику радость. Отвещав же диявол. глагола ему. ничтоже не ужасайся и не бойся глаголания их. и не брези их веселящих(ся). се бо ныне пришед радость сотворих есть Иоанн креститель. велико-глаголник. ибо егда бе на земли. велия свидетельствова о человеце том. и глагола всему миру. яко сей есть хотя избавити вселенную. и внидох во Иродиаду светилницу³⁷⁸ мою. и наследницу мою. тою прогневах царя. и сего Иоанна усекну на обеде. и главу его дах отроковици. и та яко яблоком поигра на блюде. и сей. его же глаголаше. яко сеи есть хотя избавити Израиля и вселеную. но ни самого (себя) избави. И отвеща же ад ко дияволу. блюди, брате, обходи испытно. еда обольщена будеве. блюдися исыпытай. откуду чий есть сын. си бо вси велми радуютца о нем. блюди испытно. да егда хотехове единого прияти, и всего мира лишена будеве. еже толико нама будет облишение. но и смеху и поругание будеве.

Се слышав диавол иде ко Юдеюм. и вооружи я на Господа. и пребываше с ними. и не отхожаше от них и поучаше их на распятие Господне, не ведяше бо окаянный диявол. яко Господня смерть всемь воскресение будет. Абие же на пути несытства³⁷⁹ обретши сотона Июду. нача тем готовити предание. и начать творити его любителя сребру. темже учением дияволим ко Юдеом глаголаше. что ми хощете дати и аз вам предам его. Братие. кто не прослезитца о глаголе сем возлюблении. трепещут бо ми удов состави. ужасаетмися помысл о словесех сих. что хощете ми дати, и аз вам предам его. како искрепе язык его, и како (неудавлени) быша устна его. како не связася язык его. и како не усхоша уста его. како не увядеся (?) весь состав телеси его. таковая глагола извещающи. Что ми хощете дати. и аз вам предам его. Они же рекоша. что хощете взяти. достойна неимут ничтоже дати. но прииди Июдо. что ради предаеши³⁸⁰. егда что лиши тебе других ученик. или егда лишше инем что подасть. не тоиже ли благодати объщника тя сотвори. да его продаеши. и паки егда препоясася лентием. и умы нозе учеником. такоже и твои. якоже и онем. не лиши тебе ни единоя благодати. а ты на предание вооружися. тольма же тебе не восхоте отринути от ученик. а ведый твою предательскую лесть. вечеряти тя сотвори с Собою. да не мниши, яко не ведяше твоего соблажнения. темже на той же трапезе рече. омочивыи со мною руку. той мя предаст. а не рече ти. востани с трапезы моея предателю. яко неси достоин. ясти со мною на трапезе. рука твоя хлеба причащаетца ядяше. а душа твоя цену Его совещевает. О горе тебе Июдо. что сотвори. сребро прият, а Господа предаст. сребра ради совет сотвори. темже епископство твое да приимет ин³⁸¹ и в кровех твоих не будет живущаго тех ради сребряник (много добра лишився. и многаго зла доведен бысть. тех ради сребреник грех отец твоих не отымется и беззаконие матере твоея не очистится; тех ради сребреник)³⁸² тмы тмами ангел. и архангел. тысяща тысящам бысть им враг. единому дияволу любим бысть тех ради сребреник. лика апостольска отлучися и в бесех причтеся. и престола царского отступи. и славы совлечеся. и уже удавления (на ся) наложи. Что хощете ми дати. да аз вам предам Его. и поставиша ему 30 сребряник. О горе тебе Июда. что сотвори, на тридесяти сребряницех продаеши небу и земли Творца. раб владыку продает. убо продаеши Господа. то поне блюди. како продаеши. аще бы раба хитра имел. не бы его продал. хитрости ради на 30-ти сребряницех. или сотворшаго своею хитростию весь мир, пятью день. на тридесяти сребряницех продаеши окаянне. всю тварь (юже) видиши окаянне. той есть сотворил. а ты окаянне цену Его совещаваеши. что хощете ми дати. и аз вам предам его. и поставиша ему 30 сребреник.

По отшествии же его. и по отлучении лика апостольска. нача Иисус тужити. и скорбети. прискорбна ми есть душа до смерти. О милосердие Владычне. о предатели скорбяше. смерти ся не бояше. бесмертен сый. Слышал же то диявол. Господа рекша. прискорбна ми есть душа до смерти. мняше бо. яко смерти боитца. и начат подвижнее бывати. и тек ко адови рече. готов буди брате мои аде. уготоваи место твердо. да затвориве нарицаемаго Иисуса. себо устроих нань смерть. и уготовах гвоздие. и наострих копие. пальях оцта и губу. и жидове наострих нань. яко оружие. и се по двою днью представлю ти его брате мои аде. и многу бо ми пакость сотвори на земли Иисус. и много прогнева мя. и многия сосуды истощи. еже аз завистию невидимо творях. тоже он словом исцеляше. их же аз разрушах уды. то он крепляше. одр на раму носити повелеваше. другаго ослепих. и затворих очи ему. и веселихся о нем. егда о стену ударяшеся. или в воду впадаше. Он же пришед не веде откуду противная ми творя. словом даст ему прозрети. и другому сущу во чреве матерне ослепих очи. яко не знати ему видети света. Он же обрете брение сотворив. помаза ему очи. и повеле ему в Силуамли купели умытися. и прозре. аз же не обрет места. камо иду. и поях с собою 7 бес. все служебныя слуги. и отидох далече от него. и обретох уношу добра и вшед в него и живях в нем. и неведе. како разуме. пришед тамо запрети ми. и повеле ми изъитти от него. и исшед аз не обрет места. камо иду. молих поне на свиньях прииму власть. еще же паки. жена от мене в недуг впаде. и 12 лет течения кровная от плоти ея истекаху. и не веде. откуду тамо прииде. и видевше. и притче и прикоснуся. емь воскрилию риз Его. абие ста течение крови ея. и гневахся нань и не смех победитися с ним. и паки идох оттуду. и приидох во пределы Сирския. и Хананейския. и пришед обретох отроковицу добру и вшед в ню живях в неи. и творях злое. овогда во огнь вметах ю. другое со стен сметах ю и веселяхся ею. и матери ея начняше битися. ея ради. и тужаше вельми о неи. и не вемь. откуду прииде тамо и живяше ту. и абие слышав мати отроковици, шедше поведа глаголемому Иисусу о дщери своей. и глаголющи: помилуй мя Иисусе Сыне Божий. яко дщи моя зле беснуетца. и абие помянув жене и рече: о жено велия вера твоя, буди тебе. якоже хощеши. тоже и не Сам приде изгнати нас. но жене дал власть изгнати мя. другойжцу выехавшу ему в море. и сшибахуся волны. и хотящему погрузити корабль. в немже бяше Иисус. со ученики своими. и се хотящу кораблю сокрушится. и абие ученици возбудиша Его. и востав запрети морю. и послушаше его море и вси ветри. и бысть тишина велия. Видев же аз. яко и ту пребывает. и идох во Вифанию. хотяи оскорбити. и восхитити друга Его Лазоря. и приведох к тебе брате мои. аде. и без печали быхове. мню. яко уже не может от тебе восхитити его. и по 4 рех днех пришед неоткуду. не веде. спящу ли тобе. или не хранящу его. и исхити его от тебе. отвещав ад глагола ко дияволу: той же ли есть ныне. иже тогда Лазаря возведе. аще той есть. помилуй мя. не води его семо. того бо токмо глас устраши мя. и разруши ми всю силу. того ли Иисуса возвещаеши ми затворити. он аще приидет семо. ихже имам зде. извести имать. аз тогда изгноих «тело Лазорево зело. яко начат воняти. и начашася раступати» составы тела его. егда же возгласи. Лазорь гряди вон. и абие воскочи. и яко лев из вертепа на лов идыи. яко орле летая. всю свою немощь отверг. в мегновении ока. аз того затворити не могу. отвещав же диявол глагола ему. сила моя и твоя не сытая утроба. да приимет. (не бляди много). отвещав же ад глаголя: кая ми сила. ибо аще бы имел силы. то победился бы с ним. мною ли и юдеи хощеши оправдан быти. глагола ему диявол. страшливе, не мужу, худодушьне. мне толико зла сотвори. и не престаях победяся с ним. а ты едино зло приим от него. толику боязнь приях. Аз же. егда видех внешния болезни телесныя исцеляет. и начах душа человеча невидимо мучити. егда видех. яко и ту пребывает. и паки обретох уношу именем Матфея. и возложих на сердце его помысл имения. и поставих его на мытнице. и толма послушаше мене уноша, яко же бияше вся. и радовахуся о нем. и не веде. откуду Он прииде. и мимоидыи рече ему. уноша иди по мне. и абие от словеси его Матфеи остави мытницу. и последова Ему. и бысть Ему ученик. а мне враг. аз же оскорбех зело. мнех. яко возраст уноши возлюби. и восхити его от мене. И идох аз во страны Ерихонския. и обретох человека. мала возрастом. именем Закхею. и внидох в онь. и поставих и на мытнице. и утеши мя от печали. еже о Матфеи. и мнех, яко по его возрасту не имать любити. и прииде Он не веде откуду. и мимоидыи с народом. Закхеи же не могии видети. кто есть мимоходит. и возлезе на сукомаслию. и возрев Иисус. видев и глагола к нему. Закхее подщися слези. днесь бо подобает ми в дому твоем быти. абие прият и радуяся. и шед возврати четверицею. еже бе лихоимах. и от своего имения подаст нищим. и иде вослед Его. и бысть Ему ученик, а мне враг. И не обретох места, камо итти. и идох к братии моей Июдеом. и вооружих я нань. отвещав же ад. глагола ко дияволу. отстанися его. ничтоже тобе с Ним. Глагола ему диявол. аз виде. яко человек есть, боитца смерти. Се бо разумех. яко предаяся скорби и глаголет. прискорбна ми есть душа моя до смерти. Глагола ему ад. якоже хощеши сотвори. поне искуси брань нань. и аще победиши. то затвори его зде. и царствуеши ты со юдеи. аще ли ты не одолееши и пришед семо. изведет. яже имам зде затвореныя. и свяжет тя и слуги твоя и предаст вы мне. Горе вам будет окаяннии.

Се слышав диявол. и иде ко Июдеом и вооружи их на Господа. Собравшежеся на Господа. совет сотворше на Господа. да и погубят, и се собранным им. приде Июда глаголя. егоже аз лобжу той есть, имете и. Приступль облобыза и глаголя. радуйся учителю. Господь рече к нему. уноше. дерзай. нанеже пришел еси. О лобзание полно беззакония. О целование погибельно душе. ходатаи родству огненому. блудница лобзавши нозе Владычни. душу свою очисти от скверны. а сей душу свою погуби. она лобзавше рукописание своих грехов раздра. сеи же лобзав от книг животных изгнан бысть. О жены премудрость. О ученика неразумство. онои лобзавши нозе Владычни. ангели радуются. и венец еи готовят. а сему лобзавшу беси радуютца. и уже удавление плетяху. Радуйся Учителю. облобыза и. приступльше беззаконници. и яша и содержащаго дланию всю землю. и приведоша и пред Пилата. Пилат же седяше судя хотящаго судити живым и мертвым. предстояше и терпяше. берние на престоле. а Творец предстояше. судим же Господь Пилатом за спасение всего мира. И се судиму Ему. жена же Пилатова посла к мужу своему. глаголющи. ничтоже зла не сотвори Праведнику тому. много бо пострада во сне Его ради. О беззаконие Юдейское. О жены премудрость. жена не чтуще закона. ни пророк. праведника нарече. рекше. ничтоже тобе и Праведнику тому. а старци Июдейстии. чтуще и закон и пророки. злодея нарекоша и глаголюще. аще не бы сей злодей был. то не быхом ти предали Его. Тогда Пилат бив и предасть на распятие.

Окаянныи же диявол видев знамение. яже на кресте быша. солнцу померкшу. и земли трясущеся. и опона церковная раздрася на двое. камение распадеся. и самого диявола поругана. тек ко адови. глагола ему: горе мне окаянному. яко поруган бых. помози моему окаянству. затворив врата. да не внидет семо. утверди заклепы железными и всею силою противися Ему. не прияти Его. Тече же ад затвори врата. и заклепы железными утверди. И Господь надгна дьявола, и силы небесные пред Ним течаху. и се врата адова утвержена бяше. и возгласиша силы Божия глаголющи. возмете врата князи ваши. возметеся врата вечная. и внидет Царь славы. Яко неведыи ад. что отвещавати, изнутрь глаголя. кто есть Царь славы. поведите ми. силы реша. Господь крепок и силен. Господь силен во бранех. И отвещав ад. то аще тако есть. то что ищет зде. почто оставил небеса и сниде семо. И силы реша: понеже Царь славы есть. противника гоня связав. и дати тобе. а воины исторгнути. И отвеща ад ко дияволу. треглавниче. вельзавуле. и вратнич ангельскии. поспешниче болезнем. не глаголах ли тобе. не победися с ним. сия же рех ти. предстоит. и что сотвориши окаянне. почто мене не послуша. изыди. аще силен еси. усрящи Его. аз бо помощи тобе не могу. Окаянныи же диявол плача отвеща глаголя. помилуй мя брате. Поне не отверзи врат. дóндеже возвратится. Потрудися мене ради. аще и поруган бых. кто не поруган будет от таковых словес. овогда яко смерти боитца. скорбяше глаголя. прискорбна ми есть душа до смерти. другойци отцу молитвы всылаше глаголя: отче. аще есть возможно. да преидет чаша сия от мене. и сии глаголи прельстиша мя. Сима же глаголющема. возмете врата князи ваши³⁸³ пророци глаголаху. отверзите врата. и внидет Царь славы. и ад слышав то трепеташе. И отвещав пророк Давид рече. не дейте сего, да збудетца пророчество мое. разумех тогда и рех. врата медная сокруши и верея железная сломи.³⁸⁴ и скончася писание. где ти смерти жало³⁸⁵. где ти ад победа. Господь наш Иисус Христос возшед на адова врата медяная сокрушил. и верея железныя сломил. И сниде во ад. и рече сущим во аде. идете паки в рай. они же радующеся поющи. и глаголаху. благословен грядый во имя Господне. Тогда Господь им диявола и связа узами нерешимыми. пророки изведе глаголя. идете в раи. и тако искочиша из ада. Отнихже первый пророк Давид. бряцая в гусли. глаголаше: приидете возрадуемся Господеви. и воскликнем Богу Спасителю нашему³⁸⁶ яко Царь наш по нас побежься. и одоле. и вси отпеваху: алилуиа. И паки тойже Давид рече: вси языци восплещете руками. воскликнете Богу гласом радости³⁸⁷ яко Царь наш побежься и одоле. Другий от пророк рече. радуйся зело дщи Сионова. и потом: востани Ерусалиме. облечися в славу свою, яко Царь твои побежься и одоле. И тако веселящеся в рай течаху. славяще избавителя Господа нашего Иисуса Христа. емуже подобает всяка слава. честь и поклонение Отцу и Сыну и Святому Духу ныне и присно и во веки веком.

И вшед в раи обретоша разбойника. и ужасошася. и глаголаху ему: кто тя введе семо. кто ли ти врата отверзе, что сотвори. первие нас вниде семо. убити ли хощеши и украсти пришел еси семо. что хощеши сотворити. рци нам. кто тя введе семо прежде нас. Онже рече им. не за дело мое внидох семо. ниже достоин ни приближитися зде. но Владыка человеколюбец милостивый введе мя семо в рай. аз же ничтоже добра не сотворих. а злодеяния моего много. осудиша мя жидове распяти с бесмертным Царем и хотеша убити мя. но Иисус дарова ми живот вечный. и распяша мя с Господем. и видех знамение на кресте. и разумех. яко Сын Божий есть. возопих гласом велиим: помяни (мя) Спасе. егда приидеши в царствии твоем. Абие прият Господь моление мое. и рече ми: аминь глаголю тебе. днесь будеши со Мною в раи. и дасть ми крестное знамение се и глагола ми: возми се иди в рай. аще ти возбранит пламенное оружие. и ты покажи ему крестное знамение. и отверзет ти врата. и егда внидох. и видев мя. возбрани ми. и затвори врата. аз же показа ему Владычне крестное знамение. и се видев отверзи ми врата. и внидох в рай. и не обретох никогоже. и ужасохся и глаголах к собе. где есть Аврам и Исак. и Яков и прочих святых пророк множество. Чудившумися. и недомысляющу. и се явиста ми 2 мужа. стара деньми одесную страну восточных. дивна велми и красна лицем. и приидоста ко мне. и вопросиста мя. кто ты еси. Авраам ли еси, оного бо образ священ. или есть Моисеи. Моисеи бо мудр, а речью гугнив. а твоя беседа явствена есть, но ты еси разбойник. наю являеши. образ твои разбойничий есть. аз же исповедах вся им. яко разбойник есмь. но Владыка введе мя есть в раи. поне спутник Ему бых. и до смерти ею же пострада за ны. и вопросих ею. а вы кто есте. от нею един рече ми. аз есмь Илья Фезвитянин, иже колесницею огненою восхищен был на небо. а со мною Енох есть. глаголом Божиим преложен есть зде. и еще есме смерти не вкусили. Пророци же слышавше и прославиша Бога о дарованных грешником. Господь же испроверг ада. и смертию смерть попрал. древнюю клятву древом крестным разруши. и врата сокруши. и верея сломи. диявола связа и всего мира свободи. и всяческих в раи введе. воскрес из мертвых. Господи слава тебе.