Сказание о приходе в Рим сестер Лазаря, Марфы и Марии

Иже во святых отца нашего Иоанна Златоустаго патриарха Константина града слово о Господе нашем Иисусе Христе. Благослови отче!

(Из Сборн. Солов. библ. XVI-XVII в. № 854. лист. 9–16)

Страшна и велиа деяниа хощу вам поведати, яже о Спасе нашем Иисусе Христе, не пред многими паче леты и роды збышася. сиа же молчанием прейти неподобно есть. но яко же мощно есть изрещи о сих покушаюсь и своего недоумениа яко не забыв еже знамениа велегластво, се же творю повелевшаго мне и не хотя ся ослушати, бедне убо зло есть. вем убо яко ни малы тайны слово достойно. но никто же непираяся на худословие и на грубость глаголющу ми. да не похулит сице высокыя силы. сице и вещающим силы мощь. разумети лепо есть. обаче ж святых тайн сих поучение сице! Возмем начаток глаголу. идеже Владыко яко источник животу приидет, и многиа истачает струа человеколюбиа. но о сем убо превнесем слово. По вознесении Господа нашего Иисуса Христа, Тиверию Кесарю единоначалствующу на земли, и обладающу всеми восточными и западными странами. сестры убо Лазоревы, Марфа и Мариа пути сотворивше шествие, и дошедше до Рима исповедавше Кесарю Тиверию о Господе нашем Иисусе Христе, сице реша. Владыко царю, мы есмы от земля Мадиамскиа, и приидохом възвестити твоей державе страшна и велиа деяниа. яже быша в наша лета. но аще послушаеши нас. слышати имаши дивная и славная дела Божиа. яко не токмо слышати имаши славу Божию, но обаче и очима узриши присно Сына Божиа съприсносущнаго рождьшагося на земли плотию. Сиа убо слышав Кесарь и ужас объят и. и кротостию глагола к ним и рече. поведите ми. что есть дело и прихождение ваше к нам. Тогда отвеща(ша) Марфа и Мариа и глаголаше Кесареви. господине Кесарю, Бог явися на земли крепок и силен делом и словом, иже мертвыя от гроба воскрешает и слепым прозрение очию подает, и прокаженыя оцыщает. и духи нечистыя прогоняет. Изыде убо на гору со ученики, прокаженым и не слышащим истачает струа. сшед оттуду и различными недуги одержимым туча исцелении проливает. и при овчии купели ста. и словом стягну разслабленаго. и вниде в дом Петров и виде тещу его огнем жегому прохлади ю. и срете прокаженаго, и мозоли ему страсти губою человеколюбиа исцелив и отер. и прииде в соборище. имущу человеку суху руку в прозябение поклоняемо есть дела сотворити³⁶⁵. и сниде в Кана Галилею, и преславное преложение, во образе воду в вино званным преложи и почерпе. и пять тысящьному народу пятию хлебы, изобилно насытив. и ина многа чудеса, яже исчести не возможно. И в преполовение праздника взыде в церковь. и вся уча в месте молитвенем. и чужахуся Июдее премудрости источника, и невероваша и не поклонишася. Злобою исполнены суще. и лукавствием. зряху врача прилагающе билие³⁶⁶ исцелением и премудрости истачающе божественнаа учениа. и криле человеколюбием простирающе на всех. Глаголаше бо к ним Господь: коль краты восхотех собрати чада твоя. якоже кокош собирает птенца своя под криле свои. и не восхотесте. и чужахуся Июдее глаголюще: како сей весть книги не учився. и рече к ним: Мое учение несть Мое, но пославшаго Мя Отца моего, иже ми сведетелствова с небеси. и пред всеми нами глагола и возгласи: сей есть Сын Мой возлюбленыи, о Нем же благоизволих. Иоанн сведетельствует о Нем и глаголаше: се Агнец Божий, вземляи грехи всего мира. яко светилника позна солнечная заря, его же Дева Мария бессеменно зачат, и породи нетленно плотию в Вифлеоме Иудейстем, и крести во Иордани от Иоанна. Июда предаст его лобзанием Июдеом. Июдеи же Пилату предаша и. Пилат убо посудив и предаст его на убиение. и емше воини пропяша. и Логин убо сотник копием ребра ему прободе, и абие изыде кровь и вода. земля же потрясеся и камение распадашеся. и тма бысть по всей земли. и тварь вся поколебашеся. и та убо вся Логин сведетельствует исповедавше вся. и не вероваша ему. завистию одержими. мы же его со креста снемше и положихом во гробе. и бысть во гробе яко мертв, и тридневно воскресе. и видехом вси восходяща со славою на небеса. Сия убо слышав Кесарь. и ужасен быв, сладким гласом вопрошаше Марфы: воистинну ли глаголеши о жено. яко таковый человек на землю с небеси приити изволи, яко же ты глаголеши. Глагола убо Марфа: послушай царю; брат убо наш Лазорь умерл и положен бысть во гробе. и по четырех днех пришед и возва Лазоря, мертвеца четверодневнаго воздвиже, и воскреси. и вси исцелевшеи в мире ходят. И рече к ним Кесарь: аще воистинну глаголете. се аз посылаю слугу моего во Иерусалим с вами, нарихаемого Капсофа³⁶⁷, и приведет ми вся недужныа. ихже исцелив Христос. и брат ваш Лазарь да приидет. его же глаголете еще жива суща. и увижу его и верую. Тогда посла Кесарь Капсофа, во Иерусалим с ними и заповедав им тако, да придет Пилат со Иродом и вси архиереи, и старцы.

И егда возвратишася во Иерусалим, изыде повеление Кесарево по всей Иудеи, вси единокупно сошедшеся, и нуждею послашася к Кесарю Августу. и пришедшим им в Рим и введена быша, и предсташа Кесарю и бысть трус велик. и восколыбася основание полатное и пастися хотяше. и ужасен быв Кесарь, зря бываемое. и реша предстоащии Кесареви. еда сих ради людий сице творится. иже приидоша возвестити державе твоей. о Христе распятом. тогда убо повеле Кесарь изгнати я вон, и изгнани быша ис полаты. И тогда преста трястися земля. и повеле Кесарь, да введени будут по единому, и увидим и разумеем, что ради трус сий бывает. и внидоша вси по единому. Егда же бысть внити Логину сотнику. и паки начат трястися полата страшно и все здание полатное, яко хотяше пастися, и обиат страх всех ту сущих. и не могоша зрети на Логина. И рече Кесарь к Логину: ты кто еси о человече и что есть твое дело. еже зрим бываемо тебе ради, и хощем вси погибнути вскоре, но повеждь нам дело свое. Тогда отвеща Логин со страхом великим к Кесарю. и рече: владыко царю, не мене ради гибель сиа бывает, но Христа ради распеньшагося. рекомаго Иисуса. егоже аз копием прободох в ребра. и абие изыде кровь и вода. и видех тварь трясущися. и яко быти велию трусу. ако же ныне зрит держава твоа. и тма бысть по всей земли до часа девятаго. солнце помрьче и луна не дасть света своего. и се ныне Лазорь предстоит ти, егоже воскреси от мертвых из гроба четверодневнаго суща мертвеца. исповеда ему вся по ряду бывшая при распятии Иисусове. И глагола к нему Кесарь: верую, яко таковый человек бысть, но что ради трус сей есть, вси бо со страхом одержими есми. И отвеща Логин рече: рех ти царю, яко распеньшагося деля сиа вся бывает Христа, яко и риза его на мне есть. тогда глагола ему Кесарь: изыди скоро и совлеци с себе ризу Божию. и принеси ю семо. И Логин сотвори тако, совлек с себе ризу боготканную. и вдасть в руце Кесарю. Тиверий же Кесарь имеаше во обличии образа своего струп велий. и не можаху его врачеве исцелити, но паче горше ему беаше. И седе Кесарь на судищи. и призва архиереи и старци и вся книжники, и призван бысть и Пилат, и прочии князи и властители и вся старейшины Иерусалимстии и все воинство. и вопрошени бывша от Кесаря Августа: повидите ми знамение царское. начертаемое от силы великиа Божиа. явльшагося на земли, яже слышу о немь. яко Бога сошедшаго с небес в наша лета и велиа знамениа бываемая от него. и многосмыслено поучение. како убо не посласте и ко мне. да узрю и аз светлаа и дивнаа знамениа Божиа. кто убо от древних человек сотвори тако. от мертвых воскреси четверодневнаго мертвеца. и слепу рожену отверсти очи, аще не бы Бог был, и вся изрече им по ряду. елика слыша от божественаго Лазоря. и Мариа и Марфа³⁶⁸, и рече: аще есть слово в вас смыслено, отвещайте ми. Тогда архиереи и старци. и князи вся власти реша: владыко царю, послушай нас раб своих. закон убо наш не судит убити человека, но аще кто сам царь творится, смертию да умрет. мы убо обретохом человека сего, разоряюща закон наш. и сам ся царь творит, и возбраняюща дань твою даяти. того ради емше его; и предахом Пилату. Пилат убо. испытав и обрете повинна смерти, и предаст и на пропятие. Тогда убо Кесарь Тивирие. исполнися гнева и ярости и вопроси Пилата глаголя: не аз ли убо дах ти власть сию. и послах тя во Иерусалим. аще закон судит не убити человека. то како ты возложи руку на Господа Иисуса Христа Сына Божиа. пролияти кровь неповинную, но аще убо ты послал бых еси его ко мне. то и аз бых исцелел от недуга моего. Тогда глагола к нему Марфа: Господи, Царю послушай мене рабы своеа. Тогда вопроси ю Кесарь глаголя: како нарицаеши имя его. и рече к нему Марфа: знаменаи лице свое крестообразно, и глаголи: во имя Отца и Сына и Святаго Духа. И сотвори царь тако, и отер лице свое ризою боготканною. яко исполнено беаше лице его гноя от струпа. и испаде от лица его струп. и ужас велий и страх обиат и, и приспе сердце его с трепетом. и глаголаше жалостию. яко воистинну Бог явися и сошед с небеси в лета наша оболкийся в естество человече, нас ради грешных, како ли не сподоблен бых недостойный аз, образ лица Твоего видети и поклонитися стопам нозе Его. Яко не видев приах разрешение недугу своему от Него. недостойныи сыи человек и грешен. Возрев же на вся архиерея и старци Иерусалимскиа и на князи и на властители гневом, и на все воинство и рече: отидете от мене вскоре проклятии, и да постигнет вас гнев Божий, и на чада ваша, и повеле мечнику отсещи главу Пилатову. Моляша же и Пилат глагола: не погуби мене господине вскоре, но дажь мучение велие. егда како со стражущу ми отпустятся греси мои, их же содеях окаянный. И повеле Кесарь мучити и на долзе. и мучиму бывшу ему глаголаше: помилуй мя Христе Царю Сыне Бога вышняго. и Творче всей вселеннеи, согреших пред Тобою предавы Тя на убиение. И глас бысть с небеси к нему: радуйся, яко Мене ради приат страсть сию. прииди и вниди во обитель отца Моего. отверзошатися двери раискиа. се бо воинство ангельское собрашася. и держат венец и свеща. чающе твоего сретениа. Тогда спекулатор отсече главу его. и ангел, сшед с небесе, и взем главу его и взыде на небо.

И возвестиша бывшее Кесарю знамение. и Кесарь зело удивися. архиереи же и старци, и князи Иерусалимстии и все воинство реша в себе: бежим от лица Кесарева. да не како размыслит и послеть последи нас и погубит ны. Бежаша в ту нощь, и приидоша до места единаго камени, и съкрышася в расседаниах каменных, и инии же в язвинах, друзии же в горах. Свитающу же дни. грядяше множество воинское ко Августу Кесарю. и творяху ловление. и обретоша их съкрывшихся. и реша сии мужие вскую тако скрышася и познаша их, яко не суть от Римския страны. и пришедше возвестиша Кесареви яже о них. И удивися Тивирии и прослави Бога. иже Божиим дарованием распалися сердце его любви Христа Бога и возрадовася царь радостию великою зело, якоже Господь возвести блаженным Давидом: предадятся в руце оружию, и части их лисовом будут, царь же возвеселися о Бозе их. Тогда Кесарь Тивирие вопроси Марфы и Марии, глаголя: что глаголаше Христос и Господь всей твари. повеждь жено, егда ведяху его на пропятие. Тогда отвещавше Марфа и Мариа. и глаголаста Кесарю: послушай нас о царю. егда убо ведяху его на убиение, грядяхом и мы последующе Ему. и плачущи, и ины жены многи от Ерусалима, их же бе исцели от различных недуг и духов и ран лютых. и обращься узре ны плачущихся. и рече: дщери Иерусалимскиа, не плачитеся Мене, но себе плачитеся и чад ваших. яко постиже на вы гнев Божий и оружие поят вы. и падета вы во острии меча. и будета в заточении и рассеяни во всех странах и землях. и ненавидимы всеми, и биеми и поругаеми.

Сия убо слышав Кесарь. и убеди ити во Иерусалим, и написа епистолию. и распусти по всем странам и градом, снитися повеле всем во Иерусалиме. и совокупи вся воя и сниде во Иерусалим. И собра вся архиереи и книжники. и прочая власти. в князи местныя. и весь род евреискый, в повеле изсещи их. дóндеже паде на них тма. и повелением Кесаревым престаша секущеи, и тогда отъятся от них тма. и пречетшеся и обретоша я яко 3 ихже отъят тма. и расточи я по всем странам и в языцех разсеяние, и разрушение велие бысть Иерусалиму. якоже не было от начала, и не имать быти. якоже не бе лежащу камени на камени. Каиафа убо архиерей убеже и скрыяшася в некоей пещере. утаився прямо Иерусалиму. Тивирие убо Кесарь шествуя из града, и вся здания Иерусалимская обхождаше, и въздвигоша елень. и бежа елень той. и ста пред пещерою, идеже бе Каияфа. и гнав по нем Кесарь и стреляше и удари и стрелою, и пришедши стрела и вниде в пещеру. и обрете Каиафу внутрь юду, и уязви его в сердце. И мнози искаху стрелы царевы, и не обретоша. и един убо от них вниде в пещеру. и узре Каияфу лежаща мертва, имущу стрелу цареву в сердцы его. и исшед убо вон, и возвести Кесареви и сущим с ним бывшее чудо. и удивишася зело, и прославиша Бога. и глаголаше Кесарь: слава Тебе Христе Царю и Творче всей твари. якоже открыл еси мне недостойному рабу твоему чудная дела твоя, яко не видех Тя, и верую в Тя, и Тебе единаго проповедаю Иисусе Христе. И крестився Кесарь во имя Отца и Сына и Святаго Духа, и возвратися в дом свой, славя Бога со Отцем и со Святым Духом, ныне и присно и в веки веком, аминь.