Послание Пилата к Тиверию Кесарю³³⁸

Възношение послано от Пилата к Тиверию Кесарю в Рим о съдеянных Господем нашим Иисус Христом. Благослови Отче.

(Из Сборн. Солов. библ. № 854, лист. 39–44)

Веледръжавному, и зело честному, и божественному, и вельми страшному³³⁹ Тиверию Кесарю. аз Пилат Понтьскый въсточныя страны область предръжа възвестити требую вашему величествию нашим възношением. Трепетом и многым страхом одрьжимь есмь, дръжавный царю. се бо ныне настоящим временем малым. якоже скончано бысть в настоящее время. истину показуа. иже съдеяшася в дни сиа. Аз сию обдержа власть. некотораа молва въста в июдейстем племени. и по повелению вашего тихотства³⁴⁰ аз старейшина в стране той. на месте иже есть въсточней стране един от град нарицаемый Иерусалим. Бысть сице³⁴¹ в едине святилище Июдеиска языка. ту в немь сбиратися всякому народу июдейску. предаша ми некоего человека глаголемаго Иисуса. много бесчислены съблазны нань (при)носяще. и немогоша же ни в каком же словеси Иисуса обличити. едина бо бе речь нань. яко суботы их разоряше глаголя. несущаго праздника суща³⁴². многа же исцелениа съврьшаше благыми делесы. слепыа сътвори прозрети. хромыа ходити. мертвыа въстати. разслабленыа исцелити. не могуще отнюдь ни членов телесных удов имети състояниа. но токмо имуще глас и костное стечение³⁴³ и подаяше им силу ходити и ристати, словесем токмо повелеваше. Ина же что мощнейша вещей дивнейше яже есть от богов наших³⁴⁴ и четверодневна некоего Лазаря от мертвых въскрси словесем токмо призвав умершяго, растлено имущи тело уже червьми и смрадом, и телу общему сущу в гробе и лежащу повеле тещи, никакоже мертво имущу что. но яко из чертога жених, тако изыде из гроба, благоуханиа многа исполнен. и некыа яве бесящася и в пустыни жилища имуща. и плотоядца суща своих удов. и згады дивии. и с зверми живуща бесящася. сиа жителя сътвори градныа в своих домех. и словом смыслены показа, премудры же и разумны. и славны повели быти. от нечистаго духа владыко мучимым. и сущих в них бесов погыбелью нужною в стадо свиное послал, в мори потопи. Пакы же ин некий, суху имыи руку, и отнюдь полтелесе усохша. и ни поне твари телныа имыи, того словом исцели. и постави его здрава. и жену кровоточиву в мнозех временех. яко от самаго течения телеснаго отнюдь течением костным счетание яве быти. и ни единаго естества человеча имущи телом, постыдящися хождаше, и еле жива от кроветечениа. вси бо врачеве не начаянно пренарекше³⁴⁵ пресущаху (?) еа. не бы в ней владыко ни единоа надежи спасениа суща. мимогрядущу же Исусу, крепость приимши жена, и осяжением Его коснуся съзади въскрилие ризы Его. и (в) том часе ста течение крове ея. и бысть яко николиже не имевши зла. и нача скоро тещи в свой град велми. И си убо сице сущим. възвещаху Июдее съвращающа Иисуса в суботы, яко паче Бог почтом болшими³⁴⁶ паче разумех чудеса бывшая от Него. Сего ради убо Ирод, Архелаи, и Филипп же, и Анна. и Каияфа предаша ми с всеми людми их. о семь въпрашати ми и велику молву сътвориша. и аз повелех о себе сего распяти, прежде бив Его. и ни единоа же в Нем обрет вины злодеаниа, имъже оклеветаху Его. токмо распят бысть, и бысть тма по всей вселеннеи, и солнцу померкшу отнюдь. и токмо кругу темну сущу. тоже к сему полудне яко и звездам всем светитися. но обаче светлость имяху, якоже не свесть ваше благочестие. иже в всем мире свеща въжгоша от шестыя годины до вечера. и месяц же яко в крови всю нощь не преста. Над сим же все множество прилучившеся. весь мир колебашеся от невидимаго труса. и хотяше вся тварь в преисподняа поглощена быти. тако же яко же имяху священие церковное³⁴⁷ июдеиское. и катапетазма их церковнаа раздрася свыше до низу. громи же и мнози шуми свыше бываху, яко всей земли не токмо колебатися, но и трястися. Явишажеся и в странах мертвецы въскресше, яко и сами Июдеи видевше рекоша. яко видехом Авраама. и Исаака. Иакова. дванадесять патриарха с Моисеом прежде скончавшихся преже двою тысящу и пять сот лет³⁴⁸ и инии мнози. яже аз (видех) в телеси явльшася. плачь же творяще велий всем людем. бывшаго ради от них беззакония, и погыбели делма³⁴⁹ закона. яко бо закон их нецыми разорен бысть. Начата же бывати трусове от годины шестые, в иже час въбиени быша гвозди в руце и нозе Иисусови. пригвождени быша на древе крестнем до вечера. Во едину же суботу нощь велий шум бысть с небесе. яко всему небеси седмерицею сугубо яснейшу и светлейшу паче всех дней быти. от третьяго же часа нощию солнце въсиа, яко николи же явилось бе, и освети всюду. и все небо просветися яко млъниа. внезапу зиме наидоша³⁵⁰. Тако мужи нецыи высоцы во одеждах красных. и в славе неисповедимей суще являхуса множеством безчисленом въпиюще: распныйся въскрсе Христос, их же глас слышашеся яко величество громово: Слава в вышних Богу и на земли мир. изыдете от ада порабощении в преисподних ада. от гласа же их вся горы земныа и холми колебахуся. и камение разседшимся и пропасти на земли великы бываху. яко и глубине яве быти глубоцей. и многом телесем умершим въскрнути из мертвых, и ходити всему множеству. и въспевати великым гласом: воскрес из мертвых Христос. вся мертвыа въскресив оживи. и ада разрушив умертви. ныне рцете учеником Господним, яко варяет вы в Галилеи. всю нощь, о владыко благочестивый, свет не престааше; от Июдей же мнози умроша, в пропастех земных погыбоша. яко ни телесем их явитися. инии же глаголют на Иисуса владыко бывшая привидение некако видети мертво, егож никогда же бых видех³⁵¹ едино же съборище оста в том самом Иерусалиме, а вся съборища падошася в нощи той. Темже страхом в ужасе быв трепетом лютым одръжим, яко видех владыко бывшая в той час. написав възвестих вашей дръжаве. списав же содеянная от Июдей на Иисуса, и послах вашему благочестию владыко самодръжец.

Донесеным же бывшим книгам в Рим и сказаным Тиверию Кесарю и прочтеным³⁵². и немалу стоящу синьклиту. пристрашни бывше Пилатова ради безакониа, и неправедного суда. Тма труси по всей вселенней быша. и ярости исполнився Кесарь. посла воины, и повеле связавше Пилата привести в Рим. И слышав Кесарь яко прииде Пилат. седе на Капетулии в церкви бог³⁵³ с всем его синьклитом. и всему множеству римъску предстоящу. и повели привести Пилата. к нему же рече царь³⁵⁴: глаголи ми, нечестиве³⁵⁵, ты ли еси Пилат Игемон въсточную обдержа область. Пилат же рече: ей владыко самодръжче. аз есмь раб вашего тихостиа. аз есмь Пилат Понтьский от Амасиа града Понтьскаго строа. Кесарь рече: что сицевая дръзнул еси, о нечестиве? и видев сицевая знамениа человека того злодеянней смерти горцей предал еси ты. имже весь мир хотел есть погыбнути. якоже тобою посланое възношение научило ны есть. И рече Пилат: аз, владыко самодръжец, безвинны сего сътворих. безчестив род июдейск. Кесарь рече: кто сии суть? Пилат рече: весь народ живый в Иерусалиме. Кесарь рече: чего ради воли тех последовал еси? Пилат рече: жесток есть непокорлив язык сей³⁵⁶, мне же повинни сущи вашим повелением. Кесарь рече: токмо предали ти суть. его же ти лепо в утвержение сътворити и послати ко мне. и причастити и распяти³⁵⁷ мужа велика. блага знамениа сътворша, якоже назнамена еси нам своим възношением книжным. и хотящему распятися на титле написал еси. и пригвоздил еси на древе креста его: се есть Христос царь июдейск. И се рекшу царю и нарекшу имя Христово. все множество бог спадеся – и быша яко прах. идеже седяше царь с синклитом своим. народ же предстояй и вси же с царем пристрашни бывша, бывшего ради падениа бог и словесного ради речениа и страхом многым одержими. и отыдоша кождо их в дом свой дивящеся. И повеле же Кесарь утвердити³⁵⁸ Пилата, яко да увесть известно о Иисусе. На утреи день пакы сед Кесарь на капетулии³⁵⁹ с всем своим синьклитом. нача пакы въпрашати: глаголи ми, о трепроклятый и нечестиве³⁶⁰ истинное. яко твоего ради нечестивого осуждениа и тщим деянием еже в оного человека, и зде показа злым делом своего деяниа богом на падение предложи. глаголи убо треокаянный: кто бе он человек распныйся. яко имени его токмо наречену зде богы вся погуби. Пилат рече: память, владыко самодержче, аз послах вашему божеству³⁶¹ истинны наричутся, аз веру ях от самех вещей, яко болей есть бога³⁶². его же мы чтем. Кесарь рече, что ради сицеву муку нанесе нань не разуме сил его. всяко хотя зла моему царству. Пилат рече: нечестивого ради настояниа Июдей се сътворих. Ярости исполнився Кесарь съвет сътворив с всем синклитом своим. повели повеление написати на Июдея сице. Ликинию старейшине въсточные области, на нечестивыя Июдея. В настоящее время бывши дръзость от Ерусалимлян, живущих (в) окрестных странах беззаконныа Июдеа. Бога ради, глаголемаго Иисуса. с Пилатом распенших Господа. яко того ради съблазна отнюдь весь мир омрачен быв. малы погыбель не бысть. повелеваю убо вкупе множеству воин приити попленити пленением велием. Сим повелением повинуя, и сътвори я на расточение в всех языцех. и прогна я поработи. да не явятся в градех своих. яко лукавства полни наричутся. И повелению дошедшу на восточную страну, и Ликиний повинувся страхом повелению, и изгна вся Июдея. и пленникы в всех языцех предасть. и работати сътвори я. Яко уведати Кесареви вся бывшая Ликинием. годе же бысть Кесареви. въпраша паки Пилата, повеле префекту именем Салдию³⁶³ главу Пилатову усещи, рек: якоже сей руце нанесе (на того), тако же да получит днесь. И Пилат же шед на место глаголаше: Господи не погуби мене с проныривыми Июдеи. яко аз не бых руку мою на тя не нанесл. но языка ради безаконных, и настояниа Июдеиска нудивших мя. но ты веси, Владыко, яко не ведый сътворих, не погуби мене с грехи моими, и неведением сим, но умилосердися на мя, и на рабу твою убогую Проклу с мною в горкый час смерти моея, юже научил еси прорицати. яко имаши при кресте пригвоздитися. Ни в гресе сем не остави мене. Но остави ми прегрешения вся. и в части праведных причти мя. Окончавшу же молитву Пилату. прииде глас с небесе глаголя: блажат тя вси роди, и отечествия язык³⁶⁴ яко о тебе скончася пророческая проречениа о мне. и ты же свидетель будеши во втором Моем пришествии. егда хощу судити живым и мертвым. и дванадесяте коленома Израилевома неисповедавшими Мене. ни веровавшими имени Моему. И отсече Пилату главу профект. и ангел Господень прия главу его. Видевше же ангела, жена его Прокла радости исполнившися и та предаст дух. и погребена бысть с мужем своим. славяще Господа нашего, Иисуса Христа. Ему же есть слава с Отцем и Святым Духом. ныне и присно и векы веком аминь.