127. Послание митрополита… к архимандриту… с выговором за неуместную строгость к младшей братии

Издано не было; здесь издается из синодального сборника № 562, л. 75–77, в котором это и следующие четыре послания стоят между грамотами митрополита Ионы: ему, по всей вероятности, они и принадлежат.

От… митрополита всея Руси в… монастырь архимандриту… Почто разоряешь похвальный чин о себе и о пастве своей? не добра ли строителя поставих тя церкви Христовой, еже сохранишь чисто и непорочно? И устроих тя пастыря Христовых словесных овец, да пасешь по евангельскому слову, за нихже Христос кровь свою пролья; и поставих тя делателя Христова винограда: должен еси насажать и отреблять его и очищать от всякого преграждения лукавого. Ты же пражден и ленив еси, отсекая насажденных от него и вне церкви изметая из святой ограды, и скор и тщалив еси обрелся ³²⁸⁴ в небрежении положить о братии своей. Да смотришь, чья злоба смяте похваление твое, яже не в прилежании ³²⁸⁵ творишь, в скудости своего разума, паче же неразумия. Како ли не слышишь Господа, Пророком глаголюща: «яко душа крове погибших от руки пастырь взыщу», за нихже Христос душу свою дать не отречеся? И в день страшный Христова воздания что отвещеваешь? Разумеешь ли нужду последнего сего времени, како подобает быть пастырю: яко скоты всяческие, и овцы, и звери дикие совокупить ³²⁸⁶ во едину чреду, и коегождо мысль и нрав и свирепство укротить, и достоянием мир упасти, и в любви духовне и в смирении устроить ³²⁸⁷ , и един от другого невредим пребудет и все вкупе соблюдаемы бывают, и целомудрием связавши плоть свою же и других, обаче рачения божественного исполнить и теплоты духовной влияти, и основания всякого благочестия твердости недвижимо положить, и попечение и спасение тобой иметь о бессмертных единородных верных душах человеческих Христовы паствы, уверения и пользы их и довола духовного, и о сих подвига и жалости, да добре в подвиг благочестия течения придут, и жития монашеского, паче же ангельского достояния постигнуть, из негоже воссияет свет, и радость, и мир, и вечная жизнь, и все изрядное Божье. Понеже пастырь словом именуешися, а дело далече от тебя отстоит; и пастырю подобает избыточествовать во всем верой, и делом, и словом, и разумом, и всем тщанием искушать лучшее и в том пребывать: ты же что сотворил еси? Искупил еси от мира колико братий, паче же и душа их, и ввел еси во обитель свою и братству сочтал, и ангельскому образу сподобил еси их, да они спасут души свои твоим руковожением и наставлением истинного любомудрия, иже ³²⁸⁸ по образу жития, еще же возрастом и леты млады суть и детский разум имуща: и удивляюсь твоему неразумию, почудихся о сем, которой сатана прельстил тя есть? чего ради и которых деля вещей такую юнейшую братию изо обители изгнал еси, от братства и от паствы отлучил еси их, отнюдуже изидоша, и осужение их взял еси на главу свою, своих постриженников? Аз же, смиренный, о том вельми смутихся, ведуще душевную твою пагубу, в нюже впал еси искушением общего врага человеческому спасению, ни поискал еси душу погибших, ни себя вразумил еси, такое зло сотворшему ти, им поревновал еси истинному Пастырю, иже на горах девятьдесят и девять овец оставив, устремися в след погибшей ³²⁸⁹ , еяже обратше, на раму вся и створи радость ангелам. Ты же не поискал тобой погубленных своих овец, ихже потопил еси в море мира сего, ихже душу продал еси на снедь мысленным волкам, паче же и свою душу с ними. Они убогие иноки придоша к нашему смирению и припадоша к ногам нашим со многими слезами, и исповедаша нам вся, яже содеяна о них, и един от них некие словеса зла изрече ми о тебе и не восхотех стыда ради писанием предать тебя, донележе устами изреку тебе. Аз же, смиренный, по своему долгу святительскому, сужалихся о них, и не восхотех презреть погибающих, и смотрех о них, аже ³²⁹⁰ и ты с ними не погибнешь, и единому от обоих быть у тебя не яся, якоже ми он исповедав духовне, и того предах в другой монастырь; а который здесь у нас был твой же постриженик, тобой же изгнан из монастыря, и аз его послал к тебе, и ты бы его всяко принял к себе, яко сущего своего ученика и постриженика, и дал был еси его старцу, доброму человеку, в келью, кто бы ся могл душой его печаловать: и инако бы еси не учинил. И хотел бы еще много писать о твоем непотребстве; но время нам не даст: иные нам вещи земские зашли; а как будешь у нас, и аз хочу сам тебе, аже даст Бог, говорить.