128. Митрополичья уставная грамота монастырю

Из синодального сборника № 562, л. 60–61; издана была, по тому же описку, в Ι-м томе Акт. Археограф. Экспед. под № 381. ΙΙ. Ср. легенду № 127.

Се аз… митрополит всея Руси, дал есмь сию свою грамоту в монастырь… святого, почему архимандриту и попам и дьяконам и чернецам ходить о всем по сей моей грамоте. Архимандрит да имеет к священникам и ко всем старцам того монастыря свершенную духовную любовь; а вы, священники и старцы, чтобы есте своему архимандриту и духовному своему настоятелю с благоповиновением и с послушанием честь воздавали, без его благословения и повеления неисходны были нигдеже из манастыря, и о всем бы есте жили по уставу иноческого жития. А архимандрит должен есть попечение иметь о вашем спасении, и по благословению нашего смирения. А которой поп, или дьякон, или от чернецов кто негодовать имет о сем наказания, и еще имет какую брань чинить в той честной обители: и аз приказал архимандриту того понаказать духовне перед двумя или тремя послухи, да престанет от того; а не накажется, будя яко нечувствен, и аз велел того попа или диакона от церкви отслать, а чернеца из монастыря выслать. А что идет им хлеб из сел монастырских, что на них крестьяне пашут, или на серебро монастырское пашут, и они то делят межи собой, как по иным монастырям: архимандриту от всех жить половина, а попам и диаконам с чернецами половина; а тое поповские и дьяконские и чернецкое половины попам и дьяконам половина, а чернецам половина. А что которых монастырских земель не испахивают, ни пожен не искашивают, а дают в наймы: и теми наймы также делятся: архимандриту половина, а попом и дьяконам с чернецами половина. А в дань мою и в мои проезды митропольские во все архимандрит подъимает половину, а другие половины попы и дьяконы подъимают, а чернецы половину; а более того чернецы в церковный приход ни в монастырский не въступаются ни во что. А что годовое, и сорокоусты, и вписы, и молебны, а тем архимандрит делится с попами и дьяконами по половинам: архимандриту изо всего половина, а попам и дьяконам и с просвирником и с пономарем половина; а чернецы в те приходы не въступаются ни во что. А дана грамота…