102. 1471 г. марта 22. Его же грамота Новгородцам с убеждением покориться великому князю и не изменять православию чрез союз с Латинами

Из сборника графа А.С. Уварова № 512 (прежде Царского № 366), л. 255 об.–264; издана была, по тому же списку, в I-м томе Актов Исторических под № 281.

Благословение Филипа, митрополита всея Руси, в господина и сына моего благоверного и благочестивого великого князя Ивана Васильевича всея Руси отчину, в Великий Новгород, о Святом Духе сыну нашего смирения священноиноку Феофилу, нареченному на владычество той архиепископии нашей великой митрополии, и архимандритам, и честнейшим игуменам, и всех семи соборов священникам всей новгородской земли, также и посаднику степенному и старым посадникам, и тысяцкому степенному и старым тысяцким, и купцам, и черным, и всем христоименитым Господним людям, всему православному христианству, в благочестии пребывающим, всем купно великим же и малым, и всему Великому Новгороду, мужем вольным. Весте убо, сынове, и по святым писаниям добре разумеете о сих, како в начале святое крещение и веру православия прияли есте от сущего в нас и равного Апостолам боговенчанного великого князя Владимира, в немже благочестии и неподвижно пребываем, доколе и Бог повелит; а святая великая наша соборная церкви ²⁹⁰⁰ православия, Богом соблюдаема, якоже солнце сияше благочестием в всех русских землях, истинного нашего великого православия, отчины господина и сына моего великого князя Ивана Васильевича всея Руси, вашего господина, отчича и дедича; а вы, отчина его, земля новгородская, мужи вольные, за коликое многих лет от его прародителей, и от его прадеда, и от деда, и от его отца, от всех великих князей русских, из старины, и ²⁹⁰¹ от его самого, от своего господина от великого князя Ивана Васильевича, неотступны были николиже, никоторыми делами, и до сего времени; а господин и сын мой князь великий Иван Васильевич всея Руси, вас, свою отчину Великий Новгород, также жаловал, как его прадеды и деды и отец его князь великий: как на чем рекл, так вас и жаловал и в старине держал по докончанию. А вы де, сынове, сказывал ми сын мой князь великий, как на чем рекли господину и сыну моему великому князю, и крест есте на чем целовали, что вам имя его держать честно и грозно, а в земли и в воды его и в пошлины не вступатись: и вы де, по тому докончанию, многая неисправления учинили перед моим господином и сыном, перед великим князем. И господин и сын мой князь великий Иван Васильевич послов своих многажды посылал к вам, к своей отчине, чтобы ся есте в том перед ним исправили; и вы пак прислали к нему своего посла Василия Ананьина. И господин и сын мой князь великий чаял, что Василия прислали есте бить челом, с правыми челобитьем и с исправлением; и Василий Ананьин о вашем неисправлении ни сякова слова не молвил, ни челобития его о том не было, а молвячи так: «о том Великий Новгород со мною не приказал». И господину и сыну моему великому князю то велми больно стало, что его дело все забывши и своего неисправления, да приказываю[т] же о своих делах; да за то был господин и сын мой князь великий и гнев на вас, на свою отчину, положил и на коня всести хотел, а приказывал к вам с Василием с Ананьиным: «отчина моя, Великий Новгород, учнут мнe бить челом, а учнут ми ся править о всем, и аз свою отчину жалую, в старину держу». А за тем пак его богомольца, а моего сына, прежде бывшего владыку Иону, вашего отца. Бог взял: и вы прислали к моему господину и сыну, къ великому князю, да и ко мне, бить челом своего боярина Микиту Савина, просячи опасных грамот, чтобы тебе Феофилу, нареченному на владычество, приехать в дом святой Богородицы и к моему господину и сыну к великому князю, да и ко мне, к его отцу к митрополиту; а мне бы о тебе печаловатись, чтобы господин и сын мой князь великий мне митрополиту велел тебя поставить на владычество, cебя богомольца, а Великому Новгороду и Пскову отцом, и в белом клобуке, и отъехать бы добровольно, и кто с тобой поедет, также бы им приехать и отъехать добровольно. И господин и сын мой князь великий, моего для моления и челобития, и матери своей для, великой княгини, пожаловал, с коня ссел, и опасную свою грамоту пожаловал дал, да и аз опасную свою дал, таковы, о каких есте челом били. Вы пак тем великим Божьим делом церковным почали длить, а ко мне слух таков пришел, что деи ваши лихие учали себя вкладывать в сердца неподобные мысли и неимоверство: и аз тому не поверил, а послал есми к вам свою грамоту с Тургенем, с своим сыном боярским, описав о всем о том и с поучением; вы пак, от тех мест и до сих мест, то великое Божье дело, церковное и земское, заложили, а к моему господину и сыну к великому князю и ко мне есте, по тем опасным грамотам, не поехали. А ныне слышно в детях ваших, в Новгородцах, да и в многих у вас в молодых людях, которые еще не навыкли доброй старине, еже стоять и поборать по благочестии, а иные де не познав доброго наказания отцов своих, благочестивых родителей, да по животах их остались, по грехом, ненаказаны ²⁹⁰² , как жить в благочестии: да и нынче деи те несмысленные, копячася в сонмы, да поостряются на многие стремления и на великое земли неустроение, нетишину, хотячи ввести мятеж велик и расколу в святой Божьей церкви, да оставя православиe и великую старину да приступить к Латынам. А ты ми, сыну, того не возвестишь и не опишешь, со своими архимандритами и со всеми священниками, занеже, сыну, то есть церковное правление паствы нашей и попечение наше святительское. А вы, сынове, православные старые посадники новгородские и тысяцкие, и бояре, и купцы, и весь Великий Новгород, живучи в православии, сами того поберегите, да старые младых понакажите, да лихих восчуните от злого начинания, чтобы как не было у вас Латынам похвалы на веру православных людей: занеже, сынове, то есть злое начинание, прелестно и богоотметное дело, еже благочестия свет оставить, да ко тьме латынской прелести приложиться, как бы не чаючи на себе от Бога будущего суда его, ниже и блюдутся многих вечных мук, да так грубите святой Божьей соборной церкви, да чините и делаете ²⁹⁰³ чрез разума Божьего и спасенных заповедей его. И вы Божьего гнева убойтесь и его страшнаго серпа, великим Захарией Пророком виденного, сходящего с небес на сынов непокоривых, да наказайте бесчиния творящих, распря и соблазны: тии бо льстят сердца незлобивых, и посреди мирнующих вводят неправду и целеную ярость износят безумные; и вы их сами наказывайте о всей доброй старине, по пути отцов своих ходить и жить в прежнем благочестии и тишине. Многие бо люты и не утолимы предстоят в таковом начинании, еже оставить новый закон благочестия и от руки Господа Бога Вседержителя на тех богоотступниках, начинающих вводить богуотметную ересь древних еретиков Каруловых в великое благочестье земель ваших, далее и оного Формоса, последовавшего им папу римского, в нихже ересях Латына и пребывают даже и днесь, и все их папы римские, четверовластно держа Святую Троицу, глаголюще не токмо от Отца Дух Снятой исходящ, но и от Сына Дух, яко раболепна Духа Святого глаголют; и опресночная служат, а субботу хранят и постят в нее, яко жидове, и водой кропятся по всем дням, тем же обычаем жидовским. А о прочих ересях латынских и в святых книгах поискав, обрящете многие зело ереси их; аз же не писах вам того пространней, ради многой речи, еже предолжить писание о сих. И вы молодых от того лиха восчуните, а им не потакайте, злому начинанию, по реченному: «бежи греха, яко ратника, бежи от прелести, яко от лица змиина, да не уязвит твоей души жалом пагубы некончаемые». Зане бо сами весте, како в преждебывшие времена, коликие царства великих земель и многие грады, преступления ради закона и преслушания ради, святых Пророков и Апостолов и святых Отцов учения не послушавше, в пагубу многу впадоша и в запустение быша; а непокорившиеся земли и грады богоподручным си господарем, како сотрошась и разорени быша. А нынче пак, в лета наши, и сами весте, како погаными Турками и нужней одержим бысть великий царствующий прежде благочестием град Константинополь: не той же ли ради латынской прелести погибе и от великого благочестия истребися, еже царь и патриарх от Латин прельстишась, и в той же соблазн их впадоша, и богоотреченного восьмого их сборища взыскаша, и злата ради благочестия отступиша и к Латинам приложишася, имже последоваша Исидор, митрополит богоотступный, и Григорий, ученик его, иже ныне в Литве живет? А ты, сыну Феофиле, нареченный на владычество, и вы архимандриты да и честнейшие игумены и всех семи соборов священники, своих детей духовных, от велика и до мала, всех накажите духовным си учением, укрепляя их в вере православия, берегучи единородных и бессмертных их душ от сетей ловца, многоглавного змия дьявола, яко да не ввалатся в стромины покровенных оных глубоких ям бесовских, ни увязнут в сетях лукавого, прельщением латынских ересей, а пребудут в истинной своей вере христианской и поживут в законе отцов своих, в великом благочестии святой церкви и причтутся в лик правоверных и православных своих родителей, а не прелести латынской с иноверными, ниже богоотступниками. ²⁹⁰⁴ Таковое бо, сынове, прельщение на пагубу душам, врагу дьяволу радость, а Богу последняя мерзость и некончаемая грубость; того ради сам истинна, Христос Спаситель наш Господь, заповедая нам, рекл есть: «пастуси, блюдете стадо овец моих, яко да не заблудят на горах и на дубровах и да не погибнет ни едина же от них», еже есть взыскание и попечениe наше о душах заблудших человеков грешных. А вы, сынове, православные все люди новгородские, к латынской прелести не приступайте, ни вводите в ваше православие, да сами познайтесь: ни един бо в вас, ни дна блазнитесь, хотячи отступить от истины и с пути правого заблудить, а забывая свою великую старину и закона отцов своих, да и своих дедов и прадедов, – но бесчисленное ваше множество народа, души православных людей. Сего бо ради пишу вам, боячися осуждения оного ленивого раба, иже в землю талант скрывшего, а приступа им не сотворивша к сему, яко да не от нас истяжет Бог сугубы грехы за леность ненаказания. И вы, сынове, смиритесь под крепкую руку благоверного и благочестивого государя русских земель, под своего господина под великого князя Ивана Васильевича всея Руси, по великой старине вашего отчича и дедича, по реченному Павлом Христовым Апостолом, вселеньским учителем: «всяк повинуяйся власти Божьей повелению повинуется, а противляяйся власти Божьей повелению противится». И того ради смиритесь, а того великого Божьего и дела церковного и земского в долготу не откладывайте, а святая бы церковь Божья без пастыря не вдовствовала; а по божественным правилам святых Апостолов и святых Отцов, святой Божьей церкви [боле] двух месяцев быть не лзе без пастыря и учителя ²⁹⁰⁵ : и вы о сих поразумейте, а Бог мира да будет с вами. К сему же и пространнее писал бых вам от божественных святых писаний, но вем, яко по данной вам благодати от Бога в купели святого крещения, книжной мудрости и сами разумны есте; но от сих должное Богом врученные нам паствы пишем к вам, вашей же ради душевной пользы. А милость Божья и пречистой его Богоматери на вас, и нашего смирения благословение. А писана на Москва, месяца марта, в лето 79-е.