100. 1465–1470. Послание великого князя Ивана Васильевича к новгородскому архиепископу Ионе о том, чтоб он не имел общения с киевским лжемитрополитом Григорием

Из сборника Импер. Публ. Библиотеки, Q, XVII, № 64 (прежде Толстого, Отд. II, № 68), л. 344–346. Сверено c другим списком той же Библиот. Q, XVII. № 50 (Толстого, Отд. II, № 341), л. 343–347. Подано было в I-м томе Актов Археограф. Экспед. под № 80.

Князь великий Иван Васильевич всея Руси, тебе своему богомольцу, пресвященному архиепископу ²⁸⁷⁹ Великого Новгорода, и Пскова, отчины своей, владыке Ионе повествует: брать наш, Казимир король польский и великий князь литовский, еще к нашему отцу к великому князю к Василию, а нынче ко мне послов своих не одикова присылал, о том, чтобы есма приняли к себе его митрополита Григория: ино, отче, ведомо тебе, тот Григорий митрополит отколе пришел, от кого поставлен: пришел из Рима, от папы, поставлен в Риме Григорием, патриархом бывшим цареградским, который патриарх повиновался папе, с восьмого собора. А сами ведаете, за колико лет разделилась греческая вера с латынской верой, и святыми Отцами заклято и утверждено, что с Латыной не совокупляться. Тот паки Григорий патриарх, чрез святых Отцов правила и заклятия, и не держа за собой стола цареградского, в его место иной патриарх в те времена [на] Царьграде, а он будучи в чужой стране, в чужой области, в Риме, да поставил того Григория, Сидорова ученика, в митрополиты на всю Русь. И отец мой, князь великий Василий Васильевич, и до королевы обсылки еще зарано, послышав только о том Григории, что идет от Рима не по нашей старине, а еще и в литовскую землю не пришел, и он послал к брату своему с тем к королю: «чтобы еси, брате, того Григория от Рима к себе не приимал на нашего отца на общего, на Иону митрополита, а новины бы еси не чинил, а наши бы еси старины не рушил: занеже, брате, старина наша от нашего прародителя великого князя Володимера, крестившего землю русскую; выбрание Ионе, взысканиe митропольское, наших прародителей, великих князей русских и наше и до сих мест, а не великих князей литовских: кто будет нам люб, тот будет у нас на всей Руси, а от Рима митрополиту у нас не быть, мне не надобен». Да многие свои правды поставя и старины приводя, да брату своему тем отвечивал есми, с его послами отказывая, а с своими наказывая: «одноконечно, брате, не приимай его, а у нас ему не быть; а приимешь, ино ты церковь Божью разделяешь, а не мы». Король паки тако принял его к cебе, чрез обсылку нашего отца, и церквей ему русских поступился, что в его отчине, а у нашего Ионы митрополита отняв, чрез свой лист и через нашу старину.

Князь великий повествует: коли паки еси, наш богомолец, приезжал к нашему отцу великому князю, и ко мне великому князю, и к отцу нашему Ионе, митрополиту всея Руси, на свое поставление: ино тебе о том гораздо и самому ведомо всем о том положении: и как паки отец наш того берегучи, князь великий, да и мы, и отец Иона митрополит, того с тобою покрепили, и каков паки ecи обет свой дал Ионе митрополиту, что ти к тому Григорию не приступить ²⁸⁸⁰ , а быть ти не отступну от нашего отца Ионы, митрополита всея Руси, или кто и по нем будет, кто ни буди, митрополит в дому пречистой Богородицы на Москве, у гроба чудотворца Петра, митрополита русского; а опосле отца нашего Ионы митрополита живота его, и ты и отцу нашему Федосию митрополиту обет свой положил своим писанием, да и нынешнему отцу нашему Филипу митрополиту.

Князь великий повествует: нынче паки являем тебе, своему богомольцу: прислал ко мне из Царьгорода Иосиф митрополит Кесарея Филиповы грамоту свою, чтό поставлен у нас на Москве, а у вас был, в моей отчине в Великом Новгороде, да и к нашему отцу к Филипу митрополиту писал, да и к вам свои грамоты послал же, а являет нам о том Григорие, о Сидорове ученике, как ся домышляет, как бы ему мочи ²⁸⁸¹ внити в наше в православное христианство; и он посылал до Царягорода посла своего Мануила, ищучи себе благословения и подтверждения от царьградского патриарха, а хотячи того, как бы ему быть у нас в дому пречистой Богородицы и у чудотворца Петра на Москве, да чтобы о нем патриарх посла своего послал до меня, до великого князя, да от того деи много порекл злата и порт патриарху, да подавал великиe же поминки; и в то деи время патриарх был, Симоном звали, над некоторым монастырем над убогим, а большие церкви Божьи соборные турецкий царь в мизгити починил; a которые церкви оставил патриарху, на тех крестов нет, ни звона у них нет, поют без звона. И тот деи патриарх Симон, человек деи рассудителен, да у того Мануила, у Григорьева посла, поминков и обещанного злата, ни порт не принял, а благословенья не дал, а отрек деи ему так: «аз сам живу в убожестве, в басурманских руках, в чужой неволе, а наше ся уже православие изрушило». И мы также ныне умыслили себе со своим отцом с митрополитом, и с своей матерью с великой княгиней, и со своей братией, и со своими богомольцами, с архиепископом и с епископами и со владыками, и с архимандритами и с честными игуменами, и со всем священством, да того ми посла патриарша, ни Григорьева, и в землю свою впускать не велеть: не требую его, ни его благословенья, ни его неблагословенья, имеем его от себя, самого того патриарха, чуждого и отреченного, и его посла и того окаянного Григория: тебе бы, нашему богомольцу, ведомо было.

Князь великий повестует: которыми делами, отче, тот посол патриарший пойдет к тебе, к моему богомольцу, и к моей отчине ²⁸⁸² , к Великому Новгороду, и к твоим детям, с тем посланием, или тот Григорий учнет ся подсылать которыми речами или писанием: и ты бы, мой богомолец, того также гораздо ся оберегал и детям своим наказал, чтобы тому никоторому посланию патриаршему, ни Григорьеву не верили, ни поученья его, ни ложного благословления не требовали, ни речей бы от него не слушали, ни поминков бы от него не приимал, ни к нему не слал; а помнил бы еси, отче, свой обет, как ся еси обещал преже бывшему отцу нашему Ионе митрополиту всея Руси, на своем поставлении, или кто по нем будет митрополит в дому пречистой Богородицы, у гроба чудотворца Петра митрополита на Москве: также еси его имел во всем отречена.