27 июля

А́нгельския си́лы на гро́бе Твое́м,/ и стрегу́щии омертве́ша,/ и стоя́ше Мари́я во гро́бе,/ и́щущи Пречи́стаго Те́ла Твоего́./ Плени́л еси́ а́д, не искуси́вся от него́;/ сре́тил еси́ Де́ву, Да́руяй живо́т.// Воскресы́й из ме́ртвых, Го́споди, сла́ва Тебе́.

Перевод: Ангельские Силы – при гробе Твоем, и охранявшие его омертвели, а Мария стояла в гробнице и искала пречистое тело Твое. Ты опустошил ад, не потерпев от него, Ты встретил Деву, Дарующий жизнь. Воскресший из мертвых, Господи, слава Тебе!

Живонача́льною дла́нию/ уме́ршия от мра́чных удо́лий,/ Жизнода́вец, воскреси́в все́х Христо́с Бо́г,/ воскресе́ние подаде́ челове́ческому ро́ду:/ е́сть бо все́х Спаси́тель,// Воскресе́ние и Живо́т, и Бо́г все́х.

Перевод: Живоначальною Своею дланию из мрачных глубин всех умерших воскресив, Податель жизни Христос Бог, воскресение даровал человеческой природе, ибо Он – Спаситель всех, Воскресение и Жизнь и Бог всего!

Му́дрости благода́тию, о́тче, укра́шенный,/ труба́ богогла́сная показа́лся еси́ Ду́ха/ и доброде́телей наста́вник, Никоди́ме Богоглаго́ливый,/ всем бо подае́ши спаси́тельная уче́ния,/ жития́ чи́стаго показу́я сия́ние/ бога́тством Бо­же́ственных твои́х слове́с,// и́миже, я́ко свет, ми́рови возсия́л еси́.

Перевод: Благодатью мудрости, отче, украшенный, ты стал Богогласной трубой Духа и наставником добродетелей, Никодим Богоглаголивый, ибо ты подаешь всем спасительные наставления, показывая сияние чистого жития богатством Боговдохновенных твоих поучений, ими же, как свет миру, ты воссиял.

Свети́ло Афо́нское, и На́ксии о́трасль,/ и Це́ркве всея́ богодухнове́ннаго учи́теля,/ Никоди́ма, ве́рнии, да почти́м,/ и́же, исполня́яся му́дрости Боже́ственныя,/ уче́ния бо небе́сная и оби́льная излива́ет вопию́щим:/ сла́ва просла́вльшему тя Христу́,/ сла́ва венча́вшему тя,// сла́ва подаю́щему тобо́ю нам по́мощь.

Перевод: Светило Афонское и росток Наксоса, и всей Церкви Богодухновенного учителя, Никодима, верующие, почтим, который наполнившись Божественной мудрости возглашает обильные небесные учения всем взывающим: «Слава прославившему тебя Христу, слава Венчавшему тебя, слава Подающему через тебя нам помощь».

Я́ко таи́нника изря́днейшаго доброде́тельнаго жития́ и благоче́стия,/ богоно́снаго учи́теля Правосла́вия, пра́зднует тя Це́рковь,/ с Небе́с бо дарова́ния прие́мый,/ озаря́еши Боже́ственными твои́ми писа́нии вопию́щих ти:// ра́дуйся, о́тче Никоди́ме.

Перевод: Как особого хранителя тайн добродетельного жития и благочестия, Богоносного учителя Православия, празднует память твою Церковь, ибо ты получив дарования с Небес, озаряешь Богодухновенными твоими писаниями взывающих к тебе: «Радуйся, отче Никодим».

О богодохнове́нный и вселе́нский и́стины учи́телю, изря́дная Святоимени́тыя Горы́ похвало́, светле́йшая звездо́ Правосла́вныя Це́ркве Собо́рныя, всепреподо́бный и святы́й о́тче Никоди́ме! Да́ждь нам просвеще́ние моли́твами твои́ми во исполне́ние боже́ственныя во́ли, напра́ви стопы́ на́ша ко стезя́м доброде́тельнаго жития́, осени́ нас да́нною тебе́ благода́тию и вразуми́ ум наш, во е́же разуме́ти богому́драя поуче́ния твоя́, да обря́щем в них покая́ние, исцеле́ние, ра́дость, мир, кро́тость, поко́й, любо́вь, и а́ще что добро́ и бла́го и спаси́тельно, и в конце́ живо́т ве́чный, и моли́ся всегда́ ко Го́споду о всех нас, и́скренне лю́бящих тя и на всяк день и час призыва́ющих оте́ческую твою́ бла́гость и по́мощь. Аминь.

Препросла́влен еси́, Христе́ Бо́же наш,/ свети́ла на земли́ отцы́ на́ша основа́вый/ и те́ми ко и́стинней ве́ре вся ны наста́вивый,// Многоблагоутро́бне, сла́ва Тебе́.

Перевод: Препрославлен Ты, Христе Боже наш, как светила на земле отцов наших утвердивший и ими на путь истинной веры всех нас направивший, Многомилостивый, слава Тебе!

Апо́стол пропове́дание и оте́ц догма́ты/ Це́ркве еди́ну ве́ру запечатле́ша,/ я́же и ри́зу нося́щи и́стины, истка́нну от е́же свы́ше Богосло́вия,// исправля́ет и сла́вит благоче́стия вели́кое та́инство.

Перевод: Проповедь Апостолов и отцов догматы веру единую для Церкви утвердили; и она, нося одежду истины, сотканную из небесного Богословия правильно преподает и славит благочестия великое таинство.

Апо́столе святы́й Аки́ло,/ моли́ Ми́лостиваго Бо́га,/ да прегреше́ний оставле́ние// пода́ст душа́м на́шим.

Я́ко ве́лие со́лнце, Це́рковь тя стяжа́вши, сла́вне Аки́ло,/ светлостьми́ уче́ния твоего́ просвеща́ет ве́рно чту́щия тя,// Госпо́день апо́столе.

Правосла́вия ревни́телю,/ благоче́стия наста́вниче и чистоты́,/ и́щущим спасе́ния путеводи́тельный свети́льниче,/ мона́шествующих Богодухнове́нное удобре́ние,/ преподо́бнаго Се́ргия ду­хо́вный собесе́дниче,/ Стефа́не прему́дре,/ уче́ньми и добродея́ньми твои́ми ду́ши просвети́л еси́/ и пусты́ни насели́л еси́,// моли́ Христа́ Бо́га спасти́ся душа́м на́шим.

Перевод: Православия ревнитель, благочестия наставник и чистоты, ищущим спасения путеводная звезда, монашествующих Богодухновенное украшение, преподобного Сергия духовный собеседник, Стефан премудрый, наставлениями и добрыми делами твоими души просветил ты и пустыни населил, моли Христа Бога о спасении душ наших.

Чистото́ю душе́вною боже́ственно вооружи́вся,/ блаже́нную жизнь соверши́л еси́,/ в пусты́ню, я́ко во град, всели́вся,/ благода́ть прия́л еси́ от Бо́га/ исцеля́ти неду́ги приходя́щим к честне́й твое́й ра́це/ и всех возвыша́ти к Боже́ственней высоте́,/ те́мже, име́я дерзнове́ние ко Святе́й Тро́ице,/ помина́й нас, чту́щих па́мять твою́, да зове́м ти:// ра́дуйся, преподо́бне Стефа́не, по́стником удобре́ние.

Перевод: Чистотой душевной с Божией помощью вооружившись, блаженную жизнь ты прожил, в пустыни, как в городе, поселился и получил благодать от Бога исцелять болезни приходящих к почитаемой раке твоей, и всех поднимать на Божественную высоту, потому, имея дерзновение ко Святой Троице, вспоминай нас, почитающих память твою, да взываем к тебе: «Радуйся, преподобный Стефан, постников украшение».

Всеблаже́нне и преподо́бне о́тче Стефа́не, просла́вленный уго́дниче Пресвяты́я Тро́ицы, Престо́лу Ея́ предстоя́ с ли́ки святы́х А́нгел и всех святы́х, помяни́ нас, в беда́х и ско́рбех припа́дающих к цельбо­но́сному твоему́ гро́бу и моля́щихся тебе́, услы́ши моли́твы на́ша и принеси́ к Престо́лу Триипоста́снаго Бо́га, прося́ у Него́ нам бога́тыя ми́лости, здра́вия душа́м и телесе́м на́шим, наипа́че же отпуще́ния грехо́в, благода́ти и спасе́ния. Ты бо, име́я дерзнове́ние к Нему́, мо́жеши умоли́ти Его́, да пода́ст нам в житии́ на́шем блага́я и вся, я́же на по́льзу на́шу и во уготовле́ние к ве́чному животу́. О благи́й и ве́рный ра́бе Бо́жий, и́стинный учениче́ Христа́, избра́нный сосу́де Свята́го Ду́ха, чудотво́рче Стефа́не! Мо́лим тя усе́рдно: сотвори́ нас гре́шных прича́стники бы́ти благода́тных дарова́ний, и́миже Бог тя обогати́, и бу́ди нам по Бо́зе наста́вник к богоуго́дному житию́, утиши́тель бу́ри страсте́й, помо́щник в ско́рбех и беда́х и засту́пник от враг ви́димых и неви́димых, да и мы, предста́тельством и богоприя́тными твои́ми моли́твами бу́дем насле́дницы Ца́рствия Бо́жия и сподо́бимся вку́пе с тобо́ю предстоя́ти Престо́лу Царя́ сла́вы, Ему́же подоба́ет вся́кая сла́ва, честь и держа́ва во ве́ки веко́в. Ами́нь.