14-й день

Свята́го апо́стола Аки́лы

Преподо́бнаго Стефа́на, игу́мена Ма́хрищскаго

Свята́го благове́рнаго кня́зя Влади́мира и святы́я благове́рныя княги́ни Агриппи́ны, Рже́вских чудотво́рцев

Сего́ же дне пое́тся слу́жба Ки́рика и Иули́тты, вку́пе со апо́столом.

ВЕ́ЧЕР

На Го́споди, воззва́х: стихи́ры апо́стола на 3, глас 1.

Подо́бен: Небе́сных чино́в:

Па́вел вели́кий, Богому́дре,/ ми́ра со́лнце, я́коже све́тлую лучу́, во вселе́нную/ тебе́, блаже́нне, пусти́,/ све́тлыми твои́х слове́с сия́нии просвети́ти/ дре́вле в нощи́ неве́дения бе́дствующия.

Чи́стое твое́ се́рдце,/ Боже́ственнаго Ду́ха све́тлыми заря́ми/ озари́вшеся бога́тно, Аки́ло Богогла́се,/ светови́дно вои́стинну яви́ся/ и е́ллинов тьму лю́тую/ Боже́ственною благода́тию разори́.

И́же хра́му твоему́ Боже́ственному притека́ющии,/ и в нем тя ве́рою моля́ще, Аки́ло,/ избавля́ются неду́гов вся́ческих, и бед, и скорбе́й/ свяще́нными твои́ми мольба́ми/ и к Бо́гу хода́тайствы, свяще́нне.

И́ны стихи́ры му́чеников 3, глас 4.

Подо́бен: Я́ко до́бля:

Младоу́мнаго мучи́теля соверше́нным умо́м,/ несоверше́нным же те́лом,/ му́чениче Ки́риче,/ мужему́дренно посрами́л еси́./ Те́мже, на суди́щи тя тя́жко истязу́я,/ налага́ет смерть тебе́,/ помина́ющу жизнь нестаре́емую,/ в ню́же вшел еси́,/ неусе́ченою на ле́та ороша́емь кро́вию.

Я́ко плодови́т виногра́д, напое́нии духо́вными,/ Иули́тта сла́вная,/ от боку́ твое́ю прозя́бша Ки́рика/ приво́диши закала́ема/ и точи́лы му́ченическими вои́стинну изгнете́на,/ с ни́мже источи́вше умиле́ния вино́,/ сердца́ веселите́/ ве́рою творя́щих па́мять ва́шу.

Ра́нам прибли́жившися,/ и строга́ние телесе́ вои́стинну претерпе́ла еси́, досточу́дная,/ очи́ма же зря́щи сыно́вне сконча́ние,/ муче́ние сугу́бо, Иули́тто, прошла́ еси́,/ те́мже дае́т ти и сугу́бы венцы́ Подвигополо́жник,/ побе́ду стра́ждущим всеси́льно да́руя.

Сла́ва, глас 6:

Прииди́те и у́зрите вси стра́нное виде́ние и пресла́вное:/ кто́ ви́де младе́нца, триле́тна су́ща,/ мучи́теля посрами́вша?/ О, чудесе́! Ма́терь сса́ше/ и млекопита́тельнице вопия́ше:/ не бо́йся, ма́ти моя́, мук лю́таго мироде́ржца,/ Христо́с бо есть кре́пость ве́рующим в Него́.

И ны́не, Богоро́дичен или́ Крестобогоро́дичен.

Подо́бен: Тридне́вен:

Лю́ди беззако́ннейшия,/ без пра́вды пригвожда́ющия Тя на Дре́ве,/ Де́ва и Чи́стая Ма́ти Твоя́ зря́щи,/ я́коже Симео́н прорече́,/ утро́бою, Спа́се, уязвля́шеся.

На стихо́вне Окто́иха.

Сла́ва, глас 8:

Триле́тен Тро́ицу пропове́даше/ и млеко́ ссый ма́терь утвержда́ше:/ преста́ни, о ма́ти моя́,/ от слез пла́чущи,/ свы́ше Зижди́тель зрит/ и спасе́т ду́ши на́ша.

И ны́не, Богоро́дичен или́ Крестобогоро́дичен.

Подо́бен: Что́ вас нарече́м:

Не терплю́, Ча́до, ви́дящи Тя, на Дре́ве усну́вша,/ бо́дрость всем подаю́щаго,/ я́ко да и́же дре́вле преступле́ния плодо́м/ сном поги́бельным усну́вшим/ Боже́ственную и спаси́тельную бо́дрость пода́си,–/ Де́ва глаго́лаше, пла́чущися,/ Ю́же велича́ем.

Тропа́рь апо́столу, глас 3:

Апо́столе святы́й Аки́ло,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Тропа́рь му́чеником, глас 8:

Я́ко лоза́ благопло́дная, Иули́тто честна́я,/ грозд зрел принесла́ еси́ Царе́ви, всех Бо́гу,/ сы́на твоего́ Ки́рика сла́внаго,/ муче́нием того́ бога́тно украси́вши/ и твое́ю кро́вию наверши́вши⁵⁸,/ тем и дарова́ тебе́ Вы́шний возме́здие в Вы́шних,/ иде́же лику́юще, помяни́те нас, му́ченицы терпеливоду́шнии.

Ин тропа́рь му́чеником, глас 4:

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

НА У́ТРЕНИ

Кано́н Окто́иха еди́н и апо́стола на 4, его́же краегране́сие: Сла́внаго воспое́м Аки́лу любо́вию. Творе́ние Ио́сифово, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Свяще́ннаго свяще́нными воспои́м Аки́лу пе́сньми и возопие́м:/ того́ моли́твами, Ще́дре, вся спаси́, я́ко Пребла́г.

Весь себе́, блаже́нне, прия́телище Ду́ха светови́дно сотвори́л еси́,/ осия́емь Того́ све́тлыми заря́ми,/ тем су́щия во тьме просвети́л еси́.

Зако́ном Христо́вым огради́в ум твой,/ беззако́нных шата́ние все низложи́л еси́/ и и́дольския хра́мы вся разори́л еси́, пострада́в, Богоблаже́нне.

Богоро́дичен: Сло́вом, Чи́стая, Сло́во во утро́бе зачала́ еси́, сло́вом вся соде́лавшаго./ Сего́ ра́ди Тя словесы́ Боже́ственными воспева́ем, Богора́дованная.

Ин кано́н му́чеников на 4, его́же краегране́сие: Ки́рика пою́ с ро́ждшею му́дренно. Творе́ние Ио́сифово, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Пропове́давше Сло́ва, от Отца́ я́ве рожде́на,/ воплоще́на же от Ма́тере,/ свиде́тели Сего́ страсте́й страстьми́ и сме́ртию бы́сте.

Сла́вная му́ченица, я́ко светоза́рная луна́, совоку́пльшися с со́лнцем,/ из нея́ рожде́нным Ки́риком,/ всю тварь чуде́сными заря́ми просвеща́ют.

Теку́щими измени́ла еси́, я́же ника́коже дви́жима, му́ченице,/ и, на рука́х твоего́ сы́на нося́щи,/ с сим беззако́нных и диа́волю лесть омрачи́ла еси́.

Су́щи от ро́да сла́вна,/ муче́нием же и страда́нии многови́дными, му́ченице Иули́тто,/ Царя́ безсме́ртнаго дщи была́ еси́.

Богоро́дичен: Упраздни́ся смерть Тебе́ ра́ди,/ и а́дово жа́ло потреби́ся, Ма́ти Чи́стая:/ Ты бо безсме́ртнаго Влады́ку, умерщвле́на пло́тию, родила́ еси́.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Возжела́л еси́ Бо́га, я́ко преподо́бен, сла́вне, еди́наго Влады́ку и Царя́,/ и Того́ Боже́ственное хоте́ние несумне́нным се́рдцем испо́лнил еси́.

Кре́постию Честна́го и Боже́ственнаго Ду́ха, Аки́ло прехва́льне,/ лука́ваго кре́пость всю низложи́л еси́,/ пострада́в до́блественне, свяще́ннейше.

Умо́м твои́м чи́стым созерца́я сла́ву Госпо́дню,/ тоя́ причасти́лся еси́ соверше́нно, блаже́нне,/ отше́д от вре́менных к пребыва́ющим.

Богоро́дичен: Еди́н Чи́стый, еди́н Госпо́дь Тя еди́ну я́ко позна́,/ чисте́йшую всея́ тва́ри, Пренепоро́чная,/ от чи́стых Твои́х крове́й воплоти́ся.

Ин

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Небе́сных черто́гов и светоза́рнаго поко́я,/ ве́чнующия же сла́вы сподо́бистеся, му́ченицы сла́внии,/ диа́воля жа́ла боле́зньми страда́ния потре́бльше.

Птене́ц я́ко красе́н, голуби́це целому́дренней сей подо́бился еси́,/ льсти́вому проти́вяся, сла́вне Ки́риче, льсти́вно присту́пльшу/ и укра́сти тща́щуся тя непобеди́маго.

Го́рдаго зми́я, на не́бо положи́вша уста́ и зе́млю потреби́ти хва́лящагося,/ младе́нец незло́бив кре́стным всеору́жием/ до конца́ низложи́ и потреби́.

Богоро́дичен: Не истощи́в недр Оте́ческих, Пречи́стая, Сло́во, вся осуществова́вшее,/ во Твою́, Пренепоро́чная, утро́бу всели́ся, и плоть непреме́нна бысть,/ и челове́ки обожи́ Пресу́щественный.

Конда́к апо́стола, глас 4:

Я́ко ве́лие со́лнце, Це́рковь тя стяжа́вши, сла́вне Аки́ло,/ светлостьми́ уче́ния твоего́ просвеща́ет ве́рно чту́щия тя,/ Госпо́день апо́столе.

Ин конда́к му́чеников, глас 2.

Подо́бен: Тве́рдыя:

Же́ртва прия́тна, Бо́гови приноси́ма,/ и свиде́тель ве́рен Христо́в явля́емь,/ с ма́терию пострада́л еси́ Иули́ттою, Ки́риче сла́вне,/ с не́юже Христа́ Бо́га моли́ти не преста́й о всех нас.

Та́же седа́лен, глас 4.

Подо́бен: Ско́ро предвари́:

Па́вла глаго́лы озари́в твою́ ду́шу,/ я́ко со́лнце, просия́л еси́ Богоразу́мия све́том, Аки́ло блаже́нне,/ вене́ц же муче́ния испле́л еси́ зако́нно./ Те́мже источа́еши ре́ки исцеле́ний ве́рою пра́зднующим, блаже́нне, па́мять твою́.

Сла́ва, му́чеников, глас то́йже.

Подо́бен: Удиви́ся Ио́сиф:

Тезоиме́нно, страда́льче, пропове́дник яви́лся еси́ и́стинен,/ пострада́в с ма́терию, Ки́риче сла́вне Христо́в, благоче́стия тече́ние сконча́в,/ и был еси́ нам му́жество ве́ры, попра́в вра́жию всю си́лу,/ и с Небесе́ прия́л еси́ вене́ц с ма́терию твое́ю, сла́вне./ Христа́ моли́те спасти́ся всем, творя́щим па́мять ва́шу.

И ны́не, Богоро́дичен:

Треволне́нии страстны́ми безсо́вестный аз обурева́емь, Чи́стая, призыва́ю Тя те́пле:/ да не пре́зриши мене́, окая́ннаго, поги́бнути, бе́здну милосе́рдия ро́ждши,/ ра́зве бо Тебе́, наде́жды не и́мам./ Да не враго́м у́бо обра́дование и смех, наде́явся на Тя явлю́ся,/ и́бо мо́жеши, ели́ко хо́щеши, я́ко Ма́ти су́щи всех Бо́га.

Крестобогоро́дичен:

Де́ва и А́гница, ви́девши на Кресте́/ без се́мене из Нея́ А́гнца ро́ждшагося и копие́м прободе́на,/ печа́ли уя́звена стрела́ми, вопия́ше боле́зненно, восклица́ющи:/ что́ но́вое та́инство?/ Ка́ко умира́еши, И́же живота́ еди́н Госпо́дь?/ Те́мже воскресни́, па́дшаго воздвиза́я пра́отца.

Песнь 4

Ирмо́с: Услы́шах, Го́споди,/ слух Твоего́ смотре́ния,/ и просла́вих Тя,/ Еди́не Человеколю́бче.

Дрема́нием спя́щия лука́ваго, Аки́ло, злоче́стия/ ко благоче́стия све́ту воздви́гл еси́.

Го́рдое свире́пство врага́ низложи́л еси́, Аки́ло,/ смире́нием Боже́ственным вооружи́вся.

Блаже́нно пострада́л еси́ за Христа́, кровь твою́ излия́в,/ свяще́нник и свиде́тель страда́ний Его́.

Богоро́дичен: Мы́сленну Тя пала́ту и высо́кий престо́л Царя́,/ Богоро́дице Влады́чице, имену́ем.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Младе́нствуя те́лом, и соверше́нным, му́чениче, умо́м/ злонача́льнаго низложи́л еси́, лука́вство злосотво́ршаго.

Я́ко плодови́та лоза́, му́ченице Иули́тто, грозд израсти́ла еси́,/ до́бляго вои́стинну Ки́рика, муче́ния сла́дость иска́пающа.

Ми́лостивно взира́ющи, я́коже а́гница на а́гнца му́ченика,/ Иули́тта досточу́дная, закала́ема усе́рдно.

Богоро́дичен: Зако́ны естества́, Пречи́стая, па́че естества́ в рождестве́ Твое́м изменя́ются:/ Соде́теля бо па́че ума́ и сло́ва породила́ еси́.

Песнь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Сла́дко сло́во при́сно источа́я благоче́стия, прему́дре,/ го́рькою пре́лестию одебеле́вшия услади́л еси́ ду́ши,/ я́ко священнотаи́нник, Аки́ло прехва́льне.

Твоя́ похвалы́ Лука́ Богогла́сный вои́стинну написа́,/ свяще́ннаго бо Па́вла учени́к и Боже́ствен странново́дец быв,/ Боже́ственным я́ве наказу́я.

Я́коже звезду́ я́сну, све́тлы лучи́ испуща́ющу,/ честно́е пропове́дание, свяще́ннаго обре́т Па́вла,/ от того́ зари́ прия́л еси́ словеса́ и свет был еси́.

Богоро́дичен: Ма́ти и раба́ Христа́, вопло́щшагося нас ра́ди, была́ еси́,/ Его́же приле́жно всегда́ моли́, е́же спасти́ нас,/ Богоро́дицу Тя Чи́стую имену́ющих.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Терза́ему, Богому́драя, ра́нами те́лу твоему́, и раздробля́ему,/ тле́ния дебельство́ совлекла́ еси́,/ во оде́жду же облекла́ся еси́, ю́же от Де́вы Единоро́дный, плоть поне́с,/ челове́ки обожи́в, облече́.

Обнажи́лася еси́ те́лом, му́ченице всесла́вная, преоби́девши плотски́й студ,/ и врага́, Е́ву обнажи́вшаго, Иули́тто, дре́вле,/ терпели́вно вмужи́вшися, в ве́чный студ оде́яла еси́.

Во главу́ усе́чена бы́вши, главу́ зми́я, му́ченице, сокруши́ла еси́,/ лише́на бы́вши бога́тства, Небе́сное бога́тство насле́довала еси́,/ недви́жимое прии́мши Ца́рство со все́ми му́ченики, прехва́льная.

Богоро́дичен: Бо́жие Бог Сло́во плоть прия́т,/ мы́сленну и одушевле́ну, от Тебе́, Пречи́стая,/ и за милосе́рдие бысть Челове́к,/ и обожи́ мя, преступле́нием отринове́на,/ Его́же моли́ спасти́ вся́ческая.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призывя́ю бе́здну:/ от тли, Бо́же, мя возведи́.

Излия́ся благода́ть во устну́ твое́ю, блаже́нне свяще́нне,/ те́мже благослови́ тя всех Госпо́дь во ве́ки, Аки́ло Богодохнове́нне.

Неду́гом разли́чным измене́ние и согреша́ющим душа́м очисти́лище/ твоя́ моли́тва бысть, Богоно́се Аки́ло блаже́нне.

Ше́ствия твоя́, боже́ственно сотворя́ема и к путе́м Бо́жиим направля́ема,/ блудя́щим яви́шася наставле́ние и стезя́ спаси́тельная.

Богоро́дичен: Господоиме́нная Де́во Всенепоро́чная,/ Я́же благи́х Пода́теля Бо́га ро́ждшая,/ Тя пою́щия всегда́ от напа́стей многообра́зных спаси́.

Ин

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Преплы́вше безме́рных мук, прехва́льни, непостоя́нную во́ду кре́стным окормле́нием/ и ко приста́нищу ти́хому я́ве доидо́ша,/ погрузи́вше фарао́на неви́димаго кро́вными струя́ми.

Игра́ет Икони́йский град, тебе́ воспита́вый,/ и краси́тся па́мятию твое́ю честно́ю Тарс, Иули́тто:/ муче́ние бо в том сконча́ла еси́ с сы́ном твои́м/ и венце́в побе́ды сподо́билася еси́.

Презре́ла еси́ многоплете́нныя му́ки, и го́рлица прекра́сная яви́лася еси́,/ со птенце́м возлете́вши и над все́ми возвы́сившися сетьми́ зми́я, всехва́льная,/ и во оби́телех Небе́сных прему́дро почи́ла еси́.

Богоро́дичен: Кореносека́тельным серпо́м Твоея́ моли́твы посецы́, Отрокови́це,/ лука́вая помышле́ния души́ моея́ и плодоно́сну покажи́, молю́ся,/ всех бо Соде́теля, Бо́га и Спа́са, родила́ еси́.

Конда́к му́чеников, глас 4.

Подо́бен: Яви́лся еси́:

Во объя́тиих нося́щи христому́ченица Иули́тта Ки́рика,/ на по́двизе му́жески веселя́щися, взыва́ше:/ Христо́с есть му́чеников похвала́.

И́кос:

Ум мой просвети́, Христе́, све́том за́поведей Твои́х,/ я́ко да возмогу́ воспе́ти святы́я и по́двиги изрещи́./ Кий же язы́к изглаго́лати возмо́жет страда́ния, я́же претерпе́ша?/ Тем припа́даю Тебе́, Человеколю́бче:/ оставле́ние пода́ждь души́ мое́й окая́нней,/ да́руй ми вре́мя покая́ния,/ на се бо во́лею восприя́л еси́ плоть, да вся на живо́т возведе́ши,/ его́же страда́льцы получи́вше, непреста́нно пою́т:/ Христо́с есть му́чеников похвала́.

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огни́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Истка́в себе́ нетле́ния оде́жду Боже́ственным Ду́хом,/ весь красе́н был еси́ и врага́ обнажи́л еси́,/ и́же от него́, Аки́ло, обнаже́нныя оде́ял еси́ во оде́жду светови́дну/ и свет спаси́тельный.

Гла́дом мы́сленным одержи́мыя лю́ди и бе́дствующия/ хле́бом слове́с, досточу́дне Богому́дре напита́л еси́/ и Небе́сныя трапе́зы прича́стники сотвори́л еси́,/ священнотаи́нник быв Богови́ден.

Свято́му хра́му твоему́ притека́ющии здра́вие прие́млют,/ и страсте́й разреша́ются, и от неду́г очища́ются,/ воспева́юще тя любо́вию и вопию́ще, прехва́льне:/ благослове́н еси́, Бо́же оте́ц на́ших.

Богоро́дичен: Умертви́ся пе́рвее Ада́м тлетво́рною сне́дию, Всенепоро́чная,/ Ты же, ро́ждши Живо́т наш, сего́, Де́во, оживи́ла еси́./ Тем я́ко до́брых Тя вино́вну воспева́юще, вопие́м:/ благослове́нна еси́, Я́же Бо́га пло́тию ро́ждши.

Ин

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Па́лицами сокруша́ет твое́ те́ло беззако́нный, Богому́драя Иули́тто,/ по́мысла кре́пость ника́коже подви́же:/ жезл бо си́лы – Крест Христо́в держа́ла еси́.

Ту́чами кро́вных наводне́ний/ погаси́ша огнь безбо́жия Христо́вы страда́льцы, зову́ще усе́рдно:/ благослове́н еси́, Го́споди Бо́же, во ве́ки.

Нося́щи на руку́, му́ченице, его́же родила́ еси́,/ предста́ла суди́щу и сугу́б до́брый сконча́ла еси́ по́двиг, вопию́щи:/ благослове́н еси́, Го́споди Бо́же, во ве́ки.

Богоро́дичен: Глаго́лом Твои́м после́дующе,/ блажи́м Тя, ро́ди вси, Отрокови́це,/ Блаже́ннаго Бо́га Ма́терь я́вльшуюся,/ в Него́ ве́рующия блаже́нны соде́лавшаго.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки.

Ра́достно на Небесе́х с Боже́ственными ученики́, и слуги́, и самови́дцы Сло́ва,/ я́ко учени́к живы́й, Аки́ло, и боже́ственне обожа́емь,/ помина́й ве́рою и любо́вию тя пою́щия.

По́тов твои́х то́ки, ре́ки всем нам Боже́ственных чуде́с источа́ют, блаже́нне,/ и то́ки страсте́й безме́стных изсуша́ют всегда́,/ и ополче́ния погружа́ют льсти́ваго.

Приступле́нием обожа́емь при́сно, я́ко приближа́яся Бо́гу умо́м невеще́ственным,/ весь свет еси́, отреши́вся от пло́ти,/ и ви́диши, я́же ви́дят А́нгели,/ сла́вне Аки́ло, Христо́в священному́чениче.

Богоро́дичен: Я́ко всех вино́внаго Бо́га,/ вы́шше вся́кия вои́стинну, Чи́стая, вины́ во утро́бе заче́нши,/ и нас ра́ди по нам я́вльшася, ро́ждшая, Пренепоро́чная,/ Сего́ моли́ о пою́щих Тя.

Ин

Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

Све́тлыя зве́зды, я́же на тве́рди церко́вней неле́стно водрузи́вшеся/ и зе́млю чудесы́ просве́щше, благоче́стно чту́тся от всех днесь,/ песносло́вящих Христа́ во ве́ки.

Я́коже нова́ ветвь ко́рене Богонасажде́нна су́щи, Богому́драя,/ честна́го твоего́ сы́на нося́щи, увяди́ла еси́ нече́стия сады́,/ вопию́щи с ним и глаго́лющи:/ Тя превозно́сим, Христе́, во ве́ки.

Я́коже тельца́ ю́на, ю́ница су́щи прекра́сна, Иули́тто,/ но́сищи Ки́рика сла́внаго, же́ртву жи́ву/ от Де́вы А́гнцу возсия́вшему и заколе́ному за кра́йнее милосе́рдие.

Богоро́дичен: Вопло́щся Сло́во от пречи́стых Твои́х крове́й, Отрокови́це,/ прини́кшия к безслове́сным плотски́м страсте́м позна́нием Боже́ственным обожи́, Чи́стая,/ Его́же превозно́сим во вся ве́ки.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Свяще́нными тя пе́сньми свяще́нна бы́вша сосу́да Сло́ва/ и че́стна, Сего́ и прему́дра пропове́дника, и ми́ра свети́льника,/ и утвержде́ние ве́ры на́шея, соше́дшеся, Аки́ло, согла́сно ублажа́ем.

Я́ко потреби́тель ле́сти, и язы́ков наста́вник,/ и Боже́ственный Спа́са страда́лец, и сограждани́н,/ и ссе́льник святы́х А́нгелов, Аки́ло Богогла́се,/ с ни́ми Влады́ку умоли́ спасти́ ду́ши на́ша.

Тя, ученика́ у́бо Па́влу, уве́девше, Аки́ло, ми́рови же свети́льника неле́стна/ и свяще́ннаго му́ченика, потреби́теля и́долов и ра́зума Бо́жия вводи́теля,/ благоче́стною мы́слию, Богому́дре, ублажа́ем.

Всесвята́я твоя́ па́мять возсия́вши ми́ру,/ я́ко со́лнце, просвеща́ет ду́ши благоче́стно пою́щих тя,/ в не́йже моли́ся, блаже́нне, да́ти очище́ние грехо́в,/ и мир глубо́к, и ве́лию всем ми́лость.

Богоро́дичен: Све́тел Тя све́щник прозря́ше проро́к,/ Све́та, возсия́вшаго от Све́та, Де́во Ма́ти, нося́щу,/ просвеща́ющаго бога́тно пе́рвее омраче́нныя/ заря́ми несказа́ннаго Своего́, Пренепоро́чная, Божества́.

Ин

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Исцеле́ние приноша́ет ра́ка сла́вных страда́лец,/ благода́тию Боже́ственнаго Ду́ха напая́емая:/ прииди́те, почерпи́те, и освяти́те ду́ши,/ и от неду́г очи́ститеся, мучениколю́бцы, Да́теля до́брых велича́юще.

Я́коже ши́пок, му́ченическими прозябо́сте удо́лии, всеблаже́ннии,/ я́коже крин благово́нен, я́ко рая́ Боже́ственное прозябе́ние,/ ми́рно я́ко вои́стинну иска́пающе украше́ние,/ и ве́рных ду́ши благово́нием та́йным веселите́.

Ра́нами му́ченическцми украси́стеся, добропобе́днии му́ченицы,/ и А́нгелом я́ве уподо́бльшеся, Бо́гу предстоите́, побе́дным венце́м све́тло обложе́ни/ и чту́щим вас очище́ние грехо́в прося́ще.

Му́ченица, я́коже а́гница, я́ко а́гнца сы́на своего́ нося́щи,/ посреде́ волко́в невре́дно про́йде и в Небе́сную огра́ду всели́ся;/ при́сно сих моли́твами, Го́споди, спаси́ ны, тех свяще́нную па́мять чту́щия.

Богоро́дичен: Просвети́, две́ре Све́та, ослепле́нную ду́шу мою́ страстьми́,/ и злы́ми по́мыслы омраче́нную, и бе́дствующую,/ и изми́ мя от напа́стей, и бед, и скорбе́й,/ да сла́влю Тя, упова́ние ве́рных и утвержде́ние.

Свети́лен Окто́иха. Сла́ва, му́чеников.

Подо́бен: Жены́, услы́шите:

Ра́дуйся, красу́йся и лику́й, све́тло торжеству́я, Икони́йский гра́де,/ я́ко из тебе́ возсия́ша два свети́льника прему́дра,/ Иули́тта сла́вная и Богому́дрый Ки́рик,/ зако́нно бо пострада́вше, вене́ц прия́ша сла́вы.

И ны́не, Богоро́дичен:

Ма́терь и Де́ву Тя пое́м, Всенепоро́чная:/ Ты бо Бо́га всех во чре́ве носи́ла еси́,/ Его́же совокупле́ние пропове́дающе, непрело́жно по ипоста́си,/ Тя, Богоро́дицу Влады́чицу, испове́даем вои́стинну, и́же Тебе́ ра́ди спаса́емии.

На хвали́тех стихи́ры на 4, глас 1. Самогла́сны. Ге́рманово:

До́бляго страда́льца и пропове́дника ве́ры/ с ма́терию Богому́дрою досто́йно восхва́лим:/ си́и бо, терпели́вно пострада́вше,/ злонача́льнаго врага́ си́лою Креста́ му́жески низложи́ша,/ те́мже венцы́ прия́ша от Подвигополо́жника Бо́га/ и мо́лят Его́ со дерзнове́нием непреста́нно/ спасти́ ве́рою творя́щих свяще́нное их страда́ние.

Глас 2: И́же от пеле́н испо́лнен благода́ти,/ име́яй сед ра́зум,/ в побе́де подвиго́в твои́х, му́чениче Ки́риче,/ моли́ся с ма́терию твое́ю Христу́ Бо́гу/ дарова́ти мир ми́ру,/ я́ко Тро́ицы ве́лий испове́дник.

Младе́нец яви́лся еси́ в му́ченицех,/ соверше́н же показа́лся еси́ ра́зумом,/ отне́леже Безнача́льное Сло́во прия́т, всехва́льне,/ огня́ не устраши́лся еси́ беззако́нных./ С ма́терию твое́ю Зижди́теля моли́,/ да спасе́т я́ко Спас ду́ши на́ша.

Сла́ва, глас то́йже. Византи́ево:

Прииди́те, ве́рнии, хвала́ми, соше́дшеся,/ венча́ем дво́ицу всесвяту́ю,/ Тро́ице честь держа́щую:/ и́дольскую бо пре́лесть/ и мучи́телей умышле́ние свои́ми нога́ми попра́ша./ Сих восхваля́юще,/ ве́рнии, взыва́ем, глаго́люще:/ ра́дуйся, Иули́тто всечестна́я,/ я́же же́нскую не́мощь отве́ргши и му́жески подви́гшися;/ ра́дуйся, Ки́риче всеблаже́нне,/ и́же триле́тен те́лом/ и многоко́зненнаго врага́ низло́ж./ Ра́дуйтеся, на́ша похвала́ и сла́ва,/ ве́рою пра́зднующих свяще́нное ва́ше страда́ние./ Е́юже мо́лим моли́ти при́сно всех Го́спода/ ми́ру дарова́ти мир/ и душа́м на́шим ве́лию ми́лость.

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

Дре́ву Кре́стному Тя, Иису́се, пригвожде́на зря́щи Неискусобра́чная,/ пла́чущи, глаго́лаше:/ Ча́до сла́дкое,/ почто́ оста́вил еси́ Мене́, ро́ждшую Тя, еди́ну,/ Све́те непристу́пный Пребезнача́льнаго Отца́?/ Потщи́ся, и просла́вися,/ я́ко да сла́ву получа́т Боже́ственную/ и́же Боже́ственныя стра́сти Твоя́ сла́вящии.

На стихо́вне Окто́иха.

Сла́ва, глас 4. Анато́лиево:

Ра́дуйся, красу́йся и весели́ся, Икони́йский гра́де,/ я́ко из тебе́ прозябе́ плод сла́вен,/ Иули́тта, прекра́сная и добропобе́дная му́ченица,/ и из нея́ честны́й о́трок, Ки́рик тезоимени́тый:/ все бо кова́рство мучи́теля врага́ му́жески попра́вше,/ венцы́ побе́ды досто́йно прия́ша,/ пропове́давше лю́дем чести́ и покланя́тися Пресвяте́й Тро́ице./ Те́мже и мы со дерзнове́нием возопие́м/ сих просла́вльшему Христу́ Бо́гу на́шему,/ умири́ти мир и спасти́ ду́ши на́ша.

И ны́не, Богоро́дичен или́ Крестобогоро́дичен.

Подо́бен: Я́ко до́бля:

А́гнца и Па́стыря Тя/ на Дре́ве я́ко ви́де,/ А́гница ро́ждшая рыда́ше/ и ма́терски Ти веща́ше:/ Сы́не возжеле́нне,/ ка́ко на Дре́ве Кре́стнем пове́шен еси́, Долготерпели́ве?/ Ка́ко ру́це и но́зе Твои́, Сло́ве,/ пригвозди́шася от беззако́нных/ и кровь Твою́ излия́л еси́, Влады́ко?

НА ЛИТУРГИ́И

Блаже́нны Окто́иха и му́чеников, песнь 3-я на 4. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Кори́нфяном, зача́ло 154, от полу́. Аллилу́ия, глас 7: Из уст младе́нец и ссу́щих соверши́л еси́ хвалу́. Ева́нгелие от Луки́, зача́ло 51, от полу́. Прича́стен: Ра́дуйтеся, пра́веднии, о Го́споде:

Моли́тва

О дво́ице свята́я, страстоте́рпцы Христо́вы, преблаже́нне Ки́риче, в триле́тнем во́зрасте пострада́вый, с богому́дрою ма́терию Иули́ттою! Кровьми́ ва́шими, я́ко багряни́цею, украси́вшиися и Небе́сных черто́гов и ве́чнующия сла́вы сподо́бившиися, не забу́дите и нас, на земли́ су́щих, но те́плым хода́тайством ва́шим пред Бо́гом изба́вите всех нас от вся́кия ско́рби и боле́зни. Се бо, к честне́й ико́не ва́шей благогове́йно припа́дающе и лобыза́юще ю́, мы, недосто́йнии и многогре́шнии, к вам, я́ко к ско́рым помо́щником и те́плым моли́твенником на́шим, прибега́ем и с сокруше́нным и смире́нным ду́хом вопие́м: не пре́зрите моле́ния нас, гре́шных, немощны́х, во мно́гия беззако́ния впа́дших, но, я́ко благода́тию Бо́жиею венча́ннии, очи́стите нас от неду́г на́ших и испроси́те нам у Христа́ Бо́га на́шего здра́вие душе́вное и теле́сное. Вы бо неоску́дную благода́ть исцеле́ний от Спа́са на́шего Иису́са Христа́ за ве́ру ва́шу, муче́нии запечатле́нную, прия́ли есте́. Тем же у́бо помози́те всем, в лю́тых не́мощех лежа́щим и в челове́честей по́мощи отча́явшимся, к вам же те́пле с ве́рою прибега́ющим, и исцеле́ние тем подава́йте неоску́дно, всем же ве́рным грехо́в оставле́ние испроси́те, да сла́вят ди́внаго во святы́х свои́х Го́спода Бо́га и Спа́са на́шего Иису́са Христа́, и Пречи́стую Ма́терь Его́, и ва́ше те́плое заступле́ние, все́гда, ны́не, и при́сно, и во ве́ки веко́в. Ами́нь.

Святой апостол Акила и жена его Прискилла апостолы из семидесяти, были верными учениками святого апостола Павла, разделившими его труды и смирение Христу. Святой Акила был родом из Понта, но затем переселился в Рим. При императоре Клавдии (41–54) святых Акилу и Прискиллу, как евреев, выселили из Рима. Такие действия Клавдия были вызваны разногласиями евреев относительно почитания Христа, император опасался возникновения от их споров брожения и смуты. Святые Акила и Прискилла поселились в Коринфе и занялись ремеслом изготовителей палаток. Там они встретились со святым апостолом Павлом, пришедшим проповедовать веру Христову в Коринф. Апостол Павел поселился у благочестивой четы и занимался изготовлением палаток. Святые Акила и Прискилла горячо восприняли проповедь великого апостола и крестились (по другим источникам, они были крещены еще в Риме апостолом Петром).

Через полтора года апостол Павел отправился в Сирию. Вместе с ним отправились святые Акила и Прискилла. В Ефесе апостол Павел оставил их для проповеди слова Божия ефесянам, а сам отбыл в Иерусалим.

Известно влияние святых Акилы и Прискиллы на одного из известных вероучителей того времени, Аполлоса, впоследствии ставшего апостолом от семидесяти. Аполлос во многом верно учил о Христе, но знал только Иоанново крещение. Святые Акила и Прискилла разъяснили ему учение Христа Спасителя.

После смерти императора Клавдия святые Акила и Прискилла вернулись в Рим, но пробыли там недолго. Апостол Павел назначил святого Акилу епископом в Асию. Святые Акила и Прискилла усердно трудились, проповедуя слово Божие не только в Асии, но и в Ираклии, и Ахаии. Проповеди святых Акилы и Прискиллы постоянно сопутствовала молитвенная помощь апостола Павла. О его постоянной памяти о своих учениках известно по при ветствиям в апостольских Посланиях. Так, в Послании к Римлянам апостол Павел писал: «Приветствуйте Прискиллу и Акилу, сотрудников моих во Христе Иисусе, которые голову свою полагали за мою душу, которых не я один благодарю, но и все Церкви из язычников, и домашнюю их церковь» (Рим.16:3–4). Святые Акила и Прискилла приняли смерть от язычников. Мощи святых находятся в Риме.

Святые мученики Кирик и Иулитта пострадали за Христа около 305 года в царствование римского императора Диоклитиана (284–305). Они жили в г. Иконии Ликаонийской области (Малая Азия). Святая Иулитта происходила из рода римских императоров, была христианкой. Рано овдовев, святая Иулитта одна воспитывала маленького сына Кирика.

Когда в Ликаонийской области началось воздвигнутое императором Диоклитианом гонение на христиан, святая Иулитта оставила свой дом и вместе с трехлетним сыном и двумя верными служанками отправилась странствовать. Скрывая свое происхождение, она, как странница и нищая, пришла в сирийский город Селевкию, но и там язычники жестоко мучили христиан. Тогда святая Иулитта отправилась в киликийский город Тарс и поселилась там среди бедняков. Однако в скором времени ее узнали и вместе со святым Кириком отвели на суд к гонителю христиан игемону (правителю) Александру. Святая Иулитта, укрепленная Господом, исповедала себя христианкой. У нее отняли ребенка и стали жестоко избивать. Святой Кирик, видя мучения матери, рыдал и вырывался из рук державших его язычников. Игемон взял святого Кирика на руки и стал его утешать, но мальчик еще более взволновался и стал громко восклицать: «Я христианин, пусти меня к матери». Тогда разгневанный игемон бросил его с высоты своего помоста на каменные ступени. Святой Кирик покатился по ним и, обагрив их своей кровью, мученически скончался.

Когда святую Иулитту перестали пытать, она увидела окровавленное тело сына и со слезами на глазах благодарила Бога за то, что Он удостоил его мученического венца. Святую Иулитту вновь подвергли пыткам: ее подвесили и строгали тело железными крюками, а раны поливали кипящей смолой. Святая мученица мужественно переносила все пытки. Тогда игемон приказал ее обезглавить.

Тела святых мучеников Кирика и Иулитты были брошены на съедение псам, но ночью две служанки взяли их и с честью погребли. Одна из служанок дожила до царствования святого равноапостольного императора Константина Великого (324–337; память 21 мая) и показала христианам место погребения святых мучеников. Мощи их были обретены нетленными и благоуханными, больные получали от них исцеление.

В честь святых мучеников Кирика и Иулитты близ Константинополя был устроен монастырь, а недалеко от Иерусалима в Иудее (возможно, между Иерусалимом и Иерихоном) – храм. По свидетельству русских паломников ХII–XV веков, святые мощи мученика Кирика почивали в Софийском храме в Константинополе.

Святые мученики Кирик и Иулитта с древности почитались на Руси. Им посвящали храмы, приделы, часовни, во многих храмах были иконы с изображением святых мучеников. Первый храм во имя святых Кирика и Иулитты был построен, вероятно, в Угодичах, что на берегу озера Неро, близ Ростова Великого. По преданию, этот храм строился один день в память крещения жителей села Угодич при равноапостольном князе Владимире. В XIX веке в Никольском храме в с. Угодич был придел во имя мучеников Кирика и Иулитты.

Мученикам Кирику и Иулитте молятся о семейном счастье и о выздоровлении больных детей. В старинных рукописных сборниках встречается более подробное житие мучеников Кирика и Иулитты. В нем излагается спор святого Кирика с игемоном Александром о вере, описаны чудеса, а также приведена предсмертная молитва святого мученика. В ней святой Кирик просил Господа послать прощение грехов, изобилие и радость в дома тех, кто будет помнить день его мучений и в этот день подавать милостыню и кормить бедных. Тем, кто составит его житие, святой мученик просил милости в день судный; того, кто будет молиться ему во время потопа, просил избавить от смерти. Явившийся мученику Кирику Господь Иисус Христос обещал исполнить его молитву в преизбытке.

Литература

1. Извольский С. П. Жития святых. Месяц июль. М., 1877, с. 133–135.

2. Димитрий (Самбикин), архиепископ. Месяцеслов святых всею Русскою Церковью или местно чтимых. Вып. 11, июль. Тверь, 1901, с. 197–200.

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 1.

Подо́бен: Небе́сных чино́в:

Наста́, Богоно́се, со́лнца светле́йший твой пра́здник,/ озаря́ет приходя́щия к тебе́ ве́рою,/ и безсме́ртием облагоуха́ет,/ и душа́м источа́ет исцеле́ния,/ Стефа́не преподо́бне,/ моли́твенниче о душа́х на́ших.

Крест Госпо́день взем, преподо́бне Стефа́не,/ и́стинно после́довал еси́ Христу́,/ нас ра́ди на Кресте́ распе́ншемуся,/ и Его́ ра́ди любве́ вся оста́вил еси́,/ и Того́ еди́наго возлюби́л еси́,/ Его́же моли́ спасти́ся нам.

Чу́вственныя стра́сти теле́сныя/ победи́в воздержа́ния бразда́ми,/ чудоде́йственниче Стефа́не,/ и ре́вности безпло́тных на земли́ показа́в,/ вся плотска́я жела́ния ду́ху повину́л еси́,/ тем ны́не в Небе́сных селе́ниих водворя́яся,/ моли́ о душа́х на́ших.

Блаже́нне Стефа́не,/ основа́ние положи́в доброде́тели,/ дре́вняго челове́ка совле́клся еси́ с похотьми́/ и во Христа́ обле́клся вои́стинну,/ тем и обличи́л еси́, преподо́бне, мно́гая вра́жия ополче́ния,/ наста́вник мона́хов быв./ Моли́ спасти́ся душа́м на́шим.

Сла́ва, глас 6:

Све́тлый днесь возсия́ нам и всепра́зднственный день,/ я́коже второ́е со́лнце,/ просвеща́я, и наставля́я, и отгоня́я тьму помраче́ния на́шего,/ ве́рных созыва́ет любо́вию/ к честне́й ра́це припа́дати и облобыза́ти ю./ Моли́, мо́лимся, о́тче Стефа́не,/ да́ти ми́ру мир/ и душа́м на́шим ве́лию ми́лость.

И ны́не, Богоро́дичен: Богоро́дице, Ты еси́ лоза́ и́стинная:

На стихо́вне стихи́ры, глас 2.

Подо́бен: До́ме Евфра́фов:

Дом Ду́ха Свята́го/ был еси́, преподо́бне,/ просвеща́я и наставля́я/ ве́рою и любо́вию/ притека́ющих к тебе́.

Стих: Честна́ пред Го́сподем/ смерть преподо́бных Его́.

Блаже́н вои́стинну/ и преблаже́н яви́лся еси́,/ преподо́бне Стефа́не,/ мона́шествующих наста́вниче/ и благоче́стия побо́рниче.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Прииди́те, ублажи́м/ преподо́бнаго Стефа́на,/ по́стника и возде́ржника/ и мона́хов нача́льника,/ Пресвяте́й Тро́ице уго́дника.

Сла́ва, глас то́йже:

Прииди́те днесь, ли́цы мона́шестии,/ притеце́м ко гро́бу преподо́бнаго Стефа́на,/ моля́щеся Христу́ Бо́гу на́шему,/ прося́ще грехо́в проще́ние,/ и наро́ду на́шему на враги́ побе́ды,/ и плене́нным свобожде́ния, и ми́ру устрое́ния,/ и Це́рквам соедине́ния,/ и душа́м на́шим ве́лия ми́лости.

И ны́не, Богоро́дичен: Все упова́ние мое́: Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 2.

Подо́бен: Егда́ от Дре́ва:

Боже́ственный глас Ева́нгелия Христо́ва услы́шав,/ ми́ра оста́вил еси́ бога́тство и сла́ву,/ и, крест свой на ра́мо взем,/ Христо́ви после́довал еси́ невозвра́тным по́мыслом,/ и те́сный путь по́стничества проше́л еси́, ра́дуяся,/ и а́нгельским лико́м прича́стник показа́лся еси́,/ Богому́дре Стефа́не преподо́бне,/ с ни́ми же моли́ся о чту́щих честну́ю па́мять твою́.

Егда́ Боже́ственное раче́ние на́йде на тя, Стефа́не прему́дре,/ тогда́ оте́чество оста́вил еси́,/ в пусты́ню, я́ко во град, всели́лся еси́,/ и та́мо мона́хов сонм собра́л еси́,/ с ни́ми же порабо́тал еси́ Христу́,/ Его́же ра́ди распя́лся еси́ ми́рови,/ и с ми́ром к преми́рному, ра́дуяся, возше́л еси́,/ иде́же а́нгельская во́инства веселя́тся,/ с ни́ми же моли́ся о чту́щих честну́ю па́мять твою́.

Егда́ благода́ть Свята́го Ду́ха се́рдце твое́ просвети́, Стефа́не,/ тогда́ Тро́ицы прекра́сное селе́ние яви́лся еси́,/ Е́юже наставля́емь, святы́я хра́мы созда́л еси́, блаже́нне,/ и оби́тели на спасе́ние мона́хов,/ и́хже на зла́це воздержа́ния упа́сл еси́/ и твои́ми уче́нии по Небе́сней стези́ ше́ствовати наста́вил еси́,/ с ни́ми же почита́ем твою́ честну́ю па́мять.

Сла́ва, глас 6:

Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ и на подо́бие, я́коже мо́щно, возше́л еси́:/ му́жески бо естество́ пону́див,/ потща́лся еси ху́ждшее покори́ти лу́чшему/ и плоть порабо́тити ду́ху,/ те́мже мона́шествующих яви́лся еси́ вождь,/ жи́тель пусты́нный, благотеку́щих обучи́тель,/ пра́вило доброде́тели изве́стнейшее,/ и ны́не на Небесе́х, о́тче наш Стефа́не,/ чи́сте зри́ши Святу́ю Тро́ицу,/ моля́ся о и́же ве́рою и любо́вию чту́щих тя.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чте́ния 3 преподо́бническая (зри день 19-й).

На лити́и стихи́ры, глас 6:

И́же на земли́ а́нгела/ и на Небеси́ челове́ка Бо́жия,/ ми́ру благо́е украше́ние,/ о́браз доброде́телей,/ по́стников похвалу́,/ Стефа́на вели́каго почти́м:/ насажде́н бо в дому́ Госпо́дни/ и процвете́ пра́ведно, я́ко кедр в пусты́ни,/ умно́жив ста́до Христо́во слове́сных ове́ц/ в преподо́бии и пра́вде.

Кий ра́зум челове́ческий или́ язы́к/ возмо́жет изрещи́ или́ похвали́ти по досто́инству житие́ твое́?/ И са́ми А́нгели житию́ твоему́, е́же на земли́ в телеси́, удиви́шася/ и похвали́ша Христа́,/ толи́кую побе́ду, преподо́бне, тебе́ на стра́сти дарова́вшаго,/ Его́же моли́, прехва́льне, спасти́ся нам.

Блаже́нна оби́тель,/ иму́щая в себе́ честны́я мо́щи твоя́, преподо́бне,/ от ни́хже истека́ют ве́рным исцеле́ния;/ блаже́нни же ученицы́ твои́,/ такова́го учи́теля себе́ стяжа́вше/ и такова́ отца́ ча́да наре́кшеся,/ Стефа́не пречу́дне, моли́твенниче о душа́х на́ших.

Глас 4: Пресве́тлый и светоно́сный, Богому́дре Стефа́не,/ твой приспе́ пра́здник,/ созыва́ющий мона́хов мно́жества/ просла́вити и пе́ти твое́ честно́е успе́ние,/ прося́щих от Христа́ хода́тайством твои́м/ прия́ти ве́лию ми́лость.

Сла́ва, глас 2:

Пусты́ня, пре́жде непло́дствующи,/ ны́не весели́тся,/ зря́щи в себе́ лик мона́хов,/ обстоя́щих всечестны́й гроб пречу́днаго отца́ своего́/ и духо́вно веселя́щихся,/ и́же пра́зднственная торжеству́ют, глаго́люще:/ ра́дуйся, свети́льниче пресве́тлый,/ и́же чудесы́ сия́я, озаря́еши ду́ши ве́рных;/ ра́дуйся, о́тче всеблаги́й,/ умно́живый ча́да духо́вная в пусты́ни безмо́лвней,/ о ни́хже труды́ и по́ты полага́я,/ ду́шу твою́ пре́дал еси́ Бо́гу,/ Ему́же моли́ся, свя́те Стефа́не, о нас, ча́дех твои́х,/ благоче́стне па́мять твою́ пра́зднующих,/ изба́вити от наве́т вра́жиих,/ я́ко да, до́бре сконча́вше жизнь свою́,/ дерзнове́ние получи́м в день стра́шнаго испыта́ния.

И ны́не, Богоро́дичен:

Все упова́ние мое́/ на Тя возлага́ю, Ма́ти Бо́жия,/ сохрани́ мя под кро́вом Твои́м.

На стихо́вне стихи́ры, глас 1.

Подо́бен: Прехва́льнии му́ченицы:

Стефа́не пребога́те,/ душе́вныя стра́сти от ко́рене исто́ргл еси́/ и теле́сная чу́вства поработи́л еси́ добро́тами твоего́ жития́,/ и, чуде́с благода́ти сподо́бився,/ Христо́ви моли́ся дарова́ти душа́м на́шим/ мир и ве́лию ми́лость.

Стих: Честна́ пред Го́сподем/ смерть преподо́бных Его́.

Стефа́не преподо́бне,/ твои́м кре́пким воздержа́нием и непреста́нною моли́твою/ стра́сти теле́сныя умертви́в,/ бесо́вския полки́ посрами́л еси́/ и А́нгелы возвесели́л еси́,/ с ни́ми же Христо́ви моли́ся дарова́ти душа́м на́шим/ мир и ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Стефа́не преподо́бне,/ в пусты́нях и гора́х ты, бе́гая, удали́лся еси́,/ сла́ву вре́менную пренебре́гл еси́/ и Небе́сней сла́ве насле́дник был еси/ и А́нгелом собесе́дник,/ с ни́ми же Престо́лу Царя́ Христа́ Бо́га предстоя́,/ моли́ся дарова́ти душа́м на́шим/ мир и ве́лию ми́лость.

Сла́ва, глас 8:

Мона́хов мно́жества,/ наста́вника тя чтим, о́тче наш Стефа́не,/ тобо́ю бо путь пра́вый ходи́ти позна́хом:/ блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелом собесе́дниче и вели́кому Се́ргию соприча́стниче,/ с ни́ми же моли́ся Го́сподеви/ поми́ловатися душа́м на́шим.

И ны́не, Богоро́дичен: Безневе́стная Де́во,/ я́же Бо́га неизрече́нно заче́нши пло́тию:

Тропа́рь, глас 8:

Правосла́вия ревни́телю,/ благоче́стия наста́вниче и чистоты́,/ и́щущим спасе́ния путеводи́тельный свети́льниче,/ мона́шествующих Богодухнове́нное удобре́ние,/ преподо́бнаго Се́ргия духо́вный собесе́дниче,/ Стефа́не прему́дре,/ уче́ньми и добродея́ньми твои́ми ду́ши просвети́л еси́/ и пусты́ни насели́л еси́,/ моли́ Христа́ Бо́га спасти́ся душа́м на́шим.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1.

Подо́бен: Вознесы́йся на Крест:

От ю́ности, блаже́нне, от всея́ души́ Христа́ возлюби́л еси́,/ и, Того́ си́лою укрепля́емь,/ непреста́нною моли́твою, я́коже копие́м, низложи́л еси́ враги́ неви́димыя,/ и сла́вно венце́м побе́ды венча́лся еси́ от руки́ всех Христа́ Бо́га,/ те́мже почита́ем честну́ю твою́ па́мять, преподо́бне.

Сла́ва, и ны́не, Богоро́дичен:

Нечи́стых помышле́ний мои́х мно́жество/ и безме́рных мы́слей обурева́ние кто изрещи́ мо́жет, Всенепоро́чная?/ Настоя́ние безпло́тных враго́в мои́х кто испове́сть и е́же от них озлобле́ние?/ Но Твое́ю моли́твою, Блага́я, сих ми всех избавле́ние да́руй.

По 2-м стихосло́вии седа́лен, глас 1.

Подо́бен: Гроб Твой, Спа́се:

А́нгельски пожи́л еси́ на земли́, преподо́бне,/ во бде́ниих же и злострада́ниих плоть свою́ удручи́в,/ те́мже и А́нгелы житие́м свои́м удиви́л еси́, и бе́сы посрами́л еси́,/ и и́ноческая сосло́вия в па́мять твою́ торжествова́ти собра́л еси́, Стефа́не.

Сла́ва, и ны́не, Богоро́дичен:

Упова́ние христиа́н, Пресвята́я Де́во,/ Его́же родила́ еси́, Бо́га, па́че ума́ же и сло́ва,/ непреста́нно моли́ с Вы́шними си́лами/ да́ти оставле́ние грехо́в всем нам и исправле́ние жития́,/ ве́рою и любо́вию при́сно Тя чту́щим.

По полиеле́и седа́лен, глас 3.

Подо́бен: Красоте́ де́вства:

Стопа́м после́дуя Влады́ки своего́, Стефа́не,/ от ю́ности горды́ню возненави́дев и сла́ву ми́ра, я́ко мимоходя́щу,/ смире́ние же и нищету́ возлюби́в,/ те́мже и па́стыря тя ста́ду твоему́ поставля́ет Христо́с Бог,/ Ему́же моли́ся о нас, преподо́бне.

Сла́ва, и ны́не, Богоро́дичен:

Я́ко невозде́ланен, Де́во, виногра́д, прекра́сный Грозд израсти́ла еси́,/ источа́ющий нам вино́ спасе́ния, веселя́щее ду́ши на́ша;/ те́мже, я́ко вино́вну Тя до́брых ублажа́юще,/ при́сно со А́нгелом вопие́м Ти:/ ра́дуйся, Благода́тная.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Всечестно́е торжество́ наста́вника мона́хом Стефа́на Богому́драго,/ сше́дшеся днесь, пра́зднуем/ и, к честне́й его́ ра́це с ве́рою притека́юще,/ любе́зно целу́ем святы́я его́ мо́щи:/ сей бо па́че зла́та чудесы́ облиста́,/ и́же ма́лыми хле́бы иногда́ мног наро́д напита́,/ и разли́чныя неду́ги исцели́,/ и мно́га чудеса́ сотвори́,/ и ны́не мо́лится Христо́ви/ дарова́ти ми́рови ве́лию ми́лость.

Кано́н преподо́бнаго Стефа́на, глас 4.

Песнь 1

Ирмо́с: Отве́рзу усти́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Сло́во ми пода́ждь, Сло́ве Бо́жий, во отверзе́ние недосто́йных уст мои́х,/ и очи́сти се́рдце мое́,/ я́ко да возмогу́ по достоя́нию воспе́ти преподо́бнаго Твоего́.

Его́же Сам просла́вил еси́, Христе́ Спа́се мой,/ просла́вити да́руй ми честно́е торжество́ Стефа́на преподо́бнаго, Твоего́ уго́дника,/ нача́льника мона́хов и оби́тели утвержде́ние.

Триипоста́сным Све́том Божества́ просвети́л еси́ се́рдце, преподо́бне,/ от ю́ности мирска́го пристра́стия возгнуша́вся,/ и Небе́сная восприя́л еси́ наслажде́ния.

Богоро́дичен: Без се́мене О́тчею во́лею от Боже́ственнаго Ду́ха Бо́жия Ты зача́т Сы́на,/ пло́тию родила́ еси́ на́шего ра́ди спасе́ния.

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Возмуще́ния мо́ря жите́йскаго избе́г, преподо́бне Стефа́не,/ в пусты́ню безмо́лвия по́стническаго пребыва́ния/ всели́лся еси́, ра́дуяся, блаже́нне.

Воздержа́нием плоть свою́ и бде́нии ча́стыми удручи́л еси́, преподо́бне,/ и, пусты́нная претерпе́в озлобле́ния,/ стремле́ния лю́тых страсте́й уста́вил еси́, Стефа́не.

На па́житех живо́тных слове́сное ста́до ученико́в твои́х му́дре упа́сл еси́/ и на зла́це воздержа́ния, Стефа́не,/ от волко́в мы́сленных невреди́мо сохрани́л еси́.

Богоро́дичен: Ве́дуще, благоче́стно пропове́дуем Тя/ и́стинную Ма́терь Бо́жию, Пренепоро́чная:/ Тобо́ю бо к нам Зижди́тель прибли́жися.

Седа́лен, глас 8.

Подо́бен: Прему́дрости наста́вниче:

Оте́чество свое́ оста́вил еси́, преподо́бне,/ я́коже Авраа́м други́й, пресе́льник быв,/ и в пусты́ню всели́лся еси́, крест свой взем,/ Христу́ после́довав, плоть свою́ воздержа́нием, и труды́, и пусты́нными озлобле́нии умертви́л еси́,/ и ста́до мона́хов собра́л еси́,/ и по сме́рти от Бо́га бдагода́ть прия́л еси́ неду́ги исцеля́ти/ с ве́рою приходя́щим к честне́й твое́й ра́це, Стефа́не преподо́бне,/ моли́ Христа́ Бо́га согреше́нием оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Во искуше́ния многоплете́нная впад от враг ви́димых и неви́димых,/ бу́рею одержу́ся безчи́сленных мои́х прегреше́ний/ и я́ко к те́плому заступле́нию и покро́ву моему́, Чи́стая, притека́ю./ Тем, Пресвята́я, из Тебе́ Вопло́щшагося без се́мене моли́/ о всех рабе́х Твои́х, непреста́нно пою́щих Тя,/ согреше́ний оставле́ние им дарова́ти.

Песнь 4

Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Оте́чество свое́, я́коже иногда́ Авраа́м, оста́вил еси́, преподо́бне Стефа́не,/ и, на землю обетова́нную пресели́вся,/ Го́рняго Иерусали́ма насле́дник изря́ден показа́лся еси́, Богому́дре.

Страннолю́бие, я́коже Авраа́м пра́отец дре́вле, стяжа́л еси́,/ и, я́коже он, служи́тель и друг Бо́гу нарече́ся,/ и Сего́ ты в се́рдце твое́м чистоты́ ра́ди жития́ твоего́ всели́л еси́, Стефа́не.

Заря́ми чуде́с облиста́лся еси́, Стефа́не Богоприя́тне,/ грехми́ отемне́нное се́рдце мое́ све́том твои́х моли́тв просвети́,/ я́ко да и аз благода́рственно воспою́ па́мять твою́.

Богоро́дичен: Сни́де, я́ко дождь на руно́, во утро́бу Твою́ Госпо́дь,/ я́коже рече́ дре́вле проро́к, Всенепоро́чная, Ему́же взыва́ем:/ сла́ва си́ле Твое́й, Го́споди.

Песнь 5

Ирмо́с: Нечести́вии не у́зрят Сла́вы Твоея́, Христе́,/ но мы Тя, Единоро́дне,/ Оте́ческия Сла́вы Сия́ние Божества́,/ от но́щи у́тренююще,/ воспева́ем Тя, Человеколю́бче.

Влады́це своему́ Христу́ подо́бяся, во́льную страсть претерпе́вшему,/ распя́лся еси́ ми́рови и страсте́м, Стефа́не Богоприя́тне,/ и ны́не све́тло прославля́ешися, лику́я во Ца́рствии Его́.

Исто́чник исцеле́ний показа́ся ра́ка моще́й твои́х, Стефа́не,/ к не́йже вси с ве́рою притека́ющии разли́чных неду́г и страсте́й избавля́ются/ богоприя́тными твои́ми моли́твами.

Во пло́ти ме́ртвенней безпло́тным подо́бяся,/ жития́ чистото́ю, Богому́дре,/ безпло́тных враг мы́сленная ополче́ния, Стефа́не, до конца́ низложи́л еси́.

Богоро́дичен: Тя ору́жие непобеди́мое на враги́ предлага́ем,/ Тя держа́ву и наде́жду на́шему спасе́нию, Богома́ти, стяжа́хом.

Песнь 6

Ирмо́с: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой, Многоми́лостиве.

В пусты́нях всели́лся еси́, бе́гая сла́вы су́етныя, я́коже дре́вле вели́кий Анто́ний,/ те́мже обре́те Боже́ственную кончи́ну/ и по сме́рти сия́еши чудесы́, преподо́бне.

Кто изрещи́ возмо́жет труды́ твоя и бде́ния, Богому́дре Стефа́не,/ и́хже ра́ди возме́здие от Бо́га по достоя́нию восприя́л еси́,/ по свое́й сме́рти разли́чныя неду́ги исцеля́ти.

Те́ло свое́ моли́твами и посто́м удручи́л еси́,/ ду́шу же свою́ благодея́нии просвети́л еси́/ и се́рдце свое́ от скверн плотски́х очи́стил еси́,/ те́мже прия́телище Ду́ху Пресвято́му, Стефа́не, показа́ся.

Богоро́дичен: О чу́до, всех чуде́с превы́шшее:/ я́ко Де́ва, во чре́ве вся́ческая Содержа́щаго сло́вом неискусому́жно прии́мши,/ без истле́ния родила́ еси́.

Конда́к, глас 8.

Подо́бен: Взбра́нной Воево́де:

Чистото́ю душе́вною боже́ственно вооружи́вся,/ блаже́нную жизнь соверши́л еси́,/ в пусты́ню, я́ко во град, всели́вся,/ благода́ть прия́л еси́ от Бо́га/ исцеля́ти неду́ги приходя́щим к честне́й твое́й ра́це/ и всех возвыша́ти к Боже́ственней высоте́,/ те́мже, име́я дерзнове́ние ко Святе́й Тро́ице,/ помина́й нас, чту́щих па́мять твою́, да зове́м ти:/ ра́дуйся, преподо́бне Стефа́не, по́стником удобре́ние.

И́кос:

Разу́мнаго свети́льника, вся озаря́юща чудесы́ исцеле́ний,/ во смире́нии и кро́тости Влады́ки всех Христа́ подража́теля и столпа́ утвержде́ния,/ и́ноком наста́вника, равноа́нгельно на земли́ пожи́вша,/ неви́димыя враги́ си́лою кре́стною до́бльственне низложи́вша/ и плотска́я мудрова́ния ду́хови повину́вша,/ в страннолю́бии же и в ми́лостыни неоску́днаго и в благодея́ниих прекра́снаго,/ преподо́бнаго Се́ргия спо́стника же и собесе́дника,/ Боже́ственнаго кри́на, в пусты́нных удо́лиих процве́тшаго, восхва́лим, зову́ще:/ ра́дуйся, преподо́бне Стефа́не, по́стником основа́ние.

Песнь 7

Ирмо́с: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,/ Бо́же оте́ц на́ших.

Я́коже Лот Содо́ма дре́вле, латы́нскаго злове́рия избежа́в,/ а́ки в Сиго́р, в Моско́вскую зе́млю, кре́пко соблюда́ющую и́стинное правове́рие, прише́л еси́, Стефа́не, вопия́:/ благослове́н еси́, Го́споди, Бо́же оте́ц на́ших.

Си́лою Христо́вою вооружи́вся, преподо́бне, стра́шен яви́лся еси́ бесо́м/ и над страстьми́ воцари́лся еси́, взем крест свой, после́дуя Христо́ви и вопия́:/ благослове́н еси́, Го́споди, Бо́же оте́ц на́ших.

Собра́нное тобо́ю слове́сное ста́до весели́тся днесь в па́мять твою́, Стефа́не Богому́дре,/ посреде́ иму́ще честны́я твоя́ мо́щи, источа́ющия струи́ исцеле́ний, преподо́бне, зову́щим:/ благослове́н еси́, Го́споди, Бо́же оте́ц на́ших.

Богоро́дичен: Благослове́н Плод благослове́ннаго чре́ва Твоего́,/ Его́же благословя́т Небе́сныя си́лы и преподо́бных собо́ри,/ нас изба́вльшаго кля́твы дре́вния, Благослове́нная.

Песнь 8

Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Оби́лием благода́ти и одожде́нием слове́с твои́х/ серде́чныя бразды́ учени́к твои́х напои́л еси́, Стефа́не,/ и в сих мног плод Влады́це Христу́ возрасти́л еси́, Богому́дре.

Ме́ртвость твоя́ живоно́сною яви́ся, преподо́бне Стефа́не, Христа́ ра́ди,/ Его́же Престо́лу со дерзнове́нием предстоя́,/ моли́ся о чту́щих честну́ю па́мять твою́.

Я́ко незави́стну благода́ть имы́й от Бо́га, преподо́бне,/ пресла́вная чудеса́ источа́еши/ с ве́рою притека́ющим к ра́це честны́х моще́й твои́х.

Богоро́дичен: Вода́ еси́ неисчерпа́емая, Де́во,/ от нея́же вси, пию́ще, благода́ти исполня́емся,/ душе́ю и те́лом освяща́еми.

Песнь 9

Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чрев оноше́ния ми́рови Благослове́ние процвела́ еси́./ Тем Тя вси велича́ем.

Побе́дное одоле́ние оте́честву на́шему/ на проти́вныя да́руй моли́твами твои́ми, Стефа́не преподо́бне,/ и Це́рквам единомы́слие устро́й,/ да непреста́нно в пе́снех па́мять твою́ почита́ем.

О чту́щих честну́ю па́мять твою́ любо́вию моли́ся, Стефа́не преподо́бне,/ изба́витися враг мы́сленных и ви́димых,/ да ктому́ мно́жае тя в пе́снех непреста́нно велича́ем.

От недосто́йных мои́х усте́н/ приноси́мое ти ма́лое от усе́рдия хвале́ние приими́, Богоблаже́нне,/ и огня́ ве́чнаго изба́витися моли́ся,/ да непреста́нно честну́ю твою́ па́мять почита́ю.

Богоро́дичен: Ра́дуйся и весели́ся, Неве́сто Царя́ Вели́каго,/ созерца́ющая све́тло Твоего́ Жениха́ красоты́, па́че зла́та сия́юща,/ Его́же пою́ще, велича́ем.

Свети́лен.

Подо́бен: Не́бо звезда́ми:

Ты яви́лся еси́, Богому́дре о́тче, столп доброде́телей/ и преподо́бным сла́ва и украше́ние,/ те́мже помина́й чту́щих честну́ю твою́ па́мять.

Сла́ва, и ны́не, Богоро́дичен:

Тя Предста́тельницу вси иму́ще, гре́шнии, о Пресвята́я Де́во!/ Моли́ся благопремени́тельна сотвори́ти нам Сы́на Твоего́/ ма́терними Твои́ми моли́твами.

На хвали́тех стихи́ры на 4, глас 8.

Подо́бен: О, пресла́внаго чудесе́:

О́тче преподо́бне Стефа́не,/ от младе́нства Бо́гови прилежа́,/ мирска́я пристра́стия оста́вил еси́/ и, пло́ти взыгра́ния воздержа́нием обузда́в/ и се́рдце свое́ от скве́рны очи́стив,/ сосу́д избра́н Ду́ху Свято́му был еси́/ и столп утвержде́ния и́ноком,/ те́мже мо́лим тя:/ моли́ Христа́ Бо́га, да спасе́т ду́ши на́ша, я́ко Милосе́рд.

О́тче Богому́дре Стефа́не,/ глас Ева́нгелия Христо́ва услы́шав/ и крест свой на ра́мо взем,/ после́довал еси́ Христу́ невозвра́тным по́мыслом,/ вожделе́ния плотска́я умертви́в,/ тем и по сме́рти сия́еши чудесы́,/ Бо́гу прославля́ющу тя,/ Его́же моли́, да спасе́т ду́ши на́ша, я́ко Милосе́рд.

О́тче Стефа́не Богоприя́тне,/ лоза́ виногра́да Христо́ва был еси́/ и сади́тель чистоты́,/ сле́зными исто́чники пусты́ни безпло́дное возде́лал еси́/ и, ко́рение страсте́й увяди́в,/ цвет свяще́ния был еси́./ Моли́ Христа́ Бо́га, да спасе́т ду́ши на́ша, я́ко Милосе́рд.

Сла́ва, глас 6:

Днесь и́ночестии собо́ри,/ сше́дшеся в па́мять Богоно́снаго отца́,/ слове́сныя плету́ще венцы́,/ увенча́им наста́вника и́ноком,/ Стефа́на Богому́драго,/ неви́димых враг ополче́ния/ терпе́нием и смире́нием му́жески победи́вшаго/ и благода́ть чуде́с от Христа́ Бо́га прии́мшаго/ исцеля́ти разли́чныя неду́ги/ и прогоня́ти ду́хи лука́выя/ от всех, с ве́рою притека́ющих к честне́й его ра́це,/ те́мже возопии́м:/ мона́хов наста́вниче, и А́нгелом собесе́дниче,/ и преподо́бным украше́ние,/ моли́ дарова́ти мир ми́рови/ и душа́м на́шим ве́лию ми́лость.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы,/ поми́ловати ду́ши на́ша.

Славосло́вие вели́кое. И отпу́ст.

На литурги́и слу́жба преподо́бническая.

Моли́тва

Всеблаже́нне и преподо́бне о́тче Стефа́не, просла́вленный уго́дниче Пресвяты́я Тро́ицы, Престо́лу Ея́ предстоя́ с ли́ки святы́х А́нгел и всех святы́х, помяни́ нас, в беда́х и ско́рбех припа́дающих к цельбоно́сному твоему́ гро́бу и моля́щихся тебе́, услы́ши моли́твы на́ша и принеси́ к Престо́лу Триипоста́снаго Бо́га, прося́ у Него́ нам бога́тыя ми́лости, здра́вия душа́м и телесе́м на́шим, наипа́че же отпуще́ния грехо́в, благода́ти и спасе́ния. Ты бо, име́я дерзнове́ние к Нему́, мо́жеши умоли́ти Его́, да пода́ст нам в житии́ на́шем блага́я и вся, я́же на по́льзу на́шу и во уготовле́ние к ве́чному животу́. О благи́й и ве́рный ра́бе Бо́жий, и́стинный учениче́ Христа́, избра́нный сосу́де Свята́го Ду́ха, чудотво́рче Стефа́не! Мо́лим тя усе́рдно: сотвори́ нас, гре́шных, прича́стники бы́ти благода́тных дарова́ний, и́миже Бог тя обогати́, и бу́ди нам по Бо́зе наста́вник к богоуго́дному житию́, утиши́тель бу́ри страсте́й, помо́щник в ско́рбех и беда́х и засту́пник от враг ви́димых и неви́димых, да и мы, богоуго́дно преше́дше по́прище сея́ жи́зни, твои́м предста́тельством и богоприя́тными твои́ми моли́твами бу́дем насле́дницы Ца́рствия Бо́жия и сподо́бимся вку́пе с тобо́ю предстоя́ти Престо́лу Царя́ сла́вы, Ему́же подоба́ет вся́кая сла́ва, честь и держа́ва во ве́ки веко́в. Ами́нь.

Преподобный Стефан Махрищский родился в XIV веке в Киеве. По достижении совершеннолетия он принял монашеское пострижение в Киево-Печерской обители, где проводил жизнь в строгом воздержании, непрестанной молитве и полном послушании у старцев. Преподобный Стефан уже в юности был примером для других иноков: он первым приходил в храм и последним уходил из него, во время молитвы стоял неподвижно, как осужденный, иноческие послушания исполнял беспрекословно, служил братии со смирением и кротостью. Несколько лет святой Стефан прожил в Киево-Печерском монастыре, все более совершенствуясь в иноческих подвигах. Однако мирное течение монашеской жизни в Киеве было нарушено подчинением южной части России князьям Литовским, а затем – польскому королю. Католики усилили свое влияние и стали притеснять православных: отбирали у них храмы и устраивали в них костелы, не допускали православных до значительных должностей, бранили и даже избивали священников и монахов. Гонение на Православие особенно усилилось в середине XIV века. В то время многие иноки в Киеве и его окрестностях покинули свои монастыри и уединились в безвестных дебрях и пустынях для подвигов поста и молитвы. Преподобный Стефан также ушел из Киево-Печерской Лавры и отправился на север, в православную Москву.

Святой Стефан прибыл в столицу Русского государства в княжение великого князя Иоанна II (1353–1359), который предложил подвижнику избрать для жительства любой монастырь в Москве. Но святой. Стефан решил поселиться в пустыне и отправился на северо-восток, где и избрал себе место в лесном урочище Махрище в 35 верстах от обители Преподобного Сергия. Водрузив деревянный крест, подвижник срубил себе келлию, выкорчевал вокруг лес для возделывания земли и стал жить там, подвизаясь в посте, молитве и трудах. Когда о святом отшельнике стало известно в окрестностях, к нему начали приходить ревнители благочестия. Сначала преподобный Стефан, стремясь к безмолвию, не разрешал им селиться около него, но затем уступил их просьбам. Не позднее 1358 года, по благословению святителя Алексия, митрополита Московского (†1378; память 12 февраля), преподобный Стефан основал монастырь. Братия построили храм во Имя Живоначальной Троицы, трапезную и келлии, которые обнесли оградой. Святитель Алексий рукоположил преподобного Стефана во иеромонаха и поставил игуменом новой обители.

Преподобный Стефан примером своей жизни, кроткими наставлениями учил братию монашескому деланию. Строгий к себе, он был снисходителен к другим, ни на кого не гневался и трудился более других иноков. Показывая пример нестяжания, преподобный носил грубую и ветхую одежду, покрытую заплатами. Не только иноки, но и миряне вдохновлялись подвигами святого. Некто Григорий, живший недалеко от Троицкой обители, передал монастырю свою землю и другое имущество, принял монашество и стал усердным учеником игумена. Впоследствии он мученически скончался, убиенный татарами (†1392; память 15 июня).

Когда Преподобный Сергий Радонежский удалился из своей обители, то пришел к преподобному Стефану и просил у него одного из иноков, который помог бы ему найти уединенное место в окрестных лесах. Преподобный Стефан с любовью исполнил просьбу аввы Сергия и, отпустив с ним добродетельного монаха Симона, проводил его до источника, за три версты от обители. Позднее на месте расставания святых старцев, над источником, была поставлена часовня, к которой ежегодно из Махрищской Сергиевой приходской церкви совершался крестный ход.

Присоединение к обители преподобного Стефана некоторых земель вызвало раздражение живших неподалеку четырех братьев Юрковских, опасавшихся, что и их имение может отойти к монастырю. С целью заставить преподобного уйти из этих мест они грозили убить его. Никакие вразумления святого не помогали. Тогда преподобный Стефан, оставив вместо себя священноинока Илию, тайно оставил монастырь вместе с преподобным Григорием. В 60 верстах от Вологды, в древнем Авнежском княжестве, он основал Троицкую Авнежскую пустынь. Первым пострижеником обители стал местный землевладелец Константин Дмитриевич, который, желая подражать подвигам преподобного Стефана, одну часть своего имения раздал бедным, а другую пожертвовал новому монастырю и принял монашеский постриг с именем Кассиан (впоследствии пострадал вместе с преподобным Григорием в 1392 году; память 15 июня). Со временем слава об Авнежских иноках дошла до Москвы. Благоверный великий князь Димитрий Иоаннович Донской (†19 мая 1389), узнав место пребывания преподобного Стефана, вызвал его к себе, а в монастырь сделал богатый вклад Богослужебными книгами и другими пожертвованиями.

По дороге в Москву преподобный Стефан посетил Махрищскую обитель, где с радостью был встречен братией.

В Москве святой Стефан познакомился с великокняжеским окольничим Тимофеем Васильевичем Вельяминовым, у которого жил родственник-сирота по имени Косма. Косма мечтал быть иноком, но его влиятельный родственник не соглашался отпустить его в монастырь. Узнав о святом Стефане, Косма пошел к нему и со слезами стал просить о помощи. Преподобный Стефан, провидя в юноше великого светильника Русской Церкви, постриг его в рясофор и преднарек ему имя Кирилл. Затем преподобный отвел Косму в Симонов монастырь, где преподобный Феодор (впоследствии архиепископ Ростовский; †1394; память 28 ноября) постриг его в мантию. Это был преподобный Кирилл Белоезерский (†1427; память 9 июня).

По просьбе великого князя Московского преподобный Стефан вернулся в Махрищскую обитель. Он ввел в ней общежительный устав и в течение многих лет мирно и мудро управлял братией. Достигнув глубокой старости, преподобный Стефан передал игуменство старцу Илии и принял великую схиму. В скором времени, 14 июля 1406 года, он, приобщившись Святых Христовых Тайн, мирно отошел к Богу. От тела почившего исходило благоухание.

В 20-х годах XVI века игумен Махрищского монастыря Иона и инок, столетний старец Герман, видели над могилой преподобного Стефана огонь, который озарял обитель. С того времени возобновилось почитание святого, уже почти забытого. Над могилой была поставлена рака и зажжена неугасимая лампада.

В 1550 году при постройке нового каменного храма во Имя Живоначальной Троицы мощи преподобного Стефана были обретены нетленными. От святых мощей совершались исцеления больных. По молитвам преподобного происходили и другие чудеса. Однажды в праздник Пятидесятницы в обитель собралось до двух тысяч богомольцев. В тот год (по некоторым источникам 1557) был голод и в обители было мало хлеба. Игумен Варлаам (1557–1570), желая исполнить завет преподобного, учившего питать всех приходящих в монастырь, не знал, как быть. С верою он обратился в молитве к святому Стефану, прося у него помощи. Затем игумен повелел монаху Симеону, служившему за трапезой, весь имевшийся хлеб разделить на малые части и разложить на столы. Симеон мысленно осудил игумена, полагая, что такой поступок не только не накормит множество народа, но и лишит братию завтрашнего пропитания. Однако он исполнил повеление и по молитве святого Стефана произошло чудо: не только все паломники насытились, но еще осталось столько хлеба, что братия питалась им три месяца.

Игумен Варлаам стал первым собирателем сведений о жизни преподобного Стефана. Он разыскал записки о святом у своего прадеда Серапиона, лично знавшего преподобного Стефана, и записал известные ему чудеса, происходившие у святых мощей. На основе этих записей игумен Данилова монастыря Иоасаф (1560, затем епископ Вологодский), по благословению митрополита Московского Макария (1542–1563), составил житие и службу преподобному Стефану. Служба святому была составлена также Симеоном Полоцким.

Литература:

1. Жития святых, на русском языке изложенные по руководству Четьих-Миней святителя Димитрия Ростовского, кн. 11. М., 1910, с. 128–132.

2. Филарет (Гумилевский), архиепископ Черниговский. Жития святых, чтимых Православною Церковью, со сведениями о праздниках Господских и Богородичных, и о явленных чудотворных иконах. 3-е изд., дополн., июль. СПб., 1900, с. 107–108.

3. Протопопов Д. И. Жития святых, чтимых Православной Российской Церковью, а также чтимых Греческой Церковью, южнославянских, грузинских и местно чтимых в России. Месяц июль. М., 1885, с. 174–177.

4. Димитрий (Самбикин), архиепископ. Месяцеслов святых, всею Русскою Церковью или местно чтимых. Вып. 11, июль. Тверь, 1901, с. 167–169.

5. Амфилохий, иеромонах. Святой преподобный Стефан, игумен Махрищский, 2-е изд. М., 1894.

ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры на 8, глас 4.

Подо́бен: Я́ко до́бля:

Прииди́те, духо́вне соше́дшеся днесь, ве́рнии,/ на́ша засту́пники восхва́лим,/ прего́рдаго врага́ попра́вшия,/ Влади́мира благочести́ваго вку́пе со Агриппи́ною,/ чудотво́рцы Рже́вския,/ я́ко целому́дрня рачи́тели,/ Христу́ моля́щияся о спасе́нии душ на́ших.

Наста́ ны́не всесве́тлая па́мять ва́ша,/ пресла́вный Влади́мире с прехва́льною Агриппи́ною,/ осеня́ющи новоизбра́нныя лю́ди./ Тем Христа́ моли́те о спасе́нии всех,/ любо́вию вас непреста́нно, блаже́ннии, почита́ющих,/ чудотво́рцев Рже́вских.

Пе́рвее у́бо, прехва́льнии,/ от ю́ности ва́шея Христу́ рабо́тасте,/ су́щая в ми́ре сем, я́ко уме́ты, презре́вше/ и сего́ ра́ди ми́лостынею и моли́твами/ до́бре Тому́ угоди́вше./ Тем и по сме́рти исцеле́ние подава́ете всем,/ ве́рою вас почита́ющим.

И́ны стихи́ры, глас 2.

Подо́бен: Ки́ими похва́льными:

Ки́ими похва́льными венцы́/ венча́ем блаже́ннаго Влади́мира/ вку́пе с прему́дрою Агриппи́ною,/ разделе́ных те́лом и совокупле́ных благода́тию?/ О́ваго, я́ко прему́дра врага́ победи́вшаго,/ о́ву же, я́ко целому́дрия сохра́нницу./ Сего́ ра́ди, соше́дшеся, воспое́м пе́сньми ра́достными,/ си́це глаго́люще:/ ра́дуйтеся, прехва́льнии,/ люде́й правосла́вных похвале́ние,/ земли́ Росси́йския заступле́ние,/ оте́чества своего́ храни́телие,/ вас бо безсме́ртныя сла́вы венцы́ венча́ Христо́с Бог,/ име́яй ве́лию ми́лость.

Ки́ими пе́сненными добро́тами/ восхва́лим Влади́мира блаже́ннаго/ с прехва́льною Агриппи́ною?/ Я́ко богоразу́мная кри́ла,/ прелете́вшая от земли́ на Не́бо,/ и прибли́жившася престо́лу Святы́я Тро́ицы,/ и со А́нгелы ве́село ликовству́ющая,/ и Христу́ моля́щаяся о устрое́нии ми́ра/ и о сохране́нии земли́ Росси́йския от наше́ствия сопроти́вных/ и междоусо́бныя бра́ни,/ и́же любо́вию восхваля́ют/ и непреста́нно почита́ют/ Рже́вския чудотво́рцы.

Ки́ими пе́сньми духо́вными похва́лим блаже́нных,/ спле́тшихся любо́вию вку́пе обою́?/ Пе́сньми ра́достными воспое́м, си́це глаго́люще:/ ра́дуйтеся, блаже́ннии и треблаже́ннии,/ в боголю́бии пожи́вшии,/ смире́ние и поще́ние сохра́ньшии/ и ми́лостыню да́рующии,/ о не́йже Сам Христо́с та́ко рече́:/ блаже́ни ми́лостивии, я́ко ти́и поми́ловани бу́дут./ И сего́ ра́ди вопие́м к ним си́це:/ пресла́вный Влади́мире вку́пе с прехва́льною Агриппи́ною,/ моли́те Христа́ о гра́де сро́дствия ва́шего/ и нам низпосла́ти мир и ве́лию ми́лость.

Ки́ими смире́нными устна́ми/ воспое́м Влади́мира блаже́ннаго с пречестно́ю Агриппи́ною,/ яви́вшихся в Росси́йстей земли́ но́вых чудотво́рцев/ и свети́л незаходи́мых?/ Со́лнца мы́сленнаго зве́зды пресве́тлыя,/ просвеща́ющия весь мир чуде́с све́тлостию,/ печа́льных утеше́ние,/ плене́нных избавле́ние от го́рькия рабо́ты,/ кре́пость и забра́ло гра́да Рже́ва./ Те́мже прииди́те, вси ве́рнии,/ пра́здник блаже́нных псало́мски торжеству́ем,/ да моли́твами их вра́жия шата́ния вся Христо́с низложи́т,/ име́яй ве́лию ми́лость.

Сла́ва, глас 6. Самогла́сен:

Блаже́нно и треблаже́нно оте́чество ва́ше,/ блаже́н и град, в не́мже жили́ще име́сте,/ прече́стен же и свят храм,/ в не́мже положе́на бы́ша честна́я телеса́ ва́ша,/ пресла́вный Влади́мире с прехва́льною Агриппи́ною,/ Христу́ моли́теся,/ Его́же от ю́ности возлюби́сте,/ сохрани́ти оте́чество ва́ше/ и душа́м на́шим дарова́ти мир и ве́лию ми́лость.

И ны́не, Богоро́дичен.

Вход. Проки́мен дне. Чте́ния преподо́бническая (зри день19-й).

На лити́и пое́м стихи́ры, пи́санныя на хвали́тех.

На стихо́вне стихи́ры, глас 2.

Подо́бен: До́ме Евфра́фов:

Я́ко вели́кое со́лнце,/ Росси́йстей стране́/ яви́стеся, блаже́ннии,/ чудесы́ просвеща́юще град Ржев,/ те́мже, соше́дшеся, вси воспое́м вас.

Стих: Честна́ пред Го́сподем/ смерть преподо́бных Его́.

Све́том сия́я/ Боже́ственныя благода́ти,/ пресве́тлый ваш пра́здник ра́достен всем,/ его́же, ра́дующеся,/ и́скренно вси восхва́лим.

Стих: Что возда́м Го́сподеви о всех,/ я́же воздаде́ ми?

Прииди́те, рже́встии наро́ди,/ вели́цыи и ма́лии,/ восхва́лим в вас пре́жде ца́рствовавшия,/ те́плыя предста́тели,/ но́выя чудотво́рцы, Влади́мира и Агриппи́ну.

Сла́ва, глас 8. Самогла́сен:

Ра́дуйся и весели́ся о Го́споде, гра́де Рже́ве,/ и све́тло торжеству́й и лику́й, Це́рковь Бо́жия,/ в не́йже лежи́т честно́е сокро́вище,/ пресла́вных но́вых чудотво́рцев Влади́мира благочести́ваго и Агриппи́ны прехва́льныя,/ сокро́вище дра́го и ковче́г пресла́вен,/ телеса́, чудеса́ точа́щая всем, притека́ющим с ве́рою./ Сего́ ра́ди прииди́те, вси лю́дие, соше́дшеся, ве́рнии, поклони́мся святы́м./

Тецы́те, собра́вшеся, и псало́мски восплещи́те рука́ми,/ и, лику́юще, ра́дуйтеся, и, веселя́щеся, си́це глаго́лите:/ ра́дуйтеся, пресла́внии чудотво́рцы,/ Влади́мире блаже́нне и Агриппи́но Богому́драя,/ гра́ду бо на́шему утвержде́ние/ и нам, ве́рным, спасе́ние./ И ны́не, в па́мяти ва́шей,/ испроси́те у Христа́ дарова́ти душа́м на́шим/ мир и ве́лию ми́лость.

И ны́не, Богоро́дичен.

Тропа́рь, глас 8:

Я́ко благочести́ваго ко́рене пречестна́я о́трасль был еси́,/ до́бре во благоче́стии пожи́в, блаже́нне Влади́мире,/ та́ко и с супру́жницею твое́ю, прехва́льною Агриппи́ною,/ в ми́ре Бо́гу угоди́вше, и преподо́бных житию́ сподо́бистеся./ С ни́миже моли́теся Го́сподеви/ сохрани́ти без вре́да оте́чество ва́ше,/ да вас непреста́нно почи́та́ем.

Сла́ва, и ны́не, Богоро́дичен:И́же нас ра́ди рожде́йся от Де́вы:

НА У́ТРЕНИ

На Бог Госпо́дь: тропа́рь, дважды. Сла́ва, и ны́не, Богоро́дичен.

По 1-м стихосло́вии седа́лен, глас 1.

Подо́бен: Лик А́нгельский:

Вси пра́зднуем вку́пе всесвяту́ю па́мять Влади́мира и Агриппи́ны прему́дрых,/ Це́рковь бо сла́вит, вопию́щи к ним:/ моли́твами ва́шими, блаже́ннии, исцели́те неду́ги и боле́зни на́ша/ и вся́ких искуше́ний изба́вите ве́рою па́мять ва́шу восхваля́ющих.

Сла́ва, и ны́не, Богоро́дичен:Чу́до чуде́с, Благода́тная: (зри Богоро ́дичны отпусти́тельныя).

По 2-м стихосло́вии седа́лен, глас 3.

Подо́бен: Красоте́ де́вства:

Иму́ще дух и́стинный, прему́дрии,/ те́мже мы, соше́дшеся, ве́рнии, па́мять ва́шу велича́ем,/ и облобыза́ем честну́ю ра́ку, исцеле́ния получа́юще неоску́дно,/ и, пою́ще, рцем си́це:/ Влади́мире пресла́вне ку́пно с супру́жницею Агриппи́ною,/ Христу́ моли́теся сохрани́ти оте́чество ва́ше,/ и разруши́ти междоусо́бную страсте́й на́ших брань,/ и дарова́ти нам ве́лию ми́лость.

Сла́ва, и ны́не, Богоро́дичен:Красоте́ де́вства Твоего́: (зри Богоро́дичны отпусти́тельныя ).

Велича́ние:

Ублажа́ем вас, святи́и чудотво́рцы Влади́мире и Агриппи́но,/ и чтим святу́ю па́мять ва́шу,/ вы бо мо́лите за ны/ Христа́ Бо́га на́шего.

Псало́м избра́нный: Блаже́н муж, боя́йся Го́спода:

По полиеле́и седа́лен, глас 8.

Подо́бен: Прему́дрости:

Прииди́те, вси лю́дие, хвалу́ принесе́м пресла́вным и богому́дрым чудотво́рцем/ Влади́миру и Агриппи́не, си́це вопию́ще:/ ра́дуйся, преблаже́нне Влади́мире, и́же го́рдаго врага́ страсте́й свире́пство погуби́л еси́;/ та́кожде и ны́не с супру́жницею твое́ю засту́пницы и хода́таи бу́дите оте́честву ва́шему,/ и сопроти́вных го́рдость низложи́те,/ и грехо́в оставле́ние да́руйте/ чту́щим любо́вию святу́ю па́мять ва́шу.

Сла́ва, и ны́не, Богоро́дичен:

О Тебе́ ра́дуется, Благода́тная, вся́кая тварь,/ А́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́,/ из Нея́же Бог воплоти́ся и Младе́нец бысть,/ пре́жде век сый Бог наш:/ ложесна́ бо Твоя́ престо́л сотвори́ и чре́во Твое́ простра́ннее небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

Та́же степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Вся́к град и страна́,/ сла́вному гра́ду на́шему сра́дуйтеся,/ и псало́мски восплещи́те рука́ми вку́пе,/ духо́вное днесь торжество́ пра́зднующе/ Влади́мира благочести́ваго и Агриппи́ны сла́вныя,/ и пе́сньми похвали́те,/ всечестны́й сей день соверша́юще,/ в весе́лии вопию́ще си́це:/ приими́те пе́ние люде́й ва́ших, блаже́ннии,/ и моля́щимся пода́йте неоску́дно/ исцеле́ние и ве́лию ми́лость.

Кано́н Богоро́дицы, со ирмосо́м на 6, глас 2: Нетре́ну, необы́чну: Святы́м же два кано́на на 8. Кано́н святы́м, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Песнь Твоему́ уго́днику, на земли́ Тебе́ просла́вльшему, Влади́миру,/ принести́, Бо́же, да́руй ми,/ я́ко да Смыслода́вца пе́сньми возвели́чу Тя.

Вас, преблаже́ннии, оте́честву ва́шему,/ я́ко пресве́тлое со́лнце, Христо́с показа́,/ чудесы́ всех озаря́ющее, ве́рою к вам приходя́щих.

Я́ко о теле́сных небре́гше, и земна́я, я́ко тле́нная, возненави́девше,/ и сего́ ра́ди ми́ра отре́кшеся, преподо́бных че́сти сподо́бистеся,/ с ни́миже о ми́ре моли́теся.

Богоро́дичен: Пречи́стая Богоро́дице,/ ро́ждшая пло́тию присносу́щное Сло́во Безнача́льнаго Отца́, Присноде́во,/ Ему́же ны́не взыва́ем:/ Изба́вителю Бо́гу на́шему пои́м.

Други́й кано́н чудотво́рцем, глас 1.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Благочести́ваго и венцено́снаго Влади́мира вку́пе со Агриппи́ною,/ соше́дшеся, по достоя́нию восхва́лим,/ чуде́с Пода́теля оби́льных и спаса́ющаго ду́ши на́ша.

Пе́сньми и пе́ньми духо́вными восхва́лим блаже́нных вку́пе, си́це глаго́люще:/ ра́дуйтеся, прехва́льнии,/ оте́честву ва́шему пресве́тлии свети́льницы и тве́рдии засту́пницы.

А́ще и на коне́ц лет новопросвеще́нная Росси́йская земли́ сих блаже́нных израсти́,/ но дре́вних че́сти сподо́бишася:/ дарова́ния бо чуде́с оби́льно подаю́т прихода́щим к ним.

Богоро́дичен: Ума́ моего́, Всенепоро́чная,/ омраче́ння све́том Твои́м отжени́ и тьмы изба́ви мя ве́чнующия,/ я́ко да пою́ вели́чия Твоя́.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Безпомо́щным бу́ди помо́щник, блаже́нне Влади́мире,/ и печа́льным ми́лостивное утеше́ние,/ да, твои́ми моли́твами избавля́еми, почита́ем тя.

Я́коже иногда́ сопроти́вных шата́ния низложи́л еси́,/ та́ко и ны́не твое́ оте́чество борю́щих победи́, треблаже́нне,/ да тя прославля́ем.

Виждь уны́ние, виждь печа́ль, виждь беду́, на ны напа́дающую от проти́вных,/ те́мже моли́твою твое́ю ко Го́споду премени́, Влади́мире,/ да благоче́стно тя почита́ем.

Богоро́дичен: Тебе́ вси стяжа́хом, христиа́не, прибе́жище и сте́ну/ и Тебе́ славосло́вим немо́лчно, Безневе́стная.

Ин

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е/ и основа́вый на вода́х зе́млю, Всеси́льне.

Тебе́ в чудесе́х сла́вна росси́йским страна́м показа́ Бог, Влади́мире преблаже́нне,/ и украси́ тя Небе́сными дарми́./ Того́ ны́не моли́ поми́ловати всех нас.

Свети́льницы пресве́тлии, я́коже со́лнце второ́е, сия́юще,/ нас озари́те, соверша́ющих па́мять ва́шу,/ преблаже́ннии Влади́мире и Агриппи́но.

Весе́лия хода́тай наста́ нам,/ светоно́сный день Влади́мира и Агриппи́ны прему́дрых,/ и́же ве́рою воспева́ющим их да́руют ве́лию ми́лость.

Богоро́дичен: Изба́ви нас от всех напа́стей/ и от мно́гих собла́зн зми́евых и тьмы, Всенепо́рочная,/ Я́же Свет поро́ждшая нам невече́рний.

Седа́лен, глас 4:

Благослове́нному и светоно́сному торжеству́/ я́коже со́лнцу возсия́вшему, Влади́мира и Агриппи́ны, во всем ми́ре,/ к ни́мже стеце́мся, ве́рнии, и непреста́нно вопие́м си́це:/ а́ще и преидо́сте от земли́, пресла́внии, но нас не отлучи́стеся/ и та́мо со А́нгелы Тро́ице предстоите́,/ Ю́же моли́те спасти́ ду́ши на́ша.

Сла́ва, и ны́не, Богоро́дичен:

Сло́во О́тчее, Христа́ Бо́га на́шего, от Тебе́ воплоти́вшагося, позна́хом, Богоро́дице Де́во,/ Еди́на Чи́стая, Еди́на Благослове́нная./ Тем непреста́нно Тя, воспева́юще, велича́ем.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Я́ко хода́тай и засту́пник оте́честву твоему́,/ я́ко сопроти́вных реши́тель бу́ди, заступа́я лю́ди твоя́,/ тебе́, Влади́мире, сла́вящия.

Я́ко в Небе́сных оби́телех с преподо́бными и пра́ведными веселя́ся,/ преблаже́нне Влади́мире ку́пно со Агриппи́ною,/ не преста́й моля́ о лю́дех Твои́х.

Тебе́ мо́лимся, преблаже́нне Влади́мире, сопроти́вных шата́ние низложи́/ и неду́ги челове́ков облегчи́,/ я́ко да во гла́сех хвале́ния тебе́ велича́ем.

Богоро́дичен: Очище́ние на́шим да́руй прегреше́нием, я́ко Пребла́г,/ и умири́ мир Твой, Бо́же, моли́твами ро́ждшия Тя.

Ин

Ирмо́с: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том, позна́ешися,/ внегда́ приити́ вре́мени, пока́жешися./ Сла́ва си́ле Твое́й, Го́споди.

Стра́сти вра́жия у́бо иногда́ уби́в, блаже́нне, коне́чныя того́ па́губы избе́гл еси́,/ та́ко и ны́не, Влади́мире, оте́чество твое́ сохраня́й ненаве́тно/ вку́пе со Агриппи́ною моли́твами твои́ми.

Заре́ю трисо́лнечныя благода́ти сия́я све́тлый ваш пра́здник, блаже́ннии,/ страстна́го омраче́ния бесо́вскаго избавля́йте/ творя́щих ве́рою па́мять ва́шу.

Днесь день святы́й пра́здничный/ мона́хов созыва́ет стада́ на весе́лие и трапе́зу духо́вную/ и на пи́щу нетле́нныя жи́зни и Боже́ственнаго наслажде́ния чудотво́рцев.

Богоро́днчен: Разуме́в проро́к Ду́хом Бо́жиим,/ го́ру Тя приосене́нную преднаписа́, Чи́стая;/ иста́явшую зно́ем мно́гих прегреше́ний ду́шу мою́ прохлади́ хода́тайством Твои́м, Де́во,/ еди́на бо Ты челове́ком исправле́ние.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Земля́ освяти́ся, прие́мши честна́я телеса́ ва́ша,/ Богоблаже́ннии Влади́мире и Агриппи́но,/ челове́цы же, прие́млюще ва́ми исцеле́ние, Христа́ сла́вят,/ и́скренно вас просла́вльшаго.

А́ще и преидо́сте от земли́, но к Небе́сным доспе́сте/ и та́мо со А́нгелы Тро́ице предста́сте,/ Юже моли́те спасти́ любо́вию вас почита́ющих, блаже́ннии.

Я́ко зве́зды пресве́тлыя и я́ко незаходи́мое со́лнце стяжа́вше вас,/ оте́чество ва́ше хва́лится,/ почита́юще па́мять ва́шу пречестну́ю, Влади́мире и Агриппи́но.

Богоро́дичен: Де́ву пое́м Тя по рождестве́, Богоро́дице,/ Ты бо пло́тию Бо́га Сло́ва нам родила́ еси́,/ Ему́же вси си́це зове́м:/ пути́ на́ша напра́ви, мо́лим Ти ся.

Ин

Ирмо́с: Све́тлый нам возсия́й Свет присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Христе́, Бо́же наш.

О предо́брая дво́ице!/ О пресве́тлая свети́ла!/ О благосопряже́ние, еди́н свет, во двою́ те́лу сый!/ О свети́льницы блази́и своему́ житию́ бы́вше!/ Яре́м бо Госпо́день взе́мше, Тому́ от души́ после́довасте ве́рою.

Досточу́дная и пресла́вная па́мять ва́ша возсия́ в Росси́йстей земли́, блаже́ннии,/ и ра́достно ве́рных весели́т собо́р,/ и́скренно вас в пе́снех, святи́и, сла́вящих.

Святи́тели и свяще́нницы, мона́си и прости́и, и ста́рцы со ю́нотами,/ и всяк во́зраст, све́тло предыгра́йте,/ па́мять пресла́вных Влади́мира и Агриппи́ны в пе́снех велича́юще.

Богоро́дичен: Светообра́зный Христо́в храм, Отрокови́це,/ моли́твами Твои́ми Отцу́ и Сы́ну и Свято́му Ду́ху и нас хра́мы сотвори́,/ преподо́бныя содева́ющи, Пречи́стая.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

О пречестна́я дво́ице!/ О вели́цыи свети́льницы!/ Освяти́те и просла́вите любо́вию вас в пе́снех сла́вящих, чудотво́рцы.

Я́ко пресве́тлая дво́ице и я́ко пречестна́я верста́ и благосочета́ние,/ яре́м Госпо́день взе́мше, Тому́ от души́ порабо́тасте.

Я́ко сове́тницы до́брии своему́ житию́,/ еди́ну мысль во двою́ те́лу иму́ще, мир чудесы́ просвеща́ете,/ те́мже и нас озари́те моли́твами ва́шими.

Богоро́дичен: Уясня́ют проро́честии гла́си Бо́жию Тя, Де́во, Роди́тельницу,/ пое́м же Тя и мы, ви́дяще сбытие́ честны́х прорица́ний,/ де́вству вои́стинну и чистоте́ вмести́лище.

Ин

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

От прече́стна ко́рене израсте́ ветвь пресла́вная,/ и, благоче́стно на земли́ пожи́в, Влади́мире,/ прия́телище чи́сто Ду́ха Свята́го был еси́,/ просвеща́й пою́щих ны́не па́мять твою́.

Весе́лия днесь испо́лнися Росси́йская земля́,/ в наро́читый день пра́здника ва́шего, пресла́внии чудотво́рцы,/ и, пою́щи, си́це глаго́лет:/ моли́те Христа́ сохрани́ти оте́чество ва́ше от язы́ка чужда́го.

Сиро́т и вдови́ц засту́пницы, и в беда́х необори́мии помо́щницы,/ и всех притека́ющих к вам приста́нище небу́рное,/ и неле́стное ути́шие су́щих во гресе́х.

Богоро́дичен: Вели́чия Тебе́, Чи́стая, сотвори́ Христо́с Бог наш,/ Его́же моли́ при́сно возвели́чити и в нас бога́тую Его́ ми́лость,/ Пренепоро́чная Влады́чице.

Конда́к, глас 8.

Подо́бен: Взбра́нной:

Ми́ра сего́ княже́ние и сла́ву вре́менну помышля́я,/ сего́ ра́ди благоче́стно в ми́ре пожи́л еси́, Влади́мире,/ ку́пно и с супру́жницею твое́ю, прему́дрою Агриппи́ною,/ ми́лостынею и моли́твами Бо́гу угоди́вше./ Те́мже, и по сме́рти неразлу́чно во гро́бе лежа́ще,/ исцеле́ние неви́димо подава́ете,/ и ны́не Христу́ моли́теся/ сохрани́ти град же и лю́ди, и́же вас сла́вящих.

И́кос:

Уясни́ язы́к мой, Спа́се, и умири́ се́рдце мое́,/ разшири́ уста́ моя́ и напо́лни Ду́ха и прему́дрости,/ да и́миже возглаго́лю и воспою́ си́це Твоя́ чудотво́рцы:/ ра́дуйся, Влади́мире блаже́нне с прехва́льною Агриппи́ною вку́пе./ Ра́дуйтеся, земли́ Росси́йстей засту́пницы и князе́м правосла́вным помо́щницы./ Ра́дуйтеся, оте́честву ва́шему храни́тели и гра́ду Рже́ву утвержде́ние./ О пречестна́я дво́ице и благо́е сопряже́ние, Христу́ моли́теся/ сохрани́ти град и лю́ди, и́же вас сла́вящих.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

В боле́зни к тебе́ прибега́ющих избавля́й, преблаже́нне Влади́мире/ ку́пно со Агриппи́ною, Христу́ вопию́щих:/ оте́ц на́ших Бо́же, благослове́н еси́.

Всем приста́нище бу́дите, преблаже́ннии,/ и небу́рное оти́шие су́щим во гресе́х,/ да и мы с ва́ми Христу́ возопие́м:/ оте́ц на́ших Бо́же, благослове́н еси́.

Прибе́жище да ми бу́дите в день гне́ва, Богоблаже́ннии,/ я́ко посреде́ хожду́ сете́й мно́гих:/ те́мже изба́вите мя от них, да возмогу́ воспе́ти вас.

Днесь пресла́вная па́мять Влади́мира и Агриппи́ны, я́ко со́лнце, возсия́ в ми́ре,/ в ню́же соше́дшеся, вси воспое́м си́це:/ оте́ц на́ших Бо́же, благослове́н еси́.

Богоро́дичен: Ка́пля Богото́чная, от Тебе́ ро́ждшаяся, мир освяти́, Богоро́дице Де́во;/ ка́пли мне ми́лости источи́,/ освяща́ющия ду́ши и помышле́ния земны́х.

Ин

Ирмо́с: О́троцы, благоче́стию совоспита́ни,/ злочести́ваго веле́ния небре́гше,/ о́гненнаго преще́ния не убоя́шася,/ но, посреди́ пла́мене стоя́ще, поя́ху:/ отце́в Бо́же, благослове́н еси́.

Во всех страна́х про́йде веща́ние,/ я́ко гра́ду Рже́ву яви́шася чудотво́рцы пресла́внии,/ да́рующе мно́жество исцеле́ний всем, приходя́щим к ним/ и ве́рою пою́щим их.

Се ны́не стеко́шася от всех градо́в и стран вси святи́телие, и свяще́нницы,/ и мона́си, и прости́и, бога́тии и убо́зии, вси ра́дующеся вку́пе,/ хвалу́ возда́ти вам, Богоблаже́ннии.

Чудесы́ у́бо твои́ми, я́ко цвет, процве́л еси́, пресла́вне Влади́мире, я́коже рече́ проро́к:/ пра́ведник, я́ко фи́никс, процвете́т./ Сего́ ра́ди вси тя ны́не сла́вим, блаже́нне.

Богоро́дичен: Тебе́, Всесвята́я Чи́стая, раби́ Твои,/ всегда́ во дни и в нощи́ мо́лим сокруше́нною мы́слию,/ прося́ще избавле́ние пода́ти грехо́в на́ших Твои́ми моли́твами.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Очи́сти и прости́ согреше́ния на́ша, Безгре́шне,/ моли́твами Твои́х уго́дник Влади́мира и Агриппи́ны,/ да пое́м Тя, Христе́, во ве́ки.

И́же от се́рдца руко́ю недосто́йною приноси́мое вам хвале́ние, блаже́ннии, приими́те/ и мольбу́ сотвори́те о нас ко Христу́ Бо́гу.

Тро́ичен: Певце́м, Тебе́ пою́щим, Тро́ице Пресвята́я,/ согреше́ния оста́ви, я́ко Пребла́га,/ моли́тв ра́ди Влади́мира и Агриппи́ны, да Тя пое́м во ве́ки.

Богоро́дичен: Божества́ сосу́д бы́вши, Чи́стая,/ просвети́ мя в повеле́нии Све́та ходи́ти, Пречи́стая,/ от чре́ва Твоего́ возсия́вшаго и просвети́вшаго ве́рных сердца́.

Ин

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

А́нгельстии чи́нове хва́лят вас, пресла́внии,/ и челове́честии ро́ди пою́т непреста́нно,/ творя́ще ве́рно па́мять ва́шу.

Досто́йными похвала́ми воспе́ти пресла́вныя чудотво́рцы/ ум и смысл да́руй ми, Христе́ Бо́же,/ я́ко да пою́, ра́дуяся, па́мять их.

Побе́да имени́та вои́стинну ве́рным лю́дем,/ в беда́х кре́пцыи помо́щницы яви́шася,/ Влади́мир ку́пно со Агриппи́ною.

Богоро́дичен: Уврачу́й, Пречи́стая, стра́сти се́рдца моего́, ро́ждшая всех Царя́ Бо́га,/ и пра́ведных ча́сти яви́ мя прича́стника, Богоро́дице Де́во,/ Христа́, Сы́на Твоего́, умоли́вши.

Песнь 9

Ирмо́с: Вои́стиину Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

От ю́ности ва́шея чи́стую со́весть иму́ще к Бо́гу,/ сего́ ра́ди, благоче́стно пожи́вше, к Вы́шним преидо́сте./ Моли́те Христа́ о нас, да вас любо́вию почита́ем.

Я́ко предстоя́ще Святе́й Тро́ице с преподо́бными и пра́ведными,/ моли́теся, блаже́ннии, изба́вити нас вся́каго преще́ния и гне́ва,/ да вас непреста́нно велича́ем.

Лю́дие твои́ мо́лят тя, Богоблаже́нне Влади́мире,/ ку́пно моли́ Христа́ с прему́дрою Агриппи́ною,/ с не́юже в ми́ре богоуго́дно пожи́л еси́,/ изба́вити нас от вся́ких зол.

Богоро́дичен: О, чудесе́ вели́каго!/ Ка́ко вмести́ся во утро́бу Твою́ Христо́с Бог, ника́коже вмести́мый?/ Его́же за хва́лящия Тя умоли́, Де́во, от бед изба́вити нас/ и от беззако́нных челове́к всегда́.

Ин

Ирмо́с: Светоно́сный о́блак, во́ньже всех Влады́ка,/ я́ко дождь с Небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси, я́ко Ма́терь Бо́га на́шего Чи́стую.

Красе́н душе́ю и те́лом и благоче́стием сия́я, сла́вне Влади́мире,/ Боже́ственнаго испо́лнен ра́зума и прему́дрости, орга́н Свята́го Ду́ха был еси́,/ по сме́рти у́бо к безсме́ртней жи́зни/ и неконча́емому блаже́нству преше́л еси́, ра́дуяся.

Я́ко у́тро, я́ко день све́тлый, ваш пра́здник яви́ся, сла́внии,/ а́ки струя́ происхо́дит от ра́ки ва́шея исцеле́ний вся́ких/ и ве́рных сердца́ напоя́ет, любо́вию вас почита́ющих.

Вели́к щит и вели́ка кре́пость земли́ Росси́йстей/ обре́лся еси́, блаже́нне Влади́мире вку́пе со Агриппи́ною,/ наро́ду правосла́вному похвале́ние и сла́ва во всех язы́цех,/ и ны́не мо́лим вы сохрани́ти оте́чество ва́ше от ва́рварскаго нахожде́ния.

Богоро́дичен: Я́же Свет ро́ждшая Боже́ственный,/ омраче́ннаго мя все́ми прило́ги лука́ваго,/ и во уны́нии живу́щаго, и прогневля́ющаго Бо́га,/ Всенепоро́чная, просвети́ и наста́ви к до́брым дело́м,/ я́ко вина́ всех благи́х.

Свети́лен.

Подо́бен: Посети́л ны:

И́же благоче́стно пра́зднующим па́мять ва́шу, Богоблаже́ннии Влади́мире и Агриппи́но,/ вку́пе ми́рно пожи́вше и благоче́стно,/ моли́те Христа́ грехо́в оставле́ние дарова́ти рабо́м ва́шим.

Богоро́дичен:

Пресвята́я Богоро́дице, упова́ние на́ше и похвало́,/ Тя еди́ну ве́дуще, ве́рою покланя́ющеся, мо́лим:/ ра́дуйся, Неискусобра́чная Свята́я Мари́е, покро́ве и огражде́ние на́ше/ и Помо́щнице су́щим в беда́х./ Моли́ Христа́, Сы́на Твоего́, за рабы́ Твоя́, на Тя бо наде́емся.

На хвали́тех стихи́ры на 4, глас 4.

Подо́бен: Зва́нный свы́ше:

Я́ко светоза́рное со́лнце,/ блаже́ннии, от за́пада возсия́вше,/ всю Росси́йскую зе́млю просвети́сте/ и к све́ту весе́лия наста́висте;/ и ны́не о пою́щих вас, Влади́мире блаже́нне с прему́дрою Агриппи́ною,/ и сла́вящих лю́дех, и прося́щих исцеле́ния,/ и ко Христу́ и́скренно притека́ющих/ моли́те спасти́ и просвети́ти ду́ши на́ша.

О, вели́кое и несказа́нное чу́до/ Боже́ственныя благода́ти,/ Влади́мира блаже́ннаго с прему́дрою Агриппи́ною/ ка́ко возмо́жем воспе́ти или́ изглаго́лати?/ О́ваго я́ко хра́бра и богочести́ва,/ о́ву же я́ко му́дру и благове́рие храня́щу./ Ов у́бо го́рдаго врага́ победи́,/ о́ва же смире́ние любля́ше;/ и ны́не Христу́ Бо́гу мо́лятся/ спасти́ и просвети́ти ду́ши на́ша.

Всечестны́й приспе́ пра́здник святы́х чудотво́рцев,/ хода́тайствуя всем спасе́ние,/ в не́мже, та́йно восплеска́вше, к ним си́це рцем:/ ра́дуйтеся, свети́ла те́мным мы́сленнаго Со́лнца;/ ра́дуйся, Влади́мире, ку́пно с супру́жницею твое́ю/ благове́рие храня́ще во Еди́нстве Святы́я Тро́ицы,/ Ю́же моли́те спасти́ и просвети́ти ду́ши на́ша.

Пе́рвее у́бо, прехва́льнии,/ от ю́ности своея́ Христу́ порабо́тавше,/ су́щаго в ми́ре сем/ я́ко прехва́льна позна́вше/ и сего́ ра́ди ми́лостынею и моли́твами/ до́бре Тому́ угоди́вше./ Те́мже и по сме́рти исцеле́ние подава́ете всем,/ ве́рою вас почита́ющим, Влади́мире и Агриппи́но,/ и ве́лию ми́лость.

Сла́ва, глас 2. Самогла́сен:

Прииди́те, вси язы́цы,/ восплещи́те рука́ми и ликовству́йте,/ прииди́те, вси росси́йстии святи́телие и свяще́нницы,/ мона́си же и прости́и,/ духо́вне возвесели́мся/ в наро́читый день пра́здника но́вых чудотво́рцев Рже́вских,/ Влади́мира блаже́ннаго и Агриппи́ны прехва́льныя./ И сих, я́ко цве́ты, хвала́ми и пе́сньми почти́м,/ си́це глаго́люще:/ ра́дуйтеся, пресла́внии,/ Небе́снии челове́цы, земни́и а́нгели,/ Ду́ха Свята́го оби́телище,/ ева́нгельскому гла́су у́бо возсле́дницы,/ тем и прия́сте вме́сто тле́нных нетле́нная./ И ны́не в па́мяти ва́шей моли́те Христа́ Бо́га/ сохрани́ти оте́чество ва́ше,/ и поми́ловати град и лю́ди, почита́ющия вас,/ и спасти́ ду́ши на́ша.

И ны́не, Богоро́дичен: На Тя упова́ние:

Та́же славосло́вие вели́кое. Тропа́рь. И отпу́ст.

НА ЛИТУРГИ́И

Блаже́нны: от кано́на 1-го Песнь 3-я, на 4, и друга́го Песнь 6-я. Проки́мен, глас 7: Честна́ пред Господем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода: Ева́нгелие от Матфе́я, зача́ло 10. Прича́стен: Ра́дуйтеся, пра́веднии, о Го́споде:

Святые благоверные князь Владимир и княгиня Агриппина Ржевские издревле почитались в городе Ржеве. Они были погребены в ржевском соборном храме. Над их могилами, расположенными рядом, до 1745 года сохранялась гробница. Город Ржев в древности назывался Ржевою Владимировою по имени своего первого князя – святого Владимира. Святой Владимир был сыном Мстислава Мстиславича Удалого, брат святой Феодосии, матери благоверного князя Александра Невского (†1263; память 23 ноября). По другим источникам, он сын Всеволода Большое Гнездо. Святая Агриппина, вероятно, была женой благоверного князя Владимира. Память ее совершалась местно также 23 июня. Точных сведений об этих святых нет. По преданию, колодец около городского собора выкопан благоверным князем Владимиром.

Во Ржеве существовала легенда о сохранении города в Смутное время от литовцев благодаря заступничеству благоверного князя Владимира. Будто бы благоверный князь верхом на коне, словно из-под земли, вырастал перед литовскими войсками, и они в смятении отступали, когда он взмахивал белым платом. Каждую ночь благоверный князь Владимир обходил городские стены, как бы сторожа Ржев. Вечером к его могиле ставили новые сапоги, а наутро они оказывались истоптанными. Но однажды ржевцы пожалели новые сапоги и сделали набойки на старые. Утром обувь оказалась нетронутой, и, хотя жители города поспешили исправить свою вину и поставили к гробнице новые сапоги, благоверный князь Владимир более не обходил город. Православные жители Тверской земли продолжали почитать память святых князя Владимира и княгини Агриппины. В 1979 году благоверные князь Владимир и княгиня Агриппина, по благословению Святейшего Патриарха Пимена, включены в Собор Тверских святых (переходящее празднование в Неделю 1-ю после дня памяти святых первоверховных апостолов Петра и Павла).

Литература:

1. Димитрий (Самбикин), архиепископ. Месяцеслов святых всею Русскою Церковью или местно чтимых. Вып. 11, июль. Тверь, 1901, с. 190–192.

2. Тверской Патерик. Краткие сведения о Тверских местно чтимых святых. Казань, 1907, с. 30–32.

3. Журнал Московской Патриархии, 1979, № 11, с. 15–21.