IV. Часть Требника

С Богом.

Епископ глаголет:

Господи Боже блажи и святе, во святем почиваяй, его же благоволением и заповедьми святыми древле раб Твой Моисей прия кровь и окропи ею все сосуды служебные, яже во образ нам быша, ныне молимтися и милися деем, о Благий человеколюбче: преподаждь освящение сосудом сим от Духа Твоего Святаго, и кропление крови Христа Твоего да покрыет я, воеже быти им сосудом чистым в чистое и истинное служение животворящего Твоего благоволения, еже есть Тело и страшная Кровь Христа Твоего, да освятятся и исполнятся хвалы имени Твоего Святаго во всех, Отче и Сыне и Душе Святе.

Посем знаменует крестообразно из чувств своих, и взяв елей, помазует им сосуды, глаголя: Благословен Господь Иисус Христос Сын Бога Святаго, и Дух Святый. Аминь.

Епископ глаголет:

Владыка Господь Бог, Господь благий, да прострет руку свою святую и освятит дискос сей, полный благ, яже уготова любящим имя Его святое и возлежащим на вечери тысящу лет – И ныне, Господи, человеколюбче, простри руку Твою Божественную на дискос сей благословенный, на нем же имут возлежати уды Тела Твоего Святаго, еже вознесут на алтарь святилища святаго града (имрек). Слава Тебе со Отцем Твоим благим, и Духом святым, ныне и присно.

Посем приимлет елей и помазует им дискос, глаголя: Благословен Господь Иисус Христос Сын Бога святаго и Дух святый. Аминь.

Епископ глаголет:

Господи Боже, Творче Благий, уставивый одежду святилища и освящение одеяния, и творяй ново благо, еже уготова Господь любящим имя Его и возлежащим на вечери тысящу лет: понеже ты Господи человеколюбец еси, простри убо руку Твою десную на одежду сию, благословенную чериленицею (стр. 266, 268) тела Твоего святаго. Сия есть, яже уставлена во храме, иже есть церковь святая. Хвала Тебе и Сыну Твоему и Духу Святому, ныне и присно.

Приемлет елей и помазует им одежду, глаголя: Благословен Господь Иисус Христос Сын Бога святаго и Дух святый. Аминь

Молитва о благословении чаши.

Епископ глаголет:

Владыко, Господи, Иисусе Христе, иже еси истинный Бог и человек, егоже Божество нераздельно от человечества Твоего, иже пропял еси Кровь Твою за нас по единому благоизволению хотения Твоего, простри руку Твою Божественную на чашу сию, освяти и очисти ю, да носится в ней Кровь Твоя пречистая, и да будет во врачество и умилостивление всем, иже имут пити от нея истинно. Слава Тебе, и Сыну Твоему благому, и Духу святому. Аминь.

Посем приемлет елей и помазует им чашу внутрь и вне, глаголя: Освящение, и очищение, и благословение, и благодать всем, иже имут пити от Крови Твоея пречистыя и истинныя. Аминь.

Боже, сподобивый раба Твоего Исиию, пророка видети Серафима, влещи в руце имуща, и ими вземльша уголь горящ на олтаре и принесши оный к устом его: и ныне Господи Боже вседержителю простри руку Твою на лжицу сию, еюже приемлется Святое Тело Сына Твоего единороднаго Господа, и Бога, и Спаса нашего Иисуса Христа, благослови ю, освяти ю, даруй ей силу и славу, якоже сотворил еси с клещи, бывшими в деснице Серафима. Яко Твоя есть сила, и честь, и крепость с Сыном Твоим единородными, Господом нашим Иисусом Христом и Духом Святым. Аминь.

И помазуя лжицу елеем глаголет: Сила, и честь, и свет, и освящение Троицы Святыя в сей церкви святой (имрек). Аминь.

Епископ глаголет:

Господи Иисусе Христе, Источниче сокровищ милосердия, даяй блага всем уповающим на Тя, простираяй небеса на высоте их, украшаяй и испещряяй твердь и облаки небесные, яже колеблются и не изменяются: ныне, Господи человеколюбче, да будет сила Твоя Божественная в сосудех сих, сиречь в покровах, имиже повиваются уды Тела Твоего святаго: ниспосли на их силу плащаницы, еюже Тело Твое святое во гробе повито бе²⁶ и да будут подобни небесным. Яко твоя есть сила и слава и держава с Сыном Твоим благим и Духом святым. Аминь.

Посем епископ, помазует его, и глаголет: Един Отец Свят, и един Сын Свят, и един Дух Свят. Ему подобает держава, слава и власть. Аминь.

Епископ обращся к востоку, глаголет:

Владыко, Господи, Боже вседержителю, сотворивый небо и землю всесильным словом Твоим, и исполнивый я Духа Твоего Святаго, создавый ангелы и архангелы, херувимы и серафимы и все воинство небесное, моря и реки и вся яже в них, просим и молим благость Твою, человеколюбче: услыши нас, простри руку Твою невидимую и благослови сию трапезу древяну, да будет олтар святый и престол святый, вместо олтаря высока и от камене устроена. Ты повелел еси рабу Твоему Моисеови освятити скинию свидения и вся яже в ней: он же благослови е по заповеди Твоей. И аз раб Твой пред Тобою стоящий молю Тя: услыши мя уничиженна, убога и недостойна молитися Тебе, благий человеколюбче, Иисуса Христа ради Господа нашего и Духа святаго: благослови сию трапезу, да вся возложенная на ню и вся потребная ко олтарю освящаются на ней благодатию и милосердием и проч.

Посем, приемлет елей святый и помазует им трапезу во образ креста на четырех странех ея, глаголя: Благословен Господь Иисус Христос Сын Бога Святаго и Дух святый единый животворящий. Аминь.

Молитва о олтаре, егда будет осквернен руками еретиков или животными.

Первее водою измывается, посем да чтутся молитвы и епископ возжет фимиам и глаголет сию молитву:

Владыко всякаго естества, содетелю всех сущих и создателю всех тварей, благословениями вся люди ущедряяй во всякое время спаса ради нашего, и блага подаваяй роду человеческому, основавый землю на тверди ея, творяй дивная един Ты Владыко во всяком месте и граде в ко всяцей области даровал еси им церкви, и олтари водрузил еси в них, и заповедал еси, да имени Твоему святому приносятся возношения духовная и жертвы безкровныя во спасение душ человеческих.

Диакон. Помолитеся.

Епископ обращся лицем к востоку, глаголет:

Ты ныне, Господи, по любви Твоей к людем, посли духа Твоего святаго и очисти олтарь сей от всякия извращеныя веры еретиков, от всех нечистот телесных и от всяких прилогов скверных, да надежда и спасение веры будет приступающим к Божеству Твоему во обновление души, тела, и духа, и во оставление грехов: ты бо един еси милостивый, долготерпеливый и многомилостивый, и Тебе подобает всякая слава, Отцу и Сыну и Святому Духу, ныне и присно, и во веки веков. Аминь

Посем пять раз знаменует крестом трапезу и четыре страны ея.

Молитва, глаголемая епископом при освящении образов.

Господи Боже всемогущий, Отче Господа и Бога и Спаса нашего Иисуса Христа Бога, иже древле чрез раба Твоего Моисея дал еси нам закон рукою Твоею и повелел еси ему сотворити в скинии свидения подобие серафимов и херувимов, покрывающих олтарь крилами своими, и даровал еси Соломону премудрость создати Тебе дом во Иерусалиме, и явил еси избранным апостолам воплощение Сына Твоего единороднаго Господа нашего Иисуса Христа, и повелел еси нам сооружати церкви, посвященные имени святых Твоих и мучеников. Просим и прилежно молим Тя человеколюбче: посли Духа Твоего святаго на иконы сия (имрек святаго или мученика), да будут прибежища спасения, прибежища кающихся, да вси приступающии к ним с верою получат благодать от Бога, иже един оставляет грехи: яже благословен еси, и преславно имя Твое святое, о Отче, Сыне и Душе Святе, иже с Тобою пребывает и соравен Тебе есть. Аминь.

Боже наш, Царю святых, даровавый нам сию благодать Твою великую и дивную, еже имети телеса святых мученик, (зде епископ глаголет: Боже, се тело святаго мученика имрек, иже славно подвизася за имя Твое благословенное, и явил есть всю силу всевышняго), иже взяша кресты своя на небо, во обитель живых, тела же их соделашася свята на земли в здешнем обитании, во славе и чести: сим убо достопокланяемым мощам даждь Господи благодатный дар, да врачуют вся немощи в людех, и прогонят дуси нечисты. Ныне, Господи человеколюбче благий, смиренно молим Тя: ради страстей святых мученик, яже претерпеша за имя Твое святое, подаждь нам здравие силою телес их благословенных, и их ради сподоби благодати Твоея, спасителю, нас и всех покланяюшихся им во истине, услыши благие моления их о нас и о отцех наших, и даруй нам оставление грехов наших и здравие душам нашим и духовом нашим, и спаси ны ради славы Твоея, о Христе, со Отцем Твоим Благим и Духом Святым, животворящим и соравным Тебе. Аминь.

По уготовании всего потребнаго епископ глаголет благословение, и приемлет кадильницу: посем чтут послание св. ап. Павла к Ефесеем: Молю убо вас аз юзник о Господе, достойно ходити звания, в неже звани бысте, со всяким смиренномудрием и кротостию, с долготерпением, терпяще друг другу любовию, тщащеся блюсти единение духа в союзе мира: едино тело, един дух, якоже и звани бысте во едином уповании звания вашего: един Господь, едина вера, едино крещение, един Бог и Отец всех, иже над всеми и чрез всех и во всех нас. Единому же коемуждо нас дадеся благодать по мере дарования Христова и пр.

Посем чтут трисвятое и псалом 21. Глас Господень на водах, Бог славы возгреми, Господь на водах многих, глас Господа великаго и славнаго.

Евангелие от Матфея: пришед Иисус во страны Кесарии Филипповы, вопрошаше ученики своя, глаголя: кого мя глаголют человецы быти, Сына человеческаго. Они же реша: они убо Иоанна Крестителя, они же Илию, другие же Иеремию, или единаго от пророк. Глагола им Иисус: выже кого мя глаголете быти. Отвещав же Симон Петр рече: ты еси Христос, Сын Бога живаго. И отвещав Иисус рече ему: блажен еси Симоне вар Иона, яко плоть и кровь не яви тебе, по Отец Мой иже на небесех. И аз же тебе глаголю, яко ты еси Петр, и на сем камени созижду Церковь Мою, и врата адова не одолеют ей. И дам ти ключи Царства небеснаго: и еже аще свяжеши на земли, будет связано на небесех: и еже аще разрешини на земли, будет разрешено на небесех.

Епископ глаголет сию молитву:

Господи Иисусе Христе, единородный сыне Бога Отца, озаряяй вся сущая на небесех, иже священием тела Твоего святаго свободил еси нас от мучительства диавола, и показал еси нам сие таинство божественное, в неже ангели желают приникнути, иже даровал еси нам освящение, входа ради в царствие Твое, банею пакибытия и обновлению: рекл бо еси: иже аще не родится водою и духом, не внидет в Царствие Божие: и сего ради благоволил еси креститися в водах Иорданских, и аще не нуждался еси во очищении, яко свят еси, но очистил еси я, и освятил еси я, егда снишел еси в ня, и сокрушил еси главы дракона в водах, такожде же и нас погрязших с ним во гресех: даруй оставление грехов наших, да будут измовенны в купелех наших.

Диакон возглашает: Помолитеся.

Епископ. И ныне, Господи, смиренно молим Тя о сей воде, яже предложена есть наподобие Иордана: о Господи, иже спасения нашего ради крестился еси от раба Твоего Иоанна по воле своей, и иже освятил еси воды Иордановы, освяти и воды сия, да вси приступающии к ним сподобятся отпущения грехов, избавления от тли, и даров небесных, и да напишутся имена их в книзе живота, и подобие сына Твоего Благаго и Духа Святаго, с Тобою воды оживотворяющего. Аминь.

Приемлет елей, и помазует ним воду, глаголя: Освяти сию купель о имени святаго Иоанна Крестителя, во имя Отца, и Сына, и Святаго Духа. Аминь.

Тайно же глаголет сию молитву:

Тайная молитва, юже глаголет епископ пред службою: Господи Боже вседержителю, Отче Господа, и Бога, и Спаса нашего Иисуса Христа: се аз раб Твой (имрк) чадо апостолов и провозвестник Евангелия во вселенной, якоже и отцы мои (предшественники), иже вси вероваша благоговейно и благочестиво в пришествие в мир сына Твоего единороднаго Иисуса Христа и в воплощение Его от непорочныя Девы Святыя Марии, и в страсти Его спасения нашего ради, такожде же и во вменение страстей Его, иже послушлив бе даже до креста, и во Святое Воскресение Его. Сие есть наше исповедание христианское²⁷. Аз есмь немощный и убогий грешник (имрк) излей убо на мя дары Христа Твоего, яже излил, еси на дванадесять апостол. Исполни мя всякаго разума и мудрости и кротости. Укрепи десницу раба Твоего, егоже призвал еси в служение апостольское и во священство и в жребий святых во Христе Иисусе Господе нашем, иже и пр.

Смиренно молим Тя: ради благости Твоея, человеколюбче, приими жертву и обет раба Твоего (имрек), не причастный ни коея скверны²⁸: сый на небесех приими от земных: соверши ны во святости, да и сосуды сия будут святы о дусе святыни Твоей, и да будут сосуды чисты, сосуды святыни, сосуды благословения, сосуды спасения, очищающия души наша, и дуси наша, и телеса наша: соверши ны, и даждь нам дары Твоя небесныя всецелы, ради Сына Твоего Господа и Бога и Спаса нашего Иисуса Христа, иже и проч.

Ведай чадо благословенное, Христианине возлюбленный, священнослужителю православный, Богу посвященный и разумный: яко рождие святое от корене святаго есть, и яко надеющемуся на Господа будит по молитве его. Бог благословил тебя, и благословение Его небесное велико есть: той бо есть Отец наш, ему же подобает слава всегда, ныне и во вся веки. Аминь. Той благоугодися в тебе, чадо, яко в сыне своем, силу и доброту имущем, и туне дарова тебе о Дусе своем святе дар совершен, имже сподобился еси получити благодать диаконства, якоже и прочии, иже прияша жребий сего служения, да умееши чести книги апостольския слушающим людем, такожде же и Евангелие и псалмы в церкви Господа, да благовествуеши спасение и славословиши во храме его, и да носиши чашу Божественную, источник причащения, да прославят его вси людие ради постановлени и святых²⁹ … паче же ради жребия сего служения богатнаго ради очищения грехов и возвышения на степень святаго Стефана архидиакона и мученика, ради раздаяния богатств святых, и обилия причастий в них. Прилежи убо, чадо, со всяким рачением и тщанием возрастам в делех добрых кровию Господнею, и преспешати в мудрости, пребывая в новой свободе, якоже мало отроча. – Начни учение Господне от младости, да навыкнеши в служении, в неже поставлен еси, измеряй оное трудами, храни оное в персех твоих ревнуя чести священная иисания, и разумети смысл и силу их, елико ум твой постигнути может по мере благодати, иже тебе дана есть: она бо озарит разум твой и запечатлеет в нем всякие познания духовныя и мудрость. И да будет ти ведомо, яко сие тако бывает. Наляцы подражати Господу благоговейно, и работай ему со страхом, и служи Богу святым и правым служением Твоим, доньдеже достигнеши конца его и совершенства твоего, да подражают тебе наши в добрых и святых делех, яже услышат о тебе. Блюди четыре поста, среду и пятницу, и пост из постов (сиречь четыредесятницу), яже заповедана есть Христианам паче прочих язык. Трудися ныне до изнеможения, церкви ради, и всегда бывай на славословиях, службе и литургии. Егда же достигнеши возраста брачнаго, избери супругу³⁰, но токмо одну, рожденную от добраго отца и благочестивыя матери, степенну, и право, разумно и совестно правящу домом и чадами, да и сим извествуются дела твоя в домостроительстве церкви Иисус-христовой, да будет тебе покорна в союзе чистом, и да послужит тебе мышцею целомудренною. Ты же не бремени ю тяжестью супружества, и не возлагай на ню ярма дел житейских: обличи ю, егда явится двоедушна в слове и деле и с великим тщанием блюди, да не впадет в блуд и безчестие. Убойся нерадети о всех сих, понеже даси отчет за грехи ея и имаши ответствовати за ню пред Господем, яко поручителем доброты ея и спасения ея. Храни ю от пиянства, еже есть зол вина, и от пристрастия безумных, иже далеко суть от царствия небеснаго. Тишись такожде взаимно помогати ей, и поведай ей вся помышления сердца твоего. Люби ее чистым сердцем, и разве ея не вверяйся иной: и да не бывает молва, яко предаеши ю совлекающему покрове с ней: и спасешися таковою стражою, и соблюдеша обещание твое и завет твой. И Господь Бог поможет тебе и чадем Твоим, и воздаст тебе за преспеяние во всех заповедей церкве. Силою его божественною возрастай в них паче и паче, и преспевай в ведении духовном и в познании всего, еже служит на пользу духа и в укрепление немощных. Буди раб послушливый, и тако от степени до степени достигнеши священства в мире со отцы нашими, и приимеши жребий в купе с достоублажаемым мучеником святым Стефаном архидиаконом и с седьмью достойными чести диаконами, и помогут ти в служении твоем, и поощрят тя в делании, еже внушено тебе якоже теми, иже превосходят тя в нем, такожде и всеми, ихже благими делы благоугодися Господь. И он поставит тя со двадесятью и четырьмя старцы, и услышиши глас радостный, глаголющий; вниди в радость Господа Твоего, да узриши Царя, и яже уготова тебе от сложения мира. Аз же нищии духом, уничиженный, смиренный и убогий в простоте Моей и уничижении Моем, в день судный заступления владычицы нашея святыя Марии Девы чистейшия и присно достопокланяемыя, ходатайства святаго славнаго и всехвальнаго мученика и евангелиста Марка, такожде апостолов, патриархов, епископов, исповедников и всех, иже быти причастники сего священства, блаженных, и прочих святых мученик, заступления смиренно прошу.

По рукоположении священника, абие дается ему сия заповедь.

Имеющии получити разрешение покровен приидет к тебе исповедати грехи своя, в чем сиречь преступил помышлением, словом и делом. Святое правило гласит, яко священник, не приемлющий кающегося, да извержется от общения. Исповедающимся же да скажется, яко святой апостол Иоанн заповедует покаяние сими словами: исповедайте друг другу согрешения ваша, и еще: молитеся друг за друга. Убо и священник должен молиться за паству свою. Иже бо обратит грешника от заблуждения его, спасет душу от смерти. Подобает же тебе прежде³¹ … и наконец, прилагати врачевство и пластырь, сообразны и недугу и язве коегождо: не полагается бо зелие на око мужа, ему же не пользует оно. Врачуй же недужныя члены благовременне, и познавай нравы, свойства, время, место, сложение телесное, образ жития, словом все состояние чад твоих, их благочестие, покой, и ничтоже их да не укрыется от Тебе, да приведеши болящего от немощи его во здравие. Буди подобен духовному кормчему, приводящему корабль в пристань спасения. Буди наставник духовный, светильник во тьме сияющий, возводяй учащиеся на свойственные им степени, да будут достойны сугубыя награды. Тебе же Господь даст обилие благ небесных ходатайством Девы Марии и всех святых мученик. Аминь. – Еще, со всяким тщаянием преподавай таинства Бога живаго, и делай сие с великим благоговением, неотложно и прилежно, и со страхом, понеже сами серафимы и херувимы и вышнии силы трепещут пред ими. На горнем месте высоким умом помышляй³², яко закланный за тя и жертвоприносимый тобою на олтаре есть Христос Еммануил, иже самаго себе предаде за Тя, и ведай, яко причащаешися членов человечества его неповрежденнаго, и в руцех твоих носиши, его же Симеон священник с великим благоговением и страхом подъя на руце свои, и яко сия есть чаша Крови Его, изливаемая о гресех, и яко ею свободишеся от всех беззаконий, чаша Крови, богатно истекшей из вертепа, иже есть ребро его божественное, егда предаде духа на кресте. Сие есть таинство страшное, сие есть Тело святое и Кровь честная, имиже бысть спасение всякой твари. Сей есть агнец Божий, вземляй грехи мира. Сей есть приводяй вся ко свету истинному. Возведи убо мысли и сердце твое горке с великим тщанием блюди сие сокровище подобно бдящему серафиму, яко воздаяние и мзду жизни. Храни сия таинства. Прилежи уклонятися от всяких искушений, не токмо себе ради, но и назидания ради всякаго, внемлющего сим святым тайнам. Обрати заблудшего от пути неправа: не погуби души его, и не буди виною развращения его. Проси Бога, о еже сподобитися видити его: пред ним бо мир весь ничтоже есть. Толико многоценно есть служение твое, в неже посвящен еси! Совершай убо оное чинно, парадно, в спокойствии и тишине, с великим тщанием и рачением, в пристойном одеянии и с кротким взором очей. Имей попечение о священных сосудах, светли их единожды, дважды и трижды, и пытай, аще есть в них кое повреждение, да совершенно и достохвально будет служение твое, и молитва твоя благопоспешна, и благодать Господня да преизбыточествует в тебе. И Господь Бог, Царь Царей и Господь Господей, и раздаятель достоинств, распределяяй степени священства на земли, якоже есть облечен ими на небеси, поможет ти и снабдит тя, укрепит и направит тя силою своею в деле служения твоего, во всякое время живота твоего, благословить тя и сам благословится в тебе.

Ведай, чадо благословенное и угодное Господу, призвавшему тя к себе, и избранниче Бога, ему же угодно бысть избрати тя. Понеже Господь наш, егоже честь и хвала избра тя на служение ему, сотвори тя единаго от священник своих, егда от степени диаконства возведе тя на степень священства, и почте тя достойна совершати таинства живоносные: сего ради послушествуй, елико можно, онем заповедем: приращение бо дел, от них раждающихся, служит ко отпущению грехов. Познай, яко мера благодати сея, юже сообщихом тебе, есть дар совершенен, егоже приял еси в сей час, понеже чрез него сподобился еси смотрения Господня, воеже быти ходатаем во святилище его и разрешати люди от грехов их. Действуй убо не по чувствию внешнему, но по чувствию внутреннему, еже восторгает в вечность, и да не престаеши стяжати добродетели духовныя, дóндеже дух живит сия члены твоя, но паче приложи делам благоугодным, и возсияет денница в тебе от света Его не вечернего. Буди образ петый в слове и удалении от прелести вещей суетных, якоже пред людьми, такожде и в доме твоем. Убегай любостяжания: оно бо есть корень всех зол. Блюдися от пресыщения и пиянства: оне бо помрачают ум и погубляют тело. Убегай такожде распрей, ярости, жестосердия, осмеяния и гордости. Уклонися от ропота, и остервенения, и от мерзких беззаконий блуда и прелюбодеяния, и от любящих вся сия. Блюди, да не будеши двуязычен, ниже свидетельствуеши ложно: писано бо есть³³ … не обретеся во устех его лесть. Ты же не косни телеси, дóндеже достигнеши до конца. Но люби Бога и вся создания всею душою и сердцем, и стяжи прочие добродетели, милосердие, благочестие, и благостыню, и смирение, сокрушение сердца, терпение, верность, кротость и искренность. Не отступай от правыя веры Господа нашего Иисуса Христа: понеже он есть основание, на нем же зиждется спасение всех христиан. Приникай умом непрестанно в читаемая тобою, и в учение и в смысл книг церковных, и упражняйся в познании правил и законов и преданий веры. Труждайся ради людей божиих во благочестии, и настоятельно управляй ими, да подражают Христу, обаче с снисхождением и кротостию в тайне по силе сего наставления, да путем сих добродетелей достигнеши жилища блаженных. Наказуй себе самаго правилами твердыми о нуждными, яже суть основание и существо учения христианскаго, в них же паче всех других заповедей имаши нужду.

Написася сия книга благословенная в патриаршество владыки и отца нашего Гавриила, иже бе девять-десять пятый:³⁴ (да продлит Бог вышний владычество его) и сей есть един от лика патриархов престола св. Марка. Преведе же ю отец честный, изрядный, мудрый, сосуд избранный испытатель глубокий, исполнь величия, имый ведение духовное и прочия совершенства светозарная, иже достойно возведет бе на степень епископа, и живет в памяти паствы его, яко пастырь добрый и учительный: – и сбыстся на нем слово: добрый рабе и верный, в мале был еси верен, над многими Тя поставлю, вниди в радость Господа Твоего: – отец наш Клеопа, возведенный на престол отцев наших. Да умножит Бог лета живота его в мире безмятежном, и да у твердит его на престоле на многая лета: нам же дарует мир долгий. Аминь.

И аз убогий преводник, многими грехми оскверненный и исполненный беззаконий, чужд всякие добродетели, недостойный именоватися человеком за грехи и беззакония, аз молю всякаго чтущего сию книгу, да почивает на ней со всяким прилежанием и благорасположением, и в конец да улучит вожделенное благо и мир непростающий.

Хвала подателю смысла.