III. Чин посвящения и рукоположения до степени священника

Сей чин и следующая за ним часть требника переведены на славянский языке с латинского. А латинский перевод их сделан частию с коптского, частию с арабского языка, и помещен в старинном издании византийских историков, которым и пользовался в книгохранилище святогробского греческого монастыря в Иерусалиме.

В обоих этих книгах, особенно замечательны следующие места:

1) В чине посвящения иподиакона: «Помолитеся вси предстоящие, да снидет на него Дух Святый в словесех наших». Поистине молитвенное слово, как чистейшее проявление разумной души нашей, по невещественности своей есть самый соответственный Духу Святому орган, чрез который он действует благодатно.

2) B заповеди Священнику: «Имеющий ти получи разрешение покровен прияет к тебе исповедати грехи свои». От сюда видно, что Копты исповедуются пред священником закрыв лица свои.

Во имя Отца и Сына и Святаго Духа, Бога единаго

Посвященный станет без хитона пред олтарем с покровенною главою, и долу преклонь выю. Епископ же станет на ступени олтаря. Приведшие ставленника снимают с него покров.

Епископ речет им: Вы ли свидетельствуете, яко сей есть во истину достоин посвящения; и они свидетельствуют, рекше: «тако, наш отче, достоин есть». Тогда епископ, вземлет ножницы и стрижет главу его крестообразно, единожды посреди и четырежды по странам, глаголя: «во имя Святыя Троицы». По сем глаголет благодарение, и, прияв кадильницу, благословляет ю, и обращся лицеем к западу, глаголет сию молитву:

Смиренно просим и молим Тя Господи, Господи Боже: приими раба Твоего (имярек.) чтеца в церковь Твою, да почивает ум его на правде и истине Твоей. Даждь ему страх службы Твоей, сотвори его достойна прикасатися священным сосудам, да будет благоговейный анагност, сиречь чтец пред Тобою, и тако приобрящет благодать Твою со всеми благоугодившими Тебе от века. Понеже милосердие, сущее в воле Твоей, есть приращение Тебе чести и почитания от коегождо служащего и поклоняющегося Тебе, Отче, Сыне и Душе Святе.

По сем, архидиакон возглашает: Помолитеся.

Епископ же, обращся лицеям к востоку, глаголет сию молитву:

Боже богатый в дарех Твоих, иже милостив являешися церкви Твоей в посвящении, и поставлявши сих пред Тобою чрез сие таинство: се раб Твой (имярек) чист и непорочен: се раб Твой (имрек), его же призвал еси в служение чтеца: сотвори убо его достойна, и исполни его всякой мудрости в разумении, да помышляет о Твоих словесех Божественных и о служении своем. Соблюди его в семь достоинстве без порока. Соверши его в дарех Твоих легце, по милосердию Твоему, вкупе с единородным Твоим Сыном и Святым Духом. Аминь.

Обращся к западу, держит его за виски и глаголет:

Боже великий человеколюбче, держай вся десницею Твоею, и изливаяй Духа Твоего на коегождо. егоже властию вся содержатся призри на сего раба Твоего, пред лицем Твоим стояще, егоже пред Тобою поставляем, да возвещает словеса Твоя святые Ветхаго и Новаго Завета людем Твоим, и да поучает их сему святому слову Твоему, в нем же есть спасение и здравие душами. Благослови Господи показати ему велелепие Света Твоего. Просвети сердце его сиянием и озарением Твоим. Даждь ему сердце смиренно, да чтет писание и обрящет в нем разумение и мудрость: слушающие же его да воздадут Царству Твоему славу и честь, Отче и Сыне и Душе Святе.

Обращся к западу, держит виски посвящаемаго, и глаголет:

Господи Боже, Его же Сын всемогущ: Ты, иже предварил еси нас познанием числа избранных Твоих в мире и начал еси призывати человека, восполни недостаточествие раба Твоего, даждь ему мудрость, да чтет закон Tвой людем Твоим, и ныне же помози рабу Твоему (имярек), иже назнаменован есть во анагноста, даруй ему мудрость в дух проречений, да внедрит словеса Твои в смышлении святем в людех Твоих, (чтя) со умилением и без дерзновения, благодатию в любовию человека, иже есть Сын Твой единородный, Господь наш и Спас наш Иисус Христос.

По сем дает книгу, да несет Евангелие на персех: чтец лобызает олтарь и десницу епископа. Тожде деют и сущие с ним. Абие изъясняют ему святые таинства. Епископ же не возлагает на него руки, но токмо чтет ему сицевое увещание.

Чадо! Сесть первая степень ставленников, и зовется точно вступление. Приложи убо ведати ее едину. Она есть едина от источник святой Церкве, сущей от самаго Бога, обильно изливающего на ню дары благодати, да и ты от них уделяеши людем. И понеже дело сие трудно, сего ради подобает тебе бодрствовати и уготовлятися, во еже быти тебе подобну светильнику сияющу на свещнице своем, и исполняти слух внемлющих тебе неточию словесы чтомыми, но и толкованием оных. Пецыся на всякое время воспоминати слово Господне, еже глаголет: чтяй да разумеет: да избравшии тя на служение сие видят доброе житие твое, и назидаются примером твоим, и тако достигнеши высшей степени: приведшие же тя прославятся в тебе, и засвидетельствуют доброту твою во всякое время, по истине, о Господе нашем Иисусе Христе, ему же подобает хвала, честь и поклонение со Отцем Его и Духом Святым, ныне и присно, и во веки веков. Аминь.

Хвала давшему разум!

С Богом

Нареченный иподиакон станет пред олтарем без хитона (стихаря), долу преклонь главу, и вкупе с приведшими его на средину поклонится пред епископом, иже став на ступень олтаря, изрекает благословление, взяв кадильницу. Благословляет ю, и посем глаголет сию молитву, обращся лицем к востоку.

Господи Боже сил, приведый нас в жребий служения сего, устрояй разум человека, и испытуяй сердца и утробы, услыши нас во множестве благодати и милости Твоея, очисти ны от всякие скверны тела и духа, разжени любовию грехи и беззакония наша, яко мрак и мглу облачную, исполни нас силы Твоея Божественной и благоволения Сына Твоего единороднаго и действия Духа Святаго, да будем достойны служения сего новозаветнаго, да обогатимся делы благими, и величаем имя Твое святое, и совершаем службу благоволения Твоего Божественнаго. Не причти нас к приобщающимся грехом иноязычных, и не попусти нам Господи творит, еже не лет есть. Даруй же нам смысл глаголати полезная и приступати ко олтарю Твоему святому. Се приходит к Тебе иподиакон раб Твой (имрек), и стоит, уготован в чаянии Даров Твоих небесных; понеже еси благ, и многомилостив всем призывающим имя Твое святое, еже есть сильное могущество Твое, – с Сыном Твоим Единородными Иисусом Христом, Господем нашим, и Духом Святым. Аминь.

Архидиакон возглашает: Благодатию, восполняющею недостаточествия наша, приходит ко мне брат, его же обстоим тесне рукоплещуще ему, да вознесем имя его на священную степень, яже есть иподьяконство в церкви Божией святей, свободившей нас от великих бед и трудов. Помолитеся все предстоящие зде, да снидет на него Дух Святый в словесех наших.

Вси глаголют трижды: Господи помилуй!

Епископ же, обращся лицем к олтарю, глаголет, сию молитву:

Молю Тя, Господи: сотвори его достойна звания иподиаконства, да ради заслуг, яже суть от благодати Твоея человеку дарованы, прославить имя Твое святое, и служит Тебе и правит святым олтарем Твоим, и приимет милость от лица Твоего: понеже милость и благоволение благодати Твоей у тебе есть, и Тебе подобает слава и честь со единородным Сыном и Святым Духом. Аминь.

Посем епископ обращся к западу и держа виски иподиакона, глаголет сию молитву:

Господи Боже вседержителю, освятивый скинию свидения и хранящих священные сосуды, Сам и ныне, Царю наш, яви лице Твое на раба Твоего (имрек), иже дадеся, да будет во оправдание всем представившим его. Исполни его Духа Свята, да обрящется достоин прикасатися сосудом сего служения, и стояти при дверех храма, и возжигати сияющий светильник в доме молитвы Твоея. Насади его в церкви Твоей, яко древо масличное, приносящее плод, освящающий во всякое время. Постави его, яко зерцало правды, в веселии.

По сем, обращся лицем ко олтарю, глаголет:

Призри, Господи Боже, на служение наше, очисти ны от всякой скверны, и ниспосли благодать Твою на раба Твоего (имрект.), да обрящется достоин пред Тобою совершати служение иподьяконства неуклонно, и да преисполнится благодати Твоея со всеми, благоугодившими Тебе от века. Милосердие бо во благоволении Твоем есть, и Тебе подобает честь, и слава, и поклонение от всех, о Боже и Сыне и Душе Святе. Аминь.

Обращся к западу, знаменует чело иподьякона большим перстом своим, глаголя: Призываем тебя церковь Бога святую. Аминь.

Архидиакон возглашает: Се, иподиакон во святей церкви Божией. Аминь.

Епископ же велегласно глаголет: нарицаем Тя (имрек) иподиакона в церкви (имрек), града (имрек) во ими Отца и Сына и Святаго Духа.

Епископ знаменует два креста на лице его, призывая троицу: посем, обращся к востоку, глаголет:

Благодарим, Тя, Царю наш всемогущий, за вся и о всех. Хвалим и славословим имя Твое святое, яко сотворил еси с нами великая, и научил еси оправданием Твоим раба Твоего (имрек.). Смиренно молимтися, Царю наш: услыши ны ради множества благодати Твоей, и да угодно Ти будет благословити иподиакона раба Твоего (имрек). Даруй ему истину, и очисти его, и соверши его во всяцем деле служения сего, да соблюдется во уповании Твоем блазе благодатию Сына Твоего единороднаго Иисуса Христа Господа нашего. Сей есть, иже и пр.

Посем епископ, обращся, возлагает облачение на рамена иподиакона, глаголя:

Слава и честь имени Твоему святому, Отче, Сыне и Душе Святе единосущие. Мир и разумение его церкви святей. Аминь.

Все сие переведено с коптского языка, обязанности же иподиакона – с арабского.

Обязанности его те же, что и у диакона. На него не возлагается рука. Он не клянется, иметь одну жену, пребывает ей верен, чуждается жены ближнего, удаляется сообщества с женами, яко омовенный в бане пакибытия. Хвала Богу всегда.

Чадо! егда уже возведен ты на степень иподиаконства и посвящен: омый его пред очима твоима. Долг твой последовати диакону и помогати ему в деле служения тако, како диакон подражает священнику. Ты убо должен хранить двери дома Божия, иже есть церковь, и возбраняти вход в ню иудею, псу и развратнику в час священнослужения: и егда возгласит диакон – никтоже нарушаяй благочестие да стоит на сем месте, ниже всяк, емуже не изъяснены святыя таинства – прилежи охраняти двери церковные. Понеже тебе уже дарована есть благодать прикасатися к священным сосудам служения святаго и несквернаго: сего ради уразумей досточтимую заповедь свою и дары, яже тебе сообщены суть, яко раб разумный и верный, творящий волю Господина своего со всяким тщанием. Да получиши плод великаго звания твоего во Христе Иисусе Господе нашем, емуже честь и слава и поклонение со Отцем его благим и Святым и Животворящим Духом, ныне и присно, и во веки веков. Аминь

Хвала подателю смысла!

Егда духовник, представляющий диакона, познает его достойна быти сего служения: тогда приводит его к епископу, свидетельствующи о нем. Ставленник станет у олтаря пред епископом, преклонь десное колено на ступень олтаря: и глаголет епископ молитву благословения, приемлет кадильницу, благословляет ю, и глаголет сию молитву:

Господи Боже сил, приведый нас в жребий служения сего, устрояяй разум человека, и испытуяй сердца и утробы, услыши нас во множестве благодати и благоволения Твоего, и очисти ны от всякие скверны тела и духа. Разжени по любви Твоей грехи наша и беззакония наша яко тьму. Исполни нас силы божественной и благодати Сына Твоего единороднаго, и действия св. Духа, да будем достойны сего служения новозаветнаго, да совершаем е достойно Святаго Имени Твоего, и стоим служаще по благоволению Твоему Божественному. Не причти нас к творящим грехи неверных, но даруй нам, еже лет есть. Сподоби ны, Царю наш, творити похвальная и предстояти святому олтарю Твоему. Се приходить к Тебе диакон (имрек) в чаянии даров Твоих небесных: яко Ты благ и многомилостив ко всем, призывающим Тя: велия бо крепость Твоя со Единородным Сыном Твоим, и Святым Духом. Аминь.

Архидиакон глаголет сию молитву:

Благодать Господа нашего Иисуса Христа, восполняющая недостаточестия наша Евангелием Бога Отца и Духа Святаго, да снидет на сего (имрек), приступившего ко олтарю Твоему, со страхом и трепетом поклоняющегося и возносящего очи сердца своего горе к Тебе, живущему на небесех, чающего даров Твоих небесных, внегда преходити ему от иподаконства в чин диаконства в церкви Твоей святей. Помолитеся вси, да снидет на него Дар Святаго Духа (Господи помилуй.)

Епископ глаголет сию молитву, обращся лицем ко олтарю.

Молю Тя, Господи: сотвори его достойна звания диаконства, да ради заслуг любве Твоея, еюже возлюбил еси человеки, величает имя Твое святое, и служит Тебе, правя святым олтарем Твоим, и обрящет милость пред лицем Твоим. Понеже милость и благочестие у тебе суть, и Тебе подобает хвала, Отче, Сыне, и Душе Святе, иже еси от века, отныне и до века.

Обращся к западу, возлагает десницу свою на главу его, и глаголет тайно сию молитву:

Господи Боже вседержителю, неложный и верный в обетовании Твоем, богатый для всех призывающих Тя, услыши ны: молимся убо Тебе, призри на раба Твоего (имрек), представленнаго во диаконство по суду и оправданию поставивших его зде пред Тобою. Исполни его Духа Свята, мудрости и силы, якоже исполнил еси архидиакона и первомученика Стефана, спострадавшего Христу. Сподоби его возрастати во благодати Твоей. Постави его служителя олтаря Твоего святаго, да служит Тебе по благоволению Твоему в степени, на нейже поставил еси его, не у клонься ни на десно ни на шуее, и без всякаго греха, да сподобится и высшия степени: понеже благодать даруеши не нашима грешными рукама, по посещением милосердия Твоего богатаго, еже дается тому единому, егоже ты достойна твориши. Се аз, очисти мя от грех моих чуждих, и избави ны от всякаго зла ходатайством Сына Твоего Господа Бога и Спаса нашего Иисуса Христа, иже с Тобою и проч.

Обращся к востоку противу олтаря, глаголет сию молитву.

Призри Господи на ны в служение наше, и очисти ны от всякие скверны, и ниспосли свыше благодать Твою на раба Твоего (имрек), да будет достоин пред Тобою, и да совершает службу Твою без порока, и богатеет благодатию Твоею со всеми от века Тебе благоугодившими. Понеже милосердию есть в воле Твоей, и Тебе подобает от коегождо честь и поклонение, Отче и Сыне и Душе Святе Аминь.

Обращся к западу, знаменует чело его большим перстом, глаголя:

Призываем Тя в церковь Бога святую. Аминь.

Архидиакон же возглашает:

(Имрек), есть Диакон в церкви апостольстей, церкви Божией. Аминь.

Епископ глаголет: Посвящаем (имрек) в диакона во олтарь, сиречь, в православную церковь (имрек), во имя Отца и Сына и Святаго Духа. Аминь.

По сем епископ творит три креста на лице его, с призыванием Снятой Троицы, и обращся к востоку, молится тако:

Благодарим Тя Господи Боже Вседержителю за вся и о всех. Да благословится и восхвалится имя Твое Святое: яко дивная сотворил еси с нами, и расширил еси дары Твоя на раба Твоего (имрек). Смиренно молим Тя ради любве, еюже возлюбил еси человека: услыши ны ради благодати и благости Твоея, и благоугодися в рабе Твоем (имрк), ради славы Духа Твоего Святаго благоугодися в нем и в людех, требующих посвящения его в чистоте и благодати благостыни Твоея, и призови ны с ним во благо, да сподобимся обрести приращение таланта, и получим со всеми от века творящими волю Твою, воздаяние домостроительства вернаго и благоразумнаго домоправителя в явление Господа и Бога и Спаса нашего Иисуса Христа.

Посем обращся, епископ возлагает орарь на шуее рамо его, глаголя: Слава и честь Святей Троице, соравному Отцу и Сыну и Святому Духу. Мир церкви единей, святей, апостольстей церкви Божией. Аминь.

Наконец посвященный приступает ко олтарю и лобызает руку епископа. Тоже делают и вси сущие с ним.

Конец посвящения диакона. Спасение от Господа. Аминь.

Разумей, о чадо благословенное, яко степень, на нюже постави тя Бог, есть степень велика, и служение исполненно величия. Есть бо степень святаго архидиакона Стефана. Посещай убо люди Божие, вдовицы, сирыя и удрученныя, утешай их, и елико можеши, помогай им и молися о них. Буди им образ, да видяшие добрые дела твои созиждутся путями твоими. Последуй епископу и свяшенникам. Поучай странных и пришельцев, посещай в по велению моему, и почитай старшего тебя по рукоположению. Священницы да будут тебе, якоже отцы. Сподобляйся блаженства, обетованнаго Господом глаголющим: служай Ми, почтит его Отец Мой: и яко же глаголет апостол Павел: служивши добре, степень себе добре снискают и многое дерзновение в вере, яже о Христе Иисусе (Тимоф. 3, 13)²⁴. Разумей убо меру и степень достоинства, юже даровахом тебе, воеже посети истинную кровь, иже дадеся во спасение мира, и яже преподается рукама твоима. Хвала Богу нашему, и Спасу нашему Иисусу Христу Господу нашему. Аминь, аминь, аминь.

После епископом паки благословляет его и изъясняет ему таинства, и троекратно возлагает на него руку, и вси священники троекратно глаголют: аксиос. По совершении сего, епископ глаголет: (имрек) диакон поставлен в церкви Божией святой. Аминь.

Хотяще представити имуща получити рукоположение священническое, священницы первии свидетельствуют о добрых делех его и о знании здраваго учения по слову Божию, и яко есть кроток, утешаяяй, благоволиши, и ако жена его такова есть, яковую преднаписует закон и правило церковное, и яко приял степень чтеца, иподиакона и диакона преемственно: и благословится во утрие.

Тогда исходит он в диаконском облачении со орарем на шуием раме ко олтарю. Епископ же станет ту со священники. Избранный преклонят колена своя пред олтарем. Епископ же начинает благодарение, и вкупе приемлет кадильницу и чтет молитву над нею: посем обращся лицем ко алтарю, глаголет сию молитву.

Господи Боже, сподобивый нас прияти жребий служения сего, даяй человеку разум, и испытуяй сердца и утробы, услыши ны, и силою божественною и благодатию Сына Твоего Единороднаго и действием Духа Святаго сотвори ны достойны сего служения новозаветнаго, да преуспеем в делех благих, и имя Твое святое прославим, и совершим, священническое служение благоволения Твоего святаго, и не приобщимся ко грехам неверных. Прости беззакония наша и не попусти нас, Царю наш, творити еже не лет есть. Даруй же нам познание, да возглаголем должная, и предстоим олтарю Твоему святому. Се приходит к Тебе рукополагаемый во священство; соверши сего раба Твоего (имрек), стояща и чающа даров Твоих небесных. Яко ты еси благ многомилостив ко всем призывающим Тя, и спаси еси во власти Твоей с Сыном Твоим Единородным и Духом Святым. Аминь.

Архидиакон речет: Благодарение имени Иисуса Христа, восполняющего недостаточествия наша волею Бога Отца: и Дух Свят да снидет на (имрк) сего, иже со страхом и трепетом и с сердцем смиренным предстоит у олтаря Твоего святаго, и преклонься возводит очи сердца своего к Тебе, живущему на небесех, чая даров Твоих небесных, да прейдет от диаконства в чин священства в церкви (имрк), и ко святому олтарю. Помолитеся вси, да снидет на него дар Святаго Духа.

Народ глаголет трижды: Кирие елейсон. – Епископ же обращся к востоку, глаголет сию молитву:

Молю Тя, Господи Боже: сотвори его достойна звания пресвитерства, да заслугами любви Твоея к людем прославит имя Твое святое, и послужит Тебе, и управит олтарем Твоим святым, и обрящет милость пред лицем Твоим: понеже милость и благодать у тебе есть, о Боже, ему же подобает хвала Отцу и Сыну и Святому духу. Аминь.

Народ трижды: Кирие елейсон.

Обращся к западу, епископ возлагает десницу свою на главу его, и молится тако:

Господи Боже Вседержителю, создавый вся словом Твоим, и промышляяй о всем сущем пред Тобою по воле Твоей, призираяй выну на церковь Твою святую, да поставляеми в ней возрастут, и укрепятся, и преуспеют в слове и деле, призри на сего раба Твоего (имрек), иже ставится Тебе священник по одобрению и суду поставивших его пред Тобою. Исполни его духа Твоего Святаго по милости и благоволению Твоему, да боится Тебе, и правит людьми Твоими, их же избрал еси, в повелел еси рабу Твоему Моисеови избрати себе старейшины исполненны Духа Свята, иже без пременения исходит от Тебе.

Помолитеся.

Молю Тя, Господи: услыши ны в тех, яже смиренно от Тебе просим, и сохрани в нас Дух Свят цел. Семуже даруй дух премудрости Твоей, да совершен будет в деле спасения, да поучает народ Твой в звании своем, и служит Тебе во святости и чистых помыслех и в дусе нелицемерне, и да совершает дела священства ради людей Твоих живых и усопших, иже обновлены суть банею пакибытия. И се аз: счисти мя от всякаго греха сокровеннаго и разреши мя от явных грехопадений ходатайством Сына Твоего Единороднаго Господа и Бога и Спаса нашего Иисуса Христа, иже и пр.

Обращся ко алтарю, молится тако:

Призри Господи на ны и на служение наше, очисти ны от всякой скверны, и ниспосли благодать Твою небесную на сего раба Твоего, да достоин обрящется пред Тобою, воеже исполняти долг священства без нарушения, да получит благодать Твою вкупе с угодившими Тебе от века. Понеже милосердие есть в воле Твоей, и Тебе подобает честь и слава от всякаго создания, и поклонение, о Отче, Сыне и Душе Святе. Аминь.

И обращся к западу, знаменует чело его большим перстом своим, глаголя:

Призываем Тя в церковь Бога святую. Аминь.

Посем архидиакон возглашает:

(Имрек) священник есть олтаря святаго, во святей, соборней и апостольской церкви Божией. Аминь.

Епископ же велегласно глаголет.

Нарицаем тя (имрек) священника олтаря святаго, православнаго, во имя Отца, и Сына, и Святаго Духа. Аминь.

Епископ образует на челе его три креста, знаменуя Троицу, и облачает его в фелонь, глаголя: Слава и честь Троице Святей, Единосущней, Отцу и Сыну и Святому Духу. Мир и приращение Церкви Божией Святей. Аминь.

Обращся к востоку, епископ молится тако:

Благодарим Тя, Господи Боже вседержителю за вся и о всех. Да прославится имя Твое святое, яко дивная сотворил еси с нами, и богато разширил еси дары Твоя на раба Твоего. Смиренно молимтися, царю наш, услыши ны по множеству благости Твоея, и удовлися сими обряды, совершенными над рабом Твоим, иже прия Духа Твоего Святаго в себе и ради людей окрест стоящих, ихже избрал еси во освящение и благодать благостыни Твоея, и избрал еси нас вкупе с ним во благо, да действует и приращает талант свой, и купно с творящими волю Твою от века приобрящет мзду вернаго и разумнаго домоправителя, в явление Господа и Бога и Спаса нашего Иисуса Христа. Аминь.

Да будет ведома тебе, брате, мера дара, его же днесь сподобился еся: се есть пресвитерство, имже поставихом тя над великими тайны Завета Новаго, и на степень учителя. Долг твой делать и учити примером и житием добрым и изрядным словом, и памятовати слово первоверховнаго от апостол Петра, глаголюща: «Старцы, иже в вас, молю аз причастник вам во священстве, свидетель Христовым страстем, иже в хотящей славе явитися общник. Пасите, еже в вас стадо Божие, посещающе не нуждою, но волею и по Бозе, ни яко обладающе причту, но образа бывайте, стаду. И явльшуся пастыреначальнику, примите неувядаемый славы венец». Да совершаются убо дела твоя по дарованному тебе таланту. Руководися им и усугубляй его, и получиши мзду раба благоразумнаго и вернаго, и собереши люди в слово учения, укрепляя их пищею духовною, да спасение себе и слушающих тя. Иди с миром. Господь да будет с тобою. И хвала Богу во веки.

Тогда священник, дав присягу, лобзает олтарь, епископа и предстоящих.

По сем изъяснит что-либо о таинствах. И епископ трижды возложит на него руку свою и все глаголют велегласно: Достоин есть (имрек) быти священником в церкви святой, соборней и апостольстей, иже есть во граде (имрек). И любы Христа в мире Божием. Аминь.

Сиречь руководителя душ, ему вверенных.

Егда приводится посвящаемый в игумена, первое свидетельствуется от священников: и станет во иерейском облачении, и преклонит колени, вкупе с приведшими его, предо епископом, иже станет пред олтарем святым. Посем епископом глаголит молитву благодарения, приемлет кадильницу и благословляет ю: народ же трижды речет:

Помилуй мя, Боже. После же епископ глаголет сию молитву:

О, Господи Боже сил, призваный нас в жребий служения сего, даяй разум человеку, и испытуяй сердца и утробы, услыши ны по множеству благости Твоей, и очисти ны от всякие скверны тела и духа, и разсей тьму грехов наших, и мрак лукавствий наших разжени: исполни нас силы божественной и благодати Сына Твоего Единороднаго и действия Духа Святаго, да будем, достойны сего служения новозаветнаго, да возрастем в делех благих, превознесем имя Твое святое, и совершим священническое служение благоволения Твоего святаго. Не вмени нам грехов чуждих, и изглади беззакония наша, и не попусти нам, о Господи, творити прегрешения: но благоволи даровати нам ведение, да глаголем еже лет есть, и приближаемся ко алтарю Твоему чистому. Се, приходит к Тебе, с намерением совершенным, раб Твой (имрек), и предстоит, чая даров Твоих небесных. Яко ты еси благ и многомилостив всем призывающим Тя, и держава Твоя крепка со единородным Твоим Сыном и Духом Святым. Аминь.

Архидиакон глаголет сию молитву:

Благодать Господа нашего Иисуса Христа, восполняющая недостаточествия наша по благоизволению Бога Отца, и Дух Святый да снидет на (имрек), иже со страхом и трепетом приступает ко олтарю Твоему святому, и возводит очи сердца своего к Тебе, живущему на небесах, чая даров Твоих небесных, внегда преходити ему от чина священника в сан аввы игумена в церкви (имрек), иже во граде (имрек). Помолитеся вси: да снидет на него благодать Святаго Духа.

Народ. Господи помилуй, (трижды).

Епископ же обращся лицем к востоку, глаголет сию молитву:

Молю Тя Господи: сотвори его достойна звания игуменства, да заслугами и благодатию Твоею прославит имя Твое святое, и послужит Тебе, и управит олтарем Твоим, и обрящет милость пред лицем Твоим: понеже милость и благость у тебе, Боже: Тебе бо подобает хвала, о Отче, и Сыне и Душе Святе. Аминь.

Обращся к западу, епископ возлагает руку на главу его, и тайно глаголет сию молитву:

О, Господи Боже, всемогущий Отче, Господи наш, и Боже наш, и Спасе наш Иисусе Христе, ведый вся прежде создания: Ты избрал еси раба Твоего (имрек), да будет отец, правитель и начальник рабов Твоих, собранных во едином месте ради имене Твоего святаго. Сего ради молимтися, Человеколюбче: призри на него, благослови его и освяти его: благодать Духа Твоего Святаго да почиет на нем: и нас вкупе с ним, настави на всякое дело благое. Подаждь ему премудрость и силу, да живет пред Духом Твоим Святым без порока день и нощь. Даруй ему, о Господи, дух мирный, благий, верный и христианский, да благоугодить Тебе делы благими и начальствует над хотящими повиноватися, да со тщанием поучает их закону Твоему, печется о них, и соблюдет их в чистоте и любви, да освятит их и направит к жениху небесному Христу, достигнут же высоты жития духовнаго, исполнит реченное: тако да просветится свет наш пред человеки, яко да видят добрая дела наша и прославит Отца нашего, иже есть на небесех.

По сей молитве обращся лицем к востоку, глаголит:

Мир всем. Призри Господи на ны и на служение наше, очисти ны от всякой скверны, и ниспосли благодать Твою с небесе на раба Твоего (имрек), да сподобится Тобою совершати священство свое без порока, и да возвеличится пред Тобою благоутробием милосердия Твоего со всеми благоугодившими Тебе от века. Яко милосердие в воле Твоей есть, и Тебе подобает от всех честь и поклонение, о Отче, Сыне, и Душе Святе, ныне и на всякое время.

Обращся к западу, знаменует чело его большим перстом глаголя:

Нарицаем Тя (имрек) авву игумена в Святей Церкви Божией. Аминь.

Архидиакон же возглашает:

(Имрек) авва игумен во олтаре святем, сиречь в церкви Бога святей, соборней и апостольской. Аминь.

Епископ велегласно речет: (Имрек) авва игумен во олтаре святем Христолюбиваго града (имрек), во имя Отца и Сына и Святаго Духа. Мир Божий и приращение единой святой и апостольстей церкви Божией!

Посем обращся к западу, глаголет:

Благодарим Тя, вседержителю, ради славы Твоея всякой, и благословим Тя и хвалим имя Твое святое, яко дивная сотворил еси с нами, яко ниспослал еси дары Твои на раба Твоего (сего). Смиренно молимтися, Господе: услыши ны по множеству благости Твоея: да будет угодно Тебе посвящение во игумена раба Твоего (сего), еже бысть ему благодатию Духа Твоего Святаго. Смиренно молимтися, Царю наш, о сем, его же призвал еси, и осущих зде окрест, их же избрал еси во освящение и благодать благостыни Твоея, и вкупе с ними избрал еси и нас во благо, да со всеми творящими волю Твою от века получитъ мзду вернаго и благоразумнаго домоправителя, в явление Господа и Бога и Спаса нашего Иисуса Христа, иже и проч.

Посвященный лобызает олтарь, епископа и предстоящих. Посем начинают литургию. И епископ вручит ему священный служебник и прочтет спасительные наставления.

Ведому творю тебе, брате, меру сана, в оньже пред Господем возведен еси, иже есть игуменство. 3ело прилежи в слове учения, и первый яви дела добрые, имиже научиши народ сей, за негоже имаши дати ответ Богу, якоже заповедует апостол: бди о душах их, и направи я к делам добрым, да совершают я: обличай согрешающих, и научи их ходити по закону апостольскому во всяцей простоте и кротости, пецыся о них, врачуй сия уды твоя с великим тщанием, и не попусти приблизитися волку к стаду, но отгоняй его и побеждай словом истины. Исполни писанное: подобает нам сильным носити немощные со всяким терпением, да не изнеможем сами: да услышиши и ты наконец: «рабе добрый и верный, яко в мале был еси верен, над многими Тя поставлю: вниди в радость Господа Твоего».

Хвала Богу всегда.

Епископ глаголет сию молитву:

Господи Боже великий в дарех Твоих, и велий в милосердии и во благодати и благости ради Сына Твоего Единороднаго Господа нашего Иисуса Христа: Ты основал еси Иерусалим небесный, и Ты един еси Глава всяческих на земли: Ты наименовал еси всякий чин, и вся силы и власти церкви Твоея:

Диакон возглашает: Помолитеся.

Епископ же:

Сам убо и ныне, Господи человеколюбче, приими моление наше: грешни бо есмы. Ниспосли благодать Духа Твоего Святаго на раба Твоего (имрек) представлена ко архидиаконству по суду и одобрение поставивших его пред Тобою, яко мужа извествованна. Сотвори его достойна, воеже быти ему архидиакону в церкви Твоей Святой. Очисти его, якоже единаго от седьми диакон, их же поставиша апостоле святии, якоже Стефана перводиакона и первомученика. Исполни его силы, и страха, и разума, яко Стефана архидиакона, в церкви Твоем Святей, в безкровном служении и высоте чистаго благовествования, и да носит чашу достопокланяемой Крови Агнца непорочна и пречиста, иже есть Сын Твой Единородный, да служит сирым и помогает вдовицам, не изнемогая в служении Богу, да научит невежды, исправит безчинные, обличит развращенные, возвратит заблудшие, да почтит священницы, и послужит странным, да повелевает идеже подобает, и да будет образ, всем прочим в церкви, да сотворит ce6е степень добрую и высокую, и обрящет уважение от всех²⁵, … посещением благодати Твоея Богатой, иже даруется достойным ея.

Диакон. Помолитеся.

Епископ же глаголет:

Ныне Царю наш, смиренно молим благость Твою, человеколюбче, о возвеличении раба Твоего (имрек), да будет достоин благодати звания, еже есть архидиаконства, и да снидет нань Дух Твой Святой. Се аз такожде очисти мя от всякаго греха чуждаго, и обнови мя, от грех всяких свобожденна, ходатайством Сына Твоего Единороднаго Господа нашего Иисуса Христа, иже и проч.

Конец чина.

Хвала давшему разум.