Слово огласительное во святой и светоносный день преславного и спасительного Христа Бога нашего Воскресения. Иже во святых отца нашего Иоанна, архиепископа Константинопольского, Златоустого

Аще кто благочестив и боголюбив, да насладится сего добраго и светлаго торжества (Лк. 14:17). Аще кто раб благоразумный, да внидет радуяся в радость Господа своего (Мф. 25:21). Аще кто потрудися постяся, да восприимет ныне динарий²² (Мф. 20:13) Аще кто от перваго часа делал есть, да приимет днесь праведный долг²³. Аще кто по третием часе прииде, благодаря да празднует. Аще кто по шестом часе достиже, ничтоже да сумнится: ибо ничимже отщетевается²⁴. Аще кто лишися и девятаго часа, да приступит, ничтоже сумняся, ничтоже бояся. Аще кто точию достиже и во единонадесятый час, да не устрашится замедления: любочестив бо сый Владыка, приемлет последняго якоже и перваго: упокоевает²⁵ в единонадесятый час пришедшаго, якоже делавшаго от перваго часа. И последнего милует и первому угождает, – и оному дает и сему дарствует, – и дела приемлет и намерение целует²⁶, – и деяние почитает и предложение²⁷ хвалит (Мф. 20:1–16). Тем же убо внидите вси в радость Господа своего: и первии и втории, мзду приимите: богатии и убози, друг со другом ликуйте. Воздержницы и ленивии, день почтите. Постившиися и не постившиися, возвеселитеся днесь. Трапеза исполнена²⁸: насладитеся вси. Телец упитанный: никтоже да изыдет алчай, вси насладитеся пира веры: вси восприимите²⁹ богатство благости. Никтоже да рыдает убожества³⁰, явися бо общее царство. Никтоже да плачет прегрешений, прощение бо от гроба возсия. Никтоже да убоится смерти, свободи бо нас Спасова смерть. Угаси ю³¹, Иже от нея держимый. Плени ада, Сошедый во ад. Огорчи его, вкусивша³² плоти Его. И сие предприемый³³ Иcaиa возопи: ад, глаголет, огорчися, срет Тя доле (Ис. 14:9)³⁴. Огорчися, ибо упразднися. Огорчися, ибо поруган бысть. Огорчися, ибо умертвися. Огорчися, ибо низложися. Огорчися, ибо связася. Прият тело, и Богу приразися. Прият землю, и срете небо. Прият еже видяше, и впаде во еже не видяше. Где твое, смерте, жало? где твоя, аде, победа (1Кор. 15:55)? Воскресе Христос, – и Ты низверглся еси. Воскресе Христос, – и падоша демони. Воскресе Христос, – и радуются ангели. Воскресе Христос, – и жизнь жительствует³⁵. Воскресе Христос, – и мертвый ни един во гробе: Христос бо востав от мертвых, начаток усопших бысть (1Кор. 15:20). Тому слава и держава, во веки веков! Аминь³⁶.