Житие Пресвятой Богородицы Епифания, иеромонаха обители Каллистратовы

Житие Пресвятой Богородицы.

Епифаниа иеромонаха. обители Калистратовы. о житии и о воспитании. и летнаго показаниа. пречистыя и преблагословенныя Владычица нашея Богородица и Приснодевы Мариа⁴⁹⁶.

(Из Торжественника XVI в., № 370 (1050), лист. 343, на об. 361)

О воистинну истинной Богородицы, и Приснодеве Марии, мнози поведаша. Пророцы убо различными образы и именовании яже о ней, и иже от нея несказанно рождьшагося Христа истиннаго Бога нашего предрекоша. Святии же апостоли иже от нея воплощьшагося Сына и Слова Божиа, и о содеянных упразднишася. о ней же мала некая прорекоша, абие претекоша. Духу святому тако устроившу. Вси же от Давида род ея глаголют быти. Похваляющеи же ея мнози от святых отец быша. Ниединже от них о житии ея и о воспитании, или о кончине, праве и благоявленне⁴⁹⁷ назнаменаша. но и начаша. и мала некая изрекше не исправиша. себе быша оглаголници. Иаков же Евреин. Афродитиан Персянин⁴⁹⁸, и неции прочии. о рождении ея точию рекше, о прочих умолчаша. О успении же ея Иоанн Селуньскии многословное сотворив слово, сам себе покори⁴⁹⁹ и ин некто Иоанн, иже себе Богослова нарече, лжею покрывся. Андреи же Иерусалимлянин архиепископ Критскыи, мала некая рек исправив, в похвалу ея упразднися. Аз же многых оставль, и собрав яже истину имущая. и благоверна быти и истинна. простыми беседами, любящим яже о ней известне слышати. помощию ея Богоматере и заступлением. Представим и коегождо творца имя, от негоже аще что приахом на краевех книг напишем. да не восхощет кто оболгати нас, яко что свое приложивша, или оставивша. но паче аще и от скверных, или еретик приахом, никто же нам да зазрит. от врага бо сведетельства достоверна суть и твердеиша⁵⁰⁰, якоже рече святыи Кирил имже и той сотвори⁵⁰¹...

От Авраама даж до Давида, о родстве Иосифа обручника пренепорочныя Богородицы и Приснодевы Мариа. в родословии же ея, понеже от двою брату родишася. и се соглашают и обои Евангелисти родословяще. Матфеи убо сходя по родословию. Лука же возвращаяся, и Сына его Давидова именуа. От колена Нафанова сына Давидова раждается Левии. сеи же Левии роди Мелхиа. и Панфира. и Мелхий убо вземь жену. и умре бесчадно. Панфир же роди Ванбанфира⁵⁰². Ванбанфиир же роди Иоакима. отца Преблагословеныя Богородица. Паки от колена Соломонова раждается Матфан. Матфан убо раждает Иакова. и родив его умрет. И вземь жену его рекше матерь Иаковову, Мелхий брат Панфиров. сиречь первый сын Левиев. и роди Илию. Иаков бяше от племене Соломонова. Илии же от племене Нафанова. Умрет же Илий бесчаден. в вземь жену его присный брат его Иаков. и роди Иосифа. И убо Иосиф сей естеством есть сын Иаковль, яко от племене Соломонова. по закону же Илиев от Матфана. живяху же в Галилеи купно. И взяша оба брата едину жену, якоже закон повелевает глаголя. аще кто умрет бесчаден, да поимет брат его жену его, и воздвигнет семя брату своему. Якоже Иоаким, и Илий от отца единого Панфира братиа. сице и Илий паки и Иаков, от отца Матфана братиа. Сеи убо Иоаким, роди Марию Пречистую Богородицу. Иаков роди Иосифа обручника. и Марию, юже наричет Евангелист Марию Клеопову. якоже быти Марии Богородици, и Иосифу обручнику, двою брату детии. Иосиф же бе хитростию древоделя. Имяше же брата приснаго от Иакова, Клеопу. егоже Клопу рекома. И тако убо обретохом по отцы племя Преблагословенныа Богородица. от колена сына Давидова Нафана, от негоже родися. И Левий убо роди Мелхиа, и Панфира. Панфир же Вамбанфира. Вамбанфир же Иоакима, отца преблагословеныя Богородицы. По матери же сице еще. паки от колена Давидова раждается Матфан. и Матфан. Иакова. Иаков убо сей по Матфану, яко от колена Соломонова. и той роди Иосифа обручника Богородицы. И тако убо обретохом по отци род преблагословеныя Богородици. Смотри же зде. и матери такожде, колена возращение. Матфан священник от Вифлеома, роди три дщери. Марию. Сову, и Анну. И Мариа убо роди Саломию бабу. Сова же Елисавет матерь Предтечеву. Анна же взят Иоакима, брата отцу Иосифу обручнику, иже от Матфана. И сниде невеста от Иерусалима, во град галилейский Назарет. и жит со Иоакимом, 50 лет, и чадо не сотвориша.

Бысть же им взыти во Иерусалим, в праздник обновлениа. И приношаху сынове Израилеви дары своя Господу Богу. Принесе же Иоаким. и ста пред ним Рувим иерей глаголя. не достоит ти первее принести дары своя, понеже семене не сотворил еси во Израили. И оскорбе Иоаким зело. и не явися жене своей, но отиде в пустыню. и бе тамо моляся, 40 дний. Молящуса же ему в горе, услыша глас с небесе глаголющь ему. яко родитися отроча, и ради его прославишися. Зачат же убо жена его Анна в старости. и роди отроча женьский пол. И нарече имя ей Мариа. первыя ради сестры ея, юже прежде рекохом. И порадовашася с ними вси сродницы их и друзи их. Бывши же отроковици Марии триемь летом. и возведоша ю родителя ея во Иерусалим, и представиша ея Господеви с дары. И приат ею и дары их, иерей Одае, нареченный Варахиа. отец Захариин, отца Предтечева. И вси иереи срадовашася. помолшеся, и благословивше Иоакима и Анну, и отроковицу Марию. И потом снидоша в Назарет. И в седмое лето паки возведоша ю. и отдаша ея Господеви в дар во вся дни живота ея. И се сотворше, по мале Иоаким умрет, якоже рекоша осмидесятим летом. Мариа же от церкве Господня не исхождаше нощию и днию. По смерти убо Иоакима. остави Анна Назарет, идеже бяше свекры ея. рекше Галилею, и прииде во Иерусалим. И бяше с дщерию своею Мариею. И пребывши жива две лете, успе летом сущи, 79 единого лета неравна со Иоакимом. от преданиа. Мариам же от всех обсиротевши, пребываше неисходна. не исходящи от церкве Господня. Убо иже аще требоваше, к брату чаде своей Елисавети хождаше токмо. близ бо живяше. и яко к сродници своей хождаше. Научижеся пречистаа Богородица и преблагословеная Мариа евреиской книзе⁵⁰³. живу сущу отцу ея Иоакиму. и бяше удобна ко учению, и любящи учение. И ктому уединившися прилежа, и упражняшеся о божтвеных писаниях. и о делании же волненемь. и о льне, и о коприне пекущися⁵⁰⁴. Превзыде мудростию и разумом паче всех, иже в роде оном отроковиц. яко к ней глаголати праотцу ея Соломону. жену мужествену кто обрящет, и прочая. Бяше же отлучено место в храме Господни, близ левыя страны жертвеника. идеже стояху девицы едины. ибо другыя девица, по собрании, и отпущениа службы вся отхождаху в домы своя. та же едина приседяше. соблюдающи жертовник и церковь. иереом служаше. Нрав же ея бяше честен. мало беседующи. скоропослушлива. благолепна. благодерза ко всякому человеку. не смеющися. не смутна. не гневлива. благопоклонна. честителна. чтущи и покланяющися всякому человеку. якоже чудитися всем о разуме ея и беседе. Возрастом средним. русовласа. очи славе⁵⁰⁵. благовидна. черне вежди. нос средний. имея долзе руце. долги персти, долга лицем. благоодежна, нетщеславна. не образующися. не красящися. одежда багряна любящи носити. и сведетельствует омофорион ея, сиречь, раменоносец. Ткаше же иереем одежда. рекше храму Господню. пребывающи в молитвах, и в чтении и в посте. Яко украшениа ради дел ея и устроениа, многам женам быти ей наставници сущей Богородици и присноблагословенеи Марии. Бывши же ей дванадесятим летом. бысть в едину от нощии, молящися ей при дверех жертовннка. в полунощи свету восиати паче светлости солнечныя. И глас изыде от олтаря глаголющий. родиши Сына моего. Она же умолче, никому же поведавши тайну, дóндеже Христос вознесеся. Авиа же архиерей, роди Одая, егоже нарицаху Варахию. сей роди Аггеа и Захарию. и тии священници. И взят Захариа Елисавет, брату чаду Богородици, и живяху в Вифлееме. и роди Елисавет Крестителя Иоанна. Аггей же брат Захариев, роди дщерь именем Соломею. И взят ю Иосиф древодель. прежде обручения пречистыя Богородица. сын Илиев, Иаковов. Сий убо Иаков бяше от колена Соломонова. Илии же от колена Матфанова, якоже прежде речеся. брату чад сии Марии Богородици. И роди от Соломеи сыны 4. Иакова апостола, иже по плоти нарицается брат Господень. и Симеона, иже Симон. и Иуду апостола. иже по плоти нарицается брат Господень. Иосию. и две дщери Есфиру и Марфу. Умрет же Саломеи жена его. и пребываше Иосиф (в) вдовстве и целомудрии. летом сый 70. богатством нищ. хитростию древодель изряден. пребывая во граде Галилеистем Назарете. Пречистая же Мариа, бяше в Иерусалиме в дому Господни. И бывши ей летом четыринадесятим. невместно ей быти в дому Господни лунные ради немощи женьскаго естества. Архиереи же о пречистей сей Марии и Богородици (совет) сотвориша, сташа в молитву. И Захариа отец Иоанна Крестителя, взят 12 жезл старец священник. и постави их в жертвенници глаголя. покажи Господи знамение, кому будет Девая. Прием и в число дванадесятих жезл. и от сродник Девые жезлы. И молящимся им, прорасте сице преславне сух и не посажден жезл Иосифа древоделя. и прочее суд Божий обручи ему брату чаду, Деву Марию. Приат же ея Иосиф от руку Господню, и введе ю в дом свой. иже в Вифлеоме града Галилейскаго Назарета. Высочайше же есть место Иерусалимско от всех мест. иже и предаст тамо ей дщери своя, Есфиру и Марфу. упремудрити и вразумити их якоже себе. Се же все бысть⁵⁰⁶ во еже утаитися хытреца злобе диавола. древле назирающу Девы, отнели же слыша пророка. глаголюща. се Девая в чреве зачнет. Отразен убо бысть обручениа ради яко наветник спасениа, началозлобный змий и благаго отступник. Сего ради обручник наречеся, купно же Деву и Богородицу хранити. и недоведомо врагу вещь содевая. якоже посягнувша мня его, а не девственика. и не безмужну святую Деву и Богородицу Марию. Бысть же брак даже до обручениа. И тако пребываше неисходна. Сотворившу же в дому Иосифове, 6 месяц. обычне постящися ей. открыв ей Ангел Гавриил. повеленное таинство приим в разуме. Изрек таиньство. и никтоже уведе бывшаго от дому ея. ниже Иосифу поведа что Богородица, дóндеже узре Сына на небеса восходяща. Сего ради глаголет Евангелист. и не позна ея, дóндеже роди Сына своего первенца. сиречь не уведе яже о ней таиньства Божиа. ни знаше же в ней содеваемое. ни разумеаше Божественаго смотрениа. глагол бы сокровенное таиньство. Аще ли же яко по святому Василию и Иоанну Златоусту. яко возвращающеся вяще отсущаго. глаголют во еже се с вами есмь во вся дни даже до скончаниа. еда по кончине отлу(чи)тся праведных, да не будет, и по еже яко не возвратится голубь, дóндеже не преста вода. таже возвратися. по еже дóндеже состареется Аз есмь. еда повнегда состаретися несть. или елика подобна. Бе же день неделный первый, еже есть неделя. и се перваго месяца. Первый же месяц от еврей наричется март. от негоже и пасха обретается, луне первой. Сей месяц первый в месяцех. якоже книга Моисеова сказует. Се первый день. в онже первородный отгнася мрак, или тма. в сем месяци сотвори Бог всяческая. И сведетельствуют и древеса цветущая в нем. и Христова страдания. В том первый человек создася рукою Божиею. В том фараонския работы свободи израиля Бог. и чрез Чермное море проведе. и пасху соверши. И в том Ное изыде из кивота. в нем богописанныя скрижали Моисии приат, во уставление кивота. В нем Гавриил Богородици богомужнаго строения благовещение принесе. В нем Христос Бог из мертвых воскресе тридневно. В нем же общая кончина, и востание и суд будет⁵⁰⁷. Се месяц 6, отнелиже Иоанна Крестителя зачат Елисавет септемвриа бо месяца в 23 зачат его. В седмыи убо месяц рекше от марта яве яко септемврие. в немже обновление сенопотчениа творимом. и в поклонение кивота вниде Захариа, в святая святых един по закону. И явися ему Ангел Гавриил. Оттоле убо месяци в числе поются по лунному кругу. последи бо явишася вменишася индиктии. месяци от грек. Зрящи святая себе в чистоте, рече к Гавриилу дерзостне. преславное гласа твоего неудобь приатно души моей является. А еже рещи святей Марии ко Ангелу, како се будет ми, идеже мужа не знаю. рекше мужа не желаю. желание мужьско не вемь. не вемь похоти плотския желаниа мужска. не имяше бо девство по воздержанию, или от подвига, якоже прочая целомудреныя жены. но от естества. иже есть изряднее от всех жен. и странно всякого человеческаго естества. И се есть от пророка Езекииля реченое. будеть дверь яже на восток затворена, и не отверзется. и никтоже проидет сквозе ея, точию Господь Бог Израилев един. внидет и изыдет сквозе ея. и будет дверь тая заключена. Вси же пророци и апостоли тожде сведетельствуют. Но отци наши и учителие, и светильници соборныя церкве тоже соглашают. С ними же и святый Дионисие Ареопагит рече о Христе. яко видеша человек человечьская творяше. и сведетельствуется еже от Девы рождьство. Святыи же Афонасие Александрьский, и Лео папа Римский о ней рекше, яко похотениа мужска не уведе. И святии вси православнии собори тожде сведетельствуют. И не точию се. но и от еврей неции сведетельствуют. От нихже Иаков еврей⁵⁰⁸ иже бе тогда на рождьство Христово, се глаголет. яко осязана бывши от бабы пречистая Богородица, обретеся Девая, якоже и прежде рождьства. с сими же и Рувим священник, тожде сотворив, бабы ради уверися. От еллин же неции глаголаху. изрядное нечто обретеся естество. друзии же паче устав естественых бысть. имущи богоприатну Девая утробу, востече к Елисавети. Младенец же оноя абие познав сеа целование радовашеся, и игранми вопиаше. Пречистая же Мати Божиа, по в еже преити ангелову видению, и абие вскоре взыде в Вифлеом. к брату чади своей Елисавети. Иудеа бо в неиже есть Вифлеом, высочайше есть место от Галилеа, в немже бе Назарет. сего ради и Евангелист глаголет. яко вставши Мариам, иде в горняя со тщанием во град Иудов. и вниде в дом Захариин. Вшедши же и целовавши и Елисавет. поведа ей божественая таиньства. первое явление ангелово, еже в церкви еще. и благовещение, и словеса яже рече к ней. яко мужьскый пол во чреве ея. И яко Захариа Ангела виде в церкви, сего ради умолча. понеже Захариа не можаше беседовати. и сами в себе таиньства поведаху, и никомуже поведаху глаголанная им. Пребысть же Мариам с нею яко три месяца, и возвратися в дом свой. И по трех месяцих, сниде всепетая Мариа в Галилею в дом свой. Лету же преминуему, и утробе растящи. бурю внутрь имея помышлений неверных, целомудреныи Иосиф смутися. к небрачнеи тебе зря, и бракоокрадованну помышляше непорочная. уведев же ти зачатие от Духа Свята, рече аллилуиа. Иосиф зря пречистую Деву, яже о ней таиньства не ведый. многою печалию и срамотою таяше. помысли отаи отгнати ю от дому своего. Ангел же возбрани ему глаголя, якоже рече Евангелист. не убоися приати Мариам жены твоея, и прочая.

Случижеся тогда написанию быти, от кесаря Августа. И взыде Иосиф от Галилеа во Иудею, со всемь домом своим. И сыны убо предпосла, дщере же своя и святую Марию взем, со ослятем грядяше. И не доспевши во Иерусалим, в еже написатися. в обители иже бе пред Вифлеомом, идеже бе село брату чади Богородици, Саломиа обиташе. в неи же бе пещера, и обитель волом и овцам. И в ту нощь роди Господа нашего Иисуса Христа, пречистая и приснодевая Богородица. Уведевши же Елисавет дошествие их, прииде к ним, и принесе им яже на потребу, и неции от сродник их слышавше, яже пастырие рекоша, удивишася. Слышаша пастырие ангелом поющим. И в осмый день обрезаша отроча, и нарекоша имя ему Иисус. еже есть Сапс. И тако возвратишася в дом свой Назарет. Сынове же Иосифовы, возшедше во Иерусалим, написашася. сиречь, Иаков. Симеон, Иосии и Иуда, самобратници. и возвратишася и тии в Назарет. Хотящу Симеону от нынешняго века преставитися от прелестнаго. и скончавшимся 8-м днем. возведоша родителие отроча Иисуса во Иерусалим, якоже глаголет Лука Евангелист. и представиша и Господеви с дары. И Симеон старец взыде Духом в святилище, и приат его на руку своею, и рече. ныне отпущаеши раба своего Владыко, по глаголу твоему с миром. яко видеста очи мои спасение твое, и прочая. Во второе же лето его, приидоша волсви от Персиды, града Вавилоня. сиречь от востока солнечнаго. видевше же звезду ошую Иерусалима. тако бо прилежит Персида ко Иудеи. Звезда же не бяше от прочих звезд, ниже от высоты прочих звезд. но нижняиша и никогда явившаяся якоже рече Иоанн Златоуст. Ирод же по днех онех, имяше домашнюю брань с Саломиею другою женою своею. дщери сущи Уркану архиерея. и сынов ея, Александром, и Аристовулом. И жену убо убив, бояся сынов ея бежа. и сниде в Рим к кесарю. и сотвори тамо две лете. И приат власть, паки оттуду возвратився, удави в реце сыны своя. Архелу же токмо остави сына своего, отроча еще суща. имеяше и с собою. Имже ради сего яже от волхвов реченная, взабытии премину. Упразднившуся убо, и воспомявувшу, яко от волхвов поруган бысть. не возвратившимся к нему, якоже испыта от них время явльшиася звезды. гневом велиим раждегся, и сотвори детоубитие по двою лету. Посем же служащу Захарии, отцу Предтечеву, убиша и воини внутрь в церкови Иерусалимстеи. Елисавет же бяше во Вифлеоме тогда. Вземши Иоанна бежа в пустыню. и скрыяшеся 40 дний в пещере. Иоанн убо тамо воспитася. пребываше в пустыни, до дне явления своего ко Израилю. Во время же Иоанново по откровению ангелову. возсия в Египте просвещение истинне. отгнал еси лжи тму. Иосиф бежа во Египет с сыны своими, и с дщерми своими. и с пречистою Богородицею, и с рождьшемся из нея Христом. Сотвори 5 лет, и паки окровениа ради отлучися оттуду. возвратися и прииде во град Галилейский Назарет. И поят сестру ея Марию, брат его Клеопа, иже Клопа. с Иосифом яве от единоа матере, от Иакова. и роди от нея Симеона. Сей убо Симеон по Иакове брате Господни епископ бысть во Иерусалиме. при Доментиане цари Римстем, по мнозех муках, послежде распят бысть. летом сый 120. Иаков же сын Иосифов, име жену за две лете. и умерши ей, ину не поят. Иуда же брат его роди два сына. Зоира⁵⁰⁹, Иакова, сице нарицаемых. Сии предсташа Доментиану царю Римскому. добродетели ради их и премудрости, еже на Христа гонение уставиша. Иаков же, и Иуда братиа Господня, в числе суть 12 тих апостол. Иосии же, и Симеон. и тии вземше жены. Есфира же пребысть с пречистою Богородицею вся лета. Иосии же еще сущу ему умрет мати его. и воспита его Мариа дщи Саломеина. брату чади пречистыя Богородицы. На всякии же праздник пасхи прихождаху от Назарета во Иерусалим. Уведен бысть Иисус от многих, и чуден бысть премудростию и разумом, и многих ужаси, егда обретоша его, якоже рече Евангелист, посреде учителей седяща, и послушающа его, и вопрашающа их. Бе же красен видением зело. якоже рече пророк. красен добротою паче сынов человеческих. и якоже самовидци и служителие Слову бывше, и зрителие и сожителие святии апостоли. от зачала и свыше предаша церкви, преписавше божественое его воображение⁵¹⁰. Благ возрастом. троелакотен. веждема леп. очи красны. нос долг имея. власы сломлены. наведен. леп видом. браду черну имея. лице среднее, рекше ни бело ни черно. по матернему подобию. персты долги. благогласен. сладкобеседен. незлобив кроток. молчалив. долготерпелив. и множаиша добродетели умножение имея, в ихже подобиих божественыи его образ пишется⁵¹¹.

Иоанну же сущу в пустыни 30 и едино лето имущу. начинаемом летом, сиречь от септемвриа месяца. Бысть к нему слово Господне о крещении. И прииде во Иудею, и в Галилею. проповедая крещение покаяниа, во оставление грехом, а не в Дух Святый. Еще убо не бе Дух Святый проповедан о нем. понеже Иисус, якоже глаголет Иоанн Богослов, не бе прославился. Зряще же людие житие его странное и чудное. последоваша ему мнози, и быша ему ученицы. в нихже бе Андрей от Вифсаиды града Галилейска. Иоанн от Зеведея града. Архиереи же иудеистии, слышавше о Иоанне и о учении его. овии глаголаху яко Христос есть. ови же, яко несть. И распре бывши мнозе посреде их о глаголе сем. послаша ко Иоанну, и вопросиша его, якоже глаголет в Евангелии. ты что глаголеши о себе. И отвеща, яко несмь аз Христос. но аз глас вопиющаго в пустыни. съзади же мене грядый посреди вас стоит. и прочая ищи тое в Евангелии истиннее уведети. Бысть же день и приидоша людие мнози. и началници на Иордан ко Иоанну. и крещахуся от него, исповедающе ему грехи своя. Иоанну люди учащу и оглашающу в стране Вифаваре об он пол Иордана. прииде Иисус, и крестися от него, имея и той лет 30. И во осмый день изыде в пустыню иорданьскую Христос. И сотвори тамо дний 40 якоже рече Евангелист. и паки возвратися ко Иоанну. И якоже виде Иоанн грядуща к нему рече. се агнец Божии вземляй грехи миру. видех бо Дух Божий сходящ с небесе, и пребывающь на нем. и глас слышах глаголющь. сей есть Сын мой возлюбленный. И слышаху народи и дивляхуся. Во утреи же паки виде Иоанн Иисуса ходяща, и глагола о нем. се агнец Божий и Сын Отчь. И слышавше ученици его, Андрей и Иоанн, оставиша его и последоваша Иисусу. И приидоша с ним во обитель. якоже глаголеть Евангелист. яко реша ему учителю где пребываеши; он же рече им приидете и видите. они же пришедше пребыша у него день он. Час же бе яко десятый. Поискав же Андрей брата своего Симона. и обрете его и приведе ко Иисусу. И слышав Иисус, яко предан бысть Иоанн. в утре и прииде в Галилею, с треми ученики своими. И обрет Филиппа улови его. рекше приведе. И он паки Нафанаила. И приидоша в Кана Галилейскую. И в третий день брак бысть тамо. и позвани быша и сотвори воду в вино. Имя же жениху Симон. иже и по днех малех последова Иисусу. И оттуду прииде в Вифсаиду град Галилеиский. и внидоша в дом. Петрову тещу пришед исцели. Востав возвратися в Назарет.

Иосиф же обручник Богородици, успе стар исполнь днии. якоже реша неции летом 110. Сынове же Иосифовы, Иаков же и Иуда последоваша Христу. Обаче вси последоваша ему, по вся грады и страны хождаше. и проповедающе царство небесное. исцелевающе всяк недуг, и всяку болезнь. Такожде и теща Петрова исцелевшиа, с дщерию своею женою Петровою, последоваша ему. пребывающе с Богородицею. Воздвижеся оттуде, приидоша в Зеведею галилеиския веси, вифсаидския. При ней же есть езеро Гениса именуемо, иже и Генисарет глаголется. в немже есть бальзам, и чудный висс. иже есть былие очервляа. наричетжеся Гениса езеро и округло, за еже изравнениа круглости. Вода же ему зело чиста и светла. яко седмь поприщ имущо окрест себе. Масло же чудно, и всяко овощие окрест езера и рыбы множество. Пришед же Иисус, в Зеведея в град, с материю и с ученики своими, препочи у Иосифа Зеведея. зане бе первый, от иже в Галилеи нарочитых муж. иже имеаше жену и два сына. Иакова и Иоанна. И поят их ученики. Мати же их мнящи яко о земном царствии возвещает. просящи у него, яко да един одесную тебе, а другий ошую сядут в царствии твоем. И оттуду изшедше, приидоша в Капернаум. и исцели разслабеннаго, и инех мнозех, идеже аще бы возлег. Исцелеваемии же, и первии от града своею волею приношаху ему множество богатства. и мнозех оглашаху и крещаху ученици его. Иисус же не крещаше, точию учаше и исцелеваше болящих, аможе аще поидяше. Иосиф же Зеведей умреть. И пришед Иаков сын его, рече ко Господу. повели ми поити, да погребу отца моего. И не повеле ему рек. остави мертвыя погребати своя мертвеци. И по мале посла и оба брата, Иакова и Иоанна. иже и шедше отца убо погребоша. матерь же приведоша ко Христу. и пребысть с Богородицею по вся дни живота своего. Пришедшу же Господу с материю своею и с ученики во Иудею. всюду благовествующе и крещающе, и исцелеваху недужным всяку болезнь. Вшедшим же во Иерусалим, пребываше тамо дний неколико. бяше бо праздник сеновняго почтениа. И мнозех просветив учением Христос, в святилищи. и торжники изгна. и мнозех исцели от различных недуг. возвратися в Галилею. И вшед в Магдалу град. жена некая. именем Мариа Магдалыни. яве яко благородна и богата зело. приат его в дом свой. яко имяше седмь бесов. от нихже свободившися, якоже рече Евангелист. Слышавши слово его, и видевши чудеса яже сотвориша. отрекшися дома своего, и пришедши ко Христу последовавши ему. и бяше с Богородицею и с прочими. Бяше же мудра и теплеиша паче вся духом, якоже и Петр в мужех. И от богатства своего служа им. Ученици тогда бяху числом сии. От Вифсаида града два брата, Андрей и Петр. От Зеведея града два брата, Иаков и Иоанн. два брата Господня. и тая два Иаков Алфеов, Иуда Иаковль. Иосиф бо обручник Богородици, от другия жены беша. сего ради наричется Алфеов. Филипп и Варфоломей. Симон Кананит, сиречь иже от Кана Галилеа. и Фома глаголемый близнец. Матфей Евангелист. Иуда предатель от Скары града. Разумно же яко Иоанн и Иаков сынове Зеведеови, повнегда умрети Иосифу отцу их иже от зеведейска града. Сим же и Зеведей наричется. продаша дом свой, иже в зеведейсте граде сущь. и пришедше во Иерусалим, купиша святый Сион. Высочайши же есть сия страна во Иерусалиме, обону страну Иерусалима. Первосвященницы же тогда на коеждо лето изменяхуся. и не наместници бываху. но от различных стран. Темже и Анна архиерей от Катаволы бяше. Каиафа же от Киавитиньския страны. Имже той архиерей, в лето оно бысть. И спросив пребысть в куплении, Иоанна Богослова. сего ради Евангелист рече, яко ученик он знаем бяше архиерею. Пол убо от дому даде архиерею, повелением брата своего Иакова, в пребывание. в половине же уготова пасху. сиречь, вечерю тайную. в четверток вечер, со ученики и со ученицами. Еже бо рещи Христу, идете во град ко онсици, Иоанна Богослова глаголет. Тамо вечеря совершися. тамо бо воспевше изыдоша в весь Гевсимании нарицаему, к горе Елеонстей. тамо бо совершиша первое таинство апостоли. Тамо бежаша страха ради иудейска. Тамо пребываху по воскрсении Господни апостоли. тамо явися им дверем затвореном, и дасть им рек. приимете Дух Святый. Тамо увери Фому апостола, показав ему образы гвоздинныя, и копиа. Тамо поставиша апостоли перваго епископа Иакова брата Господня. якоже рече Евангелист глаголя. Тамо пребываше мати Иисусова со Иоанном Богословцем. якоже рече Евангелист глаголя. от часа оного поят ю ученик во свояси. Тамо пребыша вси апостоли с Богородицею и со женами, и с братиами. в посте упражняющеся, и на земли леганием. в молитвах же и слезах, и в песнех непрестанных со многою радостию. Тамо являяся тем Христос часто. якоже Лука рече, во мнозех знамениих. за 40 дний являяся им, и глаголя яже о царствии Божии. Мироносицы же жены бяху 7. Первая Мариа Магдалыни. 2.я Саломии. 3.я мати сыну Зеведеову. Иудова же жена брата Господня. 4.я Мариа Иакова малаго мати. 5.я Иосиева мати, воспитавшиа брата Господня. 6.я Анна жена Петрова, 7. сестра матере Господня. сиречь Мариа Клеопина. сестра же Иосифова. понеже Иаким и Анна другое чадо не сотвориша. Сиа мироносица четырежды в нощь ону приидоша на гроб. когда же Господь воскресе не уведеша. Богородица же единицею и прежде с Мариею шедше на гроб, и от ангела уведевше воскресша его. и возвратившемася има, срете их Господь и рек радуйтеся. И уверившися пребываше никакоже смутящися. Жены же другыя многы благородны, от различных областей пребывающе с Богородицею. ови от болезней свободившеся, ови же от дух нечистых.

По вознесении же Господни, и Духа Святаго на ученики пришествии. Иаков брат Божий и первый епископ Иерусалимский. раздели и страны жребием и откровение Духа Святаго. И посылая их заповеда. да якоже учит кождо их. да посылают ему еже и творяху. яко да соглашается проповедание Христово. и на коеждо лето приходити им во Иерусалим в день пасхи и пятдесятницу вкупе тем с Богородицею праздновати. Стефан же первомученик, по шести летех вознесениа Господня, камением побиен бысть. И Павел апостол по шести летех и пол крестися. И по трех летех, поят ученики Дионисиа Ареопагита, вкупе и Тимофея. и иных иже на успение пречистыя Богородица приидоша от Ефеса, восхищену бывшу Павлу. Евангелие же Матвеево, написася от него. по повелению Иакова брата Господня и первосвятителя на востоце, по осми летех вознесениа Христова. А еже от Марка, написася от него во Александрии по 10 тих летех. От Луки же написася от него в Риме, по повелению Петрову, по 15 тих летех. А еже от Иоанна, написася от Прохора в Патме. по повелению Иоанна Богослова. по тридесятих летех вознесениа Христова.

Видевши же пречистая и пресвятая Богородица сыновне на небеса вознесение. множае себе вдавши пощению, и коленопреклонению. якоже рече Андрей архиепископ Критский. яко даже и доныне места коленом ея, на мраморех святаго Сиона суть. и на камени лежание. идеже мало естественый приемля сон. Многа же исцелениа немощным творя. и беснующихся от дух нечистых свобождаше. Милостыня же и попечениа многая творяше нищим и вдовицам. И прежде 15 дний прорече о исходе своем⁵¹². И прежде трех дней прииде ангел Гавриил предвозвещая ей исход ея, и Господнее пришествие. И пославше созва вся сродники своя, и соседи своя. Сим же пришедшим. се и апостолы вся приидоша на облацех. И некая словеса изрече им, и тайны страшныя. яже в сердци своем слагающи соблюдаше. При третием же часе дне оного, гром бысть велий с небесе, яко воня благоуханиа. И се Господь прииде на облацех со множеством ангел. и целова Мариам же и апостолы. Она же радости исполнившися рече к нему. благодарю тя Господи Иисусе Христе. зане яже обещал ми еси исполни. и абие предасть душу свою Господеви. Господь же прием пренепорочную и святую ея душу взыде на небеса. Богоприатное же тело ея, ангельскими и апостольскими песнми пренесено и положено бысть во гробе в Гефсимании. На месте же том за три дни ангельское и апостольское пение пребысть непрестанно. По третием же дни ангельскому пению преставшу. всем сущим апостолом. единому же недоспевшу⁵¹³, и по третьем дни пришедшу. и богоприатному телу хотя поклонитися. Отверзоша гроб, и тело ея пречистое и препетое необретшися. Едина же ея погребалная обретше. От нихже неизреченнаго благоуханиа наполнившеся. Те же паки взяти быша, и когождо на своем месте поставиша, иде же проповедаша. И считаютжся лета ея сице. Седмию лету принесена бысть родителми Господеви. И сотвори в церкви лет 6 и в дому Иосифове другыя месяц, 6 рекше на тринадесятое лето восходящии. В четыренадесятное лето восходящи. благовестися ей всемирная радость. и в пятонадесятое лето роди Господа нашего Иисуса Христа. И с сыном ея Богом нашим 30 лет и 3 и по еже на небеса вознесении его, пребысть с Богословом в святом Сионе, лет 24. якоже купно всех лет 72. Еяже молитвами Христе Боже спаси душа наша.