Слово о успении Божией Матери Иоанна, архиепископа Солунского

Иже во святых отца нашего Иоанна архиепископа Селуньскаго правоверна и свята мужа слово о успении Пресвятыя Владычица нашея Богородицы и Присно-Девы Мария. Благослови Отче.

(Из Сборника Соловецкой библ., № 811, лл. 184–196)

Егда прииде время изыти от телесе Пресвятеи Богородицы. прииде к неи великии Ангел. и рече еи. Марие. воставши приими си вравие⁴⁸⁵. еже ми даст насадивый рай. и даждь е апостолом. да дръжаще е поют пред тобою, по трех бо днех изыдеши от тела. се бо вся апостолы послет к тебе Господь. и ти погребут тя. и славу твою узрят от тебе дóндеже принесут тя на место твое. Отвещавши Мариа, и рече ко Ангелу глаголющи: почто се едино принесл еси. и не принесе комуждо вравиа. вдану бо сему единому, друзии вознегодуют, и что есть еже хощу сотворити, или како есть имя твое. да аще вопросят мя, и реку им. И рече к ней Ангел, что ты имени моего ищеши⁴⁸⁶. дивно бо есть слышати е. о вравии же убо не сумнися. понеже многи силы будут ныне во искушение всем неверующим. являася. пойди убо на гору. покажу ти силу его. Тогда воставши Мариа иде в гору Елеоньскую. предсветящу ей свету Ангельску⁴⁸⁷ имущи в руце вравие. Егда же взыде на гору. и возрадовася гора со всеми сады. абие же садове прегибающеся и поклоняхуся. егда же се виде Мариа и смутися. мневши, яко Иисус есть. и рече: рци ми, кто ты еси. или сам Господь ты еси⁴⁸⁸ понеже толики силы быша тобою. яко вси садове поклонишатися. глаголю бо яко никтоже толики силы может сотворити, но токмо Господь славе. явльбося мне сам. Тогда рече к ней Ангел: никтоже может творити знамения, аще не от руку Его. того бо вси силы послушают. аз есмь приемля душа смиряющихся пред Господем. и принося в место праведных. вонь же день исходят из телесе. тобе убо исходящи от тела. аз же прииду к тобе. Тогда глагола ему Мариа. ким образом приходиши к земным ко избранным. аще ли убо что есть на мне. что подобает ми сотворити. да внидеши и восприимеши мя. Глагола ей: что имаши Мати Божиа. егда бо послан буду, к тобе, не аз един прииду, но и вси вои Ангел приидут. и воспоют пред тобою. имуще вравие. И се рек к ней Ангел быв яко свет. взыде на небеса. Мария же вниде в дом свой. Абие потрясеся дом. славы ради вравия. сущаго в руце ея. потом же вниде в хранилницу. и положи вравие в плащаницу. тогда помолися глаголющи: услыши Господи молитву Матере Твоея Мариа. посли на мя Твое благоволение. да ни едина же власть приидет на мя в час он. но соверши реченое тобою. егда плакася пред тобою. Господи Господи что сотворю да мимоиду. благословити⁴⁸⁹ грядущая по душу мою. Отвеща ми глаголя: не плачи. не Ангели бо приидут по тя, ни Архангели, ни Херувими, ни Серафими, ни ины власти, но Сам Аз прииду по душу твою. ныне убо приближися болезнь раждающи. И помолися глаголющи: благодарю Тя свет превечный, в немже живеши, благословлю все насажение руки твоея. еже пребывает в веки. святый во святых почиваяй, услыши глас моления моего. И се рекши изыде, и рече отроковицы дому своего: слыши иди и призови ужики моя, знающая мя, глаголющи, яко Мариа зовет. Шедши же отроковица призва вся якоже рече ей. и вшедшим им. и рече Мариа: отцы и братиа поможем собе. хощу бо изыти от тела в покой вечный. воставше убо сотворите со мною велие человеколюбие. не прошу бо ни злата ни сребра. понеже си вся суетна и тленна. но прошу от Бога человеколюбия. да не угасите светилницы в три дни. да благословлю вы прежде даже не отиду от места сего. И сотвориша якоже рече им. даст же ся весть всем ближником ея и знающим ю. Обращьшися Мариа. и виде вся предстоящая, воздвиже глас свой глаголющи: отцы и братиа поможем собе. вжегши светилницы. побдим. понеже не вемы в кий час тать приидет. разумех же братиа моя. когда восприата буду. но не веды стрелы его⁴⁹⁰ яже в руце его. вем, показано ми есть воистину, но не верую. обще бо есть всем. но единого оного князя ради, супостата борющагося со всеми паче. но не может противу праведником и верным. одолевает же неверным и волю свою творит. праведным же не удолевает. понеже ничтоже имать у них. два бо Ангела приходита на человека. един праведный, а другий не праведный. и внидут со смертию. дóндеже измет душу смерть. и приидуть оба Ангела обыскати тело его. аще будет сотворила (душа) дела праведна, радуется о ней Ангел Божий. понеже лукавому ничтоже в ней. и тогда убо множество Ангел приидет ко души. и идут поюще пред нею. до места праведных всех. Тогда восплачется о ней ангел лукавства. ибо не имать части в ней. Аще ли обрящется дела сотворив неприазнена. радуется ангел лукавства. поим инех седмь дух. и возмут душу. претя ей. Ангел же праведныи сетуется зело. Ныне убо отцы и братиа поможем себе. да ничтоже лукаво обрящется в нас. Се глаголющи Марии, и рекоша к ней жены: сестра наша сущая мати и владычица всему миру. аще вси боимся. ты что ся имаши бояти. мати сущи Господня, о горе нам убо камо имам бежати⁴⁹¹ аще ты се глаголеши. небо, но упование наше ты еси и укрепляющи ны, ты бо не сотворшия греха. мы же что сотворим грешнии, или камо бежим. аще пастырь убоится волка, камо убежат овца. плакахужеся вси предстоящии. Она же тешаше я глаголющи. молчите братия моя не плачите, но прославите иже посреде вас. в сий бо час молю вы не плачите на месте сем Божиа девы, но пойте в плача место. да приидет во вся роды земныя, и во вся человеки Божиа. пойте убо в плача место, благословение се будет нам, не точию бо соблюдати вас присно, но и всего мира. И се глаголющи Мариа. призва вся ближники своя и рече им: воставше помолитеся. помольшеся и седоша, глаголюще величиа Христова⁴⁹² и знамениа яже сотвори. И глаголющим им. се прииде Иоанн апостол. толкнув в двери Мариины, отверз и вниде. Узревши же Мариа возмутися духом. воздохнувши не може удержати слез. ни возможе болезнию щедрот умолчати. но возопи гласом великим глаголющи. глас учителя твоего. иже тобе рече о мне в день в оньже изыде от нас. и аз плаках глаголющи: идеши кому мя оставляеши и у кого вселюся. и рече ми. тобе ту стоящу и слышащу, яко Иоанн есть набдяй тя. ныне убо чадо незабудь заповеданаго ти от него. помяни, яко возлежа на перси его. помяни, яко тебе рече единому. тайну. возлежащу ти на персех его. еяже никто же весть, токмо аз да ты, яко ты еси девьствен избран. и мене не восхоте оскорбити. понеже пресельница его есмь. рех бо ему повеждь ми. что рече ко Иоанну. и повеле ти. и ты поведа мне. ныне убо чадо Иоанне не остави мене. Си глаголющи Мариа плакаше. Иоанн же, не терпе, но смутися дух его, не разуме что глагола ему, не ведеше бо. яко исходит от тела. тогда возопи гласом велиим глаголя: Марие Мати Господня, что хощеши. да сотворю тобе. ибо оставих ти слугу моего. да брашно приносит ти. не хотев преступити заповеди Бога моего. юже заповеда мне глаголя. обходите весь мир, дóндеже грех потребится. ныне убо повеждь ми болезнь душа твоея, скорбиши ли, или ни. И рече ему Мариа: чадо Иоанне, ничтоже потребую от мира сего. но понеже по утренем дни исхожу от тела. молютися. сотвори со мною человеколюбие. тело мое. едино положи в гробе. и стерези со братиею своею со апостолы. архиереи деля. слышах бо я глаголюща. яко аще обрящем тело ея. огневи предамы е. от сея бо прииде льстец он. Си слышав Иоанн, глаголющи ей, яко исходит от тела. паде на колену и восплака глаголя. о Господи что убо есмь мы, яко показа нам скорби сиа. не бо забыхом древняго да претерпим другую скорбь. почто аз не изыду от тела. дабы мя видела Мария. Слышавши же Мариа Иоанна сице глаголюща и плачуща, умоли предстоящая народы да умолкнут. беша бо и ти плачуще. объимше Иоанна глаголаше: чадо. престани от плача твоего мало. Тогда востав Иоанн отираше слезы своя. паки же рече ему Мариа. помоли народа. дóндеже побеседую с тобою. да поют. Поющим же им, поимши Иоанна, веде в хранилницу свою. показа ему погребальныя ризы, и все сущее в жилищи ея. глаголющи: чадо Иоанне. веси яко ничтоже имам на земли. токмо погребалныя своя две ризы. еста же две зде вдовицы. егда же изыду от тела. даждь едину коеиждо. по сем же веде и. идеже дано ей от ангела. да приимут е апостоли. и рече ему: чадо Иоанне, приими вравие. да несеши пред одром моим. тако бо яве, тогда рече ей: не могу е взяти без апостол. не сущим им зде. да пришедшим онем негодование и зависть будет им о мне. есть бо боле мене в них. поставлен над нами. но егда вси соберемся и благословение будет. Исходящими же има ис хранилницы. гром бысть велик. яко смястися будущим на месте. По громном гласе. низвесишася апостоли. во облацех пред двери Мариины суще, 11 когождо их седя на облацех, и причтеный к апостолом, начало имяше вере христове. с нима же и прочии святии мужи собрашася пред двери Мариины. и целоваху друг друга. взирающе на ся и чудящеся, како снидошася вкупе. И рече Петр: братие помолимся Богу, собравшему нас. еще же и Павлу брату нашему сущу с нами. Петру же рекшу слово о молитве. взяша един глас апостоли глаголюще: помолимся, да разумеем, что ради собра нас Бог. Тогда друг друга честию вменяху, да помолится. рече Петр Павлу: брате Павле, востав помолися прежде мене. понеже радостию неизреченною возрадовася, яко бысть в вере христове. И отвеща Павел: отдаждь ми отче Петре. яко новопросвещен есмь, и несмь достоин, да стопам вашим последствую. како помолюся прежде тебе. ты бо еси столп светел. вся же предстоящая братиа моя болше мене суть. ты отче помолися о всех нас. Апостоли возрадовашася о смирении Павла. и реша вси: отче Петре, ты еси поставлен над нами. ты прежде помолися о нас. Тогда Петр поклонися им глаголя: благословен Бог Отец Господа нашего Иисуса Христа. прославивый вас, яко славится в вас служение. аз, братие, менший есмь раб, якоже бо аз избран есмь. тако и вы избрани есте. едина есть церькви сущим всем нам. всяк прославляя друга. Бога прославляет. а не человека. си бо есть заповедь Учителя. да любим друг друга. Тогда Петр простер руцы свои похвали Бога. глаголя сице: Владыко Вседержителю, седяй на херувимех. на смиреныя призирая. в свете живый, в покои вечнем. Открывая скровища скровеная. ты еси насадивый в нас благодать твою. кто бо, якоже Ты, Боже очистителю наш. твоего человеколюбия не отыми от нас. яко спасаеши от зла вся уповающая на тя, от ныне и до века. Егда реша аминь, целоваху друг друга. и абие посреди их прииде Иоанн Богослов глаголя: благословите, и егда целовахуть и вси. и рекоста, Петр и Андрей: Иоанне. возлюблене Господу. како прииде семо колико дний имаши. И рече Иоанн. бысть ми сущу в Сардийстем граде. учащу ми ту словесе Божию сущая люди. в 9 час дне. се облак светел сниде на место. идеже бяху собрани. и восхити мя пред всеми, иже со мною бяху, и принесе мя зде. толкнув же в двери. вшед обретох народ мног у Марии Матери Господа нашего. и рече ми, яко исхожу от тела. аз же не стерпех посреде предстоящих. но воспалихся плачем горким. ныне же убо братие, егда внидете светающу дни, не плачите, еда смутится Мати Господа нашего. се убо есть, емуже научи мя, учитель. егда возлегох на вечери на перси его. егда видевше народ плачущи ны. вознепщуют в сердцах своих глаголюще. яко убояшася си смерти⁴⁹³. тогда апостоли в утре вшедше в дом Мариин Матери Спаса нашего, и рекоша: благодать с тобою. Рече же и Мариа: когда приидосте семо, и кто возвести вам яко исхожду от тела, како ли зде собрастеся. вижду бо вы совокупльшася. и рече кождо их, страну от нея же взяти и принесени быша. Тогда прославиша ю вси от Петра и до Павла. глаголюще: благословит тя Господь спасаяй всех. Тогда возрадовашася апостоли. и Мариа духом глаголющи: благословлю тя обладающаго всем благословением. благословлю жилища славы твоея. благословлю тя давца свету. вселшагося в утробу мою. благословлю вся дела руку твоею. послушающая тебе и повинующася. благословлю любовь твою. еюже возлюби нас. благословлю словеса твоя животная. исшедшая из уст твоих и даная нам. воистинну убо верю, якоже рече и быша ми. рече бо ми послю ти вся апостолы исходящи ти от тела, и се собрашася. и есмь посреди их яко лоза плодовита, во время егда бех с тобою, Сыну мой. благословлю тя всем благословением. глаголаная ми тобою. да будут якоже бо ми обещася глаголя Сам прииду хотящу ти изыти от тела. Си глаголющи еи. призва Петра со всеми апостолы. введши в хранилницу и показа им потребна и погребалная, и даное ей от Ангела вравие. посем и шедши седе посреде их горящим светилником и не угасающим яко же заповеда им Святая Богородица Мариа. Зашедшу же солнцу во вторый день по явлении Ангела к ней. рече Петр ко апостолом: братие, иже имать слово назидания да глаголет. утешая народ всю нощь. Отвеща(ша) апостоли, отче Петре кто есть болий тебе сказая слово утешениа. мы раби есме. Тогда Петр нача глаголати: братие, елико вас прииде в место се. в час сий человеколюбиа, Матере нашея Мариа. просвещьше светилники, светящаяся от огня земнаго. се уже видим добре сотвори. хощу же и аз да кождо из вас приимете свещу свою. в непреходящий век. не имущии скверны. се бо свеща внутреняго человека. трисовокуплена есть. наше тело и душа и дух. аще бо просветите се трие истинным огнем. в оньже тружаетеся. непостыдитеся. егда внидете на брак с женихом своим в покои. тако есть и о Матере Господа нашего Иисуса Христа. свет светилника ея исполни вселеную не угаснет до скончания века. да вси хотящии спастися приимут дерзновение от нея. аще приимете свещу свету, восприимете покои и благословение. не мните убо смерть сущу, смерть Мариину. Владычица нашея Богородица, несть смерть, но живот вечный. понеже праведных смерть прославляется от Бога. си убо есть смерть слава. вторая же смерть. не возможе пакостити ей.

Си глаголющу Петру, свет велик. восия в храмене. якоже помрачитися свету светилник их. бысть глас глаголя глаголя, Петре глаголи им в разуме, и понести возмогут, угодно бо врач врачует, против страстем болящаго. питает и греет противу возраста отрочати. Петр воздвигл глас свой и рече. благословим Тя Христе Боже наш. Спасе душ наших. тогда предстоящим ту девам рече. слышите благодать вашу и славу вашу и честь. ближнии бо сохраншеи образ чистоты своея. слышите и навыкнете, что нам рече Учитель наш. рече бо: подобно есть царство небесное девам. не рече бо летом многим. понеже коеждо лето преходит. не уподоби его богатству. понеже погибает богатство. имя же девства пребывает. тем же верую, яко преславно есть девство. сего ради уподоби вам царство небесное. понеже бес печали есте. егда бо приидет смерть на вы, не речете: о горе нам, камо идем. и кому оставляем страстныя наша дети. или богатства великая. или насаждения селная, или собрания многая. никакоже бо о сем не печетеся. о ином же печали не имате. токмо о вашем девстве. егда бо послет вам готовитися. обрящет вы ничемь же дръжимы. видите, яко ни которая же детель болши вмени сего. ничтоже тяже мирских. слышите же и се.

Бе Етер во граде во всем изобилуя. согрешиста же ему два раба не послушавша его. и прогневася господин и отлучи я во страну далече. на время некое. и посем призва я. един же раб тою отлученою созда собе дом. и насади виноград. я сотвори нивы и стяжания многа. другий же раб делая еже притяже все на злато вдааше. и призвав златаря. и рече ему: аз есмь раб, имею владыку. но сотвори ми венец злат, иже воздам сынови его. златарь же сотвори, якоже повеле ему. и рече к рабу востани и приими венец на главу твою. и рече раб возми мзду свою. аз бо свое время имам носити венец. Тогда златарь разуме глагол реченыи от раба, иде в дом свои. Посем же свершися съврьшение отлучения. посла господин ею усекателя Етера к нима, и рече: аще до седми дний не приведеши ми ею, беду приимеши от мене. Тогда посланый скоро изыде со тщанием. и прииде в страну. и обрете раба она в нощи, яко во дне. и ем создавшаго дом и виноград и ино богатство стяжавшаго. и рече ему: поидеве, яко господин твой посла по тя. и чтотися мнить. рече же ему поидеве. Последи же рече ему. потерпи на мне. дóндеже продам все. еже стяжах зде. Отвещав слуга и рече ему: не могу терпети седмь бо дний имам повелениа. и боюся прещениа его и не могу ждати. Тогда раб восплакася глаголя. о горе мне, яко не готова себе обретох. Рече же ему посланный: о рабе злый, ведая работу свою, яко взыщет тя господин твой, и послет по тя. почто насади на чуждей земли. и не обретеся готов, прежде даже не приидет по тя. Тогда раб восплакася глаголя: о горе мне. мняхся всегда во отлучении сем быти. и не веровах. яко взыщет мене владыко мой. сего ради богатство стяжах во стране сей. Тогда убо слуга поят и. ничтоже с собою приносяща. Слышав же другий раб. яко посла господин его по него, востав и возложи на свою главу венец. и шед на путь ждяше. имже хотяше ити посланый слуга по него. яко прииде и рече ему: владыка мой посла тя по мя. с радостию прииду, ничтоже имам. легок бо есмь. разве токмо венец си златы. иже уготовах, чая возвращениа. и молюся, да милостив будет господин мой. егда послет по мя. и возвратит от сего разлучениа. егда завидят ми нецыи и возмут от мене венец ныне улучих хотение моего молениа. воставше идем. Тогда оба раба идоста со слугою. и яко узре господин его. глагола: ничтоже имущему. где есть дело от толика времене отлучениа твоего. Овещав же раб и рече: владыко, посла по мя воина усекателя. и молихся, да ми услабит. да продам все мое имение, и возму в руку мою. и не ослаби ми. Глагола господин его. о рабе лукавый. ныне ли помянул продаяти. егда послах по тя. почто не взираше на отлучение. ни помышляше ли, яко ничтоже поможет оно богатство. И прогневася господин его. повеле руцы и нози связавше ему послати во ина места далняя. Призвав же носящаго венец. и глагола ему: гряди рабе благоверне. вожделел еси свободы от сотвореннаго тобою венца. венец бо свобода есть. како ли и смееши его носити. без написаниа владыки своего. не может бо раб свободитися, сице не от своего владыки. якоже вожделел еси свободе сей. имей ю от мене. тогда свободь быв. и поставлен бысть над многим.

Сия глагола Петр к девам сущим с Богородицею Мариею. и обращься к народу рече. слышите и вы братие. находящая на ны. си бо дева истинна жениха. Сына Божиа Творца всея твари Мати есть. Мы же есмы род человечь. исперва прогневахом Бога. из рая изгна Адама, и весь мир остави от него. яко негодуя. яко в отлучении живем зде. приидет же комуждо нас кончина. и преселимся, якоже отцы наши и прадеды, Авраам, Исаак, Иаков. Бывающи же кончине каждому нас. понь слуга послан бывает крепок, сиречь смерть. Егда приидет по душу грешницу. собравши множество грехов и безаконий. и стужить ей зело. тогда молится глаголющи. потерпи на мне. дóндеже избавлюся от грех, яже насадих на теле моем. како бо хощет ослабити скончавшуся уроку житиа. никоея же правды имый. и приносится на место мучениа. Аще ли кто имать дела правды. радуется глаголя. ничтоже мене одержится. токмо имя девства ношу. и молится глаголя: не остави мене на земли сей. да не взавидевше нецыи возмуть имя девства моего. тогда изыдет душа из тела. и принесут ю к небесному жениху с песньми. Ныне убо братие подвигнитеся ведуще, яко не пребудете зде в веки.

Си глаголющу Петру до утрении укрепляющи народ. Возшедшу же солнцу. воставши святая Мариа изыде вон. воздевши руцы свои моляшеся глаголющи к Богу. Владыко призри на молитву матере своея, скончай глаголанаа ми тобою. По молитве же вшедши и леже на одре соврьшающи строи свои. Петр же седяше (в) возглавии ея. Иоан же у ногу ея. прочии же апостоли окрест одра ея. В третий же час дне гром бысть с небеси велик и воня благуханиа. от множества же воня благыя сон являшеся всем предстоящим. разве святей Богородицы Марии. Свидетельствуют о преславней чистей Владычицы истинны Богородица Мариа и славе ея. И се прииде Господь на облаце. с множеством вой ангел. и вниде в храмину, идеже бе святая Мариа. сам Господь. и Михаил архистратиг. поющим ангелом непрестанно. окрест храмины парящим. Вшед же Господь обрете апостолы у святыя, и целоваше я. и посем же целова Марию Матерь свою святую Богородицу. Отверзши же уста своя святая Богородица. благословяще и глаголюще: благословлю Тя Владыко Господи. яко же обещася рабе твоей. не остави мене. рече бо ми древле Владыко. не оставлю ангел приити по душу твою. но Сам прииду по ню, и бысть ми по глаголу твоему. кто есмь аз смиреная. яко толицей славе сподобихся. И се ей глаголющи предаст дух свой. осклабляющуся лицу ея ко Господу. Господь же приим душу ея. и дасть в руцы Михаила. обви ю яко кожею, еяже славы несть мощно поведати. мы же апостоли видехом душу Божиа Матере Мариа предаему в руцы Михаилу. исполнену всех удов человечих. разве мужства и женьства. ничему же иному сущу, токмо подобие всяка телесе, ни муж. ни жена. и белу седмерицею паче солнца. Возрадоважеся Петр и вопроси Господа глаголя: Господи кому от нас душа бела есть, якоже бескверней голубицы Марии. и глагола ему Иисус. всем в мире сем ражаемым душа таковы суть. но егда исходят из тела, не обретаются сице белы. понеже инака ся послаша, инака ся вземлють. возлюбившаго телу многих ради грехов. аще ли кто сохранится от грех тмы века сего. яко исперва дах вам знамение. изыдет от тела и обрящется душа его бела сице. По сем же рече Петрови Господь. скутай тело Девы Мариа. скоро изыди ошуию града. обрящеши гроб нов, в том положи тело, и пребудете у него. якоже заповеда вам.

Си глаголющу Спасу возопи тело Пресвятыя Девы Мариа пред всеми глаголя. Помяни мя яко Твое (со)здание есмь. помяни мя яко сохраних преданое ми сокровище. Тогда рече Иисус телу. не оставлю тебе. обретебося верна сохранши даный ти завет. не оставлю тебе скровище печатленно пребывши. дóндеже взыщется. и се глаголя Спас невидим бысть. Петр же и апостоли и три девы. устроивше тело Пресвятыя Девы Мариа. и положиша и на одре. по сем же уснуша. и возбнуша. и рече Петр к Иоанну. ты еси девственый. тобе достоит прияти вравие в руце свои. и нести пред одром Матере Господня. И рече Иоанн. ты еси отец наш и учитель, тебе лепо есть пети пред одром, носяще вравие до места. Отвеща Петр и рече. де никтоже братие не жалить си. поставим ея на одре. Вземше же апостоли одр Пресвятыя Богородица Мариа, несяху на погребение. Петр же начат пети сице глаголя: изыди Израиль из Египта, аллилуиа. Господь же в облаце суще со ангелы невидимо пояху. Тогда глас слышашеся ангельский. глас же народа многа взыде во Иерусалим. Слышавше же архиереи глас поющих. смутишася глаголюще, что есть глас сей, и рекоша им нецыи. яко Мариа изыде от тела. апостоли окрест поють. Абие вниде в ня сатана. совещавше в собе и рекоша: изыдем убием апостолы, а тело ея сожжем, ношьшее влъхва оного. Воставше изыдоша с оружием. яко да убиють я. и абие поразиша я ангели невидимо. и главы их у стены⁴⁹⁴ сотроша. и не видяху камо ити. Един же от архиереи. изыде на путь, видети хотя бывающая чудеса. егда же виде апостолы поюща, исполнився ярости зело, и рече. се жилище разорьшаго отец наших законы. и какову славу страшну имать. притече с велиею яростию к одру. и ем идеже бе вравие. хоте на землю соврещи. абие руцы его прилепистася одре, отсечени от локту. и остасте висящи (на) одре. а другии пол у тела висяше. Тогда восплакася пред апостолы, моляшеся им глаголя. помилуйте мя Божии апостоли, не презрите мене в велицей беде. Тогда рече ему Петр, се дело несть мое, да ти помогу, то ни единого от сих. аще не веруеши, яко Иисус есть Сын Божий, на него же вы востаете и емше убисте и. не исцелееши от раны сея. И рече ерей: видехом, яко Сын Божий есть. но сребролюбие омрачи очеса наша. а отцы наши поведаша нам глаголюще. се Бог наш избра нас от всех колен. да будем пред людми сими в силе. да делаем землю сию. иже есть дело велие да созижете люди сиа. и приимете от них десятину. начатки и всяк первенец разверзая ложесна. но соблюдете чада, еда како наполнится место от вас имением. вознесетеся и прогневаете Бога. но ваш избыток дадите сиротам и нищим вдовицам людий моих. душа скорбящая не презрите. мы же отец наших предания не послушахом, но видевше, яко избыточествуем зело прьвенцы. овец и волов положихом в дому Божии. трапезу продавающих и купящих. и пришед Сын Божий. изгна вся вон, глаголя. возмите сия отсюду. не творите дому отца моего дому купленаго. мы же своими проклятыми обычаи, совещахом совет зол. и востахом нань и убихом и. ведуще, яко Сын Божий есть воистину. но не помяните зла нашего. но отдадите ми. се бо ми бысть, понеже возлюби мя Бог. да жив буду веровав в онь. Петр же повеле поставити одр. и рече ко архиерею: ныне аще веруеши от всего сердца, прииди облобызай тело Владычица нашея Богородица. тако глаголя, яко верую в тя и из тебе роджьшагося. Тогда архиерей еврейским гласом благовестуя Марию, яко три часы не даст никому же прикоснутися ей. приводя свидетельства от Моисеова закона. якоже писано есть о ней. яко се церкви будет Божиа славы, и ина многа глагола о ней пророчьская речениа. якоже всем чудитися слышащим такое учение. ихже николиже слышаша. И глагола ему Петр: гряди и прилепи обе руцы твои. Он же прилепи я. глаголя: во имя Иисус Христа Бога нашего. Сына Мариина Пречистыя голубица, сокровеннаго сокровища благодати его. да прилепитася ко мне руцы мои. И абие быста руцы его якоже и прежде ничемьже скудни. И рече ему Петр: востав возми талию от вравиа⁴⁹⁵ и вниди в град обрет народ ослабленый. не обретающ пути, повеждь им приключьшаяся тебе. верующим же положи на очию талию сию, и абие прозрят. Шед же архиерей, якоже заповеда ему Петр, обрете многи страждуща. яже поразиша невидимо ангели. плачущася и глаголюща: о горе нам. яко бывшее в Содоме на ны найде. они бо побиени быша невидимо. потом же прииде огнь с небесе. и поже я. о горе нам. се бо скончеваемся. уже бо огнь грядет на ны. Прииде Офониа ерей, приим талию. и поведа им приключьшаяся ему. и рече им о вере. и иже вероваша. абие прозреша. а не веровавшеи осташа слепи.

Принесше же апостоли честное тело Пресвятыя и Преславныа Владычица нашея Богородица и Приснодевы Мариа. и положиша е во гробе нове на селе Гефсимании. идеже Спас показа им. Пребыша же на месте том единодушно стрегуще три дни. пребысть же ангельское пение непрестанно над гробом. апостоли же славяще Бога пребываху. По сих же прииде Фома апостол понеже бе остал. и тъ поклонится и целовати пречистое тело. Гробу же отверсту бывшу. тело убо не обретеся. преложи бо е Сын и Бог ея. на место, идеже Сам весть, едины же понявы обретоша гробныя. Сам же Господь нашь Иисус Христос прослави пречистую свою Матерь Богородицу Марию. и вся славящая прославит. верно творящая пречистую память, святых ея праздник. и от всех бед спасет. слышавшая с любовию благодати исполнить. якоже дом Онсифоров. оставление грехов приимут зде, и в будущем веце. яко явися на земли престол его херувимскы, небесныи же и земныи. надежа и прибежище, и дръзновение роду человечьскому. да причастимся тайно. пречистеи памяти Приснодевы Мариа. верующе воистину. и проповедающе благодать Христову во всем мире. благолепие ея осенит. и щедроты и милости и человеколюбиа сподобимся зде. и в страшном же и трепетном его предстоянии на праведном судищи. сподобимся восприяти вечных благ. яко Богу и Отцу есть слава и дръжава. с Единородным Сыном. и с Пресвятым Духом. ныне и присно и в веки веком, аминь.