Псалом 11

Пс.11:1. В конец, о осмей, псалом Давиду.

НАДПИСАНИЕ И СОДЕРЖАНИЕ

О сем надписании сказано во псалме Пс. 6:1. В настоящем же псалме Пророк приносит жалобу Богу на нравы века своего, о окружающих его, притом просит помощи против льстецов и клеветников, и испрося, научает и других уповать паче на Бога, нежели на людей, понеже словеса человеческая часто бывают ложна, словеса же Божия всегда суть истинна и верна.

Пс.11:2. Спаси мя, Господи, яко оскуде преподобный: яко умалишася истины от сынов человеческих.

Прекрасна есть добродетель, но и трудна, и сама по себе неудобна, наипаче, когда любящий оную будет жить между малым числом добрых. Аще бо в мореплавании трудно, волнам вопреки стремящимся, управлять кораблем противу оных: кольми паче сие есть трудно в разсуждении добродетели. Для того и Пророк, яко един к ней прилепивыйся, всем прочим шествующим вопреки, к промыслу Божию прибегает, глаголя: спаси мя, Господи. Аки бы рекл: мне потребна рука свыше, потребна помощь оная небесная. Шествуя бо путем, противным человекам прочим, обретаю нужду во многом промысле, да спасуся от опасностей порока и от растления века сего лукаваго. Яко оскуде преподобный, сиречь: яко мало обретается людей благочестивых, праводушных и правдолюбивых. Яко умалишася истины от сынов человеческих, сиречь: яко мало есть людей глаголющих истину, паче же яко и самая истина взятся от среды сынов человеческих.

Пс.11:3. Суетная глагола кийждо ко искреннему своему: устне льстивыя в сердцы, и в сердцы глаголаша злая.

То есть, люди не глаголют с ближними своими, как разве с намерением обольстить и обмануть. И не диво: понеже имеют устне льстивыя в сердце, сиречь, глаголют не от чистаго и простаго, но от лукаваго сердца, и в сердце глаголют злая, сиречь, иное языком провещавают, а иное на сердце имеют, и тако простодушных прельщают.

Пс.11:4. Потребит Господь вся устны льстивыя, язык велеречивый,

Пс.11:5. рекшыя: язык наш возвеличим, устны наша при нас суть: кто нам Господь есть?

Сими словами пророчествует, что все льстящие языком и мнящиеся приобретать некую корысть от лести, каковы суть клеветники и наушники, вечно погибнут. С устнами льстивыми соединил язык велеречивый, дабы показать, что люди льстивые не только вредят ближнему языком, но тем еще и гордятся, превознося искусство свое похвалами, и за нечто великое почитая уста злоречивыя, и тем как бы презирая Бога, давшаго уста человеку на прославление имени Его. Устны наша при нас суть, кто нам Господь есть? Аки бы рекли: не хощем никого признавать за высшаго, – кто может господствовати над нами? Языком нашим всех превозможем. Таковы были придворные льстецы во времена Давидовы при Сауле; таков был Фараон, таков был Рапсак, таков был Навуходоносор (Исх. 5:2; 4Цар. 18:28–32; Дан. 3:14–15).

Пс.11:6. Страсти ради нищих и воздыхания убогих ныне воскресну, глаголет Господь: положуся во спасение, не обинюся о нем.

Пророк вводит Бога глаголющаго и обещающаго помощь Свою людем убогим, страждущим и воздыхающим от угнетения людей, льстивых и коварных. Страсти ради нищих, и воздыхания убогих ныне воскресну, глаголет Господь. То есть: не закосню помощию моею, но вскоре востану от долготерпения аки от сна, и прииду помощи им. Положуся во спасение, и не обинюся о нем. То есть, спасу рабов Моих от злострадания, и утвержду безопасность их, дабы всегда невредимы пребывали, и в том свободно по власти Моей поступлю, якоже Мне угодно.

Пс.11:7. Словеса Господня словеса чиста, сребро разжжено, искушено земли, очищено седмерицею.

Сими словами показывает Пророк, что обещания Господня, о которых сказал он в стихе предыдущем, не суть подобны обещаниям людей льстивых, но зело истинны и верны, подобны сребру разжжену, то есть, сребру прямому и неподложному, познаемому по звуку, весу и чистоте, – каково бывает сребро разжженое во огни, и очищенное от земли и от всякаго другаго примеса искусными художниками, и притом не единожды, не дважды и не трижды, но седмерицею, сиречь, многократно.

Пс.11:8. Ты, Господи, сохраниши ны и соблюдеши ны от рода сего и во век.

Заключает из вышереченных, что Бог непременно исполнит обещанное. Аки бы рекл: понеже мы сами собою и своими силами не можем сохранитися от рода сего, сиречь, от людей сих коварных и льстивых, или от века сего растленнаго. Ты убо, Господи, по силе обетований Твоих, сохрани нас от рода сего во век, не точию зде в напастех утешая, но и в будущей безконечной жизни вечный покой даруя.

Пс.11:9. Окрест нечестивии ходят: по высоте твоей умножил еси сыны человеческия.

Сие место в Еврейском тексте читается так: «окрест нечестивии ходят, егда возносятся суетнии сынове человечестии». Следуя переводу седмидесяти толковников, должно полагать причину, чего ради просит сохранитися от нечестивых губителей оных или от рода онаго людей растленных: понеже де повсюду свободно ходят, и примером своим аки некоею язвою неосторожных заражают: тлят бо обычаи благи беседы злы (1Кор. 15:33), и предохраниться от них весьма трудно. К сему присовокупляет, что число людей непорочных и праводушных зело оскудело и умалилося, как выше показал; беззаконных же, по неизследимых судьбам Божиим, повсюду есть безчисленное множество. Следуя же тексту Еврейскому, в том же смысле рещи можно: нечестивые умножатся, и повсюду дерзновенно ходить будут, егда нас убо уничижиши, суетных же сынов человеческих вознесеши и прославиши.