87. 1460 г. Его же послание к литовским епископам о незаконном киевском митрополите Григории

Из сборника новгородско-софийской библиотеки (нынe с.-петербур. Духов. академии) № 1464, л. 394–407; сверено со списком, находящимся в другом сборнике той же библиотеки № 1465 (прежде № 677), л. 184–189. Издано было, по этому последнему списку, в VI томе. Ист. Русс. Цер. Макария (Прилож. № I). Соображения о времени написания грамоты см. там же, стр. 43, примеч. 66.

Благословение от пресвященного apxиепископa Ионы, митрополита киевского и всея Руси, о Святом Духе возлюбленным сынам и сослужебникам нашего смирения, епископам земель великих литовских, добре бывшим строителям святой церкви, правителям божественного закона: благодать вам и мир, еже о Христе святой церкви благоустроение. Помните убо, сынове, прежде бывшее еже о мне смиренном, како по милости Господа Бога Спаса нашего Иисуса Христа и пречистой его Матери, святой Богородицы, аз смиренный епископ, быв преже муромский епископ и рязанской земли, и колико лет пребывах в послушании духовно отца и господина своего, пресвященного apxиепископa Фотия, митрополита киевского и всея Руси, о немже благоволи Бог приять душу его в небесное царство. И сия весте, како изволи Бог и пречистая Богородица, еже получить ми паству великой Божьей церкви и богособранного Христового великого стада словесных овец. О сих же, чада, Бог весть, яко не дерзновенно, ни самовластно таковое сотворих, ниже о сих желательно душу имеях, но cиe бысть действием Святого Духа. И по сих с подвигом избрания и воли благочестию ревнителя, благоверного великого князя Василия Васильевича, и достигох Царствующего града, цветущего в прежнем благочестии греческого православия, и приях, от благоверного царя и от святейшего патриapxa Иосифа благословениe, и от всего святого собора вселенского. И тако Божьей волей царь же и патриарх, по своему благословению и по всего святого и вселенского собора, повелеша быть ми на русской земле по Сидоре митрополитом; зане уже тогда от них поставлен бысть Сидор митрополит, и по сих пребысть на Руси не мало время, и потом Рима достиг, и оттоле злая ересная святой церкви русской принесе неподобная, да и сам к Риму отбеже. И егда бысть по временам злочестивого Сидорова ересного прихода еже от Рима на русскую митрополию, и паки, по отшествии его другого пути к Риму, еже хождаше расстояния ради святой церкви и развращения ради православию злыми своими ересями, восследуя прежним богоотступникам Apию и Несторию. Видев же тогда сын наш князь великий таковые Сидором нечестия бываема, и остави его, яко безумна и отступника веры, и тако Божьей волей ²⁸¹⁰ и пречистой Богородицы, духово попечение имея еже о святой церкви, новый Владимир, благочестия ревнитель и мудрый изыскатель святых правил богоуставного закона святых Апостолов и святых Отцов предания, иже во благочестии цветый благоверный князь великий Василий Васильевич, вскоре о сих возвещая ми, еже Сидором деемым, даже и о поставлении в своей земле митрополита, по изысканию святых правил, всей земли епископы, и обсылает о сих брата своего, короля и великого князя литовского, и тако прошения волю о поставлении и грамоты его приим, и созывает архиепископов и всех епископов великодержавных земель своих русские митрополии, ихже ныне имена суть на небесах написаны в книгах животных. И сотворше собор великий в церкви архангела Михаила, в богоспасаемом граде Москве, и милостью Божьей и пречистой его Матери святой Богородицы, и по извещению Святого Духа и по изысканию святых правил божественого закона и по прежнему благословению царя же и святейшего патриapxa и всего их вселенского святого собора греческого великого православия, и по начатию о Бозе действующего благоверного великого князя Василия Васильевича, святой его великой церкви дело благо и совершися еже о мне, паче же Богу поспешествующу: и бых свершен в русской земле митрополит киевский и всея Руси. Другого же шествия долготы пути великого не сотворихом еже ко Царствующему граду богоуставного закона, до царя же и патриapxa не придох, нужа ради путем велит тесноты, насилованием множества от поганых; зане бо многих тогдашние земли русские людей, великих гостей, и шествующих тех путем, и побивше, поганые смерти предаша, а товара бесчисленное множество разграбиша, и никомуже тогда пройти не дадуще семо же и овамо. К тому же еще и о сих известие уведахом, зане уже по грехам тогда прииде раскола и мятеж святой великой соборной церкви греческой с римской, прелести ради богомерзкого Сидора, еже в восьмом си соборе, обльсти царя же и патриapxa греческого и сотвори им, якоже Иудеи Христу сотвориша, воздающе за манну желчь, за воду же оцет, и распенша и кресту пригвоздиша. Сидор же прельстив царя и патриарха, разлучи от закона их святого и погибели исполни их. Богозданному же великому Царьграду, сами весте, како того ради смущения по малых временах от Бога попущенной казнью, многим волнением поганых языков, люди православия сотрошась, прелести ради вере православия греческого и Сидорова деля развращения. О таковой бо Апостол пиша глаголет: «аще кто рассыплет храм Божий, рассыплет того Бог».

Помните паки, сынове, и сия: како аз смиренный, пришед в святую си церковь на Киев, в великую державу короля и великого князя литовского, по уставу божественного закона смиренне и благочинне, и по святым правилам имея богопорученное си строение и попечение, еже о святой церкви и о уставлении приношения святой службы и о молитвенных предстояниях к Богу, еже о здравии и многолетствии самодержавного короля и великого князя литовского, и о его благоверных князьях, и боярах, и о всем православном христианстве вашей паствы русские, митрополии киевские и литовские земли. И бывал паки есмь неоднова тамо, управления ради святой церкви, а не богатства деля злата, ниже сребра, ни возмездия ради почести, якоже он преже бывший Сидор, грабитель и враг церковный, татьством их пограбив, святую церковь пречистой Богородицы здесь на Москве, и поймал бесчисленное множество злата церковного, а подкручаяся на путь неправды, к составлению восьмого си собора, отреченного святыми правилами богоуставного закона прежнего православия греческого, и заповедью святых Апостолов и преданием святых Отцов богосоставленных святых семи соборов всей подсолнечной, и утвердивше о сих добре, и повелеша нам веровать в святую и животворящую и единосущную Троицу, Отца и Сына и Святого Духа. О восьмом же всей вселенной соборе заповедь тверду написавше, в святых правилах положиша, запрещающе зело, еже на таковая никтоже да не дерзает, ни составляет, ниже покушается о сицевых делать же и творить, кроме особных дел, поместных си управлений церковных, в своей земле митрополит с епископами своими, или епископ в своей си церкви с священниками своими да створют; а восьмому великому собору вселенной никакоже святые правила быть не повелевают и с проклятием отрицают. Сеятель же горького семени таковая здела Сидор своею прелестью, якоже диавол, с ним же Григорий чернец, ученик его.

И сия паки помните, сынове, како аз смиренный, по божественному закону, не оставих вашего прошения и желания о божественной пастве святой церкви, и тако по святым правилам дах вам освятение и благословение на главы ваша и устроих вас церковные правители, истинные учителя, и яко добры пастыри Христову стаду словесных овец. И ныне о сих такоже, сынове, благословляю вас: Господь Бог да управит о всем благочестне и законне, по святым правилам, путь чисть вашей паствы, правление святой церкви и духовне соблюдение Христового стада словесных овец. И о таковых благочестии добре подвизайтесь, якоже и мы, Божьей милостьо и пречистой Богородицы. И сия весте сами, сынове и сослужебники нашего смирения, колико уже лет аз смиренный имеях великую паству, по божественному закону правя и устраяя святую великую церковь русского православия, по святым правилам, безмятежне, и доднесь моля Бога и пречистую Богородицу о здравии и многолетствии благоверного великого князя Василия Васильевича, и сына его благоверного великого князя Ивана Васильевича, и благоверного князя Георгия Васильевича, и о всех благоверных князьях и боярах, и о всем великом господстве их великого благочестия, яко да устроит Господь Бог в мире и в тишине великой все времена ²⁸¹¹ лет живота их. Ныне же, сынове и сослужебники нашего смирения, слышим пришедшего к вам церковного врага, Сидорова ученика Григория, чернеца богомерзкого, и того ради пишу вам: блюдете опасне сих, да не взмятет у вас богоотметный Григорий святые церкви, ниже лестью да прострет сети змиевые, сатаниновы злые ереси, ниже насеет греховного плевела ложного учения, ни покрыет мглой прелести развращения вере божественного закона святых Апостолов. Вы бо сами приимше от нашего смирения благословение, и по святым правилам бысте богоизбранны правитель святой церкви и истинные учителя миру и проповедники вере благочестия, да никакоже не приимете его; сами бо весте преже бывшие злые нечестия их. Аз же ныне о сих пишу, воспоминая вам, како убо Сидор и тот чернец Григорий, ученик его, насытишася яду змииного, сатаниновой прелести, злые ереси прежних богомерзких ересников, и составиша богоненавистны, отметны собор вселенский, сшедшеся во Флоренции граде римском, егоже восьмым нарекоша, и тако увязнувше в сети златолюбия; якоже он, злой раб и льстец, окаянный Иуда, объят бысть мрежей сребролюбия и продаст Бесценного, емуже не достоит весь мир: такоже и Сидор истинную веру благочестия на злате отдавает папе римскому, и того ради незаконне почесть гордости бесовния взимает, и богоуставного закона православия веры отмещется, и тьмой своей неверия покрывается. Егда же от Рима приде к нам, и тако звашеся легатос и от ребра апостольского седалища, лятского же и немецкого; егда же в молитвенных речениях святой службы и вместо святых патриархов вселенских поминает и блажит Сидор Евгения, папу римского, о немже никогдаже не приглашает святой церкви нашего православия, с Сидором же и чернец его той диакон Григорий, ученик его, единосложно таковое согласуют и следующе способником своим богомерзкого их собора отреченного, ихже не приемлет святая церковь православия и зело отрицает. Егда же бысть по окончании святой службы, тако повеле Сидор, ставь посреде церкви, чести велегласно богомерзкого си восьмого вселенского собора, отреченного святыми правилами, еже сдела грамоту, в нейже писано есть разделение о святой Троице, согласующе, яко от Сына Дух исходит, и опресночная нам соединиша приношения в святой службе святой церкви. Сидор же с Григорием, вкупе блядовствующе, о сих добре похваляют, и ина богомерзкое, богоотметное многое, еже святой церкви развращенное, глаголаху. Святая же великая наши Божья церкви русского благочестия держит святые правила и божественные закон святых Апостолов и устав святых Отцов, еже прия преже бывшей святой великой соборной церкви богосданного Царствующего града великого православия греческого, прежнего богоуставного благочестия, от неяже преже бывшие митрополиты русские устраяли и управляли святую церковь русского благочестия безмятежне, и того ради от Бога венцы святыми венчашася и великих чудес сподобишася: святой Петр митрололит, Алексей митрополит, церковные правители быша, истинные учителя благочестия, и к Богу отъидоша, еже по смерти и доныне чудеса творят Божьей волей, ихже молитвами и мы сподобихомся от Бога приять правление святой си церкви в русской земли воссиявшего благочестия и паству великого богоизбранного Христового стада словесных овец, в нем же и пребываем благочестии прежнем, доколе Бог велит. Егда же узре благоразумный князь великий Василий Васильевич в Божьей церкви великого си благочестия неудобь делаемо Сидором развращение святой церкви благочестию их, великому православию русской земли, и тако повелевает тогда побыть ему во общем монастыре великого архангела Михаила, донележе пошлет до Царствующего града ко царю и патриарху и к всему собору православия о Сидоре, да увесть от них, что ради бысть сицево развращение от него святой церкви злыми ересями. Сидор же тогда беснуяся, и тако нимало времени пождать не стерпе, срама ради обличения своего о злых ересях, еже делаше, и тьмой своего безверия оболкся, ночью бездверием изшед, татством бегу ятся и с учеником своим с Григорием с чернецом. Благоверный же князь великий Василий Васильевич не посла за ним возвратить его, ни восхоте удержать его, яко несмыслена и богомерзка, да не приступится к ереси ²⁸¹² его, зане бо святые правила божественного закона святых Апостолов повелевают такового церкви развратника огнем сжечь, или живого в землю эасыпать.

Сидор же о таковых своих ересях ничтоже приим зла, к Риму отбеже, и ныне отдалеча Сидор тоже творит, якоже злой пагубный змей диавол, жестоко гоня святую церковь, развращая русского благочестия, и вводит ныне от римского папы митрополитом на Русь чернеца Григория, богоотметного ученика своего, такового же с ним богомерзкого и тьмокровных ересей исполнена, о немже король и великий князь литовский присылает к своему брату, великому князю Василию Васильевичу, послом Якуба, своего писаря, да с ним Ивашенца, о том, чтобы Григория приять им себя митрополитом. Благоверный же князь великий Василий Васильевич и сын его, благоверный князь великий Иван Васильевич, никакоже не восхотеша приять такового врага бывша святой церкви, Григория чернеца; ркуще – волка, а не митрополита, и не прияли его. Аз же, смиренный митрополит, и со всеми сынами и сослужебниками нашего смирения, с архиепископами русской земли и со всеми епископами, вашей богодуховной братией, с церковными прави[те]лями, и со всеми соборами святой церкви, иже в великом благочестии русского православия, все держим богоотметного чернеца Григория отлучена от святой церкви, и богомерзкого врага, и чужда православной веры, якоже и Сидора ересна, бывша прелестника великому благочестию святой церкви и всему православию русской земли, имже да воздаст Господь Бог в день страшного суда по делам их. Нам бо есть, сынове, подвизание и попечение о сих иметь, яко да таковыми ложными учителями не будут восхищены словесные овцы стада Христового. И благословляю вас, сынове и сослужебники нашего смирения, да не приемлете от богомерзкого Григория и послушания ложных его словес. Аще начнет ученьем глаголать или писать к вам, да по послушаете; аще ли запрещением что делать начнет, вы же сих не внимайте; аще ли что напрасльством хочет развращения, вы же не усомняйтесь, по реченному в святом Евангелии Господнему слову: «не убойтесь от убивающих тело, души же никакоже коснуться не могущих». И вы, сынове, якоже и мы, имейте богомерзкого того чернеца Григория отлучена от святой церкви: вы бо есте, сынове, яко божественного рая древеса доброплодные. Вам есть богопоручена, еже по святым правилам и по нашему благословению, церковная власть; вы бо есте, сынове, богоизбранные пастыри и учителя; вам бо, якоже и нам, подобает пещися о управлении святой си церкви. И тако сынове дни бывше и облекшеся, якоже во броня, во истинную Христову правду и крепце подвигшеся по благочестии, имеюще Христовые огнедуховные уста и приимше меч духовный, еже есть слово Божье, и пребудете против духоборца, якоже твердии адамантовы, отгоняюще богомерзкого чернеца Григория, святыя церкви врага, и отсекающе его злые плевелы неприязни, ложные учения его, и мудрствующа беззаконнующая, бездверья прелести уста его Божьей силой словес заградисте, угашающи пламень лютого безбожия и сети неприязненные злых его ересей размещете; а Божья сила Отца и Сына и Святого Духа помогаете вам: Господь Бог с вами есть, ни-ктоже на вас. И тако, сынове, пребудете о Бозе управляюще святую церковь, и по снятым правилам утверждающе веру православия, иже в русской земле воссиявшего благочестия, и учения духовных словес напитеющи богособранное Христово стадо словесных овец своей паствы, собблюдающи от мысленного волка Григория и от всех врагов навета непреклонно.

А благодать Божья и милость и пречистой его Матери, и о Христе благословение и молитва нашего смирения да пребывает с вами духовно всегда и днесь, Божьей волей, неразлучно. А писан на Москве, августа месяца. ²⁸¹³