120. 1493 г. Послание игумена волоколамского монастыря Иосифа к Нифонту, епископу суздальскому, о еретичестве митрополита Зосимы, необходимости казнить еретиков градскими казнями и недействительности проклятия, изрекаемого иepapхами-еретиками

Из рукописи Москов. Синод. Библиот. XVI в. № 453, л. 1–16. Здесь, как и в списке, изданном в Моск. Общ. Ист. и Древ. 1847 г., № 1 (в Смеси), послание к Нифону слито, на конце с посланием к игумену Bacсиану, брату Иосифа: в настоящем издании прибавка эта опущена. В других списках (Публ. Библ. Q., отд. XVII, № 68, л. 244 об. и № 50, л. 16. Москов. Синод. Библ. № 791, л. 59) послание обрывается у конца второй части (о необходимости казнить еретиков), где и в нашем списке стоит обычное заключительное славословие. Соображения о времени написания и первоначальном виде послания см. у Хрущова в исследовании о сочинениях Иосифа, стр. 123–129.

Господину государю пресвященному владыке суздальскому и торускому, Нифонту, грешный чернец Иосиф, нищий твой, господине, челом бью. Ведомо тебе, государю моему, нынешняя великая беда, постигшая русскую землю и все православное христианство: в великой убо церкви пречистой Богородица, сияющей якоже второе солнце посреди всей русской земли, и на престоле святом, идеже божественные святители и чудотворцы Петр и Алексей и иные многие великие православные святители посажены быша, на том же престоле ныне сидит скверный и злобесный волк, оболкийся в пастырскую одежду, иже чином святитель, а произволением Иуда предатель и причастник бесам, иже оскверни святительский великий престол, овех убо жидовству уча, иных же содомски скверня: змий пагубный, мерзости запустение на месте святом, отступник Христов, иже не точию сам отступи от Христа и диаволу прилепися, но иных учит отврещися Христа, первый отступник во святителях в нашей земле, антихристов предтеча, иже антихриста ждет, свинским житем живый, сын погибельный, иже Сына Божьего попра, и пречистую Богородицу похули, и всех святых уничижи, и икону Господа нашего Иисуса Христа и пречистой его Матери и всех святых болваны нарицая, и всяко нечестие и претыкание и соблазн на непорочную христианскую веру полагает, и евангельские предания и апостольские уставы и всех святых писания отмеща: «несть, деи, второго пришествия Христова, нет, деи, царствия небесного святым; умер, деи, ин умер, по та места и был»: – ни в древних еретиках и отступниках злодей таков не бывал! А сказывал ти и самому, государю моему, брат мой Васиан. И ныне, господине, о том стать накрепко не кому, опроче тебя, государя нашего; аще же ты потщишися за Христа и за пречистую Богородицу и за все православное христианство стать накрепко, тобой, господине, многие пользуются и о тебе укрепятся все: глава бо еси всем, и на тебе все зрим, и тобой очистит Господь всю церковь и все православное христианство от жидовской и пагубной и скверной ереси. Поистинне, государь, с первыми исповедниками и святителями, с Германом и с Никифором и с Мефодием, царствию небесному сподобишися от Господа нашего Иисуса Христа. Помни, богопочтенный владыко, колико лет жили есмя, милостью великого Бога и Спаса нашего Иисуса Христа и пречистой его Матери и молитвами всех святых, в мире и во устроении и во всяком благоденстве и чести. Аще убо во время мирное порадовахомся со Христом, но и во время гонения постражем с ним; аще во время благоденства Иисусу любили быхом, и во время ратно да не будем ему враги. Иисус распять бысть нас ради безгрешный, а мы за распятого нас ради не постражем ли до смерти? Что сего блаженнейши, еже за Христа пострадать и за пречистую Богородицу? Аще бо с ним умрем, то с ним и прославимся. Аще ли же ныне не умрем о правде и о благочестии, помале туне умрем. Ныне время купли, время труду, время мене, время течению и подвигам. Воспомяни, богопочтенный владыко, богоносные Отцы и Учителя, патриархи-исповедники, иже до крови о благочестии подвизавшихся. Зри и вижь, какова ныне слава их и благолепие: почиша бо в мире, и гробы их фимиамом мирисают, и мощи их цветут, яко благоуханный цвет ³⁰⁷⁸ , и царствует в них Господь, и душа их в руце Господни. И яко тогда беша многие исповедники и мученики, с радостью и веселием крови свои проливающе за Господа нашего Иисуса Христа и за непорочную веру христианскую, ныне же сие до конца оскуде: сего ради подобает о сем паче ныне даже до смерти подвизаться, в последние сие лета и во времена, лютейшие паче всех времен, о них же рече великий Апостол Павел: «в последняя дни настанут времена люта, приидет преже отступление и тогда явится сын погибельный». Се ныне уже прииде отступление: отступиша бо многие от православной и непорочной Христовой веры и жидовствуют втайне. Иже преже ниже слухом слышася в нашей земле ересь, отнелиже воссия православия солнце, ныне же и в домах, и на путях, и на торжищах иноки и мирские и все сонмятся, все о вере пытают, и не от Пророков, ни от Апостолов, ниже от святых Отцов, но от еретиков и отступников Христовых, и от проклятых на соборе, от протопоповых детей, и его зятя, и от их учеников, и с ними дружатся, и пьют и едят, и учатся от них жидовству, и от самого того сатанинского сосуда и дьяволова, митрополита, не выходят и спят у него. Поистинне, приде отступление: отступиша бо человеки от истины и от правды, отступиша братолюбия и нищелюбия, отступиша целомудрия и чистоты, и на сласти совратишася, зряще на скверного пастыря, всегда сквернящегося мирскими сквернами, еще же жидовству и отвержению учаща: се уже прииде отступление; сей есть антихристов предотеча и сын погибельный, явивыйся во свое время. Аще не искоренится той второй Иуда предатель, помале укрепится и во все человеки внидет отступление. Сего ради блажен необленивыйся, ниже расслаблен ныне, яко больше первых мучеников и славнейши имать быть, якоже рече священномученик блаженный Ипполит, папа римский: «блаженнейши же, иже и о искреннем подвизаяся». Сие убо просит, ищет от нас милостивый и щедролюбивый Господь, яко да нами и прочие человеки пользуются и вразумятся и о благочестивой христианской и непорочной вере подвигнутся даже до смерти.

Ныне же, богоутвержденный владыко, о сих тебе пишу, не яко уча и наказуя твое остроумие и богоданную премудрость (ни бо лепо есть нам забыть своей веры и таковая дерзать), но яко ученик учителю, яко раб государю воспоминаю тебе, и молю, яко да наказуешь и учишь все православное христианство, еже не приходили к сквернителю оному и отступнику, ни благословения от него не приимать, ни есть ни пить с ним. Аще ли же кто к нему начнет приходить, благословения ради, или есть с ним или пить, ведая его жидовство, той на страшном суде Христовом о том истязан будет и с ним осужен будет во огнь вечный, яко преступник и отметник апостольских преданий и от святых Отцов писания. Великий убо Апостол Иван Богослов глаголет: «аще кто не исповедует Иисуса Христа во плоти пришедша, сей есть льстец и антихрист, и не приемлите его в дом, и радоваться ему не глаголите: глаголяй ему радоваться, причащается делех его злых». И святой Апостол Павел глаголет: «еретика человека отвращайся, ведый, яко совратися таковой». И святой Иоанн Златоуст глаголет: «возлюбленные, многажды вам глаголах о безбожных еретиках, и ныне молю не совокупляться с ними в ядении и в питии, ни в дружбе ни в любви; творя бо сие , чужа себе творит Христовой церкви. Аще кто и бесплотных житие поживет, а не исповедует православия догматы, отвращаемся и бежим яко от змия». А иные, господине, говорять: «мы у него не слыхали ничего»; и только, господине, есть на него достоверны свидетели, ино то как и сами вы слышали. Занеже еще и в Моисееве законе писано: «аще кто отвержется Моисеева закона и начнет глаголать, яко не отверглся есмь, и аще будут на него достоверные свидетели два или три, тако без милосердия убиваем бывает». И свидетельствует божественный Апостол, глаголя: «отвержется кто закона Моисеева, без милости по двух или трех свидетелях умирает». Но колицей ³⁰⁷⁹ , мнится, сподобится горшей муке, иже Сына Божьего поправ? Зриши ли, яко ныне горшей муке сподобиться достоин есть, иже Сына Божьего поправ, паче оного, иже тогда Моисеева закона отвергшегося?

А иные, господине, говорят, что грех еретика осужать: ино, господине, не токмо их осужать велено, но и казнить и в заточение посылать, точию смерти предать епископом не повелено есть; а цари благочестивые и смерти предаша от жидов и от еретиков многих непокаявшихся. Православный царь Ираклий повеление изложи по всему своему царству: аще жидовин не крестится, да убиен будет. Також и амиритский царь Аврамей повеле убивать не хотевших креститься жидов. По тех же Устин и Tиверий, благочестивейшие цари, повелеша главу отсечь епарху Адду и Елеферию Самчию, поборникам ереси «нетленно мнимые». Феодора же царица и сын ее Михаил благочестивый Анния еретика, патриарха Константинограда, в заточение повеле послать, и тамо повелеша ему очи извертеть, потом же, умолением патриapxa Мефодия, не извертеша ему очи, но повелеша ему дать двести ран ременьем. Потом же вавилонский царь Моавия, во святом крещении наречен Иоан, егоже крести снятый Феодор, епископ эдесский, посла в Едес, повелением святого Феодора, и повеле Несториан и иных еретиков из града изгнать, и Манихеянам повеле языки изрезывать. И многа такова обрящешь в божественном писании, яже и сам веси, паче нас, богонаученной мудростью и многим разумом, по глаголющему словеси: «даждь премудрому вину, премудрее будет; сказай праведному, и приложит приимать, и еже разуметь закон, помысла есть блага. Сим бо образом, владыко, много поживешь лет и приложат ти ся лета животу», держащему уставы по апостольскому преданию, в честь и в славу и поклонение единосущной Троице, и в похвалу православный веры, со всеми повинующимися тебе христианами, ихже учиши и паствиши повелением и властью Святого Духа, словом и уставом ³⁰⁸⁰ Великого Apxиерея, Спаса нашего Иисуca Христа, емуже слава и держава в веки.

А что еси, господине, ко мне писал: «аще прокленет еретик христианина, то последует ли ему божественный суд? то еретическое проклятиe во проклятие ли, или ни во что?». Ино ты сам, господине, ведаешь, что многие еретики христиан прокляша, и не последоваше им божественный суд, но клятва их на них возвратися. Аще патриарх, или митрополит, или епископ еретик прокленет, не последует ему божественный суд. И много обрящем свидетельства о сем в божественном писании. Диоскор еретик, патриарх Царяграда ³⁰⁸¹ , со Евтихом собраша собор с единомудренными себе епископами, и прокляша блаженного Флавиана, патриapxa Царяграда, и не последова им божественный суд, но сами прокляты быша от Бога и от человеков, а блаженный Флавиан со всеми святыми причтен бысть. Потом же Копроним с патриархом своим и с единомудреными сeбe епископами прокляша великого Германа и всех поклоняющихся святым иконам, и сами прокляты быша, а блаженный Герман со Апостолами и патриархами и исповедниками причтен бысть. Виждь, яко не последует еретическому проклятию божественный суд, но все еретики, проклиная христиан, себя проклинают. Аще проклинаяй Авраама проклят, по божественному гласу, колми паче еретик и отметник Христов, проклинаяй христианина, сам проклят. И многие еретики прокляша христиан, и не последова им божественный суд, но сами прокляты быша. Господь нашь Иисус Христос глаголет к священным своим ученикам и Апостолам, рече: «приимите Дух Свят; имже отпустите грехи, отпустятся им, и имже держите, держатся им». И паки рече: «егоже аще свяжете на земли, и будет связан на небеси; егоже аще разрешите на земли, и будет разрешен на небесех». Зриши ли, яко Святым Духом и вязать и разрешить, и оставить грехи и держать? Кроме благодати Святого Духа ничтоже мощно кому сотворить от священных. Еретики же в себе нечистый дух имеяху сатанин: како могут на небесах и на земле вязать и решить? Beликий Иван Богослов глаголет: «аще кто не исповедует Иисуca Христа в плоти пришедша, сей есть льстец и антихрист». Богослов антихриста нарек есть еретика, то како имать последовать божественный суд антихристову суду? Потом глаголет: «не приемлите его в дом и радоваться не глаголите ему, и глаголяй ему радоваться, причащается дел его злых». Аще приемля еретика в дом и глаголя ему радоваться, причащается дел его злых, какову имать получить милость иже с еретиком приобщение имеяй и ядый с ним? Божественный Апостол Павел рече: «но аще и мы или ангел с небеси благовестит паче, еже благовестих вам, проклят да будет». И паки рече: «еретика человека отвращайся, ведый, яки совратися таковой». Великий Апостол Петр глаголет: «быша убо иногда лжепророки в людях, яко и в вас будут лжеучителя, иже внесут ереси и погибели, искупльшего их Владыки отметающеся. И многие последуют им нечистотами, сквернители и подручники, питающеся лестьми своими, очи имуще иснолнь любодеяния и непрестающего греха». Сия бо не явлено ли о нынешних еретиках рекл есть божественный Апостол Петр? И паки глаголет: «ихже суд искони не коснит и погибель их не воздремлет». И паки блаженный Апостол Иуда, брат Иакова, глаголет: «возлюбленные, молю подвизаться вам о преданный вере святым единой. Вопроша бо некие человеки, иже древле приписаны и в сей грех нечестия, Бога нашего благодать прелегающе в скверну, и единого Владыки и Бога нашего Иисуса Христа отметающеся». И паки: «елика убо не ведят, хулят; елика же по естеству, яко бессловесные животные, ведят, сими сквернятся. Якоже Содома и Гомора и окрестные сих грады, подобным сим образом соблудивша и вшедшая в след плоти иные, предлежат в показание огню вечному, суд подъемше: такоже убо и сии, сония видяще, плоть убо сквернят, господства же отметаются». Паки глаголет: «вы же овех убо милуйте рассуждающе, овех же страхом спасайте, от огня восхищающе, и обличайте с боязнью, ненавидящие яже от плоти оскверненную ризу». Подобает же и некие свидетельства сему еще приложить от божественных писаний . От жития святого Симеона, иже на дивной горе: «Великого Симеона, иже на дивной горе чудотворца, пресвитер некий, завистью побежден быв, проклят, и aбиe видев множество бесов, пришедших к нему, и связавше его опаки руками, яко не мощи ему оттоле и святого Евангелия прочитать». Вижь, яко аще недостойне прокленет или свяжет, себе прокленет или свяжет, яко пресвитер». Святого Дионисия Ареопагита :«яко аще святитель паче воля Божья отлучит, не последует ему божественный суд». Великого Василия : «аще кто творит кого без благословения быть безвременно, сам да будет без благословения». Иоанна Златоустам : «аще повеление развращенно имать святитель, аще и ангел будет, не покаряйся ему». Святого Афанасия александрийского: «шествующе еже не прелестный, живоносный путь, око убо да извержем не чувственное, но умное, сиречь, аще епископ или пресвитер, сущие очи церковные, неподобно живут и соблажняют людей, подобает изврещи их. Уне есть им без тех собираться в храм молитвенный, неже с ними воврещися, якоже с Анной и Каиафой, в геену огненную». Святого Анастасия синайского: «егда входите в дом, глаголите: мир дому сему. И аще будет ту сын ³⁰⁸² мира, мир ваш почиет на нем; аще ли же не будет достоин, мир ваш вам возвратится. ³⁰⁸³ Аще убо мир, паки ко онем возвращается, занеже не обрести достойна себе, множае паче неблагословение и клятва возвратится на главу неправедно ту посылающего, яко неповинну сущу оному приятию, к немуже послана бысть. Всяк убо всуе не благословляя и проклинаяй, себя не благословляет и проклинает. Глаголет убо Соломон: «якоже летающие птенцы, суетная клятва не вселится ни во единогоже». Попущающу убо Богу, якоже рехом, настают безумные на мудрые, и нечестивые на благочестивые, и неправедные на праведные, уничижевающе и обидяще». От святых правил: «иже убо ереси ради некие приобщения себе отлучиша епископства, таковые не точию правильному запрещению [не] подлежат, но и подобающая чести православным сподоблены будут. Не епископом бо, но лжеепископом и ложным учителем зазреша и церковное соединение не раздраша, но раздрания и разделения церковь ³⁰⁸⁴ потщашася избавить». ³⁰⁸⁵ Се убо божественные Апостолы и священные учителя, патриархи святые и семь святых вселенских соборов, в нихже бяше две тысячи святых Отцов, и многие беша святые поместные соборы, все еретиков проклятию предаша, и нам такоже повелеша проклинать их и отвращаться от них и бегать. Явственно показаша нам, яко аще прокленут нас, ничтоже нас вредит, но паче себя проклинают; то какову приимет милость от Бога пьяй и ядый с ними и глаголяй, яко последует еретическому проклятию божественный суд? В святых правилах писано: «аще еретик внидет в церковь, божественная служба да не поется, дóндеже изыдет». ³⁰⁸⁶ Аще в церковь входить еретикам не повелеша святые Отцы, то како божественный суд последует им, егда христиан проклинают? – От святых правил: «иже в небрежение полагающих священные и божественные правила святых Отцов наших, да будет проклят». ³⁰⁸⁷ Виждь, яко еретики суть хуляще святых Отцов правила, и те прокляты суть: и како имать Бог послушать еретиков? Явственно бо есть, яко егда нас проклинают еретики, тогда есмя от Бога благословены, якоже Господь наш Иисус Христос рече своим ученикам и Апостолам: «всяк убиваяй вы, мнится службу приносить Богу». Якоже бо тогда Иудеи и Эллины, убивающе святых Апостолов, мняху ся службу приносить Богу, сие ради службы осужены быша со дьяволом в огнь вечный, святые же Апостолы сподобишася небесному царствию со Христом Богом: тако и еретики, проклинающие христиан, осужены быша и осудятся с дьяволом к огнь вечный; христиане же их ради клятвы сподобятся небесному царствию от Христа Бога, якоже Господь наш Иисус Христос рече: «блажени есте, егда поносят вы и рекут всяк зол глагол, на вас лжуще, мене ради». И паки рече: «не приидох вложить мир, но рать и ножь; приидох бо разлучить человека на отца своего, и дщерь на матерь свою, и враги человеку домашние его». Се есть рать и ножь: егда отец, или мать, или сын, или дщи совратится от правый веры, подобает ненавидеть их, и отвращаться и бегать от них, яко не с ними погибнем.