II. Слова и поучения

Буди ревнитель право живущим и сих деяние пиши на твоем сердце. Мнися быти с малыми: не удобь бо, рече: богату внити в царство небесное (Мф. 19:23), тем и мало есть входящих вне. Не всех мни в монастыре спасающихся: мнози бо приходят к добродетельному житию, мало же их ярем его приемлют. Нудящихся бо есть царство небесное, и нужницы восхищают е (Мф. 11:12; 16:16). Нужду наречет Евангельское слово плотское повиновение, еже повинутися Христову учению, во отметание своих воль, и плотскаго повиновения, и покоя, на сохранение заповедей Господних.

Да есте ведуще, братие, яко всь день (в настоящий день) есть предпразньство Пресвятыя Владычицы нашея Богородицы, присно Девыя Мария (Девы Марии); да сберетеся на вечернюю молитву и на оутреннюю и литоургию. Т (этот) бо свят день начатък нашему спасению; в т бо день Господь Бог наш престоупившая заповедь Его и в глоубину зол въпадшая и льстем порабощьшаяся въсхоте снити за избавление наше и пакы бытиискую обновити, послав ангела своего благовестити праведному Акиму и Аньне рожество пречистыя Богородица по плоти Господа нашего Иисуса Христа. Да и мы, братие, чающе достойно сего дня, тщимся добрыми делы просветити светильникы своя: милостынею, верою, любовью; теми бо душа и тело просвещается: вера же без дел мертва есть. Тем же бо подобно есть к вере милостыни стяжати с любовью, – та бо на небо взносит и царствия двери отверзает; милоуяй бо нища в заем дает Богу. И пакы рече: милости хощу, а не жертвы. Не мимоидем пользы – ни алчна, ни нага, ни страньна не минем, но приимем яко самого Христа с любовью в дом свой; да ны приимет Христос Бог наш тех молением в вечное царство свое, еже уготова Бог любящим Его, Ему же слава во веки веков.

Приспе время, братие, спасению нашему. Се бо восия нам, во тме греховьней седящим, селением мысленаго солнца Христа. Днесь, братие, всему миру радость восия; днесь Адаму прадеду внука и госпожа родившися и узы адовныя ослабляет; днесь клятве Боужине потребление родися и мироу всемоу обновление; днесь ветхая лесть разорися, и новым людем новое въсия благовещение. Женским преступлением испали бяхом ис породы (из рая) и паки женьским рождеством (Богоматери) взвращаемъся в рай. Евга бо змиива свет (совет) прияла бе, а си (Богоматерь) змиева оубиицю породи Христа, иже не терпя зрети нас бестоудными делесы порабощъшася врагу, и преклонь небеса, яко щедр сниде на възискание наше благоволением родителя и осенением святаго Духа, якоже Лука евангелист послоушьствует: и тако вселися Бог, вышняго ипостасная премоудрость Сын Божии, иже со отцем единосоущен есть и с пресвятым Духом славим и бысть вкупе Бог и человек, да человека спасет. Не бе бо тако человеку спастися, аще не бы от самого Творца обновление приял, т (Господь) бо немощи наша прият и болезни понесе, и нищ быти нас ради изволи; страньн же и пороугань, да ны нищетою своею обогатит. Да егда видим, братие, нища ли, нага ли, алчьна ли, странна ли и отъидем не сотворше (им) никоего же добра: да весть, яко самого Христа презряще минухом и себе лишихом вечных благ. Не свое каждо имать кто ли дает, но Божие дает; да поне от своего ему дадим довольное; не просит бо от нас имения, ни иного тяжка, но пища и одежа, хотя малом избытком приобрести. Не мщайте же сами себе, возлюблении, гляголет бо пророк: от лица Божия глаголема мзда есть; да аз въздам, глаголет Господь. И паки Павел, убуждает ны глаголя (Еф. 7:18): не оупивайтеся вином, в нем же несть спасения; но паче наполняйтеся Духом святым, глаголюще в псалмех и песнех духовных; и паки въсязая от гнева глаголет: гневаитеся, а не согрешаите, солнце да не зайдет о гневе нашем, не дадете места гневу. Тем же, вься покоряюще под нозе, добротою препояшетеся, любовию и кротостию, чистотою и трезвением, милостынею: та бо покрывает множьство грехов.

Никтоже воистину ненавидит так греха, якоже святии; обаче же не ненавидят согрешающих, ни осуждают, ни отгоняют их, но и паче страждут с ними, и наказуют и утешают. Якоже уд болящь, егда врач целит, не неприлежно о болящем тщание и ревность показует, но вся творит, яко да исцелити его. Такоже и ловец, егда ввержет уду в реку и имет рыбу велику, и чюет яко смущается, и погружается не напрасно, ни нуждею влечет ю, да не урвется вервь, донележе ходит, аможе хощет: и егда разумеет, яко утомися, и преста от стремления, тогда начнет паки влещи ю помалу. Тако и святии долготерпением и любовию наказуют брата согрешающа, и не отскачют ни скаредуют, ни гнушаются; но покрывают, и заступают, яко да сего по времени исправят; ни иным же попускают обличите его, яко да и тии боле преспеют в любовь Христову. Что убо сотвори святый Аммон, егда приидошя к нему братия, глаголюще: игумене, иди и виждь в келлии оного брата, яко имать внутрь блудницу и сквернит место сие, и каково милосердие показа святая та душа? Разумев бо, яко хранит брат жену под спудом, пришед и седе верху, и повеле искати им по всей келлии, и яко не обретошя глагола им: Бог да простит вы. И сие рек, посрами я. И отпусти их, рек: не удобь веры емлите на ближняго своего. И сия сотворь, да оного уцеломудрит покрыв его согрешения. И ем за руку брата по изшествии всех и рече ему: пецыся о своей души, брате. И умилився брат, вниде в страх Божий, и сотвори покаяние о души своей. Тем же и мы, братие, стяжим милосердие и любовь к согрешающым, да соблюдемся от осуждения, яко да и нас Бог соблюдет от всего зла и лютаго греха.

Не имей дружбы с женою, да несгориши огнем ея. Не имей дружбы с малым детищем, да не впадеши в сеть с ним. Не имей дружбы со старейшим своим, токмо слушай словес его, а по делом его не твори. Не возлюби ити во град, не рцы, яко чисто ми есть око, сотвориши бо е неприязни. Не пий вина, да не сотворит ти сердца осквернена в сластех похотных. Не яжд дважди днем, да не утолстеет ти плоть, и укоренятся мысли. Не затвори дверей от страннаго, да не затворит Господь дверей своих от Тебе: внюже бо, рече, меру мерите, возмерится вам (Мф. 7:2; Мк. 4:24; Лк. 6:38). Посети болящаго, да Бог посетит тебе. Не много спи, но моли Бога на помощь си прилежно, да избегнеши яко птица от сети. Пребывай присно в храме Божии, глаголет бо: прославляющаго мя прославлю. Сие бо творя, сам спасешися и сущии с тобою. Пребывай же в покорении, и в молчании, и его-же аще просиши, будеши ты яко нищий духом. Не собирай требования, паче живи смирением. Труждайся своима рукама, да имаше подати требующим. Сице аще твориши, жив будеши о Бозе. Ему же слава, ныне и присно, и во веки веков.

Ничтоже возбраняет противу хотящему спастися, ни сумнение, ни леность, ниже ина кая от сих обдержат и, аще и в последний вид злых грехов впадет. Воистину глаголю, послуси (свидетели) бо сему суть мнози. Иже и о Давыде старейшине разбойников реку, каков бе: не первый ли человекоубийца, и не всякого ли зла исполнен, и како покаяся, и монашеский взя на ся образ, и бысть искусен, и от диавола мучимыя избавляше? Рече бо к нему ангел: Давыде, Давыде, отпусти Господь Бог грехи твоя, и не точию же прости его, но и чюдотворца показа. Хощеши ли и другаго видети: виждь Манассию, иже на пятьдесят и два лета преврати Израиля служити бездушным капищем; но и той в мало дний покаявся спасеся, и возда хвалу Богови, юже и до ныне поет Божия церковь. И паки божественный Давыд, по любодеянии убийстве, пророческий прия дар. Мария же египтяныня, по ненасытстве греховнем, в преподобство достиже и пророчества сподоблена бысть. И инии мнози падшиися грехми своими, покаянием восташа. Тем же никто же никогда не отчает себе; но потщимся покаянием достигнути спасения. Того ради, братие, бодреливейше будем, и благонадежно веруем, яко аще Бог и в пучину грехов падшыя безмерным человеколюбием помилова, и призывает и спасает, колми паче нас согрешающих ему спасет. И да никтоже рцы, слышав сия, аще тако содеявше и тако прияти бывшя Богом, то и всех нас помилует, не встягновенно от страсти живущих. Не помышляйте сих. Они бо по отпущении ангелски пожиша, а иже не встягновенно (невоздержно) пожившии зде, своими осудятся совестьми, и в будущий век осуждени и мучими будут без конца. Понеже восприяшя собираемая тлеющая сокровища, стонати убо и плакати подобает таковых; тем ничто же есть наслаждение света сего, противу муки согрешающих. Тем же, братие, подвигнемся на покаяние, приносяще отпущения грехов, и радуемся о друг друзе, спеющем к Богу, терпением и покорением, с соодолением плотских похотей, еже есть второе мучение, да теми свершени, наследницы будем вечныя жизни о Христе Иисусе Господе нашем.

Да есте ведуще, братие, яко сий день есть предпраздньство воздвижению честнаго креста Христова, на нем же пригвоздися Господь наш и прадедьнюю клятвоу потреби, еже светом (советом) дьяволим и вкоусом древним, им же испадохом ис породы (из рая). Того ради Владыка Господь наш, оумрщвяя страстное въкушение, на кресте пригвозди плоть, не вкоушьшю горькаго вкуса, да безстрастьем введет в животное древо, Его же желающе, подвигнемся, братие, очистивше си душа и телеса, приступите к животворящему кресту, поклонимся честными устнами целовати; то бо оцещает душа наша и тем недузи наша исцеляют, и того беси бегают, тем адовная дьржава скроушися и царствие отверзеся всем верою кланяющимся о Христе Иисусе Господе.

Днесь, братие, крест пречистый вздвижется, разрешая прегрешения наша и всяко лето обновляя въздвиженьем своим и обетъшавшая грехом сердца наша претваряя; тем бо Святым крестом искуплени быхом от козни вражыя; на том пригвозди Господь Бог наш роукописание греха нашего; на том бо оумьртви вся прегрешенья и соблажнения наша; того же даст нам Владыко Господь оружье на противьнаго врага; тем смерть оумьртвися и ад разруши; тем Адам оумьртвенный древле (паки) обновися и Евга от клятвы свободися. Древним вкоусом бе испал из рая древле и древьних (древом) паки крестом си вселися в рай; того бо видевши смерть встрепета (страхом) пусти яже бе пожерла древле от перваго Адама до Того, иже ся на нем пригвозди; то (он) бо есть наша победа, то бо есть ороужие наше на противнаго; тем знаменующеся, неоубоимъся видимаго же и невидимаго врага; то бо есть исцелитель страстям нашим; то бо есть насыщая верою сердца наша без труда, то бо есть хранитель всем крестьяном и кормитель знаменаемым (крестом) и тем все тело и брашно наше, и не приступит к нам зло; то бо напасти наша прогонит (и мира всего спасает). Тем же, братие, того святаго креста со страхом целоующе и кланяющеся ему, отвьрзем от себе всякоу злобоу, ярость и гнев, клеветоу, лихоимание и студодеяние, пьянство, (да) вся та дьяволоу повьргъше, възлюбим кротость, трезвение, нищелюбие, странноприятие, пощенье, чистоту; то есть аньгельское житие; тою бо вси правовернии спасаются; тоу чистоту и подобная дела възлюбим, да будем сынове Вышнему и причастьници царствию Его, славяще Святую Троицу, Отца и Сына.

Рече блаженный Иоанн Златоустый: седящу ти в почитании словес Божиих, прежде помолися Богу, да отверзет ти очи сердечнии. Да нетокмо чтеши написаная, но да и твориши, да не в грех себе святых жития и словеса чтеши. Егда же чтеши, прилежно, и всем сердцем, со многим прилежанием прочитай словеса, а не тщися токмо листы обращати. Аще ти есть требе, не ленися, но и двократы, и трикраты прочитай словеса, и многащи, да разумееши силу их. Егда же хощеши чести или послушати иного чтуща, то помолися Богу, сице глаголя: «Господи Иисусе Христе, отверзи ми очи сердечнии, услышати слово Твое, и уразумети е, и творити волю Твою; яко пришлец есмь аз на земли, не скрый от мене заповедей Твоих, но открый очи мои, да разумею чюдеса от закона Твоего. Скажи ми безвестная и тайная премудрости Твоея. На Тя уповаю, Боже мой, да Ты просветиши ум мой и смысл светом разума Твоего, не токмо чести написанная, но и творити я, да не в грех тебе святых жития и словеса почитаем, но во обновление, и просвещение, и в святыню, и в спасение души, и в наследие жизни вечныя, яко Ты еси просвещение лежащих во тьме, и от Тебе есть всякое даяние благо и всяк дар совершен».

Человек некто в Константине граде зело бе милостив. Яко и по улицам градским ходящу ему, и по нем хожаше множество нищих; он же, яко отгоняя их и огревая, но в руки их влагаше милостыню: се же творя, хотяще утаитися от человек. Некоему же другу его верну вопросившу его, како бысть милостив. И поведа ему глаголя: «егда, рече, мал бех, яко десяти лет, и внидох в церковь помолитися, и видев старца духовна учаща люди и глаголюща о милостыни: иже, рече, дает нищему, самому Христу в руце влагает. Аз же слышах, и не веровах учащему, помышляях бо глаголя: аз слышах Христа на небесе седяща, одесную Отца, да како на земли обретается, яко же глаголет, да взимает, яже нищым дают. И сия мысля идох в дом мой, и видев нища в рубех идуща, и над главою его стояше обличие Господа нашего Иисуса Христа. И яко нищий той идяше путем своим, некто милостив срете и (его) и даде ему хлеб. Да яко простре руку даяй хлеб, и се образ Спасов простре руце свои к руце дающаго, и прият от руки его хлеб, и даде противу тому благословение. И то видев аз, веру ях, яко даяй нищему, поистине Христу дает. Аз же и ныне вижю той же образ над главою нищих стоящ, да того ради обдержим бываю страхом, и творю милостыню по силе, колико могу.

Возбешение гневное человеком сице есть: елико боли перечится, толико паче увет требует. Якоже и огнь егда мног бывает, тогда паче раскаляется, но не прекладай огневи дров, да скоро угаснет: не имать бо силы о себе гнев, аще не иного иже разгневливает. Тако бо и корабленицы творят: егда бури воставши в море, тогда не помнят ктому рухла (рухлядь) что изметавше; бури же утишившися, поминают яже изметаша и много си жалят. Такожде и гневаяйся имать. Буря бо есть ему люта, егда ум его смущен есть, и вне себе пребывает, и нечюет, что творит, аще и злая словеса износит. И егда утыхнет ему гнев, тогда помышляет, яже есть износил злая словеса, и разумеет тщету велику, и срам, и погибель. Яко же бо кто в нощи крадет портищя златы, или ины драгия (драгоценности) и прочая, и обличивше и, извесут я пред чадь (челядь), то не того укоряют, его же суть, но иже я крал; тако же и кидаяй злая словеса другу своему, не оного укоряет, но паче себе. Якоже бо и сырище не здраво, блюет яд смердящу; тако и уста гневливаго кидают словеса злая. Мнози же убо отвернь (опаки) творят (возражают, вступают в спор с гневающимся) на гнев и вражду скори суще, а на смирение лениви суть. Но он есть, речеши, начальник вине той, да оному лепо есть покоритися. Тем же ты варив (предупредив) покорися ему, да тебе от Бога мзда будет; якоже бо не ты начало зла того сотвори, тако ныне и добра сотвори. Сице бо и врачеве ходят к болящым, а не болящии ко врачем, – не могут бо, зане болезнию одержими. Тако же и ты сотвори к брату одержиму болезнию гневною, исцели ему язву греховную покорением. Послушай Господа рекша: аще тя кто ударит в ланиту, обрати ему и другую (Мф. 5:39).

Крестьянин всякый пребывает (пребываяй) кроме (христианин в стороне от) неверных, без делания грехов, друг Божии, а враг дьяволь, причастник Христовых Таин, отметаяся сотонских дел, чисто, и преподобно, и боголюбно (живя), часто молящеся Господеви, глаголя: Отче наш, еже (sic) еси на небесех. Да недостоин (не) Бога Отца собе нарицая (я), укорен будет от Него, но яко пьрьвнец сын славя отца и акы раб господина своего бояся. Глаголет бо Господь: аще Аз отец вам есмь, то где ми от вас слава и честь, аще ли господин, то где страх мой в вас? Тем же, братие, пребудем в повелении Божии, чтим (Его) акы Отца, боимся акы господина, поминаем грехы своя, их же безпрестани плачемся (я), да очистим своя (я) душа, и тако к Христови придем. Богу нашему слава (Тип. № 155 л. 2 об.).

Видиши ли, кий грех есть тягчайши сего, еже судити ближнему: что убо того тягчайши есть? Тако бо того Бог ненавидит и отвращается, якоже кто ненавидит сущаго врага своего: не должни ли есмы трепетати и боятися? Что бо ключися (случилось) оному старцу, слышавшу о некоем брате, впадшем в блуд, и рекшу: «он зло сотвори». Невесте ли, коль страшно глаголет о нем в Старчестве. Яко принесе ангел душю согрешившаго брата и глагола ему: «виждь, его же осудил еси, успе, и где велиши убо да вложю: в царство ли, или в муку». И паки рече ангел к старцу: «понеже ты еси судия праведных и грешных, рцы, что велиши о смиренней сей души, помилуеши ли ю, или мукам предаси ю». И тако святому оному старцу дивящуся, и ужасающуся о таковем ангелском речении. И пребысть прочее время живота своего со стенанием и со слезами, и со тмами трудов своих моляся Богу, еже помиловану быти о гресе том. И падшу ему на лице своем на ногу святаго ангела, и прият прощение. И паки рекшу к нему ангелу: «се показа тебе Бог, что есть тяжчае, еже судити брата своего, и николиже не паки сотвориши вещи сея се уже прощен еси». И от сего убо времени, никогда же утешися душа старча, от таковаго плача, дóндеже умре. Что убо мы хощем прияти, осуждающе ближняго? Но комуждо бо, братие, подобает нам себе внимати о своих гресех. Богови же едину есть оправдати, или осуждати, ведущему составление коегождо и силу, якоже той сам един весть. Инако бо судит епископу, и инако князю, и болярину, инакоже судит игумену, инако ученику, инако старцу, и инако здраву. И кто возможет тыя судбы уведати его, токмо он един, сотворивый всяческая и сведый вся.

Не можем убо, братие, ленитися о своем спасении, ни презрим времене, даннаго нам на покаяние, егоже паки получити не возможем. Вельми бедно (погибель) ныне зде не кающымся. Темже покаемся от грех своих, дóндеже не постигнет нас смерть. Оттуду бо не можем паки возвратитеся, понеже несть оттамо возвращения; но пойдем в землю мрачную тмы, идеже несть света, ни жития грешником. Тем ныне подвигнемся, братие, да Бога милостива сотворим себе, и делы добрыми угодим ему, постом, и молитвою, милостынею, и смирением, чистотою, и братолюбием, и покаянием, не оплетающеся века сего суетами. Отвержемся мирския злобы, не оплетемся паки плотскими страстьми, объядением, и пианством, и похотми блудными, тлящими и душю и тело: мало бо наше время зде. Того ради попецемся душами нашими, и поищем своего спасения, потрудимся к Богу грех ради наших, а не еже днесь кающеся и смиряющеся, утре же горшая творяще. И якоже кто умываяся от мертвеца и паки прикасаяся ему, что успеет во умывании своем? такоже и каяйся грехов своих и паки тожде творя, что успеет в покаянии своем, возвращаяся от правды на грех? Како ли молитва его услышана будет пред Богом? но Господь уготовает нань гнев свой, яко же бо многа милость Его, тако многа и прещения Его, и комуждо по делом его судит, и кождо по делом своим обрящет. Блажен человек, могий сотворити грех, и не сотворит. Горе же сердцу на двое мыслящу, и грешнику в два пути ходящу. Господь бо вселяет единомысленныя в дом свой.

Человек некто добра рода насади виноград и оплотом огради. И отходя в дом отца своего, рече: «Кого сотворю стража моему притяжанию, аще бо оставлю зде от предстатель моих, то изгубят труд мой. Но сице сотворю, посажю у врат слепца с хромцем: да аще от враг моих кто восхощет окрасти виноград мой, слепец убо чюет, а хромец видит. Аще ли от сею кий восхощет, хромец убо не имать ногу дойти тамо; слепец же, аще пойдет, то в пропастех убиется». И посадив я у врат и отиде. И на долзе седящема има, рече слепец к хромцу: «что убо благоухание сие повевает извну врат?» Отвеща хромец: «многая благая господина наю внутрь суть, их же неизреченно вкушение. Но понеже премудрил есть господин наю, посади тебе слепаго, мене же хромаго, и не можема тех никакоже доити и насытитися». Отвеща слепец хромцу, глаголя: «почто прежде неси ми возвестил сего, да быхома не жадала: аще бо аз слеп есмь, но нозе имам и силен есть носити тя; возми кош и всяди на мою плещу, и аз несу тя, ты же ми путь поведай, и вся благая господина наю объемлема. И егда приидет господин наю, укрыется от него наю дело. Аще бо мене вопросит, аз реку: ты веси, Господи, яко слеп есмь; аще ли тебе вопросит, и ты рцы: аз хром есмь. И тако премудруема наю господина». Въсед же хромец на слепца, и дошедша, окрадоста овощь господина своего. По времени же, прииде господин винограда того, и видев его окрадена, повеле привести слепца. И глагола: «не добра ли тя стража моему сотворих винограду, то почто еси окрал его?» Отвеща слепец: «господине, ты веси, яко аз есмь слеп, да аще бых и хотел, то не вижю доити. Но покрал есть хромец, а не аз». Тогда повеле господин блюсти слепца, дóндеже призовет хромца. Призвану же хромцу, и начаста сама обличатися между себе. Хромец убо глаголаше слепцу: «аще не бы ты носил мене, никакоже мог бых доити, понеже хром есмь». Слепец же глаголаше: «аще не бы ты мне путь сказал, како бых дошел тамо аз?» Тогда господин сед на судищи, начат има судити. И рече има: «якоже еста крала, тако да всядет хромец на слепца». Въседшу же хромцу на слепца, повеле бити я немилостивно. Толкование. Разумейте же сея притчи силу. Человек есть добра рода – Христос сын Божий. А виноград – земля и мир сей. Оплот же – закон и заповеди. Слуги же сущыя с ним – ангели менит (разумеет). Хромца же – тело человече, а слепца – душю его. А яже посади у врат: человеку убо предана во область вся земная. Преступившу же ему заповеди Божия, и того ради смертию осуждену бывшу. Егда же приводится душа его к Богу и оправдается глаголюще: яко не аз, Господи, преступих заповеди твоя, но тело. И того ради несть мучения душам до втораго пришествия, но блюдомы суть идеже – Бог весть. Егда же приидет обновити землю и воскресити умершыя, по Павлу, глаголющу: тогда еси сущии во гробех услышат глас Сына Божия, и оживут, и изыдут сотворшии благая, в воскресение живота (Ин. 5:28). Тогда бо паки душы в телеса внидут, и приимут воздаяния противу делом, и отслются грешницы во тму кромешную, идеже будет плачь и скрежет зубов, а праведницы в жизнь вечную. Богу нашему слава, ныне и присно, и во веки веков.

Исповедайте своя грехи, исповеданием бо струпи душевнии исцеляются: и вред плотный, объявляем врачю, исцелевается, а таимый велику страсть творит и потом смерть. Тако же и греси таимии тело и душю уморяют, и радость творят диаволю. Велико добро исповедание грехов, а таение радость сатане; убо он прелщаяся, глаголет: днесь угодие си сотворю, таже утре покаюся. Не весть бо, дойдет ли утренняго дне, или несть; но точию хощет в глубину болшю свестися зол, даже напрасно смерть похвативши, погубит и. Аще ли книжник есть кто, то мысль ему влагает диавол рекий: «сам себе, ты твоя мысли веси, и еже писание глаголет, якоже отцы святии суть заповедали, тако сотвориши сам». Не послушай мысли тоя, и не медли исповедати грехи твоя, да прощен будеши в сий век и в будущий.

Страшное и чудное видение честною (честную) старцю (святителю) Андрея и Епифания, како видеста на въздусе святую Богородицю, пришедшюю в Влахернскую святую церковь, со ангелы (архангелы) и с предтечею и с богословцем Иоанном и с инеми многыми святыми. Народу стоящю в церкви видеста молящуся с слезами к Сыну си (Своему) за всеь мир. И глагола Андрей к Епифанови: видеши ли Царицу и Госпожу всех за весь мир молящюся? – Он же рече: вижу, отче. И, покрывшимся (покрывшися) честным (святым своим) омофором, светящимся паче електора (иликтра, илектор – янтаря) люди сущая в церкви. Се оубо егда слыша, помышлях, како страшное и милосердьное (се) видение, паче же надеянье и заступление наше бысть без праздника. Надея же ся (аз), Владычице, на милосердная Твоя словеса, еже к Сыну, в молитве рече: «Царю Небесный, приими всякаго человека, славящаго Тя и призывающаго имя Твое и всяко место (на всяком месте), идеже бывает память имени Моего, освяти место (оно) и прослави прославляюща Тя, именем Моим, приемля их всяку молитву и обет». Тем словесем надеяся въсхотех, да не без праздника останет святый покров Твой, Благая (Блаженная), но яко же Ты хощеши оукрасити честный (свой) праздъник покрова Твоего, всемилостивая, оукраси, да и прославляющии Тя возвеселятся, видящи многоименне (многоименныя) Твоя праздъники сияюща, и яко же тамо сущая народы (в церкви) милостивно покры, тако же и нас грешных раб Твоих покрый кровом крилу (милости) Твоею, низлагающи съветы же и думы помышляющих на ны злая, спаси ны по милости Сына Твоего и Твоей и во с (в сии) век и в будущии и вся притекающая к Твоему крову со страхом и верою надеющася на Тя, скорое наше заступление и помощи. Оуставижеся таковый праздник праздьновати месяца октября в 1 день на память святаго (апостола) Анание, во славу Отца и Сына и св. Духа.

Всем потребно есть, еже нудитися воздержати утробу, паче же хотящым Богу работати. Добро ясти в меру, лагодно (по желанию). Еже ли не воздержася ясти, подобно есть кораблю обременену; тело бо пищи требует, а не сладости доволи и не презсытства. Ово бо души и телу подобно на здравие и крепость, ово же (пресыщение) обое вреждает: не точию здравие тлящи, но и недуги пакостны раждающи. Указано бо малоядение подвижнику, яко воздержаяй чрево, удаляет греховныя мысли, побеждаемый же брашны, похоти растит злыя. Якоже многа дрова велик огнь раждают, тако и множество брашен мысли злыя растят. Сладко брашно токмо гортань веселить, кормит же черви неусыпающыя. Якоже опустевши земля, терние раждает, тако и ум велеядовитаго (много ядущаго) растит злыя мысли. Человек ласкосердив (сластолюбивый) часто памяти святых творит, да чреву угодит, а воздержаяйся житию святых подобится. Обядивый (объедающийся) ничим же хвалится, но токмо брашном многим; но дух живый в ласкосердем человеце скорбит и, не терпя смердения, отходит от него. Якоже бо дым прогонит пчелы, тако и обядивый благодать святаго Духа. Лучше бо есть отврещи сладкая брашна, и простую пищу, и требование сотворити телесное: да не уподобимся в пустыни чреву работавшым людем. Седоша бо людие ясти и пити, и восташя играти; тогда заповеди Божия забышя, и на идолобесия уклонишася. Добре убо и наследником их пишет Павел: Их же Бог чрево, и слава в студе их, мыслящих земная (Флп. 3:19). И паки: Брашна чреву, и чрево брашном: Бог же и сие и сия, да упразднит (1Кор. 6:13). И паки: Аще брашна ради скорбит брат твой, уже не по любви ходиши. И наводит: Таковии Богу не работают, но своему чреву и добрословием прелщают сердца незлобивых. (Рим. 14:15) И паки: мудрость плотская, вражда Богу есть, мудрость же духовная, жизнь и мир. Добро есть благодатию утверждати сердца, а не брашны (Рим. 8:7). И паки: несть царствие Божие пища и питие, но правда, и мир, и радость о Дусе святем, а не обядение и пиянство (Рим. 14:17). Якоже и Иаков понося чреву рабам глаголет: Веселистеся на земли, и насладистеся, и упитесте сердца ваша, яко овча в день заколения (Иак. 5:5). Господь же неверным иудеом рече: Аминь глаголю вам: ищете мене не яко видеста знамение, но яко ясте хлебы и насытистися. (Мк. 7:2). И прирече: Не делайте брашна гиблющаго, но пребывающее в жизнь вечную, иже Сын человечь даст вам (Ин. 6:27). Ему же слава, честь, и держава.

Пиянство паче объядения горши есть, и зело отречено святыми книгами, ибо не подобно есть сим отягчатися, якоже безумнии хвалятся, но помале нищетою болят. Добро убо мало испивати немощи ради телесныя. Якоже земля во время напаяема, чисто всеянное вню (в неё) семя с прибытком возрастит, многими же тучами умочаема, точию былие и волчец растит; тако и многое питие творит человека безумным в поругание, а мудрым во оплакаяние. Рече бо Божие писание: «Ной бе муж праведен, и упився лежаше наг, от безумнаго же Хама поруган бысть, а от мудрою сыну покровен бысть» (Быт. 9:21–22). Бежим убо братие пиянственнаго беса, да не поругани им будем: но паче трезвимся и утвердимся, да будет цел внутренний человек. Яко же приточник учит ны глаголя: «Не буди винопийца: всяк бо пияница обнищает» (Прит. 23:20). И паки: «Кому люте, кому молва, и свары, и суды, и пря, и искушение вотще; кому сини очи, не пребывающым ли в корчме, и назирающым где пирове бывают» (Прич. 23:28–30). И прирече: «В вине не мужайся: многи бо погуби пиянство» (Сир. 31:29). И паки: «Не ползует безумному пища и питие, неистово бо и досадително пиянство, и всяк примешаяйся ему, не будет мудр». Исаиа же, укаряя в пиянстве сущих, глаголаше: «Горе квас гонящым, и ждущым вечера, вино бо я сожжет» (Ис. 5:11). Иоиль же рече: «прелщены есте, истрезвитеся упивающиися, и плачитися рыдающе пагубы вашего пиянства». Воистинну убо неверных и некрещеных есть человек веселие пиянственое. Якоже рече Иов моля на некия: «да заблудят яко пияни» (Иов. 12:25), а хотящии чисто пожити, сего да лишатся (от сего откажутся), и по правому пути безблазнене да пойдут. Слышите же Апостола глаголюща: «Не упивайтеся вином, в нем же несть спасения» (1Кор. 11:12). И паки: «Пияницы царствия Божия не наследят» (1Кор. 6:10). И прирече: «Сего ради не будите безумни, но разумейте что есть воля Божия» (Еф. 5:17). Вси бо студовиднии вреди от пиянства бывают. Якоже Давид рече: «нощь просвещение в пищи моей» (Пс. 138:11). Пищю нощь нарицаше, мрак же и тму – винопитие. Упивающиися бо, нощию упиваются, по Апостолу. И иже о Лотову дщерию написаное, волею премину. Господь же наш Иисус Христос, всем заповеда глаголя: «Блюдитеся, да не отягчают сердца ваша объядением и пиянством, и печальми житейскими».

Четыре суть добродетели прилежащия к спасению человеческому: пост, и еже молитися часто Господеви, и ручное дело, и чистота телесная: сим четырем противится диавол. И первое бо пищею в раи запят (погубил) Адама. Второе же, не молящася Господеви виде его, и посрами его, и скрытися сотвори, и не приити пред Бога: да не поклоншуся, рече Адаму, пред Богом, прощение своего греха приимет. И якоже изгнан бысть Адам празден (без дела), и тою празднию хотяше его диавол во ин грех въринути и во отчаяние его хотя въвести. Но человеколюбец Бог, проведый злодейство диаволе, даде дело Адаму, глаголя: делай землю, от нея же взят был еси. Паки Адам, пекийся делом, отверже диаволе злохитроство: диавол же в том побежден бысть. И паки на чистоту телесную помысли: сотвори украситися дщерем каиновым и вверже вня сыны Сифовы в блуд, и оскверни телесную чистоту. Тем и глаголет писание: «Внидошя сынове Божии ко дщерем человеческим». Егда бо человек хранит тело чисто, яве яко Сын Божий есть: не осквернив бо руку Божию творения. Тем же потщитеся на ручное дело, да не праздны обрет ны диавол прелстит. Аще ли кто сия сохранит четыре: Пост, Молитву, Рукоделие, Чистоту телесную, – яве яко сын есть света и наследник царствия небеснаго, о Христе Иисусе Господе нашем, Ему же слава, ныне и присно и во веки веков.

Мздоимец, и резоимец, и сребролюбец, и грабитель, едина колесница есть четверична, имущи гордостнаго возатая сатану, иже Богом свержен быстъ: собирает же вся последующия ему в свою погибель. Неподобно есть убо добре смыслящым, от вражебника водимом быти, да не с ним в яму вечнаго огня ввалятся, но к лучшему, по Апостолу, в жизнь направитися, глаголющему: «Имуще же пищю и одеяние, сими доволни будем, а хотящии богатети, впадут в напасть, и в сети неприязнены» (1Тим. 6:8–9), не храняще заповедей Апостолских, паче же Бога, глаголюща самого: «Не стяжите ни злата ни сребра, ни пецытеся что ясти, или что пити, и во что облещися» (Мф. 6:31, 34, 10 и др.); сбирающаго бо богатство низлагает Бог и своима ногама спирает. Добре же и приточник сварит (осуждает) мздоимцев глаголя: Любяй сребро, не насытится сребра, и не отимай от убога, нищ бо есть и умеет ходити прямо жизни» (Еккл. 5:9; Притч. 22:22). Глаголет бо Апостол; «лучше есть даяти, нежели взимати» (Деян. 20:35). Закон же рече: «Не оправди нечестиваго мзды ради, ни возми мзды: мзда бо ослепляет очи видящих». И Самуил бо держа заповедь законную к людем глаголаше: «Еда от руки вашея взях избаву (избавление): се послух (свидетель) Господь, не прииде мзда в руце мои». Пророк же Аммос, скорбя о судиях, глаголаше: «мзду избранную от нищих приясте». Исаиа же укоряя град глаголет: «Князи твои любят мзду, гоняще воздания. Горе оправдающым нечестиваго мзды ради, и праведное без правды от праведника взимающым» (Ис. 5:23). И паки: «губитель сам своей души мздоимец, а не любяй мзды, имать жив быти». И паки: «Приемляй мзду в недра без правды, не исправится пред Богом, лучше бо имя добро, неже богатство много». Давыд же, моляшеся Богу, глаголя: «Не погуби с нечестивыми душю мою, их же десница исполнися мзды» (Пс. 29:5). Видиши ли беззаконники, и мужи крове нарицает убийцы и мздоимцы. Тому же подобно рече Господь: «Безумне, в сию нощь душю твою истяжут от Тебе, а яже уготовал еси кому будет?» (Лк. 12:20). Безумныя нарицает надеющыяся на богатство погибающее. И паки Давыд: «Приклони сердце мое во свидения твоя, а не в лихоимство» (Пс. 118:36). Иов же показуя свою чистоту: «Егда рука моя прикоснуся мзде» (Иов. 31:7). И Господь заповедает, глаголя: «Блюдите и хранитеся от всякаго лихоимства, яко не от избытка кому живот его есть; но яко же писано есть: праведник верою жив будет».

Потщитеся, молю вы, братие (и сестры), к вечней жизни светлей, юже нам Господь по своей милости туне дает, а сея временныя жизни и скверныя, аки змия ядовита устен, бежим и не прикасаемся ей. Зане Господу Богу уготовавшу нам на небесех житие, и самому вне (в него) позвавшему ны, а не телу своему лагодяще (угождающе) брашны сладкими и питием, и сном, и похотми, и обычаем греховным, в слабости телесней и лености живуще, отречемся царства небеснаго и позвавшаго ны вне. Он убо уготова брак сыну своему, реку же (сиречь), царство небесное, и посла рабы своя звати, реку же, Пророки, и Апостолы, и мученики, а мы отрицаемся глаголюще: жену поях и не могу ити. И паки: волы купих, и иду искусити их. И еще же: село купих, и иду соглядати его. И иными жития сего делы отрицаемся вечныя жизни. Не слышим ли Господа глаголюща: Не пецытеся о утренним, что вы ясти, и что пити, или во что облещися: воззрите на птицы небесныи, како не сеют, ни жнут, ни в житницы собирают, и цветы селнии како растут, не труждаются, и не пекутся ни о чем же. Сия помышляюще, братие, воспрянем яко от сна, я пойдем несквернени по узкому пути, ведущему ны в царство небесное. Вдадим телеса своя на труды, на пост, на молитву, на воздержание, на чистое покаяние: царство бо небесное нужно есть, и нужницы восхищают е (Мф. 11:12). Да почто не сжалим си (не пожалеем себя), яко своею леностию и слабостию лишаемся вечныя жизни; но да понудимся в кратцем сем веце, а не угождаем тленному телу. Аще бысте ведали небесное житие, то аще бы нам зде во огни горети и до смерти, а онамо (только там) с Господем царствовати в славе его во веки. Но аз не реку горети, не буди то, но потрудимся и иссушим телеса своя. Рече бо Господь: Аще зерно пшенично пад на землю не умрет, то едино пребудет; аще ли умрет, то мног плод сотворит (Ин. 12:24). Яве рече: аще не умертвим похотей телесных, то не можем плодов небесных сотворити. Не любяй бо, рече, души своея в веце сем, во оной жизни вечней обрящет ю (Мф. 16:25). Да сие слышавше, подвигнемся. Аще ли речете немощни есмы: но ты токмо по своей силе начаток подвига сотвори, якоже можеши, и видя Бог подвиг твой, даст ти помощь и на прочая добрая дела. Тем же не отлагаем подвига: еда бо велик живот наш (разве продолжительна жизнь наша), не лет ли пятьдесят, или шестьдесят, или семьдесят, наиболе сто: и то много ли нам есть потрудитися; и зде вмале потрудимся, а онамо во веки царствовати имамы на небесех. И паки зде в мале поживше славно, кормящеся, и поюще, телесныя похоти творяще без воздержания, то онамо будет во веки мучитися. Тем же попецемся, Христос ны сам зовет, а не человек, Царь царем и Господь всех. Да к Нему ум вперим и зде поживем богомудренно постом, молитвою, трудом, и терпением, плачюще грехов своих, и присно имеюще Его пред очима, и день судный. И не ослабим себе, якоже наченше, тако и скончаем. Рече бо Господь: в чем тя застану, в том тя и сужду. Вонмем, любимицы, в сердца нашя слово сие, да не ослабеем к смерти: не вемы бо когда приидет смертный час и похитит коегождо нас, душю имуща неготову сущу, и осудит ю во огнь вечный. Аще ли обрящет ны смерть в покаянии, то всех скорбных избывше, общая улучим благая, о Христе Иисусе Господе нашем, Ему же слава со Отцем, и Святым Духом, ныне и присно, и во веки веков, аминь.

Чюдный Иоанн Санаитский поведаше, глаголя: яко седящу ми, рече, на край пустыни, прииде ко мне брат некто посещения ради от монастыря. И вопрошах его: «что могут отцы?» И рече ми: «добре молитвами нашими». Вопрошах убо его о едином брате, злу славу имущем. Рече ми той: «веру ими ми, отче, не пременися от слуха того». Се слышав аз, рех: «ох», и рекшу ми «ох», взяхся во ужасе сна (впал в ужасный сон), и видех себе пред святым кранием (лобное место, Голгофа) стояща, и Господа нашего Иисуса Христа стояща между двема разбойникома, и устремихся убо на поклонение. И егда приближшумися, и яко се виде, обратися к предстоящым ангелом и глагола им: «изрините его вон, яко антихрист ми есть, прежде моего суда той осуди брата своего». Изгониму убо ми, яко приидох изыти из дверий, удержася мантия моя, и утвердися, и оставих ю тамо. И абие убуждься, глаголах к пришедшему брату, и рех ему: «зол день сий мне». И рече ми: «чесо ради, отче?» Тогда сказах ему явлшаяся мне и рех: «мантиа – покров Божий оста, и лишен есмь помощи Божия». И от дне того, яже по Господню слову, седмь лет сотворих блудя (блуждая) по пустыням, ни хлеба вкушая, ни под кров ходя, ни человеку беседуя, дóндеже видех Господа моего возвративша дати мантию мою. Мы же, сия чуднаго Иоанна слышавше, рехом: «аще праведник едва спасется, нечестивый же и грешный где явится?» Тем же подобает нам о своих пещися гресех и никому же согрешающих судити. Писано бо есть: Аще покрыем братня прегрешения, то Бог нашя покрыет.

Лют есть клеветивый вред, паче бо диаволу есть подобен, по реченному о нем во псалме: Смирит клеветника (Пс. 71:4). Врази бо суть Богу мерзцы клеветницы и сообщнии (причастницы) продавшим истину и распеншым Господа нашего Иисуса Христа. Аз бо есмь, рече, истина и живот (Ин. 14:6). Велит же и закон глаголя: Не буди послух на всю неправду и согрешение, пред уст бо, рече, двою, или триех послух (свидетелей) всяк глагол верен (Втор. 19:15). Саул же, преступив заповедь сию, триста Господних иерей уби, послушеством единаго клеветника Доика сирина. Приточник же глаголаше: Оклеветаяй убогаго, раздражает сотворшаго и (Притч. 14:31). И паки: слава мужу отвращатися клеветы; всяк же безумный тем обязается. (Притч. 20:3). Давид же молится гонзнути (убегати) от клеветы: Избави мя от клеветы человечи, глаголя, и покрый мя от сонма лукавнующих, иже изостришя яко оружие языки своя (Пс. 118:134; 64:3). И ин: Оклеветаяй убогаго, многа собирает зла. И паки: нечестивый муж хвалится оклеветаяй друга. И паки: Лев алчай, и волк жаждай, обою есть горши клеветник зане проливаяй кровь языком. И прирече: Величается клеветник, изрывая яму языком ближнему, последи же сам впадает вню. Екклисиаст же: Обратился аз, и видех вся клеветы бывающыя под солнцем: и се слезы оклеветаемых, и несть утешающаго их. (Еккл. 4:1). И паки: Оклеветание мудраго возмущает, и благодариваго погубляет. (Еккл. 7:8). Давид же: спасет сыны убогих, и смирит клеветника. (Пс. 71:4). Утвердимся убо, братие, сами от всея злыя клеветы, боящеся горкия муки деющым таковая. И с Павлом рцем: Оклеветаеми, благословим, гоними, терпим, хулими, молимся, якоже отреби быхом всем в попрание (1Кор. 4:12), да не будем осуждени со враги Христовы иудеи, иже пришедше к Пилату, на Господа глаголаху оклеветанием: «сего обретохом развращающа язык наш и возбраняюща даяти дани Кесарю, и себе глаголюща помазана царя». Той же, яко агня незлобивое, терпяще.

Совершена есть любы еже не раздвоити человека, рекущи: ового знаю, ового же не знаю; или: сий мя хвалят, а сей кленет. Но на свое естество присно взирая, вся человеки равно люби: други убо и враги, добрыя же и злыя, да совершен пред Богом явишися, и от враг убо со благодарением наносимая тя злая претерпи. Отнюдь не помысли от тех сие творимо, но от диавола за согрешения нашя. Тем и Господь наш Иисус Христос, свою любовь к нам показуя, за все человечество пострада. И всем равно надежду воскресения дарова, внеже кождо себе достойна сотворит, или чести, или муце. Ибо Христовы рабы вся любят искренно, и сами же не любими суть всеми. Мира же его друзи никого же от сердца любят; а духовнии до скончания сложенную любовь хранят. Да потщитеся всякаго человека от души своея любити, се бо есть заповедь Господня. Да аще не можете сохранити ея, поне никого возненавидите, да от Христа Бога благодать восприимете.

Внемлите от лживых пророк, приходят бо к вам во одежди овчей, внутрь же суть волцы хищницы (Мф. 7:15). Лжепророки же зде не еретики поведает, якоже мню; но житие имущя растленно, лицем же добродетели обложени. Тем и рече, глаголя: от плод их познайте я. (Мф. 7:16). От еретик бо многажды житие обрести есть, от сих же, их же глаголах, никакоже. Что убо рече, аще и сих осуждаете, не пременятся скорее: таково есть пути сего естество, им же изволиша ходити. Труден (одержимый болезнию), и зол, и лицемерен, иже трудитися не брегий, но являтися токмо: тем и обличается скорее. Тем убо и Павел являя, глаголаше: Яко благими словесы прелщают сердца незлобивых (Рим. 18:16). И виждь кротость, не рече бо мучете их, но не приимете пакости от них, и да не сохранени к ним впадете. И да не речете: яко немощно познати таковых. И паки притчею человеческою сице глаголя: еда берут от терния вино, или от волчца смокви. Тако всяко древо благо творит плод добр, а гнило древо плод зол творит. Не может древо добра плода зла творити, ни древо избутело (сгнившее) плода добра может сотворити. А еже глаголет, сие есть: ничтоже имут кротка, ни сладка, до кожи токмо овчи: тем и удобен разум о них. Понеже убо мнози благих от злых мнят, всякаго убо лишая их ответа, сия рече: ни бо имаши рещи, яко прельсти мя, ни домыслихся: ибо известно ти предах, еже от дел уведение о Христе Иисусе Господе нашем, Ему же слава, ныне и присно и во веки веков.

Велми добро есть нудитися человеку, да удержит страсть гневную, и да сокрушит ярость душевную долготерпением и кротостию, молитвами и смирением; зело бо реет (побуждает) бес на гнев хотящаго спастися. Да яже соберет труды постом и молитвою, бдением, или службами, то во един час изгубит, бесу гневом многолетный плод отъемшу от него, и уже обрящется человек без вина пиян. Многа убо требует человек учения, да изженет страсть гневную. Хотяй к совершению приити, и желая подвиги душевными подвизатися, от всего прихода гневнаго чюжд да будет; дух бо гневный в нашем сердце седяй, очи разумнеи темными мятежи ослепляет. Да уже ни разсуждения полезных стяжати можем, ни духовнаго разума обрести, ни совета блага удержати. Не подобает бо нам с гневом на единоверныя наступати, но точию на своя грехи и на злыя мысли, яже тщатся совратити ны со истиннаго пути. Того бо ради и приточник глаголет: отъими разгневание от себе, и помяни, яко ты всегда прогневаеши сотворившаго тя. И паки: гнев погубляет праведники; слово же жестоко воздвизает гнев. И гнев отцу, сын безумен: слуга же мудр, укротит гнев мужа. И паки: Тяжел камень, и не удобь носим песок; гнев же безумнаго тяжчайши обоих (Притч. 15:1; 17:25; 27:3). И прирече: утоли гнев, бесу бо есть отец. Да не подобает нам, братие, лютаго беса в сердце держати, ведущаго ны в погибель. Якоже бо вода движется от нужди ветреныя, такожде и гневливый смущается от мысли гневныя. Человек гневливый, вепрь дикий: видев друг друга, и зубы поскрежета. Иаков же учит ны глаголя: Да будет всяк человек скор на послушание, медлен же в гневе; гнев бо мужу правду Божию не содевает (Иак. 1:9). Павел же: Не себе отмщающе, возлюбленнии, но дадите место гневу (Рим. 12:19). И паки: Всяка горесть, гнев и хула, да отимется от вас со всякою злобою. (Еф. 4:31). Тоже и Давид: Престани от гнева, и остави ярость. Строитель же душ наших Господь вещает глаголя: Яко всяк гневаяйся на брата своего безума, повинен есть суду. Иже бо речет брату своему юроде, повинен есть родству (геене) огненному (Мф. 5:22), его же избыти молимся Милостивому Владыце Христу Богу нашему, Ему же слава со Отцем, и со Святым Духом, ныне и присно, и во веки веков.

Вси убо ведят, яко начаток всему добру молитва есть, и спасение и жизни вечныя исходатаи. Потреба ми есть елико могу глаголати о ней, да обыкшыя в молитвах жити, и прилежащыя в делех Божиих присно, быстрейша сих слово сие творит; жившии же слабо в молитве, и душю пусту оставившии, да уведят от мимошедшаго времени тщету, и да не лишат себе спасения на прочее время. Абие же се велико хощу о молитве глаголати (великое дело молитва), яко всяк моляйся, с Богом беседует. Каколи же есть (что же значит это) человеку сущу, с Богом беседовати? Вси ведят, но не можем чести тоя (беседа человека с Богом в молитве) изглаголати. Та бо честь и великолепие ангельское превосходит, юже паче они сведят. Якоже един славен пророк о них вещает: страхом, моля, их же Богови приносят, покрывающе лица своя и ноги, со многим говением (благоговением), и прикровением (Ис. 6:2); и еже не могут премолчати многаго ради страха. Прочее же все естество, и житие, и премудрость, и разум, и все еже аще кто речет; молитва же общее дело есть ангелом и человеком, и несть ничтоже разно посреде обою естеству в молитве. Тайне совокупляет к ним (соединяется с ними), и скоро в жизнь их преступаеши, и в честь, и в благородие, и в разум житием своим, на всяком месте и часе. Потщимся к Богу молитвами. Что бо будет светлее беседующих с Богом и молящихся? Что же праведнее? Что же премудрее? Что же подобает рещи о беседующих с Богом и молящихся ему?.. Тому честь и держава во веки.

Блаженный Иоанн милостивый о памяти смертней, и о исходе души присно глаголаше, яко бе ему откровено от святаго Симеона столпника: «Исходящи бо, рече, души из телеса и хотящи взыти на небеса, усретают ю лицы бесов, и пытают первое лжи и клеветы. Да аще от того не покаялася будет, то удержана будет от бесов. И паки выше усретают беси душю, и пытают блуда и величания. Аще и сих покаялася будет, то избавится от них. И многа запинания (препятствия) и истязания души от бесов идущи до небесе. Посем ярости, зависти, оболгания, гнева, оклеветания, гордости, срамословия, непокорства, лихвы, сребролюбия, пиянства, злопомнения, чародеяния, потворов, объядения, братоненавидения, убийства, татьбы, немилосердия, блуда, прелюбодейства. И егда же окаянная та душа от земли до небесе идет, кроме ея (в стороне от неё) святии ангели суть, и не помогают ей; но сама душа о себе слово отдаст покаянием и добрыми делы, и боле всего милостынею. Его же бо греха забвением зде не покается, то милостынею избавится от насилия бесовских мытарств. Да сие ведуще, братие, убоимся горкаго того часа, егда срящит ны суровии они, и немилостивии мытари, к ним же не доумети начнем что рещи. Тем ныне покаемся от всего зла, и по силе нашей сотворим милостыню, могущую ны проводити от земли на небо и от бесовскаго удержания. Многа убо есть их ненависть на нас, и велик убо нам страх, и велика беда воздуха того. Ибо от града во ин град на земли требуем проводящаго ны, да не заблудивше в злая впадем, или в реки не проходны, или в разбойники не измолимы; колико паче настольников божественных руководителей требуем, идуще на долгий он вечный путь, еже есть смертный день, от тела души исход, его же не можем никуде же минути?

О богатии слепии, убогии правдою, изобильнии грехи, яже от убогих собрашя во своя храмы тмы вечныя! О убозии и грешнии, како земными мучители томими, Бога не взыскаете! Аще бы было погибнути нам казнию их не угодивши им, то не бы ли лучше единому Богу работати? Вемы, яко не напрасно, иже весть немощь рода человеческаго, иже требует ничтоже ни от кого же; но сам всем даруя доброе все, и освящает и исполняет от начала и до конца, и прочее, тамо и еще во веки вся милуя, и храня, и просвещая своим светом божественным. Вы же убо, о человецы, самовластни своим безумием, Божия страха забывши, сами себе страшите, и обидити, гоните, мучите, блазните. Верни суще, не по вере живете; ведуще, не весте; слышаще, не слышите; видяще, не видите. Яко же рече древле Бог усты пророка Исаии (Ис. 6:10): Утолсте бо сердце людей сих, и ушима тяжко слышашя, и очи свои сомжишя (смеживши, зажмуривши). Поистине, тацы суть человецы мира сего; тем же мерзка есть жизни сия и тяжка, Божия же служба и работа легка и сладка. Тем же понудимся к ней вси немощнии, оставяше вся мирская греховная, лжю, обиду, блуд, татьбу, ненависть, и котору (смуту), свар (брань), и тяжю, нечистоту, и скверну, злобу, и лихоимание, от ней же биются богатии мира сего, и секутся, и воюются, друг другу хотяще одолети: и дом его хотяще разграбити, и власть его прияти, и честь, и славу, и землю его взяти, и сами велицы быти на земли в человецех, честни же, и хвални, и горди. Сия мысль вражия есть, да иже тако хотяще быти, не обрящют милости Сына Божия Христа. Ему же слава со Отцем, и с Пресвятым и Благим и Животворящим Духом, ныне и присно, и во веки веков.

Хощу вам воспомянути, братие, о лживых мало: вижю бо вы не зело тщащяся храните языки, и от тех удобь много привлачимы есмы. Требе убо есть многа возпряновения (бдительность и бодрственность), да не окрадени будем от лживых. Никто же убо лжий причастник Богу бывает, и чюжд есть Богу лжий. Пишется бо: Всяка лжа от лукавствия есть. И паки: Яко ложь есть, и отец лжи: сего отца глаголет лжива диавола, истина же есть Бог (Ин. 8:44). Той бо глаголет: Аз есмь путь, и истина, и живот. Зрите убо, откуду разлучаемся, и к кому прилепляемся лжами: яве есть, яко к лукавому. Аще убо хотели быхом воистину спастися, должни бышя были всею силою и всяким тщанием любите истину и хранитися от всякия лжи, да не отлучит нас от истины и живота. Суть же троя различия лжи. Есть бо лжа от помышления, и есть словом лживый, есть же иже и на свое житие лжет. Иже от помышления лживый, есть приимаяй мнения: аще видит некоего глаголюща с братом своим, помышляет и глаголет, яко мене ради глаголет. И аще уставита беседу, паки помышляет, яко мене ради остависта ю: и все от помышления лжет. Помышляет о том, оклеветание, битися, осуждати, рать творити. Не может бо древо лукаво плода добра творити. Аще ли хощеши воистину сам исправитися, положи покаяние, и не смущайся. Паки Богу нашему слава, ныне и присно, и во веки веков.

Подобает епископу непорочну быти, и единыя мужу жены, чисту, не пиянчиву, кротку, незлобиву, и не златолюбиву, свой дом добре строящу. Аще бо своего дому не умеет строити, то како Церковию Божиею попечется? Да аще епископом тако речена суть, колми паче тебе. Аще бо ти суть дние работни, от земных властель, яко же ты глаголеши, и оставляют тя от молитвы Божия, или нищета, или строения кая человеческа: не тужи тем, но паче прави порученое ти добре, чая от Бога за порученное тебе мзду прияти, противу труду твоему. Еще же имаши и в нощи часы, елико и в день, раздели я по силе, ово на покой телу отлучи, ово же Богу на службу. Не в месте бо Бог описуется, но яко же рече божественный Давид: На всяком месте владычествия Его благослови душе моя Господа (Пс. 102:22). И аще киим возненавиден будеши, и того ради си не стужи (не печалься). Богу нашему слава, ныне и присно, и во веки веков.

Братие и отцы, торжество деют (производят торг) продающе и купующе, сходящися по вся дни человецы; но мал год той есть, паки бо разрушается. А еже о души торжество единаке (единственно) стоит, и не разрушается; но коегождо житием притяжано, его же купля ни злато, ни сребро, ни ризы, но спасение души, и жизнь вечная в безконечном царствии, о нем же всяко тщание и печаль ныне приимем. Да не погрешим, братие, искушением, ни добрыя тоя купли лишимся; но послушаем Господа глаголюща: Царство небесное близ вас есть (Лк. 17:21). Тощно (усердно) по вся дни купим его, ни злата, ни сребра предлагающе, но веру праву, и житие очищено: послушание, и терпение с смиреномудрием, и любовь, еже есть союз совершения. Се бо паки Господь проповедует во Евангелии, рекий: Подобно есть царство небесное купцу, ищущему добраго бисера, иже обрете един многоценен бисер, шед прода все имение свое, и купи бисер (Мф. 13:45–46). Се убо есте и вы, добрии торжницы, оставлше всяческая, и добрый честный бисер купим Христа. Се бо есть еже взяти крест свой и возследовати ему преподобием и правдою. Но понеже торжество настоит, бдению есть время и подвигу велику. Тем же, братие, и мы добрейше будем и готови, в семь торжищи купующе спасение наше. Добр есть купец, иже вся беседы на молчании продает, ни кому же огорчася. Добр есть купец, иже безчестием своим честь измени. Добр есть купец, иже плоть свою и кровь продает, а дух вземлет терпением, и послушанием братии. Но понеже о послушании слово, побеседуем о тех, иже по вся дни братии ядь сотворяют, и труждаются велми, дружня тяготы не поминающе, и тако закон любовный совершают. Вонмем тем, иже на потребу братню труждаются, яко добрии и искуснии делателие о Господе. И паки вонмем поющым разумно, и хвалящым Бога, с подвигом великим, иже сугубу мзду прияти сподоблени суть. Да разумеем, како есть житие наше; како ли блаженную ону куплю прикупишя святии отцы во мнозе терпении, да и мы убо добре прикупим, и совершени бывше, преидем отсюду, по глаголемым от Давида: Обратися, душе моя, в покой твой, яко Господь добро тебе уготова. Буди же и нам таковый глас изрещи во время смерти и получити жизнь вечную.

Милостыня ремественица есть мудра, и приставница делающем ю, и содружебница Божия есть, и присно близ его предстоит, о нем же хощет, удобь приносит благодати, аще не обидима есть нами. Обидима же есть, егда от восхищения (хищения) творим ю. Егда же чиста есть, много имать дерзновение: и связанным та решит узы, разрушает тму, угашает огнь, умерщвляет червь, изгонит зубом скрежет, и со многою радостию отверзает небесная врата. Царица бо есть, воистину, подобны творящи человеки Богу: будите убо, рече, щедри, яко Отец ваш небесный щедр есть. Крилата есть и легка, и криле имущи злате, летание имущи преукрашающее ангелы, яко веща пророк: Криле голубине посребрене, и междорамия ея в блещании злата. Яко паче голубь злат и жив летающь, векома взирающь оком кротким, и ничто же ока того краше. Добра есть и пава, но к сей ничтоже есть. Птица есть красна и чюдна, выспрь всего зрит. Девица есть криле имущи злате, бело имуще лице и тихо, крилата есть и легка, у престола предстоящи царска. Внегда судими будем, внезапу предстанет и явится, и измет нас от мучения, своима крилома одевающи. Таковыя убо жертвы хощет Бог от нас. Ему же слава, ныне и присно, и во веки веков.

Милостынею и верою очищаются греси; милостыню же меню (разумею) не еже от насилия: то бо есть не милостыня, но суровство и безчеловечие. Кая польза совлещи со иного, а иного облещи? Аще бо и все имение иному дамы, никий же прибыток нам. И укажу о Закхеи, иже тогда, рече, молбы творя к Богу, отдам обидимым четверицею. Мы же тмами насилующе и отъемлюще, мним умолити Бога, но не наипаче ли разгневаем его? Рцы убо ми: аще коня мертва и изгнила от распутия вовлек на олтари бы положил, не вси ли бышя тя изгнали, яко сквернена и неистова? Что убо аще обличю, яко аще от грабления, не коню умершу положену; но паче и злейше? И ты убо, когда глаголы своя сподобляеши Богу, забытие зла сотворити, обычаи же злыми грабя, устраяеши жертву свою на жертвенице. Ныне же не сие токмо едино есть согрешение, но и того лютее, яко святых оскверняеши душы. Трапеза бо сия камень, или древо есть, и освящается; оны же самого носят Христа: и дерзаеши тамо посылати таковыя нечистоты. Не от того, рече, посылаю, – но от иного имения чиста: смех сия и кощуны. Ны веси ли яко аще во многое множество имения впадет неправедное, все осквернит. Яко же бо источник чист гной вметаяй кто, всего нечиста сотворит; тако и лихоимство, в богатство вшедшее, все просмрадит злою вонею. Се бо глаголано, иже не миловати лучше есть; понеже и Каину лучше бы не принести отнюд: да иже хуждьшее принес, Бога разгневи, а иже чужая дав, како не разгневает? Но мое есть, рече (скажешь): несть твое грябленое, но иного, он господин того имения, аще и тмами держиши я. Аз ти рех, рече Господь: не граби, и ты тем мя чтиши. И убо не речет ли к тебе: вознепщевал еси беззаконие, яко буду тебе подобен, обличю тя, и представлю пред лицем твоим грехи твоя. Да устранямся убо неправедных и сотворим праведная о Христе Иисусе, Господе нашем, Ему же слава, ныне и присно, и во веки веков.

Кийждо, возлюбленнии, внидем в свою совесть, и помыслим прегрешения, и суд на ня возлагаем, да не когда со вселенною причтени будем. Страшно бо судище то, грозно и место, и истязания и страха полно есть: огнена река течет. Воспомянем глаголемое во Евангелии: ангел текущих, затворяема чертога, свещы угасающыя, сих влекущих в пещь огненую. И то помысли, аще котораго нас вещь тайна на среду изведена будет днесь, пред всем народом, колико бы ся молил да бы погибнул, или земля разселася с ним. И егда будут свидетели злии о тайне той, что бо тогда приимем, егда при всей вселенней в среду принесутся, при таковом великом том позорищи, и знаемых и незнаемых нами, всем зрящым? Ох мне (горе мне), откуду вы исповем нужду ону страшную, – от человеческаго ли сумнения, или паче же подобает от страха Божия? Кацы будем тогда, рцы ми, егда связани, зубы скрегчюще, в кромешнюю тму отгоними будем? Аще сия убо тако будущая, отпадение царства, болезнь, и яже от геенны присныя узы, тма внешняя, червь ядовитый, скрежет зубов, туга, огнены реки, пещи неугасимыя; и все собрав, и противу поставив, и собранное имение искорени, недуг бо той: да истое богатство взем и лютыя сея нищеты избудеши вечнаго суда, и будущих причастишися. Или аще бо потщимся и молимся прилежно, то простит нас Бог; аще ли не просим от него, ни сотворим тако ничтоже, то како быти нам прощеным? или како исправити вещь жития спящу? ни сего бо света вещи есть обрести николи же, нежели паче духовныя спящему. От друга бо ничтоже никогда же взяти спящу, то како от Бога? Ни отцы сыном чести творят сонливым, множае паче Бог. Ни господие рабом терпят ленивым, како убо Бог? Того ради мало поскорбим ныне, да вовеки веселися. Обаче скорбным есть быти, аще не зде, но онамо ждет нас скорбь. Почто бо не хощем зде скорбни быти, да тамо почием присно? Постонем убо мало, молю ны, и сетуем ныне, да не тогда восплачемся о злобе: сей плачь добродетели есть, оный же без ползи. Зде мало время веселу быти, а онамо без конца скорбь. Поскорбим, возлюбленнии дóндеже есть время: велми же попецемся, да не речем, яко богатый он (тот – Евангельской притчи богач). Аще кто ныне отпустил, той попекся о спасении своем: да тем подвигнемся ныне. Богу нашему слава, ныне и присно, и во веки веков.

Ведомо буди, иже милостыню творит кто от праведнаго имения, и богоугодно живет, и всякую добродетель исправляет, сей велий во царствии небеснем. Страстей же и бед и всякия напасти не хотяй терпети, мал есть пред Богом. А иже паки реку в вере и добродетели живя (живет), страсти, и беды, и всякия напасти приемлет с радостию, не превратимо, ни отскача, той есть болий пред Богом, и в человецех есть целомудр, и во ангелех есть славим. А иже зде согрешающе, и бед не приемлюще ни кацех (никаких) же, болшему мучению сподобятся. А иже зде, аще и согрешиша, и с покаянием беды приемлюще терпят добре, хваляще Бога, и за торящыя беды моляще, тии со святыми равно приимут жребий. Аще ли кому не верно слово сие, помысли беды Иововы, и страсти Апостольския, паче же всех Павловы. Егда бо Иов милостыню творяше и богоугодно живяше, тогда мал бяше пред Богом, а пред человеки славен. А егда беды прия, тогда бысть велик пред Богом, и славен во всех святых бысть. Тако же и Апостоли, егда чюдеса творяху и ину добродетель, не славни бяху. А егда многи беды и страсти подъяшя, тогда быша прославлени велми. И Павел бо всех боле беды подъя, боле всех и венец прия. Той бо всех избраннее есть: да о том избраннем вси избраннии спасение улучат (обретут – 2Тим. 2:10), и друзии улучишя. Яко же бо злато огнем искушаемо, тако же и святии страстми. А грешнии во лготе (свободны от этого), противу изволению их Бог им попусти, занеже не изволиша вечныя пищи, но жизни сей временней привязавшеся. Да тем имемся сея (воздержимся от увлечений её), и обилно подаст нам Бог; оная же не имут прияти, сию жизнь гонящии и любящие ю.

Нищелюбие и страннолюбие, две ветве есте масти масличныя, еюже плод умащает вся. От нею же помазует си Господь главу и нозе и воздает помазующему царство небезное. Истый бо нищелюбец слушает глаголющаго: милостыня и вера не оставляет тебе, привяжи же я своей выи, и обрящеши благодать, и промышляй добрая пред Господем и человеки. И путие праведных точно свету сияют, предъидут и просвещают, дóндеже исправит день. Заповедах же и закон глаголя: Отверзая отверзи руце твои убогому, да не возопиет на тя к Богу. Приточник же: Живота нищаго не лиши, и души алчны не оскорби, и не мимо иди даяния требующаго. Брата скорбящаго не отрей, ни отвращай лица твоего от нищаго (Сир. 4 гл.). И паки: души своей благо творит муж милостивый, губит же свое тело немилостивый (Притч. 11:16–17). И пророк Иосиа: Сейте, глаголя, в правду, и милость и суд храните, и приближайтеся к Богу своему присно (Ос. 10:12; 12:6). Даниил Навуходоносору рече: Совет мой да будет ти годе царю, грехи твоя милостынями очисти, и неправды твоя щедротами нищих (Дан. 4:23–24). Давид же: Расточи, даде убогим, правда его пребывает в век века. Любит милостыню и суд Господь. Блажен разумеваяй на нища и убога, яко в день лют избавит его Господь (Пс. 3:9; 32:5; 40:2). Иов же рече: Еда оставих кого из дверий моих изыти недром тщим (Иов 31:34)? И ин: Приклони ухо твое к нищему, иже бо дает нищему, не оскудеет (Сир. 4:8). И паки: Елико имать рука твоя творити, и елико же сила ти есть, твори. Души бо своей благо творит муж милостив, и благословение Господне на главе дающих (Еккл. 9:10). Избавление души мужу, свое его богатство (Притч. 13:8). Милостынями и верою очищаются греси. (Притч. 15:27). И милуяй нища, в заим дает Богови, по даянию же его воздастся ему (Притч. 19:17). Добро убо есть от своего труда, яже Господь подает, всем лишаемым подаяти пространно, ничто же сумняся, кому дам, кому ли ни дам. Всем бо Бог даяти велит от своих трудов, а не разсмотряти, кому даст, кому ли не даст. Служба бо сия препроста свершится, славна бо есть от Бога, но тако просто служити Богови, и жив будет. Велий бо человек, и драг, муж милостив. Апостол же: Сеяй щадя, щадя и пожнет, и сеяй о благословении, о благословении и пожнет (2Кор. 9:6). И наводит: Македониа бо и Ахаиа благоволиша общение некое к нищым сотворити святым, иже во Иерусалиме (Рим. 15:26). Господь же: Продадите имения вашя, и дадите милостыню, и сотворите себе влагалищя не ветшающя, и сокровищя не оскудеема на небесех. Идежо сокровищя вашя, тамо будут и сердца вашя (Лк. 12:33–34; Мф. 6:21).

Аще наук имееши о гресех, наложи на ся страх Божий, и муки вечныя, и одолееши всяко. Яко несть труд оставити гнев опечалившему тя. Кая болезнь (труд, страдание) молитися дающему Богу, и просити тмами благих со усердием? Кая болезнь, еже зла не рещи никому же? Кая спона (препятствие) отврещи ревность и зависть? Кий труд есть, еже любити ближнего своего? Кая страсть не вещати срамных словес, ни клеветати, не досаждати никому же? Кая спона миловати нищыя? Аще ли алчеши, покажи самеми делы; аще видиши убогаго, милуй; аще имаши врага, смирися. Аще видиши друга о добре спеюща, не завиди; аще видиши жену доброличну, премини ю. Да не уста алчют токмо, но и око, и слух, и нозе, и руце, и все удове тела твоего. И сия сотворив, спасешися, о Христе Иисусе Господе нашем, Ему же слава; ныне и присно, и во веки веков.

Паки же ты, о пресвитере, пастуше Христовых овец, и предстателю страшней Его трапезе, за вся сущия в храме сем и совокуплении верных вознося молитвы к Богу, хранися от пиянства: оскверняет бо молитвы твоя. И не смешай словес твоих с простыми людьми, ведый яко Богу собеседник еси. Тело твое чисто соблюди, ведый яко ходатай еси к Богу о братии твоей. Кротко ступание имей ногама твоима, понеже на месте святем стоиши. Храни руце твои от всякия нечистоты, яко тема подъемлеши Тело Христово. Смирение приими, и ни во чтоже полагай себе, да взывающу ти к Богу, призрит на тя: на смиренныя бо презирает Господь. Чист имей язык от осуждения всякого человека, понеже тем славиши Бога со Ангели. Уклоняйся часто народнаго мятежа, да не мятежен ти быв ум, чисту молитву к Богови воспустит. Милостив буди на убогия, милосердый бо милость обрящет от Бога. Приступаяй к святей трапесе, изуй, яко Моусей, обязания печалей мирских и нечистых помысл от сердца твоего: место бо, на нем же стоиши, свято есть. Поминай во святых молитвах братию твою, и до последняго их. Не пестри молитвы, ни гласа разно в пении: то бо отгонит смирение. Почитай с прилежанием жития и учения снятых отец – братии твоей, не премудрено, но разумно, не учительски, но смиряя себе; все же повелением старейшины твоего, а не о себе, да не дерзостным оружием падеши. Не насыщай утроби твоея зело, да не парою (пар, испарение) телесною и дыханием проженеши Святаго Духа, сходяшаго на Дары. Стоящу ти у святыя трапезы, не часто назад озирайся, но токмо возводи очи к Единому Живущему на небеси. Мир и поклонение сотвори и до последняго, о всех благословение и молитву испрошь, и пред олтарем став, без осуждения воздежи руце. О сем же и паки ти глаголю, о служителю Христов! хранися от пития: серафим бо еси плотяный и не лепо ти есть прилежати питию, к сему же (нелепо ти есть прилежати) еще и любоимению, гордости, осуждению, славохотию, и гневу, и блудным помышлением. Сия бо вся кроме (вне) суть ангелскаго воинства, их же чин восприим, служеши Телу Христову, паче же с ними смешаяся: ныне бо, рече, Силы небесныя с нами невидимо служат. Тем же, пресвитере, буди смыслен, разумей что еси, или о чем служеши; и разумев, работай Господеви со страхом и любовию, и всякия нравы пустошныя отверже. Да Ангелскую службу прием и ту со страхом и любовию и говением держав, будеши на небеси ликовствуя со ангелы в безконечныя веки, о Христе Иисусе Господе нашем, Ему же слава, ныне и присно, и то веки веков.

Поставил ли тя царь в кий либо сан, или судию людем своим, или строителя граду своему, или пред лицем его стояше, и мнози ти поклоняются или идут к тебе малии и велицыи, славнии и неславнии, приносяще ти честь и дары и к ногама ти припадают: то благо, от Бога ти дарованно. Но блюди еда будет с грехом взято что: егда кто соперника своего хотя препрети, варяет (заранее располагает в свою пользу) тя мздою, и будеши осуждая неправедне человека, во образ Божий суща, его же ради Христос кровь свою пролия; довлеет ти, и дому твоему урок (определенный, законный доход) твой, реченный ти яве, а не отай. Но приемля аки мутное питие, разумей недуга душевнаго, и блюдися разумом о души паче. Страхом же Божиим, аки цедилом (сосуд с сеткою на дне) очищая, да не имется (не коснется) скверна жизни сея неправеднаго имения души твоей, и недуг родит неизбыточен. Но яко же предрекох, процежай выну, и достаточно омывай в мимотекущей воде, рекше, в мимоходящих врата твоя по улицам нищих, просящих хлеба и воды, одежды и покоя, и омовения; поими, и введ посади, накорми, напой, согрей. Ты по силе твоей сотвориши, а Бог готовится ти воздати сторицею, яко же сам обеща, и не лжет. Ты всей, а он возрастит. И аще зде мало воздаст ти, но оного разум похвали. Напасть ли найдет на тя искушения, наводящему руце воздежи. Лепо бо есть случающыяся напасти с молитвою и крепостию терпети и благодарити Бога о сих. И не дивися, аще зде не приимеши скоро воздаяния, противу добра деяния. Но егда прейдеши от мира сего скоротаимаго (скоротечнаго) в вечный и светлый град, вышний Иерусалим, тогда приимеши идеже написано есть ныне. Бога ли веси, или книги чтеши, не глаголи: «горе мне, богат есмь, житейскими печалми связан есмь, не довем, что сотворю!» Держи богатство, еже ти Бог дал, не храни его невидимо. Аще ли ти есть возможно, и без печали желаеши быти, раздай нищым, и буди инок. Аще ли не можеши сего сотворити, то и в мире сих держася, не лишен будеши милости Божия. И рцы к Богу: «по милости твоей спаси мя!» Се же есть (тоже самое и) о помиловании убогих. Не рцы бо: «имение мое есть»; но глаголи: «поручено ми есть на мало дний», и да аки ключарь порученое раздавай, яко же велит поручивый ти. Тем же еже ти дал Вышний, то Вышняго повеления твори в нем, и не оставляй последнему роду своему – на дети своя, и жену свою, и все племя свое: поручи Богови, доброму блюстителю, Его же милость велика, и богатство не сведомо. Имение бо света сего реце подобно есть, отсюде отъидет вниз, и паки сверху приходит. Тем же вышнии граждане реки тоя сосуд своих не наполняют ли, или скота своего не напояют ли, рекуще: «яко нижным гражданом оставим?» ни убо, но до избытка черпают, а нижними не пекутся; та же бо река минует я. Тако же и о имении, не пецыся последними сынми, и внуки, и правнуки: тем бо инако время ключается или напасть, или татба, или рать, или царев гнев, изгублено, не останет им помогая. Тем же в животе твоем о твоей души размышляй и тою крепко пецыся: яко едина ти есть душа, и едино время живота, едина смерть. Тем же поболи собою и поскорби, и зде очищения грехов проси, и на исходе провождения от бесов. И тамо пришедшу, како бы уготованное прияти царство Божие от века, и палаты Его светлыя учиненыя, аще зде купить я будеши. Аще бы мира сего богатством купити едину от менших хизин (хижин) вышняго Иерусалима, но ни всего мира богатство собрано не достойно есть цены тоя. Милостынею же купится царство небесное. Милостыня же не в велицем и мнозем, ни малем даянии лежит; но по силе дающаго, и всем сердцем. Даяние бо требующым убогим – то есть милостыня блаженная, ея же бышя полни сосуди онех пяти дев мудрых, им же царство отверзеся. Ту же милостыню и ты приими не отпустно и навяжи ю на выи твоей, да будет всегда с тобою. Глаголют книги: милостыня мужу, аки печать с ним. Тем же аще ту приимеши то ни один от супротивных востанет на тя, видяще яко печать Царя Небеснаго носиши и к тому идеши. Ему же слава, ныне и присно, и во веки веков.

Мнози от безумных человек изрядну хулу к чернцем творят: егда бо видят кого от чернец лихотворяща, Господский закон сказуют, сами же тмами согрешающе, насилующе и грабящи. И аще видят брашна до сыти наядшася, горцы клеветницы бывают, сами же пияни по вся дни суще: не ведуще яко своими грехи болий себе собирают огнь и всего лишаются ответа. Тем же запрещает Господь, рекий: что убо видиши сучец мал во очеси брата твоего, а в твоем очеси клады (бревна) не видиши. Тем же убо добро есть своим грехом зазирати, а не инех осуждати, и тако у Бога милость получити.

От всего сердца обращайся, стенанием, и плачем сердечным, терпением смиряйся, и милуй нищыя и убогия, и ближнему отпущай прегрешения. Ныне бо, глаголет Господь наш, обратитеся ко мне от всего сердца вашего, постом, и рыданием, и плачем. Расторгните сердца вашя, а не ризы, обратитися ко Господу Богу вашему, яко милостив и щедр есть, и долготерпелив, и многомилостив. Милуяй бо, рече, помилован будет. И отпустите, и отпустится вам. Милостыня мужеви, аки печать с ним, и дар благ есть творящым ю пред Вышним. И тако греси потираются, аще имеши Ниневитское покаяние. Имаши Давида, покаянием очищающа грехи и толику покаяния силу являюща, яко тем пророческому дару сподобляющася и Богу Отцу познаваема. Имаши, иже рабе вопрошающи о учителе, и отнержеся его с клятвою (ап. Петр), не знаема сотворив, и ложною ротою объят быв, толми же (и все-таки, настолько) скверну отвержения очисти, яко и верховнику ему быти, и Апостолскаго ликостояния не испасти, и церкви основанию, и небеснаго царствия ключарю от истины нарещися. Имаши мытаря и блуднаго сына, и блудницу, и разбойника, во едином часе благоразумным гласом, грехи разсыпающа, и в породе (в раю) гражданина впишема. Дерзай покаянием, совлецы скверну, не бойся: потом Господь дерза (смелым) тя сотворит. И егда покаешися и постонеши, тогда спасешися, яко велика есть милость Христа Бога и очищение обращающымся к Нему подобне; токмо обратимся и покаемся. Тогда бо Господня милость, яко дождь на троскот (трава, зелень), в наши души одождит и неприязнена брань разрушится о Христе Иисусе Господе нашем, Ему же слава ныне и присно, и во веки веков.

Уподобимся и мы жене Самарянине и о своих гресех человеков да не устыдимся; егда бо стыдимся о спасении человеком открыти своя грехи, то в день он не пред единем, или двема, но всей вселенней зрящым людем испытаемся. Ибо Бог помогает ныне: не хощет бо смерти грешнику, но еже обратитися и живу быти ему. Воспомянем прочее, како прииде к Давиду Нафан, пророк к пророку прииде: аще бо и пророк бе Давыд, но яко же и врачеве, егда болят, то иного требуют врача, ибо болезнь хитрость погубляет. Тако же и зде вся обличаема, рече, светом яве бывают и исцелеваются. И яко же убо и струп храним есть и покрываем, не исцелевается; но егда горе восходит, тогда исцелен бывает, яве ни единого приемля потружения: тако же убо и грех, дóндеже храним есть, не прощается Тем же убо да не восхощи связан быти от человека, зане и разрешение приимеши от человека же. Аще ли убо от человека не восхощеши связан быти, то узами неразрешимыми в вечней муце свяжешися, идеже несть льзе (нельзя) покаятися. Тем же, возлюбленнии, молю вы, вси друг друга бедите к покаянию, да варим лице его ко исповеданию нашему.

Возлюбленнии, днесь спасению нашему начаток зачинается и плодится во утробе праведныя Анны, по благовещению Архангелову, внука Иессеа праведнаго, от колена Давыдова. Сею бо разрешишася узы Адамовы. Сею мир от лсти свободися. О сей убо радовахуся пророцы, чающе от Нея родится Господу нашему Иисусу Христу. Да есте ведуще, возлюбленнии, яко днесь празднуем зачатие Госпожи нашея Пречистыя Владычицы Богородицы. Тем же к церкви Ея радостно тецем, на молитве со страхом стоим, и отверзем двери небеснаго чертога бдением и молитвами, и милостынею, и постом украсимся и тако проводим честно, с радостию празднующе честное зачатие Пречистыя Госпожи Богородицы. Та бо непрестанно за ны молит Сына своего и Бога нашего. Не токмо сами ядуще и пиюще, но и убогия милующе, и алчющыя насыщающи, жадныя напояюще, нагия одевающе, яко же рече Господь: Будите милостиви, яко же и Отец ваш небесный милостив есть. Подражаем убо оны мудрыя девы, им же рече Господь: внидите в небесный чертог, яко странна суща видевше помиловасте, и алчна накормисте, и жадна напоисте: еда братие (не) Самого Христа накормиша, или напоиша, тем же царства небеснаго сподобишася; но ходящыя в мире сем и просящыя во имя Господне. Молю вы, убежим огня и геенны, и напраснаго суда. Не вемы бо, в кий час душа от тела разлучится, еда ядущи, или пиюще, или ходящи, или седящи. Тем же имеем на всяк час покаяние, милостыню, кротость, воздержание: и тако умолим Владыку Христа, могущаго нас помиловати. Помянем великаго пастыря Златоустаго, якоже рече: О чада, сия вас деля сотворенна суть, а не вы сих деля. Не отвращайтеся от церкве, ни на пустошная поучайтеся, да не наполнится вас геенна, со отпадшими славы Господни. Тем же, возлюбленная братия, убедимся на молитву всегда, с чистотою к церкви ити, на всякий праздник Господа нашего Иисуса Христа, и Пречистыя Его Матере, Владычицы нашея Богородицы, да сподобимся слышать гласа его: приидете благословеннии Отца моего, наследуйте уготованное вам царство. Ему же слава, ныне и присно, и во веки веков.

Аще кто любит Бога, а брата своего ненавидит, ложь ест, ибо любяй Бога, любит и брата своего, а не любяй брата своего, ни Бога любит, по Апостолу Иоанну (Ин. 4:20, 21): яве, яко оскорбляяй брата своего, Бога оскорбляет. И не оскорбляйте бо, рече, Святаго Духа, Им же знаменастеся. И паки о любви глаголет: Понеже единому сотвористе сих малых братий моих, Мне сотвористе, и елма же не сотвористе сим малым, ни Мне сотвористе (Мф. 25 гл.). Указабося в прежде реченнем: яко угождаяй брату своему, Богу угождает. И се ведуще убо, братие, яко сим Богу угодим, да не оскорбим ни о чем же искренняго своего; но вселично (всячески) подвигнемся угодити братии, и не дати вины, еже сим печалным быти от нас, подобне и неподобне, и не неприятне (пред) Богом быти молитве нашей, яко овчати непорочну. Единому бо, рече, молящуся, а другому проклинающу тя, коего гласа услышит Владыка, яко же в премудрости писано есть? И паки един созидает, а другий разоряет, что успеют, токмо труд? Или: мыяйся от мертвеца и паки прикасаяйся ему, кая полза во умовении его? Тако и постяйся человек о гресе своем, и паки на той же входя грех, молбу его кто услышит и что успеет в смирении своем? И приводит глаголя: не куй на друга своего зла, надеющагося на тя. Из уст бо, рече, безумных, исходит жезл досаждения, устны же праведных хранятся. Ходяй убо праведне, боится Бога, а стропчаяй путми (ходящий кривым путем) укорен будет. И пророк Михиа, вздыхая глаголаше на Израиля: Кождо искренняго своего на зло поущает, и руки своя нань уготовляет. Апостол же: Аще брат твой скорбит, рече, на тя, уже не по любви ходиши. Господь же глаголет: Всяк гневаяйся на брата своею туне, повинен есть суду; а иже речет уроде, повинен есть родству (геенне) огненному. И еще приводит: Аще убо принесеши дар твой ко олтарю, и тамо помянеши, яко имать нечто брат твой на тя, остави дар твой пред алтарем, и иди прежде и смирися с братом твоим, и посем да принесеши дар твой к Богу.

Муж свят, виде единаго cогрешающа, горко прослезися, и рече: «сей днесь, а аз утре». Аще (токмо) кто согрешит, не осуди его, но имей себе грешнее его, любо и неверен; и никако же ему поноси, иже согреши, но помяни бо сам себе, и внемли себе како ходиши, да не падеши. Даждь дело душе твоей, еже стати на молитве и прилежати Богови, да не одолеет ти помысл неприязнен. Молися, да дух забвения отступит от Тебе, и аще убо что потребно сотвориши и похвалишися, то погубиши е. «Аз, рцы, вечер умрети имам, и заутра, и на всяк час». И аще глаголеши кому о будущей жизни, со умилением и плача глаголи послушающему, понеже и ты бы ине еси рекл: да не умру без ползы, пребываяй суетными словесы. И аще хощеши спастися, блюдися похваляющих тя, и возвышающих твой помысл, и ближняя укоряющя, себе же не зряща. Или не веси убо, яко разбойник на кресте бе, от словесе единаго оправдися, фарисей же единем словом обвинися, и Иуда со Апостолы причтен бе, и в нощи единей погубил труд свой и сниде во ад. Тем же никтоже благотворяяй да похвалится: вси убо уповающии на себе падошя. Аще ли и видиши кого согрешающя, не на того возлагай вину, но на победившаго и диавола, глаголи: «горе мне, яко сей не волею пролщен бысть, аз же волею, и ведая согрешаю». Тем же убо плачи и проси от Бога помощи: никто же бо, леностию и нерадением живя, одолеет диаволу и получит благая от Бога. Тем слабости ради и небрежения жития нашего вси прелщаемы есмы в мре сем суетнем. Егда же о падении чюжем порадуемся, или позазрим, то сами предани будем брани бесовстей. Аще ли крепце стоим сердцем и умом, то Бог нам выну будет помощник, Ему же слава.

Благая словеса от благаго сокровища сердечнаго исходят. Аще же кто не очистит сердца своего от злобословесия, той добра о себе беседовати не может: аще бо и мнится глаголати послушником (внимающим, слушающим), не приятна суть словеса его, но отметна, не имущя благодати Святаго Духа. Хотяй же убо ползовати кого в словесех, да просит у Бога слова на отверзение уст своих. Якоже Исаиа глаголет: Господь даде мне язык на учение, яже ведати во время внегда подобает рещи слово. И глаголет: послушайте мене, да поживет во благих душа вашя. Приточник иже рече: Сотове медвении словеса добрая, слодость же их исцеление души (Притч. 16:14), и разумевый я в вещех, обретатель благ (Притч. 16:30), и возлюбит уста глаголюща словеса добра. Устны бо сладки покрывают сердце печално (Притч. 26:23). И паки рече: Слово жестоко воздвижет гнев, язык же мудрых добрая умеет (Притч. 15:1). И паки: Из уст праведных каплет премудрость, уста же смиренных учатся благодати (Притч. 10:31). И паки: От плода уст душа мужу насытится благ, по возданию же уст его, воздастся ему (Причт. 12:14). Устны бо истины исправляют свидетельство, и хотящии мирни быти, возвеселятся (Притч. 12:19). Давыд же рече: Отрыгну сердце мое слово благо (Пс. 44:2), и Господь даст глагол благовествующым силою многою (Пс. 67:12). И: Господи устне мои отверзиши, и уста моя возвестят хвалу Твою (Пс. 8:17). Пишет же и Павел глаголя: Слово ваше всегда во благодати да бывает, солию растворено, ведети како подобает комуждо вас отвещавати (Кол. 4:6). К Римляном рече: Возжелах видети вы, да некое подам вам дарование духовное, утвердитися вам, и утешитися верою общею. (Рим. 1:11). И паки: молю убо единаго когождо вас утешая, ходити достойно Богу (Кол. 1:10). Иже бо мнится приим дар учительства, да беседует со смиренною мудростию: да ины созидая, сам не осужден будет, яко же и скрывый талант. Не приемый же таковаго дара от Бога, да молчит, и да не износит глагола праздна от сердца своего, – еда услышит сие: грешнику же рече Бог: вскую ты поведаеши оправдания моя, и приемлеши завет Мой усты твоими? ты же возненавидел еси наказание и отвергл еси словеса моя вспять (Пс. 49:16–17). Добрый бо человек, рече Господь, от добраго сокровища сердца своего, сиречь, благодати Святаго Духа, износит благое (Мф. 12:35), о Христе Иисусе, Господе нашем. Ему же слава, ныне и присно, и во веки веков.

Внимаем себе, еда како узким путем и прискорбным обещавшеся ити, пространный же держаще заблудихом. Узкий путь да явиттися: воздержание чреву, стояние обнощное, хлеба скудость, безпосластия питие; оклеветания на смерть, подсмеяния, наругания, отрезание своих воль, терпение хуления, оклеветания без правды терпети, оглаголанному не гневатися, уничижаему смирятися, и ужасаему не боятися. Блажени, иже путем сих ходят, яко тех есть царство небесное.

Праздник приходит, братие, Рождества Христова, иже всех праздников честнее и страшнее. Того ради аз начинаю учение ныне, да очиститеся от грех, и тако приходите ко Святым тайнам. Да никтоже ми речет: полн есмь студа, грехов бо имам совесть исполнену. Довлеет убо пять дней сих на очищение, аще истинно покаемся, и бдим и постимся, многия грехи отсечем; ни убо, не на кратко время взираем, но оно помыслим Владычне человеколюбие. Понеже Ниневитяне в три дни возвратишася к покаянию, и возможе им душевное сокрушение гнев утолите. Блудница же, во един час пришедши ко Христу, долгаго времени грехи вся омы. Иудеом оклеветающым, яко прият ю, и тем уста загради, ону же всего зла премени, с дав ей дерзновение, отпусти ю. Что же сие? Понеже теплым умом и разженною верою от души сокрушены Святых Пречистых коснуся ног: власы (распустивши), источник слез от очию испущьши, и мира излия, ими же прельщаше человеки, тем же и врачество покаянию устрои. Ими же блудником улови очи, тема и прослезися, пленицы (украшения), ими же запя (запятна) многи грехами, теми же и отираше нозе Христу. И ты тако же, ими же прогнева Бога, теми же и умоли Его ныне. Прогневал ли еси граблением имения, тем и примирися Ему: восхищения раздавай обидимым и ино к сим придавай. Рцы же яко и Закхей: «отдаю четверицею, их же есмь преобидел». Аще ли языком согрешил, тем ныне чисты молитвы возсылай и кленущыя и злословящыя тя благослови. Аще же сице пременишися в слезы и обычай (нравы, образ поведения), то не долга времени покаянию возтребуеши, ни многих лет, но во един день токмо получиши отпуст. Тем молю вы, отступите льсти и приимити добродетель, престаните от злобы, обещайтеся тех не творити, и довлеет вам сие на ответ. Аз свидетельствую и поручаюся: яко от согрешения преставшым, и предних (прежних) отбегшим зол, и воистину, покаявшымся, милостив есть Бог, и приемлет я, яко человеколюбивый. Ничтоже убо иного взыщет, токмо же отсечение показати в себе от злых, и к тому не творити я. Человеколюбец бо есть, простит первая и не помятует злобная, аще истинною покаемся. Яко же болящая желает родити, тако и Бог желает милость свою излияти на вы. Того ради отвержем всяку неправду и тако праздновати начнем Христово Рождество. Отложим клевету, и осуждение, попрем гневодержание и зависть и вся житейския печали. И тако в пяти сих днех покаявшеся, чисти от всякия злобы к чистому и беззлобивому Богу приступим, кождо глаголюще: «душю мою хощю спасти, помози ми, Господи, да спасуся». Кую бо ползу приимет человек, аще и весь мир приобрящет, а душю свою погубит? Се же не на осуждение вам глаголю, но ища вашего спасения, да избавитеся вечныя муки о Христе Иисусе, Господе нашем.

Да есте ведоуще, братие, яко всии день пост есть пред предпразднеством Господним; того же ради пост есть да с говением и чистотою съберетися в церковь в 6-й час, гнев поправши, плътьскыя скверны очистившеся (оцестивше) и вся неподобная дела отвергъше, да дотойни боудем оустьнами чистами с сердцем непорочным причаститеся теле Бижьи (Тела Божия), в неже нас деля облечеся обнища волею. Видя ны злобою греховною облечены и въороужены с делы бестудными дыяволоу (дияволу) поработившеся, н не може нас презрети (презрети) в толико зло впадъша, преклони небеса и сниде; бес порока и бес примеси в оутробоу чистоую девичу вселися Слово Божие безначальное, плоть и человек бысть, соугоубь естьством, человецьскый (человечь) род обновити хотя и в первоую породоу (рай) въвести, из нея же испали бяхом, послушавше врага, завистью прелгав прадеда нашего Адама, первозданнаго человека, в смертьное житье въверьже. Да того ради сниде к нам Сын Божии, безначальный, от отца без матере первое рождество имея, въторее же нас делма без отца из матери въплотися, его же снитию и въплощению (радоующеся) праздноуем в память святых Его (праотец и) прадед по плотскомоу (Его) рожьствоу; мню же великаго Авраама, Исака с Якова, их же имена апостол поминает, и еще в пророцех дивнаго Данила и три отрокы: Ания (Ананье), Азарию, Мисаила, иже верою, акы в броня оболкшеся, ярость зверину оукротиша, вера бо с чистотою сплетшися нетленьными венцы оувазъше (увязъше) Христовы мученикы с праведникы, иже верою и делы добрыми дроузи Богоу нарекошася. Се же их (им) дела бяху: нагыя одеваху, страныа приимахоу, сироты помиловахоу: тем же и память их светла есть. Да и мы, братие, поревноуем тем и подвигнемься творите я (тако же творите), да боудем Богоу дроузи и сынове царствия Его. Тачи (тщи) же беша с плотяни человеци же, яко же и мы, н плотная оугодья възненавидеша и оустроиша телеси своя не на питье, ни на спанье, н на пощение и на бдение и на покланяние присно. Тем поревновати достоит, а не татем и пьяницам, ни злодеем, им же оуготована (есть) моука с дыаволом (дьяволом), от нея же избавит ны Господь Бог.

Время убо моего отшествия настоит, потщитеся своими попещися душами, понеже от сюду отшествие (отшедший от мира, усопший) покаяния или добродетели сотворити плода не мнит. Во аде бо, рече, кто исповестся Тебе (Пс. 6:6)? Зде подвизи, а онамо венцы, по закону страждущым, зде с невидимыми и видимыми рать, а тамо убо храбрства надеяния; зде тщания, а онде чести и славы; зде подвигом купование, а онде прибытку собрание; зде, скратящи рещи (кратко говоря), добру же и злу действа сотворяются, а онде убо сим отдание. Да не убо временнаго ради и греховнаго восприятия, не токмо вечных лишимся благ, но и безконечных предадимся мукам: идут бо сии, рече Господь, в жизнь вечную, а сии в студ вечный и муку безконечную (Мф. гл. 25). Первое же убо к Богу веру тверду и неподвижиму в своих душах от всего возраста соблюдите. Но и дерзати Спас велит: Аз, рече, победих мира (Ин. 16:33). И паки: Не заботитеся от убивающих тело, а душу не могущих убити: убойтеся же паче могущаго душю и тело погубити в геенне (Мф. 10:28), ей, глаголю вам, того убоитеся. Злапоминания же не держаще: во гневе бо вашем да не зайдет солнце (Еф. 4:26); в него же не чист помысл како внидет, то скору того потщитеся погубити молитвою. Святи бо, рече, будите яко Аз свят есмь (1Пет. 1:16). Лихоимания же, аки кумирослужения матере, бегайте; нестяжание же паче любите.

Приступите, братие и сынове, да скажем вам (скажу вы) разоумно силоу и честь дня сего, в (во) иже посещение бысть (и) избавленье роду человеческому, впадшему в прелесть дьяволю, в истление, преступлением заповеди Божия, яко же положена в раи древле, завистью дьяволею, невъздержанием отпад славы Божия и пищи раискыя лишен быв, в тленемь и смертнемь жития сы ради нас; яко виде ны дьявол отпадша славы Божия и нача многыми козньми блазнити человекы, хотя оукрасти от Бога: разбой, татьбами, клеветами, блоудом, требами всеми злыми, дабы мы соувражники Богоу сотворил. Н милостивый Господь Бог наш, не терпя зрети нас в толико зло впадша, ни забы дела роукоу своею, н преклонь небеса и сниде на избавленье наше, и в плоть нашю облечеся, хотяй ны обожити своим Божеством, и пеленами повито, яко младенец, мьглою землю повивая, и в яслях скотьях възлежит, яко младенец почивая на рамну Херовимьску воину, да избавит ны от скотьскаго жития. Сего ради бысть ныне видим несозданный в создание свое въместися, неосязанный осязян бывает, сын девичь (Божий) сын человечь бысть, но свершен бысть человек; не отложь Божества своего, плотью скрыв Божество, сниде на искание наше и обрети заблоужшюю овчю на рамо восприим ко отцю Своему принесе, сиричь человечь (чловець) състав, иже бе поглотил дьявол, и на радость призва ангельскыя силы, глаголя: радуйтесь с мною, яко обретох овчю погибшюю (погибшее овча). Тем же в мы, братие, должны есме почтити Его съшествие и заповеди Его присно блюсти (сблюсти) любовию друг друга тщащеся, яко же и сам, написав (закон), предасть нам рек: не оукради, не убеи, прелюбы не створи, лжив послоух не боуди, чти отца своего и матерь и възлюби ближняго своего яко и сам ся, – не иже есть по родоу ближнии, но всякаго живоущаго по вере Христове: алчнаго напитающе, нагаго одевающи, Божия рабы честно творяще: ти бо бдят о душах нащих, к церкви тщащеся ночь и день; тоу бо оцищася (очищаемся) от греха, трезвящеся отиноудь, с чистою свестью пристоупим к телоу Божию и крови, не имоуще вражды ни на ком же (ни на кого же), не лицем любяще ся, н срдцем дроуг дроуга чтяще (чтуще), да боудити сынове Вышняго и причастници небесному царствию, в неже позывает вы (позывая ны пришел есть) Христос истинный Бог наш, сын Божии, соуоубь естеством и равно славим в Троици.

Се ныне хотящии приступити к Святей Страшней Тайне разумейте, братие, смыслено, кацей (какой) святыни ныне хощете причаститися. Ея же со страхом трепещут Ангелския сили, херувимы, и серафими, и вси чини грозно ужасаются, возносяще духовную жертву горе на небеса. Тех бо образ имуще иереи, предстоят страшней сей трапезе, идеже предлежит Тело и Кровь Сына Божия, волею плоти и крови нашея причащьшася нас деля, с хотяща причастники Себе сотворите. И ведый немощь рода нашего, яко не может мяса кровава ясти ни ктоже, ни крови пити: сего ради преложи Тело свое в святую просфору и Кровь в вино, над ним же Святая Тайна совершается. Да не можем, братие, друг друга уничтожающе, приступити яко к просте вещи, не очистившеся от совестных грехов. Но тако преступим, чистотою просветившеся и трезвением украсившеся, любовию друг друга преспевающе. Не человек бо сих сотворяяй есть, но Бог невидимою рукою, и страшною си тайною причастники ны сотворяет, и вмещаяся в нас, общники си сотворяет ны Своего царствия. А иже ли небрежением и не очистившеся, и друг друга уничтожающе приступают, приемлюще тело Божие, недостойни его суще и зрети, яко же и Иуда прежде сотвори, то в лют недуг въпадают и муце повинне будут. Тем же молю и понуждаю вы, братие, не сотворимся небрежением и грубостию противни Богу; но день и нощь чистящеся, поучаемся, да зде добре поживем и на страшнем суде одесную Престола Божия явимся, о Христе Иисусе Господе нашем, Ему же слава, ныне и присно, и во веки веков.

Слышите и научитеся, коль благ Господь наш, яко и плотию Своею питает ны и Крови Своея не щадит, егда требуем. Ты же не хлеба даси Его ради, ни чаши воды: таковая убо приемля от Него, да худых щадиши. Аще бо за Христа не умреши, то без смерти ли пребудеши; яже бо ти нуждею оставити, сия волею Бога рада да издаси. Еда не тяжка ли сия, яко Бог Сына Своего за тя дал, ты же ни хлеба Его ради даси? Тебе ради распят бысть, ты же издаяти презираеши? И что сего беззакония горее, яко вся телеса тебе ради сотворшу Ему, ты же тверже еси камене: толиким тя нудящым вещем, в скупости пребываеши. Аще бо не вдаси за тя Пострадавшему, но поне да щедрот ради помилуй, узницы ради умилися, болезни ради преклонися. Аще ли ни сия тя сотворят человеколюбца на легкое податие приити, то помяни рекшего Христа: «ничтоже, рече, прошу велика, но точию хлеба и словесе утешна. Не глаголю ти: разреши мою нищету, или дай ми богатство; но хлеба прошу мало, утешения ради от глада. Аще во узницу впаду, не нужу тя уз разрешити и извести вон; но прошю, да посетиши мя тамо, и видиши мя посреде связанных. Могу убо сих ради посещения и мзду ти подати, и в веце оном венчати. Хощу бо ти должен быти и дати некий плод к венцу. Того ради возмози мене напитати. Обхожю бо у всех прося, и у дверей предстою. Простираю руку, и тобою накормлен быти желаю. Украшаюся тем, яко да пред вселенною всею похвалю тя, внегда всем слышащым, и покажю тя питателя Моего. Аще бо киими накормлени будете, то стыдящеся тем подавасте. Аз же понеже вы люблю зело того ради наказую, яко да милостиви да будете, и иным глаголемая мною изглаголете. О аще сим не будете ревнителие, ни инех научите, посрамлени будете в судный день и от лица Моего отриновени. Аще ли сия сотворите, исповем бывшее ваше все с великою похвалою, и не устыжуся рещи: яко нага Мя суща облекосте, и алчна напитасте. И наипаче украшаюся сими, ими же и наследницы небеснаго царствия будете». Сия же помышляюще, возлюбленнии, поищем милостынею своего спасения, да вечных благ улучити сподобимся, о Христе Иисусе Господе нашем, Ему же слава, ныне и присно и во веки веков.

Суть мнози глаголющии: чему есть алчба (пост) чисто живущым? Но то есть извет (ложь, клевета) слабых. Кто бе чистее Адама, но и того Бог не лишил поста, еже бо рече от всякаго древа сущаго ясти в раи, от древа же, еже ведети добро и зло, да не ясте, рече, от него. И се есть образ поста. Да елико той в раю бысть пост, то колми паче вне рая. Аще прежде язвы требе бысть зелие, то колми паче при язве. Аще не уже на ны нашедши брани похотней, требе бысть оружие, колми паче ныне посреде ратей похотных нам стоящым. Разумейте же колми гневается Бог похуляему посту, колми же паче любит и честну ему бывающу. Не почти Адам поста, темже услыша глас Господень глаголющ: земля еси, и в землю пойдеши (Быт. 3:19). Да разумейте, како негодует Бог, иже кто пост похуляет: ту абие смерть наносит на небрегшые его. И разумейте силу постную: пост бо научит ны обращатися аки от полупути идущым на смерть. И о сем указание, не от двою, ни от трех, но народ цел, Ниневитска града великаго, мало убо непогибшу ему, аще не бы обратишася на покаяние и пост. Честный пост паки от самых рук погибелных изъят я и на живот обрати. Они убо не имуще закона, ни ведуще, но сами себе быша закон, мы же како отмещемся, о нем же нам тмами указания суть. Моисей бо пророк и Илиа, егда хотяху приступити к Богу беседовати, к посту прибегнуста первее, и рукама постными пригвождена быста ему. Алка же и сам Господь Бог наш Иисус Христос четыредесять дней, не требуя поста, но образ нам дая и победу на всю силу диаволю. Богу нашему слава, ныне и присно, и во веки веков.

Празднословие и празднохождение раждается от безстрашия Божия и от нечаяния будущих. Аще би муки боялися быхом, празднословцы николи же быхом были, зане Господня заповедь есть: слово воздати нам противу в день судный о праздне глаголе, яко пользы души не приносят праздны глаголы. Потребно убо нам нуждею воздержатися и не дати места празнословию. Подобает же нам всем хранением блюсти свое сердце и уста, и известне (знаемо) беседовати, яко совершеном. Паче же вам книжником наставляти простыя, да не услышим глаголюща к нам: «учий друга, себе ли не учиши?» Безсоветия бо знамение еже праздно глаголати. Яко же и в притчах глаголано есть: Сыне, не ревнуй мужем злым, ниже возжелай быти с ними (Притч. 24:1). И приводит глаголя: Уста не затворена износят нестроение (Притч. 26:28), и безумный множит словеса (Екк. 10:14), и при язычнем мужи не поведай жития чужого. Глаголет же Иов другом своим: Буди же вам онемети, и то буди вам мудрость (Иов. 13:5). И другий: Блажен муж, иже не поползнетса языком своим, и без свара поживет. И паки: Воздержю язык твой, да без свара поживеши; не любяй беседы, оскужает злобу. Глаголет же и Екклисиаст: Словеса мудрых благодать, а устны безумнаго потоп лют: начаток бо уст его злоба (Екк. 10:12). И приточник рече: Любяй живот, щадит уста своя (Притч. 16:17). Тако же и Апостол: всяко слово гнило из уст ваших да не исходит, но еже благо и полезно, да даст благодать слышащым (Еф. 4:29). Имуще же возлюбленнии толико свидетельство, всем тщанием да отступим безполезнаго, паче же дущевреднаго празднословия, помышляюще выну, яко же речено есть страшное запрещение Господа, глаголюща: Аминь глаголю вам, яко всяк празден глагол, иже рекут человецы, воздадят о нем слово в день судный (Мф. 12:36), Богу живу, Ему же слава, ныне и присно, и во веки веков.