I. Житийные чтения Пролога. Из житий и памятей некоторых святых вселенской церкви, русских и обще-славянских⁶²

Глеба, князя Российскаго, сына Володимиря, (уби) свой брат, Святополк, послав убийц. Прежде бо посла к нему в Муром, с лестию глаголя: «зовет тя отец, уже ему дние скончалися», и уже брата Бориса убил (Святополк), а на Глеба готовяше убиение: помышляя бо братию всю избити, и хотяше един княжение прияти, ему же конец бысть мука вечная, яко же рече пророк: увязе грешник в сети своей. Глебови убо едущи, и яко бывшу у града Смоленска на Смядыне, приспеша окаяннии убийцы немилостивии, яко свирепии зверие, иже послани окаянным Святополком. Святый же Глеб чаяше от них целования, и они окаяннии оружие готовляху нань, и вскочивше внасад, яша святаго, повар же святаго Глеба, именем Торчин, закла господина своего ножем, месяца септевриа, в пятый день. И повергоша его на пусте месте. Но Господь Бог не остави своего раба, яко же и прежде Стефана мученика прослави. Овогда убо виде людие столп огнен, овогда же свещы горящыя, иногда же пение ангельское слышаху. И возвестиша во граде о святем, и изшедше вернии, взяша тело святаго и принесоша его в Вышеград.

Сей преподобный Иосиф бе от предел града Волоколамскаго, прадеда имея литовския земли, отца же именем Иоанна и матерь Марину. И егда быв седми лет, вдан бывает от них в научение грамоте и вскоре извыче все божественное писание. И нача к церкви безпрестани приходити, сверстники же своими не сочетавшеся, но всегда на благое тщашеся, еже бы Богу угодити. Разсмотрев же мира сего нестоятельное, отъиде в монастырь в Боровск, к преподобному Пафнутию, и тамо от него пострижеся и бысть монах искусен. И бе выну в посте и молитве пребывая, повинуяся во всем наставнику своему. По некоем же времени, взя к себе в монастырь и отца своего по плоти, старости его ради, и облече его во святый образ, и служаше ему, и покояше его до дне смерти его. И пребыв тамо в повиновении и в послушании у Пафнутия лет восемнадцать. По смерти же св. Пафнутия бысть игуменом того монастыря и пребысть в игуменстве два лета. Посем отъиде оттуду с некими в лес, града Волоколамскаго, и тамо монастирь возгради, и церковь каменну воздвиг, во имя Пресвятыя Богородицы, честнаго и славнаго ея успения. И собра братий множество и сотвори общежительство, и всем равенство устроив в ризах и во обущах. Сам же преподобный тако хождаше яко един от убогих, никто же бо его в братстве познаваше. И тако бо добре и богоугодне поживе, и на еретики подвизався, написа на них о православии многая словеса. О устроении же и благочинии церковном в монастыре братии своей изложи, тако же написа чин и устав монастырский. И во время глада многия маломощныя препита и иныя добродетели исправив. Преставися к Богу в вечный живот месяца септевриа, в 9 день, в лето 7024 (1516), во дни благочестиваго князя Василия Иоанновича, всея России, жив всех лет живота своего 75. И положиша тело его противу олтаря.

Блаженная Людмила бяше от земли сербския, князя Сербскаго дщи, отдана бысть за Чешскаго князя, именем Боривоя. Бяху же тогда не вси крещени. Егда же быста вкупе (вместе – Боривой и Людмила), просветистася има очи сердечнеи, и крестистася во имя Отца, и Сына, и Святаго духа. И создаста церкви, и совокуписта иереи. И родиста три сыны и дщерь. Боривой же тридесяти и шести лет жития сего отъиде, блаженная же Людмила всю печаль имяше к Богу, и все свое имение в милостыню нищим раздая. Сын же ея Вратислав, прия престол отечь, и владев лет тридесят три, и почи о Господе. Тогда нача мыслити мати Вечеславля зло на свекровь свою Людмилу и всячески искать погубит ее. Разумевши же Людмила, отъиде в иный град, Тагин (Тегин) нарицаемый. Сноха же ея (Драгослава) совещавши со двема боляринома и посла я в Тегин, да бы погубили свекровь ея Людмилу. Пришедша же разбойника та и совокуписта от себе множество подобных злодеев себе. Вечеру же бывшу обступиша двор со оружием, и разбиша двери и внидоша во храм. Емше же Людмилу, возвергоста уже на шею ея и удависта ю. И тако прия конец жития в день субботный, в первый час нощи, живши лет шестдесят и едино, и Богу угодивши, мучения венец прия. Бог бо показа от нея знамения и чудеса на месте, иде же бе погребена. Не бе бо в церкви, но под стеною града, иде же по вся нощи являхуся свещы горящы. И некий слепец прозре, прикоснувся персти, идеже Людмила лежаше. И оттоле многа быша чудеса, яже слыша внук ея Вечеслав, потщався, принесе бабу свою (Людмилу, бабушку его) в славный град Прагу. И положи мощи ея в церкви св. Георгия, идеже и ныне многи суть знамения и чудеса, окаянная же мати Вечеслава зле погибе.

Сий пресвященный Киприан, митрополит Киевский и всея России, бысть родом земли Сербския, всякаго же благолюбомудрия и божественнаго разума исполнен, и вельми книжен и духовен зело. И добродетельным житием подвизаяся, учением же своим богодохновенным и благоразсудным наказанием наслаждаше всех. Велик бо подвиг имея и многое тщание, еже непрестанно учити люди Божия истинному разумению и страху Божию. Праздных же вещаний, и суетных глагол, и всяких смехотворений всем возбраняше творити, да не от празднословия наполнятся ушеси смехливых человек. И всех на молитву к Богу и на истинное покаяние увещаваше. Любяше же безмятежно жити и время безмолвия улучити, и того ради часто пребывая в своем селе митрополстем в Голенищеве. Бяше же место безплищно, и безмятежно, безмолвно же, и покойно от всякаго смущения, между двою рек, Сетуни и Рамениси (Раменки), иде же тогда бысть оба полы лес мног, идеже есть церковь, во имя святых трех святителей, Василия Великаго, Григория Богослова и Иоанна Златоустаго. И пребывая тамо, епископы и попы ставляше, идеже и книги своею рукой писаше. И многия святыя книги с греческаго языка на российский (словенский) язык преложи и доволна списания (довольно писания) к пользе нам остави. И великаго чудотворца Петра митрополита всея России житие написа и похвалами украси. И в молитве чисте тамо упражняшеся, и в прочитании божественных писаний, и в памяти смертней, всегда имея во уме страшный Суд Христов и мучение грешников, праведных же (праведникам же) благих наслаждение. И в таковых добродетельных исправлениих свято поживе и богоугодно подвизаяся, в старость велию достиже. В том же своем селе Голенищеве разболеся и неколико дний лежаше болезнуя, за четыре же дни прежде представления своего написа грамоту некаку чудну прощальную, всех правоверных прощая и благословляя, тако же и сам от всех прощения и благословения требуя и прося, еже есть истинное любомудрие и смирение. Сего ради сице сотвори, понеже смирением вся согрешения разрешаются и вся во благая поспеваются. И сице заповеда епископом и сущим там приставникам, глаголя: яко егда мя во гроб положите, тогда сию грамоту прочтите надо мною вслух людем, – еже и бысть. И с таковым смиренномудрием и со многим тамо благодарением представися к Богу, в лето 6914 (1406), месяца септевриа в 16 день.

Сий святый благоверный князь Феодор сын бяше Ростиславль, рекомый Черный, девятый степению от святаго и равноапостольнаго Владимира, внук Мстиславль, правнук князя Давида Смоленскаго, праправнук же Ростислава Мстиславля Владимира Мономаха. Имеяше же два брата, Глеба и Михаила, от них же в жребии отечества обиден бысть: даша бо ему токмо в наследие един град Можаеск. Он же с безмолвием господствуя в нем и не гневашеся на братию свою; его же ради незлобия поручи ему Бог и славный град Ярославль, таковым обычаем (по такому случаю). В граде Ярославле бе княгиня Ксения, князя Василия Ростовскаго, у нея же бяше дщи единочадна. Благоверный же князь Феодор оженися ею и град Ярославль притяжа во обдержание себе, по брате же князе Михаиле наследова господства и Смоленска града. Живяше же благочестно и богоугодно во граде Ярославле. Измлада бо Христа возлюби и пречистую его матерь; зело же по преизлиха чтяше священники, яко слуги Божия, и монашеский чин вельми любяше, и нищих миловаше; еще же от всякия неправды огребашеся, и яко изящный воин угождая во всем своему владыце. И тако ему добре и благоговейно живущу во граде Ярославле, и родися ему сын, князь Михаил, и просвещен бысть святым крещением. В та же лета, по пленении нечестиваго царя Батыя, заповедь его обдержашеся, яко князем российским ходити в орду, и тамо царствующих комуждо их приимати отеческия хоругви же и державу. Некогда же идоша князи Российстии во орду, купно же с ними тамо прииде и сей блаженный князь Феодор и дары многи удовли (удовлетворил) царя же и царицу его. Царица же яко виде благородие лица его, уязвися сердце ея, еже любити его, яко же египтяныня Иосифа, и на Россию нехотя отпустити его, мужества ради и красоты лица его. Царь же всегда повелеваше ему пред собою стояти у себе, и чашу от руку его приимаше. И три лета держаше его у себе. По сем царица мысляше дщерь свою дати ему в жену. Он же не хотяше, но поведа им, глаголя, яко имам супружницу, внуку Всеволожу. И прошашеся у царя на свое ему господство в Ярославль; царь умолен быв от него, отпусти его с честию. Благоверный же князь Феодор прииде ко граду Ярославлю и услыша, яко супружница его умре, сын же его князь Михаил во граде бяше. И хотяше святый во град внити, теща же его и боляре не прияша его и нелепая словеса глаголаша ему: «мы такого обычая не имамы, еже от инуду пришедша прияти, довлеет (достаточен) нам отечеству наследник, князь Михаил, сын твой». Святый же князь Феодор паки шед во орду и моли царя о управлении державы своея. Царя же скоро посла ко граду Ярославлю с великим прещением, дабы его прияти на свое княжение во град Ярославль. Они же посланию цареву не внимаху и блаженнаго Феодора на княжение не приимаху, – ему же тогда пребывающу у царя во орде и честь велию приемлющу от него. Царица же сугубо любляше его, и царю глаголаше, еже бы вдати дщерь свою в супружество за него. Царь же глаголаше ей: «не лепо есть нам вдати дщерь свою за служебника нашего, паче же не единоверна закону». Царица же весьма печаловашеся о нем и глаголаше царю: «аз убо от много времени велико желание имею, да бы дщерь наша веровала в Господа Бога, сотворшаго небо и землю и всю тварь: в Него же христиане веруют». Царь же абие преклоняется к молению ея и присвояет его в зятьство себе. Блаженный же князь Феодор рече цареви: «О, царю, разумно да будет ти, яко по заповеди Творца Бога и Спаса нашего Иисуса Христа, и по правилам святых отец, – не повелено нам христианом неверных поимати в супружество себе; аще же крестится дщи твоя, то не отрицаюся пояти ю по христианскому закону церковному». Царь же, слыша сия словеса, возрадовася радостию великою зело и глагола ему: «буди тебе, яко же хощеши, господине мой». И повеле крестити дщерь свою. Крещение же ей бывши и нарекоша имя ей во святом крещение Анна; и по сем браку бывшу, яко же христианский закон обдержство имать (повелевает). И нача его любити царь вящше перваго, всегда бо против себе седети повелеваше ему и царский венец свой по вся дни полагаше на главу его и в свою порфиру облачаше его. Повеле же ему дом устроити и полаты украсити и вся елика довлеет господству его (подобает званию его) вдати ему. Пребывающе же ему в такове любочестии у царя, и от всех сих не вознесеся сердце его, и слава мира сего не отлучи его от любве Христовы, но паче преспевая в заповедех Господних. Сице же ему во орде сущу во благозаконном супружестве богоугодно пребывающу и вся по Бозе благочестно правящу, родися ему сын и наречен бысть во святом крещении Давид; еще же ему пребывающу во орде, паки родися ему вторый сын и наречен бысть во святом крещении Константин. По сем же преидоша к нему вестицы с России поведающе сына его, князя Михаила, представившеся в Ярославле. Благоверный же князь Феодор, возвестив о сем царю, к тому же и прошение приложи, яко да отпустит его на Россию с княгинею и с чады. Царь же по воли его сотвори, и отпусти его с великою честию, и царский венец возложи на него, и великим княжением Ярославским почте его. Святый же князь Феодор прииде в славный град Ярославль в велице славе; с ним же придоша многи силы российския и царева двора татар множество и прежде бывшая ему обиды отмстиша царевым повелением; и потом отпусти татар к царю во орду с великою честию. Сам же прочее великий князь Феодор во граде Ярославле державствова, по прежнему своему благому обычаю, благочестно и богоугодно, даже и до старости маститы. По сем болезнию одержим бысть и разуме яко близ скончания болезнь его, призва княгиню свою и дети, и завеща им во любви пребывати и во единстве мирне. И повеле нести себе в монастырь и тамо прият от игумена иноческий образ, с великою радостию и покорением. И весь день той пребысть радуясь и благодаря Бога, яко сподоби его таковаго дара получити, его же от многих лет желаше. Таже при конце своем повеле на себе и схиму возложити и, прощения просив, – тако же и сам всем прощение дав – и мир и благословение, и знаменався крестным знамением и предаде душу свою в руце Божии. И певше над ним подобающая пения надгробная, положиша тело его в церкви Боголепнаго Преображения Господа нашего Иисуса Христа, честне и боголепне, и даже до ныне содевает многа чудеса о Христе Иисусе, Господе нашем, Ему же слава ныне и присно и во веки веков.

Сей блаженный великий князь Михаил от юныя версты (с юных лет) Бога возлюби, и Пречистую Его Матерь, и ум свой вперив (вперить – устремлять на что-нибудь внимание) кротостию и милостию ко убогим, и вся пустошная мира сего отверг, богатства и славу суетную, еже есть худшее паучины.⁶³ В лето шесть тысящ семь сот четыредесят шестое (1238) бысть нахождение безбожнаго царя Батыя на русскую землю гневом Божиим за умножение грех наших, и разбегшымся всем христианом и князем. Царь же Батый, призывая их лестию, и повеле поклонятися идолом, канови, и кусту, солнцу же и огню. И мнози идоша сквозь огнь и поклонишися идолом, славы ради света сего, и души своя погубиша. Благоверныма же тогда князю Михаилу и болярину его Феодору пребывающыма в Чернигове и видеста многия прельщающыяся славою света сего и бездушным идолом пожершыя, и о сем душею поболести. Им же даде Бог благодать и дар Святаго Духа еже обличити царя Батыя прелесть, ею же лстит христианы. И поведаста отцу своему духовному мысль свою, и просиста у него благословения еже царя обличити и пострадати за веру Христову. Он же поучил я довольно от святаго Писания и, благословив я, отпусти с миром. Князь же Михаил и болярин его Феодор приидоста к царю Батыю. Царь понуждаше ею поклонитися солнцу и огню.⁶⁴ Они же царева повеление преобидеста (пренебрегши) и идолом царевым не поклонистася. Царь же рече: «почто повеление мое преобидеста и богом моим не поклонистася, солнцу и огню?» Михаил же рече: «недостойно есть христианом поклонитися твари, паче творца; мы убо поклоняемся святей Троице, Отцу, и Сыну, и Святому Духу, иже есть един Бог, Творец небу и земли». Мнози же прихождаху к святому Михаилу от своих ему и моляху ему глаголюще: «сотвори волю цареву». Святый же Михаил никакоже преклонися к молению их. Слышав же царь, яко не возможе святаго увещати ласканием словес своих, ни прещением смерти устрашити, ниже слез и моления своих ему молящих послушати ему и сотворити волю цареву. И повеле Батый святаго растягнуть за руце и за нозе и бить не милостивно по всему телу его. И на долзе биему святому нещадно, яко и земли кровию его обагритися. Един же от слуг царевых, Доман именем, иже прежде христианин быв, потом же отвергся веры христианския, отреза ножем честную главу святому исповеднику, великому князю Михаилу, и отверже ю от тела, святому же еще одно слово во устех глаголющу: «христианин есмь». Потом же начаша слуги царевы глаголати Феодору: «сотвори поне (по крайней мере) ты волю цареву, и поклонися богом нашим, и жив будеши и велику славу от царя приимеши: господина твоего князя Михаила наследник будеши». Феодор же рече: «не хощу княжения господина моего, великаго князя Михаила, ни славы, юже царь обещаваяй ми, и богом вашим не поклонюся; но во Христа, единаго Творца небу и земли верую, и зань хощу пострадати, яко же и князь мой». Видевше же убийцы оны непреклонна того пребывающа, абие емше (схвативши) его и немилостивно мучаху, яко же и великаго князя Михаила, последи же и честную главу мечем отсекоша, рекше еще: «яко и солнцу не хотеста поклонитися, наньже недостойна суща и зрети». И тако пострадаста святая мученики, и благодаряща Христа, предаста святая своя души в руце Господеви, месяца септевриа в 20 день. Святая же телеса ею повержена быста псом на снедение. На многи же дни лежащима има и благодатию Христовою неврежденна пребыста. Богу прославляющу святая своя чудесы: столп бо огненный явися над телесы ею, сияющ пресветлыми зарями и свещи на многи нощи горящи зряху. Видевше же то прилучившиися вернии абие погребоша честная ею телеса, благодаряще Бога, прославляющаго святыя своя.

Сей преподобный и Богоносный отец наш Сергий (у Макар. «Сергие») родися во граде Ростове (у Мак.: «рождение имея и воспитание отечества граду Ростову»), отца благочестива, Кирилла именем, матери же Марии, яже благословенный плод заченши (Мак.: «иже благословениа плод заченши»), родиста сего священнаго (Мак.) отрока. Глаголется же, яко прежде рождения святаго отрока (Мак.) взыде мати его в церковь во время божественныя службы (Мак. «литургиа»), и абие отрок прогласи в чреве матерни трижды: и от сего разумно бысть всем, яко велий светильник хощет явитися и Троици служитель; еже и бысть.⁶⁵ Таже приспевшу рождению, родися има сын и нарекоста имя ему Варфоломей.⁶⁶ И от нележа родися (с момента рождения), в среду и в пяток от сосцу не ссаше, и млека не ядяше. Спеяше же отроча (возрастал), и единорожденных, и сверстник своих преходя возрастом и мудростию. По сих же вдаста его в научение божественных писаний (Мак.: «грамоте»), иже божественым откровением старцу некоему или паче ангелу Божию, послану во образе старца, и тако вскоре даровавшу ему без труда разумети писания.⁶⁷ Родители же его видящя сия бывающая, зело радовахуся. Таже (потом) преселистася родителя его от прежереченнаго града Ростова в место нарицаемое Радонеж, имуще отрока с собою (нет этих слов у Макар.), не яко место оно славно или нарочито, но на том месте Богу изволившу прославити угодника своего.⁶⁸ Посем родители его от жития отъидоста, вручиста стяжания (имущество свое) Варфоломею.⁶⁹ Видев же священный отрок преставление родителю своего, помышляше в себе, глаголя: яко и аз смертен есть и всяко умрете имам, яко и родители моя, и умысли раздати имение своего отца, ничто же себе оставив на нужную пищу, уповаше бо на Бога, дающаго пищу алчущим. Таже по сих власы своя остризает (у Мак. «отлагает») и долу влекущая мудрования умерщвляет, и наречено бысть имя ему Сергий. Прият же в начале жития своего, первое смирение, к сим бдение, и сухоядение, и молитвы слезами напаяемы. Многа же и неизреченная прия от бесов досаждения, их же невозможну подробну сказати.⁷⁰ Сим же так бывающим (т. е. после того как он превозмог все тяготы пустынной жизни), слава прохождаше о нем (о его подвигах и о святости его жизни) повсюду. Стекахуся же мнози от окрестных стран и градов пользы ради. Он же не леностно приемляше приходящая к нему.⁷¹ Созда же прежде дом молитвенный. Таже по сем монастырь честен воздвиже, в славу святыя Троицы, яже есть до ныне благодатию Христовою. Собрашася же к нему инок множество и тако общее житие состави, и заповеди ничто же своим звати, но вся обща имети, глаголя к ним: «блюдите, братие, иже великая оставлше, да не како малыми заняти будем. И тако по вся дни утверждаше Христоименитое стадо. И бяху подражающе святаго послушанием и верою (у Макар.: «и тако послушаху, с верою возмогающе и ревнующе тому»...) и жестокому житию ревнующе по мере силы своея; не яко предстателя, но яко на ангела Божия взирающе и во всем бяху повинующеся тому;⁷² и мнози от ученик его яко светила просияша, подобни быша наставнику своему. Тем и даром пророчествия от Вседержителя Господа почтен быв, яко прорицати на многа времени разстоящия, от них же едина есть сие: некогда убо великому князю Димитрию Иоанновичу скорбящу о нахождении безбожных агарян, – святый молитвою того вооружив, глаголя: «изыди противу варвар, всяко сомнение отверг себе и Богу помогающу ти победиши, и здрав, во своя возвратишися», еже и бысть по пророчеству святаго.⁷³ Прият же от Бога и дарования чудес многих: толико бо ему дадеся яко и мертваго воскресити. Некый человек, ему же единочаден сын болезнию одержим, и верою и надеждою влеком, понесе и к святому, иже на пути изнемогши скончася: и сего блаженный молитвою воскреси. Паки же оскудению бывши в монастыре, святый же помолися всех благими изобиловаше. Приходят же к нему и от дух нечистых одержимы, и абие еще не дошедше святаго, нечистии дуси отгоними бываху от них, прокажении очищахуся, слепии прозираху. И просто рещи: вси иже с верою приходящии различными недуги одержими, не токмо здравие, но и пользу приимаху, и отхождаху в домы своя. Бяше же святый всякими добродетельми украшен и слово его духовною солию растворено, и от сего любим бяше всеми. Бяше же онаго места вода далече сущи, братству же велику умножившуся святый же помолився воду произведе, яже есть и до ныне на всяку потребу монастырскую изобилующи: многа же и исцеления бывают от воды тоя даже и до сего дне. Сподоби же ся и видению Пречистыя Владычицы нашея Богородицы и Приснодевы Марии, со двема апостолома, с Петром и Иоанном, обещания дающи ему, еже не отступной быти святаго обители, и по его отхождении братию посещати. И се яви Богомати угоднику своему множество братства в нощном видении зрети, ученик своих птицами красными неизреченных красот от добродетельна их жития.⁷⁴ Такоже егда служаше святый божественную литургию, ангел Господень сослужаше ему, якоже свидетельствоваше известно видевый сие, в добродетели совершенный Исакие, ученик его. Другому же ученику его, Симону еклесиарху, такожде и тому сподобившуся видети служаща святаго, и божественному огню ходящу по жертовнику и осеняющи алтарь и святаго окружившу от главы и до земли, мнети его во огни стояща. И хотяща святому причаститися, той же божественный огнь свится, яко же некая божественная плащаница, и вшедши в божетвенный потирь, и тем причастися святый. Жив же святый лета довольна в добром воздержании и труде, и многы монастыри составив, и учеником своим вручив пасти, и наказав богоугодне жити, и в глубоце старости сый, уведев своего отхождения к Господу, и прежде шести месяц преставления своего призывает братию. И старейшине своему присному ученику сущу, в добродетелех совершенну и в зельном послушании возлюбленному, Никону именем, повеле пасти стада христоименитое внимательне же и праве, яко слово воздати хотящу о сем.⁷⁵ И оттоле безмолвствовати нача. И месяца септеврия в недуг впаде телесный, и разуме конечное свое к Богу отхождение, призва братию, поучив их о пользе, глаголя: «внимайте, братие, себе имети чистоту телесную и душевную, и любовь нелицемерную, злых и скверных похотей отлучатися; пищу же и питие имети не мятежно, наипаче смирением украситися, супротисловия удалятися, и ничто же вменяти жития сего честь и славу, но вместо сих еже от Бога богатую мзду ожидати и вечных благ наслаждения». Сия же и ина многа изрек яже о пользе.⁷⁶ И в самый час исхода своего животворящих тайн причастися и братию благословив, святу свою и священную душу Господеви предаде. Поживе же всех лет живота от рождения своего семдесят осьмь.⁷⁷ Положено же бысть пречистое тело его и трудолюбное на одре честно, лики инок обстоимо, псалмы же и песнми надгробными проводивше. Бяше же лицо его светло, не яко обычай есть мертвым, но яко спящу, показующу его душевную чистоту, иже от Бога мздовоздаяния трудом его. Положени же быша мощи его в обители, в ней же подвизася, многа исцеления дарующи приходящим с верою. Посем же минувшым тридеситим летом, егда восхоте Бог прославити и угодника своего и большу обитель воздвигнути во славу свою, явися блаженный некоему мужу благоговейну, иже многу любовь ко святому стяжавшу, да возвестит настоятелю, глаголя: почто толико лет остависте мя под землею и от воды утесняему? И тако стекошася державнии князи и священнии собори, иноци же и простии, и раскопавши землю и открывши гроб, безчисленных аромат благоухания исполнишася, и видевше чудное зрение, прославиша Бога, яко не токмо честное его тело цело и нетленно соблюдеся, но и одежда его, в ней же погребен быть, цела бяше вся и непричастна тлению, и вода от обою страну гроба стояша ни ризам святаго никакоже прикоснуся. И сотвориша раку, и тамо положиша его честно, иде же и до ныне честныя его мощи и многоцелебныя всем видимы суть и исцеления не оскудно подавают с верою приходящим.⁷⁸ Совершается собор его в том же монастыре, иде же положен бысть, месяца септеврия в двадцать пятый день...

«Роуская оубо всеосщ҃енная, и великая ц҃ркви, справославными к҃нзи, инокиже и простии, ев҄альских источник струями напоившеся, д҃ховно веселимся, внарочитом празднице, добраго пастыря и оучителя». (Служба преп. Сергию, стих. на литии).

Приидите честное и святое постник сословие, приидите отцы и братия, приидите празднолюбцы, приидите овчата духовная, прииди стадо Христоименитое, всяка бремена мирских вещей отвергше и чисти непорочному да явимся: се бо свыше наше звание прииде, се духовная трапеза предлежит, се хлеби неистощаемая пища и масло милования, се целомудренная пшеница и вино, душу и тело веселяще, се труба, человеки обновляющи и бесом неисцельну язву дающа, божественный огонь, иже терние греховное попаляюще, се убо Русская земля, паче же вселенныя похвала. Тем же приидите, яко да насладимся добраго нынешняго торжества, преподобнии и яко подражателю, ученицы яко учителю достойную честь воздающе, чада яко отцу составльше праздник и торжество светло в нарочитом празднике добраго пастыря и учителя: зело бе честнейше злата и камения многоценнаго, все же честное земных недостойно есть сему празднеству. Рци убо явленнейше яко да навыкнем яснейшим: что звание? кто трапезу предложивый? (что значит этот призыв, кто трапезу предлагает?), Аще хощеши, рече, слыши разумно и увеси истину (если хочешь узнать, слушай внимательно и узнай истину): не бо от человека звание наше (призыв к нам), но самая святая и животворящая Троица ликовати нас воздвиже, и ангелы с нами праздновати устрои, всем общее веселие содея в память своего угодника, иже мир своим житием просветившаго и беси от Христова стада отгнавшаго, иже равноангельским житием своим землю же и самый воздух радости исполнившаго духом Святым вверенное ему иноческое стадо на пажити животныя наставившаго... Откуду сий таковый светильник возсия: егда от Иерусалима или от Синая? ни, рече; но Русская велика земля, иже прежде многа лета живши без просвещения, сподобльшися, яко той превзыти иже исперва сподобльшихся просвещения, глаголю же, очистившися от идольскаго поклонения, вместо же сих процветши православную веру и монастыри честныя, в них же светильницы возсияша, яко же бо рещи вселенную просвещающи, в них же бысть и сей великий Сергие⁷⁹...

...«Слава Богу о всем и всяческих ради, о них же всегда прославляется великое и трисвятое имя, еже и присно прославляемо есть! Слава Богу вышнему, иже в Троицы славимому, иже есть упование наше, свет и живот наш, в Него же веруем, в него же крестихомся, о нем же живем и движемся и есмы (Деян. 17:28)! Слава показавшему нам житие мужа свята и старца духовна! Весть бо Господь славити славящаго и благословити благословящаго, еже и присно прославляет своя угодники, славящая его житием чистым и богоугодным и добродетельным. Благодарим Бога за премногую его благость, бывшую на нас якоже рече апостол: благодать Богу о неизреченном Его даре (2Кор. 9:15). Паче же выне должны есмы благодарити Бога о всем; еже дарова нам такова старца свята, глаголю же господина предобраго Сергия, в земли нашей Рустей, в стране нашей полунощней, во дни наша, в последняя же времена и лета; гроб его у нас и пред нами есть, к нему же верою повсегда притекающе, велико утешение душам нашим приемлем и от сего зело пользуемся, – да по истине велико то есть нам от Бога даровася дарование!...⁸⁰ ...Днесь ныне похваляем есть Сергие блаженный, преподобный отец наш. Сему убо вправду подобает дивитися и достойно его ублажати: зане и он человек подобострастен нам быв; но паче нас Бога возлюби, и вся красная мира сего яко же уметы вмени и презри, и усердно Христу последова, и Бог возлюби его: и яко угодити ему искренно потщася, и удиви и прослави его: славяща мя бо, рече, аз прославлю, уничижающая же мя без чести будут. И его же Бог прослави, кто может похвалу его сокрыти? Лепо убо и нам того в правду достойно ублажити и похвалити: похвала бо еже его от нас не оного что пользует, но нам паче спасение содевает... Сей приведе к Богу многих души чистым своим и непорочным житием, преподобный игумен, отец наш Сергие святый, старец чудный и добродетельми великими украшен, тихий и кроткий нрав имея и смиренный и добронравный, приветливый и благоуветливый, утешительный, сладкогласный и благоподатливый, милостивый и добросердый, смиренномудрый и целомудренный, благоговейный и нищелюбивый, страннолюбивый и миролюбивый и боголюбивый, иже есть отцем отец и учителям учитель..., столп терпения, иже поживе на земли ангельским житием и возсия в земли Рустей аки звезда пресветлая, иже за премногую его добродетель людем на пользу бысть, многим на спасение, многим на успех душевный, многим на потребу, многим на устрой, иже бысть христолюбивым князем великим Русским учитель православию, вельможам же и тысущником и прочим старейшинам и всему синклиту и христолюбивому всему воинству еже о благочестии твердый поборник... Бяше же видети его хождением и подобием ангелолепными сединами честна, постом украшена, воздержанием сияя и благолюбием цветый, кроток взором, тих хождением, умилен видением, смирен сердцем, высок житием добродетельным, почтен Божиею благодатию: понеже Бога чтяше и Бог почте его и честь многу положи на нем; он Бога прослави и Бог прослави его... Сего же угодника своего, преподобнаго отца нашего Сергия, тако Бог почте и тако прослави его, яко да молитвами его мнози от болезней здрави бываху и мнози от недуг исцеление прияша, мнози от бесов избавишася и от многоразличных искушений очистишася; толико бо Бог прослави угодника своего не токмо в той стране, в ней же святый живяше, но и в иных градех и в дальних странах и во всех языцех от моря и даже до моря; не токмо в царствующем граде, но и в Иерусалиме; не токмо едини православнии почудишася добродетельному житию преподобнаго, но и невернии мнози удивишася... жизни его: бяше бо Бога возлюби всем сердцем своим, и ближняго своего, яко сам ся, равно бо любяше всех и всем добро творяше и вси ему благотворяху..., и мнози к нему прихождаху, не токмо ближнии, но издалеча и от дальних градов и стран, хотяща видети и слышати слово от него, и велику пользу и душевное спасение приемлюще от поучения и дел его... Иже убо словом учаще, тоже и сам делом творяше, и не токмо от поучения пользовахуся, но и многажды некыим зрящим нань точию от зрении его приимати пользу многым... И упасе бо порученное ему от Бога стадо свое в преподобии и правде, образ во всем быв своим учеником... Сии убо преподобный отец наш Сергие из детска возраста и от малых ноготь предасться Богу и от самых пелен Богу освятися, и из млада церкви вельми предстояше и часто в ню ходя, поучался в святых книгах, навык божественная писания и сладостно их послушая и в них всегда поучашася... Измлада бо возлюби монашеский чин и в онь оболкся, измлада во всякой добродетели прилежно постився и всяку добродетель иноческаго жития исправи, и свет благодатный возсия в сердци его, и просветися помысл его благодатию духовною, его же преспеяше в житии добродетельнем... Не прильнеть ум его никацех же вещех земных и житейских печалех, и ничто же не стяжа себе притяжания на земли, ни имения от тленнаго богатства, ни злата, ни сребра, ни сокровища..., но сице стяжа себе паче всех истинное нестяжание и безъименьство, и богатство нищету духовную, смирение безмерное и любовь нелицемерную, равну ко всем человеком, и всех вкупе равно любляше, равно чтяше... Кто бо слыша добрый его и сладкий ответ не насладися когда сладости словес его? Или кто зря на лице его, не веселяшеся? Или кто видя святое житие его, не покаяся? Или видя кто кротость его и незлобие, и не умилися? Или кто сребролюбец бысть, видя его нищету духовную, и не подивися? Или кто похищник и гордостию превозносяйся, видя его высокое смирение, и не почудися?... Несмь бо аз видел во дни сия и в нынешния времена и в наша лета сицева мужа свята и совершенна во всяка дела блага и украшена всякою добродетелию всячески, яко же от прочих святых, иже кто возлюблен есть от Бога, якоже сей преподобный Сергие: сей ми есть и первый и последний в нынешния времени; сей провосиял есть во стране Рустей яко светило пресветлое посреди тьмы и мрака.⁸¹

Сия бяше дщи исповедника Христовы веры, великаго князя Михаила Черниговскаго. Прежде бо предивнаго великаго князя Михаила, супруга бе неплоды. И оба аки голубице прилетаста, теплою верою ко образу пресвятыя Богородицы, и ко преподобным отцам, Антонию и Феодосию, иже в Киеве, со слезами просяста подати има плод чрева. Во едину же от нощей явися има Пресвятая Богородица, и рече: «дерзайта, молитася, прията суть молитва ваю, и вознамение себе приимита благоухание». Она же ужасостася, и воспрянуста от сна, и обретоста при возъглавии своем, во узле, благоухание, и вложше в кадильницу, и исполнися их весь дом благоухания. Вельможи же их и вси домочадцы удивившеся неизреченному тому благоуханию. Святый же великий князь Михаил и с супругою своею паки со слезами молитву воздаста. Посем же паки явися има святая Богородица, вдающе им голубицу на руку, и паки дом ею наполнися благоухания. И паки третицею Пресвятая Богородица, со преподобныма отцема Антонием и Феодосием явися има, рекущи: «идита в дом ваю, зачнета бо и родита дщерь, и наречета имя ей Феодулиа: будет бо тая служительница церкви Влахернстей». Приспе же время рождению, и родися сей благоросленный Христу плод, и нарекоша имя ей пореченному гласу Богородичну Феодулиею. Егдаже доилица ея ядяша мяса, тогда святая, еще в пеленах сущи, не вкушаше во весь день от доилици млека сосец ея; мати же святыя о сем помышляше, что будет? Во един же от дний виде себе крылату и возлетающу, и отдающу отроковицу в руце Богови. И возъбнувши, благодари Пресвятую Богородицу о всех бывающих от нея. И тако крестиша отроковицу в Печерском монастыре, во храме Пресвятыя Богородицы. Благоверный же великий князь Михаил сам поучаше ю Божественным книгам. Прочая же научеваше ю болярин его Феодор, зане же бе мудр и навычен философии. Отроковица же вельми быстро учашеся, и преспеваше во учении и в красоте лепоты лица своего всех сверстниц своих. Мнози же слышавше о премудрости и о красоте лица ея, друг перед другом стужающе отцу ея, хотяще пояти ю в жену себе, и не получиша. Во время же то бе в Суждале великий князь, именем Мина, вельми благочестив; род же его влечашеся от Клавдиа, кесаря Римскаго. Той же князь Мина, всех преодолевая саном и честию ужик своих, и умоли рождших святую, и обещаста вдати ему в жену. Отроковица же вельми о сем печалуяся, еже бо соблюсти ей чистоту телесную, и непрестанно молящися пресвятей Богородице со слезами. Пресвятая же Богородица явися ей, повелевая послушати родителей своих, и рече ей: «скверна не примесится телеси твоему». И повинуся родителема своима, пойде к Суждалю, и еще ей идущи путем, обрученный ей во отечествии своем отъиде ко Господу. И егда достиже Суждаля, и обрете монастырь Пресвятыя Богородице риз положения, и пострижеся ту, и преименовася Евфросиниа. И велие покорение ту сущым черноризицам имущи, сама же велми плоть свою изнуривши, душу же просвещши, и всяк вид добродетели исправивши. И толми паче подвизася на добродетели, яко от Бога и дар пророчествия прия, и начасте в церкви Божии изуст Божественное писание о пользе душевной ясно всем сказоваше, и приходящыя к ней различными недуги изцелеваше многи. И во время нахождения нечестиваго Батыя обитель свою от пленения его молитвами своими сохрани, и тако преставишася в вечныя обители, месяца септевриа в 25 день – воньже прежде обещание ко Господеви Богу своему сотворивши, в тойже и конечное от земли отхождение к Богу прият. Ему же слава, ныне и присно; и во веки веков. Аминь.

Бысть убо во дни благочестиваго и великаго князя Василия, сына Василиева, Владимирскаго и Московскаго и великаго князя Бориса Тверскаго и князя Феодора Рязанскаго, кормила же церковная правящу великаго Нова града и Пскова, Архиепископу Евфимию брадатому в лето 6904 (1396), бысть во едином от монастырей Белозерских, в Кириллове именуемем, житель старец именем Савватий, пребываше со инеми монахи, работая Господеви день и нощь, изнуряя тело свое постом, и бдением, и молитвами. Бысть же той старец в послушании у игумена и братии, и вся службы монастырския проходя добре, любим бе от всех и почитаем, яко образу ему быти прочым иноком во всех добродетелех. И стужив си (впав в уныние, в печаль), зане не восхоте славы от человек приимати, но от единаго Бога славы ища, тщашеся бо в лучшая приходити жития блаженный. И посем нача молити игумена и братию о исхождении своем (об отпуске его) из Кириллова монастыря. «Есть, рече, в новгородских монастырях монастырь на острове, глаголемем Валаам, и тамо по вся нощи труждаются братия, делающе своима рукама и от того пищу себе нужную приимаху, – да отпущен буду с благословением вашим в сей монастырь». И еже проси, сице и получи. По некоему же убо Божию смотрению, прииде в монастырь он рекомый Валаам, во обитель святаго Преображения Спасова и тамо прият быв честне, труждаяся с братиею, и прилагая труды к трудом; и бе убо любим всеми, и пребыв тамо не мало время; и плоть истнив (истощив) до конца жилище явися святаго духа. И начаша братия хвалити преподобнаго Савватия о добродетельном его житии; он же тяжко си внят о сем (с сокрушением, с тугою внимая сему), и снедашеся утробою (сокрушался внутренно), видя себе блаженный почитаема от братии и помышляя святый безмолвия путь гонити (последовать путем безмолвия). И слыша о острове сем, о немже нам слово, иже Соловецкий именуется, на мори окиане, и Богом наставляем, тайно изыде из обители Валамския, и пойде к предреченному острову, иже глаголется Соловецкий. Не дошедшу же ему острова, прииде на реку, зовомую Выг, и обрете тамо старца именем Германа. Герман же поведа ему вся поряду о острове Соловецком и тако поидоста оба на остров. И пришедта водрузиста честный крест, и келлию себе постависта и начаста труды к трудом прилагати, и землю копаста своима рукама, и от того ядяста. По времени же, в день недельный, преподобный Савватий изыде из келлии покадити креста Христова и слышашеся вопль ему аки биют некоего. И глас бысть: «изыдите от места оного, изыдите: место бо сие будет на собрание иноком преподобным». Святый же Савватий с молитвою возвратися в келлию свою, и поведа подругу своему Герману иже слыша глас. Герман же прииде на место, идеже рыболовцы живяху, и ту жена рыболовца оного поведа старцу, како дубцы (прутьями) ея (её) биста два юноша светла, и глаголаста: отыдите от места сего, сие место водворение иноком будет. Старец же отиде, и поведа преподобному Савватию: он же прослави Бога о сем. Посем же преподобный Савватий, проуведа свое отхождение и восхоте причаститися тела и крове Господа нашего Иисуса Христа. Божиим же строением двема денма преплы до Выга наволока (мыса), до часовни, и тамо прият причастие пречистаго тела и крове Владычни, Господа нашего Иисуса Христа, от игумена Нафанаила. И рече игумен преподобному: «да всяко (во всяком случае) пойдеши к часовне, аз же иду до некоего человека больна причастити его», – и мир дав игумен к преподобному и целование о Христе, и отиде. Святый же вшед в келлию, и затвори себе. И в то время прииде купец именем Иоанн и вышед из насада (плоскодонного судна) и поклонися у часовни святым образом, Спасову и Пречистыя, и всех Святых, и прииде к блаженному Савватию благословитися от него. Святый же даде ему благословение, и поучив его довольно от божественнаго писания. Купец же той Иоанн богат зело, и нача святому давати от имения своего, еже на потребу. Святый повеле дати требующым. Иоанн же оскорбися вельми о сем, яко не взя святый у него милостыни. Рече же святый: «чадо Иоанне, препочии (отдохни) зде до утра, и узриши благодать Божию, и безтрудным путем отидеши в путь твой». И в том часе бысть трус (буря) велик в мори и в реце. Иоанн же ужасеся зело, и не поеха, и пребысть до утра. Утру же бывшу, прииде Иоанн в келлию преподобнаго Савватия, хотя от него благословение прияти и отити в путь свой. И видев святаго седяща в мантии и в кукуле (клобук), и кадильница в скрай его стояше, а душа его к Богу уже отиде, келлия же святаго исполнися неизреченнаго благоухания. И прииде игумен Нафанаил, и виде святаго преставлшася. Игумен же облобыза преподобнаго мощи и со слезами вси ту прославиша Бога, яко таковаго дара сподобишася от Бога прияти. И надгробное пение совершивше со Иоанном честно, и честныя и святыя его мощи во гробе положившя, и вдашя персть персти, месяца септебрия в двадесят седмый день, егоже и память в той день уставиша праздновати, блаженнаго же игумена Зосимы, месяца априллиа, в седмый надесят день. Богу вашему слава, ныне и присно, и во веки веков.

Сей преподобный Григорий от града бе Галича, от благочестиву и славну родителю рождся, боярска рода: воспитався от нею в смиренномудрии, играм бо детским не внимаше; но точию божественным книгам поучаяся и родителема повинуяся во всем, кроме сана, о немже нимало брежаще. И разсмотрив суету мира сего, изыде от родителю своею в монастырь, ко игумену преподобному Макарию, в место зовомое Желтыя воды: и от него пострижеся в монашеский чин, и бысть изрядный постник, яко мнозем дивитеся тамо терпению, и смиренномудрию, и кротости его. И за многую его добродетель сподобляет его Макарий священства сан восприяти. Таже и игумен бысть в монастыре Святыя Богородицы, честнаго Ея Рождества, близь езера: и болшим трудом прилежаше. В тоже время бе тогда в Галиче князь Юрий, брат великаго князя Василия Димитриевича, его же святый, по умолению его, два сына его просвети святым крещением. И пронесеся слава его и до самого великаго князя Василия Димитриевича, и хотяше его граду Ростову архимандритом быти. Он же славы не хотяше от человек слышати, отиде от туду в незнаемая и непроходимая места, иже прилежаху града Вологды. И слышав о преподобнем Дионисии Глушицком, прииде к нему в монастырь, Пресвятыя Богородицы, честнаго Ея Покрова, в лето 6920 (1412). И виде его преподобный Дионисий, яко делатель есть Христовых заповедей, даде ему келлию, идеже создана церковь, на полуденной стране от болшия лавры, в пустыни, зовома Сосновцем: и тамо пребываше в послушании святаго лет 10. И потом испросив благословение от Дионисия, и изыде в пустыню, в лето 6930 (1422). И шед на восточную страну от тоя пустыни, вдалее 28 поприщ. И там бяше весь (поселение) не далече отстоящи от тоя пустыни, вдалее 16 поприщ, еяже некто житель именем Мартин дарствует преподобному по его прошению сел своих и земли, елика требует на составление обители. И на том месте святый крест постави, и келлию созда, и монастырь возгради, и церковь созда во имя Пресвятыя Богородицы, честнаго и славнаго Ея собора, в лето 6934 (1426), и трапезу и келлии постави по чину, и прилагаше труды к трудам, и во всенощных стояниих пребываше не ослабляяся. В лето же 6939 (1431) шедшу блаженному в славный град Москву, тогда владущу князю Юрию, а князю Василию Василиевичу на Коломне сущу, занеже зависти ради изгнаша его. Святый же наказал того князя Юрия глаголя: не подобает тебе, княже, власти прияти не управя своего жития: зде убо приимеши укор, а онамо суд, и ина много изрече ему и тако увеща его отити на отца его наследие в Галич. Князю же Василию Василиевичу пришедшу на свое княжение к Москве, и святому многу честь возда, и отпусти его в монастырь свой. В таже лета князь Димитрий пришед на град Вологду в зимное время многою ратию, и многа зла учини. Святый же от ревности распаляем, за христианы прииде скоро ко граду, и много с прещением и обличением наказав того князя, о злобе его на христианы, яко за сие имаши погибнути. И не терпя обличения его князь, повеле его с мосту ринути. Он же с радостию подят нанесенное от него, благодаря Бога. И по сих, по словеси блаженнаго, много войска избиени быша; святый же отшед в монастырь свой, славя Бога и Пречистую Его Матерь; и пребываше Ангелски живя, и прихождаху к нему многи. Он же учаше не точию словесы, но и делы и никогда же измени правила своего молитвеннаго и прочих добродетелей. И по сем разумев свое к Богу отхождение, призвав священномонаxа Александра и братию, и поучив их, преда его им паствити я (управлять ими). И посих изнемог, конечнее завеща им о знамении себе же и монастыря. К томуже прирек: «егда душа моя от тела разлучится, никоеяже чести мене сподобите, но тако просто по земли влекуще за нозе мои предайте мя блату». И сия рек, возляже на одре своем, прекрестився знамением честнаго креста, предаде честную свою душу в руце Божии. В лето 6957 (1449) в четверток, в 6 час дне. Богу нашему слава, ныне и присно, и во веки веков, аминь.

Сей преподобный отец наш Савва бяше от Тверския страны, града Кашина, не проста рода, но от велика, и всем тамо знаем бяше. Воспитан же бысть родителема своима в благочестии, – еще бо ему в юне сушу теле, совершенну же бывшу добродетелию; аще бо и мирская ношаше, но вся иноческая творяше святый: глаголю же (разумею) пост и молитву, и прежде всех сверстник своих обреташеся в церкви. Посемже рачением божественным пострижеся во иноческий чин, в некоем от монастырей, иже бяху житие живяху жестокое. И во всех службах монастырских смирение безмерное имяше ко всем и вси ту сущии отцы яко Ангела Божия имеяху святаго посреде себе. Сродницы же святаго и вси велможи тоя земли похваляюще жестокое святаго воздержание. Обаче же святый не любяше от юности хвалы от человек. Посем якоже Авраам отъиде от земли своея и от рода своего, яко да никто же познает его. И прииде в преименитый великий Нов-град, яко един от нищих и странных, и никомуже себе объяви. И Богом наставляем прииде на Вишеру реку, и тамо малу колибу (хижину) водрузи, и моляшеся тамо пред образом Пресвятыя Богородицы. И прилучися человеком некоторым от града видети святаго, на молитве стояща, и от комаров лица ему не видети суща: и удивишася того житию, и похвалиша того истинна быти человека Божия. Святый же, видев, яко познан бысть, отиде близь реки Сосницы, тако нарицаемыя: и тамо вселися, иде же и жесточайшее житие нача жити святый. Человецы же даяху потребная, приносяще святому, и начашя приходити к нему. По мале же и слух прохождаше о нем, добродетельнаго ради жития его, во всем великом Нове-граде. Посемже прииде к преподобному Савве преосвященный архиепископ Иоанн и почюдися блаженнаго отца терпению и смирению зельному его и воздержанию. И с любовию благослови святаго отца Савву и много архиепископ Иоанн поучив святаго, и беседова с ним святый о ползе душевней, и учредив (ободрив) святаго старца, возвратися во град, похваляя святаго. И оттоле архиепископ велику веру стяжа к блаженному Савве, велика его именуя, и всегда потребная посылаше к святому. Посем возвратися блаженный Савва от Сосницы и испроси от жителей ту место над Вишерою рекою и тамо обитель состави, и церковь воздвиже, во имя честнаго Вознесения Господа Бога и Спаса нашего Иисуса Христа, и братию совокупив о Христе. Пожив же блаженный отец наш Савва лета довольна. И яко прихождаше время отшествия его, в болезнь телесную впад, и братию поучив о ползе душевней, честных Таин Христовых причастився, и душю свою мирно Господеви предаде. И положено бысть святое и трудолюбное тело его в монастыре, созданнем от него, между столпа и церкве святяго. Идеже положен бысть святый, многа и различна исцеления бывают от гроба его, даже и до сего дне, с верою приходящим. Богу нашему слава, ныне и присно, и во веки веков.

Преподобный убо Гурий рождение име и воспитание во граде Радонеже; родом бе от менших боляр, имя ему прежде бе Григорий, сын отца Григориа же, зовомый (по фамилии) Руготин. Живя же прежде у некоего князя, именем Иоанна, смирен и тих имея нрав, и к церкви часто прихождаше, посту же и молитве, и милостыне, и прочим добродетелем прилежаще, безсопружное житие живый. И виде его господин добронравие, вручи ему весь дом свой, и сего ради оболгав бысть господину, зависти ради от клеврет своих, яко прелюбодеет с женою его. Господин же веру ем клевещущым на него, повеле его убити. Сын же господина его, разумен сый, умоли отца своего, да не ускорит клевещущим веру яти, и не посрамит себе: испыта потонку о нем. И уведе яко неповинен, свободи его от смерти, обаче отец его от ярости побеждаем, всади его в ров глубок. И два лета в нем препроводил, алчбою озлобляем, и пища даема ему не человеческа, на три бо дни вметаху по единому снопу овса и воды по оскуду. И некто друг ему обеща снеди ему приносити. Он же не хотяше, но веле ему приносити бумаги и чернил, и писаше седя в темнице книжицы в научение детем и даяше продавати, и цену их нищим раздавати. И Божиим смотрением изыде из рова и из дому того никому же ведом. И прииде в монастырь Пресвятыя Богородицы, честнаго и славнаго ея Успения, иже Иосифов (Волоколамский) именуется: и пострижеся ту, и бысть изряден постник и черноризец. Последи же бысть игумен тоя обители. Потом же остави паству немощи ради телесныя. И паки по мале посылается от царя на игуменство в Селижаров монастырь. Егда же покори Бог царю Иоанну Василиевичу град Казань, тогда советом Преосвященнаго Митрополита Макариа и прочих святителей российския митрополии, поставлен бысть, по жеребию, граду Казани первый Архиепископ, в лето 7063 (1555), февруалиа в 7 день. И посла его царь в Казань, с великою честию, и многия церковныя драгия вещи вдав ему. И проводи его с честными и животворящими древами, и со иконами, с митрополитом и со всем священным собором, и все народное множество с литиею. И тако прииде во град Казань и восприя престол, не восхитив власти, ниже гонив честь, но от Бога приим. Живяше же преподобный богоугодно, нищая кормя, и неимущыя всякими потребами удовляя, бедныя и сироты и вдовы заступая, и от бед изимая, и труды ко трудам, и обнощное стояние присно в молитвах приносяше к Богу. Неверныя учаше и наказуяше, како познати и веровати во святую Троицу, во Отца и Сына и Святаго Духа, единаго Бога. И многи неверныя в веру приведе, и крести. Посем в болезнь впаде, и многое время боляше, но никакоже преможе телесная болезнь душевное любомудрие святаго, и тогда бо к церкви повелеваше себе носити. И тако трилетное время труждашеся. И познав свое отшествие к Богу, призва Архимандрита Варсонофиа и повеле ему возложити на ся схиму. В четвертый же день декемвриа, в 8 час нощи, отиде к Господу в лето 7072 (1564).

Пасе церковь Божию 8 лет и 9 месяц. И положиша тело его во обители Спаса, Боголепнаго Преображения, за алтарем у болшия церкве, погребше честно со псалмы и песнми духовными. Преподобный же Варсонофий, родом бе града Серпухова; имя ему бе прежде Иоанн, сын некоего священника, именем Василиа. От него же вдан бысть в научение грамоте, и не достигшу ему возраста, пленен бысть от крымских татар, и тамо работая им со всяким усердием, яко и сна мало приимати, и изуст пояше псалмы, яже помняше. Невернии же видевше его такова суща, добронравна, и праведна, и нелицемерна к трудом, и смирена, и без прекословия работающа им, удивишася о нем, и повелеша ему во ослабе жити. И по трех летах искупи его отец его от татар. И прииде к царствующий град Москву и пострижеся, в монастыре, зовомом Андроникове, и прохождаше добре житие свое. И ради добраго его жития, поставлен бысть игумен в монастырь, иже на Песноше. Потом архимандрит бысть, Боголепнаго Преображения, во граде Казани: и тамо созда монастырь, и церкви, и келлии постави. И живяше добре, и Богоугодне: постом бо и молитвою, и бдением тело свое озлобляя, и вериги на теле своем ношаше, никому же ведущу, и бысть во всем образ братии к добродетели. И многи неверныя обрати к Богу, и крести. Ко преподобному святителю Гурию любовь нелицемерную имяше и во всем ему повинуяся. Потом-же поставлен бысть в епископы граду Твери. И добре пасяще словесное стадо Христовых овец. И наипаче себе простре к подвигу: в посте бо, и в молитвах и слезах и во всенощном стоянии выну пребываше, Многа же болящыя уврачева: бе бо и врачебней хитрости искусен, мзды же никакоже ни откого же приимаше, но туне врачеваше. Болми же врачеваше Духа Святаго благодатию душевныя страсти. Ручное же дело бе ему: греческие клобуки делаше, и посылаше братии своей, и моляше их молити о нем. Егда же бысть святый в глубоцей старости, оставив паству свою, и преселися паки в созданный от него монастырь Боголепнаго Преображения, иже во граде Казани. И паки касается своему делу богоугодному, еже трудитися в молитвах и во бдених. И возложи на себе великий образ. Скорбию же многою и дряхлостию одержим сый, не измени своего правила: но и тогда к церкви возим бываше от учеников своих. Егда же конечно изнеможе, и познав от мира сего отшествие свое к Богу, и причастився пречистых Христовых Таин, отиде ко Господу, Его же возлюби, в лето 7084 (1576). И погребен бысть тамо в монастыре, близь преподобнаго Гуриа. В лето же 7104 (1596), повелением благочестиваго Государя Царя Феодора Иоанновича всеа России, зиждема бе церковь каменна, Преображения Господня. Егда начаша рвы копати, и окопавше гробницы святых, Гуриа и Варсанофиа, октовриа в 4 день, тогда сущу митрополиту во граде Казани Ермогену возвестиша. Он же совершил литургию, и пев понахиду, иде в монастырь со всем освященным собором. И открывше гроб святаго Гуриа, и обретоша полн благоуханна мира; тело же его верху мира яко губа ношашеся цело, токмо мало верхней губе тлению коснувшуся. Такожде и ризы его целы, яко и новых крепчайшим быти. Подобне открыша гроб и святаго Варсанофиа, и обретоша такожде нетленно и цело, точию ногам тлению коснувшуся, кости же не разрушены, но крепки бяху зело, и никакоже слабости в составех имуще, якоже и Гуриа святителя. И преложиша честная их телеса от гробов в ковчеги, и впевше надгробная, поставиша я верху земли, да вси приходящии видят, и целуют с верою честная их мощи. Возвещено же бысть о сем писанием Царю Феодору Иоанновичу, всеа России, и святейшему патриарху Иову. Слышавже святый Царь и святейший Патриарх и весь царский синклит и множество народное, воздаша о сем славу Богу, прославляющему святыя своя. И заповеда благочестивый царь многоцелебныя их мощи хранити верху земли. Повеле же у большия церкве с южныя страны алтаря церковь создати и тамо положити их мощи, еже и бысть, подающа исцеления верным. Богу нашему слава, ныне и присно, и во веки веков.

Сей преподобный Сергий бе от святыя горы, иже пришед оттуду в Россию и вселися в пределех Радонежския области, во обители преподобнаго Сергиа Чудотворца, иже в Маковце: еще бо ему живу сущу тогда. И пребысть у него довольное время, внимая и последствуя святому житию его, и добродетельнаго его ради жития прославися от тамо сущих. И немогий славы терпети, испроси благословение от преподобнаго Сергиа, и отиде в пределы града Вологды, и вселися на великом лесу, на реце Нурме, близ пустыни преподобнаго Павла Обнорскаго, вдалее яко два поприща: еще бо тогда не бяше у преподобнаго Павла братства, но уединенное жительство проходяще. И обрет место потребно на селение, возлюби е, и сотвори молитву, потче крест ту (очистил избранное место), и созда малу келлейцу, и живяше в ней лета довольна, во многих подвизех и трудех, во бдениих же и злостраданиих. И многая претерпе озлобления от злых духов и от разбойников, и многия ради его добродетели и трудов прослави его Бог. Пронесеся бо слава о нем во вся окрестная места, и начаше приходити к нему мнози: ови ползы ради, хотяще слышати от него духовных словес; ови же носяще в телесных потребная ему; инии же и сожительствовати ему хотяще. Блаженный же Сергий всех с радостию приимаше, и всем всяк бываше, яко отец чадолюбивый, да вся приобрящет, по Апостолу (1Кор. 9:19–22). И собрася к нему братии числом яко и до 40, и не бяше хиж (хижин – изб) на обитание им. Святый же созда и келлии им, и церковь воздвиже, во имя Всемилостиваго Спаса, иже бывает празднуемый месяца августа, в 1 день. И стадо свое добре наставляя и управляя, образ сый во всем бывая сам. Часто же блаженный и преподобному Павлу собеседоваше, приходя к нему; подобне же и Павел собеседоваше преподобному Сергию, приходя к нему. И тако препроводив блаженный течение подвига своего в воздержании и в трудех, и дойде до старости. Виде же себе болезнена и к концу приближившася, призвав братию, и довольно поучив их на добродетели. И виде себе к конечному издыханию пришедша, приобщается и Пречистых Таин, Христа Бога нашего тела и крове. И сотворив молитву, предаде дух свой в руце Богу, в лето 6921 (1413). Мощи же его братия вземше со псалмы и песнми погребоша близ храма Всемилостиваго Спаса, егоже сам созда, многа исцеления подающе с верою приходящим. Богу нашему слава, ныне и присно, и во веки веков.

Сия святая, преподобная Параскева бысть от земли Сербскиа, веси Эпиват наричем, от града Каллистратиа, дщи благоверну родителю, ни имением богату, ни области имущу, ниже паки нищетою страждущу. Ей же до совершеннаго возраста достигши, и помысл утвердивши поревновавти житию Ангелскому: и оставивши родителя, и други, и вся яже суть в мире, и последова Христу, и добродетелми себе вперивши; и вшедши в пустыню, и пребываше тамо, безмолвно житие возлюбивши. Житие же рещи воистину ангелское: пощением и бдением тело удручающи, и не бяше у нея видети ястия и пития, но пища и брашно ей бяху слезы и непрестанныя молитвы. Тако все житие свое провождающи, и в той стране добродетелми просветившися, и доблествене пребывши, и ум и чювство в себе смешен и совокуплен имущи, и выну горе пребывающь и ни единому от земных той прилеплятися, но пребываше вся к Богу вперившися. Острый и жестокий путь шествующи и свое преставление уведевши, оставляет пустыню, и приходит в Царь-град. И святая места обшедши, и ту мало пребывши, и до своего отечествия Каллестратия дошедши, и ту предаде блаженный свой дух в руце Богу живу, и почести венцы небесныя прият. Улучижеся в то время корабленику болевшу лютым недугом, и преставлся, погребен бысть близь столпа. И тамо смраду исходящу от гроба того, яко никому мощи минути путем тем. И ту столпнику сущу, понужен бысть из столпа изыти, и трупа оного глубоче погребсти, яко да из глубины не исходит. И инии слышавше, от пути труп вземше, близ тела святыя погребошя. Тело же тоя цело видевше, самоукреплено, и совершено, и здраво, – удивишася. И от сего поразумевше глаголаху: «яко аще бы свято было тело сие, то открыл бы Бог чудесы». И в томже месте оставлше святыя тело, и отидоша. И се един от них, именем Георгий, видев сон таков чуден и ужасен: царицу некую седящую на престоле, и чинов множества предстоящя ей, их-же видел, абие страхом одержим бысть и ниц паде. Един же от онех мужей светлых ем за руку и воздвиже его. И глагола ему: «человече, не боишили-ся Бога, яко тело сие есть, и како сие тело гнило и смердящо с сим телом Божия рабы Параскевы погребосте, но иди ныне вскоре и всем возвести, да от толика смрада избави мя. Аще ли сего не сотвориши, поистине познавай, яко огнем от Бога имате погибнути, ибо и аз человек есмь, и отчина ми есть Эпиват». В ту же нощь некая жена именем Евфимиа тоже видение виде, и оба на утриа всем возвестишя. Слышавше-же вси, и приимше свещы, притекоша на тело святыя. И иземше тело, положишя е в раце, и шедше, положиша е в церкви святых Апостол, еже и целбы точит и до сего дне: беснии исцеление приемлют, слепии прозирание, хромии хождение и всякими различными недуги одержимии целбы приемлют. Слышав же великий царь Иоанн Асень, сын великаго царя Асеня, о чудесех святыя, и желанием возжелав, восхотев пренести тело святыя во своя си. Тогда-бо Фрягом Царь-град держащым, и дани дающе великому царю Асеню Иоанну. Он же ни требова ни сребра, ни злата, ни камения многоценнаго, но труделюбезно подвигся, пренесе святое тело, в свой славный град Тернов; и усрете с Патриархом, и со всем причтом, и народом, со свещами и с кадилы, и со всякою честию положишя е в царстей церкви. Ея же молитвами да сподобит ны Господь царствию своему.

Святый преподобный отец наш Иоанн, великий в постницех, бяше от предел, славнаго града Средскаго, от села нарицаемаго Скрина, в царство Христолюбиваго Петра, Царя Болгарскаго, а Греческаго Константина Диогена. Родителя имый благочестива, и не зело богата, племени Болгарскаго. Родителема же его отшедшема от жития, сей же, от младых ногтей Бога возлюбив, вся оставшая ему от отеческия части нищим и маломощным раздав, сам-же восприим монашеский образ. И от отечества своего изыде, ничесо ино нося на теле своем, точию едину ризу кожную. И на гору некую вшед, высоку и пусту, и ту на добродетель подвизашеся, былием дивиим питаяся. Малу же времени преминувшу, диаволским навождением, разбойницы на него нощию нападоша, иже зело бивше, изгнашя и оттуду. Иоанн же от тоя горы изшед, вселися в пустыню Рылскую и тамо крепко на подвиг подвизася. И в дуплено древо вшед, и в постех и в молитвах, и слезах, непрестанно Бога моля, пребываше. И пребысть-же в том месте шестьдесят лет, от былия точию потребу телесную приимаше, и лица человеча не виде, но со зверми дивиими бяше пребывая. Его же великое терпение виде Бог, на предлежащем месте сланутку израсти повеле. И от того блаженный на многа лета питашеся. Виден же быв некими пастыри, и теми повсюду сказан быв. И мнози к нему притекаху, недужныя своя приносяще: и молитвами святаго здравие приемлюще, отхождаху. И изыде слава преподобнаго по всей земли той, и мнози поревноваше добродетельному житию святаго, и жити с ним изволишя. И в прилежимем вертепе (пещере) церковь сотворишя, и монастирь наставишя; начальника и пастыря имуще преподобнаго. Он же добре пасый стадо свое, и многия Господеви приведе; и велия, и преславная чудеса сотвори; и в глубокую старость достиг, с миром конец житию прият: преставлься к нестареющемуся блаженству, и тамо своими ученики погребен бысть. И времени не малу прешедшу, явися учеником своим и повеле пренести мощи своя в Средский град. Они-же открывше гроб, и видещя цело тело преподобнаго, тли не причастно, и благую воню испущающо, прославишя Бога. И тако с честию пренесошя в Средец, и положишя в церкви святаго Евангелиста Луки. Последи же церковь прекрасна создана бысть во имя его, и в ней преподобнаго тело положишя, творящее дивныя, и преславныя целбы. И минувшым многим временом, двигся угорский краль, со многою победою, и пришед поплени греческую землю: таже и Средца града достиг. И преподобнаго раку с телом взем: слышал бо бяше сам краль о чудесех преподобнаго. И повеле со многою честию ковчег его нести в страну свою и положити в церкви честно во граде нарицаемем Острогоме. И положен быв тамо святый, и непрестаяше творя чудеса и знамения, и целбы многи. От многа же мало да скажем. Слышав убо о нем Архиепископ Острогомский, яко велик есть пред Богом преподобный и прославлен чюдесы во всех странах, не вероваше, но глаголаше: «не вем аз сего в древних писаниих поминаема». И не хотяше поити поклонитися святому. И внезапу прием онемение языка, и познав, яко тоя ради вины приключися ему онемение, тек скоро к ковчегу преподобнаго, и припад облобыза и прося прощения. Святый же угодник сего скоро услышав, и в том часе соуз разреши, и паки ясно глаголати тому подаде. Он же целбу получив, и с плачем прегрешение свое, еже к святому, всем исповедаше, славя Бога и преподобнаго величая. И ина многа и преславна сотвори святый во Угорстей земли. Сия же вся разсмотрив краль, и удивлься о преславных чюдесех святаго; паче же и ужасом велиим одержим быв украсив ковчег святаго сребром и златом, и облобызав мощи его, и с великою честию паки в Средец посла. И тако в святей своей церкви паки положен бысть в лето 6605 (1097) индикта пятаго. Не многу же времени минувшу, внегда⁸² благоволи Бог воздвигнути падшую скинию и обновити болгарскую власть, обветшавшую греческим насилием, и внегда вознесе рог болгарскаго царства, при Христолюбивом царе Асене, ему же имя во святом крещении Иоанн. Той убо в начало царства своего падшия грады болгарския обнови и подтверди. И хождаше покоряя страны, и приемля грады. Дошед же и до Средца, и того покорив, и видев святаго и преподобнаго отца и слышав преславная, яже о нем, и поклонися святому ковчегу (рака, гроб с мощами святого) и облобызав пречестныя мощи его, повеле священному патриарху Василию и иже с ним причту взяти всеславную раку и со многою честию понести пред ним до царскаго града Тернова. И приставив триста воин избранных на провожение святаго. Таже патриарх Василий возлож на кола (на колесницу) пречестную раку, и тако вси сущии с ним с радостию яшася пути (отправились в путь), и идяху с веселием славяще Бога, святыми молитвами наставлеми; с ними же идяху монаси святаго монастыря его, игумен Иоанникий и с ним богобоязнинии иноцы. Сам-же благочестивый царь Иоанн Асень, ускорив и предварив в царский град, повеле скоро устроити церковь во граде, трапезицу (усыпальницу) на положение святаго. И уведев, яко приближился есть патриарх Василий и вси сущии с ним, носяще преподобнаго, изыде сам в сретение его на окоп и вси с ним боляре, и вси властели, и все множество людей, радующеся телесы и веселящеся духом. И видевше поклонишася мощем преподобнаго отца. И порадовашася радостию неизглаголанною. И пребысть на окопе рака преподобнаго отца седмь дний, донележе церковь сограждена бысть. Совершенне же бывши и принесошя и положишя мощи святаго со многою честию, и освятивше церковь боголепно, в лето 6703 (1195), идеже и до нынешняго дне лежит чудотворивое тело преподобнаго, и целение безомздное (безмездное) приснотекущий источник источает. Слепии бо приходяще с верою, просвещаются; слукия (сгорбленные) исправляются; немии быстро и благоглаголиве беседуют; недужнии от немощи в силу прелагаются; беснии исцелеваются. И вси всякими болезнми одержимии притекающе, здравие приемлют. Но, о! пречестная главо и благодати святаго Духа исполненая, Спасово со Отцем обиталище, предстояй у престола всех Царя, и наслаждаяйся света единосущныя Троицы, и Херувимски со Ангелы возглашая песнь трисвятую, велико и неизследованное дерзновение имея, молися всемилостивому Владыце, спаси твоя сродники, единородный ти язык, нечестивыя же истребляй! Помози державному Царю нашему и покори ему вся противныя враги под нозе его. Веру непорочну соблюди. Грады нашя утверди, мир весь умири. Глада и пагубы избави ны и от нападания иноплеменных сохрани ны. Старыя утеши, юныя накажи, безумныя умудри. Вдовицы помилуй, сироты заступи, младенцы воспитай и вся люди твоя сохрани от всех напастей. И в день страшнаго суда шуяя ны части избави, и с десными овцами, молитвами твоими, сподоби и слышати блаженный он глас от Владыки Христа: «Приидите благословеннии Отца моего, наследуйте уготованное вам царство от сложения мира».

Сей богомудрый и праведный отрок, блаженный Артемий, бяше от северных стран, российския земли, близ великаго моря окиана, от предел кеврольския страны, веси нарицаемыя Верколы. Смиренну и благочестиву родителю сын: отца имяше земледельца, именем Косму, нарицаемаго малаго, и матерь именем Аполинарию. Има же и воспитан бысть во всяком благоверии и от младенчества возлюби Бога. В пятое же лето возраста своего, начат паче детскаго обычая ошаяватися (воздерживаться, уклоняться) всякаго глумления (шуток, игр). И начат прилежати к церкви Божии и во всем повинуяся родителем своим, прилежаше навыкая труду земледельства, яко всем сущым соседом его дивитися не обычному малолетия возраста его смирению. Егда же бывшу ему лет двоюнадесяти, и изыде по обычаю со отцем своим на поле земледельства ради во время орания, и по обычаю труждающемся им, абие Божиим смотрением воста ветр велий, и облак с дождем, и гром велий возгреме на месте том. От возгремения же громнаго богомудрый и праведный отрок Артемий предаде святую душю свою в руце Господни. И положено бысть святое тело его в лесе на пусте месте, верху земли, не погребено, но древием озданно, далече негде от церкве. По преставлении же его минувшым 45 летом, восхоте Бог прославити угодника своего сицевым образом: веси тоя, церкви святаго Николая Мирликийских чудотворца, клирик, муж благоговейн, именем Агафоник, ходя по пустыни той, собрания ради плодов земных: и видит на месте том, идеше лежаше тело святаго свет сияющ, и преиде на место оно и виде тело блаженнаго цело, ничим же вреждено сияющо. И шед поведа веси тоя жителем, они же шедше со тщанием, и видевше прославишя Бога: и вземше тело святаго, со священником, положишя в паперти, у церкви Святаго Николая. Преблагий же Бог хотя прославити угодника своего чюдесы. Приключися во время то во стране той належати на людех трясавичному недугу, и мнози болезноваху мужи и жены и дети, яко от тоя тяжкия болезни мнози и умираху. И вси маляху Преблагаго Бога, еже избавитися им от содержащаго их недуга того. Приключися же человека веси тоя, именем Каллиника, сыну его зелне страдати недугом тем. Человек же той скорбяще велми о сыне своем, и моляше всещедраго Бога, и святаго Артемиа на помощь призывая. И шед ко гробу его взят часть малу от обвития святаго, и пришед в дом свой, возложи на перси болящему сыну своему: и абие здрав бысть. И возрадовася человек той и прослави Бога и святаго Артемиа. И шед поведа всем бывше чюдо на сыне своем: и вси течаху ко гробу святаго и освобождахуся от недуга того, здравие приемлюще. И преста болезнь она в людех от того часа во стране той, молитвами святаго; и вси славяху Бога. Многа же чюдеса начаша бывати от святаго различными недуги одержимым. И возвестиша о сем, иже тогда правящу престол святыя Софии, преосвященному Макарию, митрополиту великаго Нова-града. Он же опасне испытав яже о святем и повеле храм создати во имя святаго, и ту святое тело его честне положити. Многа же и тогда чюдеса содеяшася различными недуги одержимым, и даже до днесь содеваются с верою приходящым, во славу иже во святем прославляемаго Христа Бога, Ему же слава, ныне и присно, и во веки веков.

Преподобный отец наш Авраамий бе родителю благочестиву сын. И остави родителя своя и мирский мятеж, и взем крест Христов, последова Ему. От младых бо ногтей Богу себе представи, и бысть монах, и чисто бысть приятелище святаго Духа, покорив плоть духови, и жестокому пребыванию и нуждному (изнурительному, тягостному). И тако обладая страстми плотскими, и трудом себе удручив, и истончив плоть свою, и бысть монахом началник. Житие ангельское поживе и чюдесы обогатив весь мир. Благодатию же Христовою исцеляше страсти неисцелныя, и течением слезным душю свою омыв. Видев же преподобный Авраамий прелесть идолскую сущю во граде, Ростове, не убо беша еще граждане прияли святое крещение, но чюдски живущи и поклоняющеся идолу каменну, омрачени бо суть прелестию сердца их сатаниною, яко близ его никто же смеяше ходити путем тем. Мечты бо творяше и человеки устрашаше злым омрачением. Преподобный же отец наш Авраамий помолися Богу, и иде в царствующий град взыскати дому Иоанна Богослова. И явися ему святый Иоанн Богослов на пути, и вдаде ему трость, и глаголав ему: «возвратися в Ростов, и избоди тростию сею идола Велеса. И рцы ему: во имя Иоанна Богослова, да сокрушишися». И абие сотвори тако святый, и бысть весь идол в прах. И на том месте постави церковь во имя Иоанна Богослова. И посем взем благословение от епископа и водрузи церковь малу, во имя святаго Богоявления Господа нашего Иисуса Христа, идеже прежде идол Велес бе. И постави келлии, и монахи призва, и печашеся ими, и общину сотвори. И много зла подъя от неверных. Овогда же хотяще разорити святыню и сожещи, но Богу не попустившу их. И не по мнозе времени всех приведе ко Христу богоразумием преподобный. И крестишася от мала и до велика. И начаша ходити на славословие Божие, и на всенощное пение, жены же и отроцы; Святый же почитанием книжным наслаждаше сердца их. Потом же созда церковь велию, и украси ю всем, яко невесту Христову. Князи же Ростовстии начашя веру держати велику к преподобному Авраамию и ко всей братии; и имения многа, и села даваху на устроение обители и на потребу братии. Совет же сотвори епископ с князи и поставиша святаго архимандритом. Преподобный же Авраамий нача труды к трудам прилагати. Диавол же хотя спону (препятствие, препону) сотворити святому отцу. Во время убо молитвы святаго причащения, певшу преподобному, и хотящу руце умыти, влезе бес во умывальницу святаго отца; святый же, разумев коварство вражие, взем крест, положи на верх сосуда онаго и огради около сосуда крестным знамением. И не могий изыти оттоле диавол, жгом в сосуде на многи дни. И паки приидоша князи по обычаю в монастырь помолитися и от святаго благословение прияти. И внидоша в келлию святаго. Старца же святаго не бе в келлии, но в пекарни мыяше власяницы, на братию труждашеся Слышав же о князех, и иде к келлию благословити их. И виде преподобный духа нечиста, на монастырь изшедша. Князем бо дерзнувшим крест сняти с сосуда без святаго отца, и в том часе изыде дух смраден из сосуда, аки дым черн, и устраши ту всех сущих, и глаголаше к преподобному на монастыре: «окаянне, ты мне мучитися сотворил еси в сосуде, и жжену быти силою крестною, тако же и аз тебе спону сотворю в мале времени». Пришед же святый в келлию, благословения сподоби князей, и поучив отпусти их с миром. Посем же бесу преобразившуся во образ воина, и шед ко князю во Владимир, глаголя: «есть в Ростове, господине, в твоей области монах некий Авраам, волхв, образом творящеся, яко свят; и сей бе старец нашел в земли сосуд медян, достоин бысть твоему величеству, в нем же множество сосудов златых, и поясов златых, и чепей, яко немощно и цены уставити им; и тем сокровищем монастырь созда, и церковь велию постави, а твоему государству неповеда». Князь же посла воина люта по святаго старца, с великим гневом, глаголя: «в чем обрящеши старца, не глаголав к нему ни единаго слова, в том и постави его предо мною». В тоже время преподобному Авраамию в келлии на молитве стоящу, в единей власянице, и не обувену в сандалия. И прииде к нему злый воин, не имый милости к святому. И в том часе взя святаго, не да ему ни обувения, ни риз надети. Разумев же святый вражду вражию, и убо святый не убояся никакоже, но благодаряше Бога. Взем же его воин, и поругашеся святому, всадив его на пегую ослятицу (ослицу), и сандалия женская обу на нозе святому Авраамию. И постави святаго отца пред великим князем во граде Владимире, в единой власянице. И повеле князь поставити воина. Воин же, таже словеса нача на святаго поносити о обретении влагалища. Святый же воздев руце на небо помолися, и запрети духу лукавому, силою Господа нашего Иисуса Христа, и абие исчезе. Князь же видев прелесть диаволю и святаго отца поругана стояща: и страх великаго князя и всех ту сущих объят. И начат князь со слезами прощения просити у святаго о таковем согрешении. Преподобный же прости его. Князь же смирение видев преподобнаго, и честь велию возда святому; и имения, и сел много вда ему; и отпусти его; и учини его монастырь болши всех монастырей, иже суть в Ростове. И пожив преподобный во своем монастыре лета доволна, и в старости мастите ко Господу отиде, Его же измлада возлюби. Ему-же слава, ныне и присно, и во веки веков. Аминь.

Сей убо Иоанн премудрый родися во Антиохии Сирьстей, от богату родителю, отца Секунда, воеводы суща, и матери Анфусы. Мелетий же патриарх Антиохийский крести первое Иоанна, потом же и родителя его. Не попусти убо Бог таковаго солнца и церковнаго учителя без просвещения быти: не точию же самого, но да не лишена будута веры Божия и родителя его. И даста же и в научение грамоте, и пристависта к нему пестуны со слугами, да ходят с ним: сам же на конех да ездит. Иоанн же не потребова ничтоже, ни слуг, ни коней, но со смирением прилежаше учению: и тако вселися вонь мудрость Божия. Бяше же ему учитель Ливаний философ и Андрагаф. Преставлшуся же отцу его, ему же оставшу сиротою. Матери же его овдовевши, и юне сущи, ново из отча дома изшедши. Иоанн же шед во Афины, и тамо до конца извыче вся книги; и Анфимия философа препре, и в крещение введе; и Афину богиню сокруши, и вся капища испроверже, и кумиры попра, и введе вся Афины в крещение. Посем возвратися во Антиохии, и хотяше иноческое житие восприяти. Мати же его имши за десную руку, введе и в ложницу свою. И сидяши вскрай одра, на нем же бе и родила его, реками слез лиющи; и тех слез милейшя словеса прилагающи и вопиющи, глагола к нему: «Аз, чадо, не народовахся и с твоим отцем за скращение живота: Богу тако изволшу, тебе сиротство, а мне вдовство. Тако сотворши смерти отца твоего, обаче ни едино мя прилучшеемися зло не може принудите второму браку и инога мужа привести в дом отца твоего; но пребывах яко в буре, или яко в пещи огненне во вдовстве, терпящи Божиим промыслом вся прилучшаяся мне искушения. И твое лице часто видящи, отца твоего подобно обличиния в души твоей снабдящи, и велик увет и утешение творящи. К сему же ни имения отца твоего погубих, бедою вдовственою, и требования ради многа, но и то цело снабдех, еже есть требе на твое мужество. И егда мя земли предаси, тогда свою мысль исполниши якоже хощеши». Иоанн же послушав молбы матере своея, дожда смерти ея и погребе ю сам. Розда же богатство свое, и челядь свою распусти на волю, и шед в монастырь, пострижеся. И начат чюдеса многа творити. Мы же во истину речем: «блажена еси ты в женах таковаго детища родивши! Блажим вдтовство твое, блажим и терпение твое; тем воистину не наречем тя жену, но мужа совершена, яко мужески до конца стерпе. Тем-же и вы, жены добрыя, слышаще сия, останитеся от злоб ваших. Како сия мала корене восприимши и от единой ветви безпристани моляся Богу: жена добра, и по смерти мужа спасет».

Сей убо блаженный Иона рождение имея и воспитание в великом Нове-граде. Осиротевшу же ему от родителю своею, некая вдовица поболевши о нем матерски, вземши воспита его, и вда некоему диакону в научение божественным книгам. Бяше же нравом тих, и кроток, и смирен; детем же юным никогда же ко игранию прилагашеся. И абие еще ему юну сущу, избран бысть от Бога на святительский престол великому Нову-граду, яко о нем писание рече. – В некое убо время, грядущу ему от учителя своего со отроки, отроком-же играние творящым, тому же стоящу и зрящу на ня. И абие преподобному Михаилу юродивому, иже нарицается Клопский, грядущу путем тем, идеже сей отрок стоя, о нем же нам слову вина належит, – тогда убо первое юродство во граде творящу, устремльшуся ему во улицу ону, идеже сие честное детище стояше. И притек к священному отроку, и взят его за власы, и подем его выше себе, пророчески вопияше ему: Иоанне, – тако бо от святаго крещения имя детища, – учися книгам прилежно: имаше бо сему великому Нову-граду архиепископ быти, и объем его, отиде от него во своя си, в монастырь на Клопско. И посем пророчество Михаилово сбысться на святем Ионе. Архиепископу святому Евфимию к Богу отшедшу, марта, в 11 день; и положену бывшу в монастыре, иже на Вяжищех, в созданнем от него. И паки Божиим изволением взяшя святаго Иону из обители Харитона архимандрита, еже зовется Отня пустыня, и в епископию возведошя его. Радующеся же о святем вси граждане великаго Нова-града. И абие князь и боляре и посадники и весь народ послашя святаго с грамотою в Москву, к митрополиту Ионе, да поставит и архиепископом великому Нову-граду. Митрополит же, со архиепископы, и епископы, и со всем собором святив его и постави его ерхиепископом великому Нову-граду, и отпусти его с миром во своя си. И паки святый прииде в свою архиепископию, к великому Нову-граду, и всех ту сущих благословив, и поучив их доволно от божественных писаний; и отпусти их в домы своя с миром. И паки сам нача труды к трудом прилагати. Вдовицы убо и сироты убогия миловаше, и суд творяше по правде, а не по мзде; и не даваше силному и нечестивому насиловати смиреннаго, но от руку их смиреннаго сам изимаше. И по сих во своем пострижении во Отни пустыни постави церкви многи каменны. Первое церковь болшую, трех святителей постави, и подъписанми (росписями), и иконами, и книгами, и всем украсил ту. Второе трапезу каменну созда, присовокупи к ней и церковь святого Николая. Еще же и церковь созда святаго Иоанна Предтечи, присовокупи к паперти болшия церкве; в ней бо и гроб себе ископа. И многи села со многим имением и угодием купи, и вда обители, и многа имения своя ту истощив; и церковь постави святаго Онуфриа великаго в той же обители. И по сем многим святым светлости их ради, в вечныя памяти, на уведение последним родам (составил жития). И понуди Логафета Пахомиа, иже от святыя горы, каноны и жития изложити им: Великому Варлааму, иже на Хутыне, и великому Онуфрию бдение написа, и великой княгине Ольге такоже написа, и преподобному Савве Вишерскому, и архиепископу Евфимию, прежде его бывшым. И по преставлении Ионы митрополита, повелением святителя Ионы, той же Пахомий написа канон святому Ионе митрополиту. Святый же, одарив Пахомиа многими дары, Пахомию-же отшедшу в Московскую страну. И посем повеле князь великий Василий, и сын его Иоанн, и митрополит Иона святитель, ити к себе к Москве святому. Он же пришед к Москве и тамо честно прият бысть святый от них; и сам князь великий и сынове его подъдержаще десницу святаго: понеже яко стар бе святый, и собирающеся церковная исправляху. И паки князь великий начат жаловатися пред святители святому на великий Нов-град. Святый же Иона многа утешительная словеса глаголаше великому князю. И увеща князя еже ему не воздвигнити рук на великий Нов-град и снабдети люди града того. И посем святый взя грамоту жалованную монастырю своему о всяких исправлениих. И посем митрополит Иона посла к святому грамоту, еже скоро приити ему к Москве, глаголя: «светильниче Божий, уже бо отхожду к Богу, тебе избрахом пасти достойна престол великия церкве». Святый же отписа к нему: «уже бо стар есмь, и ноги имею отягчене. Отче святый, не могу сего сотворити; на воскресение же общее святых тамо, отче видения сладчайшаго сподобимся от учителя нашего Христа». И посем при животе святаго Ионы благоплодны земли бышя, Новгородская и Псковская гобзовати (изобиловали) всеми овощми, молитвами святаго. И паки единою при нем на град смертоносие паде. Святый же утешаше люди от Златоустовых словес, глаголя: «сего ради язвими бываем, им же согрешивше к Богови, а покаяния не взыскавше о гресех своих», и ина многа глаголаше к людем святый. Тогда же молитвовавше людие вси со святым, и храм во имя святаго Симеона во Зверицах создаша. И абие преста смертоносие и люди здрави быша молитвами святаго. И посем святый, в старости глубоце, написа завет своею рукою, еже о монастыре своем, яко не насиловати его никомуже, и снабдети же братии своей веляше, и иже по нем бывающим Архиепископом поручи сам. И причастися божественных таин Христа Бога, скончася во блаженней кончине праведных. И пение сотворивше братия над святым, и положивше в ковчег дубов честное тело его. И на нем (на гробнице) назнаменаша лето и месяц и день преставления его. И поставишя и в церкви Иоанна Предтечи, иже сам созда, над землею же святаго певше до четыредесяти дней. И понеже тело его не издаде вони, по днех четыредесятих, и гробницу над ним устроиша досками выше лактю; и второму лету преходящу по преставлении святаго, тело его честное нача издавати воню в церкви той, даже и до днесь. И многа исцеления бываху от телесе святаго отца, и до сего дне, с верою приходящым человеком, яцем же недугом кто одержим бываше. И пас церковь свою святый лет тринадесят. Богу нашему слава, ныне и присно и во веки веков.

Сей преподобный отец наш Варлаам, родися в великом Нове-граде от благоверну и христиану родителю, воспитан же быв в добре наказании и божественным книгам научився. И еще юн сый телом, старец многолетных разумом превзыде; игры же, или смехотворных словес, якоже обычай детем, велми не любляше. К сему же воздержание имяше, сладких же брашен отнюд не ядаше. Видеста же родителя велие воздержание его, и в печали беста о сем. И единою рекоста ему: «не мози, чядо, скорбити нас, и неядением плот свою изнуряти, да не в болезнь впадеши, еще юну ти сущу, и нам печаль наносити зрением лица твоего». Благоразумный же отрок тихим гласом отвеща има, якоже имея обычай: «аз убо многа писания прочет, не обретох же родителей своему чаду зло советующа, яко же вы мне совещаваета. Брашно бо и питие не поставит нас пред Богом, яко же великий Апостол Павел глаголет; но токмо пост и молитва. Воспомянита же и се, колико бысть от Адама праотца нашего человек: не вси ли умрошя и с перстию смесишася? Что же и пророк рече: человек суете уподобися, дние его яко сень преходят. А иже Богу угодившие добрым житием, и кровь свою за Христа пролиявшии, и любви его ради мира отвергшиися и тому последовавшии, получиша от него небесное царство и сего ради от нас прославляеми суть и блажими. Тем же, аще Богу помогшу ми, потщуся наследник их явится». Видеста же родителя его и почюдистася о ответе отрока, и тако остависта его в своей воли жити. Посих же не много пожиста родителя его и от маловременнаго жития сего преставистася. Блаженный же проводи я честно, отпев надгробная. По смерти же ею болми (вельми) любовию божественною разгоревся, яко никим возбраняем бысть, и имение отца своего раздаде нищим. Сам же свободу улучив, абие оставляет мир, имев наставника по Бозе живуща, священномонаха именем Порфирия, от него же прият монашеский образ. Обшед же места, разсмотряше, где обитель сотворити. Видев же место красно, и некую лучю божественну осиявшу его близ реки Волхова, и молитву сотворь начят здати келлию, иде же ныне монастырь стоит, в нем же трудолюбно удручив плоть свою. Пост же его и бдение кто исповесть? питашеся же от своих потов (трудов). Видевше же беси себе уничижаемы, воздвигошя на него брань: и преображахуся овогда в змия, овогда в звери различны, хотяще его отлучити от места того. Он же знамением крестным ограждся, безвести сих сотвори. Иногда же от человек пакости приносяще ему, да поне досады человеческия не терпя, отбегнет от места того. Но обаче тии спяти бышя (отвергнуты) и падошя: приразишабося (ударившись) твердому адаманту (драгоценный камень), и сами сотрошася, твердаго же столпа не поколебаша. Посем возгради церковь малу, Преображение Господа Бога и Спаса нашего Иисуса Христа. И великаго ради жития его, произыде о нем слава повсюду. И собирахуся к нему князи и велможи и прочии христоименитии людие, познаватися (ознакомиться с ним) хотящии. И кийждо свое прощение получив, отхождаху в домы своя, благодаряще Бога. Собрашася же к нему инок множество, хотяще ревновати доброму житию его, и жительствоваху с ним. В тоже время новгородцем держащым по своей воли князя во отмщение противным. Некогда же князю пришедшу к святому в келлию благословения ради. Святый же пророчествова ему о сыне, а князю не ведущу сыновня рождения; святый же и крести его. Некий же человек велику любовь имея к святому, у него же единороден сын болезнию одержим; и понесе его к святому, яко да помолится о нем, ему же на пути издшу. Святый же молитвою воскреси его. Иногда же празднику приспевшу Воскресения Господа Бога и Спаса нашего Иисуса Христа; святый же посла рыбарей ловити рыб, и молитвами святаго уловиша множество рыб, и осетра велика емше и утаиша его; и малыя многи вземше и принесше к святому. Святый же посохом распростирая рыбы, глаголя: се убо дети привезосте, а матерь где есте скрыли? Они же, падше на нозе святаго, каяхуся греха и рыбу принесоша. Некогда же оскудению бывшу в монастыре, святый же помолися к Господу, и всеми благими изобилствова. Приношаху же к нему иже от духов нечистых одержимых, и абие не у еще дошедше святаго, нечистии дуси отгоними бываху; прокаженнии очищахуся, слепии прозираху. И всяк, иже с верою приходяй, и различными недуги одержимии, не токмо здравие, но ползу приимше отхождаху в домы своя. Бяше же слово его духовною солию растворено, и от сего любим бяше всеми и велик познавашеся. По сих разумев святый к Богу свое отхождение, и призвав братию рече им: «Се уже, братие, конец живота моего приближися, и отхожду от жития сего, вас же предаю в руце Божии. Наставник же будет вам в мое место Антоний, сверстник мой». И тако предаде ему монастырь и братию вручив, глаголя: «се убо с Богом оставляю тя строителя и правителя святому сему монастырю». И Господь наш Иисус Христос да сохранит и утвердит вы в любве его. Аз же аще и телесне отхожду от вас, но духом с вами неотступен буду. И о сем да будет вам разумно, яко аще есмь обрел благодать пред Богом, то монастырь и по моей смерти, якоже и при моем животе, ничим же оскудеет, аще любовь будет между вами». И поучив я довольно, и духовным лобзанием одарив их, конечное слово изрек: «Господи в руце Твои предаю дух мой». И тако всечестную и пресвятую свою душю предаде в руце всех Бога. Прииде же Архиепископ великаго Нова-града и от всех монастырей стекошася инок множество, и честне с кадилы надгробное пение певше, скуташя (похоронили) честное и трудолюбивое тело его, месяца ноемвриа в 6 день. Множество же тогда недужных различными болезнии одержими исцеления прияшя. Совершается же собор его в монастыре Преображения Господа Бога и Спаса нашего Иисуса Христа, идеже положено бысть честное его и чюдотворное тело, исцеление подавая с верою приходящым и до сего дне. Богу нашему слава, ныне и присно, и во веки веков.

Сей великий светильник и присный вселенныя учитель бяше от великаго града Антиохийскаго: отца Секунда стратилата и матере Анфусы, обою благочестиву и верну. Абие убо изначала жития своего многое о словесех стяжа рачение; яже о сих тщанием и естества быстротою, всяко еллинское наказание пройде, ученик быв Ливаниа и Андрагафиа, антиохийских мудрецов. Таже иже во Афинех. Навык же добре эллинская и христианская писания и достиже в крайний о сих разум, и украсив житие свое девством и чистотою. И в клирический чин возводится, от святейшаго Мелетиа патриарха антиохийскаго, от Флавиана же диакон и пресвитер. Сочинив же многая словеса больши числа, о покаянии, и украшении обычаев, и всякое богодухновенное писание сказав. И понеже Нектарий, патриарх Константина града, от жития прейде: жребием епископским и повелением Аркадиа царя из Антиохии приведен бысть и патриархом Константиня града поставляется, законне хиротонию прием. Множайше же простреся к потщанию сказания писаний и в поучение бесед, ими же многих к богопознанию и покаянию привлече. Толико же себе вдав посту и воздержанию, яко точию мало муки ячменны водою растворенны вкушаше. И сна мало, и сего не на одре, но стоя и ужи (уже – веревка) некиими поддерживаемь, и аще когда хотяще преклонитися, седяше. Выну же учашу ему христиан добродетелному житию, и лихоимец обличающу дерзновенне. Тем же и Евдоксия царица наипаче подвижеся нань гневом. Та бо восхити виноград вдовицы некия. И вдовица вопиющи, свое искаша. И святый учаше чюжия вещи не держати; и не покаряющися царицы, обличаше ю и показанием (примером) Иезавели утверждаше. Она же отнюдь взверившися, держаше крепко виноград. И не терпящи обличения, сотвори быти собору некиих епископ, враждебных ему, начальствующу (под председательством) Феофилу Архиепископу Александрийскому. И четверижды Златоуст призываем быв, не прииде к собору, отрицающуся предъявленными враги судитися; но на собор икуменицкий, сиречь вселенский, отзывашеся. Они же, яко не повинующася собору, извергоша и. И царевым повелением в заточение послан, обаче от пути, молвы ради народа, возвращается паки на престол свой. Таже конечнее святый паки в Кукусы Арменския заточен, и скорби многи приим, честную свою душу Господеви предаде, якоже являет яже о нем историа. И яко по изшествии его от престола и изгнании, онии, иже споспешествоваху на сие, впадше во многия и различныя недуги, умроша, зле извергше душы. Пострадавши сие прежде Евдоксии (она пострадала прежде других), яко и первей беззаконовавшей, и епископом виною бывши погибели. Еще же и по смерти ея, обличения ради неправды, юже сотвори Златоустому, рака, в ней же бе положена, трясашеся лет тридесят и два, даже пренестися честным мощем Златоустаго и положити, идеже суть ныне, преста от колебания онаго и движения. Сотворяется же память сия ныне во успения место, заве ключися (случилось) успение его в праздник Воздвижения Честнаго Креста. Молитвами Златословестнаго, Христе Боже, помилуй и спаси нас. Аминь.

Сей приснопамятный великий князь Михаил Ярославич, внук великаго князя Ярослава, правнук же Всеволода Георгиевича Долгорукаго, матери же великия княгини премудрыя Ксении. Во время же княжения его, преставлшуся двоюродному брату его, великому князю Андрею Александровичю Владимирскому, и в себе место (вместо себя), по степени старейшинства, благоволи на великом княжении быти сему брату своему князю Михаилу, великаго князя Александра внуку. Тогда же обычай бе нашым великим князем ходити во орду и приимати власть от ординских царей. По некоему же случаю, на поклонение нечестивому тогда пойде во орду и великий князь Георгий Даниилович тамо царствующему царю. Лютии же поганцы татарове свадиша (поссорили) тех благочестивых царей и превратиша сердце князя Георгиа, ради его великих даров, на великое княжение: и сие не сбысться. Боголюбивый же князь Михаил, благословением великаго святителя Петра Митрополита, седе на великое княжение во Владимире, на место брата своего князя Андреа. И по осьми летех, воста во орде ин царь, именем Азбяк. И паки великим князем, Михаилу и Георгию, бывшим во орде, и бысть между ними распря велия; и остася князь Георгий во орде. Князь же Михаил отпущен бысть на Россию. Нечестивии же татарове вземше сребра у князя Георгия много, даша ему старейшинство на великое княжение российское и отпустишя с ним единаго от своих князь, беззаконнаго Кавгадыя. Великий же князь Михаил срете их с вои своими и посла послы своя ко князю Георгию, рекий (сказать, чтобы) еже бы ему не вступатися во область его, и пойде во свое отечество. Князь же Георгий с татары, собра множество рати, и прииде ко Твери, и повоева весь град, и обону страну Волги реки тако же сотвори. Великий же князь Михаил, призва епископа и боляр своих, и печалуяся слезне о благочестивых погибели. И собра воя своя, пойде противу князя Георгиа, и победи полки противных; телеси же его от противных стреляния не уязвену бывшу, токмо ризам его касахуся. Тамо же плени и окаяннаго Кавгадыя, и одарив его, отпусти. Той же окаянный кляся ему того не мстити. И не хотя христианскаго кровопролития святый, смирився со братом своим князем Георгием, еже ити во орду и тамо конечне пред царем между собою умирение прияти. Великий же князь Георгий, со окаянным Кавгадыем соединяся, поидоша прежде. Князь же великий Михаил посла сына своего, князя Константина. Посем прия благословение от епископа Варсонофиа, и от всего священаго собора; и исповедася отцу своему духовному, и сам пойде во орду. Князи же ордынстии ругахуся ему, ложне глаголюще: «ты многи дани поимал на градех, а царю нашему не дал еси». Святый же обличаше многое их неправедное глаголание. Нечестивый же Кавгадый, всему злу судия ему бысть, и на том истязании возложиша на выю его кладу (колодку) велику. Святый же непрестанно пояше псалтирь со всяцем умилением и слезами, день и нощь, и в том тяжком терпении пребысть 26 дней. Во един же от дний исповедася отцу духовному, проуведав свою смерть, и причастився святых Пречистых Таин, поучая сына своего Константина о всякой ползе душевней. В то же время окаянный Кавгадый со князем Георгием послаша убийцы на него. Тии же окаяннии повергоша его на землю; един же от них удари в ребра его ножем и отреза честное сердце его. И тако святый великий князь Михаил предаде святую душу свою в руце Богу, месяца ноемврия, в 22 день, в лето 6827 (1319). Богу нашему слава, ныне и присно, и во веки веков.

Сей убо бысть благоверный и христолюбивый князь, великий Александр, сын Ярославль, внук великому князю Всеволоду, сыну Владимирову, просветившаго российскую землю святым крещением. Измлада же благочестивый князь Александр Христа возлюбив, и Пречистую Богородицу, и вся Святыя. По велику же убо чтяше и иерейский чин, яко слуги Божии, и иноков зело любляше, тако же и нищыя миловаше, и от всякия неправды отгребаяся. Сиротам и вдовицам заступник и безпомощным помощник. Не изыде бо из дому его никто же тощ и тщама недрома. И тако ему живущу в великом Нове-граде и от Бога порученную ему власть добре правящу. Посем же приидоша от западных стран человецы нецыи, иже нарицают себе слуги Божия, видети возраст блаженнаго Александра. Видевше же святаго возраст и красоту лица его, и велми почудившеся, и шедше поведашя кралю своему части римския, Нестору Велгелу о красоте его и возрасте. Слышав же краль от них мужество святаго князя Александра, и подивися. Посем собрав краль силу многонародну, и наполни корабли многи воины своими, и прииде на реку Неву, и ста на устии тоя реки, Ижеры, хотя пленити и Ладогу, и великий Нов-град, и всю землю славенскую. И гордяся, посла послы своя к святому князю Александру, глаголя: «аще хощеши противитися со мною, то уже есмь зде пленяя землю твою». Святый-же князь Александр со архиепископом вниде в соборную церковь святыя Софии, и со слезами помолився Господу Богу, и Пречистей Богородице, и святым Страстотерпцем Борису и Глебу, пад на землю. И по молитве востав, пойде мале дружине, не сождався с силою бранною. Тако же и отцу его Ярославу не бе ведомо таково нахождение схизматиков (вероотступников). К тому же Александр не успе послати и во Владимир ко отцу, точию Бога в помощь призвав, и святых мученик Бориса и Глеба. И прииди на реку Неву, идеже схизматики стояху, иулиа месяца, в 16 день недельный. Бе же некто Александра князя един от воевод земли ижерския, именем Филипп, благоговеин сый и бояся Бога; сему убо поручена была стража нощная. И виде силу ратных, и шед хотя поведати святому князю Александру, идеже стояше. И прииде близ моря, уже восходящу солнцу, и виде насад (судно) един, и посреде насада стояща святая мученика Бориса и Глеба во одеждах червленых, и руце своя держаща на раму, гребцы же седяху аки мглою одеяни. И рече Борис: «брате Глебе, пойдем вскоре, да поможема сроднику нашему, великому князю Александру, на неистовыя немцы». Страж же той поведа вся сия, яже виде, святому князю Александру. Князь же прослави Бога и святую мученику Бориса и Глеба. И в шестый час дне сступися со схизматики римляны, и Божиею помощию, и Пречистыя Богородицы, и пособием Христову мученику Бориса и Глеба, избиено бысть схизматик многое множество, и отступника краля блаженный сам уязви мечем в лице. И тако избавлен бысть великий Нов-град от лукавых немец; и не единою избави великий Нов-град от плена лукавых немец. И посем тии же лукавии немцы собравшеся на богохранимый град Псков: и многи люди избивше псковския, и Псков прияша, и наместники своя посадиша. И паки блаженный князь Александр, и с братом своим князем Андреем, пояста с собою низовцы, и обыдоста своими людми вси пути псковския, и избиста лукавых немец многое множество, а инех окованых посласта в великий Нов-град. И тако великий князь Александр избави град Псков от плена лукавых, помощию Святыя Троицы и молитвами Пресвятыя Богородицы. И землю их шед плени, и пожже, и многих неистовых мечем погуби. И не сие токмо храбрство великаго князя Александра над лукавыми немцы, но и от многих язык избавляше российскую землю от плена при животе своем. Посем же в то время безбожный царь Батый многи земли поплени; и прииде на российскую землю, и грады многа взя и пожже Владимир, и Ростов и прочыя, попущением Божиим, грех ради наших. И ту избиена быста Всеволожя князя приснопамятная, Юрий и Василко от безбожнаго Батыя. В то же время пострада Христа ради князь Михаил Черниговский и с болярином своим Феодором. А инии князи российския земли мнози, чести ради и славы света сего, волю безбожнаго царя сотвориша и страха ради мучителева оставишя веру христианскую, и поклонишася солнцу, и кусту, и иным идолом их. И паки окаянный царь Батый, еще не насытился бяше крови христианския, посылает посланники своя во град Суждаль к святому великому князю Александру, глаголя: «мне покоришася мнози царства и язы́цы, а ты ли един не хощеши покоритимися? Аще хощеши соблюсти землю свою, пришед поклонимися, якоже и прочии князи российския поклонишася мне, и власти своя прияша, и честь велию от мене; слышах бо тя храбра суща и велика возрастом». Святый же, слышав сия от посланных, печален бяше, велми боля душею, и недоумевашеся что о сем сотворити. И шед святый поведа епископу Кириллу мысль свою. Епископ же, поучив святаго на мнози глаголя: «брашно и питие да не внидет во уста твоя, и не остави Бога, сотворшаго тя, ни сотвори тако, якоже инии сотвориша, но постражи за Христа, яко добрый воин Христов». Святый же епископу вся сия обещася сотворити от всего сердца своего. Епископ же дав святому Тела и Крове Христовы спутника ему быти, и отпусти его с миром, и прирече: «Господь да укрепит тя». Таже прочее дошед блаженный князь Александр безбожнаго царя Батыя, и в том часе возвестишя царю о блаженнем. Царь же повеле привести пред ся святаго. Волхвы же восхотеша вести святаго сквозе огнь, якоже обычай бяше в них, и поклонитися солнцу и огню. Святый же рече волхвом: «не подобает ми, христиану сущу, кланятися твари, кроме Бога; но поклоняюся Святей Троице, Отцу, и Сыну, и Святому Духу, иже сотвори небо, и землю, море, и вся яже в них суть». Волхвы же, яко поругани от святаго, шедше возвестишя царю Батыю. Посем же царь повеле святаго с честию привести пред ся, не нудима кланятися солнцу и идолом, красоты ради лица его. Приведену же ему бывшу пред царя, святый же ста пред царем и поклонися ему, глаголя: «царю, тебе поклонюся, понеже Бог почти тебе царством, а твари не поклонюся: та бо человека ради сотворена бысть, но поклоняюся единому Богу, Ему же служю и чту и». Царь же ничтоже сотвори святому зла, но видев блаженнаго красоту лица, и величество тела, и храбрость, и похвалив пред всеми святаго, и честь велию воздав ему. Посем убо посла святаго с братом его Андреем к Кановичем во орду. Безбожный же царь Батый в то время иде с силою многою на болгары, и тамо убиен бысть от краля Владислава злый. Посем же святый прииде из орды от Кановичь во отечество свое, во Владимир, и церкве многи воздвиже, и христиан распуженых во отечество свое собра. И посем святый посла сына своего Димитриа на западныя страны, противу иноплеменных; и вся полки своя святый посла с сыном своим. Сын же святаго шед взя немецкий град Юриев и возвратися к Нову-граду с пленом многим. А святый князь Александр отыде к Беркалю во орду, и тамо пребысть 6 месец и в болезнь телесную впаде. Царь же отпусти святаго; и дошедшу ему Городца, и болма изнемогаше. И ту пострижеся во иноческий чин и в схиму, с великою верою; и наречено бысть имя святаго Алексий. И всех ту, игумена и братию, и своих целовав, прости. И причастися Тела и Крове Владычни, Господа нашего Иисуса Христа; и всех благословив. И крестным знамением знаменався, и воздев руце горе и молитву сотвори. И предаде священную свою душу Господеви, в лето 6771 (1263), месяца ноемвриа, в 14 день. Совершается же память святаго, того же месяца, в 23 день, понеже в той день принесено бысть тело его во град Владимир, в свое очечество. И ту надгробными песнми проводивше святаго. И нача митрополит прощальную грамоту в руце влагати святому пред всеми. Святый же сам, яко жив, разгнув руку свою и прият грамоту у митрополита и паки согнув ю сам святый. И вси предстоящии прославиша Бога о сем чудеси. И подожено бысть честное святаго тело в монастыре Рождества Пречистыя Богородицы, во архимандритии велицей. И от того времени начаша от гроба святаго многа исцеления простиратяся с верою приходящым. Богу нашему слава, ныне и присно, и во веки веков.

Блаженный и приснопамятный, всея Российския земли князь Ярослав, нареченный во святом крещении Георгий, сын Владимиров, крестившаго землю Российскую, брат же святую мученику Бориса и Глеба. Сей восхоте создати церковь во свое имя, святаго великомученика Георгиа, да еже восхоте то и сотвори. Яко начаша здати ю и не бе у нея много делателей. И се видев князь, призва тиуна и рече: почто не много у церкве страждущих? Тиун же рече: Господине, понеже дело властелско есть, и боятся людие еда труд подимше, найма лишени будут. И рече князь: аще тако есть, то аз сице сотворю. И повеле куны возити на возех в камары златых врат. И возвестиша на торгу людем, да возмет кождо по наготе на день. И бысть много делающих, и тако вскоре сконча церковь. И освяти ю Иларионом митрополитом, месяца ноемвриа, в 26 день. И сотвори в ней столование новостановимым епископом. И заповеда по всей России творити праздник святаго Георгиа месяца ноемвриа, в 26 день.

Сей великий бяше в лета царей Диоклитиана и Максимиана мучителей. Первее монашеским житием пребывая, и многих ради его добродетелей, архиерейство приим. И занеже христианский ходатай бяше и благочестие проповедая свободным гласом, ят бысть старейшинами градскими, и язвами и узами обложен быв от них, и в темницу ввержен бысть со иными христианы. Великому же и благочестивому царю Константину, волею Божиею царство греческое приемшу, отпущени быша затвореннии в темницах; с ними же и великий Николай отпущен бысть и достиг Миры. И не по мнозе времени собран бысть Никейский собор великим царем Константином, в нем же и дивный Николай, един сый в них быв, много тщание и велику ревность о благочестии показа. Посих и ина многа сотвори чюдеса, якоже о нем писание поведает. Спасе же и оболганыя три мужи, без правды умрети осужденны. И инии убо во время внегда хотяху в темнице посечени быти, и святаго на помощь призывашя: воспомянувше его благое соделование, еже сотвори трем мужем великий, убиенным и тем чающым быти, и спасени бышя. Является убо во сне царю и епарху, за еже он к царю оболга мужей: царя же уча, яко неповинны суть, и по зависти в темнице затворени суть, того ради онех свободив от належащия беды. И священно и православно упас люди и в глубокую старость достиг, ко Господу отъиде.

Ниже по кончине забывая паству, но повсегда, яко же рещи дни и часы. благосоделования своя подавая требующым. И великих ради изрядных великаго чюдес, взнаемых (всем известных) и иных прочих, праведно выну воспоминати сие, еже убо быти всем ведомо в славу и хвалу, иже велми прославляющему Богу, и иже тому вседушно (всей душой) работающым, и ни который убо да не верует приточному сему (имеющему особенную важность) и изрядному (необыкновенному) чюдеси, бывшему во дни нашя: ничто же бо Богу не возможно, ибо некогда бывшу преизящию (преизящество) Аввакума пророка (большее и высшее случилось некогда с пр. Аввакумом). И еже во гроб ввержене, от Готфина отроковице, яко в нощи единой от Готф во Едесе святыми исповедники обретшися ей. И иже в темнице, во агарийстей стране, некоему юноши похищену, святым великомучеником Феодором Тироном в Византию во едину нощь принесену. И иже и победоносным и всеславным мучеником Георгием от Крита восхищенному, еже на руце сткляницу держащу с вином, полне сущи, и на вечери многоценней Амире возлежащу, еще и мраку дотигшу, и в Пефлагонии матери его представив, и сткляницу с вином подавающа. Тако же и ныне той же Бог есть иже с верою несуменною (чистой, искренней) просит, не точию таковая, но и болшая чудодействия приемлет, и никоегоже тще (тщетно) есть, иже и зде сбыться, еже от треблаженнаго отца нашего Николая. Муж бо некоторый в Византии благочестив бе, и Господу Иисусу Христу верен, и преподобному отцу обрекся память его чтити и любя его. Той некогда во иную страну плаванием ити помыслив, работы ради некия, и пришед к церкви святаго, помолися по обычаю, и своя други и соседы целовав, и вшед в корабль отплы. В девятый же час нощи, ветру некоему подыхавшу, воставше пловцы направити ветрила (паруса), воста же и той благочестивый муж противу потребе водней. Всем же пловцем тщащымся о направлении ветрил, запинся (запятися – поскользнуться) и впаде (тот благочестивый муж) в пучину морскую. Онех же содержаще темница мрачная (пловцов окружил такой мрак) и ветру велику биюшу по лицу онех, и не можаху убо что сотворити, мужа горкую смерть рыдающе плакаху. Он же во одежди сый, юже ношаше, в мори погрязе, и сей водами морскими наводнився, и в пучине и глубине погрязнув, «святый Николае, помози ми», рече. На мнозе же (спустя долгое время) гласом сице вопия: «О чюдесе! яко неизследованна чюдеса твоя, Господи», – обретеся среде дому своего, мня яко во глубине ему стояти. Соседи же яко глас ощутиша, восташа. Тако же и иже в дому его сущии свещи вжегше. И сошедшымся околным (близким) соседом, видеша его среде храмины стояща и вопиюща, и со одежди, ею же бе облечен, морскую воду низ текущу. И в недомыслии бывше, ужасошася и устрашишася. Он же, «О братие, рече, что есть сие видимое? аз бо вем известно, яко всех вас в девятый час целовах и отплых, и силну ветру новеявшу, и бех седя в корабли; и наченшым пловцем ветрила направляти, аз же запенся в море ветром впадох и на помощь святаго Николая призвах, идеже есмь ныне, не вем, вы скажите ми, зане аз изумлен есмь и инак отнюд бых». Они же глаголемая от него слышаще, и морскую воду низходящу со одежди его зряще, дивляхуся, помышляюще быти преславному чюдеси. И с ним радующеся и слезяще на мнозе, Господи помилуй, взываху. Потом совлекся и во иные одежди облекся, в церковь святаго Николая пойде; и прочее нощи тамо препроводив, припадая со слезами моляся жалостивне и в благодарствие со ужасом воздаяше. Утренни же уже достигши и обычным людем в церковь собравшымся. Да яко вси добревонных аромат оных исполнишася, иже на благодарение святому от мужа принесшихся, всесветящу и церковь видевше, вопрошаху: «како вина есть бывшему?» И уведевше, удивишася, славяще Бога, а святаго похваляюще, и изрядное и пречюдное сие величие по всему великому граду поведано бысть, и во уши цареве, и архиерею великия церкве престол красящему. И сонм велик собравше, и мужу ставшу посреде, и со дерзновением поведавшу, како и коим нравом таковое неизреченное чюдоделие бысть. И вси возопиша «велий еси Господи и чюдна дела твоя, и кое же слово довлеет к пению чюдес твоих!» Молбу же и бдение сотвориша, в церкви святаго собравшеся, славяще и благодаряще Бога и верному его угоднику благодарение воздавающе.

Не мню праведно, ниже достойно и сие умолчати, еже о чюдеси святаго и преподобнаго отца нашего Николая. Бяше бо некий муж именем Агрик, добродетелна и благоговейна жителства, и сын единороден ему бысть, Василий зовом, иже во Антиохийстей стране, близ Срацын живый. Благодатиею же Божиею украшен, кипя богатством многим, и имея веру велию к святому отцу Николаю. Сего ради по вся лета на память святаго отца Николая день той торжественне препровождая. И две трапезе поставляя: едину убогим, а другую соседом, и другом, и прочим. Бе же церковь создана во имя святаго отца Николая, яже пять поприщ от града разстояние имея. И тамо на всяко лето собирахуся людие, на память святаго отца Николая. Во едину же от лет, на славную его память, многим людем грядущым на праздник ко святей церкви его, благоверный же он муж посла сына своего Василиа со отроки своими, и рече ему: «иди, чадо, к церкви святаго отца Николая, и сотвори по обычаю, якоже от нас прочими леты научен еси, яко да вечерняго пения, со страхом предстоя, послушаеши, такожде и утреннюю всю и Божественную литургию, и потом возвратишися в дом наш на обед; аз же и мати твоя устроим яже суть на потребу нищим». Сия же слышав Василий от отца своего, отьиде с радостию. Бысть же егда во время утренняго пения, и се внезапу приидоша Срацыни, и окруживше церковь, плениша вся народы: ту же и Василия, Агрикова сына, и во остров Критский отведоша, и даша его Срацынскому князю Амире, бе бо зело красен. И повеле ему Срацынский князь пред лицем своим стояти, а другия продаша, иныя же в темнице затвориша. Родители же Василиевы сия слышавше, на плачь и рыдание обратишася, и вместо радостнаго ликовствования, постиже их печальное сетование. И тако за два лета прибывающе, памяти святаго не творяху; но печалию обливающеся и со слезми рыдающе, сице глаголаху: «Сыне наш любезный, како тя ныне с сверстники твоими не зрим, и руками не обымаем, и устнами не целуем; добрее бы мне да бых тя видела на одре суща в болезни лежаща, и дабы тя воздвигнула своима рукама и обратила, нежели ныне впадша в поганых руце слышим. И аще бы смерть приключилася тебе, то с радостию бы земли тело твое предала, сердце же и чрево наше не бы терзалося». Толико сия им глаголющим, и прочая подобна сим. Слышаху же соседи их и вси сродницы, стицахуся вси на утешение скорби их и рыдания. И сице глаголаху им: «что, яко едини в скорбях, не терпеливи являетеся? или не веста чюднаго Николая, колико много по суху и по морю чюдес содевает, меча же и пленения и от всяких неповинных смертей много избавляет»? И ина глаголаху им многа на разрушение печали. Слышав же сия Агрик от ближних своих, утешився мало от печали. И востав иде к жене своей, и рече ей: «есть ли нам кая польза еже много плачем? Уже бо третие лето в сей печали, забыхом и о памяти святаго отца Никалая и не изыдохом к нему на праздник. Ныне послушай мене, да приимем свеща и елей, и фимиам, и пойдем к святому, и помолимся ему с верою, яко да о нашем сыне Василии утешение приимем от него, и с великою надеждою возвратимся: может бо сына нашего в руце дати нам, или всячески объявити о нем жив ли есть, или мертв». Сия же слышавши, жена его рече ему: «добре, господине, глаголеши, сотворим якоже хощеши, понеже и праздник приспе святаго отца Николая». И тако сотворше, и воставше с радостию текоста к церкви святаго отца Николая. И сотвориста яже по обычаю лепо празднующым, возвратистася в дом свой. И созваста на вечерю сродники своя и вся ближния соседы. Постависта же трапезу, и начаша ясти и пити славяще Бога и святаго отца Николая чюдеса поминающе. Егда же бысть в год вечери их, начаша пси лаяти прилежно. И рече Агрик отроком своим: «идите и видите что притужают пси, зверь ли есть, или ино что». Отроцы же шедше, ничто-же видеша; пси же паче пристужаху лающе. Агрик же взя свещы и пойде видети с прочими. И видеша человека посреди двора стояща в срацынстей одежди, и убояшася: недоумевахубося что есть сие? Еда же Агрик приступи к нему близ, и виде отрока юна стояща, и сткляницу полну вина в руце держаща, и смотряше нань ничто же глагола, но страхом и радостию одержим бысть, и едва проглагола во ужасе велице: «О, чадо мое, Василие! се ныне тя зрю воистину, ты ли еси сын мой, или стень (призрак) мне тобою кажется?» Отрок же Василий скоро отвеща: «аз есмь, отче, единородный сын твой, его же безбожнии Срацыни пленишя и в Крит от ваших недр родителей моих отведошя». Сия слышав отец его Агрик, простер руце, и охапив (обняв), нача целовати его, и впрошая его рече: «рцы ми, сладкое мое чадо, како еси избежал от безбожных Срацынских рук, или с кем, чадо мое, совещался еси, исповеждь ми вся отцу твоему». Отрок же рече отцу своему: «ничто же, отче, вем сего, о нем же мене вопрошаеши; но едино сие вем, еже на вечери ныне срацынскому князю предстоял есмь, понеже егда пленишя мя, и ведошя в Крит, и отдашя мя срацынскому князю Амире, и от того времени Амир срацынский князь постави мя черпати вино, и держати в стклянице предстоящу лицу его, якоже мене, отче, ныне видеши. И се не вем кто силен напрасно (внезапно) восхити мя и со сткляницею сею, юже и еще держу, и яко ветром несе и постави мя зде. И видех поставляющаго мя на месте сем великаго отца Николая». Слышав же сия, отец его Агрик, радости наполнися о велицем чюдеси, ем за руку и предаде матери его. Она же видевши сына своего, от радости плачющи, и многая словеса умилная глаголющи, и рукама обиемши непрестанно лобызаше, сице глаголюще: «ныне вижу тя; Василие, многолюбезное чадо мое, ныне ненадеемаго тя видети, в руку моею держащи ми; ныне, сладкое мое чадо, имам тя утешение души моей; ныне вся печали естества моего разрешишася: уже бо вся благая моя рукама моима держу!» Таже и ина многа умиления глаголаше о нем. Слышавша же все, яже окрест того места живущии людие, скоро стекошася, на таковое слышание и веселие неизглаголаннаго чюдесе. Святому же и великому отцу Николаю честен праздник сотвориша, славяще Святую Троицу, Отца и Сына, и Святаго Духа, ныне и присно, и во веки веков.

Сей убо преподобный отец наш Антоний бяше от предел Двинския области, иже близ студенаго моря окиана, от веси глаголемыя Кехты. Родителя же его беста художеством (по своим занятиям) земледельцы; имя же отцу Никифор, матери же не сведомо нами показася (нам неизвестно). Но точию сие вемы, яко живяста по закону Божию и родиста сего блаженнаго, о нем же нам, слову вина належит. Во святом же крещении имя ему бе Андрей. По времени же вдан бывает в научение книгам, яко же обычай имать детем, и благодатию Христовою навыче скоро и превзыде всех сверстник своих. Потом же научен бысть иконному художеству. И тако пребывая повинуяся во всем родителем своим. Земледелству же не внимаше, но паче прилежаше рукоделию. Зело же бе тщание его к церкви. Родителя же своя почитая, от них же и велми любим, и на вся благая успевая. Родителя же его по мале преставистася ко Господу. Блаженный же Андрей тогда бысть телесным возрастом двадесяти пяти лет. И по преставлении родителей своих отиде в пределы Нова-града. И по некоему смотрению Божиею, у некоего болярина поработа пять лет. Повелением же господина своего сочетавается законному браку, и по мале времени и свободися: супружница бо его от жития сего отиде. И зело о сем возрадовася. И работаше господину своему не яко человеку, но яко Богу; сего ради зело от него любим бе. Таже господину его от жития сего отшедшу ко Господу, он же свободен бысть, прииде в дом свой. Беша бо в дому его сродницы его братия и сестры единоутробныя. Блаженный же часть своего имения раздав нищым, сам же отиде из дому своего, желая получити иноческаго жития. Бывшу же ему на пути, и почивающу, и виде во сне видение: некто бо ему явися, и возвести вся, что ему хотяше случитися. Посем же прииде в монастырь Всемилостиваго Спаса, Боголепнаго Преображения, в Пахомиеву пустыню, иже Кенский нарицается: от того же святаго старца (Пахомия) и сподобися прияти монашеский образ и наставися монашескому житию. Бе же тогда преподобный телесным возрастом тридесяти лет, егда прият благий ярем ангельскаго образа, и бысть всем образ во обители живущым. По некоем же времени, понудишя его сан священства прияти: еже и бысть. Таже по благословению своего наставника, поим с собою два брата, Александра и Иоакима, и отиде в пустыню на реку Шелексу, и ту постави церковь, во имя святаго Николая Чюдотворца, и четыре брата присовокупи к себе, и устроил монастырь, и поживе ту седмь лет. И по зависти бесовской, окрест живущии в весох людие, не боящиися Бога, изгнаша его. Он же отъиде и с братиею своею, и прииде близ Студенаго моря, ходя по непроходимым местом, ища идеже бы селитву имети и монастырь создати. И моляшеся Богу, да бы им желаемое устроил. И обрете их некий человек, рыбный ловец, именем Самуил, и получи от святаго старца благословение. Вопроси же его святый, аще весть благопотребно место к сожитию монахов. Он же обещася, и приведе их на далное езеро, зовомое Михаилово, в него же течет река глаголемая Сия, из многих езер протече. И показа им место зело благоугодно ко монашескому спасению. Святый же место то зело возлюби и Бога благодари. И ту прежде водрузи крест, потом же постави церковь, во имя живоначальныя Троицы. И состави монастырь, и собра братию, при державе благовернаго и великаго князя Василия, сына великаго князя Иоанна, иже и Нов-град смири и живущих в нем управи. Написа же и образ Живоначальныя Троицы, от него же множество чюдес бысть. Некогда бо огнем запалися церковь и сгоре, чюдотворная же та икона в самый пламень из огня изыде никим же носима. Постави же святый и ины церкви, и трапезу, и вся устрои якоже лепо; много же потрудися на месте том. Бысть же преподобный Антоний во обители своей игуменом, понужен от братии, и добре пасяще стадо Христово и много поучаше братию. Отхождаше же святый в пустыню един, а в свое место пастыря оставляше: пустынныя же его труды и терпение кто исповесть? И паки возвращашеся в свой монастырь. Поживе же святый лета доволна и уже дойде во глубокую старость. Уведа же конец жития своего, созва всю братию и наказав их доволно, и вместо себе постави им игуменом ученика своего, именем Геласия. И тако сотвори молитву, и мир всем рек, и преставися к Богу, в лето 7065 (1557), декемврия в 7 день.

Сей преподобный Нил родися во единой от веси Новогородских предел, Деревския пятины, Жабенскаго погоста; а от какову родителю, того не обретохом, но токмо потрижен бысть в монастыре Псковския области, зовомаго Крыпца. И оттуду прейде в пустыню во Ржевский уезд, и вселися у Черемхи реки, пища же ему бе от былия (трава) и вершие дубное. Диавол же, не терпя сего видети, всяко вооружается на святаго, многими страшилищи преображаяся, в звери и во вся гады, и привиденми во дни и в нощи; и ненаказанными человеки пакости ему деяше. И тако пребысть 13 лет. Некогда же молящуся ему и воздремавшу, слышит глас глаголющ: «Ниле, изыде отсюду и иди во остров Столбное, в нем же возможеши спастися». Преподобный же от гласа того многия радости исполнився, яко не презре Господь моления его, и нача о том острове изысковати. Людие же поведашя ему, яко той остров на озере Селигере, имущи от Осташкова седмь верст. Преподобный же сия слышав, дойде до того острова, и велми возрадовася красоте острова того, и ископа себе ту в горе пещеру. И поживе в той пещере едину зиму, и потом созда себе келлию и часовню, и ту велми подвизася, в молитвах и посте, и в трудех землю копаше и оттого питашеся. Диавол же непрестанно ратоваше на преподобнаго и очевидно ему пакости деяше. Единою убо сотвори тако, яко мнети святому на келлию его ужу (веревка) возложену быти и опровергнути (сбросить) ю во озеро. Святый же молитвою вся сия разгнав. Посем же неистовнии жителие близ того острова, хотяще святаго согнати со острова того, и посекоша лес, помышляюще себе, рекуще: «егда той лес запалим, тогда и келлию его сожжем». И егда запалиша лес, святый же став на молитве, и Божиею благодатию пламень до горы не дойде и угасе. Иногда же нашедшим нань разбойником, и претящым святому, да отдаст им свое сокровище. Святый же глаголаше им: «идите и возмите в келлии во угле». Они же вшедше и ослепоша, и со слезами молящеся святому и просяще прощения. Святый же помолився Богу, и тии разбойницы прозреша. Он же наказав их о пользе душевной, и заповедал им того никомуже поведати. По преставлении же преподобнаго всем сия ясно исповедаша. Еще живу сущу святому, богобоязнинии рыболовцы питающе его рыбою. Во един же от дний ин рыболовец, быв в нечистоте плотьстей, поем рыбу несе ко святому. Святый же уразумев духом святым, и оконце келлии своей от него закрыв. Ловец же возвратится ко дружине своей, поведа им о себе вся по ряду. Во ино же время человек некий на острове том посече лес на строение домовное. И абие бысть гром страшен, и глас рекущь: «человече, отселе престани пакости деяти». Той же, не усомневся (не устрашившись), накладе воз, животное же его не возможе с места двигнути; той же обещася к тому тако не творити, и со страхом отъиде. Ин некто поселянин прииде ко святому в нечистоте телесней. Святый же, наказав его таковая не творити, и отпусти с миром. Поживе же преподобный на острове том двадесять седмь лет. И прежде преставления своего ископа землю своима рукама, и ту постави гроб, и по вся дни исхождаше и плакаше над ним. И егда приспе время преставления его, причастився Святых Таин. И вшед в келлию свою, обычныя молитвы творя; и взем кадилницу и покадив святыя иконы и всю келлию. И восклонися пазухами (пазуха – передняя часть тела) на обычныя крюки своя, на них же мало прежде телесный покой приимаше. И тако преставися ко Господеви Богу, в лето 7063 (1555), месяца декемвриа, в 7 день. Богу нашему слава, ныне и присно, и во веки веков.

Вонифатий, святый славный, в милостыни и щедротах во всей римстей стране знаем бе. Нищелюбие же издетска возлюбив, яко еще егда у матере юн сый, исходя из дому своего, и овогда убо без срачицы, овогда же без свиты возвращашеся. Егда бо нага кого видяше, то совлачашеся, им же бяше оболчен, и тем нагаго одеваше. Часто же и мати его сваряше (сварити – бранить), глаголющи: неправедно ти, чадо, самому пищу сущу, нищих одевать Единою же мати его влезши в житницу, в ней же бяше на все лето пищу уготовала си, и обрете ю тщи (пѵсту): сыну бо ея Вонифатию издаявшу нищым отай (тайно). И начат плакатися, в лице свое биющи и глаголюще: «ох мне, где возму на все лето пищу!» Он же пришед к матери своей начат ю утешати и молите, да выступит вон. Оной же излезши, и паде на землю Вонифатий, помолися Богу, и бысть полна житница пшеницы. Мати же его видевши сие возрадовася, и зело утешися, и оттоле не браните и ему же хощет дает. Видевши же своего отрочате превеликую милостыню и веру, прослави Господа. И достойна сотвори его Господь епископскаго стола града Ферийскаго.

Сей убо блаженный Петр родися от христиану и благоговейну родителю, во едином от мест земли Волынския. Прилучижеся нечто сицево и прежде рождения его, еже не достоит молчанию предати. Еже бо ему сущу во утробе матерни, во едину от нощей, светающи дневи неделну, виде видение мати его: мняшеся бо ей агньца держати на руку своею, посредеже рогу его древо благолиствено израстшо и многими цветы же и плоды обложено, и посреде ветвей его многи свещи светаща и благоуxания исходяща. И возбудившись недоумеяшеся, что сие, или что конец таковому видению; поведа же и мужу своему. Он же недомышляшеся о видении. И абие по мале родися има отроча, но конец последи со удивлением явися о нем. И преспевшу седмому лету, вдан бывает отрок родителема своима книгам учитися. И косно (медлительно, слабо) учащуся ему, не мала печаль бяше родителем его о сем. И паки же отрок виде во сне некоего мужа, во святительских одеждах пришедша, ставша над ним и глаголавша: «отверзи, чадо, уста твоя». Отрок же отверз уста. Святитель же коснуся языку его, и благослови отрока и отиде; и якоже некоею сладостию налияся гортань его. Отроку же возбудившуся, и никого же видевшу. И от того часа елико ему учитель написоваше, отрок же вскоре изучаше. И в мале времени всех сверстник своих превзыде. И бысть убо святый двадесяти лет, и отиде к предлежащей тамо пустыни, во един от монастырей. И тако прият ангелский образ, и вся службы монастырския тамо прошед – и братиям мыяша власяницы. В зиме же и лете правила своего ни мало оставляше, и первие всех обреташеся на церковном правиле, и последи исхождаше. Посем же, проразсуждением настоятеля обители, поставлен бывает диаконом, потом же и пресвитером. И абие повелением наставника иконному художеству вскоре навыче блаженный Петр, иконы писаше и отдаваше наставнику своему. Наставник же раздаваше братии и иным христолюбивым людем, приходящым в монастырь благословения ради. Посем же, проразсуждением наставника своего, обрете место пустынно на реце зовомой Рата. И ту святый церковь воздвиже, во имя Господа и Бога Спаса нашего Иисуса Христа, и монастырь состави, и братии множество собрашася к нему. Святый же всех наказуя и печашеся ими яко чадолюбивый отец. Тако же и князем и велможами знаем бе и чтим земли Волынския. Посем же убо Максим архиепископ от жития отъиде, и положено бысть тело его в преименитом граде Владимире, в церкви Святыя Богородицы. В тоже время некто Геронтий игумен самочинием восхити сан святительский и отъиде к Царю граду к Патриарху и не получи чаемаго. И абие князь и велможи Волынския земли молишя святаго Петра, да идет к Патриарху Цареградскому. Святый же умолен бывает от князя и от велмож и от священнаго собора, и отъиде в корабль. И вмале времени достиже Царя града, и прият бысть честно от патриарха Афанасия, и освящен бысть Митрополитом на престол Российския земли. И посем святый прииде немедленно на свой престол, мир и благословение всем дав. И начат учити без лености Богом порученное ему стадо, проходя от места до места. Посем некий епископ Тверскаго предела, именем Андрей, наважением вражиим сплетает на святаго ложная и хулная словеса, и посла в царствующий град, к святейшему Афанасию Патриарху. Патриарх же удивися, и неверна вмени оболгания епископля на святаго. И писание написа к святому Петру Патриарх, и посла с клириком своим. Клирик же приим, и Российския земли достиже, и собор собрася во граде Переяславле о лживом клеветании на святаго. Епископ же, иже оклеветавый святаго, пред всеми посрамлен бысть и уничижен. И паки еретика Сента препре, иже чюжда бывша церкви Христовы, и проклятию преда. Посем же прииде святый в приснословущий град Москву, еще ему малу сущу и не многонародну. В том же граде бяше князь Иоанн, сын великаго князя Даниила, внук блаженнаго и великаго князя Александра Невскаго, его же видев святитель Христов Петр в православии сияюща, и во всех добрых делах цветуща, зело возлюби его святый. И начат болши инех мест жити святый в том граде. И посем святый повелевает князю церковь каменну воздвигнути, во имя Святыя Богородицы. И проро[чески] рече князю: «аще мене, сыне, послушаеши, и храм Пресвятыя Богородицы воздвигнеши во своем граде, сам прославишася паче инех князей, и сынове и внуцы твои в [род] и род; и град сей славен будет во всех градех российских, и святители поживут в нем, и взыдут руки его на плещу враг его, и прославится Бог в нем; еще же и мои кости положены будут». И якоже князь слышав та словеса от святаго, и повеле церковь основати, и сам прилежа святый о церкве, церкви же совершающися. Святый же проуведе смерть свою Божиим откровением, и нача себе гроб делати своима рукама, близ святаго жертвеника. И по совершении гроба своего, паки виде видение, еже от жития сего отъити к Богу. И весь святый радости исполнися. И дневи бывшу, сам вниде в церковь и Божественную Литургию совершает, помолився о православных царех и князех и о своем сыне, благочестивом князе Иоанне, и за все благочестивое христианское множество все российския земли, и о умерших такоже воспоминание сотвори, и Святым Таинам причастився. Посем изыде из церкве, и призва весь причет церковный, и доволно поучив их, якоже обычай бяше ему творити. И от того часа не преста милостыню творити всем приходящым к нему убогим. Тако же и церквам и монастырем и иереом. И конечное свое уведе еже от мира отхождение, и призва к себе Протасиа, его же князь старейшиною постави градским: князю бо не прилучившуся во граде. Рече Протасию: «се оставляю сыну моему князю Иоанну мир и благословение, и милость от Бога, и семени его до века, а аз отхожду от жития сего». И много поучив его святый, и даде ему влагалище, и завеща истощити на церковное совершение. И абие всем в купе мир дав. И нача вечерню пети; еще бо сущи молитве во устех его, и сам руце воздев на небо, предаде душю свою в руце Божии. В тоже время князю приспевшу со всеми велможами своими во град, и скорбяше о лишении отца. Посем положиша святаго тело на одре, и к церкви понесоша, якоже обычай есть мертвым (творити). И человек некий прииде посреде оного народа, неверием одержим к святому. И виде святаго на одре седяща, и по обою страну народ благословляюща и князя. И одр убо с мощьми святаго принесше ко гробу, иже сам созда своима рукама, и положиша тело святаго отца в нем, месяца декемвриа, в 21 день, идеже и ныне лежит, чюдеса различная точаше, в славу Христову и до сего дне, иже с верою приходящым.