Сказание Афродитиана Персянина о бывшем чудеси в Персидстей земле

На Рождество Христово. Сказание Афродитиана о бывшем чудеси в перстеи земьли. Господи благослови отче:

(Из Сборн. Солов. библ. № 804; лист. 167–174.)

От Перс уведан бысть Христос. испръва. не утаитьбося в них ничто же сущих книгъчии. о всем любезне глаголющим¹⁷⁹ им. якоже бо есть въваяно. и лежит в листех¹⁸⁰ царских. Глаголю убо еже слышах. о сущих в них жерцех. в кумирнице убо каменнаа¹⁸¹ Ира. обону страну царского двора. юже кумирницу. свидетельствують. с всякою бе честию сътворил царь. и поставил в неи. богы многы, сребреные, и златые, и утворил я камением многоценным. но да (не) исповедаа о утвари. продолъжу слово. В ты дни. написанныя доскы сказают. влезъшу царю в кумирницу. разрешение сном прияти. и рече жрець Пруп¹⁸² порадуются с тобою владыко бози. Ира зачала есть в утробе. Царь же осклабися рече ему. умершаа ли в утробе имать. он же рече ему. умершаа ожила есть. Царь же рече, что се есть скажи ми. и рече истинно владыко год приспел есть сде. всю бо нощь пребыша образи. ликоствующе мужьсти и женьстии, глаголющи сами к себе. ходите, да ся радуемьмся с Ирою. яко возлюбленнаа бысть. и рекоша ми. пророче¹⁸³ иди и радуйся с Ирою. аз же отрекох. кто имать възлюбити не сущую. они же глаголаху. но ожила есть и потом (не) наречется Ира. но Ураниа великое бо солнце възлюбило есть ю и женсти к мускым глаголаху. яко похваляющи деяние. яко источник възлюблен. и глаголаху мужи. ныне бо Ира за древоделю обещалася источник есть в правду наречен приемлем. но имя еи Мариа есть, яже в ложеснех. яко в мори, многа добра корабль носить. аще ли источник та есть, да ся сице разумеваеть. источник бо воды, источник Духа присно источаеть. едину рыбу имеет Божиею удою емлему. им же весь мир. яко и море живуще¹⁸⁴ своею плотию кормить, добре рече. яко древоделю имать тайно. не от мужа его раждает древоделю¹⁸⁵ и тъ бо раждаяся древаделя. старейшины древодельскыи. отрок тригубне съставив¹⁸⁶ и небесныи кров съдела. премудрыями хитростьми настроение вселенныя всея. строп словеси съставив. Пребыша же убо образи прещеся о Ире. ти о источнице единогласне¹⁸⁷ рекша. скончавающежеся дни си вси увемы. И рече жрец ныне убо владыко пребуди прочее дни си. будеть бо конечнии разум деяния. въздвигшееся убо¹⁸⁸ несть просто тако, пребывшу же царю ту. и видящи¹⁸⁹ образы кумирныя. и начаша гудуци¹⁹⁰ в гусли. песница¹⁹¹ пети. елико же беаше в нутрь четвероножных. и птиц сребрен. и злат. кождо свершааше. свои глагол. Царю же грозну бывшу и всему наполнившуся¹⁹² страха. хотящу¹⁹³ отити. не тръпяше бо самозрачнаго мятежа. рече же ему жрец. пожди царю. приспело бо есть конечное явление. еже бо Бог всех изволил есть явити нам. Сему же тако събеседованну открыся строп¹⁹⁴ и взъиде звезда светла. и ста над кумиром источника. и глас бысть таковыи сълышаны. источниче Господь великое солнце. пустил¹⁹⁵ мя есть поведати тебе купно и служити ти. бескверное писание. Служить тебе мати старейшия¹⁹⁶ всех чинов. бывающи невесте триименитому божеству сущу. прозываетьжеся неописанный младенец. начало и конец. начало спасу¹⁹⁷ конец пагубе. Сему бо гласу възданну. вси кумири падоша ниц. единому источнику стоящу. в нем же обретеся почтен царьскыи венец, имыи от камыка нареченного ануфракс¹⁹⁸ (и) от змарагда. верху же источнику стояше звезда. Повеле же царь созвати вся премудрыя. разрешающа знамениа. елико же их беше под царством его. звателем же. трубами подъщевающим. приидоша вси в кумирницу. (и) яко узреша звезду. над источником. и венец звездныи. камением украшен. а кумиры на тлях¹⁹⁹ лежааше. и рекоша царю. корень царьскыи. и Бога небеснаго въсклонился есть, земнаго царя²⁰⁰ образ принося, источник бо каринь²⁰¹ вифлеомьскыя земля есть дъщи. венец же образа царьского есть проповедание. на земли чудотворимо от Июды востало есть царство еже жидовьскую паметь отвержеть. а еже бози падоша на тлях. скончание чести их приспело есть²⁰². ныне убо царю посли в Иерусалим. и обрящеши бо сына вседръжителя. телом телесныма рукама дръжим женьскыма. Пребысть же звезда та над источником, наречены(м) небесны. дóндеже поидоша волсви от перс... и тогда с теми поиде звезда. Вечер же позде зело явися единому. в тоиже кумирници. диону(с) с²⁰³ схоруговию. глаголя кумиром и источнику. ни един от вас по сем. но над вами есть, иже поновляет человечу вещь: Божиа служениа²⁰⁴ суща. жръче Прупе. что седиши сде. деяние писаниа доспело есть на вы. есть нам от сановита лица обличенным быти. еже лжущем (ме)чтахом. и еже въвладехом. к сему же не даем пророчества. отъята есть от нас честь. без славы и безо чести быхом. един точию есть. иже взя свою честь. рече же не плищуи к сему да не испросять пръси дано земныя ни въздушныя. уставити бо пришел есть дание. дани пустившу ему приносят²⁰⁵: пръвыи образ претворяя²⁰⁶ приспел есть духом, небо с землею радуеться. земля же хвалится. небесную хвалу приемлюще. еже бе горе²⁰⁷ бысть долу, его же невидесте умнии. телесни видита. онем бо пламень въспрещает²⁰⁸, а сим роса прииде карину²⁰⁹. благослучныи источник родися в Вифлеоме. жидовскаа земьля процвете. и странным (иноплеменником) Спас прииде. тружающимся покои изобилуеть. подобно жене ликоствують глаголюще. госпоже источниче пение²¹⁰ принося, бывшиа мати светильнику небеснаго. облак (от зноя) орошаа и весь мир. поминай своя рабы любимыя госпоже. Царь же ни мало премедли посла сущаа волъхвы под царством его с дары. звезда наставляющи. як възвратишася споведаша ему. въписавше на златую дьску сице. Пришедше убо в Иерусалим. подвизашася²¹¹ вся пришествиа нашего знамениа. глаголющим иерусалимляном. что есть премудрым перьскым приити с явлением звездъным. въпрашаху старейшины жидовьскые о будущем. чего деля есте пришли. и отвещахом: се его же наречете Мессию родился. они же плищевааху и противитися не дръзняаху. ти же рекоша нам. тако вы небесного суда поведите нам. что есть разумели. мы же отвещахом им. вы неверованием болите. и не имете веры. ни с клятвою ни без клятвы. но последуете²¹² безвестному разуму. Христос бо Сын вышняго родился есть. рассыпаа съборы ваши и закон. и того деля волъхвованием крепким стреляеми. не крепко послушаете имени сего. иже внезаапу прииде на вы. Они же сами в себе свещавшеся молиша ны. да возмем дары. и потаим таковое (чудо) тако страстныи быша да не будеть задора в них²¹³, Противу же отвещаша. мы злато много на честь ему принесли есмьмы. яко проповедати. бывшее²¹⁴ чудо в нашей стране и величество. внегда раждаашеся. вы же глаголете: възмите дары. нам явленное небесным царем таити велите. и преступити своего царя заповеди. или ни есте почли²¹⁵ колико искушение приимше асурииско. они же нас убоявшися пустиша. Царю жидовьску нас приведшу к себе, и глаголавшу к нам. и въпрошавшу. отвещахом к нему. о немже возмутися отинуду. и отидохом от него, не послушавше его. яко рядника. И приидохом. аможе пущени. и видехом рожденнаго и роджьшую. Звезде указующи человеческы²¹⁶ младенець. рекохом к матери. како ся прозываеши. преславнаа мати. Она же рече. Мариа. Мы же рекохом. откуду чадо. она же рече. от вифлеомьскые веси. мы рекохом. име ли мужа. она же отвеща. тъчию обещана бех. прежде брачьным небывшим знамением. суботе осветши, солнцу въсиявшу. прииде ангел. благовестуя мне преславно рождение некое. восплищавши воспих²¹⁷. и ни како же да не будеть ми Господи. мужа не знаю²¹⁸ и извеща ми. яко изволением Божиим. сего рождение имети. Мы же рекохом. Мати матерем вси бози прьстии ублажиша тя. хвала твоя велика, превознесеся паче всех человек. Отроча же седяше на земли. яко второе лето ему. яко же сам глаголаше. мал приклад имыи образ родившиа. сама же бяше высока телом. Смагл бльск имущи (кругловатым лицем и власы увясты имущи)²¹⁹. Мы же обличие обою имущи. написано в страну свою занесохом. и бысть положено нашими руками. еже бе проречено. и написано сице. в диоптове кумирници. солнцу Богу великому. царю перьскыя дръжавы написа. И взяхом отроча кождо нас. и подръжавше е на руку и поклоншася ему. и целовавше. дахом ему злато и ливан. и измурну. рекуще ему. тебе творим любезней чтьм тя небесныи Иисусе. Инако бо не быша было устроено (неустроеная). аще бы ты не пришел. инако не смеаху вышняя с нижними совокупитися. не толма бо спеется служьба. аще кто раба пустить елма же. аще кто приидеть сам владыи, лепо бо есть се твоей премудрости и хитрости. супостата прехитрити. Отроча же смеяшеся и плескааше. хваление имея словес наших. И поклонихомъся матери его. та же ны почтивши. И мы же ю прославивши приидохом на место. на немже бехом обитали. и бывшу убо вечеру прииде к нам уноша страшен и ужасен глагола к нам. скоро изидите. да не подимете съвета зла на ся. Мы же с ужастию отрекохом. кто есть творяи съвет на великыя силы и воеводы Божиа. он же рече. Ирод, нъ въставши абие идете с миром спасаеми. Мы же ускоревъше. и вседе на борзы коня отидохом оттуду, со всем подъщанием. и исповедахом все. елико видехом в Иерусалиме. се убо толико о Христе исповедахом вам. вемы убо Христа Спаса нам бывша.

Мы же о сем чудеси расмотривше рекохом. начаток от неверных язык. небо приведе на веру. от въсточные перьскыя земли. и в Иерусалим звездою волхвы призвав. поклонение с дары ко младенцу лежащему в яслех. носяще злато яко цареви и змирну же яко человеку. а фемиан яко Богови. их же устраньше (?) младенец, не скыпетры царскими ни престолы. но последнею нищетою. Что бо худейше врьтъпа. или что смиренее пелен: в них же восия божественое богатество. Темже и мы подъщимъся. подражати тыя волъхвы. Христу Богу сия дары принесем. веру праву от душа. чистоту от телеси; истину от языка. того бо рождеством девственным. и блудници възлюбивше житие целомудрено. честнейши дев бывают. а девы целомудреные Бога раждают. си рече неразумные научает глаголюще. О жены девьствуйте. да Христовы матери будете глаголюще. яко болящаа приближаеться родить. в болезни своей вопияше, тако быхом възлюбленому твоему. страха ради твоего Господи в чреве прияхом, поболехом и родихом дух спасения твоего. иже сътвори на земли. темже матери радуитеся о матери Божии но всяк възвраст и уноша и девы и старци. да хвалят имя Господне. яко възнесеся имя того единого. неплоды великоствуйте глаголюще. радуйся матерем мати и царице предповеленнаа всех вышьши. тебе бо Семион Богоприемец поклонся и стопам Божественем прикоснувся. неискусобрачней Божиеи Матери. он рече: носиши чистаа. его же боюся приимати яко младенца. воплощаема Бога. свята невечерня. и миром обладающа. ему же слава с Отцем и со Святым Духом. ныне и присно и в векы веком. Аминь.