Слово на Рождество Христово о пришествии волхвов²²⁰

(Из Сборн. Солов. библ. № 804; лист. 150–167.)

Господу нашему Иисус Христу. рожьшюся от пречистыя Девица Мариа. в Вифлеоме иудейстем. в дни Ирода царя. в лето 5500. месяца декамвриа в 25 день. его же звезда явися на въстоце. яко солнце в звездах превелика. омрачающи светом своим вся звезды. Сиюже видевъши в Персех волсви. иже беше надо всеми волхвы. у царя перского трие сущии Мелхиор Каспар и Валтасар. сии бо паче инех умеющих учение и хитрости и звездное течение. яже от седми планит преданиа хранящих отец своих. Древле глаголано бысть: въстанеть человек от израиля съкрушить начаткы Моавьля и пленить сыны иосифовы. сияже пророчествова Валаам волхв. в прежьняя времена, еще сый послан бо бяше Валаком царем прокляти исраиля. но Божиею пакы силою сице пророчествовавше. виписааше волсви таковое пророчество в Персех²²¹ прежде Рождества Христова. за 1400 лет. по приятии же учаахуться вси Перстии вълсви. и те сматряху. когда узрять таковую звезду. видевши же якоже не творяше шествия. якоже и прочая звезды от въстока на запад. но к полуднию и разумеша, яко рождество великаго царя являет. С радостию вземше от сокровищ своих дары. злато и ливан и змурно. с звездою наставницею грядяху. ни какоже не отступающе ея проводими ею бяху. внегда бо онем стати бяше. и та с ними стааше. Мне же мнимо есть по Божественых отец писанию. в неи же ясно сказааше. не есть убо звезда но сила некоя Божия претворишися в тако. егда бо онем стати бяше. и та с ними стаяше. егда бо онем ступати. и та с ними ступааше. Вся бо обычныя звезды на запад грядуть. сия же чрес естество на полудне идяше. солнцу же възъдшедшу, вся бо обычныя звезды омрачаються и невидими бывают. сия же солнечныя луча омрачаються. и невидими бывают пригыбааше. дóндеже шед и ста, идеже бе Ирод царствуя. Волсви же шедше в град Иерусалим. въпрашаахут с расмотрением глаголюще. где есть родивыйся царь июдейск. видехом бо звезду его на востоце. приидохом поклонитися ему. Тогда смятеся весь Иерусалим знамением пришествия их. глаголаше Иерусалимляне что се есть. яко премудрым пръсяном приити с явлением звездъным. Въпрашаахуть старейшины жидовьскыя о будущем. чего деля пришли есте. Они же отвещеваше се: его же нарицаете Месию родилъся есть. они же плищевааху. противитися не дръзааху. Тогда рекше им тако вы небесного суда. поведайте нам что есте разумели. Они же рекоша им. вы неверованием болите. и не имете веры. ни с клятвою ни бес клятвы. но въследуюте своему безвестному разуму. Христос Бог Сын Вышняго родился есть. рассыпая закон ваш и зборы. итого ради волхвованием крепким. стреляеми и да не крепко послушаете имени сего. иже внезапу прииде на вы. они же сами себе свещавшеся молиша ны вземше дары и потая таковое чудо. тако бо страстнии быша да не будет задора в них. Вълсви же отвещаша. Мы дары на честь ему принесли есмы. якоже проповедати бывшее чудо. в нашей стране и величество. вънегда же и роджьшася. и глаголете возмите дары. нам явление небесного царя таити велите. Промчежеся слово то до Ирода. иже бо ему возвестиша. Те глаголаху. мы убо царю слышахом от пришедших волхв. иже возвестиша нам о рождшемся цари. ему же глаголаху царству его несть конца. Ирод же возмутився яростию. скоро повеле их призвати. слугы же Иродовы возвестиша им глаголющи. царь зовет вы к собе. они же слышавше тощно идяху. чающе възвещениа о рождьшемся цари. ему же поклонитися приидоша. и абие сташа пред Иродом. И глагола к ним Ирод. где есть. егоже вы глаголете. рождьшагося в странах наших. егоже глаголете царству его несть конца. да аще убо изьвестно вежьте. и поведите нам. где есть родивыйся. Волсви же отвещаша Ироду глаголющи. мы убо, царю, сынове есми перьстии. область та отечьство наше есть. вся пределы земля твоея добре свемы. якоже отци наши добре разумеюще и нам предаша. мы же тех добре умеюще учениа и хитрости. и звездное течение. яже седми планит не соблажняяся. ты же почто вопрашаеши нас. о рождьшемся цари. мы убо звезду имам водящу нас. дóндеже та уставить предолгое наше шествие туда²²² увидим роджьшагося на земли царя на спасение земным. Ирод же се слышав глаголюща от вълхвов. уярився зраком. и смутися умом. да почто рече неизвестне ведущи. возмутили есте страну нашу и нас. Они же отвещаша к Ироду глаголюще. мы убо царю николиже съблазнихомся. дóндеже и до ныне зрящи на приход звездъныи. и вся знамения известне свемы. в коей либо стране приключьшееся. якоже отци предаша нам. ты же почто вопрошаеши нас, о рожьшемся цари. егда свидетеля есма стране твоей. мы убо имам звезду водящу нас, дóндеже та уставить течение. ту да поклонимся превечному царю. Ирод же лестию хотя от волхв уведати. кротко к ним отвеща и глаголя. то сице поистине грядете поклонитися рождьшемуся царю на земли. възвестите ми разумно. да и аз шед поклонюся ему. Испыта же Ирод известно о отрочати. и посла с ними слуги своя глаголя. аще где обрящете таковааго. възратившеся поведите ми. да шед поклонюся ему. Волсви же и слуги Иродовы. яко начаша начинати шествиа пути и ту абие погибе звезда. водящая мужа перскыя. посланные же слуги вспять возвратишася ко Ироду глаголющи. мы убо царю сице разумеваем вещь сию бывающую. яко си мужи волшества своего промышлением уставиша таковое знамение пречудно. егда бо начинаахом начати шествиа пути твоего повелениа. ту абие погибе звезда водящая та. да размыслить о них твоя дръжава. Ирод же распалився лютою яростию и наполнився яко аспида некаа гневом дышущи. повелев врещи их в темницу. и темничному стражу повеле твердо блюсти я. и пристави мужа единого умеющи язык пръскии. рекши. да разумееши убо. что глаголють сами к себе и не являйся им. и пакы нам възвестиши вся яже слышиши. и сотвориша тако. О нем же седящим скорбию одръжими бяху. от приключьшияся нань печали. сами себе глаголаху. еда соблазнихомся о знамении бывшем. и пакы к себе глаголаху. ни убо. но Иродова деля злааго возбешениа. и посланных его слуг скрыся убо таковое знамение. мы же о доселе на звезды смотрящи и не съблазнихомся. якоже отци наши добре разумеюще. и нам предаша. да пустим убо ко Ироду. отпустить ны едины. обретше и едины. ищем поклонитися превечному царю. И поведа слуга Ироду вся глаголаннаа от волхов. и абие царь рад бысть чая возвещениа о рожьшемся цари. призва их глаголя. почто добророднии мужи еще не глаголете нам о рожьшемся цари. да и чести сподоблени будете от нашего царствиа. и истиннии глаголнци наречетеся. Они же единако глаголаху. мы убо царю знамениа смотрим. да где станет звезда. ту да увидим роджьшагося царя. и поклонимся ему. известно видевше и возвратимся к тобе. Ирод же вопроси я глаголя: колико время имате шествиа пути вашего. отнележе явися знамение. Они же отвещаша: се уже яко две лете. Ирод же отпусти я с миром глаголя: аще кде обрящете таковаго. възвратившеся поведите нам. да и аз шед поклонюся ему. Лестно, а не истинно глаголаше. хотяй одолети и не преодолеемому Богу. его же с небеси бесплотнии зрящии дивляхуся и глаголющи. дивна видим ныне и преславна. егоже небо не вмести ныне же в чрево девиче вместися. и бывает в плоть. хотяй исполнити Божественныи строи. да сего Ирод готовится мечу предати хотя. разоряюща советы языком. отметающаго мысли людии. Нъ напредълежаще възвратимся. отпущенным же бывшим волъхвом. яко изидоша из града. яко се усты звездою глаголя небо кажет Творца своего Владыку всяческым светом ея просвещая языкы. и приводя на разум Бжии. и шедъше и ста верху, идеже бе отроча. Волсви же влезъше в храмину. и видевше отроча и матерь его. и падше и поклонишася ему. отверзъше сокровища своя. и даша ему злато. и ливан и змирну. злато бо есть якоже цареви достойно бяше. человечьство проявляюще. в нем же купно и Божество. ливан же яко Богу им же бо яко воня добровонно есть фемиян. да тем благословится кадило и честь воздаеться. и змирна же масло есть. им же помазывают мертвые. да тем провозвестиша тридневное воскресение Господа нашего Иисус Христа. юже мастию жены пришедши помазааху тело Иисусово. Да почто не почудимся вернии пръскых муж. и долговременному хождению. даром их прорицанию. не стыжуся бо, по Божественному писанию. пророкы их нарицати. имже бо провозвестиша. хотящее быти. и в плоти божество и человечьство. знаменавши своими приношениа дарми. се бо исполнися глагол певца Давида глаголюща. Ефиопиа и Фарсис аравитьстии острови. Сава и Медяне. всю землю одръжаша дары носящи. и припадоша ти Спасе. рожьшемуся от девица. на истребление поползениа стыдьскаго Адаамова. Но на предняя възвратимся. Поклоншеся волсви рыдавше. якоже рекохом и реша матери его како ся прозываеши преславная мати²²³. Она же отвещавше. Мариа имя ми есть. Они же рекоша име ли мужа. она же рече. обещана бых. преже брачьным не бывшиим. и суботе отсветши солнцу точию осиявшу. и прииде Ангел благовествуя мне преславное рожение некое. сплищевавши и въспих. и никакоже да не будеть мне Господи. понеже мужа не знаю. и извеща ми Ангел. яко изволением Божиим. сего рождение имети. Они рекоша еи. о мати матерем и старейши всех чинов бывающи невесте пречистей. триименитому единому Божеству сущу. госпоже источниче питие принося. бывшее мати светила небеснаго облака. от зноя ограждьшия весь мир. поминай своя рабы. любезнаа госпоже. хвала твоя велика. превознесеся паче всех человек. Отроча же седяше на земли: яко второе лето тому. якоже Исаия глаголаше. мал приклад имы яко образ рождения. сама же бяше высока телом. смагл блъск имущи. Они же обою обличиа имуще написана. в свою страну занесъша. и взяша отроча кождо их на руку и подеръжа. и поклонишася ему, и целовавше его. и давше ему дары. рекуще ему тебе и твоим любезно. и чтем тя небесный Иисусе. прозываешися неописанный младенец. начало и конец. начало спасу, и конец же пагубе. отрок трегубне (?) съставлениа небесны круг съдела премудрыми хитростьми построи вся вселенныя²²⁴ словом съставив. приспело есть конечное явление. иже бо Бог изволил есть явитися нам наконец. не быша было устроениа. не толма бо ся спеет служба. аще кто раба пустит. елма же аще кто придет сам. лепо есть сеи твоеи премудрости и хитрости. съпостата тако прехитрити. Отроча же смеяшеся и сплескаше хваление имея словес наших. И поклонихомся матери его. та же их почтивше. они же прославиша и. и идоша на место, идеже беаху обитали. И бывшу вечеру и прииде к ним уноша страшен и ужасен и глаголаше к ним. скоро изыдите да не подымете зла съвета на ся. Они же с ужастию рекоша. кто есть творяй совет на великия (силы и воля Божия). Он же рече им. Ирод. нъ въставше абие отидете с миром спасаеми. Они же въставше отидоша оттуду со всем подъщанием. и исповедаша все. еже видевше в Иерусалиме. Тогда Ирод разумев вся. яко поруган бысть от волхвов. и съзва мудрыя старца града того²²⁵. якоже волсви сътвориша ему. и рече им что есть вина явльшагося знамениа. еже пришелци они глаголаху роджьшагося в странах наших. егоже глаголаху царству его несть конца. Тогда отвещаша старейшии жидовъскыя глаголющи. мы царю слышахом от прежних нас. и разумехом. тако бо и книгы глаголють. яко от Вифлеома изидет. писано бо есть. ты Вифлеоме земьля Иудова. ничимже бо меншии еси в владыках Иудовах, из тебе бо изыдет владыка. иже упасет люди моя Исраиля. от Вифлеома бо изиде закон. и слово его от Ерусалима. да ту есть в пределех Вифлеомъскых. Ирод же се слышав и помысли избити вся младенци сущаа в Вифлеоме. и в всех пределех его. и посла вся слугы своя в Вифлеом, заповеда им глаголя. аще где обрящете мужеск пол двою лету и ниже по времени. мечу предадите их. аще ли женск пол, то пощадите. Иосиф же приим весть от Ангела. поим отроча и матерь его нощию. и бежа в Египет. и пребысть тамо до умертвиа Иродова. якоже Исаия глаголаше. се Господь седит на облаце легце. и прииде(ть) в Египет и потрясутся рукотворенна Египетьская от лица его. Облаком же нарицають деву. вселися и родися из нея. легкимже. понеже огнь Божественыи носи в собе. пред егоже лицем падше и потрясошася вси идоли Египетьстии. рукотворении бози их. тъ бо есть един неложный. но истинныи Бог. сам Собою избавляеть человеческыи род. истлевшии древним преступлением. Послании же слугы начаша избивати сущаа младенца. и бысть плачь горек в Вифлеоме. и в всех пределех его. Сбысться пророческое слово. глас в Раме слышан бысть сиречь в высоких. Рахили плачущися чад своих. и не хотяше утешитися тугою великою. яко не суть. та же бе Рахиль подружие Иакову патриарху. из нея же ся беша родили. та же беша во жребиях пали в пределех Вифлеомьстех. в первыя лета делящим израильтяном землю хананейскую. да тем, рече, избиеным отроком ея. не хотяше утешитися, зане не бе их. Да кто убо не плачется жен онех рыданиа. горькаго их плача зрящи. власом тръганиа. лицем их сапаниа. кричь бо рамень от жерел их исхождааше. кояждо бо их в себе глаголаху. увы мне. увы мне. избитаа²²⁶ наша чадца. уне бы нам было. аще бы ся есте не родили. да сея злострастьныя горькыя печали вашего убийства неподъяли быхом. почто быхом повинни вашей пагубе детци наши. честнии и дразии. да почто земля разирьши²²⁷ уста своя и не пожреть вся ны. якоже древле гневом Божиим, при Дафане и Авироне. и вся скоты их. да бы убо простершися на жалость вашу. и не презрящи вашего пагубнаго убиисьтва. любимыи наши цветци. да не до конца процветши. дабы ныне разъседъшися земля. и прияла в глубины своя. вам же еще в утробе сущим. уне бы нам было. или каа река напрасно наводнившися и похитила бы ны. и плодом ея на снедение да быхом были. или кое море росколыбався волнами в свою пучину восхитило бы нас. и волны ты морскые гроби бы нам быша были. или неции звери бы быша нам яро дышуще. яко некыя ехидна пыскающии. исшедши от некыя пустыня и пожрели ны быша. единою с вами претерпели быхом. Ныне же чадьца наша избитая²²⁸ зрящи вашего убииства печалию растерзаеми есми. каяжде бо их к себе глаголаше. о горе ми горе ми. власи ми растерзаются. очи ми не могоста огненых слез источати. язык ми связается. гортань ми пресыхаеть. сердце ми раставается. чресла ми потресаются. колени ми изнемогают. руце ми оцепенеста. что бо имамь рещи, или что глаголати о горькыя болезни. не вемы видевши вашу злострасную смерть. Инии бо от них мечем просекаеми бывают, инии сулицами пронижаеми бывают, а инии на копия възнизаеми. а инии о камень за власы разбиваемии. ови за нозе прънзаеми ими. а инии о стену приражаеми ими. а овоих же подавляаху. да тем рыданиа исполнишася. ко убийцам глаголаху. помилуите ны человеци таковии Бога ради. давшему закон Аврааму деду нашему. таковыи Бога избравшаго отца наша. помилуйте ны. не имате ли когождо вас матере и не весте ли любве матерня. не помилуете ли се перси нагы видящи. не боители ся егда и вашим чадом се же будеть. Помилуйте ны человеци таковии закон святы законодавець Моисеи. не бещадствуите нас. нъ пръвее детеи наших нас избийте. да что суть дети наши зло сотворили. мы да приимем месть. Вопия же ко цареви глаголаху. о царю законопреступници. почто закон дръжа беззаконие твориши. правде царь еси поставлен. а неправду почто сице твориши. были о царь веси ли колику ли суть дети любо. почто не взираеши к Богу. кто ин на младенца востал. но токмо ты един. беззакония делателю сый. Сии словеса с болезнию сердечною глаголаху и печалию безмерною. свиты раздираху сии и в перси камением биаху си. влас тръзааху. небеса молчаща послуха привождааху. послы творяаху Богу глаголющи. что се есть велико сверепство царево. Владыко твоей дръжаве противится. Ты создал еси. а он погубил. Ты одарьствовал еси. а он же отщетуеть. что ради мужьска полу родихом. аще сицева горка отроком смерть. О Царю небесныи. нам повели умрети с ними. на них же аще твое есть повеление. аще ли законопреступнаго царя повеление есть то повелением напрасным погубы его. И пакы рыданиа исполнешася и глаголаху. слыши небо и внуши земле. О земле. воспившыя древле. за кровь Авеля праведнаго, убиенаго бес правды. тако и за наша младенца воспии ко общему Владыце рекуще. зане твоего ради Единороднаго Сына. исшедшаго из пречистых ти ядр. и от престола славы твоея наши агньци пострадаша. егоже и мы ныне видевши. из невесты пречистыя пребогатыя рождество славим. лик свиряющих сподобишася видети. бесплотному Богу в плоть пришедшу. и чин же бесплотных видевше поюща. Тебе Царя и Господа Христа знаменааху. бес семене рожьшагося. в высоких царствующаго на небесех. ныне своим милосердием. съвершаеши нас от безневестныя отроковица, бесплотныи сыи преже век ныне же в последняя Слово удебелив плотию, сыны долу поникшиа хотяи пакы въздвигнути. тако и сия младенца. О Владыко преблагый. с десными у тебе овцами причти. и наслаждатися присно сподоби. в свете неприступнем. в раи Божества твоего. яко благ и милостив еси. хотяи всем спастися. и в разум истинный приити. и тебе славу восылаем глаголюще. слава Отцу сътворшему ны. слава Сыну спасшему ны. слава Святому Духу обновльшему ны. емуже слава в веки веком, аминь.