Сказания о Лице Спасителя и Богоматери. Первоевангелие Иакова¹¹⁰

Месяца сентября в 8 день. Рождество святыя Богородицы Марии. Благослови, отче.

(Из Сборн. XVI–XVII в. Солов. библ., № 804, лист. 26–37)

Глава I. В летописании, обоюнадесять колену израилеву. бе Аким богат зело и принося дары Господеви сугубы¹¹¹ глаголем в себе: да будеть еже о имении моем и всем людем. а еже за отпущение мое Господеви моему Богу. оцещение мне. Приближибося день великий. и принесоши дары своя. сынове израилеви. и ста Рувим¹¹² пред ними глаголя: Иоакиме, недостоить. тебе прежде приносите даров твоих: занеже семене неси сотворил в израили. И прискорбен бысть Иаким зело. иде в обенадесять колене израилеве. глаголя всебе. да виждю. аще един аз не сотворих семене. Изыскав же въся праведникы¹¹³. яко семя воскрсиша в израили. помяну патриарха Авраама, яко в последняя дни его. дасть ему Господь Бог сына Исаака. И печален бысть Иаким зело. и не явися жене своей Анне. но шед в пустыню, и постави си кущу¹¹⁴. и постися. 40 днии. и 40 нощии. и помышляше в собе глаголя: не сниду ни на брашно, ни на питие. дóндеже посетит мене Господь. и будет мне молитва брашно и питие.

Глава II. Жена же его двема сетованиема сетовашеся. и двема плачема плакашеся. сетую (рече) вдовьства моего, и плачуся бещадиа моего. Приближибося день великий Господень. и рече ей отроковица ея¹¹⁵. доколе оскорбляеши душу свою, се приближися день Господень великий. и не подобает ти сетовати. но приими главотяжь¹¹⁶ си. иже дасть ми осподини. и рече. яко не подобает ми увястися им. занеже раба есмь. и образ имать царский. И рече Анна отступи от мене. аз бо сего (не) сотворю. яко Господь Бог смири мя зело. егда како лестник¹¹⁷ въдасть ти и и прииде причастить мене гресе твоем. И рече раба ея: доколе смиряеши душу свою, почто не послуша гласа моего. да не боле проклену тя. занеже затворить Бог ложесна твоя, неда тебе плода во Израили. И печална бысть Анна зело. и съвлече ризы своя сетовалныя¹¹⁸ и облечеся в ризы своя брачьныя. к године 9 и сниде в сад свой походити. и седе под дафиниею¹¹⁹ и помолися к Богу глаголющи: Боже отец наших, благослови сия. и услыши мою мольбу. яко же благослови ложесна Сарина. и дасть ей сына. Исаака.

Глава III. И възревши на небо виде гнездо птиче на дафинии. и сотвори рыдание в себе глаголюще. люте мне. кому уподоблюся аз. и кто мя роди. ли коя ложесна изнесоша мя. яко аз клятва родихся пред сыны израилевы. и поносиша ми и поругашамися. изъгнаша мя из церкви, Господа Бога моего. люте мне кому уподобихся аз. и не уподобихся аз птицам небесным. яко птица небесныя плодовиты пред тобою Господи. люте мне. кому уподобихся аз. ни зверем земным. яко зверие земнии плодовиты пред тобою Господи. и не уподобихся аз ни водам. яко воды сия пред тобою Господи плодовиты, суть волны бо утешающа и глумящася тя благословят Господи¹²⁰. увы мне кому уподобихся аз. неуподобихся аз земли сей. яко и земля приносит плоды своя на всяко время и тя благословят Господи.

Глава IV. И се Ангел Господень ста пред нею глаголя: Анно услыша Бог молитву твою, и зачати имаши и родити и възглаголется¹²¹ семя твое, повсей вселенней. И рече Анна: жив Господь Бог. яко аще приживу мужеск пол или женеск принесу вдар Господеви Богу и будет служа вся дни живота своего. И се приидоста два вестьника глаголюща ей: се Аким муж твой грядет с стады своими. Ангел бо Господень сниде к нему глаголя: Иакиме. услыша Господь Бог молитву твою, сниди отсуду. се бо твоя жена Анна в утробе приимет и родит и възглаголется семя твое по всей земли¹²². И сниде Иаким. призва пастыря своя глаголя. приведите ми 10 агнец неклосен. непорочен¹²³, и будет 10 агнец Господеви моему. и приведите ми семо 12 тельца неклосна и непорочна¹²⁴ и будет 12 тельца иереом. и старцем, и 100 козел¹²⁵ и будет 100 козел всем людем. И се Иаким идяше с стады своими, и съта Анна при вратех. и виде Иакима грядуща. и текши охапися выи его¹²⁶ глаголюще: ныне виде, яко Господь Бог мой благослови мя зело, сущия вдова, ктому не вдовица, и бещадна в утробе прииму. И почи Иаким первый день в дому своем, и разуме Анну жену свою¹²⁷.

Глава V. И в утрий день принесе дары своя. Иаким в себе глаголя: аще Господь Бог оцестил мя есть, петаль иерееву¹²⁸ явит мне, и принес дары зряше к петалу иереову. дóндеже вниде в алтарь Господень. и не виде греха на собе, и рече Иаким: ныне виде, яко Господь Бог оцестил мя есть, и остави ми вся грехи моя. изыде из церкви Господни оправдан, и бе Иаким в дому своем. Исполнишася Анне дни родити. и роди Анна. и рече бабе: что родих. она же рече: женеск пол, и рече Анна: възвеличишася душа моя днесь, и взлеже. Исполньшимъся днем измыйся Анна, и дасть сосец отроковици и нарече имя ей Мариа.

Глава VI. День же от дне крепляшеся отроковица, егда же бысть ей 6 месяц. постави ю мати на земли, искусити станет ли. и 7-дмижды ступльши. и прииде на лоно ея. и взя ю мати ея глаголюще: жив Господь Бог мой, и не имаши ходите по земли сей, дóндеже веду тя в церковь Господню. И сотвори Анна священие¹²⁹ на ложи своем, о скверну и нечистоту не дадяше миновати мимо ню. И призва дъщери еврейскы и неговахуть ю¹³⁰. Егда же бысть первое лето отроковици и сотвори пир великыи Иаким. и призва иереа. и книжники. и старци. и вся люди израилевы. и приведе отроковицу Иаким к иереом. и благословиша ю глаголюще: Боже отец наших. благослови отроковицу сию. и даждь ей имя именито, вечно вся роды земныя. И рекоша вси людие: да будет, аминь. И приведоша ю к архиереом. и благословиша ю глаголюще. Боже с высоты¹³¹ призри на отроковицу сию. и благослови ю последним благословением. еже изменения¹³² не имать. И восхити ю мати ея в освящениа ложа¹³³ и дасть ссати отроковици¹³⁴. И сотвори Анна песнь к Господу Богу глаголюще: въспою песнь Господеви Богу моему. яко посети мене, и отъять от мене поношение враг моих, и дасть ми Господь Бог плод правды своея, и кто възвестить сыном Рувимлим. яко Анна доить отроковицу. И положьши (ту) на ложи священия¹³⁵. изыде и служаше всем. Скончавшижеся вечери, изидошо веселящеся. и прославиша Бога израилева.

Глава VII. Отроковициже прилагахуся месяци. И бысть двою лет: и рече Иаким Анне: ведете отроковицу в церковь Господню. и дадиве обещание¹³⁶ еже обещахове. егда како послет гнев на ны Господь, и не приятен будет дар наю. И рече Анна: пождиве до третьего лета, дабы не искала отца, и матеря. и тогда ведеве ю в церковь Господа Бога. Бывши же ей 3 летом, и рече Иаким: призовите дъщери еврейскы. не-скверны. да возмут рясны свеща горяща¹³⁷. да не възвратится вспять отроковица и пленять сердце еа от церквьи Господа Бога. И сотвориша тако, и внидоша в церковь Господню. и прият ю иерей, целовав ю благослови. и рече: Господь Бог да възвеличит имя твое во вся роды, и в последняя дни. егда явит Господь Бог избавление свое на тебе сыном израилевом. И посади ю на степени третьем олтарнем. и възложи Господь Бог благодать на ню. и потрепа ногама своима. и возлюби ю весь дом израилев.

Глава VIII. И снидоста родителя ея поюща. и благословяща Бога яко не възратися книма отроковица. Беже Мариа в церкви яко голубь питома¹³⁸ и приимаше пищу от рукы ангеловы. Бывъши же еи 12 лет в церкви съвет бысть иереом. и глаголаху: се Мариа бысть 12 лет в церкви Господни. что убо сотворим ей. да не осквернит святилища Господа Бога нашего. И реша иереи к Захарии: Ты предстоиши олтарю Господню. да вшед в святилище помолися о ней. и еже ти явит Господь Бог. тоже ей сотвори. И вниде иереи. оболкся в ризу, двою на 10 звонную. в святаа святых. и помолися о ней. И се Ангел ста глаголя ему: Захарие, шед сбери сущая вдовца в людех и да принесут рясны¹³⁹ жезлы, ему же явит Господь Бог знамение, тому будет жена. Изыдоша проповедници по всеи земли июдейстей. и воструби труба Господня. се притекоша вси.

Глава IX. Иосиф же поверг теслу¹⁴⁰ изиде противу¹⁴¹ и собрашася. приидоша ко иереови, имущеи жезлы. Взем же иереи жезлы от когождо их. вниде в святилище и помолися. И кончав же молитву, взят жезлы, и шед дасть им. и не явися в них знамение. Последний же жезл приять Иосиф¹⁴² и се голубь изыде от жезла и полете на главу Иосифа. И глагола иереи. Иосифе на тебе жребии паде. пояти деву Господню в соблюдение себе. И рече противу Иосиф. глаголя: сыны имам и стар есмь. и се девица есть егда како смех буду сыном израилевым. И рече иереи: Иосифе. убоися Бога. помяни что сотвори Корею, Дафану, и Авирону. како ся проседе земля и пожре та за прекословие. и ты убойся Иосифе. да не тоже будет и в твоем дому. И убояся Иосиф. поят ю в соблюдение себе, и рече: Марие. се приях тя от церкве Господа Бога и оставляю тя в дому своем, иду здания здати. и прииду к тобе, Господь да съхранит тя.

Глава X. Бысть же съвет иереев глаголющь. да сотворим катапетазму церкви Господни. и рече иереи: призовите девы нескверны колена Давидова. Идоша слугы изискавше обретоша 7 их. И помяну иереи Марию. яко бысть от колена Давидова. и не скверну Богу. Идоша слугы. и приведоша ю в церковь Господню. И рече иереи, известите ми ся сде. кто имать прясти злато не скверно, и вусь¹⁴³ и сурика иоакинта. и кокин. истовую порфиру. И паде Марии своя порфира, и кокин. вземши Мариа иде в дом свой. Во время же оно Захариа молча. в бысть Симеон¹⁴⁴ в него месте, дóндеже Захариа прогласи. Мариа же вземши кокин скаше.

Глава XI. И взем шикобел¹⁴⁵ изыде почерпти воды, и се глас к неи. радуйся обрадованная. Господь с тобою. благословенна ты в женах. И озреся одесную. и ошуюю. откуду есть глас, и убоявшеся иде в дом свои. И поставльши водонос, и вземши порфиру седе на престоле своем¹⁴⁶ и скаше. И се Ангел Господень ста пред нею глаголя: не бойся Марие. ибо обрела еси благодать пред Богом. зачнеши бо и родиши сын. И Мариа же слышавши помышляше в собе глаголющи: како ми се будет, идеже мужа не знаю, аще убо аз зачну от Бога жива, и рожду. яко и всяка жена раждает. Абие отвеща Ангел Господень. глагола к неи: не тако Марие. но сила Вышняго осенит тя. да тем раждаемое свято наречется сын Вышняго, и наречеши имя ему Иисус. тъ бо спасет люди своя от грех их. И рече Мариа: се раба Господня пред ним, буди ми по глаголу твоему.

Глава XII. И сотворивши порфиру. и кокин. и несе к иерею. Благослови ю иереи, и рече Марие возвеличил есть Господь Бог милостью имя твое, и будеши благословенна во всех родех земных, и до века. Радость же приимши Марие и прииде к Елисавети ужици своей, и толкнув в двери. Елисавета же слышавши тече и отвори еи. и благослови ю и рече: откуду се ми да приидет Мати Господа моего ко мне. сущее бо во мне взыграся радощами в чреве моем, и благослови ю. Мариа же забы таину, юже к ней глагола Архангел Гавриил, и възревши на небо и рече: Господи кто есмь аз яко вся жены земные блажать мя. И створи три месяци. у Елизавети. день же от дне растяше утроба ея. и убоявшися иде в дом свои, и скрывся от сынов израилеву. Бе же 16 лет, егда быша тайны сиа.

Глава XIII. Бысть же еи 6 месяц. егда прииде Иосиф от зданий своих¹⁴⁷ и виде Марию непраздну сущу. и прискорбен бысть зело, и испад лицем повержеся на земли, на вретищи¹⁴⁸ и плакася горко. и глаголаше в собе: ким лицем възрию к Господу Богу моему. како же ся помолю о девици сеи. яко девою поях ю от церкви Бога моего, и не съхраних ея. кто мя улови. кто зло се сотвори в дому моем, и оскверни ю. еда на мне обновися сказание Адамово¹⁴⁹ яко же бо тъ в час славословия своего бысть. и обрете змиа жену едину. и прелсти ю. тако и мне прилучися. И въстав Иосиф от вретища, призва Марию и рече: Набдимая Богом¹⁵⁰ что се еси сотворила. и смирила еси душу мою. забыла еси Господа Бога своего, воспитанаа в святаа святых. и приимшая пищу от рукы Ангеловы. что сотворила еси. Она же плакася горко глаголющи. яко чиста есмь аз. и мужа не знаю. И рече Иосиф: да откуду се есть в утробе твоей. Она же рече: жив Господь Бог мои, яко не веде се откуду есть в мне.

Глава XIV. И убояся Иосиф зело, и умолъча к ней. и помышляя что сотворит ей. и рече: аще скрыю грехи ея, обрящуся сваряся¹⁵¹ с законом Господним. и аще явлю сыном израилевом. и боюся егда како ангельско есть сущее в неи. и обрящуся предав кровь неповинну на осуждение смертное. нъ что убо сотворю еи. отпущу ли отаи от себе. И постиже и нощь, и се Ангел Господень во сне явися ему глаголя: не бойся Иосиф отроковици сея. сущее бо в неи от Духа Свята есть, родит же сын. и наречется имя ему Иисус. тъ бо спасет люди от грех их. И востав Иосиф от сна своего прослави Бога. давшаго ему таку благодать.

Глава XV. Прииде же Анна книжник, и рече Иосифу. почто не явися собору нашему пришед. И рече Иосиф труден бых¹⁵² от пути. почив первый день. И обращься Анна виде Марию непраздну сущу. и шед с тщанием. и рече иереови, Иосиф. о немже ты свидетельствуеши. беззаконие сотворил есть зело. И рече иереи: кто грех сотворил есть, он же рече: девицу юже поят от церкви Господня оскверни ю. украде брак ея. а не яви сыном израилевым. Иереи рече. Иосиф ли се есть сотворил. Анна рече: посли слуги своя, и обрящеши деву непраздну сущу. Идоша слугы и обретоша якоже Анна рече. и приведоша ю с Иосифом на судище. И рече иереи к Марии. забыла Господа Бога своего, воспитаная в Святая Святых. и приимши пищу от рукы Ангеловы. и слышавши пениа их. что еси сотворила. Она же плакася горко глаголющи: жив Господь Бог мой яко чиста есмь и мужа не знаю. И рече иереи Иосифови: что се сотворил еси. и рече Иосиф: жив Господь Бог мои, яко чист есмь от неа. И рече иереи: нелжесвидетелствуи. но глаголи истинну. украл еси брак ея. и не яви сыном израилевом. и неси подклонил главу свою под крепкую руку Господню. дабы было семя твое благословенно. и умолча Иосиф.

Глава XVI. И рече иереи: возврати деву. юже поят от церкви Господня. и прослезися Иосиф. И рече иереи: да вы напою воды обличения¹⁵³ и явит Господь грехи ваю пред очима нашима. И взем иереи, и напои Иосифа, и посла в горницу¹⁵⁴ и прииде цел¹⁵⁵ напои же Марию и прииде цела, и чудишася вси людие. яко грех не явися на него. И рече иереи: аще и Господь не яви греха ваю. ни аз осуждаю ваю. и отпусти я. Поимже Иосиф Марию. иде в дом свой радуяся. славя Бога израилева.

Глава XVII. Бысть же повеление от Августа кесаря, написати сущая в них вся. в Вифлеоме Июдейстем. И рече Иосиф: се аз напишу сыны своя, сей же отроковици не веде, что сотворю. и како напишу. жену ли себе. но стыждуся. или дщерь, но ведят сынове израилеви. яко несть ми дщи, се день Господень да сотворить, якоже хощет. И оседла осля и всади ю. и ведяше ю. и Симеон¹⁵⁶ в след его идяше сын его. и преидоша три поприща. и обращься Иосиф виде Марию дряхлу¹⁵⁷ и рече в себе егда како сущее в ней труждает ю. и обращеся Иосиф. виде ю смеющуся. и рече: Марие что есть се. яко лице твое овогда вижу дряхло. ово ли смеющеся. И рече Мария. двои люди¹⁵⁸ виждю предо очима моима. едины плачуща. а другия смеющеся. Егда же быша посреди пути идуща. и рече Мариа к Иосифу. ссади мя с осляте. яко сущее в мне нудить мя изыти. И ссади ю с осляте. И рече Иосиф, кде тя веду скрыть. яко место се пусто¹⁵⁹.

Глава XVIII. И обрете ту вертеп¹⁶⁰ Иосиф и введе ю тамо. и пристави сыны своя ту. иде искать бабы евреяныня от Вифлеема. Аз же Иосиф идый и не ведях¹⁶¹ и возрев на небо, и видех круг небесный стоящ¹⁶² и видех небо мутно. птица небесныя молчаща. и възрев на землю, видев овца стояща¹⁶³ и видев делателя възлежаща и беяху рукы их в опаници¹⁶⁴ и взимающе не приношаху к устом своим. и жующе не жваху. но всем лица беша горе зряще. и видех овца же немы стояху. и възведе пастырь жезл свой и ударить я. и рука его дръжашеся горе, и възрев в поток, видех уста козлищ прилежаща и не пиюща. и все прикосновением женяхуся¹⁶⁵.

Глава XIX. И видех жену сходящу с горниця¹⁶⁶ и рече ми кде идеши и рех: бабы исках евреяныни. и рече ми: от Ерусалима¹⁶⁷ ли еси. и рех еи. И рече ми. кто есть раждающа в вертепе. и рех: обрученная ми жена, и несть ми жена, занеже зачатье имать от Духа Свята. И рече баба: воистину ли се есть. и рече Иосиф: гряди и виждь. и иде с ним баба.¹⁶⁸ И се облак светел ста над врьтепом. и свет восия в вертепе. яко очима не тръпети. и рече баба. възвеличися душа моя днесь. И абие възимашеся облак от врътепа. и въсиа свет велии. явися младенець. и прият съсец от матери своея Марии. и въспи¹⁶⁹ глаголюще баба: велик ми день Господне. яко видех чудо новое. И изиде из вертепа славяще Бога. и срете ю Саломия. и рече Саломии: да ти поведе чудо ново. дева роди. его же небо не вместить. и рече Саломии: жив Господь Бог мои. аще не разумею вещи сиа. и не иму веры. яко деваа роди.

Глава XX. И вниде баба к Марии глаголющи. открыися. не мала ми туга на тебе¹⁷⁰. и видевши Саломии, въспи глаголющи: люте моему неверию и безаконию. яко искусих Бога жива. и се рука отпадает от мене. И преклонши колене. моляшеся к Богу глаголющи: Боже отец наших; помяни. яко семя есмь Авраамле. Исааково. Иаковле. не обличи мене пред сыны израилевы. но возврати мя к нищим. яже веси Владыко яже целяхуся именем твоим. и мзду мою чаю прияти от тебе. И абие приступи Ангел Господень глаголя: Саломии. Саломии. услышав Господь молитву твою. принеси руку твою к отрочати и исцелееши и будет ти спасение. И радость приимши Саломии. поклонися ему глаголющи. ты царь родися израилев. и поносивши же и абие исцеле. изиде от врътьпа оправдана. И се глас к неи. Саломии. Саломии. не възвести. яже виде славънаа днесь. дóндеже внидет детище в Иерусалим.

Глава XXI. I се Иосиф изыде уготовася от Иудеа¹⁷¹ и приидоша волсви¹⁷² от въсток глаголюще: где есть царь июдейск. видехом бо звезду его на въстоце восиявъшу. и приидохом поклонитися ему. Слышав же Ирод смятеся. и посла слугы ко архиереом глаголя: что вы есть писано о Христе. кде есть раждаяйся. Они же реша в Вифлеоме июдейстем. тако бо писано. и отпусти я. И призва волхвы въпрашааше я глаголя: что видесте¹⁷³ о рожьшимся царе. и реша волсви. видехом звезду велику, восиявшу в звездах и омрачающу и. и мы разумехом. яко царь родися израилев. и приидохом поклонитися ему. И рече им Ирод: изищите известно о отрочате. и аще обрящете. поведайте ми. да и аз шед поклонюся ему. Изидоша волсви. и се звезда. юже видеша на въстоце, и ведяше я. дóндеже пришедши над врътпом ста над главою отрочате. видевши волъсви отроча с Мариею матерью его. изнесоша от скровищ своих злато, и ливан. и смирну. и даша ему. И весть приемши от Ангела, не ити в июдею. но инем путем отидоша в страну свою.

Глава XXII. Тогда увидев Ирод. яко поруган бысть волхвы. разгневався посла убийца и глагола им. избиите вся младенец сущаа в Вифлеоме. от двою лету. Слышав Мариа. яко младенца избивают. убоявшися взя отроча, и повивши скры и в яслех волуях¹⁷⁴. И Елисавет же слышавши. яко Иоанна ищут. и вземши бежаша в гору. и глядаша места. где скрыти. и не бяше места тайна. Тогда воздохнувше Елисавет. глаголя: горо приими матерь с чадом. небо можааше к тому Елисавет возратитися. И абие расседеся гора и приат я. и сияше има свет в горе. и Ангел Господень с нима храня я¹⁷⁵.

Глава XXIII. Ирод же искааше Иоанна. и посла слугы в олтарь Господень к Захарьи глаголя: кде еси скрыл сына. он же отвеща. аз есмь слуга Божии. седяи у церкви Господня. како уведе. где есть сын мои. И шедше слугы поведаше се Ироду. Посла же Ирод третие к Захарии. глаголя: рци кде есть сын твой, не веси ли. яко кровь твоя в руку моею есть. И рече Захариа: мученик буду Божии. аще прольешь кровь мою. дух мой приимет Владыка. а кровь прольете неповинну. Пред дверьми церкви Господня. и противу свету¹⁷⁶. убиен бысть Захариа. и не ведяху сыны израилеви убиена суща.

Глава XXIV. Но в час целованиа иереи идуща, не срете их по обычаю благословение Захариино. и стояху иереи ждуще целованиа. еже в молитве испросити у Вышняго. Медлящу же ся Захарии. убояшася вси. дръзнув же един от них. вниде в святилище, и виде при олтари Господни кровь сседшуюся. и глас глаголющ: убиен бысть Захариа. и не въстребится кровь его. дóндеже приидет местник¹⁷⁷ его. Слышав же словеса сии убояся. и възвести иереом. еже виде и еже слыша. Дръзвувше же и внидоша вси. и видевше бывшее. на степени церковнем сташа и възопиша. и растерзаше ризы своя от горы и до низу¹⁷⁸. и не обретоша телеси его. кровь же его обретошася. яко камень съседшуся. и убояшася изидоша. и възвестиша всем, яко Захариа убиен бысть. И слышаша вся колена израилева. и плакашася три дни и три нощи. по трех же днех. съвещаша иереи. кого поставят на месте Захариине. паде жребии Симеону, тому възвещено Святым Духом не видети смерти. дóндеже узрит Христа в плоти.

Глава XXV. Аз же Иаков написавши сказание се. молве бывшей, егда умре Ирод. и скрыхся в пусте. дóндеже престанет молва в Иерусалиме. Слава давшему ми мудрость тайна сиа написати. яко тому подобает слава в векы веком аминь: