Вопросы князя Антиоха и ответы Св. Афанасия Александрийского

Иже во святых отца нашего Афанасиа архиепископа Александрийскаго, ко Антиоху князю, о многих и нужных взысканых вещех, иже в Божественых Писаниях обретающихся. всем христианом ведомо быти должны.⁵²⁷

Вопрос 1. Первее (Небеса сл.35) убо веровавше и крестившеся в Троицу единосущную, и глаголюще (сл.8) Бога быти Отца, подобне Бога быти и Сына, такожде Бога быти и Духа Святаго, како не глаголем три боги, но единаго Бога точию. Аще единаго Бога токмо чтем и покланяемся, яве яко (сл.5) единоначалие верующе жидовствуем, аще ли три паки боги, то яве (сл.8), яко еллинствуем, многобожие вводяще, а не единому Богу благочестне покланяющеся.

Ответ. Неиспытно слово и образ благочестия есть. Верою единою, а не испытованием познаваем и чтим. (Небеса сл. 4) Бог бо постижимый, несть Бог. Аще бо ангели (сл.14. Богослов сл.2. сл.14. Небеса сл.23) или наши души тварь суще постигнути не можем, кольми паче тех Творцу лепо есть быти недоведому, тайне бо сказаем ничтоже есть чудно, тем убо христианом вера, и сих трисоставный⁵²⁸ Бог, иже един есть составом⁵²⁹ человекообразен⁵³⁰ якоже жидовстии отроцы баснословят (Небеса сл.5). Ниже паки трие нецыи бози, друг друга отстояще, отступай еллинскаго баснословия; неразделно бо в триех составех единаго существа Божество, обаче ведети подобает (Небеса сл. 4) яко ни глаголании ни помышлении постигнути, или исповедати что от Божества ум человеческий может (Василий Великий Шестоднев сл.1. Иоанн Екзарх сл.1). Вси елицы Бога постигнути потщашася, свою сень гониша, елицы же существо Божие рещи восхотеша, бездну измерити своею горстию потщашася, и елицы изобрести непщеваша⁵³¹, во злия ереси превратишася (Небеса сл.8). Отец бо и Бог не якоже аз создан есмь (слово 4). Отец роди Сына несозданна, не якоже аз. ни Сын якоже всем плотским раждаем, Сын рожден бысть (слово 7), ни Дух Святый, якоже человеческий дух есть описан, но неизреченно и несказанно есть Святыя Троицы таинство, и не рцы сим образом, паче бо образа Божественный образ, ниже рцы сим словом, паче бо слова Божественное Слово, но веруй во Отца, не испытуй вещи, покланяйся Сыну, и не испытуй его рождения, воспевай Дух Святый, не изыскуяй святыя Троицы таинство (Мф.6. Мк.2. Лк.10). Гряди на Иордан и зри самими вещми явление святыя Троицы силу. Отца убо свыше свидетелствующа. Сына же доле крещаема. Духа же Святаго в видении голубине сходяща (Мф.70. Мк.38. Лк.45) и глас глаголющь: сей есть Сын мой возлюбленный, о немже благоволих, того послушайте.

Вопрос 2. Откуду познавает человек, яко всяк крещен бысть, и Дух Святый прия, яко бе младенец во святом крещении?

Ответ. Пророк Исаия (глас 26) рече ко Господу, страха ради твоего Господи во чреве прияхом, и поболехом, и родихом дух спасения. якоже бо во чреве заченшия жена. от взыграния младенец, иже во утробе ея свесть неложно, яко плод прияла есть. тако и душа истиннаго христианина, не глаголы родительными, но вещми и взыгранми, и радованми сердца своего, и паче же во время праздник, и просвещений, и причащением святаго тела и крове Христовы познаваем от радости души своея, яко Дух Святый прият, и крестився.

Вопрос 3. Когда и откуду, и како быша ангели?

Ответ. Ниже (Небеса сл.14. Богослов сл.2. сл.11.12) откуду, ниже како быша ангели, рещи невозможно есть естеству человеческому. разве сие точию, яко от небытия в бытие словом Божиим быша. А еже когда, то овии реша в первый день. инии же глаголют, прежде перваго дне. во святых же отец наш Епифаний Кипрский в своем слове на Павла Самосатского в Панариих сказа, куппо с небом и землею сим созданым быти.

Вопрос 4. Откуду есть ведомо яко создани суть ангели. ни бо писано есть что таково в книзе Бытейстей?

Ответ. Сведый Бог идололюбное многобожие июдейское, сего ради укры в Бытии еже о ангелех слово, яко да не и тех обоготворят (Исх.32. 3 Царств) иже телца. и ина некая обоготворивше яко боги (Дионисий Ареопагит. О священноначалии небесном. сл.1. Богослов. сл.2. сл.11.12. Небеса сл.14. Пс.148. Иудиф.9). А яже создана суть ангели, слыши Святаго Духа пророком глаголюща. хвалите Господа вси ангели его... хвалите его вся силы его. яко той рече и быша. той повеле и создашася.

Вопрос 5. (Небеса сл.14. Богослов сл.2. сл.11.12) От существа же ли света сего суть, или иного некоего естества?

Ответ. Елико разнствует от звезд солнце, толико различно есть существо ангелское от всея видимыя твари.

Вопрос 6. (Небеса) Колико убо есть ангелское число, паче числа человеческаго?

Ответ. Овии убо реша девятьдесять и девять частей быти ангел противу числа человеческаго. по притчи Господни иже (Лк.78) от овец, инии же по (Лк.) притчи, девяти драхм. Друзии равночислени глаголют быти ангели и человеки. приносяще во свидетелство. иже (Втор.32:8) поставив пределы языком, по числу ангел Божиих. Златоуст глаголет в слове о непостижимом, яко неисчетна и неповествованна ангелская племена.

Вопрос 7. Чим пременися существо бесовское от существа ангелскаго?

Ответ. (Небеса сл.15) Существо убо не пременися, но произволение, якоже нрав⁵³² праведнаго и грешнаго.

Вопрос 8. Колико чинов, и колико существ ангелских суть? (О священноначалии небесном сл.4 глав.2.6)

Ответ. Существо убо ангелское едино есть, якоже и человеческое. якоже о существе ангелстем святый Григорий Ниский пишет, в седмьнадесятой главизне. Чинове же яко многии в богословии Дионисий рече (О священноначалии небесном сл.1. глав.6. Небеса сл.14.) девять. иже суть сии. ангели, архангели, начала, власти, силы, господства, шестокрилатая серафим, многаочитая херувим, и престоли.

Вопрос 9. Колико (Небеса сл.17) небес есть?

Ответ. Сомнително есть мнозем вопрошение се, книга бо Бытейская два небеси глаголет. святый же апостол Павел, третие небо виде, пророк же Давид и четвертое глаголет, якоже рече (Пс.148) хвалите его небеса небес. Ведомо же буди зане якоже естество человеческое, и един человек глаголется. и паки мнози человецы (Небеса сл.17.18). тако и небесное естество, и едино небо, и многа небеса в Божественном писании глаголются.

Вопрос 10. Когда или чесо ради (Небеса сл.15) отпаде диавол? блядут бо нецыи глаголюще. яко не восхоте поклонитися Адаму, того ради отпаде.

Ответ. Буих мужей суть таковии глаголы (Богослов сл.2). диавол бо прежде даже не создану быти Адаму, рекше человеку, отпаде. яве же есть, яко гордости ради своея отпаде, якоже рече Исаия пророк (Ис.14. Зах.3) помыслив, яко поставлю престол мой на облацех, и буду подобен Вышнему.

Вопрос 11. (Небеса сл.14.30) Чесо ради попусти ему Бог ратовати род человеч?

Ответ. Яко да любящии Бога явятся, и прилежащии сластем обличатся. супостату бо несущу, приснии воини царевы не являются. Диавол убо винен победе есть, и венцем, и честем любящим Бога.

Вопрос 12. Спадшу диаволу с небес, како писано есть (Иов.1), яко приидоша ангели Божии предстати пред Господем, и диавол посреде их?

Ответ. О сем чти в Маргарите пространнее. Не рече писание, яко прииде диавол на небесех посреде ангел, яве убо яко на земли ста, ибо на земли, идеже аще суть святии ангели Богови предстоят, обаче ведети подобает, яко некиим святым ангелом Бог ко диаволу беседоваше. якоже и царь некоим ходатаем посредним человеком ко осужденику.

Вопрос 13. Может ли убо обавник⁵³³ уморити человека?

Ответ. Праведнаго убо никакоже, но ниже приближитися ему. грешнаго же Богу попущающу ей (Небеса сл.15 елма Мк.19) ниже над свиниями имать власть, якоже во святых Евангелиих слышим.

Вопрос 14. Которыя молитвы и глагола боятся беси и диавол?

Ответ. Поведаша нецыи духоноснии отцы достойни верованию, яко очи видесте, некогда явися им диавол, и о сем вопрошен быв от нихже, отвеща, яко несть во всем ветхом и новом писании глагол устрашая и расточая всю силу нашу, якоже начаток 67 псалма. якоже се диавол рече, и наченшим им той же псалом, и рекшим точию первый глагол, еже есть да воскреснет Бог и разыдутся врази его, абие воскричав без вести⁵³⁴ бысть от них диавол, делом показа молитвы действо.

Вопрос 15. Откуду движутся в сердцы человеку помыслы (Лествица сл.23) и словеса хулная, и неподобная и самого Бога многащи хуляще, яко не хощет душа человеку глаголати, или именовати?

Ответ. Се диавол есть творяй⁵³⁵ и той таковая неподобная в душу человеку влагает, глаголя на Бога глаголы хулныя. во отчаяние человека сих ради хотя ввести, но от сего никакоже осуждается человек. от мнения же таковый помысл приходит человеку. свобождает же ся от него (Быт.18:27) землю и в пепел себе вменяя и никакоже в число таковый помысл вменяя. но глаголя ко диаволу. хула твоя на главе твоей диаволе. аз бо Господу Богу моему покланяюся и того никакоже похулю, твердо убо внимаем реченным, мнози бо от человек сим помыслом удержаны бывше. овии себе во бреги низринуша. и вси иже во отчаяние пришедше погибоша.

Вопрос 16. Подобно быти мню⁵³⁶ но еже по Бозе, и ангелех словеси третие еже. (Василий Великий. Шестоднев сл.1. Небеса сл.23. Богослов сл.14) о душах словесных слово в среду привести, много бо яко воистинну и о сем от человек есть взыскание же и сумнение: глаголю же что самое есть вещию душа человеческая (Палея. Иоанн Екзарх сл.6) откуду та составляется в телеси и когда и како (Чти Григория Беседу книгу 4-ю) от тела разлучается, и что даже до воскресения делает, никтоже бо от мертвых в житие пришед сия нам возвести или увери. тем же яко мнозем непостижимо суще еже о души слово, научени быти вопросихом твою святыню.

Ответ. (Василий Великий. Шестоднев сл.1. Небеса сл.23) Человеческая убо душа есть существо умно, безплотно, невидимо, безстрастно, безсмертно, отнюд подобно ангелстей тонкости (Гранограф гл.67) а не ангел бе некогда душа, якоже оригеняне блядут (Иоанн Екзарх сл.6. Криница гл.58. Соборник 5) ниже прежде телес бывают души, якоже манихеи сказуют. Но якоже камени и железу сражаемым из обою раждается огнь, (Иоанн Екзарх сл.6. Палея), тако и о человеце от мужеска и женска совокупления составляется Божиим повелением тело и душа одушевлена бывают телеса, и да уверит тя святый апостол Павел глаголя (1Кор.15:44) сеется тело душевно, и востает тело духовно. яве яко на воскресение.

Вопрос 17.⁵³⁷ Откуду есть ведомо, яко во время смерти не соумирает⁵³⁸ с телом душа? нецыи бо тако мнят.

Ответ. Христа Бога нашего слово явственне нас учит, смерть естеству⁵³⁹ телесному, и безсмертию души нашея глаголя (Лк.12:4) не убойтеся от убивающих тело душу же не могущих убити. яве, яко безсмертны и безстрастны суще.

Вопрос 18. Верно (2Тим.2:11) слово и всякаго приятия достойно (Палея), киимже образом разлучается душа от телеси?

Ответ. От (Небеса сл.18,23,51,52) четырех вещей, яве веруем, яко тело человеку составляется глаголю же. от крове, и флегма, и черныя, и желтыя желчи, рекше от теплаго и студенаго, и сухаго, и мокраго. сиречь от огня, и воды, и воздуха, и земли. кровь убо яко тепла, яве яко от огня. (Небеса сл.25) хима же яко мокро, яве яко от воздуха, желчь же, яко суха, яве яко от земли. флегма же яко студена. проявлено, яко от воды. В сих четырех составех, якоже в четырех стенах в дому телеснем, равно некоей голубице, затворена есть душа. Во время убо смерти повелением Божиим отступают друг от друга четыре составы, якоже бы рекл, разорятся четыре стены храму, и отходит яже внутрь затвореная голубица, рекше душа. И (Небеса 51. Палея) первее убо отступает кровь, сиречь, теплый животный состав. тем же мертвая телеса желчь убо имут по смерти, и глек⁵⁴⁰, и слуз⁵⁴¹, кровь же никакоже.

Вопрос 19. Где же хощем глаголати, яко суть ныне предварившии души человеческия?

Ответ. Странно убо и страшно есть вопрошение се, и от человек утаено. (Беседа Григория 4 книги) не попусти бо Бог возвратитися от тамо сущих кому к нам, и поведати, где или како суть яже от нас отшедшия души. Обаче, якоже от писаний учимы есмы, яко грешных души (там же гл.32) во аде суть под всею землею и морем, якоже рече во псалмех (Пс.87:7) во тме и сени смертней и в рове преисподнем, и якоже писано есть во Иове (Иов.10:22) в земли темне и мрачне. в земли тмы вечныя, идеже несть света, ниже зрети жизни человеческия. праведных же души по Христове пришествии, якоже от разбойника иже на кресте научаемся, яко в раи суть. не бо единыя ради души святаго разбойника Христос Бог наш рай отверзе, но и прочих всех святых ради душ.

Вопрос 20. Что убо восприяша ли праведныя благая и грешныя такожде муку?

Ответ. Никакоже. Обаче та радость, иже имут ныне святых души, очасти наслаждение есть. якоже и печаль, юже грешнии имут, очасти мука. И якоже призывает царь други своя, еже обедовати с ним, такожде и осужденики имея еже мучити их, иже убо на обед призвани, в радости суть пред домом царевым, даже до часа обеднаго, осужденицы иже в темнице затворени в печали суть. дóндеже изыдет судия. сице подобает прочее разумети, и о иже ныне тамо о нас предваривших душах глаголю же праведных и грешных.

Вопрос 21. Аще убо никто же, якоже рекл еси, ни в царствие, ниже в геену вниде, како о богатем, иже при Лазаре, слышим, яко во огни и в муках сый, ко Аврааму беседоваше?

Ответ. Притчею Господь вся яже о Лазаре рече. якоже и (Лк.16:19, Мф.25:1) о десятих девах, и прочих притчах. не бо вещию бысть Лазарева притча, занеже не зрят грешнии в геене суще, праведнии со Авраамом суще во царствии. но ниже паки познавает кто искренняго своего тамо во тме суща.

Вопрос 22. Како се, страшно бо есть слово и дивно, яко не познаваем друг друга тамо. но непознаваеми ли братия братиям. и отцы сыновом. друзи другом бывают?

Ответ. Познание о телесных некиих знамений⁵⁴² бывает. безтелесныя же души подобны себе друг другу по всему суть якоже во множестве некиих нескверных и случных⁵⁴³ себе голубицах. или пчелах не разнствующих единой от другия. ниже честию ниже величеством, но по всему в равенстве друг друга суще. се же глаголю о иже во аде оосужденных душах грешных, яко себе не познавают. в праведных же душах и сие благое, глаголю же познание Бог дарова.

Вопрос 23. Да будет по твоему слову и уставу, яко души друг друга не познавают. такожде ни на воскресение ли убо не познавают грешнии друг друга. глаголю же иже от единыя страны идоша и рода суще.

Ответ. Ниже на воскресение.

Вопрос 24. Чесо ради.

Ответ. Занеже вся яже от семене и тли случшаяся⁵⁴⁴ нашим телесем образования⁵⁴⁵, ими же друг друга познаваем, на воскресение мертвым с семенем и тлею упражняются. И (Богослов сл.2 сл.15.16. Небеса сл.53) якоже исперва из единаго человека Бог сотвори, тако и в пакибытии⁵⁴⁶ вси во един человек⁵⁴⁷ востанем сиречь, всяк человеческий образ подобен Адамову образу, и созданию, величеству и образованию⁵⁴⁸. Тем же несть на воскресение, мал и велик мужеский пол и женский. ни черн, ни бел. ниже толст, ни чермность, ни грубость. ниже различная лица и образы, и оскудения и исполнения⁵⁴⁹, сия бо вся от семене и тли бываемая со тлею разрушатся. И како прочее рцы ми отец познает свое отроча младо умершее, и тридесяти лет совершена человека зря его востающа, якоже и Христос тридесяти лет крещен бысть. или како познан будет умерший мурин⁵⁵⁰ бел востая. или умерший прокажен, и здрав востая. Аще ли неверна тебе сия быти являются. слыши Господа к саддукеем глаголюща (Мф.22:23) яко в воскресение мертвых ни женятся ни посягают, но суть яко ангели, (тем убо якоже ангели) единаго вида и образа суть. сице веруем и о нашем естестве в воскрешении, ради нетления⁵⁵¹ прочее быти. и яко о пшенице, клас⁵⁵² сперва сотвори Бог, и от класа бысть зерно. и паки сеемо возрастает клас. тако и человек бысть от Бога сохраняя заповедь нетленен. таже ради преслушания сокрушися и бысть тленен, сеем же смертию и разливаяся в земли возрастает еже хотяше быти исперва нетленен.

Вопрос 25. Убо посещают ли житие се яже тамо предварившия человеческия душа или ни.

Ответ. Никакоже, слыши бо пророка Давида о умирающих человецех глаголюща (Пс.102:15): человек яко трава, дние его яко цвет селный, тако оцветет. яко дух пройде(т) в нем и не будет, и не познает ктому места своего.

Вопрос 26. И аще сия тако суть. како святии множицею являются во своих храмех и раках⁵⁵³.

Ответ. Дивно и преславно есть вопрошение се, и вернейшая душа требующе к послушанию его, обаче ты вместив слыши не ослабей помыслом. иже во храмех и раках святых бывающая осенения и явления⁵⁵⁴, не душами святых бывают, но ангелы святыми. како бо рцы ми едина сущи душа блаженнаго Петра или Павла, можаше явитися в память его⁵⁵⁵ в тысящах храмех его во всем мире. сие бо ни ангел един мог бы сотворити когда. Божие бо точию есть, еже на многих местех и во всем мире в той же праздник обретатися. (Небеса сл.14) елма и самыя умныя силы оста(вля)ют⁵⁵⁶ всяко иже на небесех славословия, внегда послани будут на землю на служения.

Вопрос 27. Чим различно есть существо ангельское и душевное от существа человеческаго.

Ответ. Три (Книга 4 Беседы Григория) существа непостижна от человек обретаем, яже никтоже никакоже ни видел есть на земли, ни видети может якоже суть. глаголю же Божие и ангелское и душевное. обаче разсмотряем, яко елико разнствует луна от солнца толико изяществует и светлеется ангельское существо от существа душевнаго.

Вопрос 28. И како пророцы являются множицею видевше Бога.

Ответ. По всех пророцех, и по самем явлении Христове рече святый Евангелист Иоанн, яко Бога никтоже виде нигдеже, и яко да уверит, яко страшен и странен глагол приведе. единородный Сын сый в недрех Отчих, той исповеда. отнюдуже и Павел о Господе рече (1Тим.6:16): егоже не виде от человек никтоже, ниже видети может. Тем же Божие существо нас никто же виде никакоже. но противу человеческою очию, немощи сходне Бог воображаяся пророком являшеся. Тем и бесплотен тогда сый, яко человек тем множицею являшеся воплощен. отнюду же ведомо, яко не существо Божие зряху, но славу еже и о ангелех и о назех душах подобает разумевати. (Златоуст, сл. на Благовещение Пресвятой Богородицы) едина же точию святая Богородица наго существо⁵⁵⁷, яково же есть Гавриилово, виде.

Вопрос 29. Что убо не ангели ли по существу являются человеком.

Ответ. Никакоже (Небеса сл.14) ни бо может тленное око видети существо нетленное. отсюду же есть яве познати, (Лествица, сл.27) яко не по существу являются нам ангели. понеже не единем образом являются на земли. но ови убо во образех юношеских преобразуются, инии же в виде (Нав.5:13) воинстем. и просто мнози тех образы, едино существо.

Вопрос 30. Что же (есть) устав существа ангельскаго⁵⁵⁸.

Ответ. Ангел есть животно словесно невещественно, песнословно безсмертно.

Вопрос 31. Что же дело небесных сил на небесех есть.

Ответ. Пения беспокоя (Лествица сл.27) и желание непрестанно великолепия Господня. еще же и молитва усердна о спасении нашем. Елма же и тии чинове, и воинства глаголются. подобает прочее разумети. чин учителский. чин хранителный, чин обращателный. чин промысленный. чин служителный. чин мучителный. чин душам разлучителный. чин ратнический. чин на небесех пребывателный. Но якоже чиновом различие в горних силах познахом, тако и стояния разумом. (О небесном свящ. нач. сл.1 гл.6, Небеса сл.14) престоли убо и херувими и серафими, не ходатайствене от Бога навыкуют яко всех вышнее, и Богови ближнейше суще. серафими же учат должнейшия чины, и тако прочее горнейши учат долнейших. долнейшии же чин суть святии ангели. иже человеком суть учители.

Вопрос 32. Убо поминают ли нас предварившия души, якоже святии ангели нас поминают.

Ответ. Праведных убо и святых души, всяко, грешных же во аде суще, ни Бога поминают. ни нас. И слыши Давида к Богу глаголюща (Пс.6:6) яко несть в смерти поминаяй тебе, во аде же кто исповестьтися. и паки (Пс.113:25), не мертвии восхвалят тя Господи, ни вси нисходящии во ад.

Вопрос 33. Что убо дело есть ныне тамо предварившим душам.

Ответ. Душа от тела отделившеся ни благо что, ни зло соделати может, видения бо яже зрят нецыи о тамошних смотрителне, сия Бог показует к ползе, якоже бо цевница, аще не имать ударяющаго ю, праздна зрима есть, и безделна, тако и душа и тело друг от друга разлучшася, ничтоже действовати могут, святых убо души от Святаго Духа действуемы, со ангелы во стране живых Бога восхваляют и радуются.

Вопрос 34. Что (Беседа Григория кн.4 гл.38,39,40) убо не ощущают ли некоего благодетелства⁵⁵⁹ и грешных души от бывающих о них пений, и благотворений и приношений.

Ответ. Аще не быша некое благодетелство приимали от сего, не быша во святом приношении поминаеми были. но якоже егда виноград цветет вне на селе. ощущает обоняние его внутрь затвореное вино, и с ним цветет, и то сице глаголем есть и сущим во аде душам приимати некое благодетельство, от еже о сих бываемыя бескровныя жертвы, и благотворения⁵⁶⁰.

Вопрос 35. Убо мощно ли есть разумети, чесо ради не попусти Бог души (Беседа Григория кн.4 гл.18,27) некоего иже тамо от отшедших возвратитися к нам, и поведати нам на ползу, како суть вещи еже во аде, и нужди яже тамо сущия.

Ответ. Многа от сего прелесть в житии раждатися хотяше. мнози бо прочее (Хождение Богословле) беси во образе человек прежде усопших имяху преображатися и хотяху глаголати себе от мертвых воскресивших и многи ложны вещи и веления о сущих тамо имяху в нас всеяти к нашей прелести и погибели.

Вопрос 36. Мнози (Лествица сл.6) глаголют, яко полезно бе человеку предведети день своея кончины.

Ответ. Аще вся на ползу Бог премудростию сотвори, ниже се разсмотрения от нас укрыл есть, аще бо предведел бы человек день своея кончины, во всем животе своем хотяше без страха согрешати. и множицею прежде двою или триех дней своея кончины обратитися в покаяние. Слышав Бога (Иез.33) пророками рекша, якоже в немже обрящу тя, в том и сужду ти. и кая прочее благодать рцы ми, яко да сто убийств сотворит, кто преобиде Бога, и два дни точию престанет от злобы.

Вопрос 37. Чего (Небеса сл.37) деля мы христиане кланяемся на восток, и по что жидове на юг.

Ответ. Не един убо и подобен еже о сем ответ, инако бо жидовом отвещаем, инако еллином скажем, инако паки о сем христианом проявим. И жидовом убо речем, яко сего ради вернии покланяемся на восток, Духу Святому взаконившу нам Давидом пророком рекшу (Пс.131:7): поклонимся на месте идеже стоясте нозе Господни. Захария пророк да учит его глаголя, и станут нозе Господни на горе Масличней. к востоком прямо Иерусалиму, отнюдуже и сами жидове во Иерусалиме молящеся на восток зрят к горе Елеонстей. и сие убо вкратце ко июдеом отвещание. Ко еллином же, сице рцем. не яко на востоце описуем Бога к востоком кланяемся, но понеже Бог свет истинный есть. и глаголется сего ради к свету созданному взирающе, не тому, но Творцу его покланяемся. от перваго создания иже прежде всех созданий, вечнаго Бога почитающе. вернии же да слышат, и да навыкнут, яко сего ради блаженнии апостоли на восток христианския церкви стояти сотвориша, краю нам внимати хотяще, отнюдуже испадохом. яко да к древнему нашему отечеству взирающе и месту, молим Владыку устроити нас, отнюдуже изгнани быхом. на юге же внимати⁵⁶¹ июдеом пророцы взакониша (Авв.3:3), заеже от юга Иерусалиму, рекше от Вифлиема хотящаго родитися Господа, тем и рекше пророком от Вифлиома приидет мир сиречь от юга.

Вопрос 38. Чесо (Небеса сл.35) ради Христу обрезавшуся не обрезаемся и мы такожде.

Ответ. Христос убо Сын Божий сый исполнити закон прииде, яко да не вменится богопротивен быти Богу давшему закон. Ктому прочее мы (Рим.6:14) несмы под законом, но под благодатию. Темже глаголет и нам Павлом Христос, яко (Гал.5:2) аще обрезаетеся, Христос вас ничтоже пользует. темже отсюду яве познаваем. яко чужди от Христа суть вси обрезание приемлющии. или вернии, или невернии. или жидове, или еллини. яко в законе Моисеове хвалящеся, а не Христови покоряющеся. но якоже бо вси иже кровию и безсловесными жертву Богу приносити непщующе, бескровныя жертвы гнушаются, и отвращают. сице и вси, иже плоть обрезающии, духовное обрезание, рекше, святое крещение укоряют, и отвращаются.

Вопрос 39. (Лев.26, Ис.44, Иер.10, Прем.13,15) Господу пророки повелевающу не покланятися рукотворенным. почто покланяемся иконам, и кресту. дела человеческая суща якоже идоли бяху.

Ответ. (Небеса сл.41) Не яко богом иконам покланяемся вернии, да не будем. якоже еллини. но токмо желание и любовь нашея души к начертанию лица иконы являюще. тем множицею начертанию открывшуся яко древо просто иже некогда икону сожигаем (Быт.47:31) якоже убо Иаков хотя умрети, край жезла Иосифова поклонися. не жезл почитая, но иже той держащаго. сице вернии, не иного ради коего образа иконы лобызают, разве любве ради иже ко святым, еже являем се творяще, якоже и чада наши или отца и други лобызающе. якоже и жидове законным скрижалем, и обоим херувимом златым изваянным покланяхуся. не каменя и злата естества почитающе, но иже та быти повелевшаго Господа. А иже от презорства отвращающиися, еже не покланятися иконам, и кресту. да глаголют неразумнии, како святых иконы множицею миром воскипеша силою Божиею (Пролог, окт. 11 день). како язвы приим Спасов неодушевленный образ, яко в телесное естество, кровь преславно источи. како от ковчега, и мощей и икон многащи беси вопиюще отгоняеми бывают, яко да множае убо несмысленыя обратим и посрамим. Слыши слово некоего от святых отец нам возвещено, глаголет убо (Патерик синайский сл.45) яко во Иерусалиме некоего от постник люте нападаше и стужаше ему блудный бес, во един убо от дний является ему глаголя, аще хощеши, да не ратую тебе, не покланяйся иконе сей, и отступлю от тебе. бе же икона Пресвятыя Владычицы нашея Богородицы. Что убо рекут отвращающиися святых икон, и повелевающе не кланятися образом святым, ихже воспоминания ради точию воображаем, а не иного ради некоего образа. И сие убо еже о иконах вкратце слово. О кресте же яве есть, яко распеншагося ради на нем Христа, покланяемся и целуем.

Вопрос 40. Темже убо понеже и на осля Христос возсел есть, должни есмы прочее и ослем покланятися и лобзати. яко к нам июдейстии отроцы глаголют.

Ответ. Не со ослем Христос диавола упразднил есть и бесы, ниже о нем спасение содела, но о кресте. темже осля убо зряще бесы не боятся ни трепещут, крест же множицею зряще, и бегают и упраждняеми бывают, и прогоними.

Вопрос 41. Чесо ради вернии вси кресты убо равнообразны кресту Христову творим. святаго же копия его и трости и губы равнообразия не сотворяем. свята бо суть и та, якоже крест.

Ответ. Креста убо образ от двою древу совокупляюще, внегда кто нам от неверных поносит, яко древу кланяющимся. можем два оныя древа разделивше, и образ крестный разоривше, невернаго увещати, яко не древо чтем, но крестный образ. копием же или тростию или губою се сотворити или показати не можем.

Вопрос 42. Откуду есть ведомо яко лучши всякия веры яже под небесем, есть вера Христианская. всякая бо вера благочестивейши⁵⁶² себе быти вменяет от прочих вер.

Ответ. Много есть еже о сем слово и долго еже о христеянстей вере сказание. Обаче два нецы знамения зрятся в нас. наше благочестие, и Божию к нам любовь, и покров являюща. Первое убо, яко не обретаем от начала века, язык, от всех язык ратована, лета толика и непотреблена. разве точию Христову веру яже не бы убо пребыла непотребляема сице от всех язык ратуема, аще не бы рука Господня сохраняла, и храня ю непотребляему. Второе же, яко ниже царь християнский где когда варваром предан бысть на смерть, яже и толиким языком царство то ратовавшим, не токмо же царя не яша, но ниже той самый образ его от златника со крестом упразднити возмогша. Таже и мнозем мучителем на се покусившимся. Да не убо мало что тебе вещь сия вменяется быти. аще бо не бы паче всех вер нашу веру Бог избрал и возлюбил, не быти посреде язык мнозех яко волков хранил, невредиму же и непобеждаему, обаче ниже хотяше попустити Бог прелщену веру, обладати по воплощении Сына его Бога нашего Господа Иисуса Христа на всех концех земных. темже и то самое, еже во всех языцех вероватися Евангелию Христову, свидетельство его не ложно. яко несть ина вера благочестива под небесем.

Вопрос 43. И аще сия тако суть, како Сатана не раздели ину веру на земли в толики ереси, точию веру християнскую.

Ответ. Яко супротивну ему, яве яко упражняющу его. коего попечение рцы ми, или кая печаль есть Сатане июдее, или самариты, или еллины ратовати, или разделити в ереси и веры различны. вси бо сии тоговы суть, и никакоже Сатана своих ратует. но яже суть Божия. Тем же хотящему отсюду есть уведети, яко несть ина вера благочестива на земли другая, разве точию едина, яже во Христа.

Вопрос 44. Киим же образом увещаем невежду, и варварина и бескнижнаго, яко паче всех ересей соборная Церкви правую веру держит, и не согрешает.

Ответ. Немогущиим Писанием же и догматом опаство и глубину слышати. отсюду непорочное и благочестивое соборныя Христовы церкви уверитися должни суть. Глаголю же, от еже всем спасеным и честным местом Христовых страданий соборней и православней нашей вере и церкви от Бога дарованном быти и ввереном. Глаголю же Назарет идеже Христос нам вселися. Вифлеем, идеже по плоти родися. Сион, идеже спасение мирови содела. Иордан, идеже Адама обнови. Фавор, идеже небесное царство прообразова. Елеонскую гору, отнюдуже ко Отцу Господь на небеса от нас взыде. яже вся та святая его и честная места не туне ниже вотще соборней церкви вверил есть. но яко благочестивейша яве и честнейши всех, иже во християнех именуемых верах. якоже царь честныя еговы полаты храмины и сокровища вернейших от всех слуг его вручает и вверяет. тако и Христос от начала пришествия его соборней церкви честная его места вверил есть. Аще ли же глаголет кто от супротивных, яко царским насилием сия держим. да навыкнет таковый, яко убо и варваром многащи Палестину приемшим не попусти Христос своя места предана быти. но аще и вмале се начаша, вскоре паки соборная Церковь сих яко свинии отгна от святых Христа Бога нашего дворов и мест.

Вопрос 45. Где повеле Бог апостолом християны именовати верующих во Христа.

Ответ. В Деяниих (Деян.11:26) святых апостол слышим, яко во Антиохии бысть первое наречение, рекше откровение Божие апостолом повелевая зватися нам християны. Темже опасно да весть всяк человек, иже ко Христове вере приити хотяй. яко всяка вера на земли на имя человеческое именуется. (Василий Великий. Шестоднев сл.4) глаголю же от Симона симониане, от Маркияна маркионите. от Ария, арияне. от Евномия, евномиане. Сия вся и прочая ереси, яже в человеческия имена именуемыя, не суть от Бога, ни Бог в них. аще ли быша от Бога были, чесо ради имены человеческии именуются и величаются. похвала убо похвальна нам да есть⁵⁶³ соборная церковь. и еже проповедовати и именоватися християном, яко не от человека именована бывши, но от Бога произвещена.

Вопрос 46. Кто прежде всех именова Бога на земли.

Ответ. Проявлено яко диявол, егда ко Еве глаголаше. что яко рече вам Бог от всякого древа иже в раи, ясти. и не дивися сему, ангел бо сый иногда диявол, имеяше разум паче человека тогда.

Вопрос 47. Где хощем глаголати, яко есть рай, овии убо глаголют. яко во Иерусалиме есть. овии же на небесех.

Ответ. Ниедин же от обоих истинствует (Богослов сл.2, сл.15, Небеса сл.22) и яко убо во Иерусалиме несть рай, свидетельствует Адам на лобнем месте лежа. Еве же есть, яко не потребен бысть в раи. но изгнан бысть. яко на небесех несть рай, свидетелствует Писание, глаголющее, (Быт.2:8, Гранограф гл.100) и насади Бог рай во Едеме на востоцех. учит убо нас, яко от восток всея земли есть рай, отнюдуже и списатели опасни⁵⁶⁴ глаголют. яко сего ради вся благовония ароматом на восточнейших землях, рекше индийских странах суть. яко близ места райского суща, якоже финицы мужескаго полу, приближающеся финики женскаго пола дыханием ветреным наюховающе плодоносити творят, тако и от рая ветреным дыханием благовоние исходящее ближнейшая тамошних мест древеса облагоюхавают.

Вопрос 48. (Богослов сл.2, сл.15, Небеса сл.22) Тленен ли убо глаголати хощем рай, или нетленен.

Ответ. Ниже тленен его глаголем, но сущих в нас садовьях же и плодах согнития и червей творению, ниже паки всячески нетленен по будущему веку нетлению же и необетшанию бывающему. но противо убо сущих в нас плодов же и садовию, всякия тли есть вышши, (1Кор.2:9) противу же славы будущих благ, ихже око не виде и ухо не слыша, вельми хужши есть и веруется.

Вопрос 49. Колико (Чти Синаксарь в неделю сырную) время сотвори Адам в раи.

Ответ. Недоведомое отцем вопросил еси ганание⁵⁶⁵, овии бо глаголют шестомесячное время. инии же множае. друзии же толико часов точию, елико Господь на кресте сотвори, мню же се истиннейше быти.

Вопрос 50. Что (Богослов сл.2, сл.15,16, Шестоднев гл.5,6) бяше убо древо, от негоже плод снеде Адам.

Ответ. Ниже се согласно реша отцы, и в правду, еже бо Божественное Писание волею утаи, никтоже известно рещи возможе. Темже овии убо смоков быти реша плод. инии же духовную пищу. друзии же Евино видение, мнит же ся неким никакоже ясти Адаму в раи. Но убо истинейши есть первое, еже о смокве.

Вопрос 51. Да аще не бы преступил Адам, како хотяще быти житие человеческое.

Ответ. Можаше Бог, иже словом составивый множества ангельская, честным неким и чистым нравом составити множества рода человеческаго. нецыи же глаголют, яко Бог мужеский пол и женский сотвори. яве есть, яко семенородием восхоте Бог род человеч составити. обаче же не хотяше преслушанием, по счастию сему быти.

Вопрос 52⁵⁶⁶. Почто в седмый день Бог тварь соверши.

Ответ. (Богослов сл.4, сл.2,3) В числе десятицу⁵⁶⁷ обретаем исполнение всякому числу. аще убо в десятицу приидеши, паки абие на единицу возвращаешися. седмь убо и три есть совершенное число. и сего ради седмь дний суть создания, святая же Троица несозданна.

Вопрос 53. Многа (Иоанн Екзарх сл.1) некое от многих есть взыскание, еже кое подобает предвчиневати день прежде нощи. или нощь прежде дне. аще бо речем день прежде быти, обретается Христос прочее в субботу воскрес, нощь бо она субботы бяше, аще по словеси Моисея списателя мирского творения вменити хощем.

Ответ. По (Иоанн Екзарх сл.1) разсмотрению убо и слову глаголющему, яко рече Бог прежде всех да будет свет, проявлено, яко день первеийши есть нощи, тма бо она, яже верху бездны, не у бе именована нощь. ниже луною и звездами, и двоюнадесятми часы мерима. Без сомнения убо свет первейший есть тмы, обаче да не обрящут к нам глаголати июдее, яко в субботу воскресл есть Христос. сего ради предзагради им уста Бог, взаконив тем от вечера пятка начинати день субботный.

Вопрос 54.⁵⁶⁸ Что убо, сего ли ради и нам Бог повелел есть от вечера субботы начинати недели.

Ответ. Не сего ради, но понеже Бог языки от тьмы неведения на свет богоразумия евангельского призва, по подобию убо нам воскресения своего день от вечера начинати повелел. не подобно бо и неключимо от света начати и в нощи к тме скончеватися Христа истиннаго света днем.

Вопрос 55. Чесо ради в 25 день Марта месяца Христос во утробу девыя вселися на земли.

Ответ. Понеже в той день исперва Адама созда Бог. темже и в той месяц вся древеса и былия и животная в плодоносце и чадородне подвижутся, яко во время то Богом быша.

Вопрос 56. Каковы (Богослов сл.2, сл.16, Небеса сл.53) бяху кожныя ризы, яже Бог Адаму и Еве сотвори.

Ответ. Овии глаголют от листвия древес. овии же паки, плоть нашу и сие ризы разумеша. изволися же инем иже истиннейши воистинну ризы кожныя сия быти, плоть противообразную.

Вопрос 57. Никому же еще не умершу, откуду навыкну Каин убити Авеля.

Ответ. Диявол ему во сне показа, киим образом умертвити брата своего.

Вопрос 58. Како (Гранограф, Криница 4-я) суть сынове Божии и поемшия дщери человеческия.

Ответ. Сынове Сифовы, ельма бестелесное естество, ниже телесе желает, ниже женам примешатися может.

Вопрос 59. (Исх.3:2) По что в купине Бог явися Моисеови, а не во ином саде.

Ответ. Овии убо глаголют, яко да не возмогуг жидове идола сотворити от древа ея, инем же мнится, яко прописуя Бог, яко хощет во отерневшем⁵⁶⁹ нашем воплотитися естестве. сего ради в таковом саде явися Моисею.

Вопрос 60. Почто (Исх.32,34) во мраце Бог закон даде.

Ответ. Понеже темне и прикровенне в нем сокрыто бе смотрения Христа Бога нашего таинство.

Вопрос 61. Чесо ради (Исх.32) две скрижали первыя сокрушены быша.

Ответ. Назнаменовающу Богу перваго закона обетшание и мимошествие.

Вопрос 62. (там же) Безтелесну и невоображену тогда Богу, кая задная виде Моисей.

Ответ. Аще превечна и преднейша всех тварей веруем быти иже всех Бога несозданнаго. проявленно, яко задняя Божия твари суть, и словеса их яже видев. изложи рек. (Быт.1) искони сотвори Бог небо и землю.

Вопрос 63. Кто первее преобрази в ветхом двои люди. глаголю же иже от июдей, и от язык.

Ответ. Яве есть, яко (Быт.25) Ревекка жена Исаакова. близнецы рождши, Иякова и Исава.

Вопрос 64. Кто в ветхом первее прообрази образ животворящаго креста.

Ответ. (Быт.26) Иаков благословляя два сына Иосифова вопреки рукама⁵⁷⁰.

Вопрос 65. Кого глаголют в ветхом яко трищи в мертвых вменися.

Ответ. Яве яко Иону (гл.2) яко же бо древнее приносится слово, той бяше сын (3Цар.17) вдовицы, егоже воскреси пророк Илия от мертвых. паки же (Ион.2) в ките от человек умре и третие конечное его успение.

Вопрос 66. Где есть Фарсис, идеже Иона бежаше (3Цар.10:22).

Ответ. Фарсис град есть страны индийския, якоже в третием Царстве уведехом.

Вопрос 67. Убо даже и до ныне ли наводятся греси отец на чада. на третий и на четвертый род.

Ответ. Моисеом убо се рече Бог (Втор.5:9), Иеремием же пророком паки рекл есть, яко не будет (Иер.31:29) прочее тако. но иже снесть зеленая, того зу6ы оскомины сотворят. Слышим же паки Христа ко июдеом глаголюща (Мф.23:35), аминь глаголю вам приидут греси отец ваших на вас, от крове Авеля (Быт.4:10) праведнаго до крове Захария сына Варахиина, егоже убисте между церковию и олтарем. отнюду же знамена ти есть подобно, яко на некрещеныя убо наводятся греси отец нечестивых. на сыны лукавыя и неблагия. о верных же, святое крещение очищает нас от всякаго праотеческаго греха.

Вопрос 68. Нецыи глаголют умирати множицею верных младенцем ради родительных грех. убо тако ли есть.

Ответ. Да будет сему тако быти.

Вопрос 69. Убо чесо ради (Небеса сл.53) младенцы умирают, друзии же престареются. И откуду нецыи (Пат. алфавит. знам. 1 гл.1) убо правды творяще, бывают маложителны. нецыи же злая творяще многолетны умирают. инии же блази суще, бывают безчадны и убози. друзии же нечестиви, благочадствуют же и богатеют, и блазе живут.

Ответ. Много еже о Божиих судьбах слово, и непостижимо. Обаче, якоже от Божественных Писаний разсмотряюще глаголем, яко убо верных младенцы не за грех, но множицею к целомудрию родителному умирают. двое благо всем Богу соделовающу. Едино убо яко (9 окт., повесть о Андронице) да чисти отшедше, отселе спасение тамо получат. есть же, яко (Пролог, 21 ноября) и лукаво зело житие пожити хотяху, и смотрителне Бог предвосхити их. Второе же, яко да и сих родители целомудренейши будут, и яко да яже умершим чадом хотящая по заветом дана быти имения, на нищих прочее истощат. Всяко же и по иной судьбе нам сущи неведомей. И сие убо еже о верных младенцех слово (Пат. алфавит. знам. 1 гл.1). Богатеют же и изобилствуют, и благочадствуют множае лукавии, всяко некая мала блага дела сотворивше, и зде мзду их восприемлюще (Лк.16:25), якоже богатый он слышавый: помяни, яко восприял еси благая вся в животе своем. сиречь, отдашатися мзды твоя о благих твоих делех, ихже сотворил еси. Обнищевают же и злостраждут благоговейнии и праведнии зде, яко да скорбию очищшеся (там же). Якоже Лазарь от своих грех, тамо прочее совершенне с ним утешатся. Аще бо, его же любит Господь наказует, что прочее смущаешися, зря святых во озлоблении сущих, грешныя же яко свинии на заколение вечному огню питающихся. Прочее убо не смущайся. не бо даже до здешних стоят наша, но подобает всяко спасающимся (Деян.14:22) многими скорбми внити во царство небесное. разум бо сей есть Богови (Иез.18:23, 1Тим.2:4) еже всем человеком спастися и в разум истинный приити, тем же и грешным убо множицею долгая лета дает Бог вину тем дая к покаянию, яко да поне (Мф.20:6) яко иже в единонадесятый час в глубоцей старости обратятся. праведныя же множицею малолетны восхищает, да (Прем.4:11) не злоба изменит разум, или лесть прельстит души их, якоже рече Соломон. но скончавше вмале исполниша лета многа. угодни бо быша Господеви души их.

Вопрос 70. И что убо, никто же ли иже в сем житии от пострадавших входит тайно в геенну. ниже паки кто от благоденствовавших зде входит тамо в царство небесное.

Ответ. Ни овии бо от человек согрешиша вельми, и наказани быша зде мало, подлежат всяко и тамо мучими быти, якоже и от сущих в (Быт.19) Содомех обретаем, овии же паки принесоша Богу труды многи прияша же зде благоденства мало, и щадится им прочее царство небесное. яков же бе Авраам, и Ное, и Мелхиседек. Инии согрешиша много, и ничтоже пострадаша зло зде, якоже и (Лк.16:23) богатый иже при Лазаре, и подлежат тамо муце. друзии же изыдоша Бога ради, во вся лета своя «ходяще во овчиих и в козиих кожах» (Евр.11:37), всякого наслаждения земленаго отрекшеся, иже и болшим Бога даром паче всех сподобляются. Инии же, согрешиша Богу отчасти, и наказани быша зде достойне, о нихже согрешиша, избавишася тамо вечныя муки. Отнюдуже ради реченных уведехом, яко овии убо от человек зде и тамо мучатся. инии же зде точию. инии же убо зде никакоже, тамо же болезнене (мучатся). якоже и сопротивное, яко овии убо и зде и тамо наслаждаются, овии же зде убо никакоже, но тамо точию. равно же нецыи и сущих зде и тамошних отпадают. зде убо человекоугодия ради злострадавше, и сего ради иже тамо благ вечных отпадше. Достоит убо всем благочестивым милостивным ведети известно, яко не точию о нихже содеяша согрешениях истяжутся милование и требующим показати, но и о всех, ихже тем Бог дарова благих. ни бо достоит мерити яже нищим даемая, но яже от Бога нам даруется. да не како и о самых тех Божиих дарех, в суд страшный впадем, многащи бо и недостойным и грешным Бог богатство дарует. яко да тем (Сир.3:30) милостынями своя грехи отмыют и очистят. милостынями бо, якоже рече Божественное Писание, очищаются греси.

Вопрос 71. И что хощем глаголати о иже внезапу умирающих или от высоты падающих или от иных таковых смертей умирающих.

Ответ. Яко убо безвестна таковая суть и Богу единому ведома, не подобает не веровати, обаче Господу глаголющу, они (Лк.13:4) осмьнадесят на сих же столп Силоамский паде, грешнейши ли бяху паче всех живущих во Иерусалиме. ни глаголю вам. от сего убо познаваем, яко не вси нечествии, или неправедни суще, горкою смертию скончающеся умирают, ибо дети (Иов.1:19) Иовли праведни суще, умиленну подъяша смерть. Тем же нам о сих две подобает разсмотрети. яко (Григория Беседа кн.4 гл.14,31, Пат. скит. сл.27, 3Цар.13) благоговейнии убо горкою умирают смертию, мало что согрешение имеяху и сего избавишася таковою горкою смертию, яко да болшим воистинну честен сподобятся. прочее же, яко да и мы зряще уцеломудримся по реченному словеси: аще «праведник едва спасется, нечестивый же и грешник где явится» (1Пет.4:18), такожде же и грешнии таковою смертию умирающе, всяко от сего отчасти милость получают. купно же паки зрящии тех, ползу некую приемлют, видяще напрасно кого восхищаема, якоже не весть человек. Аще ли и младенцы суще умирают, не дивися, тии убо от сего никакоже вреждени быша ниже своих ради грех се пострадаша, но яко да и тех родителие целомудренейши или благоговейнейшии будут помышляюще, яко тех ради грех сице тех младенцы умроша. обаче над всеми сими подобает поминати Господень глас глаголющий: яко не две ли птицы на ассарии продаетася, и ниедина же от них падет на земли без Отца вашего, иже есть на небесех. и яко вам верным и власи главнии вси изочтени суть (Мф.10:29).

Вопрос 72. Мнозем сущим на земли Господне слово страшно является глаголющее: всяк грех и хула оставится человеком. а яже на Дух Святый хула не оставится. иже аще речет слово на Сына, оставится ему, а иже аще речет слово на Дух Святый, не оставится ему, ни в сий век ни в будущий (Мф.12:31).

Ответ. Сего ради наказует всех Божественный апостол глаголя. яко да духовне писание разумеем, да не како в неподобная хуления впадем, яковоже есть предлежащее нам ныне Господне слово, еже аще по писанию⁵⁷¹ глаголы восприимем, не токмо в неподобныя мысли впадем, но и самого Господа сопротивляющася себе обретаем. аще бо иже речет слово на Сына, оставится ему. како нам той Сын рекл есть. Отметаяйся мене пред человеки, отвержен будет мною пред ангелы Божиими (Лк.12:9), и паки, аще всяк грех и хула оставится человеком (Мф.12:31). како слово воздадим о праздне слове в день судный, якоже рече Господь. и како глаголяй брату своему юроде, повинен есть в геену огненую (Мф.5:22). како рече апостол Павел: не прелщайтеся, ни блудницы ни прелюбодее ни малакия ни клеветницы царствия Божия не наследят (1Кор.6:9). и аще сия тако суть. како прочее, рцы ми, всяк грех и хула оставится человеком. и аще паки на Дух Святый хула. не имать прощения (Криница гл.35, Боголов сл.10 сл.35, Иоанн 44) почто не приемлет церковь Новата отметающаго покаяние. и иже аще речет слово на Сына оставится ему, мний есть прочее Сын от Духа Святаго и Отца. и како Сын глаголет, аз и Отец едино есма (Ин.10:30), и не чтяй Сына, ни Отца чтит (Ин.5:23). И паки иже аще речет слово на Сына, оставится ему. убо проститлися яже на Сына хула (Криница гл.42) арианом, и савелианом, и прочим всем, иже на сыновнее похулившим воплощение, да не будет безместия⁵⁷² сего. Аще бо глаголяй брату своему юроде, повинен есть в геену огненную (Мф.5:22), в какову геену. геенам ввержен будет глаголяй Бога своего тварь и не Сына Божия. но раба и слугу и мала. и како сам Сын рече: не ядый мою плоть и не пияй мою кровь, не имать живота вечнаго (Ин.6:53). како же и может кто не чтый Сына, чести Духа Святаго. ометаяйся бо Сына, яве яко отметается святаго крещения. святаго же крещения ометаяйся Святаго Духа совлачится. якоже о солнца. аще теплоте или луче его досадиши, на все естество его досада восходит, сице и о присолнечном Святыя Троицы свете, и таинстве единаго состава, хула всего исполнения Божественаго есть безчестие. что убо есть, еже от Господа ко июдеом глаголемое, яко всяк грех и хула оставится человеком. иже аще речет слово на Сына оставится ему. а иже речет на Духа Святаго не оставится ему ни в сем веце, ни в будущем.

Разрешение. Иже убо присно Богу приражающиися, и хулящии жидове сугубо на Господа хуления имеяху. ови о плоти его, сиречь Сына человеческаго претыкающеся. пророка его а не Бога быти непщеваху. имже и прощение дал есть. начало бо бе проповеданию. и еще не вмещаше мир Бога веровати видима человека, темъже и рече Христос, яко иже аще речет слово на Сына человеческаго. рекше о телеси его, оставится ему, дерзаю бо глаголати. яко ни самыя ближния его ученицы совершенное имеху мудрование в Божестве его. дóндеже Дух Святый к ним в пятдесятный день прииде (Деян.2:1). елма. и по воскресении его видевше и поклоншеся (Мф.28:17), овии же усумнешася. но от сего не осудишася. на Святый же Дух рекше, на Христово Божество. хуляще и глаголюще яко о велзауле князе бесовстем изгонит бесы, сим рече, яко не оставится ни в нынешнем веце ни в будущем. обаче знаменати подобает. яко несть рекл Христос, яко похулившему и покаявшуся не оставится, но хулящему и пребывающему в хулении. понеже несть греха непрощаема от Бога, во иже прилежне и по достоянию кающихся.

Вопрос 73. И что убо, имать ли оставление покаянием иже во Христа отвергийся и похулит на Дух Святый.

Ответ. Три (Небеса сл.35) крещения чистителна, всякого якова либо греха, Бог естеству человеческому дарова. глаголю же еже водою. и еже мучением, рекше своею кровию, и (Патерик скит. сл.4) третие еже слезами, в немже и блудница очистися (Лк.7:48). паче же и той сам верховный святый апостол Петр по отвержении плакав, прият бысть и спасеся. Аще ли Христово отвержение имать прощение, Святаго же Духа не имать, обретается прочее. сын мний Святаго Духа. Слыши от Писания свидетельство, и уверися не быти никоему же греху побеждающу Божие человеколюбие. глаголет убо Бог пророком Иезекиилем сице: живу аз глаголет Господь (Иез.18), яко аще сотворит человек вся грехи и обрящу его в правде, не воспомяну всех беззаконий его. обрящу его, яве яко в день смерти его. (Лест. сл.7, Пат. печер. гл.32, Григория Беседа кн.4, гл.33, Пат. скит. сл.4). Достоит бо ведети, яко подобно крещению слезный источник очищает человека. тем же мнози согрешенми осквернивше себе по святом крещении слезами очистишася, и праведни показашася.

Вопрос 74. (Лест. сл.88) Кий грех творит человеку молитву от Бога. неприятну.

Ответ. Памятозлобие (Лест. сл.9) по словеси Господню, глаголющему: яко аще принесеши дар свой ко олтарю, и ту помянеши, яко имать нечто брат твой на тя, остави дар пред олтарем и шед прежде смирися с братом твоим, и тогда пришед принеси дар твой (Мф.5:23). яве, яко памятозлобие творящу неприятен дар молитвы.

Вопрос 75. Кий грех не может покаятися к Богу.

Ответ. Проявлено, яко (Лест. сл.5) отчаяние, от негоже одержим бысть Июда обесися (Мф.27:5).

Вопрос 76. Кий грех есть тяжчайший всех.

Ответ. Аще якоже рече апостол, болши всех благих есть любовь (1Кор.13). яве, яко и болши есть всех злых братоненавидение и немилосердие и немилование.

Вопрос 77. Кая от заповедей прощает человеку вся грехи.

Ответ. Господу глаголющу: не судите и не осуждени будете (Мф.7:1), и паки, остави нам, якоже и мы оставляем должником нашим (Лк.11:4), проявлено, яко и еже не судити искренняго, прощает грехи, тако же и еже не поминати злая человеку, оставите бо рече, и оставится вам, в нюже меру мерите, возмерится вам.

Вопрос 78. Аще кто сотворит тяжчайший грех и покается, откуду хощет уведети, аще прощено ему есть от Бога или ни.

Ответ. (Григория Беседа кн.4 гл.6,33) Сие убо малым иже на земли от человек, зде ведомо бывает обаче, якоже Владыка и раб, сице есть совесть человеку, и Бог. якоже убо раб согрешивый познавается от глагол, и от образов владыки своего, яко несть к нему благоуветен, яко же бо прежде согрешения. тако и человек согрешаяй погубляет дерзновение, еже имяше совесть его к Богу в молитве его. покающуся убо человеку по достоянию, паки дарует ему Бог дерзновение, еже имяше к нему прежде согрешения. от сего познавает человек, яко простил есть ему Бог.

Вопрос 79. Аще кто сотворит грех велик, таже зазрит себе и начнет каятися и по трех днех умрет. что подобает непщевати о нем.

Ответ. Аще (Пат. скит. сл.13,19) начен покаяние, отврати свою душу от лукавых совет, и положи к Богу обеты, яко ктому не сотворити первыя ею грехи, яже содея, и на утрия умрет, прият Бог покаяние его, якоже разбойниче. еже бо начати покаяние, в человеце есть. а еже жити или умрети, на Божии воле есть. мнози бо наченшии каятися, абие восхищает Бог, яко благой ползе предведевый, яко аще многолетна будет, паки паднути имут и погибнути.

Вопрос 80. Како нецыи от единыя и худы вины множество слез испущают. друзии же аще и тмами в беды и скорби впадают, или иных отпадших зрят, прослезити не могут.

Ответ. (Григория Беседа кн.3 гл.32) Суть убо растворения такова душам же и телесем от естества слезы имуща. или неимуща. ова убо тепла и слаба суща естества, абие слезят милостивне, яково же и во всех просто женах зрим бываемо. овии же паки от свирепа нрава и сухаго естества и гордостна сердца прослезити не могут. Сия же рехом о иже посреде мира живущих, иже бо иноческое житие проходящеи множицею и от Божественныя благодати дар слезам приемлют. Обаче некое много и в слезах различие бывает, нецыи бо многащи и от пиянства слезят. нецыи же и славу человеческую ловяще⁵⁷³. темже убо оныя суть добрыя слезы. иже сокровенне Богу приносимыя. якоже и милостыни.

Вопрос 81. (Лествица сл.26) Аще кто нищим просящим у него на пути, инем мнозем мужем ту сущим и зрящим. что подобает ему сотворити, аще несть мощно сокровенне милостыню дати.

Ответ. Помысл человеку судит Бог, аще убо пред тмами Бога ради а не человекоугодия ради сотворит кто милостыню, не осуждается.

Вопрос 82. Откуду овогда убо бывает блага душа к милованию, овогда же жестока и не милосерда.

Ответ. Едина непременна, и присно такожде пребывающее Божественое естество свемы. ельма и (Небеса сл.15, Ис.14, Зах.3, Иов.40) от ангел нецыи превратишася, тем сице прочее подобает помышляти о пременнем естестве человечестем. яко овогда убо ублажается, яко (Иоанн Екзарх сл.6, Небеса сл.23, Богослов сл.2,14, Шестоднев сл.5) по образу Божию сущи. овогда же ожесточевается ратуемо от врага, и прилежащи житейским. обаче аще человек нудит себе к милованию, еже сотворити всяко благо, предуспевает благим обычаем, во еже всегда усердно раздаяти.

Вопрос 83. Слышим (2Кор.9:7) апостола глаголюща: ни от скорби ни от нужди, тиха бо дателя любит Бог. не подобает ли прочее понудити человеку свой помысл, и сотворити милостыню.

Ответ. Совершенных убо есть, еже всегда тихо творити благое. нудящий же себе в нищаго заповедь, благоприятны суть от Бога. рекшаго, яко нужницы восхищают царство небесное.

Вопрос 84. Аще кто о своих гресех покается, яве есть, яко потребляет грехи своя. прочее убо (Пролог Ноября 11 день) и аще кто, сотворив благотворение, раскается. потребляет мзду, юже сотвори ради раскаяния.

Ответ. Да не будет, якоже бо о покаянии греховнем, Бог есть иже тому ходатай. тако и о раскаянии еже о милостыни, диявол есть ходатай ему, а не душа человеку. тем ниже погубляется бываемая мзда, обаче не добро есть, еже раскаятися о бываемом благом, иже бо часто раскаяйся, ленивейший на благое бывает.

Вопрос 85. Нецыи глаголют, яко (Пат. скит. сл.22, Пат. Иерусал. сл.13) не подобает без истязания даяти милостыню, но вопрошати со опаством. аще воистинну скуден есть иже к нам приходяй. глаголет бо Соломон, яко аще творити благо, блюди кому твориши.

Ответ. Сице и прочая писания зле разумевающии развращают. не о человеце убо земном рече Соломон, но блюди, кому твориши сиречь, яко Богу твориши. аще бо о еже истязоватися просящему рече, како Господь глаголет (Мф.5:42) всякому просящему у тебе дай.

Вопрос 86. Ежели убо в церковь приносити есть благочестнейши, или еже нищим раздаяти.

Ответ. Еже (Мф.25:35) рещи Господу сущим одесную яко взалках, и дасте ми ясти. вжадах, и напоисте мя. показа предпочтено быти, (Шестоднев сл.5) еже по образу и по подобию его созданным человеком милование, обаче множицею, во время гонения, хотящу храму Божию разоритися, потребно, и еже о сем пострадание, и паки иже за Христову веру мучимым неким, честнейше сих всех избавление.

Вопрос 87. Аще кто верен от неверных имения вверен быв, сим прикоснется. убо прощен ли есть от Бога о сем.

Ответ. Господу глаголющу: отдадите кесарева кесарю (Мф.22:21, Мк.12:17) яве, яко еллину тогда кесарю сущу, навыкаем, яко непохвално есть еже прикоснутися. обаче аще на нищия таковая истощена будут имения, могут нищих молитвы Бога умолити. рекшаго, (Лк.16:9, Пролог 24 сент.) сотворите себе други от мамоны неправеднаго, аще ли на сласти некия житейская иждота будуть, яве, яко двема грехома иже се творящий впадают. глаголю же сласти и татьбы.

Вопрос 88. Может ли милостыня всяк грех человеку очистити.

Ответь. Есть грех, и грех. и есть милостыня. и милостыня. яко во что глаголю. аще злопомнение имамы ко искреннему, проявлено, яко тмами милостыня не простят нам согрешения. (Мф.6:12,14, Лк.6:37) аще не оставляем и мы брату нашему долги его по Господню слову. паки же ино есть преставшу кому от блуда, творит милостыню. и другое еже пребывающу во гресе. сице даяти нищим. ина паки мзда земледелателю. еже от своих потов творящему милостыню. ина князю, иже от мыта и от прибыток дающему. инии же от лишения своего дая, инии же от избытка, ин рукозаятель, иже чужая вверяемый еже раздаяти нищим. не точию се, но яко ов убо посреди мира сый, и ничтоже ино могий Господеви о своих согрешениях принести, очищается ради милостыни. а иже иноческая жития проходяй истязуется болши некое жителство показати. обаче аще и Новоходоносора такова нечестива возможе милостыня оправдати, велика яко воистинну, и неудобо исцелеваемая согрешения милостынею потребляются. слышим убо святаго Даниила (Дан.4:24) к нему глаголюща: царю совет мой да угоден тебе будет. грехи своя милостынями да избави и неправды своя щедротами нищих. и паки Божественное Писание, (Сир.3:30) милостыня покрывает грехи велики, и паки (Пс.40:1) блажен разумевая на нища и убога, в день лют избавит его Господь. глаголю же вечныя муки.

Вопрос 89. Дерзнуша нецыи блажити совершенныя милостивыя паче творящих знамения.

Ответ. Не о себе таковый суд реша, но всяко Спаса рекша слышавше, яко о сем познают вси, яко мои ученицы есте, не яко знамения творите, но любите друг друга. яве же есть. яко познание истинныя любве, милостыня есть. ибо постави одесную Христос, (Мф.25:34) праведником рече: приидите благословении Отца моего, наследуйте уготованное вам царство небесное, не яко знамения и чудеса сотвористе, ни яко ино некое благо сотвористе, но яко взалках, и дасте ми ясти, и прочая такожде и сущих ошуюю отсылая во огнь вечный, немилование и немилосердие тех поношаше. ибо еже сотворити знамения Божия, единыя есть силы. а еже любовь и милование ко ближнему показати, проявлено, яко человеча есть произволения. слыши же и яснейшая о творящих знамения а не милостыни, свидетелства и суды. (1Кор.13:1) аще, рече Павел, языки глаголю, ангелски. и аще имам всю веру, яко и горы преставляти, и аще предам тело мое, да сожгут мя, любве же не имам, никая же есть полза. (Лк.6:36) и паки Господь рече: будите не знаменоносцы, но щедри и блази, якоже и Отец ваш небесный щедр есть.

Вопрос 90. Колику часть от своих имений истязается от Бога человек дати благотворения.

Ответ. Не зрит Бог даемая, но щадимая человеку. глаголющу убо апостолу. (2Кор.9:8) яко ваш избыток да дастся во убогих лишение, и яве есть, яко елико в сокровищи положим вящше нашея снеди и пития и одеяния, суд в них приимем в день судный. и таков суд, яков же убийцы приимают. занеже многих от смерти нашим имением могуще спасти, не спасохом. но презрехом.

Вопрос 91. Иже нищим оставляемыя от умирающих милостыни что глаголются.

Ответ. Мертвыя же жертвы, обаче аще и в животе своем милостив бе, таковая приятны суть от Бога, и яже по смерти его благотворения.

Вопрос 92. Аще кто во гресех состаревся ни поститися может, ни на земли легати или побдети. или ино некое злострадание сотворити, ниже имения имать на роздаяние, то ни жития может отрещися. ким убо прочее образом таковый спастися возможет.

Ответ. Имже образом спасеся (Лк.18:13) мытарь, и по рекшему пророки, смирихся (Пс.115, Лест. сл.25) и спасе мя Господь. якоже бо безкровная жертва милостыня, во оставление грехов наших приносится Богу, сице и смиреномудрие сердца, жертва бо рече Богу дух сокрушен, сердце сокрушенно и смиренно Бог не уничижит. и паки (Пс.33:18), близ Господь сокрушенных сердцем и смиренныя духом спасет, и паки якоже блажатся милостивии и святии сердцем. сице блажими суть, прежде всех, нищии духом, яко тех есть царство небесное. се убо путь спасения. и нищ и немощен, и стар и невежда ходити и исправити могут.

Вопрос 93. Что убо есть смиреномудрие.

Ответ. (Лест. сл.25, Пат. скит. сл.10,24) Смиреномудрие есть душа, не смотряюще, ниже судяще чуждая согрешения, но своя токмо единая зрящи. и повинна вечней муце себе имущи. я се к Богу глаголющи: святи мя милости твоея ради, а не моих исправлений ради. а яже себе сице повинна помышляя. ниже зло помнити на человека когда. ни осудити человека согрешающа, и прочее. От триех образ грехом оставление приемлем. яко не осудяй не осуждается, яко смиреномудрие оправдается, и яко прощая прощается.

Вопрос 94. Аще кто многащи согрешит и многащи каятися начнет, паки в грех впадет. даже до колицех согрешений паки кающася Бог приемлет его.

Ответ. Иже удобь превратное человеческаго естества сведый Господь. аще и тмами человек падет и тмами покается, никакоже его отгоняет (Мф.18:22, Лк.17:4) заповедавый бо Петру седмьдесять седмирицею прощати брату, множае паче той простит, тмами седмерицею человеку кающемуся. обаче и се подобает опасно ведети, яко душа во обычай пришедши еже множицею согрешати, и многащи каятися преобидящи Бога, и ко греху возвращающися, неудобь воистинну, таковая душа от греха оступает (Лест. сл.1), якоже пес на колитве⁵⁷⁴ в смраде обыкну. прочее же яко жизни нашея конец есть не ведом, подобает нам утвержатися, да не како во гресе постижени будем бес покаяния и предани будем в муку вечную.

Вопрос 95. Колико прелюбодейств суть.

Ответ. Две, ибо жена мужата. идеже аще соблудит, прелюбодейство есть. и паки муж жену имея, идеже аще соблудит, прелюбодеяние есть от своея жены.

Вопрос 96. Глаголют нецы (Лест. сл.15), яко милость имать телесный грех, паче всех грехов, яко (Пат. скит. сл.6) естествену сущу движению в человецех.

Ответ. Сопротивне паки апостол тяжчайший всех грехов той именует глаголя (1Кор.6:18) яко всяк грех иже аще согрешит человек кроме тела есть, блудяй же во свое тело согрешает. понеже от самыя своея плоти, якоже некую жертву подает Сатане, свое семя, обаче, и еже ясти по естеству есть, и се Бог Адама преступивша осуди.

Вопрос 97. Колика разсуждения и согрешения блуда суть.

Ответ. Многа и различна, болшему бо суду подлежит имеяй жену и блудяй, паче неимущаго. и болшему иже добру жену имея паче иже злу имущаго. и болшему иже во старости блудяй паче иже во юности, и болшему иже непрестанно, паче иже временем. и болшему иже не сый тепла растворения, но студенаго. себе же снедми разжигая, и на сласти понуждая, инии же мнози суть. и различны о блуде иже от Бога суды. ин бо есть суд иже со единою женою согрешающему, паче иже многи и различны обтичущаго, и многи души со своею погубляющаго. ин суд паки иже со зазиранием согрешающему, паче иже безсрамно себе греху отдавшаго. ин иже сожителницу имущему, и с мужатою согрешающему, еже и сугубо прелюбодейство делающему. грех той вменяется. страшен же паки суд, еже с правилною женою смешатися, и паки еже обидиме жене помощи. мзду заступления просити, еже грех с нею творити. не токмо же, но и местом есть о гресе суд различен (Лест. сл.13) мнози бо и во церкви грех творят, сугубо суд приемлют. множицею же и другом жены оскверняют. друзи жидовскую любовь лицемерствующе. яже вся истязает и смотряет праведное Божие око по неизреченному его суду, и нелицеприемному и мерилу его опасному и непоруганному.

Вопрос 98. Мнозем пророком в ветсем завете две жене и три имевшим, како нам не повелено бысть две жене имети. то ни подложницу стяжати.

Ответ. Не токмо еже две жене имети благочестивым Христос возбрани, но и самыя тоя единыя жены удалятися нам повеле. глаголя, аминь глаголю вам, иже не возненавидит отца и матерь и чада и жену и последует мне, несть мене достоин. аще ли хощеши болшее, слыши (Мф.5:28): реченно бысть, рече, древним не прелюбы сотвориши, аз же глаголю вам, яко всяк возревый на жену, еже похотети ей, уже прелюбы сотвори с нею в сердцы своем. аще убо очное похотение прелюбодеяние верным Христос вменяет. каково прочее любомудрие и жителство вернии, паче иже в ветсем истязуем есмы. аще бы бо мощно человеку две жене имети, яве, яко жене два мужа. слыши убо Бога о муже и жене глаголюща. яко (Быт.2:24, 1Кор.6:16) будета оба в плоть едину. а не рече, яко будета трие. обаче аще едина жена дана бывши мужеви, трие же и миру всему наветова. что хотяще мир пострадати. аще бы сотворил Бог исперва две жене взимати человеку. аще ли ищеши, чесо ради древнии две и три жены взимаху, веждь опасно, яко многобо тогда дияволское мучителство, еже Христос пришед упраздни, многи от бесов от среды изгнав, овых убо в бездну, овых же в пустыню, и не в селенная и не в проходимая места.

Вопрос 99. Како множицею некая от соний истинствуют.

Ответ. Се (Григ. Беседа кн.4,гл.34, Пролог 25 февр., Никон.43, Лест.сл.3) множицею бывает и от Бога. множицею же и от случая. всяко же яко умна душа предразумевает некая. есть же егда и бесове предпоказуют некая во снех.

Вопрос 100. Что убо проуведетель ли есть диявол и бесове, и могут рещи хотящая бывати.

Ответ. Проуведатель и сердцеведец един Бог есть. (Лест. сл.26) елма ниже самии ангели сердечная, или будущая сведят. беси же елика (Лест. сл.3) о сониях предпоказовати непщуют от лукавства сия назнаменующе глаголют. рекше, множицею яко дуси суще, зрят дождя индеянския многи бывающа, предваряют во Египет. и чародееми или сонием велико восхождение Нила реки проричут. инии же некая подобна сим соделовают. многащи же и лжут, и хотяй сих обличити да уставит во своей души, рекше, колико златниц роздати наутрия и призвав чародея, или волхва до вопросит его о немже уставил есть и всяко обрящет ничтоже сведуща рещи.

Вопрос 101. Понеже нецыи жидове и еллины множицею благотворения соделовают, убо внидет ли сего ради в царство небесное или что подобает о них помышляти.

Ответ. Слыши (Ин.3:5) Господа глаголюща к Никодиму: аминь, аминь, глаголю тебе. аще кто не родится водою и духом, не внидет во царство небесное. яве убо есть, яко никтоже некрещен внидет в не. Се же подобает о благотворении неверных помышляти или яко се здешних благоденством свою мзду восприемлют. или яко в будущем веце легчае мучатся паче прочих неверных, ничтоже благосотворивших. аще ли и писано есть (Рим.2:10): слава же и честь и мир всякому творящему благое, июдею же прежде и еллину. не дивися о сущих бо прежде Христова пришествия сия рече апостол.

Вопрос 102. Убо имать ли конец мука или ни.

Ответ. Господу глаголющу о сущих в геене (Ис.66:24, Мк.9:44): яко червь их не умрет. и огнь их не угаснет, и паки, грешницы же в муку вечную пойдут. и паки апостолу глаголющу (1Кор.6:9): не прелщайтеся, ни прелюбодей, ни блудница, ни пияница, ни клеветницы, ни хищницы, царствия Божия не наследят. Яве убо, яко вечно праведных есть наслаждение. такоже и грешных безконечная мука. и (Мф.26:24) паки рече Господь о июде, яко добро бы ему. аще не бы родился человек той. (Небеса сл.12., Максим Грек сл.7,15,61) аще ли конец имать мука, полезно есть, яко родися Июда. аще позде когда во царствии небеснем хощет устроен быти по мучении, 5 собор на Оригена. якоже еретицы прелщающеся се блядут.

Вопрос 103. Откуду бывают смертныя нахождения, рекше мор. и почто в некиих странах пустынных и языческих множицею не бывает. но яко на мнозе во вселенней, и многонародных градех. и многогнойных.

Ответ. Глубок воистину вопрошения сего ответ, и малым от сущих на земли вмещаем обычай (Мф.19:12) якоже рече Господь могий вместити да вместит, аще бо речем, яко множицею и от воздух тлетворных и прахов, и злосмрадия трупов мертвых, и дождев жатвенных⁵⁷⁵, и воздымлений изношений земленых и морских, недугов телесем, и тли и смерти бывают, обаче ненаучени нецыи зазирают нам. яко беспромыслена яже о нас глаголюще. ихже и вопросити хощем, рцыте нам о сии: како во едином граде мор бывает, от града же того суть во других градех две или три тысящи куплю деющих мужей. и никтоже от них умрет. аще бо бы Божий гнев на град он приспел, подобаше всяко и далеча сущим того вкусити. аще и не всем то иже неким от них. обаче да не дамы вину иже ту сущим. глаголем, яко множицею ова убо от смертных. по Божию прещению бывают. ова же и по воздушных, и прочих винах, их же предрекохом, яже наипаче растлевают младенца, яко немощнейших. обаче и воздухом и воздымлениом⁵⁷⁶ творец есть Бог, рекий (Мф.10:29): не две ли птице на ассарии продаетася, и ниедина же о них падет на земли без Отца вашего, иже есть на небесех, ваши же и власи главнии вси изочтени суть.

Вопрос 104. Убо пользуетлися или избавляется от смерти иже от града во ину страну бегая.

Ответ. Пророку к Богу глаголющу (Пс.138:7): камо иду от духа твоего, и от лица твоего камо бежу. яве есть, яко от Бога убегнути никтоже может, аще ли воздух некий или ина от создания вина есть, иже губительное творящая прилучся, избегает кто сея во ину страну пришед.

Вопрос 105. (Пат. скит. 27, Григ. Беседа кн.4 гл.12) Откуду убо зрим некия праведны души борющияся на дни⁵⁷⁷ и судимы. некия же грешны мирно и вскоре издыхающе.

Ответ. Вся судбы Божия ведети убо нам невозможно есть, сего ради добро есть немного испытовати нам сия. Обаче же разсмотряюще глаголем. яко множицею и мужие благочестивии мучими бывают прежде смерти, или на смерть. яко да мы зряще убоимся и уцеломудримся. всяко же и яко человецы святии мал некий недостаток имуще, ради таковыя муки яже на смерти (Пат. скит. сл.27) совершенне очищаются, и непорочни прочее отходят, грешнии же мирне и вскоре издыхают. яко нестерпиму всяко прияти хотяще тамо муку.

Вопрос 106. Чесо ради множайшии от человек в нощи рождаются, в нощи умирают.

Ответ. Мне мнится, яко да навыкнем таковыя ради притчи (Богослов сл.40), яко темно убо есть настоящаго ради жития. и рождение и успение. рекше иже в него вход и иже из него исход.

Вопрос 107. Откуду нецыи убо люте в страсть блудную ратуеми суть. нецыи же естествене отнюдь таковыя сласти удаляются просто. таже и множицею дебелою плотию обложени суще.

Ответ. (Пат. скит. сл.6, Лест. сл.26) Телесем похотение бывает человеку. или от теплаго растворения телеснаго. или от многия пищи, и сна и покоя, таже и от действа сатанина, четвертое же множицею. и от еже судити других, пятое же от высокоумия, егда кто велемудрует о своей чистоте. таковый убо попущаем есть паднути, яко да ради блуда отложит гордость, и наставлен бысть во смиреномудрие, получит спасение. в сравнении бо двою злу, легчайши есть паче гордости согрешения еже от тела естественое похотение. Чистотствуют же нецыи, или от Бога покрываеми. или студенаго суще растворения, или мнозем пощением себе нудяще, и никакоже осуждающе. аще нецыи гордость имуще чистотствуют, подобает ведати таковых. яко от диявола преобидени быша, доволне сущи гордости паче всех страстей повинны тех. сотворити вечней муце.

Вопрос 108. Кое знамение должен есть человек держати, яко да не прелстится и приимет антихриста. мнящи яко Христос есть.

Ответ. (Мф.24:27) Еже наш Господь предаст рек, якоже молния исходит от восток и является до запад, тако будет и второе пришествие Сына Божия. отнюдуже познаваем, яко всяк Христос приходяй, и не напрасно во всем мире во един час, являяся, не во стране некоей или во едином граде обитаяся. таковый без сумнения антихрист есть. во пришествие бо Христово все человечество вкупе обретается и посреде его Христос видим всеми.

Вопрос 109. Истинною же ли есть, яко от Египта изыдет антихрист, знамение некако на единой руце и на едином оце имать.

Ответ. (Небеса сл.47) Всякия бабския басни суть. антихрист бо никое же знамение таковое не имать. но от Галилея изыдет, отнюдуже Христос изыде, якоже рече Писание (Втор.33:22), скимен лев Дан искочит от Васана, тоже есть скифопол.

Вопрос 110. Глаголют нецыи, яко не может антихрист мертвецы воскрести, ина же прочая вся сотворит знамения.

Ответ. (2Фес.2:9, Откр.13:13) Еже рещи апостолу о антихристе, яко во всех знамениих и силах прелестных. яве есть, яко и мертвецы покажет востающа не истинною, но мечтанием.

Вопрос 111. Како нецыи еретицы множицею творят знамение.

Ответ. Се нас не должно есть удивляти. слыщахом бо Господа глаголюща (Мф.7:22), яко мнози рекут ми в день он, Господи не твоим ли именем бесы изгонихом. и силы многи сотворихом, и реку им: аминь глаголю вам, николиже ведех вас, отидите от мене делателие беззакония. (Лест. сл.28) множицею, не жителство чудодеющаго есть исцеление творя, но якоже к нему вера приходящаго человека. писано бо есть, вера твоя спасе тя, иди в мире. обаче подобает и се ведети, яко множицею нецыи зловернии труды многи пощением Богу принесоша. и мзду свою прияша в нынешнем веце от Бога. исцелением и прорицанием дарованием. яко да в веце будущем услышат еже восприясте благая ваша и труды ваша. ныне же прочее ничтоже вам должно есть.

Вопрос 112⁵⁷⁸. Аще во время праздника останет человек во стране некоей, в ней же причащение соборныя церкве⁵⁷⁹ не обретается, что должен есть праздника ради сотворити, приобщатилися еретиком, или пребыти без приобщения.

Ответ. (Мф.5:27, 1Кор.7:2) Аще многа и люта беда есть мужеви, еже свою жену оставити, и со иною прелюбы деяти, аще и во отхождении далече есть (Пат. скит. 132, 254, 268), то кольми паче правую веру предательствовати. за еже еретиком соприобщатися, якоже бо свою куплю продати хотящий елико же время укоснят, не хотят прияти вместо царскаго воображения, внешнее начертание. тако и о Христове причащении подобает помышляти, еже бо рещи апостолу (Еф.4:5), яко един Господь едина вера едино крещение, назнамена известно, яко едина точию в мире неложна есть вера, юже держит святая соборная и апостольская церковь. и едино крещение чистително и грехов избавително. а иже сице не мудрствуяй, заблудил есть.

Вопрос 113. Камо оходят верных умирающии младенцы, в муку или во царствие, и камо неверных младенцы. где верных некрещении учиневаются, с верными, или с неверными.

Ответ. Господу глаголющу: оставите детей приходити ко мне (Мф.19:14), таковых бо есть царствие небесное. и паки апостолу глаголющу (1Кор.7:14): ныне же чада ваша свята суть. яве убо, яко нескверни вернии во царство входят християнстии крещении. младенцы, некрещении же и язычестии. ни во царствие входят, ниже в муку. греха бо не сотвориша.

Вопрос 114. (Пат. синайский гл.29) Вси ли убо еретицы в погибель отходят. или ни.

Ответ. Есть ересь и ересь, и есть судба и судба. инакова бо есть погибель манихеом и манентанитом, таковым бо проклятым еретиком, и ина паки глаголющим. нетленно тело восприяти Господу нашему Иисусу Христу. (Лк.16:10) обаче иже в мале неверен, и во мнозе неверен. не токмо же се. но и той единой ереси многи и различны суть судбы (Дороф. поуч.6, Небеса сл.53). ин бо есть грех епископу прелщающему люди. ин есть суд причетнику, могущему навыкнути православную веру. и ин паки немогущему. ин паки проклинающему истинну. и сопротивляющемуся нам. и ин иже в разуме согрешающему, и ин иже в неведениих. всех легчаше женское. яже вся свесть опасно хотяй судити вселенней в правду.

Вопрос 115. Мощно ли убо есть князем мзды приимати и сия нищим раздаяти.

Ответ. Аще нецыи облагодетелни бывше в богатстве суть, и волею его тем приносят, глаголю же облагодетившим их, еда не мног суд имут приемлющий, яве яко нищим сия раздают. елма елики мзды от земли трудник и рукоделник приемлют насилуемых. и заступления ищущих, огнь и муку себе собирают. аще и тмами благочестивым сия раздают якоже рече писание, яко огнь пояст дом мздоприемник.

Вопрос 116. Аще муж свят послет казнь, или мучение, или беса, или смерть или ино некое наказание на дом, или на чада, или на существо человеку, может ли человек он умолити иного святаго убегнути осуждения, егоже посла ему раб Божий.

Ответ. Аще муж свят есть, иже мучение послал есть, яве, яко советом Божиим то сотворил. и кто есть прочее, иже совет Божий возвратити хотяй, или могий, обаче ниже святии сами друг друга ратуют сведяще любовный союз. и яко не услышит Господь святаго молитву, иного святаго молитву возвратити хотяща. ни бо есть Богу се подобно единаго убо оскорбити, другаго же упокоити своего раба. отнюдуже иже (1Кор.5:5) в Коринфе соблудившаго Павел связав, (2Кор.2:7) той и разреши, (3Цар.17:1) и Илия такожде небо связа, еже не одождити, (3Цар.18:45) той и разреши, паки таже имущу Богу седмь тысящь чистых. иже не преклонишася Ваалу. (Иов.42:8) и паки досаждену бывшу Иову от своих ему другов, того сотвори Бог простити им согрешения глаголя: идите к рабу моему Иову, и помолится о вас. и якоже во ангелех не сопротивно деет един другому сице и о святых непщуем.

Вопрос 117. Откуду нецыи убо естеством и без нужди суть милостиви, нецыи же естествене суть сурова же и немилостива в подаяние.

Ответ. Некий же человек от Бога естеством бысть немилостив и немилосерд. естеством же паче Бог друголюбное в человеческое существо вложи. и не в человеческое точию, но и безсловесное скот и птиц темже многащи друг друга разлучаема животна, скорбят, и вопиют и алчут. некая же и слезят. вранов же род, и брашна обрет. и абие друг друга гласом зовут на восприятие. и како прочее, рцы ми, не хотят нас от безсловесных многая осуждати иже по образу Божию бывших, не токмо ради немилосердия нашего, (Пат. египет. гл.33) о рахманех. но и ради блуда и невоздержания егоже имамы. она бо не токмо мужеский пол мужескому на смешение не прикасаются, но и самого того женского пола в малы дни желая. лихоимства не ведят. укоризны не имут. а еже лютейшее (Шестоднев сл.5) яко по образу и по подобию Божию быхом. якоже речеся, и князи безсловесным учинени, (Пс.48:12) приложихомся скотом несмысленым и уподобихомся им.

Вопрос 118. Откуду зрим некия (Иоанн Екзарх сл.6) лукавыя и недостойны на архиерейство и власти людем предъизбираемы, многа неподобна соделовающе.

Ответ. Не за еже тем быти достойным власти Бог избирает я владети людми, за еже быти людем злым, таковы тем архиерея и князя подавает. (1Цар.8,9,10, Иоанн Екзарх сл.6) дам бо вам рече Бог князя по сердцу вашему.

Вопрос 119. Откуду есть должен уведети моляйся Бог о прошении некоем, приятно ли бысть моление его.

Ответ. Скуднем неким и благочестивым мужем се ведомо бывает, тех сердцу умне извещение приемлющу.

Вопрос 120. Како и чародеи нецыи отгоняют от человек бесы.

Ответь. (Мф.12:26) Христос во святом Евангелии глаголаше, яко аще Сатана Сатану изгонит, царство его не станет. яве убо, яко чародей беса не изгонит, но бес, иже в бесном человеце живый, самоволне отходит, за еже прелстити человеки, и вместо, еже притекати к Богу, уверити их к чародеем тещи.

Вопрос 121. И како толико может чародей, яко и в безсловесное естество преложити человека.

Ответ. Аще бы могл от человека безсловесно животно соделати, всяко могл бы убо и от безсловесных человека составити словесна. но несть се, да не будет. но якоже глаголемый сам антихрист приходя в мечтание прелщает очи человеком. злато тем многащи, или сребро показуя. сице глаголющии от человека животно сотворити, зрящих точию прелщают, елма иже по образу Божию, и по подобию бывшаго человека скота сотворити не могут.

Вопрос 122. Убо имут ли грех, иже татбы подъемлющии и к глаголемым волхвом приходящии.

Ответ. (Пат. печер. гл.21) И велик. Научи бо нас Божественное Писание глаголати о всякой беде на нас находящей (Иов.1:21) еже Господь даде, Господь взя, якоже Господеви изволися, тако и бысть, буди имя Господне благословено.

Вопрос 123. (Григ. Беседа книга 4 гл.18,26,27) како нецыи в смертоносных умирающе зрят некая видения. и по двою или триех часех востают, некая поведающе.

Ответ. От таковых несовершение тогда душа от тела изыде, но во изступлении бывает, аще и нам издохнувша мнятся, а яже зрят и поведают страшная, к нашей ползе тем Бог показует.

Вопрос 124. (Небеса сл.26) Откуду познавает душа непрелестно свое тело на воскресение, и не входит в чужее.

Ответ. Естественным последованием, якоже бо агнцы от вечера матерей отлучени во утрене непрелестно от естества ко своей матери коеждо привлачится. сице и о душах разумеем на воскресение бывати.

Вопрос 125. Аще ли разбойник сто убийств сотворит, и ят быв отсекут главу ему, что хощем глаголати о нем. убо свободил ли ся от всех убийств, ихже сотвори.

Ответ. Единаго токмо убийства приял есть суд. прочих же девятидесят и девяти в будущем веце приимет суд, ведети же подобает, яко убо и едино некое множицею сотворит человек убийство, и аще ят быв, и отсекут главу его, не всяко убо всего греха убийственаго свободися. яково же что глаголем о святем Иоанне крестителе и о Ироде. егда бо и отсечена бы бысть глава Ироду, занеже уби крестителя. но несть равно ко спасению мирскому, Иоанн, ни Ирод. ов бо спасителен человек бе, ов же наветник, (Пат. синайский гл.24, Григ. Беседа кн.4. гл.14) подобне же и о инех неких убийцах, и убиваемых праведных мужех есть разумети, и разсудити, якоже предрекохом.

Вопрос 126. Аще некий князь от ярости с клятвами многими уставил вещь, таже по клятвах пришед в себе, раскается, разумев, яко зле уставил есть, что должен есть сотворити.

Ответ. Исповедатися Богу, и зазрети своему продерзанию, и разорити клятву. ибо Петр апостол рекл, яко не умыеши ноги мои во веки (Ин.13:8). и разорив, еже рече, похваляем есть се сотворив. Ирод же совершив свою клятву ради главы Предтечевы (Мк.6:26) во веки мучим есть.

Вопрос 127. Которые вящши всех добродетелей князем подобает еже ключимы суть.

Ответ. Прежде всего милостивное и человеколюбное, еже в Бозе сущее. таже и непамятозлобное и безгневное, и неприемное. и прежде всех неудобь еже без истязания клеветам веровати, многа убийства без правды творят. такожде и от немилосердия освенятися. той бо есть Богови благоугоден. иже ничтоже от предреченных страстей в себе имея.

Вопрос 128. Аще кто помыслит некую вещь юже непщует себе на ползу, како должен есть о ней просити и Богу молитися.

Ответ. Якоже Христос научи молитися, и глаголати ко Господу, да будет воля твоя (Мф.6:10), ибо сему наказуя нас Христос, сице и тому молящуся Отцу глаголя. не моя воля да будет, но твоя. мы же человецы множицею просим (Лест. сл.27,28) некая от Бога. непщующе та нам на ползу быти. получше прошеное, обретаем того совершение зело нас вредяще, тем же яко провидец Господь конец вещем сведый, преслушает многащи молитвы наша, яко благ полезное нам соделовает темже несть добро еже нудити Бога в прошениих наших, но якоже научени быхом молитися и искати не нашей, но Божией воли бывати. хощет бо всяко всем человеком спастися (1Тим.2:4), и подает нам, якоже ко спасению нашему споспешная.

Вопрос 129. Аще кто совещает некую вещь сотворити, откуду хощем уведати, аще благоугодно есть, еже совеща, сотворити.

Ответ. Малех зело мужей есть, еже во всех своих совещаниях непрелестно сведети, аще благугодно есть бываемое, тем от иже в Божественых Писаниих реченных, иже святыми содеянных многия от иже в нас разсмотряем, аще суть благоугодна. и се же нецыи назреша, яко убо елика благоугодна суть, Богу, не точию Бог, но и вся о вас споспешествует, и помогает, якоже и в неугодная Богу не работает, но сопротивляется. се же всяко всяк человек истязуется, яко да к Божию благоугождению, совещевает вся, елика аще деет и творит.

Вопрос 130. Предрекохом в первых⁵⁸⁰ яко убо в немже постижен будет человек на смерти его, в том и отходит. или во благом, иди в злом. аще кто убо и благая и злая творя умрет что подобает о нем помышляти.

Ответ. Единому Богу ведомо есть се, елма ни человеку ни ангелу. суть бо некая злая покрывают малая благая. и суть благая некая покрывают и потребляют великая зла. судбы же сия бездна многа.

Вопрос 131. Великое и зело словущее и отнюд всеми искомое время⁵⁸¹ хощем рещи имуще человеческое житие или ни; аще бо время⁵⁸² есть, то како Давид рече к Богу: не возведи мене в преполовение дний моих (Пс.101:24), аще ли несть время. како паки той же глаголет: се пядию измерены положил еси дни моя (Пс.38:5). аще ли паки время есть, то како Соломон рече, не буди жесток, ни нечестив зело, да не умреши в безгодие свое. да аще есть в безгодии умирати, то како неким изволися глаголати, яко смерти наводятся временем⁵⁸³ жизненым, кончавшимся како же Иезекию (4Цар.20:6) и ниневитяном (Ион.3:10) живота прошшим, приложил есть Бог.

Ответ. Премудростный источник, и великий сосуд ведения Павел апостол, к Коринфяном пиша, рече, иже бо недостойне яст хлеб и пиет чашу, рекше кровь Господню, суд себе яст и пиет, да сего ради в вас мнози немощни, и недужни, и спят доволни. внемлите со испытанием. зане аще достойне тайнам причащалися рече, то не быша умирали в безгодие то ... гдеже ищем времене⁵⁸⁴ жизненнаго. от многих нам излагаемаго⁵⁸⁵. Паки Елифазу рече Бог: согрешил еси ты и оба друга твоя, аще не Иова ради раба моего, то погубил вы бых (Иов.42:7). темже Иововы ради добродетели, яже к Богу имяше, не умроша. не кончания ради времени жития их. аще ли, яко некиими мнимое⁵⁸⁶, уставлени и уречени дни человеку, да кто иже в беззакониях хотя умрети, святым мужем молился, живота и обращения себе от Бога просити, глаголя. и никтоже о живых своих детех Бога да молит, устав бо един есть, и приложение к нему не может быти. то како рече Писание, чти отца своего и матерь свою да будеши многолетен (Исх.20:12). время убо человеческое есть. воля Божия, емуже хощет приложит, и емуже хощет отъемлет. вся творя комуждо на ползу, якоже Владыка стаду, егда хощет послет и приведут, юже хощет овцу. тако и Бог о человецех творит. и тогда находит смерть человеку. временю, рекше лету живота его скончавшуся. темже убо время, якоже предрекохом, когождо, жития есть повеление Божие и воля.

Вопрос 132. (Небеса сл.8,51,52) Неудобна некая вещь многим, и невозможна мнится растлевших телес востание. како бо рече или откуду востанет плоть. яже многащи утопши, и снедоша ю тысяща рыб, и тысящу рыб, тысяща мужей, и тысящу мужей тысяща волков.

Ответ. Исповедаете ли о несмысленнии всемощно суще творителя Бога существо. всяко речете, яко ей. тем же навыкните безумнии, яко приведый от небытия в бытие человека Бог. той неизреченным неким словом, и обновити может. кое есть скуделнику удобнее, повеждь ми, ежели от несущества на существо сосуда сотворити. или сокрушена паки поновити. яве есть. якоже потворити бывши и уже аще и на многи части разсыпан будет. но да естественым последованием скажем и притчею. якоже убо земленаго огня и теплоты источник и корень солнце есть. и угасающи пещи. яве есть, теплота та к солнцу невидимо восходит. и паки вжигаеме ей, яве есть, яко от солнца огнь приходит, иже бе от нея отшел (Небеса сл.52) тако и растлевающих и разсыпающихся человеческих телес разумевай. яко аще или в зверины, или рыбия, или птичия утробы разделится человек. то в четыре стихии возвращается, и отходит от них же есть и составлен, по солнечней притчи. в воду отходит мокротное. а студеное в воздух. теплое же во огнь. а сухое паки в землю, да во время воскресения по повелению Божию невидимо отдаст каяждо стихия, еже взят от умершаго человека. и приидет душа и востанет человек, яко весть един создавый человека. всеян убо в землю в тление воставляем же в нетление (1Кор.15:42). темже и самаряны от сего обличити можем. якоже се тело востает всеяно, яко некое зерно в земли сокрываемо тело. сего бо ради Бог исперва отцы нашими взаконил есть, копающе нам погребати умирающих телеся, да и не хотя человек исповедает воскресение. все бо в землю нами погребаемое, яве есть, яко на упование воскресения крыемо есть. аще ли несть мертвым воскресения, якоже еретицы блядут, то уже неправеден Бог обретается, мнози бо праведни пострадавше, и зле им попусти избиемым быти (Пат. скит. сл.27) многим же нечестивым и грешным добро житие и долголетие даровав, и здравие. но да не лстятся самарянстии отроцы, будет бо некогда время воскресения, яко да и благочестивии венчани будут, по праведному суду Божию.

Вопрос 133. Како Бога обрящу милостива себе, постом ли, или бдением, или милостынею.

Ответ. Разсмотрением вся приятна Богу. мнози бо плоть свою изсушивше и удручиша пощением и молитвами. но смирения не имуще ни любве. и гневливи. и величави. те отидоша тщи и не приемше плода. иже бо постится кто гнев имый, или вражду подобен на море (?) Апостол глаголет (Евр.12:7): аще наказание терпите, яко сыном вам обретается Бог. аще ли же без наказания есте. то убо прелюбодейчищи есте. ихже любит Господь. наказует. сам Господь глаголет, елицех аще люблю, обличаю, и наказую.