Беседа трех святителей

(Из Сборника Солов. библ. №889; стр. 170 наоб.–172 наоб.)⁵⁸⁷

Вопрос: кольких лет взя Иосиф Марию: из церкви, из дому Господня: и святая святых; (от) сущих 14 лет; (в) колько пребысть Мария у Иосифа в дому: явися ей архангел; (от) сотвори Иосиф в дому 6 месяц по обычаю постящися, 5 и приим час дни, молящися и явися архангел; (в) коль млада Христа Симеон на свои руце приим. (от) 40 дний; (в) колько Елисавет пребысть внутри пустыни со Иоанном егда от Ирода царя уклонися. (от) 40 дний. (в) колицех лет Христос крестися от Иоанна во Иордане; (от) 30-ти лет, и Иоанн крестил, той пребысть 30-ти же лет в пустыни, и глас ему глаголя: о крещении: Иоанн же шед во Иудею; егда Иисус изыде, из святая святых: во одежди архиерейской, учити народа: и виде Логгин сотник и рече: – воистинну се есть Сын Божий. И несть подобен, ходити по земли: тогда снем убрус, со главы своея, и постилаше по земли. по пути: по немуже хождаше Иисус. имаше же убрус, 70 лакот; (в) егда Иисус рече: блажени видесте мя, и вероваша. треблажени слышавше, и вероваша; (от) егда Авгарь князь слышав о Иисусе, (яко) чудеса велиа во Иерусалиме творит, и посла Луку своего писца, повеле ему на убрусе образ списати, Иисус же, убрусом утре лице свое и даст Луце: и бысть на убрусе образ нерукотворенный, Господа Иисуса Христа: и принесе образ во Едес, ко Авгарю князю. а сам пойде, со инеми: и бысть ему ученик: и евангелист; (в) в кое лето, учиниша Иисуса иереи на архидиаконстве. кольких лет Иисус был. (от) в 3-е лето по крещении Господни. Случися в та лета, умрети пресвитеру церкви Божии: имя ему Маркел: и тако, церкви устав, аще не изберут, на литургию: 40 попов, несть литургии. И тогда Иисуса иереи научиша на архидиаконство; и даша ему книги, Исаиа пророка чести в людех; и обрете в них, иже написано сице: яко овча на заколение ведеся: яко агнец, прямо стригущему безгласен. И тако не отверзая уст своих, во смирении своем, он же разуме в сонме, и согнув книги, и предаст Луце: и глагола: о мне се речено бысть и сказающе людем. и послушающе в сласть словес его; (в) при котором царе Христос: потяжатель быв, или, в которой стране; (от) при Августе царе: по всей земли не бе кто без работы, по всему царству тому: яко сам владыка при том царе потяжатель быв, в день дни, изыде владыка. во Вифлиом, обрете человека на пути, орюща на едину страну прелагаше землю, но обходяще землю окрест: и видев Господь: яко провожаше (?) и прият Господь в руку свою рало, и устроив Господь 3 бразды, и призвав, даст ему рало. и устроив Господь: о дивное чудо, како при Августе цари тяжатель явися Господь; (в) что есть спутник, или разбойник: иже со Христом пострада; (от) бысть на царстве во Иерусалиме Навдан⁵⁸⁸ царь: той царствова 100 лет, тако изменися царство его: 24 лета, до Ирода царя. и в то время, человек во стране Иерихонстей. именем Асон. и прииде поклонитися, (здесь несколько слов срезано) и во святая святых: с женою своею, Анорою⁵⁸⁹: и непраздна бысть, и родив сна, и нарече имя ему Спутник. и вселися близ дому Божиа во притворе Соломона: иже бе создал Соломон странным. близ же бе иное место, идеже бо седящи, кождо их, стрегущи древа осужденнаго: еже на нем распятися Христу Богу нашему: то и место зовется разбоище и доселе; аще кто пребывает, благ или зол, то начнут глаголати: разбой(ник), и вселися ту Асон. И пожил и умре: поручи сыну своему Спутнику, и рече: блюди, чадо, древо се лежащее: на сем древе хотят обесити живота нашего, и Бога Христа: аще приидет когда, ты чадо, аще распнешися с ним, то весь род свободишь от вечныя муки. Пребысть же Спутник в разбоищи сем 100 лет. и бысть се: и распятся со Иисусом Христом Богом; беже спутник родился прежде Иисуса, и пребысть разбойник в разбоище 70 лет, предаст душу свою со многим трудом; (в) что есть: секира уже при корени древа лежаще. (от) корень вера святая: а секира всем человеком кончина. (в) како имя волхвом. (от) 1-му имя Мелхион. 2-е Аскар. 3-е Валтасар; (в) колько лет Господь был во Египте. (от) 13 месяц. (в) в чьем дому Господь был во Египте. (от) Фелонове; (в) в который день Павел апостол вниде во апостольский чин; (от) единым днем, прежде крещения. (в) кто солгав спасеся: и кто истинну рек погибе; (от) Петр солгав спасеся. Христа овержеся 3-жды и рече, незнаю человека сего. а истинну рек Иуда: и погибе: предав Христа на распятие жидом, сей, рече, егоже лобзах, то есть Христос: имите его; (в) кто праведен сый не глаголя 9 месяц и день; (от) Захария, видев видение; (в) от которого праведника град спасеся от смерти. (от) Сигор град; егда Лот, избежа от смерти, от Гомора, в Сигор град вниде спасеся. (в) кто смерти не вкуси, смерти бежа. (от) Илиа, Езавели бежа жены; (в) где студень с теплом снятся. (от) в Содоме и Гоморе град и углие горящее; (в) колько Адам пребысть в раи; (от) 7 лет был, а по согрешении был от 7-го часа до девятаго. (в) кольких лет был Ной праведный, егда потоп был на землю. (от) 600 лет, и двух; (в) который пророк: мертв бысть, поя и спасеся. и жив телом хождаше; (от) Иона, во чреве китове; (в) кто не верова: и бысть телом сланеным; (от) жена Лотова; (в) колько лет работаша исраилтяне египтяном. (от) 450 лет; (в) на колько частей разступися море. (от) на дванадесять: да кийждо родом своим путем пройдут море; (в) колико тысящ исраилтян; (от) 600 тысящ. (в) колько исраильтян со Иисусом Навиным прешли Иордан, (от) 400 тысящ. (в) что суть небеса исповедают славу Божию. (от) 7 небес; 1-е Сим: 2-е Енох. 3 Енос. 4 Ной. 5 Авраам. 6 Исаак. 7 Иаков. (в) Где Бог взя персть, и сотвори Адама. (от) в земли мадиамстей, среди земли: туже и умре: и погребе его тамо; (в) коего месяца сотвори Бог Адама; (от) марта, в час 6-й; (в) кольких лет был Сим, егда потоп бысть; (от) ста лет⁵⁹⁰ ... Христос: беседова с женою самарянынею, в 6 час: а еже, 5 обличаше. обличи бо ю Христос: добре рекла еси, не имаши мужа: 5 бо имела еси; а иже, 12 удивляхуся: апостоли святии дивятся, зане Господь: с женою беседует; (в) что есть 5 земная, и две тме морстей: и 5: и 12; (от) пять земная: 5 хлебов благословенных Христом, а две тьме морьстей, две рыбе, а иже 5: пять тысящь мужей, возлеже. а иже 12: дванадесять, рече, коша избытков; (в) кольку долготу имеаше ковчег; (от) 300 лакот. а в высоту 100 и 50. а в широту 30 лакот. (в) кто умер, и не возсмерде: или, погребен и неистле; (от) жена Лотова; егда избежа из Содома: и преступи заповедь Божию: и озревся воспять, и ста столпом сланым. (в) колько стояла вода потопная: егда бе при Нои; (от) 12 месяц; (в) колько стояла вода потопная, и явишася горы; (от) 100 и 50 и 7 дней; (в) которое естество на небеси, и на земли: (от) Бог: человек, родися царь, Господь: Иисус Христос; (в) в пещере, и во вертепе: кто бе господин во вертепе, и кто бе господин вертепу тому: еже сказается Фуздос: еже евсевний (?). (в) что суть волсви, иже принесоша дары ко Господу: како имя им, и что принесоша даров; (т) принесоша: злато, и ливан, и смирну: и злато принесоша является вочеловечение хотя быти. аще и ливан, Божество есть его: ли смирну, умертвие его. занеже мастью помазаша умерших милых своих: а пастуси суть апостоли святии, Петр и Павел: якоже рече, Лука евангелист во евангелии (?) и пастуси суть апостоли беша: на месте сем. глас к ним, глаголя: не бойтеся вы, и се благовествую вы радость велику, якоже будет всем людем, яко родися Господь днесь. во граде давидове, се вам знамение, обрящете младенец во яслех, они же шедше, и обретоша: не точию самого, но и матерь его, еже есть Госпожа; (в) почто родися во яслех: и что нарекутся ясли; (от) ясли суть мир: якоже повися верою; что есть осел: и что есть вол. – егда родися во яслех, Христос Бог: овоже мнят вола, совершеннии быти во вере своей: а осел есть христианство, новыя людие, верою и благодатию; престол есть на земли⁵⁹¹, поверже: умалил есть, дни времени его, и облиял еси студом его; егда будет антихристова царства 3 лета, как 3 месяцы. а три месяцы как три недели: а три недели как три дни. 3 дни, как 3 часы. Повержен будет со студом; тогда возложат на алтарь твой тельца. (т) егда убиет сотона с бесы своими Илию и Еноха на жертвеннице; и трубы рожаныя, от конца до конца вселенныя, (т) егда ангели вострубят, убужая от века умерших; апостол Павел рече: купно восхитимся на облацех, и востретение Господне на воздусех. (т) егда начнет земля горети: тогда вси праведницы восхищены будут на облацех, и на воздусех; окропиши мя иссопом: и очищуся, омыеши мя, и паче снега убелюся. (т) егда выгорит земля, тысящу лакот во глубину: и не будет ни горы, ни камения. и будет чиста, аки хартиа. и убелится, аки снег, и сошлет Господь 4 ветры. восток. юг. север. запад. и развеют всю скверну со земли. и будет чиста земля, аки девица нескверная: и возопиет ко Богу глаголющи. яко девою есмь пред тобою Господи. и несть уже, Господи, греха; воззваша к Богу: и не бе спасая их: и не услыша их Господь. (т) егда жидове, со антихристом, и з бесы, пойдут во тму кромешную. и тогда возопиют к Богу: а Господь их не помилует: и не услышит их; (в) како имя древу, на немже обесися Июда. (т) сирнихий; (в) кто первие именова Бога на земли; (от) сотона рече: есь се (?), что вам повеле Бог ясти; (в) что есть единаго исках, а три обретох; (от) три погребены быша в Голгофе: единого креста исках, а три обретох кресты. (в) почто месяц держит 4 недели. (от) 4 стихии есть; а 5-е неделя толикоже держит. (в) чтося нарече динар; (от) Иаков брат Господень; (в) рцы ми: десять слов святым евангелием; (от) 1: искони бе слово. 2: Бог бе слово. 3: есть Бог слово. 4: се бе искони от Бога. 5: вся тем быша. 6: без него не бысть. 7: в том живот бе человеком; 9: свет во тме светится. 10: тьма его необъят; (в) где списа евангелист евангелие: и в кий образ быша. (от) иже от Матфеа, на востоце: самим Матфеем, жидовскими писмены: и во образ человечь, херувим; еже от Луки, самем Лукою, повелено Петром: во образ телечь; а еже от Марка, написано самем Марком: во образ львов: се есть божественный иеросалимлянин: идеже Господь варяя, со ученики своими. а еже от Иоанна написано есть, в Патме, кипрстем острове. во дни Траяна царя: во образ орль; написано бысть 10 слов святаго евангелия. сиречь, искони бе слово; (в) киим образом отец един: святый Дух; (от) отец един, святый Дух: Бог всемогий, и вседержитель: безначален, и нерожден, безсмертный, и неотступлен: Христос; Саваоф. Нераздрушен, и невидим; (в) киим образом сын славится, (от) един свят: слово Божие: солнце праведное: свет животный. истинный путь: дверь; столп: камень. цвет жизненый; пастырь животный, хрисма обновляющи: сын Божий. сын человеческий: и велика совета ангел. червь, пастырь. Мессиа. Иисус. Христос, Бог, царь, доброта, премудрость, сила, лев, уста, милости источник. светлый облак, началник Божиим силам; (в) киим образом славится святый Дух; (от) свят: Господь: дивен, тонок. благ, быстр: безвластелен. благолюбец. и истинен, остр: непрелестен, бестелесен, известен остр. крепок, тверд: безначален, всемогий. вся посещая: разумен, от силы Божиа; (в) кто роди гиганты; (от) внук Хамов; (в) что есть седмь мщений; (от) якоже рече: всяк убив Каина, седмь мщений разрушит. и положи ему знамение. 1-е, Бога разгнева. 2: отца оскорби. 3: матерь безчадну сотвори. 4: брата уби. 5: кровь пролия. 6: землю оскверни. 7: ада обнови; (в) коликоже по благовещению родися; (от) седмь; 1-е, Сим. 2: Енох. 3: Исаак. 4: Сампсон. 5: Самоил. 6: Богородица. 7: Иоанн Предтеча (стр. 170 наоб. – 172 наоб.).

(Из ркп. Солов. библ. XVII в. in 4° № 1138; лист. 177–186).

Вопрос. Григорий рече: кто первие Бога нарече на земли? Василий рече: Сатана первый ангел бысть и за гордость свержен с небесе прежде создания адамли и наречеся Сатана и дьявол. Василий: что есть высота небесная и широта земная и глубина морская? Иванн рече: Троица Отец и Сын и Святый Дух свет есть и другий свет огнь есть. Иванн рече: Петр приник и виде ризы едины лежащии и сударь, еже бе не с ризами но особь свит на едином месте. Григорий рече: сударь бе два плата служебная на блюде, а ризы его верхнее небо в преисподней бездне стоит яко риза, стихарь 6 (7?) небес, а пояс железное столпие около великаго моря, на немже земля плавает, а патрахиль вход и исход, а поясом земля, толстота ея яко от востока и до запада. Повеле Господь согнати пену морскую и сотворити землю на трех китех великих и на тридесяти малых китех. залягут тридесяти морских оконец, а души их третья часть райская воня и идут на ту воню и те рыбы в сети увязнут. Глубина того моря великаго, втрое того толстота, как земля толста, дно под тем морем великим равно(е) железному столпию. того же моря дно стоит на 7 столпех. Туже есть адово жилище, туже будет и антихрист связан, а Михаил архангел утвержает его. То же столпие стоит возвышено яко то море, то столпие стоит на огне неугасимом. Под тем огнем есть Дньнница, иже прежде солнца сотворена, и туто есть люди крилати яко паучина мыслию. а смерти им несть. та же иного ничего, но все воздух Божий то держит. То ти есть бездна яко риза. Иванн рече: где первие Бог был, еже не бе света? Василий рече: суть комари три на небесех в тех комарех (в другом списке: ту бяше Господь) агнь(цем). А свету несть конца. Григорий рече: протолкуй ми Троицу. Иванн рече: в тех комарех Отец и Сын и Святый Дух свет есть, а другий свет огнь есть. Василий рече: отчего суть ангели сотворены? Григорий рече: от духа Господня и от света Господня. Иванн рече: отчего солнце сотворено есть? Василий рече: от рясны ризы Господня. Григорий рече: отчего луна сотворена есть?⁵⁹³. Василий рече: колко ветров? Иванн рече: 16. Григорий рече: что суть четыре рози на земли? Василий рече: восток, запад, юг, север. Григорий рече: протолкуй ми о ответе. Василий рече: на востоце Лука человеческим образом. а на севере Иван орлим образом, а на западе Марк львовым образом, а на юзе Матфей телчиим образом, все суть крилати. Василий рече: отчего Адам создан? Иван рече: посла Бог ангела и взя «А» на востоце а «Д» на западе а «М» на юзе а «Ъ» на севере. и то есть Адам. Григорий рече: от коликих ветров или от частей? Василий рече: от осми частей. Первая от земли тело, вторая от моря кровь, третья от солнца очи, четвертая от камени кости, пятое от облак мысли, шестое от огня теплоту, седмое от ветра дыхание. от света свет дух бо сам Господь в него вдохну. Иванн рече: колко Адам пребысть в раи? Василий рече: от шестаго часа до девятаго часа. Иван рече: где вселися Адам, егда изгнан бысть из рая? Василий рече: в земли Мадиамстей. ту создан бысть и умре. Василий рече: кол(и)ко великих морь и рек великих? Григорий рече: морь великих 12 идут сквозе всю землю, а рек великих едина, а из рая идут четыре реки. Иванн рече: кол(и)ко островов великих? Василий рече: 72. а в тех островех 72 языки роздноличных имян. Иван рече: колко костей в человеце? Григорий рече: 185. а суставов толко же. Василий рече: кому посла Господь грамоту? Иван рече: к Сифу сыну Адамову. Григорий рече: что еси ему посла? Васили рече: десять слов посла: искони бе Слово и Слово бе от Бога и Бог бе Слово и се бе искони от Бога и вся тем быша и без него ничто же бысть. И оттого паремьи быша: искони сотвори Бог небо и землю. От того пойде Израильтеское колено. Иванн рече: глас изыде от востока и до запада. Григорий рече: егда Господь проклят Каина. Василий рече: коли четвертая часть мира умре? Иванн рече: егда уби Каин брата своего Авеля. Григорий рече: коли возрадовася весь мир? Василий рече: егда изыде Ной из ковчега? Иван рече: который не бысть зверь у Ноя в ковчезе? Василий рече: рыбы не были. Василий рече: город стоит, а пути к нему несть. Иван рече: к Ноеву ковчегу. Григорий рече: кто первее научил кланятися? Василий рече: Моисей на горе Агаре. Григорий рече: который пророк не погребен бысть? Иванн рече: (Моисей) на горе Синайстей внесе его Моисея ангел Господень в рай. Василий рече: древян ключ, водян замок, заец убег, ловец утоп. Григорий рече: Моисей удари жезлом в море и пройде, а фараон потопися. Иванн рече: отчего просвира и гоменцо?⁵⁹⁴. Василий рече: егда Моисей проведе люди своя сквозе Чермное море, и тогда почаша опресноки петчи от солнца на главе, Господеви своему на службу. Иванн рече: кая два супостата борются? Григорий рече: смерть и живот? Василий рече: день и нощь. Григорий рече: кто солгав спасеся, а истину рек погибе? Иван рече: Петр солгав спасеся, а Июда истину рек погибе. Василий рече: кто дважщи смерть вкуси? Григорий рече: Лазарь. Иван рече: кто смерти трижды днем вкуси! Василий рече: ему же повеле Господь одр взяти. той зауши Господа на предании, и повеле Господи снедати (его) лютому зверю трижды днем. Григорий рече: кто обличи Петра? Василий рече: Асалай просящая у врат, и рече: ты еси ученик его. Василий рече: кто отвали камень от дверии гробу? Григорий рече: два ангела единому имя Калуил а другому имя Азаил. Иван рече: отчево сотворено миро? Василий рече: егда искупа Саломея Господа, тогда купелию тою помаза брата своего Симона, лежащаго в недузе 16 лет. Григорий рече: где виде Саламия купель Господню? Иван рече: в горе разступися камень и опять ступися и до нынешняго дни поет ангел сходя с небес и свеща горит ту день и нощь и крестияне ю видят. Василий рече: како имяна разбойником: Иван рече: правому имя Араго (в друг. ркп. Рах), иже сказуется сила, а шуему имя Геста иже сказуется изгнание. Григорий рече: кто не рожен, кто не умер? Иван рече: Адам не рожен, Илия не умер. Василий рече: кто состаревся опять во чрево матере своея вниде? Иван рече: Адам в землю пойде, от земля создан бысть. Григорий рече: кая мати дети своя сьсет? Иван рече: море реки. Василий рече: внук глагола бабы: положи мя в себе, и рече баба: како тя хощу положити, а ты мне отец? Иван рече: баба есть земля, а внук, то есть Христос. Григорий рече: кто постави полчетверта столпа на земли? Василий рече: Илия не одожди земли три лета и шесть месяц. Иван рече: кое художество первие на земли бысть? Григорий рече: Адам и Евва сшиста собе в листвии смоковном одеявие. Иван рече: что есть непоставлен поп, а диякон отметник, а певец блудник. Григорий рече: поп не поставлен Иван Предтеча крести Господа. диякон отметник Петр. а певец блудник Давыд царь. Григорий рече: кто Бога не виде, а Богу ся поклонил? Иван рече: Исайя от чрева матерня взят бысть ангелом и несен бысть до седмаго небесе и видев Господа и поклонися ему и опять во чрево матери своея вложен бысть. Василий рече: который апостол не умерл, но жив есть? Иванн рече: апостол Иванн Богослов. Иванн рече: что есть еже вселенную всю сотворил и пядию небо измерил той же единою покрыт бысть? Василий рече: Иван Предтеча возложил руку на Господа на Иордане. Григорий рече: что есть прииде богатый к нищему много всего имяще, а единаго прошаще? Иван рече: Господь ко Иванну Предтечи прииде все имяще а крещения не имяше. Василий рече: кто Захарию крести отца Предтечина? Григорий рече: пришед Господь из Египта с четырми ангелы и воскреси Захарию от мертвых, а Иванна ангел из горы принесе и крести их Господь обоя во Святая Святых в 4 час нощи. Иван рече: что есть киот и что леввит? Василий рече: киот есть новый закон, а леввит ветхий закон. Григорий рече: небо бяше, а земли под ним несть, град убо что есть, а пути к нему несть, а идет к нему посол не путем, а несет грамоту неписану. Иван рече: град есть Ноев ковчег, а посол голубь, а грамота неписана лист масличен. Иван рече: внук рече к бабе своей: положи мя у себе, и рече баба: како тя хощу положити, еще есми девою?⁵⁹⁵ Василий рече: Авель глагола земли, тот первый на земли мертвец. Иван рече: который пророк покры дланию своею седмь небес. Григорий рече: Иванн Предтеча крести Господа. Василий рече: два беху стояста и глаголаста два, а пять обличаше, а два на 12 дивляхуся. Василий же рече: Христос, беседуя со женою Самарянынею два стояше. небо и земля, а пять обличаше пять бо мужей рече имела еси и ныне имаши шестаго но несть ти муж. а 12 дивляхуся, то есть 12 апостол при беседе Христове с Самарянынею. Иван рече: ряб пищит ихже зовет, а не родил есть. Григорий рече: ангел вострубит и мертвии востанут. Василий рече: гроб хожаше, а мертвец в нем пояше. Григорий рече: Иона во чреве китове пояше сиречь моляшеся. Василий рече: видех змия, лежаща при пути и уязви коня за пяту ноги задния и ста конь приляже на ногу ждый от Бога избавления. Иван рече: конь есть правая вера крестьянская, а путь мир, а змия антихрист, а пята последняя дни века сего, в ня же приидет антихрист царствовати и разоряти Христову веру, дóндеже приидет Господь избавити люди своя. Василий рече: видех жену седящу при мори, а змия лежаща при пути. егда хотяше жена та ражати отроча, и змия пожираше. Иван рече: жену мнит быти церковь, а змия дьявола, да егда хотят вернии людие поститися и спастися, приходяще к церкви, дьявол возбраняя им всеми своими козньми прелщая их и вревая в путь погибелный, во пьянство и в блуд в свар и вся нужная мерская. Иванн рече: яко вода покры море. Василий рече: море наричется мир, а вода учение книжное. Григорий рече: будут в лузе ограды овцам. Иванн рече: луг нарицается рай, а ограды места райская, а овцы верныя люди, иже работают Богу, а не жертве. Василий рече: иже чужая грабя, а милостыню творя, не токмо не помиловани будут, но и болшаго мучения сподобятся, аще ли приимут ум и помиловани будут, ихже кто грабил, не токмо мучения избудут и жизни вечныя причастницы будут. Григорий рече: се есть безумие последнее человеком, иже у себе держат твердо чужее имение, неправдою собрав, а оставят своим детям, а сами пойдут в муку. Иван рече: иже не требует добытка неправеднаго, живет в мирне житии и потом пойдет в мирный в вечный живот и покой. Сирах рече: муж каяся и моляся и постяся, в руку держа неправедно богатство, како поможет ему. Василий рече: добрая дела твоя отступят на злая дела, то болшему мучению сподобятся. Василий рече: пьянаго человека Господь бежит, а хмель дышет дух усты его упияся рече пьяному не видети сего света, а сребролюбцем оного. Аще человек видит во сне добро или зло. или зрит себе на иннои стране видетися? Толко: то ум от него летает, занеже ум есть бесплотен аки душа. Душа есть у человека сущи разумна бесплотна, невидима, тонка, бестрастна, подобна ангельной тоности. О уме человечестем: у человека ум седит во лбе промеж лбом и мозгом, аки царь на престоле седит, понеже бесплотен есть аки душа. И всяцыи помысли исходят от сердца человеку добрые и лихие и приходят ко уму воспрашиватися, аки слуги ко царю. Аше ум крепок и неподвижим, то приходящыи мысли от сердца человеку добрыи бывают, и примает их к себе, а лихия отревает и не дает им приближитися к собе.

Вопросительная словеса⁵⁹⁶ о родословии. Матфан имяще три дщери. первую Марию. таже роди Саломию, бабу Господню. 2-ю Софию. таже роди Елисаветь, матерь Иванна Предтечи. 4-я. Анна. таже роди святую Госпожу Богородицу Марию. Иосиф име 4 сыны и три дщери. Сынам же его имена 1. Ияков 2. Симеон 3. Иуда 4. Иосия. а дщерем его имена, 1-я Есфирь. 2-я Марфа. 3-я Саломея, мати Иоанна Богослова. Вопрос. Что есть лет 30 и 50 и 1. Толк. 30 лет есть совершение человеческое. в них же деяния добрая и злая. а 50 лет отходит от человека многая мысль и приближается старость. а 1 есть будущая благая и злая вонже осужение будет человеком. да подобает того блюстися добро житие со страхом по закону. Вопрос. Видех рабы на конех едущих и князя пеша идуща. Толкование. апостоли взяша силу книжную во учении. то есть на конех ездящих. а князь пешь ходит, то есть Христво имя в миру славимо бывает. Воспрос⁵⁹⁷. Коликих лет взял Иосиф Богородицу Марию из церкви из дому Господни. Толк. 10 лет. бысть у Иосифа в дому 3 лета. и пойде Мария с черпалом на кладязь и благовести ей архангел из облока рождество великаго Бога и царя небеснаго при часе 10-м дни. Вопрос. Коль млада Христа Симеон на руку свою взял? Толкование. 20 дней. Вопрос. Коликих лет крестился Господь (на этом статья прерывается в рукописи).

(Из ркп. Солов. библ. XVII в. in-4° «Главник» № 86; лист. 328–334)⁵⁹⁸

Григорие рече: Елисавети в кое время и в кое лето благовествова архангел Гавриил! Василие рече: во время Льстилу и Силуану⁵⁹⁹ преже 13 коланд. Василие: Богородицы в кое время благовествова архангел Гавриил и в кое лето? ответ: во дни Августа царя месяца марта в 25. Григорие рече: воплощение Господня в кое время и в кое лето? Совет: при Августе царе. Иоанн рече: кто родися в вертепе?⁶⁰⁰ Василие: кто ся слыша Господень вертпу⁶⁰¹. в немже родися Господь? Григорие рече: имя ему Фуздос. еже сказается благоверствие. Василие рече: кто слышахуся волсви, иже дары принесоша Богу? Иоанн рече: Мелхеон Аспар⁶⁰² и Валтасар. Григорие рече: колико лет сотвори Господь во Египет шед? Василие: 12 месяца. Иоанн роте: в чием дому пребысть Господь во Египет вшед? Григорие: в дому Фелонове. Григорие рече: рабыни яже сотвори Петра отврещися что ся нарече? Василие рече: Лечица еже сказается просящия. Василие рече: кто ся слышаше дина. идеже Господь вечеря? Ияков брат Господень по плоти? Древо на немже ся обеси Июда что ся слыша? Григорие: миринхи. Иоанн рече: понесый крест Господень кто ся слыша? Григорие рече: Симон Кириней. Григорие рече: прободый Господа копием кто ся слыша? Василий: Логин. Василие рече: распятая со Христом что ся слышата. или что ся сказаета имен ею? Иоанн рече: иже одесную в раи⁶⁰³ еже сказается сила, а еже ошуюю Геста иже сказается оземствие. Иоанн рече: иже снят тело Господне и погребе е кто ся слыша? Григорие рече: Иосиф иже от Аримафея. Григорие рече: оба ангела, иже отвалиста камень, како еста имена има? Василие рече: един Изаил еже сказается праведен Бог. а другий Калуил⁶⁰⁴ еже сказается крепок Бог. Иоанн рече: в кое время апостол Павел во апостолский чин вниде и в кий день? Григорие рече: единем днем преже крещения. Григорие рече: рцы 10 слов от Евангелия. Василие рече: 1. Искони бе Слово. 2. и Слово бе к Богу. 3. и Бог бе Слово. 4. сей бе искони от Бога. 5. и вся тем быша. 6. и без него же ничто же не бысть еже бысть. 7. в том живот бе. 8. и живот бе свет человеком. 9. и свет во тме сияет. 10. и тма его не объят. Василие рече: где ся написаша 4 евангелия и в кий образ быша? Григорие рече: еже от Матфея на востоке самем Матфеом жидовски писмены во образ человеку херувиму. А еже от Марка написася в Риме самем Марком во образ львов. сей есть блаженый иерусалимлянин. идеже Господь вечеря со ученики своими. А еже от Луки написано бысть самем Лукою, повелено святым Петром во образ телчь. А еже о Иоанна написано бысть в Патме кипрстем. во дни Трояна царя во образ орла. написа 10 слов Евангелия. сиречь. искони бе Слово. Василие рече: отец и Сын и Святый Дух. ким образом славится Отцу? Григорий рече: един отец и Святый Бог всемогаи вседержитель безначален неразделен. нерожден безсмертен неотступен. Христос Саваоф неразрушный невидимый. Василие рече: ким именем славится Сын? Григорие рече: един свять. Слово Божие. солнце праведно. свет живот⁶⁰⁵ и истина путь. дверь столп⁶⁰⁶ цветец. пастырь овцам. хлеб. хризма обновляющи. сын человеческий. велика совета ангел. пастырь Мессия. Иисус Христос Бог. царь премудрость сила. милостыни источник. лев. скимен львов. светлый облак. началник Божиим силам. Иоанн рече: ким именем славится пресвятый Дух? свят Господь многоденен. тонок во благобыстрии. мудрость безвластелен⁶⁰⁷ благодетелен человеколюбец известен. крепок тверд беспечален всемогай всепоспешая⁶⁰⁸. разумна чистота тонко неразлучно от силы Божия⁶⁰⁹. Григорий рече: кая ся два бори(е)тца? Ответ: живот и смерть. Григорий рече: кая два супостата? Ответ: нощь и день. Григорие рече: кто спасеся, солгав? Ответ: Петр рекий: не знаю человека того. Григорий рече: кто истину рек погыбе? Василие рече: Июда предавый Господа. рече бо: егоже бо аз лобжу. того имете. Григорий рече: кий человек полчетверта столпа постави на земли? Василие рече: Илия при Езавели 3 лета и 6 месяц не одожди. Григорий: кто праведен сый не глагола 9 месяц и 8 день? Ответ: Захария видев видение. Григорие: коего праведнаго (ради) град спасеся от смерти? Василие: Сигор град. и Лот егда избеже из Содома и спасеся в Сигор. Григорие рече: кто несть рожен от человек и кто несть умер? Василие: Адам не рожен. и Илия не умер. Григорий: кто двократы смерть вкуси? Василие: Лазарь. Григорие: кто смерти не вкуш смерти бегая? Василие: Илия Иезавели. Григорие: где студено и тепло смесистеся? Василие: в Содоме и Гоморе град и углие горяще. Григорие: кое художство первое? Василий рече: шев⁶¹⁰. егда Адам сши листвие смоковно. Григорий: чий глас сниде от востока до запада? Василий: егда Евва роди Каина. Вопрос: когда четвертая часть мира умре? Ответ: егдаже уби Каин Авеля. Вопрос: колико пребы Адам в раи? Ответ: от шестаго часа до девятаго. Вопрос: кто не рожден умре? Ответ: Адам. Вопрос: кто по рождестве состаревся паки во чрево матерне влезе? Ответ: Адам от земля взят бысть и паки в землю пойде. Вопрос: коликолетен бе Ной егда потоп бысть? Ответ: 600. Вопрос: кто от пророк жив погребен бысть и телом хождаше и мертв спасашеся и пояше? Ответ: Иона во чреве китове. Вопрос: кто роди гиганы?⁶¹¹ Ответ: внук Хамов. Вопрос: кто не верова бысть телом сланом? Ответ: жена Лотова. Вопрос: когда ся радова весь мир? Ответ: егда Ной из ковчега изыде. Вопрос: колико лет работа Израиль во Египте? Ответ: 430 лет. Вопрос: на колико частей разделися море? Ответ: на 12 да кииждо род своим путем пройдет. Вопрос: колико тысущ проиде море? Ответ: 600 тысущ. Вопрос: колико лет сотвориша Израильте в пустыни? Ответ: 40. Вопрос: колико их пройде Иордан? Ответ: 400 тысущ. Вопрос: кто суть небеса исповедуют славу Божию? Ответ: 7 небес яже исповедуют славу Божию: 1. Сим. 2. Енос. 3. Енох. 4. Ной. 5. Авраам. 6. Исаак. 7. Ияков. Вопрос: где взем персть Бог созда человека? Ответ: в земли Мадиамсте. Вопрос: где ся всели излез из рая? Ответ: в земли Мадиамстеи. среди земля. Вопрос: когда Бог созда Адама и коего месяца? Ответ: Марта месяца в 25 а в час 6. Вопрос: кто первее Бога рече на земли? Ответ: Сатана. рече Евве: что ти Бог рече ясти? Вопрос: колико лет бе Сим егда потоп бысть? Ответи 100 лет. Вопрос: почто месяц держит 30 дний а четыре недели? Четыре ради стихии. 1я же неделя буки держит. 2я неделя он. 3я глагол. 4я ер. да составивше Бог ся рече. Вопрос: что есть единаго искаху а три обрет и егоже искаху не можаху обличити. но показа им мертвая девица? Ответ: пропяся Господь со двема разбойникома на трех крестех. да тыя три вземше погребоша в Голгофе. и пришедши святая Елена Господня и обретши на пути мертва положи оба и не явися ничесоже. и егда положи Господень воста мертвая девица. Вопрос: что есть 6 стояще. 2 глаголасте. 5 ся обличаше. 12 дивляхуся. Ответ: Господь обрет на студенцы Самаряныню. проси пити воды. час же стояше 6. а еже два глаголета Господь со женою. а еже пять ся обличаше. обличи ю Господь глаголя: добре рече яко мужа не имам. 5 бо муж имела еси, и ныне егоже имаши несть ти муж а 12 апостоли дивляхуся. Вопрос: кто есть един име много. а другий отнюдь не име ничтоже, даст же нищии боле богатому много. Ответ: нищии рече Иоанн, а богатый Христос. иде бо Христос ко Иоанну всяческими обладыи небесными и земными. и взят от Иоанна крещение. егоже не имеяше Иоанн. Вопрос: что есть пятое земля, 2 тмы морстии, 5, 12? Ответ: пятое земля 5 хлеб, яже благослови Бог. а еже два тме морстии 2 рыбы. а еже 5 муж. а еже 12. 12 коша избыток. Вопрос: откуду есть хризма. еюже помаза Мария нозе Господни? Ответ: егда же родися Господь от купания еже вземши баба вълия в сосуд и погребе в тои же пещере. да егда благоволи Бог по тридесяте летех и по трех в сокровенне месте явися святое и открыся. и исполнися место то от воня мирския. яко дивитися пастухом. и искавше его Мария обрете, неведуще что есть, да егда вниде Господь в дом Симона прокаженнаго. помаза нозе его от того. Вопрос: кая Мария помаза миром и слезами омочи? Ответ: сестра Лазарева и Марфина. Вопрос: колико родися муж на возвещению и жен? Ответ: 7. 1. Сим. 2. Енох. 3. Исаак. 4. Самсон. 5. Самуил. 6. Богородица. 7. Иоанн. Вопрос: колико есть естеств на небеси и на земли? Ответ: Бог и человек. Вопрос: что ся слышат ясли. идеже лежа Господь? Ответ: ясли убо людие, ихже ради сниде и повится верою. Вопрос: почто ся крести Господь от Иоанна Крестителя? Ответ: не да ли крещшуся Господу освятятся воды. прежде, до крешения святаго, крещение мертво беяше. да егда сниде живот всех. освяти Святым Духом. Вопрос: кто ся слышит, иже зауши Господа на предании? Ответ: разслабленый иже на овчии купели. имя ему Иереос. Вопрос: колико есть мироносиц жен? Ответ: 3. Вопрос: кия? Ответ: 1я Фариссова. 2 Лазарева. 3 блудница, яже на вечере помаза Господа миром. И другия бо помазати идут и не обрет. уже бо бе воскресл. всегда и ныне и присно и во веки веком. Аминь.

(Из сборника Солов. библ. № 889, стр. 170 на об. – 172 на об.)

Премудрость царя Соломона сына Давидова. В. Что есть премудрость? О. Христос. В. Премудрость созда себе храм? О. Премудрость Христос, а храм Богородица. В. Муж мудр безмолвие водит? О. Всяк глаголати умеет, а не всяк разумеет. В. Иго мое благо, а бремя мое легко есть? О. Иго крещение, а бремя – покаяние. В. Что есть 12 супруг волов, и сеятели 4, 150 жателей, угобзися нива и сотвори три кобли? О. Супруг волов 12 апостолов, а сеятели 4 евангелиста, а нива Богородица, а 150 жателей 150 псалмов псалтыри: а три кобли Троица – Отец, Сын и Дух. В. Что есть котел, и коваше на нем 12 ковачей, друг друга не чуяше? О. Котел год, а ковачи 12 месяцев в году, друг друга грома не чуют. В. Что есть горы высокия еленем? О. Горы высокия пустыни, а елени чертоги, в них спасаются пустынницы. В. Что есть камень прибежище заяцем? О. Камень – церкви, а зайцы християне, иже прибегают в церковь Божию от враг. В. Кто преже всех на земли Бога в Троицы проповеда? О. Егда сотвори Бог Адама и вложи в него душу и посади его на престоле, и рече Бог: благослови, владыко! И воста Адам от престола и рече: благословенно царство Отца Сына и Святаго Духа, ныне и присно: Троицу проповеда. В. Кто клятца и клятвы не преступи, а мучитца до ныне! О. Клятца Ирод Иродиаде, отсече главу крестителю, и доныне мучим есть, а Июда так же жидом клятца, и не преступи о Христове преданьи, и тоже мучится и доныне. В. Что есть скимни рыкающе восхитити и просити от Бога пищу себе? О. скимни пророцы, рыкающе радуются, егда их хотяше Христос из ада извести и дати им пищу, райское наслаждение и пищу. В. Возсия солнце и собрашася? О. Солнце Христос, егда воскрес из мертвых, и собрашася апостоли, о воскресении его радующеся, став Иисус посреде их и рече им: мир вам. В. Изыдет человек на дело свое и на делание свое до вечера? О. Человек есть Христос, сниде на землю научити люди своя закону своему и праведники извести из ада и дати обетования, а на делание свое до вечера, то паки вознесся на небо к Отцу своему совершити хотение свое. В. Се море велико и пространно. ту гади, имже несть числа, животная малая с великими? Море весь мир, а гады погании язы́цы, а животная все человецы на земле живи, а малая с великими правовернии и маловернии. В. Ту корабли преплывают, змий сей, его же созда ругатися ему? О. Корабли апостоли, ходяху по земли, проповедаху Христову веру, а змий враг ненавидит добра роду человеческому, научает на зло люди и не веровати Христовы веры и мучит злым человеком хрестьян. В. Котораго зверя не было с Ноем в ковчеге? Рыб не было. В. Кто дважды смерть вкуси? О. Лазарь праведный, друг Христов. В. Кто не родися, умре, и кто родився, не умер и кто умер и не истле? О. Адам нерожен умре, а Илия родився не умре, а Лотова жена, из Содома идучи от погубления, стала каменем и доныне. В. Кто от апостол погребен, а ходит жив? О. Иван Богослов. В. Кто состаревся, опять в чрево матерне вниде? О. Адам от земли создан, и паки вниде в ню. В. Кая мати дети своя сосет? О. Море из рек воду в себе емлет. В. Кто поставив полчетвертаста столпа на земли? О. Илия не одожди земли три лета и 6 месяц. В. Кое первое художество на земли бысть? О. Швечество; Адам и Евва иже сошиста себе одеяние из листвия смоковнаго. В. Приде богатый к нищему много у себя всего имеяше, а единого у себя неимеяше, и нищий отдал ему, чего у него не было. О. Прииде Господь ко Ивану, все имеяше, единого крещения не име, и он ему и подал. В. Что киот и что Левгит? О. Киот новый завет и закон, а левгит ветхий закон и пророцы иереи и архиереи. В. Небо бяше, а земли не бяше, а град в то время бысть? О. Небо бысть, а земля не бысть в Ноев потоп. Под водою земля в то время не бысть, а град был Ноев ковчег. В. Что есть шесть стояше, а два глаголали, пять обличаста, 12 дивляхуся? О. Шесть стояху в 6 часу Христос с Самарянынею женою беседоваше на кладезе, то есть два глаголаше, а пять обличиста, пять бо мужи имеху сия, 12 дивлятся то 12 апостолов. В. Кто глубоку воду Господу принес и убрус неткан? Блудница принесе слезы, а убрус неткан власы главы своея. В. Что есть пять от земли, две от моря, 5 от мира, 12 от (пяти) земных? О. Иже от земли то есть пять хлебов, а от моря то суть две рыбы, а от мира пять тысящ мужей, их же Господь напитал от пяти хлебов и двух рыб, а 12 кош от земных, то суть 12и кош избытков. В. Сыну, пии воды от своих студенец и источник, да непроливаются твои воды во иныи источники? Не твори блуда с чужими женами, да твоя со инеми не блудит. В. Видех жену стоящу на мори и змию, лежащу при ногу ея: егда хотяше жена дети раждати, и змия пожираше я? О. Море есть весь мир, жена церковь Божия, а змия дьявол, а дети правовернии людие. Егда хотят вернии люди поститися и спасатися и приходят к церкви, дьявол же возбраняет им всеми своими кознями и украдает их от Бога. В. Яко вода покры море? О. Море мир, а вода учение книжное. В. Будет в лузе отрада овцам? О. Луг есть рай, а отрада райская пища, а овцы вернии, иже работают Богу, а не жертве. В. От коликих частей сотворен бысть Адам? О. От седьми частей: первое от земли тело, второе от моря утроба, третье от солнца очи, четвертое от камени кости, пятое от облака мысли, шестое от огня теплота, седьмое от ветра дыхание, осьмое дух сам Господь вдохнул. В. Где студено с теплом снятца? О. В Содоме и Гоморре град и углие горячее. В. Сколько Адам пребысть в раю? О. От шестаго часу до девятаго; столько и Христос на кресте был. В. Колику долготу имяше Ноев ковчег? О. Триста локоть, а в высоту 150, а в ширину 50 локоть. В. Престол его на землю поверже, умалил еси дни времени его, облиял еси студом? О. Егда будет антихристово царство три лета. а три лета, как три месяца, а три месяца, как три недели, а три недели, как три дня, а три дня как три часа, и повержен будет со студом. В. Тогда возложат на алтарь твой тельцы? О. Егда убиет сатана Илию и Еноха на жертвеннице. В. Окропиши мя иссопом, очищуся, омыеши меня, и паче снега убелюся? О. Когда возгорится земля тысящу локоть в глубину, не будет гор, сошлет Бог четыре ветра, Восток, Запад, Юг и Север, и развеют всю скверну от земли, и будет земля чиста, аки девица нескверная, бела, аки снег, и возопиет ко Господу глаголюще: девою есми пред тобою, Господи, несть уже на мне греха. В. Воззваша ко Господу, и не бе спасаяй их, и не услыша их Бог? О. Егда жидове со антихристом и с бесы своими пойдут во тьму кромешнюю, тогда возопиют ко Господу, а Господь их не услышит и не помилует их. Гадатель: некто родися наг, без отца и без матери, нестыдящи пеленами не повит, пищею не питаем, солнце нань не возсияет, скоро погибает и паки возростает, и возрасту его радуетца весь мир. Аще творишися мудр, повежди ми сия гадательно. В. Стоит древо злато, а на нем листвие златое, а под тем древом лахань, и прилетает голубь и листвие щиплет и мечет в лохань. Лохань не полна, а листвие не убывает? О. Древо вселенная, а листвие люди на земли, а голубь смерть, а лохань земля. Людей в землю кладут, людей в земли не прибудет, а людей на земле не убудет. В. Гроб ходяше, а мертвец в нем пояше? О. Гроб кит, а мертвец Иона в ките. В. Что есть древян ключ, водян замок, заец ушел, а ловец потонул. О. Заец Моисей, а ловец царь Фараон. В. Секира неугодное древо сечет и во огонь вечный вметает? О. Секира смерть, а неугодное древо грешный человек. В. что есть: от земля не взят, от матери не рожен, и от отца не посеян, а человек бысть? О. Имя человеку. В. Истина от земля возсия, и правда с небесе приниче? О. Богородица от земных родися, Христос приниче в нее с небеси. В. Что есть не рожен умре, а рожен не умре? О. Адам не рожен умре, а Илия рожен не умре В. Что есть: два стоят, а два минуются? О. Небо и земля стоят, а луна и солнце идут и минуются. В. Что есть: стоит град между небом и землею, а идет к тому граду посол нем, а несет грамоту неписаную, и весьма возрадуются посольству его? О. Град есть Ноев ковчег, как на воде плавал, а посол к нему голубь, а грамота неписаная листвие масличное, и принес голубь листвие к Ною в ковчег, потому познал Ной сушу земли, и вси в ковчеге возрадовались. В. Который пророк не рожен Господа видел? О. Исаия пророк взят бысть на облака и ту виде Господа и ста поклонися ему, и паки вложен бысть в утробу матерню. В. Который пророк дланию седмь небес покры? О. Егда Иван предтеча Господа крести на Иордане, тогда бысть длань Иванова выше главы Господни, а Господь выше седьми небес. В. Что есть: бел щит, а на беле щите бел заяц; и прилетел орел, и взял зайца и отнес на небо, и ста на том месте сова? О. Бел щит свет, а заяц правда на земли, и отъиде правда на небо, а сова на земли остася кривда. В. Кому Господь посла с небес первую грамоту? Сифу, сыну Адамову. В. Кто солга спасеся, а кто истину рек погибе? О. Петр апостол солга спасеся, а Иуда истинну рек жидом погибе. В. Которые два супостата борютца? Живот со смертию или день с нощию. В. Что есть земная ширина, небесная высота и морская глубина? Отец и Сын и Св. Дух. В. Когда четвертая часть миру погибе? О. Егда Каин уби Авеля. В. Когда возрадовался весь мир? О. Когда Ной изыде из ковчега на сушу, тогда вси возрадовались. В. Кто две смерти вкуси? О. Лазарь. В. Чей глас изыде во весь мир на вселенней? О. Каинов; егда Господь его прокля за убийство брата его, а Каин возстонал в слух отцу своему и матери, а в то время всего и было трое, потому глас его изыде во весь мир. В. Что есть, видеша татя течаша с ним? О. Егда Иуда преда Господа, Иудеи течаху с ним. В. Что есть, еже в писании речеся: егда опустеет земля, и царь изнеможет, и сильнии его разыдутся, того ради разрушатся камени и городи, и источники изсякнут, и ветри не возвеют, и пути великие опустеют, и престанут жерновы мелющия, и море великое умертвится, и многолиственная древа падут и опустеют плодовитая и рабы и рабыни от глада изнемогут, тогда царица изыдет от престола своего, аки твердо заклепаная голубица излетит от гнезда своего? О. Земля опустеет человек умирает, царь изнеможет ум человеческий, сильнии разыдутся помыслы человечьи, разрушатся камени и городи кости человечьи, источницы изсякнут слезы из очей не пойдут, ветри не возвеют дыхание, пути велиции опустеют гортань, престанут жерновы мелющие зубы, море великое умертвится утроба, многолиственная древа падут язык, опустеют плодовитая уста, рабы и рабыни от глада изнемогут руце и нозе, царица изыдет душа из человека. В. Который человек потрижды на день умирает? О. Когда Господь разслабленнаго изцелил, и тот разслабленный по исцеленьи на распятии Господа по ланите ударил, и за то ему дал Господь муку, по трижды велел его на день зверю снедати, и зверь его снедает, и он опять оживет, и он на день оживает трижды, а зверь его снедает трижды. В. Кто первый пророк на земли? О. Адам, как уснул в раю и видел во сне Христа распята на кресте, а Петра Апостола распята стремглав, а Павла усекнута от Нерона. В. Кая тварь у Бога прежде небес сотворена бысть? О. Ангели. В. Единаго искахом, три обретохом, егоже позна мертвая девица? О. Когда царица Елена во Иерусалиме искала креста Господня и нашла три креста, Христов да разбойничи, и не ведает, который крест Христов, и клали по единому кресту на мертвую девицу, и от разбойничих не бысть ничего, и положением креста Христова воскресе мертвая девица. В. Кои две души на земли сотворены бысть? О. Море и суша. В. Кто преже Адама на земли человек бысть? О. Тот же Адам, доколе ему недано бысть имя Адамом.

(Из Хронографа Соловецкой библиотеки XVI в., № 51)⁶¹³

О родословии святыя Богородица. От колена Нафанова сына Давидова. Матфан иерей от Вифлеома роди Левию. Левиа же роди Мелхиа и Памфира. Мелхиа взем жену умре безчадна жена. Памфир роди Иоакима отца святыя Богородица. От колена Соломона сына Давидова родися Матфан. Сей роди Иакова и умре. и поя жену его Мелхиа брат Панфиров. и роди Илию. И бысть Илиа брат Иакову по матери, беху же по отце Мелхии от колена Нафанова. Иаков по отце Матфане. от колена Соломона. Илия же умре безчаден. и поят жену его Иаков, и роди Иосифа обручника. И бысть Иосиф естественыи сын Иакову. а по закону Илиин. Сего ради Матфей его нарече сына Иаковля. а Лука Илиина. Бысть же Иоаким Илии брат двоюродныи. а Богородица Иосиф обручник вторая брату чада. Паки Авиа архиерей роди Иоддая, его же нарицаху Варахию. Сей роди Аггеа и Захарию. И тии священници. Аггей же, брат Захариин, роди дщерь именем Саломию, и взят ю Иосиф преже обручениа Богородица, и роди и нея четыре сыны, Иакова, Симона иже и Симион. Июду. Иосию и три дщери. Есьфирь, и Марфу, и Саломию. иже бе жена Зеведеова мати Иоанну и Иакову. Иосиф же сый лет 70 умерши жене его. ину не поят. но пребываше во вдовстве. Сице убо обретается род по отци Богородици. По матери же паки Матфан иерей о Вифлеома. роди дщери три Марию. Совию. Анну. Мариа роди Саломию бабу. Совиа же роди и Елисавет, матерь Иоанна Крестителя. Анна же иде за Иоакима брата двоюроднаго. Илиина. Имяше же Иосиф обручник иного брата от Иакова. и единыя матери именем Клеопа и сестру Марию. Сего ради евангелисти нарицаху Марию сестру Пречистой. занеже Иосиф и Мариа двою брату чада с Пречистою. такоже и Клеопа. Марию же нарицают евангелисти Клеопову по брате ея Клеопе. Иаков же сын Иосифову име жену за две лете. и умерши ей. ину не поят. Иосии же и Симон и тии взяша жены. Июда же поят жену именем Марию. и роди о неа два сына. Иакова малого Иосию иже нарицахуся по имени дядь своих. Иакова. Иосию. Сию Марию жену Июды апостола нарицаху евангелисти. глаголюще Мариа Иакова малаго. Иосиина мати иже и воспита Господа с Пречистою Богородицею. Богородицу же нарицаху евангелисти Марию Иаковлю яко мащеху Иакову болшему. Мироносица же нарицают сию первую Марию. Иакова малаго, Иосиину матерь. жену Июды апостола. Вторая Магдалыни. Третиа Мариа Клеопина сестра Пречистой. по Иосифе обручнике и по Клеопи. Четвертая Лазарева. Пятая Саломия Зеведеова. Шестая Иоанна жена Хузаня. Анна же пребысть со Иоакимом, якоже прежде речено бысть, лет пятьдесят. и не сотвориша семене во Израили. И оскорбися зело Иоаким. В Иерусалиме же в празник обновления молящуся Иоакиму во святилищи. бысть ему глас с небесе: будет ти чадо. И отшедшу в гору, паки благовести ему ангел такоже: будет ти детищ, о немже прославишися. и Анне молящеся в овощнем ограде благовещение бысть от ангела.

О зачатии святыа Богородица. Святаа же Анна зачат от смешения мужеска святую Богородицу декабря в 9. Исполньшимся 9 месяц. в лето 5486-е. 22-е лето кесаря Августа. индикта в 1. сентября в 8 роди святую Богородицу. и нарече имя ей Марию по имени сестры своеа. и егда бысть трех лет поставиша ю пред Господем с дары. И прият ея Варахиа архиерей отец Захариин. Егда же бысть 7 лет. вдаша ю в дар Богови. И прием ея Захариа архиерей. и внесе во святаа святых, и бе тамо питаема ангелом. И по мале преставися отец еа. сый летом осмьдесятем. Анна же прииде в Иерусалим, и по двою лету преставися. сый летом 79. Пречистая же осиревши от родителей, пребываше всегда в церкви. И егда бысть 12 лет, молящися ей пред жертвеником, неизреченный свет восиа. и глас прииде от святилища. родиши Сына Моего. Она же никому не поведа тайны. И в четвертоенадесят лето возраста еа. Захариа архиерей взем 12 жезла, по числу дванадесяте мужей. от 12 колен Израилев. положи в жертвенице и помолися. И процвете жезл Иосифа древоделя. брату чада двоюроднаго Иоакима отца Богородици. Бе же Иосиф тогда семидесят лет. Архиерей же вдаша ему Богородицу не на брак, но в сохранение непорочнаго девства. Пречистыя же Богородица девство бысть не по воздержанию, якоже прочим человеком. но от естества и нашествием Святаго Духа. еже есть странно человеческаго естества. яко же мнози от святых свидетелствуют о ней.

О зачатии Предтечеве. В то время по благовещению Гаврилову. сентября в 23 зачат Елисавет жена Захариина Иоанна. Предтечу. а Захариа невериа ради умолче.

О благовещении святей Богородици. В лето 5499 в 37-е лето кесаря Августа. в шестый месяц от зачатиа Предтечева. еже есть марта в 25 в день неделный. в час 9 молящися святей Богородици предста ей архангел Гавриил, и рече: радуйся обрадованная, Господь с тобою! се зачнеши и родиши сына и наречеши имя ему Иисус! Она же рече: како будет ми се. идеже мужа не знаю. сиречь не желаю. и несть во мне желаниа мужеска. и не вдана мужу на съвокупление. но старцу в сохранение непорочнаго девства. Рече же ей ангел: не по естеству будет тебе рождение, но Дух Святый найдет на тя и сила вышняго осенит тя. И исповеда ей вся тайны о Сыне Божии и отойде. И паки Иосифу сумнящуся о ней. явися ему ангел и рече. не убоися приати еа. не по естеству бо. но от Духа Святаго есть зачатое. И приат ю и не знаяше еа. сиречь не разуме тайны Божиа о ней, ни сокровенныя глубины. дóндеже роди Господа. и тогда от чудес разуме Божиа тайны. и от ангел известися.

О рождестве Предтечеве. Скончавшимся девятим месяцем от 23-го сентября. родися Господень Предтеча. июня в 24. и разреши отцу безгласие. И егда устрабися⁶¹⁴ бысть в пустыни до дне явлениа своего ко Израилю.

О рождестве Христове. Родившужеся Господню Предтечи. соприсносущное Отцу и мирозиждителное Слово. уже три месяци во утробе чистыя и нетленныа отроковица плоть примеси себе от тоа кровей. и от 25-го марта скончавшимся девятим месяцем до 25-го декабря в лето 5 и пятсотное в лето 42-е кесаря Августа, декабря в 25 в 7 часе нощи. родися Господь наш Иисус Христос, от пречистыя Деве. и бысть съвершен Бог и съвершен человек. сего ради и Богородица наречеся родившая его. иже и по рождестве пребысть Дева. якоже пишет о ней Иаков жидовин в слове⁶¹⁵, емуже начало. в лето написаниа, егда послан от Августа Киринеина писати всю вселенную в лето написаниа. яко Иаков брат Божий сие слово написа яко он тогда бе ведый осля на немже Богородица грядяше со Иосифом. в Вифлеом написатися. И исполньшимса днем родити. не обретоша храмины. но в убозе вертепе роди Господа нашего Иисуса Христа. и повит его положи в яслех скотиах творца всех. Иаков же бе с отцем Иосифом тогда послужи таинству. и елико виде чудеса, написа в том слове. И сие пишет яко осязана бысть Пречистая от бабы и обретеся и по рождестве паки Дева. И ина прочее о ней, бе же Саломиа баба тетка святей Богородици. иже пови Господа нашего Иисуса Христа. И в осмый день обрезаша Господа. и нарекоша имя ему Иисус. еже есть Спас. И возвратишася в Назарет. И скончавшимся 40 днем представиша и Господеви с дары. И прият его на руку Симион старец.

О пришествии волхвов. В лето 5502-е приидоша от Персиды волсви поклонитися Господу, и принесоша ему дары. ливан, яко Богу. злато яко царю. змирну яко умрети хотящу. и от ангела весть приимше. инем путем отоидоша во страну свою. Ирод же избивает младенца во Вифлеоме. и во всех пределех его. 14 тысящ по двою лету и нижаиши. Искаше же Иоанна убити. и вопросиша Захарию, где есть сын твой и рече не вем, и повеле Захарию убити межу алтарема и церковию. Инии же глаголют, яко сего ради убиен бысть. яко пречистую Девицу и по рождестве сведетельствова деву сущу. и постави в месте, идеже бе преже рожества, яко девицу. И по отшествии волхвов приим от ангела весть Иосиф и бежа во Египет, с Господем и Богородицею с сынми и дщерми своими. И падоша идоли их. Иереи же помолившеся Господу. да церкви их не падет. и повелеша написати образ Спасов. и не возмогоша. дóндеже Спас надклонися на ню и абие вообразися образ его. И пребысть Иосиф в Египте 5 лет. и по сошествии волхвов пребысть Ирод 3 лета и умре. Остави 3 сыны. Архелая постави царя и пребысть 9 лет и умре. Антипу же Ирода и Филиппа брата его постави тетрархи. И по умертвии Иродове Иосиф весть приим. остави Египет и пришед вселися в Назарет. Август же кесарь царствова 56 лет. а по вочеловечении Господни 15 лет. а жит всех 86 и умре в Риме.

О крещении Господни. Иоанна Предтечи. о житиа его⁶¹⁶. В лето пяттысящное и пятсотное, и тридесятое. в 15 Тивириа кесаря прииде Гавриил архангел ко Иоанну сыну Захариину в пустыни. и рече к нему: тако глаголет Господь, создавый тя и избравый тя от чрева матери твоеа. поиди в жителнаа места и крещай вся приходящая к покаянию. и се Аз послю Сына Моего единороднаго. Той приидет и крестится от тебе. и воды освятит и всех крещающихся. над негоже узриши Дух Божий, сходящ в видении голубине, и пребывающ на нем, Той есть Сын Божий Мой возлюбленый. судиа живым и мертвым. избавляя верныя от всякого гнева. Сиа слышав Господень Предтеча Иоанн прииде в Иерусалим. и приходяще июдеи крещахуся от него, исповедающе грехи своя.

От списания Иосифа⁶¹⁷. Бе же, рече, тогда некий муж хожаше во июдеох. в чудных одежах. прилепив власы скотинныя к телу своему. на немже месте не покрыто бе от влас его. а лицем бе яко дикий. Бысть же нрав его чуден и житие не человеческо. якоже дух безплотен. тако и сей пребываше. Уста его хлеба не познаша. ни па пасху не вкуси опреснока глаголя. яко на воспоминание Богу. избавльшему люди от работы вдана суть сиа ясти. вина же и сикера ни приближити к себе даяше. и всяка животна гнушашеся. Всяку же неправду обличаше, и на потребу ему быша древяныя цепки сиречь вершие дубное. Той пришед ко июдеом. учаше их на свободу глаголя, яко Бог мя посла, да покажу вам путь, имже избудете от многих властелин. и не будет на вы владеяй смертный. разве Вышняго пославшаго мя. И то слышавше людие ради быша. и иде по нем вся июдея. и яже окрест Иерусалима. И ничесоже иного не творяше им разве во иорданьстей струи погружаше и пущаше. наказывая их, да престанут от злых дел, и вдастся им царь избавляа их. и покоряа вся непокоривыя. сам же непокорен будет никомуже. Ови поругашася ему. ови же яша веру. И приведен ему бывшу ко Архелаеви. и собравшимся закономудрецем. вопросиша его. кто есть и где бысть доселе. Он же овещав рече им: человек есмь имже мяд введе Дух Божий в пустыню. и питахся тростием и корением и цепками древяными. Онем же претящим ему мукою, аще не престанет от тех глагол и дел. он же рече: вам подобает престати от своих скверных дел. и прилепитися Господу Богу своему. И встав с яростию Симон книжник, родом есеянин, рече ему: мы по вся дни чтем божественыя книги. а ты ныне вышед из дубравы яко зверь, то смееши учити нас. и народи прелщати непотребными глаголы своими. и устреми(ша)ся растерзати тело его. Он же укоряа их рече: не открыю вам сущую в вас таину. понеже не изволили того есте. тем приидет на вас погуба неизреченна. И сиа рек отоиде на ону страну Иордана. никому же смеющу возбранити ему. и тоже творяше, якоже и преже.

Разрешает сон Господень Предтеча Иоанн Ироду Филиппу⁶¹⁸. Ирод Филипп сый в своей власти сон виде, яко орел исторгну обе очи его. И созва вся мудреца своа. инем инако разсужающим сон. Муж он, егоже преже писах в зверских власех ходяща. и в иорданских струях люди очищающа. прииде к нему внезапу незван. и рече: слыши слово Господне. сон иже еси видел, орел есть твое лихоимание. яко бо та птица насилна и восхитница есть. и той грех изымет твои очи, яко есть власть твоя иже на твоя. И си ему рекшу до вечера и умре Филипп. а власть его дасться Агрипе.

Сие от житиа Предтечева. Бе же в днех онех царствуяй Июдеею Антипа Ирод нечестивый. Услышано бысть о Иоанне по всей Галилеи и Июдеи. и мнози прихожаху к нему. Собрашажеся к нему ученик 40 в нихже бе Андреа о Вивсаиды Иоанн Зеведеев. Ирод же живяше в Севастии. И посла пятидесятника на Иордан повеле привести Иоанна. Пятидесятник же пришед видев славу покрывающу лице его. не смея рещи ничтоже. Господень же Предтеча разумев. чего ради прииде. рече ему: иди рцы царю Ироду. яко несть время ныне предстати ми пред тобою. Приидут же дние, егда сам себе представлю пред лицем твоим. и нечестие твое и преступление закону обличу. яко недоволен еси таковыми злыми. но излияся лют на ложе брата своего хощеши взыти. и яко преступник Божий обрящешися. И шед пятидесятник сказа Ироду реченная. Слышав же Ирод удивися. и рек болшим своим: есть ли что могущее сокрытися от мужа сего пагубника. яко воспоминание помысла моего обличи ми. По тридесятех убо днех приходит Господь на Иордан. бе же тогда 30 лет возрастом. видев же его Иоанн грядуща. простер руце свои и одежду на землю рече к сущим с ним: се агнец Божий. и возбраняше ему глаголя. аз требую о тебе креститися. Он же рече: остави ныне. И крестився Иисус генваря в 6 в 7 часе нощи. Виде Господень Предтеча Дух Святый, сходящ яко голубь и пребывающ на нем.

Иосипово. По сих же Антипат Ирод. поят жену Филиппа брата своего. И сего ради вси законницы гнушахуся его. и не смеяху обличити его. Токмо же сей муж егоже нарицаху дикаго. прииде к нему с яростию и рече: понеже еси братню жену поял беззаконниче. яко твой брат умре безаконниче безмилостивною смертию. тако и ты поят будеши серпом, не премолкнет бо Божий промысл, но уморит тя печалми злыми во иных странах. понеже не семя воставляеши брату своему. но похоть плотскую исполняеши. и прелюбы сотворяеши четырем детем от него родившимся. Ирод же сиа слышав разгневася зело. и повеле биюще изгнати его. Он же непрестано, идеже обреташе Ирода, ту обличаше и пред всеми, дóндеже стужи вси. и повеле в оковех воврещи его в темницу.

От житиа Предтчева. Слышав же ученицы его. приидоша к нему в темницу плакахуся плачем велиим и крепким зело. и лобзав их всех. помолися о них. и поучив их отвращати лица от прелюбодейства. и блуда и зависти. и от сребролюбиа и гордости. и лжа. поминаите рече закон Моисеев. сиречь помните, яко сиа писана есть в законе Моисееве. сохраните по духу рече. сиречь духом совершаемыя добродетели потщитеся творити сиа. ум ваш вышняа до мудрствует и да молится. мысль ваша да вперяется к небесней доброте. светилницы ваши да горят выну. свеща ваша да светит присно. уста ваша да песнословят Бога непрестанно, любите враги ваша. зла в зло никому же не воздадите. всесожжениа ваша и жертвы да не возсмердят. но паче начала ваша добреишая приносите Богови. слово ваше да будет всегда солию разстворено. иже аще сиа вся сохраните чада, да будет благодать Господа нашего Иисуса Христа всегда с вами. жертву же и всесожжениа творити добрейши ми законною глаголет или Давидом реченную: жертва Богу дух сокрушен. Еще же духовная и безкровная жертва тогда не предана. Сиа рек и целовав их отпусти, плачущимся им зело. На утрие же, егда Ирод рожеству своему вечерю творяше, сиречь дню тому, в онже родися. и призва вся велможа своя 22. Иродияда же призвавши вся велможаты, и умоли их увещати Ирода о Иоанне Крестители. или престанет от обличения. или да усекновен будет. Ирод же умолен ими посла ко Иоанну. и обрете его паче обличающа. И бывшу пиру и егда упишася пришедши дщи тоя Иродияды, и плесавши и угоди Иродови. И клятся ей, аще попросит и до полцарствиа. она же научена материю проси главу Иоанна Крестителя. И послав царь спекулатора. и усекну его в темницы. и принесе главу его на блюде. и царь взем дасть ю девици, и девица дасть матери своей. Пришедше же ученици его взяша тело его и погребоша. Бе же тогда святый Иоанн. лет 31 и 2 месяца. пострада же августу 29. Иоанн же Зеведеев и Андреа. егда услышаша Иоанна последствоваша Христу. и реша учителю где живеши, и у него пребыста день той. Умершу же Зеведею, Иоанн продасть все имение свое и купи Сион. и потом половину его дасть Каияфе архиерею. Сего ради глаголет, яко ученик той бе знаем архиереови. А половину того сам держаше. Ту Христос и пасху с ученики соверши. и тайную вечерю предаст. Тамо и Богородица пребысть со Иоанном и до преставлениа. Бе же тогда Богородица 48 лет.

Сведетелство Иосипа Евреина. о Христе и о апостолех Его⁶¹⁹. Сей убо Иосип аще не сведетельствуется в писании. яко совершено приат веру Христову. но в писании похвален яко истинну писа о пленении Иерусалима. яко Христа ради и по прорчеству Христову. таковаа погибель бысть жидом. Сего ради и сам оставив Иерусалим к римляном и к Титу отоиде. Пишет же и Манеа с ним прииде к Титу. братанич Лазорев. егоже рече Иисус воскреси из мертвых уже изгнивша, и много писа о Христе не совершенною верою, но недумением, что слыша и виде со удивлением сице. В то время, рече, явися муж некий. Аще и мужем достоит его нарещи. и естество и образ его есть человеческии. зрак же его паче человека, а дела его божествена. и творяше чудеса дивна и силна. тем не мощно ми есть его нарещи человеком. Паки же на общее естество человече зря не нареку и ангелом. вся же творяше елико силою некоею невидемою творяше. Словом и повелением послушаху его. Ови о нем глаголют, яко законодавец наш первый воста от мертвых. и многа исцеления и хитрости показоваше. Ови же мняху, яко от Бога послан есть. Но противляшеся во мнозе закону. и суботу не храняше по отеческому обычаю. Но паки скверно ничтоже творяаше. Ни рукоделание. но токмо словом вся творяше и уготовляше. И мнози от народа последовааху по нем. и учению его внимаху. и многи душа подвигахуся мняще, яко тем свободятся колена июдейская от римских рук, обычаи же ему бысть пред градом в Елионьстей горе паче пребывати, ту же и целбы дароваше людем. И совокупишася к нему слуг 150 сиречь ученик, а от людей множество. Видяще же силу его. яко вся елико хощет, творит словом и глаголаху ему, да вшед в град избиет воя римския и Пилата, да царствует над ними. Но сей о том небрежаше. И последи бывши вести о том властителем жидовским. и собрашася со архиереом. и рекоша, яко мы немощни есмы и слаби противитися римляном. яко лук напряжен. да шедше возвестим Пилату сиа, яже слышахом. и бес печали будем. егда когда услышит от инех. имения лишени будем. и сами изсечени будем и дети расточени. И шедше возвестиша Пилату. Он же послав многи изби от народа. и оного чудодеицу приведе сиречь Христа Иисуса. И испытав о нем и разуме, яко добродеиц есть, а не злодей, ни мятежник. ниже царству желатель, и пусти и. жену бо его умирающу исцели. Он же шед на обычное место. и обычная дела делаше. И паки болшим людем совокупляющимся окрест его. и словяше своим творением паче всех. Завистию уязвишася законницы. и даша Пилату 30 талант. а един талант 500 рублев руских. да убиет его. и той взем дасть им волю, да сами свое хотение исполнят. Они же даша ученику его 30 сребреник. и по навожению его емше распяша чрез отечьскии закон.

От Исаи. Великий бо Исайа пишет о страсти Спасове. яко овча на заколение ведеся. и яко агнец прямо стригущему его безгласен. в смирении суд его взятся. род же его кто исповесть. яко вземлется от земля живот его. И паки Захариа пророк о предании рече: поставиша цену мою 30 сребреник. и паки возрят нань. егоже прободоша.

О распятии Христове. Распят же бысть Господь. в лето 5533 марта в 30 в пяток в 6 часе дни. От того же часа до 9-го тма бысть по всей земли. о неиже глаголет Захариа пророк. в день он не будет света. и день он познан Господеви. и ни день ни нощь, к вечеру будет свет. Распят же бысть Господь нашь Иисус Христос индикта в 3. Бе же тогда фасха жидом в 31 марта, в суботу. есть же Голгофа место, идеже распятся Господь. камень кругол высок. иже нарицается Голгофа. Исподи же под распятием, идеже есть глава Адамля. то нарицается краниево место, еже есть лобное. Егда же распяша Его воины, разделиша ризы Его, и о нешвенои одежи Его меташа жребиа. Егда же предаст Господь дух в руце Отчи. тогда земля потрясеся. и камение распадеся. Тогда и той камень еже есть Голгофа разседеся. И един от воин копием ребра Ему прободе, и абие изыде кровь и вода разселиною тою на главу Адамлю. и омы грех праотца Адама и всего рода человеча. И гроби отверзошася. и многа телеса усопших святых восташа. Якоже пишет во евангелии. такоже и Никодим пишет о смерти Спасове в слове емуже надписание. деяние святыя Троица⁶²⁰ в том глаголет. И Семионовы Богоприимца два сына восташа. Карин. и Лицеош⁶²¹ и возвестиша сотвореная Xристом во аде⁶²² и инии мнозии. И завеса церковная раздрася. о неиже пишет Иосип Евреин сице.

О катапетазме Иосипа Евреина⁶²³. Внутрь же церкви быша двери от сухаго злата 55 лакот в высоту. а в ширину 16. Пред теми же висяше катапетазма сиречь завеса. равна дверем широтою и высотою. яже бе паволока вавилонская. устроена уакинфом и виссом, и коком. и порфиром чудно видением. Премудростию же устроено прообразоваше бо кок огнь. а висс землю. уакинф аер, а порфир море. Сии убо подобни образом тем стихиям. Написано же бе на той катапетазме всяко небесное движение и мудрость. разве двунадесяте пояс небесным. Сия же катапетазма пред сим родом бысть цела. зане благочестиви быша людие. Ныне же жалостно бысть зрети на ню. раздрабося внезаапу о верха и до долу. егда добродеица мужа, и не мужа делом. предаша на убиение мздою. И многа ина знамениа кажут быша тогда, егда того убиша.

О воскресении тогоже⁶²⁴. И по погребении необретаема во гробе глаголаху. Ови же бо свидетельствоваху воставша Его. ови же украдена своими ученики. ови же рекоша, яко не мощно есть украсти Его. понеже окрест гроба Его поставиша стража, тысяща римлян. а 1000 июдеи. Не вем же, котории праве глаголют. Встати бо мертвыи собою не может, аще не молитвою иного праведника поспешаем. Разве аще ангел будет или ин от небесных сил. или сам Бог явится яко человек. и сотворит, елико хощет и ходит с людми. и падет и ляжет и востанет, яко ему воля. Сие пишет Иосип Евреин. слыша чудеса Спаса нашего с удивлением глаголет. Веру же истинну не потщася стяжати. яко поистинне Бог явися во плоти и пожит со человеки. и сотвори преславная, и пострада, и в гробе положися, и воста третии день своею волею. Пишеть же той же Иосип, яко титла иже написа Пилат и постави на кресте по распятии, поставиша в церкви. В втореи рече церкви в неиже стояху столпи равни. и на них титлы грамотами еллинскими сиречь греческими и римскими и жидовскими. проповедающеся закон чистоте. И над теми титлами четвертая титла висяше, теми же грамотами показуя Иисуса царя нецарствовавша распятаго от людей. зане проповедаше разорение града. и опустение церкви. Сиа писах, яко и те сами жидове проповедают и удивляютса, чудеса страсти и воскресение Спаса нашего. обратити же ся и приати истинную веру не могут.

О воскресении Господни. Воскресе Господь наш Иисус Христос в 3 день в 7 час нощи. свитающу дню неделному. в 1 апреля. и явися апостолом и инем святым многим. И дверем затвореном ста посреди ученик своих и по 8 дний явися такоже и Фому увери являяся им деньми 40. И вознесеся на небеса майа в 10 день. в четверг... в 9 час дни. святым апостолам зрящим и множеству народа. И святии ангели сташа посреде их глаголюще: мужие галилейстии, что стоите зряще на небо и прочаа. И по 10 дний мая в 20 в день 50-ный. в неделю в 3 час дни сущим апостолом в святом Сионе посла Святый Дух на них в огненых языцех, и начаша глаголати всеми языки. Написа же Пилат к Тивирию кесарю, яко распят бысть Иисус глаголемый Христос от июдей. и воскресе в 3 день. и ученици Его чудеса содевают велиа именем Его. Кесарь же слышав дивися. Уведев же кесарь, яко Ирод Антипа советен бысть на смерть Христову. и Иоанна Крестителя безаконнаго ради прелюбодеяниа усекну. послав приведе его в Рим связана со Иродиадою и отъем имение их. а самех же посла в заточение во Испанию. и ту живот свой зле скончаша. Плясавшую же отроковицу земля пожре живу. К сему Тивирию тече в Рим Мария Магдалыни вопиющи на вставшая на Христа на Пилата. и на архиереа и Каиафу ихже Тивирии зле умучи. Пилату же ото многиа нужа самому себе заклати⁶²⁵. И умре царь Тивирии своею смертию. в полате сый лет 70. Царствова лет 23. по вознесении Христове царствова 5 лет. уби же Логгина сотника со двема воины сей кесарь, по оклеветанию Пилатову и жидовскому.

Иосипа Евреина о апостолех⁶²⁶. Паки Клавдие своя властеля послав ко всем царствием и в Июдею. аще кто от законнаго словеси оступаше. то мучаще и прогоняху. или кесареви посылаху. И многим явившимся слугам сиречь апостолом прежеписаннаго оного чудотворца, сиречь, Христа Иисуса. и глаголюще о своем наставницы, яко жив есть, аще и умре. и той свободит вы от работы. и мнози от народа глаголемых послушаша и повелению их внимаху. не славы их ради. быша бо от худых. ови прямшевци. ови же калижницы и рыболовцы. и рукоделницы. но дивна знамения творяху. в истинну яже хотяху. Сиа же благороднии строители видяще возвращение людское. подумаша с книгчиами яти их и убити. да не малое немало будет. егда великим совершится. Но устыдешася и устрашишася знамениа глаголюще. яко чародеянием толика чудеса не бывают, аще не от Божиа Промысла суть, то скоро ся обличат. и вдаша им власть, да по воли ходят. Потом же стужиша си о них. распустиша я ови к кесареви. ови же в Антиохию. овех же по далным странам. на испытание вещи. В 18 лето по вознесении Господни. в 9-е лето царства Клавдиева. в праздник пятдесятный в Иерусалиме. слышаша глас глаголющь от внутреняго олтаря. еже есть Святаа святых. отходим отсюду. Сие трижды возгласи. И оттоле нача потребление бывати Иуюдеом.

О преставлении Богородица. При сего царствии в 30-е лето. преставися святая Богородица жит лет 72. Снидоша же ся вси апостоли на облацех. елици и преставишася. и с пением положиша ю во гробе. Фома же един по Божию смотрению оста. и по трех днех прииде имый пояс Пресвятыя Богородица. Егда, рече, восхищен бых на облацех. и видех святую Богородицу грядущу в врата небесная со множеством ангел. И даст ми пояс свой. и целовавше пояс и шедше отверзоша гроб, еже поклонитися Фоме. и не обретоша телеси еа, токмо погребалная.

О воздвижении хлеба. По страшнем же воскресении Господни. егда начинаху апостоли ясти хлеб. оставляаху праздно место Господне. И вземше из хлеба часть Христову положше на скрижаль и поставляху на месте. и по востании благодаряще воздвизаху хлеб. до вознесениа глаголаху. Христос воскресе 3-жды. Потом же во все лето глаголаху велико имя Святыя Троица: Господи Иисусе Христе помогай нам. Сиа глаголаху и до успениа Богородица. По успении же Богородица егда воздвигоша хлеб. глаголюще велико имя в той час, оле преславному чудеси, видеша Богородицу внезаапу на облаце носиму со множеством ангел. И возопи к ним, радуитеся, яко с вами есмь вся дни живота вашего, сий дар от Сына и Бога своего приах. Они же видевше и вместо: Господи Иисусе Христе, возопиша: Пресвятая Богородице помогай нам. и уверишася, яко и по смерти жива есть и воскресе из гроба яко же и Господь Иисус Христос. Иоанн же Богослов пребысть с Пречистою до успениа ея 20 лет. И по успении ея прииде в Ефес 50 лет и 7 месяц. и пребысть в Ефесе 10 лет. И по успении Богородици паки апостоли разыдошася по странам. идеже им поручено бысть.