Житие князя Михаила Ярославича Тверского, написанное архимандритом Желтикова монастыря Макарием (Петровичем)

Подготовка текста и комментарии С.А. Семячко

Печатано в Московской синодальной типографии 1791 года.

1. Якоже плавающий по морю корабленник, аще и случится ему впасти в зельная обуревания и опасная места, обаче⁷³ представляя себе других, иже от мореплавания великия получили корысти и богатства, надеждою ободряется и стремительно против неудобств ополчается, тако и нам подобает творити, о любопразднственнии слышателие. Донележе бо есмы в теле, дотоле всех злостраданий, бедствий и печалей, приключающихся нам, неудобно есть избежати; обаче взирающе на мужественныя подвиги святых, иже, доброму последующе предводителю Христу, содеяша правду на земли и достигше к желаемому пристанищу, получиша обещанный им от Бога вечныя славы неувядаемый венец, ополчаемся крепко противу всех врагов и побеждаем о Христе. Блаженный Павел, аще и начисляет беды, яже горестную творят жизнь, обаче присовокупляет, яко за то соблюдается венец жизни.⁷⁴ Что убо не предпочтим ли краткой суете житейской целое небо? Аще навыкнути желаеши, чего ради, по преждеписанному, Бог руководствует святых к Небесному Царствию, то слыши Спасителя, глаголющаго, яко нужно есть Царствие и тесный путь к нему предлежит.⁷⁵ И яко злато в горниле, искушает огнем страданий любящих его благоутробный Владыка, да тем всему миру изъявит мужественное в святости постоянство их, да даст нам незыблемый христоподражания пример. И да пожившии зде свято вящшее за понесенный крест восприимут воздаяние в будущей жизни, якоже блаженный Павел в послании к евреом учит⁷⁶ и якоже сей доблественный страдалец благоверный великий князь Михаил Ярославич доказал то своим примером, о немже предлежит нам настоящее слово.

2. Егда святый благоверный великий князь Александр Ярославич Невский по четвертом хождении в Орду к Беркалю,⁷⁷ татарскому царю, на возвратном пути во граде Городце, облекшися в иноческий чин и схиму, преставися к Богу,⁷⁸ тогда общим согласмем возведен бысть по нем на великое княжение Ярослав Ярославич, князь Тферский, яко старейший брат святаго, в лето от спасительнаго промысла 1264.⁷⁹ Бысть убо сей двадесять первый великий князь по счислению лет от святаго Владимира,⁸⁰ по степени же родства седмый,⁸¹ ибо Ярослав родися от Всеволода Георгиевича Долгорукаго, иже произыде от Владимира Мономаха, сына Всеволода Ярославича, емуже в лето 981 даде начало святый равноапостольный великий князь Владимир Святославич, внук Игоря Рюриковича,⁸² российскаго князя из варягов.

3. ⁴⁶Сей благоверный князь Ярослав Ярославич до возшествия на великое княжение, юн еще сый, обычай имеяше в та времена, иже избыточествоваху ему от общенародных дел, увеселятися ловитвою зверей. Случися же ему за ловитвою отлучитися от града вниз по Волге реке яко на 40 поприщ и обнощевати недалече от веси⁸³, нарнцаемыя Едимоново село. Бяше же в той веси у церковнопричетника именем Афанасия дщерь Ксения зело красна, премудра же и благочестива, юже⁸⁴ некнй княжеский отрок, зовомый Григорий, хотя в супружество пояти, приде тамо. Егда убо усну благоверный князь, видит во сне некое странное вндение, еже не возможе тогда разумети, разуме же от исполнения. Потом же видит и вышереченная девица Ксения подобное вндение и, Богу ей открывающу, уразуме ясно, яко имеет ю⁸⁵ пояти в супружество князь и яко имеет некогда быти великою княгинею. Дню убо свитающу, воспрянув благоверный князь, воста и размышляше о сновидении в себе, что хощет быти, обаче никому онаго не поведа. Девица же Ксения приуготовляшеся, якоже мощно ей бе, на восприятие благовернаго князя и глаголаше своим: «Друг жениха моего прииде, самаго же того надлежит еще ожидати». Отроку же Григорию глаголаше: «Потерпи мие мало, гсподине, яко на мой брак ⁴¹не у⁸⁶ вси собрашася гости».

4. Между тем благоверный князь, Богу должныя молитвы воздав, по обычаю паки с вельможами своими в ловитву дася⁸⁷. И Божиим изволением доспевши оныя веси, идеже девица Ксения живяше, воспомяну своего отрока и прииде видети имевших сочетатися браком. Егда же нача приближатися к Афанасиеву дому, девица, Духу Святому ей на сердце глаголющу, абие⁸⁸ позна все сие и воззва к собравшемуся на позор⁸⁹ народу: «Вскую вы достодолжную честь не воздаете вашему благоверному князю Ярославу Ярославичу, иже грядет с вельможами своими наше убожество посетити. Изыдите во сретение ему скоро, яко уже приближися и входит», – не познаваху бо князя людие веси тоя, яко не бе облечен во своя великолепная одеяння, но просто грядяше, яко един от велмож. Сретоша убо людие благовернаго князя своего с подобающею честию и введоша в дом, идеже благоразумная Ксения со отроком Григорием, воставше, поклонишася ему. Князь же, седши, воззре на Ксению и проразуме сущыя в ней от благодати Божия великия добродетели, еще же и видение, еже виде во сне, ту ему открыся, и рече ко отроку своему Григорию: «Друже, Бог изволит, да сия девица мне супруга будет, ты убо ищи себе другую невесту». И тако, востав, князь поят девицу и, шедше в бывшую тамо святаго великомученика Димитриа Фессалонийскаго церковь, по чиноположению обвенчастася. Князь бо не у бе сочетался браком, юн еще сый, яко⁹⁰ двадесяти лет. Таже пришед в дом Афанасиев, сотвори велие учреждение⁹¹ всему народу и, обнощевав ту, наутрие возвратися с супругою своею во град Тферь, идеже любезно срете его весь град, и срадовахуся князю своему, яко Бог дарова ему таковую супругу, яже яко луна вся прочая светила, тако та весь женский пол красотою, мудростию и постоянством превзыде, сего ради ублажаху ю, глаголюще: «Ты утешение граду и всему отечеству покров и надежда».

5. Сим тако бывшым, предреченный отрок Григорий облечеся во иноческий чин и княжеским изволением состави зело красный монастырь во Тфери, нарицаемый Отрочь, идеже свято и добродетельно пожив, ко Господу отиде.⁹² Благоверный же князь Ярослав Ярославич потом возведен бысть на великое княжение, якоже речеся, и бе любим всеми кротости ради и других добродетелей, яже врагов убо страхом поражаху, подчиненных же милостию в след привлекаху. Обаче велия ему печаль бе, наипаче же блаженней Ксении, яко не бяху има чада. Начаша убо о том молитвами Бога умилостивляти, ибо, яко видети есть на святых, сие едино бе врачевство, употребляемое древними разрешения ради неплодства. И тако даде им Бог дщерь едину, яже потом уневестися Христу.⁹³ Зачат же паки Ксения богомудрая и, духом провидя, каково имать быти носимое во утробе отроча, возрадовася вельми, яко иногда⁹⁴ Самуилова мати,⁹⁵ и, Бога благодаря, непрестанно воспеваше, в песнех взывая: «Пою Богу моему, вознесеся рог мой, неплоды роди»,⁹⁶ – и подобная сим.

6. В то время случися благоверному великому князю Ярославу Ярославичу отлучитися во Орду, ⁴⁸ово нужд ради некиих общенародных, ово⁹⁷ дая показания повиновения тогдашнему царю, и быв тамо, разболеся вельми, почему, разумев свое ко Господу отшествие, скоро возвратися вспять, желая, да во своем отечестве течение совершит⁹⁸, наипаче же, яко ведяше свою любезную супругу непраздну⁹⁹ быти. Обаче, по Божиим неиспытанным судбам, желаемаго не получи. Бывшу бо ему на пути, в конец изнеможе, таже призвав обретающихся тогда при нем духовных лиц, облечеся во святый аггелский образ¹⁰⁰ и преименован бысть Афанасием в знамение ожидаемыя им безсмертныя жизни,¹⁰¹ и вся благочинно устроив, с миром тленному естеству последний отдаде долг в лето от Христа 1271. Взяша убо бывший тамо тело святаго князя и, опрятавше¹⁰², якоже подобает толикому лицу, привезоша в славный град Тферь, идеже сретоша его с горкими слезами вси от мала и до велика и, великолепно препроводивше в церковь святых безсребренных Космы и Дамиана, ту погребоша его.¹⁰³

7. Егда же услыша благоверная Ксения о сем, кто изрещи может, коликия слезы излия, коликия умиленныя произнесе словеса: «Увы мне, – глаголаше, – мой любезный княже! Како увяде твоя доброта, яко крин¹⁰⁴ в полудни от силнаго зноя! Како прекратися жизнь, исчезе слава, яко дым от ветра, яко пожатая трава, яко сень, солнцу объяту тмою!¹⁰⁵ Весна зимою бысть, и паде кедр, цветущий в Ливане,¹⁰⁶ орел российский возлете далече, и где обитавши ныне, како не ответивши слова? Рцы, княже мой, что сотворил еси нам? О померкни, свет! О рыдайте, друзи!»

8. Егда же преидоша дние плача, тогда исполнися время блаженной Ксении родити, и роди мужеск пол. Предвидя же имеющую вселитися в него Божию благодать и полагая упование свое на отеческий блаженный о прискорбных сиротах промысл, наименова его во святом крещении Михаилом¹⁰⁷ и нача всевозможное попечение имети о добром воспитании и наставлении его, не тако бо млеком, яко благочестием воспитоваше его.

9. И тако Богу поспешествующу, елико предуспеваше возрастом, толико обогащашеся. Потщася бо благоверная княгиня Ксения обрести людей добронравных и смыслящих, имже вручи младаго князя Михаила, дабы его научили всякой мудрости книжной и добродетели, наипаче же повеле, да благочестию его наставят и страху Божию, премудростию и всеми благими делы. «Слышите, – рече, – что Писание глаголет, яко «страх Божий есть премудрости начало»;¹⁰⁸ а дабы кто боялся Бога, якоже подобает, не требуется ли к тому истиннаго богопознания и рачительнаго богопочитания, к ним же благочестие руководством своим отверзает путь. Что бо в высоких науках? Что в богатстве и славе, аще кто не знает всех благ источника Бога? Якоже бо некий медом растворенный яд, тако и вся мира сего красная без познания Бога. Безумныя младенцы, не могуще предусмотрети сущую в змии смертоносную силу или во огни опаляющее качество, егда увидят сия к сим подобная, увеселяющая их зрение, абие стремятся к ним, желая играти с ними, яко обычай есть детем, ко от прикосновения впадают в опасность жизни, тако есть и все, еже в мире. Мир сей, представляя нам величие и славу, богатство же и честь, сладость снедей и питий различных, красоту одежд и блистание многоценных венцев, аки бы тайно на ухо шепчет оная диаволская словеса: «Сия вся тебе дам, аще, падь, поклонитися предо мною, сиречь, аще восхощеши моим быти рабом, мое исполнити хотение и своей угождати плоти. Вскую¹⁰⁹, – глаголет, – трудами изнурити младое тело? Вскую не употребляти мира красоту, юже Бог состави во увеселение наше?» Тем же прелщаемся часто и вместо Христова пути емлемся¹¹⁰ за пространную жизнь, яже во дно адово приводит.¹¹¹ Разумеете ли, яже глаголю, о премудрые мужи! Аз изрекох та, яже самым искусом познал. Мир сей никогдаже может удоволствовати наше ненасытимое желание, но паче разгорячает, елико употребляем мира, толико большее раждается в нас неудоволствие, сластолюбие и самолюбие, ихже требованиям и похотениям никтоже возможет положити предела. Возможно ли бо морскою водою утолити жажду или маслом угасити огнь? Аще кто вкусит сладость небеснаго блаженства и уразумеет, коль прекрасен Бог, таковый, презрев вся, яже в мире, на оную непостижимую красоту мысленными очами с крайним удоволствием выну¹¹² взирает. Сия, прошу вас и молю, более всего потщитеся сыну моему изъяснити, сие бо аз за правило всея жизни почитаю, еже знати Бога и себе, разумети же мирская коварства и всякую вещь ценити достойно».

10. Отвешдвше, учителие реша: «Мы потщимся о сем, якоже повелевавши, госпоже наша, обаче блаженна ты, толикий премудрости дар получившая от Божияго Духа; блажен и сын твой, яко удостойся имети таковую матерь, яже предходит¹¹³ ему примером во всем. Аще бо и правила, преподаваемая в науках, много споспешествуют к просвещению разума, обаче едино умозрение есть, аки тело бездушно, а примеры деянию научают и в совершенство знание приводят. Едина вещь из сих не может быти без другой. Убо потщимся добраго наследника отечеству поставити, да не постыдни явимся пред Богом и пред тобою, ленивым бо рабом Божий гнев Судом угрожает».¹¹⁴

11. Приемше убо учителие тии благовернаго князя, воспитоваху его добрым наказанием, якоже подобает. Отрок же, благоразумен от природы сый, успеваше зело в предлагаемом ему учении, и вскоре пройде вся знания, яже в та времена обрести бе можно. Аще бо и княжеский сын бе, обаче о том ни мало не возношашеся, но учителем всякую воздаваше честь, глаголя в себе: «Плотстии родители даша мне жизнь, учители же сотворят тую богоугодну и отечеству полезну, убо не подобает ли их всячески почитати и слушати? Когда учуся, то мне польза оттуду, а леность не нарушит ли должность, к нейже Бог мене обяза, и прелщу добрую о мне имеющих надежду, и раздражу учителей моих, и подниму гнев, и взрасту, аки древо некое, не имеющее ни ума, ни плода. Убо подвизатися зело надлежит в трудах, Дóндеже желаемый получу учения конец». Егда же в чем недоумеваше, таковыя учителям из неудоборазумителных словес вывождаше вопросы, яко удивлятися им и глаголати: «Воистинну Дух Святый препочи на отроце сем! Воистинну сия младая ветвь вся совершенства святых прародителей своих представляет, яко в зерцале!»

12. Времени же довольну минувшу, и прилежно учащуся святому, доволно сокровищем премудрости обогатися, наипаче же потщася Бога, елико можно, лучше уразумети, обаче не вдавашеся продерзостно в любопытное испытание непостижимых, ведая, яко любопытство еретичество раждает, а незнание есть суеверия мати. Узнав же Бога, делаше сравнение, умом воздетая, яко по лествице от тварей ко Творцу и прилежно разсматривание имеющееся между Богом и нами различие, отонуду¹¹⁵ же стяжа совершенное познание вещей. Якоже бо хотяй¹¹⁶ познати какия-либо вещи тяжесть и цену возлагает ее на мерило и приравнивает к известному другому количеству, тако и святый Михаил вся прилагаше к Богу, иже бе ему конец желанный и высочайшее добро. Отсюду уведа яве¹¹⁷, яко весь мир есть игралище случайности превратныя; яко богатство есть прелесть очес и часть пестровидныя земли, разлучающая человека с Богом; яко слава есть звук, раждающийся на воздусе и обращающийся в ничто; яко вся жизнь наша есть дым исчезающий или трава, скоро увядающая в поле;¹¹⁸ яко похотения суть диаволския сети, а страсти – орудия смерти, имиже уязвляеми к погибели спешим; яко плоть есть враждебница, яже по подобию Далиды предает в плен, обложив оковы.¹¹⁹ Того ради святый, нигде не возмогши обрести тихаго спокойствия, в немже бы могл безопасно от наветов препочити, к единому устремися Богу, в немже водворяшеся выну и радостно упокоевашеся, яко мнетися ему быти телом точию¹²⁰ на земли, духом же бе небесный гражданин, присный святым, и собеседник Богу. Тако мир крайне возненавиде и вся, яже в нем. Богатства, имиже изобиловаше, не своя быти мняше, но должником себе почиташе убогих, помня еваггелскаго богатаго, осужденнаго за скупость,¹²¹ дом свой сотвори прибежищем Богу освященных лиц.¹²² «Сии, – рече, – суть светила мира, орудия Божияго Духа, имиже Божие снисхождение превлекаем к нам». Славу свою, величество же и честь тако покры смиренномудрия одеждою, яко быти ему и показоватися ничимже превосходнейшим от прочих. С убогими обращашеся кротце, с простыми милостиво, с вельможами премудро, наконец плоть свою потщася всячески обуздати. «Да побежду тя, – глаголаше, – враже мой домашний, да злодейски ты мене ослепленнаго не вринеши в погибель». Сия бяху размышления святаго, в нихже, по закону свято управляя жизнь, упражняшеся день и нощь, и бе видети в нем вместилище всех добродетелей, имиже, яко некое солнце, сияше, и яко некая смоковница, насажденная во ограде Христовой, сторичный приношаше плод.¹²³ Богу убо вразумляющу и святаго соблюдаяющу, превзыде отроческий возраст и достиже 20 лет.

13. Тогда блаженная Ксения, ово желая видети в жизни своей благовернаго князя сочетана браком, ово поспешая удалитися к безмолвному пристанищу на уединение в монастырь, ово отечеству защищения и наследия скорейшаго желая, призва сына своего, аще и юна леты, но сединою вышния премудрости украшена, и, седши, нача глаголати к нему сице: «Уже ты, любезное ми чадо, якоже вижу, дошел еси до совершеннаго возраста, безконечное убо Богу моему благодарение воздаю, яко поможе ми воспитати тя по родительской должности в добром наказании¹²⁴ и страсе Божии. Ныне подобает ти в законное супружество вступити, яко един остался еси в отеческом доме, дабы имя родителя твоего не истребилось от земли, и да княжество сие возъимеет наследника по тебе. Аще избиравши себе житие безмолвное и супружества свободное,¹²⁵ то разсуди сам, что имеет последовати оттуду. Кто защитит отечество от нападений вражиих и дом сей, твоими прославленный предками? Кто в цветущем состоянии сохранит? Кто внутренняя возмущения, яже могут произойти, отвратит? Кто подчиненных в пределе закона удержит и, истребив, яко на лядине¹²⁶, умножающиеся в народе пороки, истинныя добродетели насадит? Всякое правительство есть Божия величества сияние и горняго престола, на немже нелнцеприемное правосудие седит, орудие. Правительству убо подражати должно не точию в делах милосердия, но и в делах правосудия. Истреби волков, да овцы в тишине будут; попали терние, да чистая на нивах возрастет пшеница; сиречь, добрых награждай, смотря на заслуги, злых же наказуй, да зло истребится от земли, обаче везде меру и равновесие наблюдай. Се другий тебе, чадо, представляю пример. Владетель долженствует быти солнцем, якоже бо солнце сиянием своим освещает твари, да тако к трудам возбудит человеки, представляет красоту и безобразие вещей, да уклоннвшеся от зла, возлюбим благое, показует путь, имже ходити подобает да, в яму впадше, не сокрушимся; тако есть и владетель: ему приличествует неусыпным оком на вся дела подчиненных назирати и отеческий имети промысл о сохранении тишины государства, о вспоможении и возбуждении народа, да в должности своей неленостно пребудет о уставлении чина и порядка, дабы всяк, себя зная, удалялся излишняя роскоши, легкомысленнаго высокомерия и надменныя гордости. Аще ли же владетель не будет радети о сем, или свои пристрастия почтет вместо правила жизни, или свирепствовати начнет и озлобляти народ, то погубит и награждение обещанное ему от Бога на небеси и доброе имя на земли затмит, вместо отца и повелителя назовется наемник, расточитель и тиран. Внимай, чадо, словесем моим, аще и случится согрешити когда («никто бо без греха, кроме единаго Бога»¹²⁷), обаче грехи, происходящий от излишняго снисходителства и милосердия, приличнейшии суть нашему естеству, нежели раждаюшыяся от безмерныя жестокости и ярости, ибо сие прилично зверям, милосердие же созданному по Божию образу человечеству сродно».

14. Отвеща благоверный князь: «О коликое бремя под именем княжескаго высочества возлагается на нас! И кто может такое звание непогрешително проходити, требует бо оно нечто, человеческий превышающее силы». «Правду рекл еси, яко многотрудная есть правителей должность, обаче идеже человеческия силы не достают, тамо Божия укрепляет и наставляет благодать. Прозорливость убо надлежит имети и неусыпно Бога в помощь призывати, впрочем, должно полагатися на мудрыя советы благоразумных мужей. Где многие о единой вещи разсуждают, ту больше вникается в подробность и естество вещи. Случаются же иногда и такия дела, коих решенном поспешати не подобает, но отлагати или до дальнейшаго разсмотрения, или до произведения следствия. Мнози согрешиша от скоропоспешества, еже и невинным иногда отъемлет живот¹²⁸, и винным раздает почести и дары. Первый друг в жизни твоей будет ти твоя супруга, еюже тя Бог благословит. Верная супруга мужу своему зиждет дом и делает имя на земли, а муж жене есть красота и радость. Муж снисходительство да являет к жене своей и любовь, а жена к нему взаимное почтение и повиновение. Якоже крин без благовония, яко неплодная яблоня и неогражденный сад, тако и жена без мужа; муж же без жены, яко собираяй¹²⁹ во вретище раздранное¹³⁰ и не имеющий пристанища корабль. Виждь убо, чадо мое, яко и тебе подобает сочетатися браком; иным аще и позволяется жити, якоже хотят, но ты князь сый и в народе должен еси о всем промышляти, яко предрекох ти; аще ли преслушаеши мя, согрешити против Бога и всего народа, и против дому блаженных родителей твоих».

15. Сия яко услыша благоверный князь, поклонися матери своей и рече: «Вем изъмлада, дражайшая мати, яко Дух Святый и премудрость, приседящая Вышняго престолу,¹³¹ обитает в тебе, того ради не смею ти прекословити ни в чем, твоя увещания приемлю, яко Божия заповеди, и обещаюся по ним исправляти всю мою жизнь». К сим приложи богомудрая княгиня: «Ныне, чадо, послушай мя: пошлем послы во град Кашин к благородному мужу Димитрию Борисовичу (князю Ростовскому),¹³² яко да о бракосочетании изъявит слово, есть бо у него, якоже слышах, дщерь едина, зело добродетельна, премудра же и прекрасна, сию, Богу хотящу, желаю видети в супружестве твоем, последннй бо сей еще долг родителский имею ти воздати, прочее в совершенном безмолвии пребуду, удалившися от многомятежнаго мира в монастырь».

16. По довольном сем увещании призва благоверная княгиня мужей сановитых и честных и, послав их во град Кашин, рече: «Шедше, рцыте благородному Димитрию, яко да даст дщерь свою сыну моему в жену, возлюбих бо ю добронравия ея ради». Они же, шедше, сотвориша вся, якоже повелено им бысть. Тогда великая княгиня Ксения, устроив вся, яже к бракосочетанию служат, посла привести целомудренную девицу Анну. Таков бо в древности обычай целомудренный бе, яко юношам и девицам ниже разглаголствовати лет¹³³ бе о тех, яже к браку служат, но попечение о том родители их или сродницы имеяху, юношество же, стыдением красящися¹³⁴, пребываше в молчании и послушании родителей своих; а не якоже нынешний творит безобразный век: дети, еще не доспевше совершеннаго возраста, назирают уже, где сходбище бывает то же мудрствующих девиц, или, скитался безстудно по домам, нелепая глаголют и сами себе избирают невесты, взирая или на едину телесную красоту, или на знатность и богатство, добродетелей же, украшающих душу и некрадомое составляющих сокровище, отнюд не ищут. И како препочиет Божие благословение на таковых, иже сочетаются единаго ради угождения похотным страстем? Не оттуду ли происходят чудовища оная, иже ни Бога, ни закона, ни честности не зная, в единых упражняются пороках, якоже прежде потопа бывшии исполины?¹³⁵

17. Егда же девица Анна, препровождаемая своими сродниками и боляры, приближися ко граду, тогда абие сретоша ю знаменитии мужие, учрежденнии на то, во одеяннях светлых и веселым лицем, поклоншеся ей, препроводиша с великою славою во град до соборныя церкве, идеже име бракосочетание совершитися, и, шедше, по обычаю, возвестиша благоверной княгине Ксении о том. Она же, призвав любезнаго сына своего Михаила и матерним напутствовав благословением, отпусти в церковь. Изшед убо благоверный князь, облечен во всю славу свою, идяше торжественно и великолепно, предшествующу ему и последующу безчисленному множеству народа, Дóндеже приближися к церкви, идеже сретоша его с честным крестом духовная лица, и, введше в церковь, обвенчаста, якоже чин святых отец повелевает, потом, изшедше, возвратистася в княжеския чертоги. Священницы убо предъидяху, окропляюще святою водою и благословляюще путь, народ же радостно восклицаніе: «Да живет Богом сочетанный супруг! Да возвеличится Михаилов дом, и Анна да процветет во славе!»

18. Тако шествующым им, егда приближишася к чертогам, изыде великая княгиня, нося на руках пречестный крест и Спасителев образ, и, сретши их в преддверии, ста и рече: «Се, чада, благословляю, вас великим именем Спасителя нашего Христа; благодать его и милость, юже неоцененною кровию своею исходатайствова нам у Бога Отца, да пребудет на вас и на чадех ваших до века. Ныне конец желаний моих наста, ныне моя исполнися радость. Аз, отнележе овдовех, не имех толь благоприятнаго дне, якоже есть сей, но всегда печахся, дабы и дом ваш сохранити, и вас привести до такого состояния, в каком вижу ныне. Внидите убо во изобилующий славою и богатством дом, и Господь да приумножит сторично благополучие ваше». Сия рекши, объя их и облобыза любезно; они же, поклоншеся, целоваста Спасителев образ, и матернюю десницу, потом внидоша в чертоги. В той день сотвори князь велие учреждение вельможам своим и всему духовному чину, повел же и милостыни многия дати из сокровищ своих убогим и сиротам. И сице начаста благополучно господствовати во отечествии своем.

19. Немногу потом времени минувшу, зачат благоверная княгиня Анна, и роди мужеск пол, егоже во святом крещении Димитрием нарекоша,¹³⁶ таже приложи и еще родити три сына, Александра, Константина и Василия.¹³⁷ Благослови бо я¹³⁸ Бог чадороднем, якоже Иоиля¹³⁹ иногда, еже бе явное знамение милосердия Господня, низпосылаемаго на верных своих рабов. От сего Александра, иже послежде великим князем бысть, мнози и велицы произыдоша цари же и князи,¹⁴⁰ якоже летописи свидетельствуют; а Димитрий, по заклании отца своего, по некотором времени был также великим князем; Константин же бысть князем Тферским, а Василий – Кашинским; сей по матернему, а той по отцевскому наследию.¹⁴¹

20. Видя же благоверный князь Михаил, яко Бог огради его державу миром и сотвори прозябати¹⁴² всякому изобилию и богатству на земли, благ совет предприя во уме своем, еже бы создати великолепную каменную церковь во имя Святаго Спасова Преображения на том месте, идеже прежде древянная Святых чудотворцев Космы и Дамиана бе,¹⁴³ потщася убо зотчиев взыскати и приуготовив вся, яже на потребу, нача с великим прилежанием строити. И тако благопоспешашеся дело, яко скоро воздвигнутися преславному храму, егоже, украсив благолепно и всякою утварию снабдив изобильно, посвяти Спасителю Христу в жертву благоприятну, яко невесту прекрасну или яко неоцененный дар, изъявляющий его возженную к нему любовь. В сих бо и подобных сим делах выну упражняшеся святый, а не вдавашеся в роскоши и сластопитание, от нихже тщетное расточение и опустошение домов происходит. Богатство, употребляемое в добро, станет на все и преизбудет. Аще ли же кто, забыв, яко оное ему от Бога дадеся в долг на домостроение чинное, и яко от него потребуется некогда по преставлении ответ, начнет ясти и упиватися, и прочая непотребная дела творити, то аще бы и вся мира сего сокровища имел, скоро оскудеет, и постигнет его клятва Божия со всеконечным истреблением от земли.

21. Между тем немалое время прейде, различным князем управляющим престол, яко по кончине благовернаго великаго князя Ярослава Ярославича бысть преемник престола брат его менший Василий Ярославичь,¹⁴⁴ иже бездетен скончася; по нем владеша дети святаго великаго князя Александра Невскаго, Димитрий, Андрей и Даниил.¹⁴⁵ Егда же вси сни ко Господу отъидоша, подобаше сему благоверному князю Михаилу Ярославичу и по старшинству, и по степени, и по общему соизволению всех, и по заветам прежних князей взыти на великое княжение.¹⁴⁶ Того ради собравшеся знатнейшии российстии велможи во град Владимир, избраша сего благовернаго Михаила во великаго князя и произведоша, якоже обычай есть, присутствующу при том и святейшему Петру, митрополиту всея России, 1304 года от Христа,¹⁴⁷ возраста же своего в 33 лето. В та времена попущением Божиим Россиа отчасти бе под татарским игом, и российстии князи обычай имеяху ходити во Орду к татарскому царю, да от него власть свою приимут. Убо и благоверный князь Михаил иде во Орду.

22. Бе же у преждебывшаго великаго князя Даниила Александровича старейший сын, емуже имя Георгий.¹⁴⁸ Сей, славолюбием возбуждаем и мудрования плотскаго держася, возжела быти великим князем. Воста убо, да идет вслед великаго князя в Орду, воеже бы¹⁴⁹ препятствие оному учинити и самому восприяти престол. Егда же бысть во граде Владимире, срете его святейший Петр митрополит¹⁵⁰ и, уведав причину шествия его во Орду, моли, да не идет и не сотворит сего, глаголя: «Благоверный княже Георгий Даниловичь, молю благородие твое, не твори дела сего, егоже умыслил еси сотворити; виждь, яко христиане есмы, и первее убо подобает нам, по завещанию Господню, сохранити любовь, таже и о том попечение имети, дабы имя Божие нами не хулилося во языцех. Что егда увидят варвары между нами несогласие и вражду, не рекут ли, яко тому нас учит наша святая вера, ни, княже, не твори сего, аз и великая княгиня Ксения, мати благовернаго великаго князя Михаила, поручаемся тебе, яко еже аще восхощеши, получиши зде во отечествии твоем, егда возвратится князь. Ты веси добронравие князя, веси, яко он не иска великаго княжения, но Божию званию сопротивитися не возможе; обаче, аще желаеши, возвратит тебе всю славу и честь, он бо весь ум и все желание имея вперено к Богу, обыче измлада ничтоже желати от временных». Отвещав князь Георгий Даниловичь святителю, рече: «Да весть твоя святыня, отче, яко великаго княжения не хощу, видит Вседержителево око, и ни единаго препятствия не сотворю, но иду точию, да вижу деющаяся у татар». Сия рек, отъиде во Орду.

23. Бывшу же ему тамо, нача ²обращатися с¹⁵¹ татарскими князи, еже видев всезлобный диавол, употреби сей случай в коварство и, подустив¹⁵² орудия своя безбожных татар, научи советовати ему тако: «Не ты ли сей, – рече, – Георгий Даниловичь, сын великаго князя? Не тебе ли по наследству надлежит на великое княжение вступити? Вскую¹⁵³ не брежеши о том, но предавши себе в посмеяние другим? Аще желаеши, объяви нам мысль свою, мы обещаемся о тебе ходатайствовати к царю». Сими словесы развратиша безбожник сердце князя Георгиа, и нача желати великаго княжения. Татаре же, не яко добра желающе, советоваху сия, но да вящшыя дары и богатства получат от обоих князей. Шедше убо, татарове возвестиша царю своему о том; он же, варвар сый и несмысленное подобие точню человека, егоже и страсти, и похоти, ослепивше, влекут, отвещав, рече: «Мне не пристойно есть взирати, якоже глаголют, на достоинство и добродетели, но кто принесет мне злата и больше обещает впредь даней приносити, той да будет князь».

24. Тогда грех ради наших велия тягота бысть в российстей земли. Отвсюду бо собираху великия дани, а кои по неимуществу не имеяху что дати, тии немилостивно влачимы, биемы и в темницу всаждаемы бываху, – и бе видети везде стенания и плачь, туги и беды. Еже бо Бог долго непросвещенному знанием веры народу терпит, то ускоряет низпосылати во мщение на тех, на нихже все сокровище благости своея излия, дабы тии злыми делами имя всесвятое не хулили во языцех и дабы навыкли, живя по закону свято, всегда молитвами прибегати к Богу. Тако бысть тогда, и собраша татаре велие сокровище из российской земли, обаче не превозможе противная страна князя Георгиа, но благоволи Бог быти на великом княжении благоверному князю Михаилу, яко избранному от всех и по завету, определенному на то: отпусти убо татарский царь великаго князя во своя с миром, да обладает престолом российским, Георгию же князю за толикия дани велию сотвори честь и обешания состави, и тем прекратися между князьми вражда.

25. Возвратившуся убо благоверному великому князю Михаилу на свой престол, прияша его вси во граде Владимире честно, и, благословение прием от святителя Божия Петра митрополита,¹⁵⁴ нача мирно управляти народ. Начаша же с прибытием его вкупе процветати науки, умножатися искусства, земледелие распространятися, купечество обогащатися, церкви созидатися и благочестие вкоренятися. Аможе¹⁵⁵ бы кто обратил очеса, везде сияше мир, тишина, довольство и радость; якоже бысть во дни Соломона, царя израильскаго,¹⁵⁶ тако бе и при благоверном великом князе Михаиле. Он бо якоже приобыкл бе исперва, тако и во все владение свое никогдаже последова пристрастиям своим, но Божий закон выну пред очима имея, по нему исправляше¹⁵⁷ вся, темже и подчиненных своих управляше премудро, снисходительство велие являя ко всем; аще же и случашеся наказати кого за вины, обаче при том не раздражашеся гневом, но правосудие сохраняя, пороки точию общия ради тишины истребляше, людей же всех, яко присный¹⁵⁸ отец, миловаше и щадяше. Не сие ли есть, еже глаголется в законах, яко правосудие, наказуя винных, милует; не исправления ли ради сынов своих наказует отец, подобно и врачь опаляет раны и гнилыя иссецает уды¹⁵⁹, да сохранит болящаго живот.

26. Особливыя же его добродетели, акибы ему единственно приличествующим, бяху непрестанная молитва и глубочайшее смирение. Молитвою возвышашеся от земли на небо и весь вперен¹⁶⁰ любовию несказанною в Бога, о нем выну помышляше и помышляя услаждашеся, и яко бы вне тела мняся быти и предстояти со безплотными престолу Владычню, разглагольствоваше день и нощь в молитвах и сладце пояше Давидовы песни.¹⁶¹ Сия ему бяху сладкая пища и увеселительное питие. Смирением же украшая тление естества, немощь человечества памятоваше, откуду вконец высокоумия надмение пресек, всех, яко присную¹⁶² братию, любляше, наипачеже нищих миловаше, глаголя в себе: «Кто есмь аз, яко изобилую честию и богатством, сии же тают гладом и по стогнам¹⁶³ скитаются без покрова на мразе? Не сии ли суть, ихже ублажая, Христос Господь братиями нарицает?¹⁶⁴ Не сии ли продают елей, имже во сретение Владычне возжигается светилник?⁸⁴ У сих бо подобает мамоною¹⁶⁵ неправды⁸⁴ куповати¹⁶⁶ небо,⁸⁴ – тако размышляше о сем. Другий смирения святаго плод бе всегдашнее умиление, якоже в Житии святыя благоверныя великия княгини Анны, супруги святаго, написано обретохом.¹⁶⁷ Размышляя бо о безприкладном¹⁶⁸ Владычнем снисхождении, како нас ради спиде с небесе, и воплотися от пречистыя Девы, и послужи нашему спасению, и пострада, и умре, Бог сый всех, соприсносущный Отцу и Святому Духу, непрестанно сокрушашеся от умиления и овогда теплыя из очес испускаше слезы, овогда взираше на вечную оную погибель, от неяже Спаситель нас исхитив, возведе на небесное достоинство, овогда же повергайся на землю, благодарение возсылаше Богу за пречудный его о нас спасительный промысл, и толико уязвися любовию ко Христу, яко спасительное его имя никогдаже испущаше из уст.

27. В сих богоугодных исправлениях успевающу святому, преидоша от вступления его на великое княжение осмь лет. Между же тем умре ордынский царь, и наста по нем другий, именем Азбяк, иже, богомерзкую срацынскую веру по согласию с турками прием,¹⁶⁹ паче всех лют враг и гонитель христианскому роду являшеся. Прежний бо цари, бывший до Азбяка, идолопоклонницы суще, имже огненное естество мняшеся быти бог, не много радяху, какую кто веру держит; сей же, проклятаго Магомета сый ученик, яко безчеловечный и неприступный зверь всем являшеся. Идоша убо паки наши князие в Орду новому царю поздравление и дары по обычаю принести.

28. Бывшим же им тамо, паки завидя диавол добродетели святаго, велию воздвизает на христианство бурю, паки междоусобие и вражда востает. Предреченный бо Георгий князь развратися паки, воеже великаго княжения возжелати; и по довольном пререкании бысть Георгию князю остатися во Орде, святому же Михаилу возвратитися во своя с миром, обаче и по отшествии его не преста ово ласканиями, ово великими дарами, яже собра с бедных христиан, привлекати благоволение к себе новаго царя, еже и бысть. Минувшу бо непрестаннаго его тщания единому лету, соизволи лютый оный царь, взятаго мздоимства ради, Георгию убо быти великим князем, емуже и Кончану царевну, сестру свою, даде в жену,¹⁷⁰ желая его присвоити к себе, да вящшая еще от него получит, святаго же Михаила князя безвинно уничтожи, яко не толикия ему приносящаго дани. Святый бо князь, отечески защищая своих, ничесого излишняго не собираше от них, но паче общенародныя нужды, идеже бе можно, своим имением дополняше. Возстена убо вся Россиа, услышав сия, глаголюще: «Лишихомся отца, се грядут проклятые сыроядцы на разорение наше! Горе нам, яко согрешихом пред Богом!»

29. И сия убо тако суть: егда бо премудрое правосудие Владычне хотеть по щедротам своим помиловати народ (не бо что можем заслужити, раби неключими¹⁷¹ суще), тогда благих посылает нам царей и щедротно изливает на землю изобилие и мир. Егда же грехи нашя привлекают благость Божию ко гневу, тогда или наказуеть владетелей нащих, якоже о Давиде чтется, что и подчиненных постизает всех, или вместо орудия мщения своего безчеловечнаго воздвизает царя, якоже Навуходоносора на Иерусалим,¹⁷² не его любя, но видя стремляение его злое, управляет оное на повинных людей, излияния ради праведнаго гнева на них.

30. Прием убо князь Георгий Даниловичь великое княжение от татарскаго царя, якоже предрекохом¹⁷³, в лето 1317 от Христа, умысли возвратитися во своя, обаче ведая храбрость великаго князя Михаила, и, убоявся, испроси у царя, да послет с ним против святаго единаго от велмож своих с татарскою силою: мняше бо, яко имать ему сопротивитися и пререкати. Сему прошению соизволив царь, определи послати некоего от советник своих, именем Кавгадыя,¹⁷⁴ мужа, преисполненна всякаго варварства и зверства, и сице с великим ополчением грядяху на опустошение России. Блаженный же великий князь Михаил, яко слышав вся, грядущая на нь, потщася абие вся полки своя собрати, не кровопролития желая, но ово изъявляя, яко аще хощет, может против их стати, ово яко должен есть за благочестие отечества до капли крове стати, ово же предупреждая их злая начинания, дабы свой дом и детей защитити. Изшед убо святый с полки своими в сретение великому князю Георгию, посла от лица своего посланника к нему рещи: «Блюди, великий княже, да всуе кровь христианская тобою не проливается в России, яко и ты христианин еси. Аз ти уступаю великое княжение, еже даде убо тебе царь, радуюся бо, яко тебе княжеское достоинство прииде, иже брат ми еси, господствуй убо им. Господу помогающу ти, обаче молю тя, в мою область, яже от прародителей моих мне в наследие бысть, не вступайся, ибо и аз человек есмь, имый дом, жену же и детей, имже подобает некое пристанище имети». Слышав же сия, великий князь Георгий совратися¹⁷⁵ с пути и иде во Владимир град, тамо бо княжеская столица бе. Благоверный же великий князь Михаил отпусти вся воя¹⁷⁶ своя и с домочадцы прииде во отечество свое,¹⁷⁷ идеже, яко обычай име, нача мирно жити, в добродетелех уединенных упражнялся без всякаго коварства и лети, не могут бо вмещатися сия, идеже обитает Христос, по оному: «Кое причастие света ко тме, или кое общение Христу с велиаром» [2Кор.6, стих 14 и 15].¹⁷⁸

40. Минувшу некоему времени, великий князь Георгий, видя, яко никияже споны¹⁷⁹ творит ему святый, укрепися на престоле, обаче не удовлися тем, но имея при себе кровопийцу Кавгадыя онаго, якоже рехом, со безчисленными татары, к нимже присовокупив всю низовскую землю и мордву, нечаянно прииде ратию зелною на Тферь. Идяше же не яко на брань, но, уповая на свои толикия силы, яко на некий торжественный пир, имея при себе и жену свою, яже от татар, и других приятелей и сродников своих. Якоже убо внидоша во область тферскую, начата люто свирепствовати в народе: сожигахуся грады, разоряхуся веси и села, опустошахуся обители святыя и церкви, убивахуся людие, различными изнуряеми смертми, оскверняхуся жены и девы от неистовых поган, младенцы мечьми разсецаеми бываху, – плачь велий ношашеся везде, и туга¹⁸⁰ велия належаше на землю, еже все разпростреся, даже до Волги.

32. Егда же намереваше на другую страну Волги перенестися, тогда блаженный великий князь Михаил, не могущи толикое озлобление¹⁸¹ людей своих терпети, призва отца своего преосвященнаго Варсонофия епископа¹⁸² и других вельмож своих и рече к ним: «Видите, братие, яко аз, не желая пролития христианския крове, отрекохся всего княжения моего и уступил оное сроднику моему, дабы жил в мире, ныне же коликая злая сотвориша державе нашей; аз же сия претерпевах, чая тем прекратнтися злобе, яже не прекращается, убо главы моея, якоже вижу, ищут и всеконечнаго опустошения отечеству моему. Судите убо мя, аще есть во мне кая неправда, унее¹⁸³ бо ми есть, да един аз постражду, а не весь народ погибнет за единаго мене».

33. Тогда отвещаша вси, и яко единеми усты рекоша предстоящий: «Прав еси, господине наш великий, яко аггел Божий, во всем пред сродником твоим, смирение твое есть безмерное, еже явил еси уступленном княжения и претерпением толиких пред очима нашима нанесенных ти озлоблений». Сия рекше, прослезишася вси от великия туги, яже их сокрушаше сердце, и умолкоша надолзе, таже приложите глаголати: «Что убо мы седяще ожидаем? Время бо тесное¹⁸⁴ наста, еда¹⁸⁵ и нам тогожде ожидати от окаянных татар, да осквернят святыню, да опустошат град и нас изсекут или живых в плен возмут? Ни, не будет то! Пойдем, друзи, да умрем славно за святую веру и за отечество наше!» Потом, обращшеся к благоверному князю Михаилу, реша: «Молим тя, кротчайший господине наш, пощади рабов твоих, пойдем на сопротивление врагам, мы душы положити за тя готовы есмы; известно ведаще, яко не в силах восхотеть Господь, аще бо и малы есмы числом, обаче славною благословит нас победою, принуждены бо суще, за душы наши воевати идем».

34. Сия слышав, князь кротце ответа: «Похваляю, братие, ваш благий совет и богоугодное намерение, еже душы положити за святыню Господню и за братию нашу, за Божию бо честь всегда должни есмы готовы быти умрети, за братию же умрети, яко подобает; и сам Спаситель примером показа, еваггелский бо глас научает, глаголя: «Больше сея любви ничтоже есть, да кто душу свою положит за други» [Иоанн 15, стих 13].¹⁸⁶ Колико братий ныне стенет под лютым игом татарства? Коликих же пожре свирепая и немилостивая смерть? И не вменится ли нам в грех, аще пренебрежем о том? Ныне убо, поспешшеся, идите в домы ваша и приуготовите скоро, яже на потребу ко ополчению, соберите же и воинов, елико возможно, и разпределнте, да кийждо знает чин и порядок свой; аз бо сам, вооружившися, изыду к вам утре».

35. Изшедше убо велможи от князя, абие устроиша все, еже повелено бе, и пребыша день той кийждо в своем доме, не разходящеся даже до утра. Благоверный же князь повеле, да будет всенощное моление по всем церквам в той нощи и завеща сетование и пост, яко да прещедрый Господь отвратит свой гнев от града и народа. Во утрие же зело рано воста благоверный князь, и вооружися мечем по бедре, воздев же златый свой крест на персех, и, сед на коня, изыде к полкам. Прииде же и святейший Варсонофий епископ с клирики своими и, сотворив молитву, благослови я, рек: «Идите, чада, во имя Господне, Господь сил да предвидет пред вами и мышцею крепкою, яко по израиле над фараоном,¹⁸⁷ да поборет». И тако отъидоша в путь.

36. Приближившым же ся им к неприятелским полкам, видеша, яко великаго множества их невозможно бе очима досягнути, и бяху пред ними, яко горсть пшеницы в сравнении целаго спуда,¹⁸⁸ того ради и ругахуся варвары изшедшым, глаголюще: «Что сии прузие¹⁸⁹ хотят? Не смерть ли предускорити на ся изъидоша?» – и пребываху, ничтоже брегуще¹⁹⁰. Великий же князь Михаил повеле воем своим стати и, расположив вся, якоже подобает на сражение ити, помолися со всеми Господу Богу, еже пособити им во брани. Тогда, обращся к полкам, рече: «Внушите глаголемым, мужие, мы ополчаемся за душы нашя, не убойтеся превосходныя неприятельский силы. Господь бо предшествуяй победе и победит, яко единаго, всех, аще ли же ни, унее есть нам на поле умрети славно, нежели, дождавшимся нападения врагов, видети разорение отечества и срамоту пленения нашего и домашних наших во граде, идеже спасающаго не будет, и со стыдом нужно¹⁹¹ погубим живот. Не убойтеся убо, но ополчимся крепко и днесь спасение получим. Видите, яко противницы, небрегуще о нас, не приуготовляются на брань, Господь бо, поборствуя по нас, ослепи я. Не убойтеся убо, но последствуйте мне».

37. Сия рекшу ему, вострубиша и устремишася силою на сопротивных, и соступишася полцы, и начася сеча, яже на долг час продолжися, и аможе аше обращашеся с своими святый, тамо падаху противныя враги, яко снопие в жатву, стремляху бо ся воини святаго, яко раздраженные львы, и мняхуся, подобно орлам, на сражение летети, предваряюще друг друга, душу положити, варварам же нанесена бысть язва, яко их телесами всему покрыту быти месту. Нападе же и страх велий на окаянных, и, давше плещи¹⁹², обратившася в бегство, и давляхуся, разными стезями спасения ищуще. Сие видевше, воини святаго ободришася зело, и инии убо гнахуся за бегущими, собирающе поверженная оружия на земли, инии же пленников стрежаху, ихже бе многое множество, между коими обреташеся и Кавгадый зверообразный, и Кончана царевна, супруга Георгия князя; сам же князь Георгий, видя себе побежденна, побеже в Торжок, таже в Великнй Новград со стыдом.

38. И тако благоверный великий князь Михаил с воинством своим возвратися торжественно в славный град Тферь, водя и пленников с собою, месяца декемвриа в 22 день,¹⁹³ и бе видети на нем все одеяние изсечено и язвенно, вся бо противная сила устремляшеся на него, а на святом телеси его не бысть ни единыя раны, Господу его соблюдающу и заповедь давшу, якоже благоглаголивый вещает Давид: «Аггелом своим заповесть, еже сохранити тя»¹⁹⁴ [Псал. 90, стих 11]. Егда же прииде во град, абие вшед в церковь, всесильному Богу усердное благодарение принесе за дарованную над враги победу и, великия почести раздав последовавшым ему, отпусти всех во своя. Царевне же Кончане и Кавгадыю оному повеле честныя домы ко обитанию отвести и всяким довольствием и служительми по их сану снабдети.

39. Прешедшим же неколиким днем, возвестиша святому, яко царевна Кончана болит. Прииде убо благоверный князь к ней и, приседши ея одру, рече: «Царевна, что яко болиши? Не оскорбихом ли тя чем, или нужду некую претерпеваеши? Виждь, яко не аки пленницу тя имею, но яко драгаго посетившаго мя гостя. Аще ли скорбиши о разлучении с мужем твоим, не есмь аз тому причина: тогда же бо отпустил бых тя к нему, аще не бы он отлучился, ныне же потерпи, молю, время бо способное улучив, с честию отпущу тя в мире». Она же рече: «Не сия болезни моея причина, аз бо толико твоим снизходительством довольна, яко николиже забвению предам е¹⁹⁵, и к благодеяниям твоим навсегда благодарна пребуду. Начася же болезнь во мне еще исперва, ово от утруждения на пути, ово от страха, подъятаго при бывшем сражении». Сия слышав от нея, блаженный изыде и, призвав искусныя врачи, посла, да о ней всевозможное старание приложат. Шедше убо, врачи начаша ю по повелению лечити, обаче болезнь умножашеся паче, а не ослабеваше, яже тии вся подробно возвестиша благоверному князю.

40. Слышав же сия, благоверный князь прииде к ней и нача тую надолзе богодухновенными словесы утешати и первее убо предлагаше повести из Божия слова, како устроил Бог сей мир,¹⁹⁶ како грешныя истреби потопом,¹⁹⁷ како изведе Израиля и даде закон,¹⁹⁸ таже о Христе, Спасителе нашем, поведаше, како нашего ради спасения сниде с небесе и воплотися от пречистыя Девы Марии безмужно,¹⁹⁹ и пострада безвинно, и умре поносно,²⁰⁰ и воскресе тридневно,²⁰¹ и взыде на небеса,²⁰² отнудуже паки приидет судити живых и мертвых. Наконец: «Всяк, – рече, – иже не верует в Господа нашего Иисуса Христа, осудится на вечное мучение, яко той есть един ходатай Бога и человеков, иже своею кровию неоцененною соверши спасение наше, а иже верует во Христа, той по преселении от земли наследует вечное блаженство».

41. Сия слышав, царевна зело умилися, никогдаже бо прежде таковая слыша, и действующей в сердце ея Божией благодати, нача просвещатися светом веры, темже²⁰³ убо любопытнее нача вопрошати, глаголя: «Рцы ми, великий княже, молю тя, како глаголеши, яко Христос, сый истинен Бог, умре и яко о нас ходатайствует к Богу, не могу бо разумети сия. Еда ли и вы многих исповедуете богов, якоже татарове, или еда может умирати бог?» Отвеща благоверный князь: «Ни, княгиня Кончана, не многих исповедуем богов, но точию единаго, иже из ничего единым словом всемогущим вся произведе в бытие, и сохраняет всю тварь, и всем дает дыхание и жизнь, и вся управляет к преславному концу, ибо он есть вездесущий, преблаженный и премудрый. Сей Бог наш, аще и един существом, обаче троичен лицы быти верится, якоже наши православныя книги учат, Отец, Сын и Святый Дух. Отец роди превечнаго Сына и Святаго Духа испусти, и сии три лица суть равны по всем совершенствам своим, но точию свойствами нерождення, рождения и нахождения разделяются, и сим действиям не бе начала, не будет конца, ни пременения, ни преложення. Таинство сие воистинну непостижимо есть уму, обаче досязаемое верою. Егда же изволи Бог по безприкладной милости своей создати мир (ибо никакия нужды не имеяше в нем, сам сый обогащаяй щедротами вся), тогда сотвори и человека в рай сладости, да будет обладатель и повелитель всея земли. Сей человек долженствоваше в знак благодарения Богу жити по закону свято, обаче согреши, диаволом прельщен. Суть бо злыя духи в мире, иже выну погибели нашея ищут. Бог убо наш, яко пречистый и пресвятый, грехом оным зело прогневан бысть, того ради человека предаде смерти, изгна из рая и осуди,²⁰⁴ да вечное мучение по временной смерти поимет во аде. Яко ветви в корени, тако мы вси тогда бехом во Адаме (сице бо именовашеся первый человек). Убо оному за грех осуждение подъявшу, вси погибохом, греха его участницы бывше, не устоит бо здание, колеблющуся основанию, и злое семя не может добрые плоды издати. Сия, яже изрекох ти, вся от правосудия зависят, еже требует или удовлетворения, или наказания за грех. Мы, осквернены суще и праотеческим, и произвольными безчисленными грехами, удовлетворити правде отнюд не возмогохом, того ради Сын Божий, милосердием привлекаем, сниде с небесе и воплотися, якоже Рех ти, да нас искупит от осуждения и смерти. Подобаше бо удовлетворению страданием совершитися, а Божество есть смерти непричастно, безстрастный убо Бог плотию пострада, и убо сим страданием спасаемся, верою присвояюще себе заслуги Христовы, оправдаемся и воусыновляемся Богу. Разумевши ли отсюду, яко вменяемыя нам заслуги Христовы суть нашего искупления безконечная цена. Подобно бо сия быта, яко аще бы кто за неимущаго должника удовлетворение своим богатством сотворил, или бы праведный кто предал себе смерти, да повиннаго искупит».

42. Зде царевна, прервав святаго беседу, ражжеся бо велми любовию к Богу, возопи: «О глубина недоведомых таинств! Кто не удивится толикой премудрости? О лютыя погибели нехотящих слышати проповеди Божия слова! О благий Иисусе! И кто тя не возлюбит за толикую твою любовь, весь бо еси сладость?» Таже, обращен к князю, рече: «Молю тя, господине мой, буди мне вместо рождшаго мя отца, присоедини мя избранному Христову стаду, не потерплю бо отселе отчуждатися толиких благ, ихже наслаждаются христиане». Возрадовася убо князь вельми со всем домом своим о сем и абие посла призвати епископа, иже, огласив ю²⁰⁵, крести. Бысть же от святыя купели восприемник сам благоверный князь, и преименоваша ю Агафиею,²⁰⁶ в знамение ожидаемых за доброе ея усердие благостей небесных. Наутрие же зельному належащу недугу, вконец изнеможе блаженная Агафия. Посла убо к благоверному князю, моля его, яко да не бы обленился приити к ней. Егда же прииде князь, то она возблагодари ему за вся сия благая: «Твоим, – рече, – благодеянием аз неизреченно одолжена есмь, наипаче же, яко был ми еси наставник и предводитель ко Христу, ныне же аз с радостию скончаваюся. Господь мой Иисус Христос да воздаст ти за мя!» Таже, причастився Святых Таин, с миром о Господе успе, и погребоша ю при церкви честно.

43. Сим тако бывшым, повеле благоверный князь Кавгадыя призвати к себе. Он же, пришед пред княжеское лице, вострепета от страха, совесть бо его люто угрызаше, и мняше, яко князь абие велит его смерти предати, паде убо на лице своем пред князя, глаголя: «Согреших, господи²⁰⁷ мой, пред тобою, яко толикая нанесох ти злая, обаче ты, благ сый, не помяни беззаконий моих ради Бога, егоже подобие носиши на себе». Благоверный же князь, абие притекши, воздвиже его от земли, глаголя: «Дерзай, Кавгадый, востани, не бойся, Божий бо есмь аз, сего ради в той же самый час, егда брань совершися, забвению вся предах, да и прежде никогдаже гневахся на тя и желах ти мщения, но точию живот мой защитах мечем, долженствуем бо защищати и сохранити, елико мощно, здравие свое, по повелению, да не самоубийцы будем. Ныне же не поношаю ти, ибо яко человек согрешил еси, обаче внущи словесем моим, яже реку ти в ползу: виждь, Кавгадый, яко еже умыслил еси мне сотворити, Бог обрати на твою главу, и впаде в яму, юже ископа другому, не дивися сему, ибо не самослучен²⁰⁸ есть свет, но Божия вседержителная сила, правда же и премудрость управляет вся. Вскую убо немощнейшая тварь человек продерзостно и гордостно возносится на Бога, а не паче смиряется, зря свою тленность? Истаевает бо живот наш, яко воск от огня, и дние проходят, яко быстрая река, яже не возвращается никогда, убо умрем вси. Вскую горести умножаем, Вскую призываем смерть, да поспешшися нас истребляет? Не лучше лн тишина неба, нежели обуревания морския? Не лучше ли согласие и мир, нежели кровопролития и брани? Брани неизвестен конец; на брани, иже стояше, падет, иже лежаше, востанет, да никто уповает на ся; мира же известен плод, яко обогатится земля, возвеселятся людие и умножатся народы. Разумей, Кавгадый, яже глаголю: ты умыслил мне нанести язву, ныне же смири тя Господь, предаде тя в руце мои. Аще бы хотел, не могл ли бы тя убити? Обаче да веси, яко Христовы рабы мщения не ищут, ниже радуются о погибели врагов; прощаю ти вину и дарую ти живот».

44. Сия слышав, Кавгадый, аще и окаменен бе сердцем, обаче прослезися и пад на нозе великаго князя, благодарение ему возсылаше, глаголя: «Щедрота и великодушие твое есть безмерное, великий кияже! Ныне разумех добродетели христиан, ныне удостоверихся, колик ты пред Богом. Темже благодарю тя, великий кияже, за твои щедроты, яже изливавши на мя, и се предлагаю ти завет²⁰⁹, яко аще пустиши мя, не точию никаковаго зла не восхощу ти нанести никогда, но и буду всевозможное тщание прилегати о ползе твоей и всего народа». Глагола ему князь: «Еже рекл еси, утверди клятвою, и пущу тя». Кавгадый же клятся, глаголя: «Да погибну от земли, и да поразит мя небо, аще не пребуду в завещанном слове!» Тогда святый Кавгадыю рече: «Зри, яко мщение Божие призвал еси на свою душу, еже непременно постигнет тя, аще солжеши, Бога бо прелстити²¹⁰ невозможно, он бо тайная сердца видит и на клятвопреступных, ругающихся ему, неумытен²¹¹ есть судия». Отвеща Кавгадый: «Ей, великий княже, не солгу, кленуся ти небом и землею, наипаче яко преобидех тя много, царь бо не повеле ми воевати на твою державу, но точню возвести князя Георгия на престол и усмирити точию тех, иже бы хотели сопротивлятися тому». На сие святый рече: «Не вопрошаю тя болше ни о чем, ибо следствия творити над тобою не хощу, и сам аз все то вем, еже бы хотел еси изрещи, но точию объявляю прощение и свободу, не точию единому тебе, но и всем пленным с тобою. Ныне убо идите с миром, сохраняя нерушимо слово, еже завещал еси со мною». И тако отпусти всех пленников, напутствовав их нужными к содержанию и шествию вещми.

45. Между тем великий князь Георгий, побежав, якоже рекохом, с малым числом в Новград от брани, паки собра своих, иже живи осташася, воев, к нимже присовокупив множество новгородцев и пскович, пойде ко Тфери, хотя во отмщение святому вторичное составити сражение. Святый же князь, щадя христианскую кровь и не терпя видети толиких разорений, имевших последовати, малым числом воев провожаем, изыде к нему и срете его противу Синевскаго,²¹²· идеже с своими ополчашеся великий киязь Георгий, и, дерзнув, небоязненно вниде в неприятельский полки, помышляя в себе предускорити кровопролития и разорения, яже сии умыслиша сотворити. «Аше ли же ни, то сам аз, – рече, – добровольно предамся в руки их, яко да, насытившеся крове, или пощадят других, или да не вижу имеющая быти на земли стенания и воздыхания». Обаче Богу его соблюдающу, никтоже ему коснуся, ниже дерзну что противное реши, и уста бо их загради Господь, якоже при Данииле львом в рове,²¹³ и руце невидимою силою связа, яко Исаву иногда, иже против кроткаго Иакова ополчашеся.²¹⁴

46. И тако святый князь, прошед полки, дойде до князя Георгиа. Видев же сей святаго, абие пременися сердцем от гнева на любовь и, притек, объя святаго, прирек: «Добре пришел еси, брате мой любезный». Ему же святый возответствова: «Господь да сохранит тя от всякаго зла и да низпослет ти благословение святое свыше». И целовастася, таже внидоша в шатер, и, седше, начат святый глаголати ко князю сице:

47. «Ты веси, брате, яко недавно имехом кровопролитное сражение, и земля еще не очистися от крове, еще трупия не истлеша мертвых, что убо ускорявши паки погибелную язву нанести на людей убогих. На сие ли Бог воздвиже нас в князи народу? На сие ли порождени есмы, да будем погибелью людем? И где должности наши и обещания, яко кляхомся пред Богом, да защищаем народ и да будем яко отцы подданным своим? Остави, брате, молю тя, великаго ради имене Божия, еже от начала призвася на нас, остави намерение твое. Вскую изощрявши на блато топор? Вскую противу комара строиши махины и извлекавши мечь? Аз не противлюся ти ни в чем, скажи, чесо хощешн, тебе ради и ради общаго покоя вся сотворю. Не видиши ли, яко сам аз изыдох и вдахся в руце твои? Твори со мною, еже ти угодно: аще изволиши, вонзи мечь твой в сердце мое, аз бо с радостию умру, точию да своею смертию мир воздвигну в России; аще ли сего сотворити не хощеши, то паки тя вопрошаю, чесо ища, пришел еси во владение мое. Не отрекохся ли княжескаго престола тебе ради? Не оставих ли ти вся в целости, яже ми во Владимире быша? Не удалихся ли во отечествие мое, дабы тебе ни единаго случая к подозрению не подати? Не живях ли мирно? Кто тя воздвиже на мя? Аще ли чим раздражих тя, отдаждь неправду мою. Разве негли²¹⁵ то тебе безпокоит, яко живу еще? Живу убо, яко воля Божия продолжается о бытии моем; егда же неизбежный предел жизни моея настанет, оътиду вслед бывших от века. Престани на мя злобствовати, княже, Бог свидетель совести моей, яко ничимже винен есмь пред тобою; аще ли же ни, убий мя убо ты, якоже Рех ти, видиши, яко един есмь с тобою; убий мя, яко уби незлобиваго Авеля Каин,²¹⁶ и возврати отечеству покой».

48. Князь Георгий, слушая сия, седяше, в землю потупив очи, таже воззрев на святаго, рече: «Прости мя, брате, за вся злая, яже нанесох ти, велия бо есть моя неправда пред Богом и тобою, а во языце твоем несть ни единыя льсти, яже изрекл ми еси, вся тако суть; и убо аз раскаяние приношу пред тобою и обещаюсь впредь никогда не воевати на твою державу; живи в мире, и аз пребуду в покое, а яже доселе быша, веру ми ими, яко вся быша по наущению других».

49. «По наущению других?! – отвеща святый. – Что аще бы кто советовал кому, да обесит камень жерновый на выю²¹⁷ свою и ввержется в море? Еда послушал бы чужаго гласа? Подобно есть и сие, паче же и болше. Коликия бо опустеша веси и селения, осиротеша младенцы, овдовеша жены, старцы лишишася помощи, и ихже тогда не пожре смерть, тии умроша гладом. Люте нам, яко унее бе нам единым, якоже Рех ти, ввергнуться в море, нежели толикая сотворити злая, о нихже в пришествие Господне страшное истязание²¹⁸ наступит. И како явимся тамо? Кий воздадим ответ? Како избежим осуждения, нещадно убогую братию Христову, ихже подобаше миловати, умучивше? Обаче грех да понесет наушник и ласкатель, возжегший толикий пожар, нам же надлежит отныне опасно²¹⁹ жития нашего препровождати время, выну пред очима Божий имеюще закон, и аще кто советует согласная закону, тому последовати, льстецов же и ласкателей, яко орудий диаволских, всячески блюстися. Таковии бо людие суть прегубителнии в свете, наипаче же для высоких властей, ихже они окружают, зело опасни. Увы, брате мой, яко сии лукавии человецы под видом доброхотства ведают хитро покрывати лесть свою; мы же, не могуще проникнути в злое их сердце, прелщаемся часто и, вредным их последующе советам, падаем в неприязненную сеть лукавства. Не о таковых ли вещает Бог чрез пророка: «Сыне человечь, ты посреде скорпий живеши»,²²⁰ – мнози бо бяху во иудеех лживии пророцы, вси же таковии именуются в Писании прелестныя звезды,²²¹ дважды умершая телеса,²²² аггели сатанины,²²³ волцы хищнии²²⁴ и проч. Темже убо всякий властелин должен есть всемерно блюстися их.»

50. Отвеща Георгий киязь: «Добре глаголеши, княже, и якоже советуеши мне, потщуся блюстися, да не кто от таковых прелстит мя. Ныне убо утвердим между мною и тобою завет, еже мирно и любезно по Бозе жити нам отселе». Благо слово приложи князь: «Святый Дух Божий проглагола усты твоими. Завет, егоже предлагавши, приемлю тако, яко завет Христов; обаче, ведая, разумей, яко подобает его свято и нерушимо хранити; аще ли же кто разрушит оный, того разрушит Бог в конец, якоже из Писания доволно веси». На сие князь Георгий отвеща: «Буди тако: кто утвержденный сей между мною и тобою завет разрушит, да разрушит его Бог». И к сему оба вкупе приложиша: «Буди тако. Аминь». Таже, воставше, целовастася, и бысть в той день велия радость во всех. И поведа святый князю вся, яже збышася во Тфери, како супруга его в добром исповедании скончася, како Кавгадыя отпусти, утвердив с ним завет, и прочая. Егда же святый хотяше возвратитися во своя (ибо великий князь Георгий потщася с воинством отъити во град Владимир), предложи ему святый, да аще угодно явится слово, пойдут вкупе во Орду к царю, да некую милость исходатайствуют у него христианом, яко да престанет озлобляти их и уменшит наложенныя дани, яко несносны суть. Соизволи на сие князь Георгий; и совещастася в грядущее лето, еже умыслиша, исполнити делом, и тако разыдошася.

51. Великий убо князь Георгий, пришед во Владимир, обрете Кавгадыя, ожидающаго его ту, и, совокупився с ним, паки начаста вкупе на святаго составляти ковы²²⁵. «Зри, – рече, – коликий стыд и срам нанесе он не точию княжению сему, но и всему татарскому царству, поразив нас, плени и, яко хищный волк, обогатися нашими корыстьми²²⁶, умертви же и великую царевну; аще ему потерпим, то никогда не возможем в спокойствии жити, он бо улова на ся, не престанет возмущати нас», – сице сии на праведнаго и незлобиваго совещашася мужа и, забывше кийждо клятвенная обещания своя, предвариша святаго и отъидоша к царю во Орду, поемше с собою вся князи низовския земли²²⁷ и боляр всех градов, еже клеветати на святаго к царю.

52. Егда же приидоша во Орду, абие царь повеле всех представити пред собою, иже, представше, начаша многия лжи клеветати на святаго, к нимже присовокупиша и сие, яко он и царския власти отторжеся, и отречеся прийти к нему, укорительно вещая: «Кто есть сей варвар нечестивый, дабы аз на поклонение к нему пришел?!» Слышав же сие, царь разгневася зело, яко изменитися ему лицем и сотрястися от распаления ярости, и возопи: «Увы мне, яко от единаго проклятаго человека того преобижается моя держава, еяже трепещут земля и море; тако ми силы моея, яко не будет жив той человек» . Таже, призвав некоего от велмож своих, именем Ахмыля,²²⁸ посла его к блаженному князю, да объявит ему царское повеление свое, яко да непременно чрез четыредесять дней приидет во Орду; аще ли же сего не сотворит, да предложит ему лютую рать, поносную²²⁹ смерть и разорение всего наследия его.

53. Святый же великий князь, духом предвидя вся, совещаваемая и грядущая на нь, призва сына своего князя Константина и посла его пред собою во Орду, глаголя; «Шед, чадо, явися царю и рцы, яко и аз вскоре имам лицу его предстати; виждь бо, яко князи наши, не возвестивше, предвариша нас, и боюся, да оттуду царь не возимеет некоего подозрения на нас и не стал бы пакости какия строити нам. Тако бо научихомся от Христа, да нанесенное зло терпим великодушно, обаче самих себе подвергати опасности и бедам не повеле, но еще и отвращати зло, елико возможно, подобает по примеру святых, иже ово бегствиями, ово извинениями, ово молениями и кротостию укрощаху гнев, прогоняху зло и защищаху жизнь. Жизнь бо от Бога имеем. Убо мы над нею власти не имеем, и должни есмы оную, яко Божий дар, сохранити до повеления Господня».

54. Отшедшу князю Константину во Орду, призва блаженный супругу свою Анну, якоже пишется в Житии ея, и от великия скорби горько прослезися пред нею наедине, таже начат глаголати: «Время лютое наста, о госпоже моя! Яко сие дух мне предвещает: паки врази мои злохитрыя на мя составиша советы и внушиша царю, воеже бы имя мое истребити от земли. Увы, яко тяжестен бых людем, аз же потщахся никогоже озлобити никогдаже; убо да умру аз, яко да престанет злоба и успокоится вся земля, аще за мя страждет». Отвеща благоверная княгиня: «Ни, княже, ты не тяжестен еси земле, вси бо подчиненнии твои, под крилами щедрот твоих покоящеся, сие свидетелствуют согласно, но твои добродетели порокам несносны. Может ли когда злобный кроткаго и смиреннаго любити, и неправда не всегда ли воюет на правду? Сам Дух Святый в Писании изрек: «Яко вси, хотящий благочестно жити о Христе, гоними будут».²³⁰ Причина сего изъявляется во Еваггелии; «Всяк, – рече, – делаяй злая, ненавидит света»,²³¹ – и паки: «Вы от мира несте, сего ради ненавидит вас мир».²³² Что, скажи мне, овцы согрешиша волкам, яко сии всегда враждуют на тех? Убо Вскую желаеши смерти, якоже рекл еси, да умру, умрем бо вси, но Богом уставленный жития предел в терпении ожидати должно».

55. Отвеща благоверный князь: «Не мни, яко малодушествую аз и в нетерпении желаю себе смерти. Ни, госпоже! Но рекох ти, яко надлежит ити ми во Орду, аще царь прогневався на мя и хощет мя убити; аще ли же не иду аз туда, то приидут онии варвары, и опустошат всю землю, и нас избиют». На сие святая княгиня от великия надежды на Бога устремительно рече: «Почто боишися злочестиваго царя? Несть неправды в нас, за веру бо и отечество стоим; аще и малы есмы числом, обаче Бог поборет по нас. Не явный ли Божия помощи пример недавно имел еси пред очесы твоими, егда врази твои овии, сокрушившеся, падоша на брани, овии, плещи давше, со стыдом побегоша, овии же пленены быша и приведены во град? Не убойся убо горделиваго царя, ибо и он падет и падет наипаче, яко дерзает хулу глаголати на Бога; не предавайся, яко агнец, в челюсти того несытаго волка».

56. На сие князь рече: «Ни, великая княгиня, мне подобает всяко предстати лицу царя, ибо аще бы аз и известно ведал, яко победою над ним Бог нас увенчает, обаче оную многими разорениями убогих и многим пролитием крове надлежит купити. Веси татарскую лютость: аможе²³³ аще обратятся, все опустошают, яко силное возгорение огня, и колико душ погибнет за мя от Орды доселе и зде во отечествии нашем; убо да сия не вижу, всяко подобает ми во Орду ити, воля Господня да будет. Аз бо от многа времени желаю пострадати за имя Христово и душу положити за порученное ми от Бога стадо». Глагола княгиня: «Аще тако есть, яко желаеши пострадати за святое имя Господа нашего Иисуса Христа и за достояние его, еже честною своею кровию искупи, блажен воистинну будеши, блаженство бо Писание приписует страждущым правды ради и умирающим о Христе и полагающим душу за братию свою.²³⁴ Обаче блюди, великий княже мой, да не прельстят тя хитрии человецы обещаниями и ласканиями своими. Блюди же, молю тя паки, да не убоишися мучений различия и множества орудиев смертных. Пребуди в добром исповеданни, пребуди верен тому до смерти, иже Бог сый истинен горькую за нас на кресте чашу смерти испи и тем даде нам образ, да последуем стопам его». Сия и сим подобная блаженней Анне глаголющей, зело возрадовася святый и велие Богу возсылаше благодарение, яко устами супруги своея извещение о том своем намерении приять.

57. Таже призвав дети своя и поучив я доволно, еже жити в страсе Господнем, покарятися матери своей и добрым ея исправлениям последовати, благослови единаго коегождо их, рек: «Бог весть, увижу ли вас еще, чада, обаче Богу, всещедрому Отцу, вас препоручаю, той попечется о вас; вы же живите согласно и мирно, якоже подобает детем, покорным отцу, и препочиет благословение на вас. Аще ли же вражда вселится между вами, блюдите, да не един от другаго истреблени будете; матерь вашу почитайте, сия бо есть воля Божия, она же сохранит вас в добром наказании, якоже и мене моя воистинну блаженная и богомудрая мати Ксения. Осиротел бо аз прежде рождения моего, якоже весте, обаче Бог чрез матерь возрасти мя, тако и вы не будете оставлени никогдаже». Потом состави им завещание и раздели княжение, глаголя: «Будите довольни сим завещанием моим: се разделих вам достояние мое, да кийждо свою часть имеет, и да не будет вражды и несогласия между вами. Аще умеренно и добродетельно поживете, можете быти довольни своими уделы, еще же и преизбудут вам вся, и приложатся вящше, и руки ваша будут на плещи врагов ваших, вы же не постыдитеся никогдаже. Аще же за пороки впадете в скудость и беды, себе окаевайте, а не Бога и мене. Се Рех вам: внушите словесем моим и помните, еже сохранити я, и Бог мира пребудет с вами». И тако отпусти их от себе.

58. По сих иде благоверный князь к святителю Божию Варсонофию епископу и взя благословение у него, такожде и вся святая, бывшая во Тфери, места обшед, даде всем целование и мир, и на другий день зело рано, знаменався крестным знамением, ятся пути, провождающым его многим от града, в нихже бе первая блаженная княгиня Анна с чады своими. Пришедшым же им к реце, называемой Нерли, пригласи святый духовнаго отца своего Иоанна,²³⁵ пред нимже, излияв все сердце свое Богу, истинное исповедание грехов приношаше надолзе, предочищая свою святую душу. Таже, взем благословение у отца, отпусти возвратно всех, сам же поят два сыны своя Димитриа и Александра, Василью же, яко младшему сыну, повеле с материю возвратитися, идяше во Владимир град. Коликия же излияшася на землю от обоих стран при разлучении сем слезы, невозможно есть изъявити словом! Сам князь, человечеством препобеждаем, рыдаше, яко оставляет отечествне свое и разлучается с любезными други и чады. Княгиня же с прочими рыдаху, яко лишаются добраго отца и великаго пастыря и покровителя. На мног убо час не могуще глаголати от слез, очима точию взираху друг на друга и едва наконец возмогоша разлучитися в предлежащыя им пути.

59. Егда же прииде благоверный князь Михаил во Владимир, тогда постиже к нему и преждереченный от царя посланник Ахмыль, объявляя ему вся по ряду, како клеветаша на него к царю, како прогневася царь, и како его посла, и что рещи повеле. Слышавше же сия, предстоящии боляре советоваху святому, еже не ходити во Орду и не возвращатися во отечествие свое, но уклонитися на время в безвестное место, Дóндеже мимо идет царев гнев. Такожде и сынове блаженнаго глаголаху: «Уклонися, молим тя, дражайший родителю, на время от царева гнева, яко оболган еси, и опасность велия наложить²³⁶; мы же идем с боляры нашими во Орду к брату нашему Константину и тамо утолим царев гнев кротким извинением, или мы да умрем вместо тебе». Кроткий же умом муж и преисполненный всякия добродетели, великий князь Михаил, отвещав, рече: «Ваша, яже изрекосте, словеса, происходят от любви ко мне, о любезная чада и вожделеннии друзи, обаче видите, яко любовь истинная долженствует зрение имети, без сего бо удобно поползнемся²³⁷ в различныя страсти, вместо неувядаемаго благополучия поработившеся мнимому добру, еже раждает отступление от Бога и греховный плен. Вы ресте²³⁸, да скрыюся от царева гнева; и аще аз сие сотворю, кто весть, что имеет последовати потом. Что аще царь всех вас истребит мечем? Что аще, пришед на отечествие мое, в конец опустошит? Что аще мене пойдет искати велед? Коликую тяжесть претерпит земля, коликия разорения причинятся везде, коликия душы ненасытимая пожрет смерть, и кто за вся сия Богу воздаст ответ? Не и мене ли Божие за то мщение постигнет, и грозный Судия вечному мя осуждению предаст? Убо не препятствуйте ми, да иду к царю, унее²³⁹ бо есть, да аз един умру, а не толикия за мене единаго постраждут. Единожды бо умрети предлежит ми, и почто неизбежное отлагати надолзе? Пожих довольно, ныне конец житию наста, умираю с радостию, мня сие приобретение быти, яко пожих со Христом и добрым подвигом подвизахся». Сия рек, прослезися святый и, воздохнув от сердца, умиленно возде руце свои на небо, глаголя: «Увы мне, яко пришелствие мое продолжися!» [Псал. 119, стих 5].²⁴⁰ «Когда прииду и явлюся лицу твоему, Боже!» [Псал. 41, стих 3].²⁴¹ Посем надолзе, якоже обычай имеяше, детей своих поучив и написав им грамату о разделении отеческаго достояния своего, отпусти возвратно всех, сам же пойде во Орду.

60. Егда же достиже святый до устия Дону реки, идеже впадает в Сурожское море,²⁴² ту сретоша его князь Константин, сын святаго, и приставы, иже под видом благоволения некоего послани бяху от царя, еже проводити святаго с честию и блюсти, дабы ему не воспоследовала каковая обида на пути от татар. Тако провождаемь, достиже святый во Орду и, шед, одари по обычаю вся князи ордынския и царицу, потом и самого царя. Вси же тии умягчивше словеса своя и, притворством покрывше гнездящуюся на сердцах своих злобу, прияша святаго честно и повелеша ему некое время пребыти, глаголюще: «Утрудился еси от пути, княже, препочи и успокойся, яко в собственном дому, вси бо здешнии попремногу любят тя, и ты не смущайся ни о чем». Святый же разумеваше, что оная словеса суть, и, помышляя в себе, удивляшеся хитрости и лукавству людей, како они знают яд аспиден под языком скрывати, коим, лобзая, убивают. Таже рече: «Весь мир во зле лежит, и малыя дети умеют прельщати сетию птиц и удицею рыб, сладкую представляя пищу. О, когда истребится зло и возсняет Царствие Божие на земли? Когда диаволя разрушится прелесть?»

61. Прешедшим же неколицем днем, призва царь советники своя и рече им: «Кую речь изнесосте на князя Михаила, аки бы он обиду нанесе Георгию князю? Шедше, испытайте о словеси сем, аз бо правду хощу хранити, и иже из них явится виновен, достойную да поднимет казнь, праваго же помиловати хощу». Собрашася убо вси ординстии князие во едину вежу²⁴³, яже бе за царевым двором, в нихже бе началствуяй лютый Кавгадый, о немже прежде рекохом, и послаша пригласити на суд святаго великаго князя Михаила. Он же, слышав сия, воста скоро и, знаменався крестным знамением, поклонися Господеви, глаголя: «Благодарю тя, Боже и Отче мой прещедрый, яко предначинаеши постилати ми путь, имже, тленности тела сего свобождшися, достигну к желаемому раю». Таже, яко незлобивый агнец, грядяше к злочестивому тому собранию волков; пришед же, ста дерзновенно на суде, обаче вид глубокаго смирения, имже украшашеся от детства, сияше приятно на лице его. Реша убо судии святому: «Рцы нам истину, княже, принеси признание, и простит ти царь вину». Отвеща святый: «Измлада не навыкох лгати, аз правду вам исповедую, яко несть вины моея ни единыя пред царем». Тии же реша: «Обличим тя, княже, яко вся известно вемы, обаче унее ти есть, да сам признание принесеши, и мы умолим царя за тя». Святый же тихо рече: «Еже умыслисте творити о мне, творите, несть вины моея ни единыя пред царем». На сия словеса возревеша вси онии, составляющий весь сонм, глаголюще: «Зри окаменение сего человека, яко не умягчается ничимже», – и начаша многая валити²⁴⁴, клевещуще на святаго, сами бо и доносители, и соперники, и послухи²⁴⁵, и судии бяху.

62. Предлагаху же сии наипаче вопросы: «Чесо ради сопротивися произведению великаго князя Георгия на престол? Чесо ради сражение име без царскаго соизволения? Чесо ради посланника царева плени и нужно изнури²⁴⁶ многих? Чесо ради умертви татарскую царевну, бывшую за Георгием князем? Чесо ради дани многия собра и корысти, яже подобают царю, и не прииесе я? Чесо ради укори царя и отречеся во Орду приити?» Отвеща святый: «Произведению Георгиа не сопротивляхся, но паче много способствовах, сам он может свидетелствовати, аще хощеть. Сражение имех защищения ради отечества моего, не могл же царскаго повеления просити, яко далече бяше, а время медления не терпяше. Царева посланника не плених, но точию предводителя разорений, обаче с честию и дарами отпустих его со всеми. Се Кавгадый зде, да скажет правду. Царевну не умертвих, но сама естественною смертию скончася с миром. Пошлите вопросити тамо. Дани никакия не собирах, но и яже ми бяху, вся царю дах, свидетельствуют книги, и праздная сокровища²⁴⁷ моя, и весь под моим правлением находившийся народ. Царя же николиже укорих, ведая, яко несть власть, аще не от Бога, и не отрицахся во Орду приити, паче же и Георгию советовах о том, умедлих же, яко не сказаша ми единоплеменнии мои и предвариша мя. Не и посланник ли царев на пути шествующа мя обрете? Аще ли когда кого и укорях, якоже мнится вам, обаче исправления ради, и не уничижах человека, но на пороки устремляхся, тин бо зело ненавистни суть мне и терпети я²⁴⁸ отнюд не могох. Се истину вам рекох, свидетель ми есть Господь мой Иисус Христос, иже воздаст комуждо по делом его».

63. Отвещавше же князие ординстии, рекоша: «Еще ли и Христа зде в свидетели приводиши, и кто есть Христос, да верим ему? Ты сам хитро исплел еси лож, обаче не избудеши суда, повинен бо еси всему тому, яже предложихом²⁴⁹ ти». Воззрев же святый с негодованием на них, рече: «Вы, еже хощете творити, творите ми по единым пристрастиям вашым, яко правду слушати не хощете и прогнасте ю от себе, обаче Христа, моего Господа, не укоряйте, той бо всеведущ и праведен, ускорит низпослати гнев свой на хулителей имене Своего и истребит я вконец²⁵⁰, яко не обрестися им месту на земли, Его бо есть земля, и Он всея твари владыка».

64. Сия слышавше, татарове реша: «На сие ли тя призвахом, да зде проповедуеши Христа? Еда и нас хощеши своею безумною ересию повредити? Ни, не буди то, но глаголем, яко ты человек еси, преисполненный всякия лсти и коварства, беззакония твоя и злость вопиет на главу твою, обаче аще сообщишися²⁵¹ добрей нашей вере и нам житием и мудрованием подражати начнеши, можеши имети надежду наслаждатися еще сладкою сего света жизнию. Аще ли сего сотворити не восхощеши, не избежиши мучительнаго осуждения и поносныя смерти. Отъиди убо отсюду, нечестиве, отъиди, не терпим бо видети твою главу скверную».

65. Тако укоривше святаго, изгнаша вон и повелеша, да под стражею узами связан, блюдется, идеже бе святый по обычаю своему в непрестанных молитвах, богомыслии же и умилении благодаря Бога. Они же, совещавшеся, идоша к царю, возвещающе ему безчисленныя глаголы ложныя на святаго, яже сами лестно сплетоша, и тогда абие определяху ему умрети, рекше: «Да умрет злочестивый оный, не достоин бо есть жити». Обаче царь повеле, да другое ему истязание сотворят. Сие же, не яко хотя изследовати правду, но точию свою покрыти злобу. Может ли бо добродетель вселитися в злочестивую душу, и правда между разбойниками может ли имети место?

66. Минувшым убо седми днем, вторично изыде повеление от ордынских собравшихся князей, да представят святаго на суд; прииде же великий князь, связан по руку оковами, и пред ними ста, они же, свирепо воззревше на нь, паки начата святаго вопрошати, о немже и на первом суде истязан бе. «Рцы нам, – глаголаху ко святому, – еда ли прииде в чувство, еда ли умягчился еси сердцем, еже сказати нам правду, юже прежде утаил еси, еда ли согласился еси на предложение, еже сообщится нам? Се предлагаем ти последнее увещание, да аще повиновение принесеши, добре, аще ли ни, зле умреши, воздаждь убо ответ на преждепредложенныя ти вопросы». Ответа святый: «Рех вам всю истину, но не приемлете ю, что еще хощете слышати от Мене? Еда ли яко безумный младенец буду, да, убоявшися ваших угрожений, против совести солгу на ся? Ни, Бог бо возненавиде всякаго, глаголющаго лжу, повеле же и правду небоязненно исповедати пред всеми. Разсудите убо, кого паче послушати должно, вас ли или Бога. Ни, не солгу аз; вы же, аще хощете истину уведати, испытание сотворите, призовите свидетели, учредите порядочное следствие, все явно будет; вашым же суетным мудрованиям, яже к пагубе приводят, не соглашусь никогда. Вы паче, познавше истину, поработитеся Христу, да получите живот вечный». Тогда возопиша князие от ярости: «О, продерзости! О, безстудства!» И обращшеся ко святому, реша: «Ты ли ны учиши, неключимая²⁵² главо? На что свидетели? Не требуем следствия. Дела твоя гласят: повинен еси, покайся или согласися с нами и рцы правду».

67. Святый же, видя, яко умножися вконец злоба, и зависть, ослепляющая их очеса, не дает правде места, прочее²⁵³ умолча. Неистовствующии же тии судии настояху на него, вопрошающе и поношающе, обаче святый ничтоже проглагола, но, терпением оградився, пребысть, яко камень, волнениями морскими непоколебим. Тии же, видяще, яко молчит святый, осудиша его, рекше: «Повинен есть, ибо совестью угрызаемый, признание и согласие приносит». По сем изгнаша святаго паки с безчестнем вон под стражу, яко и прежде. Бе же суббота той день, и приставите к нему от седми князей седмь суровых стражей²⁵⁴ со инеми многими, заповедавше им, да нозе святаго забиют в кладу²⁵⁵, да будет окован по руку, и да, изгнавше всех боляр и знаемых от святаго, никогоже пустят к нему собеседования и служения ради.

68. Сия вся сотвориша, пришедше стражие тии и оградивше святаго даже до одежд его и иных вещей, яже ему бяху в намете²⁵⁶, и, разделивше по себе, седоша, стрегуще его и ругаюшеся ему, укоряху, глаголюще: «Что, княже, где гордость твоя? Мы тебе усмирим, да уразумевши татарскую силу и власть». Святый же терпеливо на вся деемая взирая, глаголаше в себе: «Обыдоша мя врази мои, яко пчелы сот» [Псал.117],²⁵⁷ «Друзи мои и искреннии мои далече от Мене сташа» [Псал.37],²⁵⁸ «Благословен Господь, научаяй руце мои на ополчение» [Псал.143],²⁵⁹ «Господь пасет мя, и ничтоже мя лишит» [Псал.22].²⁶⁰

69. Во утрие же, свитающей неделе²⁶¹, повелением беззаконных варваров, освободиша нозе святаго от клады и отрешиша²⁶² руце, но точию на честную его выю возложиша кладу велию и тяжку, яже проображаше у них поносную²⁶³ муку, и повелеша, да клада оная на выи его будет, руце же его да связывают и забивают в кладу точию нощию. Таже, вящшаго ради поругания и безчестия, изведоша святаго, да течет вслед царя, иже тогда идяше с своими боляры на лов²⁶⁴. Тече убо святый весь день той, аможе аще идяше на коне своем царь, к вечеру же возвратистася в стан, обаче святый, ово от толикаго подъятаго труда, ово от неносныя²⁶⁵ тяжести клады, ово от многаго неядения утруждся, изнеможе вконец и, вшед в определенное ему место, паде, яко мертв, на лице своем. Стражие же по повелению связаша его паки и забита в кладу.

70. Минувшым же неколиким часам, воспрянув святый и, очи воздев на высоту (обременяем бо тяжестию вериг, не можаше востати), помолися в себе, глаголя: «Слава тебе, всещедрый Владыко, Господи душелюбче, яко сподобляеши мя участника быти страдания и креста, егоже вси доблествении мужи, на рамена²⁶⁶ подъявше, доброму последоваша предводителю Христу и тесным жития путем внидоша в живот. Слава тебе, Человеколюбче, яко сими оковы удостоверявши мя недостойнаго о твоем благоволении ко мне. И кое ти благодарение принесу? Что ти воздам за толикую милость? Ныне аз свободен, яко вси мя оставиша и всего того лишихся, еже бы возмогло душу мою пленити, и незыблемым упованием всажден есмь в Бозе, той мне сокровище, той веселие, слава же и честь. Ныне аз воистинну блажен, яко сподобляюся Христовым страстем сообразоватися²⁶⁷. Ныне аз победитель и царь, Христова бо, яже во мне, сила разоряет вся коварства врагов. Ныне конец желаний моих наста, и что ми еще восхотети на земли. Даждь ми убо, Господи, совершенное терпение, да возмогу до конца преплыти сия обуревания мира».

71. В сих и подобных размышлениях вся нощи препровождаше святый. Пища же ему весма скудная давашеся от мучителей оных, обаче святый доволен бяше ею, навыче бо воздержанию измлада, емуже паче прилежаше, путем шествуя от Владимира во Орду, на немже обретаяся, во всякую неделю²⁶⁸ причащашеся пречистаго Тела и Крове Владычни; а отнележе взят бысть, вся нощи без сна препровождаше в глубоких воздыханиях и слезах, исповедался Господевн и непрестанно пояше богодухновенныя пророка Давида псалмы, имиже соуслаждашеся и увеселяшеся, яко некоею на велицем пиршестве мусикиею. Поскольку же руце его оковами вязахуся в нощи и не можаше книгу держати сам, сего ради испроси у стражей, да позволят быти единому своему отроку при нем, иже, седя, держаше книгу и прекладываше листы. Молящуся святому, множае же чтяше наизусть следующыя псалмы: «Помилуй мя, Боже, по велицей милости твоей» [Псал.50],²⁶⁹ «Господи, услыши молитву мою» [Псал.71 и 142],²⁷⁰ «На тя, Господи, уповах, да не постыждуся вовек» (Псал.30],²⁷¹ «Спаси мя, Боже, яко внидоша воды до души моея» [Псал.68],²⁷² и прочая, сим подобная.

72. Тако святый препровождаше нощи, во дни же бе видети его светлым и веселым лицем, акибы склабящася²⁷³, и ни единаго не подъемлюща озлобления; егда же прихождаху к нему боляре его посещения ради, и видяше их святый, сожалеющих и скорбящих о нем, глаголаще к ним: «Се ли вам прискорбно, о друзи мои, яко зрите мя ныне, плененна и окованна отвсюду и тяжесть сию носяща на выи? Но не стужайте, ниже смущайтеся, вскоре бо узрите мя свободна и разрешенна плотских оков и предстояща Христу. Не смущайтеся, молю, яко давно желанныя ми дни ныне возсияша, иже предзнаменуют ми победоносное прешествие от юдоли сея плачевныя в дивный и немерцающий свет. О день приятный, егоже память зело услаждает мя! О день последний, далече ли отстоиши от Мене, да предстану Христу, да увижу всех праведных от века, да воспою радостно со аггелы песнь! Тако есть, любезнии друзи, тако Дух Святый нам в Писаниях изрек, яко елико внешний человек тлеет, толико внутренний обновляется,²⁷⁴ сиречь, елико больше умерщвляема бывает плоть, толико возмогает и мужается душа,²⁷⁵ и сим образом приходит в возраст исполнения Христова. И паки глаголет: «Да не кто от вас постраждет, яко убийца или яко тать, или яко злодей, или яко чуждопосетитель²⁷⁶» [1 Петр. 4, стих 15].²⁷⁷ «Аще ли же кто христианин состоит в страданиях, хвалюся, – рече, – в скорбех моих, яко знамение наше есть крест».²⁷⁸ «Да возмет крест свой, – Спаситель вещает, – всяк последователь мой, яко воини есмы, яко настоит нам сражение и венец за победу, яко наше житие на небесех есть, яко странни и пришелцы есмы на земли».²⁷⁹ Взирая убо на толикое блаженство мое, Вскую скорбите? Радовастеся иногда, егда славою сиях, егда изобиловах богатством, честию и властию, яже вся, яко сон, преидоша и, яко дым, исчезоша, бяху бо тленныя вещи и мнимое добро, еже никогдаже может истиннаго благополучия принести. Ныне же, зря мя победителя страстей, обогащенна страданиями, умерщвляема плотию, защитника правды, проповедника Христова, изобилующа духовною радостию и украшенна венцем нетленным, Вскую унываете, а не, радующеся, паче молите за мя, яко да доблественный подвиг в терпении совершу? Сия желайте ми, о друзи, аще любите мя, желайте, да моя умножатся страдания, яко да теми очищуся от грехов и, яко злато в горниле, чист предстану Христу, и приумножится ми славы венец. Помяните Христовы за нас подъятыя язвы. Помяните Павловы узы,²⁸⁰ Петровы вериги,²⁸¹ Иовлевы страдания,²⁸² Давыдовы изгнания;²⁸³ Даниил в рове со львы борется,²⁸⁴ отроцы естество укрощают огня.²⁸⁵ Толикии мученицы пролияша кровь, толикии праведницы руганием и ранами искушения прияша, еще же и узами и темницею, камением побиени быша, искушени быша, убийством меча умроша, проидоша в милотех²⁸⁶ и в козиях кожах, лищени, скорбяще, озлоблени, ихже не бе достоин весь мир, в пустынях скитающеся, и в горах, и в вертепах, и в пропастех земных (Евр.: 11, стих 36 и след.].²⁸⁷ Убо мне ли скорбети, яко в число сих избранных мужей ныне выинен²⁸⁸ есмь? Ни, не скорблю, но радуюся». Сия рек, паки весело воспе: «Благослови, душе моя, Господа, и вся внутренняя моя, имя святое его» [Псал. 105, стих 1],²⁸⁹ – и прочая до конца.

73. По сем исхождаше по обычаю своему царь на ловитву, того ради, пришедше, послании и взяша святаго, да течет, якоже и прежде, за ним. Он же, востав, скоро изыде и течаше, поя в себе: «Блажени непорочнии в путь...» [Псал.118, стих 1].²⁹⁰ Совершаше же сие дело весма рачительно и тщательно, глаголя: «От Господа ми бысть сие, сие есть звание²⁹¹ мое, звание же совестно совершати должно. Не взыщет ли Бог, аще аз нерадиво повеленное ми совершу, и не навлеку ли на ся клятву²⁹², яже изречеся творящым дело Божие с небрежением? Леность причиняет медление, ослабляет силы и усугубляет труд; радение же и рачение облегчевает тяжесть всякую, преодолевает неудобства, укрепляет слабыя руки, благопоспешество призывает и Божияго благословения удостоеваемо бывает. И Вскую ты, помышление мое, глаголеши ми, яко что есть, еже тещи всуе, сие не богоугодно и неполезно есть дело. Вопрошу бо тя аз: долженствует ли конь или осел, употребляемый в дело, вопрошати у своего господина, почто сие или иное дело дееши? Почто мя понужаеши в сию или в ту страну ити? Ни не вопрошают, и аше бы тии начали разсуждати о сем, то наказание подъяли бы у господина, емуже и всегда ленивый скот подвергается. Не и рабы ли, и малые отроки, и всяк лишенный свободы по сему же поступают, не истязывая у приставников своих причины, чего ради делается что, но точию повеленная зная исполняти; убо господское дело есть о качестве вещей деемых разсуждати, наше же точию есть налагаемыя труды проходити без роптания и лености. Сей бо есть порядок вещей от века. Раб научися в пользу питающаго тя свои употребляти силы, а ты, брение²⁹³, не глаголи скудельнику²⁹⁴: «Почто мя сотворили еси?»²⁹⁵ – тако отрок да послушает учителей своих, корабль да течет, аможе управляет кормчий, тако надлежит истинному послушанию быти. Но разумная тварь человек о сем едином наипаче да разсуждает, яко Бог есть всея твари общий властелин, убо больше ему повиноватися должен есть; аще ли же другим находящийся под ним власти поверят нам что противное Божией воли сотворити, то в сем их слушати мы не обязаны, якоже апостоли рекоша: «Лучше бо есть тысящекратно умрети, нежели единожды грехом раздражити Бога»,²⁹⁶ – а еже тещи несть богопротивное дело». Сице размышляя в себе, святый радостно за царем всегда течаше, аще и кладу нося на выи.

74. Минувшым же 24 днем страданию сему, повеле начестивый Кавгадый вящшаго ради поругания привести блаженнаго страдальца на торжище, идеже собрася безчисленное множество народа на позор той, в немже б немалая часть и российских людей. Отвсюду бо во Орду стекашеся народ, ово нужд радии некиих, ово же царю приносяще дани и купеческий отправляюще промысл. Ту предста святый в кладе, худыми одеян рубы²⁹⁷, бос и непокрыту имея главу. Прииде же и лютый Кавгадый мучитель, с велиею гордостию ездя на коне, иже абие возопи к своим: «Где есть уничиживый царскую власть и толикая злая содеявый, поминания недостойный Михаил?» Взяша убо слуги святаго и представивше его лицу Кавгадыеву, иже, на высоком месте седяше, реша: «Се Михаил». Тогда Кавгадый, свирепо на святаго воззрев, рече: «Еще ли величаешися, Михаиле, Вскую достойную ми не воздаеши честь, не веси ли, яко власть имам на тя, да тя умерщвлю и паки оживлю?» Таже обращея к слугам, со гневом рече, да святаго пред ним на коленех поставят. Они же, нападше на нь, повергоша его на землю с толиким стремлением, яко сокрушатися костем его, потом, подъявше, поставиша на коленех, и стояще тако венценосец Михаил на долг час. Между же тем Кавгадый не престаяше поношати и злословити святаго, емуже нецыи из предстоящих зрителей последоваху, друзии же о сем зело сожалеху, обаче никтоже ни единыя вины изнесе на святаго, аще и сего ради изведоша его на позор той, дабы народу свободно клеветати на нь.

75. Видев же Кавгадый, яко вси умолкоша, повеле святаго отвести паки под стражу, аможе сам потом, притворшися, аки бы сожалеет о нем, прииде и, сед, иача глаголати, предстоящу святому: «Не скорби, Михаиле, аз много скорблю о злополучии твоем и многую тщуся дати помогу, но многих имевши врагов, потерпи мало, и вскоре твоим страданиям настанет конец; а яже о кладе, тобою носимей на выи, ведый буди, яко таков есть царев обычай: аще на кого гнев свой положит, абие повелевает забити его в кладе, аще бы и присный был его сродник; егда же утолится его гнев, то вящшую изливает милость и в первый паки вчиняет сан. Потерпи убо: на сих бо днех свободу, якоже предрекох ти, получиши, и тягость сия отъидет от Тебе. Аще ли же хощеши, то ты сам можеши спасение твое предускорити и в сей день получити е, аз свидетельствую ти и поручаюся, объяви нам точию, яко будеши сообщник с нами в вере, яже коль есть честна и добра, сам видиши: вся бо нам деяти, ясти же и пити, и наслаждатися похоти, и не изнуряти постами и молитвами тело нам позволяет. Ты убо, аще хощеши, приими сию веру. Вскую ти есть уповати на убогаго Христа, умершаго поносно и тяжкий вам давшаго закон. Приими нашу веру, и абие будут ти вся». Отвеща Кавгадыю святый: «Аз не требую, дабы ти деемая о мне предлагал, ибо сам аз ведаю по единому вся, не требую же ни чести ваше я, ни свободы, ни ходатайства твоего, отнележе внидох в подвиг сей, яко Господь мой печется о мне, и той мя прославит на небесех. А яже ми глаголал еси о вере, дабы Христа моего отрекся, ни, не буди то, не буди то никогда, Господи мой сладчайший Иисусе. Ты убо ведай, Кавгадый, яко аще бы мне известно было, яко тысящу ми лет жити и на кийждо день тысящекратно мучительною смертию умирати, то ни тако бы аз отверглся Христа, егоже любовию уязвлена ми есть душа, и горю сладостно божественным огнем».

76. Рече Кавгадый: «Много глаголеши, Михаиле, обаче терплю ти, зная продерзость твою, паче же советую, да, лучшая избрав, сохранити свой живот». Ответа святый: «Лучшая избрах, предпочетши вечная тленным и египетским сокровищем поношение Христово; не хощу изменити веру, не хощу разорити закон. Закон бо наш свят, праведен и чист, закон же ваш прескверен и пребезумен. Закон должен обуздати страсти, и кто виде закон, побуждающий ко злу, якоже ваш. Не лститеся, закон ваш есть к вечной погибели путь, вера же наша есть едино средство ко спасению». Отвеща Кагадый: «Много глаголеши, Михаиле, но мню, яко от великия скорби изумился²⁹⁸ еси, того ради терплю ти, протчее умолчи». Таже, воззрев на стрегущих, рече: «Почто не облегчите убо или поне²⁹⁹ поддержите ему кладу, да не отягчает ему плечи». Притек убо един от предстоящих, поддержаше древо или паче, болше обременяше святаго, ругался ему, по сем отъиде Кавгадый во своя.

77. Некогда бывшу блаженному в лове с царем, случися ему остатися далече от царя, яко пеш бе и утруждся от пути, и никтоже из стражей бяше при нем, ибо разыдошася по стремнинам искати зверей, зде предсташа святому раби его, иже не терпяще зрети страдания и укоризны, наносимыя святому, согласилися бяху помощь некую ему сотворити. глаголаху убо святому: «Молим тя, господине наш великий княже, да соблаговолити бегствием спасти свой живот, се кони предстоят, и проводницы готовы, уклонися в некую страну, да получиши свободу и живот». Ответа святый: «Ни, чада, не буди ми то во дни моя, яз бо измлада всегда правдою ходих и пожих открыто пред Богом и людми, и ныне ли начну скрыватися противу совести моей. Аще ли скрыюся аз, то дети мои останутся в руках врагов, многия народы разорениям подпадут, отечество мое опустошится мечем и огнем, и Вскую ми единому жити в погибель толиким людем. Воля Господня да будет, и да царев гнев на мне едиием скончается, яко да прочий получат отраду. Вы же, чада, навыкните отселе жити постоянно в мире и блюдите, да никогдаже ничесоже сотворите, о немже имате стыдетися потом, но единыя держитеся добродетели, та бо спокойствие человеку приносит, а пороков, яко огня, бежите, ибо тии пленяют душу. Страдания же сия, в нихже видите мя днесь, суть средния³⁰⁰ вещи, их доброта и худость от мнения человеческаго зависит. Аще кто благоволит, якоже Павел апостол, в страданиях, и аще кто любит Бога и правды ради подъемлет муки, тому вся поспешествуют во благое и к приумножению радости душевныя служат,³⁰¹ от противных представлений и в противных случаях приходит туга и печаль. Не слышасте ли, яко Нерон Римский не можаше во всем царствии своем спокойствия обрести? Такожде и Крез Мидский, и Кир Персидский, и Александр Македонский».³⁰² Сия рек, моли рабы своя, да, взявше его, отведут в намет под стражу, не можаше бо о себе ити, бяху бо нозе его утруждены, яко нощию всаждашеся в кладу и во узы, днем же бегаше за царем на ловитву.

78. Тако безчисленная страдания блаженному подъемлющу, ово от повседневнаго течения за царем, ово от нощных томлений во узах, неспания же и неядения, ово от безчеловечных стражей оных, иже, яко тигры некие, выну нападаху на святаго, биюще его и пхающе, и влачаше, и всячески ругающеся ему, приспе день святаго Михаила, архистратига воев небесных, егоже память совершается ноемрия в 8 день. Сей день бе знаменит святому, яко в нем повсягодно обыкл бе совершати тезоименитство свое. Зело убо рано поутру нача пети Давидови псалмы, возсиявшу же солнцу, воззре святый и виде, яко пресветел бе день, восплакася убо и, моляся Господеви, рече в себе: «Вся тварь радуется ныне, аз же, тяжкими оковы пригвожден сый к земле, не могу главы моея подняти. Где прежняя светлость? Где великолепие и слава? Где богатство, дом, рабы, светлыя трапезы и празднственныя одежды? В сей день иногда дом мой не вмещаше множества народа, и весь град красяшеся радостно, ныне же аз во тме и сени смертней лежу, а яже деются во отечествии моем, далечайшее разстрояние места мраком неведения закры. О коль непостоянен есть свет! О коль неизвестны жизни сея премены!» Сия рек, весь день той в горких препроводи воздыханиях и слезах.

79. По сем абие на другий день изыде повеление от царя, да, воздвигшеся от того места, прейдут на другое. Татарове бо обыкли бяху выну преходити от места на место, да тем и глада избудут, и повреждения воздуха удалятся, и сего ради тии ниже градов, ниже домов не строят, но водворяются в полях и обитают в скиниях и кущах³⁰³, питаются же всяким мясом, какое бы токмо можно было им обрести, еже ядят с кровию, а хлеба мало употребляют. Шествоваху убо татарове сквозе безводная и каменистая места неколико дней, ведуще и святаго в кладе пеша за собою. В сем пути неизреченное мучение святый от окаянных тех сыроядцев поъдя, наипаче же яко и хлеба не бе, мяс же с кровию не яде, глаголя: «Аще ми будет и умрети, не хощу сего учинити. Се, колицы взирают на мя, иже в тяжкий могут впасти соблазн и погибнути моего невоздержания ради: отроцы бо обыкновенно, всегда на действие своих властелинов взирая, тако жизнь свою располагают, сообразуя оную примерам тех, и аще убо злый пример видят, развращаются вскоре, есть бо зло заразительная и прилипчивая болезнь, или яко непотребное зелие, еже удобно размножается без труда; аще ли же добрая исправления видят, не скоро могут привыкнути последовати тем, развратное бо естество наше и природное стремление ко злу прилагает многая неудобства, якова суть леность, сластолюбие, плотоугодие и подобная сим. И сего ради глаголет Спаситель: «Блюдите, да не соблазните единаго от малых» [Марк 9, стих 42].³⁰⁴ Сиречь, да не подадите своими действиями, без коих можете пробыти, случая другим грешити; суть бо и такия действия, яже оставляти не должно, аще бы и соблазнился мир, о нихже богоглаголивый Павел тако рече: «Мы проповедуем Иисуса распята, иудеем убо соблазн, еллином же безумие» [1Кор. 1, стих 26]³⁰⁵».

80. Между тем, минувше вся грады черкасския и ясския, ополчишася пред градом Тятяковым,³⁰⁶ за рекою Теркою,³⁰⁷ близ врат железных,³⁰⁸ на реце Севенце,³⁰⁹ ту убо призвав царь своих велмож, повеле, да последнее испытание сотворят о благоверном князе. «Вскую ми, – рече, – злочестивый той обременение творит? Вскую недостойный жития приятным наслаждается светом?» Они же, изшедше от царя, послаша воинов, да абие святаго на торжище изведут, близ бо бяше торжища блаженнаго вежа, яко камением доврещи. Послании же, шедше, изведоша святаго, и стояще тамо на мног час, Дóндеже собрашася сонмища того неправеднаго судии.

81. Егда же собрашася, начата взаимно друг друга приветствовати и расказывати, кто что виде и слыша, кто что сотвори, или кое намерение положи учинити, происхождаху же и распри некия между варварами теми, и вопли великия и кличи слышахуся ту, яже продолжишася до самаго времене обеда, таже хотяше разытися, призваша святаго и устремишася вси руганием и поношением на него, глаголюще: «Злая главо, колико нам причинил еси трудов и ничтоже дал еси нам; мы тебе ради собрахомся днесь и, другая дела оставлше, седим, разсуждающе о тебе, изыди убо, окаянне, от лица нашего и ведый буди, яко повинен еси смерти». И тако разбойническое то сходбище, ни вопросов предложив, якоже бы подобало сотворити, обвиняемому, ни послушав оправдания, ни законнаго учинив определения, осудиша на смерть неповиннаго. Зри зерцало безчиннаго суда, и пристрастия лютость, и проклятаго мздоимства плод.

82. По том святый, изшед оттуду, повеле отроком своим принести себе стулец, да мало почив, рече: «Прииму ногам моим покой, бяху бо зело отягчены от долгаго стояния и многаго труда». Отвещав же, един от предстоящих рече: «Господине наш великий княже, видиши ли, коликое множество народа тебе окружают, мы стыдимся дати тебе сести в позор сей на поругание врагам, но молим тя, гряди в вежу свою и упокойся тамо». Прослезися святый блаженный страдалец, сие слышав, и рече: «Позор быхом миру, и аггелом, и человеком» [1Кор. 4, стих 9).³¹⁰ Таже идяше к шатру своему, читая наизусть псалом: «Боже, Боже мой, вонми ми, Вскую мя оставил еси...» [Псал. 21, стих 2].³¹¹ От того часа бяше видети очи блаженнаго выну исполнены слез, провидите бо духом, яко уже скоро настоит добрым его подвигам конец.

83. Сия быша во вторник, в день Введения в храм пресвятыя Богородицы,³¹² в среду же рано повеле святый утреннее славословие отпети, емуже совершаему бывшу, со многим умилением и плачем внимаше, по сем повеле правило ко святому причащению прочитати. Наченшу же иерею, рече святый: «Даждь ми книгу, отче, да сам аз правило прочту». И взем, читаше умиленно и тихо, слезы же ему из очес, яко струи некия, изливахуся на землю. В то время предстояху ту, послушающе, сын святаго Константин и Александр игумен,³¹³ иже бе святому духовный отец, да два иереа, иже пришли бяху с ним из Тфери во Орду. Егда же святый все правило соверши, тогда пригласи предреченнаго игумена и, начен, исповедашеся Богу пред ним. Таже завеща князю Константину о доме своем, и о отечествии, и о тех, иже быша с ним, дабы купно с княгинею-материю не оставили их, и о прочем поучаше и наставляше сына своего, Дóндеже священницы, приуготовивше запасное причастие,³¹⁴ принесоша ему, не бе бо можно божественную службу во Орде совершати, яко запрещено бе от злочестиваго царя.

84. Видев же святый чашу в руках иереа, паде ниц на землю, кланялся Господеви, и, востав, ста на коленех, глаголя: «О чаша благословенная, содержащая спасение мира! О дражайшая Спасителя моего кровь, цена искупления моего, утоление гнева Божия, очищение грехов, угасившая адова пламене свирепую бездну! О пречистое тело сладкаго Иисуса, животе вечный, источниче благих, ключь, отверзающий небо, просвещаяй, яко солнце, душу, нетления венец, представляющий со дерзновением Божию престолу! Господи Иисусе, премилосердый Владыко мой и Творче, не возгнушайся недостойнаго мене! Аще бо и превзыдоша главу мою беззакония моя,³¹⁵ но ты, преблагий, пришел еси грешныя спасти, от нихже первый есмь аз, удиви милость твою на мне, прииди и вселися во мне, и очисти мя, и убели мя, да с тобою непостыдно предстану на суд». Сия рек, объят божественную чашу, и с неизреченным веселием животворящих приобщися Таин. Священницы же провозглашаху, якоже обычай есть: «Тело Христово приимите, источника безсмертнаго вкусите». По сем святый, из глубины сердечныя благодарение Богу принося о всех, приложи наконец: «Ныне отпущаеши раба твоего, Владыко,³¹⁶ да умру отселе с миром. Что есть еще на небеси, и что ми восхотети на земли? Исчезе сердце мое Боже, яко земля безводная, к тебе.³¹⁷ И кто даст ми криле, и полечу, и почию?»³¹⁸

85. Таже умолче святый, продолжая втайие умиленная размышления о величиях Божиих. Но абие страх нападе на нь, смутившися бо зело, нача тяжце воздыхати, глаголя; «Уже конец жития моего наста, уже при дверех предстоит пришедый взяти,³¹⁹ уже Кавгадый изречение прият, еже заклати мя люте. Не дивитеся, яко смущаюся, друзи: аз бо всегда разлучения от тела и преселения ко Господу желах, но человеческому естеству противна есть смерть, якоже и другия в жизни случающыяся болезни, сия бо вся суть неприродна, но внидоша в мир прелестию змия в Едеме».³²⁰ Потом сыну своему Константину рече: «Отъиди, сыне мой отселе в покровительство к царице, да и тебе беснующиися не убиют люди». Такожде отпусти от себе и освященныя мужи, глаголя: «Идите, отцы святии, и молите за мя».

86. Тем же изшедшым, испроси святый богодухновенную книгу Псалтирь и, выслав из кущи своея всех, читаше псалмы. В то время окаянный Кавгадый вхождаше к царю и исхождаше с ложными на непорочнаго агнца ответы, последи же прием от царя конечное изречение, еже бы святаго смерти предати, грядяше вкупе с князем Георгием прямо к вежи святаго, провождающу их множеству народа. Видев же сие, един из отроков притече скоро ко святому, весь побледнев лицем, и прерывающимся от страха гласом рече: «О дражайший господине наш великий княже, се грядет Кавгадый и князь Георгий со множеством народа прямо к вежи твоей». Отвеща святый: «Вем, чадо, яко грядут и грядут на заколение мое. Но воля Господня да будет». Пришел же Кавгадый с князем Георгием на торжище, сташа и, сседше с коней своих, седоша ту; призвавше же некия немилостивыя воины, послаша, еже убити святаго; между же тем ожидаху исполнения повеленнаго им дела.

87. Изшедше убо, воини тии устремишася к шатру святаго, еже видевше друзии, иже бяху на торжищи и путех, вси туда же побежаша, и бе кличь велий и молва: овии бо домочадцев святаго бияху и грабляху, овии разоряху окрестныя вежи, овии надзираху, дабы что содрати и унести, – не можно изъяснити, коликое бысть тогда смятение в народе. Убийцы же тии, яко диви³²¹ зверие, ворвашася в шатер святаго и, обретше его на молитве стояща, простроша свои безчеловечныя руки, и, емше его, инии давляху, инии пхаху и бияху дреколием по главе, потом схватиша за древо, еже бе на выи святаго, и толь зельне начаша терзати, семо и овамо влекуще, яко пастися³²² святому на землю, древо же, приразився веже³²³, сокрушися; но дивный оный страдалец вскочи на нозе свои паки, лютии же убийцы с новым бешенством паки нападоша на нь и, повергше на землю, бияху пятами и топтаху. Тогда един из числа тех беззаконных убийц, именем Романец, извлек великий нож, егоже при бедре имеяше, удари неповиннаго страдалца одесную страну в ребра и, обращая семо и овамо, отреза чистое святаго сердце. И тако скончася блаженный и великий князь Михаил в лето от воплощения Бога Слова 1319, месяца ноемвриа в 22 день, в среду в 3 час дне. Душа его святая возлете торжественне к Богу и причтена бысть к ликам³²⁴ избранным от века, а тело остася на земли, валяяся в крови, наго повержено, никимже брегомо.

88. По том абие нападоша зверообразный татарове с российскими единомышленниками, иже бяху от страны Георгиа князя, и разграбиша вежу святаго, такожде же и отроков, находившихся при блаженном, вземше, заключите в темницы. Таже притек един от злодеев тех на торжище, Кавгадыю и князю возвести, яко уже вся повеленная сотвориша. Востав же, Кавгадый с князем приидоша на место, идеже лежаше многострадальное блаженнаго тело. Кавгадый убо, яко виде в толиком презрении лежащее блаженнаго тело, сожале си и со гневом князю Георгию рече: «Не брат ли тебе старейший сей бе, иже почитается вместо отца? Почто убо нерадиши о нем? Тако ли ожесточен еси? Почто тело сие лежит повержено наго?» Сия слышав, князь постыдеся и повеле, да, своею ризою покрывше святаго тело, положат на некую великую дску, иже потом, крепко ужами³²⁵ на возницу стягнувше, превезоша за реку, называемую Адеж,³²⁶ и ту осташася, по повелению Георгиа князя, два из его отроков, яко да обнощь стрегут святаго тело; прочии же разыдошася во своя, якоже и их господне, иже собравшеся во едину вежу с прочими татарскими князи, пияху вино и составляху ложныя вины на неповиннаго страдальца.

89. Виждь лютую злость, яже и на скончавшихся уже не престает изощряти свой ядовитый язык. Сие, яко мню, происходит оттуду, что совесть, свирепо терзающая дух повинных какому злу, всегда их безпокоит и, адских скорпиев горше, угрызает. Не отсюду ли привидения оная раждаются, яже у язычников фуриями нарицаются?³²⁷ Не сие ли причиною, что многим, имеющим нечистую совесть, мечтается, аки бы колеблется земля под ними, или гласы ужасныя возследствуют за ними, или мертвецы хотят их пожрети? Не сие ли то, еже в нынешнем веце именуется ипохондрия, принуждающая человека укрыватися, всего трепетати, боятися солнца и своея сени, и весь мир почитати себе за врага? Воистинну несть свирепейшаго мучителя, якоже совесть. Она выну вопиет, обличает, терзает и угрызает человека, содеявшаго злое, и еще в жизни сей принуждает его чувствовати адское мучение; и чем более умножается зло на земли и любовь оскудевает в людех, тем лютее свирепеет совести тиранство и умножается адская мука. Откуду ныне толико изумленных³²⁸, толико ожесточенных, трепещущих и беснующихся? К избежанию от сего несть лучшаго средства, как прибегнуть к Богу верою и надеждою чрез Христа. Но увы! Коль многие бедные люди прельщаются в подобных сим случаях: они ищут утешения и упокоения совести не в покаянии, но или в пиянстве, имже хотят притупити память содеяннаго греха, или в порочных обращениях с развратными людми, кои обыкновенно не токмо извиняют зло, но и похваляют и удобряют е, или в козлогласованиях и игрищах, или в расточительных иждивениях, мотовстве и роскошах. Сия вся како могут успокоити совесть? Не паче ли раздражают дотоле, доколе во ожесточение впадет человек и совсем потемнит светило разума? Горе такому человеку! Лучше было бы ему, аще не бы родился в мире, нежели родился на свою погибель и на оскорбление Бога и природы. Таковый бо человек, по Приточнику, не радит и дерзает, яко лев, сиречь, на вся злая стремится,³²⁹ отсюду разорения, грабежи, убийства, отсюду татьбы, рвения, клеветы, отсюду прелюбодеяния, сквернословия, студодеяния и подобная. Не таков ли бе Иуда предатель,³³⁰ Саул,³³¹ Исав,³³² Каин,³³³ иже не возмогоша покаятися, зане Божию прогнали благодать, и Господь оставил их в начинания сердец их. Боже прещедрый, избави таковаго состояния всех!

90. Тело убо святаго, якоже рех, изнесено бе в пусто место. Татарове бо, бояся мертвецев, не могут терпети, да обнощует у них в стане мертвое тело. Наставшей же ноши, велий страх и ужас нападе на стрегущих воинов, егоже терпети не могше, побегоша в станы своя. Наутрие же, возвращшеся, паки видят возницу со дскою тщу³³⁴, тело же святаго особь лежащее на едином месте, язвою обращено к земли, и кровь многую истекшую из нея, десная³³⁵ же рука под лицем бе, а левая у язвы, одеяние же все цело, якоже бе прежде, и ничим не повреждено. Аще бо и многия дивия звери нощию скитахуся по пустыне³³⁶ той, но Господу хранящу вся кости праведных своих,³³⁷ нимало не прикоснушася святому, аки бы некое благоговение и почтение тем изъявляя праведному мужу, яко Даниилу пророку иногда,³³⁸ Еже бо человеческая злоба прогна от себе, то во обличение нам вселися в пустынных неукротимых зверей.

91. В той же нощи мнози от верных, елицы не спаху, такожде и от неверных (недалече бо бе пустыня та от станов их) видеша два облака пресветла, во всю нощь осеняющая над многострадальным телом святаго, яже ово убо разступахуся, ово же паки совокупляхуся, просиявающе, яко солнце; наутрие же с великим удостоверяем яве то чудо поведаху всем, глаголюще, яко свят муж бе великий князь Михаил и яко заклан бысть неповинно, еже сам Бог небесными стихиями, изъявляющими присещение³³⁹ аггелов его, яве показа. Промчеся же чудо сие абие повсюду, еже слышав, великий князь Георгий убояся велми, глаголя: «Зри, яко не снедоша сего человека звери, дабы истребилася от земли память его. Зри, яко соперник мой и по смерти не престает обличати мя и пакости ми творити. Аще сие дойдет во уши царю, то ему неугодно явится слово, и аз посрамлюся пред ним».

92. Сих ради вин совет положи Георгий князь, да сокрыет тело святаго. Посла убо боляры своя со отроки, иже по повелению его взяша мощи святаго оттуду и, возложше на возницу, отвезоша в Мосчары.³⁴⁰ Бяху же ту нецыи из отечества святаго, знаемии купцы, иже, слышавше збывшаяся, приидоша видети новаго своего мученика мощи и моляху приставленных стражей, да дозволять им драгоценными плащаницами покрыти святаго тело и с честию, якоже обычай есть, положити е в церкви. Но безстуднии тии воини не точию честь учинити святому отрекоша³⁴¹ купцам, но и видети его им возбраниша, положивше же неоцененное оное сокровище в некоей темной хлевине, ту стрежаху, дабы никто не приходил и не прикасался святому. Пребыша убо ту мощи святаго неколико дней. По вся же нощи жители тех мест яве зряху чудный некий столп огнен, сияющ вельми и протязающся от земли до небеси, иногда же и днем видяху на воздусе прекрасную дугу, прегибающуюся и преклоняющуюся над хлевиною, идеже почиваше святый. Сия вся поведаема бяху великому князю Георгию чрез посланников во Орде, того ради умысли мощи святаго отпустити в Российскую землю, дабы тем и грех свой загладити и показати некое сожаление, яко неповинен есть неправедному тому убийству.

93. Призвав убо единаго из боляр своих, даде ему неколиких воинов, глаголя: «Шед, отвези тело князя Михаила в Москву и ожидай мя тамо, аз бо и сам вскоре возвратитися имам во отечествне мое». Изшедши же болярин той с воинами от князя, прииде и, взяв тело святаго с возницею, якоже в хлевине лежаше, повезоша е ко граду Бездежу, и яко уже приближающеся бяху, мнози видеша из града окрест возницы множество народа со свещами и кандилы³⁴², а инии на конех с фонари по воздуху летаху, благолепно провождающе гроб, еже видевше, граждане со удивлением изыдоша во сретение и моляху воинов, да святаго мощи поставят на неколико дней в церкви освящения ради града, но воини, пренебрегши их прошения, обретше же некий гостиный двор, заключише святаго ту и стрежаху.

94. В то время един от стрегущих воинов возлеже с небрежением в нощи верху возницы, на нейже мощи святаго бяху, и се абие невидимая некая сила восхити его и, отвергши далече от возницы тоя, удари о землю толь крепко, яко еле живу остатися ему. По сем пришед в себе, воин едва возможе помалу приползти ко гробу святаго и ту, надолзе моляся, получи от святаго прощение и здрав быв, благодаряше дивнаго во святых Бога, всем поведая сие.

95. По неколицех днех идоша оттуду в Российскую землю, везуще мощи святаго; чрез все же шествования их время непрестанно ношашеся некий пресветлый над мощми святаго облак, и идеже людие тии стояху, тамо стояше и облак, шествующим же, шествоваше невысоко, паря по воздуху и аки бы осеняя святаго. Тако Бог прослави угодника своего князя Михаила. Человеколюбив бо есть владыка наш Господь, и премуд, и праведен вкупе, воздаяй комуждо по делом. Поживе богоугодно благоверный князь Михаил, сего ради и слава Божия сияет над ним, и чудодействиями прославлен, и нетлением почтен, еже все знамением есть оныя несказанныя радости, юже получи от Бога на небеси. Душа благовернаго князя, увенчанная неувядаемым венцем победы, одержанныя на земли, ныне сияет, яко солнце, в неприступней славе, выну видит лице небеснаго Отца, и поет со аггелы, и водворяется со святыми, и наслаждается того блаженства, еже око не виде, и ухо не слыша, и на сердце человеку не взыде.³⁴³ Не глаголи убо, Вскую на всех равныя дары не изливаются. Взирает бо Бог на способность и расположение сердец человеческих, и елико кто может вместити, толико и приемлет даров. Кто решетом может почерпнути воду? Како закрываяй очеса увидит солнце? Благодать Божия изливается на всех, такожде и еваггелский глас по всему миру гремит, но иный затыкает уши, да не слышит, иный божественным ругается действиям. Не слышиши ли фараона, глаголющаго к Моисею с презорством³⁴⁴: «Кто есть Бог?» [Исхода 5, стих 2].³⁴⁵ И паки Исаиа пророк: «Сыны родих и возвысил, тии же отвергошася мене» [глава 1, стих 2|.³⁴⁶ И паки: «Целих, – рече, – Вавилона, и не исцеле» [Иерем. 51, стих 9].³⁴⁷ Убо Бог есть чистейший источник всех благ, погибели же нашей мы есмы причина. Хощеши ли наследити живот и видети дни благи? «Уклонися от зла и сотвори благо» (Псал. 33, стих 15],³⁴⁸ – глаголет пророк. Приуготовляй на исход дела твоя, не воюй против Бога, не буди изменник Христов и ругатель тайн святыя веры. Сим путем достигнеши к вечному блаженству, грешницы же погибнут и истребятся. Кто пустит ослов и свиней в царския чертоги? Подобным образом и обремененныя грехами как внидут в небо? Добрый пастырь волков хищных не впущает в стадо. Аще же бы и един ожесточенный грешник ворвался в небо, мню, яко небо превратил бы в землю; они бо, имея от претворившейся в природу привычки непреложное стремление к злу, стали бы и тамо обиды наносити святым. Мы же утверждаем, что грешные во аде, ово свирепым взором, ово зловонием грехов, ово скрежетанием зубов, ово воплем лютым, и подобными сим, един другому есть спекулатор³⁴⁹ неукротимый.

96. Везяху убо воины тии мощи святаго князя сквозе грады российский земли и, якоже заповедано бе им, никомуже поведати хотяху, что и кого везут, и сим образом доидоша до великаго града Москвы, идеже повелено им бе тело положити святаго. Ту убо, вшедше в княжеский двор, сняша мощи с возницы и, внесше в единый монастырь, запечатлеша³⁵⁰ тыя (якоже из Орды привезены быша во гробе, егоже устрой тамо великий князь Георгий) впредь до повеления.

97. Пребыша же мощи святаго ту целый год без всякаго призрения³⁵¹, забвением и небрежением покрыты; и тако темный гроб скрываше всемирное светило, печать содержаше неизреченнаго источника чудес; храняшеся под спудом воин небесный, богогласная труба, орган Святаго Духа. О вы жители горняго Сиона, не удивляетеся ли, зря безумие смертных? У них той именуется светлейший князь, на ком блистает златотканная одежда, той сиятельнейший и превосходительнейший господин, иже на колеснице седит и предшествуют ему всадники и тристраты,³⁵² тому покланяются людие, иже изобилует златом и сребром, а Божии раби презираются, Христовы други пренебрегаются и попираются. Павел апостол глаголет, яко единаго святаго весь мир не стоит,³⁵³ но мы такое сокровище ни во что вменяем. О, безумия! О, слепоты! Обаче рцы мне, ты, ругаяйся святым, како назовеши тех, кои ради прибытка и чрева своего попирают честная камения и драгоценный бисер³⁵⁴? Свиниями и псами именуются сии в Божием слове. Убо болшая часть в мире свиней и скотов, имже Спаситель не повеле даяти святая, ниже пред ними пометати бисер,³⁵⁵ убо за ожесточение ваше отнимется от вас Царствие Божие и дастся языку³⁵⁶, творящему плоды, сиречь кротким, смиренным, боящимся и почитающим Бога,³⁵⁷ вы же взалчете, и изсохнете, и погибнете. Речеши мне, кая потреба сухия почитати кости? Но ты не почитай кости простыя, костей бо всяких великое множество везде, но почитай кости праведных, ихже Бог хранит, да не сокрушится ни едина от них;³⁵⁸ почитай почтенных нетлением от Бога; почти орудия Божиих благодеяний; почти пречистую ту обитель, в нейже вселяется и действует Бог; почти неоскудный благодати источник; почти порфиру, в нейже одеты бяху Божии сынове и цари всемирнии; почти тело, еже некогда сияше добродетелми в мире и еже некогда прославится, яко солнце, во Царствии Небеснем; почти плоть, юже чудесами прославляет Бог; почти про гонителей демонов, истребителей недугов, красоту Церкве и защищение отечества. Рех, яко многия кости везде, чесо убо ради не всякия такия удостоишася чести? Чесо ради едина Илиина милоть разделяет Иордан,³⁵⁹ а не иная кая? Чесо ради едины Елиссеевы кости воскрешают мертвых,³⁶⁰ и един Моисейский жезл изсушает море,³⁶¹ и побеждает Амалика,³⁶² и наказует Египет,³⁶³ а не иное что? Спаситель наш Христос не обличает иудеов, яко красяху праведных раки, но яко избивают к ним посланныя пророки и Божию сопротивляются слову.³⁶⁴ Обаче научаемся отсюду, яко и во иудеех древле обычай бе почитати Божиих угодников мощи, не и первенствующая ли христианская церковь то же представляет ясно. Святых бо память торжественно с похвалами совершаше в день Пентикостии³⁶⁵·³⁶⁶и Пасхи, а мощи их погребаемы бываху в церквах и при молитвенных храмех. Прочти древности и увидиш правду, вопроси у смыслящих, и возвестят ти истину. Не следуй слепым разсуждениям твоим. И аще убо не подобает почитати мощи святыя,³⁶⁷ то что речеши, подобает ли презирати и попирати? И аще сия речеши, не назову ли тя взбесившимся человеком или разума лишенным? Сии бо точию мудрствуют неподобная, мы же от православия научихомся, да, предстояще окрест нетлением почтенных мощей, призываем в заступление и помощь свято поживших зде.

98. Довольно времени минувшу от принесения мощей святаго в Москву, достиже о том слух в Тферь к благоверной великой княгине Анне, бывшей супруге святаго, и к чадом ея. Не бо бяше можно сбывшаяся слышати скоро, яко ордынское поселение далече бяше от России и писмоносителей тогда не бе. Егда же сия услыша княгиня великая, абие верных посла в Москву людей, да о глаголе сем испытают известно, иже бывше тамо возвратишася и поведаша, яко благоверный князь убиен во Орде и привезен в Москву, обретается на княжеском дворе во храме всемилостиваго Спаса,³⁶⁸ запечатан во гробе. Сим гласом вестницы тии, аки копиями, пронзоша благоверныя княгини Анны сердце, яже от нестерпимыя жалости горце возстена, из очес источники изливая слез, не меньше же и дети святаго с своими супруги и со всем домом рыдаху неутешно.

99. Промчеся же абие сие по всему граду, и вси плакаху гласом, еже слышав, святитель Варсонофий, притече во княжеский двор, да княгиню утешит и чада, но не бе утешению места. Аще и представляше³⁶⁹ святитель, яко не подобает плакати, но паче радоватися о свято почивших о Господе: тии бо, подвигом добрым подвизавшеся, благополучно преплыша горкий сего жития океан и ныне, водворяющеся со святыми, выну видят неприступную Божию славу и ходатайствуют о нас. Аще и предлагаше, яко всем предлежит единою умрети и неизбежен есть жития предел, смерть бо есть врата, отверзающая вечность, и путь, имже преселяемся на небо, идеже отечество наше, аще и живо описоваше, яко идеже ныне обретается князь, тамо вси праведнии от века, тамо патриарси, пророки, апостоли, тамо святители, мученики и праведныя душы, тамо спасительная обоженная плоть и неизреченное блаженство, обаче сия утешителная словеса успеваху мало, язва бо, егда разсвирепеет, не терпит ни пластыря, ни обязания³⁷⁰, ни елея,³⁷¹ наконец и сам святитель прослезися вельми и тако отъиде в дом, оставив всех, яко да насытятся рыданий.

100. Наутрие же паки прииде святитель во двор, и совещаста со княгинею и чады ея, яко да, пославше к великому князю Георгию во Владимир град, испросят страстотерпца Христова чудотворныя мощи, тогда бо и великий князь Георгий возвратился бе из Орды, во второе от убиения святаго лето, имея с собою и князя Константина Михайловича, и всех боляр, совозследовавших святому из Тфери. Сей совет благ явися пред очима всех, того ради князь Димитрий Михайловичь, емуже святый князь при отшествии своем во Орду поручи, яко старейшему сыну, правление княжения Тферскаго, общим согласием посылает брата своего князя Александра Михайловича со знатнейшими боляры во Владимир к великому князю Георгию Даниловичу, моля его, да подаст им многострадалное отца их тело во утешение граду и защищенне отечеству. Восписа же к нему и грамоту, имеющую образ сей.

101. «Великому князю Георгию Даниловичу, Богом избранному и превознесенному, Димитрий, князь Тферский, здравия и всякаго благопоспешества желает. Известно нам сотворися, яко дражайший родитель наш, ваш же ближайший сродник и брат, убиен бысть завистию татарскою во Орде. Ваше же величество, христианскою движимо любовию, потщася тело его оттуду привести в Москву, идеже и доныне обретается в Спасовом храме запечатано. Мы, слышавше сия вся, зело смутихомся, и неукротимая печаль, сокрушая дух наш, понуждает непрестанными обливатися слезами, наипаче же матерь наша, великая княгиня Анна, яже от зелныя туги и скорби изсше³⁷², яко скудель³⁷³,³⁷⁴ и еле жива, молит тя отдати отца нашего тело брату нашему Александру, егоже на сие истое³⁷⁵ послахом, и обретающемуся ныне при тебе Константину, яко да обще с боляры нашими, присланными к тебе, и с теми, ихже из Орды привел еси, привезут нам нашего отца. Дóндеже его не увидим, не возможем утешитися, ниже приятных наслаждатися дней; ты же, сие сотворив, приусугубнши к светлости твоей короны сияние милосердия и любви и заставиши всех неумолчно твои благодеяния проповедати».

102. С сим писанием яко прииде князь Александр Михайлович к великому князю Георгию Даниловичу во Владимир, абие вину пришествия своего возвести и послание вдаде ему. Он же, слышав, надолзе отрицашеся прошение их исполнити, ово тщася утаити убийство, еже сотвори, ово бояся, да не подвигнет к мщению народ. Обаче наконец, многим прошением убежден, повеле из Москвы в Тферь отпустити тело святаго. Шедше убо вси тферские боляре с чады святаго князя в Москву, внидоша во храм, идеже почиваше святый и, молебствовавше доволне, открыта раку святаго и, любопытно воззревше, видеша, яко мощи святаго – о чудесе! – тако бяху нетленны, яко аще бы святый в той день скончася.

103. Тако Бог свою благодать удивляет на святых своих, аще бо и бреннаго бяху сложения, еже удобно разрушается в прах, обаче тии на верх добродетелей возшедше, вечному уподобишася Богу и телом, и духом; якоже бо Бог вечно пребывает, тако и тии; якоже Бог неоскудно источает дары, тако и тии благодетельствуют своими молитвами людем; якоже Бог чудодействует в мире, тако и святии сообщаемою им силою удивляют вселенную, по предсказанию Спасителя нашего Христа: «Веруяй, – рече, – в мя, дела, яже аз творю, и той сотворит, и болша сих сотворит» [Иоан. 14, стих 12].³⁷⁶ Не дивися сему, яко Бог угодников своих такими дарами почте. Вся 6о бедствия привнидоша в мир по падении Адама в грех, а до того Адама бяше нетленен, безсмертен, повелитель всемирный, зерцало Божиих совершенств, премудрый и пресвободный.³⁷⁷ Убо аще кто клятвы Адамли избегнет, аще в такое состояние приидет, в каком бе Адам, аще совершенно образ Божий и подобие возставит в себе, аще облекшися в правду, преподобие и истину, достигнет в меру возраста исполнения Христова, таковый уподобляется Богу. Над ним не царствует смерть, ему покаряются звери, его не смущают страсти, в нем вселяется Бог, и выну разглаголствует с ним, он бывает радостию аггелов и ужасом бесов, покровителем мира и ходатаем к Богу. И сего ради смерть праведных именуется успением, упокоением, преселеннем, возрождением и приятным разлучением от плотских оков, еже святому Павлу всегдашним бе увеселением.³⁷⁸ Сие состояние святых сравнив с состоянием беззаконных людей, удобно возможеши вообразити горестную их пагубу и тщету, на них и воздух воюет, и звери стремятся, и свирепеет огнь, вода и земля, диавол, ад и вся тварь. Горе им, окаянным, горе беззаконной их жизни, состоящей в присносущней смерти, горе, яко лишишася Бога и в бесовский пременишася образ!

104. По неколицех днех, яже тферския послы препроводиша в посте и молитвах, взяша святаго страстотерпца мощи и, якоже подобает, благоговейно с кадилы и пениями возложиша на приуготованную колесницу и везяху их славно и великолепно. Егда же достигоша до Волги реки, ту изъемше мощи из колесницы, преложиша в присланное им на то великое судно и, седше, поплыша ко граду, еже слышавше людие, абие собрашася от всех стран в великом множестве и, вземше честныя кресты и святыя иконы с кадилы и свещи, изыдоша во сретение святому. Последова же и благоверная великая княгиня Анна с чады своими и преосвященный Варсонофий епископ со всем освященным собором. Бывше же у монастыря святаго архаггела Михаила,³⁷⁹ ту ста судно, и изнесоша мощи святаго на брег, обаче от великаго стеснения народа, рыдания же и вопля не возмогоша раку святаго в церковь внести, но поставиша ю пред церковными враты, яко да вси приступают к ней благословения ради.

105. Видев же гроб супруга своего, благоверная княгиня Анна вострепета от великия жалости сердцем и, падши на землю, аки к живому, рыдая, взываше: «Рыдати ли ми повелеваеши, яко лишихся тебе, или возвеселитися, яко зрю тя, о дражайший свете! Зрю убо тя, но зрю, яко не чаях, зрю бездыханна и мертва, зрю безгласна во гробе. Како померче свет? Како потемне злато? Кто наше сокровище украде, и живот наш кто отъя? О ордынская страна, царство безбожных татар! Да объимет тя вечная нощь, и да не будет вышняго благословения над тобою! О зависть! О злоба! О лютыя диавола дщери, превозмогаете, победисте, истребисте правду! Но не хвалися, гордость. Князь мой, яко орел, возлете в высоту. Князь мой, яко светлое возсия светило, увязеся венцем, торжествует в небе, вам же вечная готовится мука. Возрыдаю ли убо или возвеселюся? Рыдати заставляет естество, яко осироте мати с чады, яко лишихомся надежды, покровителя и отца; веселие же причиняют доблественныя подвиги страдальца, имиже сотре главу змиеву³⁸⁰ и вечно воцарися со Христом. Но препобеждает естество. Ктому³⁸¹ не увижу тя, свете мой! Ктому не услышу сладкаго ми гласа, и от сожития твоего разлучихся, – увы! – и кто даст мне, княже, да умру ныне с тобою, да един объимет нас гроб, и да вкупе предстанем Христови».

106. Сице блаженней княгине Анне рыдающей надолзе, едва возмогоша тую от гроба подъяти, и, вземше гроб, честно отнесоша боляре на раменах своих в соборную Спасова Преображения церковь, юже сам святый созда.³⁸² Провождаше же его все безчисленное множество народа, иже необычным рыданием и стенанием исполняху воздух, пребыша убо многоцелебныя мощи неколико дней не погребены в соборней церкве, Дóндеже народ святому своему князю последнее целование отдаде и приуготовлен бысть новый каменный гроб. Таже пришед святитель со всем освященным собором, вложи в него с ковчегом мощи и, обычное над ними певше надгробное пение, погребению предаша месяца септемвриа в 6 день в приделе святаго Александра Невскаго об ону страну боголюбиваго епископа Симеона Тферскаго, прямо жертвенника.³⁸³

107. Тако бысть житие святаго, тако совершися христоподражательное страдание. Подвизася вмале и обрете тяготу вечныя славы. Сия же написашася в наставление наше, да терпением и утешением писаний упование имамы. Полезная писания, яже нам предлагает святая Церковь, подобна суть некоему прекрасному и преизобилному вертограду,³⁸⁴ яко в нем различныя обретаются благовонныя цветы, сладкия плоды, воды живыя, драгия древеса, различныя изображения и памятники, представляющыя древность.³⁸⁵ В писаниях видим деяння, яже быша от века, обретаем чистое учение, имже напаяется душа, и прямый к царствию путь, созерцаем добрыя примеры святых, иже во всей вселенней добродетелми просияша, узнаваем Божия чудеса и отеческий промысл о нас. Сия вся не суть ли оныя плоды, имиже питаема мужается и утучневается душа? Не суть ли роса благодати, изкапающая свыше, еюже Бог строит спасение наше и духовную радость? Подобает убо нам уподоблятися пчелам. Видел ли еси, како оне, отвсюду собирая мед, сладостию обогащаются, вредительнаго же удаляются яда. Тако и ты, наипаче неискусный в писаниях человек, читай книги точию, яже матерь твоя Церковь, сохраняя в целости, тебе предлагает в пользу, и обогащайся всеми благими оттуду. Иныя бо книги предлагают та, яже к вере и надежде служат, другия же о любви учат; из тех научайся познавати Бога, его творение, промысл и таинства христианскаго благочестия, а из сих почерпай истинныя добродетели и должности, яже к благополучию служат. Аще уразумевши сия, абие искоренятся в тебе страсти, и суеверия, и ереси, просветится ти ум светом божественных откровений; увеси, яже суть Божия и яже противника его, яже непоколебимыя догматы и яже сномечтания и бабия басни. Не возложити тогда надежду спасения твоего на тленныя вещи и человеческая обряды, не дерзнеши представляти Бога с долгою брадою и протяженным телом, ниже речеши, яко перстное сложение, старыя книги и черныя иконы спасают,³⁸⁶ но исповеси с Петром верховным, яко несть иного имене под небесем, даннаго в человецех, о немже подобает спастися, кроме имене Иисуса,³⁸⁷ имже приведение имамы к Богу, и той есть очищение о гресех наших. Рекох ти уже пользу, происходящую от божественных книг, откуду разумевши, яко не всякия книги, не всякое учение подобает слушати. Навыкни убо полезныя книги опасно различати от неполезных и лживых. Полезныя книги суть, по Писанию, яко огнь, пожирающий терние грехов, яко млат на жестокия сердца,³⁸⁸ яко дождь, напаяющий душу, яко хлеб, укрепляющий тело и кости, яко семя, сторичный приносящее плод.³⁸⁹ Сия, аще веси, подобает читати со вниманием, и страхом Божиим, и добрым намерением; аще ли не веси, послушай чтущих и приложи старание, да не будеши, по Иакову апостолу, слушатель забытлив, иже уподобляется мужу, смотрящему лице бытия своего в зерцале, иже, отшед, забы, каков бе.³⁹⁰ Но потщися слышанное исполнити делом, да возрастеши и плод принесеши во святыни. Лживыя же и развратныя суть, яко тлетворный воздух, яко смертоносная язва, яко змиин яд, яко диаволя уста; от сих бежи, сих не касайся, да святаго Давида наследити блаженство, яко «не иде на совет нечестивых и на пути грешных не ста».³⁹¹ Зело бо прилипчивая суть развращения тая. Кто, к котлу приразився, не очернится? Кого диаволя не прельстят уста? Кого змиев не умертвит яд? Весь мир погибает от злых делателей сих: Азия исполнена учением безбожнаго Магомета, Америка и Африка – идолопоклонством, произшедшим от язычества, Европа – различными еретиками и суевериями. О коль мало спасающихя и в самом христианстве! Вси уклонишася и неключимы³⁹² быша, якоже глаголет пророк.³⁹³ Вины сего отступления три наипаче считаются: первая – соблазнительные злых людей примеры и словеса, вторая – диавольския тайныя прелести, третия – развратная человеческая воля, слепый пленившая разум. И понеже соестественныя вещи взаимное всегда имеют между собою соответствие, притязание и любострадание, того ради не дивися, яко всякия пороки удобно вселяются в нас, и мы, согласуйся погибелным представлениям диавола и мира, безразсудно спешим во адово дно. Вопреки же добродетельный путь коль труден и прискорбен начинающым является, плоть бо воюет на дух и воля-враждебница – на Бога; обаче чем больше начнеши в святости успевати, тем способнейший сотворяется ти на гору Господню восход, а наконец, до такого безстрастна достигнеши, яко рещи ти с Павлом: «Кто разлучит мя от любве Божия» [Рим. 8, стих 35).³⁹⁴ Любящим бо Бога вся поспешествуют во благое, и вся коварства, и гонения врагов почтеши, яко стрелы младенец. Дом мудраго мужа не разрушают ветры и буря,³⁹⁵ подобно и волнения моря не преодолевают непоколебимый камень. Кия страхования, кия хитрости и соблазны возмогоша блаженнаго князя от любве Божия и добродетелнаго пути отвлещи. Молися убо Христу Богу о нас, молим тя, страстотерпче Христов великий Михаиле, яко да и мы, грешнии, по безприкладной милости его удостоимся быти наследниками вечнаго блаженства.

108. Благоверная великая княгиня Анна по погребении супруга своего святаго князя пребысть неколико времени при сыне своем Константине, тому бо во владение от отца отдан бе град Тферь. Потом, пришед, вселися в монастырь девичий, иже бе во граде во имя Софии премудрости Божия, и ту, постригшися во иноческий чин, живяше во всяких добродетельных исправлениях, выну взирая на гроб святаго князя и желая, да кости ея возлягут с ним вкупе и душа да вселится, идеже обитает сам. Умершу же сыну ея Константину Тферскому, прииде другий сын Василий из Кашина града и слезным прошением едва возможе умолити ю, да идет с ним в Кашин, тамо бо бе и отечествие ея, идеже, пришед, пребысть до самой кончины своея, добрым житием и нелестным учением всем подая совершенныя святости пример. Прешедшым же от убиения святаго князя 19 летом, в мире скончася о Господе и погребена бысть в соборней Успения пресвятыя Богородицы церкве.³⁹⁶ Во времена же христолюбиваго царя и великаго князя Алексия Михайловича обретены быша мощи ея нетлением и чудодействием почтены, якоже и доныне в Кашине граде видети есть.³⁹⁷

109. Навыкнути нам подобает отсюду, яко у Бога лицеприятия несть: несть раб, ни свобод; несть мужеский пол, ни женский, но праведное воздаяние комуждо по делом. Жена, украшенная благими делы, препобедит мужеский пол, и раб, сотворивый Божию волю, злочестивых царей вышший явится. Что ми предлагавши составление и пол? Не могу, – рече, – подвизатися, яко раб есмь невольный, яко жена немощная есмь. И жены бо получиша небо, и рабами не возгнушася Бог. И аще воззриши на небожителей, обрящеши между ими большую часть рабов и нищих презренных, по оному Павла святаго изречению: «Видите звание ваше, братие, яко не мнози сильии, не мнози благородни, но буяя мира избра Бог, да премудрыя посрамит, и немощныя мира избра Бог, да посрамит крепкая, и худородная и уничиженная избра Бог, и несущая³⁹⁸, да сущая³⁹⁹ упразднит» [1Кор.1:27 и след.].⁴⁰⁰ Тии в святой простоте со смирением и терпением шествоваху за Христом, не противящеся благодати и полагающеся во всем на Божие слово, и не любопытствоваху гордостию надменны, испытующе глубину Божиих судеб, якоже творят мнящийся нечто быти в свете, иже в буйстве своем аки бы истязуют Христа, глаголюще: «Кто ты? Что учиши? Куда ведеши? Есть ли рай и мука? Безсмертна ли душа?» – и подобная сим, яже суть диавольския сети, препинающыя⁴⁰¹ мудрых в коварстве и высокопарную гордость и тщетное превосходство властей. Почто убо вы, христиане, сих почитая, презираете убогих святых, иже судити имут миру, и со Христом сядут на дванадесяти престолех,⁴⁰² и возлягут со Авраамом в Царствии.⁴⁰³ Что же до женска пола принадлежит, то и оныя не равным ли достоинством и дарами почтошася от Бога? Не подобная ли душа и у них, якоже и в мужеском поле? Аще бо телом и немощны суть, обаче умом могут быть крепки, аще внешним состоянием и уничижены, но постоянством, но святостию, но чистотою могут быти по внутреннему человеку превосходны. Аще и поползновени ко злу, но могут злую природу препобедити неусыпным тщанием о добродетельной жизни. Итак, что мешает тебе, жено, быти в числе избранных? Аще и несть злейшаго зла, паче злыя жены, якоже глаголет некто,⁴⁰⁴ ибо оне всему причина, оне ядовитее аспидов и скорпиев, оне свирепее львов и тигров, безстудству и сластолюбию их несть меры, несть пределов ненасытству их, похотениям, гордости и злобе. Кого не прелстиша женская словеса? Кого не уязви злоковарный их язык? Сие диаволе орудие разорило есть царства, пленило непобедимых мужей, изтребило благополучие смертных; обаче, аще добрую обрящеши жену, обрел еси неоцененное сокровище, имже благослови тя Господь Бог твой. Дом, в немже добрая жена обитает, изобилует всеми благими: тамо благочестие и страх Божий, тамо согласие и любовь, тамо тишина и мерность, тамо возрастают кроткая и молчаливая чада, тамо вси домочадцы благонравны и послушны, тамо изобилует хлеб, вино и елей, вертограды удобрены, сады благовонны, нивы угобжены⁴⁰⁵ и плодоносны. Блажен стократно, емуже Бог такого друга и сожителя посла, презлополучен же той, иже паде в руки неприязненный жены, ибо не умерщвляет та, якоже зверие, растерзан внезапно, но истончевает и изсушает помалу, чем умножает болезнь и приусугубляет мучение в безконечное наказание за грех.

110. Аще и под спудом бе угодник Божий великий князь Михаил, обаче люди помняще чудеса, яже содеяшася при убиении его и благодеяния, яже показоваше ко всем, еще жив сый, велие к нему усердие имеяху и, притекающе ко храму, идеже честныя его почиваху мощи, моляхуся Богу и получаху различная исцеления молитвами святаго. Егда же попущением Божиим грех ради наших быша литовская и польская нападения на Россию,⁴⁰⁶ тогда многажды видим бываше святый, исходищ на белом коне из града, имея в руках превеликий обнаженный меч, имже устрашаше и прогоняше врагов, якоже сами противницы со известным утверждением исповедаша святителю Феоктисту, архиепископу Тферскому,⁴⁰⁷ в лето от Христа 1606. Тогда бо помянутые варвары лестию и изменою начальников наших взявше град Тферь, приидоша во архиерейский дом и видевше на стене икону святаго, сказаша яже о нем, вкупе признающе, яко велик той человек есь у Бога.

111. Не дивися, читателю, слыша, яко святии ходатайствуют о нас и защищают грады и страны, наипаче же – идеже их почивают мощи, или идеже с плотию обитали. Ибо они аще и отстоят ныне духом от нас, преселившеся на небо, обаче любовию всегда суть соединены нам и никогда не престают промышляти, иже к нашему благополучию служат. Павел апостол глаголет, яко аще видением Бога и получением небесных благ и «истребляется вера и надежда, обаче любовь николиже отпадает» [1Кор.13:8].⁴⁰⁸ Любовь, якоже бе на земли, тако продолжается на небеси, неизменно и вечно, паче же и умножается во святых. Дóндеже бо были они в теле, обретали многая препятствия, погашающая любовь, ныне же бо безпрепятственно успевают в ней. И елико кто больше любит, толико больше блажен; и елико кто больше блажен, толико ближайший и подобнейший Богу. Толико большее стремление имеет ко благодеянию и защищению нашему, толико болшее имеет отвращение от всякаго зла и праведное омерзение к некающымся грешникам. Темже убо тщашеся зло истребити, наказуют грешных, добрых же награждают, да больше успевают в святости. Изъяснения ради предложенныя истины мы докольныя примеры в Писаниях обретаем. Молятся аггели у Даниила о помиловании израиля.⁴⁰⁹ Молятся апокалиптическии старцы и мученицы о спасении Божиих рабов и истреблении диавольскаго царства.⁴¹⁰ Молятся в Маккавейских книгах упоминаемии архиерее о свобождении своего народа.⁴¹¹ Такожде и мужи некии упоминаются тамо, иже, являющеся, устрашаху врагов и защишааху верных.⁴¹² Видит Елиссей поборствующая по нем огненныя колесницы и кони.⁴¹³ Да умолчу о других примерах. А яко святии иаипаче та назирают места, идеже пожиша и почиша, сие произходит оттуду, что вездесущие им не может приличествовати. Темже убо каждая страна своих покровителей особливых имеет, якоже видети есть и на аггелах-хранителях градов, церквей, народов, царств, человеков. Таков и в строении нашего спасения видимь есть порядок, каков и в расположении мира. Повеле Творец, да иная звезда сияет в Греции, иная – в Индии, иная – в России. Всех же предводитель – солнце. Сице и благодатному промыслу изволися, да святый князь Михаил будет защитник Тфери, якоже Димитрий – Фессалоникии,⁴¹⁴ Петр – Риму,⁴¹⁵ и прочая. Сия уразумевше, прославим Божие неприступное величество, еже толикое попечение имеет о нас. Божиих же рабов достойно почтим, яко, толикою к нам любовию горя, ходатайствуют о нас.

112. Прешедшим от убиения святаго благовернаго князя Михаила Ярославича 340 летом, благоволи Бог угодника своего прославити, еже бысть сице. Державствующу благочестивому государю царю и великому князю Михаилу Феодоровичу,⁴¹⁶ прейде от времянныя жизни ко Господу отец его величества святейший Филарит Никитичь, патриарх Московский и всея России.⁴¹⁷ Того ради христолюбивый оный царь, якоже в прочия церкви даяше милостыню на поминовение родителя своего, сице и в тферскую соборную церковь, обаче против прочих несравненно вящшую. Тферский бо архиепископ Евфимий⁴¹⁸ предложив его величеству, яко созданная святым князем тферская церковь зело обветшала и требует возсоздания от основания вновь. Молит, да повелит оную состроити и поможет своим иждивенцем тому богоугодному делу. Получив убо святитель вся, яже прошаше, молитвами святаго и обретши искусных зодчиев, из нихже первейший бе некто, называемый Иоанн, абие касается делу и в малом времени воздвиже зело прекрасную церковь, якоже бе и прежде.

113. Егда же святитель Евфимий хотяше освятити придел тоя церкви, идеже положены быша мощи святаго, прииде ему благий помысл от Бога, еже обрести гроб святаго с чудотворными мощами. «Не подобает, – рече, – да светилник мира и источник чудест хранится под спудом, но да положен будет на свещнице и светит всем, иже в храмине Церкве православныя обитают».⁴¹⁹ Того бо ради Бог и прославляет святыя своя, яко да примером их благочестивии утвердятся в вере, а злыя да навыкнут отгребатися от грехов и путем добродетелей ходити; да обличатся еретики и расколники, иже, суетным последующе мудрованиям своим, отторгаются от ограды Христовой; да злочестивии обратятся от тмы ко свету, услышавше велегласную чудотворения святых трубу; да славы Божия, яже увенча святых за добрые их подвиги, возсияет да возимеет всюду чрез ходатайство их спасительное влияние.

114. Тако помыслив, святитель приложи великое попечение о сем. Обаче недоумевашеся, где бы мощи святаго князя почивали, никто же бо можаше сие ему поведати, еже многое время забвением покры. Нецыи же глаголаху, яко тыя сгореша в велицем пожаре, иже весь град иногда пояде и в пепел преврати. Бяше же при церкве некий священник, именем Феодор, зело ветх денми, иже издавна служаше у гроба святаго. Сей приступл ко святителю, рече: «Слышах, владыко, яко гроба святаго ищеши. Сего ради приидох возвестити о сем. Аз бо вся случившаяся о глаголе сем, юн еще сый, своима очима видех и обстоятельно вем. Мощи святаго князя исперва, якоже памятовати могу, бяху наверху земли, и многая чудодействия и исцеления бываху при них, обаче кем и когда обретены быша, сего исповедати не могу. Егда же бысть пожар великий во Тфери, тогда мы ово возгорения ради, да не сожжет святыя мощи, ово бояся, дабы како не пали на них стены, или бы иное что не приключилося, вложихом я в гробницу древяну и спрятахом у церковной стены в землю, вложи вше гробницу ту в каменный великий гроб утверждения ради. Тако убо и доныне суть».

115. Слышав же, святитель возрадовася и, призвав помянутаго зодчия Иоанна, повеле ему, да церковный мост⁴²⁰, идеже показа священник, разроет и гроб святаго обрящет. Прииде убо сей в церковь и взяв блаословение у святителя, рече: «Молися за мя, святче Божий, да возмогу послужити толикому делу, и да не огнь, изшед из гроба святаго, опалит мя, недостойна прикосновения суща». Сия рек, приять прощение у всех и, прочистив место (бяше бо множество углия на нем), нача, во-первых, церковный мост разбирати, потом же – землю. И якоже ископа на един лакоть,⁴²¹ явися каменный гроб. Видев же сие, святитель и священницы, иже предстояще ту, моляхуся, да Господь обретением святаго мощей милость свою явит им, возрадовашася велми и абие со святителем вси, облекшее я во священыя одежды, соборне молебная всемилостивому Спасу и пречистей Богородице, и святому совершиша. Таже святитель, прием святую воду, покропи всю церковь и гроб святаго, и всех ту бывших, и разыдошася в своя, благодаряще Бога, не презирающаго прошения своих рабов. Пришед же в дом свой, святитель Евфимий разсуди, яко неприлично есть мощам святаго, егда по обретении яве положены будут, остатится в древней раце, но «подобает, – рече, – да новая устроена будет». Еще же умысли и службу святому сочинити, и храм некий во имя святаго освятити, да в нем Божия благодать, яже удивляет святыя своя, прославляема будет. Обаче не дерзаше сие без повеления самодержавнаго сотворити, взем убо хартию, восписа к нему сице:

116. «Благочестивейшему самодержавнейшему господину царю и великому князю Михаилу Феодоровичу всея России – Евфимий, архиеписком богоспасаемаго града Тфери, со всею церковию: благодать, милость, мир от Бога Отца и Господа нашего Иисуса Христа да умножится. Якоже повелел еси, державнейший царю, еже новую церковь вместо ветхия твоим щедротным поданием создати, сице и бысть. Вся бо благочинно и благолепно устроишася, и ныне храм, егоже воздвигл еси, предстоит Христу, яко невеста украшена мужеви своему, и вопиет немолчно к Богу, да тебе, украсившему его, низпослет всякое благословение свыше. Егда же восхотехом освятити придел, иже в храме, прииде нам помысл, еже взыскати чудотворныя мощи председателя⁴²² и сродника твоего святаго благовернаго великаго князя Михаила Ярославича в покровителство державе твоей и в защищение граду нашему. Мы убо, мня сие быти богоугодное дело, предприяхом намерение исполнити и, яко изрыхом на един лакоть на показанном свидетельми достоверными месте землю, се внезапу явися каменный гроб, в немже рака святаго с чудотворными мощми. Видевше же то, возрадовахомся велми и благодарихом Бога. Обаче без твоего повеления не смеем ниже прикоснутися мощем, ниже нанести я из недр земных в свет. Тебе бо от Бога дадеся управляти сущая в державе царствия твоего, а нам соизволения творити, наипаче же ведая, яко сам Бог твое содержит сердце и направляет ти мысли ко исполнению своего хотения святаго. Аще убо заблагоразсудится пред тобою, Богом венчанный царю и владыко наш, повели, да обретенныя мощи святаго князя в церкве яве поставлены будут. На сие бо и прославляет Бог угодников своих, да имея их выну пред очима, потщимся подражати вере и житию их. Ты же, сие сотворив, обрящеши вечнаго богомольца и ходатая к Богу о спасении твоем, сего святаго великаго князя».

117. Сие послание, егда достиже чрез нарочитых мужей в руки благочестивейшаго государя царя, возрадовася велми, глаголя: «Слава тебе, Христе Боже, яко в мои времена изволил еси сие толикое светило нам, грешным, открыти». И абие повеле свою царскую грамоту написати в Тферь ко святителю Евфимию, да вся, яже о святом великом князе умысли сотворити, сотворит вскоре. Прием же святитель от самодержавнаго послание, абие намереваемому касается делу и, обрет некоего искуснаго древоделя, именем Назариа, повеле ему, да со всяким опаством очистит место, идеже святаго гроб, потом приложит старание, како бы его из земли подъяти, бе бо зело ветх и тяжек, и бояхуся, дабы не разрушился, егда прикоснутся ему.

118. Егда убо помянутый Назарий, приуготовав вся, служащая к поднятию, приступи ко гробу святаго и хотя оный мало очистити и укрепити, осязаше его, к поднятию приуготовляя, в то время между гробом и дскою, иже бе верху, внезапу явнся скважня некая, иже видев, Назарий простре руку свою сквозе оную с безстрашием, и абие в той же час рука его тако возболе, яко аще бы кто ее стрелою поразил, и сокрушахуся кости его от того, и ощущаше болезнь даже до разделения мозгов же и членов [Евр.4:12].⁴²³ Случися же един быти при гробе, и не бе, кто бы ему руку помощи подал. Того ради, едва возможе мало восклонитися и, взлез от гроба, бежа на святительский двор, вся окрестная места стенанием и воплем исполняя. Стечеся убо на вопль той множество народа, и сам святитель, слышав, прииде к нему и вопрошаше его, что бысть ему, или какое приключение сотворися, чесо ради рука его висит без действия долу. Обаче той от зелныя болезни слячеся⁴²⁴ весь и не можаше ниже возрети на кого, ниже отвещати словесе. И тако пребысть Назарий пять дней, люте валяяся и стражда, в шестый же день едва возможе святителю исповедати вся случившаяся ему. «Огнь, – рече, – изшед из гроба святаго, опали мя, или страшный порази мя гром, не вем, что бе. Но точию яко вложих руку мою в явившуюся скважню и прикоснувся мощем, мало святаго праха взях, се адовы объяша мя болезни, се люте поражаем, умираю. Увы мне! Яко многогрешен сый, продерзостен же и безумен. Дерзнух сие сотворити и се умираю».

119. Слышав же сие, святитель и предстоящий ту зжалишася зело о нем и, вшедше с болящим в церковь, начата молебная совершати о помиловании его. Егда же приспе время чтению святаго Еваггелиа, внезапу облегчися Назарию болезнь, яко возмощи ему о себе больною рукою знаменатися крестным знамением. Возрадовася убо о сем, нача прилежнее молитися и, взирая на икону святаго, яже над гробом его бе, припадаше на землю, прося о своем согрешеиии прощения. По отпущении же молебнаго пения осени его святитель животворящим крестом и покропи святою водою. И от того часа здрав бысть человек, и утвердися рука его, якоже бе прежде. Видев же сие велие чудо, святитель и предстоящий ту людие прославиша Бога и угодника его святаго великаго князя Михаила.

120. Тогда начася совопрошение у некиих о святых, и глаголаху, яко святии удобопреклоннейшии суть ко мщению, нежели ко благотворению, а Божия кротость колико нашым поползновениям терпит, невозможно есть изъявити словом. Слышав же сие, святитель Евфимий рече: «Правду рекосте, чада, яко Божия кротость и долготерпекие есть неизследимая пучина, обаче яко и небожители еси, поскольку вместити могут, сообразуются Божиим совершенствам, всеконечными же добротами, якоже Бог, никакая тварь просияти не может. И сие есть, якоже глаголет Богослов: «Возлюбленнии, ныне чада Божия есмы, и не су явися, что будем. Вемы же, яко егда явится, подобии ему будем, ибо узрим его, якоже есть» [1Иоанна 3, стих 2].⁴²⁵ Аще убо сия тако суть, Вскую глаголете, яко святии скорейшии ко мщению суть? Ни, чада, не глаголите сего! Святии несказанною любовию выну пылающе к нам, всякаго желают нам блага и ходатайствуют у Бога. Но мы сами причиною бываем всех находящих на нас злоключений и бед, яко самопроизволно прогоняем добро и объемлем зло, еже возгнездившися в недра наша, яко змий, уязвляет нас смертию и недостойных творит небесных дарований, паче же и обращает та в лютую пагубу нам и в вечную погибель. Не Божие ли дарование есть свет, еже просвещает вся, открывает всемирную красоту, согревает землю, производит древеса и травы и оживляет все, что в ноздрях дыхание носит. Обаче тем безумныя младенцы иногда ожигают руки, иногда же или неосторожность, или злоба людей тем же огнем великия производят пожары. И что речеши, огнь ли зло? Да не будет! Но злое онаго употребление беды наносит. Подобно и о воде надлежит рещи. Всякому известно, коль сия полезна. Но аще человек ввержется в ню, утопает. Ибо невместно есть воздушной твари обитати в водах, яже тяжестию своею превосходит воздух. Навыкните убо отсюду, яко имже образом не всякая земля всякий произрастает злак, сице и не всякая вещь всякой твари пользу приносит. К восприятию бо различных вещей, различныя требуются приуготовления и вместилища. Вретища⁴²⁶ служат к восприятию пшеницы, а мехи⁴²⁷ – ко вмещению вина. Сице и о прочих разсуждая, уразумеете, чесо ради червь, иже в кале, абие умирает от прикосновения благовонному крину, чесо ради Оза внезапу паде мертв пред Господем, яко прикоснуся кивоту завета,⁴²⁸ чесо ради зверие не прикоснушася Даниилу⁴²⁹ и огнь не опали отроков.⁴³⁰ Аще бы Назарий достоин был прикосновения святаго, никогда бы таковая не пострадал, а яко были в нем греховныя плевы⁴³¹ и удобоподжигаемое хврастие безплодных дел, того ради не дивно, яко опали его огнь Святаго Духа, иже вселися в святаго чудотворца мощи. И кто виновен казни, разсудите. Како дрзает сено изсохшее прикасатися огню?! Да не дерзнет Божию киоту прикасатися рука скверных. Сие еше молю вас, чада, возмите в разсуждение: что святейше, чистейше и полезнейше Божияго слова. Обаче языков учитель глаголет, яко и то некиим бывает воня смерти в смерть [2 Коринф.: 2, стих 16].⁴³² Кому же, вопросиши, не учеником ли Христовым? Ни, яко в них вмещается слово Божие изобилно, но иудеем и еллином: сии бо за безумие почитают откровенныя тайны, а тии соблюдаются ими, и тако в них не вмещается слово Божие. Якоже негде Спаситель научает: и вины не имут о гресе своем.⁴³³ Паки слышите: что сладчайше, и величайше, и снисходительнейше Спасителя нашего Христа, иже преподает нам себе в Божественной Евхаристии? Обаче пишется, яко и той бывает во осуждение некиим: «Ядый, – рече, – недостойне суд себе яст и пиет» (1Кор.11:24].⁴³⁴ Убо на гору Божию никто да не восходит не предочистився, якоже Моисей,⁴³⁵ никто кадило в руки да не возметь, кроме тех, ихже Бог избра и освяти».

121. На другий по том день, то есть месяца ноемвриа в 24 день, вечеру приспевшу, прииде святитель в церковь со всем освященным собором и церковными служители, от других же никого не повеле пустити, кроме архиерейскаго дому детей боярских, и облекшися во священныя одежды начата молебная совершати. Назарию же повеле, да послужит, якоже преднача, поднятию святаго гроба, обаче той бояшеся и надолзе отрицашеся. По сем, ободрен надеждою на Бога и святительское благословение приим со благодарением, касается делу, и с Божиею помощию вскоре подъемше гроб, поставиша на благопристойном уготовленном месте. И совершивше молебная, приступи святитель и повеле дску со гроба сняти до полу, сам же руками держаше покров, имже бы покрыти святаго мощи. Сие сотворши, приниче во гроб и осяза мощи тыя со страхом (бяху бо велие издающе благовоние), таже покры я покровом и облобыза любезно, такожде и вси, приключившийся ту. По сем повеле святитель паки покрыти гроб тою же дскою, Дóндеже новый устроит. Прежнее же место наполниша землею. И тако отъидоша во своя, благодаряще Бога и угодника его святаго великаго князя Михаила.

122. Наутрие мнози жители градстии, приходяще к соборней церкве, исповедаху яве: ови – яко видеша свет велий во граде, друзии же – яко столп огнен, сияющ над церковию, видеша, инии же – яко два пресветлыя облака обнощь ношахуся над гробом. Слышав же сие. Божий архиерей удивляшеся несказанно толиким Божиим щедротам, яко теми же чудесами изводи и тогда благоволение свое к верному рабу своему изъявити, имиже при убиении его изъяви, якоже в Житии святаго повествуется. А вскоре по сих потщася архиерей освятити придел, в немже почиваху мощи, во имя святаго великаго князя Михаила и повеле в нем совершати молебствия и Божественную службу. И от того времене начата людие вящщее ко святому князю имети усердие и притекаху к нему с болящими отвсюду, молящеся, да исцеление получат, еже и бываше: мнози бо различными недуги одержими получаху отраду молитвами святаго. Обаче якоже сия, тако и прочая премногая обстоятелства, случившаяся при том, древность забвению предаде. Вины же забвения сего следующыя наипаче быти мню: или бо яко людей, искусных в писании и в замечании достопамятных деяний мало бе тогда (изключая нашествия врагов, опустошавших отечество): или яко мы от природы больше склонны изследовати прешедшая и будущая, настоящее же время, аки маловажное и не касающееся до нас, оставляем; или яко опасаемся строгаго изследования и так называемыя критики или осуждения вкупе живущи с нами людей; или яко зависть и злоба не допускает нам чужыя добродетели прославляти. Не похваляю аз ни единыя причины из сих, иже затмевают и заглаждают достопамятныя и нужныя к наставлению будущих родов вещи, и желаю бы, во-первых, дабы вси или, по крайней мере, те, до коих сие наипаче принадлежит, просвещением учения умудрилися. Учение бо не вредит, якоже нецыи глаголют, но точию злое онаго употребление пагубно есть. Разсуди, что лучше есть, знание ли Бога, разумение ли себе и своих должностей, имже научаемся от закона, или в глубине невежества утопати, подобно несмысленным скотам. Потом – дабы излишнее любопытство о других временах оставивше, больше о настоящем пеклися. Будущая бо неизвестность причиняет безпокойство, изследование же прешедших случаев великим подвержено затруднениям. Настоящее точию принадлежит до нас, о сем подобает пещися, выну ожидая, яко наступающую уже смерть, тако и грядущий Суд и яко отверстая врата к прешедшему и будущему времени. Не то глаголю, еже бы вся возмощи знати, ибо человецы есмы, но научаю, да нужная паче иных к сведению и служащая к благополучию временному и вечному по силе и возможности приобретаем и да вся в пользу, а не в пагубу обращаем. Наконец желал бых аз того зело, дабы люди от неразсудных предосуждений других всемерно воздержалися. Изрядно, когда судит могущий разсуждати, той бо исправит и наставит. Но жалостно есть зрети, когда благоразумнаго мужа уязвляет или пересуждает непросвещенный и злобный невежда. О, буии человецы! Вскую нападете безвинно? Вскую угрызаете благодетелствующих вам человеков? Написал ли нечто ближний твой не по твоему вкусу, разсуди, яко никтоже может на всех угодити. Приими перо и сам лучше напиши (Кто руки отъя? Кто уста загради?) или погрешности исправи благосклонно. Аще ли сего не хощеши или не можеши сотворити, умолчи, не повреждай чужыя труды незлобнаго брата твоего. Ты кто еси, судяй чуждему рабу? Не уподобляйся гонителям Христовым, иже, завидуя силе словес и действиям чудес его, ихже сами не можаху сотворити, хуляху, глаголюще, яко лжет он, яко о Велзевуле изгонит бесы, яко прелщает народы, и подобная сим.⁴³⁶

123. В лето от воплощения Слова Божия 1665, в царство благочестивейшаго государя царя и великаго князя Алексиа Михайловича,⁴³⁷ самодержца всероссийскаго, престол патриаршества правящу святейшему Никону,⁴³⁸ во Тфери же Лаврентию архиепископу пасящу Христово стадо,⁴³⁹ бысть во всем граде Тфери, такожде и далече во окрестных весех и селех, тлетворное поветрие и зело тяжкий мор: падаху бо людие нечаянно⁴⁴⁰, яко есению листвне от древес, и ¹⁸⁹не бяху доволни живи⁴⁴¹ к погребению мертвых. Тако Богу наказующу грех ради наших. Тогда архиерею Лаврентию прииде благий помысл, еже преложение мощей святаго князя сотворити из древния зело ветхия раки в новую, еже умысли благолепно сооружити. Предреченный бо Евфимий архиепископ, не успев сего сотворити, ко Господу отъиде, и мощи святаго не открывахуся никогдаже, но бяху почивающе в каменном гробе, якоже обретены быша, древяную бо раку ветхости ради не можно бе оттуду изъяти.

124. Созва убо Лаврентий архиепископ вся священныя настоятели и соборныя иереи и возвести им желание свое о сем, рек: «Видите, братие, яко гнев Божий постиже нас грех ради наших: нечаянно скончеваемся от тлетворныя смерти. Камо⁴⁴² же скрыемся от вездесущия Божия? Везде грешника обрящет неумытное⁴⁴³ правосудие, везде достойная постигнет казнь. Известно же из Писания вемы, яко несть инаго средства ко умилостивлению Бога кроме истиннаго покаяния. Того ради подобает ныне предварити лице Господне во исповедании, в посте же и молитве, якоже примером предшествова нам великий Ниневийский град,⁴⁴⁴ и тако негли Божий гнев утолится и милость его возсияет к нам. Следующую убо седмицу⁴⁴⁵ умыслих завещати, еже препроводити ту в посте и молитве. Приимите убо сие завещание любезно, чада, и сотворите, да вси людие от мала и до велика, вашему примеру последующе, постятся. Аз же между тем потщуся святому великому князю новый устроити гроб. Древний бо, якоже видите, зело обветша, и Богу хотящу преложение мощей сотворити. И литию по граду с мощми учредим, негли⁴⁴⁶ Божий гнев утолится молитвами святаго».

125. Сия словеса слышавше, святолепнии онии мужи прияша любезно и абие по всем местам проповедаша пост и молитву. Егда же та седмица прейде и вся, яже к преложению, приуготовишася, повеле святитель, да по всем церквам сотворят триипостасному Богу всенощное славословие. Во утрие же собрася все множество народа к соборней церкве на Божественную литургию, юже сам архиепископ со знатнейшими из духовных соверши. По окончании же литургии приступи архиепископ с прочими духовными лицы к раце святаго и, открывше ту, обретоша честныя святаго великаго князя мощи, яко крин сияющыя и яко бисер не увядающыя, толикое же благоухание исходите от них, яко превышать ему курение фимиама и смирны. Дерзнувше убо, со страхом пркоснушася святым мощем и со благоговением, якоже подобает, подъявще из старыя раки, обвиша в новую белую камку⁴⁴⁷ и, радостно целовавше, преложиша в новоустроенную древяную раку и, многоценными покровы покрыша тыя, разидошася восвояси. Сия быша месяца септевриа последних числ.

126. Тридесятому же дню доспевщу, собрася паки все множество народа в соборную святую церковь и, надлежащую службу совершивше, изидоша вне града с честными кресты и святыми иконы, литию творяще. Сшествоваху же и священницы, одеяны во священныя одежды, благолепно носяще на раменах своих новоустроенную раку с многоцелебными мощми святаго великаго князя Михаила, народ же, предшествуяй и вследствуяй, взываше велиим гласом: «Господи, помилуй!» И тако обшедше град, возвратишася в церковь, идеже, отслушавше Божественную литургию, поставиша паки святыя оныя мощи на прежнем месте – в приделе святаго на левой стране близ стены. Абие же по том милостию всещедраго Бога и молитв ради святаго великаго князя нача всюду смертоносие умалятися, Дóндеже в конец исчезе. Того ради соборне тогда уставлено бысть, да во всем граде и в окрестных местах воспоминания ради Божиих благодеяний празднество преложения мощей святаго повсягодно в предреченное число на память святаго священномученика Григория, епископа Великия Армении, совершается. Благоволи же всеблагий Бог тогда же вложити в сердце некоему велможе, именем Роману Бобарыкину, иже при дворе его царскаго величества отправляше должность столника,⁴⁴⁸ да устроит швенным художеством украшенную плащаницу, на нейже образ святаго изображен бе, воеже бы покрывати тою святыя мощи, в память отшедших от сея жизни его родителей. Сей богоугодный свой обет егда соверши, принесе ко святителю, иже благоговейно покры тем святыя мощи, и тако пребыша в соборе надолзе.

127. В лето Господне 1682 возведен бысть на святителский престол в Тферь преосвященный Сергий.⁴⁴⁹ Сей, видя, яко зело обветша соборная Преображенская церковь, и отчасти восколебася, умысли вновь оную собственным своим иждивением сооружити. Того ради пренесе мощи святаго из собора в церковь Воздвижения честнаго креста,⁴⁵⁰ пренесе же вкупе и древний каменный гроб, в немже мощи обретены быша. Совершившуся же зданию оному,⁴⁵¹ паки возврати мощи в собор и положи на прежнем месте, каменный же гроб остави в Крестовоздвижеистей церкве в память пренесения его. Егда же наста в Тфери преосвященный епископ Варлаам, бывый в 18 веце,⁴⁵² тогда повелением его пренесены и положены быша мощи святаго под устроенною на то, изваянною и позлащенною сению за архиерейским местом между церковными столпами, придел же святаго изпразднив, учреди в нем ризнице архиерейстей быти.

128. Пребыша убо на том месте мощи даже до времени преосвященнаго Митрофана, иже святительствова в лето 1746 от Христа.⁴⁵³ Сей доброхотным подаянием потщася древяную святаго князя раку благолепне изваянным сребром обложити, позлатив ю в местах приличных. Таже, устроив на правой стране у самаго иконостаса в стене место, ту пренесе и положи святыя мощи, якоже и доныне есть видети. Ветхий же каменный гроб, иже храняшеся в Крестовоздвиженстей церкве, в случившейся пожар распадеся весь, обломки точию некия осташася, иже и доныне зрятся в соборе.

129. 1763 года с самый день Сошествия Святаго Духа поутру паки случися в Тфери зело великий пожар: возгоревшуся в дому архиерейском огню, абие по всему распространися граду и силным стремлением, яко змий некий, ношашеся, прелетая всюду и пожирая до основания вся, зажжеся тогда и соборная колоколня. Еже видевше духоные мужи (тферскому бо епископу Афанасию⁴⁵⁴ не случившуся ту), абие вся своя презревше, со тщанием стекошася отвсюду и боящеся, да некако мощам святым повреждение некое случится, аще возгорится соборная церковь, облекошася во священныя одежды, и, вземше раку с мощми, якоже бе, изнесоша из церкви, и, благоговейно на раменах носяще, принесоша ко углу града и поставиша на брезе Волги-реки против Феодоровскаго училищнаго монастыря.⁴⁵⁵ Таже, приставлше священномонаществующих к раце, да, храняще мощи, молебствуют ту, разидошася кийждо спасати свой дом от огня. Вечеру же наставшу, и свирепству огня мало утолившуся, пришедше паки, взяша мощи и, честно несше, поставиша на прежнее место в соборе. Уцеле же вся та страна, идеже лежаша мощи, теплое бо ходатайство святаго, яко бичь некий, прогоняше огнь.

130. О сем плачевном прилючении достиже весть в царствующий град Москву, идеже обреташеся тогда благочестивейшая самодержавнейшая великая государыня императрица Екатерина Алексеевна Вторая, пришед из Санкт-Петербурга коронования ради,⁴⁵⁶ яже по приятии священнейшаго помазання и венца, егда возвращашеся в царствующий град святаго Петра, бысть по пути в Тфери и видев весь град обратившийся в пепел, соболезнова зело и, матерним возбуждаема милосердием, соизволи от щедроты своея толикое пожаловати богатство, елико доволно имело быти к созиданию и украшению всего града и всех домов жителствующих ту людей. Повеле же, да оттоле во всей Тфери, некая точию места изключив, везде каменныя домы великолепныя и высокия устроены будут, еже и бысть.

131. Вся сия, дозде написанная, великим тщаиием собрахом из разных древностей остатков, яже возмогохом обрести, некая же от повествования достоверных свидетелей взяхом, а яже видехом, яко благопристойным следствием из предидущих можно бе выводити, та с опасностию внесохом. В дополнение же к прежним зде воспомянути потребно, яко благоверный великий князь Михаил Ярославич поживе лет 48, державствова же во Владимире, по летописям российским, 13 лет. Убо матерь свою блаженную Ксению сам погребе в Тфери в соборной церкви, якоже мню, за шесть лет до кончины своея. Отец же его благоверный великий князь Ярослав Ярославичь млад сый скончася, и тридесяти лет не дожив.⁴⁵⁷ Он святителский престол основа в Тфери в лето от Христа 1271, на немже бысть первый председатель Симеон, князь Полотский,⁴⁵⁸ по нем Андрей, князь Литовский,⁴⁵⁹ таже Варсонофий, упоминаемый зде в житии. Последовавших же за сими прочих преосвященных архиереев тферских зри оглавления при конце сея книги.⁴⁶⁰

132. По кончине же святаго князя Михаила вскоре постиже гнев Божий и праведное его мщение всех злокозненных врагов его. Окаянный бо Кавгадый, прогневавшуся на него татарскому царю, в первый год по убиении блаженнаго от печали и беснования зле изверже окаянную свою душу. Князь же Георгий вскоре по том убиен бысть во Орде, якоже глаголют, от князя Димитриа Михайловича. Прочий же единомышленники и сковники⁴⁶¹ их, разными образы пострадавше, погибоша.

133. Мы же, видяще толи кий гнев Божий на злочестивыя, к праведным же толикия щедроты и чудный промысл, имже он обыче руководствовати к небесному блаженству, потщимся бегати греха и усердно хранити святый его закон, прославляя дивнаго в чудесех Бога, Отца, и Сына, и Святаго Духа, емуже подобает всякая слава, честь и поклонение, ныне, и присно, и вовеки веков. Аминь.