91. 1461 г. марта 22. Настольная грамота тверскому епископу Геннадию

Из синодального сборника № 562, л. 27–28; издана была, по тому же списку, в I-м томе Актов Исторических под № 68.

По благодати, данной нам от пресвятого и живоначального Духа, еже ставить архиепископов и епископов, по обычаю уреченных градов в епископиях, якоже то изначала божественная соборная святая апостольская церковь предала: по тому же и смирение наше, с сущими боголюбивыми архиепископами и епископами, и самобывших на том святом избраниии поставлении, архиепископа и епископов: Ионы архиепископа Великого Новгорода и Пскова, Феодосия архиепископа ростовского и ярославского, его повольной грамотой, Евфимия епископа суздальского и торусского, Давида епископа рязанского и муромского, … ²⁸⁵² , Геронтия епископа коломенского, Васиана епископа сарского и подонского, и по избранию же благодати Святого Духа, избрахом в святейшую епископию богоспасаемого града Твери священноинока архимандрита Гоннадия, и поставихом епископом. И сего ради должны суть, ты мой о Святом Духе возлюбленный сыну, благородный и благоверный великий князь Михайло Борисович, и со всем с твоим господством, и благородные князья и бояре, и честноявленные сановные мужи, и великое священническое и христоименитое все испленение святого людства, по нашему благословению, честь воздаять ему, по превышнему Христову евангельскому завещанию, к святым своим ученикам и Апостолам глаголющему: «слушаяй, рече, вас, мене слушает, а отметаайся вас, мене отмещется и пославшего мя»; и: «приемляй пророка во имя пророче мзду пророчу приимет; приемляй праведника во имя праведника мзду праведничу прииметь». И сего ради ведуще се, и яко елико кто честь воздает святителю, и тая честь к самому Христу восходить, от негоже и мзды чаете сторицею, и ты же, сыну, благородный и благоверный великий князь Михайло Борисович и благородные князья и великие бояре сановные, и архимандриты и игумены, и священноиноки и иноки, и попы и диаконы, и весь христоименитый народ, благоповиновение и послушание имейте к нему, яко присному своему епископу, со всяким благопокорением и любовью. А он убо должен есть, о Святом Духе сын и сослужебник нашего смирения Геннадий, епископ богоспасаемого града Твери, о ²⁸⁵³ евангельских и апостольских и отеческих преданиях правительных блюсти, елика сила, и о всем своем пределе, по правильному всяко извещению, церкви свящати, и в четци и в подиаконы и в диаконы ставить, и в попы совершать, и священноиноки, с испытством всяко довольно духовным, [в] настоятельство ²⁸⁵⁴ духовное уставлять, и всякое церковное дело, по правильному всяко преданию, исправлять, яко присный епископ своей епископии, не имея забавления никакого ни от когоже. И сего ради дана бысть грамота сия нашего смирения, на утверждение сего боголюбивого епископа богоспасаемого града Твери Геннадия, на Москве, месяца марта в 22 день, в лето 6969, индикта 9.