26. 1392 г. августа 29. Грамота митрополита Киприана новгородскому архиепископу Иоанну о неприкосновенности церковных судов и вотчин

Из рукописи Румянцевского Музея № 204, л. 449–450, по которой издана была в Актах Исторических, т. I, № 7. Основной список сравнен с находящимися в июльской книге Макарьевских Миней-Четьих (Синод. спис. № 182, л. 662; Успен. спис. № 996, л. 636). Приведена вполне в Стоглаве, гл. 64 (казан. изд. стр. 286–289).

Се аз Киприан, митрополит киевский и всея Руси, по преданию святых Апостолов и святых Отцов уставу, еже то уставили пределы церквам Божьим, митрополиям и епископиям, да еже что потягло к которой митрополии, или к епископии: монастыреве, игумены с чернецами, попы, дьяконы и всяк церковный человек, то все под властью, в послушании святителю: никтоже да не смеет ниедин крестьянин, ни мал ни велик, вступаться в те дела. Аще ли который от тех игуменов, или попов, или чернецов имет отыматься мирскими властелинами от святителя, такового божественные правила извергают и отлучают; а кто по них имет вступаться, того не благословляют. А что погосты и села и земли и воды и пошлины, что потягло к церкви Божьи, или купли, или кто дал по души памяти деля, а в то ниедин христианин не вступается: а кто вступится, того не благословляют божественные правила. Сего ради и аз Киприан, митрополит всея Руси, по тем божественным правилам, дал есмь сию свою грамоту в епископию в новгородскую, в Святую Софию, и сыну своему владыке архиепископу Великого Новагорода Ивану: да елико есть монастырей игумены, да будут у него в покорении и в послушании, и весь чин священнический; такоже и погосты и села и земля и воды со всеми пошлинами, что потягло при первых владыках к той епископии, к Софии Святой: как при первых владыках ¹³²⁰ тамо что ни было, тако и нынче потянет к Святой Софии и ко владыке Ивану. А никто бы не смел вступаться в церковные пошлины, ни в земли, ни в воды, блюлся бы казни святых правил; а кто будет вступился, и тот бы престал ¹³²¹ от сего часа. А кто послушает святых Апостолов правил и святых Соборов предание и мое поучение, на том, милость Божья и Пречистой его Матери и мое благословение; а кто не послушает моего благословения и покушается обидеть церковь Божью, а на том не буди милости Божьей и Пречистой его Матери, ни моего благословения. А дана грамота на Москве, в лето 6900 ¹³²² , месяца августа в 29 день.