1 сентября 2002

Ка́мени запеча́тану от иуде́й/ и во́ином стрегу́щим Пречи́стое Те́ло Твое́,/ воскре́сл еси́ тридне́вный, Спа́се,/ да́руяй ми́рови жи́знь./ Сего́ ра́ди си́лы небе́сныя вопия́ху Ти́, Жизнода́вче:/ сла́ва воскресе́нию Твоему́, Христе́,/ сла́ва Ца́рствию Твоему́,// сла́ва смотре́нию Твоему́, еди́не Человеколю́бче.

Перевод: Хотя камень был опечатан иудеями, и воины стерегли пречистое тело Твое, воскрес Ты в третий день, Спаситель, даруя миру жизнь. Потому Силы небесные взывали к Тебе, Податель жизни: «Слава воскресению Твоему, Христе; слава Царству Твоему; слава промыслу Твоему, Единый Человеколюбец!»

Воскре́сл еси́ я́ко Бо́г из гро́ба во сла́ве,/ и ми́р совоскреси́л еси́;/ и естество́ челове́ческое я́ко Бо́га воспева́ет Тя́, и сме́рть исчезе́;/ Ада́м же лику́ет, Влады́ко;/ Е́ва ны́не от у́з избавля́ема ра́дуется, зову́щи:// Ты́ еси́, И́же все́м подая́, Христе́, воскресе́ние.

Перевод: Воскрес Ты, как Бог, из гроба во славе и мир с Собою воскресил. И естество человеческое как Бога воспело Тебя, и исчезла смерть. Адам торжествует, Владыка, и Ева ныне, от уз избавляемая, радуется, взывая: «Ты, Христе, всем даруешь воскресение!»

В рождестве́ де́вство сохрани́ла еси́,/ во успе́нии ми́ра не оста́вила еси́, Богоро́дице,/ преста́вилася еси́ к животу́, Ма́ти су́щи Живота́,// и моли́твами Твои́ми избавля́еши от сме́рти ду́ши на́ша.

Перевод: При рождении Христа Ты девство сохранила и по смерти мира не оставила, Богородица: к жизни Ты перешла, как Матерь Жизни, и молитвами Твоими избавляешь от смерти души наши.

В моли́твах неусыпа́ющую Богоро́дицу/ и в предста́тельствах непрело́жное упова́ние/ гроб и умерщвле́ние не удержа́ста:/ я́коже бо Живота́ Ма́терь/ к животу́ преста́ви// во утро́бу Всели́выйся присноде́вственную.

Перевод: В молитвах неусыпающую (ἀκοίμητος — неусыпный; поэт. контраст к наименованию праздника) Богородицу и в ходатайствах надежду непоколебимую гроб и смертность не удержали. Ибо Ее как Матерь Жизни к жизни перенес Вселившийся в Ее чрево вечно девственное.

Земна́го са́на сла́ву оста́вив,/ Небе́сное Ца́рство насле́довал еси́,/ кро́вными ка́плями, я́ко пречу́дным ка́мением,/ нетле́нныя венцы́ украси́л еси́/ и ко Христу́ приве́л еси́ собо́р страстоте́рпец./ С ли́ки а́нгельскими в невече́рнем све́те/ незаходи́маго Со́лнца Христа́ обре́л еси́,/ свя́те Андре́е Стратила́те,/ Его́же моли́ с пострада́вшими с тобо́ю при́сно,// да спасе́т ду́ши на́ша.

Перевод: Земного служения славу оставив, ты наследовал Небесное Царство, каплями крови, как удивительными драгоценными камнями, свой нетленный венец ты украсил и ко Христу привел ты собрание мучеников. С чинами ангельскими в невечернем свете незаходимое Солнце Христа ты обрел, святой Андрей Стратилат, Его же всегда моли вместе с претерпевшими с тобой мученичество о спасении душ наших.

В моли́твах Го́сподеви предстоя́,/ я́коже звезда́ со́лнцу предтеки́й,/ и жела́емое сокро́вище Ца́рствия узре́л еси́,/ ра́дости неизрече́нныя исполня́яся./ Безсме́ртному Царю́ в бесконе́чныя ве́ки,/ от А́нгел безпреста́ни хвали́мому, пое́ши, Андре́е Стратила́те.// С ни́миже моли́ся непреста́нно о всех нас.

Перевод: В молитвах Господу предстоя, как звезда идущая впереди Солнца, ты увидел желаемое сокровище Царствия, наполняясь неизреченной радостью, Бессмертному Царю, Ангелами беспрестанно восхваляемому, в бесконечные века ты воспеваешь молитвы, Андрей Стратилат. С ними же молись непрестанно обо всех нас.

Святы́й му́чениче Андре́е Стратила́те, при́зри с Небе́снаго черто́га на тре́бующих твоея́ по́мощи и не отве́ргни проше́ний на́ших, но, я́ко при́сный благоде́тель и хода́тай на́ш, моли́ Христа́ Бо́га, да, человеколюби́в и многоми́лостив Сы́й, сохрани́т на́с от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит на́с, гре́шных, по беззако́ниям на́шим, и да не во зло́ обрати́м блага́я, дару́емая на́м от Всеще́драго Бо́га, но во сла́ву свята́го и́мене Его́ и в прославле́ние кре́пкаго твоего́ заступле́ния. Да моли́твами твои́ми да́ст на́м Госпо́дь ми́р по́мыслов, воздержа́ние от па́губных страсте́й и от вся́кия скве́рны, и да укрепи́т во все́м ми́ре Свою́ Еди́ную Святу́ю Собо́рную и Апо́стольскую Це́рковь, ю́же стяжа́л е́сть Честно́ю Свое́ю Кро́вию. Моли́ся приле́жно, святы́й му́чениче, да благослови́т Христо́с Бо́г держа́ву на́шу, да утверди́т во Святе́й Свое́й Правосла́вней Це́ркви живы́й ду́х пра́выя ве́ры и благоче́стия, да вси́ чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей, да мы́ вси́ в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́ благода́тию Го́спода на́шего Иису́са Христа́, Ему́же подоба́ет вся́кая сла́ва, че́сть и держа́ва со Отце́м и Святы́м Ду́хом, ны́не, и при́сно, и во ве́ки веко́в. Ами́нь.

Правосла́вия наста́вниче,/ благоче́стия учи́телю и ми́лости сокро́вище,/ архиере́ев украше́ние,/ люде́й зыря́нских наста́вниче,/ святи́телю Питири́ме,/ ду́шу свою́ за Христа́ положи́вый,/ моли́ Еди́наго Человеколю́бца о па́стве твое́й и о всех// любо́вию чту́щих па́мять твою́.

Перевод: Православия наставник, благочестия учитель и милости сокровищница, архиереев украшение, народа зырянского наставник, святитель Питирим, жизнь свою за Христа положивший, моли Единого Человеколюбца о пастве твоей и обо всех с любовью почитающих память твою.

Мона́шескими доброде́тельми/ во оби́тели святи́теля Алекси́я пе́рвее украси́вся/ и прославле́нию того́ послужи́в,/ па́стырь яви́лся еси́ лю́дем зыря́нским/ и, я́ко а́гнец чист, прине́слся еси́ Сло́ву Началопа́стырю,/ му́ченик быв, Питири́ме святи́телю всехва́льне./ Те́мже торжеству́ем вси любо́вию// Боже́ственную па́мять твою́.

Перевод: Монашескими добродетелями в обители святителя Алексия сначала украсившись и прославлению его послужив, ты стал пастырем народа зырянского и, как чистый агнец, принес себя Слову - Начальнику Пастырей, став мучеником, всехвальный святитель Питирим. Потому торжествуем все с любовью священную память твою.

Днесь проро́чество святи́теля Петра́/ пред оча́ми на́шими сбыва́ется,/ се́рдце бо Росси́и град Москва́/ свы́ше сла́ву ве́лию прие́млет,/ украша́ем, я́ко би́сером честны́м,/ мно́гим со́нмом Бо́жиих уго́дников;/ к ни́мже мы любо́вию возопии́м:/ о, пречу́днии святи́телие,/ испове́дницы и му́ченицы но́вии,/ благове́рнии кня́зие, преподо́бнии отцы́,/ и прему́дрии юро́дивии,/ и вси святи́и, зна́емии и незна́емии,/ я́ко благоче́стия сто́лпи,/ моли́те Христа́ Бо́га// стране́ на́шей в ми́ре спасти́ся.

Перевод: Сегодня пророчество святителя Петра на глазах наших сбывается, ибо сердце России - город Москва принимает великую славу свыше, украшаемый, как драгоценными камнями, большим собранием Божиих угодников, к ним же мы с любовью взываем: «О чудесные святители, исповедники и новые мученики, благоверные князья, преподобные отцы и премудрые юродивые, и все святые - известные и неизвестные, как столпы благочестия, молите Христа Бога о спасении в мире страны нашей».

Возвели́чися ны́не, гра́де Москво́,/ ве́лиих даро́в ду́ховных сподобля́ющися,/ я́ко сокро́вищница пречестна́я/ святы́ням и моще́м уго́дник Бо́жиих/ и оте́чество возлю́бленное мно́гим святы́м,/ к их же по́мощи усе́рдно прибега́ем:/ о святы́х Моско́вских ди́вный со́нме,/ ва́шими уче́ньми и дея́ньми/ вку́пе и страда́ньми за Христа́,/ ду́ши на́ша просвети́те// и спасе́ния нам при́сно бу́дите хода́таи.

Перевод: Возвеличился сейчас город Москва, удостоившийся великих духовных даров, как почитаемая сокровищница святынь и мощей угодников Божиих и возлюбленная родина многих святых, к их же помощи усердно прибегаем: «О дивное собрание московских святых, вашими учениями и делами, а также и мучениями за Христа, души наши просветите и будьте непрестанными просителями о спасении нашем».

О, преподо́бнии и богоно́снии отцы́ на́ши Моско́вские, па́стырие и учи́телие, по́стницы и испове́дницы, земни́и а́нгелы, Небе́снии челове́цы: вели́кие святи́телие Пе́тре, Алекси́е, Ио́но, Фили́ппе, Ермоге́не, Инноке́нтие, И́ове, Ти́хоне, Мака́рие, Филаре́те и Стефа́не Пе́рмский; преподо́бнии Се́ргие, Ни́коне, Михе́е и про́чие Ра́донежские чудотво́рцы; преподо́бнии схимона́ше Кири́лле и схимона́хине Мари́е; преподо́бный Андрони́к, преподо́бнии Афана́сие Высо́цкий, Са́вво Стороже́вский и Са́вво Стромы́нский; царе́виче Дими́трие, преподо́бная ма́ти Евдоки́е (Евфроси́ния), преподо́бне о́тче Ферапо́нте Можа́йский и преподо́бне о́тче Андре́е (Рублев); святи́и благове́рные чудотво́рцы кня́же Дании́ле Моско́вский и Дими́трие Донско́й; блаже́ннии юро́дивые Христа́ ра́ди Васи́лие, Иоа́нне и Макси́ме Моско́вские чудотво́рцы; преподобному́ченице и Вели́кая Княги́не Елисаве́то и иноки́не Варва́ро и все новому́ченицы и испове́дницы Моско́вские, к вам прибега́ем, вам мо́лимся и ми́ли ся де́ем, не забу́дите нас, прибега́ющих к вам, бу́дите моли́твенницы о прихо́де сем (храме сем; доме сем); мы же, яко немощны́ су́ще, ничто́же мо́жем твори́ти без ва́шего заступле́ния, про́сим предста́тельства ва́шего о нас, недосто́йних, пред Го́сподом Бо́гом, в беда́х утеше́ния, в несча́стии покрови́тельства, в оби́дах заступле́ния и во всех приключа́ющихся злых ра́дости и упова́ния, те́мже не я́ко неключи́ми раби́, но я́ко ва́ши сы́нове да пребу́дем и моли́твами ва́шими живо́т ве́чный в Ца́рствии невече́рнем насле́дим. Ами́нь.

Засту́пнице ве́рных Преблага́я и Ско́рая,/ Пречи́стая Богоро́дице Де́во!/ Мо́лим Тя пред святы́м и чудотво́рным о́бразом Твои́м,/ да, я́коже дре́вле от него́ заступле́ние Твое́/ гра́ду Москве́ дарова́ла еси́,/ та́ко и ны́не нас от вся́ких бед и напа́стей ми́лостивно изба́ви,// и спаси́ ду́ши на́ша, я́ко Милосе́рдая.

Перевод: Защитница верующих, Преблагая и Быстрая, Пречистая Богородица Дева! Молим Тебя перед святым и чудотворным образом Твоим, как раньше от него защиту Твою городу Москве даровала Ты, так и сейчас нас от всяких бед и напастей милостиво избавь, и спаси души наши, как Милосердная.

Всепе́тая и Всесла́вная Цари́це Богоро́дице,/ Ма́ти всея́ тва́ри Соде́теля,/ христиа́нская наде́ждо и Засту́пнице,/ ненаде́ющимся и отча́явшимся ско́рое наде́яние, мо́лим Тя:/ ми́лостива бу́ди нам, гре́шным,/ не оста́ви раб Твои́х и не отри́ни моле́ния недосто́йных./ Мо́лимся, взира́юще ко о́бразу Твоему́ честно́му/ святы́я и чудотво́рныя ико́ны Твоея́ и вопию́ще:/ с пла́вающими и путеше́ствующими да пребу́дет ми́лость Твоя́./ О Влады́чице, ри́зою Твое́ю честно́ю защити́,/ и во вся́ких ме́стех злы́х ве́рныя соблюди́,/ и моли́ся к Ро́ждшемуся из Тебе́ Христу́ Бо́гу на́шему,// да спасе́т от грех ду́ши на́ша.

Перевод: Воспеваемая и Прославляемая всеми Царица Богородица, Мать Создателя всего тварного, христианская надежда и Защитница, ненадеющимся и отчаявшимся ожидание быстрой помощи, молим Тебя: милостивой будь к нам, грешным, не оставляй рабов Твоих и не отвергни молитвы недостойных. Молимся, взирая на почитаемый образ Твой святой и чудотворной иконы Твоей и взываем: с плавающими и путешествующими да пребудет милость Твоя. О Владычица, ризой Твоей драгоценной защити, и во всяких тяжелых положениях верующих сохрани, и молись к родившемуся от Тебя Христу Богу нашему, да спасет от грехов души наши.

Взбра́нной Воево́де победи́тельная,/ я́ко изба́вльшеся от злых,/ благода́рственная воспису́ем Ти, раби́ Твои́, Богоро́дице,/ но, я́ко иму́щая держа́ву непобеди́мую,/ от вся́ких нас бед свободи́, да зове́м Ти:// ра́дуйся, Неве́сто Неневе́стная.

Перевод: Тебе, Высшей Обороняющей нас Военачальнице за избавление от страшных бед учреждаем Тебе торжества победы благодарственные мы, рабы Твои, Богородица! Но Ты, как имеющая власть необоримую, от всяческих опасностей нас освободи, да взываем Тебе: «Радуйся, Невеста, брака не познавшая!»

В Небе́сныя оби́тели пресели́вшаяся с пло́тию,/ су́щия на земли́ ника́коже оста́вила еси́, Богоро́дице,/ о́браз Боже́ственный и многочуде́сный Пречи́стаго Лица́ Твоего́/ зре́ти лю́бящим Тя и покланя́тися дарова́ла еси́,/ я́ко зна́мение Твоея́ благода́ти;// чтим его́, лобыза́юще.

Перевод: В Небесные обители с телом переселившись, на земле живущих не оставила Ты, Богородица, даровав возможность созерцать и поклоняться Твоему священному и прославленному чудесами образу всем любящим Тебя, как знамение Твоей благодати, почитаем его, целуя.

О, Пресвята́я Влады́чице, Де́во Богоро́дице, Засту́пнице на́ша блага́я и ско́рая! Воспева́ем Ти вси благода́рственная за чу́дная дела́ Твоя́. Песносло́вим от лет дре́вних неотъе́млемое заступле́ние Твое́ гра́ду Москве́ и стране́ на́шей, чудотво́рным о́бразом Твои́м Донски́м всегда́ явля́емое: в бе́гство обраща́ются полцы́ чужди́х, гра́ди и ве́си невреди́ми сохраня́ются, лю́дие же от лю́тыя сме́рти избавля́ются. Осуша́ются о́чи слезя́щеи, умолка́ют стена́ния ве́рных, плач в ра́дость о́бщую претворя́ется. Бу́ди и нам, Пречи́стая Богоро́дице, утеше́ние в бе́дствиих, возрожде́ние наде́жды, о́браз му́жества, исто́чник ми́лости и в ско́рбных обстоя́ниих неистощи́мое терпе́ние нам да́руй. Пода́ждь коему́ждо по проше́нию и ну́жде его́: младе́нцы воспита́й, ю́ныя уцелому́дри и стра́ху Бо́жию научи́, уныва́ющия обо́дри и не́мощную ста́рость поддержи́. Посети́ в боле́знех и печа́лех су́щия, зла́я сердца́ умягчи́, братолю́бие укрепи́, ми́ра и любве́ всех нас испо́лни. Примири́, Благосе́рдая Ма́ти, вражду́ющия и оправда́й оклеве́танныя. Истреби́ поро́ки, да не восхо́дят греси́ на́ши пред Судие́ю вся́ческих, да не пости́гнет нас пра́ведный гнев Бо́жий. Твои́ми моли́твами, всемо́щным Твои́м покро́вом огради́ нас от наше́ствий вра́жиих, от гла́да, губи́тельства, огня́, меча́ и вся́каго ино́го злострада́ния. Упова́ем моли́твами Твои́ми получи́ти от Всевы́шняго Бо́га грехо́в проще́ние и изглажде́ние и с Бо́гом примире́ние. Умоли́ стяжа́ти нам Ца́рствие Небе́сное и по сконча́нии жи́зни на́шея одесну́ю Престо́ла Бо́жия ста́ти, иде́же Ты, о Всепе́тая Де́во, Святе́й Тро́ице в ве́чней сла́ве предстои́ши. Удосто́й и нас с ли́ки А́нгелов и святы́х та́мо восхвали́ти Пречестно́е и́мя Сы́на Твоего́, со Безнача́льным Его́ Отце́м и Всесвяты́м и Благи́м и Животворя́щим Его́ Ду́хом, во ве́ки веко́в. Ами́нь.

О, Всеми́лостивая Ма́ти, Пречи́стая Де́во Богоро́дице! Ты еси́ свет ума́ моего́, ра́дость се́рдца моего́, си́ла во́ли моея́. Услы́ши и приими́ моле́ние мое́. При́зри на я́звы души́ и те́ла моего́, обогати́хся страстьми́, обнища́х смире́нием. Испо́лнен есмь студа́ за зла́я дела́ и трепе́щу Суда́ Бо́жия. Греси́ ю́ности, забве́ннии и утае́ннии греси́ отягча́ют со́весть мою́. Омы́й мя струя́ми сле́зными, сними́ бре́мя тя́жкое, грехо́вное, да сотворю́ плоды́ досто́йныя покая́ния. Те́рнием скорбе́й усы́пан есть путь мой. Вем, я́ко пра́вда Бо́жия наказу́ет мя. Умоли́ милосе́рдие Бо́жие о мне, при́зри на сле́зы моя́ и испра́ви и спаси́ мя и ча́да моя́, бу́ди ми сокро́вище ве́ры и храни́лище благоче́стия. Да́руй несокруши́мое терпе́ние в беда́х, от ве́ры проистека́ющее, отыми́ дух пра́здности, уны́ния, любонача́лия. Изгони́ гнев, за́висть, памятозло́бие, нечистоту́, ле́ность, си́ми и бо́льшими поро́ки неду́гует душа́ моя́. Примири́ вражду́ющия, оправда́й оклеве́танныя. Просвети́ нас све́том Сы́на Твоего́ и даждь нам глаго́лати сло́во и́стины, тве́рдое в пра́вде, ми́рное любве́ ра́ди, растворе́нное благоразу́мием. Посети́ в боле́знех и печа́лех су́щих, да вси, под держа́вным покро́вом Твои́м сохраня́еми, безбе́дно Ца́рствия Небе́снаго дости́гнем, хвалу́ воздава́юще за вся Человеколю́бцу Бо́гу. Ами́нь.

О, Пресла́вная Ма́ти Христа́ Бо́га на́шего, благи́х Пода́теля, ми́лостию Свое́ю всю вселе́нную сохрани́, да́руй нам, рабо́м Твои́м, прему́дрость и ра́зум, све́том Сы́на Твоего́ ду́ши на́ша просвети́, еди́на Всепе́тая, от Херуви́м и Серафи́м сла́вимая.

Я́ко умо́м Христо́вым на́с просвеща́ющую, хва́лим Тя́, Пречи́стая Ма́ти Го́спода, всю́ вселе́нную держа́щаго, Красоты́ ми́ра ви́димаго и неви́димаго, луча́ми Жи́зни на́с озаря́ющая.

Богоро́дице Пречи́стая, до́ме, Его́же созда́ Себе́ Прему́дрость Бо́жия, даро́в духо́вных Пода́тельнице, от ми́ра к преми́рным ум наш возводя́щая и всех к позна́нию ра́зума приводя́щая! Приими́ моле́бное пе́ние от нас, недосто́йных раб Твои́х, с ве́рою и умиле́нием покланя́ющихся пред пречи́стым о́бразом Твои́м. Умоли́ Сы́на Твоего́ и Бо́га на́шего, да да́рует власте́м на́шим му́дрость и си́лу, судия́м пра́вду и нелицеприя́тие, па́стырем му́дрость духо́вную, ре́вность и бде́ние о душа́х на́ших, наста́вником смиренному́дрие, ча́дом послуша́ние, всем же нам дух ра́зума и благоче́стия, дух смире́ния и кро́тости, дух чистоты́ и пра́вды. И ны́не, всепе́тая, вселюби́мая на́ша Ма́ти, пода́й нам ума́ прибавле́ние, умири́, соедини́ во вражде́ и разделе́нии су́щия и положи́ им соу́з любве́ неразреши́мый, всех заблу́ждших от неразу́мия к све́ту и́стины Христо́вы обрати́, стра́ху Бо́жию, воздержа́нию и трудолю́бию научи́, сло́во прему́дрости и душеполе́зное зна́ние прося́щим да́руй, осени́ нас ве́чною ра́достию, Херуви́мов светле́йши и Серафи́мов честне́йши су́щая. Мы же, сла́вная дела́ и многоразу́мную прему́дрость Бо́жию в ми́ре и жи́зни на́шей ви́дяще, устрани́мся земны́я суеты́ и изли́шних жите́йских попече́ний, и ум и се́рдце на́ше на Небеса́ возведе́м, я́ко да Твои́м заступле́нием и по́мощию сла́ву, хвалу́, благодаре́ние и поклоне́ние в Тро́ице сла́вимому Бо́гу и всех Созда́телю возсыла́ем, ны́не и при́сно, и во ве́ки веко́в. Ами́нь.