14-й день

Святых мученик Наза́рия, Герва́сия, Прота́сия и Келси́я

Преподобнаго отца на́шего Нико́лы Свято́ши, князя Черниговскаго

Преподобныя Параске́вы Се́рбской

Преподобнаго Космы́ Яхромскаго

На Го́споди, воззва́х: стихи́ры святых, глас 4.

Подо́бен: Я́ко до́бля:

Иже веры свиде́теле, подвиг соверши́вше,/ победы венец прия́ша/ доблему́дренный Наза́рий и великий Прота́сий/ с Келси́ем мудрым, Богомудрый Герва́сий./ ихже воспои́м, я́ко до́блия ору́жники,/ я́ко Вы́шняго Царствия наследники/ и я́ко самово́льная заколе́ния.

Просвети́вся смыслом светозаре́ния Духа,/ священный Наза́рие,/ па́че солнца, во тьме сущим, возсиял еси́ душа́м,/ Боже́ственною благода́тию поучая,/ просвещая, наставляя светле́йше/ Единаго Го́спода и ве́ровати и чти́ти,/ воплощенна от Девы пресла́вно/ и земныя осия́вшаго.

С Наза́рием возсия приснопамятный Келси́й,/ и славный Прота́сий, и Герва́сий,/ доблему́дренно пострада́вше/ и вся полки́ де́монския му́жески на земли победи́вше./ Тем то́чат исцелений струи́/ и сердца́ напаяют богатно благочестивых/ Боже́ственною благода́тию.

Да восхва́лится Наза́рий, и да почти́тся Прота́сий,/ и Боже́ственный Келси́й, и Герва́сий,/ и́же благославно пострада́вше и лесть ума́ливше,/ и А́нгельским лико́м священно причита́еми,/ и обожа́еми по причастию Боже́ственному,/ и победы венцы́ от дла́ни Живоначальныя прие́мше.

Я́ко течение соверши́вше и веру соблюдше,/ страдания венцы́ увязо́стеся/ и А́нгелом сочета́стеся,/ све́тло хра́брствовавше и льстиваго врага о Христе́́ поправше,/ Божественнии мученицы./ Сего ради, согласно соше́дшеся,/ светоно́сную вашу па́мять совершаем, веселя́щеея.

Богомудрый Наза́рий/ Боже́ственным пропове́данием гра́ды проходя́, просвети́,/ егóже подражав, Келси́й/ славу стяжа́ Боже́ственных страдалец, поправ льстиваго./ Сия́ вси похвала́́ми почти́м,/ я́ко зве́зды и светила сущим во тьме/ и врачи душ на́ших.

Сла́ва, глас 8:

Жертвы слове́сныя,/ Наза́рия, Герва́сия, Прота́сия и Келси́я похва́лим,/ я́ко все мучителей неи́стовство со идолы упраздни́ша./ Тем моли́твами их, Христе́́ Боже,/ мир ми́ру даруй/ и душа́м нашим ве́лию ми́лость.

И ны́не, Богоро́дичен или́ Крестобогоро́дичен.

Подо́бен: Мученицы Господни:

Не терплю, Чадо, ви́дящи Тя на Древе усну́вша,/ бодрость всем подающаго,/ я́ко да древле преступления плодо́м сном погибельным уснувшим/ Божественную и спаси́тельную бодрость пода́си,/Дева глаго́лаше, плачущи,/ Ю́же величаем.

На стиховне Окто́иха.

Тропа́рь, глас 4:

Му́ченицы Твои, Го́споди,/ во страданиих своих венцы́ прия́ша нетленныя от Тебе́, Бо́га нашего:/ иму́ще бо кре́пость Твою́,/ мучителей низложи́ша,/ сокруши́ша и де́монов немощны́я дерзости./ Тех моли́твами/ спаси́ ду́ши на́ша.

Сла́ва, и ны́не Богоро́дичен, аще среда или пяток Крестобогоро́дичен.

НА У́ТРЕНИ

Оба кано́на Окто́иха и святы́х кано́н на 4, егóже краегране́сие: Верно воспою мученики венценосныя. Иосифово. Глас 4.

Песнь 1

Ирмо́с: Отве́рзу уста́ моя,/ и напо́лнятся Духа,/ и сло́во отры́гну Цари́це Ма́тери,/ и явлюся, све́тло торжествуя,/ и воспою, радуяся, Тоя чудеса.

Верно пострадавше и подвиг скончавше,/ победы венце́м увязо́стеся, Божественнии мученицы./ Божественную вашу па́мять тем празднуем, веселящеся.

Ве́трилом вперя́еми Ду́ха Божественнаго,/ пучи́ну немо́кренно преидо́сте, мученицы славнии, мучений/ и ны́не к Боже́ственному приста́нищу Вышния светлости всели́стеся.

Кресто́м, я́коже броня́ми, оде́яни, блаженнии,/ врага безплотнаго пора́товасте в теле,/ томле́ния многоплете́нная и смерть неправедную претерпевше.

Богоро́дичен: Едину, вместившую Превечнаго Го́спода во утробе,/ Всенепорочную Отроковицу воспои́м,/ я́ко бысть Небес простра́ннейши, Бо́га воплотивши благости ра́ди.

Песнь 3

Ирмо́с: Твоя́ песносло́вцы, Богоро́дице,/ живый и незави́стный Источниче,/ лик себе совоку́пльшая, духовно утверди,/ в Божественней Твое́й славе/ венцев славы сподо́би.

Я́ко гро́здие Божественнии бы́сте Винограда Божественнаго истинно,/ страдания изливающе вино нам, мученицы,/ духовно веселящее всех сердца́ благода́тию.

Кре́пко проти́вился еси́ гонителю, Наза́рие, мучениче Христов,/ повелева́ющу мерзским тебе́ бого́м жре́ти, пребогате,/ я́ко а́гня заколению готов был еси́, славне.

Хвале́ния вси согла́сне воспои́м днесь верно/ Наза́рию, Герва́сию, Прота́сию и Келси́ю,/ Истины свидетелем, бывшим в Ду́се.

Богоро́дичен: Закона прообразова́вше скиния Тя быти хотящую, Чи́стая,/ Божие священное жили́ще:/ из негoже Очищение наше, святыню даруяй всем нам, приидет.

Седа́лен, глас 8.

Подо́бен: Прему́дрости:

Назариевы страсти и гонения,/ Прота́сиевы болезни и раны чту́ще,/ Герва́сия хва́лим и Келси́я, Святыя Троицы сосу́ды честныя,/ светлыя зве́зды, верных предсто́лпия,/ нечестия истиннии потреби́теле,/ и столпи́ веры, и утверждение непоколеби́мо./ Имже верою возопии́м:/ молите Христа́ Бо́га грехо́в оставле́ние дарова́ти/ чту́щим любо́вию святу́ю па́мять вашу.

Сла́ва, и ны́не, Богоро́дичен:

Я́ко Де́ву и Едину в жена́х,/ Тя, без Се́мене рождшую Бо́га плотию,/ вси ублажаем ро́ди человечестии:/ Огнь бо вселися в Тя Божества́́,/ и, я́ко Младенца, пита́вши Зижди́теля и Го́спода./ Тем А́нгельский и человеческий род досто́йно сла́вим пресвятое Рождество Твое́/ и согласно вопие́м Ти:/ моли́ Христа́ Бо́га согрешений оставле́ние дарова́ти/ покланяющимся верою пресвято́му Рождеству Твое́му.

Крестобогоро́дичен:

А́гнца, и Пастыря, и Изба́вителя/ А́гница зря́щи на Кресте, восклицаше, плачущи,/ и, горько рыдающи, вопия́ше:/ мир убо радуется, приемля Тобо́ю избавле́ние,/ утроба же Моя горит, зрящи Твое́ распятие,/ еже терпи́ши за милосердие милости./ Долготерпели́ве Го́споди, милости бездно и источниче неисчерпаемый,/ умилосердися и даруй согрешений оставле́ние/ верою пою́щим Божественныя стра́сти Твоя́.

Песнь 4

Ирмо́с: Седяй в сла́ве на Престо́ле Божества́,/ во облаце легце/ прии́де Иисус Пребоже́ственный/ нетленною дла́нию и спасе́ зову́щия:/ сла́ва, Христе́, си́ле Твое́й.

Па́че смысла святы́х мученик Твоих любовь превосходит вся помышления, Слове,/ боре́ния, и мужественныя по́двиги, и натрижне́ния,/ яже пода́л еси́ законно им, пострадавшим.

Един разум в разных ураня́еми телесе́х Христовы ору́жницы преизли́шно показаша,/ Единаго Бо́га в три́знищи испове́даша/ и многобожия лесть я́ве погуби́ша.

Наза́рия, Прота́сия, Герва́сия и Келси́я, честны́х мучеников,/ А́нгели боре́нию подиви́шася,/ како в пло́ти безплотному сплета́ющеся,/ низложиша сего на землю му́жественнейше.

Я́ко до́блии во́ини, я́ко непобедимии мученицы,/ я́ко Христовы ору́жницы и я́ко благоче́стия побо́рницы/ Небе́сная селения насле́довасте и лико́м А́нгельским всегда свеселя́щеся.

Богоро́дичен: Не истощи́в Отеческих, Пребоже́ственный, Пречистая Богоро́дице, недр,/ в не́дрех Твоих пречистых седи́т,/ Боже́ственное седа́лище всем благостынею готовля́я/ и славу, при́сно пребыва́ющую.

Песнь 5

Ирмо́с: Ужасо́шася всяческая/ о Божественней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над всеми Бога/ и родила́ еси́ Безле́тнаго Сына,/ всем воспева́ющим Тя/ мир подавающая.

Ранам тело твое́, Наза́рие, приобщи́ся, у́зам многообра́зных мук,/ миро благовонное тем источа́ет нам, облагово́нствующее ду́ши/ верою несомненною тя почитающих, всехвальне.

Кропле́ньми крове́й твои́х погасил еси́ у́глие многобожия, страстотерпче,/ Боже́ственных чудес огнем же, всемудре, ти́ну страсте́й лю́тых пожигаеши,/ Божиею благода́тию Спа́совою, Наза́рие.

Цве́ты, дыха́ющии воню́ Бо́жия зна́ния,/ Богозна́ния зла́чники,/ райская древеса́ благопло́дная, предобрыя и светоза́рныя, почти́м мученики/ и верно ублажи́м.

Да поется Наза́рий, да величается Келси́й,/ ку́пно с Прота́сием до́блий да похвалится верою Герва́сий,/ Церкве непреклоннии столпи́ и основания нерушимая бывшии.

Богоро́дичен: Оружие, древле Едем стрегу́щее, плещи́ ве́рным подае́т, Чи́стая,/ зна́менанным честно́ю Кровию, прежде источи́вшеюся от ребр копия́ прободением,/ из Тебе́ Возсия́вшаго.

Песнь 6

Ирмо́с: Боже́ственное сие и всечестно́е/ совершающе пра́зднество,/ Богомудрии, Богоматере,/ прииди́те, рука́ми воспле́щим,/ от Нея рождшагося Бо́га сла́вим.

Твоя шествия на вода́х быша, всеблаженне Наза́рие,/ и не позна́шася сим следы́ твоя́ в Дусе,/ Егóже силою вся враги посрами́л еси́.

Телес стра́сти неисце́льныя Божиею благода́тию исцелил еси́, мучениче Наза́рие,/ миро благовонное источа́еши же/ твои́м честны́м моще́м приближа́ющимся.

Яве Боже́ственный Прота́сий, великий же с ним Герва́сий,/ богатство привременное и могу́тство попра́вше,/ вечныя славы сподо́бишася.

Богоро́дичен: Законы Едина обнови́ла еси́ естества, Де́во,/ рождши Бо́га Безсмертнаго, в плоть ме́ртвенную оде́явшася,/ да мертвыя оживи́т благостию.

Конда́к, глас 2:

Подо́бен: Вышних ища:

Свети́льницы светлии явльшеся,/ Божественнии мученицы,/ тварь светом чудес озаряете,/ неду́гов разрешающе глубокую нощь всегда/ и Христу́ Единому Бо́гу моля́щеся/ непрестанно о всех нас.

И́кос:

Я́ко светоза́рнии и Божественнии свети́льницы,/ Све́ту Великому предстоя́ще присно, Богоблаженнии мученицы,/ и отту́ду испуща́емыми невечерняго Божества́́ сиянии всегда просвещаеми и обожа́еми,/ верою па́мять вашу совершающия Божественную просвети́те,/ и омраче́ния, и страсте́й, и бед, и зло́бы избавите,/ молящеся непрестанно о всех нас.

Песнь 7

Ирмо́с: Не послужи́ша твари Богомудрии/ па́че Созда́вшаго,/ но огненное преще́ние му́жески попра́вше,/ ра́довахуся, поюще:/ препетый отцев Господь и Бог, благословен еси́.

На ка́мени Божественнаго зна́ния утверди́вше стопы́, славнии,/ сердец ваших вражиими ухищре́ньми не преврати́сте, воспева́юще:/ препетый отцев Господь и Бог, благословен еси́.

Свет невече́рний страдавшим кровию вам возсия́,/ и веселие я́ве вас прият, великомученицы, воспева́ющих:/ препетый отцев Господь и Бог, благословен еси́.

Освяти́сте преусердно проходя́ще гра́ды, блаженнии,/ исповедающе Христа́ пред мучители и всем исцеления подающе требующим/ благода́тию Ду́ха Всесвята́го.

Богоро́дичен: Светле́йшую палату обре́т Бог утробу Твою́, в сию всели́ся,/ сы́ны соде́ловая света, Всенепоро́чная, зову́щия:/ отец на́ших Боже, благословен еси́.

Песнь 8

Ирмо́с: О́троки благочестивыя в пещи́,/ Рождество Богородичо спасло́ есть,/ тогда убо образу́емое,/ ны́не же действуемое,/ вселенную всю воздвиза́ет пети Тебе́:/ Го́спода пойте дела/ и превозносите Его́ во вся ве́ки.

У́тренююще к возсия́вшему из Девы пресла́вно великому Солнцу,/ мученицы непобедимии свет бы́сте и пре́лести тьму благода́тию разори́сте:/ Го́спода пойте, вопиюще, дела и превозноси́те Его́ во вся ве́ки.

Рим древле по́двиги твоя́ проповедает, Наза́рие многострадальне,/ Константиногра́д поет чудеса, священныя твоя́ мо́щи верою содержа́я,/ Го́спода пойте, вопию́щий, дела/ и превозноси́те Его́ во вся ве́ки.

Боже́ственный Наза́рий, источа́я мира благода́ти,/ повелевает всем притекающим верою почерпа́ти/ на просвещение и очищение, взывающим:/ Го́спода пойте дела и превозносите Его́ во вся ве́ки.

Вас, до́блия страстоте́рпцы,/ Наза́рия, Келси́я, Прота́сия, паки же Герва́сия,/ моле́бники ко Господу крепчайшия имуще, любо́вию зовем:/ Го́спода пойте дела и превозноси́те Его́ во вся ве́ки.

Богоро́дичен: Плотию соедини́вся Тебе́ по существу,/ всем, еже быти, Подаяй,/ всего мя обнови́, всего назда́, обветша́вшаго, Пречистая, преступле́ньми./ Тем Тя, Де́ву, пое́м и превозно́сим во вся ве́ки.

Песнь 9

Ирмо́с: Ева убо неду́гом преслушания/ клятву всели́ла есть,/ Ты же, Де́во Богоро́дице,/ прозябе́нием чревоноше́ния ми́рови благословение процвела́ еси́:/ тем Тя вси величаем.

Крепостию вжиля́еми Христа, разо́ршаго зло́бу губи́теля,/ преклонивше сему вы́ю, конец мече́м прия́сте,/ разре́шшеся от пло́ти, великоимени́тии:/ тем досто́йно блажи́ми есте́.

Красни́ я́звами плотски́ми бы́сте и А́нгелом уподо́бистеся;/ ны́не же предстоите́ всех, радующеся, при́сно красоте́,/ причастием я́ве удобря́еми, красне́йше, всечестни́и.

Зна́меньми и чудесы вас украси́/ и прежде конца, всеприснопа́мятнии, и по конце Владыка,/ Наза́рие, Прота́сие, Келси́е, Герва́сие, непобедимии мученицы,/ тем досто́йно ублажа́етеся.

Освяти́шася любо́вию вашею всяческая, совершающи па́мять днесь:/ радуются мученицы и вси пророцы с нами пра́зднуют,/ с нимиже о нас моли́теся Благодетелю, всеблаженнии.

Богоро́дичен: Глас Ти Божественнаго Гаврии́ла приносим, веселя́щеся, Отроковице Пречистая:/ радуйся, Обрадованная,/ мучеников, апостолов похвало и всех верных спасе́ние,/ Де́во Ма́ти Неискусобрачная.

Свети́лен.

Подо́бен: Духом во святилищи:

Претерпе́л еси́, я́ко безплотен, нестерпимыя му́ки, Наза́рие блаже́нне,/ мучеников сла́ва, с Герва́сием мудрым,/ Прота́сием же ку́пно и Боже́ственным Келси́ем./ Тем верою чтим всепразднственную вашу и честну́ю память.

Богоро́дичен: Па́че ума Рождества Твоего́́ пресла́вное чудо/ удивляет всяк смысл, и земных, и А́нгел:/ Дева бо су́щи родила́ еси́, и Дева пребыла́ еси́, я́ко прежде рождества, Де́во./ О страшнаго та́инства! О рождества ди́внаго!/ О чревоноше́ния преславнаго!

Святые мученики Назарий, Гервасий, Протасий и Келсий

НА ВЕЧЕ́РНИ

Блажен муж: 1-й антифо́н. На Го́споди, воззвах: стихи́ры на 6, глас 8. Подо́бен: О пресла́внаго чудесе́:

Богому́дре блаже́нне Нико́ло,/ ты, видя, я́ко прехо́дит мира сего образ/ и тле́нию вся прича́стна суть,/ образ славы своея скоро измени́л еси́,/ диади́му и ски́петр оставил еси́/ и, к Небесному Царствию взира́я,/ тесный путь изволил еси́ ше́ствовати;/ и ны́не в Небесных селениих живы́й,/ Христу́ Бо́гу моли́ся/ прияти нам Вечнаго Царства блаженство.

Преподо́бне Нико́ло,/ ты по имени твое́му и житие хотя́ стяжати беззлобно,/ мир сей победи́л еси́,/ престол кня́жества оставил еси́,/ богатство, славу и влады́чество, аки уме́ты, вменяя,/ во убо́гий образ иноческий облекся,/ обнищавшему нас ради Христу́ последовал еси́,/ Емуже ны́не предстоя,/ о нас прилежно моли́ся/ дарова́ти душа́м нашим мир и ве́лию ми́лость.

Святе Нико́ло, о́тче блаже́ннейший,/ провидя умным твои́м оком,/ я́ко ца́рие и князи славы своея лиша́ются и на́зи во гроб отходят,/ отверглся еси́ подобосе́нныя власти века сего,/ Христовым стопам последуя,/ Тому во смирении работал еси́,/ те́мже улучил еси́ нестаре́ющееся блаженство,/ идеже помяни и нас, чту́щих па́мять твою́́.

Сла́ва, глас 2:

Царство Твое́, Христе́́ Боже,/ и владычество Твое́ пребывающее во веки провидя,/ уго́дник Твой Никола ски́петр и диади́му отве́рже,/ и многопечалия удалися,/ к безмяте́жному житию и́ночествующих притек,/ бысть раб и́стинен и верен,/ Тебе́ Спасу своему́ послужив в преподо́бии и правде.

И ны́не, Богоро́дичен: Прейде сень законная:

Та́же вход, прокимен дне. И чтения три преподо́бническая.

Прему́дрости Соломоновы чтение (главы́ 5 и 6):

Праведницы во веки живут, и в Го́споде мзда их, и попече́ние их у Вы́шняго./ Сего ради прии́мут Ца́рствие благоле́пия и венец добро́ты от руки́ Господни:/ зане́ десни́цею покры́ет я и мы́шцею защити́т их./ Прии́мет всеору́жие рвение свое, и вооружи́т тварь в месть враго́м./ Облече́тся в броня́ правды и возложи́т шлем, суд нелицеме́рен./ Прии́мет щит непобедимый, преподо́бие;/ поостри́т же напрасный гнев, во оружие: спобо́рет же с ним мир на безу́мныя./ По́йдут праволу́чныя стре́лы мо́лниины,/ и я́ко от благокру́гла лу́ка облако́в на наме́рение полетят./ И от каменоме́тныя ярости испо́лнь падут гра́ды,/ вознегоду́ет на них вода морская, ре́ки же потопя́т я на́гло./ Сопроти́в ста́нет им дух силы, и я́ко ви́хор разве́ет их,/ и опустоши́т всю зе́млю беззаконие, и злодейство преврати́т престо́лы сильных./ Слы́шите у́бо, ца́рие, и разуме́йте, навы́кните судии́ концев земли́./ Внуши́те держа́щии мно́жества и гордя́щиися о наро́дех язы́ков:/ я́ко дана есть от Го́спода держа́ва вам и сила от Вы́шняго.

Прему́дрости Соломо́новы чтение (глава́ 3):

Праведных души в руце́ Божией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исход их:/ и еже от нас ше́ствие сокруше́ние, они же суть в мире./ Ибо пред лице́м человеческим, аще и му́ку прии́мут, упова́ние их безсмертия испо́лнено./ И вма́ле нака́зани бывше, великими благоде́тельствовани будут,/ я́ко Бог искуси́ я и обре́те их достойны Себе./ Я́ко злато в горни́ле искуси́ их, и я́ко всепло́дие же́ртвенное прия́т я./ И во время посещения их возсияют и я́ко и́скры по сте́блию потекут./ Су́дят язы́ком и обладают людьми, и воцари́тся Господь в них во веки./ Надеющиися Нань разумеют истину, и ве́рнии в любви пребу́дут Ему./ Я́ко благода́ть и ми́лость в преподо́бных Его́́,/ и посещение во избра́нных Его́.

Прему́дрости Соломо́новы чтение (глава́ 4):

Праведник, аще пости́гнет сконча́тися, в поко́и будет./ Старость бо честна́, не многоле́тна, ниже́ в числе лет исчита́ется./ Седина же есть мудрость челове́ком, и возраст старости, житие́ нескверное./ Благоуго́ден Бо́гови быв, возлю́блен бысть,/ и живы́й посреде́ грешников, преста́влен бысть./ Восхище́н бысть, да не злоба измени́т разума его,/ или́ лесть прельсти́т душу его./ Раче́ние бо злобы помрачает добрая, и паре́ние по́хоти пременя́ет ум незло́бив./ Сконча́вся вма́ле испо́лни ле́та до́лга:/ угодна бо бе Господу душа его: сего ради потща́ся от среды́ лука́вствия./ Лю́дие же ви́девше и не разуме́вше, ниже́ положиша в помышле́нии таковое:/ я́ко благода́ть и ми́лость в преподо́бных Его́́,/ и посещение во избра́нных Его́.

На стиховнах стихи́ры, глас 1:

Подо́бен: Небесных чино́в:

Божественным желанием разжизаем,/ преподо́бне о́тче Николо,/ мирскую славу преобидел еси́/ и, иноческое житие́ возлюбив,/ был еси́ преподобным отцем единоревни́тель,/ с нимиже ны́не водворя́яся,/ моли́ о чту́щих твое́ преставление.

Стих: Блаже́н муж, боя́йся Го́спода,/ в за́поведех Его́́ восхо́щет зело́.

Христови весь порабо́тился еси́,/ впери́в все свое́ желание к Нему́,/ Егóже ради любве мира сего отреклся еси́,/ возлюбив Возлюбившаго род человеческий;/ сего ради тя песньми ублажа́ем/ и любо́вию кланяемся раце мощей твои́х.

Стих: Блажени вси, боящиеся Го́спода,/ ходящии в путех Его́.

Всех любо́вию чту́щих тя/ заступления твоего́ не лиши, отче,/ но еликомощно предстательствуй всем/ и посо́бствуй в беда́х и напа́стех,/ полезная подая моли́твами твои́ми.

Сла́ва, глас 5:

Преподобне отче,/ не дал еси́ телу твое́му упокое́ния,/ до́ндеже страсти сердца твоего́ очистил еси́,/ Христова повеле́ния исполняя,/ дом, сродники и други оставил еси́,/ к тихому пристанищу Бо́жия Ма́тере притек,/ вели́чество и славу свою всем под ноги покорил еси́,/ в посте просияв, тело умертвил еси́/ и, Духом Божиим водяся присно,/ сын и наследник Присносу́щнаго Света показался еси́,/ идеже ны́не живый,/ моли́ улучи́ти и нам ми́лость в день Судный.

И ны́не, Богоро́дичен:

Обра́дованная, хода́тайствуй Твоими моли́твами,/ и испроси́ душа́м нашим множество щедро́т/ и очищение многим согреше́нием нашим, молимся.

Тропа́рь, глас 2:

Отечество и славу княжения твоего́ оставил,/ Князю смирения, Христови, усердно последовал еси́,/ преподо́бне о́тче наш Николо;/ тем приял еси́ от Него вечное царство и славу на Небеси,/ идеже ликуя, поминай нас чту́щих па́мять твою́́ верно.

Сла́ва, и ны́не, Богоро́дичен: Вся па́че смысла:

НА У́ТРЕНИ

По 1-м стихосло́вии седа́лен, глас 1.

Подо́бен: Гроб Твой:

Веселия исполня́ются Росси́йстии лю́дие/ и радостне поют твою́́ память, блаже́нне,/ имуще тя скораго в беда́х помощника/ и во всех болезнех избавле́ние:/ сего ради, я́ко приемый от Бо́га благода́ть словом неду́ги прогоня́ти,/ не отступи и ны́не, всем посо́бствуя,/ честно́е твое́ успение почита́ющим.

Сла́ва, и ны́не, Богоро́дичен:

Исто́чник исцеле́ний ве́дуще Тя, Де́во,/ в теплоте сердца прибегаем, гре́шнии раби Твои;/ Ты же сро́дное имущи о нас промышле́ние,/ не забуди волнуемых напа́стьми:/ но, простерши длани, моли́ся Сыну Своему́,/ я́ко да приимем тех скорое пременение.

По 2-м стихосло́вии седа́лен, глас 4.

Подо́бен: Явился еси́:

Яже на земли в суете́ преходящая возненави́дев, блаже́нне,/ и яже на Небеси присносущная от сердца возлюби́в,/ сия́ по многих твои́х труде́х и наследовал еси́,/ идеже живый, о всех нас моли́ся Христу, преподо́бне,/ в песнех твою́́ па́мять почита́ющих.

Сла́ва, и ны́не, Богоро́дичен:

Обнови́ла еси́, Де́во, святым Рождеством Твоим/ истлевшее страстьми́ земнородных естество/ и возста́вила еси́ всех от смерти к жизни нетле́нней./ Тем Тя по долгу, Ма́ти Чи́стая, при́сно ублажаем/ я́ко блажимую во вся верных роди.

По полиеле́и седа́лен, глас 8.

Подо́бен: Повеленное тайно:

Да радуется днесь святый твой прароди́тель,/ на высоте престола седы́й равноапостольный Владимир,/ я́ко от ко́рене его, благая ветвь, прозябл еси́ ты, преблаже́нне Николо,/ носящи на себе плод духовный,/ во образ всем хотящим спасти́́ся/ и Христу́ во смирении после́довати,/ я́коже ты, преподо́бне отче, сотворил еси́;/ и ны́не во сла́ве радующуся ти,/ плод и́ноческих трудов твои́х пребывает во веки.

Сла́ва, и ны́не, Богоро́дичен:

Да радуется днесь Давид песнописец,/ я́ко от ко́рене его возрасте́ нам мысленное древо, Дева Мария,/ носящая плод Христа́ Бо́га нашего,/ Имже пита́ются всего мира концы́ и причастницы бывают вечныя жизни,/ тем, вси ве́рнии, я́ко Богоро́дицу благоче́стно ублажа́ем.

По 50-м псалме́ стихи́ра, глас 6:

Ве́лие смирение жития твоего, о́тче наш,/ ибо вся земная: род и престол княжения своего, оставив,/ Единаго Христа́ возлюбил еси́,/ и Тому чистою совестию служа́,/ на земли А́нгельски пожил еси́,/ бесо́вския полки́ прогна́л еси́, возшед на высоту добродетелей,/ блажен еси́ тако Христу́ работав;/ и мы убо труды твоя́ познавше,/ любо́вию тя ублажаем.

Кано́н преподо́бному, глас 4.

Песнь 1

Ирмо́с: Отве́рзу уста моя,/ и напо́лнятся Духа,/ и слово отры́гну Царице Матери,/ и явлю́ся светло торжествуя,/ и воспою, ра́дуяся, Тоя́ чудеса.

Отверзи мне устне́, Христе́́ мой, посли Паракли́та,/ да Твоего́́ уго́дника пети возмогу стихосло́вии высоту́ добродетелей,/ на нюже в чистоте сердца смирением взыде.

В пра́вду нареклся еси́ Святоша:/ исполнь бо сый святыни, всякаго непреподо́бнаго действа удалился еси́/ и, к Богови́дению ум свой впери́в,/ оттуду познал еси́ вся, яже в мире су́етная быти.

Прежде тебе́ бывших помяну́л еси́,/ от коли́кия славы напрасно отпадо́ша, и с безче́стием пожат серп смерти;/ сего ты да изба́вишися, престол на земли княжий оставил еси́,/ и приял еси́ на Небеси престол, и́же пребывает выну со святыми.

Блаженному Иоаса́фу Инди́йскому поревновал еси́:/ я́коже бо той остави царство земное и взыска́ Небесное,/ тако и ты, блаже́нне, временное княже́ние оставль, приял еси́ вечное.

Богоро́дичен: Вы́шняго Царствия не лиши мя,/ Небе́сными и земными Владычествующая Госпоже,/ сего бо ища́, удаля́юся, обладаем вою́ющими всегда на мя страстьми́,/ обаче к Тебе́ несумне́нною наде́ждою прибега́ю.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный источниче,/ лик себе совокупльшия, духовно утверди́,/ в Боже́ственней Твое́й славе/ венцев славы сподо́би.

Раб Единому Бо́гу да будеши, не восхотел еси́ работати миру,/ от негoже изшед, аки вторы́й Авраа́м, дом и землю свою оставил еси́/ и пришед, аки в Харра́нь, в пречестну́ю Бо́жия Ма́тере Печерскую оби́тель,/ видел еси́ ле́ствицею деяния и ве́дения блаженных отец к Небеси восходящих.

Го́сподин сый иногда́ княже́нию своему́,/ за любовь Го́спода своего́ сотворился еси́ раб,/ служа рабом Христовым в пова́рни,/ да бывшему нас ради Послушли́ву до смерти последуеши.

Порфи́рою одея́н и в руце́ имеяй ски́петр,/ не устыде́лся еси́ на ра́менах дрова носити и сещи́ рукама своима;/ да вся уды в порабощение предаси Вышнему Влады́це,/ от Негoже возмездие приял еси́ живот вечный.

Мирсти́и мирска́я му́дрствующе, братия твоя́, блаже́нне,/ мняху дея́ние твое́ в пова́рне безче́стно быти,/ тем и развращаху тя, да оставиши сие./ Но ты, любя послуша́ние сие,/ еще едино лето испросил еси́ себе в том пребывати.

Богоро́дичен: За́поведем Го́спода моего не повину́ющася, ни хранящаго послуша́ния уставы,/ убеди́ мя, Влады́чице моя, к де́ланию тех/ и укрепи в прочее время в обои́х совершенно испра́витися,/ да не в лености скончався, с непотребными рабы казнь прииму по дело́м.

Седа́лен, глас 8:

Я́ко истиннаго послу́шателя Евангельскаго слова,/ и и́ноков любителя, и ревнителя преподобным,/ приидите, братие, песненными хвалами воспоем блаженнаго Николу:/ той бо тело свое́ порабо́ти Бо́гу, да душу свободит от страсте́й/ и, аки солнце, возсияв лучами доброде́телей своих,/ всех нас озаряет, поющих:/ сла́ва Бо́гу, призывающему рабы Своя в вечное спасе́ние.

Сла́ва, и ны́не, Богоро́дичен:

Вы́шняго мя гражданина покажи, Чи́стая Де́во,/ прибегающаго к Твое́му покрову и просящаго от Тебе́ теплаго заступления,/ я́ко, да Тобо́ю обрет благода́ть, воспою:/ сла́ва Бо́гу, спасающему род человеческий.

Песнь 4

Ирмо́с: Седя́й в сла́ве на Престо́ле Божества́/ во облаце легце,/ прии́де Иисус Пребоже́ственный/ нетленною дланию и спасе́ зовущия:/ сла́ва, Христе́, си́ле Твое́й.

Седя́й во сла́ве прежде на престоле и вельможам предстоящим ти,/ не устыде́лся еси́, блаже́нне, седе́ти при врате́х монасты́рских три лета,/ я́ко верно храня́й сих вход от бездельно влазя́щих.

Председящу ти пе́рвее на трапе́зе любопи́щней/ и многим рабом служа́щим я́ко владыце,/ не возгнушался еси́ последи́, святе, раб быти рабом Христовым,/ тем служа и представляя брашна от Бо́жияго дарования.

Я́коже степе́ньми на высоту́ мирския славы возшедши, имут упокоение по трудех,/ тако и ты, преподо́бне, советом игумена и братии вся послушания чины прошед,/ принужде́н с миром в келлии безмолвствовати и внимати спасению своему́.

Я́ко трудолюби́вый раб, умножа́я Влады́це своему́ талант,/ не дал еси́ упокое́ния многотрудному твое́му телу,/ но рукама своима насадил еси́ вертоград;/ и видеша братия трудов твои́х плоды.

Богоро́дичен: Леня́щася мя, на доброде́тели пону́ди, Богоро́дице,/ и даждь ми вертогра́д душевный мысленными древесы насади́ти,/ слезами умиления напая́ти, и принести Влады́це моему стори́чный плод,/ да и аз с верными рабы Его́ прииму от руку́ Его́ мзду трудов моих.

Песнь 5

Ирмо́с: Ужасошася всяческая/ о Божественней сла́ве Твое́й,/ Ты бо, Неискусобрачная Де́во,/ имела еси́ во утробе над всеми Бога/ и родила́ еси́ Безлетнаго Сына,/ всем воспева́ющим Тя,/ мир подавающая.

Дивля́хуся вси трудолюбию твое́му, блаже́нне,/ я́ко никогдаже ви́ден был еси́ пра́зден,/ но в руках дело, в устех же имел еси́ выну молитву Иису́сову/ и сею́ отразил еси́ беса, празднолюбием напа́дающаго.

Да пищи Небесныя причастник будеши, сластолюбия отверглся еси́:/ ничтоже бо ядяше, кроме от о́вощия монастырскаго мало/ и тако соблюл еси́ чистоту души и тела.

По многих твои́х постнических трудех/ приял еси́ от Бо́га дар единем словом неду́ги исцеля́ти и посо́бствовати в ско́рбех./ Молюся ти, и мене от одержащаго недуга в здравие премени́ скоро.

Многоплете́нными се́тьми тщася враг/ отврати́ти Боголюбивую душу твою́́ от добраго трудолю́бия пути,/ наусти́ не́когда служа́щаго тебе́ врача;/ ты же, святе, увеща́нием увещал еси́ того,/ я́ко да не тебе́, но своему́ спасению внимает.

Богоро́дичен: Сердцем и душою развратихся/ и, отвергшися данныя ми благода́ти, в неподобныя хожду пути,/ но, прежде даже не впаду в руце врагом,/ Ты, Ма́ти Бо́жия, управи мя на первое блаженство:/ овча́ бо есмь спасенныя Твоея́ огра́ды.

Песнь 6

Ирмо́с: Боже́ственное сие и всечестно́е/ соверша́юще празднество,/ Богомудрии, Богоматере,/ приидите, руками восплещем,/ от Нея рождшагося Бо́га сла́вим.

Божественным желанием к Бо́жией любви устреми́вся,/ вся находя́щия ти скорби, блаже́нне, сладце терпел еси́,/ разсуждая реченное, я́ко недостойны суть страсти века сего к хотя́щей яви́тися в нас славе.

Увещава́ющему тя Петру врачу от трудов и́ноческих преста́ти/ целомудренно отвещал еси́ мно́гажды, святе:/ престани, отвращая мя от сицева́го начинания,/ ни скорбь бо, ни глад, ни теснота отлучит мя от любве Христовы,/ ея́же ради терплю вся находящая на мя.

Да во Христе́́ Живот Вечный обрящеши,/ умертвил еси́ тело твое́ многим воздержа́нием и трудом/ и не лишился еси́, Егóже желал:/ се бо ны́не живеши со святыми во дворех Небесных.

Единаго имея врача Христа,/ никогдаже попустил еси́ себе в болезни врачевати,/ но глаголал еси́ со Апостолом:/ мне еже жити Христос, а еже умре́ти приобре́тение,/ и сим словом сам свой недуг исцелял еси́.

Богоро́дичен: Изнемогшую мою душу от грехов многих,/ посещением Твоим исцели, Госпоже́,/ и водою благода́ти Твоея́ напой мя,/ да сво́бод сый душевных и телесных недугов,/ порабо́таю Тебе́, Влады́чице моей, со усердием всегда.

Конда́к, глас 8:

Вся кра́сная мира сего/ и тленное богатство нивочтоже вменив,/ обогати́лся еси́ мно́гими чудесы и зна́мении от Христа́ Бога,/ Емуже в веселии предстоя́,/ поминай нас, чту́щих любо́вию па́мять твою́́, да зовем ти:/ радуйся, Нико́ло пречудне.

И́кос:

Ангельски на земле поживша/ и со А́нгельскими чи́нми ны́не светло на Небесе́х ликующа,/ тя, блаже́нне, си́ми ублажаем песньми:/ радуйся, ро́да светлость и княже́ние презревый;/ радуйся, богатство и славу тщетную попра́вый;/ радуйся, нищ и убо́г, вся оставль, Го́сподеви последовавый;/ радуйся, гордость низложи́вый и смирению прилежа́вый;/ радуйся, вся послушания монастырская проше́дый;/ радуйся, в тех со всяким смирением пребы́вый;/ радуйся, пова́рства и вра́тарства невозгнуша́выйся;/ радуйся, братий твои́х, князей, отвергийся сожительства;/ радуйся, сам от немощи возмоги́й и врача исцели́вый;/ радуйся, спасе́ние враче́ви моли́твами твои́ми исхода́тайствовавый/ и свою, и онаго смерть прозревый;/ радуйся, брату твое́му по уме́ртвии твое́м исцеле́ние пода́вый,/ радуйся, всем те́пле тя призывающим чудный и скорый помощниче,/ радуйся, Нико́ло пречу́дне.

Песнь 7

Ирмо́с: Не послужиша твари Богомудрии/ па́че Создавшаго,/ но огненное прещение мужески попра́вше,/ ра́довахуся, пою́ще:/ препе́тый отцев Господь и Бог благословен еси́.

От коли́кия славы прешел еси́, княже, глаго́лаше ти Петр,/ и укоря́ше тя, блаже́нне, я́ко всем работаеши и сме́тищу¹⁹ приседи́ши,/ но ты отвещал еси́ ему:/ не погубих чести моея, па́че же сим прославля́юся,/ последуя всем пришедшему послужити Христу, Емуже и зову,/ благословен Бог отец на́ших.

Тебе́ хотя́й в болезни Петр уврачева́ти, сам разболеся,/ егóже не зе́лием, но молитвою исцелил еси́/ и наказал того не надеятися на врачебную хитрость,/ но токмо на Бо́га уповати, зовущи:/ препетый отцев Боже, благословен еси́.

Послушание твое́ у врат скончава́я,/ провидел еси́, святе, по триех месяцех и живота твоего́ кончину,/ тем призвал еси́ Петра и увещавал еси́,/ да восприимет зде иноческий образ и вместо тебе́ послужит Бо́гу,/ И́же есть благословенный во веки.

Измене́ние жизни твоея́ слышав Петр,/ припаде со слезами к ногам твои́м, преподо́бне,/ рыдающи, я́ко лишается го́сподина своего;/ ты же воздви́г его, утешал и увещавал еси́ не скорбети о сем, но звати:/ благословен Бог отец на́ших.

Богоро́дичен: Измене́ния жизни моея скверных ради дел не иму́ща,/ кто мя не воспла́чет, отхожду бо в путь неве́дом./ От пути за́поведей Сы́на Твоего́́ уклони́хся, темже, слезя́, призываю Тя, Влады́чице,/ скажи мне путь, и пойду́ во истине, поя́:/ Препе́тая еси́, Богоро́дице, и Благослове́нная от рода в род.

Песнь 8

Ирмо́с: Отроки благочестивыя в пещи,/ Рождество Богоро́дичо спасло есть,/ тогда убо образу́емое,/ ны́не же действуемое,/ вселенную всю воздвиза́ет пети Тебе́:/ Го́спода пойте дела/ и превозносите Его́ во вся ве́ки.

Благочестномудренне пожив и при́сно провидя исход свой, преподо́бне Нико́ло,/ сам себе угото́вал еси́ место во святей пещере,/ еже Петру на моление его даровал еси́, глаголя:/ буди тебе́, аще хощеши и я́коже Господь восхощет, превозносимый во веки.

Дерзнове́ние име́яй к Бо́гу и упование по вере непоколебимо,/ приял еси́ прозрения дар, имже уве́дав по триех днех отшествие Петрово к Бо́гу,/ повелел еси́ тому угото́витися к сицево́му исходу,/ он же по словеси твое́му Святая Святых прием, отыде радуяся и поя:/ превозносимый Бог во веки.

Три́десят лет по смерти врача свято пожив и верно Го́сподеви поработав,/ стори́чныя израсти́л еси́ плоды, с нимиже отшел еси́, блаже́нне,/ ко святы́х Святе́йшему Господу Иисусу, поя́ и превознося́ Его́ во веки.

Твое́ сла́вное и честно́е успе́ние лю́дие слышаще,/ стекошася от всего града, да́ти тебе́ последнее целование/ и погребоша тя со слеза́ми, несе́ннаго с радостию А́нгелов на лоно Авраа́мле,/ да тамо со всеми святыми предстоиши Го́сподеви во веки.

Богоро́дичен: Жизнь вре́менная скончава́ется, увы мне!/ камо несе́н буду, всех человек окая́ннейший:/ Судия ждет, Книги разгну́шася и по делом моим злых часть насле́дити ми есть известно;/ но прежде даже не отыду́ отсю́ду со уго́дником Твоим Нико́лою,/ моли́ся, Госпоже, Сыну Твое́му благих части мне насле́дити.

Песнь 9

Ирмо́с: Всяк земноро́дный/ да взыгра́ется, Духом просвеща́ем,/ да торжествует же Безплотных умов естество́,/ почита́ющее священное торжество Богоматере,/ и да вопиет:/ радуйся, Всеблаженная/ Богоро́дице, Чи́стая Приснодево.

Всяк от земнородных да подражает житию Богохвальнаго отца,/ той бо славу временную на земли презрел и, во славу вечную прешед,/ ны́не радуется, име́яй престол недвижим в Небесных селениих,/ идеже и о нас молит, да будем наследницы блаженныя жизни.

Всяк, любя́й Мя, Мне последует, да будет со Мною./ Сия́ Ева́нгельская внуши́в словеса,/ преблаженный Свято́ша, возлюбив Бога, Тому после́дова/ и ничтоже па́че Того любве стяжа́ в мире;/ те́мже ны́не живет со Христом в Свете неприступнем.

Рекий: прославляющаго Мя просла́влю,-/ исполни обеща́ние на тебе́, святе;/ не токмо бо тя просла́ви сама́го дароноше́ньми,/ но и крест твой, возгла́вница и власяни́ца славлятся от брата твоего/ и воспомина́ются даже досе́ле, я́ко сла́вная от них сотвори́шася.

От ро́да в ро́ды па́мять твоя́ сла́вится, преподо́бне отче:/ труды же и подвиги твоя́ хвалит Церковь с нами,/ но и мощи твоя́, содержащияся во свято́й пещере,/ являет рака и созывает всех молити тя ны́не/ я́ко теплаго предстателя и заступника в неможе́нии нашем.

Богоро́дичен: От всех племе́н сла́вимая и почте́нная от Троицы Пресвятыя,/ нам, в песнех хва́лящим Тя, Чи́стая Де́во, Предстательница буди/ и Заступница скорая от вражиих навет, да выну пое́м ти:/ радуйся, Богоро́дице Приснодево.

Свети́лен:

Храм Ду́ха Пресвята́го был еси́,/ и, пришед Отец с Сыном, оби́тель в тебе́ сотвори́,/ и тем Боже́ственных причастием райскаго тя гражданина показа;/ в немже ны́не от Разумнаго древа питаяся и нетленныя славы наслажда́яся,/ помяни и нас, верою кланяющихся раце мощей твои́х, о́тче преподо́бне.

Сла́ва, и ны́не:

Храм пречистый воплощшемуся из Тебе́ Слову была еси́, Де́во;/ храм мя всякаго беззако́ния суща,/ сотвори храм узаконе́нных повелений Сы́на Твоего́́ предстательством Твоим,/ да селение Бо́жия благода́ти быв, досто́йно воспою Тя,/ я́ко вся о Бозе могу́щую, Богоотрокови́це.

На хвалитех стихи́ры на 4, глас 1

Подо́бен: Небе́сных чино́в:

Вели́кая исправления постнических трудов/ великих отец Печерских привлекоша тя, Николо блаже́нне,/ к постническому сословию,/ ихже житию поревновал еси́ усердно,/ и ны́не с ними на Небеси живый, моли́ о пою́щих тя.

На горе святей, идеже Бо́жия Ма́ти положи свое́ селение,/ процвел еси́, я́ко финикс сенноли́ственный,/ ве́твами убо твои́х трудов/ покрый от напасти всех, призывающих тя в помощь,/ и подава́й от плодов твои́х исцеле́ние/ благоче́стно чтущим всечестную твою́́ память, Николо всеблаженне.

Днесь в памяти твое́й, преподо́бне,/ Лавра Печерская весели́тся,/ и и́ночествующих собрание честно́е,ко гробу твое́му пришедшее,/ духовне во псалмех ликовству́ет,/ похваляющи живущаго в Свете неприступнем/ и хвали́маго во святы́х Бога,/ с нимиже и ты ны́не живе́ши,/ приемля от Него почесть.

Сла́ва, глас 2:

Древо сый доброветвенно,/ я́ко кедр в Лива́не в дому́ Бо́жия Ма́тере насажден был еси́,/ блаже́ннейший о́тче Нико́ло,/ и при вода́х животных напая́ем от учений отец Печерских:/ се́нию убо твое́ю осени́ прибегающия к тебе́ люди,/ заступи от языческих нашествий, низлагая их востания,/ постави бо тя Господь князя Российстей земли,/ тем, припа́дающе, мо́лимся,/ страну нашу в мире соблюди/ и оби́тель сию до́бре сохрани моли́твами твои́ми.

И ны́не:

Спаси́ от бед рабы Твоя́,/ Пресвята́я Богоро́дице Де́во,/ я́ко вси усе́рдно по Бозе к Тебе́ прибегаем,/ я́ко к нерушимой стене и предстательству.

Славословие великое и отпу́ст.

Преподобный Никола Святоша (Святослав)

Аще ли настоятель изволит или где прилучи́тся храм преподобныя, пое́м бдение

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 2:

Пощения путь восприе́мши,/ житейския бури избегши, Параске́во славная,/ о́во убо с мудрыми девами/ светоносна вошла еси́ во дворы Го́спода твоего,/ о́во же, уневе́стившися Ему,/ источаеши исцеления притекающим к тебе́,/ и от душевных недуг избавляеши,/ и́же к Бо́гу твои́ми моли́твами.

Надеждею Христовою и верою возмо́гши,/ стяжания родителей отбе́гши, и со Безплотными ликуеши,/ преподобная мати Параскево славная./ Темже исцеле́ние то́чиши по смерти:/ твоя́ бо мощи показа́шася, всяким благоуха́нием испо́лнены,/ еже Христос тебе́ дарова́,/ Егóже возлюбила еси́,/ Егóже возжеле́ла еси́,/ и Той тя прослави, преподобная;/ те́мже молимся и мы:/ стаду своему́ испроси у Христа́ Бо́га велию ми́лость.

Восплещайте убо, новопразднолюбцы,/ веселием ликования,/ Параскева преславная, и Богоневестная,/ и преподобная днесь явися, прежде сокровенная,/ я́коже древле от земли Крест Живоно́сный, в земли потаи́м, обличися./ Темже по долгу чтуще тя, возопиим:/ покрый нас от всякия беды и спасай стадо свое́ всегда.

Сла́ва, глас 4:

Приидите, верных соборы,/ духовно возрадуемся,/ пением трубным глас восприе́мше,/ и благодарственными песньми прорцем, глаголюще:/ Параске́во преподобная,/ сущия в напа́стех различных спасай мольбами своими/ и вся́ко убо обстояние отрева́й,/ благода́ть же и ми́лость нам проси,/ я́ко да моли́твами твои́ми спа́сшеся,/ радующеся, воспоем вси честныя подвиги твоя́, преподобная.

И ны́не, Богоро́дичен:

Ра́дуйся, стено́ необоримая,/ радуйся, покро́ве миру,/ радуйся, це́рковь Господня,/ радуйся, свеще, радуйся, престоле Божий,/ радуйся, всех радость/ и помощь на враги невидимыя сущи, Чи́стая,/ спасе́ние и оружие непобедимое.

На стиховнах, стихи́ры, глас 2

Подо́бен: До́ме Евфра́фов:

Сияет умно светозаре́нии/ светоносный день/ светле́йшими блистаньми,/ воньже ны́не моли/ озари́тися поющим тя.

Стих: Честна́ пред Го́сподем/ смерть преподо́бных Его́́.

От согласия песнь/ воспеваем, честна́я,/ и почитаем немолчно па́мять Твою́,/ Параске́во преподобная,/ Божественную вои́стинну и светлую.

Стих: Дивен Бог во святы́х Своих,/ Бог Израилев.

Твоя ра́ка,/ я́коже сокро́вище честно́,/ ю́же обстояще/ исцеле́ние грехом нашим моли,/ усердно просим.

Сла́ва, глас 2:

Се рака спасения,/ се источник целе́бный,/ святыя показашася мощи,/ темже, приидите, усердно почерпем ны́не,/ болящим исцеления/ и радости, и́же во скорбех,/ моли́твами ея, Го́сподеви,/ и Церковь сию нерушиму сохрани.

И ны́не, Богоро́дичен: Спаси́ от бед:

Тропа́рь, глас 4 (пи́сан на велицей вече́рни).

Сла́ва и ны́не, Богоро́дичен..

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, на 8, глас 6.

Подо́бен: Все отло́жше:

Возсия́ла еси́, Параске́во,/ доброде́тельми и виде́нием/ на тве́рди я́ко постница ве́рна,/ всесветлыми и славными заря́ми,/ вся отгоняеши омрачения ерети́ческия/ и просвещаеши верою и любовию/ прилежа́щия твои́м учением./ Темже светоносный твой праздник совершаем любовию,/ Христу́ со дерзнове́нием моли́ся о душах на́ших.

Труды по́стническими/ твою́́ душу вооружила еси́,/ и плотска́я увяди́ла еси́ взыграния,/ и ум, славная, соделала еси́/ Божественныя Тро́ицы жилище;/ и возвысилася еси́, о Параске́во,/ идеже нетление и покой праведных,/ с нимиже ны́не радуешися/ и во сла́ве предстоиши Христу,/ со дерзнове́нием моляся о душах на́ших.

Боже́ственных слез твои́х тече́нии, Параске́во,/ все потопила еси́ демонское ополчение,/ я́ко не́мощно су́що,/ твои́ми всегда к Бо́гу мановении и сильными восхождении;/ и гордое возношение на землю низвергла еси́,/ и возвысилася еси́ в Небесныя и благолепныя обители,/ в нихже со А́нгелы водворяешися, предстоящи Христу,/ со дерзнове́нием моли́ся о душах на́ших.

И́ны стихи́ры, глас и подобен то́йже:

Живущи по смерти, Параске́во блаженная,/ посещаеши вся, с верою притека́ющия к раце твое́й:/ от лю́тых страстей покрыва́еши всегда/ и от бед избавляеши,/ подаваеши же исцеления моли́твами твои́ми/ и спасаеши от де́монскаго нахождения/ чтущия святу́ю па́мять твою́́,/ просящи от Бо́га дарова́ти прощение прегрешений.

Ангел земный на земли яви́лася еси́,/ житие безплотное в земне́м теле показала еси́,/ отца бо и матере далече отбе́гши,/ причталася еси́ ко Христу, Жениху твое́му,/ в черто́зе Небеснем, Богоневесто, живущи,/ в Калликра́тии и́маши селение крепко,/ идеже исцеления подае́ши с верою притекающим ти,/ и чудес благода́ть всем источаеши.

Древле убо одождя́ше Бог/ изра́ильтяном манну с Небесе/ днесь же имущим имя твое́ честно́е/ сугу́ба бываше пшеница в раздаяние требующим,/ и нас ны́не в твое́й памяти, преподобная Параске́во,/ хлеба Небе́снаго сподо́би прияти благода́ть/ в благодарение чудес твои́х,/ да радость душам и спасе́ние получим во святей памяти твое́й.

Память твоя́ во веки пребывает,/ преподобная мати Параске́во,/ и труды потов твои́х всюду процветоша,/ аще бо и преставися от земных,/ но со А́нгелы предстоящи всегда,/ молиши Христа́ Бога/ о воспева́ющих досто́йно славную па́мять твою́́.

Сла́ва, глас 1:

Ты сле́зными излия́нии плотских страстей ражжения угасивши/ и Божественнаго раче́ния огнь возгне́щши,/ озарилася еси́ Царя Христа́ безсмертием/ и Тому сочта́лася еси́, добрая дево,/ и с Ним в Чертог разумный ны́не возшла еси́, Параске́во,/ моли́ся о душах на́ших.

И ны́не, Богоро́дичен: Всемирную славу:

Аще не поеши бде́ние или полиелей:

И ны́не, Богоро́дичен по гласу или Крестобогоро́дичен:

Подо́бен: Прехвальнии мученицы:

Заколение Твое́ непра́ведное, Христе́, Дева зрящи,/ и, пла́чущи, вопияше Ти:/ Чадо Сладчайшее, како без правды умираеши?/ како на Древе ви́сиши, И́же всю землю повешей на водах?/ не остави Мене едину, Благодетелю Многомилостиве,/ Матерь и рабу Твою́, молюся.

Вход. Проки́мен дне. Чтения три преподо́бническая.

Прему́дрости Соломоновы чтение (главы́ 5 и 6):

Праведницы во веки живут, и в Го́споде мзда их, и попече́ние их у Вы́шняго./ Сего ради прии́мут Ца́рствие благоле́пия и венец добро́ты от руки́ Господни:/ зане́ десни́цею покры́ет я и мы́шцею защити́т их./ Прии́мет всеору́жие рвение свое, и вооружи́т тварь в месть враго́м./ Облече́тся в броня́ правды и возложи́т шлем, суд нелицеме́рен./ Прии́мет щит непобедимый, преподо́бие;/ поостри́т же напрасный гнев, во оружие: спобо́рет же с ним мир на безу́мныя./ По́йдут праволу́чныя стре́лы мо́лниины,/ и я́ко от благокру́гла лу́ка облако́в на наме́рение полетят./ И от каменоме́тныя ярости испо́лнь падут гра́ды,/ вознегоду́ет на них вода морская, ре́ки же потопя́т я на́гло./ Сопроти́в ста́нет им дух силы, и я́ко ви́хор разве́ет их,/ и опустоши́т всю зе́млю беззаконие, и злодейство преврати́т престо́лы сильных./ Слы́шите у́бо, ца́рие, и разуме́йте, навы́кните судии́ концев земли́./ Внуши́те держа́щии мно́жества и гордя́щиися о наро́дех язы́ков:/ я́ко дана есть от Го́спода держа́ва вам и сила от Вы́шняго.

Прему́дрости Соломо́новы чтение (глава́ 3):

Праведных души в руце́ Божией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исход их:/ и еже от нас ше́ствие сокруше́ние, они же суть в мире./ Ибо пред лице́м человеческим, аще и му́ку прии́мут, упова́ние их безсмертия испо́лнено./ И вма́ле нака́зани бывше, великими благоде́тельствовани будут,/ я́ко Бог искуси́ я и обре́те их достойны Себе./ Я́ко злато в горни́ле искуси́ их, и я́ко всепло́дие же́ртвенное прия́т я./ И во время посещения их возсияют и я́ко и́скры по сте́блию потекут./ Су́дят язы́ком и обладают людьми, и воцари́тся Господь в них во веки./ Надеющиися Нань разумеют истину, и ве́рнии в любви пребу́дут Ему./ Я́ко благода́ть и ми́лость в преподо́бных Его́́,/ и посещение во избра́нных Его́.

Прему́дрости Соломо́новы чтение (глава́ 4):

Праведник, аще пости́гнет сконча́тися, в поко́и будет./ Старость бо честна́, не многоле́тна, ниже́ в числе лет исчита́ется./ Седина же есть мудрость челове́ком, и возраст старости, житие́ нескверное./ Благоуго́ден Бо́гови быв, возлю́блен бысть,/ и живы́й посреде́ грешников, преста́влен бысть./ Восхище́н бысть, да не злоба измени́т разума его,/ или́ лесть прельсти́т душу его./ Раче́ние бо злобы помрачает добрая, и паре́ние по́хоти пременя́ет ум незло́бив./ Сконча́вся вма́ле испо́лни ле́та до́лга:/ угодна бо бе Господу душа его: сего ради потща́ся от среды́ лука́вствия./ Лю́дие же ви́девше и не разуме́вше, ниже́ положиша в помышле́нии таковое:/ я́ко благода́ть и ми́лость в преподо́бных Его́́,/ и посещение во избра́нных Его́.

На лити́и стихи́ры, глас 1:

Благода́ть духо́вную от Бога/ приемши, преподобная Параскево,/ и по смерти твоя́ чудеса́ блистают/ и твоя́ постничестии труды и подвизи/ в миро благовонно предзришася./ И всем подаеши обильно недугом исцеле́ние,/ верою притекающим к раце твое́й.

От Вы́шняго Промысла благода́ть духо́вную почерпши,/ и по смерти источаеши медоточных вод струи чудес,/ и напаяя веселием верных сердца и помыслы,/ и прогоняя духа лукавствия,/ моли́ Христа́ Бо́га о творящих па́мять твою́́ святую.

Глас 2:

Желанием Божественныя любве́ ничтоже мирских предпочла еси́,/ и матерни любве небрегла еси́,/ и свою утварь в ру́це нищим подала еси́,/ и Ева́нгельский глас слышала еси́,/ то́щно Христу́ последовала еси́,/ Eгoже моли́ спасти́ся нам.

Сла́ва, глас 2:

Отечество и сродство оставила еси́,/ и Христу, Жениху своему́, последовала еси́,/ преподобная Параскево,/ и Вышний Иерусалим постигла еси́,/ и с мудрыми девами, невздремавшися, вошла еси́ во мысленный чертог/ и зри́ши Жениха своего́ красоту,/ Егóже моли́ о душах на́ших.

И ны́не, Богоро́дичен.

На стихо́вне стихи́ры, глас 4

Подо́бен: Званный свыше:

Уязви́вшися желанием Божественным,/ преподобная мати Параскево,/ вся суетная прелестнаго жития́ возненави́девши,/ Христу́ последовала еси́/ горящим духа желанием,/ мудрование плотско́е умертвивши воздержа́нием,/ и истинным умиле́нием, и совершенным смирением,/ и прия́ла еси́ от Бо́га дар чудотворений неизреченных:/ Eгoже моли́ спасти́ и просветити души на́ша.

Стих: Честна́ пред Го́сподем/ смерть преподо́бных Его́́.

Ангельское возжеле́вши житие́,/ преподобная мати Параскево,/ мимотеку́щее сие житие, я́ко сон, вменила еси́,/ подвиза́ющися воздержа́нием, и прилежными моли́твами,/ и поще́нием, и бде́нием, и низулега́нием, и чистотою;/ сосу́д пречист яви́лася еси́ Ду́ха Божественнаго/ и светлых, и неизреченных чудес дар от Бо́га прияла еси́,/ Егóже, всеблаженная мати, моли/ спасти́ и просветити души на́ша.

Стих: Блажени вси, боящиися Го́спода,/ ходящии в путех Его́.

Настоящаго жития́ сего,/ прелестнаго, и маловременнаго, и скоро мимотеку́щаго,/ вся отвергла еси́/ и пламень огня страстна́го угасила еси́./ Непрестанным умилением, и соверше́нным смирением,/ и прилежным молением Безплотных чи́ны достигла еси́/ и зри́ши откровенным лицем Славу Божию,/ Егóже, преподобная Параскево, моли/ спасти́ и просветити души на́ша.

Сла́ва, глас 2:

От ко́рене благаго израсте́ шипо́к,/ и́же от младе́нчества твоего́ возлюбила еси́ Христа, Параске́во,/ благода́тию па́че, неже млеко́м, воспита́на бывши,/ и, на ка́мени стоящи, плоть твою́́ изнури́ла еси́,/ и к Бо́гу возвысившися разумом,/ и Господне создалася еси́ доброде́тельми жилище,/ и, с Небе́сными ликовству́еши, Христова бывши оби́тель,/ моли́ спасти́ся душам нашим.

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

Егда Нескве́рная А́гница виде Своего́ А́гнца,/ на заколение, я́ко человека, волею влеко́ма,/ плачущи, глаго́лаше:/ безчадствовати Мя ны́не тщи́шися, Христе́, рождшую Тя;/ что сие сотворил еси́, Изба́вителю всяческих?/ оба́че воспева́ю и сла́влю Твою́, юже па́че ума и слова,/ крайнюю благость, Человеколюбче.

И́ны стихи́ры на стиховне, глас 1.

Подо́бен: Небе́сных чино́в:

Приидите, православных соборы,/ и лики составим в па́мять преподобныя Параскевы,/ та бо мирская оставльши, Ева́нгельский слышавши глас,/ и, вземши крест Христов, истинно последова Емуже/ и уневе́стися, Христу,/ и с мудрыми девами вни́де во Небесный чертог,/ моли́ о творящих па́мять твою́́.

Стих: Дивен Бог во святы́х Своих,/ Бог Изра́илев.

Безплотных житие в телеси ве́щнем имела еси́,/ преподобных житию поревновала еси́,/ роди́тельную любовь преобидила еси́, Божественней любве приобщися,/ Евангельским велением последовала еси́/ и в дом безстрастия достигла еси́,/ моли́ о творящих па́мять твою́́.

Стих: Честна́ пред Го́сподем/ смерть преподо́бных Его́́.

Чино́м по́стническим последова усердно,/ и преподобным сожительница была еси́,/ удалившася мира и мирских,/ и обогати́ся Божественными деяньми,/ апостольскому учению последовавши,/ и Христу́ приведеся невеста,/ Небесною красотою украшенна,/ моли́ о творящих па́мять Твою́.

Сла́ва, глас 6:

Одесную Спаса предста,/ дево преподобная Параскево,/ одеяна добротою пощения/ и преукрашена еле́ем чистоты,/ и вопиющи к Христу́ в радости, свещу держащи:/ во благоуха́ние мира Твоего́́ теко́х, Христе́́ Боже,/ я́ко уязвихся Твое́ю любо́вию аз,/ не отлучи́ мене Чертога Твоего́, Женише́ Небесный,/ тоя́ моли́твами и нас, Всесильне, спаси́ милостию Твое́ю.

И ны́не, Богоро́дичен.

Тропа́рь, глас 4:

Пустынное и безмолвное житие возлюбивши,/ и во след Христа, Жениха твоего, усердно поте́кши,/ и Того благое иго во юности твое́й взе́мши,/ Крестным знамением к мысленным врагом мужески вооружи́вшися,/ по́стническими подвиги, постом, и моли́твами, и сле́зными каплями/ у́глие страсте́й угасила еси́, достославная Параскево:/ и ны́не в Небеснем черто́зе/ с мудрыми девами предстоя́щи Христу,/ моли́ о нас почитающих честну́ю па́мять твою́́.

Сла́ва, и ны́не, Богоро́дичен: Еже от века утаенное:

НА У́ТРЕНИ

На Бог Госпо́дь: тропа́рь святыя два́жды.

Сла́ва, и ны́не, Богоро́дичен.

По 1-м стихосло́вии седа́лен, глас 4.

Подо́бен: Скоро предвари:

Жениха возлюбивши, Творца и Бога,/ жениха же тленнаго оставила еси́, честна́я Параске́во,/ и, радующися, претерпе́ла еси́ постныя по́двиги:/ те́мже и, венцы носящи, к Боже́ственному чертогу возшла еси́,/ испрошающи всем грехов оставление.

Сла́ва, глас 8.

Подо́бен: Повеленное тайно:

Иже во искуше́ниих и ско́рбех суще, к твое́му храму притекающе,/ приемлют честныя исцеления/ от еже в тебе́ живущия Божественныя благода́ти, Параскево преподобная,/ ты бо при́сно мирови источаеши исцеления.

И ны́не, Богоро́дичен:

Дево Всенепоро́чная, Яже Пресущнаго Бо́га рождшая,/ со преподобною Того непрестанно моли/ оставле́ние прегрешений и исправление жития да́ти нам прежде конца,/ верою и любо́вию поющим Тя по долгу,/ едина Всепетая.

По 2-м стихосло́вии седа́лен, глас 1:

Непорочная а́гница честна́я/ Го́сподеви сочта́ся та́инственно в чи́стем житии,/ добро́тою Богоданною себе украси́вши./ Темже и прият благода́ть исцеления,/ уврачующи страсти притекающих к ней силою духовною.

Сла́ва, глас 4.

Подо́бен: Удивися:

Ходивши по стезе́ узтей, пространнаго рая́ широту достигла еси́,/ идеже радость празднующих, идеже Древо Животное,/ нас непрестанно поминающи, чту́щих твое́ успение.

И ны́не, Богоро́дичен:

Матерь Тя Божию молим вси,/ Де́ву вои́стинну и по Рождестве явльшуюся,/ любо́вию прибегающим к Твое́й благости:/ Тебе́ бо и́мамы гре́шнии Предстательницу,/ Тебе́ стяжахом в напастех спасе́ние,/ Едину Всенепорочную.

Посем, Хвалите Имя Господне: Псалом избранный преподобнический.

Величание:

Ублажаем тя, преподобная мати Параскево,/ и чтим святу́ю па́мять твою́́,/ ты бо мо́лиши за нас Христа́ Бо́га нашего.

По полиеле́и седа́лен, глас 8:

Предъизбра́нная от Бога, преподобная мати Параскево,/ жития треволнений и мяте́жа мирскаго стра́стных помышлений избе́гши,/ ко пристанищу жития достигла еси́,/ и со А́нгелы песносло́вящи Изба́вителя Христа́ Бога,/ моли́ непрестанно о нас, да благода́ть и ми́лость дарует нам,/ чтущим любо́вию святу́ю па́мять твою́́.

Сла́ва, и ны́не, Богоро́дичен:

Ра́дуйся, А́нгелом радость мира прие́мшая,/ радуйся, рождшая Творца Твоего́́ и Го́спода,/ радуйся, сподо́бльшаяся быти Ма́ти Бо́жия.

Та́же степе́нна, 1 антифо́н, 4-го гла́са. Проки́мен: Дивен Бог во святы́х Своих, Бог Израилев. Стих: В це́рквах благословите Бога,/ Го́спода от источник Изра́илевых. Вся́кое дыха́ние: Ева́нгелие от Матфе́я, зача́ло 104.

По 50-м псалме, стихи́ра, глас 8:

Всяк язык да подви́жится/ к похвалению Христовы красныя невесты,/ честныя голуби́цы, позлащенныя Ду́хом Святы́м:/ та бо возлюби́ пустынное житие,/ бысть А́нгелом собеседница, девственная похвала́,/ юже А́нгели восхвалиша/ и человечестии роди, блажаще, вопием:/ радуйся, заступнице сущим в беда́х и обуреваемым пристанище,/ преблаженная Параскево,/ ты бо последовала еси́ твое́му Жениху Христу,/ подающему ми́ру велию ми́лость.

Канон Богоро́дицы, со ирмо́сом на 6.

И преподобныя 2 кано́на, на 8.

Кано́н преподо́бныя, глас 6.

Песнь 1

Ирмо́с:Яко по су́ху пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу победную песнь,/ поим, вопияше.

Моего разума твои́ми моли́твами мрак отжени́, Параскево преподобная,/ да воспою славную твою́́ память,/ и светоносную, и блаженную песньми.

Я́ко река устремися от Сиона, славная Параскево,/ напоила еси́ зело Божественными струя́ми верных сонмы, вопиющи:/ Го́сподеви поим песнь новую.

Божественными сия́нии душу твою́́ озаривши, Параскево,/ сладострастие плоти воздержа́ния попали́ла еси́ огнем,/ поющи истинную песнь Христу.

Богоро́дичен: Светлыми лучами Твоего́́ Сына, Богоро́дице,/ просвети́ омраченную мою душу/ и страстей смущение твои́ми, Чи́стая, укроти ходатайствы.

Ин кано́н преподобныя, глас 8.

Песнь 1

Ирмо́с: Воду проше́д я́ко сушу,/ и египетскаго зла избежав,/ изра́ильтянин вопияше:/ Изба́вителю и Бо́гу на́шему поим.

Ликующи, мати, на Небесех/ и твое́му Жениху Христу, предстоя́щи при́сно со А́нгелы, и пророки, и со апостолы,/ и со женами преподобными, о нас моли́ся.

Пост возлюбивши и чи́стое смирение, дево,/ Бо́га Истиннаго возвеселила еси́:/ Тому непрестанно о нас моли́ся.

Радостный ти Христов глас прии́де,/ на земли мольбу де́ющей, мати честна́я,/ и радости наполнилася еси́,/ Сего песньми за ны молящи.

Богоро́дичен: Чини Тя А́нгельстии и человечестии,/ Безневестная Де́во, хвалят непрестанно:/ Зижди́теля бо их я́ко Младенца на руку́ Твое́ю понесла еси́.

Катава́сия: Отве́рзу уста моя:

Песнь 3

Ирмо́с: Несть свят,/ я́коже Ты, Го́споди Боже мой,/ вознесы́й рог верных Твоих, Блаже,/ и утверди́вый нас на ка́мени/ испове́дания Твоего́.

Ты исполнилася еси́, мудрая мати Параскево, Божественнаго Духа/ и яви́лася еси́, питающи бога́тно благоче́стия сладостию,/ живо́тным словом зрящия к тебе́.

От повелений Божественнаго сияния просветила еси́ вся, блаженная Параскево,/ отгнавши всю еретическую зло́бу, Жизнодавцу Христу́ воспева́ющи:/ свят еси́, Го́споди.

На го́ру Боже́ственных доброде́телей востекла еси́, Параскево,/ и, во о́блак виде́ний прини́кши, сочеталася еси́ с Богом,/ разумныя скрижа́ли прии́мши закона благода́тнаго.

Богоро́дичен: Се лествица Иаковля, юже виде иногда́ утвержде́ну,/ на нейже утвержда́шеся Бог,/ светоно́сна, Чи́стая, явися девствующи.

Ин

Ирмо́с: Ты еси́ утверждение/ притекающих к Тебе́, Го́споди,/ Ты еси́ свет омраченных,/ и поет Тя дух мой.

Испроси́, Параскево, невесто Христова славная,/ грехов прощение подати верою хва́лящим тя.

Бе́гающи, удалилася еси́/ и вселилася еси́ в пустыни, и горах присно, и вертепех,/ Бо́гу угождающи.

Обрела еси́, егóже возлюбила еси́ от души, пречестная Параскево,/ в широте пустыни сокровище пота́еное.

Богоро́дичен: Тебе́ вси стяжахом, прибежище и сте́ну нашу, христиане,/ и Тя сла́вим немо́лчно,/ Ма́ти Безневестная.

Ин икос:

Чудесем источник отве́рзеся,/ приидите вси, почерпне́м ны́не воды, точащия исцеления,/ яви бо чудеса́ преславная Параскева всем,/ Бо́гу сию прославляющу я́ко присну Ему рабу сущу,/ сего ради обрете чудесем благода́ть Божиим велением.

Седа́лен, глас 4:

Яви́лася еси́, преподобная Параскево, Церкви, я́ко иное солнце,/ озаряющи сию молниями чудес твои́х/ и просвещающи верою вопиющия ти:/ радуйся, постниц похвало и дев удобрение.

Сла́ва, и ны́не, Богоро́дичен:

Пречи́стеи руце Твои, Де́во Мати, просте́рши,/ покрый уповающия на Тя и Сыну Твое́му зовущия:/ всем подаждь, Христе́, милости Твоя́.

Крестобогоро́дичен:

На Древе ви́дящи воздви́жена Сы́на Твоего́, Пречистая,/ утробою матернею разтерза́ема, жалостно взывала еси́:/ увы Мне, како зашел еси́, Свете Мой безлетный.

Песнь 4

Ирмо́с: Христос моя сила,/ Бог и Господь,/ Честна́я Церковь/ Боголепно поет, взывающи,/ от смысла чиста о Го́споде празднующи.

Поще́нием, преподобная Параскево, себе очистивши,/ вся света исполнилася еси́, и вся Боговме́стна показалася еси́,/ и вся яви́лася еси́ Духу соприча́стна.

Гладом уморя́ющи люте злое юности игра́ние, Параске́во блаженная,/ и постническия терпи́ши болезни,/ от совести чи́сты о Го́споде веселящися.

Облиставши, славная, жития исправлении,/ обощрена́ яви́лася еси́, я́ко Христов меч, ссецающи демонская ухищрения,/ Боже́ственным Духом укрепляема.

Богоро́дичен: Светильник всесветлый, Боже́ственная трапе́за,/ Божие селение, кивот и жезл, процветши в мире Христа,/ Ты яви́лася еси́, Ма́ти Де́во.

Ин

Ирмо́с: Услы́шах, Го́споди,/ смотре́ния Твоего́́ та́инство,/ разуме́х дела́ Твоя́/ и просла́вих Твое́ Божество.

Нескве́рно зерца́ло и свято помыслом себе сотворши,/ я́ко светило, при́сно сияющи посреде́ по́стниц, славная.

В телесном обнаже́нии солнечным попале́нием сгара́ла еси́ за любовь Жениха твоего/ и мраза студе́ность претерпе́ла еси́.

Всено́щным бдением, и моли́твами крепкими, и стена́ньми,/ плоти увяди́ла еси́ движения,/ преблаженная мати.

Богоро́дичен: Христа, Егóже родила еси́, Пречистая Де́во,/ Того умоли рабом Твоим дарова́ти прегрешений оставление.

Песнь 5

Ирмо́с: Божиим светом Твоим, Блаже,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Божий,/ Истиннаго Бога,/ от мрака греховнаго взыва́юща.

Светопода́тельными твои́ми блистаньми, Параске́во,/ мрачную тьму потребила еси́ ерети́ческую,/ и Богозна́ния светом озари́вшися, просвещаеши мира концы.

Тебе́ вси, заступницу имуще, досто́йно сла́вим, Параскево,/ ты бо яви́лася еси́ А́нгелов собеседница и дев украше́ние,/ мати преподобная.

Яви́лася еси́, мати Параске́во, светозарна,/ заблуждших путеводительница, вла́ющихся правительница,/ и колеблющихся в лю́тых твердость, и стена нерушима.

Богоро́дичен: Добро́та Иа́ковля, юже возлюби́ Бог и вселитися избра́,/ земных сла́ва и прибежище греша́щих,/ Богоро́дице, Ты яви́лася еси́.

Ин

Ирмо́с: У́тренююще вопие́м Ти,/ Го́споди, спаси́ ны:/ Ты бо еси́ Бог наш,/ ра́зве Тебе́ ино́го не ве́мы.

Дне и мира сопротивная ве́дящи,/ желания люботворца демона любити не восхотела еси́.

Мня преодоле́ти твое́й любви и чистоте,/ но смех явися козньми́ прелукавый.

Погребоша твое́ тело, я́коже нетле́емо,/ ты бо я́ко безплотна пожила́ еси́, Богоневестная.

Богоро́дичен: Де́ву по Рождестве пое́м Тя, Богоро́дице,/ Ты бо Бо́га плотию ми́ру родила еси́.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твое́му прите́к, вопию́ Ти:/ возведи́ от тли живо́т мой,/ Многоми́лостиве.

Сияеши, я́ко солнце,/ Богозарны лучи, преблаженная Параске́во, чудес испущающи/ похваля́ющим твоя́ постныя труды и дивныя подвиги.

Пречи́стую Владычицу Богоро́дицу похваляющи че́стно, язы́ком твои́м, Богомудрая Параскево,/ воспевши словеса́ светоза́рная,/ верных сонмища му́дре сердца́ умаща́ющи.

Напи́санный всечестны́й и святый образ любе́зно лобызаеши,/ безбожных же пи́сания потребля́еши, и тех богомерзская и безбожная повеления поплева́еши,/ и возвещавши честь и поклонение образа Христова.

Богоро́дичен: Вся хоте́нием Свои́м составивый Бог и содержай всяческая,/ описа́нием телес на Твоих руках держи́тся, Пречистая,/ И́же Боже́ственным Существом неопи́санный.

Ин

Ирмо́с: Моли́тву пролию́ ко Господу/ и Тому возвещу́ печали моя,/ я́ко зол душа моя испо́лнися,/ и живо́т мой а́ду прибли́жися,/ и молю́ся, я́ко Ио́на:/ от тли, Боже, возведи мя.

Мирския молвы́ попрала еси́, мира Соде́телю предстои́ши,/ возлетевши кри́лы златоукра́шенными, мати,/ от трудов пощения и молитв, Богоблаженная.

Богоугоднаго твоего́ ради жития, прелестная,/ я́ко дар освяще́н, отечеству подаешися твое́му, Параскево,/ к западу пришедши, всеславная.

Несказа́нно житие измла́да возжеле́вши,/ неви́дима бо в земли потаена́,/ восходящи, преподобная, на удивление бысть, Бо́гу явльшу тя.

Богоро́дичен: Да избу́дем от лю́тых прегрешений моли́твами Твоими, Богоро́дице Чи́стая,/ и да улучи́м Божие сияние/ из Тебе́ неизреченно воплощеннаго Сы́на Бо́жия.

Конда́к, глас 6:

Святую вси заступницу сущим в беда́х,/ благоче́стно воспоим Параскеву всечестну́ю:/ та бо, житие оставльши тленное/ и нетлеемое прият бо веки,/ сего ради славу обре́те,/ чудес благода́ть Божиим велением.

И́кос:

Приидите, постническое сословие,/ приидите, чистоты рачи́теле, приидите, празднолюбцы всяк возраст,/ песньми духовными похвалим пустыннолю́бную го́рлицу,/ постников похвалу, дев украше́ние, молчальников удобрение,/ печальных уте́шительницу, болящих посетительницу/ и сущим в беда́х скоропослушную помощницу,/ Богомудрую Параскеву, точащую всем исцеления,/ обрете бо благода́ть чудес Божиим велением.

Песнь 7

Ирмо́с: Росода́тельну убо пещь/ соде́ла А́нгел/ преподобным отроко́м,/ халде́и же опаля́ющее веле́ние Бо́жие мучи́теля увеща́ вопи́ти:/ благослове́н еси́, Боже отец на́ших.

Исправля́ющи ты слово Жениха Христа,/ Тому невозвратным желанием последовала еси́, господоимени́тая Параскево, вопиющи:/ благословен Бог отец на́ших.

Добро́ты тле́ющия, Параскево преподобная, небрегла́ еси́,/ смотряющи тамо сущаго воздая́ния,/ и прияла еси́ славу нестареющуюся, Божию красоту и веселие.

Реки твои́х словес медото́чных, Параскево,/ человеком ду́ши веселия Божественнаго исполняеши,/ хвалосло́вящим песньми Бо́га препрославленнаго.

Богоро́дичен: На Тебе́ соде́яся великое, Де́во Мати, та́инство:/ Сын Божий из чрева Твоего́́ воплоти́ся и всем яви́ся,/ Емуже, веселящеся, поем:/ отцев Боже, благословен еси́.

Ин

Ирмо́с: О́троцы евре́йстии в пещи́/ попра́ша пла́мень дерзнове́нно,/ и на ро́су огнь преложи́ша, вопию́ще:/ благословен еси́, Го́споди Боже во веки.

За́йде, я́коже солнце, преподобная мати,/ просвещаеши же чудесы верою теплою и любо́вию поющих:/ благословен Бог отец на́ших.

Испо́лнишася вся страны́ твоего́ благоухания во обретение мощей твои́х,/ имже верою пети повелеваеши, преподобная:/ благословен Бог отец на́ших.

Обрета́ешися, мати, хромым исправление,/ ибо ногою боле́вый, скака́я, вопияше, зовый немо́лчно:/ благословен Бог отец на́ших.

Богоро́дичен: Се, Ю́же прорече́, Де́во, Ду́хом Святы́м великий Исаия,/ во чреве Бо́га заченши, родила еси́:/ и благословен, Пречистая, Плод Твоего́́ чрева.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/ вся бо твори́ши, Христе́́, то́кмо еже хоте́ти,/ Тя превозно́сим во вся ве́ки.

По законе отчи, закон оте́ческий, всеблаженная, истинно нося́щи,/ де́монская ли́ца поплевала еси́, Господне воображение благоче́стно лобызающи,/ еже приим в мире, явившася от Девы Отроковицы:/ Егóже превозносим во веки.

Ум Божествен и Ду́ха Пресвята́го гусль всесочета́нна,/ слави́й добропе́снивый, верных похвала́ верховная,/ Православия сто́лпе и утверждение мудрое, церковное правило,/ монахинь сла́ва и всех преподобных удобрение яви́лася еси́,/ поющи Христа́ во веки.

Мирополо́жница Ду́ха Пресвята́го, мати, показалася еси́/ излия́нием мира благовонных твои́х и мудрых учений, потребляющи прелести злосмра́дную тлю/ и благово́нствуя нравом твои́м, Параскево, Честну́ю Церковь, зовущи непрестанно:/ песньми Тя превозносим, Христе́, во веки.

Богоро́дичен: Божия гора ту́чная,/ ея́же пра́отец Давид уясни́в, древле поя пророчески, ты яви́лася еси́, Де́во,/ от неяже отсечеся Камень краеугольный Христос и сокруши кре́пость идольскую:/ Того непрестанно пое́м и превозносим во веки.

Ин

Ирмо́с: Царя Небе́снаго,/ Егóже поют во́и А́нгельстии,/ хвалите и превозносите во вся ве́ки.

Укрепльшися умом Безплотных,/ желанием вдала еси́ тело посту/ и живеши во веки.

Пребогатая в жена́х яви́ся, блаженная Параскево,/ поющи Творцу:/ Тя превозносим во веки.

Су́щу разслабленному в лета мно́га, честна́я, исцеления подаде недуга:/ тем тя воспеваше, преподобная, во веки.

Богоро́дичен: Сошедшаго с Небес и в ложесна́ Деви́ческая все́льшася Го́спода,/ пойте и превозносите Его́ во веки.

Песнь 9

Ирмо́с: Бога/ человеком невозможно ви́дети,/ на Негoже не смеют чини А́нгельстии взирати,/ Тобо́ю бо, Всечистая, явися человеком/ Слово Воплощенно,/ Eгoже величающе,/ с Небе́сными во́и/ Тя ублажаем.

Посо́бствующу тя по Христове Церкви человекоубийца зрети не могий,/ искушения тебе́ простирает:/ обаче непрекло́нна пребыв и, мысленным врагом противилася еси́ до́блественно,/ покланяющися о́бразу Христову, Богомудрая Параскево.

Укра́шена несказанною, Богомудрая, доблестию/ и упещре́на сияньми светлейшими,/ радостно, преблаженная, предстоиши Престо́лу Зижди́теля Бога,/ идеже празднующих глас, Богомудрая Параскево.

Твоих подвигов достойную прияла еси́ по́честь,/ и венцено́сица ны́не на Небесех со А́нгелы ликовству́ющи,/ иде́же пророческий сонм, и апостол, и мученик вои́стинну во́инства многа,/ идеже патриархов ликостоя́ния,/ поминай нас, преподобная мати Параскево.

Богоро́дичен: Побо́рствующи людем ве́рным во бране́х,/ воинству на́шему на сопротивныя даждь победы, Богородительнице,/ покрывающи от всякаго навета врагов,/ Ма́ти Бо́га Слова Неискусобрачная Чи́стая,/ да Твоего́́ Сы́на поюще, Тя величаем.

Ин

Ирмо́с: Воистинну Богоро́дицу/ Тя исповедуем,/ спасе́нии Тобою, Де́во Чи́стая,/ с Безплотными лики Тя величающе.

Не престай молящи Христа, мати преподобная,/ изба́вити ны от бед рабы твоя́,/ и́же от души пою́щия тя и величающия.

Красота дев яви́лася еси́, преподобная,/ я́ко А́нгельскому житию поревновала еси́;/ не престай молящи о отечестве твое́м.

Сочеталася еси́ со Безплотными ликостоянии/ и Влады́це предстоиши, радующися,/ с мудрыми девами, Сему молящися о мире.

Богоро́дичен: Радости исполни мя и веселия, Де́во,/ я́ко приимши вину радости:/ Ты бо источила еси́ всем радование.

Свети́лен.

Подо́бен: Жены́ услышите:

Я́ко Боже́ственный свет, Параскево, песненно Церкви яви́лася еси́,/ красотою сию озари́вши светом лица твоего,/ предобрая невесто Христова:/ к Нему́же непрестанно моли́ся о всех нас.

Сла́ва:

Подо́бен: Небо звездами:

Ангельскаго жития желая, удалила еси́ себе в пустынях/ и, страсти покоривши плотски́я, равноангельна показася,/ преподобная мати на́ша Параскево.

И ны́не, Богоро́дичен:

Дре́вле дарова́нную ми ризу банею Крещения осквернив страстны́м блуже́нием,/ ужасаюся, окаянный, час помышляя вои́стинну Божественнаго Суда,/ Де́во Всенепоро́чная, предстани тогда и избави мя страшнаго прещения.

На хвалитех стихи́ры на 4, глас 8.

Подо́бен: О пресла́внаго чудесе́:

Грядите вси, Богомудрии, от земли дальния,/ раце прикосну́вшеся преподобныя/ и прошения своя от души принося́ще,/ приими́те избавление от страстей различных:/ ини́и же грехов разрешение,/ и к Бо́гу присвоение,/ и всяку пользу нам ко спасению.

Глас 1.

Подо́бен: Небе́сных чино́в:

Параскево Богомудрая,/ воздержа́нием многим, молитвою и молением Богови соединися/ и непобеждена пребысть коварствы борителя./ Темже и со А́нгелы ликовствуеши на Небесех,/ отнюдуже почитаем тя/ и Божественную па́мять Твою́, сошедшеся, празднуем.

Ты, повинующися манием Всевидца Бога,/ от Негoже благода́ть прияла еси́/ действовати чудесы и прогонити духи лукавствия./ Темже почитаем тя/ и святу́ю па́мять твою́́ достодолжно верою празднуем, Богоблаженная.

Воздержанием мудрование плотско́е умертвила еси́,/ постом и доброде́телей совершением,/ отнюдуже явися, я́ко жива, по смерти вои́стинну./ Смерть бо тебе́, я́ко сон, вменися,/ к Бо́гу прешедши и в руце Его́ душу предавши,/ Eгoже моли́ спасти́ души на́ша.

Сла́ва, глас 8:

Отечество, и сро́дство, и имение оста́вльши, Параскево,/ и нечестия вся мирская возненави́девши,/ Бо́га Единаго возлюбила еси́,/ Емуже и пощением уневестилася еси́/ и была еси́ Свята́го Ду́ха жилище,/ от Негoже светоли́тием просветившися,/ Того моли́ спасти́ души на́ша.

И ны́не, Богоро́дичен: Влады́чице, приими:

Славословие великое. И отпуст. Аще ли не пое́м бдения или полиелея, тогда пое́м стиховну во Октоихе.

Сла́ва, преподо́бней, глас 2:

Преподобная мати Параскево,/ измлада себе саму́ю возложи́вши Христу́ Бо́гу/ и от Него укрепляема, плотски́я страсти покорила еси́,/ и ху́ждшее порабо́тила еси́ лучшему:/ те́мже и венец триплете́нный прияла еси́,/ моли́ спасти́ души на́ша.

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

Егда Нескве́рная А́гница виде Своего́ А́гнца,/ на заколение, я́ко человека, волею влеко́ма,/ плачущи, глаго́лаше:/ безчадствовати Мя ны́не тщи́шися, Христе́, Рождшую Тя,/ что сие сотворил еси́, Изба́вителю всяческих?/ обаче воспева́ю и сла́влю Твою́ па́че ума и слова/ крайнюю благость, Человеколюбче.

НА ЛИТУРГИ́И

Блаженны, от перваго кано́на песнь 3 и от втора́го песнь 6. Проки́мен, глас 4: Дивен Бог во святы́х Своих, Бог Израилев. Апостол к Гала́том, зача́ло 208: Братие, прежде пришествия веры: Аллилуия. Терпя, потерпе́х, Го́спода, и внят ми. Ева́нгелие от Матфе́я, зача́ло 104: Рече Господь притчу сию: Уподобися Царствие Небесное десяти девам: Причастен: Ра́дуйтеся, пра́веднии:

Преподобная Параскева Сербская

Слу́жбу зри 18 февраля.

Тропа́рь, глас 4:

Горняго желая премирнаго жития,/ до́льняя возненавидел еси́,/ и, взем крест свой, последовал еси́ Христу,/ и в пустыню вселился еси́, досточудне,/ в ней подвизася в пениих, в бде́ниих и пощениих./ Темже в тя всели́ся Пресвятый Дух,/ но я́ко имея дерзновение ко Христу́ Бо́гу,/ испроси людем православным здравие и спасе́ние/ и не забуди посещая чад своих,/ совершающих священную па́мять твою́́,/ Космо́, преподо́бне о́тче наш.

Конда́к, глас 8.

Подо́бен: Взбранной:

Душевныя страсти из ко́рене исторга́я,/ в пустыню вселился еси́, преподо́бне,/ и неболезненную жизнь в болезнех восприял еси́,/ болезней же лю́тым уставляеши озлобления просящим у тебе́ с верою./ Темже разреши болезни на́ша душевныя и телесныя, да зовем ти:/ радуйся, Космо́ Богомудре.