15-й день

Преподо́бнаго отца на́шего Евфи́мия Но́ваго и свята́го преподобномученика Лукиа́на, пресвитера Вели́кия Антиохи́и

Святителя Иоа́нна, епископа Су́ждальскаго

Преподобнаго Лукиа́на священномученика, в Да́льних пеще́рах почива́ющаго

15.10 Священноиспове́дника Афана́сия, епи́скопа Ковро́вскаго (Минея дополнительная)

На Го́споди, воззва́х: стихи́ры преподо́бнаго, глас 4.

Подо́бен: Я́ко до́бля:

Тесный путь шествовал еси́,/ нево́лненным духом/ к жизни веду́щим препла́вая:/ постников бо ты был еси́ хвала, Евфи́мие,/ терпеливно низложив демонская ловления,/ тем получил еси́ Небе́снаго Царствия наследник быти/ и не престаю́щия наслаждаешися красоты́.

Пресветлое житие́ твое́ А́нгелы удиви́/ и де́монская свире́пства я́ве устраши,/ верных же собрания све́тло украси́,/ к Небесному Христо́ву жилищу/ повелевая ше́ствовати всегда./ Егóже моли́ от тли и бед избавитися/ верою творящим всечестную па́мять твою́́.

Песнопение и хвалу/ Христу́ приносил еси́ на всяк день, отче,/ в пусты́ни жи́тельствуя,/ Единому Бо́гу возложив душу и помышление,/ я́ко великий Моисей, в нехо́дная вшел еси́:/ тем победив невидимаго врага,/ и был еси́ чистое приятелище/ и Божественнаго Ду́ха орга́н.

И́ны стихи́ры мученика, глас то́йже.

Подо́бен: Дал еси́ зна́мение:

Словом Божественнаго зна́ния,/ обогате́в верою, верныя утвердил еси́/ многоплете́нныя муки/ и ярость мучительскую терпе́ти дерзостно/ будущия ради жизни и нетленныя радости./ Тем тя ублажаем, Лукиа́не достославне,/ и Боже́ственное твое́ днесь совершаем торжество.

Темницу многовре́менную/ и ну́жнейшую смерть претерпе́л еси́, преподо́бне,/ у́зами связу́ем, и острыми чрепи́нами стреца́ем, блаже́нне,/ и неяде́нием лютым, и долго́тною жаждею утомляемь;/ тем тя Небе́сная пища яве прия́ла есть,/ я́ко непобеди́ма мученика, страстотерпче до́блий.

Не́дро тя морское прие́м, славне,/ по три́десятих днех су́ши предае́т,/ я́коже Ио́ну древле звере́й служением,/ к Богоче́стному погребе́нию,/ и исцелений Боже́ственное источе́ние,/ мучеников начальное избрание, Церкве утвержде́ние,/ молитвенниче о душах на́ших,/ Богоносне пребогате.

Сла́ва, глас 6:

Преподобне отче,/ во всю землю изыде веща́ние исправле́ний твои́х;/ тем на Небесе́х обрел еси́ мзду трудов твои́х,/ де́монския погубил еси́ полки́/ А́нгельския же пости́гл еси́ чины ,/ ихже житию непорочно подражал еси́,/ дерзновение имея ко Христу́ Бо́гу,/ мир испроси душам нашим.

И ны́не, Богоро́дичен или́ Крестобогоро́дичен.

Подо́бен: Тридневен:

Ви́дящи Тя распинаема, Христе́,/ Тебе́ Рождшая вопияше:/ что стра́нное еже вижу та́инство, Сы́не Мой?/ како на Древе умираеши, плотию пове́шен,/ Жизни Подателю?

На стиховне Окто́иха. Сла́ва, глас 5:

Преподобне отче,/ не дал еси́ сна твои́м очесе́м,/ ни ве́ждом твои́м дрема́ния,/ до́ндеже душу и тело от страстей свободи́л еси́/ и себе уготовал еси́ Ду́ха жили́ще;/ пришед бо Христос со Отцем, оби́телище в тебе́ сотвори́,/ и Единосу́щней Троице уго́дник был еси́,/ великопропове́дниче Евфимие, моли́ся о душах на́ших.

И ны́не, Богоро́дичен или́ Крестобогоро́дичен.

Подо́бен: Ра́дуйся:

А́гнца Своего́ А́гница/ иногда́ зрящи, к заколе́нию тща́щася,/ усердно последоваше, сия́ вопиющи Ему:/ ка́мо и́деши, Чадо Мое Сладчайшее, Христе́?/ чесо́ ра́ди скорое течение сие, Долготерпели́ве, тече́ши неле́ностно?/ Иисусе Возжеле́ннейший Безгрешне, Многомилостиве Го́споди,/ даждь Ми слово, Рабе́ Твое́й,/ Сы́не Мой Вселюбезнейший,/ не пре́зри, Щедре, молча́,/ Тя стра́нно Рождшую, Боже Всещедре,/ даруяй мирови велию ми́лость.

Тропа́рь, глас 8:

В тебе́, отче, известно спасеся, еже по о́бразу:/ прии́м бо крест, последовал еси́ Христу,/ и, действуя, учил еси́ презира́ти убо плоть, прехо́дит бо,/ прилежа́ти же о души́, ве́щи безсме́ртней;/ те́мже и со А́нгелы срадуется, преподо́бне Евфи́мие, дух твой.

Сла́ва, мученика, глас 4:

Воздержа́нием постничества и муче́ния кро́вию/ ты, стяжа́в венец неувяда́емый, священномучениче Лукиа́не,/ Антиохи́йская похвало́,/ о нас моли́ Христа́ Бога,/ творящих святу́ю па́мять твою́́.

И ны́не, Богоро́дичен.

НА У́ТРЕНИ

Канон Окто́иха един и святы́х два.

Кано́н преподо́бнаго, глас 2, егóже краегране́сие: Ра́дуйся, Боже́ственная монашествующих славо.

Песнь 1

Ирмо́с: Грядите, лю́дие, пои́м песнь Христу́ Бо́гу,/ разде́льшему море и наставльшему люди,/ яже изведе́ из рабо́ты еги́петския,/ я́ко просла́вися.

Ра́дуйся, источниче, кипящий струю спаси́тельную,/ от неяже почерпаем вси целебную благода́ть прегрешений,/ любо́вию приходящим тебе́, приснопамятне.

Святыню прие́м от Христа́ Бога, от утробы, славне,/ и явился еси́ избра́нный сосу́д,/ Ду́ха благода́ть всю прие́мый, о́тче Евфимие.

Да жизни причастник нетленныя яви́шися,/ временныя, о́тче премудре, небрегл еси́:/ и Бо́гу присту́пль, непрестанно мо́лиши спасти́ся всем нам.

Богоро́дичен: Глаголу мудрому Твоих усте́н после́дующе,/ радующеся, Пренепорочная, Тя ублажаем,/ бывшую нам вину неизреченнаго блаженства.

Ин кано́н мученика, глас 4, егóже краегране́сие: Твою́, Лукиане всеблаженне, пою славу.Творение Иосифово.

Песнь 1

Ирмо́с: Воспою Тебе́, Го́споди Боже мой,/ я́ко извел еси́ люди из рабо́ты еги́петския,/ покры́л же еси́ колесницы фараоновы и си́лу.

Мудростию, и благода́тию, и силою духовною, Лукиане, возсияв,/ просветил еси́ люди:/ и к познанию Христову, мучениче, наставил еси́.

Оружием благоверия тя защити́в,/ и́же немощь нашу Понесый я́ко благоутробен,/ непобедима соде́я тя, врагов, мучениче, боре́нием.

На высоту Небе́сную во глубину́ зловерия, страдальче,/ па́дших возвлекл еси́/ мре́жами Боже́ственных твои́х глагол, досточу́дне.

Богоро́дичен: Слово Присносущное Отчее/ словом, па́че вины и слова, без семене зачала еси́, Чи́стая,/ и родила еси́ в наше избавление.

Песнь 3

Ирмо́с: На камени мя веры утверди́в,/ разшири́л еси́ уста моя на враги моя./ Возвесели бо ся дух мой, внегда́ пети:/ несть свят, я́коже Бог наш,/ и несть пра́веден, па́че Тебе́, Го́споди.

Всесветлый показался еси́, Богомудре, столп,/ наставляя чи́ны монашествующих,/ облак же, осеня́ющь жребий Божий,/ ли́ца невидимых врагов помрачающь благода́тию Всецаря.

Стои́ши пред лицем твоего́ Владыки, неосла́бным мановением моляся/ избавитися стаду твое́му от рабо́ты тьмы, преподо́бне, и мучи́тельства страстей,/ и твои́х молитв послу́шает Бог.

Плоти твоея́ двиза́ния умертви́в крепким поще́нием, Богоглаго́льниче,/ был еси́ оби́телище Владыки./ Егóже умоли избавитися скорбей и страстей смущения к тебе́ прибегающим.

Богоро́дичен: Сви́ток Тя прови́де Исаия, в немже пло́тски Слово зна́менася,/ раздрав начерта́ние первозда́ннаго, еже преступлением подписа́,/ и подаде́ оставле́ние рабо́ты нам.

Ин

Ирмо́с: Лук сильных изнемо́же/ и немощству́ющии препоя́сашася силою;/ сего ра́ди утверди́ся в Го́споде се́рдце мое.

Дом доброде́телей све́тлостию, му́чениче,/ ду́шу Твою́ Бо́гу совершил еси́/ и и́дольския храмы молитвою твое́ю разори́л еси́.

Воспевал еси́, напа́стьми окружаем, муче́ниче,/ и мучений боле́зньми оскорбляем,/ таковых я́ко Благодетеля благи́х сподобльшаго тя.

Тело му́кам преда́в, мучениче,/ душу твою́́ небла́зненно соблю́л еси́:/ жертву непоро́чну Влады́це, тя сама́го, принесл еси́, всече́стне.

Богоро́дичен: От Девы Младенец ражда́ется, соде́тельствовавый ве́ки хоте́нием,/ Ю́же воспеваем я́ко Богоро́дицу и праведно ублажаем.

Конда́к мученика, глас 2.

Подо́бен: В моли́твах:

В поще́нии пе́рвее просиявшаго,/ и во страдании второ́е светя́ща,/ вси, я́ко свети́ло пресве́тлейшее,/ Лукиана песньми славно почти́м,/ молящаго непрестанно о всех нас.

Ин конда́к мученика, глас 4.

Подо́бен: Вознесы́йся:

Я́ко святитель благоче́стно пожи́в/ и священномуче́ния венец прия́т,/ и́дольския жертвы погасил еси́,/ до́брый пастырь Христову стаду бысть, премудре Лукиане./ Сего ради тя почитаем, песньми вопиюще:/ от бед избави нас при́сно моли́твами своими.

Седа́лен преподо́бнаго, глас 8.

Подо́бен: Прему́дрости:

Отре́кся пло́ти Христа́ ра́ди/ и духовный явився народоводи́тель,/ услышал еси́ словеса тайных учений;/ монахов же явился еси́ правило пра́вости/ и стра́сти вся крепко попра́л еси́./ Тем и демонов коварство до конца испепели́л еси́;/ к Нему́ зря всегда, Богоносе Евфимие,/ моли́ Христа́ Бо́га грехов оставле́ние дарова́ти/ чтущим любо́вию святу́ю па́мять твою́́.

Сла́ва, седа́лен мученика, глас то́йже:

Благодати словом верных умаща́я сердца́, мучениче Лукиане,/ страда́ти устро́ил еси́ и побеждати мучителя:/ и добре соверши́в течение Боже́ственное,/ и по конце славы мучеников сподо́бился еси́./ Тем сошедшеся, святое твое́ вси почитаем скончание,/ Спаса прославляюще:/ страстотерпче прехвальне,/ моли́ Христа́ Бо́га прегрешений оставле́ние подати/ чтущим любо́вию святу́ю па́мять твою́́.

И ны́не, Богоро́дичен:

Солнца о́блаче разумнаго,/ Божественнаго Света, свети́льниче златокова́нный, Нескве́рная, Небла́зная, Всенепоро́чная Влады́чице,/ омраче́нную душу мою ослепле́нием страстей,/ безстрастна зарею просвети́, молюся,/ и оскверне́нное мое се́рдце омы́й пото́ки умиления, покаяния же слезами/ и от тиме́ния мя очисти дел моих, да любо́вию зову Ти:/ Богоро́дице Приснодево, моли́ Христа́ Бо́га прегрешений оставле́ние подати ми,/ Тебе́ бо имею надежду, раб Твой.

Крестобогоро́дичен:

А́гнца, и Пастыря, и Избавителя/ А́гница зря́щи на Кресте, восклица́ше, плачущи,/ и, горько рыдающи, вопия́ше:/ мир убо радуется, прие́мляй Тобо́ю избавление,/ утро́ба же Моя гори́т, зрящи Твое́ распятие,/ еже терпи́ши за милосердие милости./ Долготерпели́ве Го́споди, милости бе́здно и источниче неисчерпа́емый,/ умилосердися и даруй согрешений оставление/ верою поющим Божественныя Страсти Твоя́.

Песнь 4

Ирмо́с: Пою́ Тя, слу́хом бо, Го́споди, услы́шах и ужасо́хся,/ до мене́ бо и́деши, мене ища заблу́ждшаго./ Тем многое Твое́ снизхожде́ние, еже на мя,/ прославляю, Многоми́лостиве.

Желание Боже́ственное тя распали́, разгре́яв твое́ сердце,/ и желанная пости́гл еси́ до конца, Богому́дре отче,/ оста́вль земных пристра́стие,/ единосе́льник Вышних быв служи́телей.

Ласка́ния сопру́жницы, преподо́бне, попра́л еси́ всеобра́зно;/ вни́де бо раче́ние Содетеля в тя, Богомудре, тепле,/ и соде́янных мрачная желания до конца отри́ну.

На па́жить чи́сту возгна́л еси́ воздержа́ния стадо твое́, отче,/ и ко источнику привел еси́ то́е нему́тному безстрастия,/ мысленныя зве́ри побеждая,/ еже и ны́не моли́твами твои́ми спаса́й.

Богоро́дичен: Се Тебе́ роди славят родов, я́коже прорекла еси́, Отроковице:/ Создателя бо была еси́ палата и Боже́ственный храм,/ в немже вселися Высочайший, плотию обложся,/ да спасет нас.

Ин

Ирмо́с: Седяй в сла́ве на Престо́ле Божества́,/ во о́блаце ле́гце,/ прии́де Иисус Пребоже́ственный/ нетле́нною дла́нию и спасе́ зовущия:/ сла́ва, Христе́, си́ле Твое́й.

Кре́пок на пре́лесть явился еси́, блаже́нне,/ и многим обучи́тель к Боже́ственным подвиго́м всегда́;/ терпением же мук некрепкую смирил еси́, мучениче, кре́пость гордаго.

Распросте́рт на древе, и реме́нием растяга́емь,/ и гладом и жа́ждею многовре́менно умуча́емь,/ и тонкими чрепи́нами настрека́емь,/ претерпе́л еси́, мучениче Христов достославне.

Закон Боже́ственный пропове́дан, беззако́ннующих обрати́л еси́/ и испи́ти усердно чашу мучения показа́л еси́;/ с нимиже в Божественныя дворы́ вселился еси́, насыща́яся древа жизни,/ всеприснопамятне.

Богоро́дичен: Из утробы Твоея́ возсия́в Боже́ственное Солнце,/ яже во тме многобожия, Отроковице, просвети́/ и в се́ни сме́ртней сущия осия́./ Емуже взываем: сла́ва, Христе́, си́ле Твое́й.

Песнь 5

Ирмо́с: Просвеще́ние во тьме лежа́щих,/ спасе́ние отчаянных, Христе́́ Спасе мой;/ к Тебе́ у́тренюю, Царю мира,/ просвети́ мя сиянием Твоим;/ иного бо, разве Тебе́, бога не знаю.

Весь Бо́гу прилежа́, отче,/ в пустынях мраз нощны́й претерпе́л еси́ до́блественне,/ и дневный нося́ вар;/ и был еси́ дом мудрости Бо́жия/ добродетельным сия́нием многообра́зно украшаем.

Юношески наступи́в на поще́ние,/ чревонеи́стовства зми́я не прие́м советника, отче,/ но а́лчбою, и моли́твами непреста́нными,/ и чистото́ю соедини́вся Бо́гу,/ причастник был еси́ сла́дости лучшия.

Добродетелей возше́д на о́блаки,/ скрижа́ли прия́л еси́, блаже́нне, напи́санныя рукою Божиею,/ и монашествующих множества научил еси́/ вещественных всех оша́ятися,/ возводя́ на го́ру Божественнаго позна́ния.

Богоро́дичен: Яви́лася еси́, Чи́стая, Богопра́отцу лествица небесе́ высоча́е,/ имущи Создателя седяща./ Из Тебе́ бо Бог, воплощся, показася и совокупи́ разстоя́щаяся пре́жде./ Тем Тя Богоро́дицу ве́рнии сла́вим.

Ин

Ирмо́с: Нечести́вии не у́зрят славы Твоея́, Христе́,/ но мы Тя, Единоро́дне,/ Отеческия славы сияние Божества́,/ от но́щи у́тренююще,/ воспеваем Тя, Человеколюбче.

Поже́г, преподо́бне, те́рние страстей по́том поще́ний,/ струя́ми погасил еси́ трудов твои́х/ нечестия пещь доблемы́сленне,/ всеблаженне.

Непрекло́нен, облага́ем частыми боле́зньми, пребыл еси́,/ к Бо́гу взирая, свя́те, спасти́ могущему,/ Емуже в ру́це преложил еси́ духа твоего, веселя́ся.

Удали́вшияся Бо́га обличал еси́ злове́рныя,/ и, долгими боле́зньми и лю́тыми, славне, окружаемь, Христу́ прибли́жился еси́,/ Егóже страсть изобрази́л еси́.

Богоро́дичен: По рождестве нетле́нна пребыла́ еси́, Чи́стая,/ и тления род человеческий, я́ко Бо́га Рождшая, свободи́ла еси́;/ сего ра́ди верою Тя православно ублажаем.

Песнь 6

Ирмо́с: Ко Господу от ки́та Ио́на возопи́:/ Ты мя возведи́ из глубины́ ада, молюся;/ да я́ко Изба́вителю, во гласе хвале́ния,/ и́стины же духом пожру́ Тебе́.

Пострека́емь Владычнею любовию,/ оставил еси́ вся чу́вственная/ и Тому последовал еси́,/ на ра́мена иго легкое взем мужески благоду́шия,/ тезоимените.

Нака́зан неизреченных знанию, блаже́нне,/ научил еси́ твое́ стадо Небе́сная му́дрствовати/ и страсте́й нашествия отгони́ твои́ми поуче́ньми.

Житие́ твое́ подобно Вышних сил, отче, бысть,/ дерзновение тебе́ даде́, еже держал еси́ всегда,/ страстей избавите твое́ стадо Христа́ умоли.

Богоро́дичен: Разумев твое́ неизреченное, Чи́стая, та́инство,/ го́ру приосене́нную Авваку́м Тя провозвести́́;/ из Тебе́ бо Соде́тель за милосердие вопло́щся,/ древнее отъят изрече́ние.

Ин

Ирмо́с: Пожру́ Ти со гла́сом хвале́ния, Го́споди,/ Церковь вопиет Ти,/ от бесо́вския кро́ве очи́щшися,/ ра́ди милости от ребр Твоих/ исте́кшею Кровию.

Немо́кренно мучений преше́л еси́ пучи́ну;/ Всесильною же десни́цею/ от глубины́ тело твое́ спасе́но бысть,/ лю́бящими тя, невре́дно, Богоблаженне, ви́димо.

От ки́това чрева Иону Изба́вивый тридне́вновавша,/ спасает и тя глубины́ морския,/ служа́щим морски́м звере́м,/ по днех три́десятих.

Любовию Христовою распаля́ем, славне,/ до смерти противоста́л еси́ мучи́телей, всемудре;/ сего ра́ди Царствия Небе́снаго сподо́бился еси́, веселяся.

Богоро́дичен: Чи́стую Тя Голубицу и Едину Нескве́рную/ Пречистое обре́те Слово/ и от Тебе́ родитися благоволи́, Пресвята́я Богомати,/ Всенепоро́чная Де́во.

Конда́к, глас 2:

Подобен: Вышних ища:

Волне́ний множества невла́жно преходя́,/ безплотныя враги́ струя́ми слез твои́х/ крепко погрузи́л еси́,/ Богому́дре Евфимие преподо́бне:/ и, чудес дар при́ем,/ исцеляеши страсти всякия,/ моли́ непрестанно о всех нас.

И́кос:

Отве́рзи моя уста, треблаженне,/ благоприя́тными твои́ми моли́твами предстоя́ Бо́гу, всеславне Евфимие:/ да воспою Боже́ственное твое́ житие́ и возглаголю досто́йно доброде́тели твоя́,/ яже на земли Христа́ ра́ди Бо́га совершил еси́ преподо́бно./ Столп бо явился еси́ и правило монахов светлейшее, равно ангельное стяжав житие́,/ в нехо́дная истинно всели́вся, моли́ непрестанно о всех нас.

Песнь 7

Ирмо́с: Купина́ в горе́ огненеопа́льная/ и росоно́сная пещь халде́йская,/ яве предписа́ Тя, Богоневесто;/ Боже́ственный бо Невеще́ственный/ в веще́ственней чреве Огнь неопа́льно прия́ла еси́./ Темже из Тебе́ Рождшемуся/ поем: благословен еси́, Боже отец на́ших.

Авраамский стяжа́в нрав, премудре,/ от земли твоея́ пресе́льник быв,/ и Бо́га узре́л еси́, обещава́юща ти воздаяние бога́тно./ Тем, веселяся, усердно пел еси́:/ благословен еси́, Боже отец на́ших.

Распаля́ем ду́хом, преподо́бне,/ ко́зни вра́жия разори́л еси́/ и побе́ды одоле́ния взял еси́,/ ору́жием огражде́н нас ра́ди пригвозди́вшагося на Кресте́ Влады́ки./ Тем, веселя́ся, усе́рдно пел еси́:/ благослове́н еси́, Бо́же оте́ц на́ших.

К горе́ моли́твы приступи́л еси́,/ и, вшед во о́блак Духа, Бо́жия за́дняя ви́дел еси́,/ и, сла́ву прие́м разсужде́ния, быв, о́тче, столп непоколеби́м./ Тем приле́жно моли́ изба́витися искуше́ния вра́жия пою́щим тя.

Богоро́дичен: Закона Исполнителя родила́ еси́,/ прежде век Го́спода всяческих,/ Сына, Мудрость же и Силу,/ напосле́док, Пречистая, преесте́ственно пло́тию на обновление земны́м./ Тем благоче́стно, Де́во Чи́стая,/ благословен, из Тебе́ Рождшемуся зовем, Боже отец на́ших.

Ин

Ирмо́с: Спасы́й во огни́ Авраа́мския Твоя́ о́троки,/ и халде́и уби́в,/ яже пра́вда праведно уловля́ше;/ препе́тый Го́споди,/ Боже отец на́ших, благословен еси́.

Стремле́ния глагол твои́х мудрых, му́чениче,/ гони́тель, не терпя́,/ умерщвляет тя,/ и во глубину́ морскую помета́ет,/ Го́рнее хода́тайствуя тебе́, я́ко недоумева́я, Царствие, доблему́дре,/ и Божественную славу.

Не поклони́вся истука́нным, колена же не поклони́в и́долом,/ во огнь вве́ржен скорбе́й, в пещь мучительную вшел еси́,/ орошаемь Духом, росода́тельною силою,/ Богому́дре мучениче.

Умерщвле́нныя и во глубине́ е́ллинскаго безбожия пожре́нныя люди,/ живоно́сными твои́ми словесы́ извле́кл еси́, песнопоя́, досточу́дне:/ препе́тый Го́споди, Боже отец на́ших, благословен еси́.

Богоро́дичен: Благословен Плод благослове́ннаго чрева Твоего́,/ Eгoже благословя́т Небесныя силы и земных собо́ри,/ нас Избавльшаго клятвы дре́вния, Благословенная.

Песнь 8

Ирмо́с: В пещь о́гненную, ко отроко́м евре́йским снизше́дшаго/ и пламень в ро́су прело́жшаго Бога,/ пойте дела́ я́ко Го́спода/ и превозноси́те во вся ве́ки.

Слез твои́х тече́ньми огнепа́льныя сласти испепели́л еси́,/ гее́нскаго пламене страх отгнал еси́, о́тче мудре,/ совершенною любо́вию Создателя твоего́ сраствори́вся страхом,/ во вся ве́ки.

Я́коже Ено́х к Бо́гу преста́влься, от Него прия́т был еси́, отче,/ и, с Вы́шними ли́ки водворя́яся, пое́ши:/ вся дела Го́спода пойте/ и превозносите во вся ве́ки.

Ны́не нетленных даро́в наслажда́яся и трисо́лнечныя све́тлости исполня́яся, блаже́нне,/ певцы́ твоя́ страсте́й и тьмы моли́твами изба́ви,/ да досто́йно Христа́ славословим.

Богоро́дичен: Клятву разреши́ла еси́ древнюю, Пречистая, земных,/ неизрече́нным словом Бо́га заче́нши,/ воплоще́нна из Тебе́ за милосердие, Пренепорочная Влады́чице./ Егóже превозносим во веки.

Ин

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда убо образу́емое,/ ны́не же де́йствуемое,/ вселенную всю воздвиза́ет пети Тебе́:/ Го́спода пойте дела/ и превозноси́те Его́ во вся ве́ки.

Гла́дом мысленным иста́явшия хлебом словес твои́х утверди́л еси́/ Единаго чествова́ти Го́спода, Хлеб жизни нашея, наказа́в, славне./ Емуже вси поим;/ Го́спода воспевайте дела/ и превозноси́те во вся ве́ки.

Попра́в лю́тая козноде́йства врага преле́стника страданием твои́м,/ взялся еси́ на пресла́вную высоту́, достославне,/ и А́нгельская достигл еси́ чи́ны, вопия́:/ Го́спода воспевайте дела/ и превозноси́те Его́ во вся ве́ки.

О, стра́нных веще́й соверши́вшихся на тебе́, Лукиане терпели́вейше;/ не́дро бо морское тело твое́ святое на дово́льно прие́мь, не вреди́ е,/ су́ши же предае́т це́ло,/ струи́ исцелений точа́ще любящим тя.

Богоро́дичен: И язы́ком, Де́во, и сердцем Чистую Богоро́дицу Тя пропове́даем,/ Го́спода бо родила еси́, плотию обложе́на и во дву естеству́ разумева́ема;/ Егóже вся силы Небесныя славосло́вят во вся ве́ки.

Песнь 9

Ирмо́с: От Бо́га Бо́га Сло́ва/ неизрече́нною му́дростию пришедшаго обнови́ти Адама,/ я́дию в тление па́дшаго лю́те,/ от Святы́я Девы неизрече́нно воплоти́вшагося нас ра́ди,/ ве́рнии единому́дренно песньми величаем.

Просвеще́н добро́тою постничества, отче,/ и оде́ян ризою нетления, Евфимие,/ и увязе́н венцем даров па́че ума,/ Влады́це всех предстои́ши, радуяся.

В пребыва́лища присноживу́щая вселился еси́, блаже́нне,/ иде́же апостол собор и множество му́ченик, преподобных собрание, пророков ли́цы,/ болезней воздаяния от Бо́га прием достойно,/ Богому́дре достославне.

Всесве́тел, Богоглаго́льниче, был еси́,/ заря́ми Света Трисолнечнаго све́тло озаряемь,/ испроси прегрешений разрешение,/ лю́тых избавление и злых отчуждение/ всем, любо́вию к тебе́ притекающим.

Богоро́дичен: Воплоти́вся неизрече́нно Владыка всех из Тебе́, Богороди́тельнице Марие,/ совершен бысть Человек,/ и, роди́вся, я́коже прежде рождества Де́ву сохрани Тя Чи́сту./ Eгoже моли́ спасти́ от бед души на́ша.

Ин

Ирмо́с: Ева убо неду́гом преслуша́ния/ клятву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови благословение процвела́ еси́;/ тем Тя вси величаем.

Све́тится, мудре, священная твоя́ память,/ зарями Ду́ха о́блак страстей разгоня́щи,/ просвещающи же верных собрания и пожига́ющи де́монская воинства;/ юже совершающия ны сохраняй.

Разреши́лся еси́ от телесных уз, блаже́нне,/ и к высоте́ небесней, радуяся, возлете́л еси́,/ и явился еси́ красе́н язв удобре́ньми Бо́гу Творцу;/ Емуже предстои́ши с мученики, веселяся.

Мученик нас Лукиан совокупи́/ похвалити того стра́сти днесь, и светлыя подвиги,/ и еже до конца доблесть, чудес же благода́ть обильную./ Сего вси согласно ублажаем.

Богоро́дичен: Мудрости вмести́лище, па́че ума лу́чшия, яви́лася еси́,/ Отроковице Чи́стая, одушевленный Престол же и дверь;/ тем Тя челове́честии собо́ри и А́нгельская славят вои́нства,/ Едина всех преиму́щая.

Свети́лен.

Подо́бен: Жены́ услышите:

Мирска́го пристра́стия я́ко тру́дна избе́гл еси́/ и неяде́нием плоть увяди́л еси́;/ обнови́в же душевную кре́пость, преподо́бне,/ и славою обогати́лся еси́ Небесною, приснопа́мятне./ Тем моля́ся не преста́й о нас ко Господу.

Сла́ва, и ны́не, Богоро́дичен:

Ужа́сно твое́ предстательство, Марие Богоукра́шенная,/ и стра́шная Твоя́ сла́ва всей земли, Богоро́дице;/ в Тебе́ бо ны́не хва́лимся и Тя Ходатаицу иму́ще к Сыну и Создателю Твое́му,/ неусыпною Твое́ю молитвою да спасемся вси.

На стиховне Окто́иха. Сла́ва, глас 2:

Преподобне отче,/ из младе́нства добродетель прилежно испра́вив,/ орга́н был еси́ Свята́го Духа;/ и от Того прие́м чудес де́йство,/ увеща́л еси́ человеки преоби́дети сла́дкая;/ ны́не же Боже́ственным светом чисте́е облиста́ем,/ просвети́ и на́ша помышления,/ о́тче Евфимие.

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

Дре́ву Кре́стному Тя, Иисусе,/ пригвождена, зрящи, Неискусобрачная,/ плачущи, глаго́лаше:/ Чадо Сладчайшее,/ почто́ оставил еси́ Мене, Рождшую Тя, еди́ну,/ Свете неприступный Пребезначальнаго Отца?/ Потщи́ся и просла́вися,/ я́ко да славу получа́т Божественную,/ и́же Божественныя Стра́сти Твоя́ славящии.

Преподобный Евфимий Новый, Солунский

Преподобномученик Лукиан, пресвитер Антиохийский

НА МА́ЛОЙ ВЕЧЕ́РНИ

Стихи́ры, глас 1.

Подо́бен: Прехвальнии мученицы:

Святителю о́тче Иоа́нне,/ твоя́ священная па́мять верных собрание весели́т,/ и с теплою верою взывати к тебе́ научает:/ Христа́ Бо́га моли́ дарова́ти душам нашим мир и велию ми́лость.

Святителю о́тче Иоа́нне,/ добрая исправле́ния жития твоего́ поминающих нас,/ и та хвалебно воспева́ющих не пре́зри, егда взываем ти:/ Христа́ моли́ дарова́ти душам нашим мир и велию ми́лость.

Святителю о́тче Иоа́нне,/ смирением стяжа́в высокая,/ и в Небесных вселя́яся обителех, приими́ наше усердное тебе́ чествова́ние,/ и Христа́ Бо́га умоли дарова́ти душам нашим мир и велию ми́лость.

Сла́ва, глас 8:

Образ благоче́стия в житии твое́м явил еси́ нам,/ по преставлении же источник исцеления в честны́х мощах твои́х открыл еси́ нам,/ преблаже́нне святите́лю Иоа́нне./ Темже житию твое́му подража́ти ревну́юще, молим тя:/ Христа́ Бо́га моли́ спасти́ души на́ша.

На стихо́вне стихи́ры, глас 4:

Презира́тель до́льних и рачи́тель го́рних,/ земный А́нгел и Небесный гражданин, Иоа́нне Богомудрый/ всех нас праздновати призывает спаси́тельный день к Бо́гу отше́ствия своего.

Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.

Божественнаго Ду́ха испо́лнен,/ Евангельски возлюбил еси́ люди своя,/ ми́лость и благоутробие всем скорбящим отверза́я,/ и нищим заступник бывая;/ тем молимся ти, о́тче Иоа́нне,/ моли́ Христа́ Бо́га спасти́ся душам нашим.

Стих: Свяще́нницы Твои́ облекутся в пра́вду/ и преподо́бнии Твои́ возра́дуются.

Преми́рнаго возжелав Живота́,/ житие́ благоче́стно на земли совершил еси́,/ егóже ра́ди и Града Небе́снаго гражданин соделался еси́;/ в нем же помяни, святите́лю Иоа́нне, и нас,/ совершающих па́мять твою́́.

Сла́ва, глас 6:

Человече Божий и верный слуго́ Го́сподень,/ сосу́де избра́нный и Царствия насле́дниче,/ не премолчи́ вопия за ны ко Господу.

И ны́не, Богоро́дичен: Богоро́дице, Ты еси́ лоза:

НА ВЕЛИ́ЦЕЙ ВЕЧЕ́РНИ

На Го́споди, воззвах, стихи́ры, глас 6:

Днесь светло красу́ется благоверный град Суждаль,/ торжественно совершающе па́мять твою́́, чудотворче святите́лю Иоа́нне;/ те́мже пречестну́ю твою́́ икону любе́зно лобызаем,/ и тя песненно восхваляем,/ ча́юще скорое спасе́ние улучи́ти твои́ми к Бо́гу моли́твами.

Евангельски Бо́га возлюбив,/ и Тому́ всячески доброде́тельми благоугодити возревнова́в,/ безконечныя Жизни сподо́бился еси́, блаже́нне./ Темже с Небе́сными ны́не веселя́ся, святите́лю Иоа́нне,/ моли́ся Спасу всех избавити нас от всякаго обстояния,/ верою совершающих присночестну́ю и святу́ю па́мять твою́́.

Смирен, незлобив, кро́ток,/ милостив и чист в житии твое́м был еси́, блаже́нне;/ те́мже сосу́д избра́н явился еси́ по достоянию,/ и великих дарований от Щедродавца Бо́га сподо́бился еси́,/ имиже и нас обогати́,/ па́мять Твою́ честно совершающих.

Днесь любо́вию сошедшеся духо́вная чада твоя́, святите́лю Иоа́нне,/ преславную па́мять Твою́ светло торжествуем;/ просиял бо еси́ я́ко солнце све́тло, светом твоего́ жития,/ и скорый нам помощник явился еси́,/ избавляя нас от бед и скорбей моли́твами твои́ми.

Сла́ва, глас 8:

Це́ркве Христовы был еси́ украше́ние, пречу́дне,/ учением и житием;/ ны́не же с Го́рними си́лами радостно ликуя/ и дерзновение стяжа́в ко Господу,/ Того прилежно моли́ спасти́ся душам нашим.

И ны́не, Богоро́дичен: Царь Небесный:

Та́же вход. Проки́мен дне. Паримии святительская.

При́тчей чте́ние (глава́ 3):

Па́мять пра́веднаго с похвала́́ми,/ и благослове́ние Господне на главе́ его./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея есть./ Долгота́ бо дней и лета живота́ в десни́це ея,/ в шу́йце же ея бога́тство и сла́ва./ От у́ст ея исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о чада!/ честна́я бо реку́,/ и блаже́н челове́к, и́же пути моя сохрани́т./ Исхо́ди бо мои́, исхо́ди живота,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим:/ я́ко аз прему́дрость устро́их,/ сове́т, и ра́зум, и смы́сл аз призвах./ Мой совет и утверждение,/ мой разум, моя же кре́пость./ Аз мене́ любящия люблю,/ и́щущий же мене́ обря́щут благода́ть./ Разуме́йте убо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки,/ честная бо реку́,/ и отве́рзу от усте́н правая,/ я́ко и́стине поучи́тся горта́нь мой,/ ме́рзски же предо мно́ю устны́ лжи́выя./ С пра́вдою вси глаго́лы уст мои́х,/ ничто́же в них стро́потно, ниже́ развраще́но./ Вся пра́ва суть разумева́ющим,/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ваша,/ и испо́лнитеся Духа.

Прему́дрости Соломо́новы чте́ние (глава́ 10):

Уста́ праведнаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавляе́т их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т,/ и во благи́х свои́х плод пра́вды обы́мет./ Свет пра́ведным всегда́,/ и от Го́спода обря́щут благода́ть и сла́ву./ Язы́к му́дрых до́брая све́сть,/ и в се́рдце их почи́ет му́дрость./ Лю́бит Господь преподобная сердца́,/ прия́тни же Ему́ вси́ непоро́чнии в пути́./ Му́дрость Господня просвеща́ет лице́ разу́мнаго./ Постига́ет бо жела́ющий ю, пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней, не утруди́тся,/ и бдя́й ея ра́ди, вско́ре без печа́ли бу́дет./ Я́ко досто́йных ея́ сама́ обхо́дит и́щущи,/и в стезя́х ея явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея,/ и возлюби́х ю, и поиска́х от ю́ности моея́,/ и взыска́х неве́сту привести́ себе́,/ я́ко все́х Влады́ка возлюби́ ю./ Таи́бница бо есть Бо́жия хи́трости,/ и обрета́тельница дел Его́./ Труды ея́, су́ть доброде́тели,/ целому́дрию же и ра́зуму та́ учи́т,/ пра́вде и му́жеству, и́хже потре́бив ничто́же есть в житии́ челове́ком./ Аще же и многоиску́сства жела́ет кто́, ве́сть дре́вняя/ и бы́ти хотящая разсмо́трит./ Све́сть извития слове́с и разреше́ния гада́ний,/ зна́мения и чудеса́ проразуме́ет/ и сбытия времен и лет./ И всем сове́тник есть благ,/ я́ко безсме́ртие есть в ней и благосла́вие во обще́нии словес ея́./ Сего́ ра́ди бесе́довах ко Господу, и помоли́хся Ему,/ и рех от всего́ се́рдца моего́:/ Боже отце́в и Го́споди ми́лости,/ сотвори́вый вся сло́вом Твоим и му́дростию Тво́ею устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде./ Да́ждь ми Твоим Престо́лом приседя́щую прему́дрость/ и не отлучи́ мене от о́трок Твоих,/ я́ко аз раб Твой и сын рабы́ни Твоея́./ Посли́ ю с Небес от свята́го жили́ща Твоего́́,/ и от Престо́ла Сла́вы Твоея́,/ да су́щи со мно́ю научи́т мя,/ что благоуго́дно есть пред Тобо́ю,/ и наста́вит мя в ра́зум,/ и сохрани́т мя в сла́ве сво́ей./ Помышле́ния бо сме́ртных вся боязлива/ и погреши́тельна умышле́ния их.

Прему́дрости Соломоновы чтение (глава́ 4):

Похваля́ему пра́веднику, возвеселя́тся лю́дие:/ безсме́ртие бо есть па́мять его́,/ я́ко от Го́спода познава́ется и от человек,/ и уго́дна Го́сподеви душа́ его./ Возлюби́те у́бо, о му́жие, му́дрость и поживете́:/ восхощи́те ея и нака́зани бу́дете./ Нача́ло бо ея любы́ и соблюде́ние зако́на./ Почти́те прему́дрость, да во ве́ки царствуете./ Возвещу́ вам и не скры́ю от вас таин Божиих,/ я́ко Той му́дрости На́ставник есть, и мудрых Испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость,/ есть бо в ней Дух Разу́мен и Свят,/ и сия́ние Све́та присносу́щнаго, и о́браз бла́гости Бо́жия./ Та́я дру́ги Бо́жия и проро́ки устроя́ет,/ благоле́пнейши же есть со́лнца и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та́я угожда́ющих ей от боле́зни изба́ви/ и наста́ви на стези́ пра́выя./ Даде́ им ра́зум име́ти свят,/ и сохрани́ я от ловя́щих, и по́двиг кре́пок подаде́ им./ Да разуме́ют вси, я́ко си́льнейши всего́ есть благоче́стие,/ и никогда́же премо́жет зло́ба му́дрости,/ ниже́ пре́йдет злыя облича́ющи суд./ Реко́ша же в себе́, помы́сливше непра́ведно:/ наси́льствуем пра́ведному, и не пощади́м преподо́бства его,/ ни усрами́мся седи́н ста́рости многоле́тны./ Бу́дет бо нам кре́пость зако́н/ и улови́м пра́веднаго,/ я́ко неуго́ден нам есть,/ и проти́вится дело́м на́шим, и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Божий,/ и о́трока Господня себе имену́ет./ Бысть нам на обличе́ние помышле́ний на́ших/ и тя́жек нам есть и ви́дим,/ я́ко неподо́бно иным житие́ его, и измене́ны стези́ его./ В поруга́ние вмени́хомся ему,/ и удаля́ется от путе́й на́ших, я́ко от нечисто́т,/ и блажи́т последняя праведных./ Уви́дим убо, а́ще словеса его́ и́стинна суть,/ иску́сим, яже сбыва́ются ему́./ Руга́нием и му́кою истяжем его,/ да разуме́ем кро́тость его и иску́сим беззлобство его,/ сме́ртию безобра́зною осу́дим его,/ бу́дет бо посеще́ние от слове́с его./ Сия́ помы́слиша и прельсти́шася, ослепи́ бо я зло́ба их,/ и не разуме́ша таин Божиих и не разсуди́ша,/ я́ко Ты еси́ Бог Еди́н, живота́ име́яй и сме́рти власть,/ и спаса́яй во вре́мя ско́рби, и избавля́яй от всякаго зла́./ Ще́др и Ми́лостив, и дая́й преподо́бным Свои́м благода́ть,/ и Сво́ею мы́шцею го́рдым противля́яйся.

На лити́и стихи́ры, глас 5:

Святителю Иоа́нне,/ пресла́вное житие́ твое́/ и учение, апостольскаго духа испо́лненное,/ благочестие теплое,/ кротость же и милосердие славным соде́яша тя на земли/ и Небе́снаго сподо́биша прославления;/ сего ра́ди почитаем тя/ и светоносную па́мять твою́́ празднуем благолепно.

Глас 4:

Иоа́нне пресла́вне, па́стырю наш до́брый,/ утеше́ние скорбя́щих и неду́жных врач,/ не отвраща́йся от нас,/ но моли́ся за ны, пою́щия тя.

Глас 5:

Житие́ соверши́в непоро́чно, о́тче Иоа́нне,/ и ны́не Престо́лу Госпо́дню предстоя́ со дерзнове́нием,/ ду́ши верных, приходя́щих ко свято́му твое́му гробу, просвеща́й,/ и проси у Го́спода дарова́ти нам велию ми́лость.

Сла́ва, глас 8:

Образ благоче́стия в житии́ твое́м яви́л еси́,/ по преставлении же, источник исцелений в честны́х мощах твои́х открыл еси́ нам,/ преблаже́нне святите́лю Иоа́нне./ Темже житию твое́му подража́ти ревну́юще, молим тя:/ моли́ Христа́ Бо́га спасти́ души наши.

И ны́не, Богоро́дичен: Безневестная Де́во:

На стихо́вне стихи́ры, глас 5:

Ра́дуйся, святите́лю Иоа́нне,/ свети́льниче многосве́тлый граду Суждалю,/ и всей стране Российстей похвало́ и утверждение;/ святу́ю па́мять твою́́ ны́не пра́зднующе,/ пречестну́ю ико́ну твою́́ любе́зно лобыза́ем,/ и оставления грехов просим получити, твои́ми к Бо́гу моли́твами.

Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.

Ра́дуйся, святите́лю Иоа́нне,/ красота́ церковная и благоче́стия образ!/ В незлобии и кротости,/ милосердии и чистоте́ житие́ твое́ скончав славно,/ на Небеса восте́кл еси́ радуяся;/ иде́же ликуя со А́нгелы в Свете невечернем,/ моли́ Христа́ Бога, мир ми́ру дарова́ти,/ и душам нашим велию ми́лость.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Ра́дуйся, му́дре Иоа́нне,/ святи́телей украше́ние, и́ноков похвала́,/ оби́димых защище́ние, си́рых отец,/ скорбя́щих утеше́ние!/ Светоно́сную па́мять твою́́ ны́не пра́зднующе, молимся тебе́:/ моли́ Христа́ Бо́га мир ми́ру дарова́ти/ и душам нашим велию ми́лость.

Сла́ва, глас 6:

Срадуйтеся ны́не благоверному гра́ду на́шему всяк град и страна;/ се бо наш предивный врач и заступник, Иоанн великоимени́тый,/ Небе́снаго врачества цельбы́ предлага́ет всем,/ душе́вное и теле́сное исцеле́ние подавая па́че естества:/ егóже приемлюще, сла́вим Христа́ Бо́га нашего,/ подающаго его ра́ди нам велию ми́лость.

И ны́не, Богоро́дичен: Творе́ц и Изба́витель:

Тропа́рь, глас 8:

Православия наста́вниче,/ благоче́стия учителю и чистоты́,/ Суждалю пресветлый свети́льниче,/ святителем Богодухновенное удобре́ние, Иоа́нне премудре,/ учением твои́м паству твою́́ просветил еси́;/ святите́лю блаже́нне, моли́ Христа́ Бо́га спасти́ся душам нашим.

Ин тропа́рь, глас 8:

Управляя Церковь Божию Соборную и Апостольскую,/ соблюдая заповеди Бо́жия,/ вельми́ до́бре упас стадо словесных овец;/ зломы́сленным церковником молитвою своею прозре́ти повеле́,/ и научи́, я́коже прежде святы́й Леонтий,/ поспе́шник спасению Русския земли, учитель Ростовский,/ пре́жде связа́ и паки благослови;/ тако святый епископ Суждальский,/ напа́стем, притекающим к тебе́, изба́вниче, чудотворче Иоа́нне,/ моли́ Христа́ Бо́га спасти́ся душам нашим.

НА У́ТРЕНИ

На Бог Госпо́дь: тропа́рь святому. Сла́ва, и ны́не, Богоро́дичен..

По первом стихосло́вии, седа́лен, глас 8:

Прему́дростию Сло́ва обогате́в,/ источил еси́ учения реки спаси́тельнаго,/ и тем благочестивых души напои́л еси́;/ па́лицею же Божественнаго разума упа́сл еси́ стадо твое́./ Темже, я́ко па́стыря и учителя вели́ка, восхваляем тя, Иоа́нне;/ моли́ Христа́ Бога, грехов оставле́ние подати/ чтущим святу́ю па́мять твою́́.

Сла́ва, и ны́не, Богоро́дичен:

О Пречу́дная Де́во Богоро́дице,/ Огнь Божества́ во чреве Твое́м прия́ла еси́,/ и я́ко Младенца млеко́м питала еси́ Зижди́теля и Го́спода./ Тем досто́йно сла́вим пречистое рождество Твое́, и согласно вопие́м Ти:/ моли́ Христа́ Бо́га грехов оставле́ние дарова́ти,/ воспева́ющим досто́йно славу Твою́.

По втором стихосло́вии, седа́лен, глас 5:

Плоды Богоразумия возде́лав труды своими, Иоа́нне блаже́нне,/ услышал еси́ словеса тайных учений,/ и́ноком же и миряном образ жития явился еси́/ и, стра́сти вся крепко поправ, ко Господу преставился еси́;/ Его́ же моли́ дарова́ти нам велию ми́лость.

Сла́ва, и ны́не, Богоро́дичен:

Жезл из ко́рене Иессеова/ возрасти́ла еси́, Де́во, Христа́ Бога;/ Егóже моли, Пречистая, с блаженным святителем Иоанном,/ дарова́ти спасе́ние душам нашим и велию ми́лость.

По полиеле́и, седа́лен, глас 4:

Постом и молитвою́, кротостию и смирением,/ терпением и благотворением Небе́сная обетова́ния улучи́л еси́, Иоа́нне святите́лю блаже́нне./ Тем твой святый и светоносный день верою совершающе, благоче́стно вопием:/ я́ко имея дерзновение ко Господу, моли́ спасти́ся нам.

Сла́ва, и ны́не, Богоро́дичен:

Обновила еси́, Пречистая,/ Боже́ственным рождеством Твоим растлевшее страстьми естество наше/ и всем путь к блаженному безстрастию и чистоте открыла еси́;/ те́мже вси по долгу Тя ублажаем, Де́во Преславная.

Степе́нна 4-го гла́са. Антифон 1. Проки́мен: Честна́ пред Го́сподем смерть преподо́бных Его́́. Стих: Что воздам Го́сподеви о всех, яже воздаде ми. Вся́кое дыха́ние: Ева́нгелие от Луки, зача́ло 24. По 50-м псалме, стихи́ра, глас 6: Днесь любо́вию сошедшеся: пи́сана на велицей вече́рни.

Канон Богоро́дицы с ирмо́сом, на 6, глас 8: Многими содержим напастьми: И святите́лю на 8, емуже краегране́сие: Тя, Богомудраго святителя, молебно пою.

Канон святите́лю, глас 6

Песнь 1

Ирмо́с: Яко по су́ху пешеше́ствовав Израиль,/ по бездне стопами,/ гонителя фараона/ ви́дя потопляема,/ Бо́гу победную песнь/ поим, вопияше.

Твою́ священную творящим память, святите́лю Иоа́нне,/ дарова́ти согрешений оставление, жития исправление и Небе́снаго Царствия наследие,/ не престай молити Христа́ Бога.

Я́ко отец милосерд к сирым был еси́,/ вдовиц же питатель, скорбящим утешитель, обидимым заступник,/ граду Суждалю пастырь и хранитель, святите́лю Иоа́нне./ Темже и ны́не прилежно моли́ся Влады́це Христу́ о чту́щих па́мять твою́́.

Божественным осия́емь светом/ и со А́нгелы ны́не на Небесех водворяяся,/ поминай верою чту́щих па́мять твою́́, святите́лю Иоа́нне приснопамятне.

Богоро́дичен: Око сердца моего устремляю к Тебе́, Чи́стая,/ не презри теплое к Тебе́ воздыхание,/ и буди ми покров и Помощница.

Песнь 3

Ирмо́с: Несть свят,/ я́коже Ты, Го́споди Боже мой,/ вознесы́й рог верных Твоих, Блаже,/ и утвердивый нас на камени/ исповедания Твоего́.

Горько стеня́ припа́даем ти, святите́лю, гре́шнии раби твои́:/ моли́ся о нас ко Христу́ Бо́гу помиловати рабы твоя́,/ да не хва́лится враг, ви́дя нас погибающих.

Образ Божий сохраняя невреди́мым, преподо́бне,/ чистотою и смиренномудрием украси́лся еси́,/ житие же нескверно и нрав ми́лостивен стяжа́л еси́, досточу́дне.

Мудростию и доброде́телию украси́в житие свое,/ великое дерзновение стяжа́л еси́ ко Господу;/ те́мже моли́твами твои́ми сохраняй град и люди от всякия беды́ и ну́жды.

Богоро́дичен: Умная вся чиноначалия превозшла́ еси́, Пречистая,/ я́ко Единаго от Пресвятыя Троицы родила́ еси́ нам Спаси́теля и Го́спода,/ Егóже моли, Приснодево, спасти́ся душам нашим.

Ин конда́к, глас 8:

Незаходимое солнце возсия́ днесь/ преславная па́мять твоя́, святите́лю Христов Иоа́нне,/ созывающе нас к похвале́нию Христа́ Бо́га нашего./ Темже, притекающе к тебе́, исцеления да́ры прие́млем/ моли́твами твои́ми.

Ин икос:

Преподобне и всеблаженне святите́лю Иоа́нне,/ поучи́вся во дни и нощи в заповедех Господних,/ и сподо́бился еси́ обрести́ ле́ствицу Небесную,/ еюже взы́де на высоту Горняго Иерусалима./ Небесный человече и земны́й А́нгеле,/ светило неугасаемое всея Руси,/ моли́ спасти́ся граду твое́му и людей любо́вию тя почитающим,/ моли́твами твои́ми.

Седа́лен, глас 1:

Прему́дростию Сло́ва обогате́в,/ источи́л еси́ учения реки живо́тны,/ и тем благочестивых души напои́л еси́,/ па́лицею же Божественнаго разума упа́сл еси́ стадо твое́;/ темже, я́ко па́стыря и учителя вели́ка, восхваляем тя, Иоа́нне, святите́лю блаже́нне./ Моли Христа́ Бо́га грехов оставле́ние дарова́ти/ чтущим святу́ю па́мять твою́́ .

Сла́ва, и ны́не, Богоро́дичен:

О Пречудная Де́во Богоро́дице,/ Огнь Божества́ во чреве Твое́м прия́ла еси́,/ и я́ко Младенца млеко́м питала еси́ Зиждителя и Го́спода./ Темже досто́йно сла́вим пречестное Рождество Твое́, и согласно вопие́м Ти:/ моли́ Христа́ Бога, согрешений оставле́ние дарова́ти воспева́ющим досто́йно славу Твою́.

Песнь 4

Ирмо́с: Христос моя сила,/ Бог и Господь,/ Честна́я Церковь/ Боголепно поет, взывающи,/ от смысла чиста о Го́споде празднующи.

Духом уныния одержимь,/ к тебе́ очи сердца моего возвожу́,/ Иоа́нне святите́лю,/ и вопию ти прилежно:/ моли́твами твои́ми спаси́ душу мою погибающую,/ и научи́ мя ко Христу́ взывати:/ сла́ва си́ле Твое́й, Го́споди.

Разсла́блен есмь волею,/ слепотству́ю же разумом;/ темже, святите́лю, моли́ся ко Христу,/ помиловати душу мою,/ злыми неду́гами си́ми люте уя́звленну.

Аз, я́ко кровоточивая,/ то́ки нечистых помышлений источаю непрестанно,/ я́ко хананея же, к тебе́ взываю:/ святите́лю, моли́твами твои́ми помози́ ми,/ и исцели неду́ги души моея,/ моляся ко Христу́ Человеколюбцу.

Богоро́дичен: Господа Милосердаго нам рождшая, Пречистая,/ не предаждь нас врагом нашим,/ на́ша Заступница и на́ша надеждо,/ но покрый нас ризою Своею.

Песнь 5

Ирмо́с: Божиим светом Твоим, Блаже,/ утренюющих Ти ду́ши любо́вию озари, молюся,/ Тя ве́дети, Слове Божий,/ Истиннаго Бога,/ от мрака греховнаго взывающа.

О тебе́ радуется и веселится град Суждаль, святите́лю Иоа́нне,/ веселится и радуется и храм Бо́жия Ма́тере,/ имея тя светильника великаго,/ на́шего па́стыря преизряднаго.

Светило неугаси́мое, преподо́бне, угодниче Христов всече́стне,/ Суждалю сла́ва и всея России похвала́;/ моли́ спасти́ся граду твое́му/ от вся́ких бед и скорбей.

Возсия́в, я́ко солнце, в стране нашей,/ люди твоя́ уче́нии твои́ми просветил еси́, блаже́нне;/ те́мже тя почитаем я́ко Божественнаго наставника/ и Богомудраго учителя.

Богоро́дичен: Я́ко грешнейший всех,/ на Небо взирати не смея, к Тебе́ прибегаю и вопию:/ Ма́ти Бо́жия Пречистая, умилосердися на мя/ и избави мя вечнаго осуждения.

Песнь 6

Ирмо́с: Житейское море,/ воздвигаемое зря напа́стей бурею,/ к тихому пристанищу Твое́му притек, вопию́ Ти:/ возведи́ от тли живот мой,/ Многомилостиве.

Тя иму́ще те́пла заступника раби твои́,/ да не будем посра́млени от наветов вражиих,/ но да побеждаем их,/ моли́твами твои́ми укрепляеми.

Избави от внезапныя смерти люди твоя́, блаже́нне Иоа́нне,/ страсти угаси́, бе́ды отврати,/ и всякую скорбь и лишение отжени́/ моли́твами твои́ми.

Терпение твердое, и благодушие невозмуще́нное/ явил еси́, блаже́нне Иоа́нне,/ клеветою и зло́бою изгна́н быв из града;/ яже отврати́ от нас моли́твами твои́ми,/ да радостно воспеваем тя.

Богоро́дичен: Едино предстательство верных,/ и обуреваемых оти́шие, Де́во Богоро́дице,/ страстей моих непостоянную бурю утиши́,/ и из бездны греховной исхити́ мя,/ моли́твами Твоими, Пречистая.

Конда́к, глас 8:

Богомудрым учением и святым житием,/ я́ко светильник, сиял еси́ в Церкви Божией;/ те́мже Божественнаго заступления сподо́бился еси́,/ внегда осле́пнути очесе́м злоумышленных клеветнико́в твои́х,/ ихже прозре́ти сотвори́в молитвою твое́ю,/ вспять возвратился еси́ во град твой,/ и добре упа́сл еси́ стадо словесных овец;/ ихже ча́дом помогай и нам, моли́твами твои́ми,/ святите́лю Христов Иоа́нне.

И́кос:

Преподобне всеблаженне святите́лю Иоа́нне,/ кто, слыша мудрыя речи твоя́, не умили́ся от сладости словес твои́х;/ или кто, зря светоле́пное лице твое́, благоговения не испо́лнися;/ или кто, видя святое житие́ твое́, не покаялся;/ или кто, сребролюби́в сый, видя нищету твою́́, Христа́ ради обнищати не возжела́;/ или кто, гордостию превознося́ся, видя смирение твое́, нищ духом не соделася;/ или кто, гневлив и напра́слив сый, ти́хостию нрава твоего́ на кротость не преложи́ся;/ те́мже священную па́мять твою́́ пра́зднующе, молимся тебе́:/ заповеди Бо́жия исполнити нам помоги,/и в Царствие вечное приведи моли́твами твои́ми.

Песнь 7

Ирмо́с: Росодательну убо пещь/ содела А́нгел/ преподобным отроко́м,/ халдеи же опаляющее веление Божие мучителя увеща вопити:/ благословен еси́, Боже отец на́ших.

Любовию влеко́ми, взываем ти, святите́лю Христов:/ буди нам скорый помощник,/ избави нас от всякаго зла, и от вся́ких бед соблюди́.

Я́ко скоропослушнаго предстателя нашего/ молим тя, святите́лю Христов,/ от всякия бра́ни страсте́й, востания плоти/ и всех наветов вражеских свободи нас, вопиющих ти:/ радуйся, о́тче треблаженне.

Моли, святите́лю Иоа́нне,/ от бед избавитися, любо́вию тя почитающим,/ и научи вопити:/ благословен Бог отец на́ших.

Богоро́дичен: Ограждение напа́ствуемых, утеше́ние скорбя́щих,/ спасе́ние бедствующих, Богоро́дице всехва́льная,/ моли́ Сы́на Твоего́́ и Бога, изба́витися нам от бед и зол.

Песнь 8

Ирмо́с: Из пламене преподобным ро́су источи́л еси́,/ и праведнаго жертву водою попали́л еси́;/ вся бо твори́ши, Христе́, то́кмо еже хотети./ Тя превозносим во вся ве́ки.

Людем твои́м, прибегающим к покрову твое́му, Иоа́нне всехвальне,/ моли́ спасти́ся от искушений моли́твами твои́ми.

Еже ко Господу восхождение в се́рдце твое́м полага́я, о душе́,/ возопи́й к Человеколюбцу:/ Спасе, помилуй мя окаяннаго,/ моли́твами святителя Твоего́.

Боюся Суда Стра́шнаго и огня геенскаго;/ но виждь сокрушение сердца моего, святите́лю,/ и испроси мне прощение безмерных моих прегрешений.

Богоро́дичен: Нощь греховная покры́ла мя есть:/ но озари мя, Человеколюбче, моли́твами Пречистыя Твоея́ Матере,/ и спаси́ мя.

Песнь 9

Ирмо́с: Бога/ человеком невозможно ви́дети,/ на Него́же не смеют чи́ни А́нгельстии взирати;/ Тобо́ю бо, Всечистая, явися человеком/ Слово Воплоще́нно,/ Eгoже величающе,/ с Небе́сными во́и/ Тя ублажаем.

Отцу, и Сыну, и Святому Духу/ до́бре послужи́в во плоти, святите́лю Иоа́нне,/ Пресу́щныя Троицы предстояти Престо́лу с Безплотными сподо́бился еси́;/ иде́же Христа́ Бо́га моли, просветити души на́ша омраче́нныя.

Поем твою́́ священную память, святите́лю Иоа́нне,/ и, благонаде́жно к тебе́ прибегая, вопием:/ спаси́ нас заступлением твои́м.

О пречу́дный святите́лю Христов Иоа́нне,/ святительским житием украси́лся еси́;/ и ны́не на Небесех всели́лся еси́,/ идеже ликуют А́нгели, светом Боже́ственным осиява́еми.

Богоро́дичен: Юже иногда Иаков ви́де чу́дную лествицу, от земли просте́рту к Небесной высоте́,/ исповедуем Тя, Пречистая Богоро́дице:/ Тобо́ю бо Небе́сная земным, и земная Небе́сным совокупи́шася.

Свети́лен, глас 2:

На Небесех ны́не со А́нгелы водворя́яся,/ во свете Присносу́щныя Троицы, святите́лю о́тче Иоа́нне,/ о нас моли́ся Человеколюбцу Бо́гу,/ сохрани́тися нам от сети лукаваго.

Сла́ва, и ны́не, Богоро́дичен:

Сподо́би, нас, Пречистая,/ Твоими моли́твами избавитися от всех напа́стей,/ я́ко к Тебе́ прибега́ем, и ангельски вопие́м Ти:/ радуйся, Богоблагода́тная Пречистая.

На хвалитех стихи́ры, глас 1, пи́саны на ма́лой вече́рни. Сла́ва, глас 8: Образ благоче́стия; пи́сан на ма́лой вече́рни.

НА ЛИТУРГИ́И

Блаженны от кано́на, песни 3 и 6. Проки́мен, Апостол святите́лю общий, зача́ло 318. Ева́нгелие от Иоанна, зача́ло 36. Причастен: В па́мять вечную будет праведник, от слуха зла не убоится.

Молитва святите́лю Христову Иоанну, епископу Су́ждальскому, чудотворцу

О святый великий архиере́ю Божий Иоа́нне чудотво́рче, угодниче Христов и заступниче нам теплый, граду Суждалю и всей Российстей стране похвало и утверждение, церковная красота́, сирым отец, вдовам теплый заступник, скорбящим утеше́ние, болящим исцеле́ние, Православию наставник, благочестию учитель и чистоте́, за́поведей апостольских и отеческих верный хранитель, ста́да словесных овец бо́дренный блюсти́тель, и всем христолюбивым людем скорый предстатель! Помилуй нас, и услыши в час сей моление наше, и помяни нас у Престола Владыки Христа́ Царя, и помоли́ся о нас, я́ко да избавит нас от всех бед, и зол, и от всякия неправды, души на́ша да очистит от всякия скверны греховныя, ум да просвети́т ве́дением суде́б Своих, се́рдце же да утвердит во вся́кой доброде́тели, и тако сотворит нас наследниками Царствия Своего́ Небе́снаго; я́ко да твои́м заступлением и помощию спаса́еми, славу, хвалу, благодарение и поклонение возсылаем Отцу, и Сыну, и Святому Духу, ны́не и присно, и во веки веков. Аминь.

Святитель Иоанн, епископ Суздальский

Тропа́рь, глас 4:

Подо́бен: Вознесыйся на Крест:

И нравом причастник, и престолом наместник апо́столом быв,/ дея́ние обрел еси́, Богодухнове́нне, в видения восхо́д./ Сего ради, Сло́во Истины исправляя,/ и веры ради пострадал еси́ даже до крове,/ священному́чениче Лукиа́не,/ моли́ Христа́ Бо́га спасти́ся душа́м нашим.

Конда́к, глас 4:

Во священстве и иночестве благоче́стно пожи́в/ и мучения путь проше́д,/ мучителя и бесовская полчища посрами́л еси́,/ темже, почита́юще тя, тако вопие́м ти:/ от бед избави ны при́сно твои́ми мольбами, о́тче наш Лукиане.

Священномученик Лукиан