18-й день

И́же во святы́х отца́ на́шего Льва, Па́пы Ри́мскаго

Святитель Лев I, Великий, папа Римский (†461)

Преподо́бнаго отца нашего Космы́ игу́мена, иже на Яхрени реце́

Преподобный Косма Яхромский

На Го́споди, воззва́х: стихи́ры, глас 8.

Подо́бен: Что вас нарече́м:

Что́ тя имену́ем, Богодохнове́нне?/ главу́ ли правосла́вныя Це́ркве Христо́вы/ о́ко ли благоче́стия,/ зре́ти явле́нно се́рдцем ра́зум духо́вный,/ всем источа́ющий конце́м сло́во жи́зни,/ Богоначерта́нный сви́ток ве́ры пра́выя?/ Моли́ спасти́ся душа́м на́шим.

Что тя ны́не пронареку́, чу́дне?/ пропове́дника ли и́стины и основа́ние тве́рдо?/ старе́йшину верхо́внаго собо́ра честна́го,/ пра́вило уче́ний изве́стно/ и ме́рило иму́ще исправле́ние,/ Несто́риево разделе́ние и Евти́хиево слия́ние отсека́юща/ Богоплете́нными явле́ньми.

Что тя ны́не нареку́, ди́вне?/ нача́льника ли и царя́ теле́сных страсте́й,/ душе́вное влады́чество направля́юща светло́?/ Боже́ственнаго ми́лования сосу́д,/ любве соверше́нныя жили́ще?/ человеколюбе́зна согреша́ющим, обраще́ния ожида́юща?/ Моли́ спасти́ся душа́м на́шим.

Сла́ва, и ны́не, Богоро́дичен.

Подо́бен то́йже:

Кому́ уподо́билася еси́, окая́нная душе́,/ к пока́янию ника́коже возни́чущи/ и огня́ не ужаса́ющися, злых ожида́ющаго?/ Воста́ни, и еди́ну к заступле́нию ско́рую призови́, и возопи́й:/ Де́во Ма́ти,/ моли́ Твоего́ Сы́на и Бо́га на́шего/ изба́вити мя от се́ти льсти́ваго.

Крестобогоро́дичен.

Подо́бен то́йже:

А́гница А́гнца я́ко ви́де,/ на Дре́ве просте́рта во́лею Крестнем,/ вопия́ше ма́терски и боле́знующи с пла́чем:/ Сы́не Мой, что стра́нное сие́ виде́ние?/ всем живо́т даяй я́ко Госпо́дь,/ ка́ко умерщвля́ешися, Долготерпели́ве,/ земны́м подая́ воскресе́ние?/ Сла́влю Твое́ мно́гое, Бо́же мой, снизхожде́ние.

Тропа́рь, глас 8:

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче, архиере́ев Богодухнове́нное удобре́ние,/ Льве прему́дре,/ уче́ньми твои́ми вся просвети́л еси́, цевни́це духо́вная./ Моли́ Христа́ Бо́га спасти́ся душа́м на́шим.

Кано́н, его́же краегране́сие: Всему́дрому Льву пе́сни плету́. Творе́ние Феофа́ново. Глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.

Свяще́нства пома́занием, всеблаже́нне, удобре́н,/ укра́сил еси́ сие́ доброде́тельными ви́ды, пребога́те.

Я́коже зрел грозд, о́тче, изгне́л еси́ ра́зум,/ весе́лия крати́р, треблаже́нне, прему́дрости твое́й всем предложи́л еси́.

Петра́ верхо́внаго престо́ла насле́дник был еси́,/ того́ име́я нрав и ре́вность, Богому́дре, ве́ры.

Богоро́дичен: Зако́на преступле́нием осуждена́ первозда́ннаго,/ Спа́са ро́ждши, Богома́ти Чи́стая, свободи́ла еси́.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́нии кра́ю, ве́рных утвержде́ние,/ Еди́не Человеколю́бче.

Столп правосла́вия Христо́вы Це́ркве, всему́дре Льве, усе́рдно нося́, возста́вил еси́,/ его́же держа́нии, еретико́в безбо́жныя разруша́ет полки́ и собо́рища.

Небе́сныя и Боже́ственныя насы́тився благода́ти,/ церко́вныя до́гматы, о́тче, предложи́л еси́,/ со все́ми бо́рбствуя ерети́ческими языкобо́лии,/ благоче́стия побо́рниче, Льве пребога́те.

Све́том пресветле́йшим озари́вся, преподо́бне,/ неизглаго́ланнаго и Боже́ственнаго вочелове́чения,/ Сло́во уясни́л еси́,/ сугу́бо, рек, существо́ и сугу́бо де́йство вопло́щшагося Бо́га.

Богоро́дичен: Украси́лася еси́, я́ко неве́ста, де́вственными добро́тами,/ обра́дованная Де́во Ма́ти Неневе́стная,/ вся́кия бо тва́ри Ты превознесла́ся еси́ мно́жае,/ я́ко всех вино́вное Сло́во ро́ждшая.

Седа́лен, глас 3.

Подо́бен: Боже́ственныя ве́ры:

Уста́вил еси́ дерзнове́ния,/ де́лы уве́рил еси́ правосла́вия,/ я́ко упова́, я́ко лев, пра́ведный;/ и́стины пропове́даеши уче́ния/ и облича́вши преле́сти сокрове́ния,/ о́тче преподо́бне, Христа́ Бо́га моли́/ дарова́ти нам ве́лию ми́лость.

Сла́ва, и ны́не, Богоро́дичен:

Боже́ственнаго естества́ не отлу́чься,/ плоть быв во чре́ве Твое́м,/ но Бог вочелове́чься и пребы́сть,/ и́же по Рождестве́ Ма́терь Тя Де́ву,/ я́ко пре́жде Рождества́, сохрани́в Всенепоро́чну, Е́дин Госпо́дь,/ Того́ приле́жно моли́ дарова́ти нам ве́лию ми́лость.

Крестобогоро́дичен:

Нескве́рная А́гница,/ Сло́ва нетле́нная Де́ва Ма́ти,/ на Кресте́ зря́щи пове́шена, из Ней без боле́зни прозя́бшаго,/ ма́терски подо́бно, рыда́ющи, вопия́ше:/ увы́ Мне, Ча́до Мое́,/ ка́ко стра́ждеши во́лею,/ хотя́ изба́вити от страсте́й безче́стия челове́ка?

Песнь 4

Ирмо́с: Из горы́ приосене́нныя, Сло́ве, проро́к,/ Еди́ныя Богоро́дицы,/ хотя́ща воплоти́тися Богови́дно усмотри́/ и со стра́хом славосло́вяше си́лу Твою́.

Лев ты я́ко и́стинно, преблаже́нне, яви́лся еси́,/ смуща́ющия ли́сы отгоня́, ца́рским ры́канием ужа́сая нечести́вых умышле́ния.

Скрыл еси́ приложе́нием твои́х до́гматов богоме́рзких е́ресей следы́,/ сокрове́нную и́стину взыска́в, священнотаи́нниче всече́стне.

У́тро от за́пада возсия́л еси́, треблаже́нне,/ сви́ток благочести́вых до́гматов,/ я́ко лучи́, Це́ркве, Богому́дре, испуща́я и озаря́я ду́ши на́ша.

Богоро́дичен: Умертви́ стремле́ния, Де́во, страсте́й мои́х,/ уста́ви, Блага́я, молву́ прегреше́ний,/ грехо́вную бу́рю Твое́ю тишино́ю, Богороди́тельнице, потребляющи.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Сугу́бому де́йству пропове́дник был еси́ Спа́са Христа́:/ де́йствовати бо, рекл еси́, в ко́емждо естестве́, я́коже имя́ше,/ со обои́м слежа́щим обще́нием, святи́телю Богому́дре блаже́нне.

Равномо́щно су́що Ро́ждшему Сло́во позна́л еси́,/ я́коже плоть Сего́ бы́вша, треблаже́нне, уве́рил еси́,/ прили́чно, рекл еси́, плотска́я сво́йства де́яти,/ несли́тно непревра́тно обо́я.

Богоро́дичен: Е́же пре́жде всех век, Еди́ному ве́домо Бо́гу та́инство/ челове́ка бы́ти вся́ческих Влады́ку и Го́спода и с пло́тию смеси́тися кро́ме преложе́ния, из Тебе́, Де́во, яви́ся, прехожде́ние прие́м.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Петра́ честна́го прее́мник, и сего́ нача́льством обогати́вся,/ и теплу́ стяжа́в ре́вность, Богодви́жимый сви́ток написа́л еси́,/ ерети́ческое веле́ние отмета́я смуще́нное, растворе́ние несме́сно соединя́я.

Сы́на Еди́наго, Христа́ и Го́спода, пре́жде век от Отца́ рождена́,/ и нас ра́ди от Де́вы ро́ждшагося, и я́вльшася нам Единосу́щна, пропове́дал еси́ преесте́ственно,/ служи́телю неизглаго́ланных, Богоприя́тне.

Богоро́дичен: Тя, Всечи́стая, спасе́ния Хода́таицу, ве́рнии, испове́дающе, вопие́м:/ ра́дуйся, Чи́стая,/ ра́дуйся, Неве́сто Де́во,/ ра́дуйся, горо́ Бо́жия присе́нная,/ ми́ру бо Ты ра́дость присносу́щную источи́ла еси́.

Конда́к, глас 3.

Подо́бен: Де́ва днесь:

На престо́ле, сла́вне, свяще́нства сед/ и львов уста́ слове́сных загради́в,/ до́гматы Богодухнове́нными Честны́я Тро́ицы озари́л еси́ свет Богоразу́мия твоему́ ста́ду./ Сего́ ра́ди просла́вился еси́/ я́ко Боже́ственный таи́нник Бо́жия бла́годати.

И́кос:

Отца́, и Сы́на, и Ду́ха Свята́го/ Трисо́лнечный Свет,/ Трисвяту́ю Си́лу,/ Божество́ Еди́но и Еди́но Существо́,/ Сию́ пропове́дав, уста́ льсти́вая до конца́ загради́л еси́ ерети́чествующих,/ Льве Богому́дре./ Те́мже Чи́стую Богороди́тельницу я́ко Богоро́дицу испове́дав,/ Несто́риево безу́мие и буесло́вие низложи́л еси́,/ сего́ ра́ди позна́лся еси́ в ми́ре и в Ри́ме/ я́ко Боже́ственный таи́нник Бо́жия благода́ти.

Песнь 7

Ирмо́с: О́троцы евре́йстии в пещи́ / попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Сна не дал еси́ ве́ждома,/ дóндеже из ко́рене исто́ргл еси́ лесть Евти́ха обезу́мившагося, зовы́й:/ благослове́н еси́, Го́споди Бо́же, во ве́ки.

Еди́ну Ипоста́сь во двою́ существу́, Христа́ испове́дав,/ де́йствующа сугу́бо и хотя́ща, ны́не пое́ши:/ благослове́н еси́, Го́споди Бо́же, во ве́ки.

Богоро́дичен: Ны́не к Тебе́ прибега́ю, Богома́ти,/ прегреше́ний плени́цами стя́гнут, за милосе́рдие ми́лости изба́ви мя, вопию́ща:/ благослове́н, Пречи́стая, Плод Твоего́ чре́ва.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Всесве́тел, я́ко со́лнце, от за́пада возсия́л еси́, чу́до, Богоглаго́ливе, я́ве пресла́вно,/ смеше́ние и слия́ние Евти́хиево изсуши́в я́ве и Несто́риево разделе́ние пресека́я,/ уча́ Еди́наго чествова́ти Христа́ во двою́ существу́/ неразде́льно, непревра́тно, неслия́нно.

От Бо́га дви́жим, благоче́стия уче́ния,/ я́ко на Богочерта́нных скрижа́лех вообрази́л еси́,/ я́коже Моисе́й вторы́й, яви́вся Боже́ственным лю́дем/ и собо́ру честны́х учи́телей, зовы́й:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Воплоще́ннаго, преподо́бне, пре́жде безпло́тнаго, позна́л еси́,/ Сло́ва О́тча Единоро́днаго и Собезнача́льнаго, в ле́то безле́тнаго,/ опи́сана у́бо пло́тию, я́ко Творца́ же описа́ния не веду́ща, учи́ши, взыва́я:/ свяще́ннии, воспо́йте, лю́дие, и превозноси́те Его́ во ве́ки.

Богоро́дичен: Обложе́нием телесе́ обложи́ся, Пречи́стая, от Твои́х крове́й,/ свети́л добро́тами, со́лнцем и луно́ю не́бо просвети́вый Бог,/ одушевле́нное Тя друго́е Не́бо показа́в,/ Его́же о́троцы благословя́т, свяще́нницы воспева́ют,/ лю́дие превозно́сят во вся ве́ки.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Сия́еши ны́не, таи́нниче Христо́в, благоле́пия венце́м укра́шен/ и, я́ко ве́рен святи́тель, пра́вдою вои́стинну оде́ялся еси́/ и, в рай сла́дости лику́я, чу́дне,/ о па́стве твое́й Влады́ку приле́жно умоли́.

Иде́же ны́не патриа́рхов председа́ния же, и престо́ли, и чини́,/ Льве всеблаже́нне, ты досто́йно, о́тче, всели́лся еси́,/ я́ко патриа́рх и́стинен, и 4 ве́рою и благода́тию осияемъ./ Те́мже вси тя при́сно блажи́м.

От бу́ри жите́йския отступи́в, ко Христу́ прише́л еси́,/ Льве всеизря́днейше,/ на ме́сте зла́чнем почива́я,/ иде́же пото́к сла́дости, и Свет Невече́рний,/ и несказа́нное весе́лие, и ра́дость пребыва́ющая.

Богоро́дичен: Зре́лу пожина́ю жизнь, невреди́му дре́вом ра́зума:/ Ты бо, Всенепоро́чная, жи́зни дре́во – Христа́ процвела́ еси́,/ вхо́ды жи́зни всем сказа́вши./ Тем Тя, Всечи́стая, Богоро́дицу, ве́рнии, велича́ем.

Свети́лен.

Подо́бен: Не́бо звезда́ми:

Святи́телей сла́ва и ве́рных защи́тник,/ ты яви́лся еси́, Богому́дре о́тче, и столп доброде́телей./ Те́мже помина́й всегда́ воспева́ющия тя любо́вию.

Богоро́дичен: Тя Предста́тельницу вси иму́ще гре́шнии, о Пресвята́я Де́во!/ Ты благопремени́тельна нам сотвори́ Сы́на Твоего́/ Ма́терними Твои́ми моли́твами.

Святитель Лев I, Великий, папа Римский (†461) родился в Италии в христианской благочестивой семье. Отца его звали Квинтианом. Святитель Лев получил прекрасное воспитание и светское образование. Но, стремясь к духовной жизни, предпочел миру служение Церкви и стал архидиаконом при святом папе Сиксте III (432–440). По смерти последнего святитель Лев за чистоту и целомудрие своей жизни был единодушно избран в сентябре 440 года первосвятителем Римской Церкви. Это было трудное время, когда еретики осаждали твердыню Православия своими соблазнительными лжеучениями. В святителе Льве пастырская мягкость и доброта соединялись с несокрушимой твердостью в вопросах вероисповедания. Ему дано было Господом стать защитником Православия против ереси Евтихия и Диоскора, учивших об одном естестве в Господе нашем Иисусе Христе, и ереси Нестория. Узнав об еретическом «разбойничьем» соборе в Ефесе (449), во время которого пострадал святой Патриарх Царьградский Флавиан (память 19 февраля), святитель Лев обращался с посланиями к императорам Феодосию II (408–450) и Маркиану (450–451) о созыве IV Вселенского Собора для осуждения ереси монофизитов. Собор этот состоялся в Халкидоне в 451 году. На нем присутствовало 630 епископов и происходили прения, во время которых (на Соборе) было оглашено послание святителя Льва I к тогда уже почившему святителю Флавиану о двух естествах Господа нашего Иисуса Христа. По преданию, написав послание, святитель Лев положил его в гробницу святого первоверховного апостола Петра и обратился к нему со словами: «Если я, как человек, в чем-то согрубил и не достиг, то ты, кому Самим Господом нашим поручен Престол сей и Церковь, – помоги и исправи». По истечении сорока дней, проведенных святителем Львом в молитве и посте, к нему явился святой апостол Петр и сказал: «Прочел и исправил». Святитель Лев поспешил к гробнице и нашел в ней свое послание с исправлениями, сделанными апостольской рукой. По прочтении на IV Вселенском Соборе этого послания все присутствовавшие там епископы согласно воскликнули: «Это вера отеческая! Все так веруем! Петр через Льва так вещает! Анафема тому, кто так не верует!.. Почему это не было читано в Ефесе? Это Диоскор скрыл!».

После этого еретики Евтихий и Диоскор были осуждены и отлучены от Церкви, а послание святителя Льва вошло в основу Православного учения о Церкви.

Святитель Лев был также и защитником своего отечества. Как добрый пастырь, он был готов положить душу за овец своих. Когда в Италию вторгся предводитель гуннов Аттила со своими войсками, огнем и мечом опустошавший другие страны, святитель Лев со слезами просил Господа и апостолов Петра и Павла помочь своей пастве. Одетый в полное архиерейское облачение, он сам пошел к Аттиле и обратился к нему со словами увещания. Светлый облик святителя и его кроткие слова привели жестокого воина в ужас и трепет, он внял увещанию святителя Льва и покинул Италию. На вопросы приближенных, почему он убоялся вышедшего к нему безоружного человека, Аттила рассказал, что увидел рядом с вошедшим к нему святителем Львом двух мужей с мечами, угрожавших ему в случае, если он не покорится. То были святые покровители Рима – первоверховные апостолы Петр и Павел. Когда в 455 году предводитель вандалов Гензерих вторгся в Рим, святитель Лев сумел убедить его не предавать город разрушению, не жечь зданий и не проливать крови.

Святитель Лев дожил до глубокой старости. Он заранее знал о своей смерти и приготовил себя теплой молитвой и добрыми делами к переходу из этого мира в вечность. Он умер в 461 году и был погребен в Риме, в Ватиканском соборе. Его литературное и богословское наследие состоит из 96 проповедей и 143 посланий, из которых самое знаменитое – послание к Святителю Флавиану. На русском языке оно издано в книге «Деяния Вселенских Соборов» (Казань, 1908). Проповеди святителя Льва, Папы Римского, были изданы в «Воскресном чтении» за 1849, 1854, 1857–1860 годы и в «Прибавлении к Церковным ведомостям» за 1899, 1901 годы

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1:

Подо́бен: Прехва́льнии му́ченицы:

Сия́, преподо́бне о́тче Космо,/ я́же Боже́ственный апо́стол Па́вел/ до тре́тияго Небе́се восхище́нный ви́дев написа́,/ о́ко не ви́де, и у́хо не слы́ша,/ и на се́рдце челове́ку плотяну не взыдо́ша,/ я́же угото́ва Бог лю́бящим Его́,/ слы́шав, кре́пко во уме́ себе́ прия́л еси́/ и, тая́ при́сно по́мня, мона́шествовати возлюби́л еси́,/ в неже усе́рдно облеки́йся,/ непреста́нно Триипоста́сному Божеству́ Херуви́мскую песнь, ра́дуяся, воспева́л еси́:/ аллилу́ия, аллилу́ия, аллилу́ия, сла́ва Тебе́, Бо́же.

Моя́ благода́рственныя хвалы́, –/ блаже́нне, вы́ну вопия́л еси́, –/ Влады́ко Го́споди Вседержи́телю, приими́:/ Ты бо еси́ мой и всея тва́ри Созда́тель,/ и́бо и аз пречи́стою Твое́ю руко́ю сотворе́ние/ и о́браз и подо́бие Твоея́ Боже́ственныя сла́вы ношу́,/ но сне́дию дре́ва су́етно прельсти́вся,/ пра́ведно ра́йския добро́ты изпадо́х,/ и во удоль сию́ плаче́вную вселе́н бых,/ от нея́же к Тебе́, Избави́телю мой, возве́д мя,/ в Небе́сных селе́ниях серафи́мски пе́ти учини́:/ аллилу́ия, аллилу́ия, аллилу́ия, сла́ва Тебе́, Бо́же.

Но́выя Небе́сныя пресве́тлыя оби́тели/ восприя́ша тя но́ваго граждани́на,/ в ни́хже, ра́дуяся, со А́нгелы, живе́ши,/ со апо́столы, и проро́ки, и святи́тели лику́я,/ и му́ченики и преподо́бными све́тло торжеству́я,/ с весе́лием Присносу́щней Тро́ице предстои́ши;/ Ю́же усе́рдно моли́, приле́жно мо́лим тя, о́тче!/ низпосла́ти Церква́м пра́восла́вное соедине́ние/ и преми́рное спасе́ние, Богосло́вие пою́ще Ей:/ Свят, Свят, Свят еси́, Бо́же.

Сла́ва, глас 3:

Пе́сни Богогла́сныя прино́сим Тебе́, Христе́ – Сло́ве Безнача́льнаго Ума́,/ и Сы́не Единоро́дный и Соприсносу́щный Преве́чнаго Отца́,/ я́ко та́ко благоволи́л еси́ за ны смири́тися,/ зрак раба́ восприя́л еси́, Бо́же, от Пречи́стыя и Присноде́вы Мари́и,/ и от Ду́ха Свята́го воплоще́н,/ Крест, и смерть, и погребе́ние пло́тию за грехи́ на́ша претерпе́л еси́,/ и воскре́сл еси́ сла́вно я́ко Бог,/ челове́ка возводя́ в перворо́дное блаже́нство,/ его́же огнепа́льно жела́я твой рачи́тель,/ наш до́брый па́стырь и прему́дрый учи́тель,/ священне́йший оте́ц, общежи́тельный нача́льник преподо́бный Косма,/ усе́рдно во след Тебе́ – Жениха́ Небе́снаго потече́,/ ве́рою, любо́вию и наде́ждою,/ бде́нием же, ку́пно и посто́м и моли́твами,/ и́миже, я́ко Небопа́рнейший оре́л,/ А́нгельское на земли́ житие́ соверши́в,/ в Небе́сный Сио́н возлете́/ и в Го́рнем Иерусали́ме водвори́ся,/ пресла́вно же наслажда́лся Боже́ственныя Твоея́ сла́вы,/ его́же моли́твами мо́лим Тя, Иису́се, Царю́,/ умири́ мир и Правосла́вие утверди́,/ и Небе́снаго Твоего́ Ца́рствия сподо́би нас.

И ны́не, Богоро́дичен, глас то́йже:

Преве́лие чу́до – Де́ва ро́ждшая/ и рожде́нное Бог пре́жде век./ О, та́инства стра́шнаго!/ Е́же мы́слимое неизрече́нно пребыва́ет/ и зри́мое не пое́млется,/ блаже́нна Ты еси́, Пречи́стая Отрокови́це./ Ада́ма земна́го Дщи/ и Бо́га Вы́шняго я́вльшаяся Ма́ти,/ Того́ моли́ спасти́ся душа́м на́шим.

На стихо́вне стихи́ры, глас 2.

Подо́бен: До́ме Евфра́фов:

Приими́ пе́ние чад твои́х,/ Космо, преподо́бне о́тче наш,/ и пода́ждь нам кре́пость и си́лу/ на неви́димыя и ви́димыя враги́ на́ша,/ моле́бными твои́ми ко Христу́ хода́тайствы.

Стих: Честна́ пред Го́сподем/ смерть преподо́бных Его́.

О́тче преди́вный и Богоблаже́нный Космо́,/ ты на земли́ Ангельски пожи́л еси́,/ и на Небесе́х, я́ко челове́к Бо́жий, водвори́лся еси́./ Помяни́ и нас, соверша́ющих па́мять твою́,/ и усе́рдно пою́щих тя, целе́бниче.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Космо́, свяще́нный о́тче наш,/ моли́ Христа́ Бо́га о всех нас,/ притека́ющих с ве́рою к ра́не честне́й чудотво́рных и целе́бных моще́й твои́х,/ и усе́рдно пою́щих тя,/ и прося́щих исцеле́ния и спасе́ния душе́внаго и теле́снаго.

Сла́ва, глас 5:

Преблаже́нный рабе́ Бо́жий/ и ве́рный слуго́ Госпо́день,/ при́сный и любе́зный ты показа́лся еси́,/ А́нгел земны́й и челове́к Небе́сный,/ ты, да́нныя тебе́ от Го́спода тала́нты усе́рдно де́лая,/ духо́вною ре́вностию многобога́тно расплоди́л еси́,/ и красноцвету́щия доброде́телей плоды́ возрасти́л еси́,/ и ве́село, засия́, в ра́дость Влады́ки своего́ вшел еси́,/ преподо́бием и пра́вдою со́лнцео́бразно сия́я,/ сла́вою непристу́пнаго Божества́ Его́ озаря́ем,/ и вене́ц от десни́цы Вы́шняго восприя́л еси́,/ Его́же непреста́нно со все́ми святы́ми моли́,/ правосла́вному во́инству победи́тельная на ва́рвары дарова́ти/ и всех христиа́н в ми́ре и тишине́ и благоде́нствии утверди́ти/ и спасти́ ду́ши на́ша по вели́цей Его́ ми́лости.

И ны́не, глас то́йже:

Я́же о Тебе́ проро́чествия испо́лнишася, Де́во Чи́стая,/ ов у́бо от проро́к дверь Тя прорече́ на восто́к зря́щую,/ ю́же никто́же про́йде,/ то́чию Зижди́тель Твой и всего́ ми́ра;/ ов купину́ огне́м жегому,/ я́ко в Тебе́ оби́та огнь Божества́, и не опали́ма пребы́сть;/ ин го́ру святу́ю,/ от нея́же ка́мень краеуго́льный кро́ме руки́ челове́ческия отсечеся,/ и порази́ о́браз мы́сленнаго Навуходоно́сора:/ вои́стинну ве́лие и пресла́вное, е́же в Тебе́ та́инство есть, Богома́ти,/ те́мже Тя сла́вим,/ Тобо́ю бо бысть спасе́ние душа́м на́шим.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: Прехва́льнии му́ченицы:

О́тче Космо́ пречудный,/ твоя́ прекра́сная память свяще́нных собра́ние весели́т,/ добре́ твое́ житие́ и чуде́с благода́ть,/ и́же ве́рных совокупле́ния облистава́ет дарова́ний све́тлостьми:/ Христу́ моли́ся дарова́ти душа́м на́шим/ мир и ве́лию ми́лость.

О́тче Космо́ пречу́дный,/ вре́менных презря́ и до́льних, Богому́дре,/ высо́кая пребыва́ющая возлюби́л еси́,/ сме́ртное попече́ние в се́рдце стяжа́л еси́,/ Христу́ моли́ся дарова́ти душа́м на́шим/ мир и ве́лию ми́лость.

О́тче Космо́ преми́рный,/ до́брыми доблестьми́ возше́д на колесни́цу доброде́телей,/ к Бо́гу восте́кл еси́,/ побе́дныя по́чести прие́мляй,/ я́ко ми́лоть нам те́ло твое́, положе́нно во гро́бе, о́тче,/ оста́вил еси́ источа́ти исцеле́ния,/ Христу́ моли́ся дарова́ти душа́м на́шим/ мир и ве́лию ми́лость.

Сла́ва, глас 6:

Днесь созыва́ет нас преподо́бнаго всеми́рное торжество́:/ прииди́те у́бо, празднолю́бцы,/ све́тло пра́зднуем па́мять его́, глаго́люще:/ ра́дуйся, свети́льниче всесве́тлый;/ возводя́ ко Христу́ и́нок мно́жества;/ ра́дуйся, по́стником похвале́ и удобрение;/ ра́дуйся, преимени́тому гра́ду Влади́миру и всем ве́рным/ благоути́шное приста́нище и очище́ние боля́щим во гресе́х;/ ра́дуйся, Небе́сных чино́в сия́ния ви́дети сподо́бивыйся,/ с ни́ми же ны́не ра́дуешися, во сла́ве предстоя́ Христу́ Бо́гу,/ Его́же моли́ по́стников удобре́ние,/ Космо́ о́тче всеми́рный,/ изба́вити нас ви́димых и неви́димых враг/ и спасти́ ду́ши на́ша.

И ны́не, Богоро́дичен: Кто Тебе́ не ублажи́т: Вход. Проки́мен дне. И чте́ния три преподо́бническая.

На литии́ стихи́ры, глас 5:

Преподо́бне о́тче Космо́,/ не дал еси́ сна твои́ма очи́ма,/ ни ве́ждома дрема́ния,/ до́ндеже ду́шу и те́ло от страсте́й свободи́л еси́,/ и жили́ще Бо́гу соде́лал еси́,/ прише́д бо Христо́с со Отце́м, оби́тель в тебе́ сотвори́,/ отню́дуже благода́ть прие́м, преподо́бне Космо́,/ моли́ Единосу́щную Тро́ицу о душа́х на́ших.

Глас 6:

И́же на земли́ А́нгела,/ и на Небеси́ челове́ка Бо́жия,/ ми́ру благо́е украше́ние,/ пи́щу благи́м и доброде́тельных рачи́теля,/ по́стников похвалу́,/ Ко́ему почтим:/ насажде́н бо в дому́ Бо́жии,/ и процве́те пра́ведно,/ и я́ко кедр в пусты́не,/ умно́жил еси́ ста́до Христо́во слове́сных ове́ц/ во преподо́бии и пра́вде.

Глас 8:

Преподо́бне о́тче Космо,/ ты мирско́е попече́ние и пристра́стие/ от ю́ности возненави́дел еси́/ и от Небе́снаго тя осия́ния/ глас свы́ше услы́шати сподо́бился еси́,/ вку́пе же и явле́ния от высоты́ чуде́сныя ико́ны,/ сла́внаго Успе́ния Пречи́стыя Богоро́дицы,/ ю́же тогда́ я́ко многоце́нный тебе́ от Бо́га дар,/ умиле́нным ду́хом и радостотво́рным пла́чем на руце, о́тче, прии́м,/ усе́рдно после́довал еси́ Зва́вшему тя с Небесе́/ и внеза́пу Бо́жиим манове́нием обре́лся еси́ на ме́сте в Бели́цей Ла́вре Пече́рской,/ иде́же мона́шествовати восприи́м,/ па́ки по мно́зех труде́х и преспе́яниих/ чу́дною Бо́жиею си́лою на о́ное же ме́сто/ от Ки́ева восхище́н и предпоста́влен быв,/ оби́тель созда́л еси́,/ бде́нием же, и посто́м, и моли́твами,/ я́ко не́коею ле́ствицею, на Не́бо возше́л еси́,/ и тамо с ли́ки преподо́бных/ предстои́ши у Престо́ла всех Царя́ Христа́ Бо́га,/ те́мже мо́лим тя,/ моли́ся Христу́ Бо́гу на́шему,/ умири́ти мир и спасти́ ду́ши на́ша.

Глас 5:

Преподо́бне о́тче,/ ты возше́д на высоту́ добро́детели,/ я́ко крин Дави́дский, в удо́лиих процве́л еси́,/ и я́ко кедр в Ливане собра́л еси́ ча́да своя́,/ и я́ко го́рлица пусты́ню возлюби́л еси́,/ и мирско́е пристра́стие от себе́ отве́ргл еси́,/ и многоце́ннаго би́сера Христа́ приобре́л,/ и Ца́рство Небе́сное дости́гл еси́,/ и тамо с ли́ки преподо́бных/ предсто́я Христу́ Бо́гу ра́дуешися:/ тем мо́лим тя, преподо́бне,/ моли́ся о ча́дех твои́х Христу́ Бо́гу на́шему,/ и ми́рови по́дати мир,/ и изба́вите нас ве́чнаго муче́ния в день Су́дный.

Глас 8:

Преподо́бне о́тче,/ ты возшел еси́, я́ко некоею высоковосходною лествицею, на Не́бо,/ и тамо с ли́ки преподо́бных сочета́вся/ предстои́ши Христу всех Царю́ Бо́гу на́шему,/ и от Него́ прии́м дар чуде́с де́йство,/ исцеля́ти неду́жныя и прогоня́ти ду́хи лука́вый,/ и́бо и ду́ши приходя́щих с ве́рою к раце моще́й твои́х,/ исцеле́ния прие́млют;/ помоли́ся, преподо́бне,/ изба́витися нам находя́щих зол, и бед, и скорбе́й,/ и ве́чных муче́ний в день Су́дный.

Сла́ва, глас то́йже:

Преподо́бне о́тче Космо́,/ ми́ра красоты́ и пи́щи вре́менный отню́д возненави́дев,/ мона́шеское житие́ па́че возлюби́л еси́,/ А́нгелом собесе́дник бы́ти сподо́бився,/ и свети́льник многосве́тлый Росси́йския земли́,/ чудесы́, я́коже второ́е со́лнце, сия́я;/ но всех нас помина́й, соверша́ющих святу́ю па́мять твою́,/ мы бо ча́да твоя́,/ и о́вцы слове́сных твои́х уче́ний,/ и тя на по́мощь призыва́ем,/ прося́ще тобо́ю прия́ти мир и ве́лию ми́лость.

И ны́не, Богоро́дичен: Безневестная Де́во:

На стихо́вне стихи́ры, глас 4.

Подо́бен: Дал еси́ знамение:

Житие́ твое́ нескве́рно, блаже́нне,/ терпе́ние и кро́тость, и любо́вь нелицеме́рну,/ воздержа́ние безме́рно, стоя́ние всено́щное,/ умиле́ние Боже́ственно,/ ве́ру, наде́жду и ми́лование, о́тче, стяжа́в,/ я́ко А́нгел пожи́л еси́ с пло́тию на земли́, Космо́ преподо́бне,/ моли́твенниче о душа́х на́ших.

Стих: Честна́ пред Го́сподем/ смерть преподо́бных Его́.

Земны́й А́нгел и Небе́сный челове́к был еси́, преподо́бне,/ исто́чник умиле́ния, ми́лования струя́,/ пучи́на чуде́с, гре́шником спору́чник,/ ма́слина вои́стинну Бо́жия плодови́та,/ трудо́в твои́х утиши́ ли́ца, Космо́ в се́чу дне,/ ве́рно восхваля́ющих тя.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ум твой просвеща́ем Боже́ственными ра́зумы,/ теле́сных страсте́й превы́ше бысть непреме́шен,/ земны́х нося́ начерта́ния,/ изобража́я в себе́ Боже́ственную добро́ту/ и познава́ем весь Богови́ден де́йством Свята́го Ду́ха,/ Космо́ о́тче наш,/ и́ноков украше́ние.

Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ те́мже на Небесе́х обре́т мзду дел твои́х,/ бесо́вския погуби́л еси́ по́лчища,/ и Ангельския дости́гл еси́ чи́ны,/ и́хже житию́ без поро́ка поревнова́л еси́,/ дерзнове́ние име́я ко Христу́ Бо́гу/ мир испроси́ душа́м на́шим.

И ны́не, Богоро́дичен: Творе́ц и Изба́витель:

Тропа́рь, глас 4:

Го́рняго жела́я преми́рнаго жития́,/ до́льняя возненави́дел еси́,/ и, взем крест свой, после́довал еси́ Христу́,/ и в пусты́ню всели́лся еси́, досточу́дне,/ в ней подвиза́ся в пе́ниих, в бде́ниих и поще́ниих./ Те́мже в тя всели́ся Пресвяты́й Дух,/ но я́ко име́я дерзнове́ние ко Христу́ Бо́гу,/ испроси́ людем правосла́вным здра́вие и спасе́ние/ и не забу́ди посеща́я чад свои́х,/ соверша́ющих свяще́нную па́мять твою́,/ Космо́, преподо́бне о́тче наш.

Сла́ва, и ны́не, Богоро́дичен.

НА У́ТРЕНИ

По 1-й стихосло́вии седа́лен, глас 1.

Подо́бен: Гроб Твой:

Я́ко со́лнце све́тлое, возсия́вши, о́тче, па́мять твоя́,/ ве́рных сердца́ просвеща́ет, страсте́й тьму отгоня́ющи;/ ве́ру же и чистоту́ творя́щая,/ покры́й и сохрани́ от искуше́ний жите́йских нас, о́тче Космо́ блаже́нный.

Сла́ва, и ны́не, Богоро́дичен:

Безневе́стная Чи́стая Богоро́дице Де́во,/ Еди́на ве́рным Предста́тельнице и покро́ве,/ бед, и скорбе́й, и лю́тых обстоя́ний изба́ви,/ и́же на Тя наде́жду, Отрокови́це, иму́щих,/ и ду́ши на́ша спаси́ Боже́ственными Твои́ми моли́твами.

По 2-м стихосло́вии седа́лен, глас 3.

Подо́бен: Красоте́ де́вства:

Ко Го́споду име́я о́чи серде́чныя,/ вся, и́же на земли́, оста́вил еси́,/ и мно́гими труды́ твои́ми свое́ житие́ изъясни́в,/ и па́че вся́кия добро́ты оби́тель показа́ся,/ во псалме́х и пе́снех Го́сподеви пою́ще,/ моли́ спасти́ся душа́м на́шим.

Сла́ва, и ны́не, Богоро́дичен:

Небе́сная веселя́хуся и земна́я с тре́петом у́жасахуся,/ егда́ пречи́стый глас на́йде на Тя, Богоро́дице,/ еди́но бо торжество́ обо́йм возсия́,/ егда́ Безпло́тный ра́дость Тебе́ принесе́./ Те́мже со А́нгелом Тебе́ вопие́м:/ ра́дуйся, Обра́дованная.

По полиеле́и седа́лен, глас 4:

Возсия́ па́мять твоя́, я́ко со́лнце блиста́ющи заря́ми,/ ми́ру твои́ми чудесы́, преподо́бне Космо́,/ светоно́сче блаже́нне, по́стником похвало́/ и гра́ду Влади́миру вели́кое заступле́ние.

Сла́ва, и ныне, Богоро́дичен:

Под кров Твой, Пречи́стая Де́во, прибега́ющих/ мольбу́ принеси́ о нас Человеколю́бцу Христу́ Бо́гу,/ спасти́ся рабо́м Твои́м.

Степе́нна, 1-й антифо́н 4-го гла́са. Проки́мен: Честна́ пред Го́сподем: Стих: Что возда́м: Ева́нгелие от Матфе́я, зачало 43.

По 50-м псалме́ стихи́ра, глас 2:

Ева́нгельски Бо́га возлюби́л еси́,/ к Нему́ добро́детельми прибли́жися,/ Го́рних жела́я,/ до́ндеже, блаже́нне, в безконе́чней жи́зни/ Боже́ственным раче́нием всели́лся еси́:/ но моли́ся, преподо́бне о́тче Космо́, Христу́ Бо́гу,/ по́дати побе́ды на враги́ стране́ на́шей/ и изба́вит вся́каго обстоя́ния/ и́же ве́рою соверша́ющих прече́стную и святу́ю па́мять твою́.

Кано́н Богоро́дице со ирмосо́м на 6 и преподо́бному Косме́, творе́ние смире́ннаго Григория, емуже краегране́сие сице: От недосто́инства моего́ приноша́ю ти моле́бныя пе́сни, блаже́нне. Глас 8.

Песнь 1

Ирмо́с: Пои́м Бо́гу/ от го́рький рабо́ты фарао́новы изба́вльшему Изра́иля,/ и о́гненным столпо́м и све́тлым о́блаком наста́вльшему,/ я́ко просла́вися.

Я́ко безпло́тен, блаже́нне, на земли́ пожи́в,/ и ны́не на Небеси́ с ли́ки преподо́бных счетава́яся,/ с ни́ми же ра́дуяся, помина́й нас, чту́щих тя ве́рно.

Сою́зом грехо́вным помраче́нное се́рдце мое́, просвети́, блаже́нне Космо́,/ те́плыми твои́ми ко Влады́це моли́твами.

Умо́м очи́щенным Богови поработи́лся еси́, блаже́нне,/ целому́дрием теле́сным и чистото́ю ду́шу твою́ просвети́л еси́.

Богоро́дичен: Прему́дрость и Сло́во О́тчее несказа́нно ро́ждшая,/ души́ мое́й лю́тую исцели́ я́зву и серде́чную укроти́ боле́знь.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Ду́хом разжже́н быв, о́тче,/ труды́ подъя́л еси́, я́ко безпло́тен,/ возвы́сився смире́нием, верхи́ бесо́вския смири́л еси́, всече́стне,/ сла́ва и́ноком и утвержде́ние.

По у́зкому пути́ ходи́л еси́ Боже́ственными восхожде́нии,/ простра́ннаго же пути́ от ю́ности удаля́яся/ и неви́димаго, о́тче, зми́я смири́л еси́, смире́нием огра́ждьшся.

Моле́бный глас мой услы́ша, о́тче преблаже́нный,/ и не забу́ди раба́ твоего́,/ воспева́ющаго честны́я твоя́ по́двиги.

Богоро́дичен: Уста́ви неуста́вное помышле́ние, Чи́стая Ма́ти Бо́жия,/ Сы́ну Своему́ моля́щися,/ и напра́ви смуще́нная движе́ния се́рдца моего́.

Се дален, глас 8:

Ра́зума тве́рдостию украша́яся, преподо́бне,/ плотски́я тя́гости отве́рг, зми́еву горды́ню попра́л еси́/ и оби́телище и́збранно был еси́ Пресвято́му Ду́ху,/ неукло́нным ра́зумом поработи́лся еси́ Христу́ Бо́гу, всеблаже́нне Космо́,/ Того́ моли́ грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и Еди́ну в жена́х Тя без семе́не ро́ждшую Бо́га пло́тию,/ вси ублажа́ем ро́ди челове́честии,/ Огнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем А́нгельский и челове́ческий род,/ досто́йно сла́вим пресвято́е рождество́ Твое́ и согла́сно вопие́м Ти:/ моли́ Христа́ Бо́га, согреше́ний оставле́ние дарова́ти/ покланя́ющимся ве́рою пресвято́му Рождеству́ Твоему́.

Песнь 4

Ирмо́с: Всел еси́ на ко́ни, апо́столы Твоя́, Го́споди,/ и прия́л еси́ рука́ма Твои́ма узды́ их,/ и спасе́ние бысть ежде́ние Твое́,/ ве́рно пою́щим;/ сла́ва си́ле Твое́й, Го́споди.

Всел еси́ на коня́,/ в путе́х пра́вых неукло́нно ше́ствовал еси́,/ дости́гл еси́, блаже́нне, широты́ ра́йския/ и по́стническим ли́ком счета́лся еси́.

В пусты́ню Боже́ственным манове́нием представля́ем, преподо́бне,/ жела́нием всели́лся еси́ и в ней подвиза́лся еси́ кре́пкими по́двиги и поще́нием,/ мона́шествующим показа́лся еси́ верх и основа́ние/ и научи́ вопи́ти:/ сла́ва си́ле Твое́й, Го́споди.

Храм Го́сподеви Боголе́пен воздви́гл еси́,/ и Того́ Рождшей именова́л еси́, по о́бразу я́вльшемуся тебе́ свы́ше:/ в не́мже и сла́вятся при́сно честны́я твоя́ по́двиги, Космо́ всеблаже́нне.

Богоро́дичен: Ра́дуйся, Влады́чице Де́во,/ церква́м еси́ красото́, правосла́вным похвале́ и державо;/ непреста́нно моли́ся, Богоро́дице, Сы́ну Твоему́,/ сохрани́ти Це́рковь Святу́ю и лю́ди правосла́вный от вся́каго обстоя́ния.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою,/ Твой мир подаждь нам,/ Человеколю́бче.

Просвеща́ем ум твой Боже́ственными ра́зумы,/ теле́сных страсте́й превы́ше быв непреме́шен,/ земны́м нося́ начерта́ние, блаже́нне.

О́тче треблаже́нный, не забу́ди посеща́я чад свои́х,/ соверша́ющих честну́ю па́мять твою́,/ я́ко да моли́твами твои́ми избу́дем от вся́кия ну́жды.

Нощь грехо́вная покры́ла мя есть, о́тче,/ но озари́ мя покая́нием, преподо́бне,/ я́ко да омыю скве́рну от окая́нныя моея души́.

Богоро́дичен: Всесве́тлым укра́шена све́том, Богора́дованная Ма́ти,/ Ты бо породи́ честне́йши всех Христа́ Бо́га на́шего,/ Его́же моли́, да изба́вит ны от вся́ких напа́стей.

Песнь 6

Ирмо́с: Ри́зу мне пода́ждь светлу,/ одея́ися Све́том, я́ко ри́зою,/ Многоми́лостиве, Христе́ Бо́же наш.

Ма́слина вои́стинну Бо́жия плодови́та, ты был еси́, преподо́бне;/ еле́ем трудо́в твои́х утиши́ ли́ца, Космо́ всечу́дный,/ ве́рно хваля́щих тя.

Земный А́нгел и Небе́сный челове́к был еси́, преподо́бне,/ исто́чник умиле́ния, ми́лования струя́ и пучи́на чудесем.

Сле́зными пото́ки и по́стными поты́/ углия сла́дости погаси́л еси́, преподо́бне,/ и в чудесе́х, славна́ тя показа́ Госпо́дь, Космо́ блаже́нне,/ и украси́ тя Вы́шними дарова́нии.

Богоро́дичен: Прокля́тся смерть Тобо́ю/ и а́дово жа́ло притупи́ся, Ма́ти Чи́стая,/ Ты бо Безсмертна́го Влады́ку Христа́ пло́тию родила́ еси́.

Конда́к, глас 8.

Подо́бен: Взбра́нной:

Душе́вныя стра́сти из ко́рене исторга́я,/ в пусты́ню всели́лся еси́, преподо́бне,/ и неболе́зненную жизнь в боле́знех восприя́л еси́,/ боле́зней же лю́тым уставля́еши озлобле́ния прося́щим у тебе́ с ве́рою./ Те́мже разреши́ боле́зни на́ша душе́вныя и теле́сныя, да зове́м ти:/ ра́дуйся, Космо́ Богому́дре.

И́кос:

Покая́ния две́ри отве́рзи ми, всеблаже́нне,/ да омы́то скве́рну от окая́нныя моея души́/ и те́ла моего́ вся чу́вства очи́сти,/ да любо́вию зову́ ти благода́рственная:/ ра́дуйся, по́стником удобре́ние и и́же сам собо́ю о́браз показа́вый;/ ра́дуйся, исто́чниче пресла́дкий, и́же напоя́я ве́рных се́рдца уче́нии;/ ра́дуйся, и́же нощь на́шего неразу́мия отгоня́ющи смиренному́дрым уче́нием;/ раду́йся, слове́с твои́х благода́ть теплота́ бысть мно́гим Боже́ственному восхожде́нию;/ ра́дуйся, прелюби́мая весна́, израща́ющая всем Боже́ственную любо́вь;/ ра́дуйся, прекра́сный кри́не, и́же любо́вным взо́ром всех ко Христу́ влеки́й;/ ра́дуйся, измени́вый вре́менная, ве́чными;/ ра́дуйся, е́же возже́ле, то и соверши́;/ ра́дуйся, ве́рным по Бозе изве́стная наде́жда;/ ра́дуйся, се́рдца моего́ ко Го́споду пригвожде́ние моли́твою день и нощь;/ ра́дуйся, кра́сное доброде́тели храни́лище;/ раду́йся, пастыренача́льниче слове́сных ове́ц;/ раду́йся, гра́ду Влади́миру похвале́,/ всем притека́ющим покро́в и заступле́ние;/ ра́дуйся, Космо́ Богому́дре.

Песнь 7

Ирмо́с: А́нгелом о́троки из огня́ спа́сый/ и гремя́щую пещь преложи́вый на росу́,/ благослове́н еси́, Бо́же оте́ц на́ших.

А́нгельским житием, блаже́нне, пожи́л еси́,/ труды́ плодо́в свои́х умно́жил еси́,/ и процве́л еси́ Дави́ де́ки, я́коже фи́нике, воспева́я:/ благослове́н еси́, Го́споди, Бо́же оте́ц на́ших.

Восхваля́ем тя, о́тче Космо́, блаже́нный,/ ты же моли́ в па́мяти твое́й Христа́ Бо́га,/ лука́вства сатанина́ изба́вити нас, воспева́ющих,/ благослове́н еси́, Го́споди, Бо́же оте́ц на́ших.

Безпу́тием заблужде́ннаго/ и зимо́ю грехо́вною олядене́вшаго мя согре́й, Космо́ преподо́бне,/ и научи́ вопи́ти:/ благослове́н еси́, Го́споди, Бо́же оте́ц на́ших.

Богоро́дичен: Прия́ла еси́ вои́стинну Боже́ственное Сло́во во чре́во Твое́,/ и Сего́ па́че естества́, Пречи́стая, родила́ еси́./ Его́же моли́ изба́вити от бед рабы́ Твоя́, вопию́щия:/ благослове́н еси́, Бо́же оте́ц на́ших.

Песнь 8

Ирмо́с: От Отца́ пре́жде век Рожде́ннаго/ и от Ма́тере в после́дняя воплоще́ннаго,/ свяще́ннины, благослови́те,/ лю́дие, превозноси́те во вся ве́ки.

И́нок и́стинен был еси́, простра́ннаго пути́ удаля́лся,/ широты́ ра́йския дости́гл еси́/ и та́мо дре́ву живо́тному причаща́ешися, ра́дуяся, во ве́ки.

Дом душе́вный доброде́телей был еси́,/ и пра́вости пра́вило, Космо́ пречу́дный, испра́вил еси́/ и ны́не бу́дущих благ дре́ву живо́тному причаща́ешися, ра́дуяся, во ве́ки.

Лико́м преподо́бных сочета́лся еси́,/ и по́стническим житие́м укра́сился еси́, Космо́ преподо́бне,/ ны́не ра́я пи́щи дре́ву живо́тному причаща́ешися, ра́дуяся во ве́ки.

Богоро́дичен: Под ле́том бы́вши,/ И́же от Отца́ безле́тно возсия́вшаго, Богома́ти, нам родила́ еси́,/ Его́же мо́ли спасти́ пою́щия Тя во ве́ки.

Песнь 9

Ирмо́с: Чи́стую сла́вно почти́м, лю́дие, Богоро́дицу,/ Огнь Божества́ прии́мшую во чре́ве неопа́льно,/ пе́сньми велича́ем.

Чи́стое и кра́сное храни́лище доброде́телей был еси́, Космо́ блаже́нный:/ сего́ ра́ди я́ко молитвенни́ка тепла́ о нас ко Го́споду при́сно предлага́ем/ и непреста́нно тя ублажа́ем.

От се́рдца боле́знь, от очию сле́зы,/ от души́ покая́ние, приими́, преподо́бне!/ и ко Го́споду тепле́ принеси́,/ я́ко да непреста́нно тя ублажа́ем.

Всече́стне Космо́!/ Сохрани́ певцы́ твоя́ неви́димо, о́тче,/ си́лою моли́тв твои́х ко Влады́це,/ я́ко да непреста́нно тя велича́ем.

Богоро́дичен: А́нгели и Арха́нгели, проро́цы и апо́столи/ и весь лик преподо́бных; с преблаже́нным Космо́ю ко Христу́ приле́жно с Пречи́стою Его́ Ма́терию за весь мир моли́теся,/ я́ко да непреста́нно вас восхваля́ем.

Свети́лен:

Просла́ви тя Госпо́дь в чудесе́х, всеблаже́нный Космо́,/ и преста́вил тя есть от тли на безсме́ртие, Своего́ уго́дника,/ сего́ ра́ди па́мять твою́ ве́рно восхваля́ем.

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ и́же от Тро́ицы Еди́наго родила́ еси́, Богоро́дице,/ и но́сиши на Боже́ственную Твое́ю ру́ку Пребога́тое Сло́во,/ Его́же пе́сньми немо́лчно велича́ем.

На хвали́тех стихи́ры, глас 5:

Богому́дре о́тче, всеблаже́нный Космо́,/ по́стником ты был еси́ похвало́,/ ми́ра красоты́ отню́дь возненави́дев,/ от ю́ности Бо́га возлюби́л еси́,/ и те́сный путь ше́ствовал еси́ и́ноческаго жити́я,/ пресве́тлый свети́льниче,/ и всем ве́рным те́плый засту́пниче,/ моли́ся ко Го́споду да спасе́т ду́ши на́ша.

Богому́дре о́тче,/ ду́шу твою́ с те́лом от страсте́й очи́стив,/ Свято́му Ду́ху прекра́сная оби́тель яви́лся еси́,/ То́йже славна́ тя пока́за ко́нцем, преблаже́нне Космо́,/ соде́ла в чудесе́х вели́ка свети́льника,/ просвеща́ющаго во мра́це су́щия,/ темже я́ко наста́вника тя и́ноком и всем ве́рным,/ соше́дшеся, велему́дренно ублажа́ем.

Глас 6:

Любо́вию Христо́вою, Богому́дре, просвеща́ем,/ душетле́нныя стра́сти победи́в, всеблаже́нный Космо́,/ в до́брых по́двизех усе́рдствуя,/ подвиза́лся еси́ кре́пко на неви́димаго врага́/ и того́ ко́зней, блаже́нне, избеже́,/ в преми́рная селе́ния дости́гл еси́,/ и тамо с ли́ки преподо́бных водворя́лся,/ с ни́ми же я́ко име́я дерзнове́ние ко Христу́,/ мир испроси́ душа́м на́шим.

Глас 2:

Прииди́те, мона́хов мно́жества,/ в па́мять отца́ на́шего собери́теся,/ обстоя́ще любе́зно честну́ю его́ и многоце́нную ра́ку,/ ра́достно лик соста́вим днесь,/ и моле́бно возопие́м ему́:/ преподо́бне о́тче наш Космо́,/ предстоя́ Христу́ Бо́гу на́шему/ и Пречи́стей Его́ Ма́тери,/ моли́ся о со́бранном твое́м ста́де,/ изба́вится нам от всех наве́тов вра́жиих,/ и умири́тися ми́ру, и спасти́ся душа́м на́шим.

Сла́ва, глас 8:

Днесь благове́рнии Христоросси́йстии народи́,/ благочести́вии правосла́внии Влади́мирстии соб́ри,/ усе́рдно в дом Спаси́теля на́шего Бо́га прииди́те,/ умили́тельно предста́телю на́шему возопи́те:/ о пресве́тлый ми́ра свети́льниче/ и те́плый Христа́ Бо́га моле́бниче,/ Космо́ о́тче наш свяще́нный,/ благода́ти Ду́ха Свята́го испо́лненный,/ предстоя́й Престо́лу Царя́ Небе́снаго/ и я́сно зря сла́ву Божества́ Его́,/ призри́ на смире́нныя рабы́ твоя́,/ усе́рдно днесь моля́щия тя,/ к тебе́ бо ру́це простира́ем/ и тебе́ на по́мощь призыва́ем,/ к чудотво́рным твои́м моще́м припада́юще/ и святы́й твой о́браз любе́зно целу́юще,/ оте́ческому твоему́ милосе́рдию покланя́емся,/ и ра́достными се́рдцы приле́жно ти мо́лимся,/ моли́, преблаже́нне, Животворя́щую Тро́ицу/ и Влады́чицу на́шу Пречи́стую Богоро́дицу/ уще́дрити и спасти́ ве́рно Тя воспева́ющих/ и па́мять твою́, свя́те, све́тло соверша́ющих,/ да и мы, тобо́ю изба́вльшеся а́дских муче́ний,/ сподо́бимся у Го́спода во ве́ки Небе́сных селе́ний.

И ны́не, Богоро́дичен: Влады́чице, приими́:

По сем славосло́вие вели́кое, час пе́рвый и отпу́ст.

НА ЛИТУРГИ́И:

Служба преподо́бническая.

Преподобный Косма Яхромский жил в XV веке. Мирское имя преподобного Космы неизвестно. Его отец – обедневший боярин – был вынужден отдать его в детстве на службу соседнему землевладельцу Секерину, жившему в сорока верстах от г. Владимира.

Секерин был благочестивым человеком и заботился об образовании и духовном воспитании бывшего у него в услужении отрока. Во время продолжительной болезни своего господина его юный служитель утешал его чтением книг. Ради излечения Секерин предпринял путешествие, взяв с собою и отрока. По дороге они остановились в лесу, на ручье Яхроме. Больной уснул. Внезапно яркий свет осветил всю местность, и таинственный голос произнес: «Внимай, Косма, и разумей глаголы жизни, яви житие Богоугодное, возжелай радости праведных, да получишь Вечные блага!». И отрок увидел на дереве икону Успения Божией Матери, сиявшую дивным Светом. Он взял святую икону и приложил ее к больному месту своего господина, который тут же проснулся исцеленным.

Вскоре служба святого Космы окончилась. Повинуясь тому же таинственному голосу, повелевшему ему оставить мир ради Бога, святой Косма удалился в Киево-Печерский монастырь, где принял постриг. Прожив там некоторое время, он удивил своей подвижнической жизнью самых опытных старцев. По повелению явившегося ему во сне Ангела преподобный Косма вернулся с иконой Божией Матери на то место, где Она явилась ему, на Яхрому. Здесь преподобный Косма при помощи добрых христиан построил храм в честь Успения Божией Матери. К нему стали собираться братия, и вскоре преподобный Косма стал игуменом основанного им монастыря. С особой любовью принимал преподобный Косма и посещал больных, и странников, и пришельцев, видя в лице их Самого Христа. Облагодатствованный Духом Святым, он в особенности умел умягчать злые сердца и вызывать покаянные слезы у закоренелых грешников, обращая их ко спасению.

Слава об иноческих подвигах преподобного Космы доходила в те времена также до великого князя. Преподобный Косма дожил до глубокой старости и скончался 18 февраля 1492 года. Мощи святого Космы почивали в основанной им обители под спудом. Житие преподобного описано было иноком Спасо-Евфимиевского монастыря Григорием, а потом распространено игуменом Варлаамом.