13-й день

Пра́зднование Пресвяте́й Богоро́дице в па́мять пренесе́ния чудотво́рныя Ея́ ико́ны, И́верския в Москву́

Святых мученик Ка́рпа, Папи́лы, Агафодо́ра и святыя мученицы Агафони́ки

Преподобнаго Вениами́на, в Да́льних пеще́рах почива́ющаго

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1:

Прииди́те, вси лю́дие,/ верою соше́дшеся,/ просла́вим Владычицу Богоро́дицу, Заступницу рода нашего,/ и, обстоя́ще честну́ю икону, любе́зно облобыза́им ю, глаголюще:/ радуйся, Пречистая Де́во,/ радуйся, Ма́ти Го́спода Вы́шняго,/ радуйся, покро́ве и спасе́ние душ на́ших.

Ра́дуйся, Афонская Горо́,/ Сла́ва бо Господня на тебе́ возсия́./ Я́ко бо многосветлая звезда, прии́де от востока к западу,/ в столпе́ о́гненне явися икона Богоматере,/ озаряющи Афон свои́м пришествием.

Я́коже Моисею в Сина́и купина́ явися иногда,/ огнем убо опаляема, и невредима пребывши,/ тако и Всенепорочныя священный образ огнем одевается и неопалим пребыва́ет,/ освящая взирающия с верою на него.

Гряди́те радостно, и́ноков афонских ли́цы,/ почерпи́те благода́ть неоску́дную от иконы Богоматере, огнем блистающияся,/ и приими́те с верою и любовию:/ я́ко во сте́ну и ограждение обителем вашим пресла́вно даруется,/ да покрыет вас от всех враг видимых и невидимых.

Сла́ва, и ны́не, глас 5:

Приидите, лю́дие,/ чудотворному и всечестно́му поклони́мся Бо́жия Ма́тере образу,/ егóже дарова́ обители Иверстей я́ко стража неусыпна и необори́ма:/ ограждает бо святу́ю оби́тель и вся живущия на Афоне свои́м Покровом/ и дарует обильныя да́ры исцелений/ от неистощимаго источника святыя иконы всем, ту́ю почитающим./ Темже воспева́юще, воззовем Первообра́зней:/ радуйся, ми́рови по́моще и утеше́ние душ на́ших.

Проки́мен дне.

На стихо́вне стихи́ры, глас 2:

Вместилище чистое Света Пречистаго, Богоро́дице,/ сла́вим Тя и поем, раби Твои,/ я́ко явлением пречестны́я Твоея́ иконы нас освяща́еши.

Стих: Воскресни́, Го́споди, в покой Твой,/ Ты и киво́т святыни Твоея́.

Сла́ва Тебе́, Христе́́ Царю,/ Сла́ва многому о нас милосердию,/ ибо даровал еси́ икону Твоея́ Пречистыя Матере,/ благода́ти то́ки нам неоскудно излива́ющую.

Стих: Кля́тся Господь Давиду истиною/ и не отвержется ея.

Днесь, благове́рнии лю́дие, све́тло празднуем,/ осеня́еми иконы Богоматере пришествием,/ с верою прие́млюще в ней стра́жа нам неотступна, и возопии́м Богоро́дице:/ покрый нас от всякаго зла и спаси́ души на́ша.

Сла́ва, и ны́не, глас 6:

Притеце́м к тихому пристанищу/ и Заступнице рода нашего, Деве Марии,/ поклони́мся честно́му Ея А́нгелы почитаемому образу, умильно зову́ще:/ при́зри, Благосердая Мати,/ на лютыя ско́рби, нас обдержащия,/ и исцели́ болезни душ на́ших.

Тропа́рь Богоро́дице, глас 1:

Де́рзость ненавидящих образ Го́сподень/ и держава нечестивых безбожно в Никею прии́де,/ и по́сланнии безчеловечно вдовицу,/ благоче́стно чтущую икону Богоматере, истязу́ют,/ но та́я нощию с сыном икону в море пусти́, вопию́щи:/ Сла́ва тебе́, Чи́стая,/ я́ко непроходимое море плещи́ своя подаде́,/ сла́ва правоше́ствию Твое́му, Едина Нетленная.

Сла́ва, и ны́не, ин тропа́рь, глас то́йже:

От святыя иконы Твоея́,/ о Влады́чице Богоро́дице,/ исцеления и цельбы́ подаются обильно,/ с верою и любо́вию приходя́щим к ней./ Тако и мою немощь посети́/ и душу мою помилуй, Благая,/ и тело исцели́ благода́тию Твое́ю, Пречистая.

Ектения и отпу́ст.

НА ВЕЛИ́ЦЕЙ ВЕЧЕ́РНИ

На Го́споди, воззвах: стихи́ры на 8, глас 5:

Красуйся, Афоне,/ радуйся и веселися, оби́тель Иверская:/ се бо грядет чу́дная икона Богоматере,/ А́нгелы по морю дориноси́ма,/ светом неизреченным сия́ющи,/ мрак скорбе́й и печалей прогоняющи/ и всех лучами своея милости озаря́ющи.

Тебе́ припа́дают, Госпоже,/ и́ноков ли́цы и по́стников сословия/ и, любе́зно взирающе на святу́ю икону Твою́, вопию́т Ти:/ прииди́ к нам, Благая Мати,/ ущедри чтущия Тя/ и даруй нам святый образ Твой/ в залог милости и спасения.

О, преславнаго чудесе́!/ Я́коже бо Моисе́ю в Сина́и купина явися иногда,/ огнем убо опаляема и невреди́ма пребывши,/ сице и Всенепорочныя Богородительницы образ огнем одевается, но неопали́м пребывает,/ просвещая и нас, су́щих во мра́це,/ и невредимы в пещи́ искушений и бед сохраня́я.

Гряди́, Гаврии́ле,/ сни́ди немо́кренными ногами в море/ и приими́ во объя́тия икону Богоматере/ на радость Афону,/ на ограждение обители Иверския/ и всем христиа́ном во утеше́ние.

Богородице Де́во, державная Помощнице,/ ны́не оби́тель Иверская о Тебе́ хвалится и веселится,/ иму́щи Тя Заступницу непостыдную и сте́ну неруши́му,/ основание непоколеби́мо, стра́жа неусыпна./ Не преста́й, Госпоже, Твоими моли́твами и всегда избавляти оби́тель Твою́/ и вся люди от всех напа́стей.

Подаждь утеше́ние рабом Твоим, Чи́стая,/ напастьми одержимым,/ и рог верных вознеси, Богородительнице,/ спаси́ моли́твами Твоими оби́тель сию и грады православныя,/ укрепи на враги сла́вящия Тя,/ вся верныя рабы, хвалящия Тя, защити.

Пречистая Твоя́ икона, Богоро́дице Де́во,/ врачевство́ духовное всего мира явися:/ к нейже прибегаем, Тебе́ покланяющеся,/ почитаем и лобыза́ем ю и исцелений благода́ть получаем,/ неду́гов душевных и телесных страсте́й/ Твоими моли́твами свобождающеся.

Я́ко порфи́рою царскою и ви́ссом,/ иконою Твое́ю и Твоего́́ Сына, Богоро́дице,/ оби́тель Иверская украси́вшися, днесь сияет чудесы́,/ благода́тию Свята́го Ду́ха па́че света солнечнаго блистающися:/ в той бо на болящих и неду́жных исцеления изливаются/ и всем даруется богатая ми́лость.

Сла́ва, и ны́не, глас 8:

О Ма́ти Благая, Госпоже Богоро́дице Де́во!/ Не отри́ни нас, смиренных раб Твоих,/ пред пречистою Твое́ю иконою недостойныя молитвы принося́щих,/ бу́ди теплая хода́таица о нас, грешных, к Сыну Твое́му,/ избави нас от всех бед и искушений,/ да спасаеми Тобою, вы́ну вопие́м Ти:/ радуйся, Благая Врата́рнице,/ двери райския нам отверза́ющая.

Вход. Проки́мен дне и чтения.

Бытия чтение (глава́ 28):

Изы́де Иаков от студенца́ кля́твеннаго/ и и́де в Харрань./ И обре́те место, и спа та́мо:/ за́йде бо солнце./ И взят от ка́мения места того и положи́ возгла́вие себе,/ и спа на месте о́ном./ И сон ви́де:/ и се ле́ствица утвержде́на на земли, ея́же глава́ досяза́ше до Небес,/ и А́нгели Божии восхожда́ху и низхожда́ху по ней./ Господь же утвержда́шеся на ней и рече́:/ Аз Бог Авраа́мов, отца твоего, и Бог Исаа́ков, не бойся:/ земля, иде́же ты спи́ши на ней, тебе́ дам ю и се́мени твое́му./ И будет семя твое́, я́ко песок земны́й,/ и распространится на море, и ли́ву, и север, и на восто́ки,/ и возблагословя́тся о тебе́ вся коле́на земна́я, и о се́мени твое́м./ И се Аз с тобою, сохраня́яй тя на вся́ком пути, а́може аще по́йдеши,/ и возвращу́ тя в землю сию:/ я́ко не и́мам тебе́ оставити, до́ндеже сотвори́ти Ми вся, ели́ка глаго́лах тебе́./ И воста́ Иаков от сна своего, и рече:/ я́ко есть Господь на месте сем, аз же не ве́дех./ И убоя́ся, и рече:/ я́ко страшно место сие;/ несть сие, но дом Божий, и сия́ врата́ Небесная.

Исхода чтение (глава́ 3):

Моисей бя́ше пасы́й овцы Иофо́ра, тестя своего, священника Мадиа́мска,/ и гна́ше овцы в пустыню; и прии́де в гору Божию Хори́в./ Явися же ему А́нгел Го́сподень в пламени о́гненне из купины́;/ и видит, я́ко купина́ горит огнем, купина́ же не сгара́ше./ Рече́ же Моисей:/ мимоше́д, уви́жду виде́ние великое сие, я́ко не сгарает купина́./ Егда́ же ви́де Господь, я́ко приступа́ет ви́дети,/ воззва́ его Господь из купины́, глаголя:/ Моисе́е, Моисе́е./ Он же рече́: что́ есть, Го́споди?/ Он же рече́: не приближайся се́мо;/ изу́й сапоги от ног твои́х:/ место бо, на немже ты стои́ши, земля свята́ есть.

Исхода чтение (глава́ 13):

Обведе́ Бог люди путем, и́же в пусты́ни, к Чермно́му морю:/ пятаго же рода изыдо́ша сы́нове Изра́илевы от земли́ Египетския./ И взя Моисей кости Ио́сифовы с собою,/ клятвою́ бо закля́ Иосиф сы́ны Изра́илевы, глаго́ля:/ присеще́нием присети́т вас Господь, и изнесе́те отсюду кости моя с собою. Воздвигшеся же сы́нове Израилевы от Сокхо́фа,/ ополчи́шася во Офо́ме при пусты́ни./ Бог же вожда́ше их:/ в день убо столпо́м о́блачным показати им путь,/ но́щию же столпо́м о́гненным свети́ти им./ И не оскуде́ столп о́блачный во дни́,/ и столп о́гненный но́щию пред всеми людьми.

На лити́и стихи́ры, глас 8:

Прииди́те, празднолюбцы и по́стников сословие,/ верою сошедшеся, хвалебныя песни принесем Марии Приснодеве,/ днесь бо наста́ светлое торжество,/ явление честны́я Ея иконы Иверския,/ юже обстоя́ще со страхом и любовию, воспои́м Богоро́дице:/ радуйся, неисповедимая радосте всем;/ радуйся, образом Твоим святым нас просвеща́ющая;/ радуйся, всем похвала́́ и утверждение;/ радуйся, спасе́ние душ на́ших.

Что Тя нарече́м, Богоро́дице Де́во:/ столп ли огненный, к вечному наследию нас ведущий;/ стену ли крепкую, я́ко православный род защищаеши;/ стража ли неусыпна, я́ко оби́тель Твою́ охраняеши и спасаеши./ Темже от належа́щих бед избавляеми, возопии́м Влады́чице:/ радуйся, благи́х виновная,/ известное христиан упование.

Сла́ва, и ны́не, глас 5:

Радуется Афон, ликовству́ет оби́тель Иверская,/ торжествует и вся страна́ Российская:/ Бо́жия бо Матерь чудотворным Свои́м образом ми́лостивно нас посети́ла есть,/ дарует же нам в ну́ждах помощь, в ско́рбех утеше́ние,/ в болезнех исцеле́ние, в беда́х избавле́ние/ и всем ве́рным велию ми́лость.

На стихо́вне стихи́ры, глас 4:

Славное иконы Твоея́ явление,/ Богоро́дице Пренепорочная, славословим днесь/ и Твое́ заступление нам пра́зднуем,/ я́ко бо Ма́ти сущи Живота,/ мо́лиши о нас Христа́ Бо́га нашего,/ на Тя крепкую надежду возложивших,/ Путеводи́тельнице нело́жная на́шего спасения.

Стих: Помяну́ и́мя Твое́/ во вся́ком роде и роде.

Отложи́м, ве́рнии, печаль:/ се бо вторая неопали́мая купина́, икона Богоматере,/ и́ноки афонскими зримая,/ на очищение грешных является.

Стих: Слы́ши, Дщи, и виждь,/ и приклони́ у́хо Твое́.

Назна́менующи во странствии житейстем Твое́ нам води́тельство, являешися, Богомати, в столпе огненне,/ да нас, блуждающих,/ путево́диши к вечным обителем.

Сла́ва, и ны́не, глас 5:

Прииди́те, вси мона́си и мирсти́и,/ просла́вим Пречи́стую Де́ву Богоро́дицу:/ днесь бо, ради священныя иконы,/ в мори путие́ Ея и стези́ Ея в вода́х многих:/ от Нике́и бо в столпе́ огненне понт морски́й ко Афону преходит/ и дар пришествием Свои́м ве́рным подае́т./ Мы же, просвещаеми лучами благода́ти,/ Хода́таицу спасения на́шего ублажаем.

НА У́ТРЕНИ

По 1-й кафизме седа́лен, глас 1:

Пресветлаго зра́ка Твоего́́ явление/ радость приносит всем верующим/ и обители Иверстей да́рует стра́жа неусыпна/ и от бед избавление./ Темже пое́м Ти, Пречистая:/ покрыва́й нас при́сно Покро́вом Твоим.

Сла́ва, и ны́не, глас 8:

Сей день Го́сподень, радуйтеся, лю́дие,/ се бо светоносный облак на возду́се чу́дно простира́ется,/ и столпо́м о́гненным пред Афоном явлется/ Едина и Единаго на руках Ма́терних держащи Христа,/ Зижди́теля вселенныя,/ во спасе́ние душ на́ших.

По 2-й кафизме седа́лен, глас 3:

Веселятся днесь све́тло Афона па́ствы,/ пе́сней множество слагают,/ любо́вию Непорочную почита́юще,/ величеством благода́ти крася́щеся,/ юже прияша пришествием иконы Всенопорочныя Отроковицы,/ зарями Богове́дения благоче́стно пою́щих озаряющия.

Сла́ва, и ны́не, глас 5:

Чудо пресла́вное зри́тся днесь:/ в вода́х бо огнено́сная Богоотрокови́цы икона показу́ется,/ и зна́мения лучи испуща́ет,/ и пребывание по́стников чудом спасает./ Сего ради благодарственно вопием:/ радуйся, Благодатная.

Величание:

Величаем Тя,/ Пресвята́я Де́во,/ Богоизбранная Отроковице,/ и чтим образ Твой святый,/ имже то́чиши исцеления/ всем, с верою притекающим.

Псалом избра́нный: Помяни, Го́споди, Давида и всю кротость его:

По полиеле́и седа́лен, глас 8:

Величие Твое́ кто испове́сть, Богоро́дице,/ явлением бо Твоея́ иконы удивила еси́ вся православныя,/ многия неду́ги врачу́ющи и болезни исцеля́ющи./ О Всемилостивая Влады́чице,/ не лиши нас и ны́не Твоего́́ заступления,/ но моли́твами Твоими защити́ и спаси́ православныя люди/ и силою Твое́ю огради́,/ да Тобо́ю хва́лящеся/ и все упование на Тя возлага́юще,/ не постыдимся во веки.

Сла́ва, и ны́не, то́йже.

Проки́мен, глас 4: Помяну́ и́мя Твое́ во вся́ком роде и роде. Стих: Отры́гну се́рдце мое слово благо. Вся́кое дыха́ние да хвалит Го́спода. Стих: Хвалите Бо́га во святы́х Его́. Ева́нгелие от Луки, зача́ло 4. По 50-м псалме: Сла́ва: Моли́твами Богоро́дицы,/ Милостиве, очисти/ множества согрешений на́ших. И ны́не: то́йже. Помилуй мя, Боже:

Стихи́ра, глас 6:

Егда явление чу́днаго Твоего́́ образа приспе́,/ тогда афонстии отцы,/ столп огненный на мо́ри зряще,/ страхом одержи́ми, недоумева́ху./ Гаврии́л же, я́ко вторы́й Петр, по мо́рю ходя,/ со слезами вопия́ше Тебе́:/ о Пресвятая,/ прииди́ и сохрани достояние Твое́ от враг ненаве́тно.

Канон Пресвятей Богоро́дице на 8, ирмо́сы по два́жды, глас 8.

Песнь 1

Ирмо́с: Колесницегони́теля фарао́ня погрузи́,/ чудотворяй иногда,/ Моисе́йский жезл, крестообра́зно поразив/ и раздели́в море,/ Изра́иля же беглеца́, пешехо́дца, спасе́,/ песнь Бо́гови воспева́юща.

От скверных устен хваление приими́, Всенепоро́чная,/ я́коже прежде Сын Твой, Бог же мой и Господь, прият две ле́пты вдовицы,/ и разрешение прегрешений моих подаждь,/ я́ко да по долгу величаю Тя.

Ангельское пение подоба́ше Тебе́, Ма́тери Божией,/ Творца бо сих родила́ еси́ странно./ Но и от нас приими́, Влады́чице, смиренныя сия́ молитвы,/ да пое́м Го́сподеви:/ славно просла́вися в нашей немощи.

Огусте́ша во́ды, огусте́ша и волны посреде́ моря,/ нося́щя Твою́, Богомати, икону./ Утверди и мое подви́гшееся се́рдце на камени заповедей Христовых.

Помощница и Покровительница была еси́, Де́во, обители Иверския,/ во́ев Амиры с корабли их в мори погрузивши,/ но потопи́ в пучи́не милосердия Сы́на Твоего́/ вся моя душевныя страсти и безчисленная моя прегрешения.

Песнь 3

Ирмо́с: Утвержде́й в начале Небеса разумом/ и зе́млю на вода́х основавый,/ на камени мя, Христе́, заповедей Твоих утверди,/ я́ко несть свят па́че Тебе́, Едине Человеколюбче.

Утверди се́рдце мое во уповании на Тя, Богомати,/ изми́ всякую гордыню и превозношение из помраченнаго ума моего, да вопию́:/ несть свят, я́ко Господь, и несть праведен, я́ко Бог наш.

Ты, о Богомати, немощствующия препоясу́еши силою,/ алчущия насыщаеши;/ посети и мою немощь/ и алчущаго и жаждущаго мене насы́ти Животнаго Хле́ба,/ чрез Твою́ девственную утробу сшедшаго с Небесе на землю.

Возста́ви, Влады́чице, от земли́ мене, убогаго,/ и от гно́ища греховнаго воздви́гни, нищаго,/ даждь молитву мне, молящемуся,/ да, велича́я, пою Твое́ заступление.

Непло́дствующий мой ум плодоно́сен покажи, Блага́я Де́во,/ от непло́дове рождшаяся:/ Ты бо плодоно́сие всех благ явлением иконы Твоея́ подае́ши.

Седа́лен:

Светлое днесь Заступницы нашея наста́ торжество./ Да взыгра́ется тварь,/ да ликовству́ют человечестии собори,/ созывает бо нас Святая Богородица ви́дети огнено́сную икону Свою,/ лучами милости верныя просвещающую. Темже, радующеся, вопие́м:/ спаси́, Госпоже, от глада, огня, меча и бед вся почитающия явление иконы Твоея́.

Сла́ва, и ны́не, то́йже.

Песнь 4

Ирмо́с: Ты моя кре́пость, Го́споди,/ Ты моя и сила,/ Ты мой Бог, Ты мое ра́дование,/ не оставль недра Отча/ и нашу нищету посетив./ Тем с пророком Авваку́мом зову Ти:/ си́ле Твое́й сла́ва, Человеколюбче.

Покры́ Небеса доброде́тель Твоя́, Богомати,/ и хвалы Твоея́ испо́лнися земля,/ но положи́ любовь держа́вную крепости Твоея́ и на мне, отча́янном.

Уготовля́ющи шествие чу́дней иконе Твое́й, даде́ бездна глас свой,/ воздвижеся солнце, и сияние ея я́ко свет бысть,/ но Ты изшла́ еси́ на спасе́ние людей,/ спасти́́ Твое́ насле́дие пришла еси́.

Услы́шавше слух пришествия Твоего́, иноцы убои́шася;/ уразуме́вше же дела Твоя́, ужасо́шася,/ но внегда́ смути́тися души́ моей, ми́лость Твою́ помяни, Влады́чице, да взываю:/ Сла́ва заступлению Твое́му, Богомати.

Ты еси́ моя кре́пость и сила, Богоро́дице,/ Тобо́ю почи́ю в день скорби моея,/ и из страны́ прише́льствия взы́ду Тобо́ю в Небесное наследие,/ и возрадуюся о Го́споде и Бозе, Спасе моем.

Песнь 5

Ирмо́с: Вску́ю мя отри́нул еси́/ от лица Твоего́, Све́те незаходимый,/ и покрыла мя есть чужда́я тьма, окаяннаго,/ но обрати́ мя и к свету заповедей Твоих/ пути моя направи, молюся.

Виждь, Чи́стая, от но́щи у́тренюющия люди паствы Твоея́,/ икону Твою́ Богохва́льную обстоящии,/ разрешения же грехов просящия, и жития исправления, и Божественныя славы прича́стия:/ не отри́ни убо нас от лица Твоего́, Света незаходимаго Мати.

Всею душею и мыслию в па́стве Твое́й вси слику́юще,/ псалмы, и пе́сньми духовными, и пением Боже́ственным икону Твою́ почитают,/ прощения грехов просяще и душ спасения./ Ты же, исцеле́ние наше сущи, сия́ вся подаждь, Влады́чице Богоневесто.

Храм Твой, Де́во, я́ко рай други́й показа́ся ны́не,/ я́ко древо жизни имея икону красоты́ Твоея́,/ ю́же вси усердно со благоговением и любо́вию целующе, взываем:/ Влады́чице, мир даждь нам,/ Влады́чице, стяжи́ нас,/ иного бо разве Тебе́ утешения не ве́мы.

Ре́ку Тя сладкую и пото́к насыще́ния,/ манну Небесную, изобилие и благода́ть приснотекущую во обители Твое́й живущии стяжавше,/ поют Рождество Твое́, Отроковице.

Песнь 6

Ирмо́с: Очисти мя, Спа́се,/ мно́га бо беззакония моя,/и из глубины́ зол возведи, молюся:/ к Тебе́ бо возопи́х, и услы́ши мя,/ Боже спасения моего.

В скорби се́рдца вопию́ Ти, Влады́чице,/ житейскаго мо́ря потопля́ем бу́рею,/ к Тебе́, я́ко тихому пристанищу, прибегаю:/ возведи от тли живот мой.

Бездна последняя грехов обы́де мя, и исчезает дух мой,/ но простри, Влады́чице, высокую Твою́ мышцу/ и, я́ко Гаврии́ла, и мене, ко Твое́й иконе прибега́юща, невредима сотвори.

Не отри́ни мене до конца от лица Твоего́, Ма́ти незаходимаго Света,/ не попусти́ мне погря́знути в пучи́не беззаконий,/ но возведи мене от бла́та страсте́й, да взыдет из истления живот мой/ и пожру́ Тебе́ со гла́сом хваления и испове́дания.

Храм нося́й телесный весь оскверне́н,/ Тебе́, Пречистому храму Вечнаго Сло́ва,/ дерзаю в честно́м храме Твое́м, пред Твое́ю святою иконою приносити смиренныя моя молитвы./ Ты же, я́ко Милостивая, очисти мя Твоим благоутробием.

Конда́к, глас 8:

Аще и в море вве́ржена бысть свята́я икона Твоя́, Богоро́дице,/ от вдовицы, не могу́щия спасти́ сию от врагов,/ но яви́лася есть хранительница Афона/ и врата́рница обители Иверския, враги устрашающая/ и в православней Российстей стране/ чтущия Тя от всех бед и напа́стей избавля́ющая.

И́кос:

В столпе́ о́гненне явльшуюся Богоматере икону ви́девше,/ возопи́ша по́стников иверских лицы:/ о Владыко, сподо́би нас прияти икону Матере Твоея́ во утеше́ние странствия нашего;/ ты же, Гаврии́ле, дерзай и вни́ди в море,/ и приими́ во объятия твоя́ сокровище, нам являемое,/ да будет нам страж неусыпный, покров же, и радость всем христиа́ном,/ и хранительница, от бед и напастей избавляющая.

Песнь 7

Ирмо́с: Бо́жия снизхождения/ огнь устыде́ся в Вавило́не иногда,/ сего ради о́троцы в пещи радованною ногою,/ я́ко во цве́тнице ликующе, поя́ху:/ благословен еси́, Боже отец на́ших.

Согреши́хом, беззако́нновахом, непра́вдовахом пред Го́сподем,/ но, Влады́чице моя Богоро́дице,/ я́ко Благая угаси огнь Его́ праведнаго гнева Твоим теплым хода́тайством, да пое́м Ему:/ отец на́ших Боже, благословен еси́.

В пещи́ искушений и бед опаляемыя ороси́, Богомати, струя́ми Твоих щедрот,/ да посрамя́тся врази́ наши и да разумеют вси,/ я́ко Ты едина еси́ Владычица Богородица, по всей вселе́нней сла́вимая.

Престо́ле Царя Славы, Честнейшая Херувим, одушевленный хра́ме, в немже всели́ся Господь,/ твердь Небесная, на нейже возсия́ Солнце правды, Христос,/ Тя поем, Богомати, и превозносим во вся ве́ки.

Ты еси́ веселие и в пусты́нях живущим,/ Ты еси́ и стольнаго гра́да утеше́ние и похвала́, Де́во Марие,/ препетая и превозносимая во веки.

Песнь 8

Ирмо́с: Седмери́цею пещь/ халде́йский мучитель/ Богочестивым неи́стовно разжже́,/ силою же лучшею спасены сия́ ви́дев,/ Творцу и Избавителю вопия́ше:/ отроцы, благослови́те,/ священницы, воспо́йте,/ лю́дие, превозносите во вся ве́ки.

Поют Тя А́нгельския силы, превозносит человеческий род,/ благословя́т Тя вся тварь, Пречистая Де́во Богоро́дице./ Приими́ и от Мене, недостойнаго, приносимое Тебе́ хваление.

Пойте, иноцы Афона,/ благословляй, земле Иверская,/ превозноси, вся стране́ Российская, Благу́ю Владычицу,/ реки чудес от Своея чудотворныя иконы источающую./ Хва́лим, благослови́м, покланя́емся Ти, Богоро́дице, пою́ще и превознося́ще во вся ве́ки.

Подобием иконы Иверския не то́чию святый Афон просвещается,/ но и стольный град Москва украшается,/ от того чудесную помощь прие́мля и источник утешения в нем обретая.

Еще и страна́ Новгородская и ини́и гра́ды и ве́си/ подобием Иверския иконы Твоея́, Влады́чице, освяти́шася и чудесы просветишася, вопиюще:/ Го́спода пойте и превозносите во вся ве́ки.

Песнь 9

Ирмо́с: Ужасеся о сем Небо/ и земли удивишася концы,/ я́ко Бог явися человеком пло́тски/ и чрево Твое́ бысть пространнейшее Небес./ Тем Тя, Богоро́дицу,/ А́нгелов и человек чиноначалия величают.

Тайна глубины́ Рождества Твоего́́ ум А́нгельский ужасает, Де́во,/ и пречистая икона Твоя́ демоны прогоняет,/ не терпя́ще бо взирати на си́лу ея, бегают и исчезают./ Мы же той любе́зно покланя́емся и облобыза́ем и Тя, Богоро́дицу, величаем.

Прииди́те вси, поклони́мся, припаде́м и возвеличим Божию Матерь,/ призре́вшую на нас, смиренных, алчущия исполняющую благ/ и положившую с нами завет милости во явлении Своея дивныя иконы.

Богородице Де́во, упование христиа́ном,/ проба́ви и на́шему роду милости Твоя́, бывшая отцем нашим,/ покрый и соблюди нас от всякаго зла.

О Всемилостивая христиа́ном Помощнице,/ не может Тя воспети досто́йно язык человеческий и А́нгельский,/ я́ко всея твари честне́йшую и земных сла́внейшую,/ но приими́ милостивно сие приносимое Тебе́ от нас моление/ и спасай нас всегда, на Тя бо упование возложи́хом.

Ексапостиларий:

Икону Твою́ всечестну́ю прии́м Гаврии́л во объятия, вопия́ше Тебе́, Влады́чице:/ о сладкая Ма́ти Царя Христа,/ бу́ди покров Твое́й обители,/ радость же всем христиа́ном и Споручница жизни вечныя.

На хвалитех стихи́ры на 4, глас 4:

О, несказанныя благости!/ О, славнаго явления иконы Богоматере,/ яже сияет чудесы и просвещает благода́тию верно приходящия!/ Ю́же с веселием приемлюще,/ Чистую Богоотрокови́цу/ достодо́лжно пе́сньми почитаем и ублажаем.

О, преславнаго Твоего́́ о нас, Влады́чице, промышле́ния!/ Чу́дную бо Твою́ икону Афону посылаеши/ и я́ко стража нам неусы́пна ту́ю подае́ши милостивно/ и утеше́ние странствию нашему./ Темже, познавше Твоя́ честна́я чудеса, песньми Тя величаем.

О, преславнаго чудесе́!/ Како огнено́сная икона на волна́х морских, я́ко на колеснице но́сится,/ светлыми лучами благода́ти умы просвещающи;/ ея́же торжество песньми почита́юще радостно,/ славу возсылаем Богороди́тельнице.

Сла́ва, и ны́не:

Твой глагол исполняя, Богомати,/ праведный Гаврии́л немо́кренно по воде морсте́й пешеше́ствова/ и, восприим священную икону Твою́,/ лик пе́сненный состави/ и торжество с по́стники афонскими совокупи́./ Темже и мы, удивляющеся, вопие́м Первовино́вному:/ сла́ва Тебе́, сотворшему дивная,/ Единому Царю и Бо́гу, молитв ради Богоро́дицы!/ Сохрани люди христианския/ и победы на враги даруй, я́ко Всесилен.

Славословие великое и отпуст.

НА ЛИТУРГИ́И

Блаженны от кано́на, песнь 3-я и 6-я. Проки́мен, песнь Богоро́дицы, глас 3: Величит душа Моя Го́спода, и возрадовася дух Мой о Бозе, Спасе Моем. Стих: Я́ко призре́ на смирение рабы Своея, се бо отны́не ублажат Мя вси роди. Апостол к Филипписи́ом, зача́ло 240. Аллилуиа, глас 8: Слы́ши, Дщи, и виждь, и приклони́ у́хо Твое́. Стих: Лицу Твое́му помолятся богатии лю́дстии. Ева́нгелие от Луки, зача́ло 54. Причастен: Чашу спасения прииму и Имя Господне призову.

* * *

Ве́домо буди, я́ко празднование Пресвятей Богоро́дице святыя ради Ея иконы Иверския творится октября в 13-й день, февраля в 12-й день и во вторник Светлыя седмицы по уставу свята́го Благовещения.

Иверская икона Пресвятой Богородицы

На Го́споди, воззва́х: стихи́ры, глас 4.

Подо́бен: Я́ко до́бля:

Вери́гами связуеми и в темнице заключа́еми,/ и звере́м во снедь издава́еми,/ пове́шени и стру́жеми, во огнь же вмета́еми,/ и Божественную помощь с Небесе прие́млюще,/ непоколеби́ми пребы́сте любо́вию Владыки, Спаса всех,/ Ка́рпе и Папи́ле премудрии.

На ка́мени веры утвердив твое́ помышле́ние,/ неуклонный мудрова́нием, мучениче Папи́ле,/ каменобие́мь, радовался еси́,/ Боже́ственному подо́бяся мучеников начальнику архидиакону Стефа́ну,/ я́ко служитель и я́ко Божиих тайн слуга,/ я́ко сочи́слен мучеником и А́нгелом собеседник.

На пути шествующе свидетельства неукло́нно,/ железным обу́щам¹⁷ пригвождаеми,/ врага и губителя жа́ла, всехва́льнии, сокруши́сте тверде/ и победами венча́стеся;/ тем вся Христова Церковь празднует святу́ю вашу память,/ светоно́сную и благознамени́тую.

Сла́ва, глас 6:

Я́ко досто́ин в Богови́дцех/ Небеса ты видел еси́, преподо́бне, отве́рзена/ и Го́спода, на Престо́ле седяща,/ и Херуви́ми и Серафи́ми о́крест Его́,/ и от Тебе́ паки мы просве́щшеся,/ священное твое́ стадо, Ка́рпе, вопие́т тебе́:/ проси мира ми́ру и душа́м нашим ве́лия ми́лости.

И ны́не, Богоро́дичен или́ Крестобогоро́дичен:

Подо́бен: Тридне́вен:

На Древе Живот наш зрящи,/ Всенепоро́чная Богоро́дице, ви́сящь,/ ма́терски рыдающи, вопияла еси́:/ Сы́не Мой и Боже Мой,/ спаси́ любо́вию пою́щия Тя.

На стиховне Окто́иха.

Тропа́рь, глас 4:

Мученицы Твои, Го́споди,/ во страданиих своих венцы прияша нетленныя от Тебе́, Бо́га нашего,/ имуще бо кре́пость Твою́,/ мучителей низложиша,/ сокрушиша и де́монов немощныя де́рзости./ Тех моли́твами/ спаси́ души на́ша.

Сла́ва, и ны́не, Богоро́дичен.

НА У́ТРЕНИ

Оба кано́на Окто́иха и мучеников кано́н на 4, егóже краегране́сие: Карпа и Папилу песньми венчава́ю. Иосифово. Глас 1.

Песнь 1

Ирмо́с: Твоя́ победи́тельная десница/ Боголе́нно в крепости прославися:/ та бо, Безсме́ртне,/ я́ко всемогу́щая противныя сотре́,/ Израильтя́ном путь глубины новосоде́лавшая.

Карпа и Папилы, крепких истины свидетелей, похваляюще па́мять всесвященную,/ победители тыя соделавшаго Го́спода славы Боголепно воспои́м.

По́стническим прежде огнем искуси́вшеся,/ страданием же второ́е, мученицы,/ яви́сте истинно душе́вное искушение/ и па́че злата Божественными нравы возсия́сте.

Силою Боже́ственною к ранам, к пове́шению,/ ко огню и к смерти, славнии, устреми́вшеся,/ гонителей кре́пость победисте/ и нетленными венцы увязо́стеся.

Богоро́дичен: Двере Света, от Твоея́ нерастле́нныя утробы возсиявшаго,/ возсия́й ми покаяния просветительныя лучи́/ и отжени грехов моих мрак, Богорадованная.

Песнь 3

Ирмо́с: Еди́не Ве́дый человеческаго существа не́мощь/ и милостивно в не воображся,/ препоя́ши мя с высоты силою,/ еже вопити Тебе́, Святый,/ одушевленный храме, неизреченныя Славы Твоея́, Человеколюбче.

Плод принесл еси́ Христу́ приятен и священнейший/ священнаго с тобо́ю Агафодо́ра, раны и язвы претерпевшаго/ и одолевша с плотию врагу безплотному зна́ния крепостию.

Неправедно сокрушаемь, мудре, повелением судящаго,/ и по ре́бром стру́жемь терпел еси́;/ огнем же паки подпаляемь,/ струя́ми кро́вными пре́лести у́гли погасил еси́, Ка́рпе многострадальне.

Видети желая Христа, ви́ся высоко́, и огне́м пе́рси поджигаем,/ до́блественно терпи́ши, Богому́дре Папи́ле,/ росо́ю Ду́ха яве орошаемь и Божественными надеждами укрепляем.

Богоро́дичен: Чертог нескверный Божий, и го́ру несеко́мую,/ и кивот святый, и трапезу ве́рнии Тя вси, Чи́стая, проповедаем,/ и кадильницу невещественнаго У́гля, Пресвята́я Де́во Всенепоро́чная.

Седа́лен, глас 1.

Подо́бен: Камени запечатану:

Плоды Богозна́ния возделав труды́ твои́ми, из ко́рене безбожия исторгл еси́ остны́¹⁸;/ и ма́стию пома́зався Богоде́тельною, упа́сл еси́ люди, священниче;/ и, законно пострадав, сугубых почестей, Карпе, сподо́бился еси́./ Сла́ва Давшему ти кре́пость;/ Сла́ва Венча́вшему тя;/ Сла́ва Де́йствующему тобо́ю всем исцеления.

Сла́ва, и ны́не, Богоро́дичен:

Руце Твои́ Божественнии,/ имиже Создателя понесла еси́, Де́во Пресвятая, воплощшагося благостию,/ простерши, умоли Его́ избавити нас от искуше́ний, и страсте́й, и бед,/ хва́лящих Тя любо́вию и вопиющих:/ Сла́ва Всельшемуся в Тя,/ Сла́ва Прошедшему из Тебе́,/ Сла́ва Избавльшему нас Рождеством Твоим.

Крестобогоро́дичен:

А́гнца на Кресте А́гница зрящи,/ с разбойником распинаема Тя, долготерпели́ве Слове,/ и копие́м в ре́бра пробода́ема,/ восклицаше, вопиющи ма́терски:/ что странное и ужасное, Иисусе Мой, та́инство, несказанно совершаемое?/ како покрываешися гробом, Неопи́санный Боже?/ да Мя, рождшую Тя, не оставиши, Сы́не Мой Сладча́йший.

Песнь 4

Ирмо́с: Го́ру Тя, благода́тию Божиею приосене́нную,/ прозорливыма Авваку́м усмотри́в очи́ма,/ из Тебе́ изыти Изра́илеву/ провозглаша́ше Свято́му/ во спасе́ние наше и обновле́ние.

Нереши́мою связан любо́вию Создавшаго, каменобие́м яве, Папи́ле, мучениче Христов,/ победил еси́ метающия терпением Богодарова́нным ти, всехвальне,/ мужеу́мно с завистию боря́ся.

Ко вся́кому виду боле́зней, до́блественнейшии, ополчистеся,/ к звере́м вве́ржени бывше, ку́пно ты́я победи́сте,/ я́коже Дании́л, Божественными образы веры,/ Ка́рпе и Папи́ле, мученицы славнии.

Сый злобы обрета́тель вселукавый Христовы уго́дники неми́лостивно пожже́нию негасимому предает,/ осла́бити их си́лу мнев,/ но испепелишася того коварствия.

Богоро́дичен: Пристанище спасения, Де́во, Тя и́мамы,/ и́же в пучи́не лю́тых обуреваемии всегда:/ к Тебе́ прибегаем и на Тя уповаем,/ да не убоимся невидимых врагов наве́та.

Песнь 5

Ирмо́с: Просвети́вый сия́нием/ пришествия Твоего́, Христе́́,/ и осветивый Кресто́м Твоим мира концы/ сердца́ просвети́ светом Твоего́́ Богоразу́мия/ православно пою́щих Тя.

Ни бед гонения, ни глад, ниже́ смерть/ разлучи́ от любве́ Христовы Богомудрых,/ но усе́рднейше возда́ния предзряще, неудобных нерадиша.

Вжиля́еми Боже́ственною силою,/ претерпе́сте люте́йшая проверте́ния стоп, всехва́льнии,/ путь шествующе свиде́тельства/ и жа́ла безбожия сокрушающе.

Неугасимый свете́льник страдания нося́ще,/ претеко́сте неве́жества нощь, мученицы,/ и Све́ту прибли́жишася невечернему,/ я́ко дне и́стинно сы́нове верою.

Богоро́дичен: Зачала́ еси́ неискусому́жно Бо́га Невместимаго,/ родила еси́ Преесте́ственнаго Создателя естества./ Ве́лие та́инство, недомысленное чудо, Де́во Едина Пренепорочная.

Песнь 6

Ирмо́с: Обы́де нас после́дняя бе́здна,/ несть избавля́яй,/ вмене́хомся, я́ко о́вцы заколе́ния,/ спаси́ люди Твоя́, Боже наш:/ Ты бо кре́пость немощству́ющих и исправление.

Благоуха́ют ваша доброде́тельства челове́ческим со́нмом,/ злосмра́дие отгоня́ще яве многобожия, достославнии:/ ибо Божие ны́не благовоние явистеся, мученицы.

Возгара́емый пла́мень росо́ю веры погаси́сте, блаженнии,/ и возжго́сте желание те́пле, Агафони́ке сущей с вами благосла́вными,/ с неюже мужественне страсти совершисте.

Обощря́емы болезней приложеньми, Ка́рпе и Папи́ле, доблии страдальцы,/ мечи истинно небокова́ннии явистеся, вражия ополче́ния секу́ще.

Богоро́дичен: От тины страсте́й и от рова падений воздвигни мя/ и упра́ви раба Твоего́, Чи́стая, испове́дающаго Тя, Богоро́дицу:/ Ты бо еси́ при́сно па́дающих исправление.

Конда́к, глас 4:

Подо́бен: Вознесы́йся:

Я́ко сокровище многоце́нное, Владыка,/ и источник, источа́ющ то́ки исцеле́ний,/ сущим на земли́ подаде́ мо́щи ваша,/ неду́ги убо отъе́млющия страсте́й разли́чныя,/ благода́ть же даю́щия душа́м непреста́нно./ Темже согласно любовию/ ваше, мученицы Божественнии, совершаем торжество.

Ин конда́к, глас 4:

Венчено́сцы явльшеся днесь в мире,/ прему́дрии, с Ка́рпом Папи́ле,/ просвеща́ете всех,/ и́же верою и весе́лием чту́щих па́мять вашу.

Песнь 7

Ирмо́с: Тебе́ умную, Богоро́дице, пещь/ разсмотря́ем, ве́рнии,/ я́коже бо о́троки спасе́ три Превозносимый,/ мир обнови во чреве Твое́м всецел,/ хва́льный отцев Бог и препросла́влен.

Юношески страсте́й пещь воздержа́ния росо́ю погаси́вше,/ огнь же кровми́ страдания,/ второе, мученицы, идольское огни́ще испепели́сте,/ хвальнаго воспева́юще Бо́га и препрославленнаго.

Станем, се отве́рзеся три́знище, не ослабе́ем,/ свыше Христо́с венцы́ терпения мучений ради я́ве подае́т живонача́льною рукою,/ взываху страдальцы усердною душею, Карп и Папи́ла.

Иже к Бо́гу всеобра́зным, святии, манове́нием обожа́еми я́ве,/ безбожных раны удобь претерпе́сте,/ я́коже ино́му стра́ждущу истинно сами пребыва́юще,/ хва́льнаго воспева́юще Бо́га и препросла́вленнаго.

Богоро́дичен: Девы, Чи́стая, нашея прама́тере, прокля́тство разрешила еси́ я́ве,/ благословения Начаток рождши, Всенепоро́чная Отрокови́це Браконеиску́сная,/ Eгoже благосло́вят чи́ни Небеснии,/ хва́льнаго отцев Бо́га и препросла́вленнаго.

Песнь 8

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаголюще:/ благослови́те вся дела Господня Го́спода,/ пойте и превозноси́те во вся ве́ки.

Светоно́сная днесь нам па́мять мученик,/ светом целе́ний озаря́ющи нас, вопию́щих, возсия́:/ благословите вся дела Господня Го́спода,/ пойте и превозносите во вся ве́ки.

Украси́лся еси́, я́ко архиере́й, я́ко Боже́ственный проро́к,/ я́ко свидетель страсте́й, всеблаженне, Христовых,/ я́ко Боже́ственное зна́мение, воспевая, Карпе всеблаженне:/ Го́спода пойте дела и превозносите Его́ во веки.

То́ки твои́х страда́льческих крове́й, пото́ки конечно безбожия пото́пльше,/ источник целе́ний яви́шася вопию́щим, Папи́ле мучениче:/ Го́спода пойте дела и превозносите Его́ во веки.

Богоро́дичен: Священный Тя Боже́ственных пророк лик/ проповедает Матерь бывшую, Всенепоро́чная, Божию,/ Емуже вси зовем:/ благословите вся дела Господня Го́спода/ и превозносите Его́ во веки.

Песнь 9

Ирмо́с: Образ чистаго Рождества Твоего́/ огнепали́мая купина́ показа неопа́льная,/ и ны́не на нас напа́стей/ свире́пеющую угаси́ти молимся пещь,/ да Тя, Богоро́дице,/ непрестанно величаем.

Я́коже приношения всеце́лая, я́ко жертвы совершенныя и непорочныя,/ принесо́стеся Творцу, всеблаженнии, мече́м кончину прие́мше,/ и ны́не, венцено́сцы, на Небесе́х жи́тельствуете.

Столпи́ необоримии яви́стеся Церкве, мученицы, и забрала,/ исто́чницы, во́ды исцеле́ний пролива́ющии,/ и светила светозарная и всесветлая,/ но́щи из греха благочестивыя избавля́ющая.

Уже́ к саме́м всели́вшеся светоза́рным селе́нием и Небе́сным,/ и светлостьми́ Божественными просвеща́еми,/ и радости присносущныя исполня́еми,/ о Папи́ле и Ка́рпе, за ны моли́теся.

Богоро́дичен: Но́сиши на объя́тиих, Пречистая, Херувимски я́ко Престол вся Носящаго,/ плотию нас ради по нам обложи́вшагося и сугу́ба про́ста ви́димаго,/ Егóже всегда моли́ о нас, воспева́ющих Тя.

Святые мученики Карп, епископ Фиатирский, диакон Папила, Агафодор и Агафоника, сестра Папилы

Тропа́рь, глас 2:

Добр купец бысть, Богому́дре Вениами́не,/ богатство бо свое́ тленно раздав,/ купил еси́ оным нетленное в Царствии Небеснем,/ в немже ны́не тамошних благ наслаждаяйся богатне,/ проси нам мира и ве́лия ми́лости.

Конда́к, глас 8:

Куплю житейскую я́ко тщетную оставль/ и шед, купил еси́ себе многоценен бисер Христа,/ Емуже во иночестем образе/ труды и подвиги, безменством же и послушанием, преподо́бне Вениамине, благоугождая,/ приял от Него велию и богатую ми́лость.

Преподобный Вениамин Печерский