12-й день
Преподобных отец Диони́сия и Амфило́хия, Глуши́цких, чудотворцев
Празднование Пресвяте́й Богоро́дице ради иконы Ея Иерусали́мския
Святых мученик Про́ва, Тара́ха и Андрони́ка и преподо́бнаго отца́ на́шего Космы́ святоградца и творца кано́нов, епископа Маиу́мскаго
На Го́споди, воззва́х: стихи́ры мучеников, глас 4.
Подо́бен: Дал еси́ знамение:
В лице́ сокруша́емь, и по вы́и ураня́емь,/ и же́злием раздробля́емь,/ рука́ми же изжига́емь, и главу́, му́чениче,/ и рожны́15 пробода́емь лю́те,/ уши́ма и устна́ма обре́зуемь,/ и о́цтом напая́емь,/ и звере́м поверга́емь, и мече́м усека́емь му́чениче,/ весели́лся еси́́, Тара́хе.
Терпе́л еси́́ бие́мь, и рожны́ пробода́емь,/ и лы́стом16 отре́заемым, о́чию лиша́емь,/ и звере́м, всеблаже́нне, в сне́дь дава́емь,/ и огню́ приближа́яйся, и мече́м главоусека́емь,/ му́чеников удобре́ние, и Це́ркве утвержде́ние,/ страда́льче Про́ве сла́вный, А́нгелом равноче́стне.
Огне́м сожига́емь,/ и воло́выми жи́лами бие́мь,/ струги стру́жемь,/ по лы́стом крои́мь,/ и Богосло́вный уре́заемь язы́к,/ и зубы́, му́чениче, су́рово, Андрони́че, искореня́емь,/ со зверьми́ же сплета́яся,/ и скончава́емь мечи́,/ по́двиг соверши́л еси́́, и вене́ц прия́л еси́́.
И́ны стихи́ры преподо́бнаго, глас 4.
Подо́бен: Я́ко до́бля:
Я́ко му́дрости тя́ пита́теля,/ и чистоты́ корми́теля,/ сокро́вище зна́ния, иера́рше Космо́,/ Богосло́вника изве́стнейшаго, учи́теля Боже́ственна,/ ве́рным просвети́теля/ похваля́ем, блаже́нне,/ моля́ще тобо́ю Влады́ку,/ от тли́ и бе́д и вся́каго вре́да/ все́м на́м изба́витися.
Воздержа́нием пожи́л еси́́,/ бде́нием же и посто́м,/ целому́дрием и смире́нием, сла́вне,/ ра́зумом вся́чески обогати́лся еси́́,/ ни́жних и привре́менных,/ и Вы́шними све́тлыми:/ и я́сно возгреме́л еси́́ недоуме́нное,/ стра́шное же и вели́кое, блаже́нне,/ все́х Царя́ строе́ния та́инство.
Смиренному́др и кро́ток,/ ти́х же и доброглаго́лив, уве́тлив и незло́бив,/ целому́дрен и пра́веден,/ препро́ст и це́л, преподо́бне Космо́,/ ты́ бы́в иера́рх от Бо́га священноявле́н еси́́,/ и упа́сл еси́́ на зла́це во́д спаси́тельных/ ста́до твое́, Богому́дре,/ те́м тя́ ны́не ублажа́ем.
Сла́ва, глас 4. Анатолия:
Во́инствоваше Христу́,/ я́же на земли́ кра́сная оста́висте,/ и крест на ра́мена взе́мше,/ му́к ра́ди многоплете́нных Тому́ после́довали есте́/ и пред цари́ и мучи́тели мно́гими не отверго́стеся Его́́/ А́нгели венцы́ побе́дными главы́ ва́ша увязо́ша,/ дерзнове́ннии душе́ю све́тло/ в Черто́г вели́кий внидо́сте,/ Про́ве, сла́во му́чеников,/ Тара́хе, де́монов губи́телю,/ и, Андрони́че, побе́до ве́рных,/ дерзнове́ние иму́ще ко Спа́су все́х,/ моли́теся о душа́х на́ших.
И ны́не, Богоро́дичен или́ Крестобогоро́дичен.
Подо́бен: Я́ко до́бля:
А́гнца и Па́стыря, Тя́ на Дре́ве я́ко ви́де,/ А́гница ро́ждшая рыда́ше,/ и ма́терски Ти́ веща́ше:/ Сы́не Возжеле́нне,/ ка́ко на Дре́ве Крестнем пове́шен еси́́, Долготерпели́ве?/ ка́ко ру́це и но́зе Твои́, Сло́ве,/ пригвозди́шася от беззако́нных,/ и Кро́вь Твою́ излия́л еси́́, Влады́ко!
На стиховне Окто́иха.
Сла́ва, мучеников, глас 1: Андрея Иерусали́млянина:
Трира́сленное собра́ние,/ равночи́сленнии Святы́я Тро́ицы,/ я́коже зве́зды све́тлыя,/ от восто́ка я́вльшеся,/ тва́рь созыва́ют к свяще́нному торжеству́,/ Про́в и Тара́х со Андрони́ком му́дрым:/ пло́ти бо своя́ звере́м преда́ша,/ и кро́вию зе́млю обагри́вше,/ венцено́сцы на Небесе́х со А́нгелы ликовству́ют,/ прося́ще о на́с Человеколюби́ваго Бо́га/ прегреше́ний оставле́ние дарова́ти и ве́лию ми́лость.
И ны́не, Богоро́дичен или́ Крестобогоро́дичен.
Подо́бен: Всехва́льнии мученицы:
Заколе́ние Твое́ непра́ведное, Христе́́,/ Де́ва зря́щи,/ пла́чущи вопия́ше Ти́:/ Ча́до Сладча́йшее,/ ка́ко без пра́вды умира́еши?/ ка́ко на Дре́ве ви́сиши,/ И́же всю́ зе́млю пове́шей на вода́х?/ не оста́ви Мене́ еди́ну, Благоде́телю Многоми́лостиве,/ Ма́терь и Рабу́ Твою́, молю́ся.
Тропа́рь мучеников, глас 5:
Святы́х му́ченик исправле́нием/ Небе́сныя си́лы преудиви́шася,/ я́ко в те́ле сме́ртнем,/ безтеле́снаго врага́ си́лою Креста́,/ подвиза́вшеся до́бре, победи́ша неви́димо./ И мо́лятся Го́споду/ поми́ловатися душа́м на́шим.
Сла́ва, преподо́бнаго, глас 8:
Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ архиере́ов Богодухнове́нное удобре́ние,/ Космо́ прему́дре,/ уче́ньми твои́́ми вся́ просвети́л еси́́,/ цевни́це духо́вная,/ моли́ Христа́ Бо́га, спасти́́ся душа́м на́шим.
И ны́не, Богоро́дичен или́ Крестобогоро́дичен.
НА У́ТРЕНИ
Канон Окто́иха един и святы́х два. Канон мучеников, егóже краегране́сие: Воспою мученик Твоих, Спасе, славу. Иосифово. Глас 8.
Песнь 1
Ирмо́с: Колесницегонителя фарао́ня погрузи́/ чудотворяй иногда́/ Моисейский жезл, крестообра́зно поразив/ и разделив море,/ Израиля же беглеца, пешехода, спасе́,/ песнь Бо́гови воспева́юща.
Мученическими укра́шени благода́тьми,/ Венцедателю Христу́ на Небесех любовию, мученицы, предстои́те,/ светом озаряеми Трисо́лнечнаго сия́ния,/ и вся просвещаете верою вас блажа́щия.
В гонении нечестия явистеся, всю прогоняюще злочестивую прелесть, мученицы непобедимии,/ доблественными подвиги, я́ко до́брии воини,/ я́ко Це́ркве утверждения и я́ко Истины держава.
Смы́сленным разумом, всемудрии,/ отразивше злобную бурю и свире́пеющееся море злочестия,/ духа тихостию к пристанищем преидо́сте Небе́сным, радующеся.
Душа́м мучеников ваши срадуются, мученицы, ду́си на Небесех истинно,/ Про́ве, и Андрони́че, и Тара́хе, блаженнии:/ му́жески бо болезни мучения претерпе́сте,/ победами Божественными прославля́еми.
Богоро́дичен: Иже Отцу́ и Духу Святому Слово Собезначальное в девственную утробу, восхотев, вселися,/ и плоть невра́щно бысть, и пострадав волею,/ мученическая Боже́ственная воинства верою страдати устроил есть.
Ин кано́н преподо́бнаго, егóже краегране́сие: Косму похвалим песнотворца мудренно. Глас 4.
Песнь 1
Ирмо́с: Моря чермную пучину/ невлажными стопами/ древний пешешествовав Изра́иль,/ крестообра́зныма Моисеовыма рукама/ Амали́кову си́лу в пусты́ни победил есть.
Удобри́в доброде́телей житие́ твое́, о́тче Космо,/ светом и блистании светя́ся света Трисия́ннаго,/ Влады́це твое́му я́ко предстоя, просветитися тя поющим моли́ся.
Нрав твой подобно являет тя, имея наречение:/ архиере́ев бо украше́ние, мудре, показался еси́,/ и утверждение монашествующих, и мудрости оби́тель был еси́.
Мудрости я́ко рачитель мудрейш, мудре,/ очистил еси́ Твою́ душу, всемирный Космо,/ мирскаго смущения страсти отгнав, я́ко мглу омраче́ния.
Богоро́дичен: Марию Непорочную и Чистую Отрокови́цу воспои́м,/ я́ко Божию Матерь благоговейно согласно прославляюще:/ радуйся, Чи́стая Богоневесто, Благословенная Ма́ти Де́во.
Песнь 3
Ирмо́с: Небе́снаго круга, Верхотворче Го́споди,/ и Церкве Зижди́телю,/ Ты мене утверди в любви Твое́й,/ желаний краю, верных утверждение,/ Едине Человеколюбче.
Крепко гонителю проти́вився, Тара́хе,/ и сокрушение лица терпя́ крепча́йше,/ челюсти сокрушил еси́ мысленных львов,/ доблествен быв силою Духа.
Великому́дренным разумом раны претерпе́л еси́,/ по хребту́ и чре́ву, мучениче Про́ве, растяза́емь и поджигаемь,/ и рожны́ перси, и Богославная твоя́ уста биема.
Я́ко а́гнец, вознесен быв,/ терпел еси́ болезни люте́йших ран, мучениче Андрониче,/ огня попале́ния и искорене́ние зубов,/ и Богословнаго твоего́ язы́ка отъятие.
Трисветлы, я́ко зве́зды, разумных сия́ний/ всю, славнии, тварь просвещаете, тьму отгоня́ще многобожия лести,/ страстотерпцы, мученицы светови́днейшии.
Богоро́дичен: Я́ко добру́, я́ко красну́/ и я́ко избра́нну, Чи́стая,/ Слово, И́же вся осуществовавшее Тя избрав,/ в Твою́ непорочную и Богоприятную утробу,/ восхотев, вселися Пресу́щественный.
Ин
Ирмо́с: Весели́тся о Тебе́ Це́рковь Твоя́́, Христе́́, зовущи:/ Ты моя кре́пость, Го́споди,/ и прибе́жище, и утвержде́ние.
Пе́сньми красными к песнословию/ Христову возвеселил еси́ Невесту,/ ясно изложив Христовы Божественныя тайны.
Законы ты воспита́вся Христовыми, о́тче Космо,/ питал еси́ стадо, вверенное тебе́,/ православными повеле́ньми.
В себе огнем Божественнаго рвения/ распаля́ему душу, преподо́бне о́тче Космо, стяжав,/ вся ереси отгнал еси́.
Богоро́дичен: Преидоша убо се́ни, Христос же Истина возсия,/ плоть приим, Ма́ти Бо́жия, от боку́ Твое́ю, и спасе́ ны.
Конда́к преподо́бнаго, глас 8.
Подо́бен: Взбранной:
Укра́шен доброде́тельми, Космо́ Богодухновенне,/ Церкве Христовы украше́ние был еси́:/ пе́сньми бо украси́л еси́ сию, блаже́нне./ Но моли́ся ко Господу избавитися нам от вся́ких козней ратника,/ тебе́ зовущим:/ радуйся, о́тче требога́те.
Седа́лен мучеником, глас 8.
Подо́бен: Прему́дрости:
Святыя Троицы крепкою вооружившеся верою юношески,/ Андрони́к, Пров же и всемудрый Тара́х/ многобо́жия лести державу потреби́ша/ и люди к Божественней любви привяза́ша./ Тем победныя прии́мше почести,/ лико́м свеселятся сил Безплотных,/ к ни́мже верою возопиим:/ молите Христа́ Бо́га грехов оставле́ние дарова́ти/ чтущим любо́вию святу́ю па́мять вашу.
Сла́ва, преподо́бнаго, глас то́йже:
Благочестием и верою воспита́вся,/ и премудростию украси́в ум и душу,/ всех избегл еси́ земных попечений,/ особь же пожив и ум в неизреченныя вложив,/ великия сподо́бился еси́ благода́ти./ Тем и Божественную Христову Церковь украси́л еси́/ песньми медото́чными и ученьми, святите́лю о́тче наш Космо́:/ моли́ Христа́ Бо́га грехов оставле́ние дарова́ти/ чтущим любо́вию святу́ю па́мять твою́́.
И ны́не, Богоро́дичен:
Премудрость и Слово в Твое́м чреве заче́нши неопально, Ма́ти Бо́жия,/ ми́ру родила еси́ мир Содержащаго/ и во объятиях понесла еси́ вся Носящаго, Питателя всех и Творца твари./ Темже молю Тя, Всесвятая Де́во, и верно сла́влю Тя избавитися ми от прегрешений/ и в день Суда, егда́ предстати и́мам пред лицем Создателя моего,/ Влады́чице Де́во Чи́стая, Твою́ помощь тогда подаждь ми,/ вся бо можеши, елика хощеши, Всепетая.
Крестобогоро́дичен:
А́гнца, и Пастыря, и Изба́вителя/ А́гница зрящи на Кресте, восклицаше плачущи,/ и, горько рыдающи, вопияше:/ мир убо радуется, прие́мля Тобо́ю избавление,/ утро́ба же Моя горит, зрящи Твое́ распятие,/ еже терпи́ши за милосердие милости./ Долготерпеливе Го́споди, милости бездно и источниче неисчерпаемый,/ умилосердися и даруй согрешений оставление/ верою поющим Божественныя Страсти Твоя́.
Песнь 4
Ирмо́с: Ты моя кре́пость, Го́споди,/ Ты моя и сила,/ Ты мой Бог, Ты мое радование,/ не оставль недра Отча/ и нашу нищету́ посети́в./ Тем с пророком Авваку́мом зову Ти:/ си́ле Твое́й сла́ва, Человеколюбче.
Закон Твой соблюдающе, Слове, мученицы, беззаконных законы возненави́девше/ небрещи́ Тебе́ Творца повелева́ющия де́монскими ухищре́ньми,/ и все претерпевше треволне́ние мук, Небе́сную тишину получиша.
Любя Христово иго носити подвыйное на выи твое́й,/ еюже радуешися, сокрушаем,/ Крест же, жезл державныя, Тара́хе всеблаженне, силы имы́й,/ па́личная умножения терпи́ши, взывая:/ си́ле Твое́й сла́ва, Человеколюбче.
Я́ко си́лен Боже́ственным быв Духом,/ лы́стов твои́х болезненное мужественно, Про́ве, сокрушение и очес изятие претерпе́л еси́,/ просвещаемь знанием Троицы, совершеннейше,/ и с Вы́шними лики, мучениче, сочета́яся.
Юношески, мучениче, предстал еси́, Андрони́че, пред суди́щем,/ противля́яся врагу крепко./ Тем отре́зая лы́сты твоя́, сильнейше содеваша тя,/ главу его попира́юща и Горнее тебе́ шествие сотворяюща.
Богоро́дичен: Едина Бо́га носиши во утробе воплоща́ема, еже быти всем подающаго./ Eгoже на три́знищи непрекло́нно испове́дающа,/ пострадаша Божественнии мученицы, Де́во Богоро́дице Препетая,/ А́нгелов чудо и демонов я́зва.
Ин
Ирмо́с: Вознесе́на Тя ви́девши Церковь на Кресте,/ Солнце пра́ведное,/ ста в чине своем,/ досто́йно взывающи:/ сла́ва си́ле Твое́й, Го́споди.
Предочистив око твоего́ сердца страстнаго смущения, Космо́ иера́рше,/ пение воспел еси́ красное и спаси́тельное/ и Церковь просветил еси́.
Целе́ние всякаго уныния/ бывают твоя́, Космо, всехвальная лю́бящим пе́сненная наслаждения,/ догма́тами украша́емая и сладкогласия добро́тами.
Неду́гующую, всеблаженне, Церковь/ хульными веле́ньми Копрони́мовыми и блуди́выми/ исцелил еси́ писа́ньми, имиже сладкопесненно песнопе́л еси́.
Я́ко чудны твоя́ песни и всякаго, отче, исполнены разума,/ имиже я́вственно всем открыл еси́ Христовы тайны,/ страшныя истинно и пречудныя.
Богоро́дичен: Пресвятую воспои́м Богоро́дицу,/ Воплощенное родившую Божие Слово во дву естеству́, Единей же Ипостаси,/ я́коже Косма Боже́ственный научи́.
Песнь 5
Ирмо́с: Вскую мя отри́нул еси́/ от лица Твоего́, Свете незаходимый,/ и покрыла мя есть чужда́я тьма окаяннаго,/ но обрати мя и к свету заповедей Твоих/ пути моя направи, молюся.
Неукло́ннии путешественницы стези́ узкия и жестокия бы́сте,/ напа́стей мно́жество, я́ко пены морския отрева́юще,/ я́ко неразсе́днии столпи́, сердца́, страстотерпцы, я́ко на камени веры утвердивше.
Вити́йствуя Боже́ственная и Богословя спаси́тельная учения,/ усте́н терпи́ши растерзания, ума крепостию загражда́я уста́, на Бога, Тарахе мучениче,/вредосло́вие глаголющая сотво́ршаго.
На че́тверо протяза́ем и ран я́звами одержи́м,/ душе́вное показу́я доблественно востание./ Темже венценосец явлься с тождестрада́льники, Прове,/ Царю всех предстои́ши.
Богоро́дичен: Больши Горних сил еси́ Слово поро́ждши Отчее, Де́во,/ Собезначальное и Соприсносущное, Eгoже све́тлостьми страстотерпцы озари́вшеся,/ безбожия нощь преидоша.
Ин
Ирмо́с: Ты, Го́споди, мой свет,/ в мир пришел еси́,/ Свет Святый, обраща́яй из мрачна неве́дения/ верою воспева́ющия Тя.
Вещание твое́, му́дре, во вся концы протече́,/ песньми возвеселяя Божественными, Космо, хва́лящих тя.
Закон естественных па́че, – рекл еси́, -/ рождшую Пресвятую Богоро́дицу Пребоже́ственное Слово;/ тем тя ублажаем.
Песни дивныя сладостно поя́,/ воспел еси́ неизреченное Владычне,/ еже из Девы Пречистыя Рождество священнейше.
Богоро́дичен: Просветиша молния Твоего́́ Рождества, Всепетая, всю вселенную,/ и земля подвижеся от прелести к вере Его́.
Песнь 6
Ирмо́с: Очисти мя, Спа́се,/ многа бо беззако́ния моя/ и из глубины зол возведи, молюся:/ к Тебе́ бо возопи́х, и услыши мя,/ Боже, спасения моего.
Оружие Си́льнаго бывше верою,/ сердца́ зловерных му́жески уязви́сте,/ подви́гшеся на ня до́блественно, страстотерпцы великоименитии.
Я́ко древле Даниила в рове зве́рие устыде́шася,/ тако и ны́не крепких ору́жников веры на три́знищи устрашишася,/ укроти́вшеся честны́ми их страдании.
Прободе́ным Твоим ре́бром, Владыко,/ тожде образуя, Тарах приемлет в ре́бра прободе́ние,/ и о́цтом напая́ется, и огнем в главу лю́те попаляется.
Богоро́дичен: Заченши без се́мене во утробе Превечнаго, Чи́стая,/ и родила еси́ плотию естеством Безплотнаго,/ и млеко́м поила еси́ Питающаго всех, Богомати Неискусобрачная.
Ин
Ирмо́с: Пожру Ти со гласом хваления, Го́споди,/ Церковь вопиет Ти,/ от бесовския кро́ве очи́щшися,/ ради милости от ребр Твоих/ истекшею Кровию.
Словеса твоя́, я́ко сот сладкий, яви́шася,/ благочестивых сердца́ веселящя,/ пою́щих Крещение Спасово, Сретение же Симеоново и отпущение.
Не словесы́, но вещми́ ты представил еси́:/ востание, блаже́нне, Ла́зарево из мертвых, и детей хваление,/ и зависть иудейскую, – в песнех.
Возвышение Треблаженнаго Древа украси́л еси́,/ воспев песнь веселия всяческаго исполнену/ и радости сущия в пении того, всеблаженне.
Богоро́дичен: Глаголом Твоим Богодухнове́нным, Отрокови́це, после́дующе,/ Тя блажим вси ро́ди, Де́во,/ я́ко Бо́га Блаженнаго Блаженную бывшую Родительницу.
Конда́к мучеников, глас 2.
Подо́бен: Вышних ища:
Троицы нам славу яви́ша,/ до́блии Христовы оружницы и мученицы,/ с Тара́хом Пров же и Андрони́к:/ обличиша бо все мучителей безбожие, верою до́блественне страда́льчествовавше.
И́кос:
Иису́совы страсти до́блественно подража́вше,/ купно с Тара́хом мудрым Пров же и Андрони́к,/ радующеся, пострадаша на три́знищи, беззаконных обличающе безбожие./ Тем и мы, любо́вию чтуще па́мять их,/ в песнех похвалим и верно подвиги пропове́даем:/ я́ко дивен бо Господь, светильники в мире прославив сия,/ верою до́блественно страда́льчествовавшия.
Песнь 7
Ирмо́с: Божия снизхожде́ния/ огнь устыде́ся в Вавилоне иногда́,/ сего ради о́троцы в пещи́ ра́дованною ногою,/ я́ко во цве́тнице, ликующе, пояху:/ благословен еси́, Боже отец на́ших.
Уше́с отъятие претерпе́л еси́, радуяся, Тарахе славне,/ я́ко благопослушли́в раб Приклоншаго тебе́ ухо милостивнейшее/ и молитвы твоя́ Совершившаго, зовуще:/ благословен еси́, Боже отец на́ших.
Протяза́еми мученицы и му́ками ра́ними/ твердым смыслом пребеззако́ннующим сопроти́вистеся,/ и, победоносцы бывше, поете:/ благословен еси́, Боже отец на́ших.
Исполнися дух твой Божественныя росы́ и прохлаждения,/ егда ру́це огне́м и главу попаля́ху ти,/ и, я́коже дети, взывал еси́, Тарахе:/ благословен еси́, Боже отец на́ших.
Кропле́нием, святии, честны́х крове́й ваших пре́лести у́глие погасисте,/ ро́су Божественныя нам источающе благода́ти/ и исцеле́ния проливаете во́ды, хва́лящим вашу па́мять всегда.
Богоро́дичен: Истощевается во утробу Твою́, Отеческих недр не оставль, Соверше́ннейшее Слово,/ и плоть видится, и Младенец раждается,/ Емуже поем, Де́во, радующеся:/ благословен еси́, Боже отец на́ших.
Ин
Ирмо́с: В пещи Авраа́мстии отроцы перси́дстей/ любо́вию благоче́стия па́че,/ не́жели пламенем, опаля́еми, взываху:/ благословен еси́ в храме славы Твоея́, Го́споди.
Веселится вся́ка душа́,/ песнопения твоя́, Богому́дре отче, прочита́ющи и верою зовущи:/ отец на́ших Боже, благословен еси́.
Воистинну язык твой -/ трость книжника скоропи́сца, отче, бысть Свята́го Духа,/ писавший великая чудеса́ Слова.
Закон побеждается о тебе́ похвалении, отче,/ ни бо и́мать, что хвалению досто́йно вещати,/ тебе́ Владычняя изре́кшу вели́чествия.
Богоро́дичен: Кий Тя язык земных досто́йно ублажит, Бо́га рождшую, Богоневесто?/ Тем верою зовем:/радуйся, Де́во Чи́стая, радуйся, Препрославленная.
Песнь 8
Ирмо́с: Седмери́цею пещь/ халдейский мучитель/ Богочестивым неи́стовно разжже́,/ силою же лучшею спасе́ны сия́ ви́дев,/ Творцу и Изба́вителю вопияше:/ о́троцы, благословите,/ священницы, воспо́йте,/ лю́дие, превозноси́те во вся ве́ки.
Просвеще́ни я́звами и красными добро́тами добротво́рнаго и чуднаго страдания/ Господу предстои́те, венценосцы вси,/ Света тамо сущаго, испуща́ема бога́тно, исполняемы и любо́вию поюще непрестанно:/ отроцы, благословите,/ священницы, воспойте/ лю́дие, превозносите во вся ве́ки.
В себе неи́стовяся пребезу́мный мучитель,/ я́ко побежден вашими противле́нии,/ вскоре повелевает уморити мече́м вас, Соде́телю и Изба́вителю пою́щия:/ отроцы, благословите,/ священницы, воспойте,/ лю́дие, превозноси́те во вся ве́ки.
Троицы побо́рницы, добропобе́днии мученицы,/ и́же безбожия зи́му разо́рше теплотою веры,/ верных предсто́лпие, цве́ти кра́снии умнаго рая́,/ пристанища сущим в бури, непреклоннии столпи́,/ Андрони́к, и Пров, и Тара́х почитаются.
Богоро́дичен: Со Безплотными чи́нми,/ с мученик воинствы, со апостолы и пророки,/ всеми владычествующую тварьми Владычицу я́ко Херувим святейшу/ и Едину Божию Чистую Матерь благоче́стно поем,/ Христа́ превознося́ще во вся ве́ки.
Ин
Ирмо́с: Руце распросте́р Дании́л,/ львов зия́ния в ро́ве затче́,/ огненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы взывающе:/ благословите вся дела Господня Го́спода.
Жезло́м укрепля́еми твои́х догма́тов, славне,/ тя хва́лящии отвращаемся вся́ких еретических злоб/ и песнопоем благоче́стно Христу, зовуще:/ благословите вся дела Господня Го́спода.
Всех я́ко выше умом, Космо́, быв,/ ве́черю написал еси́, в нейже пре́дал есть Господь Живоно́сныя Тайны/ и предание страшное, безчеловечие же Иудино,/ егóже и бежати нас научил еси́.
Света Невещественнаго заря́ми осия́ем, Космо́ всепреподо́бне,/ Страсти пречистыя написал еси́,/ и погребение, и Востание, и Преображение Христово,/ научив вся воспевати:/ благословите вся дела Господня Го́спода.
Богоро́дичен: Жезл из ко́рене Иессе́ева Ты израстила еси́, Де́во Пречистая,/ Цвет, Го́спода, рождшая, нас благоухавшаго/ миродыха́тельными воня́ми Страсте́й Его́,/ тем вси Тя благословим, Марие Богоневе́сто.
Песнь 9
Ирмо́с: Устраши́ся всяк слух/ неизрече́нна Бо́жия снизхождения,/ я́ко Вышний волею сни́де даже и до плоти,/ от Девическаго чрева быв Человек./ Темже Пречи́стую Богоро́дицу, ве́рнии, величаем.
Возмогоша телесы́ тленными нетленныя подвиги пристяжа́ти, доблественнии,/ и А́нгелом уподобишася, Царство Божие приемше недви́жимое,/ Пров, и Тара́х, и Андрони́к, Христовы угодницы.
Яви́стеся у́глие, Огне́м Невещественным та́инственне вжигаеми,/ и пожго́сте вещественную лесть, великомученицы,/ и, возсиявше, я́ко свет, тварь озаряете/ и спасаете от страсте́й и бед души на́ша.
Днесь приносит празднство летнее светло и радостно Церковь Христова,/ Боже́ственное сие ваше торжество,/ и веселятся с вами пророцы, апостоли и вси мученицы,/ страстоносцы, победители великоимени́тии.
Взястеся в светови́дная ра́йская, страстоносцы, селения,/ оде́явшеся светлою ризою, юже исткасте многови́дными муками,/ и Престо́лу предстоите Вседержителя,/ о всех прилежно молящеся.
Богоро́дичен: Пощади мя, Спасе, рождейся и сохранивый Рождшую Тя нетленну по Рождестве,/ егда сядеши судити вся дела моя,/ беззакония и грехи моя, пре́зри я́ко Безгрешен,/ Милостив я́ко Бог и Человеколюбец.
Ин
Ирмо́с: Камень нерукосечный/ от несекомыя горы Тебе́, Де́во,/ краеугольный отсечеся,/ Христос, совокупивый разстоящаяся естества,/ тем веселящеся, Тя, Богоро́дице, величаем.
Богат, благороден быв, всеблаже́нне,/ доброде́тельными заря́ми сия́я и просвещая верныя, Космо,/ тя хвалами почитающия и православно пою́щия:/ тя величаем, трисвя́те.
Зако́ны сияя Божественными/ и те́ми, блаже́нне, твое́ стадо я́коже на па́жить живоно́сную наставив,/ я́ко подоба́ше, преподо́бне, к Небесе́м преставился еси́,/ плоды боле́зней твои́х пожина́я.
Показася тебе́ незаходяй Свет,/ ны́не преставльшуся тебе́ от привре́менных, я́ко очище́нному праведно,/ ясне́е же и честне́е Егóже наслаждаяся,/ помяни тебе́ почитающия, достославне.
Богоро́дичен: Тя, Пресвятую Де́ву и Серафим сла́внейшу,/ рождшую Христа, Богоро́дице,/ пребезначально возсиявшаго от Отца, я́коже пи́сано есть,/ славословяще, ублажаем.
Свети́лен Окто́иха. И святых.
Подо́бен: Учеником зрящим:
Триплете́нный лик страстотерпец,/ Тара́ха и Прова вси со Андрони́ком, песньми хва́льными увенчаем:/ строга́ния бо претерпеша, и лютыя раны, и болезни/ и со Христом царствуют.
Богоро́дичен: Херувим яви́лася еси́ сла́внейши и Серафим показалася еси́ вы́шши,/ я́ко Бо́га Рождшая воплощенна,/ земны́м же показавшаго стези правыя ше́ствовати, ко спасению водя́щия.
НА ЛИТУРГИ́И
Проки́мен глас 4: Святым, и́же суть на земли Его́, удиви Господь вся хотения Своя в них. Стих: Предзрех Го́спода предо мною вы́ну: Апостол ко Ефесе́ом, зача́ло 233. Аллилу́ия, глас 4: Воззваша пра́веднии, и Господь услыша их. Ева́нгелие от Луки, зача́ло 106. Причастен: Ра́дуйтеся:
Святые мученики Пров, Тарах и Андроник
Преподобный Косма, епископ Маиумский, творец канонов
Празднование святому Иоа́нну, Крести́телю Госпо́дню, на па́мять пренесения из Ма́льты во град Га́тчину креста из части Дре́ва Животворящаго Креста́ Госпо́дня, Филе́рмскаго чудотворнаго образа Бо́жия Ма́тере, пи́саннаго святы́м Евангели́стом Луко́ю, и десны́я руки мощей свята́го Иоа́нна Крести́теля
НА МА́ЛОЙ ВЕЧЕ́РНИ
Стихи́ры на 4, глас 8:
Днесь возсия па́мять твоя́, Предтече,/ я́ко светило ве́лие лучи обильныя чудес излива́ющи,/ благочестивых сердца́ озаряющи,/ и утеше́ние подающи всем с верою приходящим и покланяющимся тебе́,/ заступнику и поборнику земли Российския,/ и теплому молитвеннику о душах на́ших.
Светлое торжество духовное устроя́ет нам рука твоя́, Предтече,/ соводвори́тися бо с нами, почитающими тя усердно, пришел еси́ ви́димым образом,/ приносящи дары Божественныя благода́ти,/ сего ра́ди к тебе́ взываем:/ буди нам помощник, и ходатай, и руководитель,/ на спасения стези́ наставляющий.
Днесь пала́та присносве́тла является/ пришествием тебе́, светильника невечерняго Света./ Торжествует град, его же благословляет десница твоя́, Крестителю./ Светло празднуют благове́рнии лю́дие, вхождением ея осеня́емии,/ и покланяяся тебе́, глаголют:/ избави моли́твами твои́ми от всякаго зла,/ находя́щаго за множество прегрешений на рабы твоя́.
Боже́ственное сокровище и богатство неистощимое/ даровася державному граду десница твоя́, Предтече Го́сподень,/ и положися че́стне в Божественнем храме,/ и бысть духовнаго веселия вина́ тепле любящим тя, пророков верховнейший,/ иде́же священно собравшеся,/ воспеваем тя благодарным сердцем, я́ко новаго Авраама,/ пресе́льника к нам преславна и молитвенника о душах на́ших.
Сла́ва, глас 6:
Крест Твой, Го́споди,/ оружие на враги видимыя и невидимыя нам даровася,/ да будет убо неви́димая сила его/ огнь, попаляяй лица сопротивных,/ хотящих бра́ни неправедно.
И ны́не, глас то́йже:
Просте́рши Божественныя руце Твои,/ и́миже Создателя воплотившагося носила еси́,/ умоли Его́, Всеблагая Влады́чице,/избавити от искушений и страстей, и бед/ любо́вию чту́щих святу́ю икону Твою́, Приснодево.
На стихо́вне стихи́ры, глас 2:
Иде́же осеня́ет рука твоя́, Христов Предтече,/ тамо струи благода́ти, от Бо́га тебе́ данныя, изливаются обильно,/ страхом отбега́ют демони,/ различныя человеков исцеляются стра́сти и неду́ги,/ плоды духовных дел процветают, благочестие утверждается,/ и вси приходящии и прикасающиися ея,/ зарею Божественнаго света просвещаются/ и спасаются моли́твами твои́ми.
Стих: Благословен Господь Бог Израилев,/ я́ко посети и сотвори избавление людем Своим.
Светильник горя́ и светя́ от Богочеловека нарече́н был еси́, Крестителю,/ мы же возрадовахомся в день сре́тения твоего,/ егда десницею твое́ю Отечество наше озари́ти восхотел еси́,/ к ней же с любо́вию притекающе,/ воспоминаем Боже́ственное учение и А́нгельское на земли житие́ твое́,/ емуже подража́ти сподо́би славящих тя.
Стих: И ты, отроча́,/ пророк Вы́шняго наречешися.
Зря́ще телесныма очи́ма святу́ю твою́́ руку,/ умными очесы́ зрим тебе́, ангела,/ егóже посла́ в мир Великаго Совета А́нгел,/ пред лице́м Свои́м угото́вати пути Его́/ крещением покаяния во оставле́ние грехов,/ Провозвестниче, исправи стези заблуждения моли́твами твои́ми.
Сла́ва, и ны́не:
Преклонившися свыше Всецарица Ма́ти и Дева,/ благословеньми венча́ет воспева́ющих Ю́, и сице моля́щихся:/ Надеждо христиан, сподо́би смиренных нас Небе́снаго Царствия,/ ничтоже бо не возможно ходатайству Твое́му.
НА ВЕЛИ́ЦЕЙ ВЕЧЕ́РНИ
По обычном псалме́ поем Блажен муж: 1 антифо́н. На Го́споди, воззвах: стихи́ры на 8, глас 5:
Руку твою́́, прикоснувшуюся пречистому верху́ Владычню,/ с нею же и перстом Того нам показа́л еси́,/ воздежи́ о нас к Нему́, Крестителю, я́ко дерзновение имея много,/ ибо болий пророков всех от Него свидетельствован еси́./ Очи же твои́ паки Всесвята́го Ду́ха ви́девшия,/ я́ко в виде голубине соше́дша,/ воздвигни к Нему́, Крестителю, и милостива нам соделай,/ и прииди, стани с нами,/ запеча́таяй пение и предначинаяй торжество́.
Пе́рвее к антиохийскому народу рука твоя́ благода́тная/ я́ко дар Боже́ственный Лукою Евангелистом перенесе́ся,/ таже восточным царе́м Багрянородным даровася./ Ны́не же от запада приходит благословити народ российский,/ изливая струи Божественныя благода́ти./ Крестителю Христов! всех нас помяни,/ да избавимся от бед и скорбей;/ тебе́ бо даде́ся благода́ть молитися за ны.
Да устро́иши пути Госпо́дни и стези пра́вы сотвориши Бо́гу в человецех,/ да уготовиши Го́сподеви люди российския соверше́нны; прежде пришествия твоего́ посылаеши к ним священныя дары твоя́,/ последи же, аки сам с Небесе яве приходя посети́ти избранный тобо́ю христианский народ,/ десницу твою́́ Божественную нетлением прославленную, подаеши нам, Крестителю,/ во еже просветити и озарити мысли верных и укрепити в благочестии./ Темже духовными песньми вси согласно тебе́ вопием:/ Пророче и проповедниче Истины!/ моли́ спасти́ся всем людем страны нашея.
Днесь возсия в концех северных,/ я́ко светоносное солнце, рука твоя́ честна́я, Крестителю!/ А́гнца Бо́жия плотию явившагося, всем показа́вшая,/ и покаяния спаси́тельныя пути;/ юже, я́ко сокровище Боже́ственных даров, верою приемлюще,/ и со страхом прикасающеся, и покланяющеся любо́вию духовною,/ приемлем от Тебе́, Христов Предтече, источник исцелений,/ просвещение душ, благода́ть утешения и велию ми́лость.
Торжествует духовно лику́ющи Христова Церковь/ в принятии мощей твои́х, Предтече,/ град освящается и вси православнии лю́дие вопиют:/ Крестителю Христов! ты на́ша кре́пость и утверждение,/ ты на́ша добро́та и тобо́ю хвалимся,/ моли́ Христа́ Бо́га спасти́ любо́вию тя славящия.
Иисус одолева́ше и побеждаше Амали́ка,/ егда руце Моисеевы просте́ртыя в молитве ко Господу поддержа́ста Аарон и Ор;/ тако сотвори Господь российскому воинству побеждати всегда и одолевати враги,/ егда благоговейно твою́́ пречистую руку приемше, держаху, и усердне лобыза́ху,/ просяще с верою помощи во бране́х и победы на сопротивныя.
Бездна неизчерпаемыя Бо́жия благода́ти,/ за принятие с верою и благоговением десницы Пророка,/ мзду пророчу вскоре воздает христиа́ном,/ их же да сохранит, сице благоволивый Бог,/ моли́твами твои́ми, Предтече.
Ефрема и Манассию целомудренный Иосиф приводит к патриарху Иакову,/ да благословением и возложением рук свята́го Израиля/ сни́дет вседействующее Божие благословение на сыны его;/ ны́не же мы, подклоняя главы под твою́́, всеблаженне, многомощную десни́цу,/ молим тя со слезами, Крестителю,/ да твои́х ради заслуг снидет на нас всесильное благословение Всевышняго.
Сла́ва, глас то́йже:
Ве́лия сла́ва твоя́, достохвальне Предтече,/ деснице бо твое́й главу Свою преклони Иисус,/ Господь господствующих и Владыка владеющих./ Велие человеколюбие Свое́ Всеблагий Бог показа́ на нас,/ егда благоизво́ли сию дарова́ти нам, я́ко Богосветлое украше́ние и утверждение,/ те́мже радостно воспоем Промыслителю на́шему сию хваления песнь:/ Велий еси́, Го́споди, и чу́дны дела Твоя́.
И ны́не, Богоро́дичен, глас 8:
Пе́рвее написавшейся Твое́й иконе Евангельских таин благовестником,/ и к Тебе́, Царице, принесе́нней:/ да усво́иши ту и сильно соделаеши спасти́ честву́ющия Тя,/ и порадовалася еси́, я́ко сущи милостива спасения на́шего Соделательница,/ и, на ту зрящи, глаголала еси́ со властию:/ с сим образом благода́ть Моя и сила,/ и мы истинно веруем, я́ко се рекла еси́, Госпоже./ Сим образом с нами пребу́ди,/ ему же благоговейно предстояще, покланя́емся Тебе́, раби Твои,/ посети ны матерними Твоими щедро́тами.
Вход. Проки́мен дне и чтения три.
Исхода чтение (глава́ 14):
Рече Господь к Моисею:/ возми жезл твой и простри́ руку твою́́ на море, и расторгни е́./ Простре же Моисей руку на море, и разступися вода./ И внидо́ша сы́нове Израилевы посреде́ моря по су́ху; и вода им бысть стена одесну́ю и стена ошу́юю./ Погна́ша же еги́птяне, и внидоша в след их всяк конь фараонов и колесницы и всадники посреде́ моря./ И простре́ Моисей руку на море, и устроися вода ко дню на место;/ еги́птяне же бежаша под водою./ И, обратившися, вода покры́ колесницы и всадники и всю си́лу фараонову, вшедши в след их в море,/ и не оста́ от них ни един./ Сынове же Израилевы проидо́ша по су́ху посреде моря.
Царств третиих чтение (глава́ 8):
Ста Соломон пред лицем жертвенника Господня пред всем собором Израилевым./ И воздев руце свои на небо, рече:/ Го́споди Боже Израилев! несть бог, я́коже Ты на Небеси горе и на земли ни́зу./ Аще небо, и Небо небесе не довлеют Тебе́, кольми́ па́че храм сей, егóже создах Имени Твое́му,/ и да при́зриши на молитву мою, Го́споди Боже Израилев,/ еюже молится раб Твой пред Тобо́ю к Тебе́ днесь./ Да будут очи Твои́ отверсты на храм сей день и нощь, на место сие, о нем же рекл еси́:/ будет Имя Мое тамо, еже услышати молитву, еюже молится раб Твой на месте сем во дни и нощи./ И услышиши мольбу раба Твоего́́ и людей Твоих Израиля, о них же помолятся на месте сем,/ и Ты услышиши на месте обиталища Твоего́́ на Небеси;/ и сотвориши, и милостив им будеши.
Прему́дрости Соломоновы чтение (глава́ 4):
Праведник аще пости́гнет сконча́тися, в покои будет./ Осудит же праведник умираяй живущия нечестивыя;/ узрят бо кончину праведнаго и не уразумеют, что усове́това о нем, и во что утверди́ его Госпо́дь:/ приидут бо в помышление согрешений своих ужа́сни, и обличит их противу беззакония их./ Тогда станет в дерзновении мнозе праведник, пред лицем оскорбивших его и отметающих труды его./ Ви́девше же его смятутся страхом многим, и ужасну́тся о пресла́вном спасении его./ И рекут в себе, кающеся:/ сей бе, егóже име́хом не́когда в посме́х и в притчу поношения./ Безумнии, житие его вменихом неи́стово, и кончину его безчестну./ Како вменися в Сы́нех Божиих, и во святы́х жребий его есть;/ убо заблуди́хом от пути истиннаго, и правды свет не облиста нам, и солнце не возсия нам./ Беззаконных исполнихомся стезь и погибели, и ходихом стези непроходны,/ пути же Господня не разуме́хом.
На лити́и стихи́ры, глас 1:
Глас сый вопиющаго в пустыни,/ Пророк и учитель обличил еси́ велехва́льныя фарисеи, глаголя к ним:/ порождения ехи́днина, сотворите плоды достойны покаяния,/ ны́не Боже́ственною десницею твое́ю, православными Россианами любезне почитаемою,/ показу́еши ясно перст Божий,/ наказу́ющий нечестие презрителей веры, отвергших тя,/ отягощающи над ними руку благочести́ваго воинства,/и расточающи их я́ко овцы, неимущия па́стыря,/ покайтеся, вопия,/ да не когда во веки прогневается Господь,/и погибнете от пути праведнаго.
Богоотступный Иулиан, люте́йший зло́бою Ирода,/ тщашися истребити в правоверных всю святыню,/ искаше сожещи руку твою́́, Предтече;/ но вотще шата́яся, вскоре поги́бе с шумом нечести́вый./ Поборник же благоче́стия российский народ, благоговейно сию почитая,/ я́ко светильник на свещнице, во святем храме поставляет ю́, и хранит святолепно;/ тем же утвердити страну нашу в мире, и сохранити вся люди моли́ся, Предтече,/ теплый предстатель наш ко Господу.
Любовию уготовавших тебе́ златоко́ванный ковчег благоле́пнейший,/ в нем же свята́я десница твоя́ че́стне положися,/ воздая богатно приношения,/ хра́м Ду́ха Божественнаго сотвори ходатайствы твои́ми, Крестителю,/ зарею Бо́жия премудрости освещая во вся дни,/ во еже стояти им в Православии непоползнове́нно.
Коль благ Бог Израилев пра́вым сердцем,/ прежде еже родитися прови́дящий издале́че достойных Того благода́ти,/ чудодействующую бо в дальних странах десницу праведника,/ взима́я от лица неправды и ущедряя, ея же восхоте уще́дрити,/ вручает напосле́док дней многобогатый дар сей стране нашей, тайно веща́я:/ приими́те залог Моея благода́ти, благода́ти тезоимени́таго./ Се дах его стража страны вашея,/ видите, я́ко рука Моя сотвори сия́ вся.
Сла́ва, глас 8:
Даждь славу Бо́гу твое́му, Россие!/ я́ко Просла́вивый тебе́ досе́ле мно́жеством святых, не оставляет прославляти и ны́не./ Се бо многоценное сокровище, в различных странах доселе сокрываемое,/ благоизволи дарова́ти тебе́ многочудесную руку Предтечеву,/ оружие мирно, утверждение державно, сте́ну необори́му/ и невреди́мое сопротивными ограждение новому Сиону.
И ны́не, глас 2:
Предстоя пред Твоим, Всечистая, образом/ все христоименитое людей множество, досто́йно блажат Тя, Матерь Божию,/ и прославляют раболепно, и честву́ют и молятся Тебе́ по Бозе,/ да мир умири́ши в православии, и веру утвердиши,/ и спасеши от всех зол Твоя́ рабы, едина Благословенная.
На стихо́вне стихи́ры, глас 2:
Действуяй вся во всех, Боже,/ неизреченную ми́лость Твою́ явил еси́ нам,/ подая благословение рукою пророков верховнейшаго,/ о всех де́лех Твоих благодарение Тебе́ приносим.
Стих: Благословен Господь Бог Израилев,/ я́ко посети и сотвори избавление людем своим.
Весь Богоносен явился еси́, Крестителю,/ егда рукою твое́ю прикоснулся еси́ верху́ Владычню,/ слухом же Родителев глас слыша и очима сошествие Свята́го Ду́ха узре́л еси́,/ тем же и нас, почитающих Богоноснаго тела твоего́ останки,/ сотвори сосу́ды че́стны к принятию даров Божественныя благода́ти.
Стих: И ты, отроча,/пророк Вы́шняго наречешися.
Перстом десницы твоея́/ древле показа́л еси́ людем грядущаго к тебе́ крестится А́гнца Бо́жия,/ взе́млющаго грехи всего мира;/ ны́не же предлежащими персты,/ нетлением сияющими, и благоче́стно от всех почитаемыми,/ загладив неве́дения начерта́ние,/ напиши на скрижалех сердец на́ших Боговедение покланяемыя Троицы.
Сла́ва, глас 8:
Неизчетный в милости, Боже наш!/ Праведных ради обещавый не погуби́т грешныя на земли,/ повелел еси́ ты́я в молитву призывати,/ и ны́не, молящеся Тебе́, Благоутробне,/ приводим в молитву честна́го пророка Твоего́́ уго́дника,/ да его ради пощади́ши нас, избавляя от всех искушений и бед,/ и спасеши души на́ша.
И ны́не, глас то́йже:
Крепкое заступление и сте́ну неруши́му стяжавше,/ всечестную и чудотворную икону Твою́, Богомати,/ молим Тя православным христиа́ном победы на враги дарова́ти/ и спасти́ достояние Твое́.
На благословении хлебов: Тропа́рь, глас 2:Память праведнаго:
Или сей, глас 4:
От запада возсия́вши Предтечева рука,/ лучи испущает нетления ве́рным исцелений,/ свыше собирает множество А́нгел,/ до́ле же созывает человеческий род,/ единогласно возсылати славу Христу́ Бо́гу.
НА У́ТРЕНИ
На Бог Госпо́дь: тропа́рь Предтечи, два́жды. Сла́ва, и ны́не, Богоро́дичен воскре́сен по гласу тропаря.
По 1-й кафизме седа́лен, глас 4:
Воистинну пророков бо́льший нареклся еси́, Иоа́нне,/ они бо по рождестве своем проро́чествоваша,/ ты же, Крестителю, еще сый во чреве матере, сподо́бился еси́ таково́го дара,/ и был еси́ первейший благовестник воплотившагося Избавителя,/ устна́ми бо матере твоея́ Богоизбранней Отроковице вещал еси́:/ отку́ду мне сие, да прииде Ма́ти Го́спода моего ко мне?/ Сего ради вопие́м тебе́:/ радуйся, зерца́ло, тайны Бо́жия нам являющее.
Сла́ва, и ны́не, Богоро́дичен:
Тебе́ вси роди человечестии хва́льныя дары приносят, Влады́чице,/ и молятся я́ко Царице и Ма́тери Божией,/ покрый и соблюди, Госпоже, моли́твами Твоими,/ и спаси́ от бед души на́ша.
По 2-й кафизме седа́лен, глас 8:
Похвали́ Бо́га твоего, граде Петро́в,/ и да возвеселятся сердца́ православных христиан;/ я́ко благоизволи Вышний дарова́ти нам десницу покаяния проповедника,/ в рожденных жена́ми бо́льшаго Иоанна, покрывающаго и защищающаго град и люди,/ егóже почита́юще, возвеличим Бо́га нашего,/ давшаго нам священный залог милости Своея.
Сла́ва, и ны́не, Богоро́дичен:
Покланяющеся о́бразу Твое́му, Богомати, ве́рнии раби Твои,/ молим Тя, в день Судный избавити нас, и сподо́бити Царствия Небе́снаго,/ Марие Благословенная, православных похвало.
Та́же полиелейныя псалмы, по сем величание:
Величаем тя,/ Крестителю Спасов Иоа́нне,/ и почитаем вси/ честныя твоея́ руки пренесение.
Стих: Блажен муж, бояйся Го́спода:
Стих: Направити ноги на́ша на путь ми́рен.
По полиеле́и седа́лен, глас 8:
Закона гла́си нея́сни быша и косноглаголание Моисеево/ словеса благода́ти в гада́ниих изъяви;/ ты же начало Евангелия сый, светлый глас вопиющаго нареклся еси́,/ясно бо возвести́л еси́ пришедшаго в мир Спаси́теля,/ Eгoже моли́ о нас, Предтече.
Сла́ва, и ны́не, Богоро́дичен:
Приступи́те с веселием, Богоизбраннии и христолюбивии лю́дие,/ и честный образ Богоматере любе́зно приимите;/ се бо щедрот море неизчерпаемое, источник сладкий изливает благода́ти,/ от негoже вси спасе́ние почерпа́ем.
Та́же степе́нна, 1-й антифо́н 4 гла́са. Проки́мен: Тамо возращу рог Давидови,/ угото́вах светильник пома́занному Моему. Стих: Враги́ Его́́ облеку́ студо́м,/ на Не́мже процвете́т святы́ня Моя́. Ева́нгелие от Луки, зача́ло 31.
По 50-м псалме́ стихи́ра самогласна, глас 6:
Плотскаго пришествия Христова нача́ло,/ пророков конец и глас Слова сый, взывал еси́:/ покайтеся, приближися бо Царство Небесное;/ те́мже угото́вавый пути Господни,/ благода́ти предшественник явился еси́, Крестителю и Апостоле,/ моли́ Христа́ Бога, прегрешений оставле́ние дарова́ти/ празднующим любо́вию святу́ю па́мять твою́́.
Канон Предтечи со ирмо́сом на 8, глас 1.
Песнь 1
Ирмо́с: Твоя победи́тельная десни́ца/ Боголепно в крепости прославися;/ та бо, Безсмертне,/ я́ко всемогущая противныя сотре,/ Израильтяном путь глубины новосоделавшая.
Устне нечи́сты, и сердце, и глас недостойный/ движу к тебе́ на моление, Крестителю Христов,/ но ты глас Слова и орга́н Ду́ха Бо́жия сый,/ потщися на помощь,/ се́рдце просвети, ум мой озари светом Богоразумия и слово ми вдохни,/ да возмогу воспети с любо́вию вели́чия твоя́.
В моли́твах Го́сподеви предстоя,/ я́коже звезда Солнцу предтеки́й,/ радости Небе́снаго рая́ неизреченныя исполняяся,/ Безсмертному Царю, в безконечныя веки от А́нгел безпрестанно хвалимому,/ присносущное с ними возсылая славосло́вие,/ помяни нас на земли призывающих тя, Крестителю.
Друг искренний Владыки быв, Крестителю всеблаженне,/ укрепи нас любити Его́ нравом пра́вым/ и страстей тлетворных возгнушатися, влекущих к гибели.
Виновное спасения на́шего всечестно́е Древо Креста,/ предлежащее видяще,/ ве́рнии почти́м и радостно облобыза́ем,/ источающее нам освящение, и жизнь, и лю́тых избавле́ние.
Богоро́дичен: Я́коже родством естественным совоку́плени,/ тако и молитвенным согласием, вы едино су́ще,/ Ма́ти всех Царя и Боже́ственный Предтече,/ мольбу сотворите вку́пе к благоуветливому Владыке,/ да вашими ходатайствы преклонься,/ ущедрит и спасет люди Своя.
Песнь 3
Ирмо́с: Еди́не ве́дый человеческаго существа немощь,/ и милостивно в не вообра́жся,/ препоя́ши мя с высоты силою,/ еже вопити Тебе́, Святы́й:/ одушевленный храме неизреченныя Славы Твоея́, Человеколюбче.
Подвигом добрым подвизався, течение скончав мечным усекновением,/ во светлости Небе́снаго Иерусалима вни́ти и ликовствова́ти с Безплотными сподо́бился еси́;/ и ны́не с Небес простирая к нам отеческия объятия,/ рукою твое́ю привлещи́ всех в ограду Христову потщися, Крестителю,/ наставляя на путь покаяния тебе́ величающия.
Свыше нас ны́не назирая, всеблаженне,/ твои́ми моли́твами от тли и бед сохрани,/ Боже́ственному пропове́данию твое́му верно последующих/ и пребывающих во учении спаси́тельных твои́х догма́тов.
Бо́лий в рожденных жена́ми,/ имену́емый от Прему́дрости Вечныя,/ бу́ди нам премудрости и смысла хода́тай;/ да сподо́бимся с мудрыми девами внити в Чертог вечныя Божественныя Славы.
Жезлом чудесным, Креста зна́мением от камене неплодна воду людем Твоим источивый, Боже,/ от неплодныя Елисаветы покаяния проповедателя ми́ру даровав,/ десницею его нас обогатил еси́,/ вся преславна твоя́, Всесильный Владыко.
Богоро́дичен: Я́ко венцем пресве́тлым благоукрашается град наш,/ Богородительнице, образом Твоим честны́м, па́че луч солнечных сияющим/ и просвещающим хва́лящия Тя.
Песнь 4
Ирмо́с: Го́ру Тя, благода́тию Божиею приосене́нную,/ прозорливыма Аввакум усмотри́в очи́ма,/ из Тебе́ изы́ти Израилеву,/ провозглашаше, Святому,/ во спасе́ние наше и обновление.
С воинствы Небе́сными водворяяся, Богому́дре,/ Христа́ умоли с ними спасти́ нас на земли сущих,/ почитающих тя в честне́м храме сем, Го́сподень Предтече.
Светильниче Света невечерняго,/ угасший благих дел светильник возжги в душах на́ших, огнем твои́х молитв,/ да ясно узревше свет повелений Создавшаго,/ стопы на́ша направим по словеси Его́.
Бездну милосердия в струях Иорданских погрузивый рукою твое́ю, Крестителю,/ источники слез подаждь,/ разжения сласте́й погашающия и грехи очищающия.
Неповинно закла́н был еси́,/ я́ко агнец незлобив, Боже́ственный Предтече,/ непорочная и священная жертва Творцу принеслся еси́,/ те́мже верою тя молим,/ и нас возносити жертвы духовныя Бо́гу настави.
Богоро́дичен: Не отри́ни молений на́ших, Влады́чице Чи́стая,/ но посети милостию рабы Твоя́, покланяющиися о́бразу Твое́му,/ упование христиан,/ в мире житие наше соблюди и подаждь спасе́ние необори́мое.
Песнь 5
Ирмо́с: Просвети́вый сиянием/ пришествия Твоего́, Христе́,/ и осветивый Крестом Твоим мира концы,/ сердца просвети́ светом Твоего́́ Богоразумия,/ православно пою́щих Тя.
Дивен Бог, во святы́х своих творяй чудеса,/ кости бо мертвыя Елисеевы мертваго воскреси́ша,/ руками Павловыми многи от неду́г и духов злых исцелева́хуся,/ рука же Крестителева бо́льшая источает чудеса,/ и подает исцеления верою почитающим ю́/ и благоговейно лобызающим.
Приближився Све́ту крайнему,/ свет вторы́й по Боже́ственному причащению был еси́ воистину,/ те́мже радующеся светлую и благонаро́читую па́мять твою́́ совершаем,/ и молим тя, Крестителю:/ просвети́ души на́ша дарованиями Вседетельнаго Духа.
Не хода́тай, ни А́нгел, но Сам Господь, пришедый в мир, спасе нас,/ Емуже правыя пути по́слан был еси́ угото́вати, блаже́нне./ Того ны́не умоли, Крестителю,/ показати и нам стезю, к Царствию Небесному наставляющую.
Го́ресть вод древле услаждая Моисей,/ древом сохрани еврейския люди, образ Креста проначерта́я,/ сему ве́рнии покланяющася, горести и скорби всякия избавляемся.
Богоро́дичен: Се приходит Дева, всех пророков превышши, честны́м образом Своим, Зиждителя ми́ру рождшая,/ град Свой сохранити и спасти́ достояние Свое.
Песнь 6
Ирмо́с: Из утробы Иону младенца изблева́ морски́й зверь,/ я́кова́ прия́т;/ в Де́ву же всельшееся Слово,/и плоть приемшее пройде, сохраншее нетленну./ Eгoже бо не пострада нетления,/ Рождшую сохрани неврежде́нну.
Глас вопиющаго Бо́га наречен был еси́, Предтече Го́сподень;/ те́мже я́ко уста Бо́жия, кто не восхва́лит тя?
Веру благочестивую в Сы́на Бо́жия/ запустевшим сердцам проповедал еси́, Пророче благода́ти,/ неплодие душ на́ших, от тли греховный изсыхаемых на всяк день,/ отреби рукою твое́ю пречистою,/ да будем древеса приносящая плод живыя веры Вседержителю.
Волна́ми житейскими обуреваеми и в страсте́х различных погружаеми,/ под кров твой прибегаем, великий Иоа́нне,/ потщися помощи́ рабом твои́м/ и к спасения благооти́шному приста́нищу настави.
Приими от души молящихся Тебе́, Христе́,/ и даждь нам помощь Твою́ свыше, я́коже иногда учеником Твоим на мо́ри,/ и от бед избави нас, молением Твоего́́ Предтечи.
Богоро́дичен: Пред образом Твоим, Богомати,/ проливаем сердечная моления на́ша недостойнии,/ помози, Влады́чице, усердно молящимся Тебе́, и избави от всех бед и зол славящих Тя;/ кто бо, Всемилостивая, с верою призываяй Тя,/ посрамле́н и неуслышан от Тебе́ изы́де?
Конда́к, глас 6:
Умнаго Солнца светильник Боже́ственный Предтеча,/ показавый в концех светоносную свою десницу,/ ны́не на севере озаряет ею блаженное Отечество наше,/ просвещая и освящая верно покланяющихся, и Христу́ вопиющих:/ спаси́ нас моли́твами пророка Твоего́, Царю Вышний.
И́кос:
Новый рай является Боже́ственный храм,/ в о́ньже с верою и благоговением входит беседовати с Создателем свои́м первый человек./ Река бо даров Божественныя благода́ти, разделяющаяся в четыре начала,/ исходит из Едема Небе́снаго напая́ти его./ Исто́чник жизни, нетления и спасения/ изливает всем нерукотворе́нное начертание Спаси́теля нашего./ Поток милостей и щедрот, и сроднаго о христианех промышления/ исходит от святыя Богоматере иконы./ Древо Креста, на немже спасе́ние совершися,/ источает воду, услаждающую го́ресть вкушения запове́даннаго./ Струи́ же теплых молитв текут обильно от Предтечевы десницы,/ во струя́х Иорданских сподо́бившияся крестити Просветителя нашего./ Вся земля Российская да покло́нится Тебе́ и да поет Тебе́, Царю Вышний.
Песнь 7
Ирмо́с: Тебе́ у́мную, Богоро́дице, пещь,/ разсмотря́ем ве́рнии;/ я́коже бо о́троки спасе́ три Превозноси́мый,/ мир обнови, во чреве Твое́м всеце́л,/ хвальный отцев Бог, и препрославлен.
Прославляяй Господь Того сла́вящыя,/ нетлением прославленную десницу твою́́, подаде ве́рным прибежище благонаде́жно,/ юже просте́рши, подаждь нам помощь от Свята́го,/ и даждь безбедно во благочестии жизнь совершити сла́вящим тя.
Твоими моли́твами немощнии врачуются,/ демони отгоняются, и вся скорби ре́шатся,/ сего ради тя почитаем, Предтече Го́сподень,/ России похвало, кре́пость и ограждение, и утверждение.
Пригвожде́н ум к земным вещем имея,/ что сотворим, и к кому прибе́гнем ищущим помощи?/ разве к тебе́, святый Иоа́нне, благода́ти тезоимени́те,/ не отри́ни нас от твоего́ заступления, но возстави и обнови покаянием,/ и пону́ди со избранными вни́ти, а́може ничтоже скверно входит,/ в Царство Небесное.
Умири́ мир, Христе́, мольбами Предтечи Твоего́,/ низлагая врагов си́лу и тишину неизглаголанную устрояя стране нашей,/ во веки сохрани́.
Богоро́дичен: Образу Твое́му покланяющимся/ и призывающим Тя во обстоя́ниих лю́тых, помози, Влады́чице,/ упование и спасе́ние всех человеков,/ иныя бо Предстательницы, разве Тебе́, по Бозе не и́мамы.
Песнь 8
Ирмо́с: Чу́да преестественнаго/ росодательная изобрази пещь образ;/ не бо яже прия́т пали́т юныя,/ я́ко ниже́ Огнь Божества́ Девы, в Ниже вни́де утробу,/ тем воспева́юще воспоем:/ да благословит тварь вся Го́спода,/ и превозносит во вся ве́ки.
Присносущныя и неизреченныя Славы и Света невечерняго наслаждаяся,/ идеже неизглаголанное есть веселие и радость непрестанная,/ простирающих к тебе́ молений гла́сы услыши, Крестителю,/ и сподо́би моли́твами твои́ми причастниками быти вечныя Божественныя Славы.
Духом и силою Илиино́ю предходя́ Христу,/ был еси́, премудре, не трость противными ветры колеблема,/ но столп и наше Боже́ственное веры утверждение, и непоколебимое Церкве укрепление,/ юже твои́м ходатайством во единомыслии соблюди непреклонну и недви́жиму,/ утоляя всякия собла́зны.
Авраам я́ко друг Божий/ сподо́бився духом провидети день Зиждителя Своего,/ радости неизреченныя исполняшеся;/ ты же, Предтече, не в гаданиих и сенех,/ но лицем к лицу зря воплотившагося Го́спода, и от руки твоея́ крещение прие́мша,/ досто́йно взывал еси́:/ сия́ убо радость моя исполнися./ Сего ра́ди, я́ко друга Христова и теплаго о нас предстателя/ правостию ума чтуще, ублажаем.
Троичен: Троицу Нераздельную,/ Тре́ми Ли́цы разделяемую, соединяемую же Существом,/ всеми державно владычествующую и вся соблюдающую,/ ве́рнии благоче́стне исповедающе, возвеличим.
Богоро́дичен: Приими моления рабов Твоих, Пресвята́я Влады́чице,/ яже Тебе́ приносим;/ помози и от бед избави покланяющихся о́бразу Твое́му;/ Ты бо, Спаса Рождшая, имаши дерзновение, я́ко Того Ма́ти сущи,/ не престай моля́щи о чту́щих Тя, еже спасти́ся нам.
Песнь 9
Ирмо́с: Образ чистаго Рождества Твоего́/ огнепали́мая купина́ показа́ неопальная,/ и ны́не на нас напа́стей свирепе́ющую угасити молимся пещь,/ да Тя, Богоро́дице,/ непрестанно величаем.
Стал еси́ посреде закона и благода́ти, премудре,/ те́мже взываем к тебе́:/ побеждаемых нас законом греховным, воюющим противу ума во у́дех на́ших, ущедри, Крестителю,/ и благода́ти дар испроси, творити Боже́ственная хоте́ния.
Утробы неплодныя израще́ние плодовитое сый,/ неплодие сердец в благоплодие претвори моли́твами твои́ми,/ и капли покаяния спаси́тельнаго одожди́ в сердцах пою́щих тя.
Источая всегда исцеления притекающим к мощем твои́м, чудный Предтече,/ исцели стра́сти сердечныя, востающия от невнимания,/ де́тельною твои́х Боже́ственных молитв цельбо́ю.
Вити́йствующих язык не может по достоянию восхвалити тя, Предтече пришествия Христова;/ но я́коже Христос вдовицы прия́ два ле́пта,/ не возгнушайся, Крестителю, малаго сего приноше́ния;/ благости же подражанием, приими́ песнь, я́ко достойную/ и дерзнувшаго от усердия пове́дати величия твоя́.
Богоро́дичен: Взирающе на Твою́ всечестную, Пречистая Богомати, икону,/ я́ко на Тебе́ Самую́, на Небесех Сыну соцарствующую,/ с верою к ней припа́даем, благоче́стно почитаем, и со страхом лобызаем,/ и сла́вим рождшагося от Тебе́ Христа́ Бо́га нашего,/ Eгoже моли́ спасти́ рабы Твоя́.
Свети́лен:
Предстоя при́сно стра́шному Престо́лу,/ и светлыми зарями Трисолнечнаго Божества́ осияваем, свети́льниче мира,/ просвети́ души верою приступающих к тебе́,/ греховный мрак отгоняя и приводя ты́я к Све́ту незаходимому.
Сла́ва, и ны́не, Богоро́дичен:
Скорая в беда́х Помощнице,/ готовое обуреваемых приста́нище,/ Неискусобрачная Невесто, рождшая плотию Спаси́теля миру,/ сохрани нас, покланяющихся о́бразу Твое́му честно́му и сице Тебе́ взывающих:/ радуйся, Предстательнице Твоих рабов.
На хвалитех стихи́ры на 4, глас 1:
Память праведнаго с похвала́́ми,/ хвала бо его сладость верным,/ блажен вои́стинну, егóже избра и прия́т Господь;/ те́мже и мы днесь, веселящеся, почитаем па́мять твою́́, Предтече,/ просяще тя, имущаго дерзновение ко Господу,/молитися о благополучии страны нашея,/ о победе на языки противныя, еже низложи́ти непра́ведно хотящия бра́ни,/ дарова́ти же мир мирови, Церквам единомыслие,/ и душам нашим велию ми́лость.
От запада принесшая благода́ть исцелений рука твоя́, Крестителю,/ созывает верных к тоя́ пришествию./ Входу ея православный народ радуется,/ священных сословие благоговеет и торжествует све́тло;/ собравшееся же верных множество усердно покланяется,/веселия духовнаго исполняяся./ Ты же, ходатай Новаго и Ветхаго быв священнейший,/ обнови обветшание, обновление совершающих/новаго явления десницы твоея́,/ моля́ Человеколюбца дарова́ти всем спасе́ние и велию ми́лость.
Давиду кроткому и благочестивому уподобляется священных собрание,/ радостно преносящее в храм, я́коже древле в Сион,/новый кивот древняго пречестне́йший./ Тамо бе ста́мна, манну носящая,/зде же образ во чреве Носи́вшия Христа;/ тамо жезл, зде же Крест Христов, вселенныя хранитель;/ тамо скрижали каменни Ветхаго Завета,/ зде же рука, предначертающая Новый Завет,/ возвещающий ми́ру спасе́ние и велию ми́лость.
Боговидец предивный Илия,/ пове́рже ми́лоть свою на Елиссея,/ и абие сей остави волы́, имиже делаше землю,/ идяше в след его и служаше Бо́гу;/ ты же, Крестителю, не ризу,/но руку твою́́ святу́ю ниспослал еси́ нам, рабом твои́м,/ еюже да излие́тся на нас благода́ть Ду́ха Божественнаго,/ во еже не земным и суетным работати,/ но Бо́гу Жи́ву служити преподобием и правдою/ вся дни живота нашего,/ подающему ми́ру велию ми́лость.
Сла́ва, глас 8:
Вси совокупльшеся единодушно во святем храме Спаса нашего,/ и зряще в нем светлый Богоматере образ, Живоносное Древо Креста и твою́́, Предтече, пречестну́ю руку,/ руце и сердца горе́ воздвигнем к Триипостасному Божеству,/ радующеся о великих Его́ дарованиих, и молящеся прилежно,/ да предстательством Всенепорочныя, силою Честнаго и Животворящаго Креста,/ и твои́ми, всеблаженне, моли́твами,/ посетит нас милостию и щедро́тами Всеблагий Бог,/ подающий ми́ру велию ми́лость.
И ны́не, глас 8:
Со всеми пророки, со апостолы, и мученики,/ преподобными, и праведными, и всех христиан надеждою – Богоро́дицею,/ моли́ Преблагаго Бога, Предтече,/ дарова́ти совершающим светоносную и Божественную па́мять твою́́,/ разрешение грехов, очищение прегрешений и велию ми́лость.
Славословие великое и отпуст.
НА ЛИТУРГИ́И
Блаженны. Проки́мен, глас 7: Возвеселится праведник о Го́споде: Апостол к Коринфяном, зача́ло 106. Аллилуиа, глас 4: Праведник, я́ко финикс, процветет: Ева́нгелие от Матфе́я, зача́ло 40. Причастен: В па́мять вечную: На молебне Ева́нгелие от Марка, зача́ло 1.
Преподобных отец Диони́сия и Амфило́хия, Глуши́цких, чудотворцев
НА ВЕЧЕ́РНИ
Блажен муж: на Го́споди, воззвах: стихи́ры, глас 8.
Подо́бен: О, преславнаго чудесе:
Преподобнии отцы Богомудрии,/ слепым дае́те свет,/ болящим исцеле́ние и хромым здравие,/ милостивно преклоняющеся к приходящим верою к вам/ и прося́щим помощи ва́шея,/ заступники бо и предстатели ве́рнии вси обрето́хом, восхваляюще вас.
Преподобнии отцы всечестнии,/ доброде́тельми возшедше на колесницу,/ к Бо́гу востеко́сте, победныя почести приемлюще,/ и, я́ко ми́лоть, нам телеса́ ваша положена во гробех отцы оставили есте́,/ источати исцеления и прогони́ти духи лукавые,/ тем же блажим вас, прехвальнии.
Ликом по́стническим сочетастеся и украшшеся, блаженнии,/ по́стническим житием и ны́не в Небесных обителех живете, веселящеся,/ идеже ликуют А́нгели,/ и Светом Боже́ственным воистину обожаеми,/ поминайте любо́вию блажащих вас на земли́/ и святое ваше творящих празднество.
Сла́ва, глас 6:
Преподобнии отцы,/ во всю землю изыде вещание исправлений ваших,/ те́мже на Небесех обрето́сте мзду трудов своих,/ бесовския разрушили есте полки́/ и А́нгельския достигли есте чины,/ ихже житию непорочно поревнова́сте,/ дерзновение иму́ще ко Господу,/ мир испроси́те душам нашим.
И ны́не, Богоро́дичен:
Богородице Де́во Чи́стая,/ моли́ся Го́сподеви,/ я́ко да Твоими моли́твами/ подаст душам нашим грехов оставление,/ мир и велию ми́лость.
Крестобогоро́дичен:
На Древе Живот наш зря́щи,/ Пренепорочная Богородица, ви́сящ,/ ма́терски рыдающе, вопия́ше:/ Сы́не Мой и Боже Мой,/ спаси́ любо́вию пою́щия Тя.
Аще празднуеши с полиелеом, глаголи Богоро́дичен воскресный: Кто Тебе́ не ублажит:
Вход, прокимен дне. Чтения преподо́бническая.
Прему́дрости Соломоновы чтение (главы́ 5 и 6):
Праведницы во веки живут, и в Го́споде мзда их, и попече́ние их у Вы́шняго./ Сего ради прии́мут Ца́рствие благоле́пия и венец добро́ты от руки́ Господни:/ зане́ десни́цею покры́ет я и мы́шцею защити́т их./ Прии́мет всеору́жие рвение свое, и вооружи́т тварь в месть враго́м./ Облече́тся в броня́ правды и возложи́т шлем, суд нелицеме́рен./ Прии́мет щит непобедимый, преподо́бие;/ поостри́т же напрасный гнев, во оружие: спобо́рет же с ним мир на безу́мныя./ По́йдут праволу́чныя стре́лы мо́лниины,/ и я́ко от благокру́гла лу́ка облако́в на наме́рение полетят./ И от каменоме́тныя ярости испо́лнь падут гра́ды,/ вознегоду́ет на них вода морская, ре́ки же потопя́т я на́гло./ Сопроти́в ста́нет им дух силы, и я́ко ви́хор разве́ет их,/ и опустоши́т всю зе́млю беззаконие, и злодейство преврати́т престо́лы сильных./ Слы́шите у́бо, ца́рие, и разуме́йте, навы́кните судии́ концев земли́./ Внуши́те держа́щии мно́жества и гордя́щиися о наро́дех язы́ков:/ я́ко дана есть от Го́спода держа́ва вам и сила от Вы́шняго.
Прему́дрости Соломо́новы чтение (глава́ 3):
Праведных души в руце́ Божией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исход их:/ и еже от нас ше́ствие сокруше́ние, они же суть в мире./ Ибо пред лице́м человеческим, аще и му́ку прии́мут, упова́ние их безсмертия испо́лнено./ И вма́ле нака́зани бывше, великими благоде́тельствовани будут,/ я́ко Бог искуси́ я и обре́те их достойны Себе./ Я́ко злато в горни́ле искуси́ их, и я́ко всепло́дие же́ртвенное прия́т я./ И во время посещения их возсияют и я́ко и́скры по сте́блию потекут./ Су́дят язы́ком и обладают людьми, и воцари́тся Господь в них во веки./ Надеющиися Нань разумеют истину, и ве́рнии в любви пребу́дут Ему./ Я́ко благода́ть и ми́лость в преподо́бных Его́́,/ и посещение во избра́нных Его́.
Прему́дрости Соломо́новы чтение (глава́ 4):
Праведник, аще пости́гнет сконча́тися, в поко́и будет./ Старость бо честна́, не многоле́тна, ниже́ в числе лет исчита́ется./ Седина же есть мудрость челове́ком, и возраст старости, житие́ нескверное./ Благоуго́ден Бо́гови быв, возлю́блен бысть,/ и живы́й посреде́ грешников, преста́влен бысть./ Восхище́н бысть, да не злоба измени́т разума его,/ или́ лесть прельсти́т душу его./ Раче́ние бо злобы помрачает добрая, и паре́ние по́хоти пременя́ет ум незло́бив./ Сконча́вся вма́ле испо́лни ле́та до́лга:/ угодна бо бе Господу душа его: сего ради потща́ся от среды́ лука́вствия./ Лю́дие же ви́девше и не разуме́вше, ниже́ положиша в помышле́нии таковое:/ я́ко благода́ть и ми́лость в преподо́бных Его́́,/ и посещение во избра́нных Его́.
На стихо́вне стихи́ры, глас 4
Подо́бен: Я́ко до́бля:
Во Христа́ обле́кшеся,/ тле́емаго человека Богомудренно совлекшеся,/ тем духовною благода́тию при́сно просвеща́еми,/ я́ко звезды светлыя, ми́рове просияли есте́,/ молящеся от тли и бед изба́витися,/ и́же верою совершающим при́сно честну́ю па́мять вашу.
Стих: Честна́ пред Го́сподем/ смерть преподо́бных Его́́.
Ны́не пищу Небе́сную восприемлюще,/ и Светом ограждаеми, и Жизнь вечную насле́дствующе,/ к вам прибегающия от бед изба́вите,/ и искушений различных, и всякаго озлобления,/ Богомудренно к Бо́гу дерзновение стяжавше/ и любовь показу́юще воистину христоподобную.
Стих: Блаже́н муж, боя́йся Го́спода,/ в заповедех Его́ восхо́щет зело́.
Богоносцы вседи́внии, Троицы поборницы,/ к миродержителеву борению му́жескою мудростию ополчи́вшеся,/ и того низложисте твердыми сплете́нии,/ победными увязо́стеся венцы́./ Сего ради Божественную и светоносную совершаем вашу память,/ освящаеми благода́тию.
Сла́ва, глас 8:
Преподобнии отцы,/ мира красоты и пищи временныя отнюд возненави́девше,/ иноческое житие па́че возлюбивше/ и А́нгелом собеседницы бысте,/ и светильницы многосветлии вселенней,/ чудесами, я́коже второе солнце, сияюще,/ всех нас поминайте,/ совершающих священную па́мять вашу./ Мы бо, чада ваша/ и овцы словесных ваших учений,/ и вас на помощь призываем,/ прося́ще вами прияти мир и велию ми́лость.
И ны́не, Богоро́дичен воскре́сен: Безневе́стная Де́во:
Аще ли не празднуеши, глаголи сей Богоро́дичен:
Аз, Де́во Святая Богоро́дице,/под кров Твой прибегаю,/ вем я́ко обрящу Тобо́ю спасе́ние,/ можеши бо, Чи́стая, помощи́ мне.
Крестобогоро́дичен:
Тя пригвожда́ема ви́дящи на Кресте, Иисусе,/ и страсти приемлюща волею, Владыко,/ Дева Ма́ти Твоя́, увы Мне, вопияше, Чадо Сладкое,/ раны без правды како терпи́ши, Врачу́,/ исцели́вый человеком немощь/и от тли всех изба́вивый милосе́рдием Своим.
Тропа́рь, глас 8:
Светильницы светлии, я́вльшеся/ добро́ту земну́ю мудренно оста́вльше/ и идо́ша во внутреннюю пусты́ню, ку́пно с Диони́сием Амфило́хие,/ смирение и всю добродетель извыко́ша и обрето́ша безсмертие,/ постом, и бдением, и прочим воздержа́нием себе принося́ Христу,/ и ны́не на Небесех Престо́лу Христову предстоя́,/ моли́теся, отцы Богомудрии, Диони́сие и Амфило́хие,/ умири́ти мир и спасти́ся душа́м пою́щих вас,/ согреше́нием оставле́ние дарова́ти,/ чтущим всечестну́ю па́мять вашу.
Сла́ва, и ны́не, Богоро́дичен или́ Крестобогоро́дичен.
НА У́ТРЕНИ
По 1-м стихосло́вии седа́лен, глас 4.
Подо́бен: Скоро предвари:
Светильницы пресветлии и́стины Христовы,/ мир просвети́сте учением вашим, отцы Богоноснии Диони́сие и Амфило́хие,/ погуби́вше е́реси зловерных ху́льник, погаси́сте пламенная ху́лящих смущения,/ тем я́ко Христовы угодницы всех просвещаете.
Сла́ва, и ны́не, Богоро́дичен:
Дево Всенепоро́чная, Пребогатаго Бо́га рождшая,/ со Безплотными Того непрестанно моли, оставле́ние прегрешений и исправление жития да́ти прежде конца,/ верою и любо́вию поющим Тя.
По 2-м стихосло́вии седа́лен, глас 8:
Отреко́стеся плоти Христа́ ради и духовнии явистеся людем води́телие,/ услышали есте́ словеса́ тайных учений,/ и́ноком же яви́стеся правило пра́вости,/ страсти вся крепостию попрали есте́./ Тем и коварства бесо́в до конца попалили есте́,/ к Нему́ изрядно всегда, Богоноснии отцы, моли́теся,/ грехов оставле́ние подати, чтущим любо́вию святу́ю па́мять вашу.
Сла́ва, и ны́не, Богоро́дичен:
Се Тебе́ ро́ди родо́в славят, я́коже прорекла́ еси́, Отроковице,/ Создателя бо всех бысть палата и Боже́ственный храм,/ в немже вселися Вышний и плотию обложи́ся, да спасет нас.
По Хвалите Имя Господне: величание:
Ублажаем вас,/ преподо́бнии отцы,/ и чтим святу́ю па́мять вашу,/ наставницы монахов и собеседницы А́нгелов.
Псалом избра́нный: Терпя́, потерпе́х Го́спода:
По полиеле́и седа́лен, глас 8.
Подо́бен: Прему́дрости:
Егда, блаженнии, к Боже́ственному желанию ум свой впери́сте,/ тогда остависте вся до́лу влеку́щия мудрова́ния и в пустыню всельшеся,/ я́ко крин, процветосте доброде́тельми прекраснии, страстей искорени́вше терние,/ в ней насадивше плоды трудов своих,/ те́мже и пожасте рукояти, богатство неотъе́млемо на Небесех,/ отцы преподо́бнии, моли́те Христа́ Бога/ согрешений оставле́ние дарова́ти, чтущим верою святу́ю па́мять вашу.
Сла́ва, и ны́не, Богоро́дичен: О тебе́ радуется:
Та́же степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́́. Стих: Что воздам Го́сподеви о всех,/ яже воздаде ми. Вся́кое дыха́ние: Стих: Хвалите Бо́га во святы́х Его́: Ева́нгелие от Иоанна, зача́ло 36
По 50-м псалме́ стихи́ра, глас 6:
Иже на земли А́нгели/ и на Небеси́ челове́цы Божии,/ мира благое украше́ние/ и благих питателей,/ удобрение и́ноков и преподобных похвалу́/ великих отцев почтим,/ насажде́ни бо в дому́ Господни/ и процвето́ша праведно, я́ко ке́дри в пусты́ни,/ умножили есте́ стадо Христово словесных овец,/ в преподобии и правде.
Канон, глас 6.
Песнь 1
Ирмо́с: Я́ко по суху пешеше́ствовав Изра́иль,/ по бездне стопами,/ гонителя фараона,/ видя потопляема,/ Бо́гу победную песнь поим, вопияше.
Сшедшаго с Небес и на Кресте ру́це Простершаго подражатели, блаже́ннии,/ тем распя́сте себе мирови, и мир вами распина́шеся,/ и сего ради всели́стеся во Царствие Небесное,/ чудотворцы яви́стеся воистину преди́внии.
Творца всех Бо́га возлюби́сте, преподо́бнии,/ мирску́ю мудрость всю отве́ргше, о земных неради́вше,/ Небесных благ наслади́вшеся со А́нгельскими ли́ки,/ с нимиже молящеся, не забу́дите нас, чад своих.
Ревность духо́вную в сердца́х своих приемше,/ вслед Бо́га усердно потеко́сте и сего ради прославистеся в Божественней Того славе,/ у Него же обрести́ нам испроси́те велию ми́лость.
Богоро́дичен: Един от Святыя Троицы во двою естеству́/от чистых крове́й Твоих воплоти́ся, Боголепно про́йде,/ ихже от Ада́ма спасая, Пречистая, благостию Своею.
Песнь 3
Ирмо́с: Несть свят,/ я́коже Ты, Го́споди Боже мой,/ вознесы́й рог верных Твоих, Блаже,/ и утверди́вый нас на камени/ испове́дания Твоего́.
Бысть в пустынях гнездя́щася А́нгели, добродетельным житием свои́м мир озаряюща,/ Диони́сия блаженнаго обре́те, преподо́бне Амфило́хие,/ ему же после́дствовав, Спасу всех угодил еси́.
Молением свои́м непрестанным и всенощны́м предстоянием,/ Пречи́стую Богоро́дицу Помощницу иму́ще, бесовския полки́ от обители вашея прогони́ли есте́./ Тем и приходящим к вам подаваете скорое исцеле́ние.
Се, мы оста́вихом вся,/ по Госпо́дню словеси́ сотвори́сте и вслед Того изыдо́сте,/ тем мзду сторичную прия́сте и Живот вечный насле́довасте со всеми святыми,/ с ними же молящеся о нас не престайте, отцы блаженнии.
Богоро́дичен: Просвещение мне испроси, Пречистая Влады́чице,/ рождшая Свет всему́ миру, омраче́нному грехи,/страстную мглу далече отжени, Едина Богоблаженная.
Седа́лен, глас 4:
Удивил еси́, Владыко, преподобных отец на́ших,/ подав им чуде́с благода́ть и неду́ги различныя от человек отгоня́ти,/ им же молебно возопие́м:/ о, отцы досточу́днии, Диони́сие и Амфило́хие,/ непрестанно моли́те о нас Пречи́стую Богоро́дицу,/ да, просте́рши длани, умоли́т Сы́на Своего́ и Бога,/ сохрани́ти град наш и люди от злых обстоя́ний,/ подаст ве́рным людем победу на враги/ и душам нашим грехов оставление.
Сла́ва, и ны́не, Богоро́дичен:
Пречи́стеи руце Твои, Богоро́дице Де́во, просте́рши,/ покры́й уповающих на Тя, Сыну Твое́му зовущия,/ всем подай, и́же милости Твоя́.
Песнь 4
Ирмо́с: Христос моя сила,/ Бог и Господь,/ Честна́я Церковь/ Боголепно поет, взывающи,/ от смысла чиста о Го́споде празднующи.
Руце просте́рше, о нас мольбу ко Влады́це приношайте,/ стаду вашему от долг разрешение прося́ще, и́мате бо послушающаго Владыку всей твари,/ творит бо волю боящихся Его́ и молитву их послушает.
Сконча́сте течение, житие свое́ добре соверши́вше, блаженнии,/ приятелище бысте Пресвятыя Троицы,/ тем молитеся в мире сохраненным быти ве́рным людем,/ правоверно вас почитающим.
Любовию Божиею распаля́стеся, святии,/ мир весь оставльше, пустыню достиго́сте,/ в ней же А́нгельски пожили есте́ и ны́не, в Чертозех Небесных со всеми святыми веселящеся,/ непрестанно о нас молитеся.
Богоро́дичен: К Тебе́ упование мое возложих, Ма́ти Бо́жия Приснодево, спасения моего/ и Тя Предстательницу животу моему положих, тверду же и непоколебиму.
Песнь 5
Ирмо́с: Божиим светом Твоим, Блаже,/ у́тренюющих Ти ду́ши любо́вию озари́, молюся,/ Тя ведети, Слове Божий,/ Истиннаго Бога,/ от мрака греховнаго взывающа.
Смире́н помысл и ду́шу свою сокруше́нную иму́ще,/ вы́ну прилепляшеся Бо́гови и на Того упование о души́ своей возло́жше,/ толпы бесо́вския, я́ко прах, разгнасте,/ исцеляете неду́ги душевныя вку́пе и телесныя.
Юность телесную отвергше,/ посто́м и бдением удручи́ли есте́ плоти своя́,/ тем и святым житием свои́м весь мир просветили есте, Богоблаженнии.
Егóже ищущи, при́сно желаемаго вами блаженства Небе́снаго Царствия,/ о нем бо подвизастеся в поще́ниих и бде́ниих,/ души свои изда́сте в руце Божии;/ сему и нам получи́ти молитеся присно, блаженнии.
Богоро́дичен: Тебе́, рождши Христа, всему́ Содетеля, взываем:/ радуйся, И́же Свет возсия́вше нам,/ радуйся, вместившая Бо́га невместимаго.
Песнь 6
Ирмо́с: Житейское море,/ воздвиза́емое зря напастей бурею,/ к тихому пристанищу Твое́му притек, вопию Ти:/ возведи от тли живот мой,/ Многомилостиве.
Возгремели быша до Небес молитвы ваша, святии,/ я́ко гром, Святым Духом гремя́ше,/ возду́шный же дух, я́ко дым, разгоняше,/ от недуг разрешение ве́рным подавающи./ Тем я́ко заступники на́ша и к Бо́гу хода́таи,/ непрестанно вас почитаем.
Вы́шняго прибежище положи́сте себе и упова́ние, в пустынях, да я́ко в черто́зех светлых, пребывающе,/ во а́лчбе и жа́жде жизнь свою провожда́юще,/ тем и обители себе во имя Пресвятыя Богоро́дицы сотвори́сте, Ея́же моли́твами от зол нас изба́вите.
И́гу Госпо́дню вы́я прекло́нше, житейских молв избего́сте,/ тесным и прискорбным путем ше́ствовавше,/ пространства онаго Небе́снаго достигли есте́,/ егóже и нам сподобленным бы́ти, святии, молитеся.
Богоро́дичен: Пречистая Богоро́дице Влады́чице, рождшая человеком Христа́ Спаса нашего,/ подаждь ми грехов оставление, да сподоблен буду избыти вечных мук нескончаемых,/ заступление Твое́ стяжавше, Богоневестная.
Конда́к, глас 8:
Я́ко светила незаходи́мая мысленнаго Солнца, просвети́сте вселенную,/ ве́рным ду́ши и телеса́ лучами чудес ваших озаря́юще,/ незави́стно подава́ете от неду́г исцеле́ние,/ темже, сошедшеся верою, вас в песнех восхва́лим,/ я́ко наши премудрыя наставники и к Бо́гу хода́таи,/ и непрестанно вопием:/ радуйтеся, отцы Богомудрии Диони́сие и Амфило́хие.
И́кос:
Кто изрещи́ может ваша на ме́стех сих труды́ и страдания, отцы Богоноснии,/ или кто испове́сть прежде смерти и по смерти, яже ваше к Бо́гу дерзновение,/ ибо во плоти Безплотным подо́бящеся, А́нгельски пожи́сте,/ доброде́тельми своими весь мир просвети́ли есте́./ Но, а́ще и худосло́вен есмь,/ но убо воспою́ и, поя, не престаю Божию си́лу и премудрость/ и преподобных терпение и по́двизи, си́це реку́ще:/ радуйся, Диони́сие, великий о́тче наш,/ я́ко измла́да Бо́гу послужил еси́ и к Нему́ достигл еси́ в Небесное Царствие;/ радуйся, целомудренный сто́лпе, Амфило́хие преподо́бне,/ имже попрася всякая кознь сопроти́вная;/ радуйся, чу́дный Диони́сие,/ ибо терпением своим, я́ко безплотен, А́нгелы удиви́л еси́, лукавых бесо́в победи́вый;/ радуйся, Амфило́хие блаже́нне,/ мысленнаго рая́ грозд пресладкий, услади́вший весь мир пресладким житием своим;/ радуйся, Диони́сие Богомудре,/ прекрасное жилище Пресвята́го Духа;/ радуйся, Амфило́хие всече́стне,/ я́ко на Небесе́х предстои́ши Пресвятей Троице с преподобным Диони́сием, о нас мо́лишися непрестанно;/ радуйтеся, отцы наши вселюбе́знии,/ наставницы иноком премудрии, и ко Христу́ сих приведосте преподобно и праведно;/ радуйтеся, отцы досточу́днии,/ свети́льницы пресве́тлии, весь мир в чудесех просветили есте́ и, просвещая, не престае́те./ Темже, вопиюще, вси рцем непрестанно:/ радуйтеся, отцы Богомудрии, Диони́сие и Амфило́хие.
Песнь 7
Ирмо́с: Росодательну убо пещь/ соде́ла А́нгел/преподобным отроко́м,/ халдеи же опаля́ющее/веление Божие мучителя увеща́ вопи́ти:/ благословен еси́ Боже отец на́ших.
Вмени́вше уме́ты вся, яже на земли́ сущая,/ вся́ко желание и тщание показа́сте, взыска́юще,/ да Христа́ приобря́щете,/ Eгoже обре́тше, посещайте шествующих путем вашим,/ ихже сниска́сте трудами своими, отцы блаженнии.
На Небеси́ пребывающе,/ неотступно с нами пребу́дите, назира́юще нас, чад своих,/ непрестанно молитву к Бо́гу, отцы, о нас сотвори́те,/ я́ко да молением вашим от всех зол нас избавите.
Ни о́ны пустынная страши́лища устраши́ша вас,/ ни человек злых нахождения, ни лукавых бесо́в преще́ния,/ ни лет долгота́, ни скудость ме́стная,/ но вся преодоле́вше терпением,/ и сего ради со Христом царствуете в нескончаемыя веки.
Богоро́дичен: Тя, Богомати, спасе́ние позна́хом, земни́и,/ я́ко Творца плотию рождшая,/ те́мже спаси́ мене заблу́ждшаго,/ в пути правыя наста́ви мя,/ повелением Боже́ственным грехов прощение подавая ми,/ я́ко Человеколюбива, Преблагая Помощнице.
Песнь 8
Ирмо́с: Из пламене преподобным ро́су источи́л еси́/ и праведнаго жертву водою попали́л еси́:/ вся бо твори́ши, Христе́, то́кмо еже хоте́ти,/ Тя превозно́сим во вся ве́ки.
Светила великая, чудотворцы предивнии, Диони́сие со Амфило́хием,/ посетите нас в боле́знех на́ших,/ здравие всем притекающим к вам вскоре подавающе,/ разреши́те нас от греховных уз,/ ту́не прия́сте, ту́не и дади́те нам.
Я́коже обеща́стеся спожи́ти неразлучно в жизни сей,/ сице и по смерти вашей изво́листе погребе́нным быти единым телесем вашим,/ от них же чудес изливаете требующим исцеле́ние, и Христа́ непрестанно сла́вящим.
Нощь, я́ко день, вменя́шеся вами, преподо́бнии,/ не давше покоя телесе́м вашим, ни ве́ждома дрема́ния,/ но безпреста́ни течение творя́ще к Бо́гу посто́м и моли́твами,/ до́ндеже сподо́бистеся прияти праведных селение.
Богоро́дичен: В рождестве болезни избежала еси́, Чи́стая,/ и, рождши, паки Де́вою пребыла еси́,/ вся бо творит Иисус Бог и Человек,/ Eгoже превозносим во веки.
Песнь 9
Ирмо́с: Бога/ челове́ком невозможно видети,/ на Негoже не смеют чини А́нгельстии взирати:/ Тобо́ю бо, Всечи́стая, явися человеком/ Слово Воплоще́нно,/ Eгoже величающе,/ с Небе́сными вои Тя ублажаем.
Равно́ А́нгелом житие стяжа́л еси́, Диони́сие,/ тем равноа́нгельна в пусты́нях кры́ющася, обре́т тя блаженный Амфило́хий,/ и сего ради соревнова́ше ти в житии́ твое́м,/ твое́му внимающе нраву Боголюбе́зному.
Подобящеся Христу́ своему́,/ кротко житие и смиренно в жизни сей стяжа́ли есте́./ Тем и покой обрето́сте душа́м вашим,/ егóже ради жизнь сию во слеза́х и в воздыха́ниих изнури́ли есте́.
Моление сие́ не пре́зрите, отцы досточу́днии,/ и́же от недостойных уст моих вам приноси́мое,/ и, прия́в, сего донесите Творцу и Бо́гу,/ прося́ще у Него обрести́ ми́лость во вся ве́ки.
Богоро́дичен: Сы́на Безлетна от Отца Ты, во утробе несказа́нно заче́нши, родила́ еси́, Богомати Пречистая Де́во,/ моли́ непрестанно о рабе́х Твоих Того я́ко Человеколюбца Бо́га спасти́ род наш.
На хвалитех стихи́ры, глас 4.
Подо́бен: Дал еси́ знамение:
Светлейше просия́вше, я́коже солнце, преподо́бнии,/ всепра́зднственная па́мять ваша луча́ми облиста́ема/ ваших добродетельных деяний, блаженнии,/ и озаряюще верных чу́вства светом чуде́с ваших./ Сию́ убо пра́зднующе,/ радостно вас восхваляем и верно ублажаем.
Я́коже друзи́и А́нгели земни́и пожи́ли есте́,/ воздержа́нием тело свое́ удручи́вше, всеславнии;/ бдением и памятию смертною прилежно помышля́юще,/ Божественнии отцы, возраща́ху/ и великими восхожде́нии к желанию верховному./ Тем воистину прибли́жилися есте/ к Самому́ Христу, каменю краеугольному.
Страсти телесныя воздержа́нием утоли́ли есте́,/ и прилежным моле́нием/ змия льстиваго слезными потоки удавили есте́,/ отцы преподо́бнии,/ и угодили есте́ Бо́гу па́че и́нех, досточу́днии./ Тем вас укра́си Небе́сными дарованьми Иисус Человеколюбец/ и Спас душ на́ших.
Сла́ва, глас 8:
Преподобнии отцы,/ поучи́стеся день и нощь в законе Господни,/ достойни бысте древа Животнаго,/ са́дове бысте/ и плод ваш страданьми и венцы процвете́./ Дерзновение имуще к Подвигоположнику Христу́ Бо́гу,/ и нам проси́те очищение и велию ми́лость.
И ны́не, Богоро́дичен:
Влады́чице, приими́ молитву раб Твоих/ и изба́ви нас/от всякия ну́жды и печали.
Крестобогоро́дичен:
Пречистая, я́ко узре Тя плотию висяща на Кресте/ и, сердцем растерзающеся, вопия́ше, слезя́щи:/ Слове, камо зайде, прелюбимый Иисусе,/ Сы́не Мой, Го́споди,/ не остави Мене едину, Христе́, Рождшую Тебе́.
Аще имать на стиховне Сла́ва, и ты глаголи вечернюю. И ны́не, Богоро́дичен или́ Крестобогоро́дичен.
Преподобный Дионисий Глушицкий
Преподобный Амфилохий Глушицкий
Празднование Пресвяте́й Богоро́дице ради иконы Ея Иерусали́мския
Тропа́рь, глас 4:
Богорадованная Влады́чице,/ препрославленная Ма́ти щедрот и человеколюбия,/ всемилостивая о всем мире Ходатаице!/ Прилежно раби Твои́ ко Твое́му предстательству прибегаем,/ и ко пречудному о́бразу Твое́му со умилением, припадающе, молимся:/ молитву теплую Сыну Твое́му и Бо́гу на́шему сотвори,/ о Всепетая Царице Богоро́дице,/ да от вся́ких болезней и печалей нас Тебе́ ради избавит,/ и от грехов вся́ких свободив,/ Царствия Своего́ Небе́снаго наследники ны покажет:/ велие бо и неизреченное я́ко Ма́ти к Нему́ дерзновение имаши/ и вся от Него испросити можеши,/ Едина во веки преблагословенная.
Ин тропа́рь, глас 3:
Твоего́ предста́тельства уверение/ и милосердия Твоего́́ явление/ икона Иерусалимская нам, Влады́чице, показася/ пред нею же души на́ша в молитве изливаем/ и верою Тебе́ вопием:/ воззри, Милосердая, на люди Твоя́,/ вся скорби на́ша и печали утоли,/ утеше́ние благое в сердца на́ша низпосли/ и спасе́ние вечное душам нашим, Пречистая, испроси.
Конда́к, глас 5:
Не отрини, о Милосердая Мати,/ слез и воздыханий на́ших,/ но прошения на́ша милостивно приимши,/ пред Иерусалимскою иконою Твое́ю/ молящихся людей веру укрепи,/ умилением сердца́ их исполни,/ и крест земнаго жития нести им помози,/ елика бо хощеши можеши.
Сии припевы поются на Святой Афонской Горе в праздник Иерусалимския иконы Бо́жия Ма́тере.
Величай, душе моя,/ Чистую Де́ву и Едину Богоро́дицу.
Ангели, благода́ть к нам Пречистыя зряще, удивишася,/ како Дева вниде иконою Своею во храм сей святый.
Ангели дивятся величию Твое́му, Всецарице,/ и мы, бреннии, чудесем, ихже иконою Твое́ю совершила еси́.
Ангели радуются сла́ве Твое́й, Де́во,/ веселимся и мы, довольнии, припа́дающе ко иконе Твое́й.
Ангели на Небеси Тя, Богоро́дице, воспева́ют,/ и мы сла́вим зде, в дому́ Твое́м, лобызающе дивную икону Твою́.
Ангели ублажают милосердие Твое́ к людем,/ благодарим Тя и мы, Ма́ти Бо́жия, пра́зднующе иконе Твое́й.
Ангели славят промышление Твое́ о верных,/и мы пое́м Тя, явльшуюся нам на помощь Свои́м образом.
Величай, душе моя,/ благода́ть Оставившую ве́рным во святы́х иконах Своих.
Величай, душе моя,/ Всемилостивую Владычицу, иконою Своею обитати зде изволившую.
Величай, душе моя,/ Преблагословенную Марию, освящающую ко иконе Ея притекающих.
Величай, душе моя,/ Святою Троицею Избранную спасения ради нашего.
Величай, душе моя,/ Благословенную в жена́х, иконою Своею благословившую нас.
Молитва
Пресвятая Госпоже, Влады́чице Богоро́дице, упование всех уповающих на Тя, Заступнице печальных, прибежище отчаянных, вдов и сирот Питательнице! Услыши и помилуй ны, грешныя и недостойныя рабы Своя, со умилением ко пречистому Твое́му о́бразу припадающия: умоли, Милосердая Влады́чице, Сы́на Твоего́́ и Го́спода на́шего Иисуса Христа, да отвратит от нас праведный гнев Свой, да простит грехи и беззакония на́ша, я́ко да сподо́бимся благостию Его́ скончати житие наше в покаянии и получити ми́лость Его́ со всеми избранными Его́, я́ко благословена и препрославлена еси́ во веки веков. Аминь.
Иерусалимская икона Божией Матери
* * *
рожны́ – железными рогами, остроконечными орудиями.
лы́стом – голеням, мышцам.