В 11-й день

Свята́го апостола Фили́ппа, единаго от седми диаконов, и преподобнаго отца нашего Феофа́на исповедника, епископа Ники́йскаго

Святых отец Седмаго Вселенскаго Собора

Собо́р преподо́бных О́птинских ста́рцев (Минея дополнительная)

На Го́споди, воззва́х: стихи́ры апостола, глас 4.

Подо́бен: Званный свыше:

Иже седми́ диаконом причте́н,/ я́ко полн мудрости же и Божественныя благодати,/ служи́ти, блаже́нне Филиппе, святых купно со Стефа́ном потре́бам избра́лся еси́./ Тем и убива́ема сего ви́дев,/ к Самари́и восте́кл еси, повелением Божественным./ Божие Слово проповедая, славне,/ просвещая сущия во тьме пре́жде,/ яже соверши́л еси Духом Божественным Дне сы́ны, всемудре.

Богозна́мения, руко́ю твое́ю совершаемая, людие ви́дяще,/ слепых прозрение, и разслабленных исправление,/ и нечистых духо́в, идеже живаху, отгнание,/ дивляхуся, Фили́ппе, и прихождаху к спаси́тельному очищению,/ от неверия к вере внеза́пу направля́еми./ Тем Боже́ственный я́ко услы́ша апостольский лик веселяшеся,/ я́ко и Самари́и множество Бо́гу приведеся.

Колесница Слова сый, Богоглаго́ливе,/ на колеснице узре́в е́здяща, и вопроше́ния творящаго,/ и недомы́слящася, постигл еси Ае́тия Канда́кина досточуднаго/ и тому сказание и явление желаемых, блаженне, показал еси:/ веровав бо, просит Божественнаго очищения,/ егoже прие́мша,/ Божественнаго проповедника Вседетель соде́ла всея Ефио́пии/ и мучеников начальника.

Ины стихиры преподобнаго, глас 6.

Подо́бен: Все отло́жше:

Возсиял еси, Феофа́не, добродетелей ви́ды,/ я́ко звезда светле́йша на тве́рди веры светло славне,/ зарями вся отгоняя омрачения ерети́ческая/ и просвещая верою тебе́ и любовию прилежа́щия/ и твоим Божественным учением./ Тем светоносный совершаем твой праздник любовию;/ со дерзновением молися о душа́х наших.

Труды по́стническими Твою́ душу вооружи́в,/ плотска́я увяди́л еси, отче священнейше, играния/ и ум славне, соде́ла Божественныя Троицы жили́ще;/ и возвысился еси, идеже мученическая воинства, и добро́та недомы́сленная,/ и иера́рхов собор./ С нимиже ны́не ра́дуешися, во славе предстоя́ Христу,/ со дерзновением моля́ся о душа́х наших.

Божественными слез твоих тече́ньми, иера́рше,/ все потопи́л еси демонское ополче́ние, я́ко не́мощно;/ твоими же всегда к Бо́гу манове́нии и сильными восхожде́нии/ гордое возвыше́ние на землю низве́ргл еси́,/ и возне́слся еси на небе́сная и Боголепная селения;/ в нихже со Ангелы водворяешися, предстоя Христу,/ со дерзновением моля́ся о душах наших.

Сла́ва, и ны́не, Богоро́дичен, глас и подобен тойже:

Нравом злым поползо́хся и порабоще́н ле́стию лука́вною, Богоневе́стная,/ к пречу́дному Твое́му милосердию и теплому заступлению, Пресвятая Отроковице,/ прибегаю, окаянный,/ сою́з мя избави напа́стей и печа́лей/ и спаси́ мя, Пренепорочная, демонских прило́гов,/ да прославля́ю Тя, и любовию пою, и покланяюся,/ и величаю Тя, Владычице, Присноблаженную.

Крестобогоро́дичен, подобен тойже:

А́гнца Своего А́гница Нескве́рная древле и Непорочная Владычица/на Древе Крестнем я́ко узре́, ма́терски восклица́ше, и, дивящися, вопияше:/ Чадо Сладчайшее, что зрение сие новое и преславное;/ како сонм безблагодатный, суди́щу Пила́тову предаде́ Тя,/ и осуждает на смерть Жизнь всяческих;/ но воспева́ю твое́ неизрече́нное, Сло́ве, снизхожде́ние.

Тропа́рь апостола, глас 3:

Апостоле святый Филиппе,/ моли Милостиваго Бога, да прегрешений оставление/ подаст душам нашим.

Сла́ва, преподобнаго, глас 8:

Православия наставниче,/ благочестия учителю и чистоты,/ вселенныя светильниче, архиереов Богодухновенное удобрение,/ Феофа́не прему́дре,/ ученьми твоими вся просветил еси,/ цевни́це духо́вная,/ моли Христа Бога спасти́ся душам нашим.

НА У́ТРЕНИ

Канон Окто́иха един и святых два. Апостола канон, глас 6. Егoже краегране́сие: Филиппову Божественную воспою славу. Иосиф.

Песнь 1

Ирмо́с: Яко по су́ху пешеше́ствовав Изра́иль/ по бездне стопами,/ гонителя фараона/видя потопляема,/ Бо́гу победную песнь/ пои́м, вопия́ше.

Пресветлыми сиянии Христовыми озарився,/ по причастию Божества, му́дре, свет явился еси вторы́й,/ верныя священно световодя́, славне Филиппе.

Пресу́щественное Слово, все наше осуществова́в,/ священна тя ученика священно предлагает, мудре,/ несвященнаго омраче́ния язы́ки избавля́юща.

Рук возложе́нием свяще́нных учеников/ избра́н был еси со Стефа́ном и прочими священный диа́кон,/ я́ко сый полн Духа Божия, всемудре Филиппе.

Богоро́дичен:

Иже из не сущих вся содетельствуя,/ я́ко вину́ Тя име́яше воплоще́ния Своего, Богомати Чистая:/ тем по до́лгу ве́рнии Тя ублажаем.

Ин канон преподобнаго, глас и ирмо́с тойже.

Моего разума твоими моли́твами мрак отжени, иера́рше Христов,/ я́ко да воспою, славне, Твою́ священную и светозарную память пе́сньми.

Я́ко река́, устремился еси от Сиона, иерарше славне,/ и напоил еси зело́ Божественными струя́ми верных собо́ры,/ Бо́гу победную песнь поим, вопияше.

Божественными сиянии твою́ душу озари́в, Феофане,/ сласти страсте́й воздержания попалил еси огнем, песнопоя́ истинно:/ воспоим песнь Христу.

Богоро́дичен:

Светлейшими лучами Твоего Сына, Богородице,/ просвети омраченную мою душу/ и страстей смущение Твоим, Чистая, укроти́ ходатайством.

Песнь 3

Ирмо́с: Несть свят,/ я́коже Ты, Го́споди Боже мой,/ вознесы́й рог верных Твоих, Блаже,/ и утверди́вый нас на ка́мени/ испове́дания Твоего.

Сы́ны соверши́л еси Света во тьме неве́дения сущих, блаже́нне,/ в зна́мениих страшных, я́ко Небо высо́кое, Сло́ва славу пове́дая.

От племене Иудова Христа возсия́вша, блаженне, священно возвещая,/ благодати светом показал еси,/ Егoже Моисей дре́вле и пророцы провозвести́ша.

Я́да душетленнаго отбежа́ти и спаси́тельную благодать восприя́ти/ покаря́еши медото́чными глаго́лы, отринове́нныя дале́че неразумием, Филиппе Богодухнове́нне.

Богоро́дичен:

Светильник яви́лася еси та́инственный, Свещу, Отрокови́це, нося́щи истинно,/ просвещшую в нощи́ неве́дения прежде одержи́мыя, крайнею благостию.

Ин. Ирмо́с тойже

Сый испо́лнен, мудре, Божественнаго Духа явился еси,/ питая бога́тно благочестия сла́достию словом живи́тельным сердца́ зрящих к тебе́.

Повелении Божественнаго сияния изблиста́я, всеблаженне, отгнал еси всю ерети́ческую мглу,/ Жизнодавцу Христу воспевая:/ Свят еси, Го́споди.

На го́ру Боже́ственных добродетелей возше́д, иерарше, и во мрак вшед,/ сочта́лся еси с Богом и разума скрижаль приял еси, закон благодати.

Богоро́дичен:

Се лествица Иа́ковля, юже ви́де иногда утвержде́ну,/ на нейже утвержда́шеся Бог,/ Светоносная Чистая яви́ся действующи Богородица.

Конда́к Феофана, глас 2.

Подо́бен: Вышних ища́:

Возгреме́в Христово Боже́ственное воплощение,/ безплотныя враги до конца обличи́л еси,/ чу́дне Феофане./ Сего ради вси верно и благочестно вопием ти:/ моли непрестанно о всех нас.

Седален апостола, глас 8.

Подо́бен: Премудрости:

Прогони́тель демонов яви́вся/ и, я́ко светильник, сущия во тме просвети́в,/ явил еси Солнца, от Девы возсиявшаго,/ и, храмы идольския сокрушив,/ возставил еси Церкви, блаженне, в славу Бога нашего./ Тем тя почитаем/ и Божественную Твою́ память светло празднуем,/ и согласно вопием ти:/ апостоле Филиппе,/ моли Христа Бога грехов оставление подати/ чтущим любовию святую память Твою́.

Сла́ва, преподобнаго, глас 4.

Подо́бен: Явился еси днесь:

Явился еси, преподобне, Церкви, я́коже другое солнце,/ озаряя сию молниями Боже́ственных словес твоих,/я́ко ученик Господень, Феофане.

И ны́не, Богоро́дичен:

Пречистыя руки Твоя, Дево Мати, просте́рши,/ покры́й упова́ющия на Тя и Сыну Твое́му зовущия:/ всем подаждь, Христе,/ милости Твоя.

Крестобогоро́дичен:

На Древе ви́дящи воздви́жена Сына Твоего, Пречистая,/ утро́бою ма́тернею растерза́ема,/ жалостно взыва́ше:/ увы́ Мне, како за́йде,/ Све́те Мой Безле́тный.

Песнь 4

Ирмо́с: Христос моя сила,/ Бог и Господь,/ Честна́я Церковь/ Боголепно поет, взывающи,/ от смысла чи́ста о Господе пра́зднующи.

Ви́дев тя Си́мон содева́юща чудеса и зна́мения ве́лия,/ лицеме́рствовав, Филиппе, крещается,/ не зло́бы бежа́в, но погибели предае́тся.

Мно́ги тя силы содева́юща ви́дяще живу́щии во граде Самари́йстем,/ пропове́дниче Христов Филиппе,/ позна́ния свет, веселя́щеся, приима́ху.

Иди́, глаго́ла тебе́ Господень Ангел,/ путь направляя священнаго, Филиппе, Ае́тия му́рина,/ еже познати тому стезю́ Слова воплоще́ния.

Священнейший Ае́тий Канда́кий ви́дев тя, вразумля́юща того́,/ твое́ю рукою, Филиппе, крещается,/ и полн Духа Свята́го я́влься,/ проповедник Боже́ственный бысть.

Богоро́дичен:

Сы́ны соверши Божия, Всенепорочная,/ сы́ны человеческия Твой Сын,/ от чистых крове́й Твоих воплощся и рождся;/ сего ра́ди славим Тя.

Ин. Ирмо́с тойже

Поще́нием, всему́дре отче Феофане, себе очи́стив,/ весь света исполнен был еси, весь Бога вмести́телен,/ весь Духа Свята́го соприча́стен.

Гла́дом та́ем, в лю́тая влага́емь заточе́ния,/ стражда́, всеблаженне, мученически терпел еси,/ от совести чи́сты в Господе весели́ся.

Облистав, славне, исправлении обощре́н явился еси, я́ко Христов меч,/ ссеца́ющь ерети́ческая ухищре́ния,/ Божественным Духом укрепляемь.

Богоро́дичен:

Светильник всесветлый Ты яви́лася еси,/ Божественная трапе́за, Божие селе́ние, киво́т и жезл,/ процве́тши Цвет в мире, Христа, Мати Дево.

Песнь 5

Ирмо́с: Божиим светом Твоим, Блаже,/ у́тренюющих Ти ду́ши любо́вию озари́, молюся,/ Тя ве́дети, Сло́ве Божий,/ Истиннаго Бога,/ от мрака греховнаго взывающа.

Я́рости беззако́нных не убоя́вся,/ среди волко́в, я́ко агнец истинно, Филиппе, ходил еси,/ ты́я претворяя к благочестию/ благодати словом, блаженнейше.

На заколе́ния веде́ся, я́ко Агнец, Емману́ил,/ я́коже глаголет Исаия славный,/Егoже разуме́ти не моги́й, Филиппе,/ священный Ае́тий Канда́кий от Тебе́ науча́ется.

Священносло́вна тя ученика,/ единаго диа́конов седми избра́нна, уве́дехом/ и Це́ркве Боже́ственное основание/ и всех сущих во тме светильника, Филиппе.

Богоро́дичен:

Богородицу Тя истинно от души исповедающе,/ искушений и неудо́бств избавля́емся/ Твоими ко всех Бо́гу и Господу, Дево, хода́тайствы, Богоблагодатная.

Ин. Ирмо́с тойже

Светодательными твоими блиста́нии, отче священнейше,/ мрачную тьму потреби́л еси еретичествующих,/ Богозна́ния светом озаряя и просвещая мира концы.

Злочести́вых защи́тницы тебе́, досточудна сущаго, лю́тыми ранами уязви́ша,/ егoже Ангельстии чи́ни обима́ху, я́ко Христова иерарха и Божественнаго мученика.

Был еси, отче, светови́дный заблу́ждшим путево́ждь,/ плавающим кормчий,/ коле́блемым приложе́ньми лютых тве́рдость и стена́ недви́жима.

Богоро́дичен:

Добро́та Иаковля,/ юже Бог возлюби и вселитися избра,/ земных сла́ва и прибежище согрешающих,/ Богородице, Ты яви́лася еси.

Песнь 6

Ирмо́с: Жите́йское море,/ воздвиза́емое зря напастей бурею,/ к тихому приста́нищу Твое́му прите́к, вопию Ти:/ возведи́ от тли живо́т мой,/ Многомилостиве.

Вод духовных испо́лнився, я́ко река Божественнаго Еде́ма, изше́л еси,/ наводня́я волною ти́хою земныя концы и напая́я сердца́ верных, досточу́дне.

Отве́рз, исполнил еси твоя уста, учениче́, духовнаго разума,/ и разверз гортань лукаваго, поглощенных исто́ргл еси безчи́сленная множества, и спасл еси, Апостоле.

Крепость низве́ржеся невидимаго врага и отню́д поги́бе,/ тебе́, крепостию Духа Христа проповедающу, Филиппе,/ распе́ншагося и язы́ки призывающаго.

Богоро́дичен:

Законов Тя естественных кроме́, роди́, Христе, Содетеля твари,/ и па́че естества пребысть истинно Дева Нескверна Святая Мати Твоя, Пресвяты́й.

Ин. Ирмо́с тойже

Сый я́ко солнце, Богоза́рныя лучи, преблаженне, испусти́л еси,/ похваляя мученическия страсти, вяза́ния, и раны,/ и дивныя подвиги, иера́рше Христов.

Пречистую Владычицу похваляя чи́сте язы́ком твоим, Богому́дре,/ воспел еси словеса́ светоза́рная,/ верных собо́ры и мудрых сердца́ умаща́ющая.

Писа́нием твоего всечестнаго и чистаго, му́дре, лица/ безбожных писания измазу́еши и тех богоме́рзская и безбожная повеления,/ возвещая чествова́ти икону Христову.

Богоро́дичен:

Вся хотением соста́вивый Бог и содержай, Пречистая,/ описа́нием телесе на Твоих объя́тиих но́сится,/ Божественным Существом Неопи́санный.

Конда́к апостола, глас 4

Подо́бен: Вознесыйся:

Язы́ков лове́ц пречу́дный и учеников Христовых собеседник,/ апостолов предизбра́нный,/ Филипп днесь миру исцелений подает богатство,/ покрывает от обстояний того хва́лящия./ Тем согласно зовем ему:/ спасай вся моли́твами твоими, апостоле.

Икос:

Я́ко Небо славу Божию, самови́дче, исповедав,/ язы́ки да́льния привлече́ к вере близ быти Бога./ Тем, я́коже Моисей законополо́жник,/ обогаща́еши, прехвальне, стадо твое́./ Он древле море пресече́ и, преве́д люди,/ пото́м в пустыни препита́ хлебом Небе́сным;/ ты же сла́наго лютаго неве́рствия изба́вив во Христе всю тварь,/ горе́ к пребыванием Небе́сным возвел еси вопиющия:/ спасай вся моли́твами твоими, апостоле.

Песнь 7

Ирмо́с: Росода́тельну убо пе́щь/ соде́ла Ангел/ преподобным отроко́м,/ халдеи же опаляющее веление Божие мучителя увеща́ вопи́ти:/ благословен еси, Боже отец наших.

Наведе́ тя, я́ко коня́, Пребоже́ственный, возмущающа языческое море, Филиппе,/ главы́ сокрушающа вражия, и поюща Ему песненно:/ благословен еси, Боже отец наших.

Сказу́я прежде всех веков сокровенную Тайну,/ тайноглаго́льник же быв, Филиппе мудре,/ научил еси страны́ и люди/ и от тайн мерзских очистил еси.

Явился еси величайшая звезда, Филиппе славный,/ и Тралли́и удобрение,/ в нейже тело твое́ честно́е лежит,/ содева́я чудес преславная, мудре,/ на просвещение благочести́вно блажащих тя.

Богоро́дичен:

Богородительницу Тя, Дево, именуем, Марие Пречистая,/ спасаемии Тобою день и нощь от вражиих приложений вредных,/ и искушений всяческих, и душевных скверн.

Ин

Ирмо́с: О́троцы в Вавилоне/ пе́щнаго пламене не убояшася,/ но, посреде пламене вве́ржени, орошаеми, пояху:/ благословен еси, Го́споди, Боже отец наших.

Исправляя ты Истины Слово, ран искушения претерпел еси/ и, во изгнание вложен, иерарше Феофане, пел еси:/ благословен еси, Го́споди, Боже отец наших.

Твоих догма́тов струи́/ нечестивых потопиша моря́, мудре,/ не вопиющих Христу, Бо́гу нашему:/ благословен еси, Го́споди, Боже отец наших.

Ре́ки твоих словес медото́чных, Феофане,/ человеков ду́ши веселия Божественнаго испо́лниша,/ песносло́вящих песньми Бога Препрославленнаго.

Богоро́дичен:

На Тебе́ великое содеяся, Дево Мати, та́инство:/ Сын Божий, из чрева Твоего вопло́щся, ны́не яви́ся;/ Емуже, веселящеся, поем:/отцев Боже, благословен еси.

Песнь 8

Ирмо́с: Из пла́мене преподобным ро́су источил еси/ и праведнаго же́ртву водо́ю попали́л еси:/ вся бо твори́ши, Христе, то́кмо, еже хоте́ти./ Тя превозно́сим во вся веки.

Словом Божественным, всеблаженне, я́коже со́лию, растворив,/ пре́лести очистил еси смрад лютый/ и человеческая сердца́ исцелил еси/ чести́ и сла́вити Троицу во веки.

Утверди́шася ноги хромы́х словом твоим, мудре,/ ду́си же ме́рзцыи и нечистии рыда́ху,/ терпети не могу́ще данныя тебе́ благодати.

В Самари́и дре́вле живу́щии, Филиппе,/ благодати зарю от Тебе́ приемлют,/ ви́дяще многая содевающа тя чудеса силою Духа, Источника благодатнаго.

Богоро́дичен:

Коле́блющуюся злобою ратобо́рца душу мою, Дево Чистая, укрепи,/ Божественным призира́нием Движущаго всяческая приемши и неподви́жущися.

Ин

Ирмо́с: За законы оте́ческия/ блаженнии в Вавилоне юноши предбе́дствующе,/ царю́ющаго оплева́ша повеление безумное,/ и совоку́плении имже, не сва́ришася огне́м,/ Держа́вствующему достойную воспева́ху песнь:/ Господа пойте дела/ и превозноси́те во вся веки .

Закон отеческий, всеблаженне, и́стинно нося,/ пребеззако́ннейшаго ца́рствующаго поплева́л еси повеле́ние несмы́сленное,/ погубля́юща, отче, Господне воображе́ние благочестно лобзающих,/ еже прием, в мире явися от Девы Отрокови́цы;/ Eгoже превозно́сим во веки.

Ум Боже́ствен,/ Духа Пресвята́го гусль всесли́чная,/ слави́й добропе́снивый, верных верх, Православия столп и утверждение, мудре,/ Церкве твердь, монахов хвала, Феофане,/ отцев сла́ва и крепость явился еси,/ воспевая Христа во веки.

Мирополо́жница Духа Пресвята́го, отче,/ ты показался еси изливанием миродухновенных твоих и мудрых учений,/ потребляя прелести злосмра́днейшую тлю,/ и благовонствуеши нравом твоим Честну́ю Церковь, зовя непрестанно:/ песньми тя превозносим, Христе, во веки.

Богоро́дичен:

Божия гора ту́чнейшая,/ ю́же пра́отец Давид предписа́ дре́вле, песнопоя́ проро́чески, Ты яви́лася еси, Дево,/ от неяже отсечеся Камень краеугольный, Христос,/ и сокруши крепость всю и́дольскую./ Того непрестанно поем и превозносим во веки.

Песнь 9

Ирмо́с: Бога/ человеком невозможно ви́дети,/ на Негoже не сме́ют чи́ни Ангельстии взира́ти:/ Тобою бо, Всечистая, явися человеком/ Слово Воплощенно,/ Eгoже величающе,/ с Небе́сными во́и/ Тя ублажаем.

Ви́дев дре́вле тебе́ ча́емая/ и Божественную прием власть непоколеби́му,/ о нейже человеки научи́л еси, Филиппе Богоглаголиве,/ красуйся и ликуй,/ Божественнаго наслаждайся просвещения и утеше́ния.

Я́ко свет, я́ко звезда, я́ко великое солнце,/ свещательными заря́ми обтекл еси вселенную,/ возвещая Боже́ственное пропове́дание:/ во Тралли́ю же, Асийский град, пришед,/ емуже вождь быв, блаженне,/ в нем уснул еси.

Крест, и смерть, и Воскресение Изба́вителя/ ближним и дальним возвести́л еси,/ небо озвезде́нное быв, Божественными светлостьми́ блиста́ющося, Филиппе,/ апостоле Христов досточу́дне.

Земля тело твое́ многострадальное,/ сияние испущающее исцелений, покры,/ Небо же дух твой святый со апостолы и́мать веселящийся;/ с нимиже и нас помяни, мудре,/ хва́лящих тя.

Богоро́дичен:

Глас приносит Ти благодарственный вся́кое дыхание,/ вопиющий ве́село и глаголющий:/ радуйся, Престоле Вышняго огнеобра́зный;/ радуйся, Божие село пространнейшее;/ радуйся, апостолов благолепное, Чистая, венчание.

Ин

Ирмо́с: Безсе́меннаго зача́тия/ рождество́ несказа́нное,/ Матере Безму́жныя Нетленен Плод:/ Божие бо рождение обновляет естества./ Темже Тя вси ро́ди/ я́ко Богоневестную Матерь/ православно величаем.

Побо́рствующа тя по Христове Церкви человекоубийца зрети не моги́й, искушения тебе́ простира́ет:/ обаче непреклонен пребыл еси,/ мужемудренно к царе́м нечести́вым противляяся доблественно,/ увещая ты́я покланя́тися образу Христову, Феофане.

Укра́шен несказа́нною, Богомудре, добро́тою Троицы/ и упещре́н сиянии, све́тиши/ и радостно, пребогате, обстои́ши Престол истинно Зиждителя и Бога,/ идеже празднующих глас,/ отче Богоносе Феофане.

Твоих подвиго́в достойно приял еси че́сти/ и, венценосец, ны́не на Небесех со Ангелы свесели́шися,/ идеже пророков собор, и апостолов, и мучеников истинно воинства мно́гая,/ иде́же патриархов лики;/ поминай нас, отче Феофане.

Богоро́дичен:

Побо́рствующи лю́дем верным во бране́х на варвары,/ даждь победительная, Дево Богородительнице,/ Благословенная и Препрославленная, Мати Неискусобра́чная Чистая,/ покрывающи от всякаго вре́да вражия;/ да Твоего Сына поюще, Тя величаем.

Светилен.

Подо́бен: Небо звездами:

Апостоле Христов, во всю вселенную протече́ твое́ веща́ние,/ Бога проповедал еси нам;/ Егoже о нас моли/ Свет умный нам возсияти.

Сла́ва, преподобнаго:

Подо́бен: Жены́, услы́шите:

Я́ко Боже́ственный свет, Феофане, Церкви явился еси,/ песней твоих сиянием сию озари́в/ и светом лица твоего, на немже Христовы язвы носив, удобряем;/ к Немуже не престай моляся о стаде твое́м, о́тче.

И ны́не, Богоро́дичен:

Дре́вле дарова́нную мне ризу купе́лию Крещения/ оскверних страстны́ми блуды́,/ и ужасаюся, окаянный, час помышляя Божественнаго истинно Страшнаго Суда;/ Дево Всенепорочная, предстани тогда/ и избави мя страшнаго преще́ния.

На Литургии: Прокимен апостола: Во всю землю изы́де вещание их и в концы вселенныя глаго́лы их. Стих: Небеса пове́дают славу Божию: Апостол: Деяний зачало 20. Аллилуия, глас 1: Испове́дят Небеса чудеса Твоя, Го́споди. Евангелие от Луки, зачало 50. Причастен: Во всю землю:

В СУББОТУ НА МАЛОЙ ВЕЧЕРНИ

Стихиры воскресны и Богоро́дицы, по обычаю.

НА ВЕЛИ́ЦЕЙ ВЕЧЕ́РНИ

На Го́споди, воззвах: стихиры Окто́иха, воскресны 3 и восточен един.

Стихиры святых отцев, на 6, глас 6.

Подо́бен: Отча́янная:

Честныя Собо́ры отцев/ в разная времена составив,/ во едино собра́ единем и темже правилом/ зело́ до́бре Патриарх Герман Новый,/ пиша́ купно же и держа догма́ты сих,/ иже и молитвенники бо́дрственныя сия спасения/ Господу предлагает, и па́стве с пастыри.

Закона писание де́тем еврейским положи честну́ю седми́цу,/ се́ни придержащимся и служащим сей,/ юже отцы, стекшеся на Седмом Соборе ма́нием Божиим,/ в шести днех все сие совершившаго,/ и седмый благословившаго,/ честне́йшую соделаша, предел веры изложи́вше.

Троицу, всем от вещей/ миробытия су́щую вину́,/ ясно преда́сте, треблаже́ннии отцы́:/ Три бо и Четыре Соборы, та́инственнейшим словом положи́вше и отмсти́телие явльшеся Православнаго слова,/ стихи́а четыре су́ща,/ и Троицу изъясни́сте,/ создавшую сия и мир сотворшую.

Довля́ше и единою жизнь вдохнути/ лежащему сыну служа́щия,/ пророка Елиссея сляче́ние зе́льно;/ оба́че обратися седми́жды и прекланя́шеся сему,/ провозвещая я́ко провидец ваша Соборы,/ имиже умерщвление Божественнаго Слова водуши́сте,/ Ария умертви́вше, и его све́рстники.

Кто Твою́, Спа́се, ри́зу раздра;/ Арий, Ты рекл еси,/ иже Троицы пресече́ Единоче́стное Начало в разделения;/ сей отве́рже Тя быти Единаго от Троицы,/ сей и Несто́рия учи́т Богородицу не глаго́лати./ Но Собор, иже в Нике́и,/ Сына Божия Тя пропове́да, Го́споди,/ Отцу и Духу Сопресто́льна.

Арий безумный/ Пресвятей раздели Троицы Единовластие/ в три неподо́бная же и чу́ждая существа./ Темже отцы Богоноснии сошедшеся,/ усердно ревностию распаля́еми, я́коже Фесви́тянин Илия,/ духовным отсека́ют мечем, иже студу научи́вшаго хульному,/ я́коже Дух изре́кл еси.

Сла́ва, глас 6. Самогласен:

Та́инственный днесь Духа трубы́/ Богоносныя отцы восхва́лим,/ песнопе́вшия посреде Церкве песнь сли́чную¹⁰ Богословия:/ Троицу Едину Непременную,/ Существо же и Божество,/ низложители Ариевы и православных поборники,/ молящияся всегда Господу/ помиловатися душам нашим.

И ны́не, Богоро́дичен первый гласа.

По входе прокимен дне и чтения 3.

Бытия чтение (глава 14):

Слы́шав Аврам, я́ко плене́н бысть Лот, брата́нич его,/ сочте́ своя домочадцы, триста и осмьнадесять,/ и погна́ во след их даже до Да́на./ И нападе́ на ня нощию сам и о́троцы его с ним;/ и порази их, и гони́ их до Хова́ла, еже есть ошу́юю Дама́ска./ И возврати всякаго коня содо́мскаго,/ и Лота, брата́нича своего, возврати,/ и вся имения его, и жены́, и люди./ Изы́де же царь Содомский в сретение ему, повнегда возвратитися ему от се́ча Ходоллогомо́рскаго, и с царьми, иже с ним, во удо́ль Сави́ну; сие же бя́ше поле царе́во./ И Мелхиседе́к, царь Салимский, изнесе́ хле́бы и вино, бя́ше же священник Бога Вышняго./ И благослови Авра́ма, и рече́: благословен Аврам Богом Вышним, Иже созда Небо и зе́млю;/ и благословен Бог Вышний, Иже предаде́ враги твоя под ру́ки тебе́.

Втораго закона чтение (глава 1):

Во днех о́нех рече́ Моисей к сыно́м Израилевым:/ ви́дите, преда́х пред лицем вашим землю,/ вшедше, наследуйте землю, юже кля́тся Господь отцем вашим – Аврааму, и Исааку, и Иакову – дати им и се́мени их по них./ И реко́х к вам во время о́но, глаголя:/ не возмогу́ един води́ти вас./ Господь Бог наш умно́жил вы есть, и се, есте́ днесь, я́ко зве́зды небесныя, множеством./ Господь Бог отец наших да приложи́т вам, я́ко да будете ты́сящами сугу́бо,/ и да благословит вас, я́коже глагола вам./ И взях от вас му́жы мудры, и све́домы, и смы́сленны и поставих их владети над вами:/ тысященачальники, и стоначальники, и пятдесятоначальники, и десятоначальники, и писмоводи́тели судиям вашим./ И запове́дах судиям вашим во время оно, глаголя:/ разслушайте посреде братий ваших и суди́те праведно посреде му́жа, и посреде брата его, и посреде пришельца его./ Да не познаете лица́ в суде́, малому и великому су́диши,/ и не устыди́шися лица человеческа, я́ко суд Божий есть.

Втораго закона чтение (глава 10):

Во днех о́нех рече Моисей к сыно́м Израилевым:/ се Господа Бога твоего небо, и Небо небесе́, земля и вся, елика суть на ней./ Оба́че отцы ваша произволи Господь любити я́ и избра семя их по них, вас, па́че всех язык, в день сей./ И обре́жите жестосе́рдие ваше и вы́и вашея не ожесточи́те ктому./ Ибо Господь Бог наш, Сей Бог богов и Господь господе́й; Бог Великий, и Крепкий, и Страшный, Иже не диви́тся лицу, ниже вземлет дар./ Творяй суд пришельцу, и сироте, и вдове, и любит пришельца, дати ему хлеб и ри́зу./ И возлюби́те пришельца, пришельцы бо бе́сте в земли Еги́петстей./ Господа Бога твоего да убои́шися, и Тому Единому послу́жиши, и к Нему прилепи́шися, и Именем Его клене́шися./ Той хвала твоя, и Той Бог твой, Иже сотвори тебе́ великая и славная сия,/ яже ви́деста очи твои.

На литии стихира храма. Сла́ва, глас 3:

Апостольских преданий изве́стнии храни́телие бысте, святии отцы;/ Святыя бо Троицы Единосущное, православно научи́вше,/ Ариево хуление собо́рне низложи́сте,/ с ни́мже и Македо́ния духобо́рца обличи́вше,/ осуди́сте Несто́рия, Евти́хия и Диоско́ра,/ Саве́ллия же и Севи́ра безглавнаго./ ихже пре́лести испроси́те избавитися нам,/ нескве́рну нашему житию́ в вере сохра́нитися, мо́лимся.

И ны́не, Богоро́дичен:

Без Се́мене от Божественнаго:

На стиховне Окто́иха. Сла́ва, отцев, глас 4:

Молебную память днесь Богоносных отцев,/ от всея вселенныя собравшихся/ во светлем граде Нике́йстем,/ православных собрания, благоче́ствующе, верно пра́зднуем:/ сии бо лю́таго Ария безбожное веление благочестному́дренне низложи́ша,/ и от Кафолическия Церкве соборне того изгна́ша,/ и ясно Сына Божия Единосущна и Соприсносущна, прежде век Су́ща,/ всех научиша испове́дати во изображе́нии веры,/ известно и благочестно сие изложи́вше./ Темже и мы, Божественным их повелением последствующе,/ известно верующе, слу́жим со Отцем Сыну и Духу Всесвятому,/ во Едином Божестве, Троице Единосущней.

И ны́не, Богоро́дичен: При́зри на моления:

На благословении хле́бов тропа́рь: Богородице Дево: Два́жды. И отцев, глас 8:

Препрославлен еси, Христе Боже наш,/ светила на земли отцы наши основавый/ и теми ко истинней вере вся ны наста́вивый,/ Многоблагоутро́бне, сла́ва Тебе́.

НА У́ТРЕНИ

На Бог Госпо́дь: тропа́рь воскресен, два́жды. Сла́ва, отцев. И ны́не, Богоро́дичен: Иже нас ради:

Канон воскресен со ирмосо́м на 4; Крестовоскресен на два; и Богоро́дицы на два. И святых, глас 8, на 6, егoже краегране́сие: Пою блаженных Собрание Седьмое. Германово

Песнь 1

Ирмо́с: Колесницегонителя фараоня погрузи́,/ чудотворя́й иногда/ Моисе́йский жезл, крестообра́зно порази́в/ и раздели́в море;/ Израиля же беглеца́, пешехо́дца, спасе́,/ песнь Бо́гови воспева́юща.

Песносло́вити Седмое Собрание желающему ми ны́не,/ седмих дарований собор/ даждь ми Паракли́та, Го́споди,/ умудрившаго сей огненноязы́чне/ и ху́льное все языковре́дие умолчати сотворшаго.

Бо́льшее из начала числ седмое:/ ибо создания Божественнаго/ всего первообра́зно бысть,/ всесовершенное преста́ние в седмый день;/ и ны́не всех ересе́й конец/ в Соборе равночисленном.

Победи́в богоборнаго Ария в Нике́и/ древле пастырским жезло́м,/ православными ше́ствовати Церковь уче́нии лик отцев,/ и ны́не о сем посрамил есть образоборцы/ я́ко поборник.

Богоро́дичен:

Я́коже отцы благочестно научиша,/ исповедующе верно Девическую утробу,/ безболезненно рождшую плотию Безплотнаго:/ покланяемся же Сему, столпопи́шуще изображение, и че́стне облобыза́ем.

Катавасия: Отверзу уста моя:

Песнь 3

Ирмо́с: Утверждей в нача́ле небеса́ ра́зумом/ и зе́млю на вода́х основа́вый,/ на ка́мени мя, Христе, за́поведей Твоих утверди́,/ я́ко несть свят, па́че Тебе́, Еди́не Человеколю́бче.

Не поколеба́тися Христове неруши́мей Церкви,/ от Него тайнонауча́еми, Божественнии пастыреначальницы,/ иже сию поколебати хотящия,/ я́коже антихристовы ча́сти,/ от благочестивых отри́нуша.

Очищает мутныя и ти́нныя пото́ки,/ от источник спасения поче́рп,/ и жаждущия люди Христовы/ насыщает учений струя́ми отцев сословие.

На ненавидящих истинно/ и христианооглагольников Собрание христолюбных Седмое в светлем граде Нике́йстем бысть,/ егoже ца́рие Ирина и Константин защитницы.

Богоро́дичен:

Всяк да отступит нечести́вый,/ не почитаяй икону честну́ю Богоро́дицы/ и Сию не пропове́дуяй, Христа Богому́жно ро́ждшую,/ и во огнь да отшле́тся/ сгара́ти несожже́нно.

Конда́к и икос: воскресен.

Таже седален отцев, глас 4.

Подо́бен: Скоро предвари́:

Свети́льницы пресветлии и́стины Христовы миру яви́стеся на земли́,/ вои́стинну блаженнейшии отцы Боговеща́нии,/ изсуши́вше е́реси хульных языкобо́лий/ и угаси́вше пламеновидная злосла́вных смуще́ния./ Темже я́ко иерарси Христовы/ молитеся спастися нам.

Ин седален отцев, глас 2:

От начала бори́тельный Арий/ свире́по насилие наве́д, Спа́се, на Церковь Твою́,/ но сие подвигше отеческая воинства того победи́,/ и Единосущное Слово Отцу верно Тя славят.

И ны́не, Богоро́дичен:

Скоро нас предвари, Дево Мати Чистая;/ от враг нас исхити́, ху́лящих на Тя,/ сокруши языкобо́лия ересе́й вся,/ разреши́ крепостию Твое́ю стремления тех,/ да разумеют, я́ко едина Богомати еси,/ моли́твами Твоими православных совокупле́ние спасающая.

Песнь 4

Ирмо́с: Ты моя крепость, Го́споди,/ Ты моя и сила,/ Ты мой Бог, Ты мое ра́дование,/ не оставль не́дра Отча/ и нашу нищету́ посети́в./ Тем с пророком Авваку́мом зову Ти:/ силе Твое́й сла́ва, Человеколюбче.

Глагол Божий иму́ще, стрелу́ и меч,/ вся ку́пно ты́я закала́ют злоумныя/ о́бразом Крестным,/ не чтущия равно изображения Христова, Богоро́дицы и всех святых,/ отцы Богови́днейшии.

Я́коже седмию труба́ми/ Иерихо́нския сте́ны в седмом обхождении падо́ша;/ тако си́ми седмию Соборы/ весь сонм, на Бога вознося́щийся, низведе́н в бездну/ в Собрании Седмом благогла́сных труб Духа.

Юношеское настоя́ние показу́я/ и Божественною ре́вностию распаля́емо,/ отеческое множество,/ я́коже Илия, сту́дныя священники умертви́ло есть./ Тем со дерзновением Христове иконе/ любезно покланятися научи́ло есть.

Богоро́дичен:

Ты моя надежда, Всечистая, Ты мое и пение,/ Ты мое пристанище, Ты мое исправление, яже Бога Слова Отча Вопло́щшагося несочта́нно родила́ еси./ Темже Твое́й несомне́нно покланяюся иконе,/ крепостию Твое́ю укрепляемь.

Песнь 5

Ирмо́с: Вску́ю мя отри́нул еси/ от лица Твоего, Све́те незаходимый,/ и покры́ла мя есть чужда́я тма окаяннаго,/ но обрати́ мя, и к свету заповедей Твоих/ пути моя напра́ви, молюся.

Высо́кою мыслию сразсмотри́вше,/ ана́феме образобо́рцев преда́ша,/ я́ко чужда́я сих му́дрствовавших, честни́и отцы;/ и честь Христове иконе, я́коже ле́по,/ воздая́ти повеле́ша.

Ны́не время веселия,/ ны́не день спасения яви́ся,/ возвеселимся убо и Христу радостно возопии́м:/ мир даждь нам Твой/ моли́твами отцев Седма́го Собора, Человеколюбче.

Богоро́дичен:

Благоутробия ра́ди милости,/ от Девы родися Сын Божий невра́щно,/ чу́ждее нося́, я́ко Свое,/ и зра́ком сим опи́санный, зри́тся волею,/ по Существу Сый Неопи́сан.

Песнь 6

Ирмо́с: Очи́сти мя, Спа́се,/ мно́га бо беззакония моя,/ и из глубины́ зол возведи́, молю́ся;/ к Тебе́ бо возопи́х, и услы́ши мя,/ Боже спасе́ния моего.

Да ка́плют сладость го́ры и радость:/ ерети́ческое бо множество изгна́ся,/ горький излива́ющее яд,/ святых икон отверже́ние.

Небо и земля согласно да празднуют/ Дще́ре Божия вели́чие:/ ибо велича́ется, отмета́ющи Сию́ умаляющия.

Богоро́дичен:

Ма́терний Сын, Иже О́тчий пе́рвее безма́терен,/ безотчий же Боголе́пно родився/ и возродив мя;/ темже Рождшую с Рожденным образу́я, облобыза́ю.

Конда́к, глас 6.

Подо́бен: Рукопи́саннаго

Иже из Отца́ возсияв, Сын неизрече́нно/ из Жены́ роди́ся сугу́б естеством,/ Егoже ви́дяще, не отмета́емся зра́ка изображения,/ но, сие благочестно начерта́юще,/ почитаем верно./ И сего ради истинную веру Церковь держа́щи,/ лобыза́ет икону вочелове́чения Христо́ва.

Икос:

Хотяй Всещедрый Бог нас воздвиза́ти при́сно/ к памяти соверше́нней Своего вочелове́чения,/ подло́г сей предаде́ человеком,/ шароде́ланьми¹¹ икон честны́й возобража́ти зрак;/ я́ко да сия во зре́ниих ви́дяще,/ веруем, яже словом слышахом,/ разумеюще я́ве дея́ние и имя,/ начерта́ние и страдания святых мужей,/ и Христа Венцода́вца,/ венцы́ подающа святым, страдальцем же и мучеником./ ихже ради ясне́йше истинную веру держа́щи, Церковь лобызает икону вочеловечения Христова.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего ра́ди о́троцы в пещи́ ра́дованною ного́ю,/ я́ко во цве́тнице, лику́юще, поя́ху:/ благословен еси, Боже отец наших.

Побеждаются догма́тами/ Богоглаго́ливых мужей ересенача́льницы,/ образо́в честь первообра́зным изобразу́ющих право,/ я́коже рече́ Великий Василий:/ благословен Бог отец наших.

Хра́ми удобря́ются, светлыми иконами украшаемии днесь;/ сего ра́ди мир в це́рквах, па́че всех человек красне́йшему добро́тою,/ совоспева́ет поющему:/ благословен Бог отец наших.

Свет облиста́, дале́че тьма, нечести́вии отгна́ны./ Сего ради всяческая света испо́лнишася,/ Светодателя Христа с веселием поют и глаголют:/ благословен Бог отец наших.

Богоро́дичен:

Пречистая Владычица, едина всех спасения надежда,/ Яже стра́шно рождшая Царя царей Христа,/ на руках Своих Сего Младенца нося́щи,/ спокланяема есть опи́санне, я́коже отцы глаголют.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ Си́лою же лу́чшею спасе́ны сия ви́дев,/ Творцу и Изба́вителю вопия́ше:/ о́троцы, благослови́те,/ священницы, воспойте,/ людие, превозноси́те во вся веки.

Законополага́ет убо изя́щнейше отцев сосло́вие,/ Богочести́вым имстви́тельное поклонение/ и возставле́ние священныя иконы Христовы;/ любоблагочести́вии же ле́тнюю память я́ко чада совершаем благопослушли́вая оных,/ и любовию образ Христов лобыза́ем.

Седмокра́тно преклони́ху смиренных высокому́дреннии/ и любодоброде́тельных стремления пресеца́ху,/ имиже оглаго́ловаху Божественная деяния их;/ но иже Седмаго Собора соше́дшиися отцы в Нике́и/ гордыню оных а́бие истерза́ша седмокра́тнейше.

Стре́лы младенец бывают псало́мски старому́дрствующим младому́дренных язвы и раны;/ Божественною же силою изнемога́ют язы́цы мно́зи,/ хулы́ на высоту глаголющих;/ и всяк, кто Отца, Сына и Духа, Бога Единаго, не весть,/ Всевиновнаго и Единаго.

Богоро́дичен:

Зи́ждется Младенец самово́льне милости ра́ди, Зижди́тель от чи́стых крове́й Твоих,/ соблюдаяй Тя по рождестве Преочище́нну всю Чистую/ и очища́яй оскверненный образ./ Темже на иконах соизобража́ется Тебе́,/ естеством быв Человек, Бог Сый естеством.

Песнь 9

Ирмо́с: Ужасе́ся о сем Небо,/ и земли́ удиви́шася концы,/ я́ко Бог явися челове́ком пло́тски,/ и чре́во Твое́ бысть простра́ннейшее Небе́с./ Тем Тя, Богородицу,/ Ангелов и челове́к чинонача́лия велича́ют.

Ве́лий крепостию и сове́том вся содержай,/ Непостижи́ме Еди́не Боже,/ держа́внейше Всенача́льниче, Всецарю́,/ Церковь утверди, в православии Твое́м соблюдая,/ отцев всеславных, изобличающих злосла́вие, мольба́ми.

Великих че́стей сподо́бистеся на земли,/ Небому́дрении святии,/ я́ко Христово изображение любезно почто́сте./ И ны́не сень отложи́вше, и покрывало пло́ти,/ самолично Сего в Лице́ зрите́,/ и бо́льших сподобля́еми.

Да накажемся всевоинством ва́рварскаго безсловесия,/ еже попусти́л еси на ны;/ тех стремление и дерзость Сам сокруши́/ и верным споборствуй, надеющимся на Тя, Вседе́телю,/ благодерзнове́нными моли́твами святых отец,/ ихже совершаем память.

Богоро́дичен:

Разуме́ти тайну страшнаго Твоего Рождества никакоже может ум человеческий, но ниже́ Ангельский высокоу́мный,/ я́ко Бога Ты родила́ еси Воплощеннаго, па́че естества./ Тем Тя, Богородицу, ве́дуще и со О́нем напису́юще, величаем.

Светилен воскресен, Сла́ва, отцев.

Подо́бен: Ду́хом во святи́лищи:

Отцы Небому́дреннии, на Седмом Соборе собра́вшиися,/ молитву прилежну Троице принеси́те,/ еже избавитися от всякия ереси и суда вечнаго,/ Царствие же получи́ти нам Небесное,/ ваш Собор Боже́ственный воспева́ющим.

И ны́не, Богоро́дичен:

Мольбами, Преблаги́й Го́споди, Матере Твоея́/ и иже на Седми Соборех собравшихся отцев/ Церковь утверди́ и веру укрепи́,/ и Царствия Небе́снаго вся покажи́ прича́стники,/ егда прии́деши на землю суди́ти всю тварь.

Воскреснаго же светильна Богоро́дичен не глаголется, но отцев.

На хвалитех стихиры воскресны 4, и отцев 4, глас 6:

Подо́бен: Все отло́жше:

Все собравше душевное худо́жество/ и Божественным Духом разсмотри́вше/ Небесный и честны́й Си́мвол веры,/ честни́и отцы Богопи́санне начерта́ша;/ в немже я́вственнейше/ Рождшему Собезнача́льнаго Слова научают/ и всеи́стинно Единосущнаго,/ апостольским после́дующе проявле́нно учением,/ благосло́внии и пребогатии истинно,/ и Богомудрии.

Стих: Благословен еси, Го́споди, Боже отец наших,/ и хвально, и прославлено Имя Твое́ во веки.

Все прие́мше умное сияние Свята́го Духа,/ преестественнейшее благословие/ краткими глаголы и многим ра́зумом/ Богодохнове́нно провеща́ша,/ я́ко Христовы проповедницы,/ Евангельских предста́телие учений, блаженнии,/ и благочестивых преданий,/ свыше приемше сих откровение я́ве/ и, просве́щшеся, изложи́ша веру Богонауче́нную.

Стих: Соберите Ему/ преподобныя Его.

Все собравше пастырское искусство/ и ярость дви́гше ны́не пра́веднейшую,/ отмсти́тельне тя́жкия отгна́ша и па́губныя во́лки,/ пра́щею Духа изве́ргше от церковнаго исполнения/ па́дшия я́ко к смерти,/ и я́ко неисцельно неду́говавшия,/ Божественнии па́стырие,/ я́ко раби́ и́стиннейшии Христовы/ и Божественнаго пропове́дания таи́нницы свяще́ннейшии.

Сла́ва, глас 8. Георгия Никомиди́йскаго:

Святых отцев лик,/ от конец вселенныя сте́кшийся,/ Отца, и Сына, и Духа Свята́го,/ Едино Существо научи́ша и Естество,/ и тайну Богословия ясно преда́ша Церкви;/ ихже, похваляюще верою, ублажи́м, глаголюще:/ о Боже́ственный по́лче,/ Богоглаго́ливии ору́жницы ополче́ния Госпо́дня,/ зве́зды многосветлыя мысленныя тве́рди,/ та́инственнаго Сиона необори́мии столпи́,/ миродохнове́ннии цве́ти ра́йстии,/ всезлата́я уста Слова,/ Нике́йская похвало́, вселенныя украше́ние, прилежно молитеся о душа́х наших.

И ны́не, Преблагословенна еси, Богородице Дево: Славословие великое, и отпу́ст. И обычное исхождение в притвор.

Сла́ва, и ны́не, стихира Евангельская.

На Литургии: Блаженны воскресны на 6; и отцев песнь 3 на 4. По входе тропа́рь воскресен и отцев. Таже конда́к воскресен; Сла́ва, отцев; И ны́не, Богоро́дицы. Прокимен прежде воскресен; таже песнь отцев, глас 4: Благословен еси, Го́споди, Боже отец наших, и хвально и прославлено Имя Твое́ во веки. Стих: Я́ко праведен еси о всех, яже сотворил еси нам. Апостол дне, и отцев, к Евреом зачало 334. Аллилуия гласа и отцев, глас 1: Бог богов, Господь глагола: Стих: Соберите Ему преподобныя Его. Евангелие дне и отцев, от Иоанна зачало 56. Причастен: Хвалите Господа с Небес: Другий: Радуйтеся:

Подобает ве́дати, я́ко по 11-м дни сего месяца, в прииду́щую неделю память совершаем святых отец, иже на Седмом Вселенском Соборе в Никеи собравшихся второе, святых отец 365, на извержение и потребление безбожных учений христоненавистных и христианооглагольников, иконоборцев, Копрони́ма и ему смудрствующих, окаянных епископов и несвященных архиереев, и тех безбожнаго и сквернаго соборища.

И аще случится 11 день настоящий в неделю, поется в тойже день служба святых отец Седмаго Собора. Аще же в среду, поется служба их в мимошедшую неделю; аще же в четверток, поется служба их в прииду́щую неделю.

Рядоваго же свята́го служба оставляется и поется, егда разсудит екклисиа́рх.

В НЕДЕЛЮ, ближайшую к 11-му октября

И́на служба святых отец Седмаго Вселенскаго Собора, бывшаго втораго в Никеи, о святых и честны́х иконах

На Го́споди воззвах: стихиры, глас 8.

Подо́бен: Иже во Еде́ме рай:

В плоти я́вльшагося Иису́са,/ по Божеству неопи́сана Суща присно,/ описана же в нас, в толстоте¹² телесней,/ Единаго Суща составом вку́пе,/ Сего плотию описа́ем человечески, а не Божески,/ и поклоняемся на дщицах единственне, а не дво́ически,/ Един бо Господь, всею благостию я́влься на земли, не оставль Отца,/ но лесть идольскую разори́в/ и предложив нам кланятися человекообра́зней иконе Его.

Неви́димому Естеству Христову ничтоже подо́бно,/ нигде же бо виден бысть Бог,/ ви́денныя же плоти вописа́ем воображе́ние, я́ко ви́дехом лице́ Его,/ не тако бо верующии вочелове́чению Его при́зрачна являют, прилагающеся злому,/ мы же, верующе, непри́зрачно Облекшася в образ наш/ и, того прии́мша все свое́ние без се́мене,/ поклоняемся Того Богому́жному телописа́нию верно.

На лоне О́тчи Сущаго Бога Неопи́саннаго,/ на руку́ Материю описана испове́дающе, ве́рнии,/ благочестно вообра́жаем,/ в образе бо есть нашем, Иже со Отцем Необъя́тый и объя́тый в Матери,/ тамо Невоображе́нный и зде воображе́н во челове́честе,/ вся сугу́бная Его, Божественная же и человеческая сказа́ния Его,/ я́ко Единому отъя́ту и с отъи́мша и сочета́ния Его./ Того ради вообража́юще,/ Твое́й иконе поклоняемся, Христе.

На стиховне стихиры Окто́иха.

Сла́ва, отцев Собора, глас 8:

Подо́бен: Иже во Еде́ме рай:

Образы видяще вашего телесе, святи́и,/ и, верою целу́юще я,/ чуди́мся вашим подвиго́м, суди́щем,/ яже подъя́сте твердо Христа ра́ди,/ яже бо слово представляет Книгами Святыми,/ сия бо Писание показа́ет ка́пы¹³ пе́стрыми,/ вку́пе Богоугодную обретающе пользу душа́м своим, Христа славословим,/ равно А́нгелом показавшаго вас,/ иконобо́рца, я́ко ла́юща, отгоня́юще.

И ны́не, Богоро́дичен, глас и подобен тойже:

Огнено́сною купино́ю Моисей/ сподобися ви́дети Тя воображаему, Богородице, тайну,/ Тебе́ же ясне́е мы в науче́нии бы́хом,/ видяще образ Твоего зра́ка,/ емуже покланятися сподо́бленнии,/ благодать приемлем абие, от Твоего заступления приходящую нам,/ едина бо обою́ икона на Первоо́браз и славе, и че́сти приобщается свойству,/ подобию существа изменя́я,/ юже чтуще, достойно Тя воспеваем, Приснодево.

Тропа́рь, глас 2:

Пречи́стому образу Твое́му покланя́емся, Благи́й,/ просяще прощения прегреше́ний наших, Христе Боже:/ волею бо благоволи́л еси плотию взы́ти на Крест,/ да изба́виши, яже созда́л еси от работы вражия./ Тем благодарственно вопие́м Ти:/ радости исполнил еси вся, Спасе наш,/ прише́дый спасти́ мир.

Канон, глас 8.

Песнь 1

Ирмо́с: Песнь возслем, лю́дие,/ Чу́дному Бо́гу нашему,/ свободи́вшему Изра́иля от рабо́ты,/ песнь победну́ю пою́ще и вопию́ще:/ пои́м Тебе́, Единому Владыце.

Вси славу дади́м Бо́гу,/ мирови возсиявшему, плотска́го Его ви́дения образом/ и разори́вшему и́дольскаго служения всяку лесть от человек.

Тело приим опи́сано Безплотный Бог наш,/ изво́ли я́ко во всех и в написа́нии виден бы́ти,/ тем образ Твой сей Богомужия вообразующе свойством, покланя́емся.

Божественным дохнове́нием ум многий вообразова́ти,/ рече́ Христово образование,/ Василий же паки на Первоо́браз честь иконы менова́ти верно взывает.

Вся́кое вопие́т Боже́ственное Писа́ние,/ я́ко едино обнови́ свое́ние естеством Христос, вочеловечився,/ вы же вво́дите два, в нечестии Спаса необразопи́сано пи́шуще.

Грядите ны́не прочее, еретицы́,/ Божественным поклони́мся священнообра́зным зраком:/ Христову образу с Богоматерию и святых всех, Бо́гу угоди́вшим.

Едино Божество в Трех Ли́цех пропове́дается/ Богосло́вящим нам Безначальна Отца, Слово рождшаго,/ от Того и Дух присносущно изходя́щий.

Богоро́дичен:

Честь до́лжнующе Ти, Чистая,/ я́ко воистину Матерь Тя Божию, явльшуюся Воплоти́вшагося,/ Божественную икону Твою́ любовию вообража́юще,/ покланя́емся ей до́лжно.

Песнь 3

Ирмо́с: Несть свят, я́ко Господь,/ и несть пра́веден, я́ко Бог наш,/ Егoже поет вся тварь:/ несть праведен, па́че Тебе́, Го́споди.

Видится Пло́тский и Безплотный Бог/ и воображается зраком человеческим, Безчисленный,/ да иже сущая злобою омрачшая, соли́чны¹⁴ покажет Своя.

Икон в ви́дении ви́дяще Твое́ присно сошествие, Го́споди,/ поем державу Твою́ и, образ чтуще,/ ум возносим Божественней ве́щи.

Христово писа́ется, что льститеся, злольсти́вии,/ не я́ко Бог, но я́ко Человек, сугу́бен показу́ется,/ Егoже икону чтуще,/ Тому возно́сим славу служения нашего.

Троице Пресущественная и Пребоже́ственное Единство,/ разделением Единство и паки име́ющи Ли́цы Естеством,/ в еди́но ны сочета́й хотение Твоих заповедей.

Богоро́дичен:

Храм Тя Богоустроенный прописа́л есть Моисей,/ Серафимом покрываемый святых святая,/ прообража́я Твое́, Дево, Рождество неизрече́нное,/ Христа плотию напи́сана быти.

Седален, глас 7. Самогласен:

Истинных повелений светлости/ и благолепных икон воображе́нием/ Церковь Твоя украси́вшися,/ страсте́м Твоим похвали́ся, Христе Боже наш,/ и тех ра́ди в едину веру возводи́ми,/ славим непостижимое Твое́ величествие.

Песнь 4

Ирмо́с: Из горы́ приосене́нныя, Сло́ве, пророк,/ Единыя Богоро́дицы,/ хотя́ща воплоти́тися, Богови́дно усмотри́/ и со страхом славосло́вяше силу Твою́.

Дщи́цу разумную, добро сочета́нну всем,/ иконное писание Твоих чудес почитающе, имеем, Всещедрый,/ я́ко Евангелие Твое́ второ́е.

Я́ко воистину Тебе́ тело приимшу плотя́но,/ ви́димое виде́ние вообра́жаем,/ не начерта́ющие, ибо Его в мене́нии не разумевают, Тебе́, воплощшагося Христа.

Ты погуби́ идоли ле́стныя/ и Свою нам предложи́ икону,/ да Егoже чтуще,/ Того же видения содержа́ще, не льстимся.

Честь первоо́бразным суща иконам укаря́ете,/ чтите сия, о неми́и, прочее познайте, льстивии,/ ка́мо злоче́ствуете, отгоняюще икону Христову.

Разумно видно Нераздельно Единство в Единора́слену Троицу простира́юще,/ Единаго Бога над всеми славословим/ и Соста́вы Три проповедаем.

Богоро́дичен:

Ты во святых еси Пресвятая/ и в достойных еси Предостойна,/ я́ко Бога всех раждаеши/ и но́сиши описа́ема плотию Твое́ю, Чистая.

Песнь 5

Ирмо́с: От но́щи неве́дения/ Богове́дением просвети́вый концы,/ просвети мя утром человеколюбия Твоего, Го́споди.

Иже и́дольскую лесть плотски́м Своим зра́ком разорив, Христе,/ спаси́ чтущая Твой плотоявле́нный образ верою.

Божественную красоту паки Церковь прии́мши, украси́ся,/ о́бразы сияющи пришествия Твоего, Го́споди.

Описа́ние Божества везде чу́жде сый безбожным,/ мудрии Сего не написа́хом,/ едино же плотско́е лице Христово.

Обруга́нием иконы Христовы врази́ я́ве показа́стеся,/ приимите разшибении печать Царствия Его.

Троическое Едино безчи́слено сильное Естество славяще,/ Едино Пресоверше́нное от Три Совершен воспои́м.

Богоро́дичен:

Всею честию Боголепно Тя чтуще, Чистая,/ и того чтим Твоего плотови́дения образа Твоего.

Песнь 6

Ирмо́с: Я́коже проро́ка избавил еси/ из глубины́ преиспо́дния, Христе Боже,/ и мене́ от грехов моих изба́ви я́ко Человеколюбец/ и упра́ви живо́т мой, молюся.

Да радуется тварь, своего Зиждителя и Бога видящи то́ю созидающася,/ непретваря́ема же и написа́ема плотию, а не Божеством.

Пришед к челове́ком,/ восхотел еси образ человечь прияти,/ то написа́юще, Спа́се,/ целу́ем на воспоминание смотре́ния Твоего.

Свята́го образа плотскаго Твоего видения зряще, Христе,/ на ра́зумы возносимся Божественнаго Твоего Естества,/ оставльше до́лу плотский смысл.

Соста́вы Трое, аще и Естеством Едино Божество есть,/ во Иже крестимся, Имже служим,/ Отец, Слово и Дух Сово́зрастен.

Богоро́дичен:

Царский образ писанием вообража́юще Твой, Владыко,/ всех Царя Тя Матерь славим/ и, чтуще Того, Тебе́ славу возсылаем.

Песнь 7

Ирмо́с: О́троки ороси́вый в пещи́/ и Деву сохрани́вый рождшую Тя по Рождестве,/ благословен еси, Боже отец наших.

Написа́яй вся рукою Своею/ и на дщи́це нося написа́тися человекообразно,/ благословен еси, Боже отец наших.

Иже свойствы всеми человеческими воплощся, кроме́ единаго греха, Спасе,/ о сем и алкание прия́т, жажду же, я́ко во плоти описа́тися,/ благословен еси, Боже отец наших.

Иже из безначальна Твоего рождества имея Сына, соприше́дша,/ исходна же и Духа,/ благословен еси, Боже отец наших.

Богоро́дичен:

Воображающе Божественную Твою́ икону, я́ко печать являющу,/ Царское имя Твое́ в покланение и́мам своем,/ Богородице Чистая.

Песнь 8

Ирмо́с: На горе́ святей просла́вльшася/ и в купине́ огнем/ Приснодевы Моисе́ови тайну я́вльшаго,/ Господа пойте/ и превозноси́те во вся веки.

Неизрече́нных видений обличил ти́нными де́лы ви́дев Моисей, воображаше,/ мы же я́вльшагося в телеси зраковообра́жающа Тя, Христе,/ поем во вся веки.

Воображающе иконы вещьми́, не ве́щи покланя́емся несмы́слено,/ но на ней ту ста́вльшаго Господа Славы,/ Егoже превозносим во вся веки.

Святых всечестны́я иконы,/ я́ко исцеления нам совершающа,/ иже к ним нашего доброчи́нства верою покланяемся,/ и благоуха́нии чтим,/ и свеща́ем во вся веки.

Икону Христову злосло́вяще,/ жидо́вским прельститеся гневом,/ от полу́ Тому безчествующе,/ о́ни бо О́ному,/ Того же вы иконе ругающеся.

Прежде Сущаго прежде безчисленных век/ с Сыном же и с Духом Святым вседержи́тельне царствующаго Господа/ пойте и превозноси́те во вся веки.

Богоро́дичен:

По всему достойно Тя чту́ще/ и Божественному покланяемся образу Твое́му,/ показа́юще зде честно́е, Владычице, миру,/ Юже песнословим во вся веки.

Песнь 9

Ирмо́с: Проявле́нное на горе́ законополо́жнику во огни́ и купине́/ Рождество́ Приснодевы/ в наше, верных, спасение,/ песньми немо́лчными велича́ем.

Пребывая Неопи́санный я́ко Бог по Естеству,/ написа́ешися, Го́споди, человеческим существом,/ да уверит обое́ имети, непризрачствовав, таинство.

Ты, предавый нам свыше от святых в телописа́нии/ и вещественнем сказании Ветхаго и Новаго Завета,/ вся чудеса Твоя, Го́споди.

О Христе мой, како стерплю́ Твое́ терпение,/ я́ко претерпел еси, ви́дя Свой телообразный вид,/ укаряема честнаго образа/ и дерзких не спали́л еси.

Отъи́мшим красоту церковную/ и прозвавшим ю́ я́ко куми́рницу обруга́нием святых икон/ буди анафема вечная.

Тресветлое, Го́споди, Твоего Единоначалия явленными сиянии в ум наш блистая,/ от льсти многостро́енныя обращаеши в единственное обоже́ние.

Богоро́дичен:

Ты еси ереси прогоняющи, Чистая, Нестория расторгнувши, на Тя хулу́ ре́кша,/ Сама и ны́не враги иконы Своея и Сына Твоего победи́.