ПРИЛОЖЕНИЕ

Творе́ние епи́скопа Афана́сия

На Го́споди, воззва́х: стихи́ры воскре́сны на 4, глас 1: Вече́рния на́ша моли́твы: Обыди́те, лю́дие: Прииди́те, лю́дие: Сла́ва, святы́х, глас 4: Боже́ственнии отцы́: И ны́не, Богоро́дичен догма́тик, глас 1: Де́вственное торжество́:

Стихи́ры святы́х, глас 4.

Подо́бен: Я́ко до́бля:

Я́ко избра́нных от люде́й ру́сских, / святи́и сро́дницы на́ши, / соше́дшеся днесь, восхваля́ем вас, / я́ко, тече́ние соверши́вше, / ве́ру сохрани́ли есте́ / и прия́сте от Бо́га побе́ды ва́шея венцы́; / Его́же моли́те от бед и скорбе́й изба́витися / ве́рою соверша́ющим всечестну́ю па́мять ва́шу.

Ве́ры броня́ми, / и щито́м благода́ти, / и креста́ копие́м вооружи́вшеся, / сопроти́вным си́лам непобеди́ми бы́сте / и, я́ко Боже́ственнии хра́борницы, / де́монская ополче́ния победи́вше, / со а́нгелы лику́ете, / ве́рныя же заступа́ете, и освяща́ете, / и спаса́ете, призыва́емии.

Я́ко зве́зды многосве́тлыя, / я́ко све́т ве́лий сия́ющий, / на тве́рди небе́сней вас ве́мы, / и я́ко би́сер многоце́нный, / я́ко ка́мение блиста́ющее, / я́ко сыны дне, / я́ко избранных от рода русскаго, / я́ко побо́рники ве́рных прославля́ем, / соверша́юще ва́шу па́мять, блаже́ннии.

Сла́ва, глас 4:

Боже́ственнии отцы́, / бы́сте цве́ти духо́внии Ру́сския земли́, / похвала́ на́ша и утвержде́ние / и всем благоути́шное приста́нище: / о вас бо земля́ на́ша хва́лится, / стяжа́вши вас, я́ко неистощи́мое сокро́вище, / и ны́не, а́ще теле́сне язы́к ваш умо́лче, / но чудеса́ свиде́тельствуют просла́вльшаго вас Го́спода. / Ему́же моли́теся / дарова́ти душа́м на́шим ве́лию ми́лость.

И ны́не, Богоро́дичен, глас то́йже:

Богоро́дице, всех Цари́це, / правосла́вных похвало́, / ерети́чествующих шата́ния разори́ / и ли́ца их посрами́, / не кла́няющихся, ниже́ чту́щих, Пречи́стая, / честны́й Твой о́браз.

На стихо́вне еди́на стихи́ра воскре́сна, глас 1: Стра́стию Твое́ю, Христе́: Посе́м стих: Бог нам: и стихи́ры, глас 8: О, пресла́внаго чудесе́! На Небеси́: Стих: Госпо́дь сил: Та́же стихи́ра: О, пресла́внаго чудесе́! Чуде́с светлостьми́: Сла́ва, глас то́йже: О, пресла́внаго чудесе́! Христа ради: (зри на ряду́). И ны́не, Богоро́дичен, глас то́йже: О, пресла́внаго чудесе́! Небесе и земли Царице: (зри ни́же, Ин Богоро́дичен, глас 8. Ред. А.В.). Или Богоро́дичен, глас 4: При́сно страна́ Росси́йская (зри ни́же, И ны́не, Богоро́дичен, глас то́йже: Ред. А.В.).

Стихи́ры святы́х на стихо́вне, глас 8.

Подо́бен: О, пресла́внаго чудесе́:

О, пресла́внаго чудесе́!/ На небеси́ и на земли́ ра́дость / днесь возсия́ в па́мять всех ру́сских святы́х: / от а́нгел хвала́ми венча́ются / и от челове́к пе́ния прие́млют. / О, ка́ко в стране́ на́шей подвиза́шася, / ка́ко Бо́гу угоди́ша, / и́миже враг паде́ лука́вый, / Христу́ побе́ждшу того́.

Стих: Бог нам прибе́жище и си́ла, / Помо́щник в ско́рбех, обре́тших ны зело́.

О, пресла́внаго чудесе́! / Чуде́с светлостьми́ / со́лнца светле́йше / при́сно святи́и сро́дницы на́ши / све́тят конце́м Ру́сския земли́, / от невече́рняго Све́та облиста́еми, / и́хже сия́нии / о́блацы от страны́ на́шея отгоня́ются ва́рварстии / и де́мони побежда́ются.

Стих: Госпо́дь сил с на́ми, / Засту́пник наш, Бог Иа́ковль.

О, пресла́внаго чудесе́! / Христа́ ра́ди подвиза́выйся / треблаже́нный собо́р ру́сских святы́х / ко враго́м Святы́я Руси́ / всегда́ явля́ется ору́жие обоюдуо́строе, / пожина́я сих выше́ния. / Те́мже к нему́ возопии́м: / святи́и сро́дницы на́ши, покры́йте и ны́не нас, / ве́рою почита́ющих вас от любве́ всегда́.

Сла́ва, глас 1. Самогла́сен:

Вси пе́сньми духо́вными возопии́м: / ра́дуйся и весели́ся, гра́де Ки́еве, / яви́вый нам О́льгу Богому́друю, / ра́дуйся, гра́де Су́ждалю, / израсти́вый плод дре́ва ра́йскаго, / Евфроси́нию благове́рную, по́стников утвержде́ние, / с ни́ми же ублажи́м и Евдоки́ю Моско́вскую пресла́вную, / и Февро́нию Му́ромскую, и А́нну Ка́шинскую, / и Евфроси́нию, По́лоцкия земли́ украше́ние, / и вся жены́, от ро́да на́шего Бо́гу угоди́вшия, / и к ним возопии́м: / о всеблаже́нныя и святы́я, / моли́теся о нас ко Го́споду, / дарова́ти нам ве́лию ми́лость.

И ны́не, глас 5.

Подо́бен: Востру́бим трубо́ю:

Востру́бим трубо́ю пе́сней, / воспои́м согла́сно Засту́пнице страны́ на́шея, / Цари́це Богоро́дице: / ра́дуйся, благоволе́нием Твои́м оте́чество на́ше от лет дре́вних венча́вшая / и благода́ть тому́ источа́ющая. / Те́мже и пречи́стый Твой покро́в / и па́мяти тьма́ми тем чуде́с Твои́х / Це́рковь на́ша Ру́сская све́тло пра́зднует. / Не отыми́ у́бо от нас, о Влады́чице, / и ны́не ми́лости Твоя́, / при́зри на ско́рби и тесноту́ на́шу / и воздви́гни нас держа́вным заступле́нием Твои́м.

По Ны́не отпуща́еши: тропа́рь воскре́сен, глас 1: Ка́мени запеча́тану: Сла́ва, святы́х, глас 8: Я́коже плод: И ны́не, Богоро́дичен, глас 4: Засту́пнице усе́рдная:

Тропа́рь святы́х, глас 8:

Я́коже плод кра́сный Твоего́ спаси́тельнаго се́яния, / земля́ Росси́йская прино́сит Ти, Го́споди, вся святы́я, в той просия́вшия. / Тех моли́твами в ми́ре глубо́це / Це́рковь и страну́ на́шу Богоро́дицею соблюди́, Многоми́лостиве.

Сла́ва, и ны́не, Богоро́дичен, глас 4:

Засту́пнице усе́рдная, / Ма́ти Го́спода Вы́шняго, / за всех мо́лиши Сы́на Твоего́, Христа́ Бо́га на́шего, / и всем твори́ши спасти́ся, / в держа́вный Твой покро́в прибега́ющим, / всех нас заступи́, о Госпоже́ Цари́це и Влады́чице, / и́же в напа́стех, и ско́рбех, и боле́знех обремене́нных грехи́ мно́гими, / предстоя́щих и моля́щихся Тебе́ умиле́нною душе́ю / и сокруше́нным се́рдцем / пред пречи́стым Твои́м о́бразом со слеза́ми / и невозвра́тно наде́жду иму́щих на Тя / избавле́ния всех зол, / всем поле́зная да́руй / и вся спаси́, Богоро́дице Де́во, / Ты бо еси́ Боже́ственный покро́в рабо́м Твои́м.

Ектения́ и отпу́ст.

По отпу́сте вече́рни исхо́дим ко ико́не пра́здника, пою́ще стихи́ру пра́здника, глас 6.

Подо́бен: Все отло́жше:

Все отложи́вше / жите́йское томле́ние / и сла́дость теку́щую презре́вше, / крест взя́сте, / я́ко и́го Боже́ственное, / и Христу́ после́довасте, / и к Небе́сному поко́ю чу́дно всели́стеся. / О дру́зи Христо́вы, сосу́ди честни́и, / святи́и вси, в Росси́и просия́вшии, / прииди́те посреде́ нас неви́димо, / предначина́юще торжество́ и пе́ние, / сподобля́юще даро́в невеще́ственных / ваш пра́здник соверша́ющих святоле́пно.

И соверша́ем после́дование моле́бнаго пе́ния. Благослови́вшу предстоя́телю, чтец глаго́лет: Прииди́те, поклони́мся: (три́жды). И пое́м на о́ба ли́ка псало́м избра́нный. Предстоя́тель же в сие́ вре́мя раздае́т свещи́ возже́нныя сослужа́щим и бра́тии.

1 лик: Го́споди, Госпо́дь наш, / я́ко чу́дно И́мя Твое́ по всей земли́.

2 лик: Вся земля́ да покло́нится Тебе́ и пое́т Тебе́, / да пое́т же И́мени Твоему́, Вы́шний.

1. Кто бог ве́лий, я́ко Бог наш? / Ты еси́ Бог, творя́й чудеса́.

2. Кто возглаго́лет си́лы Госпо́дни, / слы́шаны сотвори́т вся хвалы́ Его́?

1. Помяну́х дни дре́вния, поучи́хся во всех де́лех Твои́х, / в творе́ниих руку́ Твое́ю поуча́хся.

2. Прииди́те, ви́дите дела́ Бо́жия, / коль стра́шен в сове́тех па́че сыно́в челове́ческих.

1. Испове́дайтеся Го́сподеви и призыва́йте И́мя Его́, / возвести́те во язы́цех дела́ Его́.

2. Воспо́йте Ему́ и по́йте Ему́, / пове́дите вся чудеса́ Его́.

1. Хвали́теся о И́мени святе́м Его́, / да возвесели́тся се́рдце и́щущих Го́спода.

2. Взыщи́те Го́спода и утверди́теся, / взыщи́те лица́ Его́ вы́ну.

1. Помяни́те чудеса́ Его́, я́же сотвори́, / чудеса́ Его́ и судьбы́ уст Его́.

2. Той Госпо́дь Бог наш, / по всей земли́ судьбы́ Его́.

1. Помяни́ нас, Го́споди, во благоволе́нии люде́й Твои́х, / посети́ нас спасе́нием Твои́м.

2. Воскресни́, Го́споди, помози́ нам / и изба́ви нас И́мене ра́ди Твоего́.

1. Доко́ле, Го́споди, прогне́ваешися до конца́?/ разжже́тся я́ко огнь рве́ние Твое́.

2. Не помяни́ на́ших беззако́ний пе́рвых, / ско́ро да предваря́т ны щедро́ты Твоя́, Го́споди, я́ко обнища́хом зело́.

1. Помози́ нам, Бо́же, Спаси́телю наш, сла́вы ра́ди И́мене Твоего́, / Го́споди, изба́ви ны и очи́сти грехи́ на́ша И́мене ра́ди Твоего́.

2. Да вни́дет пред Тя воздыха́ние окова́нных, / по вели́чию мы́шцы Твоея́ снабди́ сы́ны умерщвле́нных.

1. Яви́ нам, Го́споди, ми́лость Твою́ / и спасе́ние Твое́ даждь нам.

2. Ты, Го́споди, сохрани́ши ны / и соблюде́ши ны от ро́да сего́ и во век.

1. Дади́те сла́ву Бо́гови, / на Изра́или велеле́пота Его́ и си́ла Его́ на о́блацех.

2. Бу́ди И́мя Госпо́дне благослове́но / от ны́не и до ве́ка.

1. Сла́ва Отцу́ и Сы́ну и Свято́му Ду́ху / и ны́не, и при́сно, и во ве́ки веко́в. Ами́нь.

2. Аллилу́ия, аллилу́ия, аллилу́ия, / сла́ва Тебе́, Бо́же.

1. Аллилу́ия:

2. Аллилу́ия:

Посем Бог Госпо́дь: во глас 4 со стихами.

1 лик пое́т тропа́рь, глас 4:

Иерусали́ма Вы́шняго гра́жданы, / от земли́ на́шея возсия́вшия / и Бо́гу во вся́цем чину́ / и вся́ким по́двигом угоди́вшия, / прииди́те, воспои́м, ве́рнии: / о всеблаже́ннии земли́ Росси́йския засту́пницы, / моли́теся ко Го́споду, / да поми́лует сию́ от гне́ва Своего́, / исцеля́я сокруше́ние ея́, / и ве́рныя лю́ди Своя́ уте́шит.

2 лик пое́т то́йже тропа́рь.

1 лик: Сла́ва, и ны́не:

Богоро́дичен, глас то́йже:

К Засту́пнице страны́ на́шея, / Присноде́ве Богоро́дице, притеце́м / и к первопи́санней ико́не Ея́ ны́не припаде́м, / с ве́рою зову́ще из глубины́ души́: / о Ма́ти Бо́жия, спаси́ зе́млю Ру́сскую, / исцели́ сокруше́ние ея́ / и ве́рныя лю́ди уте́ши.

Посе́м пое́м на о́ба ли́ка ины́й псало́м избра́нный:

1 лик: Испове́дайтеся Го́сподеви, я́ко благ, / я́ко в век ми́лость Его́.

2 лик: Бог нам прибе́жище и си́ла, / Помо́щник в ско́рбех, обре́тших ны зело́.

1. Мно́ги ско́рби пра́ведным, / и от всех их изба́вит я Госпо́дь.

2. Се́ющии слеза́ми / ра́достию по́жнут.

1. И воззва́ша ко Го́споду, внегда́ скорбе́ти им, / и от нужд их спасе́ я.

2. Воззва́ша пра́веднии, и Госпо́дь услы́ша их, / и от всех скорбе́й их изба́ви их.

1. Святы́м, и́же суть на земли́ Его́, / удиви́ Госпо́дь вся хоте́ния Своя́ в них.

2. Пра́ведницы насле́дят зе́млю / и вселя́тся в век ве́ка на ней.

1. Весели́теся о Го́споде и ра́дуйтеся, пра́веднии, / и хвали́теся, вси пра́вии се́рдцем.

2. Весели́теся, пра́веднии, о Го́споде / и испове́дайте па́мять свя́тыни Его́.

1. Пра́ведник, я́ко фи́никс, процвете́т, / я́ко кедр, и́же в Лива́не, умно́жится.

2. Блаже́ни живу́щии в дому́ Твое́м, / в ве́ки веко́в восхва́лят Тя.

1. Ди́вен Бог во святы́х Свои́х, Бог Изра́илев, / Той даст си́лу и держа́ву лю́дем Свои́м, благослове́н Бог.

2. Лю́бящии Го́спода, ненави́дите зла́я, / храни́т Госпо́дь ду́ши преподо́бных Свои́х.

1. Блаже́ни вси боя́щиися Го́спода, / ходя́щии в путе́х Его́.

2. Собери́те Ему́ преподо́бныя Его́, / завеща́ющия заве́т Его́ о же́ртвах.

1. Ми́лость же Госпо́дня от ве́ка и до ве́ка на боя́щихся Его́, / и пра́вда Его́ на сыне́х сыно́в, храня́щих заве́т Его́ и по́мнящих за́поведи Его́ твори́ти я.

2. Весть Госпо́дь пути́ непоро́чных, / и достоя́ние их в век бу́дет.

1. Госпо́дь воцари́ся, да ра́дуется земля́, / да веселя́тся о́строви мно́зи.

2. Возвести́те во язы́цех сла́ву Его́, / во всех лю́дех чудеса́ Его́.

1. Воцари́ся Бог над язы́ки, / Бог седи́т на престо́ле святе́м Свое́м.

2. Спаси́ ны, Го́споди Бо́же наш, / и собери́ ны от язы́к испове́датися И́мени Твоему́ свято́му, хвали́тися во хвале́ Твое́й.

1. Высо́к над все́ми язы́ки Госпо́дь, / над Небесы́ сла́ва Его́.

2. От восто́к со́лнца до за́пад / хва́льно И́мя Госпо́дне.

По оконча́нии псалма́ а́бие начина́ем пе́ти кано́н святы́м, глас 8. Пое́м же его́ без ирмосо́в на 4.

Песнь 1

Ирмо́с: Во́ду проше́д:

Припе́в: Вси святи́и земли́ Ру́сския, моли́те Бо́га о нас.

1 лик: Мно́гими содержи́ми напа́стьми, / к вам прибега́ем, спасе́ния и́щуще, / о святи́и сро́дницы на́ши, / от лю́тых бед и нужд спаси́те нас.

2 лик: Страсте́й прило́зи и мно́гия печа́ли / и беды́ обурева́ют нас, / утеше́ние нам пода́йте, святи́и, / к Бо́гу ва́шими моли́твами.

1 лик: Сла́ва: Спа́са Христа́ моли́те, росси́йстии чудотво́рцы, / изба́витися нам от бед и скорбе́й, / земли́ же на́шей от ва́рварскаго нахожде́ния / ва́шим те́плым предста́тельством.

2 лик: И ны́не: В ско́рби нас и беда́х су́щих / посеще́ния Боже́ственнаго / и промышле́ния от Тебе́ сподо́би, / о Богома́ти Влады́чице.

Песнь 3

Ирмо́с: Небе́снаго кру́га:

1 лик: Засту́пницы и покрови́телие земли́ на́шея вы есте́, / Бо́жии уго́дницы, / напра́вите нас ко приста́нищу спасе́ния, / вы бо есте́ ве́рным огражде́ние.

2 лик: Мо́лим вас, блаже́ннии: / душе́вное смуще́ние и печа́ли бу́рю разори́ти / и тишину́ нам пода́ти / Нача́льника тишины́ Христа́ умоли́те.

1 лик: Сла́ва: Святы́м дре́вним подража́вшии / и от Бо́га благода́тию обогати́вшиися, / помога́йте нам, ча́дом ва́шим, / при́сно восхваля́ющим вас, я́ко Бо́жиих уго́дников.

2 лик: И ны́не: Лю́тыми неду́ги и страстьми́ грехо́вными обурева́емым, / и ва́рварскими нападе́нии истязу́емым, /и в ров поги́бели впа́дающим, / Ты нам помози́, Богоро́дице Де́во.

Посе́м свяще́нницы и о́ба ли́ка вку́пе пою́т катава́сию:

Моли́те Бо́га о нас, / вси святи́и земли́ Ру́сския, / я́ко мы усе́рдно / к вам прибега́ем, / ско́рым помо́щником и моли́твенником о душа́х на́ших.

Ектения́ сугу́бая. Во́зглас: Я́ко ми́лостив:

По во́згласе 1 лик пое́т седа́лен, глас 2:

Моле́ние те́плое / принеси́те, прехва́льнии, / к ми́лости исто́чнику, Го́споду, / о Святе́й Руси́ моля́щеся, / Богоро́дицу Влады́чицу вку́пе с собо́ю подви́гните на моли́тву / и от бед изба́вите нас, / всем вско́ре предста́тельствующии.

Песнь 4

Ирмо́с: Услы́шах, Го́споди:

2 лик: Страсте́й на́ших смуще́ние / и мно́гих бед бу́рю / предста́тельством ва́шим ко Го́споду / утоли́ти потщи́теся, святи́и.

1 лик: Милосе́рдия бе́здну простри́те нам, блаже́ннии, / призыва́ющим вас на по́мощь, / вы бо у Милосе́рдаго Бо́га / дерзнове́ние ве́лие стяжа́ли есте́.

2 лик: Сла́ва: Наде́жду иму́ще вас, сла́внии, / и я́ко сте́ну недви́жиму, / к Бо́гу ва́ша моли́твы стяжа́вше, / зол и всех бед избавля́емся.

1 лик: И ны́не: Исцели́, Чи́стая, душе́вныя на́ша не́мощи / и стра́сти теле́сныя, / поспеши́, Госпоже́, здра́вие пода́ти, / Врача́ всем ро́ждшая, Христа́.

Песнь 5

Ирмо́с: Просвети́ нас:

1 лик: Испо́лните весе́лия жизнь на́шу, / избавля́юще нас от ва́рварскаго нахожде́ния / и междоусо́бныя бра́ни.

2 лик: Изба́вите нас от бед, / я́ко предста́телие те́плии / и моли́твенницы о душа́х на́ших.

1 лик: Сла́ва: Разруши́те мглу прегреше́ний на́ших / просвеще́нием ва́шея све́тлости, / свети́льницы Боже́ственнии и пресве́тлии.

2 лик: И ны́не: Изба́ви нас от бед, Богоро́дице Чи́стая, / ве́чное ро́ждши Избавле́ние / и мир, всяк ум превосходя́щий.

Песнь 6

Ирмо́с: Моли́тву пролию́:

2 лик: Моли́твами ва́шими, блаже́ннии, / утеше́ние нам, в ско́рби су́щим, испроси́те, / ве́ру возста́вите / и лю́ди расточе́нныя собери́те, / в ско́рби, я́ко Ио́на, вопию́щия: / от тли, Бо́же, возведи́ нас.

1 лик: Засту́пники вас ве́мы, / отцы́ приснопа́мятнии, / и тве́рдыя храни́тели земли́ на́шея. / Те́мже к вам прибега́юще, / ми́лость прие́млем / и бед разли́чных избавля́емся.

2 лик: Сла́ва: Я́ко сте́ну и приста́нище / стяжа́хом вас, святи́и, / облегче́ние в ско́рбех, / в беда́х и напа́стех по́мощь, / в боле́знех исцеле́ние / и спасе́ние душа́м на́шим.

1 лик: И ны́не: Засту́пницу Тя жи́зни ве́мы / и тве́рдую Храни́тельницу, Де́во, / и искуше́ний ту́чи разсеява́ющую, / и бесо́в нападе́ния отгоня́ющую, / и мо́лимся всегда́: / от ги́бельных страсте́й на́ших изба́ви нас.

Свяще́нницы и о́ба ли́ка вку́пе пою́т катава́сию:

Моли́те Бо́га о нас, / вси святи́и земли́ Ру́сския, / я́ко мы усе́рдно / к вам прибега́ем, / ско́рым помо́щником и моли́твенником о душа́х на́ших.

Ектения́ малая.

Конда́к, глас 6:

Предста́телие страны́ на́шея неусы́пнии, / хода́таи о нас ко Творцу́ непреста́ннии, / не пре́зрите моле́ний на́ших, / но, предваря́юще на по́мощь, я́ко сро́дницы на́ши, / ускори́те на моли́тву / и потщи́теся на умоле́ние, / предста́тельствующе при́сно о чту́щих вас.

Проки́мен, глас 4: Мне же зело́ че́стни бы́ша / дру́зи Твои́, Бо́же. Стих: Изочту́ их, и па́че песка́ умно́жатся. Вся́кое дыха́ние: Ева́нгелие от Иоа́нна, зача́ло 51 (15:12–20).

Сла́ва: Моли́твами всех святы́х ру́сских, / Ми́лостиве, очи́сти / мно́жество согреше́ний на́ших.

И ны́не: Моли́твами Бого́родицы, / Ми́лостиве, очи́сти / мно́жество согре́шений на́ших.

Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

Стихи́ра, глас 6:

Не вве́рите нас челове́ческому предста́тельству, / святи́и сро́дницы, / но приими́те моле́ния на́ша, / скорбь бо обдержи́т нас, / терпе́ти не мо́жем вра́жеских озлобле́ний / и утеше́ния на земли́ не и́мамы. / Моле́ние на́ше не пре́зрите, / Небе́снии предста́телие на́ши, / утеше́ние нам пода́йте / и вся поле́зная от Бо́га испроси́те.

Посе́м глаго́лет диа́кон моли́тву: Спаси́, Бо́же, лю́ди Твоя́: (зри ни́же, Уста́в соверше́ния Слу́жбы Всем святы́м,.. Ред. А.В.). Лик: Го́споди, поми́луй, 12 раз. Во́зглас: Ми́лостию и щедро́тами:

Песнь 7

Ирмо́с: От Иуде́и доше́дше:

1 лик: На́ше спасе́ние я́коже восхоте́л еси́, Спа́се, устро́ити, / прославля́еши святы́х сро́дников на́ших чудесы́, / и́миже ко благоче́стию наставля́еми, пое́м: / оте́ц на́ших Бо́же, благослове́н еси́.

2 лик: Ми́лостиваго умоли́те, святи́и, / изба́витися от прегреше́ний и душе́вных скверн / ве́рою зову́щим: / оте́ц на́ших Бо́же, благослове́н еси́.

1 лик: Сла́ва: Сокро́вище спасе́ния / вы есте́, Бо́жии уго́дницы / и наста́вницы покая́ния, вопию́щим: / оте́ц на́ших Бо́же, благослове́н еси́.

2 лик: И ны́не: Теле́сныя сла́бости и душе́вныя неду́ги, Богороди́тельнице, / любо́вию приступа́ющим к Тебе́, Де́во, / исцели́ти сподо́би, / Спа́са Христа́ нам ро́ждшая.

Песнь 8

Ирмо́с: Царя́ Небе́снаго:

2 лик: По́мощи ва́шея тре́бующих / не пре́зрите, блаже́ннии, / пою́щих и превознося́щих Христа́ во ве́ки.

1 лик: Неможе́ние душ на́ших исцеля́ете / и от теле́сных боле́зней возставля́ете / превознося́щих Христа́ во ве́ки.

2 лик: Сла́ва: Исцеле́ния источа́ете, Бо́жии уго́дницы, / всем к вам притека́ющим любо́вию / и Христа́ превознося́щим во ве́ки.

1 лик: И ны́не: Напа́стей Ты прило́ги отгоня́еши / и страсте́й нападе́ния, Де́во, / те́мже Тя пое́м во вся ве́ки.

2 лик: Хва́лим, благослови́м, / покланя́емся Го́сподеви, / пою́ще и превознося́ще Его́ во ве́ки.

Ирмо́с: Царя́ Небе́снаго, / Его́же пою́т во́и а́нгельстии, / хвали́те и превозноси́те во вся ве́ки.

Песнь 9

1 лик: Ирмо́с: Вои́стинну Богоро́дицу / Тя испове́дуем, / спасе́ннии Тобо́ю, Де́во Чи́стая, / с безпло́тными ли́ки Тя велича́юще.

2 лик: Моле́ние на́ше услы́шавше, честни́и, / нече́стие в земли́ Ру́сстей потреби́те, / нас же всех во правосла́вии укрепи́те.

1 лик: Ра́дости сердца́ на́ша испо́лните, святи́и, / ра́дости неизрече́нныя наслажда́ющиися, / на́шу грехо́вную печа́ль потребля́юще.

2 лик: Сла́ва: Во дни ско́рбных обстоя́ний не оста́вите нас, / предста́телие на́ши и храни́телие, / но по́мощь ско́рую нам яви́те.

1 лик: И ны́не: Приста́нище и предста́тельство к Тебе́ прибега́ющих бу́ди, Де́во, / и стена́ неруши́мая, / прибе́жище же, и покро́в, и весе́лие.

Та́же за Досто́йно: лик 2 пое́т стих сей, глас 8:

Влады́чице, приими́ моли́твы раб Твои́х / и изба́ви нас от вся́кия ну́жды и печа́ли, / Ты еси́, Богоро́дице, ору́жие на́ше и стена́, / Ты еси́ Засту́пница, и к Тебе́ прибега́ем, / Тя и ны́не на моли́тву призыва́ем, / да изба́виши нас от враго́в на́ших. / Возвели́чим Тя вси, / Всенепоро́чную Ма́терь Христа́ Бо́га, / Ю́же осени́ Дух Пресвяты́й.

Посе́м трисвято́е: О́тче наш:

Тропа́рь, глас 8:

Я́коже плод кра́сный Твоего́ спаси́тельнаго се́яния / земля́ Росси́йская прино́сит Ти, Го́споди, вся святы́я, в той просия́вшия. / Тех моли́твами в ми́ре глубо́це / Це́рковь и страну́ на́шу Богоро́дицею соблюди́, Многоми́лостиве.

Сла́ва, и ны́не, глас то́йже:

С Вы́шних призира́я, убо́гия прие́мля, / посети́ нас, грехо́в ра́ди на́ших ско́рби терпя́щих, Влады́ко Всеми́лостиве, / моли́твами Богоро́дицы и всех святы́х ру́сских / да́руй земли́ на́шей ве́лию ми́лость.

Ектения́ сугу́бая, ю́же глаго́лет диа́кон с кади́лом. Во́зглас: Услы́ши ны, Бо́же: Посе́м возглаша́ет диа́кон: Ко всем святы́м земли́ Ру́сския помо́лимся. Лик: Вси святи́и земли́ Ру́сския, моли́те Бо́га о нас.

И чтет предстоя́тель моли́тву сию́:

О всеблаже́ннии и Богому́дрии уго́дницы Бо́жии, по́двиги свои́ми зе́млю Ру́сскую освяти́вшии и телеса́ своя́, я́ко се́мя ве́ры, в ней оста́вльшии, душа́ми же свои́ми Престо́лу Бо́жию предстоя́щии и непреста́нно о ней моля́щиися! Се ны́не, в день о́бщаго ва́шего торжества́, мы, гре́шнии, ме́ньшии бра́тия ва́ши, дерза́ем приноси́ти вам сие́ хвале́бное пе́ние. Велича́ем ва́ша вели́кия по́двиги, духо́внии во́ини Христо́ви, терпе́нием и му́жеством до конца́ врага́ низложи́вшии и нас, от пре́лести и ко́зней его́ избавля́ющим. Ублажа́ем ва́ше свято́е житие́, свети́льницы Боже́ственнии, све́том ве́ры и доброде́телей светя́щиися и на́ша умы́ и сердца́ богому́дренно озаря́ющии. Прославля́ем ва́ша вели́кая чудеса́, цве́ти ра́йстии, в стране́ на́шей се́верней прекра́сне процве́тшии и арома́ты дарова́ний и чуде́с повсю́ду благоуха́ющии. Восхваля́ем ва́шу богоподража́тельную любо́вь, предста́телие на́ши и покрови́телие, и, упова́юще на по́мощь ва́шу, припа́даем к вам и вопие́м: равноапо́стольнии просвети́телие на́ши! Споспешеству́йте лю́дем Ру́сския земли́ пре́данную ва́ми ве́ру правосла́вную тве́рдо содержа́ти, да спаси́тельное се́мя, ва́ми все́янное, не изсуше́но бу́дет зно́ем неве́рия, но, дожде́м Бо́жия поспеше́ния напое́нное, плод изоби́льный да принесе́т. Святи́телие Христо́ви! Моли́твами ва́шими утверди́те Це́рковь Ру́сскую, е́реси, раско́лы и нестрое́ния в ней потреби́те, расточе́нныя о́вцы во еди́но собери́те и от вся́ких волко́в, во оде́жди о́вчей в ста́до Христо́во входя́щих, огради́те. Преподо́бнии отцы́! Сохрани́те нас от пре́лестей ми́ра сего́ лука́ваго, да, отве́ргшеся себе́ и взе́мше крест свой, после́дуем Христу́, распина́юще плоть свою́ со страстьми́ и похотьми́, нося́ще тяготы́ друг дру́га. Благове́рнии кня́зие! Воззри́те ми́лостивно на земно́е оте́чество ва́ше и вся нече́стия и собла́зны, в нем ны́не су́щия, ору́жием моли́тв ва́ших потреби́те, да, я́коже дре́вле, та́ко и ны́не и в гряду́щее вре́мя, прославля́ется на Святе́й Руси́ И́мя Госпо́дне. Страстоте́рпцы росси́йстии пресла́внии! Укрепи́те нас в му́жественнем стоя́нии да́же до кро́ве за ве́ру правосла́вную и обы́чаи оте́ческия, да ни скорбь, ни теснота́, ни гоне́ния, ни глад, ни нагота́, ни беда́, ни меч не возмо́гут нас разлучи́ти от любве́ Бо́жия, я́же о Христе́ Иису́се. Блаже́ннии, Христа́ ра́ди юро́дивии и пра́веднии! Посрами́те му́дрость ве́ка сего́, вознося́щуюся на ра́зум Бо́жий, нам же помози́те, спаси́тельным бу́йством Креста́ Христо́ва утверди́вшеся, собла́зны му́дрости мирски́я незы́блемым бы́ти, Го́рнее при́сно, а не земно́е помышля́ти. Богому́дрыя жены́, в немощне́м естестве́ по́двиги ве́лии яви́вшия! Моли́теся, да дух ва́шея любве́ ко Го́споду и ре́вность о угожде́нии Ему́ и о свое́м и бли́жняго спасе́нии не оскудева́ет в нас. Вси святи́и сро́дницы на́ши, от лет дре́вних просия́вшии и в после́дния дни подвиза́вшиися, явле́ннии и неявле́ннии, ве́домии и неве́домии! Помяни́те на́шу не́мощь и уничиже́ние и моли́твами ва́шими испроси́те у Христа́ Бо́га на́шего, да и мы, безбе́дно преплы́вше жите́йскую пучи́ну и невреди́мо соблю́дше сокро́вище ве́ры, в приста́нище ве́чнаго спасе́ния дости́гнем и в блаже́нных оби́телех Го́рняго оте́чества вку́пе с ва́ми и со все́ми угоди́вшими Ему́ от ве́ка святы́ми водвори́мся благода́тию и человеколю́бием Спаси́теля на́шего Го́спода Иису́са Христа́, Ему́же со Преве́чным Отце́м и Пресвяты́м Духо́м подо́бает непреста́нное славосло́вие и поклоне́ние от всех тва́рей во ве́ки веко́в.

Лик: Ами́нь.

И про́чая по обы́чаю. И отпу́ст. По отпу́сте пое́т диа́кон:

Спаси́, Христе́ Бо́же, Вели́каго Господи́на и Отца́ на́шего, Святе́йшаго Патриа́рха (и́мярек) Моско́вскаго и всея́ Руси́ с богохрани́мою его́ па́ствою, зе́млю Ру́сскую в ми́ре сохрани́ и ве́ру правосла́вную в ней утверди́ во ве́ки веко́в. Ами́нь.

Певцы́ пою́т: Спаси, Христе Боже (три́жды).

Посем, сошедшеся, на сходе пое́м стихи: Утверждение на Тя: и прочия (зри ни́же).

Блаже́н муж: кафи́зма вся. На Го́споди, воззва́х: стихи́ры на 10, воскре́сны 3, глас 1: Вече́рния на́ша: Обыди́те, лю́дие: Прииди́те, лю́дие: и Анато́лиева еди́на, глас то́йже: Весели́теся, Небеса́: и стихи́ры святы́х 6, после́днюю: Святы́х па́мять: оставля́ем, Сла́ва, святы́х, глас 1: Весели́ся о Го́споде: И ны́не, догма́тик рядово́го 1-го гла́са: Всеми́рную сла́ву:

Стихи́ры святы́х, глас 3. Самогла́сны:

Прииди́те, собо́ри Росси́йстии, / су́щия в стране́ на́шей святы́я восхва́лим: / преподо́бныя, и иера́рхи, и кня́зи благове́рныя, / му́ченики и священному́ченики, / и Христа́ ра́ди юро́дивыя, / и жен святы́х сосло́вие, / вку́пе имену́емыя и неимену́емыя, / си́и бо вои́стинну де́лы и словесы́, и многови́дным житие́м, / и от Бо́га дарова́нии / соде́лашася святи́и / и Руси́ тезоиме́ние свя́тости пода́ша, / и́хже и гро́бы Бог чудесы́ просла́ви, / и ны́не несре́дственне просла́вльшему их Христу́ предстоя́ще, / мо́лятся приле́жно о нас, / любо́вию соверша́ющих све́тлое их торжество́.

Прииди́те, правосла́вия люби́телие, / пе́сненными добро́тами похва́лим богому́дрыя святи́тели Росси́йския, / Христо́вы Це́ркве све́тлое украше́ние, / свяще́нства венцы́, благоче́стия пра́вило, / исто́чники Боже́ственных исцеле́ний неисчерпа́емыя, / проли́тие дарова́ний духо́вных, / ре́ки мно́гих чуде́с, / зе́млю Ру́сскую веселя́щия тече́нием, / благове́рным лю́дем те́плыя посо́бники, / и́хже ра́ди Христо́с враго́в возноше́ния низложи́, / име́яй ве́лию ми́лость.

Земля́ весели́тся и Не́бо ра́дуется, / отцы́ преподо́бнии, / восхваля́юще по́двиги и труды́ ва́ша, / душе́вное благомо́щие и ума́ чистоту́, / зако́ном бо естества́ не победи́стеся. / О собо́ре святы́й и по́лче Боже́ственный, / земли́ на́шея утвержде́ние вы есте́ вои́стинну.

И́ны стихи́ры, глас 8. Самогла́сны:

Блаже́ннии богому́дрии кня́зие Росси́йстии, / правосла́вною му́дростию сия́ющии, / доброде́телей же све́тлостию блиста́ющии, / озаря́ете ве́рных исполне́ния, / бесо́в тьму отгоня́юще; / те́мже, я́ко прича́стники невече́рния благода́ти / и насле́дия ва́шего храни́тели непосты́дныя, / вас почита́ем, досточу́днии.

Му́ченицы Христо́вы преблаже́ннии, / на во́льное заколе́ние са́ми себе́ преда́сте, / и зе́млю Ру́сскую кровьми́ ва́шими освяти́сте, / и возду́х просвети́сте преставле́нием; / ны́не же живе́те на Небесе́х, / во све́те невече́рнем, / о нас всегда́ моля́щеся, богови́дцы.

Блаже́ннии Христа́ ра́ди юро́дивии и пра́веднии, / в Росси́и просия́вшии, / вы, отверже́нием себе́ Христу́ после́довавше, / мудре́йшим юро́дством прехитри́ли есте́ диа́вола, / сего́ связа́вше по́двиги ва́шими, / и, бога́тство нося́ще в души́ некра́домо, / вся Христо́ва уче́ния де́лом испо́лнисте, / и, ны́не на Небесе́х лику́юще, / не преста́йте моли́тися о Ру́сстей земли́ / и о всех почита́ющих вас.

Святы́х па́мять / ве́лие торжество́ яви́ся земли́ на́шей, / и, о том хва́лящеся, возглаго́лем: / не забу́дите оте́чествия ва́шего, Ру́сския земли́, / но всех нас помина́йте, / соверша́ющих па́мять ва́шу, вси святи́и, / моля́щеся о нас ко Го́споду.

Сла́ва, глас 1:

Весели́ся о Го́споде, Русь Правосла́вная, / ра́дуйся и лику́й, ве́рою све́тло оде́явшися, / телеса́ подви́жников ве́ры и свиде́телей и́стины / в не́дрех свои́х иму́щи, я́ко сокро́вище, / наслади́ся чуде́с, от них истека́ющих, / и, ви́дящи полк сей святы́й, / от ви́димых и неви́димых враго́в тя огражда́ющий, / благода́рно Спа́су возопи́й: / Го́споди, сла́ва Тебе́.

И ны́не, Богоро́дичен. Глас то́йже: Всеми́рную сла́ву:

Вход. Проки́мен дне и чте́ния три.

Проро́чества Иса́иина чте́ние (глава́ 49:8–15):

Та́ко глаго́лет Госпо́дь: / во вре́мя прия́тное послу́шах тя / и в день спасе́ния помого́х тебе́. / И созда́х тя и дах тя в заве́т язы́ков, / е́же устро́ити зе́млю и насле́дити насле́дие пусты́ни. / Глаго́люща су́щим во у́зах: изыди́те! / И су́щим во тьме: откры́йтеся!/ На всех путе́х пасти́ся бу́дут, / и на всех стезя́х па́жить их. / Не вза́лчут, ниже́ вжа́ждут, / ниже́ порази́т их зной, ниже́ со́лнце, / но Ми́луяй их уте́шит я́ / и сквозе́ исто́чники вод проведе́т я. / И положу́ вся́кую го́ру в путь / и вся́кую стезю́ в па́ству их. / Се си́и издале́ча прии́дут, / си́и от се́вера и мо́ря, ини́и же от земли́ Пе́рсския. / Да веселя́тся Небеса́, и ра́дуется земля́, / да отры́гнут го́ры весе́лие и хо́лми пра́вду, / я́ко поми́лова Бог лю́ди Своя́ / и смире́нныя люде́й уте́ши. / Рече́ же Сио́н: / оста́ви мя Госпо́дь, и Бог забы́ мя. / Еда́ забу́дет жена́ отроча́ свое́? / или́ не поми́лует исча́дия чре́ва своего́? / А́ще ли же и сих забу́дет же́на, / но Аз не забу́ду тебе́, – глаго́лет Госпо́дь.

Прему́дрости Иису́са, сы́на Сира́хова, чте́ние (глава́ 44:1–14):

Восхва́лим у́бо му́жи сла́вны и отцы́ на́ша в бытии́. / Мно́гу сла́ву созда́ Госпо́дь в них вели́чием Свои́м от ве́ка. / Госпо́дствующе в ца́рствиих Свои́х / и му́жи, имени́ти си́лою, сове́тующе ра́зумом свои́м, / провеща́вшии во проро́чествах; / старе́йшины люди́й в сове́тех / и в ра́зуме писа́ния люди́й. / Прему́драя словеса́ в наказа́нии их; / и́щуще гла́са мусики́йска и пове́дающе по́вести во писа́ниях, / му́жи бога́тии, обдарова́ни кре́постию, / ми́рно живу́ще в жили́щих свои́х. / Вси си́и в ро́дех просла́влени бы́ша, / и во днех их похвала́. / Суть от них и́же оста́виша и́мя, е́же пове́дати хвалы́. / И суть, и́хже несть па́мяти, и погибо́ша, я́ко не су́щии, / и бы́ша я́ко не бы́вше, и ча́да их по них. / Но си́и му́жие ми́лостивии, / и́хже пра́вды не забве́ны бы́ша, / с се́менем их пребу́дет до́брое насле́дие, / изча́дия их в заве́тех. / Оста́ся се́мя их и ча́да их по них, / до ве́ка пребу́дет се́мя их, / и сла́ва их не потреби́тся. / Телеса́ их в ми́ре погребе́на бы́ша, / а имена́ их живу́т в ро́ды. / Прему́дрость их пове́дят лю́дие, / и похвалу́ их испове́сть Це́рковь.

Прему́дрости Соломо́новы чте́ние (глава́ 3:1–9):

Пра́ведных ду́ши в руце́ Бо́жией, / и не прико́снется их му́ка. / Непщева́ни бы́ша во очесе́х безу́мных умре́ти. / И вмени́ся озлобле́ние исхо́д их. / И е́же от нас ше́ствие – сокруше́ние, они́ же суть в ми́ре. / И́бо пред лице́м челове́ческим а́ще и му́ку прии́мут, / упова́ние их безсме́ртия испо́лнено. / И вма́ле наказа́ни бы́вше, / вели́кими благоде́тельствовани бу́дут, / я́ко Бог искуси́ я́ и обре́те их досто́йны Себе́. / Я́ко зла́то в горни́ле, искуси́ их / и, я́ко всепло́дие же́ртвенное, прия́т я́, / и во вре́мя посеще́ния их возсия́ют / и, я́ко и́скры по сте́блию, потеку́т. / Су́дят язы́ком и облада́ют людьми́, / и воцари́тся Госпо́дь в них во ве́ки. / Наде́ющиися Нань уразуме́ют и́стину, / и ве́рнии в любви́ пребу́дут Ему́. / Я́ко благода́ть и ми́лость в преподо́бных Его́ / и посеще́ние во избра́нных Его́.

На лити́и стихи́ры святы́х вси.

Самогласен, глас 8:

Сра́дуйтеся с на́ми, вси ли́цы святы́х / и вся а́нгельская чинонача́лия, / духо́вне совоку́пльшеся, / прии́дем и воспои́м благода́рную песнь Христу́ Бо́гу: / се бо безчи́сленный сонм сро́дников на́ших / предстои́т Царю́ Сла́вы / и моле́бно хода́тайствует о нас. / Си́и суть столпи́ и красота́ ве́ры правосла́вныя; / си́и уче́нии, и де́лы, и крове́й излия́нии / Це́рковь Бо́жию просла́виша; / си́и от всех преде́л земли́ на́шея возсия́ша, / и ве́ру правосла́вную в ней / чудесы́ и зна́мении утверди́ша, / и во ины́я страны́ пронесо́ша, / апо́стольски ревну́юще; / ини́и же пусты́ни и гра́ды оби́тельми святы́ми украси́ша, / а́нгельское житие́ показу́юще; / мно́зи руга́нии, и ра́нами, и лю́тою сме́ртию / от сыно́в ве́ка сего́ искуси́шася, / мно́зи же и ине́ми ви́ды, / во вся́цем чи́не подвиза́вшеся, / нам терпе́ния и злострада́ния о́браз пода́ша, / и вси вку́пе мо́лят ны́не Го́спода / от бед изба́витися оте́честву на́шему / и всем нам спасти́ся.

И́ны стихи́ры, подо́бны на осмь гла́сов.

Глас 1. Подо́бен: О, ди́вное чу́до:

О, ди́вное чу́до!/ Исто́чницы благоче́стия / в Росси́и явля́ются, / и путеводи́телие к Небеси́ святи́и сро́дницы нам быва́ют. / Весели́ся, Русь Правосла́вная, / сих оте́чество земно́е. / Возопии́м, ве́рнии, / таковы́я иму́ще в беда́х засту́пники: / блаже́ннии и святи́и, / Бо́га не преста́йте о нас моли́ти, / подаю́щаго ва́ми земли́ на́шей ве́лию ми́лость.

Глас 2. Подо́бен: Егда́ от Дре́ва:

Све́тите оте́честву ва́шему всегда́, / сла́внии чудотво́рцы ру́сстии, / я́коже зве́зды све́тлыя, / покрыва́ете бо при́сно сие́ от па́губы враго́в / и избавля́ете озлобле́ния и бу́ри вся́кия. / Те́мже ра́достно пра́зднует, / ле́тнюю па́мять, блаже́ннии, соверша́юще, / ве́рою и любо́вию пою́ще Го́спода, / вас просла́вльшаго.

Глас 3. Подо́бен: Ве́лия му́ченик:

Ве́лия святы́х Твои́х, Христе́, си́ла: / во гробе́х бо лежа́ще, / ду́хи прогоня́ют / и упраздни́ша вра́жию власть, / ве́рою Тро́ическою подви́гшеся / во благоче́стии.

Глас 4. Подо́бен: Дал еси́:

Дал еси́ зна́мение / боя́щимся Тебе́, Го́споди, / Крест Твой честны́й, / и́мже ти́и, посрами́вше / нача́ла тьмы и вла́сти, / на Святе́й Руси́ правосла́вие утверди́ша. / Те́мже Твое́ человеколю́бное смотре́ние сла́вим, / Иису́се всеси́льне, / Спа́се душ на́ших.

Глас 5. Подо́бен: Ра́дуйся:

Прииди́те, Небе́снии предста́телие на́ши, к нам, / ва́шего тре́бующим ми́лостивнаго посе́щения, / и изба́вите озло́бленныя мучи́тельскими преще́нии / и лю́таго неи́стовства неве́рных, / от ни́хже, я́ко пле́нницы и на́зи, гони́ми есмы́, / от ме́ста на ме́сто ча́сто преходя́ще / и заблужда́юще в верте́пех и гора́х. / Уще́дрите у́бо, прехва́льнии, / и да́руйте нам осла́бу, / утоли́те бу́рю / и угаси́те е́же на ны негодова́ние, / Бо́га моля́ще, / подаю́щаго ва́ми земли́ на́шей ве́лию ми́лость.

Глас 6. Подо́бен: Все отло́жше:

Все отложи́вше / жите́йское томле́ние / и сла́дость теку́щую презре́вше, / крест взя́сте, я́ко и́го Боже́ственное, / и Христу́ после́довасте, / и к Небе́сному поко́ю чу́дно всели́стеся. / О дру́зи Христо́ви, сосу́ди честни́и, / святи́и вси, в Росси́и просия́вшии, / прииди́те посреде́ нас неви́димо, / предначина́юще торжество́ и пе́ние / и сподобля́юще даро́в невеще́ственных / ваш пра́здник соверша́ющих светоле́пно.

Глас 7. Подо́бен: Не ктому́ возбраня́еми:

Не лише́ни есмы́ наде́жди спасе́ния, / святы́я бо сро́дники на́ша и́мамы, / о нас моля́щияся. / Го́споди, сла́ва Тебе́.

Глас 8. Подо́бен: Го́споди, а́ще и суди́щу:

Го́споди, / а́ще и нам по всему́ подо́бни бы́ша святи́и, / но, пристра́стия земна́го отве́ргшеся, / любо́вию к Тебе́ кре́пко привяза́шася, / и, венча́вшеся ны́не / руко́ю Твое́ю, / предзащища́ют ду́ши на́ша.

Сла́ва, и ны́не, глас то́йже, Богоро́дичен. Самогла́сен:

Сра́дуйтеся с на́ми, у́мная чинонача́лия, / духо́вный совоку́пльше лик, / ви́дяще Цари́цу и Влады́чицу всех, / многоиме́нне ве́рными сла́виму: / ра́дуются же и ду́си пра́ведных, / су́щии зри́телие виде́ния, / на возду́се моле́бно простира́ющу всечестне́и Свои́ ру́це, / прося́щу умире́ния ми́ру, / и стране́ Росси́йстей утвержде́ния, / и спасе́ния душ на́ших.

На лити́и в моли́тве Спаси́, Бо́же: помина́ет диа́кон⁸⁴ избра́нных ру́сских святы́х, в моли́тве же Влады́ко, Многоми́лостиве: помина́ет предстоя́тель всех святы́х, в земли́ Росси́йстей просия́вших (зри ни́же, Устав совершения Службы Всем святым,.. Ред. А.В.).

И вхо́дим в храм, пою́ще стихи́ры стихо́вны воскре́сны 1-го гла́са: Стра́стию Твое́ю: Да ра́дуется: Царь сый: Жены́ мироно́сицы: со стихи́ их. Сла́ва, святы́х, глас 2: Но́вый до́ме: И ны́не, Богоро́дичен, глас то́йже: Вы́шнии ли́цы: Или ин Богоро́дичен, глас 8: О, пресла́внаго чудесе́! Небесе́ и земли́ Цари́ца:

На стихо́вне стихи́ры святы́х, глас 2.

Подо́бен: До́ме Евфра́фов:

Земле́ Ру́сская, / гра́де святы́й, / украша́й твой дом, / в не́мже Боже́ственный / ве́лий сонм святы́х просла́ви.

Стих: Го́споди, Госпо́дь наш, / я́ко чу́дно И́мя Твое́ по всей земли́.

Це́рковь Ру́сская, / красу́йся и лику́й, / се бо ча́да твоя́ / Престо́лу Влады́чню / во сла́ве предстоя́т, ра́дующеся.

Стих: Святы́м, и́же суть на земли́ Его́, / удиви́ Госпо́дь вся хоте́ния Своя́ в них.

Собо́ре святы́х ру́сских, / по́лче Боже́ственный, / моли́теся ко Го́споду / о земно́м отече́стве ва́шем / и о почита́ющих вас любо́вию.

Сла́ва, глас и подо́бен то́йже:

Но́вый до́ме Евфра́фов, / уде́ле избра́нный, / Русь Свята́я, / храни́ ве́ру правосла́вную, / в не́йже тебе́ утвержде́ние.

И ны́не, глас и подо́бен то́йже:

Вы́шнии ли́цы, / Богоро́дице Де́во, / пою́т с ни́жними, / сла́вяще непреста́нно / Рождество́ Твое́ Пречи́стое.

Ин Богоро́дичен, глас 8.

Подо́бен: О, пресла́внаго чудесе́:

О, пресла́внаго чудесе́!/ Небесе́ и земли́ Цари́ца, / от святы́х сро́дников на́ших умоля́емая, / до ны́не зе́млю Ру́сскую покрыва́ет / и ли́ка Своего́ изображе́нии ми́лостивно обогаща́ет. / О Влады́чице Держа́вная! / Не преста́ни и на бу́дущее вре́мя / во утвержде́ние на Руси́ правосла́вия / ми́лости и чудеса́ излива́ти до ве́ка. Ами́нь.

На благослове́нии хле́бов Богоро́дице Де́во: два́жды, и тропа́рь святы́х, глас 8, еди́ножды.

Тропа́рь святых, глас 8:

Я́коже плод кра́сный Твоего́ спаси́тельнаго се́яния, / земля́ Росси́йская прино́сит Ти, Го́споди, вся святы́я, в той просия́вшия. / Тех моли́твами в ми́ре глубо́це / Це́рковь и страну́ на́шу Богоро́дицею соблюди́, Многоми́лостиве.

На Бог Госпо́дь: тропа́рь воскре́сен, глас 1: Ка́мени запеча́тану: еди́ножды, и святы́х тропа́рь, глас 8: Я́коже плод: еди́ножды.

Сла́ва, ин тропа́рь, глас 4:

Иерусали́ма Вы́шняго гра́жданы, / от земли́ на́шея возсия́вшия / и Бо́гу во вся́цем чину́ и вся́ким по́двигом угоди́вшия, / прииди́те, воспои́м, ве́рнии: / о всеблаже́ннии земли́ Росси́йския засту́пницы, / моли́теся ко Го́споду, / да поми́лует сию́ от гне́ва Своего́, / исцеля́я сокруше́ние ея́, / и ве́рныя лю́ди Своя́ уте́шит.

И ны́не, Богоро́дичен, глас то́йже:

Днесь све́тло красу́ется Правосла́вная Русь, / я́ко зарю́ со́лнечную, восприи́мши, Влады́чице, / чудотво́рную Твою́ ико́ну Влади́мирскую, / к не́йже ны́не мы притека́юще / и моля́щеся Тебе́, взыва́ем си́це: / о пречу́дная Влады́чице Богоро́дице, / моли́ся из Тебе́ воплоще́нному Христу́ Бо́гу на́шему, / да изба́вит зе́млю Ру́сскую и вся страны́ христиа́нския / невреди́мы от всех наве́т вра́жиих / и спасе́т ду́ши на́ша, я́ко Милосе́рд.

По стихосло́виих седа́льны воскре́сны 1-го гла́са со стихи́ их. По полиеле́и ипакои́ воскре́сен, глас 1: Разбо́йничо покая́ние: и и́ны седа́льны святы́х от 1-го стихосло́вия, глас 3: Мужа́йся, Христо́ва Це́рковь: и от 2-го стихосло́вия, глас 1: А́ще и глаго́лют: Та́же седа́льны святы́х по полиеле́и, глас 5: Красу́йся, свети́ся Русь: Сла́ва, глас 3: Све́тло соверша́юще: И ны́не, Богоро́дичен, глас 4: Я́ко необори́мую сте́ну:

По 1-м стихосло́вии седа́лен святых, глас 2.

Подо́бен: Апо́столе, Христу́ Бо́гу:

Со́лнце пра́вды, Христо́с, вас посла́, я́коже лучи́, / просвеща́ющии зе́млю Ру́сскую, / уго́дницы Бо́жии, от ро́да на́шего просия́вшии. / Те́мже моли́те Его́, святи́и, / облежа́щий нас ны́не о́блак неве́рия разгна́ти / и дарова́ти нам мир и ве́лию ми́лость.

Сла́ва, ин седа́лен, глас 3.

Подо́бен: Де́ва днесь:

Мужа́йся, Христо́ва Це́рковь, / и держа́вствуй над всу́е борю́щими!/ Христо́ви бо дру́зи о тебе́ пеку́тся, / и предстоя́ще, и обстоя́ще, / и́хже о́бщий пра́здник ны́не / соверша́еши све́тло.

И ны́не, Богоро́дичен, глас 5:

Пред свято́ю Твое́ю ико́ною, Влады́чице, / моля́щиися исцеле́ний сподобля́ются, / ве́ры и́стинныя позна́ние прие́млют / и ага́рянская наше́ствия отража́ют. / Те́мже и нам, к Тебе́ припа́дающим, / грехо́в оставле́ние испроси́, / по́мыслы благоче́стия сердца́ на́ша просвети́ / и к Сы́ну Твоему́ моли́тву вознеси́ / о спасе́нии душ на́ших.

По 2-м стихосло́вии седа́лен, глас 1.

Подо́бен: Гроб Твой:

Я́ко со́лнце све́тлое, я́ко блиста́ющая денни́ца, / па́мять честна́я в земли́ Ру́сстей просия́вших святы́х возсия́, / всех нас освеща́ющи и согрева́ющи сердца́ на́ша / к подража́нию житию́ их Боже́ственному и к ре́вности о ве́ре.

Сла́ва, ин седа́лен, глас то́йже:

Подо́бен: Ка́мени запеча́тану:

А́ще и глаго́лют сы́нове ве́ка сего́: / прииди́те, отста́вим вся пра́здники Бо́жия от земли́, / но Ца́рство Госпо́дне и еще́ держа́вствовати и́мать, / де́рзость враго́в отража́ющее. / Те́мже настоя́щее торжество́ све́тло пра́зднующе, / Еди́ному Царю́ и Бо́гу на́шему возопии́м: / сла́ва Тебе́, Русь Правосла́вием освяти́вшему; / сла́ва Тебе́, святы́я мно́гия в ней просла́вльшему; / сла́ва Тебе́, и доны́не ве́рным кре́пость да́рующему.

И ны́не, Богоро́дичен, глас то́йже:

Боголюби́вая Цари́це, / Неискусому́жная Де́во, Богоро́дице Мари́е, / моли́ за ны Тебе́ возлюби́вшаго / и ро́ждшагося от Тебе́ Сы́на Твоего́, Христа́ Бо́га на́шего, / пода́ти нам оставле́ние прегреше́ний, / ми́рови мир, / земли́ плодо́в изоби́лие, / па́стырем святы́ню / и всему́ челове́чу ро́ду спасе́ние, / гра́ды и страны́ Росси́йския от нахожде́ния иноплеме́нных заступи́ / и от междоусо́бныя бра́ни сохрани́. / О Ма́ти Боголюби́вая Де́во, / о Цари́це Всепе́тая! / Ри́зою Свое́ю покры́й нас от вся́каго зла, / от ви́димых и неви́димых враг защити́ / и спаси́ ду́ши на́ша.

Полиеле́й

А́ще несть ико́ны Всех ру́сских святы́х, поставля́ем ико́ну Пресвяты́я Тро́ицы. По оконча́нии псалмо́в полиеле́йных священнослужи́тели пою́т велича́ние Пресвяте́й Тро́ице: Велича́ем Тя, Триипоста́сный Влады́ко: и а́бие священнослужи́тели же пою́т велича́ние Пресвяте́й Богоро́дице: Досто́йно есть: Посе́м пое́м на о́ба ли́ка псало́м избра́нный: Бла́го есть: и припева́ем велича́ние святы́м: Ублажа́ем вас: к стиха́м сего псалма́, ко всем или́ то́кмо к не́которым, я́коже указа́ся. Посе́м не пе́вше: Сла́ва, и ны́не: 1 лик пое́т: Благослове́н еси́, Го́споди, научи́ мя оправда́нием Твои́м. А́нгельский собо́р: и про́чии тропари́ воскре́сныя по непоро́чных.

А́ще пра́зднество соверша́ем во ин день, священнослужи́тели пою́т велича́ние Пресвяте́й Троице и посе́м пое́м псало́м избра́нный ино́й: Воскли́кните Го́сподеви, вся земля́: (зри ни́же, Устав совершения Службы Всем святым,.. Ред. А.В.). К стиха́м сего́ псалма́, ко всем или то́кмо к не́которым, я́коже указа́ся, припева́ем велича́ние святы́м. Сла́ва, и ны́не: Аллилу́ия, три́жды. И коне́чное велича́ние Пресвяте́й Богоро́дице.

По полиеле́йных псалме́х свяще́нницы пою́т велича́ние Пресвяте́й Тро́ице:

Велича́ем Тя, / Триипоста́сный Влады́ко, / ве́рою правосла́вною зе́млю Ру́сскую озари́вшаго / и святы́х сро́дников на́ших / сонм ве́лий в ней просла́вльшаго.

И а́бие священнослужи́тели же пою́т велича́ние Пресвяте́й Богоро́дице:

Досто́йно есть велича́ти Тя, / Богоро́дице, / земли́ Ру́сския Цари́цу Небе́сную / и люде́й правосла́вных / Влады́чицу Держа́вную.

Посе́м стих 1-й псалма́ избра́ннаго Бла́го есть: и велича́ние святы́м:

Ублажа́ем вас, / чудотво́рцы на́ши сла́внии, / зе́млю Ру́сскую доброде́тельми ва́шими озари́вшии / и о́браз спасе́ния нам / светоявле́нно показа́вшии.

Псало́м избра́нный, пое́мый в Неде́лю 2-ю по Пятидеся́тнице:

1 лик: Благо есть испове́датися Го́сподеви и пе́ти⁸⁵ И́мени Твоему́, Вы́шний, возвеща́ти зау́тра ми́лость Твою́ и и́стину Твою́ на вся́ку нощь. / Ублажа́ем вас:

2 лик: Ве́лий Госпо́дь и хва́лен зело́, во гра́де Бо́га на́шего, в горе́ святе́й Его́.

1. Род и род восхва́лят дела́ Твоя́ и си́лу Твою́ возвестя́т.

2. Великоле́пие сла́вы святы́ни Твоея́ возглаго́лют и чудеса́ Твоя́ пове́дят.

1. Па́мять мно́жества бла́гости Твоея́ отры́гнут и пра́вдою Твое́ю возра́дуются.

2. Госпо́дь кре́пость лю́дем Свои́м даст, Госпо́дь благослови́т лю́ди Своя́ ми́ром.

1. Я́ко благоволи́т Госпо́дь в лю́дех Свои́х и вознесе́т кро́ткия во спасе́ние.⁸⁶

2. Возвеселя́тся вси упова́ющии на Тя, во век возра́дуются, и всели́шися в них, и похва́лятся о Тебе́ лю́бящии И́мя Твое́. / Ублажа́ем вас:

1. Сей род и́щущих Го́спода, и́щущих лице́ Бо́га Иа́ковля.

2. Мне же зело́ че́стни бы́ша дру́зи Твои́, Бо́же, зело́ утверди́шася влады́чествия их.

1. Изочту́ их, и па́че песка́ умно́жатся.

2. Уве́дите, я́ко Госпо́дь, Той есть Бог наш, Той сотвори́ нас, а не мы, мы же лю́дие Его́ и о́вцы па́жити Его́.

1. Ми́лости Твоя́, Го́споди, во век воспою́, в род и род возвещу́ и́стину Твою́ усты́ мои́ми.

2. Ми́лость же Госпо́дня от ве́ка и до ве́ка на боя́щихся Его́.

1. Боя́щиися Го́спода упова́ша на Го́спода, Помо́щник и Защи́титель им есть.⁸⁷

2. Ра́дуйтеся Бо́гу, Помо́щнику на́шему, воскли́кните Бо́гу Иа́ковлю.

1. Возра́дуемся о спасе́нии Твое́м и во И́мя Го́спода Бо́га на́шего возвели́чимся. / Ублажа́ем вас:

2. Госпо́дь утвержде́ние люде́й Свои́х и Защи́титель спасе́ний Христа́ Своего́ есть.

1. О Бо́зе сотвори́м си́лу, и Той уничижи́т стужа́ющия нам.

2. Го́споди, си́лою Твое́ю возвесели́тся царь, и о спасе́нии Твое́м возра́дуется зело́.

1. О Бо́зе похва́лимся весь день, и о И́мени Твое́м испове́мыся во век.

2. Земля́ даде́ плод свой, благослови́ ны, Бо́же, Бо́же наш, благослови́ ны, Бо́же, и да убоя́тся Его́ вси концы́ земли́.

1. Спаси́ ны, Го́споди Бо́же наш, и собери́ ны от язы́к испове́датися И́мени Твоему́ свято́му и хвали́тися зри во хвале́ Твое́й.

2. Благослове́н Госпо́дь, Бог Изра́илев, от ве́ка и до ве́ка, и реку́т вси лю́дие: бу́ди, бу́ди. / Ублажа́ем вас:

Посе́м тропари́ воскре́сныя по непоро́чнах. Ектения́ ма́лая. Ипакои́ воскре́сен, глас 1: Разбо́йничо покая́ние: и и́ны седа́льны святы́х от 1-го стихосло́вия, глас 3: Мужа́йся, Христо́ва Це́рковь: и от 2-го стихосло́вия, глас 1: А́ще и глаго́лют: (зри выше: А́ще и глаго́лют сы́нове ве́ка сего́... Ред. А.В.).

Та́же седа́льны святы́х по полиеле́и, глас 5:

Красу́йся, свети́ся, Русь Правосла́вная, луча́ми Креста́, / его́же и́маши всем ве́рным храни́теля, / ты же мно́жество все де́монское, / тьмы испо́лньшееся, отве́ргни.

Сла́ва, глас 3.

Подо́бен: Да веселя́тся:

Све́тло соверша́юще настоя́щее торжество́, / восхва́лим и Андре́я Первозва́ннаго, / я́ко Ру́сския земли́ апо́стола, / пе́рваго ева́нгельским благове́стием сию́ огласи́вшаго, / той бо, я́коже дре́вле пра́отцем на́шим, / та́ко и нам ны́не взыва́ет: / прииди́те, обрето́хом Жела́емаго.

И ны́не, Богоро́дичен, глас 4:

Я́ко необори́мую сте́ну и исто́чник чуде́с / стяжа́вше Тя, раби́ Твои́, Богоро́дице Пречи́стая, / сопроти́вных ополче́ния низлага́ем. / Те́мже мо́лим Тя: / мир земли́ Ру́сстей да́руй / и душа́м на́шим ве́лию ми́лость.

А́ще 2-я неде́ля по Пятидеся́тнице, степе́нна воскре́сна, 1-го гла́са. Проки́мен воскре́сный, глас 1: Ны́не воскресну́, глаго́лет Госпо́дь, / положу́ся во спасе́ние, не обиню́ся о нем. Стих: Словеса́ Госпо́дня, словеса́ чи́ста. Вся́кое дыха́ние: Ева́нгелие воскре́сное 2-е, от Ма́рка, зача́ло 70. Воскресе́ние Христо́во: Псало́м 50. Сла́ва: Моли́твами апо́столов: И ны́не: Моли́твами Богоро́дицы: Стихи́ра: Воскре́с Иису́с от гро́ба:

А́ще храм Всех ру́сских святы́х, степе́нна воскре́сна 1-го⁸⁸ гла́са. Проки́мен святы́х, глас 4: Ра́дуйтеся, пра́веднии, о Го́споде, / пра́вым подоба́ет похвала́. Стих: Бу́ди, Го́споди, ми́лость Твоя́ на нас, я́коже упова́хом на Тя. Вся́кое дыха́ние: Ева́нгелие хра́ма Всех святы́х ру́сских, от Матфе́я, зача́ло 10. Воскресе́ние Христо́во: Псало́м 50. Сла́ва: Моли́твами всех святы́х ру́сских, / Ми́лостиве, очи́сти / мно́жество согреше́ний на́ших. И ны́не: Моли́твами Богоро́дицы, / Ми́лостиве, очи́сти / мно́жество согреше́ний на́ших. Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́. Стихи́ра, глас 6: Ежеле́тнюю память:

Стихи́ра святы́х по 50-м псалме́, глас 6:

Ежеле́тнюю па́мять днесь / святы́х сро́дников на́ших соверша́юще, / досто́йно сия́ да ублажи́м. / Ти́и вои́стинну чрез вся блаже́нства Госпо́дня проидо́ша: / обнища́сте бо ду́хом – обогати́шася / и кро́тцы бы́вше – зе́млю кро́тких насле́доваша, / пла́кавше – уте́шишася, / алка́вше пра́вды – насы́тишася, / ми́ловавше – поми́ловани бы́ша, / чи́сти бы́вше се́рдцем – Бо́га я́коже мо́щно узре́ша, / миротвори́вше – Боже́ственнаго сподо́бишася сыноположе́ния, / гони́ми же и му́чими пра́вды ра́ди и благоче́стия бы́вше –/ на Небесе́х ны́не веселя́тся и ра́дуются / и приле́жно мо́лятся Го́сподеви / поми́ловатися оте́честву на́шему.

А́ще пое́м слу́жбу Всех святы́х ру́сских во ин день,⁸⁹ степе́нна, 1-й антифо́н 4-го гла́са. Проки́мен, Ева́нгелие и стихи́ра по 50-м псалме́ святых.

И глаго́лет диа́кон: Спаси́, Бо́же, лю́ди Твоя́: (зри ни́же).

А́ще 2-я Неде́ля по Пятидеся́тнице, пое́м кано́ны си́це: Окто́иха–воскре́сный 1-го гла́са со ирмосо́м на 4 и Богоро́дицы 1-го гла́са на 2; кано́н Всех ру́сских святы́х, глас 8, на 8. А́ще во ин день, пое́м кано́ны си́це: Богоро́дицы, глас 2: Я́же всем удо́бь послу́шная: (зри Окто́их, повече́рие суббо́ты или́ слу́жбу «Утоли́ моя́ печа́ли», 25 января́) со ирмосо́м на 6, ирмосы́ по два́жды. И кано́н Всех ру́сских святы́х, глас 8, на 8.

Кано́н Всем святы́м, в земли́ Росси́йстей просия́вшим, глас 8.

Песнь 1

Ирмо́с: В Чермне́м фарао́на с колесни́цами погрузи́л еси́ /и лю́ди Моисе́ом спасл еси́, /пою́щия Тебе́, Го́споди, песнь побе́дную, / я́ко Изба́вителю на́шему Бо́гу.

Вси в пе́снех духо́вных воспои́м согла́сно / во благоче́стии просия́вшия Боже́ственныя отцы́ на́ша, / я́же изнесе́ Ру́сския земли́ вся́ко ме́сто и страна́ / и я́же Це́рковь Ру́сская воспита́.

Ра́дуйтеся, святи́телие седмочи́сленнии: / Васи́лие, Ефре́ме, Евге́ние, Елпи́дие, Агафодо́ре, Ефе́рие и Капито́не, / в Херсо́не епи́скопствовавшии / и зе́млю на́шу кровьми́ свои́ми освяти́вшии.

Прииди́те, мучениколю́бцы ве́рнии, / пе́сньми почти́м первому́ченики ру́сския, Фео́дора и ю́наго Иоа́нна, / и́долом не послужи́вшия и кро́ви своя́ за Христа́ да́вшия.

Вели́чие на́ше и похвала́ ты еси́, О́льго Богому́драя, / тобо́ю бо свободи́хомся от бесо́вскаго прельще́ния, / не преста́й и ны́не моли́ти за лю́ди, я́же Бо́гу привела́ еси́.

Ра́дуйся и весели́ся, ра́бе Христо́в, / кня́же вели́кий и му́дрый Влади́мире, просвети́телю наш, / тобо́ю бо изба́вихомся от душепа́губнаго идолослуже́ния, / те́мже, ра́дуйся, вопие́м тебе́.

Сия́ет, я́ко звезда́ на небеси́, Бо́жий иера́рх Михаи́л, / зе́млю Ру́сскую просвети́вый све́том позна́ния Боже́ственныя ве́ры / и Влады́це приведы́й лю́ди но́вы, ба́нею креще́ния обновле́нны.

О блаже́ннии страстоте́рпцы Христо́вы, / кня́зие Бори́се, Гле́бе, и И́горе, и Михаи́ле с боля́рином Фео́дором! / Не забу́дите оте́чества ва́шего, глад и озлобле́ние отгони́те, / от грехопаде́ний междоусо́бий изба́вите ны.

Богоро́дичен: С чи́нми а́нгел, Влады́чице, / со проро́ки, и апо́столы, и со все́ми святы́ми / за ны, гре́шныя, Бо́гу помоли́ся, / Твоего́ Покро́ва пра́здник в Росси́йстей земли́ просла́вльшия.

Катава́сия: Отве́рзу уста́ моя́:

Песнь 3

Ирмо́с: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.

Пропове́дует пресла́вно и па́че трубы́ вопие́т / вели́кая Ла́вра Пече́рская, / тобо́ю нача́ло прии́мшая, о́тче преподо́бне, Анто́ние сла́вне, / всех росси́йских мона́хов первонача́льниче.

Воспои́м све́тло мона́шескаго о́бщаго жития́ / в Ру́сстей земли́ устрои́теля, блаже́ннаго Феодо́сия, / с ним и Не́стора, достопа́мятных дея́ний списа́теля, / и Али́пия, живописа́ния в Росси́и нача́льника.

Рай мы́сленный еси́, Пече́рская свята́я горо́, / умно́жившая духо́вная древеса́, блаже́нныя отцы́, / и́хже исчести́ по еди́ному не могу́ще, / о всех вку́пе хвалу́ принесе́м Еди́ному Влады́це.

Анто́ние, Иоа́нне и Евста́фие, тве́рдии испове́дницы правосла́вныя ве́ры, / издре́вле в земли́ Росси́йско-Лито́встей насажде́ннии, / моли́твами ва́шими от зловре́дных инове́рных мудрова́ний / соо́тчичей ва́ших и всех нас огражда́йте.

Хода́таи бу́дите за оте́чество ва́ше земно́е, / Афана́сие преподобному́чениче, и ты, о́троче Гаврии́ле, / научи́те у́бо и нас Правосла́вие дерзнове́нно испове́дати / и стра́ха вра́жия не боя́тися.

Да почти́тся И́ов преподо́бный, Ла́вры Поча́евския украше́ние, / вку́пе со все́ми уго́дники и чудотво́рцы Волы́нскими, / де́лы свои́ми и чудесы́ облиста́вшии пресла́вно земли́ на́шея концы́.

Пе́сньми свяще́нными восхва́лим Афана́сия, Царегра́дскаго святи́теля, / свое́ благослове́ние земли́ Росси́йстей прине́сшаго / и честны́я своя́ мо́щи, я́ко зало́г едине́ния со Вселе́нскою Це́рковию, нам оста́вльшаго.

Богоро́дичен: Се вре́мя заступле́ния Пресвяты́я Богоро́дицы прии́де, / умно́жившимся собла́зном, / се вре́мя на́ших к Ней воздыха́ний, о бра́тие, / рцем у́бо от всего́ се́рдца на́шего: / Влады́чице, Влады́чице, помози́ лю́дем Твои́м.

А́ще 2-я Неде́ля по Пятидеся́тнице, по ектении́ конда́к и и́кос святы́х (зри ни́же). Та́же седа́льны святы́х.

Седа́лен святы́х, глас 7:

Нощне́й тьме огустева́ющей, умножа́ется зве́здный блеск, / и к тому́ о́чи заблу́ждших ра́достно возво́дятся. / Та́ко и умно́жившейся на земли́ грехо́вней тьме, / возведе́м горе́ о́чи на́ши, бра́тие, / и, сия́ние духо́вных звезд, зе́млю на́шу озаря́ющих, узре́вше, / к Небе́сному оте́честву потщи́мся, / его́же да не лиши́т Госпо́дь нас, гре́шных, моли́твами святы́х Свои́х.

Сла́ва, и ны́не, глас 4:

Притеце́м, ве́рнии, к Боже́ственней и цельбоно́сней ри́зе Спаси́теля на́шего Бо́га, / благоизво́лившаго сию́ пло́тию носи́ти и на Кресте́ Святу́ю Свою́ Кровь излия́ти, / е́юже искупи́ нас от рабо́ты вра́жия. / Те́мже благода́рственно вопие́м Ему́: / спаси́ Первосвяти́теля на́шего и архиере́и, / Оте́чество на́ше и вся лю́ди честно́ю Твое́ю ри́зою защити́ / и спаси́ ду́ши на́ша, я́ко Человеколю́бец.

Песнь 4

Ирмо́с: Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.

Первонача́льника и устрои́теля гра́да Москвы́, / блаже́нне кня́же Дании́ле, показа́ тя Госпо́дь, / к Нему́ же непреста́нно моля́ся, град твой охраня́й, зе́млю на́шу от бед спаса́й, / правосла́вныя же ру́сския лю́ди посеща́ти ми́лостивно не преста́й.

Мо́лим вас, святи́телие Христо́вы / Пе́тре, Алекси́е, Ио́но, Фили́ппе и Инноке́нтие, / Фо́тие, Киприа́не и Феогно́сте и вси про́чии Моско́встии чудотво́рцы: / душе́вное смуще́ние и печа́ли на́шея бу́рю разори́те / и тишину́ нам пода́йте ва́шими к Бо́гу моли́твами.

И первопресто́льник Росси́йския Це́ркве, и испове́дник Правосла́вныя ве́ры, / и обличи́тель грехолюби́вых и мяте́жных, / и строи́тель Ру́сския земли́ был еси́, святи́телю Ермоге́не, / и за сие́ темни́цею и гла́дом му́чимь был еси́ и прие́мь от Бо́га неувяда́емый вене́ц, / со святи́тели и му́ченики весели́шися.

Ра́дуется сла́вный град Москва́, и весе́лия исполня́ется вся Росси́я, / на твоя́ моли́твы наде́ющеся, Се́ргие Богоблаже́нне, / оби́тель же твоя́ красу́ется, / храня́щи честны́я твоя́ мо́щи, я́ко сокро́вище свяще́нное.

Песньми священными восхвалим преподобнаго Никона, послушания рачителя, / с нимже воспоим Михея, Савву и Дионисия, Стефана, Андроника и Савву и вся преподобныя ученики и собеседники великаго Сергия, / ихже молитвами сынове российстии спасаются.

О прему́дрии и блаже́ннии Васи́лие, Макси́ме и Иоа́нне Моско́встии / и вси Христа́ ра́ди юро́дивии Росси́йстии, чу́днии житие́м и ра́зумом, / мо́лим вас приле́жно: / моли́те Христа́ Бо́га на́шего за земно́е оте́чество ва́ше / и всем ве́рным спасе́ние испроси́те.

Но́вый сто́лпник в де́бри Калу́жстей яви́лся еси́, преподо́бне Ти́хоне, / и ку́пно с преподо́бным Пафну́тием, и́ночества стро́гим ревни́телем, и блаже́нным Лавре́нтием / ко гра́ду Го́рнему в стране́ твое́й путь ве́рный проложи́л еси́, / на не́мже упаси́ и нас моли́твами твои́ми.

Богоро́дичен: Подо́бием ико́ны И́верския не то́чию Афо́н просвеща́ется, / но и град Москва́ украша́ется и ини́и гра́ди и ве́си освяща́ются, / от тоя́ чуде́сную по́мощь прие́млюще и исто́чник утеше́ния в ней обрета́юще, / и нам, Блага́я Врата́рнице, две́ри ра́йския отве́рзи.

Песнь 5

Ирмо́с: Вску́ю мя отри́нул еси́ / от лица́ Твоего́, Све́те Незаходи́мый, / и покры́ла мя есть чужда́я тьма, окая́ннаго, /но обрати́ мя и к све́ту за́поведей Твои́х / пути́ моя́ напра́ви, молю́ся.

Вели́каго Нова́гра́да первопа́стырие, / Ники́то, Ни́фонте, Иоа́нне, Феокти́сте, / Моисе́е, Евфи́мие, Ио́но и Серапио́не, и про́чии чу́днии святи́телие, / в дому́ Прему́дрости Бо́жия, я́ко фи́никсы, процвели́ есте́, / словесы́ благопло́дными и непоро́чным житие́м.

Све́тло да похва́лятся кня́зие Новгоро́дстии, / Влади́мир, Святы́я Софи́и пречу́дныя устрои́тель, / с ма́терию свое́ю А́нною, и Мстисла́в, и Фео́дор, / с ни́ми же и вси от ро́да князе́й Росси́йских житие́м богоуго́дным просия́вшии, / Боже́ственными да воспою́тся пе́сньми.

Ди́внаго Варлаа́ма, вели́ка Нова́гра́да сла́ву и украше́ние, всеросси́йскаго моли́твенника, / и Анто́ния сла́внаго, от ве́тхаго Ри́ма на ка́мени по волна́м морски́м преплы́вшаго, / Са́вву же, и Ефре́ма, и Михаи́ла / кто досто́йно просла́вит от земны́х?

Еде́мскаго рая́, прииди́те, ви́дим цве́ты присножи́зненныя и богопрозябе́нныя, / по́двиги оте́ц, в преде́лех Новгоро́дских просия́вших, / и́хже есть еди́н Де́латель Госпо́дь.

Все́волод кро́ткий и Довмо́нт, Пско́ву стена́ необори́мая, / и Нико́ла блаже́нный и Корни́лий преподо́бный, / святы́м креще́нием чудь Ливо́нскую просвети́вый, / пе́сньми да воспою́тся.

Ве́ру правосла́вную пред лати́ны пропове́давшии, / к ве́чным востеко́ша оби́телем Иси́дор пресви́тер / и с ним собо́р му́ченический во Ю́рьеве, гра́де Ливо́нстем, / Царю́ царе́й ны́не предстоя́ще, мо́лятся о нас, почита́ющих па́мять их.

Авраа́мия Богоно́снаго, Смоле́нска украше́ние, / и Евфроси́нию, ра́дование По́лотское и де́вам сия́ние, / Христе́ мой, Тебе́ приво́дим моли́твенники, / и́хже ра́ди спаси́ нас.

Богоро́дичен: Засту́пница те́плая иногда́ вели́кому Новугра́ду была́ еси́ / и ненаде́ющихся наде́жда и люде́й бе́дствующих Помо́щница, / и ны́не о́ком милосе́рдным при́зри на нас / и, ско́рби на́ша ви́девши и воздыха́ние услы́шавши, / зна́мение ми́лости яви́ нам, Пречи́стая.

Песнь 6

Ирмо́с: Во́днаго зве́ря во утро́бе / дла́ни Ио́на крестови́дно распросте́р, / спаси́тельную страсть прообража́ше я́ве; / тем, тридне́вен изше́д, / преми́рное Воскресе́ние прописа́ше / пло́тию пригвожде́ннаго Христа́ Бо́га / и тридне́вным Воскресе́нием мир просве́щшаго.

Ева́нгельски Христа́ возлюби́вше, / преподо́бнии Зоси́мо, Савва́тие, Ге́рмане, Ирина́рше, Елеаза́ре и про́чии Солове́цтии чудотво́рцы, / ми́ра отврати́стеся, в непроходи́мыя и пусты́я о́стровы Солове́цкия заше́дше, / вся́кия доброде́тели о́бразу навыко́сте, / му́дрей пчеле́ подо́бящеся, / и селе́ние, досто́йное прия́ти Ду́ха Свята́го, бы́сте, прему́дрии.

Вели́каго в чудесе́х преподо́бнаго Три́фона воспои́м, Лопа́рскаго просвети́теля, / в после́дних конце́х се́верныя страны́ от го́рькаго ра́бства бесо́вскаго лю́ди изба́вльшаго / и святы́м креще́нием возроди́вшаго.

Ра́дуйся, пу́стыне, пре́жде безпло́дная и необита́емая, / по́слежде же, я́ко крин, процве́тшая и и́нок мно́жество возрасти́вшая! / Взыгра́йте, го́ры Валаа́ма и вся древа́ дубра́вная, / хва́ляще с на́ми Се́ргия и Ге́рмана, вку́пе же и Арсе́ния со Алекса́ндром Сви́рским, / отцы́ всехва́льныя.

Жития́ сего́ непостоя́нную пучи́ну немяте́жно преше́л еси́, преподо́бне Кири́лле, / ко́рмчую Ма́терь Бо́жию име́я, / и ты, Ио́сифе, Во́лоцкая похвало́, и Ни́ле нестяжа́телю, / на воде́ поко́йне и на зла́це воздержа́ния учени́к ва́ших стада́ му́дре упасли́ есте́, / и ны́не с ни́ми моли́теся о чту́щих па́мять ва́шу.

Я́ко зве́зды вели́кия, просия́ша в мона́шеских собо́рех / Анто́ний Си́йский и Три́фон Вя́тский, / Дими́трий на Прилу́це и Амфило́хий и Диони́сий, похвала́ Глуши́цкая, / Григо́рий Пе́льшемский, Па́вел, и Се́ргий, и Корни́лий Волого́дстии, / я́ко луча́ми, сия́юще доброде́тельми жития́ своего́, преподо́бнии.

Богови́дно пожи́вше, пусты́ни, я́ко гра́ды, сотвори́ли есте́, / Мака́рие, Варна́во и Ти́хоне, Авраа́мие и Генна́дие. / Те́мже вку́пе с про́чими отцы́, в преде́лех Костромски́х и Яросла́вских просия́вшими, / ублажа́ем вас и мо́лим: / моли́те Го́спода, да не лиши́т и нас его́же ны́не наслажда́етеся боговиде́ния / в ве́чнем гра́де Небе́снаго Царя́.

Лику́й, Фиваи́до Ру́сская, / красу́йтеся, пусты́ни и де́бри Олоне́цкия, Белоезе́рския и Волого́дския, / возрасти́вшия свято́е и сла́вное отец мно́жество, / чу́дным житие́м всех наставля́ющее ми́ру не прилепля́тися, / крест свой на ра́мена взя́ти и во след Христу́ ше́ствовати.

Богоро́дичен: Твое́ю всечестно́ю ико́ною Ти́хвинскою, / ю́же вели́кая Росси́я я́ко не́кий дар Боже́ственный свы́ше благогове́йно прия́т, / при́сно страну́ на́шу, о Госпоже́ Цари́це Богоро́дице, покрыва́й и заступа́й, / спаса́ющи сию́ от всех наве́т вра́жиих.

А́ще 2-я Неде́ля по Пятидеся́тнице, по ектении́ конда́к воскре́сен, глас 1: Воскре́сл еси́: и и́кос воскре́сен: Воскре́сшаго тридне́вно: А́ще во ин день, конда́к и и́кос Всех ру́сских святы́х.

Конда́к святы́х, глас 3.

Подо́бен: Де́ва днесь:

Днесь лик святы́х, в земли́ на́шей Бо́гу угоди́вших, предстои́т в Це́ркви / и неви́димо за ны мо́лится Бо́гу. / А́нгели с ним славосло́вят, / и вси святи́и Це́ркве Христо́вы ему́ спра́зднуют, / о нас бо мо́лят вси ку́пно / Преве́чнаго Бо́га.

И́кос:

Еде́мскаго рая́ древеса́ добропло́дная и кра́сная яви́шася святи́и, / цве́ты благово́нныя уче́ний и плоды́ дел творя́щии, / от ни́хже ду́ши на́ша пита́ются и глад наш духо́вный утоля́ется, / прииди́те у́бо, притеце́м под сень их и ублажи́м их, / я́ко страны́ на́шея отра́ду и украше́ние и я́ко жития́ о́браз нам и начерта́ние, / ти́и бо венцы́ прия́ша нетле́нныя от Преве́чнаго Бога.

Песнь 7

Ирмо́с: Бо́жия снизхожде́ния / огнь устыде́ся в Вавило́не иногда́. / Сего́ ра́ди о́троцы в пещи́, ра́дованною ного́ю, / я́ко во цве́тнице, лику́юще, поя́ху: / благослове́н еси́, Бо́же оте́ц на́ших.

Лео́нтий, Иса́ия и Игна́тий, Иа́ков и Фео́дор, / честни́и Ду́ха сосу́ди и Росто́ву украше́ние, / Авраа́мий, и́долом покланя́вшияся ко Христу́ приведы́й, / и Петр царе́вич, и Ирина́рх, самопроизво́льный страда́лец, / Кассиа́н и Паи́сий, князь Рома́н и царе́вич Дими́трий, / и вси Росто́встии и У́гличстии чудотво́рцы Боже́ственными да воспою́тся пе́сньми.

Да велича́ется Не́вский победи́тель, благове́рный князь Алекса́ндр, / да пое́тся Гео́ргий, во́ин хра́брый и страда́лец, / да похва́лится Андре́й, пе́рвый Ру́сския земли́ собира́тель, / вку́пе со Гле́бом, ю́ным сы́ном свои́м, / да воспое́тся же и Авраа́мий му́ченик, / гра́да Влади́мира сла́ва, Святы́я Руси́ засту́пницы / и Це́ркве Правосла́вныя украше́ние.

Фео́дору и Иоа́нну сла́ва, Су́ждальским свети́льником, / Си́мону и Диони́сию! / С ни́ми да пою́тся и Евфи́мий, в по́двизех превысо́кий, / и Евфроси́ния преподо́бная, пресве́тлая Су́ждальская звезда́, / вку́пе же и Косма́, на Я́хроме реце́ подвиза́выйся.

Песнь сто́лпнику Ники́те, покая́ния о́браз яви́вшему, / хвала́ и Дании́лу, ни́щих и безро́дных согрева́телю, / сла́ва и Андре́ю, княже́ние оста́вившему и в ни́щетнем о́бразе житие́ сконча́вшему, / Переясла́вским чудотво́рцем.

Константи́не кня́же, апо́столе и просвети́телю Му́ромския земли́, / с Михаи́лом и Фео́дором, ча́ды твои́ми, / и Пе́тре и Февро́ние, и пра́ведная Иулиани́е ми́лостивая, Му́рома засту́пницы, / вку́пе же и Васи́лие святи́телю и кня́же Рома́не, Ряза́ни сла́во, / о нас Христа́ моли́те.

Тверска́я похвало́, Арсе́ние святи́телю, / Михаи́ле, кня́же и му́чениче, / и А́нно, гра́да Ка́шина сокро́вище, / Ни́ле и Мака́рие преподо́бнии, / Ефре́ме, гра́да Торжка́ просвети́телю, / со Арка́дием и Иулиани́ею, цве́том целому́дрия, / о нас Христа́ моли́те.

Ору́жием ва́ших моли́тв, благове́рнии кня́зие Фео́доре и Дави́де с Константи́ном / и Васи́лие и Константи́не, Яросла́вля сла́во, / охраня́йте и ны́не оте́чество ва́ше / и люде́й правосла́вных от вся́ких бед и напа́стей.

Богоро́дичен: Я́ко благода́тное сокро́вище дарова́ла еси́ Святе́й Руси́ ико́ну Твою́ Влади́мирскую, / е́юже отце́м на́шим многоча́стне и многообра́зне благоде́яла еси́. / Не оскуде́й и ны́не, о Ма́ти Бо́жия, / утоля́ющи лю́тое на нас воста́ние, и зе́млю Ру́сскую спаси́.

Песнь 8

Ирмо́с: Победи́тели мучи́теля и пла́мене / благода́тию Твое́ю бы́вше, / за́поведем Твои́м зело́ прилежа́ще, / о́троцы вопия́ху: / благослови́те, вся дела́ Госпо́дня, Го́спода.

Красу́йся, гра́де Каза́нь, име́я моли́твенники своя́, / преподо́бных святи́телей Гу́рия, Варсоно́фия и Ге́рмана, отгна́вших от Тебе́ тьму неве́рия, / и Иоа́нна му́ченика, и Стефа́на, и Петра́, / оте́ческое нече́стие оста́вивших и му́ченически в Небе́сное оте́чество преше́дших.

Свяще́ннаго Писа́ния от ю́ности научи́вся, богоно́се Стефа́не, / ра́лом слове́с Твои́х олядене́вшая зыря́нских люде́й сердца́ возде́лал еси́ / и Боже́ственное се́мя в них все́ял еси́. / Ны́не же вку́пе со святы́ми продолжа́тели де́ла твоего́ / Гера́симом, Питири́мом и Ио́ною / па́ству ва́шу и всю Ру́сскую зе́млю моли́твами ва́шими огражда́йте.

Весели́ся, Сиби́рская страно́, / в тебе́ бо Госпо́дь яви́ уго́дники Своя́: / пра́веднаго Симео́на Верхоту́рскаго, и Ирку́тския святи́тели Инноке́нтия и Софро́ния, и Иоа́нна Тобо́льскаго, / но́выя ди́вныя свети́льники и чудотво́рцы.

Ра́дуйся, Иве́рие и вся земле́ Грузи́нская, торжеству́й, Арме́ние, / воспева́ющи равноапо́стольную Ни́ну и Тама́ру, Григо́рия Просвети́теля / и ины́х мно́гих, в страна́х Кавка́зских ве́ру правосла́вную испове́давших / и ны́не о земне́м отече́стве Христу́ моля́щихся.

Иера́рше Богому́дре Дими́трие, / жити́й святы́х списа́телю и подража́телю о́ным ре́вностный, / сла́вы о́ных моли́твами твои́ми соде́лай нас о́бщники.

Святи́телю о́тче Митрофа́не, пе́рвый Воро́нежу па́стырю, / му́жество ве́лие яви́вый, преще́ния царе́ва и сме́рти не убоя́выйся / и в простоте́ ду́шу свою́ спасы́й, моли́ Бо́га о нас.

Я́ко пчела́, мед сла́дкий от цвето́в скороувяда́ющих собра́л еси́, о́тче Ти́хоне, / от тле́ннаго ми́ра духо́вное сокро́вище, / и́мже всех нас услажда́еши.

Богоро́дичен: Засту́пницу усе́рдную восхва́лим и честно́му Ея́ поклони́мся о́бразу, / и́мже в новопросвеще́нней стране́ правове́рие утверди́ / и в годи́ну лю́тую ма́терь ру́сских градо́в спасе́. / Сей и гра́да свята́го Петра́ вели́кое сокро́вище, / и всея́ земли́ на́шея пресла́вное бога́тство.

Песнь 9

Ирмо́с: О, де́вства край, Богоро́дице! / пе́сньми же сла́вными / пра́здники возвыша́ющая благода́тей Твои́х / и ны́не де́вственною Сло́ва Твоего́ па́мятию /наи́тием та́йным украша́ющая в ней / Тя велича́ющия.

О благи́й просвети́телю и ти́хий а́нгеле Це́ркве Тамбо́вский, святи́телю Питири́ме, / весели́ся о па́стве твое́й и всея́ Руси́, / в ней бо но́вая и ве́чная ра́дость процвете́, преподо́бный Серафи́м, ди́вный тру́дник спасе́ния на́шего.

О святи́телие Богому́дрии Феодо́сие и Иоаса́фе, ди́вным нетле́нием от Го́спода просла́вленнии! / Ва́ми возвели́чени есмы́ и мы, ча́да су́ще Це́ркве Правосла́вныя, / в не́йже и доны́не Госпо́дь чу́дная явля́ет / и рабо́в Свои́х прославля́ет.

О но́вый чудотво́рче, Ио́сифе, святи́телю и му́чениче!/ Град А́страхань и вся Пово́лжская страна́ тобо́ю хва́лится / и почита́ет тя, за пра́вду от неве́рных мяте́жников лю́те пострада́вша.

О, па́че сло́ва и превы́ше похва́л святы́х страстоте́рпцев по́двига! / Зло́бу у́бо лю́тых отсту́пников и на́глое иуде́йское неи́стовство претерпе́ша, / ве́ру Христо́ву проти́ву уче́ний ми́ра сего́, я́ко щит, держа́ще / и нам о́браз терпе́ния и злострада́ний досто́йно явля́юще.

О, тве́рдости и му́жества по́лка му́ченик Христо́вых, / от хи́нов лю́тых за Христа́ убие́нных! / Ти́и бо Це́рковь Правосла́вную украси́ша / и в стране́ свое́й кро́ви своя́, я́ко се́мя ве́ры, да́ша, / и ку́пно со все́ми святы́ми досто́йно да почту́тся.

О вели́цыи сро́дницы на́ши, имено́ваннии и безыме́ннии, явле́ннии и неявле́ннии, / Небе́снаго Сио́на дости́гшии и сла́ву мно́гу от Бо́га прии́мшии, / утеше́ние нам, в ско́рби су́щим, испроси́те, / ве́ру на́шу па́дшую возста́вите и лю́ди расточе́нныя соберите, / от нас, я́ко дар, песнь благодаре́ния прие́млюще.

Тро́ичен: О Тро́ице Честна́я, / приими́, я́же Росси́я прино́сит Ти, / я́ко нача́тки и я́ко фимиа́м избра́нный, / вся угоди́вшия и пре́жде, и по́слежде в ней, / зна́емыя и незна́емыя, / и моли́твами их от вся́каго вре́да сию́ сохраня́й.

Богоро́дичен: О Де́во Благода́тная, / гра́ды и ве́си на́ша честна́го ли́ка Твоего́ изображе́нии, / я́ко благоволе́ния зна́мении, обогати́вшая, / благодаре́ние на́ше приими́ и от бед лю́тых оте́чество на́ше изба́ви, / вси бо Тя, я́ко Покро́в всемо́щный страны́ на́шея, велича́ем.

А́ще 2-я Неде́ля по Пятидеся́тнице, по 9-й пе́сни ектении́ и Свят Госпо́дь Бог наш: Свети́лен воскре́сный 2-й: Ка́мень узре́вше: Сла́ва, свети́лен святы́х. И ны́не, Богоро́дичен его́.

Свети́лен святы́х.

Подо́бен: Не́бо звезда́ми:

В пе́снех восхва́лим свети́ла незаходи́мая Росси́йския земли́, / таи́нники Боже́ственнаго Сло́ва, / Христа́ сла́вяще, сих просвети́вшаго и возлюби́вшаго / и помо́щники нам да́вшаго в ско́рби.

Сла́ва, и ны́не, Богоро́дичен:

Све́том лица́ Твоего́ огнезра́чную страну́ Ру́сскую озари́в, Го́споди, / и ны́не во святы́х Твои́х, я́ко в луча́х неизче́тных, / не преста́й озаря́ти нас прему́дростию Твое́ю, / я́же есть Софи́я Преимени́тая.

На хвалите́х стихи́ры на 8, воскре́сны 4, глас 1: Пое́м Твою́, Христе́: Крест претерпе́вый: А́да плени́вый: Боголе́пное Твое́: И хвали́тныя стихи́ры святы́х со сла́вником на 4; две после́дния стихи́ры пое́м со стихи́ от стихо́вны ма́лыя вече́рни: Стих: Бог нам прибе́жище и си́ла, / Помо́щник в ско́рбех, обре́тших ны зело́. Стих: Госпо́дь сил с на́ми, / Засту́пник наш Бог Иа́ковль. Сла́ва, стихи́ра ева́нгельская вторая, глас 2: С ми́ры прише́дшим: И ны́не, глас то́йже: Преблагослове́нна еси́:

На хвали́тех стихи́ры святы́х, глас 5.

Подо́бен: Ра́дуйся:

Ра́дуйся, Це́рковь Росси́йская ве́рная, / ра́дуйся, кня́же благове́рный Влади́мире пресла́вный, / ра́дуйся, О́льго избра́нная! / Вы бо есте́ ко Влады́це всех / пе́рвейшии на́ши хода́таи, / и нача́льницы правосла́вия, / и наста́вницы ко и́стинней ве́ре. / Ра́дуйся, вся́ко ме́сто, и страна́, и град, / гра́жданы воспита́вшии Небе́снаго Ца́рствия, / си́и свята́я свети́ла душа́м на́шим яви́шася, / си́и чуде́с заре́ю, и де́лы, и зна́мении просия́ша мы́сленно во вся концы́ / и ны́не Христу́ мо́лятся / пода́ти душа́м на́шим ве́лию ми́лость.

Ра́дуйтеся, земли́ Ру́сския украше́ние, / Це́ркве на́шея непоколеби́мое утвержде́ние, / сла́во правосла́вных, / чуде́с исто́чницы, / любве́ струи́ неистощи́мыя, / свети́льницы многосве́тлии, / Ду́ха Свята́го орга́ни, / кро́тцыи и незло́бивии, / доброде́тельми укра́шеннии, / челове́цы небе́снии, / земни́и а́нгели, / Христа́ дру́зи и́скреннии! / Того́ приле́жно моли́те / пода́ти вас чту́щим ве́лию ми́лость.

Прииди́те, Небе́снии предста́телие на́ши, к нам, / ва́шего тре́бующим ми́лостивнаго посеще́ния, / и изба́вите озло́бленныя мучи́тельскими преще́нии / лю́таго неи́стовства неве́рных, / от ни́хже, я́ко пле́нницы и на́зи, гони́мы есмы́, / от ме́ста на ме́сто ча́сто преходя́ще / и заблужда́юще в верте́пех и гора́х. / Уще́дрите у́бо, прехва́льнии, / и да́руйте нам осла́бу, / утоли́те бу́рю / и угаси́те е́же на ны негодова́ние, / Бо́га моля́ще, / подаю́щаго ва́ми земли́ на́шей ве́лию ми́лость.

Сла́ва, глас 4:

Глас ева́нгельский услы́шавше / и апо́стольскою ре́вностию распали́вшеся, / в науче́ние неве́рных язы́ков устреми́стеся, / богоблаже́ннии равноапо́стольнии / Ку́кше, Лео́нтие, Стефа́не и Гу́рие, / Ге́рмане Аля́скинский, и святи́телю о́тче Нико́лае Япо́нский, / и досточу́дный Инноке́нтие, / вели́кия Сиби́рския страны́ апо́столе / и просвеще́ния за мо́рем су́щих но́вых стран во Аме́рице первонача́льниче. / Те́мже со все́ми про́чими, / во благове́стии Христо́ве потруди́вшимися, / досто́йно ублажа́етеся.

И ны́не, Богоро́дичен, глас то́йже:

При́сно страна́ Росси́йская / о Тебе́ хва́лится и весели́тся, / иму́щи Тя Засту́пницу непосты́дную / и сте́ну неруши́мую, / не оскуде́й и ны́не, Влады́чице, / избавля́ти Твоя́ лю́ди от всех бед.

Славосло́вие вели́кое.

А́ще 2-я Неде́ля по Пятидеся́тнице, тропа́рь воскре́сен точию: Днесь спасе́ние ми́ру бысть: Во ин день по славосло́вии тропа́рь святы́х, глас 4: Иерусали́ма вы́шняго гра́ждане: Сла́ва, и ны́не, Богоро́дичен: К Засту́пнице страны́ на́шея: (зри вы́ше). Ектения́ и отпу́ст.

Посе́м исхо́дит предстоя́тель с кади́лом се́верными дверьми́, предъиду́щим ему́ двум свети́льником, ко ико́не пра́здника. И пою́тся стихи́ры хра́ма Всех ру́сских святы́х, подо́бны на осмь гласов.

Стихи́ры на целова́ние, глас 1.

Подо́бен: Небе́сных чино́в:

Небе́снии гра́ждане, / сослуже́бницы мы́сленным чино́м, / чудотво́рцы ру́сстии, / не забу́дите земно́е оте́чество ва́ше, / я́ко на вас упова́ние / по Бо́зе и Богоро́дице возложи́хом.

Глас то́йже. Подо́бен: Прехва́льнии му́ченицы:

Прехва́льнии чудотво́рцы ру́сстии, / вас ни земля́ на́ша потаи́ла есть, / но не́бо прия́т вы, / и отверзо́шася вам ра́йския две́ри, / и, внутрь рая́ бы́вше, / дре́ва жи́зни наслажда́етеся, / Христу́ моли́теся / дарова́ти оте́честву ва́шему / мир и ве́лию ми́лость.

Глас 2. Подо́бен: Ки́ими похва́льными:

Ки́ими похва́льными венцы́ увенча́ем предста́тели на́ша? / Престо́лу Бо́жию ны́не предстоя́щия / и духо́вно нас посеща́ющия, / чи́сте тех лю́бящих, / всех ско́рбных уте́шители / и всех су́щих в беда́х прибе́жище, / страны́ на́шея храни́тели, / ве́ры и́стинныя в ней утвержде́ние, / правосла́вных побо́рники, / и́хже ра́ди враго́в на́ших возноше́ние Христо́с низложи́, / име́яй ве́лию ми́лость.

Глас 3. Подо́бен: Крестообра́зно Моисе́й:

Крестообра́зно Моисе́й на горе́ ру́це просте́р к высоте́, / Амали́ка победи́, / святи́и же сро́дницы на́ши / при́сно ко Го́споду простира́ют ру́це свои́, / моля́щеся о Ру́сстей земли́, / охраня́юще ю́ от искуше́ний и бед / и нам о́браз подаю́ще, / да, моли́твою вооружи́вшеся и кресто́м, / побежда́ем врага́, / прославля́юще Спа́са Го́спода.

Глас 4. Подо́бен: Зва́нный свы́ше:

Свы́ше зва́ни бы́вше, / основа́ние кре́пко к доброде́телем / положи́сте в душа́х ва́ших, страх Бо́жий, / сей бо есть нача́ло прему́дрости / и окормле́ние во всем житии́ / хотя́щим угоди́ти Бо́гу, / и на сем основа́нии / назда́сте прекра́сныя доброде́тели / сохране́нием животво́рных Бо́жиих за́поведей. / Его́же моли́те / спасти́ и просвети́ти ду́ши на́ша.

Глас то́йже. Подо́бен: Хоте́х слеза́ми омы́ти:

Хоте́х житию́ подража́ти / подви́жников благоче́стия от ро́да на́шего / и про́чее жития́ моего́ / де́лы до́брыми благоугоди́ти Тебе́, / но враг льстит мя / и бо́рет ду́шу мою́, / Го́споди, / святы́х Твои́х мольба́ми / поми́луй и спаси́ мя.

Глас 5. Подо́бен: Преподо́бне о́тче:

Пресла́внии отцы́, / чу́вственное оте́чество иму́щии зе́млю Ру́сскую, / мы́сленный же и Небе́сный град Го́рний Сио́н, / свети́льницы су́щим во тьме отча́яния яви́стеся, / покая́ния у́глие пречестно́е, / доброде́телей Боже́ственное би́серие, / си́рым предста́телие и вдови́цам, / зако́нов церко́вных испо́лнителие / и де́тельнии свети́льницы воздержа́ния, / Христа́ моли́те, Христо́ви моли́теся всегда́ / дарова́ти Це́ркви Ру́сстей единомы́слие / и земли́ на́шей мир / и ве́лию ми́лость.

Глас 6. Подо́бен: А́нгельския предъиди́те:

А́нгельския предъиди́те си́лы, / я́же в дому́ О́тчи, угото́вайте оби́тели: / от ро́да бо на́шего подви́жницы благоче́стия, / я́ко Це́ркве пе́рвенцы, / и ны́не на Небесе́х напису́ются. / Тем мы, гре́шнии, в ра́дости возопии́м: / ди́вен еси́, Бо́же, во святы́х, / моли́твами их и нас поми́луй.

Глас то́йже. Подо́бен: Тридне́вен:

Па́мять святы́х –/ ра́дость боя́щихся Го́спода, / подвиза́вшеся бо Христа́ ра́ди, / венцы́ от Него́ прия́ша, / и ны́не со дерзнове́нием / мо́лятся о Ру́сстей земли́.

Глас то́йже. Подо́бен: Отча́янная:

Отча́яни есмы́ / жития́ ра́ди / и не и́мамы / нра́ва доброде́тельна, / но, я́ко прино́сим Ти / моли́твы святы́х сро́дник на́ших, / не отве́ржи ны, Го́споди, / утверди́ Це́рковь Ру́сскую, / не пре́зри сле́зы ве́рных сыно́в, / коле́на пред Ваа́лом не преклоня́вших, / и и́хже не истреби́л еси́, согреша́ющих, / приими́ ны, ка́ющияся, / святы́х Твои́х мольба́ми.

Глас 7. Подо́бен: Неради́вше о вре́менных:

Неради́вше о вре́менных, / святи́и соплеме́нницы на́ши, / и на земли́ Христа́ ра́ди до́бльственне подвиза́вшеся, / воздая́ния трудо́в от Него́ прия́сте, / но, я́ко иму́щии дерзнове́ние, / Того́ умоли́те, я́ко Бо́га всеси́льна, / Русь в Правосла́вии утверди́ти, / вся же собла́зны церко́вныя в ней / до конца́ искорени́ти, мо́лимся.

Глас 8. Подо́бен: Что вы нарече́м:

Что вас нарече́м, святи́и: / херуви́мы ли? я́ко на вас почи́л есть Христо́с; / серафи́мы ли? я́ко непреста́нно просла́висте Его́; / а́нгели ли? в те́ле бо су́ще, безпло́тных житие́ показа́сте; / си́лы ли? де́йствуете бо чудеса́; / мно́га ва́ша имена́ / и бо́льшая дарова́ния. / Моли́те спасти́ся нам, сро́дником ва́шим.

Глас то́йже: Подо́бен: И́же во Еде́ме:

Дре́вле во Еде́ме в раи́ / дре́во сне́дное прозябло́ есть посреде́ садо́в, / во всех же конце́х Ру́сския земли́ / святи́и сро́дницы на́ши, я́ко фи́никси, процвето́ша / и, я́ко ке́дри в Лива́не, умно́жишася, / и́миже Це́рковь на́ша крася́щися па́че дре́вняго Еде́ма, / ра́достно прославля́ет Го́спода, / ве́ры ра́ди сих просла́вльшаго, / и нас сла́вы о́ных прича́стники яви́, Христе́ Бо́же, / моли́твами их разруша́я я́же на ны ко́зни вра́жия, / и сподо́би нас Ца́рствия Твоего́, Го́споди.

Глас то́йже. Подо́бен: Му́ченицы Твои́:

Святи́и Твои́, Го́споди, / забы́ша жите́йская, / небре́гше о теле́сных / бу́дущия ра́ди жи́зни, / тоя́ насле́дницы яви́шася, / те́мже и со а́нгелы ра́дуются. / Тех моли́твами да́руй земли́ на́шей ве́лию ми́лость.

Сла́ва, и ны́не, Богоро́дичен, глас то́йже.

Подо́бен: О, пресла́внаго чудесе́:

О, пресла́внаго чудесе́, / Небесе́ и земли́ Цари́ца, / от святы́х сро́дников на́ших умоля́емая, / до ны́не зе́млю Ру́сскую покрыва́ет / и ли́ка Своего́ изображе́нии ми́лостивно обогаща́ет. / О Влады́чице Держа́вная, / не пре́стани и на бу́дущее вре́мя / во утвержде́ние на Руси́ Правосла́вия / ми́лости и чудеса́ излива́ти до ве́ка. Ами́нь.

И быва́ет елеопома́зание. Посе́м моли́тва Влады́ко Многоми́лостиве: кра́тко (зри ни́же, уста́в). А́ще во 2-ю Неде́лю по Пятидеся́тнице, оглаше́ние Студи́тово и тропа́рь преподо́бному Фео́дору. Час 1-й и отпу́ст. Та́же, соше́дшеся посреде́ хра́ма, пое́м стихи́ си́и:

Утвержде́ние на Тя наде́ющихся, / утверди́, Го́споди, Це́рковь, / ю́же стяжа́л еси́ / Честно́ю Твое́ю Кро́вию.

Под Твою́ ми́лость прибега́ем, / Богоро́дице Де́во, / моле́ний на́ших не пре́зри в ско́рбех, / но от бед изба́ви нас, / Еди́на Чи́стая и Благослове́нная.

Пресвята́я Богоро́дице, / спаси́ нас.

Вси святи́и земли́ Ру́сския, / моли́те Бо́га о нас.

А́ще во 2-ю Неде́лю по Пятидеся́тнице, блаже́нны воскре́сны 1-го гла́са на 6, начина́я от: Блаже́ни кро́тцыи: и святы́х блаже́нны на 4, глас 8, от: Блаже́ни есте́, егда́ поно́сят вам: А́ще во ин день, блаже́нны святы́х на 8, начина́я от: Блаже́ни ми́лостивии:

Блаже́нны святы́х, глас 8:

На 8: Блаже́ни ми́лостивии, я́ко ти́и поми́ловани бу́дут.

Вси в пе́снех духо́вных воспои́м согла́сно / во благоче́стии просия́вшия Боже́ственныя отцы́ на́ша, / я́же изнесе́ Ру́сския земли́ вся́ко ме́сто и страна́ / и я́же Це́рковь Ру́сская воспита́.

Блаже́ни чи́стии се́рдцем, я́ко ти́и Бо́га у́зрят.

О вели́цыи сро́дницы на́ши, имено́ваннии и безыме́ннии, явле́ннии и неявле́ннии, / Небе́снаго Сио́на дости́гшии и сла́ву мно́гу от Бо́га прии́мшии, / утеше́ние нам, в ско́рби су́щим, испроси́те, / ве́ру на́шу па́дшую возста́вите и лю́ди расточе́нныя соберите, / от нас, я́ко дар, песнь благодаре́ния прие́млюще.

Блаже́ни миротво́рцы, я́ко ти́и сы́нове Бо́жии нареку́тся.

О Тро́ице Честна́я, / приими́, я́же Росси́я прино́сит Ти, / я́ко нача́тки и я́ко фимиа́м избра́нный, / вся угоди́вшия и пре́жде, и по́слежде в ней, / зна́емыя и незна́емыя, / и моли́твами их от вся́каго вре́да сию́ сохраня́й.

Блаже́ни изгна́ни пра́вды ра́ди, я́ко тех есть Ца́рство Небе́сное.

О Де́во Благода́тная, / гра́ды и ве́си на́ша честна́го ли́ка Твоего́ изображе́нии, / я́ко благоволе́ния зна́мении, обогати́вшая, / благодаре́ние на́ше приими́ / и от бед лю́тых оте́чество на́ше изба́ви, / вси бо Тя, я́ко Покро́в всемо́щный страны́ на́шея, велича́ем.

На 4: Блаже́ни есте́, егда́ поно́сят вам, и иждену́т, и реку́т всяк зол глаго́л, на вы лжу́ще Мене́ ра́ди.

Не мече́м на́шим зе́млю на́шу насле́дихом, / но десни́цею Твое́ю и мы́шцею Твое́ю, / и просвеще́нием лица́ Твоего́, / и святы́х Твои́х слеза́ми, / по́двиги и по́ты, / кровьми́ и уче́нии / оте́чество на́ше утверди́ся.

Ра́дуйтеся и весели́теся, я́ко мзда ва́ша мно́га на Небесе́х.

Егда́ отступи́хом от Тебе́ / и за́поведи Твоя́ преступи́хом, / тогда́ отри́нул еси́ ны и низложи́л еси́ ны, / и па́че всех язы́к ума́лихомся, / но пощади́ нас, Бо́же, Спаси́телю наш, / святы́х Твои́х мольба́ми.

Сла́ва, Тро́ичен: О Тро́ице Пребоже́ственная, / уврачу́й боле́зни и ско́рби на́ша, / воздви́гни дух наш от ле́ности и сна грехо́внаго, / да досто́йни бу́дем оте́ц и бра́тий на́ших, / по́двиги свои́ми / в земли́ на́шей И́мя Твое́ просла́вльших.

И ны́не, Богоро́дичен: Расточе́нныя собери́, / отлуче́нныя возврати́, / отпа́дшия от ве́ры Правосла́вныя обрати́, / пла́чущия и скорбя́щия уте́ши, / земли́ на́шея подви́гшияся сокруше́ние исцели́, Благода́тная, / со святы́ми соо́тчичи на́шими / Бо́га о нас умоля́ющи.

По вхо́де тропари́ и кондаки́, и чте́ния Апо́стола и Ева́нгелия, и прича́стны по уста́ву 2-й Неде́ли по Пятидеся́тнице (зри ни́же) или ино́го дне (зри ни́же).

По заамво́нной моли́тве исхо́дим ко ико́не пра́здника, пою́ще тропа́рь святы́х, глас 8: Я́коже плод: (зри вы́ше). Сла́ва, конда́к святы́х, глас 3: Днесь лик святы́х: (зри вы́ше).

И ны́не, Богоро́дичен, глас 3:

Богоро́дице, христиа́ном Помо́щнице, / Твое́ предста́тельство стяжа́вше, раби́ Твои́, / благода́рно Тебе́ вопие́м: / ра́дуйся, Пречи́стая Богоро́дице Де́во, / и от всех нас бед Твои́ми моли́твами всегда́ изба́ви, / Еди́на вско́ре предста́тельствующая.

Посе́м чте́тся моли́тва на благослове́ние ко́лива и кра́ткая моли́тва ко всем святы́м земли́ Ру́сския.⁹⁰ (А́ще не соверша́лось После́дование моле́бнаго пе́ния, чте́тся по Литурги́и по́лная моли́тва ко всем святы́м земли́ Ру́сския, зри вы́ше: «О всеблаже́ннии и Богому́дрии уго́дницы Бо́жии,..»).

Молитва ко всем святым земли́ Ру́сския

О всеблаже́ннии и богому́дрии уго́дницы Бо́жии, по́двиги свои́ми зе́млю Ру́сскую освяти́вшии и телеса́ своя́, я́ко се́мя ве́ры, в ней оста́вльшии, душа́ми же свои́ми Престо́лу Бо́жию предстоя́щии и непреста́нно о ней моля́щиися! Се ны́не, в день о́бщаго ва́шего торжества́, мы, гре́шнии, ме́ньшии бра́тия ва́ши, дерза́ем приноси́ти вам сие́ хвале́бное пе́ние. Велича́ем ва́ша вели́кия по́двиги, духо́внии во́ини Христо́ви, терпе́нием и му́жеством до конца́ врага́ низложи́вшии и нас от пре́лести и ко́зней его́ избавля́ющии. Ублажа́ем ва́ше свято́е житие́, свети́льницы Боже́ственнии, све́том ве́ры и доброде́телей светя́щиися и на́ша умы́ и сердца́ богому́дренно озаря́ющии. Прославля́ем ва́ша вели́кая чудеса́, цве́ти ра́йстии, в стране́ на́шей се́верней прекра́сне процве́тшии и арома́ты дарова́ний и чуде́с повсю́ду благоуха́ющии. Восхваля́ем ва́шу богоподража́тельную любо́вь, предста́телие на́ши и покрови́телие, и, упова́юще на по́мощь ва́шу, припа́даем к вам и вопие́м: вси святи́и сро́дницы на́ши, от лет дре́вних просия́вшии и в после́дния дни подвиза́вшиися, явле́ннии и неявле́ннии, ве́домии и неве́домии! Помяни́те нашу не́мощь и уничиже́ние и моли́твами ва́шими испроси́те у Христа́ Бо́га на́шего, да и мы, безбе́дно преплы́вше жите́йскую пучи́ну и невреди́мо соблю́дше сокро́вище ве́ры, в приста́нище ве́чнаго спасе́ния дости́гнем и в блаже́нных оби́телех Го́рняго оте́чества вку́пе с ва́ми и со все́ми угоди́вшими Ему́ от ве́ка святы́ми водвори́мся благода́тию и человеколю́бием Спаси́теля на́шего Го́спода Иису́са Христа́, Ему́же со Преве́чным Отце́м и со Пресвяты́м Ду́хом подоба́ет непреста́нное славосло́вие и поклоне́ние от всех тва́рей во ве́ки веко́в. Ами́нь.

По моли́тве пое́м велича́ния Пресвяте́й Тро́ице, Богоро́дице и святы́м (зри выше). Пое́мым велича́ниим сим, быва́ет целова́ние ико́ны пра́здника. Посе́м: Бу́ди И́мя Госпо́дне: Псало́м 33 и про́чее Литурги́и. Отпу́ст и многоле́тие со осо́бым проше́нием (зри ни́же, уста́в) и стихи́:

Утвержде́ние на Тя наде́ющихся, / утверди́, Го́споди, Це́рковь, / ю́же стяжа́л еси́ / Честно́ю Твое́ю Кро́вию.

Под Твою́ ми́лость прибега́ем, / Богоро́дице Де́во, / моле́ний на́ших не пре́зри в ско́рбех, / но от бед изба́ви нас, / Еди́на Чи́стая и Благослове́нная.

Пресвята́я Богоро́дице, / спаси́ нас.

Вси святи́и земли́ Ру́сския, / моли́те Бо́га о нас.

В Неде́лю 2-ю по Пятидеся́тнице.

На ма́лой вече́рни. На Го́споди, воззва́х: стихи́ры воскре́сны 4, глас 1. Сла́ва, святых, глас 1. И ны́не, Богоро́дичен догма́тик ма́лыя вече́рни, глас 1. На стихо́вне еди́на стихи́ра воскре́сна, глас 1, и святы́х две стихи́ры, глас 8, со стихи́ их. Сла́ва, святы́х, глас 8. И ны́не, Богоро́дичен, глас то́йже: О, пресла́внаго чудесе́! Небесе́ и земли́ Цари́ца: (зри вы́ше, на стихо́вне вели́цей вече́рни). Или Богоро́дичен, глас 4: При́сно страна́ Росси́йская: (зри вы́ше, на у́трени на хвали́тех). По Ны́не отпуща́еши: тропа́рь воскре́сен, глас 1. Сла́ва, святы́х, глас 8: Я́коже плод: И ны́не, Богоро́дичен, глас 4: Засту́пнице усе́рдная: Ектения́ и отпу́ст.

По отпу́сте ма́лыя вече́рни соверша́ем после́дование моле́бнаго пе́ния. По 3-й пе́сни ектения́ сугу́бая. Седа́лен, глас 2. По 6-й пе́сни ектения́ ма́лая. Конда́к, глас 6. Проки́мен, глас 4: Мне же зело́ че́стни бы́ша / дру́зи Твои́, Бо́же. Стих: Изочту́ их, и па́че песка́ умно́жатся. Вся́кое дыха́ние: Ева́нгелие от Иоа́нна, зача́ло 51 (15:12–20). Сла́ва: Моли́твами всех святы́х ру́сских: И ны́не: Моли́твами Богоро́дицы: Поми́луй мя, Бо́же: И стихи́ра, глас 6. Посе́м глаго́лет диа́кон моли́тву Спаси́, Бо́же, лю́ди Твоя́: (зри ни́же, уста́в на лити́и). По трисвято́м О́тче наш: и тропа́рь, глас 8: Я́коже плод: Слава, и ны́не, глас то́йже: С вы́шних призира́я: Та́же ектения́ сугу́бая, ю́же глаго́лет диа́кон с кади́лом. Моли́тва и отпу́ст, на не́мже помина́ем: свята́го равноапо́стольнаго вели́каго кня́зя Влади́мира и всех про́чих чудотво́рцев, в земли́ Росси́йстей просия́вших: По отпу́сте пое́т диа́кон: Спаси́, Христе́ Бо́же: Посе́м стихи́ на схо́де. И и́дем в трапе́зу и быва́ет утеше́ние бра́тии, труда́ ра́ди бде́ннаго, хотя́щаго бы́ти.

На вели́цей вече́рни. Блаже́н муж: кафи́зма вся. На Го́споди, воззва́х: стихи́ры на 10, воскре́сны 1-го гла́са 3, и Анатолиева 1, и святых 6, последнюю же оставляем. Сла́ва, святых, глас 1. И ны́не, догматик 1-го гла́са. Вход, прокимен дне: Господь воцарися: И чте́ния три: Проро́чества Иса́иина (49:8–15); Прему́дрости Иисуса, сына Сирахова (44:1–14); Прему́дрости Соломо́новы (3:1–9).

На лити́и стихи́ры вси святы́х. Глас 8: Сра́дуйтеся с на́ми, вси ли́цы святы́х: Сла́ва, и ны́не, глас то́йже: Сра́дуйтеся с на́ми, у́мная чинонача́лия: А́ще обхожде́ние или́ изво́лим, прилага́ем и и́ны стихи́ры подо́бны на осмь гласо́в и стихи́ры стихо́вны святы́х с вели́кия вече́рни.

На лити́и (и на моле́бном пе́нии, и на у́трени) моли́тва Спаси́, Бо́же:

Спаси́, Бо́же, лю́ди Твоя́ и благослови́ достоя́ние Твое́, посети́ мир Твой ми́лостию и щедро́тами, возвы́си рог христиа́н правосла́вных и низпосли́ на ны ми́лости Твоя́ бога́тыя, моли́твами Всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, честны́я же и многоцеле́бныя ри́зы Твоея́, предста́тельствы честны́х небе́сных Сил безпло́тных, честна́го сла́внаго проро́ка, Предте́чи и Крести́теля Иоа́нна, свята́го сла́внаго и всехва́льнаго апо́стола Андре́я Первозва́ннаго и всех святы́х сла́вных и всехва́льных апо́столов, свята́го сла́внаго проро́ка Илии́, и́же во святы́х оте́ц на́ших и вселе́нских вели́ких учи́телей и святи́телей: Васи́лия Вели́каго, Григо́рия Богосло́ва и Иоа́нна Златоу́стаго, и́же во святы́х отца́ на́шего Никола́я, архиепи́скопа Мир Лики́йских, чудотво́рца, святы́х равноапо́стольных Мефо́дия и Кири́лла, учи́телей слове́нских, святы́х равноапо́стольных вели́каго кня́зя Влади́мира и вели́кия княги́ни О́льги, и́же во святы́х оте́ц на́ших и всея́ Росси́и чудотво́рцев: Михаи́ла, Митрополи́та Ки́евскаго, Петра́, Алекси́я, Ио́ны, Фили́ппа, священному́ченика Патриа́рха Ермоге́на и Инноке́нтия, святи́телей Моско́вских, Ники́ты и Иоа́нна Новгоро́дских, Лео́нтия и Дими́трия Росто́вских, преподо́бных и богоно́сных оте́ц на́ших Анто́ния и Феодо́сия Киевопече́рских, Се́ргия и Ни́кона Ра́донежских, Анто́ния Ри́млянина и Варлаа́ма Ху́тынскаго, Новгоро́дских, Зоси́мы и Савва́тия Солове́цких, Се́ргия и Ге́рмана Валаа́мских, Серафи́ма Саро́вскаго и всех про́чих чудотво́рцев, в земли́ Росси́йстей просия́вших, и́хже па́мять соверша́ем ны́не, святы́х сла́вных добропобе́дных му́чеников, преподо́бных и богоно́сных оте́ц на́ших, святы́х и пра́ведных Богооте́ц Иоаки́ма и А́нны и всех святы́х, мо́лим Тя, Многоми́лостиве Го́споди, услы́ши нас, гре́шных, моля́щихся Тебе́, и поми́луй нас.

На лити́и моли́тва Влады́ко, Многоми́лостиве: в не́йже вси святи́и, в земли́ Росси́йстей просия́вшии, по имено́м помя́нуты суть:

Влады́ко Многоми́лостиве, Го́споди Иису́се Христе́, Бо́же наш, моли́твами Всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́ и честны́я и многоцеле́бныя ри́зы Твоея́, предста́тельством честна́го Архистрати́га Михаи́ла и про́чих небе́сных Сил безпло́тных, честна́го сла́внаго проро́ка, Предте́чи и Крести́теля Иоа́нна, святы́х сла́вных и всехва́льных апо́столов: Андре́я Первозва́ннаго, Си́мона Канани́та, Варфоломе́я и про́чих святы́х сла́вных и всехва́льных апо́столов, свята́го сла́внаго проро́ка Илии́, святы́х сла́вных и добропобе́дных му́чеников Иоа́нна младе́нца, от И́рода убие́ннаго, И́нны, Пи́нны и Ри́ммы Го́тфских, Три́фона, Парфе́ния и Калоге́ра, Са́ввы стратила́та и с ним седми́десяти во́инов му́чеников Го́тфских, Космы́ и Дамиа́на Ри́мских, Васили́ска Кома́нскаго, Са́ввы чтеца́, Го́тфскаго, му́чеников Го́тфских Вафу́сия и Ве́рка пресви́теров, Арпи́лы мона́ха, Ави́ва, А́гна, Реа́са, Игафра́кса, Иско́я, Си́лы, Сиги́ца, Сонири́ла, Суи́мвла, Фе́рма, Фи́лла, Конста́нса, царе́вича Агафо́на и му́чениц Го́тфских А́нны, А́ллы, Лари́сы, Мои́ко, Мами́ки, Уи́рко, Анимаи́сы, Гаа́фы цари́цы Го́тфския и про́чих, и Дукли́ды, царе́вны Го́тфския, Ермининге́льда, царе́вича Го́тфскаго, во́ина Иса́ии, кня́зя Мангу́пскаго, Го́тфскаго, святы́х вели́ких му́чеников Гео́ргия Победоно́сца, Пантелеи́мона цели́теля, Дими́трия Солу́нскаго, Ники́ты Го́тфскаго, святы́я великому́ченицы Варва́ры и про́чих святы́х му́чеников, преподо́бных и богоно́сных оте́ц на́ших, Макси́ма Испове́дника и про́чих преподо́бных оте́ц, и́же во святы́х оте́ц на́ших и вселе́нских вели́ких учи́телей и святи́телей: Васи́лия Вели́каго, Григо́рия Богосло́ва и Иоа́нна Златоу́стаго, и́же во святы́х отца́ на́шего Никола́я, архиепи́скопа Мир Лики́йских, чудотво́рца, святы́х священному́чеников, в Херсо́не епи́скопствовавших: Васи́лия, Ефрема, Капитона, Евгения, Еферия, Елпидия и Агафодо́ра, и́же во святы́х оте́ц на́ших Кли́мента с Фи́вою и Марти́на, Пап Ри́мских, Фо́тия и Григо́рия, Патриа́рхов Константинопо́льских, Стефа́на, Са́ввы и Васи́лия архиепи́скопов Су́рожских, и Иоа́нна, епи́скопа Го́тфскаго, Гео́ргия, митрополи́та Митиле́нскаго, испове́дника, свята́го блаже́ннаго Андре́я, Христа́ ра́ди юро́диваго, славяни́на, святы́я равноапо́стольныя Ни́ны, просвети́тельницы Иве́рии, святы́х благове́рных царя́ Дави́да Возобнови́теля и цари́цы Тама́ры, Грузи́нских, и всех святы́х, в страна́х Кавка́зских просия́вших, свята́го священному́ченика Григо́рия Просвети́теля и про́чих святы́х вели́кия Арме́нии

Святы́х равноапо́стольных

Кири́лла († 869) и Мефо́дия († 885), учи́телей Слове́нских

вели́кия благове́рныя княги́ни Росси́йския О́льги († 969; в креще́нии Еле́ны)

вели́каго благове́рнаго кня́зя Росси́йскаго Влади́мира († 1015; в креще́нии Василия)

Инноке́нтия, митрополи́та Моско́вскаго и Коло́менскаго, апо́стола Сиби́ри и Аме́рики († 1879)

Никола́я, архиепи́скопа Токи́йскаго, апо́стола Япо́нии († 1912)

и всех про́чих оте́ц Росси́йских, во благове́стии Христо́ве потруди́вшихся

Иже во святы́х оте́ц на́ших святи́телей и чудотво́рцев Росси́йских

Михаи́ла, митрополи́та Ки́евскаго и всея́ Руси́ († 992)

Фео́дора, епи́скопа Росто́вскаго († 1023)

Иоаки́ма Ко́рсунянина, епи́скопа Новгоро́дскаго († 1030)

Иларио́на, митрополи́та Ки́евскаго и всея́ Руси́ († ок. 1053)

Луки́, епи́скопа Новгоро́дскаго († 1060)

Лео́нтия священному́ченика, епи́скопа Росто́вскаго († 1073)

Никола́я, епи́скопа Тмутарака́нскаго († по́сле 1088)

Иоа́нна II, проро́ка, митрополи́та Ки́евскаго и всея́ Руси́ († 1089)

Луки́, епи́скопа Белгоро́дскаго († после 1089)

Иса́ии, епи́скопа Росто́вскаго († 1090)

Стефа́на, епи́скопа Влади́миро-Волы́нскаго († 1094)

Мари́на, епи́скопа Ю́рьевскаго († 1095)

Ге́рмана, епи́скопа Новгоро́дскаго († 1096)

Ефре́ма, епи́скопа Переясла́вскаго († ок. 1098)

Никола́я, митрополи́та Ки́евскаго и всея́ Руси́ († ок. 1101–1103)

Ники́ты, епи́скопа Новгоро́дскаго († 1108)

Ми́ны, епи́скопа По́лоцкаго († 1116)

Амфило́хия, епи́скопа Влади́миро-Волы́нскаго († 1122)

Феокти́ста, епи́скопа Черни́говскаго († 1123)

Пантелеи́мона, епи́скопа Черни́говскаго († 1142)

Евфи́мия, епи́скопа Переясла́вскаго († после 1149)

Си́мона, епи́скопа Су́ждальскаго (1 пол. XII)

Ни́фонта, епи́скопа Новгоро́дскаго († 1156)

Константи́на, митрополи́та Ки́евскаго и всея́ Руси́ († 1159)

Арка́дия, епи́скопа Новгоро́дскаго († 1162)

Диони́сия, епи́скопа По́лоцкаго († 1182)

Кири́лла, епи́скопа Ту́ровскаго († ок. 1183)

Иоа́нна, архиепи́скопа Новгоро́дскаго († 1186)

Луки́, епи́скопа Росто́вскаго († 1189)

Григо́рия, архиепи́скопа Новгоро́дскаго († 1193)

Лавре́нтия, епи́скопа Ту́ровскаго († 1194)

Мартирия, архиепи́скопа Новгоро́дскаго († 1199)

Игна́тия, епи́скопа Смоле́нскаго († ок. 1210)

Иоа́нна, епи́скопа Росто́вскаго († 1213)

Симо́на, епи́скопа Влади́мирскаго († 1226)

Анто́ния, архиепи́скопа Новгоро́дскаго († 1231)

Мерку́рия, епи́скопа Смоле́нскаго († 1239)

Кири́лла, епи́скопа Росто́вскаго († 1262)

Серапио́на, епи́скопа Влади́мирскаго († 1275)

Кири́лла II, митрополи́та Ки́евскаго и всея́ Руси́ († 1280)

Фео́дора, епи́скопа Влади́мирскаго († 1286)

Игна́тия, епи́скопа Росто́вскаго († 1288)

Симеона, епи́скопа Тверска́го († 1289)

Васи́лия, епи́скопа Ряза́нскаго († 1295)

Макси́ма, митрополи́та Ки́евскаго и всея́ Руси́, Влади́мирскаго († 1305)

Феокти́ста, архиепи́скопа Новгоро́дскаго († 1310)

Петра́, митрополи́та Ки́евскаго и всея́ Руси́, Моско́вскаго († 1326)

Про́хора, епи́скопа Росто́вскаго († 1328; в схиме Трифона)

Анто́ния, епи́скопа Росто́вскаго († 1336)

Васи́лия Кали́ки, архиепи́скопа Новгоро́дскаго († 1352)

Феогно́ста, митрополи́та Ки́евскаго и всея́ Руси́, Моско́вскаго († 1353)

Моисе́я, архиепи́скопа Новгоро́дскаго († 1362)

Фео́дора До́браго, епи́скопа Тверска́го († 1367)

Иоа́нна, епи́скопа Су́ждальскаго († 1373)

Алекси́я, митрополи́та Ки́евскаго и всея́ Руси́, Моско́вскаго († 1378)

Кири́лла, епи́скопа Росто́вскаго († 1384)

Диони́сия, архиепи́скопа Су́ждальскаго († 1385)

Иа́кова, епи́скопа Росто́вскаго († 1392)

Фео́дора, архиепи́скопа Росто́вскаго († 1394)

Стефа́на, епи́скопа Великопе́рмскаго († 1396)

Михаи́ла, епи́скопа Смоле́нскаго († 1402)

Киприа́на, митрополи́та Ки́евскаго и всея́ Руси́, Моско́вскаго († 1406)

Арсе́ния, епи́скопа Тверска́го († 1409)

Григо́рия Премудраго, архиепи́скопа Росто́вскаго († 1416)

Симео́на, архиепи́скопа Новгоро́дскаго († 1421)

Диони́сия Гре́ка, архиепи́скопа Росто́вскаго († 1425)

Фо́тия, митрополи́та Ки́евскаго и всея́ Руси́, Моско́вскаго († 1431)

Ефре́ма, архиепи́скопа Росто́вскаго († 1454)

Евфи́мия, архиепи́скопа Новгоро́дскаго († 1458)

Ио́ны, митрополи́та Моско́вскаго и всея́ Руси́ († 1461)

Три́фона, архиепи́скопа Росто́вскаго († ок. 1468)

Ио́ны, епи́скопа Великопе́рмскаго († 1470)

Ио́ны, архиепи́скопа Новгоро́дскаго († 1470)

Фили́ппа I, митрополи́та Моско́вскаго и всея́ Руси́ († 1473)

Феодо́сия, митрополи́та Моско́вскаго и всея́ Руси́ († 1475)

Вассиа́на I, архиепи́скопа Росто́вскаго († 1481)

Фео́фила, архиепи́скопа Новгоро́дскаго († 1482)

Геро́нтия, митрополи́та Моско́вскаго и всея́ Руси́ († 1489)

Генна́дия, архиепи́скопа Новгоро́дскаго († 1505)

Си́мона, митрополи́та Моско́вскаго и всея́ Руси́ († 1511)

Вассиа́на II, архиепи́скопа Росто́вскаго († 1516)

Серапио́на, архиепи́скопа Новгоро́дскаго († 1516)

Иоаса́фа, митрополи́та Моско́вскаго и всея́ Руси́ († 1555)

Гу́рия, архиепи́скопа Каза́нскаго и Свияжскаго († 1563)

Мака́рия чу́днаго, митрополита Моско́вскаго и всея́ Руси́ († 1564)

Ака́кия, епи́скопа Тверска́го († 1567)

Ге́рмана священному́ченика, архиепи́скопа Каза́нскаго и Свия́жскаго († 1567)

Фили́ппа II священному́ченика, митрополи́та Моско́вскаго и всея́ Руси́ († 1569)

Пи́мена, архиепи́скопа Новгоро́дскаго († 1571)

Варсоно́фия, епи́скопа Тверска́го († 1576)

Анто́ния, епи́скопа Волого́дскаго († 1588)

Григо́рия епископа, Су́ждальскаго

Алекса́ндра, епи́скопа Переясла́вскаго

Алекса́ндра, епи́скопа Тверска́го

Феодо́сия, архиепи́скопа Астраха́нскаго († 1606)

И́ова, Пе́рваго Святе́йшаго Патриа́рха Моско́вскаго и всея́ Руси́ († 1607)

Арсе́ния, архиепи́скопа Су́ждальскаго († 1627)

Афо́ния, митрополи́та Новгоро́дскаго († 1653)

Софро́ния, архиепи́скопа Су́ждальскаго († 1654)

Афана́сия, Патриа́рха Царягра́дскаго, Лу́бенскаго и Ха́рьковскаго († 1656)

Серапио́на, митрополи́та Са́рскаго и Подо́нскаго († 1659)

Марке́лла, архиепи́скопа Волого́дскаго и Белоезе́рскаго, Солове́цкаго († 1663)

Некта́рия, архиепи́скопа Тобо́льскаго и всея Сиби́ри († 1667)

Феодо́сия, архиепи́скопа Черни́говскаго († 1696)

Питири́ма, епи́скопа Тамбо́вскаго († 1698)

Симео́на, митрополи́та Смоле́нскаго († 1699)

Митрофа́на, епи́скопа Воронежскаго († 1703)

Иларио́на, митрополи́та Су́ждальскаго и Ю́рьевскаго († 1707)

Дими́трия, митрополи́та Росто́вскаго († 1709)

Иоа́нна, митрополи́та Тобо́льскаго и всея́ Сиби́ри († 1715)

Филофе́я, митрополита Тобо́льскаго и всея́ Сиби́ри († 1727; в схи́ме Фео́дора)

Инноке́нтия, епи́скопа Ирку́тскаго († 1731)

Анто́ния, митрополита Тобо́льскаго и всея́ Сибири († 1740)

Иоаса́фа, епи́скопа Белгоро́дскаго († 1754)

Па́вла, митрополи́та Тобо́льскаго и всея́ Сиби́ри († 1770)

Софро́ния, епи́скопа Ирку́тскаго († 1771)

Ти́хона, епи́скопа Воро́нежскаго († 1783)

Варлаама, архиепи́скопа Тобо́льскаго и всея́ Сиби́ри († 1802)

Меле́тия, архиепи́скопа Ха́рьковскаго и Ахты́рскаго († 1840)

Филаре́та, митрополи́та Ки́евскаго († 1857; в схи́ме Феодо́сия)

Гера́сима, епи́скопа Астраха́нскаго († 1880)

Меле́тия, епи́скопа Ряза́нскаго († 1900)

и всех про́чих святи́телей и чудотво́рцев Росси́йских, я́ко пра́вила ве́ры, о́брази кро́тости и воздержа́ния учи́телие, просла́вльшихся

Святы́х благове́рных Росси́йских князе́й и княги́нь

Бори́са Росто́вскаго и Гле́ба Му́ромскаго, страстоте́рпцев Росси́йских († 1015; в креще́нии Рома́на и Дави́да)

Яросла́ва Му́драго, Ки́евскаго († 1054; в креще́нии Гео́ргия), А́нны Новгоро́дския († 1050) и сы́на их Влади́мира Новгоро́дскаго († 1052)

Святосла́ва Ки́евскаго († 1076)

Изясла́ва Ки́евскаго († 1078; в креще́нии Дими́трия)

Яропо́лка Влади́миро-Волы́нскаго († 1086; в креще́нии Петра́)

Дави́да Черни́говскаго († 1123)

Влади́мира Монома́ха, Ки́евскаго († 1125; в креще́нии Васи́лия)

Константи́на († 1129), Ири́ны (XII) и чад их Михаи́ла (XII) и Фео́дора (XII), Му́ромских

Мстисла́ва Ки́евскаго († 1132; в креще́нии Фео́дора)

Все́волода Пско́вскаго († 1138; в креще́нии Гаврии́ла)

И́горя Черни́говскаго и Ки́евскаго, страстоте́рпца († 1147)

Бори́са Ту́ровскаго († ок. 1160)

Изясла́ва Влади́мирскаго († 1165)

Гле́ба Городе́нскаго, Ки́евскаго († после 1166)

Ростисла́ва Ки́евскаго († 1167)

Мстисла́ва Влади́мирскаго († 1172)

Андре́я Боголю́бскаго, страстоте́рпца († 1174)

Гле́ба Влади́мирскаго († 1174; в креще́нии Гео́ргия)

Михаи́ла Влади́мирскаго († 1176)

Мстисла́ва Хра́браго, Новгоро́дскаго († 1180; в креще́нии Гео́ргия)

Мари́и Влади́мирския († 1206; в иночестве Марфы)

Васи́лия Новгоро́дскаго († 1219)

Петра́ и Февро́нии Муромских († 1228; в крещении Давида и Евфросинии)

Мстисла́ва Новгоро́дскаго († 1228)

Фео́дора Новгоро́дскаго († 1233)

Фео́дора († 1237), Евпра́ксии († 1237) и сы́на их

Иоа́нна († 1237), Зара́йских му́чеников

Гео́ргия Влади́мирскаго, му́ченика († 1238)

Васи́лия Росто́вскаго, му́ченика († 1238)

Все́волода, Мстисла́ва, Влади́мира, Дими́трия младе́нца, Влади́мирских, му́чеников († 1238)

Ага́фии, Феодо́ры, Мари́и, Христи́ны, Влади́мирских, му́чениц († 1238)

Яросла́ва († 1246; в креще́нии Фео́дора) и Феодо́сии († 1244; в и́ночестве Евфроси́нии) Влади́мирских

Михаи́ла Черни́говскаго († 1245) и боля́рина его́

Фео́дора († 1245), му́чеников и испове́дников

Оле́га Кра́снаго, Про́нскаго, му́ченика († 1247)

Михаи́ла Смоле́нскаго († ок. 1248)

Святосла́ва Ю́рьевскаго († 1253; в креще́нии Гаврии́ла)

Васи́лия († 1249) и Константи́на († 1257) Яросла́вских

Алекса́ндра Не́вскаго († 1263; в схи́ме Алекси́я), сы́на его́ Дими́трия Влади́мирскаго († 1269) и дще́ри его́ Евдоки́и Влади́мирския (ХIII)

Рома́на Ряза́нскаго, му́ченика († 1270)

Гле́ба Росто́вскаго, Белоезе́рскаго († 1280)

Рома́на У́глечскаго († 1285)

Оле́га Бря́нскаго († ок. 1285)

Дими́трия Влади́мирскаго († 1294)

Довмо́нта († 1299; в креще́нии Тимофе́я) и Мари́и († 1300; в и́ночестве Ма́рфы) Пско́вских

Фео́дора Смоле́нскаго († 1299) и чад его Дави́да († 1321) и Константи́на († до 1321) Яросла́вских

Влади́мира и Агриппи́ны Рже́вских (XIII)

Иоа́нна Пути́вльскаго, му́ченика (XIII)

Дании́ла Моско́вскаго († 1303)

Ксе́нии Тверски́я († 1312; в и́ночестве Мари́и)

Михаи́ла Тверска́го, му́ченика († 1318) и преподо́бныя А́нны Ка́шинския († 1338)

Дими́трия Тверска́го, му́ченика († 1325)

Фео́дора Староду́бскаго, му́ченика († 1330)

Алекса́ндра и сы́на его́ Фео́дора Тверски́х, му́чеников († 1339)

Иоа́нна Калиты́, Моско́вскаго († 1340)

Васи́лия Яросла́вскаго († 1344)

Андре́я Су́ждальскаго († 1365) и преподо́бныя Феодо́ры Нижегоро́дския († 1378; в миру́ Анастаси́и)

Дими́трия Моско́вскаго, Донска́го († 1389) и Евдоки́и Моско́вския († 1407; в и́ночестве Евфроси́нии)

Михаи́ла Тверска́го и Мику́линскаго († 1400; в и́ночестве Матфе́я)

Симео́на Вя́земскаго и Иулиани́и Вя́земския и Новото́ржския, му́чеников, († 1406)

Андре́я Смоле́нскаго (XV)

Гле́ба Смоле́нскаго (XV)

Дими́трия († 1424) и Мари́и († после 1424) Заозе́рских, Волого́дских

Фео́дора Волого́дскаго

Васи́лия Требово́льскаго

Дими́трия Кра́снаго, Га́лицкаго и Бе́жецкаго († 1440),

Андре́я У́глечскаго († 1494)

Дими́трия У́глечскаго, Прилу́цкаго († после 1540)

Дими́трия, царе́вича Моско́вскаго, У́глечскаго страстоте́рпца († 1591)

Фео́дора, царя́ и вели́каго кня́зя Моско́вскаго († 1598)

и всех про́чих благове́рных князе́й и княги́нь Росси́йских, за ве́ру во Христа́ и оте́чество жизнь свою́ положи́вших и в по́двизех по́стнических просия́вших

Преподо́бных и богоно́сных оте́ц на́ших

Анто́ния Ки́ево-Пече́рскаго, первонача́льника мона́шескаго жития́ на Руси́, в Бли́жних пеще́рах почива́ющаго († 1073)

и Феодо́сия Ки́ево-Пече́рскаго, о́бщих жити́й нача́льника, в Да́льних пеще́рах почива́ющаго († 1074)

и преподо́бных оте́ц Ки́ево-Пече́рских, в Бли́жних пеще́рах почива́ющих:

Варлаа́ма и́гумена († 1065)

Иереми́и прозорли́ваго († ок. 1070)

Дамиа́на пресви́тера, целе́бника († 1071)

Матфе́я прозорли́ваго († ок. 1085)

Ни́кона игу́мена († 1088)

Исаа́кия затво́рника († 1090)

Иоа́нна игу́мена († 1092)

двана́десяти гре́ков, зда́телей вели́кия це́ркве Ки́ево-Пече́рския оби́тели (XI)

Ага́пита, врача́ безме́зднаго († ок. 1095)

Иоа́нна († до 1088) и сы́на его́ Заха́рии († по́сле 1098)

Ма́рка гробокопа́теля (XI–XII)

Фео́фила слезоточи́ваго (XI–XII)

Иоа́нна богоуго́дника (XI–XII)

Фео́фила друга́го (XI–XII)

Феодо́сия друга́го (XI–XII)

Иоа́нна друга́го (XI–XII)

Про́хора чудотво́рца, лебедника́ († 1107)

Пи́мена многоболе́зненнаго († 1110)

Али́пия иконопи́сца († 1114)

Григо́рия иконопи́сца (XII)

Ни́кона суха́го (нач. XII)

Не́стора летопи́сца († ок. 1114)

Пи́мена по́стника († после 1114)

Иса́ии чудотво́рца († 1115)

Спиридо́на просфо́рника († ок. 1141)

Никоди́ма просфо́рника († ок. 1141)

Нико́лы свято́ши, кня́зя Черни́говскаго († 1143)

Ониси́фора испове́дника († 1148)

Иоа́нна многострада́льнаго († 1160)

Ера́зма чернори́зца († ок. 1160)

Афана́сия затво́рника († ок. 1176)

Полика́рпа архимандри́та († 1182)

Илии́ му́ромца († ок. 1188)

Аре́фы затво́рника († не позже 1190)

Ти́та иеромона́ха († 1190)

Сильве́стра чудотво́рца (XII)

Некта́рия послушли́ваго (XII)

Иоа́нна по́стника (XII)

Мака́рия по́стника (XII)

Феофа́на по́стника (XII)

Анато́лия затво́рника (XII)

Авраа́мия затво́рника (XII–XIII)

Ону́фрия молчали́ваго (XII–XIII)

Са́ввы богоуго́дника (XIII)

Авраа́мия трудолюби́ваго (XIII)

Елла́дия затво́рника (XII–XIII)

Луки́ иконо́ма (XIII)

Се́ргия послушли́ваго (XIII)

Сисо́я затво́рника (XIII)

Фео́фила затво́рника (XIII)

Они́сима затво́рника (XII–XIII)

Алекси́я затво́рника (XIII)

три́десяти оте́ц мироточи́вых глав

Ефре́ма пресви́тера (XIII)

Евста́фия зла́таря (XIII)

Иерони́ма за́творника (XIII)

Мела́дия ста́рца (XIII)

Пе́ргия ста́рца (XIII)

Па́вла чудеснопослушли́ваго (XIII)

Меле́тия иере́я (XIII)

Серапио́на иере́я (XIII)

Филаре́та иере́я (XIII)

Аза́рии по́стника

Вассиа́на

Дави́да

Елиссе́я

Инноке́нтия

Иси́хия

Иоаки́ма

Ники́фора

Ни́фонта

Се́ргия друга́го

Силуа́на друга́го

Сильве́стра друга́го

Сисо́я канонархи́ста

Стефа́на по́стника

Тимофе́я и́нока

и преподо́бных оте́ц Ки́ево-Пече́рских, в Да́льних пеще́рах почива́ющих

Иларио́на схи́мника († 1066)

Тимофе́я игу́мена († 1131)

Пи́мена по́стника, игу́мена († 1141)

Авраа́мия игу́мена († до 1156)

Досифе́я I игу́мена († 1156)

Акинди́на I игу́мена († 1164)

Досифея II игу́мена († ок. 1218)

Акиндина II игу́мена († 1232)

Сисо́я схи́мника (XIII)

Па́мвы иеромона́ха, затво́рника (XIII)

Пафнутия затво́рника (XIII)

Афана́сия затво́рника (XIII)

Софро́ния затво́рника (XIII)

Анато́лия затво́рника (XIII)

Пио́ра затво́рника (XIII)

Иси́дора затво́рника (XIII)

Лавре́нтия затво́рника (XIII)

Кассиа́на затво́рника (XIII)

Фео́дора молчали́ваго (XIII)

Аммо́на затво́рника (XIII)

Марда́рия затво́рника (XIII)

Панкра́тия затво́рника (XIII)

Евло́гия ста́рца (XIII)

Па́вла послушли́ваго (XIII–XIV)

Моисе́я чудотво́рца (XIII–XIV)

Марти́рия диа́кона (XIII–XIV)

Марти́рия затво́рника (XIII–XIV)

Григо́рия затво́рника (XIII–XIV)

Мака́рия диа́кона (XIII–XIV)

Заха́рии по́стника (XIII–XIV)

Силуа́на схи́мника (XIII–XIV)

Агафо́на чудотво́рца (XIII–XIV)

Ло́нгина вра́таря (XIII–XIV)

Арсе́ния трудолюби́ваго (XIV)

Зино́на по́стника (XIV)

Ипа́тия целе́бника (XIV)

Ио́сифа многоболе́зненнаго (XIV)

Не́стора некни́жнаго (XIV)

Ру́фа затво́рника (XIV)

Вениами́на затво́рника (XIV)

Евфи́мия схи́мника (XIV)

Ти́та во́ина (XIV)

Ахи́лы диа́кона (XIV)

Паи́сия богоуго́дника (XIV)

Мерку́рия по́стника (XIV)

Геро́нтия канона́рха (XIV)

Лео́нтия канона́рха (XIV)

Анаста́сия друга́го

Варсоно́фия

Генна́дия

Гера́сима

Дании́ла ста́рца

Дими́трия (XIV)

Петра́ (XIV)

Игна́тия архимандри́та († 1435)

Фео́дора, кня́зя Остро́жскаго († ок. 1483)

Диони́сия иеромона́ха (XV)

и про́чих преподо́бных оте́ц Ки́ево-Пече́рских, и́хже имена́ Ты Сам, Го́споди, ве́си;

и преподо́бных оте́ц

Ефре́ма Новото́ржскаго († 1053)

Судисла́ва, кня́зя Пско́вскаго, затво́рника Ки́евскаго († 1063; в креще́нии Гео́ргия)

Авраа́мия, архимандри́та Росто́вскаго († ок. 1073–1077)

Арка́дия Вя́земскаго и Новото́ржскаго († ок. 1077)

Марти́на Ту́ровскаго († по́сле 1146)

Анто́ния Ри́млянина, Новгоро́дскаго († 1147)

Андре́я игу́мена, Новгоро́дскаго (XII)

Авраа́мия Ми́рожскаго († 1158)

Гера́сима Волого́дскаго († 1178)

Ники́ты сто́лпника, Переясла́вскаго († ок. 1186)

Варлаа́ма Ху́тынскаго († 1192)

Кири́лла игу́мена, Новгоро́дскаго († после 1196)

Авраа́мия игу́мена, Яросла́вскаго († после 1219)

Авраа́мия († до 1224) и Ефре́ма (XIII) Смоле́нских

Анто́ния Ды́мскаго († 1224)

Константи́на и Космы́ Коси́нских († ок. 1240)

Елиссе́я Лаврише́вскаго († ок. 1250)

Фео́дора Ка́менскаго († ок. 1260)

Ксенофо́нта Робе́йскаго († 1262)

Киприа́на Устю́жскаго († 1276)

Петра́, царе́вича Орды́нскаго († 1290)

Михаи́ла, вери́жника Вязнико́вскаго († 1333)

Мака́рия пусты́нника, Новгоро́дскаго (XIII–XIV)

Вассиа́на Крестоми́ровскаго (нач. XIV)

Се́ргия и Ге́рмана Валаа́мских († ок. 1353?)

Авраа́мия Га́личскаго († 1375)

Варлаа́ма († 1377) и Гедео́на (XIV) Серпуховски́х

Кири́лла Челмого́рскаго († 1378)

Сильве́стра Обно́рскаго († 1379)

Лео́нтия Стромы́нскаго († ок. 1380)

Пахо́мия Не́рехтскаго († 1384)

Афана́сия и Феодо́сия Черепове́цких († ок. 1388)

Ла́заря († 1391) и Афана́сия (XV) Му́рманских, Олоне́цких

Елеаза́ра, Наза́рия и Евме́ния Му́рманских, Олоне́цких (XV)

Дими́трия Прилу́цкаго († 1392)

Се́ргия († 1392) и Ни́кона († 1426), игу́менов Ра́донежских и всея́ Росси́и чудотво́рцев

Кири́лла и Мари́и, схимона́хов Ра́донежских († до 1337)

Стефа́на Моско́вскаго (XIV–XV)

Митрофа́на игу́мена – ста́рца, Ра́донежскаго († до 1392)

Васи́лия Суха́го, Ра́донежскаго († до 1392)

И́акова посо́льника, Ра́донежскаго (XIV)

Они́сима вра́таря и сы́на его́ Елиссе́я диа́кона, Ра́донежских (XIV)

Си́мона, архимандри́та Смоле́нскаго, Ра́донежскаго († до 1392)

Исаа́кия молча́льника, Ра́донежскаго († 1388)

Мака́рия Ра́донежскаго († после 1392)

Илии келаря, Ра́донежскаго († 1384)

Си́мона екклисиа́рха, Ра́донежскаго († после 1392)

Михе́я Ра́донежскаго († 1385)

Некта́рия ве́стника, Ра́донежскаго (XIV)

Алекса́ндра-Пересве́та († 1380) и Андре́я-Осля́би (XIV), схимона́хов-во́инов Ра́донежских

Варфоломе́я и Нау́ма, Ра́донежских (XIV)

Иоанни́кия Ра́донежскаго (XIV)

Игна́тия Ра́донежскаго († после 1392)

Епифа́ния Прему́драго, Ра́донежскаго († ок. 1418–1422)

Мефо́дия Пе́шношскаго († 1392)

Са́ввы († 1392) и Иа́кова (XIV) Стромы́нских

Рома́на Киржа́чскаго († 1392)

Афана́сия Высо́цкаго, Серпуховска́го, мла́дшаго († 1395)

Афана́сия Высо́цкаго, Серпуховска́го, ста́ршаго († ок. 1401)

Андрони́ка († 1395), Са́ввы († ок. 1410–1420) и Алекса́ндра († после 1427), игу́менов Спа́сских, Моско́вских

Андре́я и Дании́ла иконопи́сцев, Моско́вских († до 1426)

Григо́рия Голу́твинскаго (XIV–XV)

Дими́трия Цили́бинскаго (XIV)

Ники́ты, Кири́лла, Ники́фора, Кли́мента, Исаа́кия и двух бра́тий их, Соко́льницких, Новгоро́дских (XIV–XV)

Евфи́мия Су́ждальскаго († 1404)

Стефа́на Ма́хрищскаго († 1406)

Са́ввы Стороже́вскаго, Звенигоро́дскаго († 1407)

Фео́дора († 1409) и Па́вла († после 1409) Росто́вских

Се́ргия Ну́ромскаго, Волого́дскаго († 1412)

Фео́фила и Иа́кова О́мучских († ок. 1412)

Ники́фора († до 1414) и Ники́ты († после 1421) Бо́ровских

Ферапо́нта Борове́нскаго (XIV–XV)

Корни́лия († ок. 1420) и Авраа́мия (XV) Палеостро́вских, Олоне́цких

Па́вла, пусты́нника Глуши́цкаго († после 1422)

Ферапо́нта Можа́йскаго, Белоезе́рскаго († 1416)

Кири́лла Белоезе́рскаго († 1427)

Игна́тия молча́льника и Досифе́я ста́рца, Белоезе́рских (XV)

Па́вла Ко́мельскаго, Обно́рскаго († 1429)

Мака́рия Пи́семскаго, Костромска́го (XIV–XV)

Лео́нтия Кари́ховскаго, Новгоро́дскаго († 1429)

Савва́тия Тверска́го († не позднее 1434)

Евфи́мия († 1435),

Анто́ния и Фе́ликса († 1418) Каре́льских

Диони́сия († 1437), Тара́сия († 1440) и Феодо́сия (XIV–XV) Глуши́цких

Алекса́ндра († 1439) и Анто́ния Ку́штских, Волого́дских

Варфоломе́я строи́теля, Иоа́нна Злата́го, ке́ларя, и Игна́тия ико́нника, Си́моновских, Моско́вских († 1442)

Иа́кова Железнобо́ровскаго († 1442)

Иа́кова Брыле́евскаго (XV)

Иа́кова Га́личскаго (кон. XV – нач. XVI)

Григо́рия Пе́льшемскаго († 1442)

Мака́рия У́нженскаго († 1444)

Варна́вы Ветлу́жскаго († 1445)

Арсе́ния Коне́вскаго († 1446)

Амфило́хия Глуши́цкаго († 1452)

Иоаса́фа Ка́менскаго († 1453)

Михаи́ла Кло́пскаго († ок. 1453–1456)

Фили́ппа Раба́нгскаго († 1457)

Варсоно́фия Тверска́го († ок. 1459)

Евфроси́на Тверска́го († ок. 1460)

Паи́сия Га́личскаго († 1460)

Варлаа́ма Уле́йминскаго, У́глечскаго († после 1460)

Са́ввы († 1461) и Андре́я (XV) Ви́шерских

Варлаа́ма († 1462) и Паи́сия Ва́жских, Пи́нежских

Кассиа́на Ка́менскаго († 1463)

Петра́ и Пахо́мия Ка́менских (XV)

Стефа́на и Тимофе́я (XV) Ку́бенских

Тимофе́я игу́мена, Волого́дскаго

Кири́лла, Спиридо́на и Фа́вста, пусты́нников Волого́дских

Евфи́мия Ся́нжемскаго († ок. 1465)

Са́ввы Тверска́го († 1467)

Иларио́на Гдо́вскаго, Псковоезе́рскаго († 1476)

Пафну́тия († 1477) и Илии́ (XV) Бо́ровских

Зоси́мы († 1478), Савва́тия († 1435) и Ге́рмана († 1479) Солове́цких

Иоа́нна свещено́сца, Солове́цкаго (XV)

Васи́лия келе́йника, Солове́цкаго (XV)

Макария рыболо́вца, Солове́цкаго (XV)

Ону́фрия, пусты́нника Солове́цкаго (XV)

Гера́сима, отше́льника Солове́цкаго (XV)

Ианнуа́рия Солове́цкаго (XV)

Стефа́на, тру́дника Солове́цкаго (XV–XVI)

Фили́ппа, пусты́нника Солове́цкаго (XV–XVI)

Досифе́я, затво́рника Солове́цкаго (XV–XVI)

Алекса́ндра Ошеве́нскаго († 1479)

Мака́рия Глуши́цкаго († ок. 1480)

Ма́рка († до 1473),

Ио́ны († 1480) и Ва́ссы († ок. 1473) Пско́во-Пече́рских

Евфроси́на († 1481) и Серапио́на († 1480) Пско́вских

Игна́тия, Харала́мпия и Памфи́ла Пско́вских (XV)

Досифе́я Верхнеостро́вскаго, Пско́вскаго († 1482)

Анто́ния Краснохо́лмского († 1481)

Мартиниа́на Белоезе́рскаго († 1483)

Мака́рия Каля́зинскаго († 1483)

Космы́ Я́хромскаго († 1492)

Моисе́я Белоезе́рскаго († ок. 1492)

Некта́рия, игу́мена Введе́нскаго, Бе́жецкаго († ок. 1492)

Некта́рия, игу́мена Покро́вского, Тверска́го (XV–XVI)

Ефре́ма († 1492) и Рома́на (XV–XVI) Переко́мских

Ти́хона († 1492) и Ники́фора (XV–XVI) Калу́жских

Ле́вкия Волокола́мского († ок. 1492)

Зоси́мы и Адриа́на Волокола́мских (XV–XVI)

Са́ввы Кры́пецкаго († 1495)

И́ова, архимандри́та Влади́мирскаго (XV)

Авраа́мия и Ко́прия Пече́нгских (XV–XVI)

Авксе́нтия и Ону́фрия Перцо́вских, Волого́дских (XV–XVI)

Елиссе́я Су́мскаго, Солове́цкаго (XV–XVI)

Алекса́ндра Во́чскаго, Га́личскаго (XV–XVI)

Севастиа́на Сохо́тскаго, Пошехо́нского († ок. 1500)

Ти́хона Лу́ховскаго, Костромска́го († 1503) Варлаа́ма (Гера́сима) и Фо́тия (Фадде́я) Лу́ховских (XVI)

Паи́сия († 1504),

Адриа́на († после 1504) и Боголе́па (XV) У́глечских,

Кассиа́на гре́ка, У́глечскаго († 1504)

Галактио́на Белоезе́рскаго († 1506)

Ге́рмана ди́внаго, Белоезе́рскаго († 1508)

Ни́ла Со́рскаго († 1508)

Вассиа́на Ря́бовскаго, У́глечскаго († 1509)

Вассиа́на Стро́кинскаго, Каргопо́льскаго (нач. XVI)

Харито́на Ся́нжемскаго († 1509)

Ио́сифа Волокола́мскаго († 1515)

Гера́сима Че́рнаго (XV–XVI), Кассиа́на Боса́го († 1532) и Фо́тия ста́рца († 1554), Волокола́мских

Пахо́мия († ок. 1515) и Пафну́тия († 1515) Ке́нских

Генна́дия Важеозе́рскаго († 1516)

Дави́да Серпуховска́го († 1520)

Инноке́нтия Ко́мельскаго († 1521)

Влади́мира Белопесо́цкаго, Серпуховска́го († ок. 1522)

Евфи́мия Архангелогоро́дскаго († ок. 1523)

Игна́тия Прилу́цкаго († 1523)

Фили́ппа Ира́пскаго († 1527)

Феогно́ста Перемы́шльскаго († 1530)

Кири́лла Новоезе́рскаго († 1532)

Ону́фрия Катро́мскаго († ок. 1532)

Мака́рия Ореде́жскаго († 1532)

Алекса́ндра Сви́рскаго († 1533)

Игна́тия, Леони́да, Диони́сия, Фео́дора, Ферапо́нта, Корни́лия и Афана́сия Остро́вских (XVI)

Ио́ны Климене́цкаго († 1534)

Корни́лия († 1537), Кассиа́на († 1537) и Лавре́нтия († 1548) Ко́мельских

Ло́нгина Коря́жемскаго († 1540)

Дании́ла Переясла́вскаго († 1540)

Иродио́на Илоезе́рскаго († 1541)

Стефа́на Озе́рскаго, Ко́мельскаго († 1542) Иоа́нна и Ло́нгина Я́ренгских († ок. 1544–1545)

Леони́да Пошехо́нскаго († 1549)

Киприа́на Тро́пскаго, Яросла́вскаго († сер. XVI)

Зоси́мы Ворбозо́мскаго († ок. 1550)

Арсе́ния Ко́мельскаго († 1550)

Иоаки́ма Опо́чскаго († ок.1550)

Ни́фонта Теле́говскаго, У́стюжскаго († 1553)

Гера́сима Бо́лдинскаго († 1554)

Арка́дия Дорогобу́жскаго (XVI)

Ни́ла Столобе́нскаго († 1554)

Макси́ма Гре́ка († 1556)

Анто́ния Си́йскаго († 1556)

Алекса́ндра, Иоаки́ма и Илии́ Си́йских (XVI)

Ники́фора Важеозе́рскаго († 1557)

Вассиа́на и Ио́ны Пертоми́нских († 1561)

Си́мона Со́йгинскаго († 1562)

Ио́ны и Некта́рия Каза́нских († после 1563)

Генна́дия Костромска́го и Любимогра́дскаго († 1565)

Ни́фонта Кожеезе́рскаго († 1565)

Иоаса́фа, затво́рника Нижегоро́дскаго († 1567)

Дими́трия и́нока, Нижегоро́дскаго

Феодо́сия То́темскаго († 1568)

Зино́вия О́тенскаго († 1568)

Арсе́ния Новгоро́дскаго († 1570)

Феодори́та, просвети́теля Ко́льскаго († 1571)

Христофо́ра Сольвычего́дскаго († ок. 1572–1582)

Кири́лла Астраха́нскаго († ок. 1576)

Афана́сия Ся́нжемскаго († после 1577)

Ана́нии иконопи́сца, Новгоро́дскаго († 1581)

Ни́кона и Диони́сия Новгоро́дских

Ника́ндра Пско́вскаго († 1581)

Три́фона Пече́нгскаго, просвети́теля Ко́льскаго († 1583)

Варлаа́ма, игу́мена Ма́хрищскаго, епи́скопа Су́ждальскаго († 1585)

Се́ргия Малопи́нежскаго († 1585)

Ио́ны Яшезе́рскаго († ок. 1589–1592)

Игна́тия († 1591) и Исаа́кия (XVI–XVII) Ло́мских, Яросла́вских

Ону́фрия Ма́льскаго, Пско́вскаго († 1592)

Серапио́на Избо́рскаго, Пско́вскаго (XVI)

Про́хора и Вассиа́на Я́стребских, Влади́мирских († 1592)

Стефа́на Гуси́нскаго

Ферапо́нта Мо́нзенскаго († 1597)

Киприа́на Стороже́нскаго († после 1598)

Анто́ния Черноезе́рскаго (XVI)

Кири́лла Сы́рьинскаго (XVI)

Ни́кона, Васи́лия и Ти́хона Соколо́вских, И́стринских (XVI)

Ти́хона Караче́вскаго (XVI)

Дании́ла Шу́жгорскаго (XVI)

Харито́на Куди́нскаго (XVI)

Варлаа́ма Ке́ретскаго (XVI)

Афана́сия На́волоцкаго (XVI–XVII)

Мака́рия Ри́млянина, Новгоро́дскаго (XVI–XVII)

Ксенофо́нта Тута́нскаго, Тверска́го (кон. XVI – нач. XVII)

Вике́нтия Волого́дскаго (XVI–XVII)

Петра́, иере́я Черевко́вскаго, Сольвычего́дскаго (XVI–XVII)

Ника́ндра Городноезе́рскаго (XVI–XVII)

Пафну́тия Балахни́нскаго (XVI–XVII)

Марти́рия Зелене́цкаго († 1603)

Гу́рия Ша́лацкаго († ок. 1603)

Се́ргия Шухто́мскаго († 1609)

Адриа́на Мо́нзенскаго († 1610)

Феодо́сия тру́дника, Мо́нзенскаго (XVI–XVII)

Стефа́на Костромска́го (XVII)

Серапио́на Кожеезе́рскаго († 1611)

Корни́лия (XVI), Ло́нгина, Ге́рмана и Боголе́па (XVI–XVII) Кожеезе́рских

Анто́ния Леохно́вскаго († 1611)

Ио́сифа († 1612), Анто́ния и Иоанни́кия (нач. XVII) Заони́киевских

Авраа́мия, игу́мена Спа́сскаго, Коря́жемскаго (нач. XVII)

Три́фона Вя́тскаго († 1612)

Анто́ния Солове́цкаго († 1613)

Иа́кова Солове́цкаго, Костромска́го († 1614)

Ге́рмана Столобе́нскаго († 1614)

Ирина́рха, затво́рника Росто́вскаго († 1616)

Иоа́нна, затво́рника Пско́вскаго († 1616)

Полика́рпа Бря́нскаго († ок. 1620–1621)

Ирина́рха пономаря́, Ра́донежскаго († 1621)

Дорофе́я книгохрани́теля, Ра́донежскаго († 1622)

Дорофе́я († 1622) и Иларио́на (XVII) Ю́гских

Иоа́нна, тру́дника Каргопо́льскаго, Власа́таго (в и́ночестве Ио́ны; † 1622)

Мака́рия Жабы́нскаго, Беле́вскаго († 1623)

Вассиа́на Ти́ксненскаго († 1624)

Ирина́рха Солове́цкаго († 1628)

Ма́рка Бела́винскаго († ок. 1630)

Диони́сия Ра́донежскаго († 1633)

Диодо́ра († 1633) и Про́хора (Порфи́рия; сер. XVII), Юрьего́рских

Андре́я, пусты́нника Солове́цкаго († 1606)

Ники́фора новгоро́дца, пусты́нника Солове́цкаго († 1617)

Мисаи́ла иеромона́ха, пусты́нника Солове́цкаго († ок. 1617)

Адриа́на, пусты́нника Солове́цкаго († ок. 1632)

Не́стора, пусты́нника Солове́цкаго († ок. 1632)

Тимофе́я але́ксинца (в схи́ме Фео́дора), пусты́нника Солове́цкаго († 1634)

Са́ввы, пусты́нника Солове́цкаго († 1636)

Ефре́ма Че́рнаго, пусты́нника Солове́цкаго (сер. XVII)

Алекси́я калужа́нина, пусты́нника Солове́цкаго (сер. XVII)

Ио́сифа I, пусты́нника Солове́цкаго (сер. XVII)

Ти́хона москвитя́нина, пусты́нника Солове́цкаго (сер. XVII)

Феоду́ла ряза́нца, пусты́нника Солове́цкаго (сер. XVII)

Три́фона, пусты́нника Солове́цкаго (сер. XVII)

Ио́сифа II млада́го, пусты́нника Солове́цкаго (сер. XVII)

Севастиа́на, пусты́нника Солове́цкаго (сер. XVII)

Гу́рия, и́нока чу́днаго, Солове́цкаго (сер. XVII)

Ки́рика (Кириа́ка), больни́чнаго ста́рца, пусты́нника Солове́цкаго (сер. XVII)

Кассиа́на Муезе́рскаго, Солове́цкаго

Авксе́нтия, А́ксия и Тара́сия, и́ноков Солове́цких, Кашка́ренских

Анто́ния Ке́нскаго, Кожеезе́рскаго (в схи́ме Авраа́мия; † 1634)

Никоди́ма Кожеезе́рскаго († 1640)

Мака́рия Холмого́рскаго, Красного́рскаго († 1640)

Евфроси́на Ку́ржескаго, Каргопо́льскаго († ок. 1641–1652)

Анто́ния Краснохо́лмскаго († 1642)

Диони́сия Переясла́вскаго († 1645)

Иоаки́ма Ша́ртомскаго (сер. XVII)

Далма́та Пе́рмскаго († после 1646)

Генна́дия иконопи́сца, Черни́говскаго (сер. XVII)

И́ова Поча́евскаго († 1651)

Леони́да Устьнеду́мскаго († 1654)

Лукиа́на Алекса́ндровскаго († 1654)

Елеаза́ра А́нзерскаго († 1656)

Фили́ппа Су́хонскаго († 1662)

Ти́хона Крестого́рскаго, Во́хмовскаго († ок. 1679–1690)

Корни́лия Алекса́ндровскаго († 1681)

Мака́рия Высокоезе́рскаго († 1683)

Мака́рия Меню́жскаго († ок. 1684)

Феодо́сия Си́йскаго († 1687)

Иса́ии и Никано́ра Си́йских, Ручье́вских (XVI–XVII)

Авраа́мия игу́мена Богоро́дицкаго, Пи́нежскаго

Корни́лия Переясла́вскаго († 1693)

Кири́лла, схимона́ха Борисогле́бскаго

Пи́мена, затво́рника и вери́жника Росто́вскаго (XVII)

Ка́рпа Моско́вскаго,

Ти́та, пусты́нника Ю́рьевскаго, Пово́лжскаго

Зоси́мы Алекса́ндровскаго († ок. 1713)

И́ова А́нзерскаго (в схи́ме Иису́са; † 1720)

Сине́сия схиархимандри́та, Сиби́рскаго († 1787)

Мисаи́ла, иеромона́ха Абала́цкаго († 1797)

Андре́я игу́мена Рафаи́ловскаго, Тобо́льскаго († 1820)

Серафи́ма Саро́вскаго († 1833)

Ге́рмана Аля́скинскаго († 1837)

Дании́ла А́чинскаго, Сиби́рскаго († 1843)

Варлаа́ма, пусты́нника Чико́йскаго, Сиби́рскаго († 1846)

Макария миссионера Алтайскаго († 1847)

Аре́фы Верхоту́рскаго, Сиби́рскаго († 1915)

Преподобных жен и матерей

Анны, княжны́ Ки́евския († 1112)

Евфроси́нии игу́мении, По́лоцкия († 1173)

Евпра́ксии, княги́ни Пско́вския († 1243)

Евфроси́нии, княжны́ Су́ждальския († 1250)

Харити́ны, княжны́ Лито́вския († 1281)

Параске́вы, игу́мении Рже́вския (до XVI)

Софи́и, вели́кия княги́ни Моско́вския, Су́ждальския († 1542)

Елены игу́мении, Моско́вския († 1548)

Иулиани́и де́вы, Ольша́нския († ок. 1550)

Софи́и княжны́, Слу́цкия († 1612)

и всех про́чих преподо́бных оте́ц и ма́терей, в по́двизех по́стнических просия́вших

Святы́х и добропобе́дных му́чеников Росси́йских

Фео́дора варя́га и сы́на его́ Иоа́нна, Ки́евских († 983)

Гео́ргия о́трока († 1015)

Авраа́мия Бо́лгарскаго, Влади́мирскаго († 1229)

Мерку́рия Смоле́нскаго († 1238)

Фео́дора фило́софа, Ка́мскаго († 1323)

Анто́ния, Иоа́нна и Евста́фия Лито́вских († 1347)

Иоа́нна Каза́нскаго († 1529)

Стефа́на и Петра́ Каза́нских († 1552)

Бори́са, Иа́кова, Фео́дора, Сильва́на, Фео́дора, Васи́лия, Фео́дора, Дими́трия, Михаи́ла, Иоа́нна и Васи́лия Каза́нских (XVI)

Симео́на, Киприа́на, Ио́сифа, Васи́лия и и́же с ни́ми, Ирге́нских, Сиби́рских (сер. XVII)

Па́вла Ру́сскаго († 1683)

Гаврии́ла младе́нца, Белосто́кскаго († 1690)

Па́вла Ви́ленскаго (XVII)

Евста́фия о́трока, Кры́мскаго († 1752)

Пахо́мия Ру́сскаго, Афо́нскаго († 1780)

и всех про́чих Росси́йских му́чеников и му́чениц, за ве́ру во Христа́ и благоче́стие страда́ния претерпе́вших

Святы́х священному́чеников Росси́йских

Ку́кши, просвети́теля вя́тичей, Ки́ево-Пече́рскаго († после 1114)

Митрофа́на архиепи́скопа, Пахо́мия архимандри́та, Дании́ла игу́мена и Феодо́сия игу́мена, Влади́мирских († 1238)

Симео́на, епи́скопа Переясла́вскаго († 1239)

Лукиа́на Ки́ево-Пече́рскаго († 1243)

Анфи́ма, епи́скопа Са́рскаго

Патри́кия иере́я, Влади́мирскаго († 1411)

Гера́сима, епи́скопа Великопе́рмскаго († 1441)

Питири́ма, епи́скопа Великопе́рмскаго († 1456)

Иси́дора пресви́тера и и́же с ним седми́десяти двух святы́х му́чеников, Ю́рьевских († 1472)

Мака́рия, митрополи́та Ки́евскаго и всея́ Руси́ и и́же с ним († 1497)

Феокти́ста, архиепи́скопа Тверска́го († 1609)

Ермоге́на, Святе́йшаго Патриа́рха Моско́вскаго и всея́ Руси́ († 1612)

Мисаи́ла, архиепи́скопа Ря́занскаго († 1655)

Ио́сифа, митрополи́та Астраха́нскаго († 1672)

Ники́фора иеромона́ха, Кры́мскаго († 1730)

Конста́нция Ру́сскаго († 1743)

Ники́ты славяни́на, иеромона́ха Пантелеи́монова монастыря́, Афо́нскаго († 1808)

и всех про́чих святы́х священному́чеников Росси́йских, за ве́ру во Христа́ и Це́рковь Христо́ву страда́ния претерпе́вших

Святы́х преподобному́чеников Росси́йских

Моисе́я У́грина, Ки́ево-Пече́рскаго († ок. 1031–1043)

Григо́рия чудотво́рца, Ки́ево-Пече́рскаго († 1093)

Евстра́тия Ки́ево-Пече́рскаго († 1097)

Кли́мента, игу́мена Ки́ево-Зверине́цкаго, и и́же с ним († ок. 1097)

Фео́дора и Васи́лия Ки́ево-Пече́рских († 1098)

Анаста́сия диа́кона, Ки́ево-Пече́рскаго (XII)

Иоаса́фа Снетого́рскаго и Васи́лия Миро́жскаго и с ни́ми Ио́сифа и Константи́на пресви́теров, Пско́вских († 1299)

Григо́рия и Кассиа́на Авне́жских († 1392)

Анто́ния, и́нока Чу́довскаго, Моско́вскаго († 1451)

Са́ввы и Вениами́на, игу́менов Железнобо́ровских (XV)

Ефре́ма, Диони́сия, Иерони́ма и Исаа́кия Обно́рских (XVI)

Адриа́на Ондру́совскаго († 1549)

Адриа́на Пошехо́нскаго († 1550)

Корни́лия и ученика́ его́ Вассиа́на Пско́во-Пече́рских († 1570)

Гела́сия игу́мена, Новгоро́дскаго († 1570)

Агапи́та Маркуше́вскаго († 1584)

Ио́ны, Гу́рия и Ге́рмана Пече́нгских, Ко́льских († 1590)

Григо́рия священнои́нока (до XVII)

Дании́ла, игу́мена Грехозару́цкаго, и с ним три́десяти преподобному́чеников и двухсо́т му́чеников миря́н, У́глечских († 1608)

Константи́на, игу́мена Новото́ржскаго с бра́тиею († 1609)

Анастаси́и игу́мении и с нею три́десяти пяти́ сесте́р мона́хинь, У́глечских († 1609)

Анто́ния игу́мена Покро́вскаго, Гера́сима архимандри́та, Евфи́мия и Варсоно́фия священнои́ноков и бра́тий и́ноков Мака́рия, Матфи́я, Вассиа́на, Гу́рия, И́ова, Иларио́на, И́ова, Ака́кия, Ону́фрия, Ио́сифа, Геро́нтия, Лео́нтия, Ти́хона, Филаре́та, Гела́сия, Ио́сифа, Вассиа́на, Христофо́ра, Серапио́на, Ге́рмана, Марке́лла, Ники́ты, Арсе́ния, Феодо́сия, Ио́ны, Иу́ды, Симео́на, Михаи́ла, Иоа́нна, Мака́рия, Ма́манта, Григо́рия, Ники́фора, Иларио́на, Афана́сия, Полие́вкта, Космы́ и с ни́ми ты́сячи му́чеников миря́н, У́глечских († 1609)

Иоаса́фа Бо́ровскаго, архимандри́та Тро́ицкаго, с бра́тиею († 1610)

Евфроси́на Синоезе́рскаго († 1612)

Галактио́на Волого́дскаго († 1612)

И́ова Уще́льскаго († 1628)

Си́мона Во́ломскаго († 1641)

Афана́сия Бре́стскаго († 1648)

Мака́рия Кане́вскаго, архимандри́та О́вручскаго († 1678)

и всех про́чих святы́х преподобному́чеников и преподобному́чениц Росси́йских, за ве́ру во Христа́, оте́чество и благоче́стие страда́ния претерпе́вших

Святы́х блаже́нных, Христа́ ра́ди юро́дивых и чудотво́рцев Росси́йских

Проко́пия У́стюжскаго († 1303)

Заха́рии иере́я († 1325)

Фео́дора Новгоро́дскаго († 1392)

Никола́я Коча́нова, Новгоро́дскаго († 1392)

Гео́ргия Новгоро́дскаго

Макси́ма Моско́вскаго († 1434)

Гео́ргия Шенку́рскаго († ок. 1462)

Иси́дора Твердисло́ва, Росто́вскаго († 1474)

Лео́нтия У́стюжскаго († после 1492)

Иоа́нна У́стюжскаго († 1494)

Кири́лла Ве́льскаго (XV)

Васи́лия Ка́менскаго (XV)

Трофи́ма Су́ждальскаго (XV–XVI)

Лавре́нтия Калу́жскаго († 1515)

Се́ргия схимона́ха, Переясла́вскаго (1 пол. XVI)

Васи́лия Моско́вскаго († 1557)

Тимофе́я Опо́чскаго, Пско́вскаго († ок. 1569)

Никола́я Са́лоса, Пско́вскаго († 1576)

Иоа́нна Ми́лостиваго, Власа́таго, Росто́вскаго († 1580)

Парфе́ния Су́ждальскаго (2 пол. XVI)

Си́мона Ю́рьевецкаго († 1584)

Иоа́нна, Большо́й колпа́к, Моско́вскаго († 1589)

Стефа́на Росто́вскаго († после 1592)

Константи́на Новото́ржскаго (XVI)

Иоа́нна Можа́йскаго (XVI–XVII)

Иа́кова тру́дника, Моско́вскаго (XVI–XVII)

Фео́дора († 1600)

Киприа́на Су́ждальскаго († 1622)

Проко́пия Вя́тскаго († 1627)

Марфы Моско́вския († 1638)

Илии́ Дани́ловскаго, Яросла́вского (1 пол. XVII)

Иоа́нна I и Иоа́нна II, Солове́цких (сер. XVII)

Макси́ма иере́я пра́веднаго, То́темскаго († 1650)

Фомы́, Иродио́на, Михаи́ла († до 1669), Иоа́нна († 1669) и Васи́лия (XVII) Сольвычего́дских

Андре́я То́темскаго († 1673)

Афана́сия Росто́вскаго (XVII)

Ону́фрия Рома́новскаго, Яросла́вского

Киприа́на Кара́чевскаго

Иоа́нна Верхоту́рскаго, Сиби́рскаго († 1701)

Космы́ Верхоту́рскаго, Сиби́рскаго († 1706)

Евдоки́и Су́ждальския († 1776)

До́мны ста́рицы, То́мския, Сиби́рския († 1872)

и всех про́чих святы́х блаже́нных оте́ц и ма́терей Росси́йских, Христа́ ра́ди в по́двизех юро́дства просия́вших

Святы́х пра́ведных оте́ц и ма́терей Росси́йских

Иоа́нна и Мари́и У́стюжских († после 1262)

Иулиани́и Новгоро́дския (XIV)

Васи́лия и Ири́ны Ка́шинских († ок. 1420)

Се́ргия и Варва́ры Сви́рских († после 1474)

Фе́клы Переясла́вския (кон. XV)

Глике́рии де́вы, Новгоро́дския († ок. 1522)

Иа́кова Борови́чскаго († до 1540)

Арте́мия, о́трока Верко́льскаго († 1545), и сестры́ его́ Параске́вы Пири́минския (XVI)

Варсоно́фии Моско́вския (1 пол. XVI)

Пелаги́и Рже́вския (сер. XVI)

Иа́кова и Иоа́нна, о́троков Меню́жских († ок. 1566–1569)

Са́ввы иере́я, Мошо́кскаго, Влади́мирскаго († 1592)

Гаврии́ла и Анастаси́и, Васи́левских, Влади́мирских (XVI–XVII)

Васи́лия му́ченика, Мангазе́йскаго, Сиби́рскаго († 1602)

Иулиани́и ми́лостивыя († 1604), Гео́ргия (XVII) и и́нокини Феодо́сии (XVII) Ла́заревских, Му́ромских

Симео́на Верхоту́рскаго, Сиби́рскаго († 1642)

Иоа́нна младе́нца му́ченика, У́глечскаго († 1663)

Боголе́па о́трока-схимона́ха, Черноя́рскаго († 1667)

Ка́рпа Медуше́вскаго Ковро́вскаго (XVII)

Проко́пия Устья́нскаго (XVII)

Григо́рия иере́я, Дими́трия, Арте́мия и Евфроси́нии, Шу́йских, Влади́мирских

Иулиани́и Сольвычего́дския

Параске́вы Кевро́льския, Арха́нгельския (кон. XVII – нач. XVIII)

Иоа́нна испове́дника, Ру́сскаго († 1730)

Петра́ о́трока, То́мскаго, Сиби́рскаго († 1820)

Фео́дора То́мскаго, Сиби́рскаго († 1864)

Стефа́на О́мскаго, Сиби́рскаго († 1876)

и всех про́чих оте́ц, бра́тий, жен, ма́терей и сесте́р Росси́йских, Христа́ ра́ди во благоче́стии и пра́ведности подвиза́вшихся

и всех про́чих святы́х, в земли́ Росси́йстей просия́вших, и́хже имена́ Ты Сам, Го́споди, ве́си,

святы́х пра́ведных Богооте́ц Иоаки́ма и А́нны и всех святы́х Твои́х, благоприя́тну сотвори́ моли́тву на́шу, да́руй нам оставле́ние прегреше́ний на́ших, покры́й нас кро́вом крилу́ Твое́ю, отжени́ от нас вся́каго врага́ и супоста́та, умири́ на́шу жизнь, Го́споди, поми́луй нас и мир Твой и спаси́ ду́ши на́ша, я́ко Благ и Человеколю́бец.

И вхо́дим в храм, пою́ще стихи́ры стихо́вны воскре́сны, 1-го гла́са: Сла́ва, святы́х, глас 2: Но́вый до́ме: И ны́не, Богоро́дичен, глас то́йже: Вы́шнии ли́цы: Или́ ин Богоро́дичен, глас 8: О, пресла́внаго чудесе́! Небесе́ и земли́ Цари́ца:

На благослове́нии хле́бов Богоро́дице Де́во: два́жды и тропа́рь святы́х, глас 8: Я́коже плод: еди́ножды.

На утре́ни. На Бог Госпо́дь: тропа́рь воскре́сен еди́ножды и святы́х тропа́рь, глас 8: Я́коже плод: еди́ножды: Сла́ва, ин тропа́рь святы́х, глас 4: Иерусали́ма Вы́шняго:И ны́не, Богоро́дичен, глас то́йже: Днесь све́тло красу́ется:

По 1-м и 2-м стихосло́виих седа́льны воскре́сны 1-го гла́са со стихи́ их. По полиеле́и велича́ния Пресвяте́й Тро́ице и Богоро́дице. Псало́м избра́нный Бла́го есть: и припева́ем ко стихо́м его́ велича́ние святы́м. Посе́м, не пе́вше Сла́ва, и ны́не: тропари́ воскре́сныя по непоро́чных: А́нгельский собо́р: Ипакои́ воскре́сен 1-го гла́са и и́ны седа́льны святы́х 1-го и 2-го стихосло́вий без Богоро́дичнов, и пе́рвый седа́лен святы́х по полиеле́и. Сла́ва, ин седа́лен святы́х по полиеле́и. И ны́не, Богоро́дичен его́.

Степе́нна воскре́сна 1-го гла́са. Проки́мен воскре́сный, глас 1: Ны́не воскресну́: Ева́нгелие воскре́сное 2-е, от Ма́рка, зача́ло 70. Воскресе́ние Христо́во: По 50-м псалме́ стихи́ра, глас 6: Воскре́с Иису́с:

А́ще храм Всех ру́сских святы́х. Степе́нна воскре́сна 1-го гла́са.⁹¹ Проки́мен святы́х, глас 4: Ра́дуйтеся, пра́веднии, о Го́споде, / пра́вым подоба́ет похвала́. Стих: Бу́ди, Го́споди, ми́лость Твоя́ на нас, я́коже упова́хом на Тя. Вся́кое дыха́ние: Ева́нгелие хра́ма Всех ру́сских святы́х, от Матфе́я, зача́ло 10. Воскресе́ние Христо́во: Псало́м 50. Сла́ва: Моли́твами всех святы́х русских: И ны́не: Моли́твами Богоро́дицы: По 50-м псалме́ стихи́ра святы́х, глас 6: Ежеле́тнюю па́мять: Посе́м глаго́лет диа́кон моли́тву Спаси́, Бо́же, лю́ди Твоя́: (зри уста́в выше, на лити́и).

Кано́н воскре́сен Окто́иха 1-го гла́са со ирмосо́м на 4, и кано́н Богоро́дице воскре́сный 1-го гла́са на 2, и кано́н Всех ру́сских святы́х, глас 8, на 8. Катава́сия: Отве́рзу уста́ моя́: По 3-й пе́сни конда́к, и́кос и седа́лен с Богоро́дичном его́ святы́х. По 6-й пе́сни конда́к и и́кос воскре́сен. По 9-й песни Свят Госпо́дь: Свети́лен воскре́сен. Сла́ва, святы́х. И ны́не, Богоро́дичен его́.

На хвали́тех стихи́ры на 8, воскре́сны 4, глас 1 и святы́х 4 со сла́вником, со стихи́ от стихо́вны ма́лыя вече́рни. Сла́ва, стихи́ра Ева́нгельская, втора́я. И ны́не, глас 2: Преблагослове́нна еси́, Богоро́дице Де́во: По вели́ком славосло́вии тропа́рь воскре́сен то́чию: Днесь спасе́ние ми́ру бысть: Ектения́ и отпу́ст, на не́мже помина́ем: свята́го равноапо́стольнаго вели́каго кня́зя Влади́мира и всех про́чих чудотво́рцев, в земли́ Росси́йстей просия́вших: И пое́м многоле́тны.

Посе́м обы́чное исхожде́ние. Пое́мым же стихи́рам хра́ма Всех ру́сских святы́х на осмь гласо́в, кади́т предстоя́тель ико́ну пра́здника и быва́ет пома́зание от лампа́ды святы́м еле́ем. По пома́зании же святы́м еле́ем глаго́лет предстоя́тель: Мир всем. Лик: И ду́хови твоему́. Диа́кон: Главы́ на́ша Го́сподеви прикло́ним. Лик: Тебе́, Го́споди. И чтет предстоя́тель моли́тву: Влады́ко, Многоми́лостиве: кра́тко, присовокупля́я то́кмо: свята́го равноапо́стольнаго вели́каго кня́зя Влади́мира и всех про́чих чудотво́рцев, в земли́ Росси́йстей просия́вших, и́хже па́мять соверша́ем ны́не: Оглаше́ние Студи́тово: Тропа́рь преподо́бному Фео́дору и час 1-й.

На часе́х тропа́рь воскре́сен. Сла́ва, святы́х тропари́ 8-го и 4-го гласо́в, пременя́юще глаго́лем. Конда́к на 1-м и 6-м часех воскре́сен, на 3-м и 9-м часе́х конда́к святы́х.

На Литурги́и. Блаже́нны воскре́сны 1-го гла́са на 6, начиная от: Блаже́ни кро́тцыи: и святы́х блаже́нны на 4, глас 8, от: Блаже́ни есте́, егда́ поно́сят вам:

По вхо́де. Тропа́рь воскре́сен, глас 1, и святы́х о́ба тропаря́ 8-го и 4-го гласо́в. Конда́к воскре́сен, глас 1. Сла́ва, конда́к святы́х, глас 3. И ны́не, конда́к Успе́ния Богоро́дицы, глас 2: В моли́твах: Проки́мен воскре́сен, глас 1: Бу́ди, Го́споди, ми́лость Твоя́ на нас, / я́коже упова́хом на Тя. Стих: Ра́дуйтеся, пра́веднии, о Го́споде, пра́вым подоба́ет похвала́. Проки́мен святы́х, глас 4: Святы́м, и́же суть на земли́ Его́, / удиви́ Госпо́дь вся хоте́ния Своя́ в них. Стих: Сохрани́ мя, Го́споди, я́ко на Тя упова́х.⁹² Апо́стол воскре́сен к Ри́мляном, зача́ло 81 от полу́, и святы́х апо́стол к Колосса́ем, зача́ло 256 от полу. Аллилу́ия, глас 1. Стих: Бог дая́й отмще́ние мне, и покори́вый лю́ди под мя. Стих 2: Велича́яй спасе́ния царе́ва, и творя́й ми́лость Христу́ Своему́ Дави́ду, и се́мени его́ до ве́ка. И святы́х, глас 4. Стих: Бо́же, уши́ма на́шима услы́шахом, и отцы́ на́ши возвести́ша нам. Стих 2: Спасл еси́ нас от стужа́ющих нам и ненави́дящих нас посрами́л еси́. Ева́нгелие воскре́сное от Матфе́я, зача́ло 9 и святы́х Ева́нгелие от Луки́, зача́ло 67.⁹³ Прича́стен воскре́сен: Хвали́те Го́спода с Небе́с, хвали́те Его́ в вы́шних. И святы́х: Благоволи́т Госпо́дь в лю́дех Свои́х и вознесе́т кро́ткия во спасе́ние.

По заамво́нной моли́тве исхо́дим ко ико́не пра́здника, пою́ще тропа́рь святы́х, глас 8. Сла́ва, конда́к святы́х, глас 3. И ны́не, Богоро́дичен, глас 3. Посе́м чте́тся моли́тва на благослове́ние ко́лива, в честь и па́мять всех святы́х, в земли́ Росси́йстей просия́вших. И моли́тва ко всем святы́м земли́ Ру́сския. По моли́тве пое́м велича́ния Пресвяте́й Тро́ице, Богоро́дице и святы́м. Бу́ди И́мя Госпо́дне: Псало́м 33 и про́чее Литурги́и. Отпу́ст, на не́мже помина́ем: свята́го равноапо́стольнаго вели́каго кня́зя Влади́мира и всех про́чих чудотво́рцев, в земли́ Росси́йстей просия́вших:

По отпу́сте Литурги́и быва́ет многоле́тие и присоединя́ем проше́ние сие́:

Христиа́нскаго благоче́стия ревни́телем / и защи́тником Христо́вы Це́ркве / и всем правосла́вным христиа́ном / пода́ждь, Го́споди, тишину́ и благоде́нствие, и изоби́лие плодо́в земны́х, / и мно́гая ле́та.

И по многоле́тии пое́м стихи́.

Об отда́нии пра́здника хра́ма Всех святы́х, в земли́ Росси́йстей просия́вших⁹⁴

В ве́чер же дне того́ быва́ет отда́ние пра́здника сего́ по чи́ну отда́ния пра́здника святы́х отце́в Пе́рваго Вселе́нскаго Собо́ра в неде́лю 7-ю по Па́сце. К вече́рни трезво́н без больша́го. На вече́рни кафи́змы не стихосло́вим. На Го́споди, воззва́х: стихи́ры святы́х 3 от малы́я вече́рни. глас 4: Я́ко избра́нных от люде́й ру́сских: Ве́ры броня́ми: Я́ко зве́зды многосве́тлыя: (зри вы́ше). И свята́го Мине́и стихи́ры 3. Сла́ва, святы́х, глас 1: Весели́ся о Го́споде, Русь Правосла́вная: (зри вы́ше). И ны́не, Богоро́дичен догма́тик, глас то́йже: Всеми́рную сла́ву: Вхо́да несть. Проки́мен дне. Сподо́би, Го́споди: Ектения́ проси́тельная. И стихи́ры святы́х на стихо́вне от ма́лыя вече́рни, глас 8: О, пресла́внаго чудесе́! На Небеси́: О, пресла́внаго чудесе́! Чуде́с: О, пресла́внаго чудесе́! Христа́ ра́ди: (зри вы́ше). Сла́ва, глас 6: Ежеле́тнюю па́мять днесь (зри вы́ше). И ны́не, Богоро́дичен, глас 5: Востру́бим трубо́ю: (зри вы́ше). По трисвято́м тропа́рь святы́х, глас 8: Я́коже плод: (зри вы́ше). Сла́ва, тропа́рь свята́го из Мине́и. И ны́не, Богоро́дичен, глас 4: Днесь све́тло красу́ется: (зри вы́ше). Ектения́ сугу́бая и отпу́ст, на не́мже помина́ем свята́го равноапо́стольнаго вели́каго кня́зя Влади́мира (и свята́го, и́мярек, а́ще бу́дет нау́трие па́мять ру́сскаго свята́го) и всех про́чих чудотво́рцев, в земли́ Росси́йстей просия́вших, свята́го (и́мярек вселе́нскаго свята́го, его́же па́мять бу́дет нау́трие).

А́ще нау́трие пра́здника в понеде́льник бу́дет два⁹⁵ святы́х, на вече́рни пое́м стихи́ры единаго святаго, друга́го же святаго пое́м стихи́ры на у́трени на хвали́тех. А́ще же бу́дет святы́й, име́яй славосло́вие или́ полиеле́й, и тогда́ слу́жбу сих святы́х со славосло́вием пое́м во ин день, или́ же, а́ще неудо́бь перенести́ сие́ пра́зднование на ин день, отда́ния хра́ма не быва́ет.

В хра́ме Всех ру́сских святы́х, иде́же по уста́ву пое́тся⁹⁶ кано́н хра́ма, я́коже в суббо́ту на у́трени, егда́ несть пра́зднуемаго свята́го, пое́м кано́н святы́х, и́же на моле́бном пе́нии поло́жен (зри вы́ше).

Уста́в соверше́ния Слу́жбы Всем святы́м, в земли́ Росси́йстей просия́вшим, во ин день

На ма́лой вече́рни. На Го́споди, воззва́х: стихи́ры святы́х на 4, глас 8, повторя́юще пе́рвую стихи́ру два́жды. Сла́ва, святы́х, глас 4. И ны́не, Богоро́дичен, глас то́йже: Богоро́дице, всех Цари́це: На стихо́вне стихи́ры святы́х, глас 8. Сла́ва, глас 1. И ны́не, глас 5: Востру́бим трубо́ю: Или́ Богоро́дичен, глас 8: О, пресла́внаго чудесе́! Небесе́ и земли́ Цари́ца: (зри вы́ше, на стихо́вне вели́цей вече́рни). По Ны́не отпуща́еши: тропа́рь святы́х, глас 8: Я́коже плод: Сла́ва, и ны́не, Богоро́дичен, глас 4: Засту́пнице усе́рдная: Ектения́ и отпу́ст.

По отпу́сте ма́лыя вече́рни соверша́ем после́дование моле́бнаго пе́ния (зри поря́док соверше́ния его́ во уста́ве неде́ли 2-й по Пятидеся́тнице, вы́ше).

На вели́цей вече́рни. Блаже́н муж: 1-й антифо́н. На Го́споди, воззва́х: стихи́ры святы́х на 8, повторя́юще пе́рвую два́жды. Сла́ва, глас 1: Весели́ся о Го́споде: И ны́не: Всеми́рную сла́ву: Вход, проки́мен дне. И чте́ния три. На лити́и стихи́ры вси святы́х. Моли́твы Спаси́, Бо́же: и Влады́ко Многоми́лостиве: (зри вы́ше, во уста́ве Неде́ли 2-й по Пятидеся́тнице). На стихо́вне стихи́ры святы́х, глас 2. Сла́ва, святы́х, глас 2. И ны́не, Богоро́дичен, глас то́йже. Или́ ин Богоро́дичен, глас 8: О, пресла́внаго чудесе́! Небесе́ и земли́ Цари́ца: На благослове́нии хле́бов тропа́рь святы́х, глас 8: Я́коже плод: два́жды. И Богоро́дице Де́во: еди́ножды.

На у́трени. На Бог Госпо́дь: тропа́рь святы́х, глас 8: Я́коже плод: два́жды. Сла́ва, ин тропа́рь святы́х, глас 4: Иерусали́ма Вы́шняго: И ны́не, Богоро́дичен: Днесь све́тло красу́ется:

По 1-м и 2-м стихосло́виих седа́льны святых с Богородичны их.

По полиеле́и велича́ние Пресвяте́й Тро́ице:

Велича́ем Тя, / Триипоста́сный Влады́ко, / ве́рою правосла́вною зе́млю Ру́сскую озари́вшаго / и святы́х сро́дников на́ших / сонм ве́лий в ней просла́вльшаго.

Посе́м пое́м на о́ба ли́ка псало́м избра́нный: Воскли́кните Го́сподеви: и припева́ем к стиха́м сего́ псалма́, ко всем или́ то́кмо к не́которым, я́коже указа́ся, велича́ние святы́м:

Ублажа́ем вас, / чудотво́рцы на́ши сла́внии, / зе́млю Ру́сскую доброде́тельми ва́шими озари́вшии / и о́браз спасе́ния нам / светоявле́нно показа́вшии.

Псало́м избра́нный, пое́мый во ин день

1 лик:⁹⁷Воскли́кните Го́сподеви, вся земля́, по́йте же И́мени Его́, дади́те сла́ву хвале́ Его́. / Ублажа́ем вас:

2 лик: Я́ко Бог ве́лий Госпо́дь и Царь ве́лий по всей земли́, я́ко в руце́ Его́ вси концы́ земли́ и высоты́ гор Того́ суть.

1. Прииди́те, поклони́мся и припаде́м Ему́ и воспла́чемся пред Го́сподем, сотво́ршим нас.

2. Бо́же, уши́ма на́шима услы́шахом и отцы́ на́ши возвести́ша нам де́ло, е́же соде́лал еси́ во днех их, во днех дре́вних.

1. Отве́рзу в при́тчах уста́ моя́, провеща́ю гана́ния испе́рва.

2. Ели́ка слы́шахом и позна́хом я́ и отцы́ на́ши пове́даша нам.

1. Не утаи́шася от чад их в род ин, возвеща́юще хвалы́ Госпо́дни и си́лы Его́, и чудеса́ Его́, я́же сотвори́.

2. Го́споди Бо́же наш, Ты послу́шал еси́ их, Бо́же, Ты ми́лостив быва́л еси́ им и мща́я на вся начина́ния их.

1. На Тя упова́ша отцы́ на́ши, упова́ша и изба́вил еси́ я.

2. К Тебе́⁹⁸ воззва́ша и спасо́шася, на Тя упова́ша и не постыде́шася. / Ублажа́ем вас:

1. И да упова́ют на Тя зна́ющии И́мя Твое́, я́ко не оста́вил еси́ взыска́ющих Тя, Го́споди.

2. Не бо мече́м свои́м насле́диша зе́млю и мы́шца их не спасе́ их.

1. Но десни́ца Твоя́ и мы́шца Твоя́ и просвеще́ние лица́ Твоего́, я́ко благоволи́л еси́ в них.

2. Бог нам прибе́жище и си́ла, Помо́щник в ско́рбех, обре́тших ны зело́.

1. Бо́же, отри́нул ны еси́ и низложи́л еси́ нас, разгне́вался еси́ и уще́дрил еси́ нас.

2. Я́ко а́ще не Госпо́дь бы был в нас, внегда́ воста́ти челове́ком на ны, у́бо живы́х поже́рли бы́ша нас.

1. Благослове́н Госпо́дь, И́же не даде́ нас в лови́тву зубо́м их.

2. Я́ко не отри́нет Госпо́дь люде́й Свои́х и достоя́ния Своего́ не оста́вит.

1.⁹⁹Спасл бо еси́ нас от стужа́ющих нам и ненави́дящих нас посрами́л еси́. / Ублажа́ем вас:

2. По́мощь на́ша во И́мя Го́спода, сотво́ршаго не́бо и зе́млю.

1. Не нам, Го́споди, не нам, но И́мени Твоему́ даждь сла́ву о ми́лости Твое́й и и́стине Твое́й.

2. Госпо́дь сил с на́ми, Засту́пник наш Бог Иа́ковль.

1. По́йте Бо́гу на́шему, по́йте, по́йте Царе́ви на́шему, по́йте, я́ко Царь всея́ земли́ Бог, по́йте разу́мно.

2. Госпо́дь Царь во век и в век века, поги́бнете, язы́цы, от земли́ Его́.

1. Мы же лю́дие Твои́ и о́вцы па́жити Твоея́, испове́мыся Тебе́, Бо́же, во век, в род и род возвести́м хвалу́ Твою́.

2. Благослове́н Госпо́дь Бог¹⁰⁰Изра́илев, творя́й чудеса́ Еди́н, и благослове́но И́мя сла́вы Его́ во век и в век ве́ка, и испо́лнится сла́вы Его́ вся земля́, бу́ди, бу́ди. / Ублажа́ем вас:

1. Сла́ва: Ублажа́ем вас:

2. И ны́не: Ублажа́ем вас:

1. Аллилу́ия, аллилу́ия, аллилу́ия, сла́ва Тебе́, Бо́же.

2. Аллилу́ия:

Священнослужи́тели: Аллилу́ия: И коне́чное велича́ние Богоро́дице:

Досто́йно есть велича́ти Тя, / Богоро́дице, / земли́ Ру́сския Цари́цу Небе́сную / и люде́й правосла́вных / Влады́чицу Держа́вную.

По полиеле́и седа́льны святы́х. И ны́не, Богоро́дичен. Степе́нна, 1-й антифо́н 4-го гла́са. Проки́мен, глас 4: Ра́дуйтеся, пра́веднии, о Го́споде, / пра́вым подоба́ет похвала́. Стих: Бу́ди, Го́споди, ми́лость Твоя на нас, я́коже упова́хом на Тя. Вся́кое дыха́ние: Ева́нгелие от Матфе́я, зача́ло 10. Псало́м 50. Сла́ва: Моли́твами всех святы́х ру́сских: И ны́не: Моли́твами Богоро́дицы: По 50-м псалме́ стихи́ра, глас 6: Ежеле́тнюю па́мять: Посе́м глаго́лет диа́кон моли́тву Спаси́, Бо́же, лю́ди Твоя́: (зри вы́ше, во уста́ве на лити́и в неде́лю 2-ю по Пятидеся́тнице).

Кано́н Богоро́дицы, глас 2: Я́же всем удо́бь послу́шная: (зри Окто́их, повече́рие суббо́ты, или слу́жбу «Утоли́ моя́ печа́ли», 25 января́) со ирмосо́м на 6, ирмосы́ по два́жды. И кано́н Всех ру́сских святы́х, глас 8, на 8. По 3-й песни седа́лен святы́х с Богоро́дичным его́. По 6-й пе́сни конда́к и и́кос святы́х. По 9-й пе́сни свети́лен святы́х с Богоро́дичном его́.

На хвали́тех стихи́ры святы́х на 4, глас 5, повторя́юще пе́рвую два́жды. Сла́ва, глас 4. И ны́не, глас то́йже: При́сно страна́ Росси́йская: По вели́ком славосло́вии тропа́рь святы́х, глас 4: Иерусали́ма Вы́шняго: Сла́ва, и ны́не, Богоро́дичен, глас то́йже: К Засту́пнице страны́ на́шея: (зри вы́ше, в после́довании моле́бного пе́ния). Ектения́ и отпу́ст, на не́мже помина́ем: свята́го равноапо́стольнаго вели́каго кня́зя Влади́мира и всех про́чих чудотво́рцев, в земли́ Росси́йстей просия́вших: И пое́м многоле́тны.

Посе́м исхожде́ние и пою́тся стихи́ры хра́ма Всех ру́сских святы́х на осмь гласов. И быва́ет пома́зание. (О сем зри выше, во уставе 2-й Недели по Пятидеся́тнице), то́кмо оглаше́ние Студи́тово и тропа́рь преподо́бному Фео́дору не глаго́лем. И час 1-й.

На часе́х о́ба тропаря́ святы́х, 8-го и 4-го гла́сов глаго́лем и конда́к святы́х.

На Литурги́и. Блаже́нны святы́х на 8, начина́я от: Блаже́ни ми́лостивии:

По вхо́де о́ба тропаря́ святы́х 8-го и 4-го гласо́в. Сла́ва, конда́к святы́х, глас 3. И ны́не, конда́к Успе́ния Богоро́дицы, глас 2: В моли́твах: Проки́мен святы́х, глас 4: Святым, и́же суть на земли́ Его́, / удиви́ Госпо́дь вся хоте́ния Своя́ в них. Стих:¹⁰¹ Сохрани́ мя, Го́споди, я́ко на Тя упова́х. Апо́стол святы́х, ко Евре́ем, зача́ло 330. Аллилу́ия, глас 4: Бо́же, уши́ма на́шима услы́шахом, и отцы́ на́ши возвести́ша нам. Стих: Спасл бо еси́ нас от стужа́ющих нам и ненави́дящих нас посрами́л еси́. Ева́нгелие святы́х, от Матфе́я, зача́ло 11.¹⁰² Прича́стен святы́х: Благоволи́т Госпо́дь в лю́дех Свои́х и вознесе́т кро́ткия во спасе́ние.

И про́чее после́дование, я́коже во 2-ю Неде́лю по Пятидеся́тнице указа́ся (зри выше). Об отда́нии пра́здника зри вы́ше.

На Го́споди, воззва́х: стихи́ры, глас 2.

Подо́бен: Егда́ от Дре́ва:

Егда́ Крест Госпо́день на ра́мена взя́сте, отцы́, / и обрати́стеся к по́стническому зде по́прищу, / и плоть и мир превзыдо́сте, / и вся ко́зни разруши́сте миродержи́телевы, / тогда́ де́монов мно́жество рыда́ньми друг ко дру́гу вопия́ху: / о, дру́зи, кре́пость на́ша изчезе́.

Егда́ восхожде́ния свяще́нная, / я́коже Дави́д глаго́лет, / в сердца́х ва́ших положи́сте, / и жизнь равноа́нгельную пожи́сте, / и к концу́ соверше́нства взыдо́сте, / ели́ко есть мо́щно челове́ком, отцы́ преподо́бнии, / тогда́ ли́цы а́нгельстии друг ко дру́гу вопия́ху: / ка́ко плоть иму́щии безтеле́сни яви́шася?

Егда́ зде свяще́нныя Ла́вры и хра́мы честны́я / во сла́ву Бо́жию воздвиго́сте, / и украси́сте сия́ уста́вы по́стническими, / и ко о́бщему попече́нию о спасе́нии душ / ты́я напра́висте, отцы́ преподо́бнии, / тогда́, а́ки град, бысть пусты́ня Афо́нская / мно́жества ра́ди мона́шествующих.

Егда́ повину́шася зле не́цыи / Святы́я Горы́ жи́телие латиному́дренным / и сообщи́шася им, храня́ще живо́т свой, / тогда́ вы, Богоно́снии, ре́вность ве́ры восприе́мше, / отверго́сте соедине́ние их / те́мже, претерпе́вше смерть и многообра́зныя му́ки, / венце́м му́ченическим украси́стеся.

Сла́ва, глас 1:

Прииди́те, вси собо́ри мона́шествующих, / колесни́цу Бо́жию, тьма́ми и ты́сящами доброде́телей украша́емую / и́же во Афо́не отце́в, восхва́лим, / преподо́бныя и святи́тели, / священному́ченики и му́ченики / и вся вку́пе, имену́емыя и безъиме́нныя: / си́и бо де́лом и сло́вом, и многоразли́чным равноа́нгельным житие́м, / и и́же от Бо́га дарова́ньми / я́ко вои́стинну свя́ти показа́шася / и Го́ру сию́ тезоимени́ту свя́тости яви́ша, / и́хже и гро́бы Бог чудесы́ и благоуха́нными ми́ры просла́ви, / и ны́не, просла́вльшему их Христу́ предстоя́ще, / приле́жно мо́лятся о нас, / соверша́ющих па́мять их.

И ны́не, Богоро́дичен.

А́ще есть Неде́ля, догма́тик глаго́лем; а́ще же во ин день, глаго́лем сей, глас то́йже:

Хода́таицу Тя, Богороди́тельнице, / предлага́ем к Бо́гу, раби́ Твои́: / моле́ние принеси́ Сы́ну Твоему́, / Отцу́ же и Ду́хови, / Еди́ному всех Соде́телю, Тро́ице Святе́й, / я́ко да уще́дрит и спасе́т нас / вели́кия ра́ди Своея́ ми́лости.

На стихо́вне стихи́ры, глас 2.

Подо́бен: До́ме Евфра́фов:

Души́ трича́стное / очи́стивше, отцы́, / доброде́телей тро́ицею, / хра́мы Пребоже́ственныя / Тро́ицы показа́стеся.

Стих: Восхва́лятся преподо́бнии во сла́ве / и возра́дуются на ло́жах Свои́х.

О́брази доброде́телей, / по́стничества пра́вила, / ме́рила воздержа́ния всем, / и́же в Горе́ сей, / отцы́, позна́стеся.

Стих: Воспо́йте Го́сподеви песнь но́ву, / хвале́ние Его́ в це́ркви преподо́бных.

Благодаре́ние вси мы / прино́сим вам, / отцы́ Богоно́снии, / я́ко на стези́ спасе́ния / при́сно нас наставля́ете.

Сла́ва, глас 5:

О блаже́нное отце́в мно́жество Горы́ сея́! / Кто вы по достоя́нию восхва́лит? / Вы бо, Крести́телю Иоа́нну, Па́влу Фиве́йскому и Анто́нию Вели́кому подража́вше, / в зе́млю Афо́нскую, пу́сту и непрохо́дну, водвори́стеся, / ча́юще Бо́га, спаса́ющаго вас, / от Боже́ственныя же благода́ти подви́гшеся, / всю́ду в Горе́ сей дворы́ свяще́нныя соста́висте / и мно́жество мона́шествующих в па́житех спасе́ния воспита́сте, / и ны́не нас, ва́ше ста́до, от вся́кия ну́жды изба́вите / и моли́теся спасти́ся душа́м на́шим.

И ны́не, Богоро́дичен: Блажи́м Тя, Богоро́дице Де́во:

Тропа́рь пи́сан на вели́цей вече́рни.

Блаже́н муж: 1-й антифо́н; а́ще же в Неде́лю, чтем всю кафи́зму. На Го́споди, воззва́х: стихи́ры, глас 4.

Подо́бен: Я́ко до́бля:

Мона́шествующих собо́ри и мирсти́и, / собери́теся и све́тлое торжество́ соста́вите: / се бо всех нас призва́ша к ра́дости духо́вней, / и́же зде по́стничествоваша, вси преподо́бнии, / своя́ боре́ния предложи́вше, / и страда́ния, и по́двиги, / я́же па́че естества́ подъя́ша.

Сосло́вие преподо́бных, / в Горе́ сей возсия́вших / и просвети́вших всю тварь, / цве́ты вои́стинну благоуха́нныя, / древеса́ кра́сная, неувяда́емая и благопло́дная, / от вертогра́да Афо́нска, ре́ки дарова́ний приснотеку́щия, / мона́шествующих ли́ки по до́лгу да ублажи́м.

В телесе́х безпло́тныя / и Бо́жия су́щия челове́ки, / столпы́ Афо́нския о́гненныя, / с любо́вию и ра́достию стоя́щия о́крест Чи́стыя Богома́тере, / я́коже узре́ша Ю́ в Боже́ственнем виде́нии, / честны́я на́ша отцы́ сыноле́пно да восхва́лим.

Сла́ва, глас 6:

Днесь облиста́ па́че многозве́зднаго небесе́ / честно́е торжество́ и́же во Афо́не отце́в, / мы́сли празднолю́бных озаря́ющее. / Прииди́те у́бо, Святы́я Горы́ насе́льницы, / похва́льными пе́сньми просла́вим их, глаго́люще: / ра́дуйтеся, победи́вшии безпло́тныя де́моны / и на земли́ А́нгелом в житии́ подража́вшии; / ра́дуйтеся, Афо́нстии жи́телие и градоде́ржцы / и о всем ми́ре моли́твенницы си́льнейшии; / ра́дуйтеся, пред Бо́гом на́ши предста́телие, / и многоразли́чнии благоде́телие, и назира́телие, / моли́теся ко Го́споду поми́ловатися душа́м на́шим.

И ны́не, Богоро́дичен: Кто Тебе́ не ублажи́т:

Проки́мен дне. Та́же чте́ния 3 преподо́бническая.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие сокруше́ние;/ они́ же су́ть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т:/ су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́/ и вооружи́т тва́рь в ме́сть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И, от каменоме́тныя я́рости испо́лнь, паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же е́сть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бы́сть/ и живы́й посреде́ гре́шник, преста́влен бы́сть./ Восхище́н бы́сть, да не зло́ба измени́т ра́зума его́,/ или́ ле́сть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры самогла́сны, глас 1:

Весели́ся о Го́споде, святоимени́тая Горо́ Афо́нская, / мы́сленный и кра́сный Богоро́дичен раю́: / се бо в подго́риих Твои́х / процвето́ша кри́ни присноцвету́щии и благоу́ханнии, / и во удо́лиих и помо́риих Твои́х древеса́ благосенноли́ственная возрасто́ша, / плоды́ безсме́ртныя ду́ха принося́щая. / Тем, и́же в тебе́ мона́шествующия и мирски́я собра́вши, / ве́село пра́зднуй и благода́рно Влады́чице и Засту́пнице твое́й возопи́й: / велича́ю Тя, Богоро́дице, возвели́чившую мя / и пода́вшую ча́дом мои́м отцы́ преподо́бныя, / и́хже моли́твами всегда́ покрыва́еми, / от Сы́на Твоего́ прие́млют ве́лию ми́лость.

Преподо́бнии отцы́, в Горе́ сей по́стническия по́двиги поне́сшии, / вы от ю́ности Крест Госпо́день взя́сте, / тем мир вам распя́тся и вы ми́рови: / о́ви у́бо чу́вственне того́ отлучи́стеся, / о́ви же тому́ мы́сленне умертви́стеся; / отону́дуже сугу́бое уразуме́вше де́йство Креста́, / сугу́бое восхожде́ние по ле́ствице духо́вней сотвори́сте –/ дея́нием и виде́нием, / и прили́чнаго челове́ком достиго́сте соверше́нства, / и ны́не на Небесе́х спросла́вистеся Христу́, / Ему́же и спострада́сте, / Тому́ моли́теся о душа́х на́ших.

Глас 2:

Прииди́те, вси мона́шествующих собо́ри, / па́мять святы́х оте́ц, и́же на Афо́не, достодо́лжно днесь почти́м: / си́и бо ненаселе́нное ме́сто сие́ / оби́тельми свяще́нными и разли́чными хра́мы насели́ша, / уче́ния же и пра́вила своя́, я́ко чадолюби́вии отцы́, / в достоя́ние нам преда́ша. / Сохрани́м у́бо, бра́тие, я́ко отцелюби́вии сы́нове, / оте́ческое насле́дие неразруши́мо, / не упраздни́м ме́сто, я́ко непло́дная смоко́вница, / но, наста́вников на́ших зря́ще сконча́ние жи́тельства, / подража́им ве́ре и подвиго́м их, / я́ко да с ни́ми ве́чная бла́га улучи́м.

Отцы́ Богому́дрии, / вы Моисе́еву и Илиину́ пусты́нному житию́ подража́сте, / досто́йно и Боговиде́ние о́ных получи́сте: / и́бо во Афо́нстей Горе́, а́ки на Сина́и и Хори́ве, пожи́сте / и сподо́бистеся, ели́ко мо́щно есть челове́ку, / я́коже Моисе́й во огни́ о́блака мра́чна / и Илия́ во гла́се хла́да то́нка, / ви́дети и разуме́ти, / не виде́нием оче́с и не позна́нием ума́, / неви́димаго и неразумева́емаго Бо́га. / Ны́не же не в зерца́ле и в гада́нии виде́ния, / но несре́дственне созерца́юще во Еди́нице Тро́ицу / и в Тро́ице Еди́ницу, / непреста́нно моли́теся о душа́х на́ших, / отцы́ Богоно́снии.

Глас 3:

Четверостру́нную цевни́цу, / Афо́нския отцы́ восхва́лим, / от преподо́бных, и святи́телей, / и испове́дников, и му́чеников соста́вленную, / и́бо за́поведи стра́хом преще́ний, / я́ко раби́, сохрани́ша, / любо́вию же обеща́ний, / я́ко нае́мницы, доброде́тели испра́виша, / жела́нием к Бо́гу распали́вшеся, / я́ко сы́нове по благода́ти, Бо́гу угоди́ша, / и ны́не на Небесе́х, / насле́дницы Бо́жии и снасле́дницы Христо́вы бы́вше, / мо́лятся о душа́х на́ших.

Сла́ва, глас 4:

Ле́тнюю па́мять днесь / и́же во Афо́не Богоно́сных оте́ц, / прииди́те, ублажи́м, / си́и бо я́ко вои́стинну / чрез вся ко блаже́нству пути́ Госпо́дни проидо́ша: / обнища́вше бо ду́хом зде, / обогати́шася во Ца́рствии Небе́снем / и, кро́тцыи бы́вше, зе́млю кро́тких насле́доваша, / пла́кавше, уте́шишася, / алка́вше пра́вдою, насы́тишася / и, ми́ловавше, поми́ловани бы́ша, / чи́стии бы́вше се́рдцем, / Бо́га, ели́ко есть мо́щно, узре́ша, / миротвори́вше, Боже́ственнаго сподо́бишася сыноположе́ния; / гони́ми же и му́чими бы́вше по пра́вде и благоче́стии, / ны́не на Небесе́х веселя́тся и ра́дуются / и приле́жно мо́лятся Го́сподеви поми́ловатися душа́м на́шим.

И ны́не, Богоро́дичен:

Не преста́й, Госпоже́, / ми́лостивно пещи́ся о рабе́х Твои́х, / под держа́вный покро́в Твой прише́дших с ве́рою, / и всех заступи́ и спаси́, / да вы́ну прославля́ем Тя, Ма́терь щедро́т, / низпосыла́ющу ве́рным ве́лию ми́лость.

Или воскре́сный: При́зри на моле́ния Твои́х раб, Всенепоро́чная:

На стихо́вне стихи́ры, глас 5.

Подо́бен: Ра́дуйся, по́стников:

Ра́дуйся, преподо́бных Афо́нских оте́ц мно́жество, / Цари́цы Небе́сныя ополче́ние, / и́же вся нача́ла тьмы и вла́сти лю́тыя / Бо́жиим вспоможе́нием победи́сте, / плоть умертви́сте и дух оживи́сте, / пролия́нии сле́зными у́глия страсте́й угаси́сте, / благода́ть же прие́мше Боже́ственнаго де́йствия, / Христа́ Го́спода моли́те душа́м на́шим да́ти ве́лию ми́лость.

Стих: Восхва́лятся преподо́бнии во сла́ве / и возра́дуются на ло́жах Свои́х.

Ра́дуйся, преподо́бных мно́жество, / и́же от Горы́, я́ко свети́ла, восходя́ще / и вселе́нную даро́в сия́ньми / и доброде́тельми Боже́ственными озаря́юще, / зве́зды многосве́тлыя я́ве показа́стеся, / ме́сто сие́ не́бо друго́е сотвори́сте / и потреби́сте мрак весь де́монский; / челове́цы Небе́снии и земни́и А́нгели, / честно́е селе́ние Пресвяты́я Тро́ицы, / Отца́ и Сы́на и Ду́ха Свята́го, / Христа́ Спа́са моли́те / душа́м на́шим да́ти ве́лию ми́лость.

Стих: Воспо́йте Го́сподеви песнь но́ву, / хвале́ние Его́ в це́ркви преподо́бных.

Ра́дуйтеся, преподо́бных мно́жество, / доброде́телей храни́лища, / смиреному́дрия сокро́вища / моли́твы всегда́шняя де́лателища сла́дкая, / кро́тости кра́сная собра́ния, / со́лнца разсужде́ния, исто́чницы умиле́ния, / любо́вь сугу́бая к Бо́гу и к бли́жнему, / Христа́ моли́те душа́м на́шим да́ти ве́лию ми́лость.

Сла́ва, глас 8:

Кто изглаго́лет по́двиги ва́ша, / отцы́ всеблаже́ннии? / Кто по достоя́нию похва́лит поще́ния ва́ша, / ума́ бо́дростное паре́ние в моли́твах непреста́нных, / к доброде́телем неотсту́пное со́вести зва́ние, / удруче́ние те́ла, страсте́м противле́ние, / всено́щная стоя́ния, приснотеку́щия сле́зы, / смире́нное мудрова́ние и я́же на де́моны побе́ды, / дарова́ний мно́жества, / над все́ми же о благоче́стии да́же до кро́ве и сме́рти противостоя́ние?/ Сих ра́ди от Христа́ я́ко победи́телие венча́стеся, приснопа́мятнии, / моли́теся приле́жно о нас, / ве́рою чту́щих святу́ю па́мять ва́шу.

И ны́не, Богоро́дичен:

Живу́щим, Госпоже́, рабо́м Твои́м в земне́й юдо́ли сей / бу́ди Уте́шительница, / отходя́щим из ми́ра Покрови́тельница, / и стоя́щим на Суде́ Засту́пница яви́ся, / избавля́ющи нас осужде́ния / всемо́щным Твои́м предста́тельством.

Или воскре́сный: Безневе́стная Де́во:

Тропа́рь, глас 1:

Пусты́ни Афо́нския отцы́, / А́нгелы во пло́ти, / испове́дники вку́пе и преподо́бныя, / святи́тели же и му́ченики в пе́ниих почти́м, / подража́юще доброде́телем их, / зову́ще согла́сно и глаго́люще: / сла́ва Просла́вльшему вы, / сла́ва Венча́вшему вы, / сла́ва в беда́х предста́тели нам вы Показа́вшему.

Сла́ва, и ны́не, Богоро́дичен: Гаврии́лу веща́вшу Тебе́, Де́во:

На Бог Госпо́дь: тропа́рь святы́х, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1.

Подо́бен: Гроб Твой, Спа́се:

Возсия́вши, я́ко звезда́ у́тренняя, / я́ко све́тлое со́лнце, па́мять честна́я и́же во Афо́не отце́в / просвеща́ет жи́тели Горы́ сея́ / и согрева́ет мона́шествующих сердца́ к подража́нию жития́ их по́стническаго / и ре́вности о ве́ре Христо́ве.

Сла́ва, и ны́не, Богоро́дичен:

Я́ко ко́кош своя́ птенцы́ собира́ет и покрыва́ет ма́терски, / та́ко вся ны покры́й кри́лы Твои́ми, Пречи́стая, Горы́ Твоея́ жи́тели, / и изба́ви ны от вся́ких бед и скорбе́й, / и собери́ нас в Небе́сный град моли́твами Твои́ми.

И чте́ние.

По 2-м стихосло́вии седа́лен, глас 5.

Подо́бен: Ра́дуйся, по́стников:

Коль красно́ собра́ние ва́ше, о отцы́ треблаже́ннии! / услажда́ет ве́рных сердца́ и весели́т духо́вно мона́шествующих собо́ры святоиме́нныя Горы́. / Моли́теся за ны, мо́лим вы, о святи́и, / да изба́вимся от бед и скорбе́й, и вся́каго зла́го обстоя́ния, / и бу́дущаго ве́чнаго муче́ния.

Сла́ва, и ны́не, Богоро́дичен:

Благодари́м Тя, Преблагослове́нная Де́во, / при́сное промышле́ние иму́щую о жре́бии Твое́м, / я́ко безбе́дны храни́ши уедине́нно и вку́пе зде живу́щия / и вся, я́же к по́льзе и спасе́нию, нам устроя́еши, / подаю́щи мир и ве́лию ми́лость.

Велича́ние:

Ублажа́ем вас, / преподо́бнии отцы́ Афо́нстии, / в Горе́ сей пости́вшиися, / и чтим святу́ю па́мять на́шу, / наста́вницы мона́хов / и собесе́дницы А́нгелов.

Псало́м избра́нный: Терпя́, потерпе́х Го́спода, и вня́т ми:

По полиеле́и седа́лен, глас 8.

Подо́бен: Прему́дрости сло́ва:

Бо́га всех возлюби́вше от души́, и́же во Афо́не пости́вшиися отцы́ / во уедине́нии пе́рвее по́двиги па́че естества́ понесо́ша, / та́же бли́жняго па́ки те́пле возлюби́вше, / в разли́чных ме́стех Горы́ сея́ хра́мы честны́я воздвиго́ша / и мирски́х мно́жества в них собра́вше, Го́ру Афо́нскую град сотвори́ша. / К ним у́бо возопии́м: / моли́те Христа́ Бо́га прегреше́ний оставле́ние дарова́ти / чту́щим любо́вию святу́ю па́мять ва́шу.

Сла́ва, и ны́не, Богоро́дичен:

Сын Твой, Де́во, Христо́с Сын Бо́жий есть, / христоимени́тым всем еди́ный Хода́тай; / Ты же, Пречи́стая, сладча́йшая Ма́ти и Засту́пница еси́ нам, на Горе́ сей живу́щим: / сию́ бо от Сы́на Твоего́ в жре́бий прия́ла еси́. / Те́мже нас уще́дри, я́ко при́сная ча́да Твоя́ и я́ко рабы́ Твоя́, Влады́чице, / моля́щи Сы́на Твоего́ и Бо́га на́шего прегреше́ний оставле́ние дарова́ти нам, / и́же в сло́ве, и де́ле, и во уме́ согреша́ем.

Та́же степе́нна, 1-й антифо́н 4-го гла́са. Проки́мен, глас 4-й: Честна́ пред Го́сподем / смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Прииди́те, христоимени́тии лю́дие / и Святы́я Горы́ Богоизбра́ннии подви́жницы, / мона́шествующии и мирсти́и, / восхва́лим лик святы́х и преподо́бных отце́в, / во Афо́не просия́вших / и до́бре Бо́гу угоди́вших, / Небе́сныя Цари́цы ополче́ние / и о всем ми́ре те́плыя моли́твенники, / и та́ко возопии́м к ним: / мо́лим вы, о отцы́ треблаже́ннии, / моли́теся о нас, восхваля́ющих вас / и соверша́ющих при́сно всепра́зднственную па́мять ва́шу, / испроси́те нам очище́ние и проще́ние грехо́в, / да с ва́ми улучи́м Небе́сное насле́дие.

Кано́н святы́м, глас 8.

Песнь 1

Ирмо́с: Колесницегони́теля фарао́ня погрузи́ / чудотворя́й иногда́ / Моисе́йский жезл, крестообра́зно порази́в / и раздели́в мо́ре, / Изра́иля же беглеца́, пешехо́дца спасе́, /песнь Бо́гови воспева́юща.

Бо́же всех, дар словесе́ пода́ждь ми, Твоему́ рабу́, / ны́не начина́ющему хвали́ти пе́сньми и́же во Афо́нстей Горе́ просия́вшия отцы́, / Твою́ во́лю испо́лнившия.

Афо́нских отце́в свято́е собра́ние, су́щии во Афо́не, пе́сньми почти́м, / дру́ги Пресвяты́я Де́вы и Христа́ Бо́га рачи́тельныя уго́дники, / на́ша те́плыя предста́тели и моли́твенники непреста́нныя о спасе́нии душ на́ших.

Вели́кия Ла́вры свяще́ннаго созда́теля в пе́снех почита́ю, Вели́каго Афана́сия, / о́браз и начерта́ние бы́вшим во Афо́не отце́м, / в виде́ниих вку́пе же и дея́ниих.

Богоро́дичен: Ра́дуйся, Пресвята́я Госпоже́, освяти́вшая Афо́н Твои́м прише́ствием; / ра́дуйся, низложи́вшая та́мо и́долы; / ра́дуйся, насади́вшая в Горе́ ве́ру и́стинную; / ра́дуйся, неве́рие отту́ду отгна́вшая.

Други́й кано́н, глас 1.

Песнь 1

Ирмо́с: Твоя победи́тельная десни́ца / боголе́пно в кре́пости просла́вися: / та бо, Безсме́ртне, / я́ко всемогу́щая проти́вныя сотре́, / изра́ильтяном путь глубины́ новосоде́лавшая.

Ватопе́дскаго сла́внаго Ага́пия восхвали́ти до́лженствую, / и́же Богоро́дичен глас услы́ша, и порабо́тися, / и изба́ви своего́ влады́ку с сынми́ его́, / я́ко свобо́ден сый ве́чныя му́ки.

Афана́сия, кра́сныя о́трасли Симе́нския оби́тели, похваля́ю житие́, / Боже́ственнаго же Ака́кия но́ваго и преподо́бнаго Гаврии́ла И́верскаго, / от мо́ря изъе́мшаго чудотво́рную ико́ну Врата́рницы.

Ка́ко не почту́ честна́го Генна́дия, / узре́вшаго я́ве в Ватопе́де источи́вшийся еле́й чу́дом Богома́тере?/ Ка́ко же умолчу́ о Богоно́снем Гео́ргии, / И́верския оби́тели созда́тели?

Богоро́дичен: Егда́ язы́ки разделя́ше Бог по числу́ а́нгел Свои́х, / тогда́ прови́дя Тя, Де́во, бы́ти в Ма́терь Свою́ Пречи́стую, / отдели́ Тебе́ Го́ру сию́ вели́кую в достоя́ние неотъе́млемо.

Катава́сия по уставу.

Песнь 3

Ирмо́с: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.

Преподо́бнии отцы́ Афо́нстии, / вы, от Боже́ственныя благода́ти подви́гшеся, / в Горе́ свяще́нныя огра́ды соста́висте / и по́мощию Богома́тере мно́жества мона́шествующих в па́житех спасе́ния воспита́сте. / Но и ны́не о нас, ва́шем ста́де, моли́те, / изба́витися нам от вся́кия ну́жды и спасти́ся душа́м на́шим.

Богосло́ва вели́каго и свяще́нный орга́н Ду́ха Свята́го я́вльшагося, / Григо́рия Пала́му воспева́ю, / Све́та невече́рняго зри́теля, / Богосло́вия ве́рным наста́вника нело́жнаго.

Пра́ведно есть восхвали́ти Григо́рия друга́го, / в преде́лех ла́врских све́тло пости́вшагося, / и соиме́ннаго тому́ Григо́рия Боже́ственнаго, / оби́тель прехва́льну себе́ воздви́гшаго.

Богоро́дичен: Ра́дуйся, во жре́бии Себе́ Го́ру сию́ избра́вшая; / ра́дуйся, Засту́пницею ме́ста сего́ бы́ти изво́лившая; / ра́дуйся, ве́рным, пребыва́ющим зде, Пода́тельнице земны́х благ; / ра́дуйся, Спору́чнице ве́чнаго их спасе́ния.

Ин

Ирмо́с: Еди́не, ве́дый челове́ческаго существа́ не́мощь / и ми́лостивно в не вообра́жся, / препоя́ши мя с высоты́ си́лою, / е́же вопи́ти Тебе́, Святы́й, / одушевле́нный хра́ме неизрече́нныя сла́вы Твоея́, Человеколю́бче.

Симе́нская оби́тель Дамиа́на произрасти́, / Филофе́ева же па́ки друга́го возрасти́ Дамиа́на, преподобному́ченика, / и с ним Боже́ственнаго Доме́тия, / и́хже да ублажи́м.

Диони́сия пою́ чу́днаго, / Крести́теля Иоа́нна оби́тель созда́вшаго, / и Доме́тия, спо́стника Диони́сиева.

Диони́сий други́й, И́верская отра́сль, / и Дамаски́н, ла́врское Боже́ственное удобре́ние, ны́не ублажа́ются, / я́ко сугу́быя венцы́ прия́ша, страда́ния вку́пе и по́стничества.

Богоро́дичен: Ты, Пречи́стая Де́во, спобо́рствовати обеща́лася еси́ всегда́ всем, / в Горе́ сей воздвиза́ющим брань с бори́телем, борю́щим челове́ки, / те́мже, Влады́чице, по Твоему́ обеща́нию не оста́ви нас, мо́лим Тя.

Седа́лен, глас 4.

Подо́бен: Удиви́ся Ио́сиф:

Ужасо́шася вку́пе вся А́нгелов во́инства, / ви́дяще му́жество души́ и боре́ния ва́ша, / я́же па́че естества́, отцы́ знаменоно́снии, / ка́ко, те́лом веще́ственным обложе́ни су́ще, безпло́тныя враги́ победи́сте, / и благода́рно песнь Го́сподеви побе́дную воспе́сте: / сла́ва Тебе́, Го́споди, сла́ва Тебе́, / укрепля́ющему ме́ртвенное челове́ков естество́.

Сла́ва, и ны́не, Богоро́дичен:

Ужаса́ет всяк ум человеколю́бие Твое́ мно́гое, Богоотрокови́це Мари́е, / е́же показа́ла еси́ чи́ну и́ноческому зде постя́щихся: / от всея́ бо земли́ собра́ла еси́ я в Го́ру сию́ вели́кую / и я́ко Свое́ достоя́ние мона́хом сию́ дарова́ла еси́. / Вели́ко вои́стинну е́же о нас промышле́ние Твое́, Присноде́во.

Песнь 4

Ирмо́с: Ты моя кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.

Бо́га возлюби́вше от всея́ души́, преподо́бнии, / вели́кия по́двиги соверши́ли есте́, / та́же бли́жняго те́пле возлюби́вше, / в разли́чных ме́стех Афо́на оби́тели воздви́гли есте́ / и общежи́телей мно́жества в ты́я собра́ли есте́. / Моли́теся у́бо, чадолюби́вии отцы́, и нам любве́ исполни́тельми бы́ти / и спасти́ся душа́м на́шим.

Пе́сньми почита́ю настоя́теля Ватопе́дскаго Евфи́мия, / и́же свя́зан бысть вери́гами и погрузи́ся во глубине́ морсте́й, / изобличи́ же у́мысл латиному́дренных / и вене́ц муче́ния от руки́ Госпо́дни неувяда́емый прия́л есть.

Совоспева́ю и друга́го честна́го Евфи́мия, И́верския оби́тели созда́теля, / я́ко, служа́щу ему́ не́когда Бо́гу, столп узре́ся от су́щих с ним солнцеобра́зен. / И Дохиа́рскаго созда́теля пою́, / друга́го па́ки преподо́бнаго Евфи́мия.

Богоро́дичен: Ра́дуйся, те́плая Хода́таице о живу́щих во жре́бии Твое́м; / ра́дуйся, ми́лость Сы́на Твоего́ до сконча́ния ве́ка ме́сту сему́ обеща́вшая; / ра́дуйся, благода́ть Его́ неотсту́пну бы́ти предре́кшая; / ра́дуйся, ра́досте и спасе́ние душ на́ших.

Ин

Ирмо́с: Го́ру Тя, благода́тию Бо́жиею приосене́нную, / прозорли́выма Авваку́м усмотри́в очи́ма, / из Тебе́ изы́ти Изра́илеву провозглаша́ше Свято́му / во спасе́ние на́ше и обновле́ние.

Восхвали́ти Феодо́сия досто́ит, Филофе́евския оби́тели наста́вника, / и Феофа́на по́стника, Дохиа́рския оби́тели Боже́ственное удобре́ние, / и Филаделфи́йскаго Феоли́пта высокоразу́мнаго, / Честны́я Тро́ицы служи́тели ве́рныя.

Фео́ну ка́ко оста́влю непохвале́на, свети́льника оби́тели Пантокра́торския / и святи́теля по́слежде бы́вша Фессалони́тскаго? / Ка́ко же словесы́ не почту́ Фео́фила мироточи́ваго, / благоуха́ние испуща́ющаго па́че всех арома́т?

Свяще́нныя оби́тели И́верския созда́теля похва́лим, Иоа́нна преподо́бнаго, / Евфи́миева по пло́ти отца́, / и с ним па́ки И́верския о́трасли, Иа́кова Богому́драго и Иа́кова друга́го, / тве́рдыя Христо́вы преподобному́ченики пои́м.

Богоро́дичен: Коль мно́гое промышле́ние Твое́ о Горе́ сей, Влады́чице! / Ты бо рекла́ еси́, / я́ко бу́деши в доброде́телех наста́вник и учи́тель всем, до́бре в ней живу́щим, / пита́тель же и врач душ и теле́с их.

Песнь 5

Ирмос: Вску́ю мя отри́нул еси́ / от лица́ Твоего́, Све́те Незаходи́мый, / и покры́ла мя есть чужда́я тьма, окая́ннаго, / но обрати́ мя и к све́ту за́поведей Твои́х / пути́ моя́ напра́ви, молю́ся.

Преподо́бнии отцы́ Афо́нстии, / вы, я́ко сла́вие сладкогла́снии, посреде́ де́брий Святы́я Горы́ живу́ще, / спаси́тельным и́менем Иису́совым поуча́стеся при́сно, / ум свой просвеща́юще Боже́ственным све́том, / сердца́ же услажда́юще отту́ду источа́ющеюся ра́достию, / е́же моли́твами свои́ми и нам подади́те, помина́ющим вас.

Иоаса́фа преподо́бнаго Диони́сиевы оби́тели в пе́сни похваля́ю, / я́ко, ра́дуяся, кровь свою́ излия́л есть за любо́вь всех Царя́ Христа́ / и муче́ния вене́ц прия́л есть.

Подоба́ет вои́стинну Ка́ллиста вели́каго в пе́снех похвали́ти, / му́дрый и Богодухнове́нный орга́н благода́ти, / И́верския же оби́тели украше́ние и па́стыря сла́внаго.

Богоро́дичен: Ра́дуйся, Де́во, я́ко благослове́нием Твои́м осени́ Го́ру си́ла Вы́шняго; / ра́дуйся, вертогра́д духо́вный благода́тию Бо́жиею в насле́дии Свое́м насади́вшая; / ра́дуйся, я́ко удо́лия и де́бри его напо́лнишася и́ноки; / ра́дуйся, я́ко просия́ во Афо́не мно́жество преподо́бных, / моля́щихся о спасе́нии душ на́ших.

Ин

Ирмо́с: Просвети́вый сия́нием /прише́ствия Твоего́, Христе́, / и освети́вый Кресто́м Твои́м ми́ра концы́, / сердца́ просвети́ све́том Твоего́ Богоразу́мия / правосла́вно пою́щих Тя.

Изря́дная отра́сль Зогра́фския оби́тели, /почте́н да бу́дет в пе́снех Косма́ преподо́бный, / и́же Богоро́дицу свои́ма очи́ма ви́де, / и с ним да почте́н бу́дет священному́ченик Конста́нтий, / и́же в Ла́вре поживе́.

О Го́споде ра́дуйся и ты, оби́тель Кутлуму́сская, / я́ко в преде́лех Твои́х процвете́ Киприа́н вели́кий, / Христо́в свяще́нник и преподобному́ченик.

Я́коже ма́ти в ча́дех, Диони́сиева оби́тель весели́тся: / честна́го Мака́рия, но́ваго му́ченика, / и Лео́нтия, от гро́ба пресла́вно источи́вшаго ми́ро благоуха́нно, сла́вит.

Богоро́дичен: Кто не ра́дуется, слы́ша обеща́ние Твое́, Пренепоро́чная Отрокови́це?/ Ты бо рекла́ еси́, / я́ко зде до́бре живу́щия Сы́ну Твоему́ и Бо́гу предста́виши, / проще́ние прегреше́ний им испроси́вши.

Песнь 6

Ирмо́с: Очи́сти мя, Спа́се, / мно́га бо беззако́ния моя́, /и из глубины́ зол возведи́, молю́ся, / к Тебе́ бо возопи́х, и услы́ши мя, / Бо́же спасе́ния моего́.

Преподо́бнии отцы́ Афо́нстии, / вы, многоразли́чныя по́двиги соверши́вше, / си́ми от Горы́ сея́ возлете́сте в го́ры Небе́сныя / и, жили́ще свое́ та́мо утверди́вше, ны́не упокоева́етеся душа́ми свои́ми, / я́ко златы́я и вседо́брыя голуби́цы, / иде́же помяни́те и нас, восхваля́ющих вы.

Ла́вры свяще́нное воспита́ние пе́сньми почти́м, / безпло́тнаго во пло́ти, Богоно́снаго Макси́ма, / от Боже́ственнаго Ду́ха бога́тый дар проро́чества прие́мшаго.

Ватопе́дския оби́тели почита́ю Боже́ственныя о́трасли, / Неофи́та сла́внаго, глас услы́шавша Чи́стыя Богоотрокови́цы, / и в преподо́бных просия́вшаго Никоди́ма.

Богоро́дичен: Ра́дуйся, я́ко на насле́дие Твое́ при́сно призира́еши; / ра́дуйся, я́ко благода́ти Бо́жия и ми́лости Своея́ сподобля́еши е; / ра́дуйся, на ка́мени за́поведий Христо́вых сердца́ рабо́в Твои́х утвержда́ющая; / ра́дуйся, благослове́ние Сы́на Твоего́ на нас низводя́щая.

Ин

Ирмо́с: Обы́де нас после́дняя бе́здна, / несть избавля́яй, / вмени́хомся, я́ко о́вцы заколе́ния, / спаси́ лю́ди Твоя́, Бо́же наш, / Ты бо кре́пость немощству́ющих и исправле́ние.

Диони́сиевы оби́тели изря́дное удобре́ние, / пет бу́ди по до́лгу, Ни́фонте чу́дный, / Константи́ня гра́да бы́вый па́стырю и всем преподо́бным ве́рше.

Весели́ся, честна́я оби́тель Дохиа́рская, / обогати́вшися созида́телем сла́вным, му́дрым Неофи́том, / обогаще́нным доброде́телию вся́кою, / я́ко дре́во благопло́дное.

По́стнице Каре́йская, весели́ся и ты о Боже́ственнем Ду́се, / процве́тши сла́внаго Некта́рия, / во́ду сладча́йшую доброде́телей и преподо́бных купножи́теля.

Богоро́дичен: Спобо́рством Твои́м, Богороди́тельнице, огради́вшеся, / я́ко всеору́жием кре́пким, / Горы́ сея́ преподо́бнии все победи́ша во́инство де́монское и по́честь побе́ды прия́ша.

Конда́к, глас 4.

Подо́бен: Вознесы́йся на Крест:

Онебеси́вшия Го́ру сию́, / и показа́вшия в ней житие́ а́нгельское, / и мно́жество мона́хов собра́вшия отцы́, / прииди́те, благохва́лим вси, к ним взыва́юще: / вся́кия беды́ и искуше́ния нас изба́вите, / мно́жество преподо́бных, / Афо́нская похвало́.

И́кос:

О, коль добро́ соедине́ние ва́ше, отцы́ Богому́дрии!/ О, коль красе́н и сла́док о́бщий сей ваш пра́здник, / в не́мже вси вы, в Горе́ сей просия́вшии святи́и, зна́емии ку́пно и безъиме́ннии, о́бщее хвале́ние, я́коже духо́вная бра́тия, прие́млете! / Подоба́ше бо во еди́нем ме́сте Го́сподеви угоди́вшим во еди́н день и пра́здновати. / Сего́ ра́ди и мы, и́же во Афо́не мона́си и мирсти́и, во еди́но собра́вшеся, / по до́лгу вас ублажа́ем, / но́вии – дре́вних и сы́нове – отце́в, согла́сно вопию́ще: / ме́сто сие́, в не́мже пожи́сте, от вся́каго зла спаса́йте, / мно́жество преподо́бных, Афо́нская похвало́.

Песнь 7

Ирмо́с: О́троцы евре́йстии в пещи́ / попра́ша пла́мень дерзнове́нно / и на ро́су огнь преложи́ша, вопию́ще: / благослове́н еси́, Го́споди Бо́же, во ве́ки.

Преподо́бнии отцы́, во Афо́не возсия́вшии, / луча́ми доброде́телей и Боже́ственных дарова́ний озаря́ете Го́ру сию́, я́ко зве́зды многосве́тлыя, / и Не́бо друго́е ме́сто по́двигов ва́ших показа́сте, / разгна́вше лю́тый мрак де́монский. / Не преста́йте моля́щеся за ны ко Го́споду.

Еди́н от святы́х, и́же во Афо́не, показа́ся Ни́фонт Богоно́сный, / и́же пти́чим житие́м живя́ше в преде́лех ла́врских / и проро́ческий дар от Бо́га прия́т.

Нил, ла́врский мирото́чец, / и Никоди́м, Кавсокали́вский цвет, / от Христа́ возлю́блен бы́вый, но́вый му́ченик, / в пе́снех и пе́ниих похвали́тася досто́йно.

Богоро́дичен: Ра́дуйся, вся́ких даро́в рабо́м Твои́м Всеще́драя Пода́тельнице; / ра́дуйся, во бра́ни, в боле́знех и труде́х их премилосе́рдая Уте́шительнице; / ра́дуйся, благоде́нственное житие́ на земли́ и всеблаже́нное на Небеси́ им устроя́ющая; / ра́дуйся, наде́ждо и спасе́ние душ на́ших.

Ин

Ирмо́с: Тебе́, у́мную, Богоро́дице, пещь, / разсмотря́ем, ве́рнии, / я́коже бо о́троки спасе́ три Превозноси́мый, / мир обнови́, во чре́ве Твое́м всеце́л, / хва́льный отце́в Бог и препросла́влен.

Ка́ко не почту́ в ли́це Боже́ственных оте́ц до́бляго Ники́фора, / и́же безмо́лвно живя́ше в преде́лех пусты́нных / и духо́вных дарова́ний сподо́бися досто́йно?

Па́вел, двух оби́телий кти́тор, Гео́ргиевы и Ксиропота́мския, по́стников добро́та, / просия́вый на кончи́не, я́коже друго́е со́лнце, / да похва́лится в пе́снех.

Песнь воспева́ю Пахо́мию, Боже́ственней отра́сли Кавсокали́встей, / но́вому му́ченику Христо́ву, / сугу́бый вене́ц прие́мшему от руки́ Госпо́дни.

Богоро́дичен: Влады́чица ми́ру Ты еси́, Присноде́во, / изря́днее же Горы́ сея́ Влады́чица еси́ и Предста́тельница, / спаса́ющи сию́ от вся́каго искуше́ния и вре́да.

Песнь 8

Ирмо́с: Седмери́цею пещь / халде́йский мучи́тель / Богочести́вым неи́стовно разжже́, / си́лою же лу́чшею спасе́ны, сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Афо́на насе́льницы и храни́телие, / по Богоро́дице на́ши предста́телие и многообра́знии благоде́телие и назира́телие, / столпи́ о́гненнии, стоя́щии с любо́вию и ра́достию о́крест Ма́тере Све́та, / не преста́йте моля́щеся за ны ко Го́споду.

Молча́льником пе́рвейший во Афо́не Петр почита́ется, / пожи́вый жи́знию невеще́ственною и прогна́вый во пло́ти безпло́тныя де́моны, / и́же наг всю свою́ жизнь прохожда́ше / и даро́в Ду́ха Свята́го сподо́бися бога́тно, Богоро́дицы моли́твами.

Рома́на сла́вна, по́стников украше́ние / и му́чеником Христо́вым весе́лие, почти́м в пе́снех, / его́же ла́врская по́стница процвете́, я́ко шипо́к благоуха́нен.

Богоро́дичен: Ра́дуйся, Храни́тельнице на́ша в настоя́щем ве́це; / ра́дуйся, Предста́тельнице и непосты́дное упова́ние в бу́дущем; / ра́дуйся, всему́ благо́му вход се́мо подаю́щая; / ра́дуйся, прило́г вся́каго зла от жре́бия Своего́ отража́ющая.

Ин

Ирмо́с: В пещи́ о́троцы Изра́илевы, / я́коже в горни́ле, / добро́тою благоче́стия чисте́е зла́та блеща́хуся, глаго́люще: / благослови́те, вся дела́ Госпо́дня, Го́спода, / по́йте и превозноси́те во вся ве́ки.

Са́вва да похвале́н бу́дет, иера́рх Боже́ственный, / и́же от Христа́ чуде́с прия́т си́лу и Се́рбскую зе́млю просвети́, я́ко со́лнце, / с Симео́ном вку́пе, отце́м свои́м по пло́ти, сы́ном же по ду́ху, / источи́вшим из гро́ба благово́нное ми́ро, / Хиланда́рския оби́тели Боже́ственнии созда́телие.

Пе́сньми почти́м Симео́на, Филофе́евския оби́тели наста́вника изря́днаго, / и мироточи́ваго Си́мона, на ка́мени созда́вшаго оби́тель превысо́кую наставле́нием Небе́сныя звезды́ / и чуде́с си́лу от Бо́га прие́мшаго и власть на ду́хи нечи́стыя.

Игра́й па́ки и лику́й, честна́я оби́тель Диони́сиева, / возрасти́вшая Боже́ственнаго Филофе́я, по́стников украше́ние, / его́же из темни́цы изба́ви Богоро́дица Мари́я, / его́же честна́я глава́, я́ко со́лнце, просия́.

Богоро́дичен: На высо́цем и све́тлем престо́ле, Влады́чице, яви́лася еси́ седя́щи, вся блиста́ющися, / ли́цы же мона́хов неизче́тни стоя́ху о́крест Тебе́, / на полу́денных преде́лех Афо́нских и Святы́я Горы́ о́крест, / и явля́хуся, я́ко о́гненнии столпи́, / и́же бы́ша ны́не восхваля́емии отцы.

Песнь 9

Ирмо́с: Ужасе́ся о сем Не́бо, /и земли́ удиви́шася концы́, / я́ко Бог яви́ся челове́ком пло́тски / и чре́во Твое́ бысть простра́ннейшее Небе́с. / Тем Тя, Богоро́дицу, / А́нгелов и челове́к чинонача́лия велича́ют.

Преподо́бнии отцы́ Афо́нстии, / Цари́цы Небе́сныя ополче́ние, / нача́ла тьмы посо́бием Ея́ победи́вшии, / плоть умертви́вшии и дух оживи́вшии, / благода́ти прия́вшии Боже́ственное де́йство, / не преста́йте моля́щеся за ны ко Го́споду.

Ра́дуйся, Ватопе́дская честна́я оби́тель, / обогати́вшаяся двана́десятию страда́льцы преподо́бными, / и́же изобличи́ша му́жественно царя́ Михаи́ла и патриа́рха Иоа́нна латиному́дренных, / те́мже и пре́дани бы́ша сме́рти удавле́ния, / и сугу́быя венцы́ от Бо́га восприя́ша.

Весели́ся, И́верская честна́я оби́тель, / я́ко мно́ги принесла́ еси́ Бо́гу от Твои́х чад преподобному́ченики, / и́же ве́ржени бы́ша во глубину́ морску́ю, / зане́ лжеслове́сие латиному́дренных мужему́дренне изобличи́ша.

Богоро́дичен: Ра́дуйся, Е́юже вся оби́тели Горы́ огражда́ются; / ра́дуйся, Е́юже вся ко́зни вра́жия разруша́ются; / ра́дуйся, на благоутро́бие к нам Сы́на Своего́ приклоня́ющая: / ра́дуйся, Е́юже и́мут дерзно́вение к Нему́ раби́ Твои́.

Ин

Ирмо́с: О́браз чи́стаго рождества́ Твоего́ / огнепали́мая купина́ показа́ неопа́льная; / и ны́не на нас напа́стей свире́пеющую угаси́ти, мо́лимся, пещь, /да Тя, Богоро́дице, /непреста́нно велича́ем.

Игра́й и ра́дуйся и ты, оби́тель Зогра́фская, / Го́сподеви прине́сшая сы́ны твоя́, два́десять и четы́ри Боже́ственныя преподобному́ченики, / и́же му́жески у́мысл латиному́дренных посрами́вше, / я́ко всесожже́ния свяще́нная, огне́м сконча́ша.

И ты, честна́я по́стнице Каре́йская, лику́й ны́не и ра́дуйся, / и́бо и ты ча́да твоя́ принесла́ еси́ Христо́ви, тве́рдыя преподобному́ченики, / и́же мече́м посече́ни бы́ша во главу́, / поне́же защити́ша оте́ческий догма́т и лати́нскую пре́лесть упраздни́ша.

Тро́ичен: Приими́, Всесвята́я Тро́ице Честна́я, / и́хже Гора́ Афо́нская прино́сит Ти, я́ко нача́тки же́ртвы избра́нныя, / вся, Тебе́ уго́ждшия пре́жде и по́слежде в ней, зна́емыя и незна́емыя, / и моли́твами их от вся́каго вре́да всех нас сохраня́й.

Богоро́дичен: Пе́сни благода́рственныя вси мы, в Горе́ сей живу́щии, прино́сим Ти, Ма́ти Бо́жия, / я́ко спаса́еши нас при́сно от вся́каго обстоя́ния, / пита́еши, устроя́еши и о нас промышля́еши. / Но мо́лим Ти ся, / и Боже́ственнаго Ца́рствия по кончи́не на́шей сподо́би ны.

Свети́лен воскре́сен, та́же отце́м.

Подо́бен: Жены́, услы́шите:

Ра́дуйся, Горо́ Афо́нская сла́вная, / моли́твенники твоя́ иму́щи просия́вшия в тебе́ Богоно́сныя отцы́: / днесь пра́здник ра́достен с насе́льники твои́ми сотво́рши, / почита́й собо́р их.

Сла́ва, и ны́не, Богоро́дичен:

Ра́дуйся, Присноде́во, прорече́ние Твое́ ви́дящи испо́лнено, / я́ко Гора́ сия́ свята́ бу́дет, / и́бо подвиза́вшиися в ней отцы́, и́хже днесь почита́ем, / яви́шася вои́стинну свя́ти, / де́лом запечатле́вше проро́чество Твое́, Отрокови́це.

На хвали́тех стихи́ры отце́в на 4, глас 1.

Подо́бен: Небе́сных чино́в:

Вси, и́же во Афо́не обита́ющии, / прииди́те, восхва́лим пе́сньми / Афо́нских отце́в честно́е собра́ние, / рачи́тельныя уго́дники Бо́жия, / на́ши же предста́тели / и моли́твенники непреста́нныя ко Го́споду.

Во Афо́нстей Горе́ теле́сне бы́вше, / отцы́ преподо́бнии, / ум весь возвы́систе / в го́ры мы́сленныя и ве́чныя / и вои́стинну я́ко невеще́ственнии А́нгели / на земли́ пожи́сте.

Кра́йняго ра́ди смире́ния ва́шего / и размышле́ния о ве́щех Боже́ственных, / предве́дение и предзре́ние вои́стинну от Бо́га прия́сте, отцы́, / Ду́ха благода́тию, / те́мже и предви́десте и глаго́ласте изве́стно бу́дущая, / я́ко настоя́щая.

Осия́еми ны́не непристу́пною сла́вою Пресве́тлыя Тро́ицы, / Богоно́снии отцы́, / и Боже́ственнаго весе́лия и ра́дости / исполня́ема, сла́внии, / о нас моли́теся приле́жно, / изба́витися нам му́ки ве́чныя.

Сла́ва, глас 8:

Преподо́бных оте́ц лик, / от разли́чных стра́н устреми́вшихся / и в Горе́ сей всели́вшихся, / сподо́бися дарова́ний духо́вных от Го́спода / и нам путь по́стничества де́лом и сло́вом показа́. / Те́мже, по до́лгу благохва́ляще их, возопии́м: / о мно́жество преподо́бных освяще́нное и Бо́гу возлю́бленное, / о пче́льный вертогра́де Богосо́бранный, / и́же в разсе́линах и пеще́рах Горы́ сея́, / я́коже во у́лиих мы́сленных, / сладча́йший мед безмо́лвия сототвори́сте / и фимиа́м благоуха́нный на же́ртвенник Небе́сный духо́вно принесо́сте, / Афо́нская похвало́ и благогла́снии орга́ни сла́вы Бо́жия, / моли́теся ко Го́споду поми́ловатися душа́м на́шим.

И ны́не, Богоро́дичен, глас то́йже:

Сия́ есть Гора́ Бо́жия, / в не́йже благоволи́ жи́ти Бог. / Испроси́ у́бо от Него́, Де́во, су́щим в Горе́ Твое́й, / благода́тное просвеще́ние и си́лу / на неосла́бное творе́ние дел благи́х, / да, спаси́тельное дея́ние и зре́ние стяжа́вше, / си́ми, а́ки двема́ крило́ма, / сподо́бимся от сея́ Горы́ возлете́ти в преми́рныя Го́ры / и в них обита́ти / Твои́м предста́тельством.

Славосло́вие вели́кое. И отпу́ст.

Блаже́нны, пе́рваго кано́на песнь 3-я и втора́го песнь 6-я. Проки́мен, глас 7: Честна́ пред Го́сподем /смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, / в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 43; или от Луки́, зача́ло 24. Прича́стен: В па́мять ве́чную:

Моли́тва

О блаже́ннии и святи́и отцы́, преподо́бнии, святи́телие, священному́ченицы и преподобному́ченицы, мироточи́вии и чудотво́рцы, земни́и А́нгели и Небе́снии челове́цы, сея́ Святы́я Горы́ насе́льницы и украси́телие, по Богоро́дице на́ши предста́телие пред Го́сподем, благоде́телие и назира́телие, ца́рское победоно́сное ополче́ние, в телесе́х победи́вшее безтеле́сныя де́моны, Царицы Небе́сныя Пречи́стыя Богоро́дицы мироуха́ннии цве́ти, светлоплодови́тая древеса́ мы́сленнаго сего́ рая́ Присноде́вы, ре́ки приснотеку́щия дарова́ний духо́вных! Приими́те похва́льная словеса́ сия́, я́же вам прино́сим, я́коже Госпо́дь прия́т вдови́цы две ле́пте, и о́бщее пра́зднество, соверша́емое на́ми в честь и па́мять ва́шу, объими́те, я́ко воню́ благоуха́ния и же́ртву благоприя́тну: не и́мамы бо и́но что принести́ по до́лгу благоде́телем на́шим за вели́кая благодея́ния, я́же прия́хом и и́мамы прия́ти от вас. Ей, испове́дуем, я́ко мы грех ра́ди на́ших не́смы досто́йни жи́ти на ме́сте сем и именова́тися сынми́ ва́шими, но вы за благосе́рдие ва́ше не отрица́йтеся бы́ти нам отцы́. Не забыва́йте нас, смире́нных, но соблюда́йте свяще́нныя монастыри́ ва́ша и вся скиты́ и ке́ллии и нас, живу́щих в них, сохраня́йте и избавля́йте от вся́каго искуше́ния и напа́сти в житии́ сем, в бу́дущем же ве́це да сподо́бимся святы́ми ва́шими моли́твами блаже́нства ку́пно с ва́ми, сы́нове со отцы́ свои́ми, ста́до с па́стыри свои́ми, ученицы́ со учи́тели свои́ми, и да услы́шим от вас о́ный блаже́нный глас ко Го́споду: се мы и де́ти, я́же дал еси́ нам, Го́споди! И, ра́дующеся, воздади́м вся́кую сла́ву, честь и поклоне́ние Отцу́ и Сы́ну и Свято́му Ду́ху во ве́ки веко́в. Ами́нь.

Собор святых, на Святой Афонской Горе просиявших.

Когда, по преданию, в Иерусалиме святые апостолы вместе с Божией Матерью определили по жребию, кому какая страна достанется для евангельской проповеди, Пречистой Деве Марии досталась Иверская земля (Грузия). Но ангел Господень возвестил Ей, что эта страна просветится в будущем, а Её уделом станет другая земля, в которую Её приведёт Сам Господь. По истечении некоторого времени святой Лазарь Четырёхдневный, находившийся в те годы на епископской кафедре о. Кипра, прислал за Божией Матерью корабль, на котором Она должна была приплыть к нему. Во время путешествия внезапный ветер пригнал корабль к Афонской Горе. Люди, обитавшие там, были язычниками, но Матерь Божия просветила их евангельской проповедью и, сокрушив языческих идолов, совершила множество чудес и исцелений, а также обратила многих к Христовой вере. Покидая Святую Гору, Она сказала, что не оскудеет милость Господа к этому месту до скончания века и что Она Сама будет тёплой Ходатаицей к Богу за тех, кто будет жить на этой земле.

Через семь веков Пресвятая Дева снова удостоила Афон Своим посещением в явлении афонскому пустынножителю преподобному Петру († 734; память 12 июня). Пресвятая Богородица подтвердила, что Афон является Её уделом. Она возвестила: «Для свободного служения Богу нет другого более удобного места, как Гора Афонская, которую Я приняла от Сына Своего Бога нашего в наследие Себе, дабы те, кои хотят удалиться от мирских забот и смущений мира, приходили туда и служили там Богу беспрепятственно и спокойно. Отныне будет называться Гора эта вертоградом Моим. Много люблю Я это место и придёт время, когда оно от края, на север и юг, исполнится множеством иноков. И если от всей души будут работать Богу и верно сохранят заповеди Его – великих дарований Я сподоблю их в великий день Сына Моего. И здесь, на земле, будут они иметь от Меня великую помощь: облегчу болезни и труды их, при малых средствах их они будут иметь довольство в жизни, [...] и славным сделаю имя их во всей подсолнечной».

Обещание Пресвятой Богородицы сбылось. Святые, просиявшие на Святой Афонской Горе, дали Православному миру высочайшие образцы подвижнической жизни, душевной чистоты, нелицемерной любви к ближним, искренней веры, самоотверженных бдений и постов, внутреннего духовного делания...

Монашество на Афоне возникло в V веке, а в конце VII века весь полуостров был передан императором Погонатом в вечную собственность населявшим Святую Гору монахам. С этого времени Афон начал приобретать славу наилучшего места для иноческих подвигов. Несмотря ни на какие беды, голод, многочисленные набеги арабов, неоднократные притязания иконоборцев, католиков и иных еретиков, несмотря на четырёхвековое турецкое мусульманское владычество Афон оставался и остаётся до сего дня непоколебимым хранителем Православной веры.

С материнской заботливостью опекая Святой Афон как Своё наследие Владычица мира не раз являлась афонским святым, призывающим Её в своих молитвах. Кроме преподобного Петра – родоначальника афонского монашества, которого Божия Матерь удостоила Своего посещения, Она неоднократно проявляла заботу о преподобном Афанасии Афонском († 1000); память 5 июля), основателе одного из первых общежительных монастырей и создателе Афонского монашеского Устава, удостоившегося лицезреть Её чувственными очами. Она освободила от оков преподобного Агапия (память 1 марта) и выпустила из темницы святого Филофея (память 21 октября), даровала год жизни преподобному Нифонту Ватопедскому (память 21 января), исцелила тяжкую болезнь ног обладавшему прекрасным голосом преподобному Иоанну Кукузелю († ХII в.; память 1 октября); удостоила Своим посещением преподобного Григория Доместика († ХIV в.; память 1 октября), которому Она дала монету, сотворившую впоследствии множество чудес; сподобила кормить из Своих рук преподобного Максима Кавсокаливита († 1354; память 13 января), скрывавшего от других свои молитвенные и постнические подвиги и прославившегося многими чудесами. Голос Пресвятой Богородицы удостоились слышать основатель Симоно-Петрского монастыря святой чудотворец Симон Мироточивый († 1287; память 29 декабря), безымянный игумен Ватопедского монастыря, которого Божия Матерь предупредила о намерении разбойников ограбить обитель (807 г.; память о событии 21 января), а также святой Гавриил Грузин († Х в.; память 12 июля), безмолвствовавший на горе в Иверской обители и услышавший повеление Богородицы пойти и взять приплывшую по воде икону Божией Матери, которую впоследствии стали называть Иверской или Вратарницей (празднование 12 февраля). Тайнозрителями Божией Матери были святой Геннадий Ватопедский (память 17 ноября), сподобившийся видеть совершенное чудо, когда Пресвятая Богородица незримо для других наполнила елеем пустой сосуд, а также преподобный Косма, отшельник Зографский († 1323; память 22 сентября), наблюдавший за тем, как Пречистая Дева распоряжалась в храме во время службы и сподобившийся в другой раз слышать Её голос, который повелел ему удалиться из монастыря на безмолвие. Божия Матерь благословила на мученичество преподобномученика Агафангела Есфигменского(† 1819; память 19 апреля), который некогда под угрозой отрёкся от Христа и принял магометанство, но впоследствии, став афонским монахом, исповедал перед турками свою веру и был обезглавлен; пришла Она утешить святого мученика Константина († 1819; память 2 июня), который находился перед казнью в темнице после невыносимых сорокадневных пыток; этот афонский монах в детстве был магометанином, но впоследствии решил исповедать Христа перед бывшими единоверцами.

Любовь Пречистой Божией Матери к избранному Своему уделу проявлялась ещё и в чудесных знамениях от Её икон. Православная Церковь особо чтит память прославления чудотворных образов Божией Матери Акафистной (память 12 января), Иверской (память 12 февраля и 13 октября ), Млекопитательницы (память 12 января), Скоропослушницы (память 9 ноября), Достойно есть (память 11 июня), Троеручицы (память 28 июня и 12 июля) и многих других икон, находящихся на Афоне. Списки с этих образов во множестве распространялись на Руси и не раз Богородица помогала русским богомольцам, с верою к Ней обращавшимся.

На Святой Афонской Горе и поныне существуют Великая Лавра и монастыри, издревле прославившиеся своими подвижниками. Некогда, во времена расцвета духовной жизни (X–XIV), количество обителей достигало здесь едва ли не сотни. К XX веку сохранилось всего 20 монастырей, 12 скитов и некоторое, меняющееся со временем, количество отшельнических келий. Церковь свято почитает основателей, строителей и возобновителей святых обителей: строителя и первого настоятеля двух монастырей – во имя святого великомученика и победоносца Георгия и Ксиропотамской обители – преподобного Павла Ксиропотамского († IХ в.; память 28 июля); основателей Дохиарского монастыря преподобных Евфимия и Неофита († Х в.; память 9 ноября), учеников преподобного Афанасия Афонского; основателей и первых игуменов знаменитой Иверской обители преподобного Иоанна († 998; память 12 июля) и его сына преподобного Евфимия, именуемого в Грузии Новым Златоустом († 1028; память 13 мая); возобновителя Хилендарского монастыря, бывшего Сербского царя, преподобного Симеона Мироточивого († 1200; память 13 февраля): ктитора обители Крестителя Господня Иоанна Предтечи преподобного Дионисия и его сподвижника преподобного Дометия († ХIV в.; память 25 июля); основателя Григориатской обители преподобного Григория Серба († ХV в.; память 8 декабря).

Эти прославленные монастыри воспитали многих наставников, учителей и духоносных отцов Святой Православной Церкви. В Иверской обители подвизался преемник подвижника Евфимия преподобный Георгий Иверский († 1065; память 27 июня), который продолжил его дело по переводу на грузинский язык Священного Писания и Богослужебных книг. Ватопедская обитель дала Православию великого богослова и писателя святителя Григория Паламу, архиепископа Солунского († 1359; память 14 ноября); это был замечательный теоретик и практик исихазма – учения, которое шло от пустынников IV века и утвердилось на Афоне ещё в VI веке стараниями блаженного Исихия Хоривита, Безмолвника (память 3 октября). В этом же монастыре подвизались преподобные Никодим († XIV в.; память 11 июля) и Никифор († XIV в.; память 4 мая), которые известны как учители и наставники святителя Григория Паламы. Святой Никифор оставил после себя сочинение «Мудрый способ Иисусовой молитвы», вошедшее в издание, названное «Добротолюбие». Ещё одним духовным руководителем святителя Григория был старец Лавры преподобного Афанасия Григорий Византийский († ок. 1360; память 6 апреля). Другой великий православный учитель преподобный Григорий Синаит († 1310; память 8 августа) вобрал опыт подвижнической жизни, обойдя на Афоне все монастыри и познакомившись со всеми знаменитыми для своего времени старцами Святой Горы, и написал множество наставлений о внутренней жизни и несколько канонов. Его ученик преподобный Ромил († 1375; память 16 января), живший в Лавре святого Афанасия, был наставником монаха Григория, будущего Митрополита Киевского († 1419). Воспитанником Хилендарского монастыря был известный болгарский учитель, автор «Истории славяно-болгарской» преподобный Паисий († XVIII в.; память 19 июня). Огромное количество высокодуховных творений оставил после себя воспитанник Дионисиатского монастыря и Пантократорского скита преподобный Никодим Святогорец († 1809; память 1 июля), автор знаменитой «Невидимой брани», предисловия к «Добротолюбию», многих агиографических трудов и «Службы Преподобным и Богоносным отцам, на Афоне постнически просиявшим» и др. Насельником русского Пантелеимонова монастыря был святитель Савва, первый архиепископ Сербский († 1237; память 12 января); ему принадлежит новая редакция Кормчей книги, которая легла в основу всех её русских изданий.

Святая Гора Афон, в частности Хилендарский монастырь, оказали огромное влияние на Сербскую Церковь. Из этой обители вышли многие сербские святители: кроме святителя Саввы I, который участвовал вместе со своим отцом святым Симеоном Мироточивым в строительстве Хилендарской обители, здесь до своего святительского служения подвизались архиепископ Арсений I († 1266; память 28 октября); архиепископ Савва II († 1271; память 8 февраля); архиепископ Иоанникий I († 1269; память 28 мая); архиепископ Евстафий († 1279; память 4 января); архиепископ Даниил († 1338; память 20 декабря) – составитель «Родослова», книги, описывающей жизнь сербских царей и первосвятителей; Патриарх Ефрем II († 1400; память 15 июня).

Начинал свои подвиги на Афоне в Есфигемской обители святитель Афанасий I, Патриарх Константинопольский († 1311; память 24 октября), два́жды удостоившийся в жизни Божественных откровений. В 1308 году он возвёл в сан Митрополита Киевского святителя Петра († 1326; память 21 декабря). Здесь же на Святой Горе начинали монашескую жизнь первосвятители Православной Церкви Патриархи Каллист I Катафиогит († 1363; память 21 июня) и Каллист II Ксанфопула († кон. XIV в.; память 22 ноября). Оба они известны как авторы духовных аскетических творений. На Афон в конце жизни за утешением и в поисках сердечного мира и тишины пришёл святитель Нифонт, Патриарх Константинопольский († 1460; память 11 августа), который, скрыв свой сан, нёс послушание как простой монах. Часто бывавший в России святитель Афанасий III Пателарий, Патриарх Константинопольский, Лубенский чудотворец († 1654; память 2 мая), за свою долгую жизнь не раз удалялся на Афон для молитвенного уединения. Здесь подвизались святитель Василий, архиепископ Солунский († IХ в.; память 1 февраля), святитель Феона, епископ Солунский († ХVI в.; память 4 апреля), и святитель Феодосий, митрополит Трапезундский († ХVI в.; память 11 января), который пришёл на святительскую кафедру из игуменов Филофеевской обители.

Безмолвие, постнические труды, пустынножительство, внутреннее умное делание, смирение, терпение и другие высшие монашеские качества привели к святости многих афонских иноков: преподобный Евфимий Новый, Солунский († 889; память 15 октября), безмолвствовал в пещере; преподобный Фома Малеин († Х в.; память 7 июля) удостоился откровения пророка Илии, а от Господа – благодати исцеления недугов; преподобный Нифонт († 1330; память 14 июня) имел пророческий дар; мощи преподобного Дамиана Есфигемского († нач. XIV в.; память 23 февраля) через сорок дней после кончины источали великое благоухание; преподобный Филофей Карейский († ХV в.; память 5 декабря) был прозорливым; такой же дар получил и преподобный Леонтий († 1605; память 18 июня), 60 лет не выходивший за пределы обители святого Дионисия; преподобный Герасим († 1579; память 20 октября) не только исцелял болезни, но и изгонял нечистых духов; испытавший при жизни клевету и злобу преподобный Симеон Босой († XVI; память 19 апреля) после блаженной кончины стал исцелять своими мощами людей; те же испытания преодолел своим смирением и преподобный Нектарий Бительский († 1550; память 5 декабря), его мощи, несмотря на то, что при жизни святой был поражён проказой, источали благоухание; за монашеские подвиги преподобных Феофила († 1548; память 8 июля) и Нила († XVII; память 12 ноября) Господь даровал обильное истечение мира от их мощей; как святые почитаются безмолвствовавший в Филофеевской обители преподобный Дометий († XVI; память 7 августа) и преподобный Дионисий Олимпийский († XVI; память 24 января), бывший некоторое время игуменом этого монастыря, а также Филофей Дионисиатский (память 21 октября).

Особо почитаются на Афоне иноки, удостоившиеся мученических венцов. В конце XIII века византийский император Михаил Палеолог решил укрепить государство за счёт сговора с католическим Римом. Униатские настроения императора поддержал Константинопольский Патриарх Иоанн Векка. Афонские иноки направили императору и Патриарху послание, в котором решительно отказывались принять унию. За это на Афон были посланы войска латинян и наёмные отряды турок. В 1284 году в Болгарском монастыре Зограф католики сожгли в монастырской башне 26 человек, причисленных к лику святых. Среди них были игумен Фома и монахи Варсонофий, Кирилл, Михей, Симон, Иларион, Иаков, Иов, Киприан, Савва, Иаков, Мартиниан, Косма, Сергий, Мина, Иоасаф, Иоанникий, Павел, Антоний, Евфимий, Дометиан, Парфений и 4 мирянина (память 10 октября). В эти же годы в Ватопедском монастыре паписты утопили в море преподобномученика игумена Евфимия, а 12 иноков повесили (память 4 января). В Иверской обители многие иноки были утоплены в море, другие взяты в плен (память 13 мая). В Карейском монастыре паписты обличавшего латиномудрствующих в ереси преподобномученика Прота после многих истязаний повесили, а остальных убили мечами (память 5 декабря.)

Некоторые монахи, попавшие в руки турецким властям или по причине ложных наветов, или за бесстрашную проповедь Христа были замучены мусульманами. Среди них преподобномученики Иаков и его ученики Иаков и Дионисий Дохиарские († 1520; память 1 ноября); преподобномученик Иоасаф († 1536; память 26 октября); из Филофеевского монастыря преподобномученик Дамиан († 1568; память 23 февраля), преподобномученик Макарий († 1590; память 6 октября); преподобномученик Роман Карпенисийский († 1694; память 5 января); игумен Хилендарского монастыря преподобномученик Дамаскин Новый († 1771; 16 января); равноапостольный священномученик Косма († 1779; память 4 августа), проповедовавший Святое Евангелие в отдалённых районах Европы, в том числе в Албании; схимник Хилендарского монастыря преподобномученик Онуфрий († 1818; память 4 января).

Другие иноки и послушники афонские получили мученический венец за то, что они вначале или по малодушию, или по неразумению отреклись от Христа и приняли магометанство, но в дальнейшем покаялись у афонских старцев и решились по их благословению на открытое исповедничество своей веры перед мусульманами. Преподобномученики начала XVIII века Роман (память 16 февраля), Никодим (память 11 июня) и Пахомий Россиянин (память 21 мая), пройдя школу монашеской жизни у преподобного Акакия Нового († 1730; память 12 апреля), получили от него благословение на открытую проповедь христианской веры перед турецкими властями, за что впоследствии были подвергнуты пыткам и казнены.

Среди омывших своей кровью отречение от Христа находятся преподобномученики Илия Ардунис († 1686; память 31 января), Никодим Мироточец († 1722; память 11 июля), Феодор († 1784; память 30 января), Иоанн Болгарин († 1794; память 5 марта), Георгий († 1794), Лука († 1802; память 23 марта), Никита († 1808; память 4 апреля), Прокопий († 1810; память 25 июня), Игнатий († 1814; память 18 октября), Евфимий Новый († 1814: память 22 марта), Акакий († 1816; память 1 мая) и многие другие.

Теснейшими узами с Афоном на протяжении почти тысячелетия связана Русская Православная Церковь. Русские обители на Святой Горе являются одними из самых древнейших. Сохранились документы о том, что Русский Пантелеимонов монастырь возник во времена равноапостольного великого князя Владимира († 1015; память 15 июля). Отец русского монашества преподобный Антоний Киево-Печерский († 1073; память 10 июля) был афонским пострижеником; он пришёл к себе на родину по благословению старцев Святой Горы и принёс с собой монашеский Устав, по которому он начал строить иноческую жизнь в основанном им монастыре. С этого времени связь с Афоном не прерывалась. Другой созидатель русского монашества преподобный Сергий, игумен Радонежский († 1392; память 25 сентября и 5 июля), явился продолжателем традиций древних святых отцов, традиций, которые были возобновлены в X–XIV веках афонскими подвижниками. Влияние Афона на преподобного Сергия несомненно. Его ученик преподобный Сергий Обнорский, Нуромский, Вологодский чудотворец († 1412; память 7 октября), пришёл к нему в Троицкую обитель со Святой Афонской Горы. Преподобный Арсений Коневский († 1447; память 12 июня) дважды ходил на Афон. В первый раз он принёс с собой на родину икону Божией Матери, получившую впоследствии название Коневской (память 10 июля) и прославившуюся многими благодатными знамениями. Преподобный Савва Вишерский († 1461; память 1 октября) начинал подвиги на Афоне, где он трудился над переписыванием Богослужебных книг. Преподобный Савва Крыпецкий († 1495; память 28 августа) был пострижеником Афона, где он научился подвигу отшельнической жизни и безмолвия. Исихастское учение афонских монахов оказало несомненное влияние на подвижническое житие преподобного Нила Сорского († 1508; память 7 мая), который некоторое время жил на Святой Горе. Известен его ученик, преподобный Иннокентий Комельский († 1521; память 19 марта), путешествовавший с преподобным Нилом на Святую Гору. Особенно много сделал для Русской Православной Церкви инок Ватопедской обители преподобный Максим Грек († 1556; 21 января), трудившийся над переводами на церковнославянский язык творений святых отцов и Священных книг, над сочинениями против латинян, язычников и др.

Русская Православная Церковь и русские государи на протяжении многих веков щедро одаривали афонские обители и деньгами, и драгоценностями, и церковной утварью, и книгами. Связь Русской Церкви с Афоном не прерывается и до настоящего времени.

История Афона, накопленный опыт веков оправдывают данное Богоматерью обетование. Взирая на Святую Гору как на Своё Божественное наследие, Она и до сего дня не перестаёт подавать Свои благодатные щедроты, особенно тем, кто проходит здесь свой жизненный путь под крестом иноческого самоотвержения. Афон и его монастыри являются непоколебимым оплотом Православия.

1. Афонский Патерик. Ч. 1–2, изд. 6-е. М., 1889–1890.

2. Вышний Покров над Афоном, или сказания о святых. Изд. 9-е. М., 1902.

3. Порфирий (Успенский), епископ. История Афона. Ч. 1–3. Киев, 1877.

4. Путеводитель по Святой Афонской Горе. Изд. 8-е. М., 1903.

5. Служба преподобным и богоносным отцам, во Афоне постнически просиявшим. СПб., 1900.

6. Поучения по руководству Афонского Патерика. Изд. 2-е. Афон, 1896.

13. Преподобный Иерофей Иверянин (1745);

22. Преподобный Косма, отшельник Зографский (1323).

1. Преподобный Савва Вишерский (1461);

1. Преподобный Иоанн Кукузель (XII);

1. Преподобный Григорий Доместик (XIV);

2. Преподобный Сергий Обнорский, Вологодский чудотворец (1412);

3. Преподобный Исихий Хоревит, Безмолвник (VI);

6. Преподобномученик Макарий (1590);

7. Преподобный Сергий Обнорский, Вологодский чудотворец (1412);

10. 26 преподобномучеников Зографских (1284);

15. Преподобный Евфимий Новый Солунский (889);

18. Преподобномученик Игнатий (1814);

20. Преподобный Герасим (1579);

24. Святитель Афанасий I, Патриарх Константинопольский (1311);

26. Преподобномученик Иоасаф (1536);

28. Святитель Арсений, архиепископ Сербский (1266).

1. Преподобномученики Иаков, Иаков, Дионисий Дохиарские (1520);

9. Преподобные Евфимий и Неофит (X);

12. Преподобный Нил Мироточивый (1651);

14. Святитель Григорий Палама, архиепископ Солунский (1359);

22. Святитель Каллист II Ксанфопула, Патриарх Константинопольский (XIV).

5. Преподобномученики Прот и иноки Карейского монастыря (XIII);

5. Преподобный Нектарий Бительский (1500);

5. Преподобный Филофей Карейский (XI);

7. Преподобный Герасим Эвбейский (XIV);

8. Преподобный Григорий Серб (XV);

13. Преподобный Иерофей Каламский (1745);

20. Святитель Даниил, архиепископ Сербский (1338);

29. Преподобный Симон Мироточивый (1287);

30. Преподобномученик Гедеон Новый (1818).

4. Преподобномученик Онуфрий Хилендарский (1818);

4. Преподобномученики Евфимий и 12 иноков Ватопедских (XIII);

4. Святитель Евстафий, архиепископ Сербский (1279);

5. Преподобномученик Роман Карпенисийский (1694);

11. Святитель Феодосий, митрополит Трапезундский (XVI);

12. Святитель Савва I, архиепископ Сербский (1237);

13. Преподобный Максим Кавсокаливит (1354);

16. Преподобномученик Дамаскин Новый (1771);

21. Преподобный Нифонт Ватопедский (1330);

21. Преподобный Максим Грек (1556);

30. Преподобномученик Феодор (1784);

31. Преподобномученик Илия Ардунис (1686).

1. Святитель Василий, архиепископ Солунский (IX);

8. Святитель Савва II, архиепископ Сербский (1267);

13. Преподобный Симеон Мироточивый (1200);

16. Преподобномученик Роман (XVIII);

23. Преподобный Дамиан Есфигемский (XIV);

23. Преподобномученик Дамиан Филофеевский (XVI).

1. Преподобный Агапий;

5. Преподобномученик Иоанн Болгарин (1794);

19. Преподобный Иннокентий Ко́мельский (1521);

22. Преподобномученик Евфимий Новый (1814);

23. Преподобномученик Лука (1802).

4. Преподобномученик Никита (1802);

4. Святитель Феона, архиепископ Солунский (XVI);

6. Преподобный Григорий Византийский (XIV);

12. Преподобный Акакий Новый (1730);

19. Преподобный Симеон Босой (XVI);

19. Преподобномученик Агафангел Есфигемский (1819).

1. Преподобномученик Акакий (1813);

2. Святитель Афанасий III Пателарий, Патриарх Константинопольский (1654);

4. Преподобный Никифор Ватопедский (XIV);

7. Преподобный Нил Сорский (1508);

13. Преподобный Евфимий Иверский (1028);

13. Преподобномученики Иверские (Х1П);

21. Преподобномученик Пахомий Россиянин (XVIII);

28. Святитель Иоанникий I, архиепископ Сербский (1269).

2. Священномученик Константин (1819);

11. Преподобномученик Никодим (XVIII);

12. Преподобный Петр Афонский (734);

12. Преподобный Арсений Коневский (1447);

14. Преподобный Нифонт (1330);

15. Святитель Ефрем II, Патриарх Сербский (1400);

18. Преподобный Леонтий (1605);

19. Преподобный Паисий Хилендарский (XVIII);

21. Святитель Каллист I Катафиогит, Патриарх Константинопольский (1363);

25. Преподобномученик Прокопий (1810);

27. Преподобный Георгий Иверский (1065).

1. Преподобный Никодим Святогорец (1809);

5. Священномученик Киприан (1679);

5. Преподобный Афанасий Афонский (1000);

7. Преподобный Фома Малеин (X);

8. Преподобный Феофил Мироточивый (1548);

10. Преподобный Антоний Киево-Печерский (1073);

11. Преподобномученик Никодим Мироточец (1722);

11. Преподобный Никодим Ватопедский (XIV);

12. Преподобный Гавриил Грузин (X);

12. Преподобный Иоанн Иверский (998);

16. Преподобный Ромил (1375);

25. Преподобный Дометий (XIV);

25. Преподобный Дионисий (XIV);

28. Преподобный Павел Ксиропотамский (IX).

4. Равноапостольный священномученик Косма (1779);

7. Преподобный Дометий Филофеевский (XVI);

8. Преподобный Григорий Синаит (1310);

11. Святитель Нифонт, Патриарх Константинопольский (1460);

28. Преподобный Савва Крыпецкий (1495).

На Го́споди, воззва́х: поста́вим стихо́в 10 и пое́м стихи́ры воскре́сны 1-го гла́са 6, и святых 4.

Стихи́ры святы́х, глас 2.

Подо́бен: Ки́ими похва́льными:

Ки́ими похва́льными венцы́ / увязе́м святы́х, от бо́лгар просия́вших, / и́хже имена́ написа́шася в кни́зе живо́тней?/ Из ко́рене бо ди́вия ма́слины произра́стше, / и Креще́нием святы́м к благоро́дному дре́ву Це́ркве Бо́жия прилепи́вшеся, / и по́двиг предо́брый подъе́мше любве́ Христо́вы, / еле́й гобзова́ша благода́ти, / и́мже оби́льне умаща́ют ду́ши нас, / пра́зднующих любо́вию честну́ю па́мять их.

Ки́ими пе́сненными добро́тами / воспои́м святы́х, от бо́лгар просия́вших, / Кири́лла со Мефо́дием, / Нау́ма и Кли́мента, / Са́вву же с Гора́здом и Ангела́рием?/ Си́и бо, соверши́вше труды́, апо́стольским ра́вныя, / Ева́нгелие пропове́давше Ца́рствия, / и гоне́ния лю́тая от сопроти́вных претерпе́вше, / просвети́ша род слове́нский и просвеща́ют нас, / воспева́ющих любо́вию честну́ю па́мять их.

Ки́ими вдохнове́нными пе́сньми / восхва́лим святы́х, от бо́лгар просия́вших?/ Пе́рваго у́бо в му́ченицех Боя́на кня́зя / и Влади́мира Иоа́нна, / сла́ву же гра́да Софи́йскаго Никола́я, / и о́ба Гео́ргия, и Зла́ту Мегли́нскую, / Игна́тия, Дамаскина́, Ону́фрия же и про́чих, / и́же кро́вию му́ченичества омы́ша со́весть, / я́коже зерца́ло о́браза Бо́жия, / и за Христа́ пострада́вше, за всех пострада́вшаго, / дерзнове́ние прия́ша моли́тися за нас, / восхваля́ющих любо́вию честну́ю па́мять их.

Ки́ими благоглаго́ливыми словесы́ / возвели́чим святы́х, от бо́лгар просия́вших? / Иоа́нна у́бо Ры́льскаго и Гаврии́ла, / Иоаки́ма и Про́хора, / Феодо́сия же и Рому́ла, / Косму́ и Пи́мена Зо́графских, / Иоа́нна сладкогла́снаго Кукузе́ля и про́чих, / и́же пусты́нным житие́м возсия́ша, я́коже зве́зды небе́сныя, / посто́м же и моли́твою е́же по о́бразу усоверши́вше, / подо́бни сотвори́шася Отцу́ Небе́сному / и благода́ть прия́ша моли́тися за нас, / велича́ющих любо́вию честну́ю па́мять их.

Сла́ва святы́х, глас 8.

Вседержи́телю Го́споди, / Де́лателю виногра́да духо́внаго, / се прия́л еси́ нача́тки ро́да бо́лгарскаго, / плоды́ сла́дкия преподо́бия и пра́вды, / не проклени́ у́бо смоко́вницы за непло́дствие, / ниже́ повели́ рабо́м отсещи́, / па́че же удобри́ благослове́нием благосты́нным к бо́льшему плодоноше́нию, / утвержда́я в Правосла́вии Це́рковь на ве́ки моли́твами их / и посеща́я люде́й Твои́х ми́лостию и щедро́тами.

И ны́не, Догма́тик, глас 1:Всеми́рную сла́ву:

Вход. Проки́мен дне. И чте́ния.

Проро́чества Иса́иина чте́ние (глава́ 43):

Тако глаго́лет Госпо́дь: / вси язы́цы собра́шася вку́пе, / и соберу́тся кня́зи от них, / кто возвести́т сия́ в них?/ Или́, я́же от нача́ла, кто слы́шана сотвори́т вам?/ Да приведу́т свиде́тели своя́ и оправдя́тся, / и да услы́шат, и да реку́т и́стину. / Бу́дите Ми свиде́тели, / и Аз Свиде́тель, глаго́лет Госпо́дь Бог, / и о́трок, его́же избра́х, / да позна́ете и ве́руете Ми, и разуме́ете, я́ко Аз есмь; / пре́жде Мене́ не бысть ин бог и по Мне не бу́дет. / Аз есмь Бог, и несть, ра́зве Мене́, спаса́яй. / Аз возвести́х и спасо́х, уничижи́х, и не бе в вас чу́ждий. / Вы Мне свиде́тели, и Аз Госпо́дь Бог. / И еще от нача́ла Аз есмь, / и несть от рук Мои́х избавля́яй; / сотворю́, и кто отврати́т то?/ Си́це глаго́лет Госпо́дь Бог, / избавля́яй вас Святы́й Изра́илев.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией, / и не прико́снется их му́ка. / Непщева́ни бы́ша во очесе́х безу́мных умре́ти, / и вмени́ся озлобле́ние исхо́д их. / И е́же от нас ше́ствие сокруше́ние, / они́ же суть в ми́ре. / И́бо пред лице́м челове́ческим а́ще и му́ку прии́мут, / упова́ние их безсме́ртия испо́лнено. / И вма́ле нака́зани бы́вше, / вели́кими благоде́тельствовани бу́дут, / я́ко Бог искуси́ я / и обре́те их досто́йны Себе́. / Я́ко зла́то в горни́ле, искуси́ их / и, я́ко всепло́дие же́ртвенное, прия́т я. / И во вре́мя посеще́ния их возсия́ют / и, я́ко и́скры по сте́блию, потеку́т. / Су́дят язы́ком и облада́ют людьми́, / и воцари́тся Госпо́дь в них во ве́ки. / Наде́ющиися Нань разуме́ют и́стину / и ве́рнии в любви́ пребу́дут Ему́, / я́ко благода́ть и ми́лость в преподо́бных Его́ / и посеще́ние во избра́нных Его́.

Прему́дрости Соломо́ни чте́ние (главы́ 5 и 6):

Пра́ведницы во ве́ки живу́т, / и в Го́споде мзда их, и попече́ние их у Вы́шняго. / Сего́ ра́ди прии́мут Ца́рствие благоле́пия / и вене́ц добро́ты от руки́ Госпо́дни, / зане́ десни́цею покры́ет я и мы́шцею защити́т их. / Прии́мет всеору́жие рве́ние Свое́ / и вооружи́т тварь в месть враго́м. / Облече́тся в броня́ пра́вды / и возложи́т шлем суд нелицеме́рен. / Прии́мет щит непобеди́мый преподо́бие, / поостри́т же напра́сный гнев во ору́жие, / спобо́рет же с ним мир на безу́мныя. / По́йдут праволу́чныя стре́лы мо́лниины / и, я́ко от благокру́гла лу́ка облако́в, на наме́рение полетя́т. / И, от каменоме́тныя я́рости испо́лнь, паду́т гра́ды, / вознегоду́ет на них вода́ морска́я, / ре́ки же потопя́т я на́гло. / Сопроти́в ста́нет им дух си́лы / и, я́ко ви́хор, разве́ет их, / и опустоши́т всю зе́млю беззако́ние, / и злоде́йство преврати́т престо́лы си́льных. / Слы́шите у́бо, ца́рие, и разуме́йте, / навы́кните, судии́ конце́в земли́, / внуши́те держа́щии мно́жества / и гордя́щиися о наро́дех язы́к, / я́ко дана́ есть от Го́спода держа́ва вам / и си́ла от Вы́шняго.

На лити́и стихи́ры, глас 1:

Весели́тся Не́бо и земля́ в честне́й па́мяти / святы́х, от бо́лгар просия́вших, –/ Не́бо, я́ко прия́т я́ во блаже́нная жили́ща, / земля́ же, я́ко освяти́ся кро́вию их, за Христа́ проли́тою, / и слеза́ми преподо́бнаго покая́ния. / Го́ры возсия́ша благода́тию: / Ры́льская с Осого́вскою, / я́ко пожи́ша в них с Бо́гом Небе́снии гра́ждане; / Родо́пская с Пири́нскою, / я́ко окропи́шася кро́вию му́ченик, / ага́рянския ве́ры не прие́мших, / за Христа́ пострада́вших и Ему́ еди́ному ве́домых; / и свяще́ннейший Афо́н, на не́мже облобыза́ся му́ченичество с преподо́бием.

Глас 2: Свети́ся, свети́ся, но́вый Иерусали́ме, / полн бо сый сла́вы Бо́жия, / полн еси́ и пе́рвенцев святы́х от вся́каго язы́ка и коле́на, / и́же от ско́рби вели́кия преидо́ша, / испра́вше ри́зы своя́ в крови́ за Христа́ муче́ния, / и и́же не оскверни́шася по́хотию пло́ти, / моля́щеся же при́сно Влады́це Свято́му / о ми́ре Це́ркви и ми́рови.

Сла́ва, глас 5:

Ублажа́ет вас Христо́с, святи́и ро́да бо́лгарскаго, / я́ко обнища́вше Его́ ра́ди те́лом и ду́хом, / Ца́рства Небе́снаго сокро́вищами обогати́стеся, / пла́кавше слеза́ми покая́ния, / Уте́шителя в себе́ всели́сте, / кро́тости Христо́вей научи́вшеся, / зе́млю но́вую насле́довасте, / жа́ждавше пра́вды Бо́жия, досто́йно насы́тистеся, / за ми́лость поми́ловани бы́сте, / мир приобре́тше, сы́ны Бо́жии нареко́стеся, / чистото́ю се́рдца Бо́га неви́димо узре́сте, / гони́ми бы́вше, в Ца́рство скоре́е внидо́сте. / Ра́дуйтеся про́чее и весели́теся, / о при́сных моля́щеся, / любо́вию соверша́ющих честну́ю ва́шу па́мять.

И ны́не, Богоро́дичен:

Храм и Дверь еси́, / пала́та и престо́л Царе́в, / Де́во Всечестна́я, / Е́юже Изба́витель мой, Христо́с Госпо́дь, / во тьме спя́щим яви́ся, / Со́лнце сый Пра́вды, просвети́ти хотя́, / я́же созда́ по о́бразу Своему́ руко́ю Свое́ю. / Те́мже, Всепе́тая, / я́ко ма́терне дерзнове́ние к Нему́ стяжа́вшая, / непреста́нно моли́ спасти́ся душа́м на́шим.

На стихо́вне стихи́ры воскре́сны.

Сла́ва святы́х, глас 6:

Ве́рнии раби́ и му́дрии Го́спода своего́, / И́же поста́вив вас над име́нием / и, призре́в в нощны́я стра́жи жи́зни сея́ / и обре́т неусы́пно бдя́щих, / введе́ в Черто́г ра́дости Своея́. / Те́мже мо́лим вы: / не преста́йте подаю́ще сро́дником ва́шим пи́щу благода́ти Бо́жия / во вре́мя свое́ хода́тайствы ва́шими / и моля́щеся Го́сподеви поми́ловати ду́ши на́ша.

И ны́не, Богоро́дичен: Творе́ц и Изба́витель:

Тропа́рь всем святы́м бо́лгарским, глас 4:

Собо́р ваш честны́й почита́юще / и па́мять святу́ю пра́зднующе, / святи́и, от бо́лгар просия́вшии, / приле́жно мо́лим вы: / Го́спода о всех моли́те, / па́че же о при́сных, / сохрани́тися земли́ Бо́лгарстей от вся́ких бед / и наро́ду утверди́тися на ве́ки в ве́ре Правосла́вней, / я́ко да, ми́рное житие́ благоче́стно пожи́вше, / вку́пе с ва́ми улучи́м ве́чное Оте́чество / в блаже́ннем Христа́ Бо́га Ца́рствии.

На Бог Госпо́дь: тропа́рь воскре́сен, два́жды. Сла́ва: тропа́рь святы́х. И ны́не: Е́же от ве́ка утае́нное: По стихосло́виих седа́льны воскре́сны гла́са. Степе́нна, проки́мен гла́са. Вся́кое дыха́ние: Ева́нгелие воскре́сно. Воскресе́ние Христо́во: Псало́м 50-й.

Сла́ва: Моли́твами святы́х ро́да бо́лгарскаго, / Ми́лостиве, очи́сти / мно́жества согреше́ний на́ших.

И ны́не: Моли́твами Богоро́дицы: Поми́луй мя, Бо́же: Стихи́ра, глас 6: Воскре́с Иису́с от гро́ба:

Кано́н воскре́сный гла́са, Богоро́дицы и Всем святы́м, в Болга́рии просия́вшим, глас 4, его́же краегране́сие: Святы́х ро́да бо́лгарскаго пою́, Парфе́ний.

Песнь 1

Ирмо́с: Отве́рзу уста́ моя́, / и напо́лнятся Ду́ха, /и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Припе́в: Святи́и ро́да бо́лгарскаго, моли́те Бо́га о нас!

Свя́те святы́х, свы́ше ми пода́ждь благода́ть, / я́ко да по достоя́нию воспою́ святы́х, / и́хже от бо́лгар благоволи́л еси́ прия́ти / во обетова́ние Небе́сных благ, воспева́ющих: / Ди́вный, сла́вно творя́й чудеса́.

Восхоте́в, воздви́же Бог царя́ Бори́са во втора́го Моисе́я наро́ду бо́лгарскому, / вести́ я́ из Еги́пта идолослуже́ния / сквозе́ мо́ре Креще́ния во обетова́ние благоче́стия, пою́щих: / Ди́вный, сла́вно творя́й чудеса́.

Я́ти бы́вше мре́жею Про́мысла Бо́жия, Мефо́дий и Кири́лл со ученики́, / я́коже Ааро́н священноде́йствием сло́ва же и та́инств благоче́стия, / пропове́даша слове́ном зако́н Сина́йский, па́че же Сио́нский, Го́сподеви пою́щим: / Ди́вный, сла́вно творя́й чудеса́.

Богоро́дичен: Твоя́ ми́лости, Чи́стая, кто пове́сть? / Из глубины́ бо зол, я́коже из пучи́ны морски́я, мно́гих избавля́еши Твои́ми предста́тельствы, зову́щих: / Ди́вный, сла́вно творя́й чудеса́.

Песнь 3

Ирмо́с: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

И́же пе́рвый от бо́лгар Бо́га испове́да, / и благоче́стию на земли́ бо́лгарстей процвести́ Ду́хом прорече́, / и бра́тним судо́м кровь свою́ за Христа́ пролия́, Боя́н бе, князь Енраво́та, / тем пе́рвый и венца́ сла́вы сподо́бися.

Христоимени́тый виногра́д земли́ Бо́лгарския / грозд зре́лый Бо́гу принесе́ – Иоа́нна Ры́льскаго, / и́же пусты́нным житие́м в лу́чшую ме́ру во́зраста Христо́ва дости́же / и светле́йшаго венца́ сла́вы сподо́бися.

Ря́дом да помяну́тся Иоаки́м Осого́вский, / Гаврии́л же Лесно́вский и Про́хор Пши́нский, / и́же, от того́жде огня́ благода́ти Бо́жия возже́гше свети́льники своя́, / те́хже и венце́в сла́вы сподо́бишася.

Богоро́дичен: О́бщия беды́ Ада́мова греха́ нас изба́вльши, Ма́ти Де́во, / безсе́менным рождество́м Твои́м, / досто́йных возвыша́еши предста́тельством Твои́м / и венце́в сла́вы сподобля́еши.

Конда́к воскре́сен гла́са.

Седа́лен святы́х, глас 2.

Подо́бен: Милосе́рдия две́ри:

Милосе́рдием и бла́гостию призира́я на Це́рковь на́шу и лю́ди, / ороша́я нас, гре́шных, бла́гостию и сия́я со́лнце пра́вды Своея́, / возве́л еси́ святы́х в му́жи соверше́нны / и прия́л еси́ плодоноше́ние ро́да на́шего в жи́тницу. / Тех моли́твами и нас поми́луй, мо́лимся.

Сла́ва и ны́не, Богоро́дичен:

Милосе́рдия су́щи исто́чник, / не лиши́ нас ми́лости Твоея́, Богоро́дице, / но всегда́ о нас Го́спода умоля́ющи со все́ми святы́ми, от бо́лгар просия́вшими, / свободи́ нас от враго́в борю́щих, / и утверди́ в Правосла́внем благоче́стии, / и введи́ в приста́нище небу́рное спасе́ния душа́м.

Песнь 4

Ирмо́с: Седя́й в Сла́ве на Престо́ле Божества́, / во о́блаце ле́гце, / прии́де Иису́с Пребоже́ственный / Нетле́нною Дла́нию и спасе́ зову́щия: / сла́ва, Христе́, си́ле Твое́й.

Дре́вле у́бо из Нике́и бежа́вше христопроти́вныя зло́бы отсту́пника Иулиа́на, / епи́скопы Фео́дор и Тимофе́й с Кома́сием и Евсе́вием / Тивериопо́ля достиго́ша, иде́же ученико́в приобре́тше благоче́стия, / вси пятна́десят, за Христа́ му́ченически враго́в победи́вше, взыва́ху: / сла́ва, Христе́, си́ле Твое́й.

Андре́й, юро́д быв Константи́на гра́да, / до тре́тьяго Небесе́ доброде́телию вознесе́ся, / и Покро́в Бо́жия Ма́тере над ро́дом христиа́нским ви́де, / и, лука́ваго коне́чне победи́в, взыва́ше: / сла́ва, Христе́, си́ле Твое́й.

Безбо́жный оте́ц, я́коже те́рние, / шипо́вник, Варва́ру святу́ю возрасти́л есть иногда́ на земли́ Бо́лгарстей, / но ту́ю уве́дав, Христо́ву ве́ру прие́мшую, / свое́ю руко́ю закла́, же́ртву Богоприя́тну, Го́сподеви взыва́ющую: / сла́ва, Христе́, си́ле Твое́й.

Богоро́дичен: О́блаче ле́гкий, Богоро́дице Мари́е, / в не́мже прии́де Иису́с Пребоже́ственный нам во спасе́ние, / моля́щи о нас не преста́й уще́дрити ны, зову́щия: / сла́ва, Христе́, си́ле Твое́й.

Песнь 5

Ирмо́с: Ужасо́шася вся́ческая / о Боже́ственней сла́ве Твое́й, / Ты бо, Неискусобра́чная Де́во, / име́ла еси́ во утро́бе над все́ми Бо́га /и родила́ еси́ Безле́тнаго Сы́на, / всем воспева́ющим Тя / мир подава́ющая.

Любо́вию к Бо́гу распала́еми в по́двизе преподо́бия, / сла́ву нетле́нную получи́ша Косма́ Зо́графский / его́же те́ло во гро́бе не обре́теся, / и Дими́трий Басарбо́вский, его́же мо́щи нетле́нно почива́ют, чудотворя́ще.

Го́спода о́браз мусики́ею в це́рквах изобража́я, / в души́ свое́й изобрази́ Пи́мен Зо́графский, / Иоа́нн же Кукузе́ль, а́нгельски воспева́я Го́спода и Пречи́стую Богоро́дицу, / а́нгельских досто́инств дости́же.

А́ще и жены́ естество́м, Пе́тка Епива́тская и Филофе́я Те́рновская преподо́бием врага́ победи́ша, / Зла́та же Мегли́нская и Неде́ла му́ченичеством Жениха́ Небе́снаго просла́виша / и в Черто́г ра́дости внидо́ша.

Богоро́дичен: Ра́дости исто́чниче, / ду́шу мою́ окая́нную обра́дуй, / пра́вде Бо́жией научи́вши мя, живу́щаго на земли́, / и, в бу́рю страсте́й мир всели́вши, / Сы́на Бо́жия мя покажи́ и насле́дника Ца́рствия соде́лай.

Песнь 6

Ирмо́с: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Святи́тельства по́двиг, преподо́бия и безкро́внаго муче́ния Патриа́рх Евфи́мий поне́с, / мно́гих и венце́в сподо́бися, / Иларио́н же Мегли́нский еретико́в побори́в, / от моще́й нетле́нных чудеса́ источа́ет.

Кано́н мона́шества и благоче́стия, Феодо́сий Те́рновский, / от Григо́рия научи́вся, мно́гих научи́, Правосла́вие утверди́, / на моли́тве, я́ко о́гненный, яви́ся, / и, во оте́чество Го́рнее преходя́, Небе́сными воспе́ся.

А́нгели удиви́шася дерзнове́нию му́чеников преподо́бных: / Игна́тия Старозаго́рскаго, Дамаскина́ Га́бровскаго, / Луки́ Адрианопо́льскаго и Ники́ты Се́ррскаго, / и́же, за Христа́ пове́шени, ско́рое горе́ ше́ствие восприя́ша.

Богоро́дичен: Гра́де одушевле́нный, / в не́мже Сын Бо́жий всели́ся, да с челове́ки поживе́т, / оче́с мои́х недосто́йных не укры́йся, / на версе́ стоя́щи соверше́нства, / но в Го́рний Иерусали́м путеводи́ мя.

Конда́к всем святы́м бо́лгарским, глас 2.

Подо́бен: В моли́твах неусыпа́ющую:

В моли́твах не усыпа́юще / и в предста́тельствах не престаю́ще, / Го́спода ми́лостива нам твори́те, / святи́и, от бо́лгар просия́вшии, / я́ко да, па́мять ва́шу пра́зднующе, / с ра́достию сию́ твори́м, / до втора́го Суди́и прише́ствия и всех Воскресе́ния.

И́кос:

Благ еси́ Ты, Го́споди, / но стра́шны судьбы́ Твои́, е́же на гре́шники преще́ния Твоего́. / И кто стерпи́т гнев Твой или кто постои́т, а́ще беззако́ния на́зриши? / Но и предста́тельства ми́лостивно прие́млеши рабо́в Твои́х, / и́хже от бо́лгар прия́л еси́ в наслажде́ние благи́х Твои́х. / Те́мже мо́лим Тя: / умоле́н бу́ди о нас моли́твами их / и соблюди́ род наш от наве́тов вра́жиих невреди́м, / да́же до втора́го Твоего́ прише́ствия и всех Воскресе́ния.

Песнь 7

Ирмо́с: Не послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог, благослове́н еси́.

Огне́м сожига́еми от лати́нян за Правосла́вие / два́десят и шесть му́чеников Зо́графских, / огне́м любве́ па́че к благоче́стию опали́шася, / отону́дуже возме́здие получи́ша му́ченичества и преподо́бия, зову́ще: / препе́тый отце́в Госпо́дь и Бог, благослове́н еси́.

Преподо́бный Иа́ков Ко́стурский да́ром чуде́с ага́рян взбеси́, / царю́-мучи́телю смерть предрече́, му́ки претерпе́, / Святы́х Даро́в причасти́ся и, дух свой Го́сподеви преда́в, / пове́шен бысть со Иа́ковом же и Диони́сием, вопию́ще: / препе́тый отце́в Госпо́дь и Бог, благослове́н еси́.

Огнь не косну́ся телесе́ Гео́ргия Но́ваго, / и́же Софи́и-гра́да прославле́ние, / я́коже тле́ние тридне́вно пове́шенному Гео́ргию Нове́йшему, / Никола́й же, ка́мением побие́н и огне́м сожже́н, всесожже́ние богоуго́дное бысть, / тро́ица Тро́ице воспева́юще: / препе́тый отце́в Госпо́дь и Бог, благослове́н еси́.

Богоро́дичен: Ю́же Дании́л проро́к прови́де го́ру несеко́мую, восхваля́юще Богоро́дицу, / без рук от Нея́ отсече́нному Ка́мени – Христу́, поклони́мся, зову́ще: / препе́тый отце́в Госпо́дь и Бог, благослове́н еси́.

Песнь 8

Ирмо́с: О́троки благочести́выя в пещи́ / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

Пра́вду сотвори́ Упра́вда царь / и, благоче́стие возлюби́в, хра́мы Бо́гови воздви́же, / Петр же благове́рный, земно́му ца́рству умер, в мона́шестве поживе́, / и князь Иоа́нн Влади́мир, от неприя́зни посече́н,–/ вси вку́пе взыва́ху: / Го́спода по́йте, дела́, / и превозноси́те Его́ во вся ве́ки.

Ага́рянский царь мече́м посече́ за благоче́стие во времена́ разли́чна преподо́бных му́ченик: / Ону́фрия Га́бровскаго, Ака́кия Се́ррскаго, Проко́пия Ва́рненскаго, / к сим же Хри́сто му́ченика и Иоа́нна болга́рина, взыва́ющих: / Го́спода по́йте, дела́, / и превозноси́те Его́ во вся ве́ки.

Ро́мул Бди́нский и Рома́н Те́рновский, преподо́бию Григо́рия навы́кше, / благода́ть получи́ша, чудеса́ сотвори́ша / и в ра́дость Небе́сную внидо́ша, воспева́юще: / Го́спода по́йте, дела́, / и превозноси́те Его́ во вся ве́ки.

Богоро́дичен: Фимиа́м вознеси́ моли́тв Твои́х всеблагоуха́нный к Сы́ну Твоему́, Богоро́дице, / я́ко да, спаса́еми от рабо́ты вра́жия / и в Вы́шнее Оте́чество вводи́ми, / ку́пно с Тобо́ю и со все́ми святы́ми ро́да на́шего пои́м: / Го́спода по́йте, дела́, / и превозноси́те Его́ во вся ве́ки.

Песнь 9

Ирмо́с: Всяк земноро́дный / да взыгра́ется, Ду́хом просвеща́емь, /да торжеству́ет же Безпло́тных умо́в естество́, /почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная Богоро́дице, / Чи́стая Присноде́во.

Е́ще да помяну́тся преподо́бный Некта́рий Би́тольский, / Софро́ний Софи́йский, Диони́сий Ко́стурский, Фео́фил Мироточи́вый, / к сим Михаи́л Во́ин пра́ведный и му́ченицы: / Анаста́сий Струмишский, Ла́зарь Бо́лгарский, / А́нгел Ле́ринский, Дими́трий Сли́венский, / и́же вку́пе мо́лятся о нас.

Но и му́ченицы, до бо́лгар на земли́ Бо́лгарстей пострада́вшии, да помяну́тся: / Филипопольсти́и, Доростольсти́и, Адрианопольсти́и, / наипа́че же сы́ны и дще́ри ро́да бо́лгарскаго, / и́хже мно́жество за Христа́ от ага́рян убие́ни бы́ша в гора́х Родо́пских и Пи́ринских, / я́ко да мо́лятся о нас.

И́же от бо́лгар святи́и просия́ли есте́, / и и́хже у́бо совоку́пную ны́не па́мять твори́м: / дерзнове́ние ве́лие иму́ще ко Го́споду, / не забу́дите сро́дства ва́шего, / но, вся́кою моли́твою моля́щеся, избавля́йте нас от сете́й врага́ лука́ваго / и па́губы вся́ческия.

Богоро́дичен: Исхо́дище спасе́ния Ты еси́, Богоро́дице, / из Тебе́ бо роди́ся Спас наш, Христо́с Госпо́дь. / Те́мже к Тебе́ о́чи на́ша возведо́хом, моля́щеся: / со все́ми святы́ми ро́да на́шего моли́ся, / я́ко да ве́чная блага́я получи́м, / в ми́ре пожи́вше и во вся́ком благоче́стии.

Катава́сия, ектения́ ма́лая, и Свят Госпо́дь Бог наш: Ексапостила́рий воскре́сен. Сла́ва святы́м, глас 3.

Подо́бен: Пло́тию усну́в:

Соше́дшеся днесь, бра́тие, / восхва́лим святы́х ро́да на́шего, / ти́и бо, дерзнове́ние иму́ще, о нас при́сно Бо́гу мо́лятся, / я́ко да, избы́вше напа́стей вра́жиих, / ку́пно с ни́ми всели́мся во оте́чество Небе́сное.

И ны́не, Богоро́дичен воскре́сный.

На хвали́тех поста́вим стихо́в 8 и пое́м стихи́ры воскре́сны 4, та́же стихи́ры святы́х на 4, глас 8.

Подо́бен: О, пресла́внаго чудесе́:

О, пресла́внаго чудесе́, / от ка́мений идолослуже́ния / воздвиза́ет Бог ча́да Авраа́му / и спосажда́ет я́ на ло́не его́; / от бо́лгар святы́х прие́млет / и в Ца́рство Свое́ вселя́ет. / О, дарова́ний Боже́ственных, / и́миже, Христе́, спаси́ ду́ши на́ша, / я́ко еди́н Благ и Человеколю́бец.

О, пресла́внаго чудесе́, / от непло́дове пусты́ни го́рныя / роди́ся Го́сподеви мно́жество чад, / па́че не́же в суете́ ми́ра сего́, / отону́дуже бе́гающе, в ней водвори́шася, / те́мже и спасо́шася от малоду́шия и от бу́ри страсте́й. / О, неизрече́ннаго Бо́жия благоутро́бия, / и́мже, Христе́, спаси́ ду́ши на́ша, / я́ко еди́н Благ и Человеколю́бец.

О, пресла́внаго чудесе́, / ма́лое ста́до ро́да бо́лгарскаго / не бои́тся враго́в шата́ния и зол, / я́ко в Ца́рство внидо́ша святи́и Его́, / и́же и, предстоя́ще Царю́ Небе́сному, / непреста́нно мо́лятся о нас! / О, несказа́ннаго Бо́жия милосе́рдия, / и́мже, Христе́, спаси́ ду́ши на́ша, / я́ко еди́н Благ и Человеколю́бец.

Сла́ва, стихи́ра ева́нгельская. И ны́не, Богоро́дичен: Преблагослове́нна еси́, Богоро́дице Де́во: Славосло́вие вели́кое. Тропа́рь воскре́сен. Таже: Воскре́с из гро́ба:

Блаже́нны, гла́са на 6 и святы́х на 4, песнь 6-я кано́на. По вхо́де тропа́рь воскре́сен, хра́ма и всех святы́х ро́да бо́лгарскаго. Сла́ва, конда́к святы́х. И ны́не, Предста́тельство христиа́н: Проки́мен воскре́сен гла́са и святы́х, глас 4: Святы́м, и́же суть на земли́ Его́, / удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся. Апо́стол Неде́ли и святы́х, к Кори́нфяном, зача́ло 176. Аллилу́ия, глас 8: Весели́теся о Го́споде и ра́дуйтеся, пра́веднии. Ева́нгелие Неде́ли и святы́х, от Матфе́я, зача́ло 10. Прича́стен: Хвали́те Го́спода с Небе́с: И святы́м: Ра́дуйтеся, пра́веднии:

Собор Болгарских святых.

Семена веры Христовой, посеянные на территории современной Болгарии ещё святыми апостолами Павлом († ок. 67; память 29 июня) и Андреем Первозванным († 62; память 30 ноября) дали обильные всходы при царе Болгарском равноапостольном Борисе-Михаиле († 907: память 2 мая). В 865 году, в результате миссионерской деятельности Кирилла и Мефодия, болгарский народ принял Крещение.

Ученики и соратники святых братьев – равноапостольные Климент, Наум и Ангеляр продолжили дело евангельского благовестия. И на церковном небосклоне Болгарской Православной Церкви воссияли яркие звезды сонма святых угодников – святителей, благоверных князей, преподобных, мучеников и праведников. По благословению Святейшего Патриарха Болгарского Максима и Священного Синода Болгарской Православной Церкви установлено совершать в Неделю 2-ю по Пятидеся́тнице празднование собору Всех святых, в земле Болгарской просиявших. В Собор вошли следующие святые: святой равноапостольный Кирилл, просветитель славян († 869; память 14 февраля и 11 мая); святой равноапостольный Мефодий, архиепископ Моравский, просветитель славян († 885; память 6 апреля и 11 мая); святой равноапостольный Фотий, Патриарх Цареградский († 891; память 6 февраля); святой равноапостольный царь Борис-Михаил, креститель Болгарии († 907; память 2 мая); святой равноапостольный Климент, архиепископ Охридский († 916; память 27 июля и 25 ноября); святые равноапостольные Наум, Савва, Горазд и Ангеляр, Охридские (IX–X; память 27 июля); святитель Михаил, митрополит Киевский и всея Руси († 992; память 30 сентября); святитель Иларион, епископ Меглинский († 1164; память 21 октября); святитель Иоаким, Патриарх Тырновский († 1246; память 18 января); святитель Ефрем, Патриарх Сербский († 1399; память 15 июня); святитель Евфимий, Патриарх Тырновский († ок. 1401–1402; память 20 января); святитель Киприан, митрополит Московский († 1406; память 16 сентября); святой благоверный царь Юстиниан Управда († 565; память 5 июня, 14 ноября); святой благоверный Пётр, царь Болгарский († 969; память 30 января); святой благоверный князь Иоанн-Владимир († 1016; память 22 мая); святой Стефан Милутин, король Сербский († 1317; память 30 октября); преподобный Иоанн Рыльский († 946; память 18 августа, 19 октября и 1 июля); преподобный Прохор Пшинский (кон. X; память 15 января); преподобный Гавриил Лесновский (XI; память 15 января); преподобный Иоаким Осоговский († ок. 1115; память 16 августа); преподобный Иоанн Кукузель (XII; память 1 октября); преподобный Косма Зографский († 1323; память 22 сентября);’ преподобный Пётр Коришский († ок. 1337–1351; память 5 июня); преподобный Роман Тырновский (XIV; память 17 февраля); преподобный Феодосий Тырновский († 1363; память 27 ноября); преподобный Ромил Бдинский († 1375; память 16 января); преподобный Дионисий Костурский (XIV; память 26 июня); преподобный Софроний Болгарский, Софийский (XV–XVI; память 28 мая); преподобный Нектарий Битольский († 1500; память 5 декабря); преподобный Феофил Мироточивый († 1548; память 8 июля); преподобный Пимен Зографский († 1620; память 3 ноября); преподобный Димитрий Бесарбовский († 1685; память 26 октября); преподобный Паисий Хилендарский (XVIII; память 19 июня); преподобная Параскева Сербская (XI; память 14 октября); святая мученица Недела-Кириакия († 289; память 7 июля); святые 15 мучеников Тивериопольских (Струмицких) епископы Феодор и Тимофей, монахи Комасий и Евсевий, священники Петр, Иоанн, Сергий, Феодор и Никифор, диаконы Василий и Фома, монахи Иерофей, Харитон, Даниил и мирянин Сократ († 362; память 28 ноября); святой мученик Боян-Енравота князь Болгарский († ок. 883; память 28 марта); святой мученик Георгий Софийский Новый († 1515; память 11 февраля); святой мученик Георгий Софийский Новый († 1530; память 26 мая); святой великомученик Николай Софийский († 1555; память 17 мая); святой мученик Триандафил Старозагорский († 1680; память 8 августа); святой мученик Христо († 1748; память 28 ноября); святой мученик Иоанн Болгарский († 1784; память 5 марта); святая великомученица Злата Меглинская († 1793; память 18 октября); святой мученик Анастасий Струмицкий († 1794; память 29 августа); святой мученик Лазарь Болгарский († 1802; память 23 апреля); святой мученик Иоанн Тырновский († 1822; память 16 июля); святой мученик Димитрий Сливенский († 1841; память 30 января); священномученик Ферапонт Сардийский (III; память 27 мая); священномученик Еразм Охридский (IV; память 2 июня); священномученик Дамаскин Габровский († 1771; память 16 января); священномученик Никита Серский († 1808; память 3 апреля); преподобномученик Иаков Костурский и ученики его Иаков-диакон и Дионисий-монах († 1520; память 1 ноября); преподобномученик Никодим Албанский († 1722; память 11 июля); преподобномученик Лука Одринский († 1802; память 23 марта); преподобномученик Прокопий Варненский († 1810; память 25 июня); преподобномученик Игнатий Старозагорский († 1814; память 8 октября); преподобномученик Акакий Сярский († 1816; память 1 мая); преподобномученик Онуфрий Габровский († 1818; память 4 января); преподобномученица Филофея Тырновская († 1060; память 7 декабря); святые 26 преподобномучеников Зографских: игумен Фома, иноки Варсонофий, Кирилл, Михей, Симон, Иларион, Иаков, Иов, Киприан, Савва, Иаков, Мартиниан, Косма, Сергий, Мина, Иоасаф, Иоанникий, Павел, Антоний, Евфимий, Дометиан, Парфений и 4 мирянина (1284; память 10 октября); святой праведный Михаил Болгарский (IX; память 22 ноября).

На Го́споди, воззва́х: Сла́ва, глас 2:

Ны́не пра́зднует Це́рковь, / но́вым одея́нием украси́вшися, / я́ко баграни́цею и ви́ссом, / кровьми́ но́вых му́чеников, / и́хже, я́ко же́ртву непоро́чну / и благоуго́дну, Христу́ принося́щи, / со дерзнове́нием к Нему́ взыва́ет: / победи́тели показа́вый страстоте́рпцы Твоя́, / увенча́вый же тех и просла́вивый, / ниспосли́ бога́тую ми́лость / любо́вию соверша́ющим честну́ю па́мять их.

На стихо́вне стихи́ры, глас 6:

Лик новособра́нный, / вседо́блее ополче́ние му́чеников Госпо́дних / пе́сньми восхва́лим днесь, / мучениколю́бцев собра́ние, / с ве́рою к ним взыва́юще: / от вся́кия нас изба́вите / беды́ и ну́жды, / всечестни́и страда́льцы / и моли́теся о спасе́нии душ наших.

Стих: Ди́вен Бог во святы́х Свои́х, / Бог Изра́илев.

Добропобе́днии му́ченицы, / Це́ркве но́вое утвержде́ние, / ве́рных похвало́, ага́рян посрамле́ние, / словеса́ Спа́са де́лом соверши́вшии / и Боже́ственныя Того́ стра́сти я́сно в себе́ изобрази́вшии / многоразли́чными Его́ ра́ди страда́нии, / моли́теся о спасе́нии душ на́ших.

Стих: Святы́м, и́же суть на земли́ Его́, / удиви́ Госпо́дь вся хоте́ния Своя́ в них.

Стопа́м после́дующе дре́вних му́ченик, / ве́ры ра́ди подвиза́стеся тве́рдо / в после́дняя времена́ сия́, / страстоте́рпцы сла́внии, / и всех подвиза́ете / к сла́ве и хвале́нию Бо́га, / укре́пльшаго ва́ше немощно́е естество́ / и обогати́вша вас дарова́ньми Ду́ха / во спасе́ние душ на́ших.

Сла́ва, глас то́йже:

Всевы́шний Влады́ко, / в Тро́ице сла́вимый и покланя́емый, / уще́дри ны благоприя́тными мольба́ми / но́вых му́ченик Твои́х, / пред мучи́тели дерзнове́нно пропове́давших / Тя, Еди́наго и́стиннаго Бо́га всех, / и Твое́, Сы́не Бо́жий, / неизрече́нное от Ма́тере Де́вы / испове́давших спаси́тельное воплоще́ние.

Тропа́рь пи́сан на вели́цей вече́рни.

На Го́споди, воззва́х: стихи́ры, глас 1:

О, пресла́внаго чудесе́!/ В после́дняя времена́ возсиява́ют му́ченицы / и пре́лести мрак отгоня́ют, / ве́ра христиа́нская ны́не возвыша́ется / и па́дает нече́стие, / ра́дуются ве́рнии / и пра́здник новоявле́нным составля́ют, / вопию́ще Христу́ Богу́: / му́чеников похвала́ и побе́да Ты еси́, Всеси́льне.

О́ле чуде́с Твои́х, Христе́! / Род немощны́й ны́не восторжествова́ / над нача́льствы и вла́стьми тьмы, / новоявле́ннии страстоте́рпцы / дре́вним сопричисля́ются му́чеником / тве́рдым испове́данием ве́ры, / до́блим терпе́нием мук, / зна́мении же и чудесы́. / Те́мже о них Тебе́ вопие́м: / страда́льцев похвала́ и побе́да Ты еси́, Всеси́льне.

Христу́ любо́вию срастворе́ни, / добропобе́днии новому́ченицы, / и Сего́ в себе́ живу́ща име́юще, / вы о Христе́ пострада́сте, / и Христо́с в вас и ва́ми пострада́, / я́ко Глава́ Це́ркве чле́ны Свои́ми. / Сего́ ра́ди честны́я мо́щи ва́ша / неду́гов реши́телие быва́ют, / и́мже с ве́рою покланя́ющеся, / вопие́м Укре́пльшему вы: / страстоте́рпцев похвала́ и побе́да Ты еси́, Всеси́льне.

И́ны стихи́ры, глас 4:

Днесь, ве́рнии, стецы́теся / и о́бщее торжество́ соста́вите: / се бо но́вии в ро́де на́шем / яви́шася му́ченицы, / дерзнове́нно пропове́давшии ве́ру Правосла́вную / и пото́мков дре́вния Ага́ри, / зле му́дрствующих, обличи́вшии.

И́стины храни́тели / и пре́лести попали́тели, / Христа́ просла́вившия во у́дех Свои́х, / и нося́щия Его́ честны́я я́звы, / позо́р¹⁰⁴ бы́вшия А́нгелом и челове́ком, / до́блия новому́ченики восхва́лим / свяще́нными песнопе́нии, / ве́рных исполне́ние.

Нача́льнику му́чеников / на Небесе́х предстоя́ще / с пре́жде пострада́вшими Его́ ра́ди, / терпеливоду́шнии страда́льцы, / подо́бною тем сла́вою украси́стеся. / Дерзнове́ние у́бо иму́ще, / проси́те нам ми́ра и ве́лией ми́лости.

Сла́ва, глас 6:

Новоявле́нныя зве́зды днесь / на церко́вней показа́шася тве́рди, / вси по взя́тии Царягра́да / во мно́зех ме́стех бы́вшии му́ченицы Христо́вы, / и́хже ублажа́юще, мучениколю́бцы, / по до́лгу им прирце́м, глаго́люще: / ра́дуйтеся, благоче́стия утвержде́ние и нече́стия обузда́ние; / ра́дуйтеся, Восто́чныя Це́ркве сла́во и иносла́вных посрамле́ние; / ра́дуйтеся, о́брази терпе́ния и за Христа́ страда́ния. / Ста́ните, непобеди́мии, посреде́ нас у́мне, / от бед и искуше́ний избавля́юще, / и моли́теся о спасе́нии душ на́ших.

И ны́не, догма́тик гла́са.

Вход. Проки́мен дне. И чте́ния 3 мученическая.

Проро́чества Иса́иина чте́ние (глава́ 43):

Тако глаго́лет Госпо́дь: / вси язы́цы собра́шася вку́пе, / и соберу́тся кня́зи от них, / кто возвести́т сия́ в них?/ Или́, я́же от нача́ла, кто слы́шана сотвори́т вам?/ Да приведу́т свиде́тели своя́ и оправдя́тся, / и да услы́шат, и да реку́т и́стину. / Бу́дите Ми свиде́тели, / и Аз Свиде́тель, глаго́лет Госпо́дь Бог, / и о́трок, его́же избра́х, / да позна́ете и ве́руете Ми, и разуме́ете, я́ко Аз есмь; / пре́жде Мене́ не бысть ин бог и по Мне не бу́дет. / Аз есмь Бог, и несть, ра́зве Мене́, спаса́яй. / Аз возвести́х и спасо́х, уничижи́х, и не бе в вас чу́ждий. / Вы Мне свиде́тели, и Аз Госпо́дь Бог. / И еще от нача́ла Аз есмь, / и несть от рук Мои́х избавля́яй; / сотворю́, и кто отврати́т то?/ Си́це глаго́лет Госпо́дь Бог, / избавля́яй вас Святы́й Изра́илев.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией, / и не прико́снется их му́ка. / Непщева́ни бы́ша во очесе́х безу́мных умре́ти, / и вмени́ся озлобле́ние исхо́д их. / И е́же от нас ше́ствие сокруше́ние, / они́ же суть в ми́ре. / И́бо пред лице́м челове́ческим а́ще и му́ку прии́мут, / упова́ние их безсме́ртия испо́лнено. / И вма́ле нака́зани бы́вше, / вели́кими благоде́тельствовани бу́дут, / я́ко Бог искуси́ я / и обре́те их досто́йны Себе́. / Я́ко зла́то в горни́ле, искуси́ их / и, я́ко всепло́дие же́ртвенное, прия́т я. / И во вре́мя посеще́ния их возсия́ют / и, я́ко и́скры по сте́блию, потеку́т. / Су́дят язы́ком и облада́ют людьми́, / и воцари́тся Госпо́дь в них во ве́ки. / Наде́ющиися Нань разуме́ют и́стину / и ве́рнии в любви́ пребу́дут Ему́, / я́ко благода́ть и ми́лость в преподо́бных Его́ / и посеще́ние во избра́нных Его́.

Прему́дрости Соломо́ни чте́ние (главы́ 5 и 6):

Пра́ведницы во ве́ки живу́т, / и в Го́споде мзда их, и попече́ние их у Вы́шняго. / Сего́ ра́ди прии́мут Ца́рствие благоле́пия / и вене́ц добро́ты от руки́ Госпо́дни, / зане́ десни́цею покры́ет я и мы́шцею защити́т их. / Прии́мет всеору́жие рве́ние Свое́ / и вооружи́т тварь в месть враго́м. / Облече́тся в броня́ пра́вды / и возложи́т шлем суд нелицеме́рен. / Прии́мет щит непобеди́мый преподо́бие, / поостри́т же напра́сный гнев во ору́жие, / спобо́рет же с ним мир на безу́мныя. / По́йдут праволу́чныя стре́лы мо́лниины / и, я́ко от благокру́гла лу́ка облако́в, на наме́рение полетя́т. / И, от каменоме́тныя я́рости испо́лнь, паду́т гра́ды, / вознегоду́ет на них вода́ морска́я, / ре́ки же потопя́т я на́гло. / Сопроти́в ста́нет им дух си́лы / и, я́ко ви́хор, разве́ет их, / и опустоши́т всю зе́млю беззако́ние, / и злоде́йство преврати́т престо́лы си́льных. / Слы́шите у́бо, ца́рие, и разуме́йте, / навы́кните, судии́ конце́в земли́, / внуши́те держа́щии мно́жества / и гордя́щиися о наро́дех язы́к, / я́ко дана́ есть от Го́спода держа́ва вам / и си́ла от Вы́шняго.

На лити́и стихи́ры, глас 1:

Весели́ся, Восто́чная Це́рковь, / весе́лием, е́же о Бо́зе, / ра́дуйся и лику́й, избра́нная неве́сто Христо́ва, / дре́вних и но́вых му́чеников твои́х / в не́дрех свои́х держа́щая, / и Жениху́ твоему́ Христу́ возопи́й: / се аз и де́ти, я́же дал ми еси́, Го́споди, / и́хже благода́тию Твое́ю духо́вно роди́х / и млеко́м благоче́стия воспита́х, / соверше́нных о И́мени Твое́м показа́х му́чеников, / приими́ кро́ви их, я́ко же́ртву благоуго́дную, / и, ми́лостив ко мне быв, / от одержа́щаго мя ра́бства и вся́кия свободи́ е́реси, / ю́же Честно́ю Твое́ю Кро́вию искупи́л еси́.

Глас 4: Цари́ и иере́и Бо́гови / бы́сте, по пи́санному, свяще́ннии новому́ченицы, / тверде́йшим ва́шим страда́нием, / цари́, я́ко над страстьми́ пло́ти, ми́ра и миродержи́теля воцари́вшиися, / иере́и же, я́ко сами́х себе́ / Бо́гу непоро́чную же́ртву и свяще́нное заколе́ние принесли́ есте́. / И ны́не Царю́ царе́й и Священнонача́льнику Христу́ / на Небесе́х предстоя́ще, / моли́теся о спасе́нии душ на́ших.

Глас 5: Ра́дуйся, новому́чеников мно́жество, / правосла́вных удобре́ние, / новозакла́ннии а́гнцы, / ве́ры побо́рницы и храни́телие, / хода́таи о нас к Бо́гу непосты́днии, / ле́ты после́днии, / страда́нии же подража́тели пе́рвым му́чеником, / терпе́ния столпи́ непоколеби́мии, / душа́м на́шим испроси́те ве́лию ми́лость.

Сла́ва, глас 8:

И́мут Небе́сная святы́х селе́ния / ду́хи ва́ша, велестрада́льнии му́ченицы, / иму́ще же и мы на земли́ / святы́я ва́ши мо́щи, / ра́дости исполня́емся, / освяще́ние душ и теле́с / и исцеле́ние от них почерпа́юще, / и благода́рственно о вас Христу́ взыва́ем: / сла́ва Тебе́, Го́споди, / и в на́шем поколе́нии но́вых показа́вшему страстоте́рпцев / во утвержде́ние ве́ры, во утеше́ние плене́нных / и спасе́ние душ на́ших.

И ны́не, глас 2: Пре́йде сень зако́нная:

На стихо́вне стихи́ры воскре́сны 2-го гла́са.

Сла́ва, глас 4:

Днесь возсия́ мы́сленная весна́ / посреде́ зимы́ страда́льческаго плене́ния, / от девяти́ десятери́ц имену́емых / и мно́гих неимену́емых / новому́чеников соста́вленная. / Те́мже прииди́те, любопра́зднственнии тех чти́телие, / в зре́ние достохва́льных подвиго́в их, / я́ко в сад многоцве́тный, вше́дше, / душе́вная на́ша услади́м чу́вства: / у́зрим бо та́мо вся́кия ви́ды цвето́в / благово́нных и николи́же увяда́емых, / кровьми́ червлене́ющихся, / и, Христу́ моля́щеся, возопии́м: / но́выя сия́ страстоте́рпцы, / я́ко шипки́, Влады́ко, / в Це́ркви Твое́й насади́вый, / благоприя́тными тех моли́твами / ве́чныя весны́ Твоего́ Ца́рствия / сподо́би ны, я́ко Человеколю́бец.

И ны́не, Богоро́дичен.

Тропа́рь, глас 3:

Но́вии му́ченицы, / дре́внюю пре́лесть тве́рдым боре́нием низложи́вшии, / вознесо́ша ве́ру правосла́вных, / беззако́нное бо служе́ние уничижи́вше, / дерзнове́нно Христа́ пропове́даша, / Бо́га соверше́нна, / и ны́не непреста́нно мо́лятся / дарова́ти нам ве́лию ми́лость.

На Бог Госпо́дь: тропа́рь воскре́сен два́жды. Сла́ва, му́чеников. И ны́не, Богоро́дичен.

По стихосло́виих седа́льны воскре́сны 2-го гла́са. По полиеле́и и ипакои́ воскре́сен и седа́льны му́чеников. Сла́ва, и ны́не, Богоро́дичен: Вели́кий мир:

По 1-м стихосло́вии седа́лен, глас 2:

Но́вое благосла́вное во́инство, / от мно́гих мест же и градо́в богособра́нное, / му́ченицы вседо́блии, зако́нно пострада́вшии и венча́вшиися от Христа́, / моли́теся о нас, вся́каго изба́витися лю́таго обстоя́ния / любо́вию почита́ющим святу́ю па́мять ва́шу.

Сла́ва, и ны́не, Богоро́дичен:

В кров Твой, Пречи́стая Де́во, прибега́ющих / мольбу́ прие́млеши от нас, / не преста́й моля́щи Человеколю́бца спасти́ рабы́ Твоя́.

По 2-м стихосло́вии седа́лен, глас 4:

Я́ко со́лнца све́тлая, во тьме ра́бства показа́стеся конце́м, свяще́ннии страстоте́рпцы, / просвеща́юще бо ве́рныя, согрева́ете тех к Боже́ственней любви́ / и, я́ко ко́твы кре́пкия, во вре́мя треволне́ния утвержда́ете коле́блющаяся в ве́ре сердца́.

Сла́ва, и ны́не, Богоро́дичен:

И́же благода́рно воспева́ти от се́рдца / и испроси́ти приле́жно, Богоро́дице, Твоя́ ми́лости, Влады́чице, / рабы́ Твоя́ зову́щия и глаго́лющия: / Пресвята́я Де́во, предвари́ и изба́ви от враг ви́димых и неви́димых и вся́каго преще́ния, / Ты бо еси́ на́ше заступле́ние.

По полиеле́и седа́лен, глас 8:

Удиви́шася му́жеству ва́шему, страда́льцы, а́нгельстии ли́цы и правосла́вных мно́жества: / ка́ко, в телеси́ бре́ннем стра́ждуще, безпло́тныя враги́ победи́сте?/ И благода́рственно о вас воспева́ют Пресвяту́ю Тро́ицу, / яви́вшую в после́дняя ле́та му́ченики.

Сла́ва, и ны́не, Богоро́дичен:

Вели́кий мир Созда́теля в ма́лом Ты еси́, Мари́е, / вене́ц Боже́ственных прорече́ний, / изображе́ние нача́льнаго благоле́пия, / Богозапеча́танная кни́га домострои́тельных суде́б, / приснотеку́щий исто́чник, точа́щий благода́ть любо́вию воспева́ющим Тя.

Степе́нна воскре́сна 2-го гла́са. Проки́мен воскре́сен, глас 2. Ева́нгелие воскре́сно тре́тие. Воскресе́ние Христо́во: Псало́м 50-й. Сла́ва: Моли́твами апо́столов: И ны́не: Моли́твами Богоро́дицы: Стихи́ра: Воскре́с Иису́с от гро́ба:

Кано́н на 8, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Тро́ице Еди́нице и Еди́нице Трисо́лнечная, / омраче́нный ум мой просвети́ и нечи́стый язы́к уясни́, / да воспою́ досто́йно, по бу́кве и и́мени, / Твои́х свяще́нных новому́чеников.

Духо́вный лик соста́вльше, ве́рнии, / сла́вныя страстоте́рпцы пе́сньми почти́м, свети́льники Це́ркве, / озаря́ющия сердца́ ве́рою и любо́вию соверша́ющих па́мять их.

Восхва́лим благовре́менно Ангели́ сла́внаго, / и и́же от Аттали́и Афана́сия, иере́я Вседержи́телева, / и, сооте́чественника сему́, друга́го да воспое́м Афана́сия с булга́рином Анаста́сией.

Нике́и благохва́льное украше́ние Афана́сий, / Афо́на же удобре́ние Ака́кий / и Солу́ня прозябе́ния Алекса́ндр и Афана́сий, / Навпли́и же похвала́ сла́вный Анаста́сий / и Ахме́т Ка́лфа да почту́тся днесь.

Струя́ми крове́й ва́ших, страда́льцы, / неви́димыя враги́ потопи́сте победи́тельною десни́цею Христа́, / погрузи́вшаго дре́вняго мучи́теля в воде́ зе́льней.

В ле́та, в ня́же огнь любве́ ко Христу́ угаса́ет, / яви́стеся, страстоте́рпцы до́блии, / я́ко первому́ченицы Стефа́н и Фе́кла и и́же по них. / Моли́теся у́бо, да но́вый огнь вве́ржется в охладева́ющая сердца́ на́ша.

С ли́ки дре́вних му́ченик све́том Трисо́лнечнаго Божества́ облистава́еми, новому́ченицы, / предста́тельством ва́шим ниспосыла́йте просвеще́ние пою́щим вас.

Богоро́дичен: Ты, Благода́тная, перводе́йственно всех даро́в полна́ еси́, / от Пресвяты́я Тро́ицы прие́млющи сия́ и раздаю́щи ве́рным, / те́ми и всехва́льная Акили́на и Аргира́ пречу́дная подвиза́шася да́же до кро́ве.

Песнь 3

Ирмо́с: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.

Анаста́сий, всечестны́й иере́й, да воспое́тся, / Афине́ев же похвала́ тве́рдый Анто́ний, / и Анаста́сий, и́же от Анки́ры, да ублажи́тся, / и Авксе́нтий, Ве́ллы прозябе́ние.

Гаврии́ла Византи́йскаго, сла́внаго председа́теля, с Гаврии́лом се́рбским, / друга́го Гаврии́ла преподобному́ченика с Гео́ргием восхваля́ю, / с ни́мже и Гео́ргия от Филаделфи́и.

Ки́прянина Гео́ргия пе́сненными хвалы́ почита́ю, / и друга́го Гео́ргия прему́драго, / и пострада́вшаго в Магниси́и зако́нно воспева́ю Гео́ргия досточу́днаго.

Сыноположе́ние благода́тное иму́ще, страстоте́рпцы всехва́льнии, / возгнуша́стеся ага́рянскаго всыновле́ния, / вся же по́чести и наслажде́ния их оплева́сте, / да Христа́ еди́наго приобря́щете.

Не хвали́теся, мучи́телие, и не глаго́лите высо́кая в горды́ни, –/ взыва́ху но́вии победоно́сцы ага́ряном, / я́ко Бог ра́зумов Госпо́дь не́мощны сотвори́т супоста́ты Его́.

Ди́вна, Христе́, держа́ва кре́пости Твоея́! / Се бо ны́нешний немощству́ющий род, Кресто́м Твои́м вооружи́вся, / препоя́сася, я́коже дре́вний, си́лою Твое́ю / и си́льнаго зло́бою дре́вняго врага́ победи́.

Тро́ице Бо́же наш, / моли́твами новому́ченик Твои́х возвы́си рог христиа́н правосла́вных, / и утверди́, побе́ды на враги́ да́руя.

Богоро́дичен: Тебе́ сла́вим, Обра́дованную Де́ву и Ма́терь Бо́жию, / Тебе́ воспева́ем, от всех родо́в избра́нную Пречи́стую Святы́ню, / я́вльшуюся но́вое Не́бо, вы́сшее небе́с, Всепе́тая.

Седа́лен, глас 5:

Святы́я мо́щи ва́ша, вои́телие Госпо́дни, враче́бница есть ди́вная, / показа́ние одушевле́нное пра́выя на́шея ве́ры / и сокро́вища чуде́с миробога́тая, / Небе́сных арома́т вмести́лища, превосходя́щая благоуха́нием земны́я арома́ты. / Моли́те Христа́ Бо́га прегреше́ний оставле́ние дарова́ти чту́щим вас, новому́ченицы.

Сла́ва, и ны́не, Богоро́дичен:

Сви́ток Богоначерта́нный Иса́иев Ты была́ еси́, Мари́е, / одушевле́нная ски́ния Моисе́ева и стена́ адама́нтская Амо́сова, / свети́льник златокова́нный Заха́риев, Дании́лова же гора́ несеко́мая / и превосхо́дное проро́ков оглаше́ние, Богоро́дице, / долго́в разреше́ние испроси́ нам, сла́вящим Рождество́ Твое́.

Песнь 4

Ирмо́с: Ты моя кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.

Дамаски́н священному́ченик, ра́дуяся, подвиза́ся за Христа́ / и, я́ко шипо́к, но́вый Дими́трий, Филаделфи́и украше́ние, / с ни́мже древоде́л Дими́трий Дим, / в Сми́рне пострада́вый и мно́гая чудеса́ соверши́вый.

Дамаски́н и Дамиа́н преподо́бнии с Боже́ственным Диони́сием / венца́ сподо́бишася страстоте́рпцев, / и и́же от Лезво́са Ду́ка в терпе́нии просла́вися / с Византи́йским му́чеником Дими́трием, / по́чести побе́ды прия́вше.

Пе́сньми почита́ю Афо́нское воспита́ние Евфи́мия, / архипа́стыря Кори́нфскаго Заха́рию и Зорзи́са И́верскаго / и с ним друга́го Заха́рию, от А́рты, / и Илию́ Ардуниса сла́влю, / сла́вных новому́чеников Христо́вых.

Кедр тверд и непоколеби́м проти́ву дыха́нием мук / яви́ся но́вый Фео́дор, украше́ние Византи́и, / с ни́мже други́й Фео́дор Лезви́йский, / и вку́пе Феофа́н, мона́шествующих похвала́, / и Фео́фил Хио́сский.

Да жизнь ве́чную на Небеси́ улучи́те и сла́ву пе́рвых му́ченик, / жизнь и сла́ву привре́менныя ни во что́же вмени́сте, добропобе́дницы, / любо́вию ко Христу́ горя́ще, / Его́же ра́ди и му́ки вся́кия претерпе́сте тве́рдо.

Влеко́ми на заколе́ние, вопия́ху ага́ряном страстоте́рпцы: / Христа́ испове́дахом вам Бо́га, и ложь ва́шу обличи́хом, / за ко́е беззако́ние хо́щете нас уби́ти? / Но оба́че у́зрите нас, во сла́ве Небе́сней сия́ющих.

Вод духо́вных испо́лньшеся, му́ченицы сла́внии, / ре́ки яви́стеся воды́ жи́вы манове́нием Живонача́льныя Тро́ицы, / от Нея́же ниспосыла́йте певце́м ва́шим мир, здра́вие же и спасе́ние.

Богоро́дичен: Я́ко вели́кое и неизсле́димое / па́че всех святы́х иму́щая дерзнове́ние ко Пресвяте́й Тро́ице, / моли́ся, Влады́чице, о нас, рабе́х Твои́х, Тя благогове́йно сла́вящих, / е́же изба́витися нам от вся́ких лю́тых.

Песнь 5

Ирмос: Вску́ю мя отри́нул еси́ / от лица́ Твоего́, Све́те Незаходи́мый, / и покры́ла мя есть чужда́я тьма, окая́ннаго, / но обрати́ мя и к све́ту за́поведей Твои́х / пути́ моя́ напра́ви, молю́ся.

Всяк язы́к да сла́вит преподобному́ченика Иа́кова, / таи́нника же его́ диа́кона Иа́кова / и Игна́тия, Афо́на украше́ния и Иорда́на, трапезу́нтцев похвалу́, / Христа́ страда́нии свои́ми просла́вивших.

Кто ублажа́ти не до́лжен есть Яни́ны кра́сное прозябе́ние Боже́ственнаго Иоа́нна, / и сла́вное Состави́и удобре́ние Иоа́нна, / и по сих с ни́ми све́тлаго Иоа́нна Кули́ку?

Византи́и хвала́ текто́н Иоа́нн да почти́тся пе́сньми, / и Та́са рожде́ние Иоа́нн швец похвале́н бу́ди, / и влахи́йский Иоа́нн – три тезоиме́нныя благода́ти му́ченики.

Я́ко еле́ни жа́ждущии, теча́сте псало́мски, но́вии страстоте́рпцы, / на исто́чники му́ченичества, взыва́юще тира́ном: / что ме́длите му́чити нас? / Жела́ем бо со Христо́м бы́ти.

Подо́бяся волко́м кровожа́дным, / пле́мя Исма́ила устремля́шеся на вас, а́гнцы Госпо́дни, / и вся́кия ви́ды мук изобрета́ше, / да разлучи́т вы, всехва́льнии, от любве́ Христо́вы.

Во́лны муче́ния, воспеня́емыя я́ростию злочести́вых, / не возмого́ша потопи́ти корабля́ душ ва́ших, благосла́внии, управля́емаго Ду́хом, / до́ндеже внидо́сте в приста́нище Ца́рствия Небе́снаго.

Триипоста́сное Богонача́лие воспои́м, / дарова́вшее моли́твенники к Нему́ о нас святы́я новому́ченики, / и́же умилостивля́ют То́е о чту́щих па́мять их.

Богоро́дичен: Ра́дуйся, Присноде́во, злата́я мы́сленных арома́т кади́льнице, / в нейже положися Небесный фимиам – Христос, / облагоуха́яй притека́ющия к Тебе́, Богоро́дице.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Ко́рмчий Иоа́нн досто́ин есть вои́стинну песнопе́ния мно́гаго / и тве́рдый Иоа́нн о́трок, други́й яви́выйся Маккаве́й благода́тию Бо́жиею, / да пое́тся с ни́ми и Иоа́нн, булга́р похвала́.

Преподо́бный Иоаса́ф пострада́ / и зако́нно подвиза́ся с ним Ио́сиф, сый от Си́рии, / и Боже́ственный пропове́дник благода́ти Косма́ сла́вный, / сугу́бым укра́шен венце́м.

Похвала́ вся́кая прили́чествует целому́дреннейшей Кира́нне, / Киприа́ну же преподо́бному, и́же и муче́ние претерпе́, / и ру́сский священнои́нок Конста́нтий хвалы́ досто́ин есть.

Я́ко ке́дры, несокруши́мыя му́ками, / умно́жи вас Христо́с в Це́ркви Свое́й, страстоте́рпцы чу́днии, / и благода́тию Свое́ю убели́ ду́ши ва́ша па́че вся́кия белизны́ земны́я.

Я́ко шипки́ и кри́ни, процвели́ есте́ во дво́рех Госпо́дних, страда́льцы, / воня́ми по́двигов ва́ших облагоуха́юще / с ве́рою призыва́ющих вас, всечестни́и.

Я́ко нарци́ссы и гиаци́нти показа́стеся посреде́ зимы́ плене́ния, / и сладкодыха́нием свои́м обвеселя́ете, Богоблаже́ннии, / душе́вная чу́вства лобыза́ющих мо́щи ва́ша.

При́зри на моле́ние недосто́йных раб Твои́х, О́тче, Сы́не и Ду́ше, / и не лиши́ нас всеси́льнаго заступле́ния Твоего́, / чту́щих но́выя му́ченики Твоя́, / страсте́й и искуше́ний изъима́я ны.

Богоро́дичен: Помо́щницу си́льну ве́дуще Тя, Всеблага́я, / моле́ние Тебе́ прино́сим от всея́ души́: / вонми́ и услы́ши ны, Влады́чице, / и изба́ви вся́каго гне́ва и преще́ния Бо́жия рабы́ Твоя́.

Конда́к, глас 1:

Весели́ся та́инственно, Христо́ва Це́рковь, / ви́дящи своя́ сыны́, но́выя му́ченики, / о́крест трапе́зы твоея́ стоя́щия в моще́х, / я́ко новосажде́ния ма́сличная, / и Зижди́телю всех возопи́й: / Ты му́чеников еси́, Христе́, утвержде́ние.

И́кос:

При́сно и во всем до́лжни есмы́, бра́тие, благогове́ти / ко е́же о нас человеколюби́ваго Бо́жия промышле́ния неизсле́димым судьба́м, / не мне́е¹⁰⁵ же и долговре́менному тира́нскому пле́ну, / и́же мно́гих душе́вных благ нам вино́вен бе, / и его́ ра́ди и от него́ прозябе́ благосла́вный / и Христу́ любе́зный и досто́йный Небе́сныя жи́тницы плод, новоявле́ннии му́ченицы, / предлежа́щии ны́не к прославле́нию. / Си́и бо терпеливому́дрии, огради́вшеся си́лою Христо́вою, / вся сла́дкая жития́ сего́ во уме́ты вмени́ша / и, плоть ника́коже щадя́ще, на по́прище страда́ния изыдо́ша. / Ага́рянское у́бо нече́стие уничижи́вше, / Христо́ву же со дерзнове́нием пропове́давше ве́ру, / ей ра́ди многови́дныя му́ки му́жественно до конца́ претерпе́ша / и му́ченическия восприя́ша венцы́, Увенча́телю взыва́юще: / Ты му́чеников еси́, Христе́, утвержде́ние.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

Пе́сньми и пе́нии преподобному́ченика хвалю́ Мака́рия, / Ки́йскаго же Мака́рия и Ма́рка Кри́тскаго, / с ни́мже и Ми́рона, того́ о́строва све́тлую звезду́.

Мануи́лу Кри́тскому с Михаи́лом, от Афи́н происхожде́нием, / и па́ки Михаи́лу, от Грани́цы су́щему, / возшле́м хвалу́, я́ко Тро́ицу сла́вно богосло́вившему.

Михаи́л от Вурли́и и Ники́та Ниро́сский да похва́лятся / и оби́тели Ру́сския на Афо́не иере́й Ники́та, / Никоди́м же в му́ченицех преподо́бный, / в оби́тели подвиза́выйся Метео́рстей.

Вои́стинну вконе́ц побежде́н бысть ва́ми враг, / зе́млю и море́ хваля́йся ниспрове́ргнути, / нога́ми бо ва́шими попра́сте того́, непобеди́мии, / Христа́ в себе́ иму́ще.

Во огни́ мук, страстоте́рпцы, я́ко зла́то, искуси́ вас Госпо́дь / и, я́ко всесожже́ние ту́чно, прия́т, / о́бщники страсте́й Свои́х яви́в вас, всеблаже́ннии.

Его́же пропове́дасте ага́ряном Бо́га и Го́спода, / за Него́же му́ки всеусе́рдно прия́сте, / Того́ умоли́те, страда́льцы, свободи́тися нам ве́чных мук.

Хвалу́ Единосу́щней Тро́ице принося́ще, не преста́йте, му́ченицы, / проси́ти нам се́рдце чи́сто и дух прав, да чи́сте пое́м: / отце́в Бо́же, благослове́н еси́.

Богоро́дичен: Бо́га Отца́ Дщерь яви́лася еси́, Мари́е, / Сы́на же Ма́терь, Присноде́во, / Неве́ста же Ду́ха Свята́го, Пречи́стая, / селе́ние Светонача́льныя Тро́ицы, / всего́ Божества́ храм одушевле́н.

Песнь 8

Ирмо́с: Седмери́цею пещь / халде́йский мучи́тель / Богочести́вым неи́стовно разжже́, / си́лою же лу́чшею спасе́ны, сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Кто не принесе́т похвалу́ Никоди́му, му́ченику и преподо́бному, в руце́ жезл нося́щему, / и прозябе́нию Каппадоки́и до́блему Никола́ю, за Христа́ пострада́вшему в Сми́рне, / и друго́му Никола́ю от ве́си Ме́цовой.

Карпениси́йский да восхва́лится Никола́й, в Византи́и страда́льчествовавый, / с ни́мже Никола́й, рожде́ние Византи́ды, / да велича́ется пра́ведно Никола́й па́ки, хвала́ вели́кая Хио́са, / я́ко от него́ бы́вый и та́мо страда́вый.

Константино́польскаго велича́ю Парфе́ния, ветвь кра́сную Митили́ны, / с ни́мже отпу́щенника Па́вла Ру́сскаго пе́сньми свяще́нными чту, / и Пахо́мия преподо́бнаго воспева́ю, / и Боже́ственнаго Панагио́та, и́же от Кессари́и.

Лик но́вых страстоте́рпцев Госпо́дних ублажа́юще, мучениколю́бцев собра́ние, / воззове́м к ним: / беды́ вся́кия изба́витися нам и осужде́ния умоли́те, вопию́щим: / Го́спода по́йте, дела́, и превозноси́те Его́ во ве́ки.

Стопа́м после́дующе дре́вних му́ченик, / ве́ры ра́ди подвиза́стеся тве́рдо в ны́нешняя времена́, добропобе́дницы, / и всех подвиза́ете Укрепи́вшему вы зва́ти: / Го́спода по́йте, дела́, и превозноси́те Его́ во ве́ки.

Свыше назирающе, венценосцы, славнии, память вашу совершающих, / ходатайствуйте у Всевышняго Дароподателя временная и вечная благая нам, зовущим: / Господа пойте, дела, и превозносите Его во ве́ки.

Глава́м ва́шим усека́емым, всечестни́и новому́ченицы, / тесне́е соедини́стеся со Главо́ю Це́ркве, / я́же есть Еди́н Христо́с Жизнода́вец, зову́ще Ему́ со Отце́м и Ду́хом: / Го́спода по́йте, дела́, и превозноси́те Его́ во ве́ки.

Богоро́дичен: Но́вый Ада́м вме́сто пе́рваго роди́ся – Сын Твой, Де́во, / Ты же, Ма́ти Пречи́стая, вме́сто Е́вы еси́; / вме́сто Еде́ма, его́же лиши́ся пра́отец, отве́рзеся не́бо; / вме́сто печа́ли прама́тере благовести́ся Ти ра́дость, Богоро́дице.

Песнь 9

Ирмо́с: Ужасе́ся о сем Не́бо, /и земли́ удиви́шася концы́, / я́ко Бог яви́ся челове́ком пло́тски / и чре́во Твое́ бысть простра́ннейшее Небе́с. / Тем Тя, Богоро́дицу, / А́нгелов и челове́к чинонача́лия велича́ют.

Блиста́ет в новому́ченицех, я́ко звезда́, светоно́сный Полидо́р от Ки́пра, / и Рома́н преподобному́ченик украша́ет лик страстоте́рпцев, / и Рома́н, иере́й и му́ченик, сугу́бый прия́ вене́ц от Го́спода.

Сра́дуется новому́чеником Христо́вым тверде́йший Са́вва Нигдели́н / и Серафи́м, архиере́й Фана́рский, / с ни́миже вы́ну лику́ют трапезу́нтский Симео́н и Стама́тий Боже́ственный, / происходя́й от Во́лы.

Но́вых му́чеников умно́жиша число́ Трианта́фил кора́бленик / и благопотре́бен Христу́ яви́выйся Христ, рая́ вертогра́дарь, / Алба́нии же похвала́, Христо́в раб Христоду́л но́вый, / Хри́са де́ва, Булга́рии украше́ние.

Безпло́тнии ли́цы А́нгелов возвесели́шася в му́ченичестей за Христа́ кончи́не ва́шей, страстоте́рпцы достосла́внии, / и свяще́нный чин му́чеников ра́достно срета́ше вас в Вы́шних селе́ниих.

Влады́ка всех, Небе́сным врато́м, отве́рстым вам, / в оби́телех Отца́ Своего́ всели́ вас, доблему́дрии, с пе́рвыми страстоте́рпцы Свои́ми / и сла́вы их подо́бники сотвори́, / иде́же помина́йте помина́ющих вас.

Но́вый собо́ре страда́льцев, / Небе́сная че́пе¹⁰⁶ златососта́вная и многови́дная, / ве́нче цветоплете́нный и свяще́нный, / песнь сию́, всехва́льнии, приими́те / и с други́ми, зде непоименова́нными, моле́ние о нас Бо́гу вы́ну приноси́те.

Триипоста́сный Бо́же наш, / но́вых му́чеников Твои́х прие́мый по́двиги и пресла́вно увенча́вый их, / тех предста́тельством спаси́ рабы́ Твоя́ / и сподо́би ны ве́чно сла́вити Твою́ Держа́ву.

Богоро́дичен: Поими́, Де́во, к Сы́ну Твоему́ свяще́нных новому́чеников, / воспомяну́тых на́ми по имена́м и не воспомяну́тых, и с ни́ми помоли́ся, / я́ко да несвети́маго огня́ изба́вльшеся, / Ца́рствия Небе́снаго сподо́бимся.

Свети́лен:

Приими́, о Тро́ице покланя́емая, но́выя му́ченики, / и́хже приво́дит к Тебе́ род плене́нный, / я́ко же́ртвы соверше́нныя, я́ко благоуха́нныя шипки́, / я́ко благово́нныя фимиа́мы, я́ко ми́ра многоце́нная, / и свобо́ду пода́ждь и прегреше́ний всех проще́ние.

На хвали́тех стихи́ры, глас 2:

Прииди́те, мучениколю́бцы вси, / воспои́м новому́ченики Христо́вы, / си́и бо яви́шася в после́дняя ле́та / сла́ва и утвержде́ние Правосла́вныя ве́ры, / те́плии предста́телие на́ши, / немощству́ющих вра́чеве, / скорбя́щих утеше́ние / и мо́лятся, о е́же спасти́ся нам.

Прииди́те, Безпло́тных ли́цы, / во пло́ти су́щим спра́зднуйте нам / в честне́й па́мяти страстоте́рпцев: / си́и бо, те́ло немощно́е нося́ще, / я́ко безпло́тнии, Христа́ ра́ди подвиза́шася, / о лю́тых му́ках неради́вше, / с ни́миже моли́теся, / о е́же спасти́ся нам.

Прииди́те, му́чеников мно́жества, / приве́тствуйте ны́не друг дру́га: / дре́внии – но́вых, / соиме́ннии – соиме́нных, / подо́бнии – подо́бных, / сра́дующеся вку́пе вси / в неизрече́нней сла́ве Небе́сней / и моля́щеся, о е́же спасти́ся нам.

Сла́ва, глас то́йже:

О новособра́нный ли́че и треплете́нный, / от священному́ченик, преподобному́ченик / и му́ченик соста́вленный!/ Кто страстоте́рпческия по́двиги ва́ша / по достоя́нию восхва́лит?/ Вы бо, в разли́чная ле́та / от разли́чных мест су́щии, / вси проти́ву еди́наго / ага́рянскаго злоче́стия вооружи́шася, / и за еди́но Богоче́стие / многови́дныя Претерпе́сте му́ки. / И ны́не на Небесе́х вку́пе лику́юще, / моли́теся, о е́же спасти́ся нам.

И ны́не, Богоро́дичен: Преблагослове́нна еси́, Богоро́дице Де́во:

Блаже́нны от 3-й пе́сни четы́ре после́дних тропаря́: Не хвали́теся, мучи́телие: Ди́вна, Христе́, держа́ва: Сла́ва: Тро́ице Бо́же наш: И ны́не: Тебе́ сла́вим:

(Служба совершается в соединении с воскресной службой Октоиха 2-го гласа)

На Го́споди, воззва́х: стихи́ры, глас 6:

Те́сный путь, препла́вающе, / ше́ствовали есте́ неви́нным ду́хом, / к жи́зни веду́щим, / терпели́во низложи́ша де́монская ловле́ния, / те́мже и Бо́гу возлю́блени есте́, / Тому́ помоли́теся дарова́ти душа́м на́шим мир и ве́лию ми́лость, / преблаже́ннии отцы́, / Нова́гра́да све́тлая похвало́.

Днесь вся страна́ на́ша / блаже́нных оте́ц просвеща́ется заря́ми, / и Бо́жия Це́рковь, цветы́ украша́ема, вопие́т к вам: / уго́дницы Христо́вы и те́плии предста́телие, / моли́теся о благохва́лящих вас.

Песнопе́ние и хвалу́ прино́сим вам, преподо́бнии отцы́: / ра́зума све́тлостию украси́вшеся, / за́поведьми Боже́ственными просвети́ли есте́ ду́ши ва́ша, / земна́я вся пренебре́гше, / к Бо́гу Еди́ному притеко́сте, / Его́же моли́те, да спасе́т ду́ши на́ша.

Воздержа́нием увяди́ли есте́ плотски́я стра́сти, / ми́лости воздая́нием благода́ть духо́вную восприя́сте, / тем и по кончи́не чуде́с сосу́ди яви́стеся, / от страсте́й очища́юще нас, блаже́ннии отцы́, / моли́те Христа́ Бо́га / грехо́в оставле́ние нам дарова́ти.

Сла́ва, глас 8:

Ра́дуйся, пресла́вная Нова́гра́да страно́, / лику́й, в Бо́зе торжеству́ющи, / тебе́ бо даде́ся многоце́нное сокро́вище –/ собо́р святи́телей украси́ тя, / преподо́бных и пра́ведных, / те́мже днесь, веселя́щеся, почти́м святи́теля Иоа́нна, / с ним же Моисе́я и Евфи́мия, / Анто́ния, Фео́дора, Варлаа́ма, / Ксенофо́нта и Ефре́ма, / Ни́фонта, Са́вву, Ферапо́нта, Кири́лла и други́х, / их бо предста́тельством чуде́с лю́дем подава́ется мно́жество, / ве́рныя лю́ди укрепля́ют на враги́ проти́вныя, / ду́хом же предстоя́ще у Влады́чня Престо́ла, / мо́лятся спасти́ся душа́м на́шим.

И ны́не, Богоро́дичен.

На стихо́вне стихи́ры, глас 4:

С Серапио́ном возсия́ приснопа́мятный Ники́та, / и сла́вный Феокти́ст, Ио́на и Михаи́л, / доблему́дренно пожи́вше / и вся полки́ де́монския му́жески на земли́ победи́вше, / тем то́чат исцеле́ний струи́ / и сердца́ напоя́ют бога́тно благочести́вых / Боже́ственною благода́тию.

Стих: Восхва́лятся преподо́бнии во сла́ве / и возра́дуются на ло́жах Свои́х.

Возсия́ли есте́, преподо́бнии отцы́, / доброде́тельми и виде́нием на тве́рди, / я́ко по́стницы ве́рнии, / всесве́тлыми и сла́вными заря́ми / вся отгоня́ете омраче́ния ерети́ческая / и просвеща́ете ве́рою и любо́вию прилежа́щия ва́шим учени́ем, / те́мже светоно́сную па́мять ва́шу соверша́ем любо́вию, / моли́теся о душа́х на́ших.

Стих: Блаже́ни вси, боя́щиися Го́спода, / в путе́х Его́ ходи́ша.

Живу́ще по сме́рти, прехва́льнии, / посеща́ете вся, притека́ющия к моще́м ва́шим, / от лю́тых страсте́й покрыва́ете всегда́ / и от бед избавля́ете, / подава́ете же исцеле́ния моли́твами ва́шими / и спаса́ете от де́монскаго нахожде́ния / чту́щия святу́ю па́мять ва́шу, / прося́ще от Бо́га дарова́ти проще́ние прегреше́ний.

Сла́ва, глас 6:

А́нгельское возжеле́вше житие́, / преподо́бнии отцы́ прехва́льнии, / мимотеку́щее житие́ сие́ я́ко сон вмени́ли есте́ себе́, / подвиза́ющеся воздержа́нием, и приле́жными моли́твами, / и поще́нием, и бде́нием, и ни́зу лежа́нием, / и чистото́ю сосу́ди пречи́сти яви́лися есте́ Свята́го Ду́ха, / и святы́х и неизрече́нных чуде́с дар от Бо́га прия́ли есте́, / те́мже моли́теся ко Го́споду / мир дарова́ти Новгоро́дстей стране́ / и душа́м на́шим ве́лию ми́лость.

И ны́не, Богоро́дичен.

Тропа́рь чудотво́рцем Новгоро́дским, глас 8:

Я́ко всесве́тлии свети́льницы, / яви́стеся во стране́ сей, / святи́телие Новгоро́дстии, преподо́бнии, и Христа́ ра́ди юро́дивии, и вси пра́веднии, / посто́м насажде́ннии воздержа́нием напая́еми, / сего́ ра́ди и сподо́бистеся бы́ти прия́телище Бо́жия Ду́ха / и чудеса́ де́йствовати, / моли́те Христа́ Бо́га за вся лю́ди, / спасти́ся душа́м на́шим.

Ин тропа́рь, глас 4:

Пусты́нное житие́ возлюби́вше, преподо́бныя отцы́, / яви́стеся Новгоро́дстей стране́, я́ко ино́е со́лнце, / озаря́юще сию́ мо́лниями чуде́с ва́ших, / и просвеща́ете ве́рою воспева́ющих вам: / ра́дуйтеся, по́стников похвало́ и пра́ведных удобре́ние.

Кано́н, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Мно́гими окруже́нный опеча́леньми от грехо́в мои́х, / напа́дающими мне неща́дно, / к вам притека́ю, о богоно́снии, / дви́жа ва́ша моли́твы в по́мощь.

Святи́телю о́тче Иоа́нне, / ты еси́ сохрани́л град от враго́в, / и бе́сы покори́л к свое́й вла́сти, / и е́зде на о́ном во Иерусали́м, / и са́ми врата́ отверзо́шася тебе́, / и про́тив ре́чныя быстри́ны пловя́ше, / моли́ спасти́ся душа́м на́шим.

Ники́то всехва́льне, / Христо́ва ста́да бы́вый па́стырь, / в нощны́х страсте́х неусы́пный бди́тель, / моли́твою твое́ю дождь сведе́, и от пла́мене град свободи́, / и нас от грехо́вных страсте́й изба́ви.

Богому́дре святи́телю Моисе́е, / Бо́гови соедини́вся, и архиере́й Це́ркви Христо́ве, о́тче был еси́, / оби́тель от разбо́йников защища́я и по сме́рти от потопле́ния избавля́я, / да изба́вимся и мы от грехо́вных страсте́й моли́твами твои́ми.

Ева́нгельских уче́ний рачи́телю, Ио́но, о́тче наш, / проро́чески возше́дый на святи́тельский престо́л, / моли́твою твое́ю изба́ви ду́ши на́ша.

Евфи́мия блаже́ннаго свяще́нную па́мять днесь соверша́юще, / Боже́ственными пе́сньми почти́м, я́ко архиере́я вели́каго, / о нас всегда́ моля́щася ко Го́споду.

Су́етныя му́дрости возгнуша́вся, / и́стинным после́дуя ева́нгельским за́поведем, преблаже́нне святи́телю Феокти́сте, / це́рковь Прему́дрости Бо́жия украси́л еси́, / и вели́кими тя просла́ви Бог чудесы́, / моли́ о чту́щих тя.

Днесь воспои́м святи́теля Арка́дия, благоче́стия наста́вника, / Це́ркве столпа́ непоколеби́маго, / Вели́кому Нову́гра́ду просвети́теля: / не преста́й, при́сно моля́ся о душа́х на́ших.

Богоро́дичен: Твои́ми моли́твами к Твоему́ Сы́ну, Богоро́дице, / ско́ро спаси́ мя от лю́тых, / Тебе́ бо Помо́щницу су́щим в беда́х вси стяжа́хом всегда́.

Песнь 3

Ирмо́с: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.

Ни́фонте иера́рше, / излия́ся благода́ть во устна́ твоя́, / и был еси́ па́стырь Христо́вы Це́ркве, / уча́ ве́ровати во Еди́ную и Неразде́льную Тро́ицу во Еди́ном Божестве́.

Серапио́не пречу́дный, / был еси́ украше́ние Вели́кому Нову́гра́ду, / па́стырь неусыпа́емый ове́ц Свои́х, / моли́ о душа́х на́ших.

Кро́ток и незло́бив во всем житии́ твое́м, / поревнова́л еси́ бра́ту / и чудеса́ми свои́ми устро́ил еси́ храм Бо́жий, святи́телю о́тче Григо́рие, / сего́ ра́ди на Небеси́ обре́л еси́ поко́й: / помина́й чту́щих па́мять твою́.

Повину́яся за́поведи Го́спода Иису́са Христа́, / от ю́ности Того́ после́довал еси́ стопа́м, святи́телю Фео́филе, / не забу́ди моля́щихся тебе́.

Варлаа́ме Богоно́сне, чудеса́ми просла́ви тя Бог: / ме́ртвых воскреша́я, и град от потопле́ния избавля́я, / и неве́рных пла́менем опаля́я, / и проро́чества дар сподо́бился еси́ прия́ти от Влады́ки своего́, / о нас моли́ дарова́тися избавле́нию.

Анто́ние, на ка́мень, я́ко на ле́гкий кора́бль, возше́л еси́ / и на нем па́че естества́, я́ко безпло́тен, по вода́м ше́ствовал еси́, / Нова́гра́да дости́г и оби́тель в нем сотвори́в, / моли́ Христа́ Бо́га спасти́ся душа́м на́шим.

Михаи́ле преблаже́нне, сла́ву ми́ра сего́ и вся кра́сная ни во что же вмени́, / во юро́дство преложи́ся, / дар проро́чества прии́м, бесо́в изгна́, и исто́чник моли́твою изведе́, / и нас, моля́щихся тебе́, росо́ю благода́ти ороси́.

Богоро́дичен: Жизнь ро́ждшая, Де́во Всенепоро́чная, / се́рдца моего́ стру́пы исцели́ хода́тайствы Твои́ми / я́же к Сы́ну Твоему́, Богоблагода́тная.

Седа́лен, глас 1:

Мирски́я молвы́ попра́ли есте́, / Миродержа́телю предстои́те, / возлете́вше кри́лы златоукраше́нными от трудо́в, поще́ния и моли́тв, / отцы́ Богоблаже́ннии.

Сла́ва, и ны́не, Богоро́дичен.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Са́вво Богому́дре, посто́м и моли́твою на столп возше́д, / чу́дным житие́м сла́вен показа́лся еси́, / и зве́ри ди́вия послу́шающия себе́ сотвори́вый, / и нас изба́ви от зве́ря, и́щущаго поглоти́ти нас.

В пусты́ню всели́вся, Преблаги́м Бо́гом наста́влен, преподо́бне о́тче Ефре́ме, / устраши́л еси́ бесо́вская ополче́ния, на тя напа́дающия, / спаси́ и нас от о́ных.

Арсе́ние пресла́вне, сла́ву ми́ра сего́ ни во что же вмени́в, / дом роди́телей и супру́жницу оста́вив, / царе́й не убоя́вся, проро́ческим гла́сом отхо́д души́ прови́дя, / моли́ о душа́х на́ших.

Нико́ло и Фео́доре, дар от Бо́га проро́чества прии́мшии, / терпе́нием изнуря́юще те́ло свое́, во юро́дство преложи́стеся, / по вода́м, я́ко по су́ху, бе́гающе и сла́вни житие́м яви́стеся, / моли́те о чту́щих вас.

Алекса́ндре сла́вне, от ю́ности Христа́ возлюби́в, / и ле́гкое и́го Его́ на ся восприя́л еси́, / и мно́гими чудеса́ми просла́ви Тебе́ Бог, / моли́ спасти́ся душа́м на́шим.

Го́рняго мудрова́ния испо́лнен сый, Богому́дре Кири́лле, / иде́же луча́ми доброде́телей, я́ко богоза́рное свети́ло, возсия́л еси́.

Богоро́дичен: Не оста́ви мене́, к Тебе́ прибега́юща, в ра́дование бесо́м бы́ти, Влады́чице, / но необори́мая Твоя́ моли́тва да прожене́т их противобо́рства.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Благове́рный вели́кий кня́же Алекса́ндре, / предста́л еси́ Престо́лу сла́вы вели́чества Триипоста́снаго Божества́, / Его́же моли́ о душа́х на́ших.

Во сла́ве О́тчей предстоя́, вели́кий кня́же Фео́доре, / нетле́нным и неувяда́емым венце́м венча́н, / моли́ о душа́х на́ших.

Оста́вив вре́менный живо́т и ца́рство, / ца́рствуеши на Небеси́ во сла́ве О́тчей, / насыща́яся Трисия́тельным Све́том Триипоста́снаго Божества́, / вели́кий кня́же Гео́ргие, моли́ о чту́щих тя.

Созда́вый храм на земли́ Прему́дрости Бо́жией, / созда́вый и себе́ хра́мом Ду́ху Свято́му, благове́рный кня́же Влади́мире, / устро́ил еси́ некра́домое Ца́рство на Небесе́х, / сего́ ра́ди почита́ем святу́ю па́мять твою́.

Возлете́ла еси́, я́ко голуби́ца чи́стая, / к Жениху́ Христу́ своему́ ца́рствовати на Небесе́х, / благове́рная княги́не А́нно, / моли́ о чту́щих тя.

Анто́ние ди́вный, умертви́вый плоть до конца́, / стра́сти покори́, и те́ло свое́ удручи́ посто́м, / дом Ду́ху Свято́му соде́лался еси́, / соде́лай и нас страсте́й победи́тельми.

Кири́лле пресла́вне, во утро́бе ма́терней, возгласи́в трикра́ты: / Свят, Свят, Свят Савао́ф, испо́лнь вся земля́ сла́вы Его́, / стра́нствия прия́ и гла́сы от Го́спода слы́ша: / на о́стров всели́вся, мно́га чудеса́ сотвори́, / и наслажда́ешися на Небесе́х неизрече́нных благ, / моли́ у́бо о чту́щих тя.

Богоро́дичен: Виждь на нас нало́ги¹⁰⁸, Многоми́лостиве, / и, сия́, я́ко Бог, обле́гчи, / приими́ о нас моля́щуюся Ма́терь Твою́, / Ю́же Ти во умилостивле́ние приво́дим.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Анто́ние чу́дне, Лео́хну просла́ви чудеса́ми, / после́довал еси́ Христу́ и предста́л Престо́лу сла́вы, / моли́ о душа́х на́ших.

Адриа́не сла́вне, испо́лнен вы́сшия благода́ти, / и дом Ду́ху Свято́му соде́лался еси́, / о нас моли́ Христа́ Бо́га на́шего.

Ана́ние до́бре, / соблюды́й о́браз Бо́жий в души́ твое́й, / из ра́ки изобразу́я святы́х и немощны́я исцели́вый тро́стию свое́ю, / изобрази́ и в нас доброде́тельныя ви́ды, всесла́вне.

Анто́ние блаже́нне, чу́дным житие́м просла́ви тя Бог, / и град Кири́ллов многоцеле́бное те́ло име́ет, / источа́ющее ми́ру исцеле́ния.

Евфроси́не преподобному́чениче, / Боже́ственною любо́вию возгоре́вся, / мирски́я пристра́стия от души́ отве́рг, / моли́ся Бо́гу, да изба́вит и нас от бесо́вских нахожде́ний.

Блага́го Бо́га подража́тель был еси́, преподо́бне Ксенофо́нте, / милосе́рдие к ни́щим и любо́вь нелицеме́рну стяжа́л еси́, / и нам испроси́ проще́ние твои́ми к Бо́гу моли́твами.

Ра́дуйся, Арсе́ние, Небе́сный граждани́не, со́лнце А́нгелов, / ра́дуйся, све́тлый свети́льниче, сия́нием чуде́с всех озаря́ющий, / ты, по вода́м пла́вающим по́мощь, / от бед и зол моли́ изба́вити нас, / умири́ти мир и спасти́ ду́ши на́ша.

Богоро́дичен: Не оста́ви погружа́тися лю́тыми скорбьми́ ду́шу мою́, о Ра́досте, / Ра́дость роди́вшая, Богоневе́сто, / но те́мныя страсте́й о́блацы от се́рдца отжени́ / и да́руй ми свет и весе́лие.

Конда́к, глас 5:

Преподо́бнии отцы́ и чудотво́рцы, / уго́дницы Христо́вы, / Новогра́дстии свети́льницы, / и́же а́нгельским житие́м просия́вше, / Боже́ственных сподо́бистеся даро́в, / Спа́су служа́ще со А́нгелы непреста́нно, / моли́те изба́витися нам от вся́каго прегреше́ния / и душа́м на́шим дарова́ти ве́лию ми́лость.

И́кос:

Прииди́те, по́стническое сосло́вие, / прииди́те, чистоты́ рачи́телие, / прииди́те, празднолю́бцы, всяк во́зраст, / пе́сньми духо́вными похва́лим на́ших моли́твенников, / в них иму́ще по́стников похвалу́, / молча́льников удобре́ние, печа́льных утеши́телей, / боля́щих посети́телей и су́щим в беда́х скоропослу́шных помо́щников, / точа́щих всем исцеле́ния оби́льно, / обрето́ша бо благода́ть чуде́с Бо́жиим веле́нием.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

Фили́ппе сла́вне, Ду́хом Бо́жиим наставля́емь, / возлюби́л еси́ безмо́лвие, к Го́рнему торжеству́ возше́л еси́, / моли́ Бо́га спасти́ся душа́м на́шим.

Ра́дуйся, мона́хов све́тлая добро́то; / ра́дуйся, Корни́лие, о́тче наш; / ра́дуйся, зре́ние сла́вы Божества́ Трисо́лнечнаго, / со А́нгел ликостоя́нии, с преподо́бными торжество́ преми́рное / и сла́ву име́я присносу́щную со все́ми святы́ми.

Я́ко А́нгел, был еси́ на земли́, всеблаже́нне о́тче наш Ни́ле, / Триипоста́сному Божеству́ славосло́вие принося́, / помина́й нас, чту́щих святу́ю па́мять твою́.

Иа́кове пра́ведный, / плывя́ по вода́м про́тив ре́чныя быстри́ны, / упра́ви ум наш к Бо́гу и моли́ о душа́х на́ших.

Я́ко избра́нник Бо́жий, Анто́ние, просла́вися на е́зере Че́рном, / не иски́й сла́вы от челове́к, / и Бог просла́ви тя в чудесе́х Свои́х.

В труде́х и по́двизе, Мартиниа́не, и во бде́ниих мно́жицею, / во а́лчбе и жа́жде поревнова́вый учи́телю своему́, блаже́нному Кири́ллу, / моли́ о душа́х на́ших.

Зоси́мо, простра́ннаго пути́ бе́гая, / путь те́снаго жития́ жела́ше, / и сим насле́довал еси́ ве́чный поко́й.

Богоро́дичен: На моле́ние мое́ ны́не умилосе́рдися / и ра́дость вме́сто печа́ли да́руй ми, / да пою́ Тя, Влады́чице, и вопию́ Сы́ну Твоему́: / благослове́н Бог наш, Бог оте́ц на́ших.

Песнь 8

Ирмо́с: Царя́ Небе́снаго, / Его́же пою́т во́и а́нгельстии, / хвали́те и превозноси́те во вся ве́ки.

Кре́пко вооружи́вся на неви́димаго врага́, я́коже тве́рдый адама́нт, / вся их сокруши́л еси́, святи́телю, Ни́фонте, / от злых невреди́мо спаси́ нас.

Я́ко еле́нь на исто́чники водны́я, / си́це ты возжеле́ ко Го́споду ду́хом, / те́сным путе́м по́стничества неукло́нно текл еси́, преподо́бне Марти́рие, / насыща́яся зре́нием Царя́ Небе́снаго, / помина́й до́лу су́щих нас.

Иулиани́е, Харити́но, Глике́рие, преподо́бныя же́ны, / чудеса́ми ны́не пра́зднуем па́мять ва́шу, / моли́те Бо́га о душа́х на́ших.

Богоза́рный свети́льник возсия́л еси́, Иродио́не, доброде́тельными по́двиги, / и светови́дна тя и сла́вна сотвори́ Госпо́дь.

Богоро́дичен: Царя́ Небе́снаго ро́ждшая, / дерзнове́ние Ма́тернее я́ко иму́щи к Нему́, Де́во, / изба́ви нас от бед.

Песнь 9

Ирмо́с: Вои́стинну Богоро́дицу / Тя испове́дуем, / спасе́ннии Тобо́ю, Де́во Чи́стая, / с безпло́тными ли́ки Тя велича́юще.

Сра́дуйся с нами, Вели́кий Новгра́де, / в светоно́сный день па́мяти пра́ведных муже́й / Ники́ты, Ники́фора, Исаа́кия, Кири́лла и Кли́мента: / доброде́тельными дея́ньми, я́ко фи́никсы, процвето́сте / и, я́ко ке́дри лива́нстии, умно́жишася.

Богоизбра́нному сосу́ду – Па́влу труда́ми, Киприа́не, ревну́я, / сам был еси́ я́ко сосу́д злат, че́стен де́лы и словесы́, / процве́л еси́ доброде́тельми.

От Боже́ственнаго раче́ния я́ко в час исхо́да от земли́ / святы́й Леони́д быва́ет прича́стник Боже́ственных Христо́вых Та́ин / и а́бие дух свой в ру́це Его́, ра́дуяся, преда́ст.

В ра́йские селе́ния вшел еси́ от нас, всеблаже́нне о́тче наш Инноке́нтие, / и о́ком бре́нным зре́ти тя не мо́жем, / при́сно мо́лишися о душа́х на́ших.

Богоро́дичен: Со святы́ми А́нгелы, с Боже́ственными апо́столы, / со сла́вными му́ченики и все́ми преподо́бными / Твоего́ моли́ Сы́на и Бо́га, Богороди́тельнице Пречи́стая, / спасти́ от бед ду́ши на́ша.

Свети́лен воскре́сен.

На хвали́тех стихи́ры, глас 1:

Я́коже зве́зды многосве́тлыя –/ доброде́тели ва́ша, Иа́кове и Иоа́нне: / вас при́сно ублажа́ем.

О вели́цыи отцы́ на́ши, / Христо́вы уго́дницы / и те́плыя предста́телие ко Спа́су о душа́х на́ших, / Се́ргие и Ге́рмане, / вы бо исцели́тели в неду́зех / и в беда́х ско́рыя помо́щники, / моли́теся о всех нас.

По́стническое и равноа́нгельное твое́ житие́, / преподо́бне о́тче наш Гу́рие, / яви́ тя чудотво́рца вселе́нней, / моли́ спасти́ся всем нам.

Сла́ва, глас 8:

Преподо́бнии отцы́, / поучи́вшеся день и нощь в зако́не Госпо́дни, / досто́йни бы́сте древеса́ Живо́тнаго Са́да бы́ти, / и плод ваш страда́ньми и венца́ми процвете́, / дерзнове́ние у́бо иму́ще к Подвигополо́жнику Христу́ Бо́гу, / и нам испроси́те очище́ние / и ве́лию ми́лость.

И ны́не, Богоро́дичен: Преблагослове́нна еси́, Богоро́дице Де́во:

Моли́тва

О преподо́бнии и богоно́снии отцы́ на́ши и вси пра́веднии, новгоро́дская свети́ла вели́кая земна́я, в Росси́йстей земли́ сла́вно просия́вшии и сию́ мно́гими светоза́рными ангелора́внаго ва́шего жития́ звезда́ми укра́сившии, всю же вселе́нную высо́ких доброде́телей светлостьми́ и чуде́с Боже́ственных блиста́нии удиви́вшии, и ны́не, к сме́ртному за́паду пло́тски во гроб заше́дшии, душа́ми со Христо́м, Со́лнцем пра́вды, су́щии пра́ведницы, просвеща́етеся, я́ко сном во Ца́рствии Небе́снем, иде́же ны́не моли́твы ва́ша к Бо́гу Све́ту, лучи́, о оте́честве свое́м, простира́юще, не забу́дите и нас, в но́щи страсте́й и скорбе́й пребыва́ющих, всегда́шнии на́ши моли́твенницы, свы́ше бога́тыми призира́ти осия́нии, я́ко да во све́те доброде́тельнаго ва́шего жития́ пра́во ходя́ще, сподо́бимся зре́ти Свет непристу́пныя Сла́вы Бо́жия, хва́ляще Его́ ку́пно с ва́ми в несконча́емыя ве́ки. Ами́нь.

И́на моли́тва

О преподо́бнии и богоно́снии отцы́ на́ши, па́стырие и учи́телие, по́стницы и испове́дницы, к вам прибега́ем, вам мо́лимся и ми́ли ся де́ем, не забу́дите нас, прибега́ющих к вам, бу́дите моли́твенницы о оте́честве ва́шем, мы же я́ко смире́ннии и немощни́и су́ще, ничто́же возмо́жем твори́ти без ва́шего заступле́ния, про́сим предста́тельства ва́шего на мо́ри и на су́ше, в беда́х утеше́ния, в несча́стии покрови́тельства, в оби́дах заступле́ния и во всех приключа́ющихся злых – ра́дости и упова́ния, те́мже, не я́ко неключи́ми раби́, но я́ко ва́ши сы́нове да пребу́дем и моли́твами ва́шими живо́т ве́чный в Ца́рствии Невече́рнем насле́дим. Ами́нь.

Собор Новгоро́дских святых.

Служба Новгородским святым составлена в XIX веке. За основу при её составлении была взята «Служба преподобным отцем Печерским и всем святым, в Малой России просиявшим» (Киев, 1866), написанная иеромонахом Мелетием Сиригом в конце XVII века, а канон самостоятелен. Текст Службы Новгородским святым сохранился в рукописи 1831 года фонда Александро-Невской Лавры (ГПБ, ф. 15, А-9 (№ 15), лл. 42–49 об.). Впоследствии к Службе святым Новгородским были составлены самостоятельные стихиры на «Господи, воззвах», на стиховне, тропарь, кондак, икос и седален. Они сохранились в рукописи XIX века фонда Александро-Невской Лавры (ГПБ, ф. 15, А-58). В Службе Новгородским святым самостоятельные тексты из обеих рукописей объединены. Первый тропарь Новгородским святым – «Яко всесветлии...» приводится по рукописи XVIII века (БАН, Арх. ком., № 230). Его употребление сохранилось и в церковно-певческой традиции Новгородской епархии. Служба совершается в соединении с воскресной службой Октоиха (2-го гласа).

Святители

Иоаким Корсунский, епископ Новгородский († 1030; память 10 февраля);

Лука, епископ Новгородский († 1060; память 15 октября, 10 февраля);

Герман, епископ Новгородский († 1096; память 10 февраля);

Никита, епископ Новгородский († 1108; память 31 января);

Нифонт, епископ Новгородский († 1156; память 8 апреля);

Аркадий, епископ Новгородский († 1162; память 18 сентября);

Иоанн, архиепископ Новгородский († 1186; память 7 сентября);

Григорий, архиепископ Новгородский († 1193; память 24 мая, 10 февраля);

Мартирий, архиепископ Новгородский († 1199; память 24 августа, 10 февраля);

Антоний, архиепископ Новгородский († 1231; память 8 октября, 10 февраля);

Феоктист, архиепископ Новгородский († 1310; память 23 декабря);

Василий, архиепископ Новгородский († 1352; память 3 июля, 10 февраля);

Моисей, архиепископ Новгородский († 1362; память 25 января);

Симеон, архиепископ Новгородский († 1421; память 15 июня, 10 февраля);

Евфимий, архиепископ Новгородский († 1458; память 11 марта);

Иона, архиепископ Новгородский († 1470; память 5 ноября);

Феофил, архиепископ Новгородский († 1482; память 26 октября);

Геннадий, архиепископ Новгородский († 1504; память 4 декабря, 10 февраля);

Серапион, архиепископ Новгородский († 1516; память 16 марта);

Филипп, митрополит Московский († 1569; память 9 января);

Пимен, архиепископ Новгородский († 1571; память 10 февраля);

Аффоний, митрополит Новгородский († 1653; память 6 апреля, 10 февраля).

Благоверные князья и княгини

Анна Новгородская († 1056; память 10 февраля);

Владимир Новгородский († 1052; память 4 октября);

Мстислав Киевский († 1132; память 14 апреля);

Мстислав Храбрый († 1180; память 14 июня);

Василий Новгородский († 1219; память 4 октября);

Мстислав Новгородский († 1228; память 4 октября);

Феодор Новгородский († 1233; память 5 июня);

Александр Невский († 1263; память 23 ноября);

Феодосия (в иночестве Евфросиния; XIII в., память 4 мая).

Преподобные

Ефрем Новоторжский († 1053; память 28 января, 11 июня);

Антоний Римлянин († 1147; память 3 августа);

Андрей, игумен Новгородский (XII в.);

Варлаам Хутынский († 1193; память 6 ноября);

Кирилл, игумен Новгородский († после 1196);

Антоний Дымский († ок. 1224; память 24 июня);

Константин († ок. 1240) и Косма († после 1240) Косинские (память 29 июля);

Ксенофонт Робейский († 1262; память 28 июня);

Сергий и Герман Валаамские († ок. 1353; память 28 июня);

Кирилл Челмогорский († 1378; память 8 декабря);

Лазарь († 1391) и Афанасий (XV) Олонецкие, Мурманские (память 8 марта);

Елеазар, Назарий и Евмений Олонецкие, Мурманские (XV; память 4 июня);

Никита, Никифор, Кирилл, Климент, Исаакий и два брата Сокольницкие (XIV–XV; память 4 мая);

Феофил и Иаков Омучские († ок. 1412; память 21 октября);

Корнилий Палеостровский, Олонецкий († 1420; память 19 мая);

Авраамий Палеостровский, Олонецкий (XV; память 19 мая);

Кирилл Белоезерский († 1427; память 9 июня);

Игнатий Молчальник, Белоезерский (XV; память 9 июня);

Досифей старец, Белоезерский (XV; память 9 июня);

Леонтий Кариховский († ок. 1429: память 18 июля);

Савватий Соловецкий († 1435; память 27 сентября);

Зосима Соловецкий († 1478; память 17 апреля);

Герман Соловецкий († 1479; память 30 июля);

Иоанн Свещеносец, Соловецкий (XV);

Василий келейник, Соловецкий (XV);

Макарий рыболовец, Соловецкий (XV);

Онуфрий пустынник, Соловецкий (XV);

Герасим отшельник, Соловецкий (XV);

Ианнуарий Соловецкий (XV);

Стефан трудник, Соловецкий († после 1492);

Филипп пустынник, Соловецкий († после 1492; память 14 ноября);

Досифей затворник, Соловецкий (XV–XVI);

Елисей Сумский, Соловецкий (XV–XVI; память 14 июня);

Арсений Коневский († 1447; память 12 июня);

Михаил Клопский († ок. 1453–1456; память 11 января);

Савва Вишерский († 1461; память 1 октября);

Андрей Вишерский (XV; память 1 октября);

Варлаам Пинежский, Важский († 1462; память 19 июня);

Паисий Важский (память 27 июля);

Александр Ошевенский († 1479; память 20 апреля);

Мартиниан Белоезерский († 1483; память 12 января);

Моисей Белоезерский († ок. 1492; память 23 февраля);

Ефрем Перекомский(† 1492; память 26 сентября);

Роман Перекомский (XVI; память 26 сентября);

Галактион Белоезерский († 1506; память 12 января);

Герман дивный, Белоезерский († 1508; память 23 февраля);

Нил Сорский († 1508; память 7 мая);

Пахомий Кенский († ок. 1515; память в 1-ю субботу после Богоявления (6 января);

Пафнутий Кенский († 1515; память 15 мая);

Иннокентий Комельский († 1521; память 19 марта);

Филипп Ирапский († 1527; память 14 ноября);

Кирилл Новоезерский († 1532; память 4 февраля);

Макарий Оредежский († 1532; память 9 августа);

Александр Свирский († 1533; память 30 августа);

Игнатий, Леонид, Дионисий, Феодор, Ферапонт, Корнилий и Афанасий Островские (XVI; память 30 августа);

Иродион Илоезерский († 1541; память 28 сентября);

Иоанн и Лонгин Яренгские († ок. 1544–1545; память 3 июля);

Иоаким Опочский († ок. 1550; память 9 сентября);

Нил Столобенский († 1554; память 7 декабря);

Антоний Сийский († 1556; память 7 декабря);

Александр, Иоаким и Илия Сийские (XVI; память 7 декабря);

Вассиан и Иона Пертоминские, Соловецкие († 1561; память 12 июня);

Зиновий Отенский († 1568; память 30 октября);

Арсений, затворник Новгородский († 1570; память 12 июля);

Феодорит, просветитель Кольский († 1571; память 17 августа);

Анания, иконописец Новгородский († 1581; память 17 июня);

Никон и Дионисий Новгородские;

Трифон Печенгский, просветитель Кольский († 1583; память 15 декабря);

Никандр Псковский († 1581; память 24 сентября);

Киприан Стороженский († после 1598; память 2 ноября);

Иона Яшезерский († ок. 1589–1592; память 22 сентября);

Антоний Черноезерский (XVI; память 17 января);

Даниил Шужгорский (XVI; память 21 сентября);

Харитон Кудинский (XVI; память 28 сентября);

Никандр Городноезерский (XVI; память 4 ноября);

Макарий Римлянин (XVI–XVII; память 19 января);

Мартирий Зеленецкий († 1603; память 1 марта);

Гурий Шалацкий († ок. 1603; память 14 ноября);

Серапион Корнилий (XVI; память 27 июня);

Лонгин, Герман и Боголеп (XVI–XVII; память 12 августа) Кожеезерские;

Антоний Леохновский († 1611; память 17 октября);

Антоний Соловецкий († 1613; память 22 марта);

Иаков, игумен Соловецкий, Костромской († 1614);

Герман Столобенский († 1614; память 22 февраля);

Иринарх Соловецкий († 1628; память 17 июля);

Диодор Юрьегорский († 1633; память 27 ноября);

Прохор (Порфирий) Юрьегорский, Архангельский (сер. XVII);

Андрей, пустынник Соловецкий († 1606);

Никифор новгородец, пустынник Соловецкий († 1617);

Мисаил иеромонах, пустынник Соловецкий († ок. 1617);

Адриан, пустынник Соловецкий († ок. 1632);

Нестор, пустынник Соловецкий († ок. 1632);

Тимофей алексинец (в схиме Феодор), пустынник Соловецкий († 1634);

Савва, пустынник Соловецкий († 1636);

Ефрем Черный, пустынник Соловецкий (сер. XVII);

Алексий калужанин, пустынник Соловецкий (сер. XVII);

Иосиф I, пустынник Соловецкий (сер. XVII);

Тихон москвитянин, пустынник соловецкий (сер. XVII);

Феодул рязанец, пустынник Соловецкий (сер. XVII);

Трифон, пустынник Соловецкий (сер. XVП);

Иосиф II младой, пустынник Соловецкий (сер. XVII);

Севастиан, пустынник Соловецкий (сер. XVII);

Гурий, инок чудный, Соловецкий (сер. XVII);

Кирик (Кириак), больничной старец, пустынник Соловецкий (сер. XVII);

Кассиан Муезерский, Соловецкий; Авксентий, Аксий и Тарасий, иноки Соловецкие, Кашкаренские; Антоний Кожеезерский († 1634; память 7 июня);

Никодим Кожеезерский († 1640; память 3 июля);

Леонид Устьнедумский († 1654; память 17 июля);

Елеазар Анзерский († 1656; память 13 января);

Макарий Менюжский († ок. 1684; память 24 июня);

Иов Анзерский († 1720; память 6 марта).

Преподобные жены

Харитина, княжна Литовская († 1281; память 5 октября).

Преподобномученики

Адриан Ондрусовский († 1549; память 26 августа);

Геласий, игумен Новгородский († 1570);

Иона, Гурий и Герман Печенгские, Кольские († 1590; память 15 декабря);

Евфросин Синоезерский († 1612; память 20 марта).

Блаженные, Христа ради юродивые

Феодор Новгородский († 1392; память 19 января);

Николай Кочанов († 1392; память 27 июля);

Георгий Новгородский (память 3 ноября);

Георгий Шенкурский († ок. 1462);

Иоанн I и Иоанн II, Соловецкие (сер. XVII).

Праведные

Иулиания Новгородская (XIV);

Сергий и Варвара Свирские († после 1474; память 30 августа);

Гликерия дева, Новгородская († 1522; память 13 мая);

Иаков Боровичский († ок. 1540; память 23 октября);

Артемий Веркольский († 1545; память 23 июня) и сестра его Параскева Пириминская (XVI; память 23 июня);

Иаков и Иоанн Менюжские († ок. 1566–1569; память 24 июня);

святой Сумского острога, имя которого осталось неизвестно.

На Го́споди, воззва́х: стихи́ры, глас 8:

Прииди́те, вси ве́рнии, / су́щия во стране́ Волого́дстей святы́я восхва́лим: / преподо́бныя и иера́рхи, священному́ченики и Христа́ ра́ди юро́дивыя, / и́же вои́стинну де́лы и словесы́ / и всем житие́м Бо́гу угоди́ша, / и от Него́ многоразли́чными дарова́нии чуде́с обогати́шася, / и ны́не мо́лятся о душа́х на́ших.

Иде́же бе хлад и мраз, / иде́же леса́, и де́бри, и бла́та, / и верте́пы разбо́йник бы́ша, / та́мо жизнь ра́йская процвете́ от преподо́бных Твои́х, Го́споди, / и́же олядене́лая сердца́ людска́я теплото́ю ве́ры раствори́ша, / плодоно́сна сия́ соде́лаша / и ны́не мо́лятся о душа́х на́ших.

Ра́дуйся, гра́де святы́й Во́логда, / ра́дуйся, оби́тель Спа́со-Ка́менская, / ра́дуйся, Глуши́це преподо́бная, / ра́дуйтеся, дубра́вы Ко́мельския, / ра́дуйтеся, святи́и То́темстии, / ра́дуйся, вся Фиваи́до се́верная, / Небе́сных гра́ждан возрасти́вшая, / и́же на земли́ а́нгельски пожи́ша, / и лю́ди во спасе́ние упра́виша, / и ны́не мо́лятся о душа́х на́ших.

Сла́ва, глас 6:

Преподо́бнии и Богоно́снии отцы́ на́ши, / Гера́симе первонача́льниче, / Стефа́не архиере́ю и Богопропове́дниче, / Галактио́не священному́чениче, / Дими́трие равноа́нгеле / и страстоте́рпче Игна́тие блаже́нне, / Иоаса́фе, Васи́лие, Кассиа́не, Тимофе́е, Пе́тре преди́внии, / Алекса́ндре Ку́штский / со про́чими отцы́ и чудотво́рцы Волого́дскими / и Черепове́цкими Анто́нием и Феодо́сием, / моли́теся о душа́х на́ших.

И ны́не, догма́тик гла́са.

На стихо́вне, Сла́ва, глас 6:

Ра́дуйтеся, Диони́сие, Амфило́хие и Григо́рие, отце́в наста́вницы, / ра́дуйтеся, Па́вле, Корни́лие, Стефа́не, Инноке́нтие, / Кассиа́не, Лавре́нтие, Арсе́ние преди́внии, / ра́дуйтеся, Ио́сифе, Анто́ние, Иоанни́кие чу́днии, / Харито́не, Христофо́ре, Фео́доре, / Фоме́, Пахо́мие, Ти́хоне, Фили́ппе, / Си́моне, Авксе́нтие, Ону́фрие со про́чими отцы́, / Феодо́сие, Се́ргие, / стада́ мона́хов воспита́вшии / и зе́млю онебеси́вшии, / и ны́не приле́жно моли́теся / дарова́ти душа́м на́шим мир и ве́лию ми́лость.

И ны́не, Богоро́дичен по уста́ву.

Тропа́рь, глас 8:

Я́ко свети́льницы всесве́тлии, /яви́стеся в преде́лех гра́да Во́логды, / преподо́бнии отцы́ на́ши, Волого́дстии чудотво́рцы: / вы бо, крест Христо́в от ю́ности своея́ на ра́мена взе́мше, / усе́рдно Тому́ после́довали есте́, / чистото́ю Бо́гови прибли́жившеся, / от Него́же и чуде́с дарова́нием обогати́стеся; / те́мже и мы, с ве́рою к вам притека́юще, уми́льно глаго́лем: / отцы́ преподо́бнии, моли́те Христа́ Бо́га / спасти́ся душа́м на́шим.

Ин тропа́рь, глас 2:

(творе́ние Волого́дскаго епи́скопа Инноке́нтия)

Правосла́вия наста́вницы, / благоче́стия и чистоты́ учи́телие, / Це́ркве Волого́дския богодарова́нное украше́ние, / моли́те Ми́лостиваго Бо́га, / да ва́шим предста́тельством пода́стся благода́ть и мир стране́ на́шей / и душа́м на́шим спасе́ние.

Велича́ние:

Велича́ем вас, / святи́и чудотво́рцы Волого́дстии, / и чтим святу́ю па́мять ва́шу, / вы бо мо́лите за нас / Христа́ Бо́га на́шего.

И́но велича́ние:

Велича́ем вас, / чудотво́рцы на́ши сла́внии Волого́дстии, / страну́ се́верную луча́ми доброде́телей озари́вшии / и о́браз спасе́ния ве́рным / светоявле́нно показа́вшии.

Кано́н, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Ра́дуйся, Гера́симе преди́вный, пе́рвый богопропове́дниче, / ра́дуйся, Галактио́не, житие́м пресла́вный, / ра́дуйтеся, Иоаса́фе, Кассиа́не, Тимофе́е, Пе́тре, Васи́лие, защи́тницы гра́да на́шего, / ра́дуйся, святи́телю Анто́ние па́стырю до́брый, / вси чудотво́рцы Волого́дстии, изба́вите нас ны́не от бед и скорбе́й.

Чудотво́рцы Христо́вы и моле́бницы о нас те́плии, / возноси́те ко Го́споду глас ваш, / да возмо́жем воспе́ти жития́ ва́шего кре́стная исправле́ния.

Богоро́дичен: Приклони́ ми у́хо Твое́, Чи́стая, / Правосла́вною ве́рою в се́ни лица́ Твоего́ че́стно любо́вию Ти притека́ющему и стра́хом покланя́ющуся, / моле́бный мой глас услы́ши.

Песнь 3

Ирмо́с: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.

Дими́трие блаже́нне, прибе́жище на́ше и и́ноков огра́до, / ты, я́ко со́лнце, просия́л еси́ в мона́шеских собо́рех, / а́нгельскою красото́ю сия́вый и Богома́терь лицезре́вый, / научи́ и нас Бо́гу служи́ти и покая́ние Ему́ во гресе́х приноси́ти.

Страда́лец Бо́жий Игна́тий да похва́лится ны́не, / от ю́ности княже́ние на темни́цу смени́вый / и в ней Бо́га обреты́й терпе́нием ве́лиим, / непреста́нно моля́ся Бо́жией Ма́тери, всех скорбя́щих Ра́дости.

Богоро́дичен: Ле́ствица дре́вле патриа́рхова Тя прообража́ше, Пренепоро́чная, / а́нгельско бо явля́ше сни́тие Бо́жие к нам, / Боже́ственное соше́ствие во утро́бе Твое́й.

Ин конда́к, глас 2:

Волне́ний мно́жество невла́жно проходя́ще, / безпло́тныя враги́ струя́ми слез ва́ших кре́пко погрузи́ли есте́, / Богому́дрии и преподо́бнии, / и, чуде́с дар прии́мше, / моли́те непреста́нно о всех нас.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Кий язы́к изрече́т боле́зни и труды́ твоя́, богопропове́дниче Христо́в, святи́телю Стефа́не? / Тобо́ю бо свята́я ве́ра во всех конце́х на́ших просвети́ся / и лю́дие те́мнии свет Христо́в узре́ша. / Сохрани́те всех нас моли́твами ва́шими, / святи́тели Пе́рмстии Гера́симе, Питири́ме и Ио́но.

Я́коже со́лнце, сия́ет чудесы́ Проко́пий У́стюжский, Христа́ ра́ди юро́дивый, / град У́стюг от ка́менно-гра́дныя ту́чи спасы́й / и свято́е ми́ро от ико́ны Богома́тере источи́вый. / С ни́мже и друзи́и блаже́ннии, Киприа́н, Иоа́нн с супру́гою свое́ю Мари́ею, мо́лятся о душа́х на́ших. / Да похва́лится и Иоа́нн, еди́ным сло́вом боле́зни врачева́вый / и во огни́ невреди́мо ходи́вый.

Богоро́дичен: Ра́дуйся, кра́сная Пала́то Сло́ва, де́вственный черто́же Царя́; / ра́дуйся, похвало́ всех Безпло́тных; / ра́дуйся, челове́ков по́моще.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Хвала́ тебе́, пе́стуне отце́в, учи́телю Диони́сие богоблаже́нне, / Глуши́цу, а́ки вторы́й рай, соде́лавый. / С ни́мже да восхва́лятся и Амфило́хий спо́стник, и прее́мницы Феодо́сий, Мака́рий, Тара́сий, / моли́твенницы на́ши те́плии.

Петр да бу́дет сла́вен, / Ло́нгин Коря́жемский, цели́тель неду́жных, и спо́стник его́ Си́мон Со́йгинский, / а́ввы пусты́ннии и чудотво́рцы.

Богоро́дичен: С Боже́ственным соше́дшеся Гаврии́лом, возопии́м Богоро́дице ве́рно: / ра́дуйся, Де́во Свята́я, Благода́тная, Госпо́дь с Тобо́ю, / И́же Тебе́ ра́ди, потреби́в печа́ль, подаде́ ра́дование.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Я́ко орел высокопа́рый, пари́т над земле́ю Григо́рий Пе́льшемский, / сосу́д избра́нный благода́ти и милосе́рдия пучи́на, / всех люби́вый и всем о Христе́ служи́вый.

Отцы́ преблаже́ннии: Се́ргий Ну́ромский, житие́м Ра́донежскому подо́бный, / и Се́ргий Малопи́нежский, просвети́тель Чу́ди язы́ческия, / христоподража́тельное ми́лование лю́дем я́вльшии досто́йно, / пе́сньми да почту́тся, / с ни́ми же Се́ргий Шу́хтомский и Евфроси́н Синозе́рский.

Богоро́дичен: Ра́дости на́шея Хода́таица яви́лася еси́, Де́во, / и благода́ти принося́ще вене́ц любо́вию, / ра́дуйся, вопие́м Ти, Благослове́нная Чи́стая, похваля́юще.

Конда́к, глас 4:

Светоно́сный о́блак свиде́телей ве́ры и благоче́стия, / осеня́ющ преде́лы страны́ на́шея, / утверди́л еси́, Христе́ Царю́, на тве́рди Це́ркве Волого́дския, / да, взира́юще на сконча́ние жи́тельства их и вене́ц сла́вы неувяда́емый, / терпе́нием тече́м на предлежа́щий нам по́двиг спасе́ния.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

Вели́каго в чудесе́х Па́вла Обно́рскаго воспои́м, в дупле́ дре́ва подвиза́вшагося, / ему́же, я́ко но́вому Ада́му, пти́цы и зве́рие служа́ху / и пи́щу от него́ прие́мляху.

Ра́дуйся, о́тче отце́в, Корни́лие пречу́дне, / верте́п разбо́йников во оби́тель спасе́ния претвори́вый, / с ни́мже просла́вим и цве́ты пусты́нныя, Инноке́нтия и Арсе́ния, с прее́мники Лавре́нтием и Кассиа́ном / моли́теся о нас, преподо́бнии.

Богоро́дичен: Де́вства Тя зерца́ло су́що и прия́телище чи́сто Божества́ восхваля́ем, / Де́во Неискусобра́чная, пе́сньми.

Песнь 8

Ирмо́с: Царя́ Небе́снаго, / Его́же пою́т во́и а́нгельстии, / хвали́те и превозноси́те во вся ве́ки.

Ра́дуйся, красото́ смиренному́дрия, Стефа́не нача́льниче, / Богома́терь со святи́телем Никола́ем ви́девый и оби́тель сооруди́вый, / труднико́м¹¹⁰ ди́вный помо́щниче и на вода́х спаси́тельный защи́тниче.

Гроб твой, Алекса́ндре, лече́бница Боже́ственная, вся неду́ги исцеля́ющая, / моли́ся с пра́ведными Иродио́ном, Васи́лием, Иоа́нном, / Михаи́лом, Фомо́ю и Проко́пием Устья́нским о душа́х на́ших.

Богоро́дичен: Кади́льница яви́лася еси́ проро́ку, / Боже́ственнаго У́гля су́щи, грехи́ отъе́млющаго, / Богоро́дице Де́во, Ма́ти Бо́га на́шего.

Песнь 9

Ирмо́с: Вои́стинну Богоро́дицу / Тя испове́дуем, / спасе́ннии Тобо́ю, Де́во Чи́стая, / с безпло́тными ли́ки Тя велича́юще.

Феодо́сие, исто́чниче цельбоно́сных вод, / на соля́ных ва́рницах ты му́дрость духо́вную стяжа́л еси́, / Андре́й же и Макси́м, ве́чная То́темская похвала́, да похва́лятся днесь.

Ди́вно житие́ и твое́, Ио́сифе Заоники́евская сла́во: / ка́ко, слепе́ц сый, чуде́сно восприя́л еси́ ико́ну Богома́тере и святы́х безсре́бренников Космы́ и Дамиа́на, / и, прозре́в, оби́тель согради́л еси́, / и по преставле́нии чудеса́ мно́га соде́лал еси́. / Моли́ся с наста́вники твои́ми Анто́нием и Иоанни́кием о душа́х на́ших.

Страстоте́рпцы Христо́вы Григо́рие и Кассиа́не А́внежстии, / преподо́бнии Авксе́нтие и Ону́фрие Пе́рцевстии, / Си́моне Во́ломский, Ону́фрие Костромско́й, / Ни́фонте Теле́говский, Ма́рко Беля́винский, / Ко́прие и Авраа́мие Пече́нгстии, / Вассиа́не Тиксне́нский, Агапи́те Марку́шевский, / Дими́трие Цылю́бинский с Кири́ллом пусты́нником, / Евфи́мие и Харито́не Ся́нжемстии, / Леони́де Устьнеду́мский, Пахо́мие, Христофо́ре, / Фео́доре, Фили́ппе и Зоси́мо Ворбозо́мский, вси имени́тии и безъимени́тии уго́дницы Волого́дстии, / в сей наро́читый день пра́здника ва́шего услы́шите мольбы́ на́ша / и испроси́те у Христа́ Бо́га душа́м на́шим мир и ве́лию ми́лость.

Богоро́дичен: Тебе́ во умиле́нии души́ мо́лимся вси: / не пре́зри, Влады́чице, на́ша мольбы́, / но бу́ди благоуве́тлив нам покро́в / и моли́тву на́шу услы́ши.

На хвали́тех стихи́ры пра́здника и святы́х, глас 6:

Преподо́бнии Богоно́снии отцы́ на́ши: / Фили́ппе, Ти́хоне, Пе́тре, Дими́трие, Иоа́нне юро́дивии, / страстоте́рпцы Христо́вы, / со про́чими Волого́дскими и Белоезе́рскими чудотво́рцы: / Кири́ллом, Ферапо́нтом, Мартиниа́ном, / Ни́лом Со́рским, Игна́тием Ло́мским, / моли́теся о душа́х на́ших.

Сла́ва, глас то́йже:

Ди́вен во святы́х Свои́х яви́лся еси́, Го́споди, / и́миже в ну́ждах ве́рным посо́бствуеши, / больны́м подае́ши здра́вие, / от злых духо́в и страсте́й свобожда́еши, / от потопле́ния спаса́еши. / Тем ны́не покланя́емся держа́ве Твое́й и вопие́м: / Безнача́льный О́тче, Собезнача́льный Сы́не / и Боже́ственный Ду́ше, / Тро́ице Свята́я, сла́ва Тебе́.

И ны́не, Богоро́дичен по уставу.

Слу́жба Неде́ли 3-й по Пятидеся́тнице и святы́м, проки́мен, глас 7: Честна́ пред Го́сподем / смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол ко Евре́ем, зача́ло 335. Ева́нгелие от Матфе́я, зача́ло 10, или от Луки́, зача́ло 24, Прича́стен: Ра́дуйтеся, пра́веднии, о Го́споде:

На моле́бне Ева́нгелие от Матфе́я, глава́ 6, стихи́ 19–21,¹¹¹ 25–33. Если слу́жба всем святы́м земли́ Волого́дской бу́дет соверша́ться вне Неде́ли 3-й по Пятидеся́тнице, то на у́трени чита́ется то же Ева́нгелие от Матфе́я (глава́ 6, стихи 19–21, 25–33), что и на моле́бне, а да́нная слу́жба дополня́ется те́кстами слу́жбы преподо́бным из О́бщей мине́и, как это бы́ло при́нято в Волого́дской епа́рхии в XIX ве́ке.

Моли́тва

О всеблаже́ннии и Богому́дрии уго́дницы, и́же во вре́меннем житии́ благоче́стно подвиза́вшиися и святы́ми свои́ми телесы́ в преде́лех Волого́дския страны́ почива́ющии, велича́ем ва́ша духо́вныя по́двиги, во́ини Христо́вы, терпе́нием и му́жеством свои́м врага́ до конца́ низложи́вшии и нас от пре́лести и ко́зней его́ избавля́ющии. Ублажа́ем ва́ше свято́е житие́, свети́льницы Боже́ственнии, зве́зды, све́том ве́ры и доброде́тели светя́щияся и на́ши умы́ и сердца́ богому́дренне озаря́ющия. Прославля́ем ва́ша вели́кая чудеса́, кри́нове ра́йстии, в стране́ мра́за прекра́сне процве́тшии и воне́ю дарова́ний и чуде́с повсю́ду благоуха́ющии. Умоля́ем ва́шу богоподража́тельную любо́вь, предста́телие на́ши и покрови́телие, сохрани́те нас от вся́каго зла и посети́те нас в не́мощех на́ших благода́тными дарова́нии, и́миже вас украси́л и просла́вил есть Госпо́дь. Благове́рнии кня́зие, испроси́те у вели́каго Царя́ Сла́вы благоде́нственное житие́ нам, мир и тишину́ стране́ на́шей, да ти́хое и безмо́лвное житие́ поживе́м, умерщвля́я ца́рствующий во пло́ти на́шей грех и напису́я на скрижа́лех серде́ц на́ших зако́н Ца́рский. Святи́телие Христо́ви, моли́твами ва́шими утверди́те Святу́ю Правосла́вную Це́рковь и упаси́те ста́до свое́ в ве́ре и доброде́тели, я́ко да и мы, недосто́йнии и оскверне́ннии, просла́вим в житии́ свое́м Отца́ на́шего Небе́снаго. Преподо́бнии отцы́, в терпе́нии и по́двизех са́ми пожи́вше, сохрани́те и нас от пре́лестей ми́ра лука́ваго, да, отве́ргшеся себе́ и взе́мше крест, после́дуем Христу́, умерщвля́я у́ды, я́же на земли́, и распина́я плоть свою́ со страстьми́ и похотьми́. Блаже́ннии чудотво́рцы, юро́дством небе́сныя му́дрости посрами́те му́дрость ми́ра сего́, вознося́щуюся на ра́зум Бо́жий и омрача́ющую спаси́тельное бу́йство Креста́ Христо́ва, и́мже да сподо́бимся вы́ну му́дрствовати о Христе́, Го́рняя, а не земна́я помышля́юще.

О всечестны́й собо́ре всеблаже́нных А́нгелов на́ших, и́же честны́ми телесы́ на земли́ с на́ми водворя́етеся, святы́ми же душа́ми ва́шими пребыва́ете на Небеси́ и с ли́ки Безпло́тных покланя́етеся ди́вному во святы́х Свои́х Бо́гу, помяни́те на́шу не́мощь и уничиже́ние и свяще́нными моли́твами ва́шими испроси́те у Христа́ Бо́га на́шего, я́ко да и мы, безбе́дне преплы́вше жите́йскую пучи́ну и невреди́мо соблюди́те сокро́вище ве́ры, в приста́нище ве́чнаго спасе́ния дости́гнем и в блаже́нных оби́телех Го́рняго оте́чества со все́ми, от ве́ка угоди́вшими святы́ми, водвори́мся, благода́тию и человеколю́бием Спаси́теля на́шего и Го́спода Иису́са Христа́, Ему́же с Предве́чным и Единосу́щным Отце́м и с Пресвяты́м Ду́хом подоба́ет непреста́нное славосло́вие и поклоне́ние от всех тва́рей в безконе́чныя ве́ки. Ами́нь.

Собор Вологодских святых.

Празднование памяти Вологодских святых установлено в 1841 году. Это событие связано с именем Преосвященного епископа Иннокентия (Борисова), который, по прибытии на Вологодскую кафедру обратил внимание на почитание святых подвижников Вологодской земли. Обращаясь к пастве, он говорил: «Куда ни посмотрю, везде вижу целые лики святых». Однако не всем святым совершались службы, что и побудило Преосвященного Иннокентия установить общее празднование всем Вологодским святым, по примеру соборного празднования Киево-Печерским святым. 5 октября 1841 года в архиерейском доме была освящена специально построенная церковь во имя Вологодских святых, служба и молитва Вологодским святым была также составлена Преосвященным Иннокентием.

Большое участие в агиографических исследованиях о Вологодских святых принимал митрополит Киевский Евгений (Болховитинов). Будучи с 1808 по 1813 годы епископом Вологодским, он составил «Собрание разных известий о Вологодской епархии и губернии» (1811 г.), в этот труд был включён полный список Вологодских святых, из рукописной книги, хранившейся в Софийском кафедральном соборе в г. Вологде. Этот список был значительно дополнен Преосвященным Евгением на основании других источников. Впоследствии перечень святых Вологодских дополнялся другими исследователями-агиографами. Память всех святых, в земле Вологодской просиявших, совершается в Неделю 3-ю по Пятидесятнице¹¹².

Святители

Стефан, епископ Великопермский († 1396; память 26 апреля);

Герасим священномученик, епископ Великопермский († 1441; память 24 января);

Питирим священномученик, епископ Великопермский († 1456; память 19 августа);

Иона, епископ Пермский († 1470; память 6 июня);

Антоний, епископ Вологодский и Великопермский († 1588; память 26 октября);

Маркелл, архиепископ Вологодский и Белоезерский, Соловецкий († 1663; память 22 марта)

Благоверные князья и княгини

Димитрий († 1424) и Мария († после 1424) Заозерские;

Димитрий Угличский, Прилуцкий († после 1540; память 19 мая);

Феодор Всеволодович Вологодский

Преподобные

Герасим Вологодский († 1178; память 4 марта);

Феодор Каменский († ок. 1260; память 10 сентября);

Киприан Устюжский († 1276; память 29 сентября);

Афанасий и Феодосий Череповецкие († ок. 1388; память 26 ноября);

Димитрий Прилуцкий († 1392; память 11 февраля);

Димитрий Цилибинский (XIV);

Сергий Нуромский († 1413; память 7 октября);

Павел, пустынник Глушицкий († после 1422; память 12 октября);

Ферапонт Белоезерский, Можайский († 1426; память 27 мая);

Кирилл Белоезерский († 1427; память 9 июня);

Досифей, старец Белоезерский (XV; память 9 июня);

Игнатий молчальник, Белоезерский (XV; память 9 июня);

Павел Обнорский († 1429; память 10 января);

Дионисий Глушицкий († 1437; память 1 июня);

Александр Куштский († 1439; память 9 июня);

Антоний Куштский (память 6 марта);

Тарасий Глушицкий († 1440; память 12 октября);

Феодосий Глушицкий (XIV–XV; память 12 октября);

Григорий Пельшемский († 1442; память 30 сентября);

Амфилохий Глушицкий († 1452; память 12 октября);

Иоасаф Каменский (в миру князь Андрей Заозерский, † 1453; память 10 сентября);

Филипп Ирапский, Рабангский († 1457; память 15 ноября);

Кассиан, игумен Каменский († ок. 1463; память 10 сентября);

Евфимий Сянжемский († ок. 1465);

Пётр Каменский (XV);

Пахомий Каменский (XIV–XV);

Тимофей Кубенский (XV);

Кирилл пустынник;

Спиридон (память 5 декабря) и Фавст (память 28 марта), пустынники Вологодские;

Стефан, игумен Спасский, Кубенский (память 27 апреля);

Тимофей, игумен Никольскаго монастыря, Вологодский;

Макарий Глушицкий († ок. 1480; память 13 мая);

Мартиниан Белоезерский († 1483; память 12 января);

Моисей Белоезерский († ок. 1492; память 23 февраля);

Авраамий и Коприй Печенгские († после 1492; память 4 февраля);

Онуфрий и Авксентий Перцовские († 1499; память 12 июня);

Галактион Белоезерский († 1506; память 12 января);

Герман дивный, Белоезерский († 1508; память 23 февраля);

Нил Сорский († 1508; память 7 мая);

Харитон Сянжемский († 1509; память 11 апреля);

Иннокентий Комельский († 1521; память 19 марта);

Игнатий Прилуцкий (в миру князь Иоанн Угличский, +1523; память 19 мая);

Кассиан Комельский († 1537; память 16 мая);

Корнилий Комельский († 1537; память 19 мая);

Лонгин Коряжемский († 1540; память 10 февраля);

Стефан Озерский († 1542; память 12 июня);

Лаврентий Комельский († 1548; память 16 мая);

Зосима Ворбозомский († ок. 1550; память 4 апреля);

Арсений Комельский († 1550; память 24 августа);

Нифонт Телеговский, Устюжский († 1553);

Симон Сойгинский († 1562; память 24 ноября);

Феодосий Тотемский († 1568; память 28 января);

Христофор Коряжемский, Сольвычегодский († 1572–1582; память 25 июля);

Феодорит, просветитель Кольский († 1571; память 17 августа);

Сергий Малопинежский († 1585; память 16 ноября);

Афанасий Сяндемский (XVI: память 18 января);

Иосиф († 1612; память 21 сентября), Антоний и Иоанникий Заоникиевские;

Вассиан Тиксненский, Тотемский († 1624; память 12 сентября);

Леонид Устьнедумский († 1654; память 17 июля);

Филипп Сухонский († 1662; память 17 августа);

Афанасий Наволоцкий (XVI–XVII; память 18 января);

Викентий Вологодский (XVI–XVII; память 19 марта);

Пётр, иерей Черевковский, Сольвычегодский (XVI–XVII; память 9 июня);

Марк Белавинский († ок. 1630; память 2 августа);

Тихон Крестогорский, Вохмовской (сер. XVII);

Онуфрий Катромский

Преподобномученики

Григорий и Кассиан Авнежские († 1392; память 15 июня);

Ефрем, Дионисий, Иероним, Исаакий Обнорские (XVI);

Агапит Маркушевский († 1584; память 21 мая);

Галактион Вологодский († 1613; память 24 сентября);

Симон Воломский († 1641; память 12 июля).

Блаженные, Христа ради юродивые

Прокопий Устюжский († 1303; память 8 июля);

Иоанн Устюжский († 1494; память 29 мая);

Леонтий Устюжский (XV; память 18 июля);

Василий Каменский (XV; память 2 августа);

Иоанн Московский († 1589; память 3 июля);

Максим, иерей Тотемский († 1650; память 16 января);

Фома, Иродион, Михаил, Иоанн и Василий Сольвычегодские († до и после 1669; память 3 июля);

Андрей Тотемский († 1673; память 10 октября).

Праведные

Иоанн и Мария Устюжские († после 1262; память 29 мая);

Прокопий Устьянский (XVII; память 8 июля);

Иулиания Сольвычегодская (память 21 декабря).

1. Верюжский Иоанн, священник. Исторические сказания о жизни святых, подвизавшихся в Вологодской епархии, прославленных всею Церковью и местно чтимых. Вологда, 1880.

2. Мордвинов В. О Вологодских святых. СПб., 1874.

3. Димитрий (Самбикин), архиепископ. Месяцеслов святых, всею Русскою Церковью или местно чтимых. Вып. 4. Август. Воронеж, 1883, с. 181.

На Го́споди, воззва́х: поста́вим стихо́в 10 и пое́м стихи́ры воскре́сны 2-го гла́са 3, и восто́чна 1, и святы́х 6, глас 8.

Подо́бен: О, пресла́внаго чудесе́:

Ди́вен Бог во святы́х Свои́х, / в ро́дех христиа́нских чудоде́йствуяй / и но́выя избра́нники Своя́ явля́яй: / зрим у́бо и ны́не Белору́сских уго́дников, / от Христа́ прославля́емых, / и красото́ю доброде́телей свои́х край наш озаря́ющих, / и дерзнове́ние ве́лие иму́щих мир вселе́нней дарова́ти / и душа́м на́шим ве́лию ми́лость.

Лик пра́ведных Твои́х, Го́споди, / на Небесе́х украси́ся / прославле́нием собо́ра / Белору́сских святы́х, / и́хже и на земли́ Це́рковь воспева́ет, / тех у́бо моли́твы / о нас приими́, Человеколю́бче, / я́ко име́яй ве́лию ми́лость.

И́на стихи́ра, глас 1.

Подо́бен: Всехва́льнии му́ченицы:

Неувяда́емыми венцы́ венча́лися есте́ от руки́ Вседержи́теля Бо́га, / святи́телие, му́ченицы, преподо́бнии и пра́веднии Белору́сския земли́. / Сего́ ра́ди и мы и́мамы хода́таев Небе́сных, / и́хже усе́рдно мо́лим: / помози́те нам по́двигом до́брым подвиза́тися / и ве́ру Правосла́вную соблюсти́.

Сла́ва, глас 6:

Наста́ днесь вели́кое торжество́ в кра́е на́шем, / прославля́ем бо сро́дник Свои́х, / мно́гими вои́стинну де́лы и словесы́ Бо́гу послужи́ша, / ны́не же просла́вльшему их Христу́ предстоя́ще, / мо́лятся о нас приле́жно, / любо́вию соверша́ющих све́тлое их торжество́.

И ны́не, Богоро́дичен, глас 2: Пре́йде сень зако́нная:

Вход. Проки́мен обы́чный. Та́же чте́ния 3 зри в Неде́лю Всех святы́х в Трио́ди Цветно́й или в Неде́лю 2-ю по Пятидеся́тнице (зри вы́ше).

На лити́и стихи́ра хра́ма и святы́х, глас 6: Наста́ днесь вели́кое торжество́: зри сла́вник на Го́споди, воззва́х:

На стихо́вне стихи́ры воскре́сны. Сла́ва, глас 1: Неувяда́емыми венцы́: (зри на Го́споди, воззва́х:). И ны́не: Богоро́дичен, глас то́йже: Се испо́лнися Иса́иино прорече́ние:

На благослове́нии хле́бов по Ны́не отпуща́еши: Богоро́дице Де́во: два́жды, и святы́х тропа́рь, еди́ножды.

Тропа́рь святы́х, глас 5:

Почти́ Господь Белору́сский край / святы́ми, Ему́ благоугоди́вшими: / святи́тели, му́ченики, преподо́бными и пра́ведными, / ве́рно Го́сподеви послужи́вшими / и мзду трудо́в прия́вшими. / К тем же ны́не и мы вопие́м: / о нас моли́теся ко Го́споду, / да в ве́ре и де́лех плод добр принесе́м.

На Бог Госпо́дь: тропа́рь воскре́сен, два́жды. Сла́ва: святы́х. И ны́не, Богоро́дичен, глас 5: Ра́дуйся, две́ре Госпо́дня непроходи́мая:

По стихосло́виих седа́льны воскре́сны гла́са с припе́вы и Богоро́дичны их.

Велича́ние:

Велича́ем вас, / святи́и Белору́сския земли́, / и чтим святу́ю па́мять ва́шу, / вы бо мо́лите о нас / Христа́ Бо́га на́шего.

Псало́м избра́нный:

1. Бог Бого́в Госпо́дь глаго́ла и призва́ зе́млю.

2. От восто́к со́лнца до за́пад хва́льно И́мя Госпо́дне.

1. По́йте Го́сподеви, преподо́бнии Его́, и испове́дайте па́мять святы́ни Его́, во всех лю́дех чудеса́ Его́.

2. Восхва́лятся преподо́бнии во сла́ве и возра́дуются на ло́жах свои́х.

1. Весели́теся о Го́споде и ра́дуйтеся, пра́веднии.

2. Я́ко Госпо́дь в ро́де пра́ведных, и насле́дие их в век бу́дет.

1. Воззва́ша пра́веднии, и Госпо́дь услы́ша их.

2. Бог нам прибе́жище и си́ла, Помо́щник в ско́рбех, обре́тших ны зело́.

Посе́м: А́нгельский собо́р: Та́же ипакои́ и степе́нны гла́са, и воскре́сная вся, я́коже и обы́чай и́мамы.

Кано́н воскре́сен гла́са со ирмосо́м на 4, и Богоро́дицы на 2, и святы́х на 8.

Кано́н святы́х белору́сских, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Припе́в: Вси святи́и земли́ Белору́сския, моли́те Бо́га о нас.

Днесь ра́дующеся, восхва́лим Тро́ицу Святу́ю, / дарова́вшую нам лик святы́х, / моля́щихся о кра́е на́шем.

Ра́дуйтеся, святи́телие По́лотстии: / Ми́но, Диони́сие и Симео́не, во епи́скопстве до́бре подвиза́вшиися / и ве́ру Правосла́вную в па́стве свое́й утверди́вшии.

Богоро́дичен: Приклони́ ми у́хо Твое́, Чи́стая, / Правосла́вною ве́рою в се́ни лица́ Твоего́ че́стно любо́вию Ти притека́ющему и стра́хом покланя́ющуся, / моле́бный мой глас услы́ши.

Катава́сия: Отве́рзу уста́ моя́:

Песнь 3

Ирмо́с: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.

Просла́вим вси му́друю Евфроси́нию, крест взе́мшую, / и путе́м а́нгельскаго жития́ ше́дшую, / и Еди́ному Жениху́ Небе́сному уневе́стившуюся.

Тверды́нею ве́ры себе́ украша́я, жела́ний кра́ю дости́гл еси́ / и Це́ркве Зижди́телю благоприя́тен яви́лся еси́, преподобному́чениче Афана́сие.

Богоро́дичен: Близ Тя су́щу Влады́ки и́мам, Пресла́вная Влады́чице, / дея́ний мои́х кни́гу возложи́х на Тя ве́рою: / не премолчи́ уще́дрити мя.

Конда́к, глас 3.

Подо́бен: Де́ва днесь:

Бо́жии уго́дницы Белору́сския земли́ / ны́не со дерзнове́нием предстоя́т Престо́лу Святы́я Тро́ицы / и неви́димо за ны мо́лятся Бо́гу, / о кра́е на́шем, / прося́ нам мир и ве́лию ми́лость

Седа́лен, глас то́йже:

Со́лнце Пра́вды – Христа́ пропове́дали есте́ житие́м, святи́и, / и мно́гия к ве́ре спаси́тельней наста́вили есте́, / и мою́ ду́шу просвети́те моли́твами ва́шими.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

В се́рдце свое́м хра́мину благоуха́нну стяжа́в, святи́телю Кири́лле, / отве́рзл еси́ уста́ богохва́льныя, / тем спросла́вился еси́ иму́щему глаго́лы жи́зни ве́чныя – Христу́ Бо́гу на́шему.

Святи́тель до́брый яви́лся еси́, о́тче Кири́лле, ре́вностным пропове́данием сло́ва Бо́жия, / тем у́бо и росси́йским Златоу́стом наре́клся еси́.

Богоро́дичен: Удаля́ются от Бо́га, те́мже и погиба́ют отмета́ющии о́бразы Сы́на Твоего́, Ма́ти Бо́жия Де́во Богоро́дице, / и́миже спаса́ются чту́щии Тя.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Дар цели́ти неду́ги стяжа́л еси́ от Христа́, свя́те Лавре́нтие, / и до́бре па́ству Ту́ровскую упра́вил еси́. / Моли́ за нас Христа́ Бо́га, неду́г душе́вных и теле́сных исцеле́ние получи́ти.

Послуша́нию до́бре навы́кл еси́, о́тче Марти́не, угожда́я иера́рсем Ту́ровским, / те́мже и, Христу́ уподо́бився, преподо́бным наре́клся еси́.

Богоро́дичен: Прораста́ла еси́ без се́мене И́же пре́жде вся́кия тва́ри, Прозябе́ние Сы́на О́тча, / безле́тно же и безнача́льно Ду́хом Боже́ственным, Богороди́тельнице Чи́стая, / Его́же подо́бие ви́да вси почита́ем.

Песнь 6

Ирмо́с: Моли́тву пролию́ ко Го́споду / и Тому́ возвещу́ печа́ли моя́, / я́ко зол душа́ моя́ испо́лнися / и живо́т мой а́ду прибли́жися, / и молю́ся, я́ко Ио́на: / от тли, Бо́же, возведи́ мя.

Оби́тель и́ноческую основа́в, / мно́ги подви́жники собра́л еси́, преподо́бне Елиссе́е, / по кончи́не же твое́й храни́ши всех, тя в по́двизех помо́щника до́бра иму́щих.

Основа́телем гра́дов в земли́ на́шей яви́лся еси́, благове́рный кня́же Ростисла́ве, / в тя́жкая же времена́ раздо́ров му́дро яви́л еси́ житие́м твои́м любо́вь Христо́ву.

Богоро́дичен: Страсте́й неуста́вное беше́ние предста́нием Твои́м, Богоневе́сто, уста́ви в тишину́ / и ко приста́нищу наста́ви нас тишины́.

По катава́сии конда́к и и́кос воскре́сны.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

Рабо́тати Христу́ еди́ному всем се́рдцем вожделе́в, / прише́л еси́ по кончи́не роди́телей Твои́х, Мака́рие, во оби́тель Пи́нскую / и та́мо, Ду́хом Бо́жиим наставля́ем, пи́щею име́л еси́ писа́ния Боже́ственная; / моли́ Спа́са на́шего, преподо́бне, да и мы, гре́шнии, о́ныя возлю́бим, / я́ко исто́чник Богодохнове́нный.

Младе́нцем му́ки тя́жкия от богопроти́вных иуде́й за Христа́ испыта́в, / А́нгелом Небе́сным уподо́бился еси́, страстоте́рпче Гаврии́ле, / и ны́не моли́ся о всех младе́нцех кра́я на́шего.

Богоро́дичен: От Тро́ицы родила́ еси́ Еди́наго, Богоро́дице, / бы́вша непрело́жна плотски́м соедине́нием, сугу́ба су́ща Естество́м, / Его́же ви́да о́браз почита́ем.

Песнь 8

Ирмо́с: Царя́ Небе́снаго, / Его́же пою́т во́и А́нгельстии, / хвали́те и превозноси́те во вся ве́ки.

Отца́ и ма́тере во младе́нчестве свое́м лиши́вшися, / ре́вность о Правосла́вии име́ющи, свята́я пра́ведная Софи́е, / обрела́ еси́ еди́наго Помо́щника и Роди́теля – Христа́ Бо́га.

Яви́лася еси́ и́стинною защи́тницею Правосла́вныя ве́ры, / град Слуцк обогати́ла еси́ сла́вным житие́м твои́м. / Те́мже и Бог просла́ви тя, му́драя Софи́е, моще́й нетле́нием, / и́хже ны́не уми́льно лобыза́ем.

Богоро́дичен: Я́же Тобо́ю бесе́довавый к челове́ком, Бог Сый вся́ческих, зрак челове́ка восприя́т. / Его́же взор почита́ем, Де́во, в писа́ниих.

Песнь 9

Ирмо́с: Вои́стинну Богоро́дицу, / Тя испове́дуем, / спасе́ннии Тобо́ю, Де́во Чи́стая, / с Безпло́тными ли́ки Тя велича́юще.

Святи́и земли́ Белору́сския, вы́ну о нас моли́те, / да и мы, соверши́вше тече́ние жи́зни на́шея, / вооруже́нии кре́постию в ско́рбех вас Укрепи́вшаго, воспое́м с ва́ми: / ничто́же возмо́же отлучи́ти нас от любве́ Бо́жия.

Святи́и вси Белору́сския земли́, / моли́те Святу́ю Тро́ицу мир Це́ркви и лю́дем спасе́ние дарова́ти, / ве́ру же Правосла́вну соблюсти́.

Богоро́дичен: Твоего́ несказа́ннаго рождества́ пропису́я проро́к, кни́гу запеча́тану прови́де, / Ея́же никто́же та́инство разуме́ вочелове́чения рождества́ Твоего́.

Свети́лен воскре́сен.

Сла́ва, святы́х: Пе́сньми восхва́лим святы́х кра́я на́шего, / Христа́ сла́вяще, сих просвети́вшаго / и помо́щники нам дарова́вшаго.

И ны́не, Богоро́дичен воскре́сен.

На хвали́тех стихи́ры воскре́сны. Сла́ва, глас 8: Лик пра́ведных: зри на Го́споди, воззва́х:

На часе́х тропа́рь воскре́сен. Сла́ва: святых. Конда́к воскре́сен и святых, пременя́юще.

Блаже́нны воскре́сна гла́са на 4 и от кано́на святы́х песнь 9-я на 4. По вхо́де тропа́рь воскре́сен и святы́х. Конда́к воскре́сен. Сла́ва: святы́х. И ны́не: Предста́тельство христиа́н: Проки́мен воскре́сен и святы́м, глас 4: Ди́вен Бог во святы́х Свои́х, / Бог Изра́илев. Апо́стол рядово́й и святы́х ко Евре́ем, зача́ло 230. Ева́нгелие рядово́е и святы́х от Матфе́я, зача́ло 10. Прича́стны: Хвали́те Го́спода с Небе́с: и Ра́дуйтеся, пра́веднии, о Го́споде:

Преподо́бнаго Марти́на Ту́ровскаго († 1150, па́мять 26 ию́ня)

Тропа́рь, глас 1:

Тя́жким неду́гом стра́ждущий и людьми́ забы́тый, / моли́л еси́ жа́жду утоли́ти, преподо́бне Марти́не, / те́мже Христо́с посла́ с Небесе́ благове́рных Бори́са и Гле́ба / тебе́ послужи́ти и неду́г исцели́ти.

Преподо́бнаго Елиссе́я Лаври́шевскаго († ок. 1250, па́мять 23 октября́) и святи́теля Лавре́нтия, епи́скопа Ту́ровскаго († 1194, память 29 января)

Тропа́рь, глас 3:

Преподо́бне о́тче наш Елиссе́е, / с Лавре́нтием чу́дным подвиза́лся еси́, учи́телю своему́ подража́я, / земну́ю сла́ву и честь стопа́м Христа́ пове́ргли есте́, / те́мже Госпо́дь увенча́ вас / нетле́нным венце́м сла́вы Своея́.

Конда́к, глас 2:

Ве́чная па́мять ва́ша, преподо́бнии Елиссе́е и Лавре́нтие, / те́мже помина́йте чту́щих свя́то ю́ / и испроси́те земли́ на́шей благоче́стие и душа́м спасе́ние.

Преподо́бныя Софи́и, княжны́ Слу́цкия († 1612, память 19 марта)

Тропа́рь, глас 5:

Блаже́нная ма́ти Софи́е, / нетле́нием моще́й и чуде́с сия́нием почти́ тя Бог; / помина́юще твое́ пра́ведное житие́, / тя мо́лим испроси́ти / телесе́м на́шим здра́вие и душа́м спасе́ние.

Собор Белорусских святых.

Согласно благословению Святейшего Патриарха Московского и всея Руси Пимена в ответ на рапорт митрополита Минского и Белорусского Филарета в 1984 году было установлено совершать в третью Неделю по Пятидесятнице празднование Собора всех Белорусских святых, руководствуясь при совершении богослужения типом служб из Триоди Цветной в Неделю Всех святых. Святые земли Белорусской прославлены в лике прочих Российских святых. Некоторые из них известны своим святительским служением, некоторые – как преподобные, просиявшие подвигами благочестия и чистоты как на территории Белоруссии, так и за её пределами, а некоторые удостоились великой чести быть исповедниками за святую православную веру. Согласно годичному Богослужебному кругу в Собор вошли следующие святые:

1. Преподобномученик Афанасий, игумен Брестский († 1649) – память 5 сентября (преставление) и 20 июля (обретение мощей в 1672 году);

2. Преподобномученик Макарий, игумен Пинский, Овручский, Каневский († 1678) – память 7 сентября (преставление) и 13 мая (перенесение мощей в 1688 году);

3. Преподобный Елисей Лавришеский († ок. 1250) – память 23 октября (преставление);

4. Святитель Лаврентий, епископ Туровский, затворник Печерский († 1194) – память 29 января и 28 сентября;

5. Святитель Симеон, епископ Полоцкий († 1289) – память 3 февраля;

6. Благоверный великий князь Ростислав (Михаил) Киевский, Смоленский († ок. 1167) – память 14 марта;

7. Блаженная София (Олелько), княжна Слуцкая († 1612) – память 19 марта. Нетленные мощи почивают в минском Свято-Духовском соборе;

8. Мученик младенец Гавриил Белостокский, Слуцкий († 20 марта 1690) – память 20 апреля. Святые мощи почивают в Покровском соборе города Гродно;

9. Святитель Кирилл, епископ Туровский († 1183) – память 28 апреля;

10. Преподобная Евфросиния, игумения Полоцкая († 1173) – память 23 мая. Честные мощи почивают в Спасо-Преображенском храме города Полоцка;

11. Святитель Мина, епископ Полоцкий († 1116) – память 20 июня;

12. Блаженный Мартин Туровский († 1150) – память 27 июня (преставление);

13. Святитель Дионисий, епископ Полоцкий († 1182).

С особым благоговением и торжественностью празднование памяти Собора Всех Белорусских святых совершается в минском кафедральном Свято-Духовском соборе и в Успенском Жировицком монастыре.

Тропа́рь, глас 4:

Наста́ днесь пресве́тлый пра́здник, Пречи́стая Де́во, / честны́я Твоея́ Табы́нския ико́ны, Влады́чице, / я́же па́че луче́й со́лнечных возсия́, / от Исто́чника приснотеку́щаго, Христа́, Бо́га на́шего, / источа́еши целе́бныя да́ры / с ве́рою к Тебе́ притека́ющим, / Тя бо Христо́с Помо́щницу лю́дем Свои́м дарова́, / покрыва́ти и спаса́ти от вся́кия беды́ рабы́ Своя́, / еди́ну Благослове́нную.

Моли́тва

О Пресвята́я Влады́чице, Де́во Богоро́дице! Приими́ мольбы́ от нас, приле́жно призыва́ющих и моля́щихся Тебе́, покажи́ ско́рое Твое́ заступле́ние, покажи́, я́ко мо́жеши, я́ко Ма́ти Бо́га, призыва́ем Тя от се́рдца, со слеза́ми припа́дающе пред Пречи́стым Твои́м о́бразом. О Бо́жия Ма́ти! Спаси́ нас и не даждь в расхище́ние супоста́том, ниже́ да на́йдет на ны вся зла́я, я́же грехи́ на́ша угото́ваша нам, ниже́ беззако́ния на́ша да превзы́дут на главы́ на́ша. Ви́ждь на́ша нестерпи́мыя печа́ли, ско́рби, ну́жды, боле́зни, стра́сти; вооружи́ся на ны лука́вно враг, язы́ком, я́коже мече́м, хотя нас погуби́ти, но Твое́ю, Богороди́тельнице, кре́постию предвари́. Уста́ челове́ков, я́ко львов лю́тых, гро́ба тягча́йше отверзо́шася, го́рько поглоти́ша ны; но Ты, Богороди́тельнице, яви́ся наде́жда ненаде́ющимся и низложи́ кре́пость их, да у́зрят врази́ и постыдя́тся, да разуме́ют и ви́дят Твою́, е́же по нам сопроти́в борю́щую си́лу, и в про́пасть преиспо́днюю низложи́ их. Да загради́тся всяк язы́к, лука́вым поуча́яйся, да молча́т уста́ льсти́выя и уста́, непра́ведно глаго́лющия на пра́веднаго беззако́ние, горды́нею и за́вистию вражде́бною вку́пе. Призыва́ющим Тя, Богоро́дице, от души́ нело́жно во вся́кой ско́рби, и в боле́знех разли́чных, и в беда́х лю́тых спе́шно услы́ши, Влады́чице, сих избавля́ющи при́сно моли́твами Свои́ми; душ спасе́ние, ве́ры сохране́ние, от грехо́вных на́выков избавле́ние, ми́рную христиа́нскую кончи́ну и Ца́рствия Небе́снаго насле́дие да́руй нам. Да и́мя Твое́, Богоро́дице, на земли́ славосло́вится, И́же бо, из Тебе́ возсия́в, гре́шником держа́вную наде́жду и сте́ну неруши́мую Тя дарова́ во ве́ки веко́в. Ами́нь.

И́на моли́тва

О Пресвята́я Влады́чице Богоро́дице, Ма́ти Го́спода на́шего Иису́са Христа́, непреста́нная о нас пред Бо́гом Моли́твеннице и Хода́таице! О Ма́ти на́ша Преблага́я, всех нас при Кресте́ Сы́на Твоего́ усынови́вшая! Благодари́м Тя, безчи́сленныя бла́га моли́твою Свое́ю нам испроси́вшая! Благодари́м Тя, мно́жество ико́н Твои́х чудотво́рных стране́ на́шей дарова́вшая! Благодари́м Тя, ди́вную ико́ну Табы́нскую в годи́ну скорбе́й кра́ю Ура́льскому посла́вшая! На ка́мени ве́лием ико́ну Свою́ сию́ нам яви́вшая, мо́лим Тя: окамене́нныя сердца́ на́ша росо́ю моли́тв Твои́х умягчи́. Ми́лость Свою́ нам показа́вшая у исто́чника водна́го, иде́же боле́зни на́ша теле́сныя исцеля́ются, да́руй нам пото́ки ско́рбных слез и очи́сти и́ми ти́ну грехо́в на́ших. У исто́чника сла́наго ико́ною Твое́ю благоволе́ние ме́сту сему́ показа́вшая, помози́ нам сло́во Го́спода, Сы́на Твоего́, испо́лнити и со́лию земли́ бы́ти. Лик Свой те́мным, нам, гре́шным, омраче́нным грехо́м, яви́вшая, просвети́ тьму на́шу душе́вную, освяти́ пути́ жи́зни на́шея и приведи́ нас к ти́хому приста́нищу в ве́чныя оби́тели, угото́ванныя Го́сподом лю́бящим Его́. Ами́нь.

Кано́н Боже́ственному и покланя́емому Пресвято́му Ду́ху Паракли́ту¹¹⁴

Творе́ние и́нока преподо́бнаго Макси́ма Гре́ка Святого́рца

Глас 4

Песнь 1

Ирмо́с: Боже́ственным покрове́н / медленноязы́чный мра́ком, / извити́йствова Богопи́санный зако́н: / ти́ну бо оттря́с очесе́ у́мнаго, / ви́дит Су́щаго / и науча́ется Ду́ха ра́зуму, / хваля́ Боже́ственными пе́сньми.

Припе́в: Сла́ва Тебе́, Бо́же наш, сла́ва Тебе́.

И́же ма́нною препита́вый Изра́иля в пусты́ни дре́вле, / и ду́шу мою́, Влады́ко, Ду́ха напо́лни Всесвята́го, / я́ко да о Нем богоуго́дно служу́ Ти вы́ну.

Со Безпло́тными Твои́ми слу́гами, сме́я, припева́ю Ти и аз, / земля́ сый и пе́пел, / трисвята́го гла́са пе́ние, / Тро́ице тая́жде и Еди́нице Преблага́я.

Всегда́ бу́рями губи́тельных страсте́й и духо́в возмуща́емь душе́ю, / Тебе́, Всеблаже́нному Паракли́ту, / я́же о мое́м спасе́нии я́ко Бо́гу возлага́ю.

Нестрое́нием вся́ческих беззако́нных по́мыслов омрача́емь лю́те, / губи́тельнаго сего́, молю́ Тя, изба́вити мя изво́ли неду́га.

Глубино́ю неразу́мия и лю́таго нераде́ния дрема́нием потопля́емь бе́дне, / к Тебе́, Всепречи́стому, вопию́: / душе́вныя сея́ тли изба́ви мя.

Сла́ва: Во чре́ве заче́нши де́вственнем, / Его́же из чре́ва пре́жде век Оте́ц роди́, / чре́вными сладостра́стии порабоще́нна, / Твое́ю кре́пкою свободи́ мя си́лою.

И ны́не: Земля́ Ты еди́на свя́та вои́стинну, / я́ко ро́ждшая всех Боже́ственный Живо́т; / зе́млю плодоно́сну ду́шу мою́ Твоему́ Сы́ну покажи́, Богоро́дице.

Песнь 3

Ирмо́с: Разве́рзе утро́бы неча́дствовавшия у́зы, / доса́ду же неудоботерпи́му благоча́дствующия, / еди́на моли́тва проро́чицы дре́вле А́нны, / нося́щия дух сокруше́н, / к Си́льному и Бо́гу ра́зумов.

Бла́гости Твоея́, Свята́я Тро́ице, позна́ние ве́лие есть, / обновле́ние созда́ннаго по Твоему́ Боже́ственному о́бразу, / Его́же, воплоще́нием преди́вным еди́наго из Тебе́ па́че сло́ва, / Себе́ жили́ще Боже́ственное показа́ла еси́.

Дарова́нии Твои́ми святы́ми и по́мыслы священноле́пнаго благогове́инства, Влады́ко, / ум мой укра́си, / я́ко да в тишине́ души́ и святоле́пном устрое́нии / пою́ и прославля́ю Тя, Боже́ственный Паракли́те.

Та́йная плотска́я движе́ния, / от го́рдостныя стра́сти во мне ражда́емая / и прескве́рне оскверня́ющая окая́нную ду́шу мою́, / отню́д истреби́ от сея́, Влады́ко, молю́тися.

Брозда́ми и уздо́ю Боже́ственнаго стра́ха, Влады́ко, / безсту́дныя души́ моея́ встягни́ устремле́ния, / я́ко да зе́льным благогове́инством и тре́звенною мы́слию / пою́ Тя и сла́влю, Боже́ственный Уте́шителю.

Мно́гими блуже́нии растли́вся коне́чне, / к Тебе́, Пресве́тлейшему Со́лнцу, ве́рою притека́ю: / Боже́ственным Твои́м све́том душе́вныя ми о́чи просвети́ти изво́ли, / Боже́ственный Паракли́те.

Сла́ва: Живота́ всех а́ки Пита́тельница, Влады́чице, / умерщвле́нную мою́ ду́шу скве́рными страстьми́ оживотвори́ти, Чи́стая, / Боже́ственным Твои́м посеще́нием изво́ли.

И ны́не: Животво́рных повеле́ний Твоего́ Сы́на, Пречи́стая, / приле́жна и спе́шна де́лателя покажи́ мя, / лю́тое разлене́ние и глубо́кое дрема́ние от души́ моея́ отню́д истреби́вши.

Та́же глаго́ли стихи́ сия́:

Спаси́ от бед раба́ Твоего́, Уте́шителю Благи́й, / я́ко зело́ и безпреста́нно напада́ют на мя нечи́стии бе́сове / по́мыслы и мечта́нии скве́рными.

При́зри благоутро́бием, Всепе́тая Богоро́дице, / на жесто́кое се́рдца моего́ окамене́ние / и просвети́ тьму души́ моея́.

Конда́к, глас 2.

Подо́бен: Вы́шних ища́:

Всех живота́, Исто́чника Приснотеку́щаго Боже́ственных даро́в, / Ду́ха Всесвята́го, / я́ко Отцу́ Единосу́щна / и Сы́ну Соприсносу́щна, / в пе́снех благове́рно воспои́м и велича́им / и я́ко Бо́гу ве́рою поклони́мся.

Поклоня́юся Тебе́, Влады́ко Уте́шителю Бо́же: / поми́луй и спаси́ поклоня́ющияся Тебе́ / и Бо́га испове́дающия Тя.

Песнь 4

Ирмо́с: Царю́ царе́й, /Яковы́й от Якова́го, / Еди́н, Сло́ве, произше́дый, / от Отца́ Безвино́внаго, Равномо́щнаго Твоего́ Ду́ха / апо́столом и́стинно посла́л еси́ / я́ко Благоде́теля, пою́щим: / сла́ва держа́ве Твое́й, Го́споди.

Услы́шати сподо́би мя, Го́споди, тогда́ многожела́емое зва́ние Твое́, / в неве́стник Небе́сный созыва́ющее всех преподо́бных Твои́х.

Осужде́на челове́ка злонача́льника прельще́нием / взыска́ла и спасла́ еси́, Тро́ице Свята́я, и просла́вила еси́ его́; / и мое́, изнемо́гшее печа́лию се́рдце, свы́ше кре́постию Твое́ю утверди́ / и возбуди́ мы́сли моя́.

Боже́ственным стра́хом пригвозди́ окая́нныя моея́ пло́ти мудрова́ние / и па́мятию бу́дущих муче́ний ду́шу устраши́.

Дерзнове́ние Боже́ственно пода́ждь ми, / водруже́нную грехо́м во мне ху́дость истреби́в, / и Твое́ю просвети́ мя благода́тию.

Богоро́дице Всепе́тая, / смире́нную Боже́ственным дарова́нием обогати́ ду́шу мою́, / высоту́ смири́вши велича́ния.

Сла́ва: Свяще́нное жили́ще Твоего́ Сы́на, Богоро́дице, / покажи́ ду́шу мою́, / безчи́сленныя ея́ скве́рны отгна́вши.

И ны́не: Кре́пце погиба́ема нестрое́нием душе́вным, Всепе́тая, / моли́твами Твои́ми утверди́ мя в Боже́ственном стра́се и любви́.

Песнь 5

Ирмо́с: Реши́тельное очище́ние грехо́в, / огнедохнове́нную приими́те Ду́ха ро́су, / о ча́да светообра́зная церко́вная!/ Ны́не от Сио́на бо изы́де Зако́н, / языкоогнеобра́зная Ду́ха благода́ть.

Напра́ви живо́т мой, Пресу́щественная Тро́ице, / к Твои́м спаси́тельным за́поведем / и све́том Твои́м ду́шу мою́ просвети́, молю́тися.

Обдержи́ма су́ща плени́цами лю́тых прегреше́ний, / реши́ти мя от сих благоволи́, Преблаги́й, / и целому́дрия любо́вию Боже́ственною воспери́ мя.

Освети́ Твое́ю Боже́ственною благода́тию, Паракли́те, / страстьми́ омраче́нную ду́шу мою́ / и глубо́кую неразу́мия тьму от нея́ иждени́.

Зело́ безбоя́зненно по вся дни прогневля́ю Тя / де́лы же и словесы́ скве́рными, Преблаги́й, / но молю́ Тя: / нече́стия сего́ изба́ви мя.

Сла́ва: Еди́на, ро́ждшая вся́кия прему́дрости Исто́чника, / преступле́нием Боже́ственных за́поведей / объюро́девшую ду́шу мою́ отню́д вразуми́, Всепе́тая.

И ны́не: Истреби́, Чи́стая, от души́ моея́ / стужа́ющия ми безпреста́нно злы́я по́мыслы / и Богоуго́дными обогати́ мя поуче́нии.

Песнь 6

Ирмо́с: Очище́ние нам, Христе́, / и спасе́ние, Влады́ко, / возсия́л еси́ от Де́вы, / да, я́ко проро́ка от зве́ря морска́го пе́рсей Ио́ну, / от тли исхити́ши / всего Ада́ма всеро́дна па́дшаго.

Страстьми́ го́рькими плотски́ми огорче́н быв окая́нною душе́ю мое́ю / и в тех, а́ки в после́дних бе́зднах, вы́ну, Спа́се мой, потопля́емь, Тебе́ молю́ся: / струя́ми Живода́тельнаго, и́же у тебе́, Исто́чника оживи́ мя.

Вели́каго вои́стинну молча́ния досто́йна суть вся Твоя́ та́инства: / трили́цствуеши бо во Еди́ном Существе́ / и, соединя́ема, пребыва́еши несме́сна. / Но, Безнача́льная Тро́ице, / Твои́х рук бре́нное созда́ние спаси́ мя.

Весь цел Сын, ве́руем, есть во Отце́ суще́ственне и Дух: / от Него́ бо, а́ки от Еди́наго Нача́ла, соприсносу́щне О́ба сия́ют / и пребыва́ют о Себе́ в Живонача́льных Ипоста́сех Свои́х.

Ю́ности гну́сными стрека́нии / на мя вооружи́вся скве́рный вся́ким о́бразом, / те́ми ду́шу мою́ и живо́т весь оскверни́л есть, / но, Паракли́те Преблаги́й, / плода́ми покая́ния исцели́ мя.

В напа́сти лю́тыя по уму́ падо́х, / и недоуме́нием содержи́мь есмь всю́ду, / и в бе́ды разли́чныя впада́ю, / и, я́коже ладия́ в морско́м волне́нии, обурева́емь есмь, / но, Преблаги́й Уте́шителю, / лю́таго сего́ обурева́ния, молю́ Тя, ско́ро исхити́ мя.

Сла́ва: Паде́нием лю́тым падо́х, / преступи́в к Твоему́ Сы́ну обе́ты моя́, / но, я́ко исто́чника щедро́т и благоутро́бия су́щую пучи́ну, / Всенепоро́чная, молю́ Тя: / ми́лостива сотвори́ ми Его́.

И ны́не: Губи́тельныя на мя наве́ты / неви́димых враго́в мои́х, Де́во, изгоня́й всегда́ от души́ моея́ / непобеди́мою и Боже́ственною си́лою Твое́ю / и даждь ми на них всеору́жие духо́вное и ра́зум.

Та́же: Спаси́ от бед:

Конда́к, глас 2:

Всех Животе́, Све́те и Утеше́ние, / Наде́ждо и Наслажде́ние, Всесвяты́й Ду́ше, / Бо́га Тя зна́ющих, Отцу́ и Сы́ну Сопресто́льна, / даро́в Твои́х сподо́би / и грехо́в отпуще́ние да́руй им.

Песнь 7

Ирмо́с: Согла́сная возшуме́ орга́нская песнь / почита́ти златосотворе́нный безду́шный истука́н; / Уте́шителева же светоно́сная благода́ть почеству́ет, / е́же вопи́ти: / Тро́ице Еди́ная, Равноси́льная, Безнача́льная, благослове́на еси́.

Вся́кия зло́бы и ху́дости нра́вов свободи́в мя, Спа́се, / дарова́нии всесвяты́ми Боже́ственнаго Паракли́та обогати́ мя, пою́ща: / отце́в Бо́же, благослове́н еси́.

Вся́каго желе́за и ка́мене жесточа́йшее се́рдце мое́ умягчи́, Спа́се, / да и́стинным умиле́нием возопию́, спаса́емь: / отце́в Бо́же, благослове́н еси́.

Со Отце́м Безнача́льным Сы́на и Ду́ха Соприсносу́щна, / во Еди́ном Существе́, и Трие́х Ли́цах, богосло́вствующе, пое́м: / отце́в Бо́же, благослове́н еси́.

Лука́вым обы́чаем грехо́вным ра́бски побежда́емь, / Тебе́, всех Влады́це, припа́дая, молю́ся: / скве́рныя сея́ рабо́ты изба́ви мя.

Кре́пкою си́лою Твое́ю / грехо́м изнемо́гшую ду́шу мою́ утверди́ти благоволи́, / да воззову́, спаса́емь: / отце́в Бо́же, благослове́н еси́.

Сла́ва: Ра́зумом Боже́ственным и те́плым покая́нием, Богоблагода́тная, / ум мой и ду́шу, лю́те грехо́м помраче́нную, / просвети́ти изво́ли, да пою́ Ти со Арха́нгелом: / ра́дуйся, Влады́чице.

И ны́не: Пло́ти моея́ беззако́нная и пристра́стная движе́ния, Богороди́тельнице, / умертви́вши коне́чне, / благода́ть Паракли́тову в души́ мое́й насади́, / да святоле́пне Тя, Пресвяту́ю, прославля́ю всегда́.

Песнь 8

Ирмо́с: Разреша́ет у́зы и ороша́ет пла́мень / трисве́тлый Богонача́лия о́браз, пою́т о́троцы, / благослови́т же еди́наго Спа́са и Вседе́теля, / я́ко Благоде́теля, / сотворе́нная вся́ческая тварь.

Губи́тельнаго разжже́ния беззако́нных по́мыслов разреши́ мя, Иису́се мой, / да чи́стым се́рдцем сла́влю Тя.

Со Безпло́тными слу́гами Твои́ми / Высоча́йшую и Вседе́тельную Тро́ицу пое́м Тя / и превозно́сим, пе́рстнии раби́ Твои́.

Губи́тельныя нахо́ды враго́в мои́х неви́димых изгоня́я от души́ моея́, / благода́ть Твою́ всели́ти в ней, Паракли́те, изво́ли.

Проше́ния, и́хже у тебе́ прошу́ моли́твою, / соверша́ти бо́дренно де́лом, и стра́хом, / и любо́вию сподо́би мя, Уте́шителю.

Го́рдыми по́мыслы сатани́нскими / беся́щуюся всегда́ ду́шу мою́, Влады́ко, / я́коже ве́си, исцели́.

Па́че блудни́цы и Иса́ва беззако́новав, / к Твои́м щедро́там прибега́ю: / не отри́ни мене́ от благода́ти Твоея́, Паракли́те Пресвяты́й.

Благослови́м Отца́, и Сы́на, и Свята́го Ду́ха, Го́спода.

Грехолюби́в зело́ па́че всех челове́к сый, Всепе́тая, / к Тебе́ прибега́ю: / спаси́ мя, недосто́йнаго раба́ Твоего́.

И ны́не: Любому́дрия и́стины Боже́ственнаго рачи́теля покажи́ мя, Всепе́тая, / стра́хом и любо́вию исправля́ющи мя.

Песнь 9

Ирмо́с: Ра́дуйся, Цари́це, / матероде́вственная Сла́во, /вся́ка бо удобообраща́тельная благоглаго́ливая уста́ / вити́йствовати не мо́гут, / Тебе́ пе́ти досто́йно, / изумева́ет же ум всяк Твое́ рождество́ разуме́ти. / Те́мже Тя согла́сно сла́вим.

Спа́се мой, просвеще́ние и Защи́тниче, / от Твоея́ Боже́ственныя ра́дости не отри́ни мене́ / Пречи́стыя Твоея́ Ма́тере моли́твами святы́ми.

С Го́рними си́лами и аз, со стра́хом ниц пад, / покланя́ютися, пе́рстный, и любо́вию вопию́ Ти: / Тро́ице Всесвята́я, сла́ва Тебе́.

Спаси́ мя, пою́щаго, покланя́ющагося и славосло́вящаго / держа́ву непристу́пныя сла́вы Твоея́.

Бла́гости нра́вов, и наказа́нию зако́на, / и ра́зуму Боже́ственных догма́т научи́ мя, / да благоуго́дно пою́ Тя, Боже́ственный Паракли́те.

Всех пра́ведных и благоугоди́вших Ти / сподо́битимися изво́ли ра́достнаго пра́здника, / да вку́пе с ни́ми пою́ Тя, Пресвяты́й Уте́шителю.

Души́ моея́ страхова́ние, и разли́чныя зло́бы, / и всю ея́ истреби́в ху́дость, / доброде́телей венце́м укра́си ю́, Святы́й Паракли́те.

Сла́ва: О Всенепоро́чная Де́во, / растли́вшуюся вся́ческими блуже́нии окая́нную ду́шу мою́ / Твои́ми святы́ми моли́твами исцели́.

И ны́не: О Боже́ственная Хода́таице Бо́гу и челове́ком, / худу́ю сию́ моли́тву мою́ / Боже́ственному Паракли́ту принеси́, молю́ Тя, Всесвята́я Богоро́дице.

Та́же: Спаси́ от бед:

И тропари́ сия́:

Досто́йно есть вои́стинну велича́ти Тя, Бо́га Сло́ва, / Его́же трепе́щут и ужаса́ются Херуви́ми / и славосло́вят Си́лы Небе́сныя, / от Де́вы непрело́жно вопло́щшагося / Христа́, Жизнода́вца и Го́спода.

Досто́йно есть вои́стинну превозноси́ти Тя славосло́вии, Всепреблага́го, / и Всепресвята́го, и Храни́теля жи́зни на́шея, / со Отце́м и Сы́ном богонача́льно ца́рствующаго ви́димыми и неви́димыми, / от Отца́ еди́наго исходя́щаго Бо́жия Ду́ха, / вели́ка же и стра́шна, со стра́хом сла́вити.

Сла́ва: Пое́м Тя все боголе́пно пе́нии Боже́ственными, / Отца́ и Сы́на и Ду́ха Боже́ственнаго, / Трисоста́вную Держа́ву, / Еди́но Ца́рство и Госпо́дство.

И ны́не: Влады́чице, Ма́ти Изба́вителя, / приими́ моли́твы Твои́х непотре́бных раб, / и́мже возда́ждь избавле́ние грехо́в / и богоуго́дныя жи́зни прия́тное исправле́ние.

Моли́тва ко Пресвято́му Ду́ху

Приими́, Влады́ко, Преблаги́й Паракли́те, Еди́н Сый Святы́я и Покланя́емыя Единосу́щныя же и Нераздели́мыя Тро́ицы, худо́е сие́ моле́ние, ему́же благоволи́л еси́ приноси́му быва́ти Тебе́ от челове́ка гре́шнаго и осужде́ннаго, и прости́ ми согреше́ния моя́, во́льная и нево́льная, от та́йных мои́х очи́сти мя и от чужди́х пощади́ раба́ Твоего́. Благоволи́ о мне, гре́шнем и непотре́бнем, и не́мощи души́ моея́ посети́ благода́тию Твое́ю и исцели́ сокруше́ние ея́. Поми́луй мя, Влады́ко, Паракли́те, Бо́же, поми́луй мя, освяти́ мою́ ду́шу и те́ло, просвети́ ми ум и ра́зум, очи́сти со́весть душе́вную от вся́кия скве́рны, нечи́стых по́мыслов, умы́шлений лука́вых и разуме́ний ху́льных и от вся́каго превозноше́ния, го́рдости же и киче́ния, высокоу́мия же и де́рзости, и сатани́нскаго шата́ния, и от вся́каго фарисе́йскаго лицеме́рия и презо́рства¹¹⁵, и от вся́каго сту́днаго и лука́ваго обы́чая моего́ изба́ви мя до конца́, сла́вы ра́ди И́мене Твоего́, и да́руй ми и́скренне покая́ние, сокруше́ние се́рдца моего́ и смиренному́дрие, кро́тость же и ти́хость и вся́кое христиа́нское благогове́инство, ра́зум же и худо́жество духо́вное, со вся́ким благоразу́мием, благодаре́нием и терпе́нием соверше́нным. Ей, Бо́же, сла́вы ра́ди И́мене Твоего́ услы́ши мя, гре́шнаго, моля́щагося Тебе́, и сподо́би мя в про́чее вре́мя окая́нныя жи́зни моея́ ка́ятися и́скренне мои́х беззако́ний, со вся́ким смиренному́дрием, целому́дрием же и воздержа́нием и́стинным, отступи́вшу мне вся́каго сомне́ния, двоеду́шия и нечу́вствия, и соблюди́ мя, Влады́ко, во вся́ком благочести́вом и правосла́вном испове́дании ве́ры христиа́нския, да сподо́блюся во вся дни живота́ моего́ без сомне́ния пе́ти Тя, благослови́ти, славосло́вити и глаго́лати: Святы́й Бо́же, О́тче Безнача́льный; Святы́й Кре́пкий, Сы́не Его́ Собезнача́льный; Святы́й Безсме́ртный, Ду́ше Святы́й, от Отца́ исходя́й и в Сы́не пребыва́яй и почиваяй; Тро́ице Всесвята́я, сла́ва Тебе́. Сла́ва Тебе́, Свята́я Тро́ице Единосу́щная, Животворя́щая и Нераздели́мая, всех ра́ди сла́ва Тебе́.

Сла́ва Тебе́, Ма́ти Бо́жия, ве́рных прибе́жище, и избавле́ние в лю́тых содержи́мым, и души́ моея́ Боже́ственное утеше́ние; всеокая́нную ду́шу мою́, о Богоблагода́тная, уя́звленную стреля́нии ра́тника, Твоему́ всеси́льному предста́тельству поруча́ю, ю́же соблюда́й, покрыва́й и спаса́й от бесо́вских ко́зней невреди́му, да вопию́ Ти: ра́дуйся, Неве́сто Неневе́стная.