31-й день
Свята́го му́ченика Ерме́я
Стихи́ры, глас 1.
Подо́бен: Небе́сных чино́в:
Кро́вными ка́плями/ безбо́жия огнь, великому́чениче, погаси́в,/ Христо́ву Це́рковь напои́л еси́ бога́тно/ и ве́рных сердца́ уясни́л еси́,/ благоче́стно почита́ющих/ твою́ свяще́нную и честну́ю па́мять.
Я́ко необори́м столп,/ прило́ги враг не поколеба́лся еси́ отню́д,/ сердца́ же тех стерл еси́, Ерме́е,/ и боле́знию до́блих по́двиг твои́х,/ я́ко преклоне́ну сте́ну,/ вся их шата́ния низло́ж.
Во глубину́ неве́рия попо́лзшияся/ возводя́, Ерме́е, Бо́жиим сло́вом,/ мук треволне́ния подъя́л еси́ мно́га,/ страстоте́рпче прехва́льне,/ до́ндеже вшел еси́ с ни́ми ра́достно/ в приста́нище Небе́сное.
Стихи́ры Богоро́дицы, глас и подо́бен то́йже:
Одержи́ми паде́нии ненаде́жными, Чи́стая,/ Тя Предста́тельницу еди́ну иму́ще, Де́во,/ вопие́м благода́рственно:/ очи́сти ны, Пресвята́я Богоневе́сто,/ Ты бо еси́ ми́ру прибе́жище/ и заступле́ние ро́да на́шего.
Жезло́м Твоего́ предста́тельства,/ Богороди́тельнице Чи́стая,/ звери́ныя стра́сти окая́нныя души́ моея́ отжени́ вско́ре,/ ми́рно живо́т мой управля́ющи,/ и свято́му мя ста́ду/ избра́нных Твои́х ове́ц причти́.
Согреше́ний пучи́ною потопля́емь,/ к ти́хому приста́нищу пречи́стыя Твоея́ моли́твы,/ Богороди́тельнице, прибе́г,/ взыва́ю Ти: спаси́ мя,/ держа́вную Твою́ пода́вши десни́цу/ рабу́ Твоему́, Пренепоро́чная.
Сла́ва, и ны́не:
Нра́вом гнилы́м попо́лзся, ниц лежу́/ и к Твое́й, Де́во, притека́ю тишине́:/ от бу́ри сопроти́вныя/ и искуше́ний многообра́зных мя изба́ви,/ да пою́ Твою́ благода́ть непреста́нно,/ Богоро́дице, Ма́ти Присноде́во.
Крестобогоро́дичен:
Воздви́жена я́ко ви́де на Кресте́ А́гнца Непоро́чная Де́ва,/ пла́чущи, вопия́ше:/ сла́дкое Мое́ Ча́до,/ что́ но́вое и пресла́вное виде́ние?/ Ка́ко, содержа́й вся́ческая го́рстию,/ на Дре́ве пригвожда́ешися пло́тию?
Тропа́рь, глас 4:
Му́ченик Твой, Го́споди, Ерме́й/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ ду́ши на́ша.
Кано́н, творе́ние Ио́сифово, глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Звезда́, сия́ющая Боже́ственным све́том,/ муче́ния сия́нием позна́н был еси́,/ све́тло вся озаря́я, ве́рою чи́стою тя, Ерме́е, чту́щия.
Вы́ну воззре́нием, е́же к Бо́гу, вся презре́в,/ я́же в житии́, му́чениче му́дре,/ в му́ченическия вшел еси́ по́двиги и врага́ держа́вно победи́л еси́.
Красе́н виде́нием и душе́ю сый, Ерме́е,/ вво́инился еси́ Царю́ Небе́сному/ и Сего́, му́чениче, до конца́ враги́ смири́л еси́.
Не поже́ршу ти и́долом, блаже́нне, твоя́ исторго́ша зу́бы,/ но ты че́люсти мы́сленных сокруши́л еси́ львов/ и побе́ды оде́ялся венце́м неувяда́ющим.
Богоро́дичен: Свята́я Де́во, Ма́ти Христо́ва,/ му́чеников сла́ва и А́нгелов ра́досте,/ с ни́ми моли́ Сы́на Твоего́ уще́дрити и спасти́ рабы́ Твоя́.
Песнь 3
Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.
Украше́ние был еси страда́льцев, му́дре, благода́тию Богосия́нною./ Те́мже, и́же в ми́ре, благоче́стно тя почита́ем.
Хвалу́ Бо́гу на́шему, че́люстем твои́м сокруша́емым, му́чениче му́дре,/ тя укре́пльшему, благода́рно воспева́л еси́.
Си́лою Боже́ственнаго Ду́ха ты укрепля́емь, прему́дре,/ си́льнаго, ра́дуяся, в зло́бе смири́л еси́ зми́я.
Богоро́дичен: Усты́ и язы́ком испове́даю Тя,/ Бо́га пресвяты́й храм, Пречи́стая,/ сего́ ра́ди вся́каго изба́ви мя озлобле́ния.
Седа́лен, глас 4.
Подо́бен: Вознесы́йся:
Низло́ж враго́в возноше́ния,/ я́ко во́ин си́лен Влады́чень, побе́дный вене́ц прия́л еси́./ Те́мже восхваля́ем тя, я́ко до́бля страда́льца,/ ве́рою творя́ще твою́ всепра́зднственную па́мять,/ в не́йже моли́ спасти́ся нам вся́кия ну́жды, Ерме́е многострада́льне.
Сла́ва, и ны́не, Богоро́дичен:
По Бо́зе во Твой, Богоро́дице, прибега́ю смире́нный покро́в Боже́ственный/ и, припа́дая, молю́ся:/ поми́луй, Пречи́стая, я́ко превзыдо́ша главу́ мою́ греси́,/ и бою́ся, Влады́чице, му́ки, и трепе́щу./ Моле́ние сотвори́, Чи́стая, к Сы́ну Твоему́ от сих изба́вити мя.
Крестобогоро́дичен:
От Безнача́льнаго Отца́ рожде́ннаго, напосле́док Тя пло́тию ро́ждшая,/ на Кресте́ ви́сяща зря́щи, Христе́,/ увы́ Мне, любе́знейший Иису́се, – вопия́ше:/ ка́ко, сла́вимый я́ко Бог от А́нгел,/ от беззако́нных ны́не челове́к, Сы́не, хотя́ распина́ешися?/ Пою́ Тя, Долготерпели́ве.
Песнь 4
Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
То́ки крове́й твои́х многобо́жия огнь погаси́ша,/ ве́рным же роса́ яви́шася, страстоте́рпче му́чениче досточу́дне.
Тро́йческою благода́тию, му́чениче, ороша́емь, пребыва́еши неопали́м,/ посреде́ пла́мене стоя́ три дни, всесла́вне.
Лик Небе́сных сил свы́ше смотря́ше до́блесть,/ и по́двиг твои́х кре́пости, страда́льче Ерме́е, дивя́ся.
Богоро́дичен: Препе́тая Влады́чице, во святы́х почива́ющаго па́че сло́ва родила́ еси́,/ сего́ ра́ди Тя пе́сньми почита́ем.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.
Сокруша́емь те́лом, му́чениче пресла́вне,/ мно́гими му́ками сокруше́ние соде́лал еси в поги́бель истука́нным благода́тию,/ сего́ ра́ди всех благочести́вых благода́тию Боже́ственною/ исцеля́еши душе́вная сокруше́ния.
Го́рькими отра́вы, му́чениче, напое́н пребыва́еши невреди́м,/ во изве́стну ве́ру призыва́я сих Пода́теля,/ претворя́ема твои́м све́тлым чудоде́йством к муче́ния красоте́ пресве́тло.
Ника́коже уклони́лся еси́ стоя́ния лу́чшаго, блаже́нне,/ укрепля́ющаго тя, и утвержда́юща, и исправля́юща по́двиги вся,/ е́же к нему́ бы́вшее, прозря́ нра́ва простото́ю.
Богоро́дичен: Мы́сленный Тя све́щник дре́вле проро́к ви́де Ду́хом,/ иму́щ, Отрокови́це, свещу́, Христа́ Го́спода,/ све́том неизрече́нным вся ны просвеща́юща,/ ве́рно Тя чту́щия, Пренепоро́чная.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Всеце́ло к Бо́гу, всеблаже́нне, име́я жела́ние,/ боле́зни и терза́ния Боже́ственнаго твоего́ телесе́, я́коже ино́му стра́ждущу,/ терпе́л еси́, ра́дуяся, венца́ прозира́я.
Претерпе́л еси кре́пко жил твои́х отъя́тие, Ерме́е, му́чениче Христо́в,/ врага́ многоко́зненнаго жи́лы истерза́я благода́тию/ и му́жеству вся́кому о́браз явля́яся.
Изощре́н огне́м Христо́вы любве́, я́ко обою́ду остр вои́стинну был еси́ меч/ во́инства безбо́жная, я́ко тверд ору́жник, посека́я явле́нно.
Богородичен: Пита́еши боголе́пно ма́нием вся Пита́ющаго,/ рука́ми держи́ши, Всенепоро́чная Влады́чице, вся Содержа́щаго,/ сего́ ра́ди Тя, ве́рнии, по до́лгу сла́вим.
Конда́к, глас 6.
Подо́бен: Е́же о нас:
И́же по Христе́ усе́рдно подвиза́вся,/ в седи́нах до́блих му́жество стяжа́, му́чениче Ерме́е,/ беззако́нных злоумышле́ния попра́в Христо́вою си́лою,/ от чаро́вных напое́ний невреди́м пребы́сть, зовы́й:/ Бог есть со мно́ю, и никто́же на мя.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.
К Бо́гу зря, могу́щему спасти́, ума́ пра́востию,/ претерпе́л еси́ боле́зни, Ерме́е, до́бляго твоего́ те́ла, воспева́я:/ оте́ц на́ших Бо́же, благослове́н еси́.
Кропле́нием твои́х крове́й огнь угаси́л еси́ безбо́жия,/ в пла́мень же вшед, не опали́лся еси́ отню́д, воспева́я, пребога́те:/ оте́ц на́ших Бо́же, благослове́н еси́.
Блажи́т тя вся́ка Це́рковь, зря́щи до́блести твоя́,/ благода́ть же чуде́с и побе́дныя по́чести,/ я́же подаде́ тебе́ Госпо́дь, му́чениче Ерме́е му́дре,/ све́тло подвиза́вшуся.
Богоро́дичен: Украси́лася еси́, Де́во добро́тою,/ кра́снаго Христа́ ро́ждши, нам уподо́бльшася и вся сокруше́нныя к жи́зни возве́дша./ Те́мже ве́рно Тя всегда́ сла́вим в пе́снех.
Песнь 8
Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведей Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.
Беззако́нных веле́ние, зако́ном укрепля́емь и́стинным,/ страда́льче Ерме́е, ра́дуяся, преоби́дел еси́:/ и по́двиги вели́кими, блаже́нне, терпя́, прия́л еси́/ я́же в Вы́шних жили́ща во ве́ки.
Не ужаса́юся вся́каго боле́зней веле́ния пребыва́ема,/ ни принесу́ че́сти не су́щим бого́м, – взыва́л еси́, всеблаже́нне,–/ еди́наго то́кмо чту Иису́са Го́спода, при понти́йстем Пила́те распе́ншагося.
Пожре́тися шел еси́, я́ко овча́ незло́биво, му́чениче Ерме́е,/ за Поже́ршагося нас ра́ди, я́ко овча́те, и же́ртвы ме́рзкия вся от земли́ отъе́мшаго,/ те́мже во хвале́нии досто́йно тя пое́м.
Богоро́дичен: Яви́лася еси́ ши́рши небе́с, вмести́вшая Бо́га во утро́бе,/ Его́же при́сно моли́ утесня́ющаго мя ны́не греха́ изба́вити, Де́во,/ я́ко да, просте́рся де́лы благоче́стия, ве́рно Тя ублажа́ю.
Песнь 9
Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют.
Ви́дети сподо́бился еси́, разреши́вся от пло́ти, страстоте́рпче прехва́льне,/ блага́я, я́же тебе́ угото́ва Бог/ и с тобо́ю пострада́вшим и низло́жшим лука́ваго./ С ни́миже нам спасти́ся Го́спода моли́, му́чениче Ерме́е достохва́льне.
Красе́н твой вид и пре́жде твоего́ страда́ния,/ красне́йши яви́ся, му́дре по по́двизех чу́дных,/ а́нгельскою све́тлостию укра́шен, сла́вне./ Те́мже и к кра́сным восте́кл еси́ чертого́м,/ побе́дными венцы́ удобре́н.
Во́инство преоби́дел еси́ земно́е,/ Царю́ Небе́сному во́инствуеши, му́чениче му́дре,/ Его́же си́лою кре́пкою де́монския полки́ вся потреби́л еси держа́вно/ и побе́дными венцы́ зако́нно увя́злся еси́,/ о нас моли́ всегда́.
Па́мять твоя́ наста́ светоза́рная, на́ша мы́сли просвеща́ющи/ луча́ми по́двиг твои́х тве́рдых, в не́йже мо́лим тя:/ име́яй дерзнове́ние ко Христу́, моли́ непреста́нно/ улучи́ти нам ми́лость в День су́дный.
Богоро́дичен: Обо́лкся в мя, про́йде из Тебе́ Бог,/ нетле́ния облече́ мя оде́ждою, злым нра́вом обна́жшася Боже́ственныя оде́жды,/ Богороди́тельнице Влады́чице, всех челове́ков прибе́жище,/ му́чеников венцено́сных утвержде́ние и стена́/ и А́нгелов ра́дование.
Святой мученик Ермий
Святой мученик Ермий пострадал за Христа в городе Команы во время гонений при императоре Антонине Пии (138–161). Правитель Севастиан, прибывший в Каппадокию для исполнения приказа о преследовании христиан, предложил святому принести жертву языческим богам, обещая за это почести и милость императора. Но убеленный сединами воин мужественно исповедал свою веру во Христа. После долгих уговоров правитель повелел мучить святого. Его били по лицу так, что содрали с лица кожу, а потом бросили в раскаленную печь. Когда через 3 дня печь открыли, мученик Ермий вышел из нее невредимым. Правитель Севастиан приказал волхву отравить святого Ермия ядом. Отравленное питье не принесло святому никакого вреда. Так же и второй кубок с сильнейшим ядом не умертвил мученика. Волхв уверовал во Христа Спасителя, принес покаяние и был немедленно обезглавлен, приняв крещение собственной кровью и восприняв мученический венец.
Святой Ермий был предан еще более жестоким мукам: из него вытягивали жилы, бросали в кипящее олово, выкололи глаза, но он смиренно благодарил Господа Иисуса Христа. Потом мученика Ермия повесили головой вниз. Три дня висел он в таком положении. Люди, посланные правителем удостовериться в смерти мученика, нашли его живым. Пораженные чудом, они ослепли от ужаса и начали взывать к святому, чтобы он помог им. Святой мученик велел подойти ослепшим к нему, возложил на них руки и исцелил Именем Господа Иисуса Христа. В ярости правитель приказал содрать с тела святого всю кожу, но страстотерпец по-прежнему оставался живым. Тогда обезумевший Севастиан собственноручно отрезал ему голову ножом. Христиане тайно погребли тело мученика. От святых мощей Ермия подавались многочисленные исцеления православным христианам от различных недугов.
Свята́го апо́стола Ерми́я
Тропа́рь, глас 3:
Апо́столе святы́й Ерми́е,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.
Конда́к, глас 4:
Я́ко звезда́, возсия́л еси́ вселе́нней,/ све́том просия́в со́лнца, блаже́нне,/ всесве́тлаго Па́вла,/ ми́ра просве́щшаго концы́,/ сего́ ра́ди тя чтим, Ерми́е.