Слово Иоанна Богослова на Успение Божией Матери

Месяца августа 15 день. слово на успение Пресвятеи Владычице нашей Богородици. Благослови Отче.

(Из Сборн. Солов. библ. № 803, лист. 51–60)

Святеи преславнеи Владычици Богородици и Приснодевы Марии. по обычаю на святый гроб Господа нашего Иисус Христа. ходяще кадити и поклоняюще святеи свои колени. молящеся рожьшемуся из Нея. дабы шла⁴³⁵ к Нему ко Сыну своему единочадому Иисус Христу Царю и Богу нашему. Видеша же ю Июдеи ходящу на святый гроб припадоша к архиереем глаголюще, яко Мария по вся дни ходит на гроб и плачет⁴³⁶. призвавши же архиерее стража и вопрошахуть и яже бяху научили. да быша не дали никомуже молитися на святем гробе. и вопрашахуть и о неи. аще воистинну тако есть. стража же рекоша. яко ничтоже таковаго обретохом. Богу бо оставльшу их. честнаго прихожения ея видети. В един же день пятку сущу прииде на гроб святая Мария. по обычаю же молитву ей творящи. и отверзошася небеса⁴³⁷ и глас бысть к Ней. вшедши к рожьшемуся из тебя, прията бысть ты и ныне к прошению твоему. оставляющи мир сеи. и на небо идеши к Сыну своему, на живот истинный непременный приходиши.

Слышавши же се Мария от святаго архангела. и возвратися в Вифлиом. имущи с собою три девы. яже служаху ей. рече к девам принесите ми кадилницу. да ся помолю. И принесоша к ней кадилницу и помолися рекуще: Господи Иисусе Христе изволивый великия ради твоея благости⁴³⁸ из мене родитися. услыши Господи глас мои. посли ко мне Иоана апостола да видевши его начну веселитися. посли же ко мне святыя твоя апостолы. иже суть уже к тебе шли. и иже суть на сем свете по коимже странам святым твоим повелением. да сия видев благословлю я и прославлю многохвальное имя твое. надеюбося яко послушаеши мене рабы твоея, о сем. молящися еи. и приидох аз Иван Духу святому восхищшему на облаце от Ефеса. и поставиша мя на месте. идеже лежаше мати Господня. внидох же к ней и прославих рожьшагося из Нея. и рех к неи: радуйся мати Господа моего. рожьшая Христа Бога моего. веселися. яко с великою славою отходиши житиа сего. и прослави святая Мария Бога. зане придох аз Иван к неи. и помянух глас Господень. ркуще ко мне: се мати твоя и сын твой. и придоша три девы и поклониша ми ся. И глагола ми святая Богородица: сотвори молитву. и возложи кадило. и помолися тако: Господи Иисусе Христе сотворивый чудеса. и ныне сотвори чудеса. пред рожьшею тя. и изыдет мати твоя от жития сего. и устрашаться распявшии тя. и не верующии в тя. И якоже сотворих молитву. и глагола ми святая Мария Богородица: принеси ми кадило. и рече: Господи соверши о мне. елико же ми еси обещал преже даже не взыду на небеса. якоже отхожу мира сего. придеши ты. и множество ангел твоих со славою ко мне многою. И глаголах к неи аз Иван: придет Господь Иисус Бог наш и узриши. якоже ти есть обещал. и отвещавши святая Мариа и рече ми: Июдеи суть заклялися. егда умру. да сожгут тело мое. отвещах и рех ей: не имать видети истлениа преподобное твое тело. и отвещав же святая Мариа и рече мне: принеси ми кадилницу и возложи кадило и сотвори молитву. и бысть глас с небеси глаголя. аминь. Слышах аз Иван глас рече ми Святый Дух: слыша ли глас реченый с небеси. И скончах молитву и рех: ей слышах Господи. и рече ми: глас сеи сказает пришествие братии твоея апостол будущее святых сил. якоже днесь приидут к вам.

Аз же Иван молихся о сем. и рече Святый Дух к апостолом. все вы вкупе вседше на облака⁴³⁹ от конец вселенной сберитесь в святый град Вифлиом матере Господа Бога нашего ради. ты Симоне Петре от Рима. Павел от Тивириана⁴⁴⁰. Фома от Индия внутрешних⁴⁴¹. Иаков от Иерусалима. Андрей Петров брат. Филип. Лука. Симон кананит. почившеи воставше от гроб святым Духом. к ним же рече. не мните же. яко воскресение ныне есть. но сего ради востасте от гроб. да идете на целование и честь и чудо матере Господня. се уже отходит от мира сего. приближибося день восхожения ея на небеса. Марко же из Олександрея прииде с прочими апостолы. якоже рехом от коеяже страны кождо. Петр же взят бысть на облаце и ста между небом и землею Святым Духом подръжим. и подобно святым апостолом всем восхищеным на облацех. и обретохомся с Петром. и тако святым Духом вси вкупе приидохом на место се. И пришедши к матери Господа нашего. Иисус Христа. и поклонишася рехом ей: не бойся ни скорби Господь Бог рожеися из тебя. и изводит тя от мира сего со славою. и возрадовавшеся о Бозе Спасе нашем. и восклонився и седе на одре своем. и глагола к ним: ныне веру ях. яко прииде учитель ваш с небеси Господь и вижу, како изыду от житиа сего. якоже вы видех пришедша. и поведите ми, како разумеете отрясение от телеси сего⁴⁴², и придосте ко мне и колицем от ких стран доидосте семо. зане како ускористе на мое посещение. не утаи бо от мене рожейся Господь Иисус Христос всех Бог.

Отвещав же Петр к апостолом рече: кождо их, к нему же Святый Дух возвести и заповеде, возвестите к Матери Господа Бога нашего Иисус Христа. Отвещав же аз Иван и рекох. аз внегда внидох во олтарь службу сотворити. и глагола сии Дух Святый. яко приближися время преставления Матери Господа Бога твоего. Иди в Вифлием на целование ея⁴⁴³. и облак светел восхити мя. и постави мя во дворех сих. И рече Петр. аз в Риме живый и к утрени же идый услышах глас глаголящ ми Духом Святым. яко время приближися преставления Матере Господа Бога твоего. и гряди на целование ея во Вифлеом. и се облак светел восхити мя. видех же и прочая апостолы на облацех грядуща ко мне. и рече ми глас глаголя: вси идите во Вифлиом. И рече ми Павел. аз во граде отстоящим от Рима не малым растоянием живый Тивериани стране нарицаемей. и слышах глас глаголющаго ко мне: Мати Господа Бога твоего оставляющи мир сей преставляется на небеса. иди в Вифлиом на целование ея. и облак светел восхити мя и постави мя с вами. Отвещав Фома и рече: аз во индийскую страну приидох исповедания благодати Христову. Давдану именем хотящу со мною знаменатися в полате⁴⁴⁴ внезапу Святый Дух глагола ко мне ты Фома, иди на целование Матере Господа Бога твоего. яко преставляется на небеса. и облак светел восхити мя и постави мя у вас. Отвещав же Марко рече. аз по кануну третьие годины⁴⁴⁵ во Александрии молитву творих. и тогда Дух Святый восхити и принесе мя к вам. отвещав Иаков рече. мне сущу во Иерусалиме поведа ми Святый Дух. буди в Вифлеоме. яко Мати Господа Бога твоего преставляется. Отвещав Филип рече. аз прославих славу Божию. яко сущу ми в мори волнующуся. внезапу облак светел осени волнение мутное. престави на тихость. мене же восхитив и постави мя пред вами.

Сия вся поведаша святии апостоли, како приидоша к святеи Богородици которою кознью⁴⁴⁶. И воздев руце на небо. помолися святаа Мариа сице глаголя: кланяютися и хвалю многохвальное имя твое Господи. яко призрел еси на смирение рабы твоея. се бо отселе блажат мя вси роди. И по молитве рече к апостолом: возложите кадило и сотворите молитву. И якоже сотвориша апостоли молитву и бысть гром с небеси. яко глас колесниц страшен зело. и се бысть множество вой ангельских глас яко сына человеча. серафими окрест храма стояху. идеже возлежаше Мати святая Христа Бога нашего. и вси сущи во Вифлиоме видеша чудеса та. Бысть же гром. внезапу явися солнце и луна окрест дому. и бысть собор первенец святых⁴⁴⁷ и сташа в славу и честь святую. Видеша же вси знамение и чудеса много бываемая. слепым прозрение. глухим слышание. прокаженым оцещение. бесным исцеление. и всякия недужныя прикасахутся внеуду стен храма с верою вопияху: Святая Мариа. Христа Бога рождьшая. помилуй ны грешных. и абие исцелеваху. И от Иерусалима мног народ от коегождо отечества пришедше молитв ради. и услышавши же бываемая в Вифлиоме Матерью Господнею знамения и придоша на место различными недугы одръжими просяще исцелениа. бысть же радость велиа неизглаголаннаа в тот день от множества исцелениа. и зряще их славяху Бога нашего и Матерь Его. вси же от Вифлиома хвалами и песнми духовными веселяхуся. и паки возвращахуся весели.

Иереи же людстии⁴⁴⁸ с людми своими удивишася о чудесех святых⁴⁴⁹ и завистью тяжкою низпадше. и паки суетною мыслью. совет сотвориша на святую Матерь и на святыа апостолы. и собрашася множество Июдеи на Вифлиом. и якоже бяху за поприще едино от града. и узреша видение страшно. и от страха смятошася ноги их: и возвратишася вспять к граду своему. и поведаша игемону. еже видеша чудо велми страшно. и вопияху глаголюще: погибе язык июдейск от жены сея. но отжени ю от Вифлиома от епарха Иерусалимска. Игемон же слышав се чудо и ужасеся и рече к ним: аз ни от Вифлеома изгоню ея, ни от иного места. Июдеи же паче вопиаху. спасением⁴⁵⁰ кесаря Тивирия заклинаху игемона, дабы изгнал ея. и апостолы от Вифлиома. аще ли не изгониши, то навадим⁴⁵¹ на тя кесарю Тивирияну. и паки посла игемон тысящника в Вифлиом на святыа апостолы. Святый же Дух глагола к апостолом и к Матери Господни. се игемон посылает на вы тысящники. вы же изыдете из Вифлиома и не бойтесь. се бо в облаце провожу вы во Иерусалим. сила бо Отца и Сына со Мною и с вами есть. Востав же святыи апостоли. и вземше одр святыя Богородици изыдоша из дому. устремление⁴⁵² творяще во Иерусалим в дом Господень. и ставши 5 дний творихом молитву. Егда же доиде тысящник Вифлиома. ни обрете Матери Господня ни апостол держаща же Вифлиомлян. глаголющи к ним. не вы ли приидосте к игемону рекущи ко иереем сия бывшая знамениа и чудеса. яко пришли суть апостоли от всех стран. ныне где суть. аще ли несть их, то вы пойдете к игемону во Иерусалим. Поим же их и веде к игемону глаголя. яко ни единого же не обретохом, по пяти же дний увиде игемон иереи и вси гражене. яко во своем есть дому Мати Господня со апостолы. быша же ту знамениа и чудеса велия. Множество же бе муж и жен собрашася вопияху: Святая Дево рождьшиа Христа Бога нашего не забуди рода человеческаго. Сим же бывающим. и паче подвизавшеся Июдеи. и вземша огнь и дрова. иереи людии. и придоша пожещи хотящии дом. идеже Мати Господня со апостолы. игемон стоящи и издалеча позоры дея. они же толико доидоша дверии дому Божия Матери. и се внезапу сила огнена изо уст апостол⁴⁵³ и попали множество люди июдейских. и во всем граде страх велик бысть зело. вси иже вернии славяху Бога рожьшагося от нея. Увидев же игемон вся бывшая и возпив рече пред всеми людьми: воистину Сын Божий есть рожшийся от нея от святыя Мария. егоже вы мнящеся прогнати. знамения бо си суть истинаго Бога. Бысть же разделение между Июдеи. мнози же вероваша в Господа нашего Иисус Христа. о бывших чудесех и знамениих.

Потом же яко быша чудеса си святыя приснодевыя Матери Господа нашего Иисус Христа. и седящим нам апостолом с госпожею в Иерусалиме. и рече Святый Дух: весте ли апостоли. яко в неделю благовещение прияла Святая Мариа Девица. от архангела Гаврила. в неделю Спас родися в Вифлиоме. в неделю чада июдейская с ветвми изыдоша во святое усретение вопиюще глаголюще: осанна в вышних, гряды во имя Господне. в неделю имать приити судити живым и мертвым. в неделю воскресе Господь из мертвых. и в неделю имать приити с небес в славе и чести преставления ради святыя Девы рожьшия и. в неделю святая Девица родися⁴⁵⁴. в неделю глагола Мати Господня ко апостолом. возложите кадило, яко Господь грядет. с вои ангельскими, седя на престоле херувимстем. Тогда же всем людем молитву творящим и явися Господь. и бесчисленое множество ангел с Ним. и светло знамение прииде на святую Деву пришествием единочадаго Сына ея. и возглагола Господь к Матери своей и рече к ней: Марие. она же рече: се аз Господи. и рече Господь: не скорби Мати моя, но радуйся. обрете абие благодать. вижь славу Мою. юже имех с Отцем Моим. Возрев же святая Мариа и виде славу на Нем⁴⁵⁵. ея же уста человеча не могут изглаголати. и рече ей Господь: се отныне преложено будет тело твое на раи. а святая душа твоя на небеса в рай в сокровища Отча⁴⁵⁶. идеже свет невечерний и веселье вечное. отвещав же и рече святаа Мария: наложи десницу свою и благослови мя. и тако держащи лобызаше честную десницу. сотворившую небо и землю, глаголющи: молю многохвально имя Твое Господи Боже Царю всех. в веки единочадный Сын Отчь. приими рабу свою. изволивый родитися из мене смирением. спасения ради человеча за неизреченное твое человеколюбие. всякому же человеку призывающу или нарицающу имя рабы твоея. подай же им Господи свою помощь. Се же ей глаголющи. и припадохом апостоли к ногам ея молящеся и рехом: Мати Господня остави всему миру благословение. якоже отходиши от него. благословила бо еси и вокресила погибшая. рожьши свет всему миру. Помолися же Мати Господня. и рече: Боже еже еси благостью своею с небеси послал ко мне единороднаго Сына твоего. вселитися в смиреное мое тело и родиться из мене. помилуй весь мир Твой. и всяку душу нарицающу имя Твое. И помолившеся паки рече: Христе Царю небесный и Сыне Бога живаго приими всякаго человека. призывающаго имя Твое святое. да прославлена будет рожьшая Тя. И паки помольшися рече: иже все можеши на небеси и на земли. и се моление приими. молю имя Твое святое. на всяко время и место. идеже бывает память имени моего. святи место то. и прослави прославляющая Тя моим именем. приемля таковыя на всякое прошение и молитву и обет. Сице же ей молящися. Господь рече к ней: веселися и да радуется сердце твое. всяка бо благодать и всяк дар дан ти бысть Отцем небесным и Мною и Святым Духом. и всяка душа. яже имя твое призывает. не имать постыдитися. но обрящет милость и утеху и заступление и дерзновение и в нынешний век и будущий пред Отцем моим небесным⁴⁵⁷. Обрящься Господь к Петрови и рече: приспе время, начни пение. и вся силы небесныя отвещаша алилуия. Тогда же просветися лице госпожано паче света. и воставше благослови своею рукою коегоже апостола. и воздахом хвалу Господу Богу и Матери Его Марии.

Простерши же руце свои Господь. и прия святую и непорочную душу ея. исхожением же святыя душа ея. исполнися благухания и неизреченнаго света место то. и се глас услышан бысть с небесе глаголя: благословена ты в женах. и проводяще очима честную душу ея святии апостоли. испущахуть радостныа слезы. притекше же Петр и Фома. и прочии апостоли 12 и яхомся за святыя нозе ея. да быхом сами святилися. честное же и святое тело ея возложивше на одр и понесохом. И се жидовин един именем Иохония⁴⁵⁸ крепок бе телом и тъ нача сметати одр на землю. в се паки ангел Господень невидимою силою и мечем огненым отсече ему обе руце от плещь его. и по аеру сотвори висити⁴⁵⁹. Сему же чудеси бывшу и возопиша вси людие обретьшиися ту июдейстии, видевшии же. яко по чистоте⁴⁶⁰ истинен есть Бог рожшися от святыя Девы Марии. и тоже сам Офоний. востав идяше в след одра вопиа. святая Мария рожьшия Христа. помилуй мя. Обративжеся Петр и рече к нему: во имя рожшагося от нея. да прилепляться руце твои отъятии от тебе. и абие словом Петровым руце висящии у одра Госпожи на воздусе. и паки отшедше и прилепистеся к Иохонии. идеже бе и прежде были. и тако веруя тъ и славяше Бога рожьшагося от Мариа.

Сему же чудеси бывшу. исходящим же нам апостолом из града Иерусалимска с одром. и внезапу 12 облака восхитиша вся ны. с телом госпожиным. Владычици нашея Богородица. и преложиша на раи. сему же преложену. и ту видехом Елисавет матерь Иванову. и Анну матерь Госпожину. и Авраама и Исака и Иякова. и Давида поюща алилуиа. и вся лики святых кланяющеся честному телу Матери Господня. и свет же ту видехом. егоже светлей несть ничтоже. и множество благыа воня. бяша на месте том. и велми поющим рожена из нея Христа Бога нашего. песнь юже сохраншим уность свою чисту данна бывает. глас же пе тоя сладости слышаще сытости не. мы же убо апостоли видевше и прославихом Бога показавшего нам своя чудеса. преставлением Матери Его Пресвятыя Владычици нашия Богородица. ея же молитвами и молением достойни будем обрести милость и отпущение грехов от Господа нашего Иисус Христа. в сем веце и в будущем. славяще вкупе Отца и Сына и Святаго Духа. и ныне и присно. и в веки веком. аминь.