Переписка Иисуса Христа с Авгарем и сказания о нерукотворенном образе

(Из Торжественника XVI в. № 370 (1050), лист. 362–371)

Подобает о сем мало побеседовати. о самои благодати Бога и Спаса нашего Иисуса Христа. Многа ему чудеса благолепне съдевающу. во всех языцех провозвещено бысть о Иисусе. Слышав о сем Авгарь князь едесскии. иже от синяя проказы, и расслаблениа неприазненаго томим бе. и желаше своима очима самого Съдетеля видети, и не мога. Посла Авгарь ко Иисусу послание молебно, глаголя сице. Слышано ми есть о тебе Господи, и о целбах твоих бывающих. токмо бо словом даеши исцеление болящим. слепым прозрение. хромым ходити. слышати глухым. прокаженые оцещаеши. и долго мучимыя исцеляеши недуги. и жену кровоточиву прикоснувшуся риз твоих исцелил еси. и мертвые воскрешаеши. И слышах и разумех на сердци моем, яко ты еси един от девою съшедыи с небесе, ты еси Сын Божии. Слышу же и се Господи, яко иудеи ропщут на тя. хотят тя убити. Есть же град мои мал людие в нем добри а той довлеет обема нама. Глагола Иисус Ананьи посланому Авгаром⁴²¹ к нему. Ведыи буди, зане, не видев мя, верова. здравие тебе уготовися. Послан есмь исполнити всю правду. и потом внити ми. откуду же снидох. И се послю к тебе единого от ученик моих Фаддею, да ти исцелит недуг, иже имаши. Слышав же Авгарь словеса си. посла скорописца горазда иконам. во Иерусалим. да напишет образ Иисусов отай на плащаници. И прииде Лука во Иерусалим и вниде в собор⁴²² идеже учаше Иисус. И став на отлучене месте. нача писати образ лица Иисусова, вещными вапы, и недоуме. како бо можаше непостижимаго Божествена Слова постигнути. Обаче тайнам разумитель. отаи бывающее яви. И абие Иисус возва и глаголя: Лука Авгарев посолниче. даждь ми плащаницу. юже носиши от Авгаря. И вшед Лука в собор, и даст Иисусови плащаницу. И абие воду испроси Иисус и умы пречистое и божественое лице свое водою, и плащаницею отре. Оле чудо и выше ума преходя и разум. Простая та вода на вапное преложение устроися. и сбежа и составы имуща на плащанице. И бысть образ Иисусов на плащанице, яко ужаснутися и в страсе всем быти. И даст ю Иисус Фаддею апостолу. и посла его в едесскии град. идеже лежаше Авгарь боляй на одре 6 лет. Отидоста же Лука скоропосолник с Фаддеем носяща образ нерукотвореныи. И приидоста на место нарицаемое Ераполис, и легоста вне града в гостинници. И убоястася и скрыста образ Господень межу двема керемидама⁴²³. И показася столп огнен с небесе. и ста верху идеже бе съкровен образ Господень. Видевши же стражие чудо таковое. и возопиша гласом велиим. И слышавше же вси людие градстии, возмятошася. и бысть мятеж велик по граду. Фаддеи же и Лука вземше скоро образ Господень. и изыдоста в путь свои. Изыдоша же народи градстии на место, идеже столп огнен. и ужасошася и падоша ниц. И возревше и видеша яко вообразился бяше образ Господень в един от камень. они же вземше то воображение людие града того. и несоша во град свои. И яко быша входяща во врата граду. и се начаша сретати слепии. хромии. беснии прокаженые. вопиюще и глаголюще: Иисусе Сыне Бога вышняго помилуй ны. и прикасахуся к подобию образа Господня, исцелениа приимаху. Видевши же людие града того преславное чудо и прослависта всемилостиваго Бога. и вероваша в святую Троицу Отца и Сына и Святаго Духа. Фаддееви же со скоропосолником пришедшима близ града едесского. яко за версту едину. обретеся некто хромец ползая. И видев апостолу Господню, возопи глаголя помилуйте мя. И прикоснуся к нему апостол Господень. носяй образ Господень. и ту абие в том часе вскочи хромыи. и тече скоро во град прежде апостолу. И видевше вси граждане начаша дивитися глаголюще. не сей ли есть сын оноя вдовица. ползая на колену. Инии глаголюще той есть. а друзии глаголаху, яко подобен ему есть. И скоро поведаша о нем Авгарю князю, и призва и к себе, и вопроси глаголя: кто тя исцели. Овещав юноша рече. За версту бех града прося от мимоходящих милостыня. и некто идыи бе путем с другом. и азь начах просити у нею милостыня. и един от нею коснувся мне, и въскочих здрав весь якоже мя видиши. И Авгарь же помысли, яко Христос есть. и посла множество послуг в сретение. И шедше сретоша апостолу носящама образ Спасов нерукотвореныи. И пришедша в полату ко Авгарю. идеже лежа на одре расслаблен, 6 лет. Авгарь же яко видев убрус на немже образ Господень, и абие восхоте от радости яко восклонитися от одра на немже лежаше. и ту абие въскочи со одра и бысть здрав всем телом, яко не имы болезни никогдаже. Неисцелимых страстей свободися. и над пред святым образом любезно кланяшеся. И потом рече Авгарь ко апостолу Фаддею. что ми подобает творити. И рече ему апостол: крестися. И крестися в граде Едесе, и с женою и чадома, и вся елика в дому его крести апостол. и весь град его крестися во имя Отца и Сына и Святаго Духа. Пречистую же ту и чудную плащаницу на неиже образ Христов. Авгарь князь повеле над враты градными сотворше место честно и гораздо. ту повеле устроити ю, заповедав тако повелением всякому человеку. или входящу во град, или исходящу. первее святому и честному образу покланятися. тоже внити в град, или изыти. написав сице над ним: О Владыко многомилосердыи Христе Боже наш, упование всем концем земля помилуй ны. в тя бо веруем. всяк надеяйся на тя не погрешить упованиа. Потом же по летех мнозех, некто идолослужитель приа область града того. Божственую убо икону Христову раздрушити восхотев. бесовское же тело мерских идол в него место поставити на том месте. И се уразуме епископ града того, чаемое положив промышление. Понеже кругло место яко коморою, в камени тако сотворено, идеже бе образ. светилник пред божественым образом вжег. и керемидою заложи. плитами и извистию извону⁴²⁴ видение иконы загради. и на равновидение⁴²⁵ стену сотвори. Зане, невидиме еи быти, остася начинания нечестивый. что се рече невидимо бысть таковое съкровище. Потом же за многа лета приидоша Перси. Едесу град взяти хотяще бранию. Граждане возопиша к Богу со слезами, милости и помощи от него просяще. и ту абие раздрешение печали скоро обретоша. В едину нощь Евлавию епископу того града едесского. явися в видении жена светоносна глаголющи ему. верху врат градных съкровен есть образ нерукотвореныи Спаса Христа. егоже приим скоро избавиши от бед град и люди его. и показа ему место. Епископ же с радостию великою, рано светающи дни. отъят загражденое то заздание. и обрете пречистыи образ Христов нерукотвореныи. и светилник горящь. На съхраненая же положеная керемида другое подобие неизменно перваго воображения воображашеся. Оле чудо за колико лет светилнику тому неугасшу. и тому сокровищу неявленну бывшу. Епископ же взем пречистую икону, и ста над враты града и воздев руце горе. имыи в руку си честныи нерукотвореныи образ Христов. и яко от лица огня прогоними быша Перси. И тако пострадавше Перси посрамлени отидоша от града. инии изомроша, а инии избиени быша. Бе же божие хотение святому сему образу Господню, быти в славнем и богохранимем граде Константине. Обладая же тогда Роман благочестивыи царь греческою властию, посла 2 литр злата. и тму сребра. и 200 срачин муж нарочитых. к владущему едесским градом. дабы ему послал пречистую икону образ Господень. а мир мног даст ему. Получив всехотение. Царь посла в едесскии град по страшное то и чудное и достославное съкровище 100 епископов. а попов 2600 а диакон 40 (тысящь) а игуменов и черноризец и постник кто может изрещи число. И пришедше в едесскии град, и взяша пречистыи той образ нерукотвореныи Господень. со слезами молящеся. и с псалмы и песнми зовуще. О Владыко помилуй, и яко приближишася к земли гречестеи. и весть бысть к царю, и патриарху. яко близ уже идут со образом нерукотвореным. И изыде царь со всем болярством. и патриарх со всем клиросом. и весь народ бесчисленое множество. много мужей и жен. покрыша море корабли, со свещами и с фимиамом. И яко усретающе вопияху: слава тебе многомилостивый Владыко. изволивый приити к нам недостойным рабом своим. слава тебе щедрый Господи, нам грешным сподобивыи поклонитися пречистому образу твоему. слава Христе твоему изволению, яко твориши все на ползу, и на спасение роду человечу. И внидоша вси во град, носяще верху главы патриарх ковчег злат. в немже бе съкровище дражее всего мира. Народи же идуще вслед вопиаху: Господи помилуй. а друзии пояху песни различныя⁴²⁶. Христос приходяй явствено Бог наш. инии велегласно вопиаху, радуйся граде Константине. се царь и избавитель твои прииде, не на жребяти якоже прежде ко Иерусалиму. ныне же на пречистеи иконе. спасти ны хотя от прелести злых кумир. Мнози же недужнии без числа исцеление приаша, слепии прозреша. глусии слышаша. хромии быстрее серны рыскаху. немии проглаголаша. и вси иже в недузех сущии. и беснии исцеление приаша. Вси же вопиаху велиим гласом: приими, глаголюще, граде Константине славу и радость. и ты Романе царю багрянородне цартво свое утверди. И внидоша в церковь Премудрости Божиа, в 16 день августа. Се съкровище честное приахом. емуже царь и святитель и просто все множество с радостию поклоншеся, и целовавше положиша в раце златоковане. И оттоле торжество приаша праздновати пришествиа божественаго воображениа, богомужнаго зрака. Христа истиннаго Бога нашего, творяще празднуем славу ему воссылающе, со Отцем и с Святым Духом. ныне и присно и в веки веком, аминь.

Рече некто от первых церковник живописец сыи. о Владычнем нерукотворенем образе⁴²⁷, яко внегда хотяше Господь наш Иисус Христос приити на волную смерть. внегда человечьскую немощь показуя бяше. видим бываше моляся и подвизаяся. Внегда и потове его яко капля кровавы капляху. сиа и евангельское слово назнаменует. Таковое некто ему от ученик вземь убрус мал. и каплю пота его отре. и абие вообразися на немь, боговидимаго вочеловечениа образ. иже его Фоме предаде. И по вознесении Господа нашего на небеса. вдан бысть Фаддею на проповедание идущу, якоже Христос тому заповеда. Глаголют же того Фаддея, таковии писателие. яко таковое воображение, послану сущу ему и идущу на проповедание. на своемь челе того прилепив. имже изрядная чудодеиства съделовахуся. Притецаху убо вси и вероваху, в еже от него проповедаемого Христа Бога. и крещахуся повсюде. последующи неискусно и безмужно в славу Христа Бога нашего. ему же слава в веки аминь.

Господа наш Иисус Христос, праведный истинный Бог наш. иже существом божества невидим. иже крепостию непобедим. и силою неизглаголанный. естеством человеколюбец и благ. иже на подавание неумедлим. образ отечьски непременен. и прежде век невидимый, от Отца родивьшся. и напоследок днии, от матере Девы рождеися. и в Вифлеоме видимыи везде абие. в чистоте явлеися, сподобил есть своеа ради благодати. и неизреченным благоутробием. тамо же волхвы наставляя к шествию звездою. и везде младеньствующих смыслом. к свершеному разуму возводяй к себе. О неизреченному человеколюбию. о неизреченному владычьству. о несказанному незлобию. о неисповедимому дарованию. оле непостижимым таинством. Поистине и преславна вещь страшна. яко в нас ... воображением невещественым бывает зижитель. тамо от Девы новый Адам явлься порождением. днесь сам телесным воображением везде кланяем быти сподобися. О чудеси великому чуду, паки к рабом восхождение Владычне. Приидете убо братие и отци слышите и повем вам всем боящимся Господа. елика быша в Камулианех, новый Вифлеом показася. и яже о честнеи онои блаженнеи нареченнеи Акилине. повесть посреде положу, аз смиреныи Григорие, и Духом святитель. явльшаяся мне недостойному. Сиа блаженная еллина сущи. и супруга имущи некоего Калама, и того еллина суща. и месту началника. неистовство и гнев на христианы имея. по повелению Диоклитиана царя. Сиа озарившися божественою благодатию, искавши время отступити от мужа, и службы его и веры. тщащися к единому Жизнодателю Владыце и Царю, надежду и разум имети отаи. страха ради безаконного мужа. моляше выну Господа еже приати святое крещение. всенощными стоании тщашеся повсегда. в постех и молитвах, всякую чистоту душевную и телесную в себе имущи. и чистому предстоящи, яже сподобльшися откровениа Святаго Духа восприати. Молящужеся еи Господу нашему Иисусу Христу со слезами и съкрушеным сердцем. иже волю его боящихся Бог творяи. услышав моление ея. расмотрив веру ея и рече. Понеже человеческаго ради спасениа снидох с небесе. и воплотився от Духа Святаго. и родивыися от святыя Девы Мариа. и ныне прииду к тебе слезам твоим внях. Уготови убо трапезу чисту. и положи на неи плат бел чист. и сосуд некоснут прозрачен с водою. И уготови таковая в клети своей украсивши, и повергши себе на землю извон легала своего. И покрыет тя десница моа. и имам явитися тебе якоже хощу. И сотвори тако блаженная Акилина. якоже повеле еи божественыи глас. И сниде к неи Владыка Христос. Оле странному и страшному таинству. И повсегда и выну проходяи, и никогда же презирая уповающих нань, и вопиющих к нему и того любящих. и дивному схождению, и неизреченному вочеловечению. Снидоша же с нимь и вся силы небесные. к пятой стражи нощнеи. поюще и глаголюще победную песнь. Свят свят свят Господь Саваоф иже к волнеи идыи смерти, и омыи нозе учеником, и лентием отрыи имже бе препоясан. Той ныне рукама омывся, отер чистым убрусом. пречистое свое и неизреченное лице. и образ абие вообразися въчеловечениа Бога. воображениа его всесвятое и истинное воображение, иже всем днесь показася. И якоже и первее своимь человеколюбием исхождением показа свое въчеловечение. тако и ныне показася таковеи честнеи и благочестивеи жене Акилине. Тем тако сицевем управлением. благодарьствивши же на Господа. и благодарьствию съвершену бывшу. положи таковое воображение, съзади в едином угле клетеи своих скутавши. и боящися мужа своего. Увидевши же свое преставление. неизреченное уготование сотворши святому таковому. и нерукотвореному образу. и яже о нем написавши и писание с ним положивши. и затвердивши негде затвори. По ошествии ея от житиа открыся мне недостойному Григорию Духом Святым. в Кумулианех во обителищи ея. И пришед в показанное мне место, и покопа во угле обретох раку. в неиже лежаше святое воображение отечьскаго обсияниа. и свещу светящую, яже бяше от блаженныя жены вожжена. многыми леты и непомнимыми. Оле чудеси, и кадило благоуханием кадилным дымяся. Се первое и великое чудо своима очима видех аз меншии епископ. И тако явленное всем показах. иже и в кесариистеи митрополии изволих положити его. Имже и многыя целбы събышася, елика и на земли въчеловечениа его. слепых и хромых, и бедных, и разслабленых внезапу исцелевшим. яко да исполнение благодати, и дар Святаго Духа явлено будет. занеже сам въчеловечивыйся Слово безначалнаго Отца, живет и крепится и пребывает. и царствуеть в веки. веком. Сиа быша в Камулианех, в царство Диоклитианово. съкровену бывшу святому и пречистому и нерукотвореному образу. При Феодосии же велицем цари явльшися. и чудодеиствующи в славу единороднаго Сына Бога и Отца. яко тому подобает слава ныне и присно и в веки веком, аминь.

(Из Сборника XVI–XVII в., № 811)

Подобаше о том мало побеседовати о самой благодати Бога Спаса нашего Иисуса Христа. многа чудеса благолепне сотворивша ихже человечь ум не достигнет. Слыша о том Авгарь Едескии князь. иже бе от диаволя проказы разслаблен. томим бе от неприязни 6 лет лежаше. иже своими видети очима самого Содетеля и немогыи. посла написание молебно к Богу. и Ананию иконнаго писца посла. заповедав ему скоро ити в Иерусалим. видети назарянина Иисуса, и написати образ лица его на убрусе. Идущу же ему во град. срете и Господь во образе человечи. дав ему написание Авгарево. в немже се. Слышах о тобе Господи. яко ты многы твориши цельбы. Слепым свет даеши. хромым хожение. глухым слышание. прокаженыа оцещаеши. и долгомучимыа болезньми исцеляеши. и кровоточивую прикосновением риз исцелил еси. и мертвыя воскрешаеши. Си о тобе слышах размыслих. яко ты еси Бог един сшедыи с небеси. Того ради молю тя и мил ся дею. да ми исцелиши лютую болезнь сию. Противу писанию Господь рече. блажен ты Авгарю. яко не видев мя верова. се уже ти здравие уготовися. И отиде Господь учаше народы. И нудяшеся Ананиа вапы Христов образ божественыи писати. но никакоже можаше по божеству образ написати овогда бо млад. овогда стар. и в наусьи являшеся. Тайновидец же возгласив рече. дай же ми семо Анание. юже носиши плащаницу. И приим воду испроси. и умыв пречистое свое и божественое лице водою. и убрусом отре. Оле чудо. Простая вода на вапное естество преложися. И сбежа и составы имуще на убрусе вообразися Христос. якоже всем дивитися во зборе ту сущим. И дасть ю Фадею апостолу рек. иди с Ананиею во Едес град. идеже Авгарь на одре 6 лет в недузе лежа. И яко идоста Ананиа и Фадеи. и беста у града Ярополя⁴²⁸. и убоястася с собою нести во град образа Господня. скрыста в камене месте вне града. и яко нощь бысть ту оба при стене града спяста идеже бе Господень образ. И показася огнен столп с небеси стоя. идеже Господень образ скровен. И се градныи виде страж. возопи велегласно. Фадеи же и Ананиа воспрянувши в той час. вземша Господень образ. в путь поидоста скоро. Народи же изидоша на место идеже стояше огненыи столп. и от страха ниц падоша вси. И по часе возревше очима. на керемиде виде Господень образ. иже ся вообрази. и с радостию окопаша керемиду с образом. и понесоста в град. И вси слепии и хромии и беснии. прокажении. прикасающеся исцелеваху. И бысть радость им велика. Фаддеи же и Ананиа. яко близ быста Едеского града. то хромец некий возопии. Господень апостоле помилуи мя. Фаддеи же приложи ему Господень образ. и востав хромыи скоро в град тече здрав. И чудишася людие вси. Поведаша о нем Авгарю царю. Призвав царь въпрашаше. како еси исцелел. Он же все исповеда. како ему исцеление случилося. Авгарь же мнев яко Христос идет. и посла многи отроки в сретение его. Исшедше отроцы. видеша апостола Фаддеа идуща. образ несуща Господень и с ним Ананиа иконник. И внидоша в град Фаддеи и Ананиа со образом Господним. И мнози беснии и слепии. хромии и недужнии. прикасающеся образе Господни. исцелишася в том часе. И вси в граде том сущии. веселящеся и ликующе прославиша Бога о преславных чудесех. Вниде же апостол Фаддеи со Господним образом и с ним Ананиа в полаты царя Авгаря. идеже болен и разслаблен лежаше 6 лет. И прият бысть славне и положи на Авгаре образ Господень и в той час исцели. И востав здрав и хожаше радуяся. И рече к Фаддееви. что ми подобает творити да спасуся. И рече к нему апостол. крестися и веруи Господеви Богу. да небесное царство получиши. а не токмо иже зде. И сотворив молитву и огласив крести и жену и чада и вся яже в дому его. во имя Отца и Сына и Святаго Духа. И много о пользе учаше я. И крепце Авгарь ятся вере. Отоле же умысли Авгарь да быша в чести имели образ нерукотворен и Христов. Пред враты града. еллиньскии стояше кумир разори. и нерукотворенныи образ божественыи. в того место въобразив Христа Бога. И повеление заповедався. кому или входящу или исходящу первие поклонитися образу. ти тако или во град или из града изити написав сиа: Христе Боже надеяся на тя не погибнет никогда. Потом же времяни многу минувшу некто идолослужитель прият града того область. и божественый образ иконы раздрушити умысли. а идола в того место поставити. Епископ же уведав злую мысль. в каменнеи же стене место иконе устрои. ту постави ю. а светильник пред нею вжег. и керемидою заложи плитами. и извистию изъвну изровна стену. дабы невидимо неверным был образ Господень нерукотвореныи. И остася нечестивыи начинаниа злаго и неведомо на долзе бысть божественое сокровище. Приидоша же от Персиды. и град хотяще Едесскии взяти. В отчаянии же быша гражане рати деля. и к Богу прочее приидоша молящеся ему. Во едину же нощь епископу града того Иулию. мольбы к Богу всылающу о прилучившеися беде. явися ему жена добролепна глаголющи. верху сего града врат. скровен божественыи Спаса Христа образ нерукотворенныи. приим его вся добре зделаеши. Утром же показанное ему место постиг. и окопав. Обрете же божественую икону небрежену. и светилник за толико время не угасаше. О чудо страшно преславнаго образа. Подобие неизменно бысть первого воображениа. Видению последуя епископ же с честию с любовию оттуду взят. и хожаше с верными по забралам града. держа божественую икону. И яко от лица Господня. прогоними беяху ратнии. и еже ся надеяху не получивше. осрамлени отидоша. Волею же Божиею в Царский град вся отвсюде съвокупляхуся. добрейшая яве убо бысть Божие хотение. и святому сему пречистому образу со инеми добрыми быти. Бе греческою областию. тогда обладаа Роман. иже двеи тме собрав нарочитых вои. и тысящу срачин послав во Едесьскии град. взяти образ божественыи. Они же неволею и нужею даша. не смеюще противитися. Воини же ко гречестей земли с радостию приближишася. И уведавше епископ. с честию восприимше образ. с ним к Царскому идяше граду. И много бяху чудотворениа образа святаго. Всяки бо от человек страсти отбегаху. и беси прогоними устрашахуся. И принесоша в Царьград честныи образ. месяца августа в 16 день. на память святаго мученика Деомида. его же патриарх и царь и епископи. и гражане вси с радостию сретоша. со свещами и с темьяном. И верно поклоншеся и целовавше радостно приаша. и в великую внесше в церковь. над олтарем поставиша честне и благолепне. И мнози недужнии исцеливают. и беси отгоняются образом Христа Бога нашего. И оттоле честно празднество творим принесению. божественаго въображениа. во славу Христу Богу нашему. ему же слава с Отцем и с Святым Духом ныне и присно и в веки веком. аминь.

Посла Авгарь царь Луку скорописца. и гораздаго иконам писати. заповеда ему скоро идти в Иерусалим. видети Иисуса. и написати образ лица его на убрусе. И приспевшу ему в Иерусалим. и срете и Иисус во вратех града во образе человека. И рече ему: О человече, что так скоро идеши. Он же рече: Послан есмь от Авгара царя. видети Иисуса Назарянина. и написати образ лица его на убрусе. И рече ему Иисус: Иди заутра. обрящеши его в соборе. Абие же виде Лука учаща Иисуса народы в церкви. И пришед пред врата церковнаа. писаше образ лица Иисусова. И не домыслящуся ему. како бы написал образ Иисусов. видев же его Иисус возва от събора. И рече ему: Луко Авгаров, вниди и дай же убрус, иже носиши от Авгара. И въшед дасть ему. Иисус же взем убрус и положи на лици своем. и въобразися образ лица его на убрусе. яко дивитися всем седящим в соборе. и дасть апостолу Фаддею. Апостол иде в Едес град с Лукою. идеже лежаше Авгарь царь на одре 6 лет. Идущима же има, Фаддею и Луке, и несущима образ. и достигоста град нарицаемыи Ераполос. И убоястася не внидоста во град. и несоста вне града. и скрыста образ Господень межи двема кремидома⁴²⁹. И показася столп огнен с небесе. идеже лежаше сокровен образ Господень. Видевше же градные стражи таковое чудо. возописта гласом велиим. Фаддеи же в той час взем образ Господень иде в путь свои. Изыдоша же народи градстии. на место то, идеже стояше столп огненыи и убояшася падоша ниц. И видевше яко въбразился бяше образ Господень в един от камык⁴³⁰ и вземше камень со образом Господним. понесоша в град. Несущим же им ко вратом градным внезапу сретаху слепии и хромии и прокаженнии. вопиюще гласом велиим. Иисусе Назарянине помилуи ны. и прикасахуся образу Господню исцелеваху. Видевше же народи градстии таковое чудо прославиша Бога. Фаддееви же скоро идущу с посолником царевым. и не дошедшим града Едеска за версту. обретоша некоего хромца ползающа на том месте. И видев хромыи апостола Господня. носящи образ Господень. и возопи к ним. апостоле Господень помилуи мя. И прикоснуся ему апостол образом Господним. Внезапу поиде хромыи. и втече в град к матери своей. и видим бысть от всех гражан. И дивишася о бывшем. и глаголаху не сеи ли есть оная вдовицы сын ползая на колену. И друзии глаголаху тыи есть. инии глаголаху подобен ему есть. И возвестиша о нем Авгарю царю. И взем царь отрока рече ему. како еси исцелел. Отрок же рече ему яко седящу ми за версту града. просящу милостыни. и некто прикоснуся мне образом на убрусе. и востах здрав. якоже мя видиши. Авгарь же мня. яко Господь есть. и посла скоро отроки своя в сретение. И шедше сретоша апостола носяща образ Господень. И приспевшу ему к Авгарю царю. идеже лежаше 6 лет разслаблен. и положи апостол убрус на немже с образом Господним. Абие воста царь здрав и хожаше. И рече ему Фаддеи апостол. крестися. и дасть ему молитву и жене его крести и и укрепи их. Авгарь же целовав образ Господень. посла ко Иисусови с молением. Слышано бысть о тебе Господи. и о твоих цельбах бывающих тобою. яко ты без волхвовании. и без зелиа даеши исцелениа гласом единем: хромым ходити. глухим слышати. прокаженные очищаеши. нечистыя духи словом отгонити. и долгомучимыя болезни целиши. кровоточивую прикоснувшуся ризам твоим исцелил еси. и мертвыа воскресил еси. мене же лежащаго 6 лет на одре разслаблена образом твоего лица возставил еси. Та вся слышав о тебе Господи. и разумех в сердце своем. яко ты еси от двою един. или ты еси Бог един сшедыи с небеси. или Сын Божий еси. Творяй тако. Того ради молю ти ся Господи и мил ти ся дею приити до мене не отрецися. да и недостаточнаа моя исправиши. Ибо и се слышах Господи. яко жидове ропщут на тебе. и хотят тя убити. Есть же у мене град мал Едес. честь с кротостию тебе прияти. И той довлеет нам Господи повелевшему мя исцелити.

Блажен еси Авгарю. и град твои Едес. Блажен есть яко и не видев мя верова. Здравие же уготовися тебе. А еже восписал еси приити к тебе. ведаа буди. яко послан есть исполнити все. и послании (?) вознестимися на небеса. к пославшему мя отцу. Послал же есми единаго от ученик моих именем Фаддея апостола. да недуг. иже имаши. исцелит ти. и животныи мир даст ти. и сотворит град твои доволен. яко не возмощи возрети сопостатом до скончаниа мира. Достойно ти есть ведати от нихже ти есмь послан. От пославшаго мя Отца. да преступное изгнание. иже в раи. потреблю. Сам ся смирих. да вы избавлю от преступлениа. заушен буду. да вы свобожу. оцта и желчи напоен буду. да вы напою чаши безъсмертиа. тернов венец понесу. да вы разрешу клятвы. на крест взыду. да вы на небеса вознесу. Запечатлев же Христос Бог наш послание се. седмию печатьми. яже положены во образе суть сице. и сице. .ф. т. х. е. у. р. д. Сказание седми печатеи. в трех лицех Бог знаем есмь. нареченыи от двою един. .ф. протолкуется. яко волею на кресте распятся. .т. протолкуется. несть яко всяк человек. но человек. .х. протолкуется. яко волею почиваа на херувимех. .е. протолкуется. аз Бог первыи развее мене несть иного. .у. протолкуется. царь и Бог богом. .р. протолкуется. избавитель роду человечу. .д. протолкуется. во всех пребываа в веки. Аминь.

Месяца августа 16 Костантина Багрянороднаго. о Христе царя греческаго. повесть от различных събрана историй. о посланнем к Авгару. нерукотворенном. и божественом образе. Христа Бога нашего. и како от Едеса принесеся. к всеблагоденьствующему сему и цартвующему. и в градех Константину граду.

(Из Сборн. XVI-XVII вв., № 811)⁴³¹

Не убо един сам непостижим бе, соприсносущныи Отцу Бог Слово. но и множаишая убо, или и вся дела его, тем же непостижениа мраком съкрываются. не елико токмо мир сей содеваа состави. но и елика во еже по смотрению восприати и нашего смешениа, с нами пожив, первою и единою оною божества своего действовааше силою. Подобает всяко себе познавающу, и яже выше себе не ведети знающу, не в чрезмернаа хвалитися. ниже точно и грубно обноситися, и или вся ведети любопретися. или ниже быти, яже сам не достиже. Убо о образе богомужнаго его зрака. иже не написанне, въобразися преестественым творящаго хотением, во приемшем убрусе. и тогда убо Авгарю послася ко исцелению. ныне же от Едеса к царствующему сему граду, смотрением всяко божиим, во спасение сему и съблюдение принесеся. да яко ни единым от благых лишен зрится, ему же лепо во всех всеми владети. мню подобает благочестивному и праведному слышателю и зрителю. историю убо яже о всех прилежно навыкнути взыскати. и древних словес хотети и непреложен разум прияти. Вину же. еже како от влаги мокренныя, без шаров и художества писателного лица видно образися волнячом тканий. и како съставленое от вещи, сине удобътающейся, временем растлениа не прият. и елика инаа иже естествене убо испытуяи вещей, обыче многопытне изысковати непостижимей Божий премудрии силе уступати. ведыи яко аще кто потщится разумом опасне объяти, и во всяческом неразумии поползъся, и в бездну непостижениа пад, беду приимет. о нужнеиших, отщетився большими. даже не явится малыми слагается. Елицы убо о вере правии. и теплейшии в ревности, зде снидостеся. приидете услышите, и повем вам. елико подобающим искушением, всяческаа прилежне испытав. и не без труда о взыскании истинны устроився. И от списавших историй, и оттуду к нам пришедших яже аки в тайнах памятию у них съблюдатися глаголаху. прилежне испытовати не возмогох. Господу Богу и Спасу нашему, к нам пришедшу. бе по пророческому гласу множества мира на земли. и многоначалие расточися. яки единым поясом римским началством всеи опоясане вселеннеи. и под единем учители и повелителем. И сего ради всяческаа всех и к всем примешение, безстрашне бываху. и неразделне человеци землю обитати видяхуся. Но аки единого Владыки стяжание сущу. и аки единого Съдетеля сущую всю. первому выю, раболепне подклонивше, друг к другу мир имеяху. Темже и иже в Едесе тогда властель Авгарь, во Египте началствующему, друг и знаем бе. и ко обоим их слуге преходити. Онюду же во время оно, в неже Господь наш и Бог, Отчую волю исполняя. спасителное учение человеком предлагаше. и преестествеными и предивными чудесы, во еже в него веру человеки обращаше. случися некоему от слуг авгарих, Ананием именуемому. к Египту сквозе Палестину идущу, издалеча видети Христа. множства человеческая, словесы от льсти отвлачаща. и чудеса предивнаа совершающа. Якоже убо шествие. еже к Египту сконча. и о нихже повелеся ему. исправив, возвращашеся. Ельма же господина своего и недугом костоломным, многовременным томима ведяаше. и черною проказою изнуряема. и сугубу беду, наипаче же мног и сугуб недуг имущаго от нихже и болезньми яже от состав содержаашеся. и проказы злыми страдавше. Беаше же к тем, и безобразиа студ. егоже ради ниже видим человеком бе. но ниже на одре лежа множае пребывааше. по и от приходящих другов к посещению от срама сокрываашеся. Сего ради паки возвращаяся, прилежнейшее о тех же разумети потщася. да яко имеет тверде возвестити господину своему. да же и той врачеванию его сподобится. Обрете убо паки Господа в тех же. мертвые возставляюща. слепым зрение дарующа. хромые целы показующа. и всем коим ни буди недугом болезнующих, оздравляюща. Ельма же убо известися. и разуме сия яве от Господа совершаема. Авгарю возвратився сказа. и множаишими яже виде, и яже слыша извести. Онюду же аки больше дела, поделие исправив. и аки благовести ему благых вестник, подобающей хвале сподобися. и от доброхотнейших ему един познавашеся. Понеже боляй аки приобретение всегда творит обещание повести. и упованию ласкающу человека, тщателне на ловитву возвещенную увещавает устремлятися. темже и Авгаря еже писанием призывати возстави глаголемаго мощи таковая врачевати. И абие обносимую всюду епистолию, ко Господу написа, сице имеющу. Авгарь местоначальник едескии. Иисусу Спасу явльшемуся благому врачу в граде Иерусалимстем, радоватися. Слышано ми есть о тебе, и о твоих исцелениих. яко кроме врачеваний и былей от тебе бываемых. якоже слово есть. слепые прозрети твориши. хромые ходити. прокаженные очищаеши. и нечистыя духи и бесы изгоняеши. и долгими недуговании мучимыя врачуеши. и мертвые возставляеши. И сия вся услышав о тебе, во уме положих единое от обою. или яко ты еси Бог. и сошед с небесе твориши сия. или яко Сын Божий еси, творяи сия. Сего ради убо писав помолих тя, потрудитися и приити ко мне. и страсть юже имею врачевати. ибо слышах яко Иудеи ропщут на тя, и хотят озлобити тя. Град же малейший мне есть, и честен. иже удовлеет обоим нам, еже обитати с миром в нем. Елма же убо Ананиа, благоумиа еже к господину своему явствено подааше знамение. и пути беаше искусен. и писателное художество ведяше. сим сицевое послание к Иисусу посла. повелев ему, яко аще не возможет увещати посланием, к нему прити Христа то подобие зрака его написав прилежне, принести к нему. да поне аки все научатся, не слухом токмо но и зрением. каков есть великих чудес содетель. Иудею убо достиг посланный. обрете Христа на яснине⁴³², ко стекшимся людем беседующа. и действующа чудеса предивнаа. Множества же народа сошедшихся, потребы некиа ради. не могии Ананиа приближитися к Иисусу. на некии камень, мало выше земля стоящ, и недалече от Господского пребывания, восшед седе. И якоже бе ему явствен Спас, множества отлучаяся и выше многих стоя, абие к оному убо очеса, к бумазе же руку прилагаше. и являемаго написоваше подобие. Позна убо сия духом Иисус, и Фому призвав. иди рече ко оному месту. и седящаго на камени человека и мой образ написующа, приведи ко мне приносяща и юже от дому прииде имеа епистолию. даже и пославшаго его исполнит повеление. Отшед убо Фома и Ананию позвав, от яже слыша обрести деюща, приведе к Иисусу. И преже еже приати епистолию от него, рече ему Христос и вину пришествия еже к нему, и силу епистолиа. Таже прием ю и прочет. другую епистолию к Авгарю приложи. речением сице имеющуюся. Блажен еси Авгаре, веровав в мене, не видев мя. писано бо есть о мне. видевших мя не веровати в мене и даже невидевшеи мене, тии веруют, и живи будут. А о немже писал ми еси, приити к тебе. нужда ми вся. ихже ради послахся, зде исполнити. и по исполнении сих, вознестися к пославшему мя Отцу. И егда вознесуся, послю к тебе единого от ученик моих. иже страсть твою исцелит, и жизнь вечную и мир подаст тебе, и сущим с тобою. и сотворит граду твоему удоволное, ко еже ни единому от врагов одолети его. Подав убо Анании сицевую епистолию Христос. понеже и о еже другое повеление господина своего. в конец ввести позна пекущася его, и умышляюща. сиречь, образа его подобие к оному отнести. Умыв водою лице Спас. таже мокроту, яже от воды, в даном ему убрусе оттер. вообразитися своему образу в нем устрои, чудне и выше слова. И сего Анании подав, Авгарю отдатися повеле. да яко желаниа утешение и недуга имеет. Ельма же убо возвращаяся с сими Ананиа, в град Иерапольский достиже. иже саракиньском убо гласом, Мемвых глаголется. сирским же Мавук. вне сицеваго града став. грамаде черепиц соделанных тамо лежащей. ту священного оного убруса Ананиа сокры. От полунощи же огнь явися мног, таковое место окружая. яко внутрь града сущим мнетися, окрестнаа огнем попалятися. и отнюду же и о себе уже убоявшеся изыти. и испытовати о зримом пламени. Тамо же Ананию обретше, обдержаша. аки содетеля дерзнутаго. и испытоваху о вещи. и кто убо будет он, и камо грядет, и откуду идет вопрошааху. Якоже убо о неподобном повиновении, Ананиа недоумеяшеся. обаче откуду есть, и откуду идет и что носит, изъяви. И якоже положи носимое в черепицах показа. отнюдуже мняшеся и пламени воспалятися. Абие же они глаголемых разумети хотевше истинну, и место испытавше. обретоша не токмо положеныи тамо Ананиею, но и близлежащей единой черепице, другыи образ божественаго подобиа, предивне, и паче ума в скудели от убруса ненаписанаго образа преписанныи. Еже и видевшеи. и чудеси вкупе и ужаса бывше исполнени. и сего ради, и за еже нигдеже огню обрестися горящу. но от сианиа еже в образе, мнетися пламени испущатися. черепицу убо восприемшую в себе божественое подобие, удержаша у себе. аки некий сосуд священныи, и многоценное сокровище. От виденаго еже в нем разумевше божественое деяние. первообразныи же и его служителя, убоявшеся удержати, послаша ко Авгарю. И ныне есть соблюдаем и почитаем, от жителеи сицеваго града, иже в черепице образ зрака ненаписанныи, и нерукотворенныи. Анания же предложенное ему шествие скончав, господину своему случшаяся на пути изъяви. отдав и яже носяше спасителнаа образованиа. И сие убо есть, еже от множаиших глаголемое слово, о ненаписанном в убрусе сем зраце Спаса нашего. Глаголетьжеся и ино некое о сем слово, еже ниже вне веры есть. сведетелеи добрых оскудевает. Тем же и сие изложу. даже не возмнит кто, за еже неведети ми того утверьжати другаго. И всяко ничтоже дивно, в толицем времени скитатися многажды истории. О истиннеи бо вещи, подобно вси соглашают, и исповедают. от Господскаго лица зрака иже в убрусе, предивне образоватися. О некоем же сущих в вещи, сиречь, о времени различествуют. еже ничтоже истинну поврежает. аще преже, аще последи бысть. Иматьже ся сице и слово другое. Внегда хотяше, глаголют, Христос к волнеи страсти итти. егда человеческую немощь показуа, бояся зряшеся и моляшеся. егда и потов своих, аки капля капати крови евангельское слово показует. тогда глаголют от некоего ученика приим, ныне зримую сию частьцу тканиа. потов каплеи в него отерти. И абие воображено бывше, зримое сие боговидного оного зрака образование. еже Фоме предав по вознесении своем еже на небеса, Фаддеем к Авгарю послати повеле. обещание еже посланми исполняя. По еже убо вознестися Господу нашему Иисусу Христу на небеса, дав Фома Фаддею нерукотворенныи Господьскаго лица зрак, ко Авгарю посла. Достиг убо Фаддеи Едеса, пребысть первие у некоего от сущих тамо иудей. Товием сеи именовася. И убо преже словес делы хотя себе показати Авгарю Христов ученик. немощныя яже во граде, призыванием единым Христовым исцели. Онюду же скоро слуху раздавшуся, еже о сицевых случатися обыче. предивныя бо вещи многих имеют вещающих, яже о них. достиже к Авгарю некоим от своих вельмож. Авдом нарицаемом, иже о пришестви апостола Христова слух. Помыслив убо абие от живущиа в нем надежи, сему оному быти, еже к нему послати Иисусу посланием обеща. и от него совершеннейше яже о Фаддее разумев, ввести его к себе повелев. Товиа убо пришед сказа сия апостолу. и тои в силе к нему послана себе бывша глаголав. Таже к Авгарю поиде. Внегда же хотяше пред лицем ему явитися, на свое чело яки воздвиг сицевое подобие, тако вниде к Авгарю. Авгарь же издалеча его приступающа видев, выше видения свет сияющ от лица его мняше зрети. его же належаще испущааше подобие. Онюду же премножеством блистающия зари ужасеся и аки в забвении быв своих недугований, и многовременнаго разслабления удов. от одра абие возскочи, и к сретению разслабленыа уды тещи понуждаше. ту же страсть пострадав, иным образом. возшедшим на гору Фаворьскую, егда блиставшаго зрака виде. Приим убо от апостола сицевое подобие. и с честию главу тем обложив, и очи, и устне. и ниже прочая телесныя части лишив таковаго приложениа. позна абие вся уды дивне оздравляемы, и еже на лучшее приложение приемлюща. и проказу очищаему и бежащу. аще и еще на челе останок ея некий мал остася. Научився убо истинны слову, тогда яснеише от апостола. и о предивных Христовых чудесех и божественых страстех. и погребении и от мертвых воскресении. и на небеса вознесении. и исповедав истиннаго Бога Христа. о еже во убрусе образовании зрака вопрошаше. И понеже прилежнеише разсмотряше, познаваше его не шары веществеными състояние имеющаго, и сущею в нем ужасашеся силою. еюже предивне воста от одра, и сочеташеся здравым. К сим же Фаддеи, время боязни сказоваше. и еже от потов безшаровное образование. и иже к нему пришествия Господне повеление. и прочаа елика предваривши историа сказа. Ельма же убо от сих и от еже во имя Иисус Христа наложением рук Фаддеевых, скорбнаа уступаху. и разслабленая, аки укрепляхуся. и безобразие разсточашеся. и вся (ко) здравию востицаху. Ужасом иже отвсюду, Авгарь съдержим. воистинну рече, истинен сии ученик Иисуса Сына Божия. иже кроме врачевании былеи врачующаго. И аз толико любовию яже о нем и верою связахся, яко аще не бых убоялся преимущиа римскиа силы, иже сущим под ними возбраняют друг на друга вооружатися. воистинну на распенших Господа иудеов. оружиа воздвигл бых. и попленил бых их. Ныне же елма и страсть его разумех вольную. известихся, яко никакоже, не восхотевша его, превозмогли бы неблагодарнии. тем же и ничтоже болше испытую. молю же и божественому крещению сподобитися. и со всем домом присвоитися и возложитися Владыце Христу. Многа убо преже соверши чудеса Господень апостол. и всех от недугов их исцелив. в нихже бе и первый слух иже о нем Авгарю сказав. его же тогда болезненаго недуга свободи. Таже приведе к божественеи купели Авгаря. и узаконенаа о нем совершив. крестив его, и жену и чада, и вся сущия в дому его. изыде от божественаго сего очищениа воднаго, чист весь и здрав. исчезнувшу абие оставшему малому останку проказы на челе его. Отнюду же всею силою чествуа и почитаа, сицевое подобие Господьскаго зрака. и сие к прочим приложу. Местоначалник от древних едесских гражан и жителей, кумир некоего от знаменитых еллинских богов, пред народными враты градскими воздвижен бе. емуже нужно бе преже поклонитися. и узаконеныя некия молитвы воздати всякому внутрь града быти хотящу. и сице входити во градскиа пути и улицы. Сего убо тогда Авгарь низложив, и исчезновению предав. вместо стояниа его, воздвиже нерукотворенныи сей образ Господа нашего Иисус Христа, на досце прилепив. и являемым и доныне златом украсив. написав злате сия глаголы. Христе Боже уповаяй на тя не погрешает. И повеле всякому, онеми враты проходити хотящему, вместо древняго оного кумира неключимаго и неполезнаго. подобающее чествование и должное поклонение и честь воздавати, многочудному и чудотворному Христову образу. и сице во град Едескии входити. И соблюдеся сицевое мужа благочестие, аки предначертание и возложение, во все пребывание житиа самого Авгаря и сына его. иже царствию и благочестию отчу бысть наследник. Но сих сын и внук. отчу убо и дедню начальству наследник бысть, а не и благочестию последователь. но отлагатель, тако рещи благочестиа. и к бесом и идолом прибеже. Темже и аки воздаяние бесом воздавая, восхоте понеже дед его идольскаго оного кумира изчезновению предаде. тожде осуждение и Господьскому образу наложити. Но не получи навета льстивый. Епископ бо места сие предуведев, возможное сотвори промышление. И понеже место в немже стояше икона, полукружен образ имеяше. кандило пред иконою возжег, и черепицу приложив. таже от внеуду известию и плинфы ожжеными загради в оставшее. в равное явление стену управи. И сицево еже не зретися завидимому образу, отступи начинаниа он нечестивыи. Черепицу же сего ради мню пред иконою положитися от иереа повелено бысть. да яко ниединому согнитию, от зданиа и извести, мокроты быти во обдержащем убрусе ткании. да не вред иже от времени приимет. Протече убо время посреде много. и от человеческиа памяти отиде и воздвижение священнаго оного образа и сокрытие. Якоже убо в своя времена, Хозрои Перскии царь, асийския грады пленяя, и к Едесу достиже. И окрест его острог водрузив, всякое ухищрение подвизаше. и всяческим к пленению градскому приклад носих арган и сосуд уготовляшеся и ухищряхуся. вся яже ко испущением стрел, и разорением стен, и ломлением врат. О толице убо беде едесстии бывше жители. умышляаху убо и тии возможная к противоополчению. и моление послаша о пособии, к царем греческим. И убо он иже тогда предстояи в греческиих воинствех, и сам от ратных стесняем. сущим во Едесе пособие послати немощен бе. посланми же утвержааше. воспоминая им Господьскаго послания и неложнаго в нем обещания. его же ради непленену соблюдатися граду. и глаголется и веруется. Персяне же с явственым падением наветующе, не явствене умышляаху. Егда же беша аки подводнии нырцы под землею, внутрь града от таковыа вины явлен бысть гражаном навет. Случися в той стране внутрь града кузнецу обитати. егоже висящая в дому сосуди медные шум испущаху. персяном под землею стучащим, и землю износящим. В недоумении убо и последнем отчаянии гражане бывше, к Богу прибегают. в с болезнию сердечною и со слезами того помощь призывают. Является убо в нощи епископу, Евлалии же сей бе. жена некаа добре украшена и честна. выше, неже по человеку. советующе ему. нерукотворенныи образ Христов прияти и молебное обхожение с ним творити. и всяко покажет Господь чудеса своя. Епископ же отнюд неведети глаголаше. аще есть всяко или у них, или у иных неких, сицевыи образ. Тогда глаголет к нему явльшаяся в женском образе. яко верху врат градских, во оном месте, сицевым чином таковыи образ крыется. Во утрии убо епископ, на истинное видение уповая, с молением на место пришед. и взыскав обрете божественыи сеи образ невредим. и кандило в толицех летех не угасше. и в черепице приложенои на соблюдение кандила, въображено другое подобие образа. еже и до ныне во Едесе соблюдаемо есть. Приим убо в руце божественое сие Христа Бога образование. и лучшиа надежи быв. прииде на то место, под нимже персяне копающе, от шума медных сосуд познаваеми быша. И наченьшим гражданом внутрьуду копати. егда друг ко другу близ быша, от кандила оного масла полиавше на иже от ратных уготовленыи на них огнь. и противу персян в таиник спустивше, всех погубиша. И сице от такового навета избавльшеся, противу ухищрений яже вне стены, подобное искуство приведоша. И сия абие пожгоша. и многых в них ратных истребиша. И сице много на них дерзновение приемше. испущениа каменнаа часто от стен творяху. от нихже и воеводе ратного воинства случися пасти. и иным многим с ним. Не токмо же. но и огнь иже от внеуду персяне воспалиша противу едеских. егоже бесчислена вещь маслин и иных многых сеченых древес воспиташе. противу персян быти поборающаго божественаго образа сотвори сила. Якоже бо свыше стен, Евлалии своими дланьми простер его, град обхождаше. абие яко на месте оном бысть, силен ветр воздвигся, и на воспаляющих таковый огнь пламень обрати. и гоняше их, и попаляше якоже халдеов древле. И сия не без сведетелства. слава есть. в сладость слуху или прелщение умышлена. Но три вкупе патриарси. Иов Александрьскии. Христофор Антиохийскии. и Василей Иерусалимский списаша. И сице ся имети сим показаша. к Феофилу пишуще царю, священным иконам досадившеу. егда различными словесы показующе божественых икон священное и честное, о сем списаша. И леть есть хотящему многострочную оную епистолию прочести, и о сем известитися. Но и Евагриа церковную историю, аще кто трудолюбне прочитал. позна всяко, како о священем сем образе, в четвертом слове глаголет. Пишет бо. яко с прочими Хозрои и сие сотворил есть. хотя яве обличити ложно слово, глаголемое от християн о сем граде, яко непленуем есть. Древес бо велие собрание, и множество бесчислено вскоре повелению многоручием войственым собрав. и сия окрест града две стены водрузив. таже землю посреде их сыпав. и противоличну ону стену созидаа, высочайше бываше едеских стен. и яко свыше стрелы на поборающих о граде скоро пущатися имеющих еже едести аки гору противу стен видяще воздвизаемо. имже аки от равнаго места, ратных лести во град чаяху. Аще и в недоумении суще, обаче и они противу ухищряюще возможная. и ров начинаху, пред новоставленою стеною копати. да яко аще возмогут попалити яже преже острогом от града, в ров же землю опроврещи. и сице велиа стена она, яко сном воздвижена, скоро разрушится и разсыплется. Понеже убо ров совершися. огнь же на древеса спустивше, разума погрешаху. не могущу огню, за еже быти внутрь сгущене земли. и древесем еще суровым, кроме некиа празности в пещи действовати. Священнаго его образа, в новоделанныи он ров принесше, и воду от него освятивше. и сию на огнь и древеса возлиавше, действену быти огню сотвориша. И вере сотворших, божественой силе споспешествующи, вместо масла огню вода бысть. и истреби все прилучьшееся. Тогда убо царь перский пленениа града отчаявся. и помощь откуду имеша, разумев, к примирению обратися. и сложения мирная сотворив, восвояси возвратися. Имеяше же убо и сей недалече благотворениа получити от священнаго сего образа. супостатом его благотворнаго, своих ратных убивателнаго. Дщи бо его бесовским духом содержима. и естественаго устроениа вне бывши. вопиаше часто, действуемо им. аще не от Едеса нерукотвореныи образ приидет, отселе живущему в неи не изыти. Еже услышав царь. и яже на обступлении воспомянув. ниже бо и его утаися предивнаа и внезапнаа сила и дръздновение едеских. пишет абие к началнику града, и к митрополиту Евлалию. и к общему градскому. послатися к нему скоро сей божественой всесилнои иконе. приложив и вину, сиречь дщерню беду. и всяким образом моля и понуждаа, не погрешити прошениа. Они же боящеся перскаго нрава неверное⁴³³ и мысляще лестию хотети Хозрою крепость их отъяти. и промышляюще не предати предстателницу и благодетелницу. но ниже мир разрушити. таковыя ради вины, совет советуют мудр и поспешен себе. Преписавше бо равну по всему и подобну. якоже мощно бе. икону. ненаписанаго писану. и к приличному по силе уподобивше к просившему послаша. Ельма же убо, внутрь перских предел быша икону носящеи. абие бес царскою дщерию вопиаше, скоро исходити. и пременити обитание. крепости ради грядущаго. токмо аще призваное подобие возвратится, не приближится полатам ниже граду перскому. И о сем много царя моляше и мил ся деаше. Обещавшу же царю, и исшедшу от отроковица бесу. и во здраво устроение бывши цареве дщери. Хозрои, или просившею моления исполняа и обещание свое. или грядущаго силы убоявся, злобы ради скверности своих дел. послав, повеле возвратити таковаго образа ко граду, из него же изыде. и дары приложи от себе к пославшим. Бе убо у едесян многоценное богатство сие и неистощимое сокровище. образ первообразный и исписанный почитаем есть всегда выну от них, соблюдая их. Ельма к царствующему сему во градех. яже отвсюду стекошася благая же и нарочитеишая. бе же убо божествено благоволение, и священней иконе сеи, зде с прочими благими сокровищствоватися. иже греческим началством владеяи Роман, тщание творит собою, да получит града того и обогатится. Темже и в различнаа времена послав в Едес. прошаше послатися к нему. образу, с самописанною Господьскою епистолиею. и противудати обещеваше, на изменение двоюсот саракин. и серебра вообразованнаго двоюнадесят тысяща. Едестии же граждане не ползовати себе глаголаху, хранителя и блюстителя града своего, сребром и человеки умирающими изменити. Елма же он убо моляше и паки их. они же многажды моление отражаху. конечне в 6455 лето, бытия мира, едесскии Амир князь, моля писанием утверженным и печатию златою имеющим твердое царю обещатися. еже ратным делом, не находити греческим воинством, на четыре сих градов. глаголю же Рохана. тако бо Едеса варварскии глас именует. Хорана. и Сароци и Самосатов. ниже пленяти их сел и живущих в них. отпустити же ся ему и двоюсот единоплеменных саракин, с предобещанным сребра количеством. и воздати ему взыскуемыи образ, и епистолию Христову. Царь же желанием сицеваго блага, ко всем предлагаемым уступив, и дав просимая. Авраамия боголюбиваго самосатского епископа, зде во оно время прилучившагося, к восприатию божественаго образа и епистолий Христа Бога нашего посла. Смотря же и пославыи и служаи, да не прельстятся в воздаянии. и вместо ненаписаннаго истиннаго, преписанныи тогда плотскаго ради обстояниа, воздастся сему. обою сию и с иными, во церкви несторианстей почитаемом древле. и тому якоже видетися от первообразного преписанному, просив ко уверению прият. иже и вспять воздашася. единому обдержанному истинному и неложному. Но сие убо последи. Тогда же раскол от сущих во Едесе верных воздвизашеся. и мятеж мног града обдержаше. не попущающим отъятися честнейшим яже у них, и отечества своего хранителем. дóндеже саракинскии князь, овех убо препрев. овех же понудив. овех же и прещеньми закланиа устрашив. отдати его сотвори. Громом же и молниям с тучею зелнейшею, по некоему случаю, или божественому промыслу внезаапу снесеным. внегда хотяше снитися из Едеса образ и епистолиа Христова. паки же и прежде держащеися сих, воздвизахуся и Бога знаменовати действуемыми утвержаху. Не по Божией воли бывати, еже оттуду святейших сих пренесение. но саракинскому началнику, на немже вся власть возлежаше, пребывати в сложениях лепо судившу, и исполнити обещание изыде от града дражайшее образование, и христописаннаа епистолиа. и к нашим странам приношашеся. Путь убо совершающе, иже сия носящеи. Ефрат реку достигоша. и паки мятеж, не мнее первых воздвизается. яко аще не знамение некое явится от Бога, никакоже пустити, аще и что нибуди. Содержителныа твердости своеа. дается убо знамение неверным сущим искушающим. Корабль бо имже Ефрата принестися им, предлежаше. еще в сирийских странах стояще. егда токмо внидоша в него епископи, божественыи образ и епистолию носяще. еще мятежу расколников содержащу внезапу кроме гребущих, кроме правящего или влекущаго, на он пол достиже. единым божественым хотением кораблю управляему. Еже убо прилучшихся ту и видевших, всех чудеси ужаса исполни. и препре нехотящих уступати отпущению. Оттуду достизают Самосат, иже носимых служителие. Беяху же самосатскии и едескии архиереи. и того протопресвитер. рекше протопоп. и неции инии благоговейнеишии христиане. с нимиже бе и амирин⁴³⁴ слуга. иже от Рима именовашеся. рекше Роман. Ту некия дни пребывше, многим чудесем тамо бывшим. начата шествие. и паки бесчислена чудеса совершахуся на пути от священныа иконы и епистолиа Христовы. Слепии бо неначаемо прозирааху. и хромии являхуся здрави. и на одрех лежащеи многовременнии скакаху. и сухиа руки имеющеи оздравляхуся. и совокупивше рещи, всяк недуг и язя прогоняшеся. И славяху оздравляемии Бога, воспевааху и его чудеса. Уже убо многое пути скончавше, достизают и в обитель пресвятыя Богородица именуемую Евсевиеву. сущую во одержании глаголемых оптимат. Во храм же сицевыя обители светолепне полагают сокрывающий ковчег чудотворную икону. И мнози приступивше чистым завещанием, от своих недугов исцелеша. Идеже и некий приступи бесом стужаем. имже аки орудием лукавыи действуяи дух и многа во хвалу образа и епистолии приличествующая им изглашаше. Ельма же издавна вемы кто еси Святый Израилев, к Господу сущии подобныа ему чести глаголаху. конечне и сия аки пророчествоваше. восприими глаголя Костантине граде славу и радость. и ты Константине Порфирогените, царствие твое. И сим реченным, исцеле человек абие, и отрешися бесовскаго нападаниа. Сих же словес мнози суть сведетели. Царю бо в честь и стретение желаемаго, первых тайнаго совета пославшу, и с сими многим сошедшим, от чина сущим оруженоснаго. случися и Магистрианом, и Патрикием, с нижаишими чинми, слышателем и сведетелем быти. И понеже речения бытие скоро приаша. взысковати достойно, откуду предпознание бесу бысть. ниже бо имея и сие веруются собою. от божественыа славы поползшеся, и тма вместо света бывше. или яве, якоже Валаамом, божественаа сила, слугою действоваше, в древнее пророчествование. и иногда иными недостойными многажды вещи по смотрению всяко некоему мудрому и благохитрому. сице и ныне сущаа в божественом образе сила бесом действоваше. и сим помале сбывшаяся предуказа. Но сему убо сице случившуся. якоже посреде помянути, негли не невременно есть. сице к прочим поведанием возвратимся. В 15 августа месяца. обычне царем праздник совершающим, преставления Приснодевы и Божиа Матере, во всечестном ея Влахернском храме. в полудни достигоша тамо служителие честных сих. и положиша в горнем молитвенице таковаго божественаго храма, ковчег внутрь имеющ и икону и епистолию. И приступивше царие, и внеуду с чествованием целоваху и и поклоняхуся. Таже с честию и светлым провожением и со свещами многыми, к царскому кораблю принесше ю. с нею достигоша царских полат. и в божественом сущем тамо храме, иже Фарос именовася. положиша ю в последствующии день. иже в 16 августа месяца есть. Таже со страхом и благоговеинством, целование паки и поклонение сотворше. и приемше ю оттуду священницы же и юношествующии царие. старыи бо за немощь в дому остася. со псалмы и песньми, и обилным светом, сквозе водящия к морю улицы, в царскии корабль паки вложивше. мало не близ града хождение творяще. даже образом некоим опояшет града, морским своим шествием. вне западныа стены града доплуша, идеже из корабля излезше, пеши шествующе. царие и вси старейшинаго совета, и священноначальствуаи, со всяческим церковным исполнением. с подобающим светлым провожением, аки другаго ковчега, паче же и выше того, святейших и честнейших хранителныи сосуд провождааху. И внешняа стены даже до златых врат обшедше. с высочайшими псалмопении и хвалении и славословии духовными. и с бесщисленым свещь светом, всенародное составляюще провожение, сквозе града шествие совершаху. святыни причащатися, и большиа крепости граду, тем верующе. и невредиму и необориму во веки соблюстися. Народу же упражняющуся. и аки великия волны народу отвсюду двизающуся и сходящуся. человек некий ногами разслаблен. и немощен от долгаго времене. своими слугами подпираася, воста ко еже видети преходящий божественыи образ. и вкупе видению предивне здрав быв. И познав твердых бывших глезнеи своих, притече сам шествуа. и целовааше ковчег иконы, и величаше Бога. чудо же о себе поведуа. егоже иже с ним ту бывшии вси и видевшеи, глаголы его услышавше, славу воссылаху Богу. иже надо всеми творящему всегда дивеса преестественаа. Толико же излияние слез от радости, и моление и молба, и благодарение к Богу от всего града бысть. божественои иконе и честнои епистолии сквозе града провожаемым, елико несть словом изъявити. аки побеждаему слову от видениа. премножество им имеющия вещи, видети есть паче нежели слышати добро. зане во след вещей слово обыче ходите. Торг убо иже пред августиею достигше. началники торжества и от праваго пути малым чим на левая уклонившеся. божественыя Софиа, рекше Премудрости Божиа тезоименитый священыи достезают храм. и внутрь невходимых олтаря, честную икону и епистолию полагают. идеже всему церковному исполнению поклонившуся, и якоже подобаше почетшу. изыдоша паки оттуду с священным бременем, довершающе происхождение. и царьскыя достигше полаты, в нарицаемом триклине злате на царскии престол, на немже царие седяще обыкоша о нужнеиших, послом отвещевати. ту божественую икону преже поставляют. еже освятитися всяко царскому седалищу. и правды вкупе и благости причастники сотворити седящих на нем, яко лепо веровавше. Прилежней же молитве, по обычаю бывши по совершении. взяша паки оттуду божественаго образа. и в предреченнем Фаросе храме, в десной стране к востоку. святолепно возложиша. в славу верных, на соблюдение цареи, и утвержение всего града, христианскаго устрояниа.

Молитва царева к нерукотворенному образу Господа нашего Иисуса Христа: Но о божественое подобие, неизменнаго подобиа Отча. о начертание, начертаниа Отеческия Ипостаси. о всечестнаа печать первообразныа красоты Христа Бога нашего. Якоже бо одушевленому тебе с верою беседую. спасай и соблюдай всегда, благочестно и кротко нами царствующаго, и твоего пришествия воспоминаниа светле празднующаго. егоже пришествием твоим, на деднии и отеческыи престол вознесен... соблюдая отрасли тогоже, в наследие непрестаемо рода и скипетр. Даруй гражданству, мирное устроение. царствующий сей град, необорим соблюди. и даждь нам, благоугождающим первообразному твоему Христу Богу нашему, в царство небесное его приятым быти. славословящим и воспевающим его. яко тому подобает слава, честь. и поклонение. ныне и присно и во веки веком, аминь.