Псалом 78

Пс.78:1. Псалом Асафу. Боже, приидоша язы́цы в достояние твое, оскверниша храм святый твой,

Пс.78:2. положиша Иерусалим яко овощное хранилище:

НАДПИСАНИЕ и СОДЕРЖАНИЕ

В сем псалме оплакивает Пророк бедствие, приключившееся Иудеям при Антиохе и при иных царех, бывших во времена Маккавеев, как согласно толкуют древние Отцы и многие из новейших: да и сам творец первыя книги Маккавейския, в главе 7, приводит сей псалом яко пророчество, бывшее о тех бедствиях. Впрочем, можно сей же самый псалом приложить и к гонениям, бывшим после на Церковь от царей языческих.

Пророк беседует к Богу и в лице людей Его жалуется о опустошении храма и града. Обращает же слово к Богу не того ради, дабы научить Его аки неведящаго, но дабы воспоминанием сим самого себя подвигнуть к теплейшей молитве. Боже, глаголет: приидоша язы́цы в достояние Твое, то есть: в тот град и в ту землю, которую Ты из всея вселенныя в собственное наследие избрал. Потом изъясняя, чего ради пришли язы́цы в достояние Божие, глаголет: оскверниша храм святый Твой, то есть: пришли осквернить храм Твой святый, который и в самом деле, под предводительством царя своего Антиоха осквернили (1Мак. 1). Тогда бо и идол поставлен был во храме, и олтари осквернены, и кумирам жертвы приносимы были, а престольный град Иерусалим так опустошен, что стал подобен быть пустому шалашу, каковы бывают те, которые устрояются для хранения плодов в садах или в виноградах. О сем происшествии, случившемся при Антиохе, свидетельствует первая книга Маккавеев (1Мак. 3:45), где сказано, что Иерусалим бе необитаем аки пустыня.

Пс.78:2. положиша трупия раб твоих брашно птицам небесным, плоти преподобных твоих зверем земным:

Пс.78:3. пролияша кровь их яко воду окрест Иерусалима, и не бе погребаяй.

Пророк, оплакав опустошение храма и града, здесь оплакивает избиение людей и зверскую лютость врагов, не терпевших даже и трупы умерших предавать погребению. Они повергали их на снедение зверям и птицам, проливали кровь неповинную яко воду, без различия лиц, возраста и пола, и сие творили не токмо внутрь стен града Иерусалима, но и в окрестностях онаго. Сие исполнилось как на многих иных, так наипаче на оных шестидесяти печальнейших мужах, коих всех во единый день избил Алким нечестивый близ Иерусалима, как повествуется в 1 книге Макк. (1Мак. 7:17), где приводится сей стих слово до слова.

Пс.78:4. Быхом поношение соседом нашым, подражнение и поругание сущым окрест нас.

Здесь еще оплакивает поругание или то безчестие, которое обыкновенно следует за гонением. Под именем соседов разумеются окрестные народы, яко то: Идумеи, Моавиты, Аммониты и иныя языки, кои озлобляя Евреев еще и ругалися им, яко людем безсильным и всякаго презрения достойным. Таким образом верные, принося на них жалобу, преклоняют Бога к милосердию. Ибо чем неистовее нападают на нас нечестивые, тем скорее является надежда избавления: понеже гордость их не может быть терпима Богом, наипаче, когда соединена она с богохулением, якоже Сам у Исаии глаголет: кого похули и поругася, поругався тебе девице дщи Сионя, и тебе дщи Иерусалимля (Ис. 37:22). А как соседственные Иудеем народы были отчасти богоотступники, отчасти ложные дети Авраамовы, отчасти явные враги благочестия, то озлобляя бедный Иудейский народ, не удерживались и от богохуления. И потому верные не столько о своем собственном поношении жалуются здесь, сколько о безчестии, относящемся к Богу и Его закону, как паки при конце псалма увидим.

Пс.78:5. Доколе, Господи, прогневаешися до конца? разжжется яко огнь рвение твое?

Пс.78:6. Пролий гнев твой на языки незнающыя тебе, и на царствия, яже имене твоего не призваша:

Пс.78:7. яко поядоша Иакова, и место его опустошиша.

Святый Пророк, видя гнев Божий на Израильтян так разгоревшийся, что, по-видимому, надлежало всему народу в конец истреблену быть, сего ради в лице людей Израильских молится Богу, дабы положил конец Своему негодованию и обратил гнев Свой на врагов людей Своих. Аки бы сказал: мы хотя и недостойное творение, обаче сынове Твои есмы: Тебе единаго вемы истиннаго Бога, Тебе почитаем и призываем. Пролей убо паче гнев Твой на враги Твоя, не знающия Тебе, и на царствия, яже не призваша имене Твоего.

Пс.78:8. Не помяни наших беззаконий первых: скоро да предварят ны щедроты твоя, Господи, яко обнищахом зело.

Дабы не возмнил кто, что людие Божии, обвиняя врагов своих и судя их достойными быть наказания, хотели самих себя оправдать, аки бы незаслуженныя казни претерпевали, и аки бы силою сопротивных, а не правосудием Божиим караемы были: сего ради исповедуют в сем стихе грехи своя и родителей своих, прибегая к милосердию небеснаго Отца и укрощая правосудие Его. Не помяни, глаголет, наших беззаконий первых, то есть, не накажи нас за прежняя беззакония наша. Скоро да предварят ны щедроты Твоя, уже бо близ погибели есмы, и аще милость Твоя скоро не предварит нас, вси погибнем. За сим присовокупляя и объясняя, чего ради потребна скорая помощь, глаголет: яко обнищахом зело, где под именем обнищания разумеется оскудение не токмо в богатстве, но и в силах и в помощи.

Пс.78:9. Помози нам, Боже, спасителю наш, славы ради имене твоего: Господи, избави ны и очисти грехи нашя имене ради твоего.

Здесь показывает, каким образом милость Божия предваряет нас; сие же творит образом молящагося, а не учащаго: Помози, глаголет, нам Боже Спасителю наш, то есть, предвари нас щедротами Твоими, помогая нам в делании правды ко избежанию грехов будущих, и в приношении покаяния ко очищению грехов прешедших. Употребляет глагол помози, дабы показать, что свобода воли чрез помощь благодати не токмо не отъемлется, но еще более укрепляется; никтоже бо приемлет помощь, разве тот, кто и сам нечто творит, содействуя благодати. Потом присовокупляет причину, чего ради требует помощи: славы ради имене Твоего, то есть, не ради заслуг наших, но ради славы Твоея избави нас от належащаго бедствия: и да сотвориши сие, очисти грехи наша, ихже ради сие гонение терпим. Обоих же просим не ради правды и заслуг наших, но ради славы Твоея.

Пс.78:10. Да не когда рекут язы́цы: где есть Бог их? и да увестся во языцех пред очима нашима отмщение крове раб твоих пролитыя.

Пс.78:11. Да внидет пред тя воздыхание окованных: по величию мышцы твоея снабди сыны умерщвленных.

То есть: того ради молим избавити нас от належащих зол, да не како рекут безумные язычники, что Ты или немощен, или боязлив, или не веси, что творится с народом Твоим. Яви убо правосудие Твое, да сии восприимут достойную казнь за излияние неповинныя крове, вси же прочии да узрят купно с нами праведный суд Твой, постигший врагов, избивших рабы Твоя, и тако во всех языцех да уведано будет отмщение крове, неповинно излиянныя. Молим еще: воззри милостивым оком и на тех, кои хотя в живых обретаются, однако в оковах заключены будучи, со дня на день смерти ожидают, и сего ради воздыхают к Тебе: да внидет пред Тя воздыхание окованных.

Пс.78:12. Воздаждь соседом нашым седмерицею в недро их поношение их, имже поносиша тя, Господи.

Двух вещей выше просил Пророк в лице людей Божиих: первое, дабы отмстил кровь избиенных, второе, дабы избавил плененных, к смерти приговоренных; теперь тех же двух вещей просит, но пременив порядок в словах: первее бо просит о сохранении живых, потом о отмщении избиенных. По величию, глаголет, мышцы Твоея, снабди сыны умерщвленныя, то есть, по мере крепости руки Твоея, крепце противостани гонителям нашим: и снабди, то есть, соблюди и спаси останки людей Твоих, сыны, глаголю, тех, кои от врагов избиени суть. Воздаждь соседом нашим седмерицею в недро их: то есть, воздаждь врагом, окрест нас живущим, казнь несравненно вящшую, которую вложи в недра их так, чтоб они не легко могли оттрясти оную. И как они дерзнули поносить Тебя немощию, аки бы Ты не всесилен: тако и Ты покажи, что они паче суть немощны и безсильны, и не столько человеки, сколько черви, или прах и персть земли.

Пс.78:13. Мы же людие твои и овцы пажити твоея исповемыся тебе, Боже, во век, в род и род возвестим хвалу твою.

Сими словами заключают верные молитву свою, обещая Богу по избавлении от зол вечную воздавать хвалу и благодарность. Здесь заметить должно, чего ради верные присовокупили к молитве оныя слова: мы же людие Твои, и овцы пажити Твоея. Ибо как Бог сынов Авраамовых с тем избрал, дабы прославляли имя Его, и воспевали хвалы в Сионе: сего ради прилично представляют Богу, что ежели Иудейский народ истреблен будет от врагов, то чрез сие пресечется и хвала имени Его. Итак, место сие без сомнения соответствует оному пророчеству (Ис. 43:21): люди Моя снабдех, да поведят добродетели Моя.