65. 1448–1458 г. Послания митрополита Ионы в Новгород: I) apxиепископу Евфимию и II) гражданам – о прекращении междоусобий

Первое из этих посланий издается по сборнику графа А.С. Уварова № 512 (прежде Царского № 366), л. 200 об.; последнее – по сборнику синодальной библиотеки № 562, л. 42 об.–48. Изданы были, по последнему сборнику, в I-м томе Актов Исторических под № 44; варианты печатного текста первого послания отменены в настоящем издании буквой А.

Благословение Ионы, митрополита киевского и всея Руси, о Святом Духе возлюбленному сыну и брату нашему и сослужебнику нашего смирения Евфимию, боголюбивому архиепископу Великого Новгорода. ²⁵⁶⁸ О сем, сыну и брате, всегда молится смирение наше человеколюбцу Богу и пречистой его Богоматери, яко да будет твое боголюбие душевне ²⁵⁶⁹ спасительно и телесне многолетно здраво, с боговрученной ти от Спасителя ²⁵⁷⁰ нашего Бога паствой, со всем православным христианством. И о сем, сыну и брате, прошу тебя, яко да не позазриши смирению нашему, о ихже вещах слышахом творящихся от некоторых твоих детей, православных христиан, еще же, паче рещи, и от честных человеков в твоей пастве в Великом Новгороде: некие междоусобные спирания и раздоры, и убийства, и кровопролития, и неколикие сотворшиеся и творящиеся ²⁵⁷¹ душегубства православному христианству, и на то на злое на ²⁵⁷² богомерзкое дело наимования ²⁵⁷³ , с обеих сторон, злорадных и хотящих кровопролитству пьянчивых и о своих душах нерадящих злотворных человеков. И того ради, за воспомяновение твоему боголюбию, хочу нечто вмале от божественного писания написать; а вем ²⁵⁷⁴ , сыну и брате, яко сам ты божественное писаниe по великому епископству ²⁵⁷⁵ веси: но наше смирение, по своему святительскому долгу, cие вмале тебе пишу ²⁵⁷⁶ , и от Владыки нашегo Спасителя Бога, по глаголющей заповеди Пророком Иезекиилем: «сыне человечь ²⁵⁷⁷ , блюстителя тя дах дому Израилеву, и слыши от меня слово и запрети им: внегда глаголати ми ²⁵⁷⁸ беззаконному, да умреши ²⁵⁷⁹ , и не повеси ему, то кровь ²⁵⁸⁰ его от руки твоей взыщу; аще ли засвидетельствуеши ему, и не обратится от беззакония своего, то сам в грехе своем умрет, а ты душу свою избавишь». И паки: «егда обратится ²⁵⁸¹ праведник от правды своей, ти ²⁵⁸² сотворит прегрешения ²⁵⁸³ , сам в грехе своем умреть, и ктому не помянутся правды его, яже сотвори, и кровь его от руки твоей истяжу, зане не возвестил ecи ему; аще же ты заповеси ²⁵⁸⁴ праведнику, еже не согрешить, и животом жив будешь ²⁵⁸⁵ , и ты душу свою избавишь». И паки: «живу аз, глаголет Господь, яко не хочу смерти грешничу, но обращение ²⁵⁸⁶ животу его». И инде глаголет: «пасый убо целомудренне стадо Христово, устами Божьими наречен ²⁵⁸⁷ есть; рече бо: аще изведешь честно от недостойна ²⁵⁸⁸ , устами моми будешь». И послыши, сыну и брате, и пятьдесят восьмого правила святых Апостолов, с каким запрещением глаголет сице: «яко епископ или пресвитер, нерадяй о причте, или о людях и не наказуяй тех благочестью, да отлучится; пребываяй же в лености, да извержется». И слыши, сыну и брате, реченное и святым Никоном от божественных писаний: «и ²⁵⁸⁹ колико художество и различие иметь подобает иже от Бога учительство врученному, и какова суть тому подобающая ²⁵⁹⁰ : и приведу бо, рече, в среду единого от святых наших Отцов и учителей, божественного ²⁵⁹¹ глаголю Златоуста, столпа церковного и утверждениe, како о нем рече некто списатель, яко свободны уста к прилучающимся безмерне имяше; внегда убо учить, много бяше в пользу, в беседах же величав и горд мним бяше не знающим его ²⁵⁹² ; словеса бо и образы пременяя на пользу послушающим, яко же той самый Златоуст глаголет; «различну достоит быть учителю и пастырю». Различна же почто глаголет? яко не ласкателя и досадителя, но многие свободы и ласкания и необиновения исполнена ²⁵⁹³ , ведуще изводить ²⁵⁹⁴ потребинейшая, егда делом вина истяжет cиe: и благу быть купно и люту. Не ²⁵⁹⁵ едином бо образом творить к облагодаемым ²⁵⁹⁶ потребно есть, но к благим и усердно послушающим учителя – благу и милосерду, к злым же и жестосердым – жесточайшу и люту, яко да все исправит и приведет ²⁵⁹⁷ к благому пути истинного покаяния; якоже бо ни врачеве единою токмо лечьбой всем болящим врачество приносить научают ²⁵⁹⁸ , ниже паки и кормчий единым путем водит еже к ²⁵⁹⁹ духóм борения. ²⁶⁰⁰ Ибо честну быть лепо есть учителю, и не возносну и приступну, и облагодательну ²⁶⁰¹ , и общительну, и угождательну и смиренну, и не порабощенну, и светлу и тиху, яко да всем убо удобь способствует». И того ради, сыну и брате, якоже и выше рех, вмале воспоминаю ти от божественных писаний, а большее и пространнейшее зело помногу сам веси. И благословляю тебя, своего сына и брата, яко да и сам наказуеши и научавши своими словесами, и священникам всем заповеси, яко да каждый их ²⁶⁰² наказует и учит своих детей духовных отступить и отлучиться от всякого дела зла. ²⁶⁰³ А о ихже выше Рех вещей, а то бы, сыну, от нынешнего времени престало ²⁶⁰⁴ всячески и в конец потребилось и забвению да предастся, яко ни именовану быть ему в православном христианстве, в вашей пастве, в толиком многонародном людстве, да в прочие лета поживут в Божью славу и в свою духовную пользу; а и сам о том восприимешь от Вседержителя ²⁶⁰⁵ Бога сторичную ²⁶⁰⁶ мзду, временно и будущее ²⁶⁰⁷ , и от многих человеков честь и похвалу и славу, а ²⁶⁰⁸ от нашего смирения благословение и молитву. А чрез твое наказательство и учительство и запрещение, и чрез священнические поучения кто ся в чем ослушает, а имут по своим желаниям ²⁶⁰⁹ душевредным ходить непокаянно, и ты в том, наш сын и брат, неповинен да будеши, а злой зле сам и погибнет, аще к покаянию и обращению не приидет. А молитва моя и благословение да есть всегда с твоим святельством. ²⁶¹⁰

Благословение Ионы, митрополита [киевского и] всея Руси, во отчину еже о Святом Духе возлюбленного сына нашего смирения ²⁶¹¹ , благородного и благоверного великого князя Василия Васильевича ²⁶¹² , в Великий Новгород, посаднику степенному ²⁶¹³ и старым посадникам, и тысяцкому степенному ²⁶¹⁴ и старым тысяцким, и боярам и купцам, и житьим людям, и всей отчине господина и сына моего великого князя, всему Великому Новгороду, и всем православным христианам. Слышах, сынове, яко по изначального врага душ наших и губителя диаволим наветом, некое богоненавистное и богомерзкое злое дело сотворяется в вашем православном христианстве, во отчине сына моего великого князя, в Великом Новгороде, не токмо от простых людей, но и от честных от великих людей, от наших духовных детей: незакую cию и великую и малую вещь начинается гнев и от того ярость и свары и прекословия и многонародное собирание со обеих стран, еще же и наимовати на то на злое и богоненавистное дело (а врагу диаволу угодное) збродией, пьянчивых и кровопролитных человеков, и бои замышляют и крови пролития, и души христианские губят. ²⁶¹⁵ И Богу ведомо, сынове, то ваше неустроение и душевную погибель вашу слыша, велми есмь в скорби духовной и душой и сердцем. И того ради, сынове, и вашему отцу, а нашему о Святом Духе сыну и сослужебнику нашего смирения, apxиепископу Великого Новгорода владыке Евфимию, нечто есмы малое вкратце от божественного писания написали в вашу душевную пользу: и то, Бог даст, сынове, писание наше грубое послышите, и от своего отца, а нашего сына, и святителя вашего и учителя словеса и наказание услышите же, чиим его Бог милосердый человеколюбец и святой всесильный его Дух божественный наставит; а вас, наших духовных детей, Бог вразумит и писания и наказания от отца вашего послушать, и внимать, и повиноваться, за свою духовную пользу: понеже, сынове, наше смирение, по своему святительскому долгу, попечениe имея о ваших же душах, воспоминание вам творим отступать от такового богомерзкого дела и в покаяние прийти, и вмале нечто и к вам к своим детям пишем, не от себя, но от божественного и священнаого писания. И преже убо о ярости слово изорцем: «егда, рече, наидет тебе напасть и прекословие, или раздражение на кого двигнуть ²⁶¹⁶ ярость, то помяни молитву и суд, еяже сам Господь наш Иисус Христос научи ученики свои, глаголя: «якожо и мы оставляем должником нашим», и aбиe бесчинное в тебе движение устанет»: ярость бо паче иных вредов смущать обыкла есть и раздражать душу; понеже ярость и гнев, оба cии едины матери исчадия суть, зовомые безумье. ²⁶¹⁷ Рече бо: «всю ярость свою износит безумный, и безумный в первый; день исповесть гнев свой». Хотяй же убо отлучиться от злыя сей вражды, сиречь ярости, да удержится терпением и кротким сердцем молением к Богу вскоре свободится от нее и будет сын премудрости, Бога бояся и Бога любя: «начало бо премудрости страх Господень, и любящий Господа ненавидит зла»; от страха бо Господня на любовь взыдет Божью. И Приточник рече: «терпелив муж отвращает ярость, а малодушный творит все без совета». И паки: «муж яр и неблагообразен, и всю ярость свою износит безумный, и человек яр разжигает свар и посреде мирнующих ввержет сваду». И Пророк о таких ²⁶¹⁸ Давид рече: «ярость их по образу змиину, и яко аспид ²⁶¹⁹ глухой затыкай уши свои». И Апостол учит рекий: «отложите всяк гнев и ярость, и злобу и хуление; в мир бо призва нас Бог». И cиe убо, сынове, о ярости и о гневе рече божественное писание, аже не воздать злобы: «аще убо хотим быть, рече, наследники Христу, то подражатели будем Христовым возлюбленникам и поревнуем кротости Давидовой, да и мы услышим от Бога глагол сей: «обретох, рече, мужа по сердцу моему, иже сотвори всю волю мою». И cиe убо о непамятевем злу Давидове речеся. И мы же убо, чада мои, такоже, да не сотворим ничтоже на отомщениe кого обидевшего нас, на не в стропотно и нам ²⁶²⁰ будет, по реченному словеси: «иже воздает зло в доброе, не подвижутся из дому его злое». И паки: «вергий камень на высоту, на главу свою мечет, и копая другу яму, сам владет в нее, и поставляяй сеть, увязнет в ней, и творяй зло, ввалится в него». И Давид рече: «Господи Боже мой, аще сотворих се, аще есть неправда в руку моею, аще вздах воздающим ми зло, да отпаду убо, рече, от враг моих тощ». И верховный убо Апостол Петр, научая нас, глаголет: «не воздати зла за зло, ни клеветы за клевету, но благословляюще, яко на се званы бысте, да благословение наследуете». И Апостол Павел рече: «блюдете, егда кто кому зло за зло воздаст, но всегда благое гоните в себе и ко всем, и не бывай побежен от зла, но и побежай благим злое». И сам Владыка наш Господь рече: «любите враги ваша и добро творите ненавидящим вас, и будите щедры и свершены, якоже и Отец ваш небесный свершен есть».

Еще же, сынове, реку вам и о блаженном покаянии, и о послушании, и о преслушании. Колико есть сладко, чада мои, покаяние! Ничтоже ино, но корень животу, якоже и сладкий наш и незлобивый, един благой и щедрый человеколюбец Бог, и строитель спасения нашего, присно жадает покаяния нашего, и веселится о слезах кающихся, и радуется о исповедании нашем, и со многим терпением ожидает обращения нашего, и не престает и до последнего, моля и бдя и призывая единого когождо нас, от многих зол и неприязненных дел к нему обращаться. Мы же, чада мои, с Давидом к Богу рцем: «яко беззаконие мое познах и греха моего не покрых, но исповем на мя беззаконие мое Господеви, и той отдаст нечестие сердца моего». Сам бо Господь рече Пророкам: «рците преже беззакония свои, да оправдитеся ²⁶²¹ в пучине милосердия моего». Исаия же глаголет: «еда не может Господь спасти? но за грехи наши отврати лице свое от нас, яко никтоже глаголет правды, ниже есть суда истинна». И ин рече: «согрешил ли еси, и не приложи ктому, и яко от лица змиина бежи от греxa». И того ради молю вас, чада мои, обратимся к Господу Богу нашему и делаем правду прочие дни живота нашего, и той створит исцеление прежним прегрешениям нашим, онем преждереченным сладчайшим его глаголом: «се цел бысть, и ктому не согрешай». И добро есть, чада мои, послушать божественного писания, и к покаянию со тщанием притечь скоро, а не преслушать, ни отчаяться: понеже, чада мои, яко же послушание на благое жизнь есть, такоже и преслушание смерть сотворяет; и послух ми сему словеси первый, рукой Божьей созданный человек: аще бо бы не преслушал заповеди Творца, не бы убо лишился породы и древа животного; изриновен же из рая быв, смертью осудися сам и иже от него сущие, слышав реченный ему от Бога страшный ответ: «яко земля еси, и в землю паки пойдеши». И о том, сынове, благословляю и молю ваше православие, яко да за то не позазрите нашему смирению, еже вмале нечто воспомянух вашему благочестию от божественных писаний, в вашу же, моих детей, духовную пользу, воспоминая оно глаголющее евангельское Господнее слово, яко «радуется множество ангелов на небесе о единой душе кающейся», а паче же о множестве многочеловеческого, Христовой честной искупленных кровью, христоименитого народа Господнего, православного людства. А вем, сынове, добре, что милостью Божьей, по изначальству вашего благочестия и по вданной вам от Бога, Божьей благодатью в святом крещении от святой купели, христианской православной веры, от благочестивых ваших родителей и настоятелей наказанию, и в святых книгах божественному писанию сами искусны есте всякой мудрости книжной: но и аз смиренный свое должное явих к вам, духовным своим чадам. Еще же, сынове, и о том благословляю вас, своих детей, чтобы есте во всем послушны были нашему сыну и брату, а своему отцу и учителю, боголюбивому архиепископу Евфимию ²⁶²² , по Господню глаголющему слову: «слушаяй ²⁶²³ вас, рече, меня слушает, а отметаяйся вас, меня отметается и пославшего мя». И Апостол Павел глаголет: «братие, повинуйтесь наставникам вашим и покоряйтесь, те бо бдят о душах ваших, яко слово воздать хотяще, да с радостью со творите»; и паки: «всей душей владыкам, яко превладущим, повинуйтесь». Понеже, сынове, от Бога поставлен есть святитель и учитель и пастырь душам христианским, и наместник есть самого Владыки нашего Христа, и молебник о душах человеческих, и область имеет святых Апостолов: егоже разрешит на земле, и хоть разрешен на небесе; а егоже свяжет на земле, и тот связан и на небесе. И того ради, сынове, воздайте ему честь и повиновение, яко самому Христу, и о том имате приять мзду от Бога временно же и будуще. А благодать Божья и милость, и предстательство пречистой Богоматери, и молитва нашего смирения и благословение всегда о всем да есть с вашим православием.