43. 1416 г. сентября 23. Его же грамота псковскому духовенству с решениями по некоторым вопросам церковной дисциплины

Из рукописи Румянц. Музея № 204. л. 401–406, с указанием разночтений списка, находящегося в сборнике синодальной библиотеки № 562, л. 413 об.–417. Издана была, по тем же спискам, в Ι-м томе Актов Исторических под № 22.

Благословенье Фотия, митрополита киевского и всея Руси, в Псков, к собору Святой Троицы и к собору Святой Софии, великому священническому и иноческому чину. О чада о Господи возлюбленные нашего смирения! Многу ползу имамы душевную, слыша ваше исправление пред Богом и о вашем вверенном вам от Бога стаде святого людства, еже како достойно попечение имеете о их спасении, в богоугодие их пасуще, еже благодатью Христовой, и уверены суть во всем, красящеся своим православием, о Господе возлюбленные мои чада! А что ми, сынове священники, пишете свою грамоту, с своими сослужебниками ¹⁹⁰⁰ , с попами, о церковных делах, хотяще с желанием рассуждение приять известно, по правильному извещению, от нашего смирения: ино о сем молюсь человеколюбцу Господу ¹⁹⁰¹ Богу, да даст вам во всем разум благодати своей, благое мудрствовать, но повелйению его пасуще Христово стадо.

И первое убо, сынове, пишете ми, еже слышите от изначальных ¹⁹⁰² православной веры, еже от Рожества Господа нашего Иисуса Христа даже и до Крещения, тая 12 дней мяса ясти: ино, сынове, повеленно ¹⁹⁰³ от Богоданного ¹⁹⁰⁴ нам Нового Закона и от святых правил, та единонадесять дней, за един день, млеко и мяса ясти; а в другойнадесятый день, в канон ¹⁹⁰⁵ Богоявления, мяса не ясти, ни рыбы повелено от святых правил, но токмо сухоядь. ¹⁹⁰⁶

А что, сынове, пишете, что на Преполовление праздника Владычня и на Усекновение главы Иоанна Предтечи мясо и млеко у вас ядят: ино бы, сынове, то от сих мест у вас не было; тыя бо дни божественные правила святых Отцов повелевают православным крестьянам чисто хранить ¹⁹⁰⁷ , а мяса и млека не ясти никакоже; понеже день великий есть Преполовенья праздника Владычнего, еже и повезде во православных христианах тыя дни чисто хранятся, и мяса и млека не ядят ¹⁹⁰⁸ ; а другый день сетовальный нам о убийстве и о усекновении честной главы Иоанна Предтечи.

А что, сынове, пишете, что Устретение Господа нашего Иисуса Христа, или Обретение честной главы Иоанна Предтечи причтется в среду или в пяток сыропустной недели: ино в тыя дни, по божественному уставу, повелено литурию совершать Великого Иоанна Златоустого. ¹⁹⁰⁹

А что пишете о Благовещении пречистой Богородицы, аже причтется в великую пятницу: ино литургию пети Златоустого, также и в неделю Цветную, и в понедельник и во вторник и в среду; а в великий четверток или в субботу причтется, ино литургию петь Великого Василия.

А что ми, сынове, пишете о Воздвижении честного Креста, что в канон дни и в самый тый день ¹⁹¹⁰ мяса не ядят: ино, сынове, по уставу, в канон того дни мяса ясть, а в самое Воздвижение не ясть. А крест воздвизать преже на восток, на четыре страны, а пятое паки последи воздвигнуть на восток же, а глаголя на всяко воздвизание, о православии, «Господи помилуй», 100. А в неделю, коли с крестами ходят соборы, ино чтется Евангелие к востоку, а и всегда.

А что, сынове, пишете о мефимоне, что петь в великую субботу: ино по уставу, не поется мефимон по церквах в великий четверг вечер, и в великую пятницу, и в великую субботу, но поются навечерницы в кельях: а на нощь великой субботы Деяния Апостольские в церквах чрез всю нощь чтутся, и каноны Спасовы нагробные и чтения.

А что ми, сынове, пишете: у кого сын духовный, по греху, напрасно умрет; но аще по греху умрет и напрасно, а не от своих рук, или нужно утонет, тех по закону погрести, и петь над ними, и поминать их в святых службах. А который от своих рук погубится, удавится или ножом избодется, или в воду себя ввержет: ино, по святым правилам, тех не велено у церквей хоронить, ни над ними петь, ни поминать, но в пустом месте в яму вложив, закопать; сотворит же о душах их Господь, якоже сам весть, по своим неизреченным судьбам, заньже святые Отцы именуют тех самовольной жертвой, даема не Богу.

А что ми, сынове, пишите, что который человек нем родится, дать ли ему святое причастие: ино, сынове, познав по его житию ¹⁹¹¹ , и како будет было прихождение его к церкви Божьей, ино рассудив, и святое причастиe дать; а в болести аще онемеет человек, ино также по прежнему его смотривше житию ¹⁹¹² , и по покаянию, рассудив по достоянию, и дать святое причастие.

А что ми, сыново, пишете, что из немецких земель приходят к вам что потребное, вино или хлеб или овощ: ино, сынове, очистив то молитвой от иерея, и подобает ясть и пить.

А что ми, сыново, пишете, что человек от своих рук пустить пса на зверя, или птицами вержет на птицу: ино, сынове, из того как исходит кровь, и от того лова ядят везде из пошлины; а что в силах или в прибоях удавится, без крови, того не повелевают святые Отцы ясть. И завещает сице о сих 63 правило святых Апостолов, к сему же и 67 правило шестого собора, глаголя сице. ¹⁹¹³ «Мерзко и бесчеловечное явленне быть мнится, еже не преже источить крови от бессловесных животных, иже мяса того хотящим вкушать; возбраняет же и зверя ясть, умерщвленного или удавленного. Аще бо и по потопе Бог повеле человекам, якоже всякого злака, ясти мяса бессловесных животин: но мяса в крови в душу не ясти возбрани: кровь бо вместо души в бессловесных животин имеет силу; сего ради и Апостолы, в Деяниях, с идолослужительным, блудом, и от удавленного блюстись узаконоположиша верным. А иже сию заповедь яко малу сущу мнящимся быть преступлению ¹⁹¹⁴ , аще убо клирики суть, извержению осуждены суть, аще ли миряне суть, проклятию осуждаются. Латыне же с иными своими непокорствами и сего правила уничижающе, бесстыдно едят давленины. 57-е же новоуставленное узаконение Льва Царя Мудрого повелевает сице: «Иже продает или ест удавленное, или аще каковое приобщение крови сущи, казнивше опозорствовать, и брады остризать и бесчествовать, и заточению осуждать повелеваем; а иже таковые вины достойные не творящих отмщение властеле и судья, десятью литр злата повинные да будут».

10-е правило 4-го собора глаголет, и 20-е правило ¹⁹¹⁵ : «В двою граду церквах клирошанину быти, рассдивше, не подобает быть; а иже се творящие ниспадают от своего степени. Се же не возбраняет иже в едином, граде, на двух церквах, учиненном бывшим клирошаном». И 15 правило седьмого собора в славных градах единому клирошанину устроену быть в двух церквах, ради скверноприбыточества, возбраняет, волю же дает сему быть токмо в меньших местах, внешних, за еже быть тем оскудным людьми: ибо «аще не изобильство будеть, рече, оного клирошанина житие единой церкви приход ¹⁹¹⁶ , и не ленится, попечение имеет о своем изобильстве, добро начинание творит, и тому и иным довлеет от него приноса, странным же и приходящим к нему». «Надобия мои, рече Апостол, и сущим со мной послужиша руки cии». Cия же вся претвори временное и вещам преложение. ¹⁹¹⁷

Слышание же мое, еже иное действуются в вас, яже возбраняема суть божественными правилами, отлученная резоимания, еже убо о сих глаголет 44 правило святых Апостолов ¹⁹¹⁸ : «Аще епископ, или поп, или диакон, дая кому в заем сребро или злато, и лихву емля, или да престанет, или да извержется, повелеваем». Яко убо паче се потребно есть смотриться, еда како по евангельскому слову научены быхом жить, сугубное подъимем осуждение, таковому лакомству дерзнувше работать, якоже и древний закон возбраняет; ов ¹⁹¹⁹ убо учит нас, глаголя: не лихвой даси сребро свое брату своему». Иезекиль же паки в больших вин злым полагает ¹⁹²⁰ , и резы имать, или лихоимство; рыдает же Исаия, глаголя: «лесть на лесть, и лихву зря на лихву», и Песнописец же о граде исполнившемся злым, угобзовану ему сущу, рече: «не оскуде от пути его лихва и лесть». Господь же глаголет: «хотящему от тебе в заим [взять], не отвратись; в заим давайте, рече, от них же не уповайте взять, милуя бо нища, в заим дает Богу»: и тот дар убо есть – за ненадежда взятия, заемное же – ради Владычнего любочестия ¹⁹²¹ ; изобильно бо весть иже сице творящих, и многосугубные дает воздаяния. 17-е же правило 1-го сбора: «Всякий клирошанин и всяк иже правила проходяй, аще таковая творит, извержению повинна повелевает; инока же тако творяща от церкви отлучать, по глаголющему словеси: «сребра своего не даст в лихву», и иже лихоимцы суще, и скверноприбыточество гонящи и лихвы просящи на должники. Таковая бо и 10-е правило собора глаголет: «или да престанут, или да извергутся клирики лихоимцы бывшие», повелевает. ¹⁹²² Великий же Василий в 14-м правиле глаголет: «Аще кто клирик лихву емляй, рече, аще производит неправедного прибытка нищим расточить, таже потом в любоимения сохраниться начнет болезни, прият да будет на священство, також и инок прият да будет церкви Христовой». Понеже и инде речено быть: «земледелатель, клас вземши, семя паки под корень просыплет; заимодавец же и плоды имает у себе, и не останется первых: без земли сеет, и жнет не сеявши; сего ради меди и злату, подвиг чрез естества бываемым, иже по естеству ражается неплодна ражаемая». ¹⁹²³

И сие все, чада моя, пишу вам, ради вашего уверения и вашей паствы, да богоугодно предстанете пред Господом, створше воля его. А что у вас ¹⁹²⁴ , сынове, будет и о иных о всех о своих делах, присылайте ко мне незазорно: хочет бо, благодатью Христовой, вся исполнена быть от нашего смирения, елико получихом от Господа. А Божья благодать и милость, и молитва моя благословение мое да будет с вами и с вашей паствой. А дана грамота си на Москвe, месяца сентября в 23 день, в лето 6925, индикта 10.