Азбука веры » Би́блия » משלי » гл.2

משלי, Глава 2

Толкования

Толкования главы

2:1

2:2

см.:Лк.8:18;

2:3

2:4

см.:Мф.13:44-46;

2:5

2:6

см.:3Цар.3:9:12;Иов.32:8;Прем.7:15;Кол.2:3;

2:7

см.:Пс.83:12;

2:8

2:9

2:10

2:11

2:12

2:13

см.:Иов.23:14;Ин.3:19;

2:14

2:15

2:16

2:17

2:18

2:19

2:20

2:21

см.:Пс.36:9;Мф.5:5;

2:22

см.:Иов.18:17;

Еврейский

Языки

בְּנִי אִם־תִּקַּח אֲמָרָי; וּמִצְוֹתַי, תִּצְפֹּן אִתָּךְ׃

לְהַקְשִׁיב לַחָכְמָה אָזְנֶךָ; תַּטֶּה לִבְּךָ, לַתְּבוּנָה׃

כִּי אִם לַבִּינָה תִקְרָא; לַתְּבוּנָה, תִּתֵּן קוֹלֶךָ׃

אִם־תְּבַקְשֶׁנָּה כַכָּסֶף; וְכַמַּטְמוֹנִים תַּחְפְּשֶׂנָּה׃

אָז, תָּבִין יִרְאַת יְהוָה; וְדַעַת אֱלֹהִים תִּמְצָא׃

כִּי־יְהוָה יִתֵּן חָכְמָה; מִפִּיו, דַּעַת וּתְבוּנָה׃

וְצָפַן (יִצְפֹּן) לַיְשָׁרִים תּוּשִׁיָּה; מָגֵן, לְהֹלְכֵי תֹם׃

לִנְצֹר אָרְחוֹת מִשְׁפָּט; וְדֶרֶךְ חֲסִידוֹ (חֲסִידָיו) יִשְׁמֹר׃

אָז, תָּבִין צֶדֶק וּמִשְׁפָּט; וּמֵישָׁרִים, כָּל־מַעְגַּל־טוֹב׃

כִּי־תָבוֹא חָכְמָה בְלִבֶּךָ; וְדַעַת, לְנַפְשְׁךָ יִנְעָם׃

מְזִמָּה תִּשְׁמֹר עָלֶיךָ, תְּבוּנָה תִנְצְרֶכָּה׃

לְהַצִּילְךָ מִדֶּרֶךְ רָע; מֵאִישׁ, מְדַבֵּר תַּהְפֻּכוֹת׃

הַעֹזְבִים אָרְחוֹת יֹשֶׁר; לָלֶכֶת, בְּדַרְכֵי־חֹשֶׁךְ׃

הַשְּׂמֵחִים לַעֲשׂוֹת רָע; יָגִילוּ, בְּתַהְפֻּכוֹת רָע׃

אֲשֶׁר אָרְחֹתֵיהֶם עִקְּשִׁים; וּנְלוֹזִים, בְּמַעְגְּלוֹתָם׃

לְהַצִּילְךָ מֵאִשָּׁה זָרָה; מִנָּכְרִיָּה, אֲמָרֶיהָ הֶחֱלִיקָה׃

הַעֹזֶבֶת אַלּוּף נְעוּרֶיהָ; וְאֶת־בְּרִית אֱלֹהֶיהָ שָׁכֵחָה׃

כִּי שָׁחָה אֶל־מָוֶת בֵּיתָהּ; וְאֶל־רְפָאִים, מַעְגְּלֹתֶיהָ׃

כָּל־בָּאֶיהָ לֹא יְשׁוּבוּן; וְלֹא־יַשִּׂיגוּ, אָרְחוֹת חַיִּים׃

לְמַעַן, תֵּלֵךְ בְּדֶרֶךְ טוֹבִים; וְאָרְחוֹת צַדִּיקִים תִּשְׁמֹר׃

כִּי־יְשָׁרִים יִשְׁכְּנוּ־אָרֶץ; וּתְמִימִים, יִוָּתְרוּ בָהּ׃

וּרְשָׁעִים מֵאֶרֶץ יִכָּרֵתוּ; וּבוֹגְדִים, יִסְּחוּ מִמֶּנָּה׃ פ