Азбука веры » Би́блия » יונה » гл.2

יונה, Глава 2

Толкования

Толкования главы

2:2

2:7

2:9

Еврейский

Языки

וַיְמַן יְהוָה דָּג גָּדוֹל, לִבְלֹעַ אֶת־יוֹנָה; וַיְהִי יוֹנָה בִּמְעֵי הַדָּג, שְׁלֹשָׁה יָמִים וּשְׁלֹשָׁה לֵילוֹת׃

וַיִּתְפַּלֵּל יוֹנָה, אֶל־יְהוָה אֱלֹהָיו; מִמְּעֵי הַדָּגָה׃

וַיֹּאמֶר, קָרָאתִי מִצָּרָה לִי אֶל־יְהוָה וַיַּעֲנֵנִי; מִבֶּטֶן שְׁאוֹל שִׁוַּעְתִּי שָׁמַעְתָּ קוֹלִי׃

וַתַּשְׁלִיכֵנִי מְצוּלָה בִּלְבַב יַמִּים, וְנָהָר יְסֹבְבֵנִי; כָּל־מִשְׁבָּרֶיךָ וְגַלֶּיךָ עָלַי עָבָרוּ׃

וַאֲנִי אָמַרְתִּי, נִגְרַשְׁתִּי מִנֶּגֶד עֵינֶיךָ; אַךְ אוֹסִיף לְהַבִּיט, אֶל־הֵיכַל קָדְשֶׁךָ׃

אֲפָפוּנִי מַיִם עַד־נֶפֶשׁ, תְּהוֹם יְסֹבְבֵנִי; סוּף חָבוּשׁ לְרֹאשִׁי׃

לְקִצְבֵי הָרִים יָרַדְתִּי, הָאָרֶץ בְּרִחֶיהָ בַעֲדִי לְעוֹלָם; וַתַּעַל מִשַּׁחַת חַיַּי יְהוָה אֱלֹהָי׃

בְּהִתְעַטֵּף עָלַי נַפְשִׁי, אֶת־יְהוָה זָכָרְתִּי; וַתָּבוֹא אֵלֶיךָ תְּפִלָּתִי, אֶל־הֵיכַל קָדְשֶׁךָ׃

מְשַׁמְּרִים הַבְלֵי־שָׁוְא; חַסְדָּם יַעֲזֹבוּ׃

וַאֲנִי, בְּקוֹל תּוֹדָה אֶזְבְּחָה־לָּךְ, אֲשֶׁר נָדַרְתִּי אֲשַׁלֵּמָה; יְשׁוּעָתָה לַיהוָה׃ ס

וַיֹּאמֶר יְהוָה לַדָּג; וַיָּקֵא אֶת־יוֹנָה אֶל־הַיַּבָּשָׁה׃ פ