Месяцеслов с Богом святым всего лета

Благослови венец лета благости Твоея, Господи.

Царю́ Небе́сный, Уте́шителю, Ду́ше И́стины, Иже везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти, Бла́же, ду́ши на́ша.

Тропарь преподобномученице Евдокии Илиопольской, глас 8

Пра́востию у́мною ду́шу твою́ привяза́вши в любо́вь Христо́ву,/ тле́нных и кра́сных и вре́менных забы́тием претекла́ еси́, /я́ко Сло́ва учени́ца,/ поще́нием стра́сти пе́рвее умертви́вши,/ страда́льчески второ́е врага́ посрами́ла еси́./ Тем Христо́с сугу́бых венце́в сподо́би тя,/ сла́вная Евдоки́е, преподо́бная страстоте́рпице,/ моли́ Христа́ Бо́га спасти́ся душа́м на́шим.

Кондак, глас 4

Во страда́нии твое́м до́бре подвиза́вшися,/ и по сме́рти нас освяща́еши чуде́с излия́нии, всехва́льная,/ ве́рою прибега́ющий в Боже́ственную це́рковь твою́,/ и торжеству́юще мо́лим тя, преподо́бная му́ченице Евдоки́е,/ да изба́вимся неду́г душе́вных и чуде́с благода́ть почерпе́м.

Величание

Велича́ем тя,/ страстоте́рпице Христо́ва Евдоки́е,/ и чтим честно́е страда́ние твое́,/ е́же за Христа́/ претерпе́ла еси́.

Тропарь преподобному Мартирию Зеденецкому, Великолукскому, глас 2

От ю́ности, Богоблаже́нне, Христа́ возлюби́в,/ отече́ство оста́вил еси́/ и, всех мирски́х мяте́жей уклони́вся,/ в ти́хое приста́нище пречестны́я оби́тели Богома́терни дости́гл еси́;/ отню́дуже уве́дев непрохо́дную пусты́ню,/ крестови́дною заре́ю пока́заную,/ жела́тельне ю обре́л еси́/ и, в ней всели́вся,/ и́ночествующих собра́л еси́,/ и сих уче́ньми свои́ми, я́ко ле́ствицею восхо́дною на Небо,/ трудолю́бно тща́лся еси́ возводи́ти к Бо́гу,/ Ему́же моли́ся, Богому́дре Марти́рие,/ дарова́ти душа́м на́шим ве́лию ми́лость.

Кондак, глас 8

Оте́чества, преподо́бне, и всего́ мирска́го мяте́жа уклони́тися возжеле́л еси́,/ и, в пусты́ню всели́вся,/ та́мо во блаже́ннем безмо́лвии жесто́кое житие́ показа́л еси́,/ и ча́да послуша́ния и смире́ния в нем возрасти́л еси́./ Сего́ ра́ди, дерзнове́ние стяжа́в ко Святе́й Тро́ице,/ е́же моли́тися, Богоблаже́нне, о нас, ча́дех свои́х, и́хже собра́л еси́,/ и о всех правове́рных, да зове́м ти:/ ра́дуйся, о́тче Марти́рие, безмо́лвия пусты́ннаго люби́тель.

Величание

Ублажа́ем тя,/ преподо́бне о́тче Марти́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь священномученику Феодоту, епископу Киринейскому, глас 4

И нра́вом прича́стник,/ и престо́лом наме́стник... (общий священномученику).

Кондак, глас 3

Мо́ре злове́рия обличи́л еси́/ и и́дольскаго безбо́жия лесть ве́рою правове́рия уязви́л еси́,/ и всесожже́ние Боже́ственное быв,/ чудоде́йствием ороша́еши концы́,/ о́тче святи́телю Феодо́те, Христа́ Бо́га моли́,/ дарова́ти нам ве́лию ми́лость.

Величание

Велича́ем тя,/ священному́чениче Феодо́те,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Арсению, епископу Тверскому, глас 8

Благоче́стно пожи́в во святи́тельстве,/ лю́ди просвети́л еси́ уче́нием твои́м,/ и о хра́ме Пречи́стыя вельми́ подвиза́вся,/ и люби́тель мона́хов быв,/ сего́ ра́ди от Христа́ па́ствы твоея́ вене́ц прия́л еси́./ Те́мже, я́ко апо́стольскаго престо́ла наме́стника,/ и святи́теля вели́каго чту́ще тя мо́лим, ча́да твоя́, блаже́нне:/ от всех бед изба́ви нас, я́же ко Христу́ моли́твами твои́ми,/ святи́телю Христо́в Арсе́ние о́тче наш.

Кондак, глас 8

Восприе́мши ра́достно честны́я твоя́ мо́щи, пречи́стая це́рковь,/ в ню́же че́стно вноси́ми мно́жеством священномона́хов и кня́зи благове́рными,/ и я́же прие́мше, я́ко сокро́вище многоце́нное./ Те́мже и мы ны́не твоея́ огра́ды слове́сныя о́вцы,/ о́крест ра́ки твоея́ предстоя́ще,/ любе́зно вопие́м ти:/ не забу́ди чад твои́х, о́тче,/ и́хже му́дре собра́л и возлюби́л еси́,/ я́ко да зове́м ти:/ ра́дуйся, святи́телю Арсе́ние, па́стырю и учи́телю наш.

Величание

Велича́ем тя,/ святи́телю о́тче Арсе́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Божией Матери ради иконы Ее «Державная», глас 4

А́нгелов ли́цы¹ благогове́йно Тебе́ слу́жат,/ и вся Небе́сныя си́лы немо́лчными гла́сы Тя ублажа́ют,/ Богоро́дице Де́во,/ усе́рдно мо́лим Тя, Влады́чице,/да пребу́дет Боже́ственная благода́ть/ на честне́й ико́не Твое́й Держа́вней,/ и светоза́рный луч сла́вы чуде́с Твои́х да нисхо́дит от нея́/ на всех, с ве́рою Тебе́ моля́щихся/ и вопию́щих Бо́гу: Аллилу́иа.

Ин тропарь, глас тойже

Гра́да Сио́нска взыску́юще,/ под Твой покро́в, Де́во Чи́стая, днесь притека́ем,/ и никто́же возмо́жет на ны,/ я́ко не́сть град си́лен, а́ще не Су́щаго Бо́га,/ и несть и́на кре́пость, а́ще не ми́лость Влады́чицы Де́вы.

Ин тропарь, глас тойже

Век скончава́ется, любо́вь оскудева́ет,/ побе́ду лука́вый торжеству́ет,/ и кто нам помощи́ мо́жет, а́ще не Ты, Де́во, Чу́дная Ма́ти,/ огради́ши Кресто́м Сы́на Твоего́.

Кондак, глас 8

Взбра́нной Воево́де победи́тельныя пе́сни прино́сим,/ я́ко дарова́ся нам держа́ва Твоя́, и ничесо́же устраши́мся,/ не от ми́ра бо спасе́ние на́ше,/ но Превознесе́нныя Влады́чицы милосе́рдием огражда́емся/ и тому́ днесь ра́дуемся,/ я́ко прии́де Засту́пница на стра́жу земли́ Своея́.

Ин кондак, глас тойже

Взбра́нной Воево́де, Засту́пнице на́шей Держа́вней,/ пе́сни благода́рственныя прино́сим о дарова́нии нам ико́ны Ея́ святы́я,/ е́юже огражда́еми, ничесо́же устраши́мся,/ не от челове́к бо спасе́ние на́ше,/ но Преблагослове́нныя Влады́чицы милосе́рдием./ Те́мже днесь ра́дуемся и пра́зднуем све́тло,/ я́ко прии́де Держа́вная на стра́жу земли Своея́.

Ин кондак, глас тойже

Избра́нней от всех родо́в Засту́пнице ро́да христиа́нскаго,/ покро́вом Своея́ бла́гости покрыва́ющей стра́ну на́шу правосла́вную,/ благода́рственныя пе́ния прино́сим Ти, Влады́чице,/ о явле́нии нам чу́дныя ико́ны Твоея́ Держа́вныя./ Ты же, я́ко Всеми́лостивая Засту́пница всех, с ве́рою к Тебе́ притека́ющих,/ от вся́ких нас бед свободи́, да зове́м Ти:/ ра́дуйся, Ма́терь Бо́жия Держа́вная,/ Засту́пнице Усе́рдная ро́да христиа́нскаго.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим Держа́вный о́браз святы́ни Твоея́,/ и́мже подае́ши ве́лию ми́лость/ всем, с ве́рою к нему притека́ющим.

Ино Величание

Досто́йно есть/ велича́ти Тя... (общее Богородице).

Или сие:

Досто́йно есть/ велича́ти Тя,/ Богоро́дице,/ земли́ Ру́сския Ца́рицу Небе́сную/ и люде́й правосла́вных/ Влады́чицу Держа́вную.

Тропарь мученикам Евтропию, Клеонику и Василиску, глас 4

Му́ченицы Твои́, Го́споди... (общий мученикам).

Ин тропарь, глас 1

Боле́зньми святы́х, и́миже о Тебе́ пострада́ша,/ умоле́н бу́ди, Го́споди,/ и вся на́ша боле́зни исцели́,/ Человеколю́бче, мо́лимся.

Кондак, глас 8

Светильницы све́тлии... (общий мученикам).

Величание

Велича́ем вас,/ страстоте́рпцы святи́и Евтро́пие, Клеони́ко и Васили́ско,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Герасиму, иже на Иордане, глас 8

В тебе́, о́тче, изве́стно... (общий преподобному).

Кондак, глас 4

Возгоре́вся раче́нием го́рним,/ же́стость пусты́ни Иорда́новы па́че всех ми́ра сла́дких предпоче́л еси́./ Отону́дуже повину́ся тебе́ зверь да́же до сме́рти, о́тче,/ послу́шне и жа́лостне на гро́бе твое́м сконча́ся,/ просла́вльшу тя та́ко Богу,/ к Нему́же моля́ся, и о нас,/ о́тче Гера́симе, помина́й.

Величание

Ублажа́ем тя,/ преподо́бне о́тче Гера́симе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь благоверному князю Даниилу Московскому, глас 4

Княже́ния твоего́ сла́ву отложи́в,/ озаря́емый Боже́ственною благода́тию,/ Богому́дре кня́же Дании́ле,/ весь ра́зум в се́рдце от су́етнаго ми́ра сего́/ к Зижди́телю неукло́нно возложи́л еси́,/ и я́ко звезда́ на восто́це Росси́йскаго госуда́рства просия́л еси́,/ целому́дрием же и равноа́нгельным твои́м житие́м/ тече́ние до́бре соверша́я,/ ве́ру соблю́л еси́ непоро́чну./ Тем и по сме́рти просла́ви тя Бог в чудесе́х,/ я́ко источа́еши исцеле́ния ве́рно притека́ющим к честне́й ра́це твое́й;/ сего́ ра́ди днесь пра́зднуем успе́ние твое́ лю́дие твои́./ Ты же, я́ко и́маши дерзнове́ние ко Христу́/ моли́ спасти́ оте́чество твое́,/ и ми́рней бы́ти держа́ве насле́дия твоего́.

Ин тропарь, глас 5

Благодатноро́дный сын Твой,/ Всетвори́телю Го́споди Бо́же наш,/ щедрототво́рством христоподража́тельный оте́ц Дании́л,/ в ева́нгельском запове́дании и благоразу́мном свое́м житии́/ чудесодарова́ния и Небе́сная со святы́ми пребыва́ния восприя́т/ от Тебе́, Спаси́теля на́шего Христа́ Иису́са./ Возыме́в бо Твое́ Боже́ственное посо́бие,/ суетномирски́я и плотоо́гненныя стра́сти упразни́/ и враги́ де́моны, неви́димыя и ви́димыя злотво́рцы/ и разори́тели своего́ великокня́жескаго насле́дия, победи́./ Того́ моли́твами спаси́ вся,/ зову́щия Тебе́: Аллилу́иа.

Ин тропарь, глас тойже

Благосла́вная похвало́ и благосве́тлый ве́нче/ ца́рствующаго гра́да Москвы́,/ всеблаже́нне Дании́ле, о́тче наш./ По́двигом бо до́брым подвиза́вся,/ богоуго́дное тече́ние соверши́л еси́,/ всера́достныя несконча́емыя жи́зни сподо́блься,/ зри́ши Го́спода Бо́га,/ Ему́же моли́ся,/ благочеству́ющим тя и лобыза́ющим богохрани́мыя твоя́ и чудесото́чныя мо́щи,/ спасе́ние и насле́дие Ца́рства Небе́снаго дарова́ти.

Ин тропарь, на обретение мощей, глас 3

Яви́лся еси́ в стране́ на́шей,/ я́ко звезда́ пресве́тлая,/ благове́рный кня́же Дании́ле,/ луча́ми све́та твоего́ озаря́я град твой и оби́тель твою́,/ лю́дем правосла́вным побо́рник еси́,/ пле́нным свободи́тель и ни́щим защи́титель,/ моли́ Христа́ Бо́га/ держа́ве Росси́йстей дарова́ти мир/ и спасти́ ду́ши на́ша.

Кондак, глас 4

Избра́нный Бо́гом от чресл роди́тельских/ и воспи́танный от младе́нчества в зако́не Госпо́дни в му́жа соверше́нна/ и про́мыслом Вы́шняго, имени́таго гра́да Москвы́ насле́дие кня́жества прие́м,/ ве́рен строи́тель благочести́вым лю́дем твои́м показа́лся еси́, Богоблаже́нне Дании́ле,/ и́хже о́бразом свои́м наставля́я/ и поуча́я за́поведем Госпо́дним вы́ну,/ путе́м, веду́щим в живо́т ве́чный, при́сно ше́ствуя,/ Небе́снаго Ца́рства дости́гл еси́,/ иде́же со а́нгельскими водворя́лся ли́ки, пое́ши Бо́гу: Аллилу́иа.

Ин кондак, глас 8

Я́ко Богонасажде́нное и Богоразу́мное дре́во в Росси́и возра́сл еси́/ и многопло́дием Богоподо́бных доброде́телей твои́х утучня́еши серца́ благочести́вых./ Те́мже в кре́пости по́мощи твоея́, преблаже́нне Дании́ле,/ от вся́ких нас бед свободи́,/ да пое́м при́сно: Аллилу́иа.

Ин кондак, на обретение мощей, глас 6

Е́же по о́бразу соблю́л непрело́жно,/ и я́же в ми́ре тле́нная оста́вив,/ со а́нгельскими ли́ки предстои́ши Христу́,/ преподо́бне кня́же Дании́ле,/ ника́коже забыва́я чад твои́х,/ но ми́лостивно посеща́я и глаго́ля им:/ а́з е́смь с ва́ми и никто́же на вы.

Величание

Ублажа́ем тя,/ преподо́бне о́тче наш кня́же Дании́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь благоверному князю Вячеславу Чешскому, глас 4

Днесь а́нгели и челове́цы ра́дуются,/ Не́бо и земля́ сла́вят па́мять твою́, уго́дниче Бо́жий Вячесла́ве,/ и мы, гре́шнии, усе́рдно тебе́ вопие́м:/ моли́ о нас Ми́лостиваго Бо́га/ изба́витися от вся́кия беды́, неду́гов и скорбе́й,/ и от всех ви́димых и неви́димых враго́в,/ чту́щим всесвяту́ю па́мять твою́.

Ин тропарь, глас 1

Благочести́ваго ко́рене отра́сль пречестна́я,/ святы́й благове́рный вели́кий кня́же Вячесла́ве,/ побо́рник быв Восто́чныя в Че́хах Це́ркве/ и прибе́жище те́плое убо́гим и си́рым,/ я́ко вторы́й А́вель, незло́биве претерпе́л еси́ смерть,/ во главу́ усече́н руко́ю бра́та пред враты́ церко́вными./ Те́мже и всели́ тя Христо́с,/ я́ко испове́дника пра́выя ве́ры во оби́тели Небе́сныя,/ просла́ви всечестну́ю па́мять твою́ в слове́нских язы́цех/ и дарова́ тя ско́раго помо́щника всем, почита́ющим тя./ Моли́ся о лю́дех твои́х ко Го́споду,/ да обрати́т их в ло́но Правосла́вныя Це́ркве и спасе́т ду́ши на́ша.

Ин тропарь, глас 4

Днесь а́нгели с челове́ки ра́дуются вку́пе о́бщим весе́лием,/ Не́бо и земля́ све́тло лику́ют в па́мять твою́, свя́те./ И мы, гре́шнии, приле́жно ти́ вопие́м:/ помоли́ся к Влады́це о нас,/ изба́вити ны от напа́сти/ ви́димых и неви́димых враг,/ чту́щих пресве́тлую па́мять твою́.

Кондак, глас 1

С ли́ки а́нгельскими предстоя́,/ блаже́нне кня́же Вячесла́ве,/ наслажда́ешися Боже́ственныя и неизрече́нныя добро́ты/ и, отту́ду благоде́тельныя да́ры поче́рп чуде́с,/ всем притека́ющим ве́рою под твою́ святы́ню,/ источа́еши цельба́м дарова́ние.

Величание

Ублажа́ем тя,/ благове́рный кня́же Вячесла́ве,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Герасиму Вологодскому, глас 4

Яко безпло́тным единонра́вен,/ и преподо́бным соо́бщник, преподо́бне Гера́симе,/ еди́н на Во́логду прише́л еси́,/ прорица́я ту бы́ти гра́ду вели́кому/ и в нем святе́й це́ркви воздви́гнутися/ и святи́телем водвори́тися./ Те́мже и сподо́бился еси́/ близ того́ погребе́н бы́ти/ и по преставле́нии свое́м мно́гими чудесы́ исцеле́ний просия́л еси́./ Моли́ся всегда́ о нас,/ я́ко да обря́щем от Бо́га ми́лость.

Кондак, глас 8

От ю́ности, прему́дре, мирски́й мяте́ж оста́вил еси́,/ и многоце́нныя ри́зы тле́нныя возненави́дел еси́,/ и святу́ю оде́жду а́нгельскую любе́зно восприя́л еси́,/ и ту соблю́л еси́ в чи́стой со́вести/ и во благи́х де́лех, и до преставле́ния своего́/ бысть Боже́ственнаго ра́ди жития́ Тро́ицы селе́ние/ и просвети́л еси́ ве́рою приходя́щия к тебе́;/ те́мже вси зове́м ти:/ ра́дуйся, о́тче Гера́симе всечестны́й.

Величание

Ублажа́ем тя,/ преподо́бне о́тче Гера́симе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь благоверному великому князю Георгию (Юрию) Владимирскому, глас 8

На высоте́ вели́каго княже́ния седя́,/ яви́лся еси́ благоче́стием и ве́рою сия́я оте́честву своему́, я́ко со́лнце;/ по Святе́й Тро́ице ре́вностнию разже́гся,/ и за ве́ру кре́пко пострада́в, кровь твою́ пролия́л еси́./ Тем и отсече́нная твоя́ за Христа́ глава́ свиде́тельствует я́ве о тебе́,/ приле́пшая по сме́рти к телеси́ твоему́:/ с не́юже и до днесь нетле́нны пребыва́ют мо́щи твоя́,/ от ни́хже источа́еши исцеле́ния душа́м и телесе́м на́шим./ Но я́ко дерзнове́ние име́я ко Христу́, страстоте́рпче Гео́ргие,/ непреста́нно моли́ держа́ву твою́ и сро́дник твои́х/ безвре́дну сохрани́ти моли́твами твои́ми.

Кондак, глас тойже

Христо́ве сме́рти подо́бяся,/ и Того́ испи́та ча́шу возжеле́в, я́ко Живота́,/ за Него́же му́жески подвиза́лся еси́, презре́в земно́е ца́рство,/ от безбо́жных ва́рвар пострада́в до сме́рти,/ Гео́ргие Богому́дре,/ тем моли́ спасти́ся ве́рным лю́дем моли́твами твои́ми.

Величание

Велича́ем тя,/ святы́й благове́рный кня́же Гео́ргие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь мученику Конону Исаврийскому, глас 4

Я́ко де́вственника преди́вна/ и му́ченика непоколеби́ма,/ блаже́ннаго страда́льца,/ на бесы́ власть прие́мшаго,/ Ко́нона пе́сньми восхвали́м и к нему́ возопии́м:/ моли́ Христа́ Бо́га,/ да спасе́т ду́ши на́ша.

Ин тропарь, глас тойже

Му́ченик Твой, Го́споди... (общий мученику).

Кондак, глас 3

Чистото́ю я́ко а́нгел на земли́ пожи́в,/ отону́дуже собесе́дник а́нгелом бы́ти сподо́бился еси́,/ и роди́тели ко Христо́ву позна́нию приве́л еси́,/ и, Еди́наго Бо́га в Тро́ице испове́дав,/ пострада́л еси́ до кро́ве,/ му́чениче Ко́ноне,/ моли́ Его́ непреста́нно о всех нас.

Величание

Велича́ем тя,/ страстоте́рпче святы́й Ко́ноне,/ и чтим честна́я страда́ния твоя́,/ я́же за Христа́/ претерпе́л еси́.

Тропарь благоверным князьям Феодору Смоленскому и чадам его Давиду и Константину, Ярославским чудотворцам, глас 8

Я́ко зве́зды многосве́тлыя от ю́ности возсия́вше,/ освети́ли есте́ сердца́ ве́рных пренесе́нием честны́х моще́й ва́ших,/ во пло́ти я́ко а́нгели на земли́ показа́стеся,/ поще́нием насажде́ни бы́сте, я́ко древа́ при вода́х воздержа́ния,/ напое́ни струя́ми слез ва́ших, и скве́рну омы́сте;/ сего́ ра́ди яви́стеся прия́телища Бо́жия Ду́ха,/ Фео́доре, и Дави́де, и Константи́не,/ моли́те Христа́ Бо́га спасти́ся душа́м на́шим.

Ин тропарь, глас 4

Измла́да яви́стеся, святи́и,/ Богому́дре Феодо́ре и блаже́нне Дави́де с Константи́ном сла́вным,/ Боже́ственнии сосу́ди, избра́ннии Бо́гови./ Ны́не же источа́ете нам мно́га исцеле́ния от честны́х моще́й ва́ших,/ вся е́реси потопля́юще,/ и спаса́юще при́сно град свой,/ и всех ве́рных сохраня́юще невреди́мо/ от ви́димых и неви́димых враг./ Те́мже ве́рою мо́лим вас, святи́и:/ моли́те Христа́ Бо́га/ в ми́ре сохрани́тися нам и спасти́ ду́ши на́ша.

Ин тропарь, глас тойже

И́же от ю́ности Христо́вы любве́/ прилепи́вшеся усе́рдно, святи́и,/ зако́ны и оправда́ния Того́ сохраня́юще,/ отню́дуже и чуде́сными дарова́нии обогати́стеся,/ исцеле́ния источа́ете и́же ве́рою вас почита́ющих,/ те́мже моли́те Христа́ Бо́га/ спасти́ся душа́м на́шим.

Кондак, глас 8

Богому́дренно пресели́стеся, святи́и,/ во град, при́сно доброде́тельми цвету́щий,/ в жи́зни сей принося́ще Бо́гови плоды́ бла́ги,/ преподо́бне Фео́доре и блаже́нне Дави́де с Константи́ном сла́вным,/ и яви́стеся, я́ко многоцвету́щая ра́йская древеса́ жи́зни/ и я́ко многосве́тлыя зве́зды, в ми́ре сия́юще благода́тию,/ в доброде́тели испра́вивше жизнь свою́,/ и сего́ ра́ди получи́сте живо́т ве́чный на Небесе́х./ Те́мже благода́рственно вам зове́м:/ ра́дуйтеся, всеми́рнии свети́льницы и гра́ду на́шему Яросла́влю вели́кое утвержде́ние.

Величание

Велича́ем вас,/ святи́и благове́рнии кня́зие Фео́доре, Дави́де и Константи́не,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь преподобномученику Адриану Пошехонскому, Ярославскому, глас 4

Аще и сме́ртию ну́ждною* у́мерл еси́,/ а́ще и сме́ртная сень внеза́пу на́йде на тя,/ оба́че, я́ко де́ву му́друю ду́шу твою́ обре́те Христо́с/ и в черто́г Свой Небе́сный введе́,/ и со святы́ми всели́,/ чудесы́ возвели́чив и́мя твое́,/ Адриа́не му́чениче преподо́бне,/ Ему́же моли́тву о нас сотвори́,/ па́мять твою́ почита́ющих.

Ин тропарь, глас тойже

Христо́ву му́ченику тезоимени́тый,/ мно́ги труды́, преподо́бне, подъя́л еси́ терпе́нием твои́м,/ и убие́нием от окре́стных ну́ждную смерть претерпе́л еси́,/ и ны́не, о преподо́бный му́чениче о́тче Адриа́не,/ моли́ душе́вныя и теле́сныя на́ша стра́сти обяза́ти,/ и́же ве́рою и любо́вию почита́ющих обре́тение честны́х моще́й твои́х/ и всечестну́ю па́мять твою́.

Ин тропарь, глас тойже

Христо́ву му́ченику тезоимени́т быв, преподо́бне,/ мно́гия труды́ подъя́л еси́ в жи́зни вре́менней,/ оби́тель и́ноческую созида́я в пусты́ни,/ и́деже от злых разбо́йников да́же до кро́ве пострада́л еси́/ и му́ченическую смерть от них прия́л еси́,/ Адриа́не сла́вне./ Чуде́с благода́тию обогати́вся,/ днесь предстои́ши всех Царю́, Христу́ Бо́гу,/ Его́же моли́ спасти́ся душа́м на́шим.

Кондак, глас тойже

Христа́ ра́ди, до́блественне, претерпе́л еси́/ и вене́ц от Не́го восприя́л еси́ страда́ния твоего́,/ приходя́щим же к тебе́ с ве́рою от честна́го гро́ба подае́ши цельбы́,/ о преподо́бне му́чениче Адриа́не приснопа́мятне,/ моли́твенниче о душа́х на́ших.

Ин кондак, глас 6

Жите́йския молвы́ избежа́в, преподо́бне,/ в пусты́ню всели́лся еси́,/ и, та́мо оби́тель и́ноков возгради́в,/ последи́ от разбо́йник му́ченически пострада́л еси́,/ и ны́не сия́еши нетле́нием и чудесы́,/Адриа́не многострада́льне,/ моли́твенниче о душа́х на́ших.

Величание

Ублажа́ем тя,/ преподобному́чениче Адриа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее «Воспитание», глас 4

Воспита́вшейся во хра́ме во свята́я святы́х,/ оде́янней ве́рою и прему́дростию и безме́рным де́вством,/ Архистрати́г Гаврии́л принесе́ с небесе́ целова́ние/ и е́же ра́дуйся, ра́дуйся, Благослове́нная,/ ра́дуйся, Препросла́вленная, Госпо́дь с Тобо́ю.

Тропарь 42-м мученикам Амморейским, глас 4

Му́ченицы Твои́, Го́споди,/ во страда́ниих свои́х венцы́ прия́ша нетле́нная от Тебе́, Бо́га на́шего;/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости,/ тех моли́твами спаси́ ду́ши на́ша.

Кондак, глас тойже

На земли́ Христа́ ра́ди страда́льчествовавше,/ я́вльшеся благочести́вии вене́чницы,/ Небеса́ прия́сте жи́ти в ра́дости,/ вся́кую бо кознь вра́жию низложи́вше боле́зньми и кровьми́ ва́ших я́зв,/ хва́лящим свы́ше при́сно грехо́в разреше́ние подава́ете.

Ин кондак, глас 2

Новоявле́нныя зве́зды ве́ры,/ за Христа́ усе́рдно пострада́вшия,/ похва́льными венцы́ досто́йне вси венча́ем,/ о нас моля́щияся Христу́,/ я́ко су́ще столпи́ и забра́ла христиа́нскаго нача́льства.

Величание

Велича́ем вас,/ страстоте́рпцы святи́и четы́редесять и два,/ во Амморе́е пострада́вшии, и чтим честна́я страда́ния ва́ша,/ я́же за Христа́/ претерпе́ли есте́.

Тропарь Кресту Господню, глас 1

Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя/ и Твое́ сохраня́я Кресто́м Твои́м жи́тельство.

Кондак, глас 7

Не ктому́ пла́менное ору́жие/ храни́т врат Еде́мских:/ на ты́я бо найде́ пресла́вный соу́з, Дре́во Кре́стное;/ сме́ртное жа́ло и а́дова побе́да прогна́ся./ Предста́л бо еси́, Спа́се мой,/ вопия́ су́щим во а́де:/ вниди́те па́ки в рай.

Тропарь Божией Матери, ради иконы Ее, именуемой «Благодатное Небо», глас 6

Что Тя нарече́м, о Благода́тная?/ Не́бо? – я́ко возсия́ла еси́ Со́лнце Пра́вды;/ рай? – я́ко прозябла́ Цвет нетле́ния;/ Деву? – я́ко пребыла́ еси́ нетле́нна;/ Чи́стую Ма́терь? – я́ко име́ла еси́ на святы́х Твои́х объя́тиях Сы́на, всех Бо́га./ Того́ моли́ спасти́ся душа́м на́шим.

Кондак, глас тойже

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице,/ Ты нам помози́,/ на Тебе́ наде́емся/ и Тобо́ю хва́лимся,/ Твои́ бо есмы́ раби́,/ да не постыди́мся.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь Божией Матери ради иконы Ее Ченстоховская, глас 4

Непобеди́мая Побе́до,/ Влады́чице Ченстохо́вская,/дре́вняго и́же о нас благоволе́ния Самозри́тельнице,/ бу́дущаго спасе́ния Храни́тельнице,/ покая́нием соде́лай ны но́выя гряду́щему Царю́.

Тропарь священномученикам, в Херсонесе епископствовавшим, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их в ми́ре упра́ви живо́т наш.

Кондак, глас 2

Светоно́сный день наста́/ па́стырей, епи́скопствовавших све́тло в Херсо́не,/ и́хже воспева́ем пра́здник,/ пострада́вших за Христо́вы о́вцы./ Священному́ченицы, моли́те Пастыренача́льника Христа́/ и нас причести́ десна́го ове́ц стоя́ния,/ да вопие́м вам:/ ра́дуйтеся, свяще́ннии отцы́,/ за Христа́ кровь свою́ излия́вшии.

Величание

Велича́ем вас,/ священному́ченицы Христо́вы Васи́лие, Ефре́ме, Капи́тоне, Евге́ние, Ефе́рие, Елпи́дие и Агафодо́ре,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь Божией Матери ради иконы Ее «Споручница грешных», глас 4

Умолка́ет ны́не вся́кое уны́ние,/ и страх отча́яния исчеза́ет,/ гре́шницы в ско́рби се́рдца обрета́ют утеше́ние,/ и Небе́сною любо́вию озаря́ются све́тло,/ днесь бо Ма́терь Бо́жия простира́ет нам спаса́ющую ру́ку,/ и от Пречи́стаго о́браза Своего́ веща́ет, глаго́ля:/ Аз Спору́чница гре́шных к Моему́ Сы́ну,/ Сей дал Мне за них ру́це слы́шати Мя вы́ну²./ Те́мже, лю́дие обремене́ннии грехи́ мно́гими,/ припади́те подно́жию Ея ико́ны со слеза́ми вопию́ще:/ Засту́пнице ми́ра, гре́шным Спору́чнице,/ умоли́ Ма́терними моли́твами Изба́вителя всех,/ да Боже́ственным всепроще́нием покры́ет грехи́ на́ша,/ и све́тлыя две́ри ра́йския отве́рзет нам,/ Ты бо еси́ предста́тельство и спасе́ние ро́да христиа́нскаго.

Ин тропарь, глас 3

Тебе́, милосе́рдия исто́чнику при́сно теку́щему/ и Спору́чнице гре́шных, недосто́йнии раби́ Твои́, Богоро́дице,/ припа́дающе, скорбя́ще, вопие́м Ти:/ спаса́й нас от бед, Влады́чице,/ и Ма́терним Твои́м хода́тайством испроси́ всем нам ве́чное спасе́ние.

Кондак, глас 1

Честно́е Жили́ще бы́вшее/ неизрече́ннаго естества́ Боже́ственнаго/ вы́ше сло́ва и па́че ума́,/ и гре́шным еси́ Спору́чница,/ подава́вши благода́ть и исцеле́ния,/ я́ко Ма́ти всех Ца́рствующаго,/ моли́ Сы́на Твоего́,/ получи́ти нам ми́лость в День су́дный.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь преподобному Феофилакту, исповеднику, епископу Никомидийскому, глас 8

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ архиере́ев Богодухнове́нное удобре́ние,/ Феофила́кте прему́дре,/ уче́ньми твои́ми, вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.

Ин тропарь, глас 6

Тая́ся, пожи́л еси́, прехва́льне,/ но Христо́с тя показа́,/ я́ко свети́ло на све́щнице мы́сленнем,/ и скрижа́ли ти вручи́ уче́ний духо́вных,/ и́миже, святи́телю Феофила́кте,/ и нас озари́.

Кондак, глас 2

Свети́льник све́тел показа́лся еси́ в конце́х,/ святи́телю Феофила́кте,/ единосу́щна Отцу́ и Ду́ху Сло́ва ты пропове́дав,/ Боже́ственных оте́ц Собо́р уясни́л еси́,/ Тро́ице уго́дник яви́лся еси́./ Е́йже предстоя́, моли́ непреста́нно о всех нас.

Величание

Велича́ем тя,/ святи́телю о́тче Феофила́кте,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Божией Матери ради иконы Ее «Знамение» Курской-Коренной, глас 4

Я́ко необори́мую сте́ну/ и исто́чник чуде́с/ стяжа́вше Тя раби́ Твои́, Богоро́дице Пречи́стая,/ сопроти́вных ополче́ния низлага́ем./ Те́мже мо́лим Тя:/ мир гра́ду Твоему́ да́руй/ и душа́м на́шим ве́лию ми́лость.

Кондак, глас тойже

Честна́го о́браза Твоего́ зна́мение пра́зднующе/ лю́дие Твои́, Богороди́тельнице,/ и́мже ди́вную побе́ду на сопроти́вныя гра́ду Твоему́ дарова́ла еси́./ Те́мже Тебе́ ве́рою взыва́ем:/ ра́дуйся, Де́во, христиа́н похвало́.

Величание

Велича́ем Тя,/ Пресвята́я, Де́во,/ и чтим о́браз Твой честны́й,/ и́мже показа́ла еси́/ пресла́вное зна́мение.

Тропарь четыредесяти мученикам Севастийским, глас 3

Страстоте́рпцы Христо́вы четыредеся́те,/ во гра́де Севасти́йстем му́жественно пострада́вшии,/ чрез огнь и во́ду проше́дшии,/ в поко́й ве́чный вше́дшии,/ моли́теся о нас ко Го́споду,/ да жизнь ми́рну сохрани́т/ и ду́ши на́ша спасе́т, я́ко Человеколю́бец.

Ин тропарь, глас 1

Боле́зньми святы́х, и́миже о Тебе́ пострада́ша,/ умоле́н бу́ди, Го́споди,/ и вся на́ша боле́зни исцели́,/ Человеколю́бче, мо́лимся.

Ин тропарь, глас 1

Страстоте́рпцы всечестни́и,/ во́ини Христо́вы четы́редесяте,/ тве́рдии ору́жницы,/ сквозе́ бо огнь и во́ду проидо́сте/ и а́нгелом согра́ждане бы́сте,/ с ни́миже моли́теся Христу́ о и́же ве́рою хваля́щих вас./ Сла́ва Да́вшему вам кре́пость,/ сла́ва Венча́вшему вас,/ слава Подава́ющему ва́ми всем исцеле́ния.

Кондак, глас 6

Все во́инство ми́ра оста́вльше,/ на Небесе́х Влады́це прилепи́стеся,/ страстоте́рпцы Госпо́дни четы́редесять,/ сквозе́ огнь бо и во́ду проше́дше, блаже́ннии,/ досто́йно восприя́сте сла́ву с Небе́с/ и венце́в мно́жество.

Величание

Велича́ем вас,/ страстоте́рпцы святи́и четы́редесяте, в Севасти́йстем е́зере му́чившиися,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь мученику Кодрату и иже с ним, глас 4

Му́ченицы Твои́, Го́споди... (общий мученикам).

Кондак, глас 8

Свети́льницы све́тлии я́вльшеся,/ Боже́ственнии му́ченицы ... (общий мученикам).

Величание

Велича́ем вас,/ страстоте́рпцы святи́и Кодра́те со пострада́вшими,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь святителю Софронию, патриарху Иерусалимскому, глас 4

Пра́вило ве́ры... (общий святителю).

Кондак, глас 8

И́же Боже́ственною ре́вностию подви́гся,/ и и́стинных повеле́ний устне́ распросте́р,/ Церко́вная основа́ния благоузако́нив,/ и та́мо су́щим мона́шеским соста́вом преда́в,/ прему́дрый в патриа́рсех, Иерусали́мский Софро́ние,/ всему́драя словеса́ во свет изве́л еси́,/ и́миже наставля́еми зове́м ти:/ ра́дуйся, све́тлая правосла́вных похвало́.

Величание

Велича́ем тя,/ святи́телю о́тче Софро́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Евфимию, архиепископу Новгородскому, глас 4

Избра́н быв Бо́гови от ю́ности,/ святи́телю Евфи́мие,/ и сего́ ра́ди архиере́йства са́ном почте́н быв,/ упа́сл еси́ лю́ди, я́же тебе́ Бо́гом вруче́нныя,/ те́мже и по преставле́нии чуде́с дарова́ния от Го́спода прия́л еси́,/ исцеля́ти разли́чныя неду́ги./ Того́ моли́ о нас,/ соверша́ющих честну́ю па́мять твою́,/да тебе́ вси непреста́нно ублажа́ем.

Кондак, глас 8

Я́ко архиере́ем сопресто́льник,/ и святи́телем изря́дный побо́рник был еси́, святи́телю Евфи́мие,/ не преста́й сохраня́я Оте́чество твое́,/ град же и лю́ди, и́же тебе́ ве́рою почита́ющия/ и честны́м моще́м твои́м покланя́ющияся,/да велегла́сно тебе́ вси вопие́м:/ ра́дуйся, святи́телю Богому́дре.

Величание

Велича́ем тя,/ святи́телю о́тче Евфи́мие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Софронию, епископу Врачанскому, глас 1

Щито́м ве́ры вооружи́вся,/ мече́м словесе́ безбо́жныя ага́ряны посека́я,/ ста́до твое́ упасл еси́ на земли́./ В Небе́сней же оби́тели всели́вся,/ Христа́ моли́ дарова́ти наро́ду на́шему/ мир и ве́лию ми́лость.

Ин тропарь, глас 3

Бо́жиим изволе́нием архипа́стырь и учи́тель был еси́/ утвержде́нному ага́рянами на́роду твоему́/ и неусы́пен о нем к Бо́гу моли́твенник./ За ве́ру Христо́ву ревнова́вый,/ мно́жество страда́ний терпе́л еси́,/ па́ству же твою́ от нече́стия охраня́л е́си,/ в благоче́стии и чистоте́ ве́ры наставля́л еси́,/ просвеща́я ю словесы́ и списа́ньми твои́ми./ Те́мже вопие́м ти, святи́телю о́тче наш Софро́ние:/ Христу́ Бо́гу моли́ся/ дарова́ти наро́ду мир и душа́м на́шим ве́лию ми́лость.

Кондак, глас тойже

Архиере́ев похвала́ и страда́льцев украше́ние быв,/ святи́телю Софро́ние,/ доброде́тельми просла́вився,/ возсия́л еси́, я́ко со́лнце,/ нас просвеща́я и грехо́вную тьму́ неве́дения отгоня́я./ Но, я́ко име́я дерзнове́ние к Бо́гу,/ мир испроси́ душа́м на́шим и ве́лию ми́лость.

Величание

Велича́ем тя,/ святи́телю о́тче Софро́ние,/ и чти́м святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь мученику Епимаху, глас 4

Му́ченик Твой, Го́споди, Епима́х... (общий мученику).

Кондак, глас тойже

Многообра́зныя ра́ны претерпе́л еси́/ и вене́ц прие́м от Христа́ Бо́га,/ Ему́же о нас моли́ся, блаже́нне Епима́ше,/ ве́рно соверша́ющих па́мять твою́,/ да спасе́т ду́ши на́ша.

Величание

Велича́ем тя,/ страстоте́рпче святы́й Епима́ше,/ и чтим честна́я страда́ния твоя́,/ я́же за Христа́/ претерпе́л еси́.

Тропарь преподобному Софронию, затворнику Печерскому, в Дальних пещерах почивающему, глас 1

Простра́нна пути́, веду́ща в па́губу,/ блаже́нне Софро́ние, угонза́я*,/ затвори́лся еси́ в те́мне ме́сте пеще́рнем,/ иде́же день и нощь в моли́твах и слеза́х,/ и в ручно́м де́ле подвиза́лся,/ обре́л еси́ ве́чный живо́т и наслажде́ние.

Кондак, глас 4

Яви́лся еси́ дре́вним отце́м ревни́тель,/ в те́мней пеще́ре све́тлым житие́м я́сно просия́в,/ и озари́л еси́ сердца́ пою́щих тя,/ Богому́дре о́тче Софро́ние.

Ин кондак, глас 8

В те́сней и те́мней кле́ти затвори́вся,/ власяни́цею и по́ясом желе́зным умерщвля́я те́ло твое́,/ псалмопе́нии непреста́нно благославосло́вил еси́,/ тем Све́та ве́чнаго и оби́тели Небе́сныя сподо́блься,/ и, а́нгельскими пе́нии наслажда́яся,/ моли́ся Го́сподеви, да не лиши́т и нас ве́чных красо́т.

Величание

Ублажа́ем тя,/ преподо́бне о́тче Софро́ние,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Феофану исповеднику, Сигрианскому, глас 8

В тебе́, о́тче, изве́стно спасе́ся е́же по о́бразу,/ прии́м бо крест, после́довал еси́ Христу́,/ и де́я* учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со а́нгелы сра́дуется, преподо́бне Феофа́не, дух твой.

Ин тропарь, глас 5

Воздержа́нием житие́ укра́сил еси́/ и, уды умертви́в,/ победи́л еси́ вра́жия ко́зни, о́тче Феофа́не,/ преста́вился еси́ к Бо́гу в ве́чную жизнь,/ я́ко досто́ин прича́стник,/ моля́ся непреста́нно/ поми́ловати ду́ши на́ша.

Кондак, глас 2

Свы́ше прие́м Боже́ственное открове́ние,/ со тща́нием изше́л еси́ от среды́ молвы́ жите́йския/ и уедини́вся, преподо́бне, чуде́с прия́л еси́ де́йство/ и проро́чества досто́инство,/ бога́тства и супру́жницы лиши́вся.

Величание

Ублажа́ем тя,/ преподо́бне о́тче Феофа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Григорию Двоеслову, папе Римскому, глас 4

И́же от Бо́га свы́ше Боже́ственную благода́ть восприе́м,/ сла́вне Григо́рие,/ и Того́ си́лою укрепля́емь,/ ева́нгельски ше́ствовати изво́лил еси́,/ отону́дуже у Христа́ возме́здие трудо́в прия́л еси́, всеблаже́нне:/ Его́же моли́,/ да спасе́т ду́ши на́ша.

Кондак, глас 3

Подобонача́льник показа́лся еси́ Нача́льника па́стырем Христа́,/ и́ноков чреды́, о́тче Григо́рие,/ ко огра́де Небе́сней наставля́я,/ и отту́ду научи́л еси́ ста́до Христо́во за́поведем Его́,/ ны́неже с ни́ми ра́дуешися, и лику́еши в небе́сных кро́вех.

Величание

Велича́ем тя,/ святи́телю о́тче Григо́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Симеону, Новому Богослову, глас 3

Боже́ственное озаре́ние, Симео́не о́тче,/ восприя́в в души́ твое́й,/ свети́ло в ми́ре показа́лся еси́ светле́йшее,/ разгоня́я того́ мракобе́сие/ и всех уверя́я иска́ти, ю́же погуби́ша, благода́ть Ду́ха,/ Его́же приле́жно моли́/ дарова́ти нам ве́лию ми́лость.

Ин тропарь, новосоставленный, глас 1

Вне́шния му́дрости пребыва́я неприча́стен,/ Боже́ственныя же преиспо́лнен был еси́ последи́/ и Но́вый Богосло́в вои́стинну все́ми позна́ся, Симео́не./ Сего́ ра́ди твою́ па́мять, о́тче му́дре, почита́юще, тебе́ вопие́м:/ сла́ва тя просла́вльшему Христу́/ сла́ва тя ди́вна Показа́вшему,/ сла́ва Де́йствующему тобо́ю всем исцеле́ния.

Ин тропарь, глас 4

Я́ко Све́та Трисо́лнечнаго зри́тель/ и таи́нственнаго Богосло́вия сказа́тель,/ освяще́ние Симео́не, о́тче наш,/ испроси́ душа́м на́шим просвеще́ния свы́ше/ и страсте́й отгони́ от нас мглу́/ я́ко бо, служи́тель ве́лий Христо́в,/ всем подае́ши поле́зная, преподо́бне.

Кодак, глас 3

Све́том просвеще́н Трисо́лнечным, Богому́дре,/ Богосло́в яви́лся еси́ Пребоже́ственныя Тро́ицы./ Свы́ше прему́дростию слове́с обогати́вся,/ источи́л еси́ Богому́дрия Боже́ственныя струи́,/ от ни́хже пию́ще, вопие́м:/ ра́дуйся, треблаже́нне Симео́не Богонауче́нне.

Ин кондак, глас 2

Я́ко Богосло́в Бо́жий Боже́ственнейший/ и моли́твенник наш ве́лий ко Го́споду,/ при́сно, Симео́не, моли́ дарова́ти нам грехо́в проще́ние/ и живота́ исправле́ние, преподо́бне.

Величание

Ублажа́ем тя,/ преподо́бне о́тче Симео́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Феоктисту, бывшему Драгутину, королю Сербскому, глас 4

Боже́ственнаго стра́ха огне́м ду́шу свою́ распали́л еси́,/ очи́стився покая́нием и украси́вся кро́тостию и смире́нием,/ восте́кл еси́ к невече́рнему Све́ту – Христу́,/ преподо́бне о́тче Феокти́сте,/ и ны́не, трисо́лнечным све́том озаряемь,/ на Небеси́ лику́е- ши,/ моли́ о нас, ве́рою почита́ющих честну́ю па́мять твою́.

Кондак, глас 7

Ве́рою и́стинною укра́шен быв,/ просия́л еси́ доброде́тельми,/ хра́мы и оби́тели ще́дро помога́л еси́,/ богоми́лов³ же душетли́тельную* е́ресь искорени́л еси́,/ сего́ ра́ди вопие́м ти:/ преподо́бне Феокти́сте, блаже́нне,/ со все́ми преподо́бными предстоя́ Христу́/ моли́ся о всех нас.

Величание

Ублажа́ем тя,/ преподо́бне о́тче Феокти́сте,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Никифору, патриарху Константинопольскому, глас 4

Пра́вило ве́ры... (общий святителю).

Кондак, глас 1

Лик патриа́ршеский святу́ю твою́ па́мять/ хвала́ми и пе́сньми, Ники́форе, честву́ет,/ в преложе́нии* бо прия́т ду́шу твою́, сла́вне./ Тем днесь Честна́я Це́рковь велича́ющи Христа́ Царя́,/ сла́вит Еди́наго Человеколю́бца.

Величание

Велича́ем тя,/ святи́телю о́тче Ники́форе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Венедикту Нурсийскому, глас 8

В Тебе́, о́тче... (общий преподобному).

Кондак, глас 6

Благода́тию Бо́жиею обогати́лся еси́,/ де́лы же извести́л еси́ зва́ние/ и яви́лся еси́, Венеди́кте, уго́дниче Христа́ Бо́га,/ в моли́твах и поста́х, дарова́ний Бо́жия Ду́ха испо́лнен,/ и был еси́ неду́жным исцели́тель,/ и прогони́тель враго́м,/ и засту́пник ско́рый душа́м на́шим.

Ин кондак, глас 4

Возгоре́вся раче́нием Го́рним и Святы́м Ду́хом,/ вся просвети́л еси́, о́тче преподо́бне Венеди́кте свяще́нне,/ непреста́нно моли́ Христа́ Бо́га, преблаже́нне, о всех нас.

Величание

Ублажа́ем тя,/ преподо́бне о́тче Венеди́кте,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее Феодоровская, глас 4

Прише́ствием честны́я Твоея́ ико́ны, Богоотрокови́це,/ обра́дованный днесь Богохрани́мый град Кострома́,/ я́коже дре́вний Изра́иль к киво́ту Заве́та,/ притека́ет ко изображе́нию лица́ Твоего́,/ и воплоти́вшагося от Тебе́ Бо́га на́шего,/ да Твои́м Ма́терним к Нему́ предста́тельством,/ при́сно хода́тайствуеши всем,/ под сень кро́ва Твоего́ прибега́ющим,/ мир и ве́лию ми́лость.

Ин тропарь, глас тойже

Днесь све́тло красу́ется преимени́тый град Кострома́/ и вся Ру́сская страна́,/ созыва́ющи к весе́лию вся боголюби́выя наро́ды христиа́нския,/ на пресла́вное торжество́ Бо́жия Ма́тере,/ прише́ствия ра́ди чудотво́рнаго Ея́ и многоцеле́бнаго о́браза,/ днесь бо яви́ся нам пресве́тлое вели́кое со́лнце,/ прииди́те, вси Богоизбра́ннии лю́дие, но́вый Изра́иль,/ ко исто́чнику цельбоно́сному,/ источа́ет бо нам неоску́дныя ми́лости Пресвята́я Богоро́дица/ и избавля́ет вся гра́ды и стра́ны христиа́нския/ невреди́мы от всех наве́т вра́жиих./ Но, о Всеми́лостивая Госпоже́, Де́во Богоро́дице, Влады́чице,/ спаси́ страну́ на́шу, и архиере́и, и вся лю́ди Твоего́ достоя́ния от всех бед/ по вели́цей Твое́й ми́лости, да зове́м Ти:/ ра́дуйся, Де́во, Христиа́ном похвало́.

Кондак, глас 8

Благода́рственная принося́ще Ти раби́ Твои́, Богороди́тельнице, о всех,/ и́миже благоде́яла еси́ гра́ду на́шему,/ из глубины́ души́ взыва́ем к Тебе́, и ми́ли ся де́ем⁴,/ не преста́ни, Влады́чице,/ Ма́терними к Сы́ну Твоему́ и Бо́гу на́шему моли́твами/ подава́ти вся блага́я и спаси́тельная всем,/ ве́рою и любо́вию вопию́щим Ти:/ ра́дуйся, Де́во, христиа́н похвало́.

Ин кондак, глас тойже

Притеце́м лю́дие, вси к ти́хому и до́брому приста́нищу,/ в дом Бо́жия Ма́тере,/ чу́дному о́бразу Цари́цы и Богоро́дицы,/ за неизрече́нную ми́лость Ея́ явле́нному,/ ве́рно припа́дающе и вопию́ще:/ о, Всеми́лостивая Влады́чице,/ за спаси́тельное Твое́ смотре́ние,/ чу́днаго о́браза к нам прише́ствие,/ посети́ нас, гре́шных, све́тло сотворя́ющих пра́зднество Твое́,/ укрепи́ страну́ на́шу,/ ди́вно на враги́ побе́ду подаю́щи, и ве́ру утверди́,/ Це́рковь Сы́на Твоего́ непоколеби́му соблюди́,/ притека́ющих к Тебе́ спаси́, от вся́ких напа́стей изба́ви,/ сохраня́ющи в ми́ре все Правосла́вие, да зове́м Ти:/ ра́дуйся, Неве́сто Неневе́стная.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь благоверному великому князю Ростиславу – Михаилу, глас 6

Обре́те тя строи́теля градо́в и церквей/ земля́ Ки́евская,/ вели́кий кня́же Ростисла́ве,/ сму́ты устраня́л еси́, еди́нство храня́,/ те́мже Госпо́дь тебе́ му́дрость ниспосла́,/ сего́ ра́ди Христу́ Бо́гу моли́ся/ спасти́ся душа́м на́шим.

Тропарь Божией Матери ради иконы Ее Себежской, именуемой «Умиление», глас 8

Взы́дем, правосла́внии наро́ди гра́да Опо́чки,/ на ту́чную го́ру, я́ко на Фаво́рскую,/ в дом Спаси́теля своего́, в честь боголе́пнаго Преображе́ния Его́,/ оби́лующу чуде́с и стокра́тный клас* израсти́вшую,/ и у́зрим сла́ву чудесе́ от чудотво́рнаго о́браза/ Пресвяты́я Богома́тере Умиле́ния Се́бежския:/ я́ко мо́ре пролия́ся и Евфра́т, теки́й из рая́,/ та́ко сле́зы Ея́ бы́ша, из обою́ оку́ пролиты́я,/ о наше́дшем гне́ве Созда́теля Своего́ за на́ше согреше́ние,/ припаде́м, каменносерде́чнии, и возрыда́ем, прося́ще:/ о Влады́чице, умоли́ Сы́на Своего́ и Го́спода на́шего/ си́ми пресвяты́ми Свои́ми слеза́ми,/ да изба́вит нас от вся́каго зла́го обстоя́ния,/ и о́гненнаго запале́ния, и междоусо́бныя бра́ни,/ от мо́ра и гла́да,/ и наше́ствия иноплеме́ных в гряду́щия времена́,/ и, ра́дующеся, со Гаврии́лом благове́стником возопие́м Ти:/ ра́дуйся, Обра́дованная, Госпо́дь с Тобо́ю.

Кондак, глас 4

Притеце́м, лю́дие, бога́тии и убо́зии,/ си́рии и вдови́цы, ста́рии и ю́нии,/ в ти́хое приста́нище,/ под покро́в цельбоно́снаго исто́чника Богома́тере./ Сле́зы бо, я́ко ре́ки, источа́ет/ из обою́ оку́ чудотво́рнаго о́браза Се́бежския/ о находя́щем гне́ве за на́ша зла́я согреше́ния/ и укрепля́ет град, его́же возлюби́ла еси́, на сопроти́вныя,/ утвержда́ет ве́ру правосла́вных христиа́н/ и избавля́ет от вся́каго зла/ моли́твами Свои́ми.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз твой святы́й,/ и́мже то́чиши исцеле́ния/ всем с ве́рою притека́ющим.

Ино величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой честны́й/ и́мже показа́ла еси́ нам пречу́дное зна́мение.

Тропарь мученику Агапию и иже с ним, глас 4

Му́ченицы Твои́, Го́споди... (общий мученикам).

Кондак, глас 8

Свети́льницы све́тлии я́вльшеся... (общий мученикам).

Величание

Велича́ем вас,/ страстоте́рпцы святи́и Ага́пие со пострада́вшими,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь мученику Савину, глас 4

Му́ченик Твой, Го́споди... (общий мученику).

Кондак, глас 2

Боже́ственная прозябе́ния,/ цвет неувяда́ющий,/ розга́ многопло́дная, Богоно́се Сави́не,/ и́же ве́рою чту́щих па́мять твою́,/ весе́лия твоего́ испо́лни и моли́ся непреста́нно о всех нас.

Величание

Велича́ем тя,/ страстоте́рпче святы́й Сави́не,/ и чтим честна́я страда́ния твоя́,/ я́же за Христа́/ претерпе́л еси́.

Тропарь святителю Серапиону, архиепископу Новгородскому, глас 8

Тве́рдый адама́нт вои́стину, о́тче, показа́лся еси́,/ во всем подо́бяся Влады́це своему́ и Го́споду,/ непра́ведная изгна́ния, ра́дуяся, претерпе́л еси́:/ те́мже и Христо́с святи́телем и му́чеником сли́ковна* тя сотвори́/ и дарова́ тя ста́ду твоему́, я́ко сокро́вище неотъе́млемо,/ чудесы́ всех обогаща́ющее./ Те́мже и мы, соше́дшеся к ра́це моще́й твои́х,/ любо́вию вопие́м ти:/ моли́ о нас, пречестны́й архиере́ю Серапио́не, о́тче наш.

Кондак, глас 3

Я́ко венце́м пресве́тлым украси́вся днесь, Вели́кий Новгра́д/ и лику́ет в па́мять па́стыря своего́ и учи́теля;/ и я́ко диади́му ца́рскую возло́живши,/ вели́кая же о́на Ла́вра све́тло ра́дуется,/ иде́же просла́ви Бог Своего́ уго́дника,/ и прояви́ после́днему ро́ду на́шему/ цельбоно́сныя мо́щи твоя́,/ святи́телю Серапио́не;/ и Це́рковь Бо́жия весели́тся,/ созыва́юще на славосло́вие, велегла́сно вопию́щи:/ ра́дуйся, гра́ду твоему́ и оби́тели похвало́/ и всея́ Ру́сския земли́ пресве́тлый свети́льниче.

Величание

Велича́ем тя,/ святи́телю о́тче Серапио́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Алексию, человеку Божию, глас 4

Возвы́сився на доброде́тель и ум очи́стив,/ к жела́нному и кра́йнему дости́гл еси́⁵,/ безстра́стием же украси́в жити́е твое́,/ и поще́ние изря́дное восприи́м со́вестию чи́стою,/ в моли́твах, я́ко безпло́тен, пребыва́я,/ возсия́л еси́, я́ко со́лнце, в ми́ре,/ преблаже́нне Алекси́е.

Ин тропарь, глас тойже

Я́ко чистоты́ свети́льник пресве́тел показа́ся,/ ди́вный Алекси́е,/ и́бо тле́нный черто́г/ на нетле́нное Бо́жие Ца́рствие премени́в,/ я́ко целому́дрия де́латель преизря́ден./ Сего́ ра́ди предстои́ши Го́сподеви, всех Царю́,/ Его́же моли́ дарова́ти нам мир и ве́лию ми́лость.

Кондак, глас 2

Дом роди́телей твои́х, я́ко чужд, име́в,/ водвори́лся еси́ в нем нищеобра́зно,/ и по преставле́нии вене́ц прие́м сла́вы,/ ди́вен на земли́ яви́лся еси́, Алекси́е, челове́че Бо́жий,/ а́нгелом и челове́ком ра́дование.

Величание

Ублажа́ем тя,/ преподо́бне о́тче Алекси́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Макарию, игумену Калязинскому, чудотворцу, глас 8

Плотска́я мудрова́ния, о́тче Мака́рие,/ воздержа́нием и бде́нием умертви́л еси́,/ ме́сто бо, на не́мже по́ты твоя́ излия́л еси́,/ я́ко труба́ вопие́т к Бо́гу,/ пове́дающи твоя́ исправле́ния*,/ и по сме́рти честны́я твоя́ мо́щи источа́ют исцеле́ния./ Те́мже вопие́м ти:/ моли́ Христа́ Бо́га, да спасе́т ду́ши на́ша.

Кондак, глас 2

Вы́шних жела́я, воздержа́нием и труды́, и по́ты наслади́вся,/ жела́ние пло́ти твоея́ обузда́в,/ чуде́с дар прие́м от Христа́ Бо́га,/ свети́льник яви́лся еси́ пресве́тлый./ Те́мже Христо́ва Це́рковь пе́сньми сла́вит тя,/ преподо́бне Мака́рие, о́тче наш.

Величание

Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Кириллу, архиепископу Иерусалимскому, глас 4

Пра́вило ве́ры... (общий святителю).

Кондак, глас 1

Язы́ком твои́м, му́дре,/ Боже́ственными вдохнове́ньми просвети́л еси́ твоя́ лю́ди,/ Еди́ну чести́ Тро́ицу/ естество́м неразде́льну, разделя́ему же Ли́цы,/ те́мже ра́дующеся, всесвяту́ю твою́ па́мять пра́зднуем,/ и́же к Бо́гу моли́твенника тя предлага́ющий.

Величание

Велича́ем тя,/ святи́телю о́тче Кири́лле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь мученикам Хрисанфу и Дарии, глас 4

Му́ченицы Твои́, Го́споди... (общий мученикам).

Ин тропарь, глас 1

Боле́зньми святы́х, и́миже о Тебе́ пострада́ша,/ умоле́н бу́ди, Го́споди,/ и вся на́ша боле́зни исцели́,/ Человеколю́бче, мо́лимся.

Кондак, глас 8

Свети́льницы све́тлии я́вльшеся... (общий мученикам).

Величание

Велича́ем вас,/ страстоте́рпцы святи́и Хриса́нфо и Да́рие,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Иннокентию Комельскому, Вологодскому, глас 4

От ю́ности своея́ весь Бо́гови поработи́лся еси́, блаже́нне./ Того́ ра́ди любве́ оте́чество и род оста́вил еси́/ и, в пусты́ню всели́вся,/ в ней жесто́ко житие́ показа́л еси́,/ и чуде́с дарова́ния от Го́спода прия́л еси́,/ преподо́бне Инноке́нтие,/ моли́ Христа́ Бо́га спасти́ся душа́м на́шим.

Ин тропарь, глас 3

От ю́ности сосу́д избра́нен был еси́/ и в житии́ Бо́гу послужи́л еси́,/ и́ноков наста́вниче Инноке́нтие,/ потща́лся еси́ ху́ждшее покори́ти лу́чшему,/ те́мже и стра́сти умертви́в,/ возвы́сился еси́ к зре́нию красоты́ несозда́нныя,/ в Бо́зе Ему́же предстои́ши,/ моли́, о́тче, Христа́ Бо́га спасти́ся душа́м на́шим.

Кондак, глас 4

Оте́чества, преподо́бне, удали́вся/ и всели́вся в пусты́ню,/ та́мо жесто́ко житие́ показа́л еси́, и мно́гих люде́й житие́м свои́м удиви́л еси́;/ помина́й нас, чту́щих па́мять твою́, да зове́м ти:/ ра́дуйся, преподо́бне Инноке́нтие о́тче наш.

Ин кондак, глас 8

Ми́ра и сро́дник удали́вся,/ в пусты́ни неуста́нною моли́твою Бо́гу угоди́л еси́,/ и в по́двизе жития́, о́тче, просия́л еси́,/ помина́й нас, чту́щих усе́рдно па́мять твою́, да зове́м ти:/ ра́дуйся, Инноке́нтие преподобие.

Величание

Ублажа́ем тя,/ преподо́бне о́тче Инноке́нтие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобной Вассе Псково-Печерской, глас 4

Днесь, ве́рнии, пресла́вно ликовству́ем,/ па́мять преподо́бныя Ва́ссы соверша́юще,/ и ра́це моще́й ея́ уми́льно покланя́ющеся,/ со слеза́ми и любо́вию вопие́м ей:/ бу́ди хода́таица на́ша пред Бо́гом,/ огради́ моли́твами твои́ми оби́тель и град наш,/ в ско́рбех и печа́лех нам бу́ди уте́шительница,/ ты бо еси́ кре́пость ве́рным,/ и оби́тели Пско́во-Пече́рския украше́ние.

Кондак, глас тойже

Па́мять преподо́бныя Ва́ссы днесь све́тло соверша́юще,/ благода́рственне воспомина́ем многотру́дныя по́двиги,/ естество́ бо же́нское отве́ргши,/ со супру́жником твои́м устреми́ся к мона́шескому житию́,/ да нетле́нными венцы́ венча́ет тя Христо́с.

Величание

Ублажа́ем тя,/ преподо́бная ма́ти Ва́ссо,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Божией Матери ради иконы Ее Смоленская, именуемой «Умиление», глас 4

К Богоро́дице со умиле́нием припаде́м,/ вси грехми́ обремене́ннии,/ чудотво́рную Ея́ ико́ну Умиле́ния облобыза́юще/ и вопию́ще со слеза́ми:/ Влады́чице, приими́ моле́ние недосто́йных раб Твои́х/ и пода́ждь нам, прося́щим,/ ве́лию Твою́ ми́лость.

Ин тропарь, глас тойже

Богора́дованная Влады́чице,/ Препросла́вленная Ма́ти щедро́т и человеколю́бия,/ Всеми́лостивая о всем ми́ре Хода́таице!/ Приле́жно, раби́ Твои́, к Боже́ственному предста́тельству прибега́юще/ и пречу́дному о́бразу Твоему́ со умиле́нием припа́дающе, мо́лимся:/ моли́тву те́плую к Сы́ну Твоему́ и Бо́гу на́шему сотвори́,/ о Всепе́тая Цари́це Богоро́дице,/ да вся́ких боле́зней и печа́лей нас Тебе́ ра́ди изба́вит/ и от грехо́в вся́ких свободи́т,/ Ца́рствия Своего́ Небе́снаго насле́дники ны пока́жет,/ ве́лие бо неизрече́нное, я́ко Ма́ти, и́маши дерзнове́ние к Нему́/ и вся мо́жеши, Еди́на во ве́ки Преблагослове́нная.

Кондак, глас 8

Взбра́нной Воево́де победи́тельная... (общий Божией Матери).

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния,/ всем с ве́рою притека́ющим.

Тропарь праведной Софии, княгине Слуцкой, глас 5

Блаже́нная ма́ти Софи́е,/ нетле́нием моще́й и чуде́с сия́нием почти́ тя Бог;/ помина́юще твое́ пра́ведное житие́,/ тя мо́лим испроси́ти/ тел все́м на́шим здра́вие и душа́м спасе́ние.

Тропарь преподобным отцам, во обители святого Саввы убиенных от сарацин, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их в ми́ре упра́ви живо́т наш.

Кондак, глас тойже

Земны́х и тле́нных наслажде́ние/ презре́вше я́ве, преблаже́ннии,/ пусты́нное житие́ изво́ливше,/ ми́ра же красне́йшее и пи́щи вре́менныя возненави́девше,/ отону́дуже сподо́бистеся Небе́снаго Ца́рствия,/ с ли́ки му́ченик и по́стник веселя́щеся./ Те́мже чту́ще па́мять ва́шу,/ вопие́м вам приле́жно:/ от бед нас, отцы́, изба́вите.

Величание

Ублажа́ем вас,/ преподо́бнии отцы́ во оби́тели свята́го Са́ввы убие́ннии,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь преподобному Евфросину Синозерскому, Новгородскому, глас 1

От ю́ности впери́в ум свой к Бо́гу,/ блаже́нне Евфроси́не,/ и бе́гая суеты́ ми́ра сего́,/ дости́гл еси́ в пусты́ню непроходи́мую,/ иде́же Бо́гу тя укрепля́ющу,/ а́нгельское житие́ стяжа́в,/ порабо́тал еси́ дово́льно Влады́це твоему́ Христу́/ в поще́нии и моли́твах и во все́нощных бде́ниих/ и сподо́бился еси́ да́ра Ду́ха Пресвята́го,/ е́же прорица́ти бу́дущая,/ наставля́я на стезю́ покая́ния/ притека́ющих к тебе́ и послу́шающих тя./ Те́мже Всеблаги́й Бог, ви́дя вели́кую твою́ к Себе́ ве́ру,/ нелицеме́рную любо́вь и несумне́нную наде́жду,/ дарова́ тебе́, не то́чию е́же ве́ровати в Него́,/ но и е́же страда́ти по Нем,/ егда́ от проти́вных сыно́в в то́йже пусты́ни кровь твоя́ неща́дно излия́ся,/ и досе́ле, я́коже А́велева, вопие́т к Бо́гу,/ свиде́тельствующу о сем нетле́нием моще́й твои́х,/ в ня́же взира́юще уми́льно вопие́м:/ сла́ва, Дарова́вшему тебе́ благода́ть толи́ку,/ Его́же и моли́ о нас.

Ин тропарь, глас 4

От ю́ности впери́в ум свой к Бо́гу,/ блаже́нне Евфроси́не,/ отверже́нием ми́ра, всели́лся еси́ в непроходи́мую пусты́ню,/ в не́йже по́стнически, укрепле́нием Бо́жиим, в моли́твах и в поще́ниих до́блественне, я́коже досто́ит, пожи́л еси́,/ и жизнь свою́ страда́льчески непови́нне убие́нием от сопроти́вных* сыно́в сконча́л еси́./ Сего́ ра́ди со преподо́бными и со му́ченики венча́лся еси́,/ с ни́миже предстоя́ престо́лу Пресвяты́я Тро́ицы,/ моли́, мо́лим тя,/ оставле́ние пода́ти согреше́ниям на́шим/ и дарова́ти нам ве́лию ми́лость.

Ин тропарь, глас тойже

От ю́ности твоея́ впери́в ум твой к Бо́гу,/ блаже́нне Евфроси́не,/ ми́ра же отве́ргся, всели́лся еси́ в пусты́ню непроходи́мую,/ и та́мо, от Го́спода укрепля́емь,/ в моли́твах и поще́ниих до́блественне пожи́л еси́,/ и жизнь твою́ страда́льчески/ убие́нием от сыно́в противле́ния сконча́л еси́,/ сего́ ра́ди со преподо́бными и му́ченики венча́лся еси́,/ с ни́миже и ны́не предстои́ши Престо́лу Пресвяты́я Тро́ицы./ Сию́ моли́, мо́лим тя,/ оставле́ние пода́ти согреше́ний на́ших/ и дарова́ти нам ве́лию ми́лость.

Кондак, глас 8

Подража́я житию́ дре́вних оте́ц,/ Богому́дре Евфроси́не,/ возненави́дев ми́ра сего́ красоту́/ всели́лся еси́ в пусты́ню,/ и ве́ру Христо́ву, я́коже щит, в се́рдце свое́ прие́м,/ изше́л еси́, добр во́ин Царя́ Небе́снаго/ не на брань проти́ву пло́ти и кро́ве,/ но на брань проти́ву ко́зней неви́димаго врага́./ Те́мже дарова́вшейся тебе́ Ду́ха Свята́го благода́ти,/ глубо́ким смире́нием твои́м низложи́л еси́ вознесе́нную того́ горды́ню,/ и прия́л еси́ от Небе́снаго Дарова́теля неувяда́емый вене́ц побе́ды./ Сего́ ра́ди соше́дшеся любо́вию вопие́м ти:/ ра́дуйся, о́тче Евфроси́не, пусты́нное украше́ние.

Величание

Ублажа́ем тя,/ преподо́бне о́тче Евфроси́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Иакову, глас 8

Правосла́вия наста́вниче,/ благоче́стия учи́телю и чистоты... (общий исповеднику).

Кондак, глас 2

Наслади́вся, Богому́дре, воздержа́ния... (общий исповеднику).

Величание

Ублажа́ем тя,/ преподо́бне о́тче Иа́кове,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Пахомию Нерехтскому, игумену Сыпа́нова монастыря, Костромскому чудотворцу, глас 4

Жите́йския молвы́, преподо́бне, отве́ргся/ и, я́ко пти́щ, обре́т в пусты́ни безмо́лвие,/ и в ней водвори́вся, соста́вил еси́ оби́тель Пресвяты́я Тро́ицы,/ в моли́твах же и труде́х прилежа́ Бо́гови,/ процве́л еси́, я́ко фи́никс,/ быв о́браз утеше́ния духо́внаго;/ преподо́бне о́тче Пахо́мие,/ моли́ Пресвяту́ю Тро́ицу спасти́ся душа́м на́шим.

Ин тропарь, глас тойже

Жите́йския молвы́, преподо́бне, отве́ргся/ и, я́ко птищ, обрете́ себе́ в пусты́ни безмо́лвие,/ в моли́твах и бде́нии прилежа́ Бо́гови,/ преподо́бне о́тче Пахо́мие,/ и оста́ви дре́внее пребыва́ние,/ и оты́де в пусты́ню, и в ней водвори́ся,/ и соста́ви оби́тель во и́мя Пресвяты́я Тро́ицы,/ и процве́л еси́, а́ки фи́никс,/ и бысть о́браз утеше́ния духо́внаго./ Те́мже, преподо́бне Пахо́мие,/ моли́ Пресвяту́ю Тро́ицу спасти́ся душа́м на́шим.

Кондак, глас тойже

В пусты́ни безмо́лвствуя,/ еди́нствующу ти, Богоно́се, взыска́л еси́ Го́спода;/ Бо́га же, не оста́вльша тя еди́наго в пусты́ни,/ и Того́ повеле́нием снидо́шася к тебе́ не́колико бра́тии,/ с ни́миже ти моля́щуся Го́сподеви,/ Тро́ице прече́стен храм воздви́гл еси́,/ в не́мже предстоя́, преподо́бне Пахо́мие,/ мо́лишися о спасе́нии душ на́ших.

Величание

Ублажа́ем тя,/ преподо́бне о́тче Пахо́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Серафиму Вырицкому, глас 4

Я́ко пресве́тлая звезда́ Росси́йския земли́,/ возсия́л еси́ в ве́си Вы́рицстей, преподо́бне Серафи́ме,/ и, си́лою Свята́го Ду́ха наставля́ем,/ све́том чуде́с твои́х страну́ на́шу озари́л еси́ духо́вно./ Те́мже и мы, притека́юще ко гро́бу твоему́,/ уми́льно глаго́лем:/ моли́ Христа́ Бо́га спасти́ся душа́м на́шим.

Кондак, глас 5

Уподо́бился еси́ дре́вним отце́м/ и по́двигом до́брым подвиза́лся еси́,/ благода́тию Христо́вою просвети́вся,/ от Него́же прие́м дарова́ния чуде́с,/ неду́гующих исцеля́ти,/ печа́льных и скорбя́щих утеша́ти,/ оби́димых и гони́мых защища́ти/ и всем в ну́ждах су́щим отра́ду/ и ско́рое избавле́ние подава́ти./ Сего́ ра́ди, я́ко вели́каго чудотво́рца чту́ще,/ мо́лим тя, ча́да твоя́, преподо́бне Серафи́ме,/ от всех бед изба́ви нас моли́твами твои́ми.

Величание

Ублажа́ем тя,/ преподо́бне о́тче Серафи́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь священномученику Василию, пресвитеру Анкирскому, глас 4

И нра́вом прича́стник, и престо́лом наме́стник... (общий священномученику).

Кондак, глас 8

Зако́нно тече́ние соверши́в,/ и ве́ру соблю́л еси́, священному́чениче Васи́лие,/ сего́ ра́ди муче́ния венце́в сподо́бился еси́/ и Це́ркве столп непоколеби́м яви́лся еси́,/ Сы́на Отцу́ собезнача́льна и Ду́ху испове́дав,/ Тро́ицу Неразде́льную,/ ю́же моли́ изба́витися от бед чту́щим тя,/ да зове́м ти:/ ра́дуйся, Васи́лие Богому́дре.

Величание

Велича́ем тя,/ священному́чениче Васи́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь праведному Василию, мученику и страстотерпцу, Мангазейскому чудотворцу, глас 8

Бога́тство ви́дев чи́стыя души́ твоея́, Васи́лие,/ укра́сти тща́шеся пра́ведных враг,/ подусти́* господи́на твоего́,/ и́же покра́деннаго ра́ди бога́тства своего́ преда́в тя судии́,/ и от того́ непови́нне мно́гия претерпе́л еси́ му́ки,/ непобеди́м пребы́в до смерти́./ Тем, я́ко прие́мый вене́ц страда́ния от всех Влады́ки,/ моли́ всем от напа́стей свобо́дным бы́ти,/ чту́щим любо́вию святу́ю па́мять твою́.

Ин тропарь, глас тойже

Я́ко пресве́тлое со́лнце,/ возсия́л еси́ чудесы́ свои́ми в Сиби́рстей стране́,/ в Мангазе́йских преде́лах,/ но́вый му́чениче непови́нный страда́льче, свя́те Васи́лие!/ За чистоту́ душе́вную и теле́сную пострада́л еси́ от лю́таго врага́/ распале́нием и немилосе́рдием господи́на своего́/ и от нача́льствующаго бо ту градска́го непра́веднаго судии́,/ и му́ки непови́нно претерпе́л еси́,/ и кровь свою́ святу́ю пролия́л еси́,/ жела́я ве́чнаго Ца́рствия Небе́снаго./ Сего́ ра́ди Христо́с Бог венча́ тя му́ченическими венцы́ на Небеси́,/ и на земли́ просла́ви,/ и Свои́м Бо́жиим про́мыслом повеле́ земли́ само́й от недр свои́х/ гроб, и те́ло твое́, и срачи́цу*, обагре́нную кро́вию твое́ю, израсти́ нетле́нно./ И ны́не притека́ющим к тебе́ с ве́рою и везде́ призыва́ющим свято́е имя́ твое́,/ поле́зная вся, и грехо́в оставле́ние, и телесе́м здра́вие подава́й,/ чту́щим ве́рою святу́ю па́мять твою́,/ и моли́ Христа́ Бо́га спасти́ся душа́м на́шим.

Ин тропарь, глас тоже

От гра́да Яросла́вля Бо́жиим смотре́нием/ в страну́ Сиби́рскую прише́дшаго и за целому́дрие от господи́на своего́/ в Мангазе́и пострада́вшаго,/ блаже́ннаго Васи́лия почти́м,/ его́же Христо́с Бог му́ченическим венце́м венча́ на Небеси́,/ нетле́нием и чудесы́ просла́ви на земли́./ Ты же, честны́й страда́льче,/ предста́тельством свои́м страну́ на́шу в ми́ре сохрани́/ и моли́ся о спасе́нии душ на́ших.

Кондак, глас 4

Страда́ние соверши́в, свя́те,/ погребе́ния же честна́го не сподо́бився,/ в ти́нное ме́сто вве́ржен/ и попира́емь был еси́ от мимоходя́щих,/ но Бог просла́ви мо́щи твоя́ чуде́сным явле́нием, Васи́лие,/ прославля́яйся во святы́х Свои́х,/ дая́й страда́льцем вене́ц нетле́нный.

Ин кондак, глас тойже

И́же но́вый в му́ченицех непови́нный страда́льче,/ свя́те Васи́лие, преревнова́л еси́ Ио́сифу Прекра́сному и Моисе́ю У́грину во искуше́ниих,/ за чистоту́ душе́вную и теле́сную/ му́ки непови́нно претерпе́л еси́./ Сих ра́ди просла́ви тя Бог,/ и святы́я твоя́ мо́щи, по явле́нию твоему́,/ от Мангазе́и к Енисе́ю во оби́тель Святы́я Тро́ицы/ ту су́щим настоя́телем принесо́шася/ и подаю́т исцеле́ния с ве́рою приходя́щим/ и везде́ призыва́ющим свято́е и́мя твое́./ Страстоте́рпче святы́й,/ моли́ Христа́ Бо́га/ о правосла́вном наро́де на́шем/ и о всех во́ех на́ших,/ побе́ду и одоле́ние нам на всех/ непросвеще́нных иноязы́чных лю́дех дарова́ти, спосо́бствуя,/ и от междоусо́бныя бра́ни спасти́ся всем моли́.

Ин кондак, глас тойже

Просвети́вся Боже́ственною благода́тию, Боголю́бче,/ целому́дрием и терпе́нием тече́ние свое́ му́ченически сконча́л еси́,/ те́мже и по сме́рти яви́ тя све́тлость жития́ твоего́,/ источа́еши бо чудесы́,/ с ве́рою приходя́щим к честно́му гро́бу твоему́ и вопию́щим:/ ра́дуйся, святы́й Васи́лие,/ Мангазе́йский и всея́ Сиби́ри чудотво́рче.

Величание

Велича́ем тя,/ святы́й пра́ведный Васи́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобномученику Евфимию Константинопольскому, глас 4

По́стнически предподвиза́вся на горе́,/ у́мная враго́в ополче́ния всеору́жием креста́ погуби́л еси́, всеблаже́нне,/ па́ки же ко страда́льчеству му́жески обле́клся еси́,/ уби́в Копрони́ма мече́м ве́ры/ и обои́х ра́ди венча́лся еси́ от Бо́га,/ преподобному́чениче Евфи́мие принопа́мятне.

Кондак, глас 2

Я́ко по́стника благоче́стна и иску́сна/ и страда́льца произволе́нием че́стна,/ и пусты́ни жи́теля сообра́зна,/ в пе́снех досто́йно восхва́лим Евфи́мия приснохва́льнаго:/ той бо зми́я попра́л есть.

Величание

Ублажа́ем тя,/ преподобному́чениче Евфи́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее Изборская, глас 4

Я́ко звезда́ пресве́тлая, возсия́ во гра́де Избо́рске/ о́браз честны́й Твой, Богоро́дице Де́во,/ от него́же иногда́ из обою́ о́чию теча́ху сле́зы, я́ко струя́,/ его́же то́гда ви́девше, наро́ди избо́рстии,/ му́жи и же́ны с ча́ды, с пла́чем моля́хуся к нему́,/ мы же, взира́юще уми́льно, си́це глаго́лем:/ о Пресвята́я Влады́чице Богоро́дице,/ не забу́ди нас, гре́шных раб Свои́х,/ моля́щихся Христу́, Бо́гу на́шему, спасти́ся нам.

Кондак, глас 8

Засту́пнице Христиа́ном усе́рдная/ и Предста́тельнице гра́ду на́шему Избо́рску непосты́дная,/ не пре́зри моле́ния нас, гре́шных,/ я́коже иногда́ от Твоего́ честна́го о́браза/ сле́зы источи́ла еси́ из обою́ о́чию, моля́щися приле́жно,/ но предвари́, я́ко Блага́я, на по́мощь на́шу,/ ве́рно к Тебе́ припа́дающих,/ услы́ши на́ша моле́ния, Богоро́дице,/ изба́ви нас от нахожде́ния пога́ных, от вся́каго зла,/ ускори́ же на моли́тву на́шу и потщи́ся на умоле́ние,/ заступа́ющи при́сно, Богоро́дице, чту́щих Тя и вопию́щих Ти:/ ра́дуйся, Де́во, Христиа́ном похвало́.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь преподобномученику Никону и 199-ти ученикам его, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их в ми́ре упра́ви живо́т наш.

Кондак, глас 3

Я́ко свети́льницы незаходи́мии разу́мнаго Со́лнца,/ соше́дшеся днесь восхва́лим пе́сньми,/ возсия́ли бо есте́ су́щим во тме неразу́мия,/ всех созыва́юще к высоте́ благоче́стия, священному́ченицы./ Тем вопие́м вам:/ ра́дуйтеся, по́стников всех основа́ние.

Величание

Ублажа́ем вас,/ преподо́бнии му́ченицы Ни́коне со ученицы́,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь преподобному Никону, игумену Киево-Печерскому, в Ближних пещерах почивающему,глас 5

Христо́ва виногра́да лоза́ яви́лся еси́, Богоблаже́нне Ни́коне,/ гро́здие принося́ Ему́ – доброде́тели твоя́,/ и про́чих, к те́мже наставля́я,/ приводи́л еси́ Христу́ Бо́гу,/ Ему́же, мо́лим тя, мо́лися за ду́ши на́ша.

Ин тропарь, глас 1

Послуша́ния до́брый рачи́тель быв,/ преподо́бне Ни́коне приснопа́мятне,/ це́рковь бо пречу́дну Пресвяты́я Богоро́дицы/ прекра́сно укра́сил еси́./ Те́мже и мы, ча́дца твоя́, любо́вию вопие́м ти:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак, глас 8

Тре́тье свети́ло пеще́рное,/ прогоня́ющее тьму бесо́вскую,/ восхваля́ем тя, му́дре,/ и по до́лгу чтим труды́ и по́двиги твоя́,/ я́же подъя́т о ста́де свое́м/ и о украше́нии церко́внем,/ воззыва́юще ти усе́рдно си́це:/ ра́дуйся, о́тче Ни́коне, красото́ церко́вная.

Ин кондак, глас 4

Духо́вному твоему́ наста́внику, о́тче Ни́коне, вся́чески прилепи́вся,/ и от него́ наставля́ем,/ во всем Христо́ви порабо́тився,/ мона́хов был еси́ чинонача́льник и преподо́бных сожи́тель,/ с ни́миже Христа́ Бо́га моли́ непреста́нно о всех нас.

Ин кондак, глас 2

Чистото́ю душе́вною Боже́ственно вооружи́вся,/ и непреста́нныя моли́твы,/ я́ко копие́ вручи́в кре́пко,/ пробо́л еси́ бесо́вская ополче́ния,/ Ни́коне о́тче наш,/ моли́ непреста́нно о всех нас.

Величание

Ублажа́ем тя,/ преподо́бне о́тче Ни́коне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь предпразднству Благовещения Пресвятой Богородицы, глас 4

Днесь всеми́рныя ра́дости нача́тки,/ предпра́зднственное воспе́та повелева́ют,/ се бо Гаврии́л прихо́дит,/ Де́ве нося́ благове́стие,/ и к Ней вопие́т:/ ра́дуйся, Благода́тная,/ Госпо́дь с Тобо́ю.

Кондак, глас 8

Всем земны́м нача́ло спасе́ния на́шего Ты еси́, Богоро́дице Де́во,/ Бо́жий бо служи́тель с Небе́с по́слан предста́ти Тебе́,/ вели́кий чинонача́льник Гаврии́л,/ ра́дость обра́дованную Ти принесе́./ Тем вси зове́м Ти:/ ра́дуйся, Неве́сто Неневе́стная.

Тропарь мученикам Стефану и Петру Казанским, глас 4

Му́чеников дво́ица единора́вная,/ Стефа́не и Пе́тре сла́внии,/ неве́рие соплеме́нников обличи́вше,/ Христу́ после́довали есте́,/ во Святу́ю Тро́ицу ве́ровати всех науча́юще,/ Ея́же ра́ди вели́кия страда́ния прие́мше,/ моли́теся о нас ко Го́споду,/ да изба́вившеся тьмы грехо́вныя,/ Све́та я́вимся о́бщницы невече́рняго.

Кондак, глас 3

Святи́и страстоте́рпцы Стефа́не и Пе́тре,/ Тро́ицы побо́рницы преизря́днейшии,/ мук треволне́ния и стра́шную смерть на ве́чную жизнь премени́вшии,/ во гра́де Каза́ни страда́льчествовавшии,/ ны́не же в Небе́сных черто́зех Всецарю́ предстоя́щии,/ от вся́ких нас грехопаде́ний изба́вити Христа́ Бо́га моли́те./ Той бо есть ве́рных утвержде́ние.

Величание

Велича́ем вас,/ страстоте́рпцы святи́и Стефа́не и Пе́тре,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Захарии, постнику Печерскому, в Дальних пещерах почивающему, глас 3

По́стническаго ра́ди твоего́ жития́,/ блаже́нне Заха́рие,/ я́ко прие́мый ве́лию на бе́сы кре́пость,/ моли́ и нам те́хже ко́зней избы́ти*,/ получи́ти грехо́в проще́ние/ и ве́лию ми́лость.

Кондак, глас 1

В по́стничестве све́тло я́ко просия́вый/ и бесо́м стра́шен я́ко яви́выйся,/ всече́стне Заха́рие,/ укрепи́ и нас твои́ми моли́твами/ по́стническое житие́ име́ти/ и бесо́вскаго изба́витися злоде́йства,/ я́ко да ублажа́ем тя.

Величание

Ублажа́ем тя,/ преподо́бне о́тче Заха́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь празднику Благовещения Пресвятой Богородицы, глас 4

Днесь спасе́ния на́шего глави́зна,/ и е́же от ве́ка та́инства явле́ние:/ Сын Бо́жий Сын Де́вы быва́ет,/ и Гаврии́л благода́ть благовеству́ет./ Те́мже и мы с ним Богоро́дице возопии́м:/ ра́дуйся, Благода́тная, Госпо́дь с Тобо́ю.

Кондак, глас 8

Взбра́нной Воево́де победи́тельная,/ я́ко изба́вльшеся от злых,/ благода́рственная воспису́ем Ти раби́ Твои́, Богоро́дице,/ но я́ко иму́щая держа́ву непобеди́мую,/ от вся́ких нас бед свободи́, да зове́м Ти:/ ра́дуйся, Неве́сто Неневе́стная.

Величание

Арха́нгельский глас вопие́м Ти, Чи́стая:/ ра́дуйся, Благода́тная,/ Госпо́дь с Тобо́ю.

Тропарь святителю Тихону, патриарху Московскому и всея Руси, глас 1

Апо́стольских преда́ний ревни́теля/ и Христо́вы Це́ркве па́стыря до́браго,/ ду́шу свою́ за о́вцы положи́вшаго,/ жре́бием Бо́жиим избра́ннаго/ Всеросси́йскаго патриа́рха Ти́хона восхва́лим/ и к нему́ с ве́рою и упова́нием возопии́м:/ предста́тельством святи́тельским ко Го́споду/ Це́рковь Ру́сскую в тишине́ соблюди́,/ расточе́нная ча́да ея́ во еди́но ста́до собери́,/ отступи́вшия от пра́выя ве́ры к покая́нию обрати́,/ страну́ на́шу от междоусо́бныя бра́ни сохрани́/ и мир Бо́жий лю́дем испроси́.

Ин тропарь, глас 3

В годи́ну тя́жкую Бо́гом избра́нный/ в соверше́нной свя́тости и любви́ Бо́га просла́вил еси́,/ во смире́нии вели́чие, в простоте́ и кро́тости си́лу Бо́жию явля́я,/ положи́л ду́шу за Це́рковь, за лю́ди своя́,/ испове́дниче патриа́рше свя́те Ти́хоне,/ моли́ Христа́ Бо́га,/ Ему́же сораспя́лся еси́,/ и ны́не спасти́ зе́млю ру́сскую и па́ству твою́.

Кондак, глас 2

Ти́хостию нра́ва украше́н,/ кро́тость и милосе́рдие ка́ющимся явля́яй,/ во испове́дании Правосла́вныя ве́ры и любве́ ко Го́споду/ тверд и непрекло́нен пребы́л еси́,/ святи́телю Христо́в Ти́хоне,/ моли́ся о нас, да не разлучи́мся от любве́ Бо́жия,/ я́же о Христе́ Иису́се, Го́споде на́шем.

Величание

Велича́ем тя,/ святи́телю о́тче Ти́хоне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Архангелу Гавриилу, глас 4

Небе́сных во́инств Архистрати́же,/ мо́лим тя при́сно мы недосто́йнии,/ да твои́ми моли́твами огради́ши нас/ кро́вом крил невеще́ственныя твоея́ сла́вы,/ сохраня́я нас припа́дающих приле́жно и вопию́щих:/ от бед изба́ви нас,/ я́ко чинонача́льник Вы́шних сил.

Кондак, глас 8

Пресве́тлыя, и Честны́я, и Вседе́тельныя,/ Пренеисче́тныя и Стра́шныя Тро́ицы,/ ты еси́, Архистрати́же, сла́вный служи́телю и моли́твенниче,/ ны́не непреста́нно моли́/ изба́витися нам от вся́ких бед и мук, да зове́м ти:/ ра́дуйся, покро́ве рабо́м твои́м.

Ин кондак, глас 2

Архистрати́же Бо́жий,/ служи́телю Боже́ственныя сла́вы,/ а́нгелов нача́льниче и челове́ков наста́вниче,/ поле́зное нам проси́ и ве́лию ми́лость,/ я́ко безпло́тных Архистрати́г.

Ин кондак, глас 2

На небесе́х зря Бо́жию сла́ву/ и на земли́ с высоты́ падая́ благода́ть,/ нача́льниче а́нгелов, му́дре Гаврии́ле,/ Бо́жия сла́вы служи́телю/ и ми́ра Боже́ственный побо́рниче,/ спаса́й, соблюда́й вопию́щия ти:/ сам бу́ди помо́щник, и никто́же на ны.

Тропарь мученице Матроне Солунской, глас 4

А́гница Твоя́, Иису́се... (общий мученице).

Кондак, глас 2

Храм твой всечестны́й,/ я́ко цельбу́ душе́вную обре́тше вси ве́рнии,/ велегла́сно вопие́м ти,/де́во му́ченице, Матро́но великоимени́тая:/ Христа́ Бо́га моли́ непреста́нно о всех нас.

Величание

Велича́ем тя,/ страстоте́рпице Христо́ва Матро́но,/ и чтим честно́е страда́ние твое́,/ е́же за Христа́/ претерпе́ла еси́.

Тропарь священномученику Иринею, епископу Сре́мскому (Сирмийскому), Сербскому, глас 8

Жизнь твою́ целому́дренно соверши́л еси́,/ ничто́же на земли́ па́че Христа́ предпоче́т,/ ра́дуяся, вшел еси́ на му́ченическое благосла́вие,/ проти́вяся мучи́теля повеле́нию,/ яви́лся еси́ венцено́сец свяще́нный,/ и́бо Христо́с возме́здие тебе́ дарова́/ и всели́ тя в Ца́рство Небе́сное.

Кондак, глас 1

Многоболе́зненных мук искуше́ния претерпе́л еси́,/ но непрекло́нен умо́м пребы́л еси́,/ мече́м же усече́н и в ре́ку вве́ржен,/ ре́чныя струи́ освяти́л еси́,/ сего́ ра́ди восхваля́ем тя, о́тче Ирине́е,/ воспева́юще свяще́нную и мироспаси́тельную па́мять твою́.

Величание

Велича́ем тя,/ святи́телю о́тче Ирине́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобным Илариону Новому и Стефану чудотворцу, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их в ми́ре упра́ви живо́т наш.

Тропарь преподобномученику Евстратию Печерскому, в Ближних пещерах почивающему, глас 7

По́стником и му́чеником яви́лся еси́ похвала́, преподо́бне Евстра́тие,/ пре́жде бо воздержа́нием плоть умертви́в,/ после́довал еси́ Христу́, нося́ крест свой./ Последи́* же и сам на крест вознесе́н быв,/ и копие́м в ре́бра прободе́н,/ в ру́це Бо́жии ду́шу преда́л еси́./ Колесни́цею о́гненною возноси́м на Небеса́,/ сугу́бо венча́лся еси́ от Христа́ Бо́га/ и Спа́са душ на́ших.

Кондак, глас 8

Я́ко ревни́тель стра́сти Влады́чней,/ и по́стников усе́рдный после́дователь сый,/ пле́нники уче́нием твои́м наста́вль, Христо́ви приве́л еси́, Евстра́тие,/ и нас плене́нных страстьми́, мольба́ми свои́ми свободи́,/ и подража́тели честно́му твоему́ житию́ покажи́, зову́щих:/ ра́дуйся, испи́вый сла́достне ча́шу Христо́вых страда́ний.

Величание

Ублажа́ем тя,/ преподобному́чениче Евстра́тие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобномуИлариону Псковоезерскому, Гдовскому, глас 4

В моли́твах бо́дрствуя,/ пресве́тлый храм Ду́ха Свята́го был еси́,/ те́мже и чудотво́рец преди́вный яви́лся еси́,/ преподо́бне о́тче наш Иларио́не,/ о нас моли́ Христа́ Бо́га/ све́том Боже́ственнаго позна́ния просвети́ти ны/ и спасти́ ду́ши на́ша.

Кондак, глас 2

Чистото́ю душе́вною боже́ственно вооружи́вся... (общий преподобному).

Величание

Ублажа́ем тя,/ преподо́бне о́тче Иларио́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь мученику Енравоту – Бояну, князю Болгарскому, глас 4

Я́коже А́вель, от суда́ бра́тняго сме́рть прия́л еси́/ и кровь твою́ пролия́л еси́ за Искупи́вшаго ны честно́ю Свое́ю Кро́вию./ От земна́го же к Небе́сному преста́вився Ца́рствию,/ кня́же и му́чениче Енраво́те-Боя́не,/ моли́ Царя́ царе́й о нас, при́сных твои́х.

Тропарь преподобному Ионе Климецкому (Клименецкому), Олонецкому, глас 4

А́нгельскому житию́ поревнова́в, блаже́нне Ио́но,/ оста́вил еси́ оте́чество твое́, Вели́кий Новгра́д,/ и, прише́д в преде́лы Олоне́цкия/ и в пусты́ню всели́вся,/ в труде́х, моли́твах и слеза́х подвиза́лся еси́,/ и, я́ко му́дрый купе́ц, Ца́рствие Небе́сное насле́довал еси́./ Те́мже любо́вию вопие́м ти:/ моли́ Христа́ Бо́га, да спасе́т ду́ши на́ша.

Кондак, глас 2

Христо́вым стопа́м после́дователь быв, блаже́нне Ио́но,/ ра́дуяся, всели́лся еси́ в пусты́ню,/ Вы́шняго Про́мыслом наставля́емь,/ и, не убоя́вся вра́жиих прираже́ний,/ я́коже столп непоколеби́м,/ угото́вал еси́ себе́ в жили́ще Ду́ху Пресвято́му,/ мы же, па́мять твою́ соверша́юще, вопие́м ра́достно: ра́дуйся, я́ко озаря́вши нас чудесы́ твои́ми,/ ра́дуйся, я́ко оста́вил еси́ вре́менная ра́ди бу́дущих благ,/ ра́дуйся, я́ко возставля́еши лени́вых ко спасе́нию./ Моли́ у́бо Христа́ Бо́га, о́тче преподо́бне,/ да спасе́т ду́ши на́ша в Де́нь Су́дный.

Величание

Ублажа́ем тя,/ преподо́бне о́тче Ио́но,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь и Кондак общие мученикам

Тропарь преподобным Марку, Ионе, Корнилию и Вассе Псково-Печерским, глас 4

Пусты́нническаго жития́ нача́льницы,/ оби́тели Богома́терния устрои́телие,/ преподо́бнии отцы́ Ма́рко, Ио́но и Корни́лие,/ и сподви́жница сла́вная Ва́ссо,/ во святе́й горе́ у пото́ка Каменца подвиза́вшиеся,/ и та́мо во глуби́нах недр земли́ храм ископа́вшии;/ последи́же и́ноки ту собра́вшеся,/ доброде́тельми сия́юще, оби́тель украша́ху./ Ны́не же в Небе́снех Черто́зех лику́ете,/ моля́щеся ко Го́споду приле́жно,/ во е́же спасти́ся нам.

Ин тропарь, глас 8

Яко свети́льницы, яви́стеся всесве́тлии/ в верте́пе Цари́цы Богома́тери,/ преподо́бнии отцы́ на́ши Ма́рко, Ио́но и Корни́лие,/ вы бо, крест Христо́в на ра́мо взе́мше,/ усе́рдно Тому́ после́довасте/ и, чистото́ю Бо́гови приближи́вшеся,/ отону́дуже си́лами чуде́с обога́тистеся./ Тем и мы любе́зно прибега́ем к вам и уми́льно глаго́лем:/ о преподо́бнии, моли́те Христа́ Бо́га/ спасти́ся душа́м на́шим.

Кондак, глас 8

Днесь ве́рнии лико́вствуют,/ па́мять преподо́бных Пско́во-Пече́рских соверша́юще./ Днесь бо в черто́зех Царя́ сла́вы мо́лятся,/ помина́юще на́ши не́мощи и печа́ли,/ непреста́нно про́сят дарова́ть нам мир/ и ве́лию ми́лость.

Ин кондак, глас 2

Христо́вою любо́вию уязви́вшеся,/ преподо́бнии, и Того́ крест на ра́мо взе́мше,/ понесли́ есте́ Боже́ственне, вооружи́вшеся на неви́димыя враги́/ и непреста́нныя моли́твы, я́ко копие́, в рука́х иму́ще кре́пко,/ победи́ли есте́ бесо́вская ополче́ния,/ тем зове́м вам:/ ра́дуйтеся, преподо́бнии отцы́ на́ши Ма́рко, Ио́но и Корни́лие,/ ве́рных удобре́ние.

Величание

Ублажа́ем вас,/ преподо́бнии отцы́ Ма́рко, Ио́но и Корни́лие, со Ва́ссою сла́вною,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь преподобному Иоанну Лествичнику, глас 1

Пусты́нный жи́тель и в телеси́ а́нгел и чудотво́рец яви́лся еси́, богоно́се о́тче наш Иоа́нне;/ посто́м, бде́нием, моли́твою Небе́сная дарова́ния прии́м,/ исцеля́вши неду́жныя и ду́ши ве́рою притека́ющих ти./ Сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Ин тропарь, глас 8

Слез твои́х тече́ньми, пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней,/ сия́я чудесы́, Иоа́нне о́тче наш,/ моли́ Христа́ Бо́га спасти́ся душа́м на́шим.

Ин тропарь, глас 4

Я́ко Боже́ственную ле́ствицу, обрето́хом, Иоа́нне преподо́бне,/ твоя́ Боже́ственныя доброде́тели,/ к Небеси́ возводя́щая ны:/ доброде́телей бо ты был еси́ воображе́ние./ Тем моли́ Христа́ Бо́га, да спасе́т ду́ши на́ша.

Кондак, глас 1

Плоды́ присноцвету́щия/ от твоея́ кни́ги принося́ уче́ния, прему́дре,/ услажда́вши сердца́, сим с трезве́нием вне́млющих, блаже́нне,/ ле́ствица бо есть, ду́ши возводя́щая от земли́ к Небе́сней и пребыва́ющей сла́ве,/ ве́рою чту́щих тя.

Ин кондак, глас 4

На высоте́ Госпо́дь воздержа́ния и́стинна тя положи́,/ я́коже звезду́ неле́стную, световодя́щую концы́,/ наста́вниче Иоа́нне о́тче наш.

Величание

Ублажа́ем тя,/ преподо́бне о́тче Иоа́нне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Софронию, епископу Иркутскому, глас 4

От ю́ности Христа́ возлюби́л еси́, блаже́нне Софро́ние,/ до́бре упра́вил еси́ и́ноческия оби́тели/ и, архиере́йства са́ном почте́н быв,/ упа́сл еси́ Ирку́тскую па́ству,/ те́мже и по преставле́нии дарова́ния чуде́с от Бо́га прия́л еси́/ и мо́лиши Христа́ Бо́га/ изба́вити нас от бед и спасти́ ду́ши на́ша.

Ин тропарь, глас 1

Ско́рый в беда́х и ско́рбех засту́пниче,/ о́тче иера́рше, страны́ Сиби́рския,/ святи́телю Софро́ние,/ на Небеси́ предстоя́й с первоиера́рхом Ирку́тския Це́ркви и все́ми святы́ми,/ вы́ну и́маши благоволе́ние Го́спода сла́вы;/ при́зри на лю́ди, притека́ющия к честны́м оста́нкам святы́х моще́й твои́х,/ с ве́рою и любо́вию сле́зно прося́щия твоея́ по́мощи и заступле́ния,/ моли́, Его́же пропове́дал еси́ лю́дем Сиби́ри,/ изба́вити я от находя́щих зол и наве́тов вра́жиих,/ просвети́ти лю́дие олядене́вшая* дре́вле неве́рием сердца́,/ дарова́ти утвержде́ние ве́ры Христо́вы/ и спасти́ ду́ши на́ша.

Кондак, глас 3

Па́стырей Нача́льнику, Христу́,/ труди́лся еси́, святи́телю Софро́ние,/ на па́жити духо́вней се́верныя страны́ на́шея,/ язы́цы монго́льстии от пре́лести и скве́рны и́дольския избавля́я,/ приве́л еси́ я к све́ту ве́ры Христо́вы,/ и ны́не со а́нгелы Влады́чню престо́лу предстоя́,/ моли́ непреста́нно о всех нас,/ изба́вити ны от бед и спасти́ ду́ши на́ша.

Ин кондак, глас 4

Соиме́ннаго му́дрости иера́рха,/ изря́дное Це́ркве Ирку́тския украше́ние,/ отца́ на́шего святи́теля Софро́ния любо́вию восхва́лим вси ве́рнии,/ той бо есть храни́тель гра́да и страны́ сея́/ и моли́твенник о душа́х на́ших.

Величание

Велича́ем тя,/ святи́телю о́тче Софро́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь сретению Пресвятой Богородицы и праведной Елисаветы, матери Иоанна Предтечи, глас 4

Де́во Безневе́стная/ и Ма́ти Всечи́стая,/ прие́мши от Арха́нгела благове́щение,/ со тща́нием востекла́ еси́ в Го́рняя,/ и, целова́вши ю́жику* Твою́, всечестну́ю Елисаве́ть,/ Ма́терию Го́спода от сия́ нарече́на была́ еси́,/ и возвели́чила возвели́чившаго Тя Го́спода:/ Благослове́нна Ты в жена́х,/ и благослове́н Плод чре́ва Твоего́.

Кондак, глас 3

Вои́стинну блаже́нна еси,/ Свята́я Де́во Мари́е/ и вся́кия хвалы́ превосходя́щая,/ я́ко из Тебе́ провозсия́ Со́лнце Пра́вды,/ Христо́с Бог наш.

Тропарь праведной Еввуле, матери великомученика Пантелеимона, глас 1

Всера́достное дарова́ние от Бо́га/ святы́м жена́м – святы́я де́ти;/ всера́достное дая́ние и тебе́, свята́я Евву́ло, –/ святы́й великому́ченик Пантелеи́мон,/ ми́лости тезоимени́тый,/ неду́гующих цели́тель и наш засту́пник./ Сла́ва у́бо о вас Всеми́лостивому Влады́це,/ сла́ва Подаю́щему ва́ми цельбы́,/ сла́ва предста́тели на́ши вас Показа́вшему.

Кондак, глас 3

Па́мять твоя́, Евву́ло,/ весели́т чу́щих тя,/ ма́терь сла́внаго Пантелеи́мона,/ с ни́мже Бо́жию Престо́лу предстоя́щи,/ моли́ся прегреше́ний оставле́ние да́та нам.

Величание

Велича́ем тя,/ свята́я пра́ведная Евву́ло,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь священномученику Ипатию, епископу Гангрскому, глас 4

Изволе́нием Боже́ственнаго Ра́зума впери́в ум свой в Небе́сныя оби́тели/ и ра́вно а́нгелом житие́ пожи́в на земли́,/ сего́ ра́ди муче́ния красоты́ вене́ц на свое́м версе́ утверди́в,/ священному́чениче Ипа́тие,/ моли́ Христа́ Бо́га / спасти́ся душа́м на́шим.

Ин тропарь, глас 3

В прекра́сном Це́ркве апо́стольския вертогра́де/ из ю́на во́зраста всеси́льною десни́цею Бо́жиею насади́лся еси́,/ Богоблаже́нне о́тче Ипа́тие,/ и в ней, я́ко ве́рен первосвяще́нник,/ ве́рно Богонача́льное и Всетворя́щее Тро́ическое Еди́нство пропове́дал еси́ во Вселе́нском Собра́нии,/ Ду́ха же Свята́го в доброде́телех испо́лнен быв,/ ве́лия чудеса́ сотвори́в,/ муче́нием за ве́ру Христо́ву сконча́вся,/ прише́л еси́ в Небе́сный град,/ иде́же Триипоста́снаго Бо́га зря,/ моли́ о честву́ющих тя,/ да в Го́рнем Иерусали́ме со святы́ми жи́ти сподо́бимся.

Ин тропарь, глас 4

Богови́дное досточу́дных доброде́телей зерца́ло,/ Богоправи́мое Правосла́вныя ве́ры прави́ло*/ и утвержде́ние Це́ркве Христо́вы,/ за ню́же и страда́л еси́, всечу́дне о́тче Ипа́тие,/ чудесы́, Богодарова́нными тебе́, весь мир удиви́в,/ душеспаси́тельныя по́льзы сотвори́л еси́,/ и ны́не ве́рно призыва́ющим тя во вся́ких беда́х и напа́стех/ испроси́ нам у Го́спода Бо́га/ по́мощь и спасе́ние ве́чное душа́м.

Кондак, глас 2

Ри́мскому оте́честву свети́льник,/ Богоза́рными луча́ми концы́ светя́,/ ны́не просвети́ твое́ пра́зднество пою́щия, Ипа́тие,/ прося́ свы́ше ми́ра и грехо́в оставле́ния,/ моли́твами защити́ ны, Ипа́тие многострада́льне.

Ин кондак, глас тойже

Оби́тель Триипоста́снаго Божества́,/ достоблаже́нне о́тче Ипа́тие, быв,/ во вселе́нную Всетворца́ Бо́га воскли́кнул еси́./ Благода́рственне же чудоде́йствуя,/ вшел еси́ в Небе́сныя оби́тели,/ та́мо моли́ Всесвяту́ю Тро́ицу, мо́лим тя,/ исцели́ти телеса́ и ду́ши на́ша/ в Богосозда́нную на́шу красоту́.

Ин кондак, глас 4

О всеблаже́нный чудотво́рце Ипа́тие,/ предстоя́й в Небесе́х Всетворя́щей Боже́ственней Тро́ице,/ с ли́ки Го́рними богоприя́тне и всера́достне возно́сиши хвалы́./ Приими́ от нас сие́ тебе́ хвалорадостносло́вие,/ и моли́ Го́спода изба́вити ны от вся́ких грехо́в, напа́стей же и боле́зней/ и дарова́ти Ца́рствие Небе́сное всю́ду пою́щим:/ аллилу́йя.

Величание

Велича́ем тя,/ священному́чениче Ипа́тие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Ионе, митрополиту Московскому и всея России, чудотворцу, глас 3

От ю́ности твоея́ весь сам себе́ Го́сподеви возложи́в,/ в моли́твах, и в труде́х, и в посте́х о́браз быв доброде́тели,/ отону́дуже ви́дев Бог твое́ благо́е произволе́ние,/ архиере́я тя и па́стыря Це́ркве Свое́й устроя́ет./ Те́мже и по преставле́нии/ честно́е те́ло твое́ це́ло и нетле́нно соблюде́ся,/ Ио́но святи́телю,/ моли́ Христа́ Бо́га,/ да спасе́т ду́ши на́ша.

Ин тропарь, глас 3

Яре́м Госпо́день измла́да восприи́м,/ и Того́ стопа́м невозвра́тным жела́нием после́довал еси́,/ и освяще́ннаго по́двига дости́же,/ святи́тельства па́ству прии́м и чуде́с от Бо́га да́ры прия́т,/ с ве́рою приходя́щим к ра́це моще́й твои́х/ подае́ши разли́чным неду́гом исцеле́ние неоску́дно,/ о́тче наш Ио́но, святи́телю Христо́в,/ моли́ Христа́ Бо́га дарова́ти нам ве́лию ми́лость.

Ин тропарь, глас тойже

Боже́ственною благода́тию просвети́вся/ и по сме́рти показу́я све́тлость жития́ твоего́,/ источа́вши ми́рови благоуха́ния,/ притека́ющим к ра́це моще́й твои́х,/ и наро́ди Моско́встии наставля́вши ко све́ту богоразу́мия,/ Ио́но, о́тче наш,/ моли́ Христа́ Бо́га/ дарова́ти нам ве́лию ми́лость.

Кондак, глас 8

Я́ко от младе́нства Го́сподеви поработи́в себе́, му́дре,/ посто́м и бде́нием те́ло твое́ удруча́я,/ те́мже сосу́д чист и дом Ду́ху Пресвято́му яви́лся еси́,/ сего́ ра́ди и Це́ркве Свое́й тебе́ архиере́я и па́стыря устроя́ет,/ ю́же до́бре упа́сл, ко Го́споду отхо́диши, Его́же возлюби́л еси́./ Тем мо́лим тя: помина́й нас, ве́рою чту́щих святу́ю па́мять твою́, да вси зове́м ти:/ ра́дуйся, о́тче Ио́но, святи́телю всечестны́й.

Ин кондак, глас тойже

Жела́нием духо́вным по́стническое житие́ соверши́в/ и святи́тельства па́ству прии́м,/ чистоты́ ра́ди теле́сныя и те́ло твое́ Влады́ка Христо́с соблюде́ нетле́нно,/ и Петру́ чудотво́рцу насле́дника тя соде́ла,/ и того́ нра́ву после́довал еси́,/ и учи́теля тя Христо́с Своему́ ста́ду дарова́,/ иде́же лежа́т целе́бныя мо́щи твоя́,/ благоуха́ют, я́ко от кади́ла благово́нна,/ и подаю́т исцеле́ния немощны́м, ве́рою приходя́щим,/ святи́телю Ио́но, моли́ Христа́ Бо́га непреста́нно о всех нас.

Величание

Велича́ем тя,/ святи́телю о́тче Ио́но,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Иннокентию, митрополиту Московскому, апостолу Сибири и Америки, глас 1

Во вся стра́ны полу́нощныя изы́де веща́ние твое́,/ я́ко прие́мшия сло́во твое́,/ и́хже боголе́пно научи́л еси́,/ неве́дущия Христа́ све́том Ева́нгелия просвети́л еси́,/ челове́ческия обы́чаи украси́л еси́,/ Росси́йская похвало́, святи́телю о́тче наш Инноке́нтие,/ моли́ Христа́ Бо́га/ спасти́ся душа́м на́шим.

Ин тропарь, глас 3

Пе́рвый учи́тель пре́жде те́мным язы́ческим племена́м,/ пе́рвый возвести́тель им пути́ спаси́тельнаго,/ апо́стольски потруди́выйся в просвеще́нии Сиби́ри и Аме́рики,/ святи́телю о́тче наш Инноке́нтие,/ Влады́ку всех моли́/ мир вселе́нней дарова́ти/ и душа́м на́шим ве́лию ми́лость.

Кондак, глас 4

И́стинный и нело́жный учи́тель был еси́,/ запове́данная бо Го́сподем сам сотвори́в,/ и́мже учи́л еси́ и наказа́л еси́ ко благоче́стию приходя́щая ча́да,/ неве́рныя вразумля́л еси́ позна́ти ве́ру и́стинную,/ просвеща́я их Святы́м Креще́нием./ Сего́ ра́ди со апо́столы ра́дуешися,/ прие́мля по́честь благове́стника Христо́ва.

Величание

Велича́ем тя,/ святи́телю о́тче Инноке́нтие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Ипатию целебнику, Печерскому, в Дальних пещерах почивающему, глас 1

Безнача́льнаго о́наго и ти́хаго ме́ста,/ иде́же несть печа́ли, ни воздыха́ния,/ дости́гнути, преподо́бне, жела́я,/ не дал еси́ себе́ зде поко́я нима́ло,/ но при́сно день и нощь в де́лех вся́ких/ и жесто́ком житии́ трудолю́бно подвиза́яся пребыва́вши,/ тем жела́емаго получи́в уже́, Ипа́тие,/ моли́ся о душа́х на́ших.

Кондак, глас 3

Труды́ ко трудо́м вы́ну ра́ди Го́спода прилага́я,/ никогда́ же обре́лся еси́ пра́зден, Ипа́тие./ Те́мже и в ле́поту трудолюби́в нарече́ся,/ зва́ние прие́м от дел.

Величание

Ублажа́ем тя,/ преподо́бне о́тче Ипа́тие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее «Боголюбская-Зимаровская», глас 1

Боголюби́вая Цари́це,/ Неискусому́жная Де́во, Богоро́дице Мари́е!/ Моли́ за ны Тебе́ Возлюби́вшаго/ и Ро́ждшагося от Тебе́ Сы́на Твоего́, Христа́ Бо́га на́шего,/ пода́ти нам оставле́ние прегреше́ний,/ ми́рови мир,/ земли́ плодо́в изоби́лие,/ па́стырем святы́ню/ и всему́ челове́чу ро́ду спасе́ние./ Гра́ды на́ша и всю зе́млю Росси́йскую от нахожде́ния иноплеме́нных заступи́/ и от междоусо́бныя бра́ни сохрани́./ О Ма́ти, Боголюби́вая Де́во!/ О Цари́це Всепе́тая!/ Ри́зою Свое́ю покры́й нас от вся́каго зла,/ от ви́димых и неви́димых враг защити́/ и спаси́ ду́ши на́ша.

Ин тропарь, глас тойже

Всепе́тая и Всесла́вная Цари́це Богоро́дице,/ Ма́ти всея́ тва́ри Соде́теля,/ христиа́нская Наде́ждо и Засту́пнице,/ печа́льных Утеше́ние,/ ненаде́ющихся и отча́явшихся ско́рое Наде́яние!/ Мо́лим Тя, ми́лостива бу́ди нам гре́шным,/ и не оста́ви раб Свои́х,/ и не отри́ни моле́ния ве́рных,/ в ско́рбех и бе́дах пред честны́м о́бразом Твои́м избавле́ния тре́бующих./ О Влады́чице, блага́я Помо́щнице!/ Ри́зою Твое́ю честно́ю нас защити́/ и от всех зол изба́ви,/ моля́щи Сы́на Твоего́, Христа́ Бо́га на́шего,/да спасе́т ду́ши на́ша, я́ко Милосе́рд.

Тропарь преподобной Марии Египетской, глас 8

В тебе́, ма́ти, изве́стно спасе́ся... (общий преподобной жене).

Кондак, глас 3

Блуда́ми пе́рвее преиспо́лнена вся́ческими,/ Христо́ва неве́ста днесь покая́нием яви́ся,/ а́нгельское жи́тельство подража́ющи,/ де́моны Креста́ ору́жием погубля́ет./ Сего́ ра́ди Ца́рствия неве́ста яви́лася еси́, Мари́е пресла́вная.

Ин кондак, глас 4

Греха́ мглы избежа́вши,/ покая́ния све́том озари́вши твое́ се́рдце, сла́вная,/ пришла́ еси́ ко Христу́,/ Сего́ всенепоро́чную и святу́ю Ма́терь,/ моли́твенницу ми́лостивную принесла́ еси́./ Отону́дуже и прегреше́ний обрела́ еси́ оставле́ние,/ и со а́нгелы при́сно сра́дуешися.

Величание

Ублажа́ем тя,/ преподо́бная ма́ти Мари́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Евфимию, архимандриту Суздальскому, чудотворцу, глас 3

Я́ко светоза́рная звезда́/ прише́л еси́ от восто́ка на за́пад,/ оста́вив оте́чество твое́, Ни́жний Но́вград,/ и доше́д Богоспаса́емаго гра́да Су́ждаля,/ в нем оби́тель сотвори́л еси́,/ и собра́л еси́ мона́хов мно́жества,/ и прие́м дар чуде́с от Бо́га, о́тче Евфи́мие,/ был еси́ о Христе́ собесе́дник/ и спо́стник преподо́бному Се́ргию./ С ни́мже у Христа́ Бо́га испроси́ нам здра́вие и спасе́ние,/ и душа́м на́шим ве́лию ми́лость.

Кондак, глас 2

Волне́ний мно́жество невла́жно преходя́,/ безпло́тныя враги́ струя́ми слез твои́х погрузи́л еси́,/ богому́дре Евфи́мие, преподо́бне./ Тем и чуде́с дар прия́л еси́,/ моли́ непреста́нно о всех нас.

Ин кондак, глас тойже

Восприи́м Авраа́млю до́блесть, о́тче преподо́бне Евфи́мие,/ оста́вль оте́чество свое́, Ни́жний Но́вград,/ и доше́д Богоспаса́емаго гра́да Су́ждаля,/ обре́л еси́ ме́сто благоуго́дно,/ на не́мже оби́тель ве́лию соста́вил еси́/ и в ней пожи́л еси́ в моли́твах, в поста́х и во бде́ниих./ Тем прии́м чуде́с дар от Бо́га,/ собра́л еси́ и́ноков мно́жества,/ с ни́миже Христа́ Бо́га моли́ непреста́нно о всех нас.

Величание

Ублажа́ем тя,/ преподо́бне о́тче Евфи́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь мученику Авраамию Болгарскому, Владимирскому чудотворцу, глас 4

Дне́сь, благове́рнии лю́дие, соше́дшеся/ восхва́лим до́бляго сего́ му́ченика и страда́льца Авраа́мия,/ сей бо, укрепля́емь си́лою Бо́жиею,/ ду́шу свою́ положи́ за Христа́,/ мно́го пострада́в от злове́рных болга́р./ Сего́ ра́ди от Го́спода вене́ц прия́т,/ и ны́не предстои́т Ему́/ и мо́лится о гра́де сем/ и о всех нас, чту́щих па́мять его́.

Кондак, глас 3

Укрепи́вся, сла́вне, любо́вию Госпо́днею/ и Того́ честны́й Крест на ра́мо взем, и́го Госпо́дне,/ посрами́л еси́ диа́воля кова́рствия/ и пострада́л еси́ да́же до сме́рти,/ и сего́ ра́ди, досточу́дне, яви́ся страда́лец вели́к, Авраа́мие,/ и ору́жником храбротаи́нник/ и уча́стник Бо́жия благода́ти.

Ин кондак, глас 8

Я́ко многоце́нное сокро́вище,/ принесено́ бысть от Болга́рския страны́ во град Влади́мир/ пречестно́е те́ло твое́, му́чениче Авраа́мие,/ и́мже подае́ши всем чту́щим пресла́вную па́мять твою́ оби́лие исцеле́ний,/ предстоя́ на Небеси́ Христу́ Бо́гу/ и моля́ Его́ о спасе́нии душ на́ших.

Величание

Велича́ем тя,/ страстоте́рпче святы́й Авраа́мие,/ и чтим честна́я страда́ния твоя́,/ я́же за Христа́/ претерпе́л еси́.

Тропарь преподобному Геронтию, канонарху Печерскому, в Дальних пещерах почивающему, глас 3

Всечестны́й канона́рше Геро́нтие,/ правилонача́льный бы́вый в це́ркви/ и в пра́виле и́ночестем возсия́вший све́тло,/ моли́ Христа́ Бо́га,/ да прегреше́ний оставле́ние пода́ст душа́м на́шим.

Кондак, глас 1

Канона́ршествуя, честны́й канона́рше Геро́нтие,/ и пе́ние церко́вное пою́щим предводи́тельствуя в це́ркви,/ уподо́бился вои́стину а́нгелом,/ пою́щим Бо́га на Небеси́,/ и́хже и житию́ подража́я, и, с ни́ми лику́я,/ помина́й ны, любо́вию хваля́щих тя.

Ин тропарь, общий преподобным Геронтию и Леонтию, канонархам Печерским, в Дальних пещерах почивающим, глас 3

Дво́ице свята́я,/ правилонача́льная, бы́вшая в це́ркви/ и в пра́виле и́ночестем возсия́вшая све́тло,/ всечестни́и канона́рси,/ моли́те Христа́ Бо́га,/ да прегреше́ний оставле́ние пода́ст душа́м на́шим.

Кондак, общий преподобным Геронтию и Леонтию, канонархам Печерским, глас 1

Канона́ршествующе, честни́и канона́рси,/ и пе́ние церко́вное пою́щим предводи́тельствующе в це́ркви,/ подо́бистеся вои́стину а́нгелом,/ пою́щим Бо́га на Небеси́,/ и́хже житию́ подра́жавше,/ и, с ни́ми ны́не лику́юще,/ помина́йте ны, любо́вию хва́лящих вас.

Величание преподобному Геронтию

Ублажа́ем тя,/ преподо́бне о́тче Геро́нтие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Титу чудотворцу, глас 8

В Тебе́, о́тче, изве́стно спасе́ся... (общий преподобному).

Кондак, глас 4

Жития́ молву́ оста́вил еси́,/ и ти́хо все житие́ твое́ пожи́в, му́дре, к Бо́гу преше́л еси́,/ чудоно́сче о́тче наш, Ти́те преподо́бне.

Ублажа́ем тя,/ преподо́бне о́тче Ти́те,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Никите исповеднику, игумену обители Мидикийской, глас 8

В тебе́, о́тче, изве́стно спасе́ся... (общий преподобному).

Кондак, глас 2

Небе́сный ум и житие́ стяжа́в,/ сия́вши я́сно, я́коже со́лнце, све́тлостию дел,/ просвеща́вши су́щия во тьме жите́йстей, о́тче Ники́то,/ и приводя́ всех к Бо́гу,/ моли́ непреста́нно о всех нас.

Величание

Ублажа́ем тя,/ преподо́бне о́тче Ники́то,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее «Неувядаемый Цвет», глас 5

Преблагослове́нная Богоро́дице Де́во,/ покланя́емся Твоему́ Пречи́стому о́бразу,/ Тебе́ пое́м хвале́бную песнь,/ Тебе́ прино́сим ну́жды, го́ре и сле́зы,/ Ты же о, кро́ткая Засту́пница на́ша,/ Тебе́ так близки́ земны́е печа́ли,/ приими́ на́ша воздыха́ния,/ помози́ нам и от бед спаси́./ Неуста́нно бо и со умиле́нием да зове́м Ти:/ ра́дуйся, Ма́ти Бо́жия, Цве́те Неувяда́емый.

Ин тропарь, глас 5

Ра́дуйся, Богоневе́сто, же́зле та́йный,/ Цвет Неувяда́емый процве́тший,/ ра́дуйся, Влады́чице, Еюже ра́дости наполня́емся/ и жизнь насле́дствуем.

Кондак, глас 6

Не и́мамы ины́я по́мощи... (общий Божией Матери).

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь преподобному Иосифу песнописцу, глас 8

В Тебе́, о́тче, изве́стно спасе́ся... (общий преподобному).

Кондак, глас 4

Покая́ния исто́чник неисчерпа́емый,/ утеше́ния пода́тель неконча́емаго/ и умиле́ния пучи́на еси́, Ио́сифе,/ сле́зы нам пода́ждь покая́ния Боже́ственнаго,/ и́миже утеше́ние зде пла́чущеся/ обря́щем от Бо́га,/ твоея́ по́мощи прося́ще, свя́те.

Величание

Ублажа́ем тя,/ преподо́бне о́тче Ио́сифе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь священномученику Никите Славянину, Афонскому, глас 4

По́стнически подвиза́вся/ и плоть покори́в ду́ху,/ вшел еси́ в тишину́ безстра́стия,/ иере́йством же укра́шен,/ за Христа́ пострада́л еси́ тверде́йши,/ Ему́же моли́ся о чту́щих тя,/ священному́чениче Ники́то приснопа́мятне.

Ин тропарь, глас 1

Плотска́я увяди́в двиза́ния вся,/ моли́твою и стоя́нием всено́щным,/ воздержа́нием же и слеза́ми/ безстра́стия дости́гл еси́, сла́вный Ники́то,/ и Христа́ со дерзнове́нием пропове́дав,/ тве́рдо за Него́ пострада́л еси́, священному́чениче./ Сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак, глас 4

Всеору́жием Креста́ огражде́н,/ к по́двигом во́льне изше́л еси́,/ не убоя́вся, Богогла́се, вра́жиих преще́ний,/ с ре́вностию же ве́ру испове́дуя, не преста́л еси́,/ до́ндеже* муче́ния иску́с проше́л еси́ весь,/ и по́честь побе́ды,/ Ники́то, получи́л еси́.

Ин кондак, глас 2

В преподо́бии и пра́вде, о́тче, пожи́л еси́/ и, страда́ньми усоверши́вся,/ сокро́виществовал еси́ себе́ бога́тство дарова́ний./ Долго́в* у́бо разреше́ние испроси́ нам,/ неду́гов свобожда́ющи, всебога́те Ники́то,/ и оби́тели сея́, в не́йже Же́ртву Бо́гу приноси́л еси́,/ бу́ди при́сное утвержде́ние.

Величание

Велича́ем тя,/ священному́чениче Ники́то,/ и, чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Иосифу Многоболезненному, Печерскому, в Дальних пещерах почивающему, глас 8

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́,/ Ио́сифе, о́тче наш,/ моли́ Христа́ Бо́га спасти́ся душа́м на́шим.

Кондак, глас тойже

Многоле́тне страда́я в боле́знех,/ моли́твою и обеща́нием восприя́тия и́ночества/ прия́л еси́ здра́вие от Бо́га,/ и, неле́ностно подвиза́вся в Пече́рстей оби́тели,/ насле́дил еси́ неболе́зненную и ве́чную жизнь,/ и исцеля́вши неду́ги чту́щих тя,/ преподо́бне Ио́сифе, о́тче наш.

Величание

Ублажа́ем тя,/ преподо́бне о́тче Ио́сифе,/ и чтим святу́ю па́мять твою́,/ наста́вниче мона́хов/ и собесе́дниче Ангелов.

Тропарь Божией Матери ради иконы Ее, именуемой «Избавительница», глас 4

Я́ко пресве́тлая звезда́,/ просия́ Боже́ственными чудесы́/ святы́й о́браз Твой Изба́вительнице,/ луча́ми благода́ти и милосе́рдия Твоего́/ озари́в в нощи́ скорбе́й су́щих./ Пода́ждь у́бо и нам, Всеблага́я Де́во,/ избавле́ние от бед,/ исцеле́ние неду́гов душе́вных и теле́сных,/ спасе́ние и ве́лию ми́лость.

Ин тропарь, глас тойже

Избавле́ние Приснося́щая всем,/ от се́рдца Тебе́ призыва́ющим,/ принеси́ избавле́ние ско́рое и нам,/ в лю́тых беда́х погиба́ющим/ и в Тебе́ Еди́ной избавле́ние на́ше по Бо́зе полага́ющим.

Кондак, глас 8

Ко ико́не Твое́й, Пресвята́я Госпоже́,/ бе́дствовавший с ве́рою прите́кше,/ заступле́нием Твои́м изба́витися от злых,/ но я́ко Ма́терь Христа́ Бо́га,/ и нас свободи́ от лю́тых обстоя́ний,/ вре́менных и ве́чных, да зове́м Ти:/ ра́дуйся, Изба́вительнице на́ша от всех бед.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь святителю Иову, первому патриарху Московскому и всея Руси, глас 3

Да торжеству́ет Це́рковь Христо́ва/ и да ра́дуется град Москва́,/ я́ко возсия́ свети́льник земли́ Росси́йския,/ во исповеда́нии и́стины непоколеби́мый И́ов Патриа́рх,/ его́же моли́твами, Го́споди,/ вся собла́зны ми́ра сего́ и е́реси искорени́,/ лю́ди во благоче́стии наста́ви/ и утверди́ в Правосла́вии.

Ин тропарь, глас 5

Правосла́вия побо́рниче,/ ве́ры Христо́вы испове́дник был еси́,/ первоиера́рше Це́ркве Ру́сския,/ святи́телю о́тче Иове,/ за ны Христа́ Бо́га моли́:/ ве́ру оте́ческую утве́рдити,/ грехо́в оставле́ние нам дарова́ти/ и пода́ти ми́ру ве́лию ми́лость.

Кондак, глас 7

В годи́ну лю́тых искуше́ний/ многострада́льному И́ову подо́бяся,/ обрати́в па́ству к покая́нию,/ терпели́ве И́ове святи́телю,/ моли́ и нам за вся благодари́ти Го́спода/ и всегда́ воздава́ти сла́ву Бо́гови.

Ин кондак, глас 6

Свети́льник Це́ркве Ру́сския/ и па́стырь до́брый яви́лся еси́,/ святи́телю о́тче И́ове,/ моли́твою твое́ю ко Го́споду/ хра́ни зе́млю Росси́йскую/ и спаси́ ду́ши на́ша.

Величание

Велича́ем тя,/ святи́телю о́тче И́ове,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь мученикам Агафоподу диакону, Феодулу чтецу и иже с ними, глас 1

Боле́зньми святы́х, и́миже о Тебе́ пострада́ша,/ умоле́н бу́ди, Го́споди,/ и вся на́ша боле́зни исцели́, Человеколю́бче, мо́лимся.

Кондак, глас 3

Свети́льницы све́тлии я́вльшеся,/ Боже́ственнии му́ченицы,/ тварь всю све́тлостию чуде́с озаря́ете,/ неду́ги разреша́юще,/ и глубо́кую тьму всегда́ отгоня́юще,/ Христу́ Бо́гу моля́щеся непреста́нно о всех нас.

Величание

Велича́ем вас,/ страстоте́рпцы святи́и Агафопо́де и Феоду́ле со пострада́вшими,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь святителю Филиппу Первому, митрополиту Московскому, глас 3

Чу́до яви́ся, извеще́нием и де́лы возсия́в,/ Ду́ха Свята́го произбра́нием святи́тельства па́ству прии́м,/ открове́нием Бо́жиим це́рковь разобра́/ и велича́йшую воздви́же,/ всече́стне Фили́ппе, святи́телю вели́кий,/ мир гра́ду да́руй на́шему Москве́/ и ве́лию ми́лость.

Кондак, глас 8

Во успе́нии твое́м обрето́ша на телеси́ твое́м сокро́вище некра́домое:/ два креста́ и тяжча́йшая желе́за, е́же есть вери́ги*,/ посто́м и моли́твами Бо́гу угоди́л еси́, святи́телю Фили́ппе,/ моли́ Христа́ Бо́га о всех нас.

Величание

Велича́ем тя,/ святи́телю о́тче Фили́ппе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Евтихию, архиепископу Константинопольскому, глас 4

Пра́вило ве́ры, и о́браз кро́тости... (общий святителю).

Кондак, глас 8

Боже́ственнаго ве́рно Евти́хия вси пою́ще, лю́дие,/ любо́вию да ублажи́м, я́ко па́стыря вели́ка, и служи́теля, и учи́теля прему́дра, и прогони́теля ересе́й:/ мо́лит бо Го́спода о всех нас.

Величание

Велича́ем тя,/ святи́телю о́тче Евти́хие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь равноапостольному Мефодию, архиепископу Моравскому, учителю Словенскому, глас 4

Святи́теля Твоего́, Христе́,/ творя́ще све́тло торжество́ успе́ния,/ ми́лости Твоей свы́ше пода́ждь,/ отве́рзи же Ца́рствия две́ри,/ разреши́ же ю́зы на́ша мно́гих грехо́в,/ хода́тайством свята́го Твоего́ ученика́,/ отца́ на́шего.

Кондак, глас 2

Боже́ственна и ве́рна Мефо́дия/ вси воспои́м, лю́дие, и любо́вию ублажи́м,/ я́ко па́стыря вели́ка Слове́ном,/ служи́теля Тро́ицы че́стна,/ прогони́теля е́реси,/ мо́лит бо ся о всех нас.

Величание

Велича́ем тя,/ святы́й равноапо́стольный Мефо́дие,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Тропарь преподобному Георгию исповеднику, митрополиту Митиленскому, глас 4

Пра́вило ве́ры, и о́браз кро́тости... (общий святителю).

Кондак, глас 2

Боже́ственный гром, труба́ духо́вная,/ ве́ры насади́телю, и отсека́телю ересе́й,/ Тро́ицы уго́дниче, вели́кий святи́телю Гео́ргие,/ со а́нгелы предстоя́ при́сно,/ моли́ непреста́нно о всех нас.

Величание

Велича́ем тя,/ святи́телю о́тче Гео́ргие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Даниилу Переяславскому, глас 4

От ю́ности, блаже́нне,/ всего́ себе́ Го́сподеви возложи́в,/ при́сно повину́яся Бо́гу,/ проти́вяся же диа́волу,/ стра́сти грехо́вныя победи́л еси́./ Те́мже сам храм Бо́жий быв,/ и оби́тель кра́сну во сла́ву Пресвяты́я Тро́ицы воздви́гнув,/ и со́бранное тобо́ю в ней ста́до Христо́во/ Богоуго́дно упа́с,/ преста́вился еси́ к ве́чным оби́телем./ Отче Дании́ле,/ моли́ Триипоста́снаго во еди́ном существе́ Бо́га/ спасти́ся душа́м на́шим.

Кондак, глас 8

Невече́рняго Све́та пресве́тлое свети́ло,/ жития́ чистото́ю просвеща́ющее всех,/ яви́лся еси́, о́тче Дании́ле,/ о́браз бо и пра́вило и́ноком был еси́,/ сирота́м же оте́ц, и пита́тель вдови́цам./ Сего́ ра́ди и мы, ча́да твоя́, вопие́м ти:/ ра́дуйся, ра́досте и ве́нче наш;/ ра́дуйся, мно́гое имы́й к Бо́гу дерзнове́ние;/ ра́дуйся, гра́ду на́шему ве́лие утвержде́ние.

Величание

Ублажа́ем тя,/ преподо́бне о́тче Дании́ле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Гавриилу, архиепископу Рязанскому и Зарайскому, глас 5

Ве́рою и пра́вдою Бо́гу служа́,/ сниска́л еси́ любо́вь па́ствы ряза́нския,/ Гаврии́ле святи́телю,/ до́брый па́стырю слове́сных ове́ц./ В годи́ну испыта́ний а́лчущих пита́л еси́,/ ико́ну Богома́тери Зна́мения, имену́емую «Корче́мною»,/ я́ко исто́чник неоску́дный утеше́ния па́стве свое́й указа́л еси́./ И ны́не моли́ся о нас приле́жно,/ чту́щих святу́ю па́мять твою́.

Кондак, глас 3

Христа́ из мла́да возлюби́л еси́/ и Тому́ любо́вию после́довал еси́,/ му́дростию святи́теля Филаре́та ду́шу свою́ пита́я,/ са́на святи́тельскаго удосто́ен был еси́,/ па́ству ряза́нскую, от Бо́га ти да́нную, усе́рдно окормля́л еси́,/ Гаврии́ле святи́телю,/ не преста́й моля́ся о ча́дех твои́х,/ да вси честну́ю па́мять твою́/ ра́достно почита́ем.

Величание

Велича́ем тя,/ святи́телю о́тче Гаврии́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь апостолам, глас 3

Апо́столи святи́и,/ моли́те Ми́лостиваго Бо́га,/ да прегреше́ний оставле́ние/ пода́ст душа́м на́шим.

Кондак, глас 2

Яви́стеся Христо́вы ученицы́ и апо́столи всечестни́и,/ Иродио́не сла́вне, Ага́ве и Ру́фе,/ Асинкри́те, Фле́гонте со Е́рмом,/ при́сно моли́теся Го́сподеви,/ пода́ти нам согреше́ний проще́ние пою́щим вас.

Величание

Велича́ем вас,/ святи́и апо́столи Иродио́не, Ага́ве, Асинкри́те, Ру́фе, Фле́гонте и Е́рме,/ весь мир уче́ньми свои́ми просвети́вшия/ и вся концы́ ко Христу́ приве́дшия.

Тропарь святителю Нифонту, епископу Новгородскому, глас 3

Яко сый нра́вом правосла́вных/ Восто́чныя Це́ркве преда́ний и́стинный защи́тник,/ сподо́бился еси́ вели́каго во отце́х Феодо́сия/ ви́дети по сме́рти, я́ко жи́ва,/ возвеща́юща тебе́ Ца́рствия Небе́снаго насле́дие,/ его́же неизрече́нных добро́т/ ны́не с ним неразлу́чно наслажда́яся,/ моли́ и о нас, ча́дех свои́х, Ни́фонте прехва́льне.

Ин тропарь, глас 4

От мирска́го мяте́жа из млады́х ногте́й/ исше́д в ти́хое приста́нище,/ честны́я оби́тели Пече́рския дости́гл еси́/ и, та́мо яре́м Христо́в восприи́м на ся,/ ра́вно а́нгелом житие́ поживе́,/ отню́дуже прише́д, святи́телю Христо́в Ни́фонте, в Вели́кий Но́вград,/ и архиере́йский престо́л восприя́л еси́/ и мно́ги лю́ди уче́нием свои́м ко Христу́ приве́л еси́,/ Его́же моли́, святи́телю преподо́бне, спасти́ся душа́м на́шим.

Кондак, глас 5

Ре́вности дре́вних оте́ц/ в тве́рдом и́стинных догма́т хране́нии подо́бяся,/ крепкоу́мне Ни́фонте,/ не восхоте́л еси́ восхи́тившему самово́льне престо́л митропо́лии Кли́му сослужи́тель бы́ти,/ избра́нному же на се от всех, поко́рся,/ священноле́пне с ним служи́л еси́,/ и жизнь свою́ сконча́в,/ обре́л еси́ безконе́чное Ца́рство Христо́во.

Ин кондак, глас 8

Возложи́в себе́ от ю́ности Бо́гу, преподо́бне,/ мир тле́нных нивочто́же вмени́в/ и па́че всех Христа́ возлюби́в,/ Тому́ от всея́ души́ любо́вию после́довал еси́/ и, я́ко светоза́рное со́лнце,/ от Ки́ева просия́ во вся концы́ Ру́сския земли́ доброде́телию/ и бысть па́стырь Вели́кому Но́вуграду,/ и, до́бре упа́с ста́до Христо́во слове́сных ове́ц на па́житех духо́вных,/ к Бо́гу отоше́л еси́,/ и ны́не со а́нгелы Влады́чню престо́лу предстоя́,/ нас помина́й, раб свои́х, да зове́м ти:/ ра́дуйся, о́тче Ни́фонте,/ святи́телем изря́дная похвало́.

Величание

Велича́ем тя,/ святи́телю о́тче Ни́фонте,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Руфу, затворнику Печерскому, в Дальних пещерах почивающему, глас 8

Послуша́ние свято́е, нарица́ющееся живо́т,/ преподо́бне о́тче Ру́фе, прие́м,/ живо́т ве́чный о́ным пости́гл еси́,/ иде́же живя́, не забу́ди и нас, хва́лящих тя.

Кондак, глас 6

Честна́ смерть твоя́, преподо́бне Ру́фе, пред Го́сподем,/ че́стне бо и преподо́бне жизнь твою́ в послуша́нии свято́м препроводи́л еси́./ Тем тя у́бо почита́ем,/ я́ко послу́шником о́браз и наста́вник.

Величание

Ублажа́ем тя,/ преподо́бне о́тче Ру́фе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь мученику Евпсихию, глас 4

Му́ченик Твой, Го́споди... (общий мученику).

Кондак, глас 2

Звезда́ све́тлая яви́лся еси́,/ непреле́стная ми́рови⁷,/ Со́лнца Христа́ возвеща́ющи,/ заря́ми твои́ми, страстоте́рпче Евпси́хие,/ и пре́лесть погаси́л еси́ всю,/ нам же подае́ши свет, моля́ся непреста́нно о всех нас.

Величание

Велича́ем тя,/ страстоте́рпче святы́й Евпси́хие,/ и чтим честна́я страда́ния твоя́,/ я́же за Христа́/ претерпе́л еси́.

Тропарь блаженной Матроне Анемнясевской, Касимовской, глас 8

Я́ко зарни́ца небе́снаго огня́/ возсия́ в ряза́нстей стране́ блаже́нная ста́рица Матро́на,/ ея́же па́мять днесь творя́ще,/ воспои́м Христа́ Бо́га,/ моля́ще Его́ дарова́ти нам то́я предста́тельством/ в боле́знех, бе́дах и ско́рбех терпе́ние,/ и душа́м на́шим ве́лию ми́лость.

Кондак, глас 8

В не́мощех си́лу, в слепоте́ о́чи нетле́нныя обрела́ еси́,/ пребыва́ющи на о́дре боле́зни,/ всю́ду я́ко пти́ца ду́хом носи́лася еси́,/ младе́нствующи те́лом, была́ еси́ ма́ти скорбя́щим и обурева́емым./ Те́мже чту́щих твою́ па́мять не оста́ви в моли́твах,/ и помози́ нам изба́витися от грехо́в покая́нием,/ и улучи́ти с тобо́ю Ца́рство Небе́сное.

Величание

Ублажа́ем тя,/ свята́я пра́ведная ста́рице Матро́но,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь мученикам, глас 4

Му́ченицы Твои́, Го́споди... (общий мученикам).

Кондак, глас 2

Му́ченическая честна́я па́мять прии́де днесь,/ веселя́щи вся́ческая,/ Тере́нтия прему́драго и дружи́ны его́./ Те́пле у́бо стеце́мся, да прии́мем исцеле́ния,/ сии́ бо благода́ть от Бо́га прия́ша Ду́ха Свята́го/ исцеля́ти неду́ги душ на́ших.

Величание

Велича́ем вас,/ страстоте́рпцы святи́и Тере́нтие, Помпи́е, Африка́не, Макси́ме, Зино́не, Алекса́ндре и Фео́доре со ины́ми мно́гими,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь священномученику Григорию V, патриарху Константинопольскому, глас 8

Благослове́н еси́, Христе́ Бо́же наш,/укрепи́вый Боже́ственнаго патриа́рха,/ низпосла́вый тому́ свы́ше Свою́ благода́ть,/ и́мже и нас свободи́л еси́ от рабо́ты вра́жия,/ Человеколю́бче, сла́ва Тебе́.

Ин тропарь, глас 7

Святи́телю и му́чениче Григо́рие,/ за лю́ди твоя́ ду́шу положи́вый/ и в светоно́сный день Христо́ва Воскресе́ния пострада́вый,/ моли́ся Страда́вшему за ны и Воскре́сшему/ Це́рковь Правосла́вную незы́блему всегда́ храни́ти,/ па́стве же твое́й и Ру́сстей земле́, святы́я мо́щи твоя́ с любо́вию ле́та мно́га храни́вшей,/ дарова́ти мир и ве́лию ми́лость.

Кондак, глас 4

Во святи́телех благоче́стно пожи́в/ и муче́ния путь проше́д... (общий священномученику).

Величание

Велича́ем тя,/ священному́чениче Григо́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь священномученику Мисаилу, архиепископу Рязанскому и Муромскому, глас 5

Богому́дре святи́телю,/ архиере́ев сла́ва и си́рых защи́тниче,/ ре́вностный пропове́дниче Христо́ва Ева́нгелия,/ утверди́л еси́ ве́рою сердца́ неутвержде́нная,/ свяще́нную оде́жду омочи́в в крови́,/ я́ко му́ченик и па́стырь просла́вился еси́./ Священному́чениче Мисаи́ле,/ моли́ся приле́жно Влады́це Христу́/ о всех нас, почита́ющих святу́ю па́мять твою́,/ да вы́шняго Прича́стия сподо́бимся/ и Све́та невече́рняго.

Кондак, глас тойже

Бог просла́ви ны́не уго́дника Своего́,/ обре́тением честны́х моще́й,/ и́бо неистощи́ма есть си́ла Бо́жия чудоде́йствующая./ Священному́чениче Мисаи́ле,/ уго́ден был еси́ Бо́гови,/ получи́в посвяще́ние во избра́нных Его́,/ простри́ нам ру́ку по́мощи хода́тайством твои́м/ и испра́ви путь наш ко спасе́нию.

Величание

Велича́ем тя,/ священному́чениче Мисаи́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь священномученику Антипе, епископу Пергама Асийского, глас 4

И́дольския ле́сти упраздни́л еси́, Анти́по,/ и диа́вольскую попра́в си́лу,/ пред богобо́рцы дерзнове́нно Христа́ испове́дал еси́./ Те́мже со а́нгельскими чи́ны в вы́шних водворя́лся,/ Влады́це всех славосло́вие принося́,/ и о нас моле́бное благодаре́ние предлага́вши,/ благода́ть цельбы́ да́руя./ Сего́ ра́ди тя чтим,/ священному́чениче Анти́по,/ моли́ Христа́ Бо́га,/ да спасе́т ду́ши на́ша.

Или сей, глас тойже

И нра́вом Прича́стник... (общий священномученику).

Кондак, глас тойже

Апо́столов сопресто́льник и святи́телей украше́ние/ был еси́, блаже́нне,/ му́ченически просла́вився,/ возсия́л еси́ я́коже со́лнце, всех просвеща́я,/ Анти́по свяще́нне,/ разруши́л еси́ безбо́жия нощь глубо́кую./ Сего́ ра́ди тя почита́ем,/ я́ко Боже́ственнаго су́ща священному́ченика/ и целе́б пода́теля.

Величание

Велича́ем тя,/ священному́чениче Анти́по,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Иоанну, ученику Григория Декаполита, глас 8

В тебе́, о́тче, изве́стно спасе́ся... (общий преподобному).

Кондак, глас 4

Воздержа́нием, о́тче, житие́ украси́в, и плоть умертви́л еси́./ Те́мже и победи́л еси́ вра́жия прило́ги, преблаже́нне,/ и преше́л еси́ к Бо́гу в безско́рбный и ве́чный живо́т,/ я́ко досто́ин насле́дник, Иоа́нне./ Ему́же моли́ся спасти́ся нам.

Величание

Ублажа́ем тя,/ преподо́бне о́тче Иоа́нне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Иакову Железноборовскому, глас 4

Небе́снаго жела́я,/ земна́я возненави́дел еси́/ и, взем крест свой, после́довал еси́ Христу́/ и от Него́ прие́м дарова́ния чуде́с,/ исцеля́ти неду́жныя; но, я́ко име́я дерзнове́ние ко Святе́й Тро́ице,/ испроси́ правосла́вным Христиа́ном здра́вие и спасе́ние,/ на враги́ же побе́ду/ и не забу́ди, посеща́я чад свои́х,/ припа́дающих к цельбоно́сному гро́бу твоему́,/ Иа́кове, преподо́бне о́тче наш.

Кондак, глас 8

Серде́чная о́чи, досточу́дне, ко Го́споду впери́в/ и теле́сныя стра́сти из ко́рене исторга́я,/ неболе́зненную жизнь в боле́знех восприя́л еси́, преподо́бне,/ боле́знем же лю́тым дае́ши исцеле́ние, прося́щим с ве́рою у тебе./ Те́мже молим тя, досточу́дне,/ исцели́ на́ша боле́зни душе́вныя и теле́сныя, да зове́м ти:/ ра́дуйся, Иа́кове Богому́дре, о́тче наш.

Величание

Ублажа́ем тя,/ преподо́бне о́тче Иа́кове,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Варсонофию, епископу Тверскому, глас 3

Возвести́телю пути́ спаси́тельнаго,/ и́стинный храни́телю апо́стольских преда́ний,/ сто́лпе непоколеби́мый, благоче́стия учи́телю/ и Правосла́вия наста́вниче, святи́телю Варсоно́фие,/ Влады́ку всех моли́/ мир вселе́нней дарова́ти/ и душа́м на́шим ве́лию ми́лость.

Ин тропарь, глас 4

Ти́хостию нра́ва направля́емый,/ святи́телю Варсоно́фие,/ в ти́хое приста́нище дости́гл еси́,/ смиренному́дрия ра́ди удо́бно избежа́в сопроти́вных сете́й,/ свято́ю душе́ю твое́ю на Небеса́ возлете́л еси́,/ иде́же Христу́ предстоя́,/ моли́ спасти́ся нам, почита́ющим па́мять твою́.

Ин тропарь, глас 8

По Бо́жием зако́не ревни́телю,/ лю́тый разруши́телю неприя́зненныя ле́сти,/ я́ко ми́ром, по́том свои́м во труде́х и бде́ниих подвиза́ся/ посреде́ Каза́нскаго ца́рствия,/ оби́тель стро́я боголе́пнаго Преображе́ния/ и вели́кому своему́ учи́телю Гу́рию после́дуя,/ с ни́мже вели́кий сою́з име́я духо́вный,/ я́коже в животе́, та́коже и по преставле́нии,/ обре́тением честны́х моще́й ва́ших во еди́но вре́мя/ и мно́гими чудесы́ вас Бог просла́ви;/ и, ра́достию восходя́ в Небе́сныя оби́тели,/ тве́рдый ка́мене ве́ры,/ от иноплеме́нник мно́ги ско́рби претерпе́л еси́,/ до́брый вво́дниче в ве́чную жизнь,/ в нюже, мо́лим тя, введи́ ны,/ преподо́бне о́тче наш Варсоно́фие/ и моли́ Христа́ Бо́га спасти́ся душа́м на́шим.

Кондак, глас 6

Воздержа́нием те́ло ду́ху порабо́тив,/ ду́шу же равноа́нгельну сотвори́л еси́,/ сего́ ра́ди святи́тельства са́ном почте́ся,/ чи́сте Чисте́йшему предстои́ши./ Моли́ Христа́ Бо́га, святи́телю,/ спасти́ лю́ди твоя́, свя́те,/ да вси вопие́м ти:/ ра́дуйся, о́тче преподо́бне Варсоно́фие,/ гра́ду на́шему Каза́ни похвало́ и утвержде́ние.

Ин кондак, глас 5

Я́коже звезда́ всесве́тлая, доброде́тельми сия́ющи, был еси́,/ обогати́в себе́ моли́твою и посто́м,/ и те́ло свое́ вери́гами удруча́я,/ в поло́не* же от иноплеме́нник мно́го пострада́л еси́./ Непоколеби́м ве́рою мно́гая ле́та,/ а́нгелом ку́пно соедини́м,/ бесо́вская ополче́ния огорчава́ше./ После́дуя безме́здником Косме́ и Дамиа́ну,/ враче́бною хи́тростию мно́гия исцели́л еси́./ Темже ны́не честно́е и боготру́дное те́ло твое́,/ от земны́х недр обрете́нное,/ чудесы́ Госпо́дь просла́ви,/ исцеля́вши бо многонеду́жныя не то́кмо у гро́ба,/ но и от честны́х вери́г/ подае́ши неоску́дно целе́бныя да́ры приходя́щим с ве́рою.

Величание

Велича́ем тя,/ святи́телю о́тче Варсоно́фие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобным Евфимию и Харитону Сянжемским, глас 1

Пусты́нное и безмо́лвное житие́ ва́ше по́стнически препроводи́вше,/ Христо́в бо крест на ра́мо взе́мше/ и Того́ стопа́м усе́рдно после́довавше,/ на неви́димаго врага́ му́жески ополчи́стеся/ и того́ ко́зни сокруши́сте,/ моли́твами и слеза́ми, чистото́ю Бо́гови прибли́жившеся,/ преподо́бнии отцы́ на́ши Евфи́мие и Харито́не./ Яко со́лнце, осиява́ете светоза́рными луча́ми чуде́с ва́ших,/ всех нас спаси́те, с ве́рою призыва́ющих вас/ и творя́щих честну́ю ва́шу па́мять,/ и, я́ко иму́щии дерзнове́ние ко Спа́су,/ мир ми́рови испроси́те и спасти́ся душа́м на́шим.

Кондак, глас 2

Волне́ний мно́жество невла́жно проходя́ще... (общий преподобным).

Величание

Ублажа́ем вас,/ преподо́бнии отцы́ Евфи́мие и Харито́не,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь преподобному Василию исповеднику, епископу Парийскому, глас 4

Пра́вило ве́ры, и о́браз кро́тости... (общий святителю).

Кондак, глас 2

Вы́шняго све́том озари́вся, блаже́нне,/ просвеща́вши вся,/ и́же любо́вию че́ствующия твое́, о́тче, честно́е страда́ние,/ Васи́лие священнострада́льне,/ моли́ Христа́ Бо́га/ непреста́нно о всех нас.

Величание

Велича́ем тя,/ святи́телю о́тче Васи́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Божией Матери ради иконы Ее, именуемой Муромская, глас 4

Днесь све́тло красу́ется град Му́ром,/ я́ко зарю́ со́лнечную, восприе́мши, Влады́чице,/ чудотво́рную Твою́ ико́ну,/ к не́йже ны́не мы притека́юще и моля́щеся, Тебе́ взыва́ем си́це:/ о Пречу́дная Влады́чице Богоро́дице,/ моли́ся из Тебе́ воплоще́нному Христу́ Бо́гу на́шему,/ да изба́вит град сей и вся гра́ды и страны́ христиа́нския/ невреди́мы от всех наве́т вра́жиих/ и спасе́т ду́ши на́ша, я́ко Милосе́рд.

Кондак, глас 6

Не и́мамы ины́я по́мощи... (общий Божией Матери).

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь священномученику Артемону, пресвитеру Лаодикийскому, глас 4

И нра́вом прича́стник,/ и престо́лом наме́стник... (общий священномученику).

Кондак, глас 4

Во святи́телех благоче́стно пожи́в,/ и муче́ния путь проше́д... (общий священномученику).

Величание

Велича́ем тя,/ священному́чениче Арте́моне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Мартину, папе Римскому, глас 4

И́стинных повеле́ний устне́ распространи́л еси́,/ уче́нии Боже́ственными вся просвети́л еси́,/ злове́рие низложи́л еси́,/ Богому́дре Марти́не,/ святи́телю всече́стне,/ помина́й нас, уго́дниче Христо́в,/ е́же к Нему́ хода́тайствы твои́ми,/ да в ми́ре устро́иши живо́т наш.

Кондак, глас 2

Боже́ственный гром, труба́ духо́вная,/ ве́ры насади́телю и отсека́телю ересе́й,/ Тро́ицы уго́дниче, вели́кий святи́телю Марти́не,/ со а́нгелы предстоя́ при́сно,/ моли́ непреста́нно о всех нас.

Величание

Велича́ем тя,/ святи́телю о́тче Марти́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь мученикам Антонию, Иоанну и Евстафию Литовским, глас 4

И́же земны́х че́сти и сла́вы отве́ргшеся,/ до́блии и честни́и страда́льцы,/ ве́ры ра́ди кре́пко и му́жественно му́ки претерпе́сте,/ на сме́рть себе́ вда́ше за Живо́т всех Влады́ку./ Те́мже и Христо́с пресла́вно столпо́м о́блачным/ с Небесе́ вас озари́,/ и по́честьми и венцы́ от Престо́ла Сла́вы венча́./ Со а́нгелы Тому́ предстоя́ще,/ моли́те спасти́ся душа́м на́шим.

Ин тропарь, глас тойже

От ко́рене непло́дна, преблаже́ннии,/ возрасти́вше Правосла́вныя ве́ры ве́тви,/ первому́чеником тезоимени́тии яви́стеся,/ зла́го бо и нечести́ваго кня́зя я́рости не убоя́стеся,/ повелева́юща Христа́ отрещи́ся./ Сего́ ра́ди му́ченическия венцы́ прие́мше,/ и со а́нгелы престо́лу Влады́чню предстоя́ще,/ о нас моли́теся, преблаже́ннии,/ правосла́вно чту́щих святу́ю па́мять ва́шу.

Кондак, глас 3

Оте́ческую пре́лесть оста́вльше, святи́и,/ приведо́стеся Христо́ви,/ всем души́ усе́рдием ста́ете мужему́дренно до сме́рти./ Те́мже и взя́сте побе́ды по́честь вои́стину,/ о всех Влады́ку на́шего непреста́нно моля́ще.

Величание

Велича́ем вас,/ страстоте́рпцы святи́и Анто́ние, Иоа́нне и Евста́фие,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь апостолам, глас 3

Апо́столи святи́и,/ моли́те Ми́лостиваго Бо́га,/да прегреше́ний оставле́ние/ пода́ст душа́м на́шим.

Кондак, глас 4

Яви́ся апо́стольский честны́й сей пра́здник,/ просвеща́я нас и грехо́вную мглу прогоня́я, зову́щим:/ яви́ся Свет и прии́де избавле́ние.

Величание

Велича́ем вас,/ святи́и апо́столи Ариста́рше, Пу́де и Трофи́ме,/ весь мир уче́ньми свои́ми просвети́вшия/ и вся концы́/ ко Христу́ приве́дшия.

Тропарь мученицам Агапии, Ирине и Хионии, глас 1

Агницы слове́сныя,/ Агнцу и Па́стырю приведо́стеся муче́нием ко Христу́,/ тече́ние сконча́вше, и ве́ру соблю́дше./ Те́мже днесь ра́достною душе́ю соверша́ем, досточу́днии,/ святу́ю ва́шу па́мять, Христа́ велича́юще.

Кондак, глас 4

Кре́пко ду́шу, Ири́но, ополчи́ла еси́ ве́рою,/ я́ве лука́ваго посрами́вши,/ и ко Христу́ привела́ еси́ тмы* люде́й мно́жества, блаже́нная,/ и порфи́ру от крове́й нося́щи,/ со а́нгелы ны́не весели́шися.

Величание

Велича́ем вас,/ страстоте́рпицы святы́я Ага́пие, Ири́но и Хиони́е,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Зосиме, игумену Соловецкому, глас 4

Изволе́нием Боже́ственнаго Ра́зума/ всели́лся еси́ в пусты́ню,/ и та́мо, впери́в ум твой в Небе́сныя оби́тели,/ ра́вно а́нгелом житие́ на земли́ пожи́в,/ в моли́твах, и труде́х, и поще́ниих/ о́браз был еси́ твои́м ученико́м./ Отону́дуже Бог, ви́дя твое́ благо́е изволе́ние,/ умно́жи тебе́ ча́да в пусты́ни, слез твои́х тече́ньми напая́емей;/ но, я́ко име́я дерзнове́ние к Бо́гу,/ помина́й ста́до, е́же собра́л еси́, му́дре,/ и не забу́ди, я́коже обеща́лся еси́,/ посеща́я чад твои́х,/ Зоси́мо, преподо́бне о́тче наш.

Кондак, глас 8

Христо́вою любо́вию уязви́вся, преподо́бне,/ и Того́ Крест сла́вный на ра́мо взем/ поне́сл еси́, боже́ственне вооружи́вся,/ и непреста́нныя моли́твы, я́ко копие́ в руце́, имы́й,/ кре́пко ссекл еси́ бесо́вская ополче́ния./ Тем зове́м ти:/ ра́дуйся, преподо́бне о́тче Зоси́мо, мона́хов удобре́ние.

Величание

Ублажа́ем тя,/ преподо́бне о́тче Зоси́мо,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Александру Свирскому, глас 4

От ю́ности, Богому́дре, жела́нием духо́вным в пусты́ню всели́вся,/ еди́наго Христа́ возжела́л еси́ усе́рдно стопа́м в след ходи́ти./ Те́мже и а́нгельстии чи́ни, зря́ще тя, удиви́шася,/ ка́ко с пло́тию к неви́димым ко́знем подвиза́вся, прему́дре,/ победи́л еси́ полки́ страсте́й воздержа́нием/ и яви́лся еси́ равноа́нгелен на земли́,/ Алекса́ндре преподо́бне,/ моли́ Христа́ Бо́га, да спасе́т ду́ши на́ша.

Кондак, глас 8

Я́ко многосве́тлая звезда́/ днесь в страна́х росси́йских возсия́л еси́, о́тче,/ всели́вся в пусты́ню,/ Христо́вым стопа́м после́довати усе́рдно возжеле́л еси́/ и, Того́ свято́е и́го на ра́мо твое́ взем честны́й крест,/ умертви́л еси́ труды́ по́двиг твои́х теле́сныя взыгра́ния./ Те́мже вопие́м ти:/ спаси́ ста́до твое́, е́же собра́л еси́, му́дре, да зове́м ти:/ ра́дуйся, преподо́бне Алекса́ндре о́тче наш.

Величание

Ублажа́ем тя,/ преподо́бне о́тче Алекса́ндре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Иоанну, ученику преподобного Григория Декаполита, глас 8

В тебе́, о́тче, изве́стно спасе́ся... (общий преподобному).

Кондак, глас 4

Воздержа́нием, о́тче, житие́ украси́в и плоть умертви́л еси́,/ те́мже и победи́л еси́ вра́жия прило́ги, преблаже́нне,/ и преше́л еси́ к Бо́гу в безско́рбный и ве́чный живо́т,/ я́ко досто́ин насле́дник, Иоа́нне,/ Ему́же моли́ся спасти́ся нам.

Величание

Ублажа́ем тя,/ преподо́бне о́тче Иоа́нне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее, именуемой Максимовская, глас 4

Днесь све́тло красу́ется сла́внейший град Влади́мир,/ ра́достно соверша́я, Влады́чице,/ пра́здник явле́ния Твоего́ святи́телю Макси́му,/ в нем бы́вшаго,/ о не́мже ны́не воспомина́юще/ и моля́щеся Тебе́, взыва́ем си́це:/ о Пречу́дная Влады́чице Богоро́дице,/ моли́ся Преве́чному Архиере́ю – Сы́ну Твоему́,/ да непоколеби́му утверди́т Це́рковь Правосла́вную,/ град наш Влади́мир и всю Ру́сскую зе́млю/ в ми́ре сохрани́т/ и спасе́т в правове́рии ду́ши на́ша.

Кондак, глас 6

При́зри на нас, Всепе́тая Богоро́дице,/ возсия́й просвеще́ние сердце́м помраче́нным/ и озари́ ста́до Твое́, Пречи́стая,/ ели́ка бо хо́щеши и мо́жеши,/ я́ко Ма́ти су́щи Зижди́теля,/ и возопи́й моля́щим Тя:/ Аз есмь с ва́ми,/ и никто́же возмо́жет на вы.

Величание

Велича́ем Тя,/ Пресвята́я Де́во,/ и чтим о́браз Твой святы́й,/ его́же святи́тель Макси́м даде́ гра́ду Влади́миру в покро́в/ и всем ве́рным во спасе́ние.

Тропарь преподобному Иоанну Ветхопещернику, глас 8

В Тебе́, о́тче, изве́стно спасе́ся... (общий преподобному).

Кондак, глас 2

Чистото́ю душе́вною боже́ственно вооружи́вся,/ и непреста́нныя моли́твы,/ я́ко копие́ вручи́в кре́пко,/ пробо́л еси́ бесо́вская ополче́ния,/ Иоа́нне о́тче наш,/ моли́ непреста́нно о всех нас.

Величание

Ублажа́ем тя,/ преподо́бне о́тче Иоа́нне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь праведной Матроне Московской, глас 2

Бо́гом умудре́нную блаже́нную ста́рицу Матро́ну,/ земли́ Ту́льския процвете́ние и гра́да Москвы́ пресла́вное украше́ние,/ восхва́лим днесь, ве́рнии./ Сия́ бо, све́та дневна́го не позна́вши,/ све́том Христо́вым просвети́ся/ и да́ром прозре́ния и исцеле́ния обогати́ся./ Пресе́льница же и стра́нница на земли́ бы́вши,/ ны́не в черто́зех Небе́сных престо́лу Бо́жию предстои́т/ и мо́лится о душа́х на́ших.

Ин тропарь, глас 4

Земли́ Ту́льския прозябе́ние,/ гра́да Москвы́ ангелоподо́бная вои́тельнице,/ блаже́нная ста́рице Матро́но,/ от рожде́ния в слепоте́ теле́сней до конца́ свои́х дней пребы́вшая,/ но от Бо́га ще́дро духо́вное зре́ние прия́вшая,/ прозорли́вице и моли́твеннице,/ наипа́че дар исцеле́ния боле́зней стяжа́вшая,/ помога́й всем с ве́рою к тебе́ притека́ющим/ и прося́щим в боле́знех душе́вных и теле́сных, ра́досте на́ша.

Кондак, глас 7

К служе́нию Христо́ву от чре́ва ма́терия предизбра́нная,/ пра́ведная Матро́но,/ стезе́ю скорбе́й и печа́лей ше́ствующи,/ тве́рдую ве́ру и благоче́стие яви́вши,/ Бо́гу угоди́ла еси́./ Те́мже, почита́юще па́мять твою́, мо́лим тя:/ помози́ и нам в любви́ Бо́жии пребыва́ти,/ ста́рице блаже́нная.

Ин кондак, глас 3

Еще ды́шит свя́тостью многострада́льная Росси́я,/ земля́ Ру́сская, я́ко осьмы́й столп плодоно́сит,/ та́ко тебе́, блаже́нная ма́ти Матро́но,/ пра́ведный па́стырь Иоа́нн Кроншта́дтский возно́сит,/ ты яви́лася еси́ ди́вное излия́ние Свята́го Ду́ха,/ и боря́сь за ка́ждую приходя́щую к тебе́ ду́шу,/ претерпе́ла еси́ мно́жество гоне́ний и страда́ний,/ и по преставле́нии не оставля́вши в боле́знех и ско́рбех су́щих.

Величание

Велича́ем тя,/ свята́я пра́ведная ста́рице Матро́но,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Феодору Трихине⁹, глас 8

В тебе́, о́тче, изве́стно спасе́ся... (общий преподобному).

Кондак, глас 4

Яви́лся еси́ преди́вен житие́м,/ Фео́доре, му́дре о́тче,/ власяны́ми ру́бы* измени́в,/ па́че ца́рских сокро́вищ,/ я́же на земли́./ Сего́ ра́ди небе́сную оде́жду восприя́л еси́,/ при́сно моли́ о нас, преподо́бне.

Величание

Ублажа́ем тя,/ преподо́бне о́тче Фео́доре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь мученику младенцу Гавриилу Белостокскому, глас 5

Святы́й младе́нче Гаврии́ле,/ ты за Прободе́ннаго нас ра́ди от иуде́й,/ лю́те от о́нехже в ре́бра прободе́н был еси́,/ и, за Источи́вшаго кровь Свою́ за нас,/ все те́ло твое́ на источе́ние кро́ве/ в лю́тыя я́звы преда́л еси́:/ ны́не же во сла́ве ве́чней с Ним всели́лся еси́./ Тем помяни́ и нас, мо́лим, зде чту́щих па́мять твою́,/ прося́ нам здра́вие тел еси́/ и спасе́ние душа́м на́шим.

Кондак, глас 6

Оте́чество твое́ Зверки́ бысть,/ му́чениче Христо́в Гаврии́ле,/ иде́же от и́стых звере́й-иуде́ев восхище́н*:/ а́бие роди́телей лише́н еси́,/ та́же вся поря́ду лю́те претерпе́в,/ в оте́чество Небе́сное пресели́лся еси́./ Восхища́й и нас зде от всяких напа́стей и скорбе́й/ и умоли́, мо́лим тя,/ улучи́ти ве́чное насле́дие твое́.

Величание

Велича́ем тя,/ страстоте́рпче святы́й младе́нче Гаврии́ле,/ и чтим честна́я страда́ния твоя́,/ я́же за Христа́/ претерпе́л еси́.

Тропарь преподобному Александру Ошевенскому, глас 4

Христа́, и́стиннаго Бо́га, все́ю душе́ю возлюби́л еси́,/ и Тому́ невозвра́тным жела́нием после́довал еси́,/ вся, я́же кра́сная и сла́дкая, возненави́дев,/ я́ко небопа́рный оре́л на Небеса́ возлете́в,/ и та́мо со а́нгелы лику́еши, и со все́ми святы́ми Святе́й Тро́ице предстои́ши,/ моли́ и нам спасти́ся ча́дом твои́м,/ я́коже обеща́лся еси́, Алекса́ндре о́тче наш.

Кондак, глас 8

Роди́телей свои́х любо́вь отри́нул еси́,/ и дом свой, я́ко чужд, оста́вил еси́,/ водвори́ бо ся в пусты́ню,/ и та́мо ви́де Бог труды́ твоя́ и по́двиги,/ па́стыря и наста́вника Богоизбра́нному ста́ду бы́ти сподобля́ет тя,/ и по преставле́нии вели́кими чудесы́ прославля́ет тя,/ исцели́ти разли́чныя неду́ги:/ моли о нас Христа́ Бо́га,/ пра́зднующих любо́вию па́мять твою́,/ да вси единогла́сно вопие́м ти:/ ра́дуйся, преподо́бне Алекса́ндре о́тче наш.

Величание

Ублажа́ем тя,/ преподо́бне о́тче Алекса́ндре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Иоасафу Сербскому, Метеорскому, глас 3

Се́рдцем и душе́ю возлюби́в Христа́ Го́спода,/ вся кра́сная ми́ра сего́ оста́вил еси́,/ изво́лил же еси́ па́че в смире́нии и послуша́нии Бо́гу служи́ти,/ не́жели на престо́ле ца́рстем владе́ти./ Сего́ ра́ди благоче́стно восхваля́ем тя/ и, святу́ю па́мять твою́ соверша́юще, вопие́м ти:/ о́тче Иоаса́фе Богоблаже́нне, моли́ Христа́ Бо́га о спасе́нии ро́да на́шего христиа́нскаго.

Кондак, глас 4

Ве́дый прехва́льное житие́ твое́ и чистоту́/ и безме́рное смиренному́дрие,/ преподо́бный Афана́сий наименова́тя прее́мника своего́,/ ты же показа́лся еси́ досто́ин сего́ нарече́ния/ и, служа́ Триипоста́сному Бо́гу,/ соблю́л еси́ вве́ренную ти оби́тель Метео́рскую./ Те́мже мо́лим тя, о́тче Иоаса́фе,/ не забу́ди оте́чество твое́ и весь се́рбский род,/ но моли́ся всегда́ о всех нас.

Величание

Ублажа́ем тя,/ преподо́бне о́тче Иоаса́фе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь священномученику Ианнуарию епископу, глас 4

И нра́вом прича́стник,/ и престо́лом наме́стник... (общий священномученику).

Кондак Ианнуарию и Феодору, глас 3

Свяще́ния пома́занием и муче́ния кро́вию украси́стеся,/ сла́внии Ианнуа́рие и Фео́доре,/ и сия́ете всю́ду, в вы́шних лику́юще,/ и нас назира́йте, во храм ваш прише́дшия/ и в нем непреста́нно зову́щия:/ всех нас соблюди́те, моля́ще Человеколю́бца Бо́га.

Величание Ианнуарию и Феодору

Велича́ем вас,/ страстоте́рпцы святи́и Ианнуа́рие и Фео́доре,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Феодору Сикеоту, епископу Анастасиупольскому, глас 2

Позна́н быв, от пеле́н освяще́н,/ и я́влься благода́тей испо́лнен,/ чудесы́ мир озари́л еси́,/ и де́монов мно́жество отгна́л еси́,/ священноде́телю Фео́доре;/ те́мже о нас моли́ся Го́сподеви.

Кондак, глас 3

Я́ко на о́гненную колесни́цу доброде́тельми, Богоно́се, возше́д,/ восте́кл еси́ на небе́сная жили́ща,/ я́ко а́нгел с челове́ки пожи́л еси́,/ и я́ко челове́к со а́нгелы о́крест ликовству́еши./ Сего́ ра́ди показа́лся еси́/ чуде́с Боже́ственное прия́телище, Фео́доре преподо́бне.

Величание

Ублажа́ем тя,/ преподо́бне о́тче Фео́доре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь апостолам Нафанаилу (Варфоломею), Луке и Клименту, глас 3

Апо́столи святи́и,/ моли́те Ми́лостиваго Бо́га,/да прегреше́ний оставле́ние/ пода́ст душа́м на́шим.

Тропарь апостолу и евангелисту Луке, глас 5

Апо́стольских дея́ний сказа́теля/ и Ева́нгелия Христо́ва све́тла списа́теля,/ Луку́ препе́таго, сла́вна су́ща Христо́ве Це́ркви,/ пе́сньми свяще́нными свята́го апо́стола похва́лим,/ я́ко вра́ча су́ща, челове́ческие не́мощи,/ естества́ неду́ги и я́зи* душ исцеля́юща/ и моля́щася непреста́нно за ду́ши на́ша.

Кондак апостолу и евангелисту Луке, глас 2

И́стиннаго благоче́стия пропове́дника/ и та́йн неизрече́нных ри́тора,/ звезду́ церко́вную, Луку́ Боже́ственнаго восхва́лим:/ Сло́во¹⁰ бо его́ избра́, с Па́влом му́дрым язы́ков учи́теля,/ Еди́н ве́дый серде́чная.

Кондак апостолу Нафанаилу (Варфоломею), глас 4

Яви́лся еси́ вели́кое со́лнце вселе́нней,/ уче́ний сия́ньми и чуде́с стра́шных световодя́ почита́ющия тя,/ Варфоломе́е, Госпо́день апо́столе.

Величание

Велича́ем вас,/ святи́и апо́столи Нафана́иле, Луко́ и Кли́менте,/ весь мир уче́ньми свои́ми просвети́вшия/ и вся концы́ ко Христу́ приве́дшия.

Тропарь благоверному князю Всеволоду, во Святом Крещении Гавриилу, Псковскому, Новгородскому, глас 4

Наста́ день всечестны́й но́вый пра́здник,/ перенесе́ние честны́х моще́й/ блаже́ннаго кня́зя Гаврии́ла,/ веселя́щи изря́дно всех благочести́вых мно́жества,/ те́мже, вси ве́рнии,/ соше́дшеся во святы́й храм Живонача́льныя Тро́ицы, возопие́м:/ блаже́нне кня́же Гаврии́ле,/ име́я дерзнове́ние ко Христу́ Бо́гу,/ моли́ спасти́ся пра́зднующим любо́вию па́мять твою́.

Кондак, глас 8

Возвесели́ся, Христова́ Це́рковь,/ иму́щи в себе́ исто́чника чудесе́м оби́льна./ Днесь, любо́вию соше́дшеся в тя, лю́дие твои́,/ в пренесе́ние честны́х моще́й блаже́ннаго кня́зя Гаврии́ла,/ воспое́м песнь еди́ному Бо́гу в Тро́ице, ра́дующеся,/ сподо́бльшаго нас ви́дети пречестно́е сокро́вище, мо́щи его́,/ от мног лет сокрове́нны, напосле́док же нам явле́ны./ Яко да моли́твами его́ к Бо́гу от всех находя́щих зол изба́вимся/ и ра́достною душе́ю и весе́лием се́рдца/ благода́рная воспое́м, глаго́люще:/ ра́дуйся, утвержде́ние гра́ду на́шему.

Величание

Велича́ем тя,/ святы́й благове́рный кня́же Гаврии́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь великомученику Георгию Победоносцу, глас 4

Я́ко пле́нных свободи́тель/ и ни́щих защи́титель,/ немощству́ющих врач,/ правосла́вных побо́рниче,/ Победоно́сче великому́чениче Гео́ргие,/ моли́ Христа́ Бо́га/ спасти́ся душа́м на́шим.

Ин тропарь, глас тойже

По́двигом до́брым подвиза́лся еси́,/ страстоте́рпче Христо́в,/ ве́рою и мучи́телей обличи́л еси́ нече́стие,/ же́ртва же благоприя́тна Бо́гу прине́слся еси́;/ те́мже и вене́ц прия́л еси́ побе́ды,/ и моли́твами, свя́те, твои́ми всем подае́ши/ прегреше́ний проще́ние.

Кондак, глас тойже

Возде́лан от Бо́га, показа́лся еси́ благоче́стия де́латель честне́йший,/ доброде́телей рукоя́ти собра́в себе́;/ се́яв бо в слеза́х, весе́лием жне́ши,/ страда́льчествовав же кро́вию, Христа́ прия́л еси́/ и моли́твами, свя́те, твои́ми всем подае́ши прегреше́ний проще́ние.

Ин кондак, глас 8

К возбра́нному и ско́рому заступле́нию твоему́ прибе́гше ве́рнии,/ мо́лим изба́витися, страстоте́рпче Христо́в,/ от собла́зн вра́жиих, воспева́ющим тя,/ и вся́ких бед и озлобле́ний, да зове́м:/ ра́дуйся, му́чениче Гео́ргие.

Величание

Велича́ем тя,/ страстоте́рпче святы́й великому́чениче и победоно́сче Гео́ргие,/ и чтим честна́я страда́ния твоя́,/ я́же за Христа́/ претерпе́л еси́.

На молебне припев:

Спаси́ от бед рабы́ твоя́, страстоте́рпче Гео́ргие,/ я́ко вси тя к Бо́гу предста́теля и́мамы,/ я́ко непобеди́маго Христо́ва во́ина и те́пла к Не́му моли́твенника.

Тропарь мученице царице Александре, глас 4

Ца́рства земна́го сла́ву презре́вши,/ еди́наго Христа́, нас ра́ди распя́таго, возлюби́ла еси́,/ и Того́ му́жественне испове́дующи,/ венце́м му́ченическим увенча́лася еси́,/ всеблаже́нная цари́це Алекса́ндро;/ те́мже и ны́не престо́лу Царя́ сла́вы на Небесе́х предстоя́щи,/ моли́ся о спасе́нии душ на́ших.

Кондак, глас 2

Храм твой всечестны́й,/ яко́ цельбу́ душе́вную... (общий мученице).

Величание

Велича́ем тя,/ страстоте́рпице Христо́ва цари́це Алекса́ндро,/ и чтим честно́е страда́ние твое́,/ е́же за Христа́/ претерпе́ла еси́.

Тропарь мученику Савве Стратилату, глас 4

Му́ченик Твой, Го́споди... (общий мученику).

Или сей, глас 5

Земна́го са́на по́яс оста́вив и по́чести, страда́льче,/ пред мучи́телем, льсти́вым царе́м,/ Христа́ Бо́га су́ща испове́дал еси́,/ и Того́ ра́ди мно́га страда́ния подъя́л еси́, сла́вне;/ тем прекра́сным побе́ды венце́м увяза́лся еси́/ от Царя́ всех ца́рствующаго,/ с Небе́сными во́и све́тло преукра́шен./ Предстоя́ Тому́, Са́вво,/ моли́, да спасе́т ду́ши на́ша.

Кондак, глас 4

Непобеди́мый я́влься стратила́т*,/ ва́рварския ко́зни победи́л еси́/ и, страда́льчествовав, сла́вне, тверде́йши,/ мно́жество враго́в неви́димых побори́л еси́./ Те́мже вене́ц испле́л еси́ побе́ды,/ о нас моли́ Христа́, Са́вво всеблаже́нне,/ ве́рою почита́ющих тя.

Величание

Велича́ем тя,/ страстоте́рпче святы́й Са́вво,/ и чтим честна́я страда́ния твоя́,/ я́же за Христа́/ претерпе́л еси́.

Тропарь преподобным Савве и Алексию затворнику, Печерским, в Ближних пещерах почивающим, глас 3

Преблаже́ннии и Богоно́снии отцы́ на́ши Са́вво и Алекси́е,/ я́ко стяжа́вшии дерзнове́ние ко Го́споду/ равноа́нгельным свои́м житие́м,/ его́же ра́ди обога́ти Христо́с/ нетле́нием и чудесы́ мо́щи ва́ша,/ мо́лим вас приле́жно:/ испроси́те душа́м на́шим очище́ние/ и ве́лию и бога́тую ми́лость.

Кондак, глас 4

Бога́тство благода́ти и сыноположе́ния стяжа́ете/ мно́гими по́двиги и доброде́тельми,/ и́хже ра́ди Христо́с всели́ ду́ши ва́ша/ в Небе́сныя селе́ния Своя́,/ дарова́в благода́ть нетле́ния/ и чуде́с мо́щем ва́шим./ Сего́ ра́ди вопие́м вам:/ ра́дуйтеся, Са́вво и Алекси́е,/ ли́ков и́ноческих похвало́ и украше́ние.

Величание

Ублажа́ем вас,/ преподо́бнии отцы́ Са́вво и Алекси́е,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь апостолу и Евангелисту Марку, глас 3

Апо́столе святы́й и Евангели́сте Ма́рко,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Ин тропарь, глас тойже

У верхо́внаго Петра́ научи́вся,/ апо́стол Христо́в был еси́,/ и я́ко со́лнце страна́м возсия́л еси́,/ Александри́ом удобре́ние быв, блаже́нне./ Тобо́ю Еги́пет от пре́лести свободи́ся,/ ева́нгельским твои́м уче́нием просве́щ вся,/ я́ко свет, столп церко́вный./ Сего́ ра́ди твою́ па́мять чту́ще, све́тло пра́зднуем,/ Ма́рко богогла́се,/ моли́ тобо́ю благовести́маго Бо́га,/ да согреше́ний оставле́ние пода́ст душа́м на́шим.

Кондак, глас 2

С высоты́ прии́м благода́ть Ду́ха,/ ри́торская плете́ния разруши́л еси́, апо́столе,/ и, язы́ки вся улови́в, Ма́рко всесла́вне,/ твоему́ Влады́це приве́л еси́,/ Боже́ственное пропове́дав Ева́нгелие.

Величание

Велича́ем тя,/ апо́столе Христо́в и евангели́сте Ма́рко,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Тропарь преподобному Сильвестру Обнорскому, глас 6

И́же измла́да Христа́ возлюби́в/ и ве́рою к Нему́ прибли́жся,/ изнури́л еси́, в пусты́ни жи́вый, многострада́льное тело́ твое́./ Тем, блаже́нне Сильве́стре, со а́нгелы ликовству́я,/ моли́ Христа́ Бога́ мир ми́рови дарова́ти/ и бу́ди помо́щник ве́рою призыва́ющим тя на по́мощь/ и чту́щим святу́ю па́мять твою́.

Ин тропарь, глас 4

Я́ко добр блаже́ннаго Се́ргия учени́к,/ ве́ре и благоче́стию его́ подража́я,/ стяжа́л еси́ даро́в Ду́ха Свята́го сокро́вище/ и си́лы мно́ги соде́лал еси́ о Го́споде/ во спасе́ние и утеше́ние ве́рных./ Не оста́ви у́бо и нас, с ве́рою притека́ющих к тебе́,/ Сильве́стре преподо́бне.

Кондак, глас 6

По́двигом до́брым подвиза́лся еси́, преподо́бне,/ и ду́шу твою́, я́ко же́ртву чисту́ и непоро́чну,/ Ду́ху Свято́му прине́сл еси́,/ и по сме́рти твое́й ста́до твое́ духо́вное соблюда́еши,/ и в боле́знех ско́ро посеща́еши./ Те́мже мо́лим тя, преблаже́нне:/ с ли́ки преподо́бных моли́ Христа́ Бо́га,/ да спасе́т правосла́вныя Христиа́ны/ и пода́ст лю́дем в ми́ре глубо́це устрои́тися, да зове́м ти:/ ра́дуйся, Сильве́стре, и́ноком духо́вный па́стырю и наста́вниче.

Ин кондак, глас тойже

По́двигом до́брым подвиза́лся еси́, преподо́бне,/ и ду́шу твою́, я́ко же́ртву чисту́ и непоро́чну, Бо́гу прине́ся еси́,/ по успе́нии твое́м явля́ешися те́плый наш пред Бо́гом моли́твенник./ Сего́ ра́ди, ве́рою притека́юще к тебе́, взыва́ем:/ ра́дуйся, преподо́бне о́тче Сильве́стре.

Величание

Ублажа́ем тя,/ преподо́бне о́тче Сильве́стре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее, именуемой Цареградская, глас 1

Возсия́ нам со́лнце светоза́рное от восто́ка в велеле́пии,/ Твоя́, Влады́чице, ико́на,/ озаря́ющи чуде́с сия́нием пресла́вно всех, приходя́щих к ней с ве́рою и любо́вию/ и моля́щихся усе́рдно к Твоему́, е́же о Сы́не Твое́м и Бо́зе, вели́чию./ Сла́ва Бо́гу, Евфроси́ном сию́ да́вшему нам!/ Сла́ва Приве́дшему ю от Царьгра́да!/ Сла́ва Даю́щему то́ю всем исцеле́ния.

Кондак, глас 8

Препросла́вленная Вы́шняго Ма́терь/ созыва́ет к песнопе́нию нас Своего́ о́браза прише́ствием от Царьгра́да/ и возбужда́ет зре́нием того́ на по́двиг,/ побежда́ти сопроти́вных си́лу,/ и к Ней, я́ко на́шея ра́дости вино́вней, пе́ти:/ ра́дуйся, Неве́сто Неневе́стная.

Величание

Велича́ем тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь священномученику Василию, епископу Амасийскому, глас 4

И нра́вом прича́стник,/ и престо́лом наме́стник... (общий священномученику).

Кондак, глас тойже

Царе́во повеле́ние преоби́дев,/ Ца́рство Небе́сное получи́л еси́, Васи́лие,/ в не́мже лику́я,/ помина́й нас, чту́щих па́мять твою́,/ священному́чениче.

Величание

Велича́ем тя,/ священному́чениче Васи́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Стефану, епископу Великопермскому, глас 4

Боже́ственным жела́нием/ от ю́наго во́зраста, Стефа́не прему́дре, разже́гся,/ яре́м Христо́в взял еси́,/ и люде́й олядене́вшая* дре́вле неве́рием сердца́,/ Боже́ственное се́мя в них се́яв,/ ева́нгельски духо́вне породи́л еси́./ Те́мже пресла́вную твою́ па́мять почита́юще,/ мо́лим тя:/ моли́, Его́же пропове́дал еси́,/ да спасе́т ду́ши на́ша.

Кондак, глас 8

Самозва́нен не и́щущим тебе́, святи́телю, обре́лся еси́,/ лю́ди от и́дольския ле́сти свободи́в, ко Христо́ве ве́ре приве́л еси́,/ и волхва́ Пансо́тника¹¹ посрами́л еси́./ Те́мже и пе́рвый епи́скоп и учи́тель Перми́ был еси́./ Сего́ ра́ди духо́вная твоя́ ча́да,/ я́ко тобо́ю изба́вльшеся от и́дол, благода́рная тебе́ возопие́м:/ ра́дуйся, Стефа́не, учи́телю прему́дрый.

Величание

Велича́ем тя,/ святи́телю о́тче Стефа́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Иоанникию Девиченскому, глас 1

Поще́нием, моли́твами и благода́тию Боже́ственною просвети́вся,/ земны́я концы́ све́тло озаря́вши благоче́стно,/ чуде́с благода́ть от Бо́га прие́м,/ исцеля́вши неду́ги, ду́хи же лука́выя от челове́ков отгоня́вши,/ и́же с ве́рою притека́ют к ра́це моще́й твои́х святы́х,/ преподо́бне о́тче наш Иоанни́кие./ Сла́ва Да́вшему ти благода́ть,/ сла́ва Укрепи́вшему тя,/ сла́ва Де́йствующему тобо́ю всем исцеле́ния.

Кондак, глас 8

От ю́ности, Богому́дре, возлюби́в а́нгельское житие́,/ вся кра́сная оста́вил еси́,/ за́йде бо, я́коже звезда́ от ми́ра,/ восте́к к разу́мному и пра́ведному со́лнцу, Христу́,/ от Него́же прие́мь благода́ть исцеле́ния,/ разли́чныя неду́ги врачу́еши притека́ющих к свяще́нней ра́це твое́й./ Те́мже и мы, соверша́юще любо́вию всечестну́ю твою́ па́мять, вопие́м ти:/ ра́дуйся, о́тче Иоанни́кие.

Величание

Ублажа́ем тя,/ преподо́бне о́тче Иоанни́кие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь апостолу и священномученику Симеону, епископу Иерусалимскому, сроднику Господню по плоти, глас 1

Христо́ва тя сро́дника, Симео́не священнонача́льниче,/ и му́ченика тве́рда свяще́нно восхваля́ем,/ пре́лесть потреби́вшаго/ и ве́ру соблю́дшаго./ Те́мже днесь всесвяту́ю твою́ па́мять пра́зднующе,/ грехо́в разреше́ние моли́твами твои́ми прие́млем.

Ин тропарь, глас 4

В ми́ре ра́дуешися, Симео́не Иерусали́мский,/ любе́зно Христу́ Бо́гу,/ те́ло душе́вное чи́сто сохрани́в,/ претерпе́вый страсть теле́сную, долготерпели́ве, кре́пко,/ и в коне́ц на кресте́ ра́спят бысть./ Ты бо, и́стинному Рачи́телю подо́бяся,/ и от ми́ра ско́ро отлучи́ся,/ лю́тыя я́звы на себе́ понесе́/ и мо́лишися о душа́х на́ших.

Кондак, глас 4

Яко звезду́ преве́лию, Це́рковь иму́щи днесь богоглаго́ливаго Симео́на,/ светово́дится зову́щи: ра́дуйся, му́чеников честны́й ве́нче.

Величание

Велича́ем тя,/ апо́столе Христо́в Симео́не,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Тропарь преподобному Стефану, игумену Печерскому, епископу Владимиро-Волынскому, глас 8

Уче́нию повину́яся Богоно́снаго Феодо́сия,/ поста́влен бысть от него́ вождь бы́ти свято́му его́ ста́ду,/ е́же до́бре пасы́й,/ це́рковь Богоро́дицы, во́лею Тоя́ осно́ванную чу́дне,/ соверши́л еси́ благоле́пно,/ приснопа́мятне Стефа́не,/ в не́йже нам, моля́щимся, испроси́ от Христа́ Бо́га ве́лию ми́лость.

Ин тропарь, глас 2

Я́ко сый Богоно́снаго Феодо́сия учени́к/ и и́стинный жития́ его́ подража́тель,/ пе́рвый по нем бре́мя настоя́тельства понесы́й,/ те́мже и моще́й его честны́х самови́дец бы́ти сподо́бился еси́,/ я́же с про́чими святоле́пно прине́сл еси́,/ насле́дил еси́ с те́мже Ца́рство Небе́сное,/ е́же получи́ти и нам, чту́щим тя, Стефа́не,/ Го́сподеви моли́ся.

Ин тропарь, глас 8

Правосла́вия наста́вниче,/ благоче́стия учи́телю и чистоты́,/ Волы́нския па́ствы свети́льниче,/ архиере́ев Богодухнове́нное удобре́ние,/ Стефа́не прему́дре,/ уче́ньми свои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.

Кондак, глас 6

Зави́дя враг честно́му ти житию́,/ изри́нул тя бя́ше злоко́знством* свои́м от нача́льства па́ствы,/ но ты, изгна́н быв,/ и на ино́м ме́сте це́рковь Богоро́дицы воздви́гл еси́,/ за что и Та са́ном почте́ тя архиере́йства,/ в не́йже ты до́бре упа́с вруче́нная ти о́вцы,/ пре́йде во весе́лии ко Христу́, Стефа́не,/ Ему́же моли́ся о нас, рабе́х твои́х.

Ин кондак, глас 1

Проходя́, всеблаже́нне, доброде́тельми от си́лы в си́лу,/ и всех, с тобо́ю су́щих, о́ными провозвыша́я,/ всем служи́л еси́, Стефа́не, и угожда́л,/ тем избра́н был еси́ всем,/ в дому́ Бо́жия Ма́тере су́щим, в старе́йшину./ Последи́ же и на сте́пень архиере́йства возведе́н был еси́,/ и ста́до Христо́во до́бре упа́с,/ моли́ Его́ о нас, ча́дех твои́х.

Ин кондак, глас 4

Стефа́н, испо́лнь ве́ры и благоче́стия,/ соверши́тель Бо́гом основа́нныя це́ркве Пече́рския,/ днесь, я́ко вели́кое свети́ло, всем возсия́,/ Христо́во ста́до Богоуго́дно упа́с,/ в неусы́пных стра́жех* нощны́х./ Его́же чту́щие, прино́сим песнь/ еди́ному Тебе́, Христу́, всех Влады́це,/ моля́ще поми́ловати нас/ того́ благоприя́тными моли́твами.

Величание

Ублажа́ем тя,/ преподо́бне о́тче Стефа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь апостолам Иасону и Сосипатру, глас 3

Апо́столи святи́и,/ моли́те Ми́лостиваго Бо́га,/да прегреше́ний оставле́ние/ пода́ст душа́м на́шим.

Кондак, глас 4

Яви́стеся, я́ко зве́зды пресве́тлыя,/ просвеща́юще всю вселе́нную све́том пропове́дания,/ апо́столи Боже́ственнии,/ Иа́соне и Сосипа́тре,/ спаса́йте ве́рою чту́щих вас.

Величание

Велича́ем вас,/ святи́и апо́столи Иа́соне и Сосипа́тре,/ весь мир уче́ньми свои́ми просвети́вшия/ и вся концы́/ ко Христу́ приве́дшия.

Тропарь святителю Кириллу, епископу Ту́ровскому, глас 4

Благоче́стия ревни́телю и рачи́телю,/ и́ноков и сто́лпников похвало́,/ святи́телю Ту́ровския па́ствы, пресла́вне,/ златослове́сный учи́телю,/ све́тлым уче́нием Богоразу́мия своего́ просвети́вый концы́ ру́сския,/ в моли́тве к Бо́гу благода́тный гре́шников споспе́шниче,/ Кири́лле Богому́дре, моли́ Христа́ Бо́га/ утверди́тися нам, сооте́чественником твои́м/ во Правосла́вии, благоче́стии и единомы́слии.

Кондак, глас 2

Боже́ственный гром, труба́ духо́вная,/ ве́ры насади́телю, и отсека́телю ересе́й,/ Тро́ицы уго́дниче, вели́кий святи́телю Кири́лле,/ со а́нгелы предстоя́ при́сно,/ моли́ непреста́нно о всех нас.

Величание

Велича́ем тя,/ Ту́ровский подви́жниче и святи́телю Кири́лле,/ златослове́сный Росси́йский учи́телю,/ и чтим святу́ю па́мять твою́,/ ты бо еси́ усе́рдный пред Бо́гом предста́тель за род наш/ и те́плый моли́твенник о спасе́нии душ на́ших.

Тропарь девяти мученикам Кизическим, глас 8

Святи́и девяточи́сленнии му́ченицы,/ от разли́чных гра́дов во еди́н лик ма́нием Боже́ственным/ му́жественно за Христа́ спострада́ти совокупи́вшеся,/ неви́димаго врага́ победи́сте,/ злове́рныя кня́зи и мучи́тели посрами́сте ва́шим терпе́нием,/ огне́м же любве́ Бо́жия разжиза́еми,/ веще́ственно вас огнь му́чащий во хлад преложи́сте./ Те́мже даде́ся вам от Христа́ Бо́га благода́ть/ тряса́вичную исцеля́ти боле́знь,/ от нея́же и от многови́дных страсте́й/ ми́лостивно спаса́йте и нас предста́тельством ва́шим, мо́лимся.

Кондак, глас 2

Тве́рдый и всесве́тлый лик му́ченик девяти́,/ Трисо́лнечнаго Божества́ испове́дницы,/ на суди́щи Тому́ нача́льно взыва́ху:/ кровь и ду́ши на́ша с телесы́,/ я́ко непоро́чную же́ртву, прино́сим Тебе́, Влады́ко,/ в лице́х Небе́сных Твои́х сопричти́, я́ко Бог Ми́лостивый.

Величание

Велича́ем вас,/ страстоте́рпцы святи́и девяточи́сленнии,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь святителю Василию, епископу Захолмскому, Острожскому (Требинскому, Скендерийскому), глас 4

От ю́ности твоея́ всего́ себе́ Го́сподеви отда́л еси́,/ пребыва́я в моли́твах, труде́х и поста́х, о́тче Богоно́сне,/ о́браз был еси́ доброде́тели своему́ ста́ду;/ сего́ ра́ди видя́ Бог твое́ благо́е произволе́ние,/ поставля́ет тя Свое́й Це́ркви па́стыря и до́бляго архиере́я/ и по преставле́нии твое́м соблюде́ свято́е те́ло твое́ неруши́мо, святи́телю Васи́лие./ Те́мже, я́ко име́я дерзнове́ние,/ моли́ся Христу́ Бо́гу/ спасти́ся душа́м на́шим.

Кондак, глас 8

Я́ко от младе́нства себе́ порабо́тив Го́сподеви,/ посто́м и бде́нием свое́ те́ло удруча́я, му́дре,/ сосу́д че́стен Ду́ху Пресвято́му яви́лся еси́,/ сего́ ра́ди поставля́ет тя па́стырем Своея́ Це́ркви,/ ю́же до́бре пасл еси́./ Те́мже ко Го́споду отхо́диши, Его́же возлюби́л еси./ Мо́лимся ти, помина́й и нас, ве́рно чту́щих святу́ю па́мять твою́, да вси зове́м ти:/ ра́дуйся всече́стне о́тче Васи́лие.

Величание

Велича́ем тя,/ святи́телю о́тче Васи́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь апостолу Иакову Зеведееву, глас 3

Апо́столе святы́й Иа́кове,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Ин тропарь, глас тойже

Апо́стол Христо́в был еси́ избра́нный,/ и Богосло́ву возлю́бленному брат единоро́дный,/ всехва́льне Иа́кове,/ пою́щим тя грехо́в оставле́ние испроси́/ и душа́м на́шим ве́лию ми́лость.

Кондак, глас 2

Глас Боже́ственный слы́шав призыва́ющ тя,/ любо́вь отца́ презре́л еси́,/ и прите́кл еси́ ко Христу́, Иа́кове, с сро́дником твои́м, сла́вне,/ с ни́мже сподо́бился еси́ ви́дети/ Госпо́дне Боже́ственное Преображе́ние.

Величание

Велича́ем тя,/ апо́столе и священному́чениче Иа́кове,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Игнатию Брянчанинову, епископу Кавказскому и Черноморскому, глас 8

Правосла́вия побо́рниче,/ покая́ния и моли́твы де́лателю и учи́телю изря́дный,/ архиере́ев богодухнове́нное украше́ние,/ мона́шествующих сла́во и похвало́,/ писа́нии твои́ми вся ны уцелому́дрил еси́./ Цевни́це духо́вная, Игна́тие богому́дре,/ моли́ Сло́ва Христа́ Бо́га,/ Его́же носи́л еси́ в се́рдце твое́м,/ дарова́ти нам пре́жде конца́ покая́ние.

Ин тропарь, глас тойже

Избра́нник возлю́блен Христо́ви яви́лся еси́,/ Тому́ скорбьми́ мно́гими и моли́твою непреста́нною прилепи́вся,/ благода́ть Ду́ха Свята́го стяжа́в,/ учи́тель изря́ден лю́дем был еси́./ Помина́й нас, святи́телю Игна́тие, богоно́сче Росси́йский,/ да уче́нии и моли́твами твои́ми покая́ние спаси́тельное обря́щем/ и любо́вию серде́чною Христу́ усво́имся.

Кондак, глас тойже

А́ще и соверша́л еси́ стезю́ жития́ земна́го, святи́телю Игна́тие,/ оба́че непреста́нно зрел еси́ зако́ны бытия́ ве́чнаго,/ сему́ поуча́я ученики́ словесы́ мно́гими,/ и́мже после́довати и нам, свя́тче, помоли́ся.

Величание

Велича́ем тя,/ святи́телю о́тче Игна́тие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Никите, епископу Новгородскому, глас 4

Наслади́вся, Богому́дре, воздержа́ния/ и жела́ние пло́ти твоея́ обузда́в,/ на престо́ле святи́тельства сел еси́,/ и, я́ко звезда́ многосве́тлая,/ просвеща́я ве́рных сердца́/ заря́ми чуде́с твои́х,/ о́тче наш святи́телю Ники́то,/ и ны́не моли́ Христа́ Бо́га,/ да спасе́т ду́ши на́ша.

Кондак, глас 6

Архиере́йства са́ном почти́вся,/ и чи́сте Чисте́йшему предстоя́,/ приле́жно моле́ние за лю́ди твоя́ приноси́л еси́,/ я́ко и дождь моли́твою свел еси́,/ о́вогда* же и гра́да запале́ния угаси́л еси́./ И ны́не, святи́телю Ники́то,/ моли́ Христа́ Бо́га/ спасти́ лю́ди твоя́, моля́щияся,/да вси вопие́м ти:/ ра́дуйся, святи́телю, о́тче преди́вный.

Величание

Велича́ем тя,/ святи́телю о́тче Ники́то,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь священномученику Василию, епископу Амасийскому, глас 4

И нра́вом прича́стник,/ И престо́лом наме́стник... (общий священномученику).

Кондак, глас тойже

Царе́во повеле́ние преоби́дев,/ Ца́рство Небе́сное получи́л еси́, Васи́лие,/ в не́мже лику́я,/ помина́й нас, чту́щих па́мять твою́,/ священному́чениче.

Величание

Велича́ем тя,/ священному́чениче Васи́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Донату, епископу Еврии, глас 8

Благи́й яре́м Христо́в и бре́мя легко́ Ева́нгельскаго уче́ния взем,/ иера́рше Дона́те Богоблаже́нне,/ вельми́ подвиза́лся еси́ во вре́менней жи́зни,/ архиере́й у́бо Богоуго́ден быв,/ до́бре пасы́й лю́ди Бо́жия,/ просвети́в ты́я уче́нием,/ чудотворе́нием вселе́нную удиви́л еси́./ Сего́ ра́ди мо́лим тя:/ да изба́вит нас Христо́с Бог от вся́ких бед/ и Небе́снаго блаже́нства сподо́бит.

Ин тропарь, глас 4

Блаже́н де́латель и украси́тель Це́ркве Христо́вы,/ о́тче Дона́те, был еси́,/ непреста́нно попече́ние о ста́де твое́м стяжа́в,/ науча́я и руководя́ о́но в любви́ Сы́на Бо́жия,/ не то́кмо бо в твое́м гра́де мно́гий наро́д,/ но в Константино́поле самоде́ржца и в нем вся лю́ди/ удиви́л еси́/ пресла́вными чудесы́ твои́ми./ Богоуго́дныя у́бо мольбы́/ сотворя́я ко Христу́ Бо́гу,/ помо́щник скор всем яви́ся,/ предстоя́ Всесвяте́й Тро́ице,/ в Вы́шних моли́ Ю о всех нас,/ да спасе́т ду́ши на́ша.

Кондак, глас 8

Красото́ Це́ркве, утверди́вшияся на ка́мени – Боговоплоще́нном Спа́се Христе́,/ Богоправи́мое доброде́телей прави́ло,/ Дона́те, досточу́дный чудотво́рче,/ я́ко иера́рх име́вши дерзнове́ние к всетворя́щему Бо́гу о лю́дех моли́тися,/ враго́в ви́димых и неви́димых предста́тельством твои́м свободи́ вопию́щия:/ сла́ва в Тро́ице Еди́ному Бо́гу.

Величание

Велича́ем тя,/ святи́телю о́тче Дона́те,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь пророку Иеремии, глас 2

Проро́ка Твоего́ Иереми́и па́мять, Го́споди, пра́зднующе,/ тем Тя мо́лим:/ спаси́ ду́ши на́ша.

Кондак, глас 3

Очи́стив ду́хом, вели́кий проро́че и му́чениче,/ твое́ светоза́рное се́рдце,/ сла́вне Иереми́е,/ проро́чествия дар свы́ше прия́л еси́,/ и возопи́л еси́ велегла́сно во страна́х:/ се Бог наш, и не приложи́тся ин к Нему́, /И́же вопло́щся, на земли́ яви́лся есть.

Величание

Велича́ем тя,/ проро́че Бо́жий Иереми́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Пафнутию Боровскому, глас 4

Жити́я све́тлостию просвети́в твое́ оте́чество,/ в моли́твах и посте́х дарова́ний Боже́ственнаго Ду́ха испо́лнился еси́,/ и во вре́менней сей жи́зни до́бре подвиза́вся,/ ми́лости благоутро́бия всем скорбя́щим отве́рзл еси́/ и ни́щим был еси́ засту́пник./ Тем мо́лим тя, о́тче Пафну́тие,/ моли́ Христа́ Бо́га, да спасе́т ду́ши на́ша.

Кондак, глас 8

Бо́жиим светоли́тием просвеще́н, о́тче,/ по́стническое стяжа́л еси́ жи́тельство, преподо́бне,/ и́ноком предо́брый наста́вниче и по́стником благо́е украше́ние./ Сего́ ра́ди Госпо́дь труды́ твоя́ ви́дев,/ чуде́с да́ром обогати́ тя,/ источа́еши бо исцеле́ния./ Мы же ра́дующеся вопие́м ти:/ ра́дуйся, о́тче Пафну́тие.

Величание

Ублажа́ем тя,/ преподо́бне о́тче Пафну́тие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь благоверной Тамаре, царице Грузинской, глас 4

Ца́рства земна́го сла́ву презре́вши,/ Еди́наго Христа́, нас ра́ди распя́таго, возлюби́ла еси́/ и Того́ му́жественно испове́дующи,/ венце́м му́ченическим увенча́лася еси́,/ всеблаже́нная цари́це Тама́ро./ Те́мже и ны́не, престо́лу Царя́ сла́вы на Небесе́х предстоя́щи,/ моли́ся о спасе́нии душ на́ших.

Ин тропарь, глас тойже

Во святы́х ди́вная,/ Иве́рии свети́ло,/ благове́рная цари́це Тама́ро,/ на гора́х высо́ких хра́мы воздви́гшая,/ да в них моле́ния возсыла́ют ко Го́споду,/ мольба́ми твои́ми кре́пость дарова́вшая во́ем христолюби́вых люде́й страны́ Иверския,/ десни́цею же свое́ю по́лчища ага́рянская низпрове́ргшая,/ моли́ Христа́ Бо́га спасти́ся душа́м на́шим.

Ин тропарь, глас 8

Вы́шния красоты́ жела́я,/ ни́жния сла́сти теле́сныя дале́че от себе́ отгна́ла еси́,/ и, в черто́зе ца́рском пребыва́ющи,/ а́нгельское житие́ препровожда́ла еси́,/ цари́це Тама́ро блаже́нная,/ моли́ Христа́ Бо́га спасти́ся душа́м на́шим.

Тропарь священномученику Макарию, митрополиту Киевскому, глас 8

Боже́ственныя безкро́вныя соверша́я же́ртвы,/ кровь твою́, от безбо́жных ага́рян излия́нную,/ в же́ртву непоро́чную прине́ся еси́ Влады́це твоему́, Пастыренача́льнику Христу́,/ Его́же моли́, мо́лим тя,/ проли́ти гнев на язы́ки, хотя́щия бра́ней,/ христолюби́вое во́инство на́ше на враги́ укрепи́/ и ста́до твое́ от вся́ких бед неврежде́нно соблюди́./ Тебе́ бо кре́пкаго засту́пника почита́ем,/ но́вый священному́чениче Росси́йский,/ святи́телю, блаже́нне Мака́рие.

Кондак, глас тойже

Весели́тся град Ки́ев,/ вели́кое сокро́вище стяжа́в,/ твое́ тле́нию неприча́стное те́ло,/ святи́телю блаже́нне Мака́рие,/ твой бо престо́л да́же до кро́ве от лю́тых враго́в наше́ствия храни́л еси́./ И ны́не Небе́сному предстои́ши престо́лу,/ иде́же моли́твенно пред Творце́м помина́й нас, о́тче наш,/ да во всех бе́дах име́ем тя прибе́жище и тобо́ю хва́лимся, зову́ще:/ ра́дуйся, Мака́рие, архиере́ом честно́е украше́ние.

Величание

Велича́ем тя,/ священному́чениче Мака́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Божией Матери ради иконы Ее «Нечаянная Радость», глас 4

Днесь, ве́рнии лю́дие, духо́вно торжеству́ем,/ прославля́юще Засту́пницу усе́рдную ро́да христиа́нскаго,/ и, притека́юще к пречи́стому Ея́ о́бразу, взыва́ем си́це:/ о, Преми́лостивая Влады́чице Богоро́дице,/ пода́ждь нам неча́янную ра́дость,/ обремене́нным грехи́ и скорбьми́ мно́гими,/ и изба́ви нас от вся́каго зла,/ моля́щи Сы́на Твоего́, Христа́ Бо́га на́шего,/ спасти́ ду́ши на́ша.

Кондак, глас 6

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице./ Ты нам помози́,/ на Тебе́ наде́емся,/ и Тобо́ю хва́лимся,/ Твои бо есмы́ раби́,/ да не постыди́мся.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь преподобномученикам Евфимию, Игнатию и Акакию Афонским, глас 1

Равночи́сленнии Тро́ицы Несозда́нныя су́ще,/ с ли́ки а́нгелов и чи́ны му́чеников/ предстоите́ вы, ра́дующеся, Престо́лу Божества́, му́дрии./ Сего́ ра́ди прича́стием сия́ние отону́ду прие́млюще,/ исто́чник исцеле́ний ве́рным подае́те/ и Боже́ственное просвеще́ние,/ му́чениче Христо́в Евфи́мие со Игна́тием му́дрым и с Боже́ственным Ака́кием,/ о нас при́сно моли́теся.

Кондак, глас 4

Яви́ся днесь Це́ркви но́вое торжество́/ трие́х страстоте́рпцев,/ я́ко свети́ла, озаря́ющее/ правосла́вных, Христе́,/ исполне́ния.

Величание

Ублажа́ем вас,/ преподо́бнии му́ченицы Евфи́мие, Игна́тие и Ака́кие,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь святителю Афанасию Великому, архиепископу Александрийскому, глас 3

Столп был еси́ Правосла́вия,/ Боже́ственными догма́ты подтвержда́я Це́рковь,/ священнонача́льниче Афана́сие,/ Отцу́ бо Сы́на единосу́щна пропове́дав,/ посрами́л еси́ А́риа./ О́тче преподо́бне,/ Христа́ Бо́га моли́/ дарова́ти нам ве́лию ми́лость.

Кондак, глас 2

Правосла́вия насади́в уче́ния,/ злосла́вия те́рния изсе́кл еси́,/ умно́жив се́мя ве́ры одожде́нием Ду́ха, преподо́бне:/ те́мже тя пое́м, Афана́сие.

Величание

Велича́ем тя,/ святи́телю о́тче Афана́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь благоверным князьям Российским Борису и Глебу, во Святом Крещении Роману и Давиду, глас 4

Днесь церко́вная разширя́ются не́дра,/ прие́млюще бога́тство Бо́жия благода́ти,/ веселя́тся ру́сстии собо́ри,/ ви́дяще пресла́вная чудеса́,/ я́же твори́ти приходя́щим к вам ве́рою,/ святи́и чудотво́рцы Бори́се и Гле́бе,/ моли́те Христа́ Бо́га, да спасе́т ду́ши на́ша.

Ин тропарь, глас 2

Пречестни́и, и целому́дреннии, и незло́бивии страстоте́рпцы,/ Рома́не сла́вный и Дави́де чу́дный,/ и́го бо Госпо́дне ева́нгельски на ра́мо взе́мше,/ после́довасте Христу́/ и, Крест Его́, яко́ ски́петр, в руку́ иму́ще,/ врага́ бра́та и зла́го властолю́бца соодоле́сте,/ и той ны́не в гее́нне му́чится,/ вы же ра́дуетеся, с ли́ки а́нгельскими предстоя́ще Святе́й Тро́ице,/ моли́теся о держа́ве сро́дник ва́ших, богоуго́дней бы́ти,/ и сыново́м ру́сским спасти́ся.

Ин тропарь, глас 4

Му́ченицы Госпо́дни спа́сшиися,/ пресла́внии блаже́ннии кня́зи Бори́се и Гле́бе,/ тружда́ющимся бы́стрии помо́щницы,/ неду́жным цели́тели,/ вы бо боле́зни врачу́ете/ притека́ющих в Церковь с ве́рою./ Те́мже и мы мо́лимся:/ от бед изба́вите нас,/ чту́щих с любо́вию пренесе́ние моще́й ва́ших.

Ин тропарь, глас 8

Днесь вся́кая душа́ ве́рных весели́тся,/ в пренесе́нии честны́х моще́й ва́ших, Бори́се и Гле́бе:/ слепы́я просвеща́ете, немы́м уста́ отверза́ете и печа́льныя утеша́ете,/ прия́ли бо есте́ от Христа́ Бо́га благода́ть исцеле́ний./ Моли́теся о душа́х на́ших.

Ин тропарь, глас 2

Правди́вая страстоте́рпца/ и и́стинная Ева́нгелия Христо́ва послу́шателя*,/ целому́дренный Рома́не с незло́бивым Дави́дом,/ не сопроти́в ста́ста врагу́ су́щу бра́ту,/ убива́ющему телеса́ ва́ша,/ душа́м же косну́тися не могу́щу./ Да пла́чется у́бо злый властолю́бец,/ вы же ра́дующеся с ли́ки а́нгельскими,/ предстоя́ще Святе́й Тро́ице,/ моли́теся о держа́ве сро́дников ва́ших, богоуго́дней бы́ти,/ и сыново́м росси́йским спасти́ся.

Кондак, глас 4

Яви́ся днесь в стране́ Ру́сстей благода́ть исцеле́ния всем,/ к вам, блаже́ннии, предстоя́щим и вопию́щим:/ ра́дуйтеся, засту́пницы те́плии.

Ин кондак, глас 3

Возсия́ днесь пресла́вная па́мять ва́ша,/ благоро́днии страстоте́рпцы Христо́вы, Рома́не и Дави́де,/ созыва́ющи нас к похвале́нию Христа́ Бо́га на́шего./ Тем притека́юще к ра́це моще́й ва́ших,/ исцеле́ния дар прие́млем моли́твами ва́шими, святи́и,/ вы бо боже́ственнии вра́чеве есте́.

Ин кондак, глас тойже

Прииди́те, вси ру́сстии собо́ри,/ чудотво́рцу и му́ченику Бори́са и Гле́ба восхва́лим,/ зако́нно бо пострада́вше,/ победи́ста сопроти́внаго врага́./ Тем святы́м заступле́нием кня́зи ру́сстии враги́ побежда́ют,/ тем па́мять е́ю ве́село и любо́вию похва́лим, вопию́ще:/ за ны моли́те Святу́ю Тро́ицу/ умири́ти мир и спасти́ ду́ши на́ша.

Ин кондак, глас 4

От гро́ба зна́мения показа́сте в стране́ Ру́сстей:/ яви́ся днесь благода́ть исцеле́ния/ всем, к вам, страстоте́рпцы, притека́ющим с ве́рою,/ Бори́се сла́вный со Гле́бом чу́дным./ Кре́пцы ве́рою, добропобе́днии му́ченицы, за Христа́ подъе́мше разли́чныя му́ки,/ и на мно́га ле́та сокрове́ни бы́ша ва́ши святи́и мо́щи;/ ны́не же явля́етеся от земли́,/ возсия́вше луча́ми, я́ко бога́тство многоце́нно,/ и в це́рковь Бо́жию че́стно носи́ми архиере́й Бо́жиих дла́ньми./ Те́мже вопие́м вам:/ ра́дуйтеся, кня́зи, ру́сстии засту́пницы.

Величание

Велича́ем вас,/ страстоте́рпцы святи́и Бори́се и Гле́бе,/ и чтим честна́я страда́ния ва́ша,/ я́же за Христа́/ претерпе́ли есте́.

Ино величание

Велича́ем вас,/ святи́и благове́рнии кня́зие страстоте́рпцы Христо́вы Рома́не и Дави́де,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь святителю Афанасию, патриарху Цареградскому (Константинопольскому), Дубенскому чудотворцу, глас 8

Прему́дростию уче́ний твои́х ца́рствующий град просвети́в,/ тьму неве́дения ерети́ческаго разгна́л еси́, преблаже́нне,/ твое́ благослове́ние земли́ Росси́йстей прине́сл еси́,/ о́тче наш святи́телю Афана́сие,/ иде́же сконча́в тече́ние твое́,/ на крыле́х чистоты́ возлете́л еси́ в Небе́сное Ца́рство,/ и та́мо со а́нгелы и ли́ки святы́х живы́й,/ непреста́нно моли́ Христа́ Бо́га о душа́х на́ших.

Кондак, глас тойже

О всесвяте́йший па́стырю и учи́телю вселе́нныя,/ преблаже́нне о́тче наш святи́телю Афана́сие,/ к ра́це моще́й твои́х припа́дающе, усе́рдно мо́лим тя:/ приими́ от убо́гих душ на́ших любо́вию приноси́мая тебе́ моле́ния/ и, я́ко име́я дерзнове́ние у Престо́ла Влады́чня,/ испроси́ моли́твами твои́ми чту́щим тя/ со а́нгелы и все́ми святы́ми/ непреста́нно Пресвяте́й Тро́ице воспева́ти: аллилу́иа.

Величание

Велича́ем тя,/ святи́телю о́тче Афана́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь благоверному равноапостольному царю Борису, во Святом Крещении Михаилу, глас 6

Испо́лнен стра́ха Бо́жия/ и Креще́нием святы́м просвеще́н,/ был еси́ жили́ще Свята́го Ду́ха,/ благове́рный царю́ Бори́се./ Утверди́в же ве́ру Правосла́вную на земли́ Бо́лгарстей/ и жезл ца́рствия оста́вив,/ всели́лся еси́ в пусты́ню,/ процве́л еси́ в по́двизех/ и обре́л еси́ благода́ть пред Го́сподем./ Ны́не же предстоя́ Престо́лу Всевы́шняго,/ моли́ дарова́ти нам, моля́щимся тебе́,/ спасе́ние душ на́ших.

Кондак, глас 8

Взбра́нный воево́до Бо́га Вы́шняго,/ си́лою Креста́ победи́вый воста́ние тьмы/ и насади́вый благоче́стие на земли́ твое́й,/ име́яй же дерзнове́ние ко Го́споду,/ сохраня́й моли́твами твои́ми достоя́ние твое́, да зове́м ти:/ ра́дуйся, равноапо́стольне царю́ Бори́се,/ крести́телю Бо́лгарския.

Величание

Велича́ем тя,/ святы́й равноапо́стольный царю́ Бори́се,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Тропарь блаженному Василию Кадомскому, глас 4

Моли́тва усе́рдная пи́ща и пити́е бысть блаже́нне Васи́лие,/ в несе́нии креста́ жития́ стра́нническаго любо́вь Христо́ву позна́л еси́./ О́ком чи́стым бу́дущая я́ко настоя́щая прозрева́я,/ ра́дость и от бед избавле́ние тре́бующим твоея́ по́мощи дарова́л еси́./ Те́мже и нас, я́ко Бо́жий избра́нник,/ не забу́ди твои́ми ходата́йствы/ Христа́ Бо́га о нас умоля́ющи.

Кондак, глас 8

Вы́шния красоты́ жела́я,/ ни́жния сла́сти теле́сныя то́щно оста́вил еси... (общий блаженным).

Величание

Ублажа́ем тя,/ святы́й пра́ведный Васи́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь мученикам Тимофею и Мавре, глас 4

Му́ченицы Твои́, Го́споди... (общий мученикам).

Кондак, глас тойже

Многообра́зныя я́звы претерпе́вше/ и венцы́ от Бо́га прие́мше,/ о нас моли́теся ко Го́споду,/ па́мять всесвяще́нную ва́шу соверша́ющих,/ превели́кий Тимофе́е и пресла́вная Ма́вро,/ е́же умири́ти град и лю́ди,/ Той бо есть ве́рных утвержде́ние.

Величание

Велича́ем вас,/ страстоте́рпцы святи́и Тимофе́е и Ма́вро,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Феодосию, игумену Киево-Печерскому, в Дальних пещерах почивающему, глас 8

Возвы́сився на доброде́тель,/ измла́да возлюби́в мона́шеское житие́,/ к жела́нию до́блественне дости́г, всели́лся еси́ в пеще́ру/ и, украси́в житие́ твое́ поще́нием и све́тлостию,/ в моли́твах, я́ко безпло́тен, пребыва́л еси́,/ в Росси́йстей земли́, я́ко све́тлое свети́ло, просия́в, о́тче Феодо́сие,/ моли́ Христа́ Бо́га спасти́ся душа́м на́шим.

Кондак, глас 3

Звезду́ Росси́йскую днесь почти́м,/ от восто́ка возсия́вшую и на за́пад прише́дшую,/ всю бо страну́ сию́ чудесы́ и добро́тою обогати́вшую и вся ны/ соде́янием и благода́тию мона́шескаго уста́ва,/ блаже́ннаго Феодо́сия.

Величание

Ублажа́ем тя,/ преподо́бне о́тче Феодо́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради икон Ее, именуемых Печерская-Нерукотворенная и Свенская-Печерская¹², глас 4

Днесь све́тло торжеству́ет Пече́рская оби́тель/ и ра́дуется явле́нием о́браза Богома́тере,/ безме́рный лик Пече́рских отце́в,/ с ни́миже и мы непреста́нно вопие́м:/ ра́дуйся, Благода́тная, Пече́рская похвало́.

Кондак, глас 3

Де́ва днесь неви́димо предстои́т в це́ркви/ и с ли́ки Пече́рских отце́в мо́лится о нас,/ благогове́йно велича́ющих Ея́ безме́рную ми́лость к ро́ду на́шему,/ я́вльшуюся в чу́дном о́бразе Ея́,/ оби́тель Пече́рскую украша́ющем.

Величание

Велича́ем тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь мученице Пелагии, деве Тарсийской, глас 4

Агница Твоя́, Иису́се... (общий мученице).

Кондак, глас 3

Вре́менная презре́вши/ и Небе́сных благ прича́стница бы́вши,/ вене́ц страда́ния ра́ди прии́мши,/ Пелаги́е всечестна́я,/ я́ко дар принесла́ еси́, кро́вныя пото́ки Влады́це Христу́,/ моли́ от бед изба́вити нас,/ твою́ па́мять почита́ющих.

Величание

Велича́ем тя,/ страстоте́рпице Христо́ва Пелаги́е,/ и чтим честно́е страда́ние твое́,/ е́же за Христа́/ претерпе́ла еси́.

Тропарь преподобным Никите, Кириллу, Никифору, Клименту и Исаакию Алфановым (Сокольницким), Новгородским, глас 1

Послу́шаша Госпо́дня гла́са,/ до́брии рачи́тели бы́вше,/ благи́й Его́ яре́м на ся взе́мше,/ усе́рдно понесо́сте/ и по́стничества путь дости́гше,/ преподо́бнии отцы́, святи́и чудотво́рцы,/ во́ини Небе́снаго Царя́ Христа́,/ Ники́то, Кири́лле, Ники́форе, Кли́менте и Исаа́кие./ Сего́ ра́ди от Вседержи́тельныя десни́цы венцы́ неувяда́емыми увязо́стеся,/ и Небе́сною сла́вою одея́стеся,/ и чудотворе́нии обогати́стеся,/ те́мже и о нас моли́ти не преста́йте,/ да полу́чим ве́чных благ,/ мы же си́це взыва́ем:/ сла́ва Давшему вам к по́двигу кре́пость,/ сла́ва Венча́вшему вас,/ сла́ва Даю́щему ва́ми всем исцеле́ния.

Ин тропарь, глас 8

Свети́льницы све́тлии я́вльшеся,/ добро́ту земну́ю му́дренно оста́виша,/ и всю доброде́тель извы́кли* есте́,/ и обрето́ша безсме́ртие,/ посто́м и бде́нием и про́чим воздержа́нием себе́ приноша́ху,/ и ны́не со а́нгелы на Небесе́х престо́лу Христо́ву предстои́те,/ моли́теся Бо́гу, му́дрии,/ Ники́то, Кири́лле, Ники́форе, Кли́менте и Исаа́кие преподо́бнии,/ умири́ти мир и спасти́ ду́ши на́ша, пою́щих,/ и согреша́ющим оставле́ние грехо́в дарова́ти,/ чту́щим святу́ю па́мять ва́шу.

Кондак, глас тойже

К Бо́гу все свое́ у́мное жела́ние впери́сте/ и к Тому́ невозвра́тно от души́ после́довали есте́,/ а́нгельское житие́ на земли́ пожи́вше,/ и мно́гим бы́сте путь ко спасе́нию,/ отсю́дуже и Христо́с вас просла́ви и да́ром чуде́с обога́ти,/ те́мже вси, притека́юще к моща́м ва́шим, зове́м:/ ра́дуйтеся, преподо́бнии отцы́ Ники́то, Кири́лле, Ники́форе, Кли́менте и Исаа́кие,/ моли́твенницы те́плии о душа́х на́ших.

Ин кондак, глас тойже

Благода́ть прие́мше исцеле́нием,/ простира́ете здра́вие су́щим в боле́знех,/ преподо́бнии отцы́ и чудотво́рцы сла́внии,/ Ники́то чу́дне, и Кири́лле блаже́нне,/ и Ники́форе прече́стне, Кли́менте свя́те, и Исаа́кие преподо́бне,/ но моли́твами ва́шими проти́вных шата́ние разори́те,/ и боле́зни на́ша исцели́те,/ и грехо́в проще́ние испроси́те,/ да благода́рне воззове́м вам:/ ра́дуйтеся, Вели́кому Но́вуграду похвало́ и утвержде́ние.

Величание

Ублажа́ем вас,/ преподо́бнии отцы́ Ники́то, Кири́лле, Ники́форе, Кли́менте и Исаа́кие,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь великомученице Ирине, глас 4

А́гница Твоя́, Иису́се... (общий мученице).

Кондак, глас тойже

Де́вства добро́тами преиспещре́нна, де́во,/ страда́льчеством была́ еси́ красне́йшая, Ири́но,/ кровьми́ твои́ми исте́кшими обагре́на,/ пре́лесть же низложи́вшая безбо́жия,/ сего́ ра́ди и прия́ла еси́ по́чести побе́ды руко́ю Созда́теля твоего́.

Величание

Велича́ем тя,/ страстоте́рпице Христо́ва Ири́но,/ и чтим честно́е страда́ние твое́,/ е́же за Христа́/ претерпе́ла еси́.

Тропарь преподобному Иакову Железноборовскому, глас 4

Небе́снаго жела́я,/ земна́я возненави́дел еси́/ и, взем крест твой, после́довал еси́ Христу́,/ и от Него́ прия́л еси́ дарова́ния чуде́с,/ исцеля́ти неду́жныя./ Но, я́ко име́яй дерзнове́ние ко Святе́й Тро́ице,/ испроси́ правосла́вным Христиа́ном здра́вие и спасе́ние,/ на враги́ же побе́ду,/ и не забу́ди посеща́я чад твои́х,/ припа́дающих к целе́бному гро́бу твоему́/ Иа́кове преподо́бне, о́тче наш.

Кондак, глас 8

Серде́чная о́чи, досточу́дне, ко Го́споду впери́в/ и теле́сныя стра́сти из ко́рене исторга́я,/ неболе́зненную жизнь в боле́знях восприя́л еси́, преподо́бне,/ боле́зням же лю́тым дае́ши исцеле́ние, прося́щим с ве́рою у тебе́./ Те́мже мо́лим тя, досточу́дне,/ исцели́ на́ша боле́зни душе́вныя и теле́сныя, да зове́м ти:/ ра́дуйся, Иа́кове Богому́дре о́тче наш.

Величание

Ублажа́ем тя,/ преподо́бне о́тче Иа́кове,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Пахомию Нерехтскому, глас 4

Жите́йских молв, преподо́бне, отве́ргся,/ и, я́ко птищ, обре́те себе́ в пусты́ни безмо́лвие,/ в моли́твах и бде́нии прилежа́ Бо́гови,/ преподо́бне о́тче Пахо́мие,/ и оста́ви дре́внее пребыва́ние,/ и оты́де в пусты́ню, и в ней водвори́ся,/ и соста́ви оби́тель во и́мя Пресвяты́я Тро́ицы,/ и процве́л еси́, а́ки фи́никc,/ и бысть о́браз утеше́ния духо́внаго./ Те́мже, преподо́бне Пахо́мие,/ моли́ Пресвяту́ю Тро́ицу спасти́ся душа́м на́шим.

Кондак, глас тойже

В пусты́ни безмо́лвствуя,/ еди́нствующу тя, Богоно́се, взыску́ющу ти Го́спода,/ Бо́гу же тебе́ не оста́вльшу еди́ному бы́ти в пусты́ни,/ и Того́ повеле́нием снидо́шася к тебе́ не́колико* бра́тии,/ с ни́миже ти моля́щуся Го́сподеви,/ Тро́ице прече́стен храм воздви́же,/ в не́мже предстоя́ще, преподо́бне Пахо́мие,/ моли́ся о спасе́нии душ на́ших.

Величание

Ублажа́ем тя,/ преподо́бне о́тче Пахо́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее «Неупиваемая Чаша», глас 4

Днесь притеце́м, ве́рнии,/ к Боже́ственному и пречу́дному о́бразу Пресвяты́я Богома́тери,/ напоя́ющей ве́рных сердца́/ Небе́сною Неупива́емою Ча́шею Своего́ милосе́рдия/ и лю́дем ве́рным чудеса́ показу́ющей./ я́же мы ви́дяще и слы́шаще духо́вно пра́зднуем и те́пле вопие́м:/ Влады́чице преми́лостивая,/ исцели́ на́ша неду́ги и стра́сти,/ моля́щи Сы́на Твоего́, Христа́ Бо́га на́шего,/ спасти́ ду́ши на́ша.

Кондак, глас 6

Предста́тельство христиа́н непосты́дное... (общий Божией Матери).

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь праведному Иову Многострадальному, глас 1

Бога́тство ви́дев доброде́телей И́овлих,/ укра́сти ко́знствоваше* пра́ведных враг,/ и растерза́в столп телесе́,/ сокро́вище не укра́де ду́ха,/ обре́те бо вооруже́ну непоро́чнаго ду́шу,/ мене́ же и обнажи́в плени́,/ предвари́в у́бо мя пре́жде конца́,/ изба́ви мя льсти́ваго, Спа́се, и спаси́ мя.

Ин тропарь, глас 2

Па́мять пра́веднаго Твоего́ И́ова, Го́споди, пра́зднующе,/ тем Тя мо́лим:/ изба́ви нас от наве́тов и сете́й лука́ваго диа́вола/ и спаси́ ду́ши на́ша, я́ко Человеколю́бец.

Кондак, глас 8

Я́ко и́стинен и пра́веден, благочести́в и непоро́чен,/ освяще́н же я́влься, всесла́вне, Бо́жий уго́дниче и́стинный,/ просвети́л еси́ мир в терпе́нии твое́м, терпели́вейший и до́блейший./ Те́мже вси, богому́дре, па́мять твою́ воспева́ем.

Величание

Велича́ем тя,/ святы́й пра́ведный И́ове многострада́льный,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Михею Радонежскому, глас 4

И́го Госпо́дне на ра́мо взем,/ после́довал еси́ Христо́ви со учи́телем свои́м преподо́бным Се́ргием,/ с ни́мже и сподо́бился еси́ ви́дети Пресвяту́ю Богоро́дицу/ и слы́шал еси́ пресла́дкий глас Ея́,/ я́ко обеща́ся неотсту́пна бы́ти ме́ста сего́,/ но, о преподо́бне Михе́е,/ моли́ся о чту́щих святу́ю па́мять твою́.

Кондак, глас 8

Прииди́те, мона́шествующих собо́ри и по́стников ли́цы,/ соше́дшеся, похва́лим блаже́ннаго Михе́я,/ спо́стника преподо́бнаго Се́ргия,/ с ни́мже предстои́т Святе́й Тро́ице/ и мо́лится спасти́ся душа́м на́шим.

Величание

Ублажа́ем тя,/ преподо́бне о́тче Михе́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Иову Почаевскому, глас 4

Многострада́льнаго пра́отца долготерпе́ние стяжа́в,/ Крести́телеву воздержа́нию уподобля́яся,/ Боже́ственныя же ре́вности обою́ приобща́яся,/ тех имена́ досто́йно прия́ти сподо́бился еси́/ и и́стинныя ве́ры был еси́ пропове́дник безбоя́знен;/ те́мже мона́хов мно́жества ко Христу́ приве́л еси́,/ и вся лю́ди в Правосла́вии утверди́л еси́,/ И́ове преподо́бне о́тче наш,/ моли́ спасти́ся душа́м на́шим.

Кондак, глас тойже

Яви́лся еси́ и́стинныя ве́ры столп,/ Ева́нгельских же за́поведей ревни́тель,/ горды́ни обличе́ние,/ смире́нным же предста́тель и науче́ние;/ те́мже и ублажа́ющим тя грехо́в отпуще́ние испроси́/ и оби́тель твою́ невреди́му сохрани́,/ И́ове о́тче наш, Многострада́льному подо́бный.

Величание

Ублажа́ем тя,/ преподо́бне о́тче И́ове,/ и чти́м святу́ю па́мять твою́,/ наста́вниче мона́хов/ и собесе́дниче а́нгелов.

Тропарь мученику Варвару, бывшему разбойнику, глас 4

Му́ченик Твой, Го́споди, Ва́рвар... (общий мученику).

Кондак, глас 3

От Бо́га да́нныя ти благода́ти,/ страстоте́рпче Ва́рваре свя́те,/ я́ко многоце́нным ми́ром, нас посеща́й целе́бне,/ да вопие́м ти:/ ра́дуйся, испи́вый сла́достне ча́шу Христо́вых страсте́й.

Величание

Велича́ем тя,/ страстоте́рпче святы́й Ва́рваре,/ и чтим честна́я страда́ния твоя́,/ я́же за Христа́/ претерпе́л еси́.

Тропарь святителю Савве, первому архиепископу Сербскому, глас 3

Пути́, вводя́щаго в жизнь,/ наста́вник, и первопресто́льник, и учи́тель был еси́:/ пе́рвее бо прише́д, святи́телю Са́вво,/ оте́чество твое́ просвети́л еси́/ и, породи́в то́е Ду́хом Святы́м,/ я́ко древа́ ма́слинная,/ в мы́сленнем раи́ насади́л еси́ всеосвяще́нная твоя́ ча́да./ Тем я́ко апо́столом и святи́телем сопресто́льна/ чту́ще тя, мо́лим:/ моли́ Христа́ Бо́га/ дарова́ти нам ве́лию ми́лость.

Кондак, глас 6

Засту́пниче скорбя́щим,/ в напа́стех помо́щниче,/ ко Влады́це моле́бниче,/ не пре́зри нас, смире́нных, обремене́нных грехи́,/ но предвари́ и исхи́ти от мук ве́чных с ве́рою моля́щихтися,/ ускори́ на заступле́ние и потщи́ся на по́мощь,/ заступи́, святи́телю Христо́в Са́вво, пою́щия тя.

Величание

Велича́ем тя,/ святи́телю о́тче Са́вво,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Кресту, глас 8

Креста́ Твоего́ о́браз ны́не па́че со́лнца возсия́,/ его́же от горы́ святы́я да́же до Ло́бнаго ме́ста просте́рл еси́,/ и в нем Твою́, Спа́се, кре́пость уясни́л еси́,/ сим укрепля́я и ве́рныя лю́ди Своя́,/ я́же и спаса́й вы́ну в ми́ре,/ моли́твами Богоро́дицы, Христе́ Бо́же, и спаси́ нас.

Кондак, глас 4

Отве́рзый небеса́ заключе́нныя,/ на небеси́ пресве́тлыя лучи́,/ на земли́ возсия́ пречестны́й Крест,/ те́мже сия́ние его́ де́йства прие́мше,/ к незаходи́мому наставля́емся све́ту,/ и во бране́х и́мамы его́ ору́жие ми́ра/ непобеди́мую побе́ду.

Тропарь преподобному Нилу Сорскому, глас 4

Удали́вся, бе́гая дави́дски, ми́ра,/ и вся я́же в нем я́ко уме́ты* вмени́в,/ и в ме́сте безмо́лвие всели́вся,/ духо́вныя ра́дости испо́лнился еси́,/ о́тче наш Ни́ле,/ и еди́ному Бо́гу изво́лив служи́ти,/ процве́л еси́ я́ко фи́никс,/ и я́ко лоза́ благопло́дна/ умно́жил еси́ ча́да пусты́ни./ Те́мже благода́рственно вопие́м:/ сла́ва Укрепи́вшему тя в по́двизе пустынножи́тельства,/ сла́ва Избра́вшему тя в Росси́и/ отше́льником уставополо́жника изря́дна,/ сла́ва моли́твами твои́ми и нас Спаса́ющему.

Ин тропарь, глас 1

Мирска́го жития́ отве́ргся/ и мяте́жа жите́йскаго бе́гая,/ преподо́бне и Богоно́сне о́тче наш Ни́ле,/ не облени́лся еси́ собра́ти цве́ты ра́йския от писа́ний оте́ческих/ и, в пусты́ню всели́вся,/ процве́л еси́, я́ко крин* се́льный*,/ отоню́дуже преше́л еси́ и в Небе́сныя оби́тели;/ научи́ и нас, че́стно почита́ющих тя,/ твои́м ца́рским путе́м ше́ствовати/ и моли́ся о душа́х на́ших.

Кондак, глас 8

Лю́бве ра́ди Христо́вы удали́вся мирски́х смуще́ний,/ ра́достною душе́ю всели́лся еси́ в пусты́ни,/ в не́йже подвиза́вся до́бре,/ я́ко а́нгел на земли́, о́тче Ни́ле, пожи́л еси́,/ бде́нием бо и посто́м те́ло свое́ изнури́л еси́ ве́чныя ра́ди жи́зни./ Ея́же ны́не сподо́бився,/ во све́те неизрече́нныя ра́дости Пресвяте́й Тро́ице со святы́ми предстоя́,/ моли́, мо́лимтися, припа́дающе, ча́да твоя́,/ сохрани́тися нам от вся́каго наве́та и злых обстоя́ний/ ви́димых и неви́димых враг/ и спасти́ся душа́м на́шим.

Ин кондак, глас 3

Терпя́, потерпе́л еси́ суе́тныя обы́чаи/ и мирски́я нра́вы бра́тий твои́х,/ обре́л еси́ пусты́нное безмо́лвие, преподо́бне о́тче,/ иде́же посто́м, бде́нием и непреста́нною моли́твою в труде́х подвиза́вся,/ уче́ньми твои́ми пра́выя стези́ указа́л еси́ нам/ ше́ствовати ко Го́споду./ Те́мже и почита́ем тя, всеблаже́нне Ни́ле.

Величание

Ублажа́ем тя,/ преподо́бне о́тче Ни́ле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее Жировицкая, глас 2

По́мощи от Тебе́ тре́бующия не пре́зри, Влады́чице,/ и милосе́рдия бе́здну отве́рзи всем/ притека́ющим к цельбоно́сней ико́не Твое́й./ Печа́ли на́ша жите́йския утоли́, Всеще́драя,/ и от юдо́ли* сея́ плаче́вныя/ к ра́дости ве́чней ве́рныя Твоя́ преста́ви./ Тебе́ бо вси стяжа́хом наде́жду и утвержде́ние,/ ми́лости исто́чник, покро́в и спасе́ние душ на́ших.

Ин тропарь, глас 5

Пред свято́ю Твое́ю ико́ною, Влады́чице,/ моля́щийся исцеле́ний сподобля́ются,/ ве́ры и́стинныя позна́ние прие́млют/ и ага́рянская наше́ствия отража́ют./Те́мже и нам, к Тебе́ припа́дающим,/ грехо́в оставле́ния испроси́,/ по́мыслами благоче́стия сердца́ на́ша просвети́/ и к Сы́ну Твоему́ моли́тву вознеси́/ о спасе́нии душ на́ших.

Кондак, глас 4

Вели́чия Твоя́ кто испове́сть,/ Пресвята́я Де́во,/ Творца́ всех Христа́ Бо́га Ро́ждшая?/ Еди́на бо еси́ Ма́ти и Де́ва,/ Преблагослове́нная и Препросла́вленная,/ упова́ние на́ше, исто́чник благосты́ни,/ ве́рным прибе́жище и ми́ру спасе́ние.

Величание

Велича́ем Тя,/ Пресвята́я Де́во,/ и почита́ем честну́ю ико́ну Твою,/ ю́же от лет дре́вних/ во оби́тели Жиро́вицкой просла́вила еси́.

Тропарь Божией Матери ради иконы Ее Любечская, глас 4

Преблагослове́нная Цари́це,/ Пречи́стая Де́во Богоро́дице,/ просла́вльшая град Лю́беч/ уго́дника Твоего́ преподо́бнаго Анто́ния Пече́рскаго рожде́нием/ и чудотво́рныя ико́ны Твоея́ явле́нием!/ Мо́лим Тя, Всеблага́я,/ моли́ за ны ро́ждшагося от Тебе́ Царя́/ Христа́ Бо́га на́шего,/ и Ма́терним Твои́м к Нему́ предста́тельством/ изба́ви нас от вся́каго зла,/ неду́ги на́ша исцели́, печа́ли на́ша утоли́/ и насле́дники яви́ нас Ца́рствия Небе́снаго,/ я́ко Милосе́рдна.

Кондак, глас 8

Притеце́м, ве́рнии, к многоцеле́бному о́бразу Засту́пницы на́шея, Богоро́дицы Мари́и,/ и, припа́дающе к нему́ с любо́вию, си́це рцем:/ о Всепе́тая Ма́ти, о Цари́це Всеми́лостивая,/ при́зри свы́ше благосе́рдием Твои́м на ны, недосто́йныя,/ и моли́твами уго́дника Твоего́, преподо́бнаго Анто́ния Пече́рскаго,/ яви́ нам Твоя́ ми́лости и щедро́ты:/ в боле́знех исцеле́ние, в ско́рбех утеше́ние,/ в беда́х ско́рую по́мощь нам да́руй,/ и вся ны спаси́, на Тя упова́ющия, да зове́м Ти:/ ра́дуйся, Де́во, христиа́н заступле́ние.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь преподобному Нилу Мироточивому, Афонскому, глас 1

Мона́шествовав богоуго́дно в Горе́ Афо́нстей,/ в моли́твах и посте́х Бо́га взыска́л еси́/ и стал еси́ прия́телище чи́стое Ду́ха,/ облистава́я ве́рным доброде́телей лучи́,/ и́миже осиява́еши, Ни́ле, вопию́щих тебе́:/ сла́ва просла́вльшему тя Бо́гу,/ сла́ва Венча́вшему тя,/ сла́ва Де́йствующему тобо́ю всем исцеления.

Кондак, глас 3

Е́же от земли́ явле́ние/ свяще́нных моще́й твои́х, Ни́ле,/ совозсия́ сия́нию Креста́,/ того́ бо вожделе́л еси́ те́пле от младе́нства,/ ко́сти твоя́, сораспя́вшияся Христо́ви,/ воскре́сшему я́ко Преве́чному Бо́гу,/ Того́ прия́ша благода́ть.

Величание

Ублажа́ем тя,/ преподо́бне о́тче Ни́ле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов

Тропарь апостолу и евангелисту Иоанну Богослову, глас 2

Апо́столе Христу́ Бо́гу возлю́бленне,/ ускори́ изба́вити лю́ди безотве́тны*,/ прие́млет тя припа́дающа,/ И́же па́дша на пе́рси прие́мый,/ Его́же моли́, Богосло́ве,/ и належа́щий о́блак язы́ков разгна́ти,/ прося́ нам ми́ра и ве́лия ми́лости.

Кондак, глас 2

Вели́чия твоя́, де́вственниче, кто́ пове́сть?/ То́чиши бо чудеса́ и излива́вши исцеле́ния,/ и мо́лишися о душа́х на́ших,/ я́ко Богосло́в и друг Христо́в.

Величание

Велича́ем тя,/ апо́столе Христо́в и евангели́сте Иоа́нне Богосло́ве,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Тропарь преподобному Арсению Великому, глас 8

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Арсе́ние о́тче наш,/ моли́ Христа́ Бо́га спасти́ся душа́м на́шим.

Кондак, глас 3

От Ри́ма возсия́л еси́, я́коже со́лнце вели́кое,/ и к Ца́рскому гра́ду дости́гл еси́, преблаже́нне,/ словесы́ твои́ми просвеща́я сего́ и де́лы,/ вся́ку неразу́мия мглу отгоня́;/ сего́ ра́ди тя почита́ем,/ отце́в сла́во, Арсе́ние преподо́бне.

Величание

Ублажа́ем тя,/ преподо́бне о́тче Арсе́ние,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Арсению трудолюбивому, Печерскому, в Дальних пещерах почивающему, глас 8

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Арсе́ние о́тче наш,/ моли́ Христа́ Бо́га спасти́ся душа́м на́шим.

Кондак, глас тойже

Яко на земли́ оста́вль, Христо́вым стопа́м после́довал еси́ те́пле/ и, Того́, сла́вне, на ра́мо взем честны́й крест,/ умертви́л еси́ труды́ по́стническими теле́сныя жела́ния, преблаже́нне./ Те́мже зове́м ти: ра́дуйся, о́тче Арсе́ние.

Величание

Ублажа́ем тя,/ преподо́бне о́тче Арсе́ние,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Пимену постнику, Печерскому, в Дальних пещерах почивающему, глас 8

В тебе́, о́тче, изве́стно спасе́ся, е́же по о́бразу,/ прии́м бо крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со а́нгелы сра́дуется, преподо́бне Пи́мене, дух твой.

Кондак, глас тойже

Пи́мене преподо́бне,/ по́стником единонра́вне,/ послуша́ния о́бразе и трудолю́бия пра́вило,/ во бде́нии и моли́твах неусы́пне,/ не преста́й моля́ся о нас ко Го́споду.

Величание

Ублажа́ем тя,/ преподо́бне о́тче Пи́мене,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Арсению Новгородскому, Христа ради юродивому, глас 1

Боже́ственною любо́вию разгоре́вся,/ вся мирска́я пристра́стия отри́нул еси́,/ крест же Христо́в на ра́мо взем,/ во след Его́ изво́лил еси́ ходи́ти,/ оте́чество твое́ оста́вив,/ Вели́каго Нова́града дости́гл еси́/ и, рабо́тая Бо́гови невозвра́тным по́мыслом,/ дарова́ния чудотворе́ний сподо́бился еси́./ Те́мже, чту́ще тя, преподо́бне Арсе́ние, вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Ин тропарь, глас 4

Оте́чество свое́ и род оста́вил еси́,/ Христу́ прилепи́ся/ и Вели́каго Нова́града дости́гл еси́,/ и в нем во юро́дстве трудолю́бное твое́ те́ло изнури́л еси́/ мно́гим посто́м и воздержа́нием,/ и проро́чествия дар прия́ти сподо́бися,/ и многошве́нныя* ри́зы изво́лил на себе́ носи́ти,/ и те́ло в нем предложи́в,/ оби́тель себе́ в преми́рнем Ца́рствии у Христа́, всех Бо́га, сотвори́л еси́./ Его́же моли́, свя́те Арсе́ние преподо́бне,/ Це́ркве в стране́ на́шей в ми́ре пребыва́ти от всех наве́т вра́жиих,/ ущедри́ти нас, почита́ющих твое́ торжество́,/ и спасти́ ду́ши на́ша.

Кондак, глас тойже

Тяжелоно́сныя во́лны тиме́ния отгна́,/ и вся плотска́я двиза́ния/ и, по́хоти паля́щия нивочто́же вмени́в,/ взем крест и по́йде вслед Христа́,/ И́мже наставля́емь, лука́выя се́ти до конца́ раздра́/ и под нога́ми предложи́,/ мо́лимтися, преподо́бне о́тче Арсе́ние,/ изба́ви нас от належа́щих на ны собла́зн,/ ты бо еси́ Вели́кому Новугра́ду похвала́ и утвержде́ние и су́щим в печа́лех ра́дость.

Величание

Ублажа́ем тя,/ преподо́бне о́тче Арсе́ние,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Кассиану, послушнику и постнику, Печерскому, в Дальних пещерах почивающему, глас 8

В тебе́, о́тче Кассиа́не, изве́стно спасе́ся е́же по о́бразу,/ восприе́м бо крест и после́довав Христо́ви,/ твори́л еси́ за́поведи Его́ тща́тельне./ Те́мже ны́не со а́нгелы ра́дуется, преподо́бне, дух твой.

Кондак, глас 2

Пред все́ми смиря́лся/ и во всем послуша́ние припряже́нное посту́, блаже́нне Кассиа́не, име́я,/ покори́л еси́ го́рдых бесо́в испове́дати,/ коль вельми́ боя́тся преподо́бных Пече́рских,/ и́хже идо конца́ посрами́в,/ всели́ся в ли́це¹⁴ преподо́бных,/ с ни́миже моли́ся о всех нас.

Величание

Ублажа́ем тя,/ преподо́бне о́тче Кассиа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь пророку Исаии, глас 2

Проро́ка Твоего́ Иса́ии па́мять, Го́споди, пра́зднующе,/ тем Тя мо́лим: спаси́ ду́ши на́ша.

Кондак, глас тойже

Проро́чества дарова́ние прие́м, пророкому́чениче Иса́ие, Богопропове́дниче,/ всем изъясни́л еси́ вочелове́чение Госпо́дне,/ возгласи́в велегла́сно конца́м: се Де́ва во чре́ве прии́мет.

Величание

Велича́ем тя,/ проро́че Бо́жий Иса́ие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь мученику Христофору, глас 4

Оде́ждами от крове́й украша́лся,/ Го́сподеви предстои́ши Царю́ сил, Христофо́ре приснопа́мятне,/ отону́дуже со безпло́тными и му́ченики пое́ши/ трисвяты́м и стра́шным сладкопе́нием./ Те́мже моли́твами твои́ми спаса́й ста́до твое́.

Кондак, глас 2

Свы́ше, прему́дре, зва́ние прия́л еси́,/ Христу́ тезоимени́т быв, Христофо́ре сла́вне,/ му́чеником Боже́ственная добро́то./ С ни́миже всегда́ моли́/ согреше́ний разреше́ние дарова́ти нам.

Величание

Велича́ем тя,/ страстоте́рпче святы́й Христофо́ре,/ и чтим честна́я страда́ния твоя́,/ я́же за Христа́/ претерпе́л еси́.

Тропарь святителю и чудотворцу Николаю, архиепископу Мирликийскому, глас 4

Приспе́ день све́тлаго торжества́,/ град Ба́рский ра́дуется,/ и с ним вселе́нная вся ликовству́ет/ пе́сньми и пе́ньми духо́вными,/ днесь бо свяще́нное торжество́,/ в пренесе́ние честны́х и многоцеле́бных моще́й/ святи́теля и чудотво́рца Никола́я,/ я́коже со́лнце незаходи́мое возсия́ светоза́рными луча́ми,/ разгоня́я тьму искуше́ний же и бед/ от вопию́щих ве́рно:/ спаса́й нас, я́ко предста́тель наш, вели́кий Нико́лае.

Ин тропарь, глас тойже

Оте́чество свое́, Ми́ры Лики́йския, не оста́вль ду́хом,/ во преми́рный град Ба́рский пресла́вно те́лом пренесе́ся, архиере́ю Нико́лае./ И отту́ду мно́жество челове́ческое свои́м прише́ствием возвесели́л еси́/ и боля́щия исцели́л еси́./ Те́мже тя мо́лим, святи́телю Нико́лае,/ моли́ Христа́ Бо́га, да спасе́т ду́ши на́ша.

Кондак, глас 3

Взы́де, я́ко звезда́, от восто́ка до за́пада/ твоя́ мо́щи, святи́телю Нико́лае,/ мо́ре же освяти́ся ше́ствием твои́м,/ и град Ба́рский прие́млет тобо́ю благода́ть,/ нас бо де́ля* яви́лся еси́ чудотво́рец изя́щный,/ преди́вный и ми́лостивый.

Величание

Велича́ем тя,/ святи́телю о́тче Нико́лае,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Шио (Симеону) Мгвимскому, Иверскому, глас 8

В тебе́, о́тче, изве́стно спасе́ся, е́же по о́бразу,/ прии́м бо крест, после́довал еси́ Христу́/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со а́нгелы сра́дуется, преподо́бне Ши́о, дух твой.

Кондак, глас 4

Житие́ твое́ служе́нием Госпо́дним испра́вил еси́/ и, взем крест, оста́вил еси́ вся жите́йская,/ красоте́ пусты́ни, преподо́бне Ши́о./ Кого́ у́бо па́че тя, и по сме́рти жива́ су́ща,/ страна́ И́верская почита́ет/ и мощми́ твои́ми, от гро́ба явле́нными, услажда́ется?/ Те́мже не преста́й моля́ся о нас ко Го́споду.

Величание

Ублажа́ем тя,/ преподо́бне о́тче Ши́о,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь мученику младенцу Гавриилу Белостокскому, глас 5

Святы́й младе́нче Гаврии́ле,/ ты за Прободе́ннаго нас ра́ди от иуде́й/ лю́те от оне́хже в ре́бра прободе́н был еси́/ и за Источи́вшаго кровь Свою́ за нас/ все те́ло твое́ на истоще́ние кро́ве/ в лю́тыя я́звы преда́л еси́,/ ны́не же во сла́ве ве́чней с Ним всели́лся еси́./ Тем помяни́ и нас, мо́лим, зде чту́щих па́мять твою́,/ прося́ нам здра́вие телеси́/ и спасе́ние душа́м на́шим.

Кондак, глас 6

Оте́чество твое́ Зверки́ бысть,/ му́чениче Христо́в Гаврии́ле,/ иде́же от и́стых звере́й-иуде́ев восхище́н:/ а́бие роди́телей лише́н еси́,/ та́же вся поря́ду лю́те претерпе́в,/ в оте́чество Небе́сное пресели́лся еси́./ Восхища́й и нас зде от вся́ких напа́стей и скорбе́й/ и умоли́, мо́лим тя,/ улучи́ти ве́чное насле́дие твое́.

Величание

Велича́ем тя,/ страстоте́рпче святы́й младе́нче Гаврии́ле,/ и чтим честна́я страда́ния твоя́,/ я́же за Христа́/ претерпе́л еси́.

Тропарь святителю Николаю, архиепископу Мирликийскому, ради чудотворного его образа «Зарайского», глас 4

Пресве́тлый хра́ме Свята́го Ду́ха,/ Богому́дре о́тче Нико́лае,/ благода́тию Небе́с освяти́ ду́ши на́ша,/ заступи́ и покры́й всечестны́м твои́м омофо́ром,/ его́же прия́л еси́ от рук Пречи́стыя Де́вы,/ и просвети́ нас све́том за́поведей Христа́,/ от Него́ бо прия́л еси́ глаго́лы жи́зни./ Моли́ бла́гость Отца́ Небе́снаго,/ во е́же спасти́ся/ правосла́вно чту́щим тя,/ да́руя нам ве́лию ми́лость.

Кондак, глас 6

Ди́внаго в чудесе́х чудотво́рца/ воспое́м, вси лю́дие,/ пра́зднующе но́ваго исто́чника щедро́т явле́ние,/ издале́че к нам прите́кшаго,/ вели́каго святи́теля хоте́нием:/ припа́дающе к нему́ ве́рою,/ напоя́ем жа́ждущия ду́ши своя́,/ любо́вию зову́ще,/ о пресла́вный Нико́лае,/ па́стырю наш до́брый,/ помози́ нам, немощны́м и убо́гим,/ в житии́ сем многотру́дном/ и ве́чныя жи́зни насле́дники нас сотвори́.

Величание

Велича́ем тя,/ святи́телю о́тче Нико́лае,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь апостолу Симону Зилоту, глас 3

Апо́столе святы́й Си́моне,/ моли́ ми́лостиваго Бо́га,/да прегреше́ний оставле́ние/ пода́ст душа́м на́шим.

Кондак, глас 2

Изве́стно прему́дрости уче́ния в душа́х благоче́ствующих поло́жшаго,/ во хвале́нии ублажи́м, я́ко богоглаго́ливаго вси Си́мона:/ престо́лу бо Сла́вы ны́не предстои́т и со безпло́тными весели́тся,/ моля́ся непреста́нно о всех нас.

Величание

Велича́ем тя,/ апо́столе Христо́в Си́моне,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Тропарь святителю Симону, епископу Владимирскому и Суздальскому, в Киеве, в Ближних пещерах почивающему, глас 1

Жити́й преподо́бных оте́ц Пече́рских списа́телю изве́стный,/ святи́телю Христо́в Си́моне преблаже́нне,/ моли́ся приле́жно с ни́ми Христу́ Бо́гу,/ да упра́вит в ми́ре живот наш,/ и в кни́ги живо́тныя да напи́шет ны,/ спаса́я ду́ши на́ша.

Кондак, глас 2

Святи́тельства оде́ждою,/ а́ще и досто́йне одея́лся еси́,/ оба́че тем не вознося́ся,/ жела́л еси́ па́че сме́таем* пред враты Ла́вры Пече́рския поврещи́ся*,/ смиренному́дре Си́моне./ Те́мже, не а́ки сме́тие, врат вне,/ но я́ко сокро́вище, внутрь святы́я пеще́ры поло́жен бы́ти сподо́бился еси́,/ и ны́не на Небеси́ Го́сподеви предстоя́,/ моли́ся о нас, чту́щих тя.

Величание

Велича́ем тя,/ святи́телю о́тче Си́моне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Симону Радонежскому, глас 5

Ра́дуйся, пусты́не Ра́донежская,/ израсти́вшая крин духо́вный,/ в вертогра́де преподо́бнаго Се́ргия:/ Си́мона, архимандри́та Смоле́нскаго,/ позна́вшаго све́тлость послуша́ния/ и ди́внаго птиц виде́ния сподо́бившагося,/ сего́ воспомина́юще, Бо́га прославля́ем.

Кондак, глас 2

Возлюби́в, преподо́бне, Боже́ственныя за́поведи,/ чистото́ю душе́вною вооружи́вся,/ непреста́нною моли́твою и трудо́м в пусты́ни Се́ргиевой подвиза́лся еси́,/ Христа́, Сладча́йшаго Иису́са, дости́гл еси́,/ Его́же моли́ непреста́нно о всех нас.

Величание

Ублажа́ем тя,/ преподо́бне о́тче Си́моне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь праведному Василию, мученику и страстотерпцу, Мангазейскому чудотворцу, глас 8

От гра́да Яросла́вля Бо́жиим смотре́нием/ в страну́ Сиби́рскую прише́дшаго/ и за целому́дрие от господи́на своего́/ в Мангазе́и пострада́вшаго,/ блаже́ннаго Васи́лия почти́м,/ его́же Христо́с Бог му́ченическим венце́м венча́ на Небеси́,/ нетле́нием и чудесы́ просла́ви на земли́./ Ты же, честны́й страда́льче,/ предста́тельством свои́м страну́ на́шу в ми́ре сохрани́/ и моли́ся о спасе́нии душ на́ших.

Ин тропарь, глас тойже

Ако пресве́тлое со́лнце,/ возсия́л еси́ чудесы́ свои́ми в Сиби́рстей стране́,/ в Мангазе́йских преде́лах,/ но́вый му́чениче, непови́нный страда́льче, свя́те Васи́лие!/ За чистоту́ душе́вную и теле́сную пострада́л еси́ от лю́таго врага́/ распале́нием и немилосе́рдием господи́на своего́/ и от нача́льствующаго бо ту градска́го непра́веднаго судии́,/ и му́ки непови́нно претерпе́л еси́,/ и кровь свою́ святу́ю пролия́л еси́,/ жела́я ве́чнаго Ца́рствия Небе́снаго./ Сего́ ра́ди Христо́с Бог венча́ тя му́ченическими венцы́ на Небеси́,/ и на земли́ просла́ви,/ и Свои́м Бо́жиим про́мыслом повеле́ земли́ само́й от недр свои́х/ гроб, и те́ло твое́, и срачи́цу*, обагре́нную кро́вию твоею́, израсти́ нетле́нно./ И ны́не притека́ющим к тебе́ с ве́рою и везде́ призыва́ющим свято́е и́мя твое́/ поле́зная вся, и грехо́в оставле́ние, и телесе́м здра́вие подава́й,/ чту́щим ве́рою святу́ю па́мять твою́,/ и моли́ Христа́ Бо́га спасти́ся душа́м на́шим.

Ин тропарь, глас тойже

Бога́тство ви́дев чи́стыя души́ твоея́, Васи́лие,/ укра́сти тща́шеся пра́ведных враг,/ подусти́* господи́на твоего́,/ и́же покра́деннаго ра́ди бога́тства своего́ преда́в тя судии́,/ и от того́ непови́нне мно́гия претерпе́л еси́ му́ки,/ непобеди́м пребы́в до сме́рти./ Тем, я́ко прие́мый вене́ц страда́ния от всех Влады́ки,/ моли́ всем от напа́стей свобо́дным бы́ти,/ чту́щим любо́вию святу́ю па́мять твою́.

Кондак, глас 4

Просвети́вся Боже́ственною благода́тию, Боголю́бче,/ целому́дрием и терпе́нием тече́ние свое́ му́ченически сконча́л еси́,/ те́мже и по сме́рти яви́ тя све́тлость жития́ твоего́,/ источа́вши бо чудесы́,/ с ве́рою приходя́щим к честно́му гро́бу твоему́ и вопию́щим:/ ра́дуйся, святы́й Васи́лие,/ Мангазе́йский и всея́ Сиби́ри чудотво́рче.

Ин кондак, глас тойже

И́же но́вый в му́ченицех непови́нный страда́льче,/ свя́те Васи́лие, преревнова́л еси́ Ио́сифу Прекра́сному и Моисе́ю У́грину во искуше́ниих,/ за чистоту́ душе́вную и теле́сную/ му́ки непови́нно претерпе́л еси́./ Сих ра́ди просла́ви тя Бог,/ и святы́я твоя́ мо́щи, по явле́нию твоему́,/ от Мангазе́и к Енисе́ю во оби́тель Святы́я Тро́ицы/ ту су́щим настоя́телем принесо́шася/ и подаю́т исцеле́ния с ве́рою приходя́щим/ и везде́ призыва́ющим свято́е и́мя твое́./ Страстоте́рпче святы́й,/ моли́ Христа́ Бо́га/ о правосла́вном наро́де на́шем/ и о всех во́ех на́ших,/ побе́ду и одоле́ние нам на всех/ непросвеще́нных иноязы́чных лю́дех дарова́ти, спобо́рствуя,/ и от междоусо́бныя бра́ни спасти́ся всем моли́.

Величание

Велича́ем тя,/ святы́й пра́ведный Васи́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь блаженному Симону, Христа ради юродивому, Юрьевецкому, глас 8

Я́ко вои́стинну гла́са апо́стольскаго/ послу́шатель был еси́, блаже́нне Си́моне,/ Христа́ бо ра́ди изво́лив име́ти бу́йство,/ в не́мже соблю́л еси́ твоя́ к Бо́гу доброде́тели, посреде́ мо́лв некра́домы,/ терпе́нием у́бо пачеесте́ственным Христа́ подража́в/ посрами́л еси́ льсти́ваго всю горды́ню,/ тем и в лю́тых ра́нах,/ я́коже дре́вний Ла́зарь, в не́дра Авраа́мля пресели́лся еси́,/ иде́же и ны́не утеша́лся, посеща́й град твой,/ почита́ющий любо́вию святу́ю па́мять твою́.

Кондак, глас 4

Возгоре́вся раче́нием Го́рним,/ же́стость* во́льнаго юро́дства па́че всех сла́дких ми́ра предпоче́л еси́,/ отону́дуже повину́ся ти огнь,/ от его́же запале́ния град твой Ю́рьевец изба́вил еси́,/ и во́ды немо́кренно, я́ко по су́ху, преше́л еси́,/ и хотя́щия бы́ти предре́кл еси́,/ просла́вльшаму тя та́ко Бо́гу,/ к Нему́же моля́ся и о нас,/ пою́щих тя, блаже́нне Си́моне, помина́й.

Величание

Ублажа́ем тя,/ святы́й пра́ведный Си́моне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь священномученику Мокию, глас 4

И нра́вом прича́стник,/ и престо́лом наме́стник... (общий священномученику).

Кондак, глас 8

Вооружи́вся щито́м ве́ры,/ нечести́вых ополче́ния стерл еси́, священному́чениче,/ и вене́ц от Христа́ взял еси́, Моки́е./ Тем и со а́нгелы ра́дуяся, спаса́й от бед пою́щия тя,/ моля́ непреста́нно о всех нас.

Величание

Велича́ем тя,/ священному́чениче Моки́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь равноапостольным Мефодию и Кириллу, учителям Словенским, глас 4

Я́ко апо́столом единонра́внии/ и слове́нских стран учи́телие,/ Кири́лле и Мефо́дие богому́дрии,/ Влады́ку всех моли́те, вся язы́ки слове́нския утверди́ти в Правосла́вии и единомы́слии,/ умири́ти мир и спасти́ ду́ши на́ша.

Кондак, глас 3

Свяще́нную дво́ицу просвети́телей на́ших почти́м,/ Боже́ственных писа́ний преложе́нием* исто́чник богопозна́ния нам источи́вших,/ из него́же да́же до днесь неоску́дно почерпа́юще,/ ублажа́ем вас, Кири́лле и Мефо́дие,/ престо́лу Вы́шняго предстоя́щих/ и те́пле моля́щихся о душа́х на́ших.

Величание

Велича́ем вас,/ святи́и равноапо́стольнии Мефо́дие и Кири́лле,/ вся слове́нския страны́ уче́ньми свои́ми просвети́вшия/ и ко Христу́ приве́дшия.

На молебне тропарь тот же.

На молебне кондак святому Кириллу, глас 2

Тве́рдаго Богодохнове́ннаго уче́ния/ просвеща́я мир пресве́тлыми заря́ми,/ обтече́, я́ко мо́лния, вселе́нную, Кири́лле свя́те,/ разсева́я Бо́жие сло́во на за́паде, и се́вере, и ю́зе,/ мир просвеща́я уче́нием, свя́те.

Ин кондак, глас тойже

Пресве́тло житие́ возлюби́, свя́те,/ заря́ми трисо́лнечными Божества́ освеща́емь,/ прии́де, я́ко мо́лния, во всю вселе́нную,/ се́верную и ю́жную зе́мли просвеща́я,/ за́падным же свет незаходи́м яви́ся./ Те́мже и ны́не мрак грехо́вный прогна́в, свя́те,/ свы́ше испроси́ благода́ть духо́вную,/ и́маши бо дерзнове́ние к Бо́гу.

Тропарь священномученику Иосифу, первому митрополиту Астраханскому, глас 6

По́двигом до́брым подвиза́вся,/ жизнь твою́ страда́ниями за пра́вду увенча́в,/ пресели́лся еси́ в Небе́сныя оби́тели,/ иде́же предстоя́ престо́лу Святы́я Тро́ицы,/ моли́, святи́телю Ио́сифе,/ гра́ду Астрахани и Оте́честву на́шему в ми́ре спасти́ся.

Кондак, глас 2

Я́ко звезда́ пресве́тлая/ возсия́л еси́, святи́телю Ио́сифе, во Астрахани,/ иде́же роди́лся и воспита́лся еси́/ и за ве́рность Бо́гу му́ченическую смерть прия́л еси́./ Мы же, чту́ще страда́ния твоя́, зове́м ти:/ святи́телю Ио́сифе, от мяте́жников убие́нный,/ моли́ Христа́ Бо́га о душа́х на́ших.

Величание

Велича́ем тя,/ святи́телю о́тче Ио́сифе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Софронию, затворнику Печерскому, в Дальних пещерах почивающему, глас 1

Простра́нна пути́, веду́щия в па́губу,/ блаже́нне Софро́ние, угонза́я*,/ затвори́лся еси́ в те́мне ме́сте пеще́рнем,/ иде́же день и нощь в моли́твах, и слеза́х,/ и в ручно́м де́ле подвиза́яся,/ обре́л еси́ ве́чный живо́т и наслажде́ние.

Кондак, глас 4

Яви́лся еси́ дре́вним отца́м ревни́тель,/ в те́мней пеще́ре све́тлым житие́м я́сно просия́в,/ и озари́л еси́ сердца́, пою́щих тя, богому́дре о́тче Софро́ние.

Величание

Ублажа́ем тя,/ преподо́бне о́тче Софро́ние,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Никодиму, архиепископу Сербскому, глас 4

Пра́вило ве́ры и о́браз кро́тости... (общий святителю).

Кондак, глас тойже

Возше́дый на высоту́ доброде́телей,/ и́миже Бо́гу прибли́жився,/ о нас моли́, преосвяще́нне,/ любо́вию тя сла́вящих,/ я́ко па́стыря и учи́теля.

Величание

Велича́ем тя,/ святи́телю о́тче Никоди́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителям Епифанию и Герману, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви живо́т наш.

Кондак, глас тойже

Священнонача́льник чу́дную дво́ицу восхва́лим, ве́рнии, по до́лгу,/ с Ге́рманом боже́ственнаго Епифа́ния,/ си́и бо попали́ша безбо́жных язы́ки,/ догма́ты прему́дрейшия возло́жше всем,/ правосла́вно пою́щим при́сно благоче́стия вели́кое та́инство.

Величание

Велича́ем вас,/ святи́телие вели́ции Епифа́ние и Ге́рмане,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь священномученику Ермогену, патриарху Московскому и всея России, глас 4

Приспе́ день све́тлаго торжества́,/ град Москва́ ра́дуется,/ и с ним Русь Правосла́вная ликовству́ет/ пе́сньми и пе́ньми духо́вными,/ днесь бо свяще́нное торжество́/ в явле́нии честны́х и многоцеле́бных моще́й/ святи́теля и чудотво́рца Ермоге́на,/ я́коже со́лнце незаходи́мое, возсия́ светоза́рными луча́ми,/ разгоня́я тьму искуше́ний же и бед/ от вопию́щих ве́рно:/ спаса́й нас, я́ко предста́тель наш, вели́кий Ермоге́не.

Кондак, глас 6

Темни́цею и гла́дом изнуря́емь,/ да́же до сме́рти ве́рен пребы́л еси́,/ блаже́нне Ермоге́не,/ малоду́шие от серде́ц люде́й твои́х изгоня́я/ и на о́бщий по́двиг вся призыва́я./ Те́мже и нечести́вых мяте́ж низложи́л еси́ и держа́ву на́шу утверди́л еси́,/ да вси зове́м ти:/ радуйся, засту́пниче Росси́йския земли́.

Величание

Велича́ем тя,/ священному́чениче Ермоге́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Дионисию, архимандриту Троице-Сергиева монастыря, Радонежскому чудотворцу, глас 3

Земна́я, прельща́ющая очеса́ миролю́бцев,/ возненави́дел еси́, о́тче Богоно́сне Диони́сие,/ за уме́ты* та вмени́в,/ ше́ствуя путе́м ско́рбным,/ и в терпе́нии добр во́ин Христо́в яви́лся еси́,/ победи́в стра́сти ми́ра,/ был еси́ до кончи́ны непоколеби́мый благоче́стия побо́рник./ Те́мже мы днесь, соверша́я свяще́нную па́мять твою́,/ духо́вными тя пе́сньми ублажа́ем и смире́нно мо́лим,/да, предстоя́ престо́лу Го́спода Бо́га,/ ходата́йствуеши о спасе́нии душ на́ших.

Ин тропарь, глас 4

Бла́гости научи́вся от Вы́шняго благода́ти,/ измла́да подвиза́вся благо́ю со́вестию,/ Диони́сие преподо́бне,/ терпе́ния столп был еси́/ и сло́ва Бо́жия пропове́дник,/ благоче́стия догма́ты утверди́в и суеу́мных мудрова́ние упраздни́в,/ те́мже и пострада́л еси́ за и́стину, ра́дуяся,/ о́браз страда́льцев собо́ю показа́в,/ но, я́ко име́я дерзнове́ние ко Христу́ Бо́гу,/ не преста́й моля́ся о нас,/ любо́вию чту́щих святу́ю па́мять твою́.

Кондак, глас 6

Свет Трисия́нный, всели́выйся в ду́шу твою́,/ сосу́д избра́н показа́ тя,/ веща́юща Боже́ственная лю́дем,/ испове́дник Бо́жия Сло́ва яви́лся еси́,/ и прилага́ющих Божеству́ веще́ственный огнь/ я́вственно обличи́л еси́,/ и злосло́вных смы́слы, я́ко паучи́ное пряде́ние, растерза́л еси́,/ благоче́стия столп и забра́ло тве́рдое ми́рови показа́лся еси́/ и сего́ ра́ди от Вселе́нскаго Патриа́рха ди́вне похва́лен был еси́./ Мы же благода́рными гла́сы, веселя́щеся, вопие́м ти:/ ра́дуйся, о́тче наш, Диони́сие преподо́бне.

Ин кондак, глас 4

Пра́вило ве́ры, столп благоче́стия/ был еси́, Богоно́сне Диони́сие,/ яви́в в себе о́браз и приме́р/ преуспея́ния доброде́тели и по́двигов,/ се́ю Ева́нгельскою мре́жею*/ мно́гих улови́л еси́ подража́телей,/ подая́ блестя́щею на Небеси́ сла́вою свое́ю/ ре́вность к соде́йствованию на по́льзу правове́рных./ Те́мже, ны́не воспева́юще сия́, мо́лим тя,/ да хода́тайствуеши о стране́ на́шей/ и о всем Це́ркви исполне́нии.

Величание

Ублажа́ем тя,/ преподо́бне о́тче Диони́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь мученице Гликерии деве, глас 4

А́гница Твоя́, Иису́се... (общий мученице).

Кондак, глас 3

Де́ву лю́бящи и Богоро́дицу Мари́ю,/ соблюла́ еси́ нетле́нно твое́ де́вство,/ любо́вию же ко Го́споду усе́рдствовавши,/ пострада́ла еси́ мужему́дренно да́же до сме́рти./ Сего́ ра́ди и сугу́бым тя, де́во му́ченице, венце́м венча́ет Христо́с Бог.

Величание

Велича́ем тя,/ страстоте́рпице Христо́ва Глике́рие,/ и чтим честно́е страда́ние твое́,/ е́же за Христа́/ претерпе́ла еси́.

Тропарь праведной Гликерии деве, Новгородской,глас 8

Вы́шния красоты́ жела́ющи,/ ни́жния сла́сти теле́сныя дале́че от себе́ отри́нула еси́,/ и нестяжа́ние па́че су́етнаго ми́ра возлюби́вши,/ а́нгельское житие́ провожда́ла еси́, Глике́рие, де́во блаже́нная,/ моли́ Христа́ Бо́га спасти́ся душа́м на́шим.

Кондак, глас 2

За Любо́вь Госпо́дню... (общий преподобной жене).

Величание

Велича́ем тя,/ свята́я пра́ведная де́во Глике́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобномученику Макарию, архимандриту Каневскому, Овручскому, игумену Пинскому, Переяславскому чудотворцу, глас 4

Христу́, нас ра́ди с Небе́с соше́дшему,/ после́довал еси́ в по́двизех твои́х,/ Мака́рие, о́тче наш,/ Его́же моли́ о нас, ублажа́ющих тя,/ проще́ние прегреше́ния дарова́ти нам,/ любо́вию же и смире́нием сердца́ на́ша озари́ти/ и спасти́ ду́ши на́ша.

Ин тропарь, глас тойже

Боже́ственным жела́нием весь сам себя́ от ю́наго во́зраста Го́сподеви возложи́в,/ яви́лся еси́ свети́льник све́тлый гра́ду твоему́,/ поуча́я всех и́стинней ве́ре и житию́ богоуго́дному,/ священному́чениче Мака́рие, О́вручская похвало́./ Сего́ ра́ди, я́ко а́гнец непоро́чный, гони́мый от распрелюби́вых враго́в,/ возше́л еси́ в оби́тель Кане́вскую,/ иде́же, я́ко па́стырь до́брый, ду́шу твою́ положи́л еси́ за о́вцы твоя́./ И ны́не ко всечестне́й ра́це многоцеле́бных моще́й твои́х, мы, гре́шнии, со умиле́нием притека́юще,/ дар исцеле́ния прие́млем, многострада́льне:/ ты бо при́сно источа́еши боля́щим здра́вие, печа́льным утеше́ние/ и всем, чту́щим тя, вся́кое исполня́еши тре́бование,/ моля́ся Христу́ Бо́гу спасти́ся душа́м на́шим.

Ин тропарь, глас 8

Ко всечестне́й ра́це многоцеле́бных моще́й твои́х, преподобному́чениче Мака́рие,/ мы, гре́шнии, притека́юще,/ дар исцеле́ния прие́млем,/ ты бо при́сно источа́еши боля́щим здра́вие,/ печа́льным утеше́ние/ и всем, чту́щим тя, вся́кое исполня́еши тре́бование, моля́щеся Христу́ Бо́гу спасти́ся душа́м на́шим.

Кондак, глас 4

Нетле́нною красото́ю смире́ннаго жития́ твоего́/ Бо́га на земли́ просла́вил еси́/ и Боже́ственныя ве́ры чистоту́/ сохраня́ти лю́ди научи́л еси́,/ страда́льческими же по́двиги кончи́ну прие́м,/ от Бо́га просла́влен яви́лся еси́,/ преподобному́чениче Мака́рие, о́тче наш.

Ин кондак, глас 2

По́стническое и равноа́нгельское житие́ твое́/ страда́льческими уясни́л еси́ по́двиги/ и а́нгелом совсе́льник, Богоблаже́нне, яви́лся еси́, Мака́рие,/ с ни́миже Христу́ Бо́гу моля́ся не преста́й о всех нас.

Величание

Ублажа́ем тя,/ преподобному́чениче Мака́рие,/ и чтим святу́ю па́мять твою,/ наста́вниче мона́хов/ и собесе́дниче а́нгелов.

Тропарь преподобным Амфилохию, Макарию, Тарасию и Феодосию, Глушицким чудотворцам, глас 8

Свети́льники све́тлыя я́вльшеся,/ добро́ту земну́ю му́дренно оста́вльше,/ и идо́ша во вну́треннюю пусты́ню, Амфило́хие, Мака́рие, Тара́сие и Феодо́сие,/ смире́ние и вся́кую доброде́тель извы́кше*,/ и обрето́ша безсме́ртие,/ посто́м и бде́нием и про́чим воздержа́нием себе́ принося́ще Христу́,/ и ны́не на Небесе́х престо́лу Христо́ву предстои́те./ Моли́те, отцы́ Богому́дрии, Амфило́хие, Мака́рие, Тара́сие и Феодо́сие,/ умири́ти мир и спасти́ся душа́м пою́щих вас/ и согреше́ний оставле́ние дарова́ти/ чту́щим всечестну́ю па́мять ва́шу.

Кондак, глас 2

Я́ко незаходи́мая свети́ла мы́сленнаго Со́лнца,/ просвети́сте вселе́нную/ и, ве́рных ду́ши и телеса́ луча́ми чуде́с ва́ших озаря́юще,/ незави́стно* подава́ете от неду́г исцеле́ние./ Те́мже, соше́дшеся, ве́рою вас в пе́снех восхваля́ем,/ я́ко на́ши прему́дрыя наста́вники и к Бо́гу хода́таи,/ и непреста́нно вопие́м:/ ра́дуйтеся, отцы́ Богому́дрии,/ Амфило́хие, Мака́рие, Тара́сие и Феодо́сие.

Величание

Ублажа́ем вас,/ преподо́бнии отцы́ Амфило́хие, Мака́рие, Тара́сие и Феодо́сие,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь мученику Исидору Хиосскому, глас 4

Му́ченик Твой, Го́споди... (общий мученику).

Кондак, глас тойже

Упра́витель превели́кий вселе́нней ты яви́лся еси́, свя́те,/ твои́ми к Бо́гу моли́твами,/ те́мже воспева́ем тя днесь,/ му́чениче Богому́дре,/ Иси́доре пресла́вне.

Величание

Велича́ем тя,/ страстоте́рпче святы́й Иси́доре,/ и чтим честна́я страда́ния твоя́,/ я́же за Христа́/ претерпе́л еси́.

Тропарь блаженному Исидору Твердислову, Христа ради юродивому, Ростовскому чудотворцу, глас 4

Просвети́вся Боже́ственною благода́тию, Богому́дре,/ целому́дрием мно́гим и терпе́нием/ во вре́менней жи́зни тече́ние до́бре сконча́л еси́,/ тем и по сме́рти яви́ тя све́тлость жития́ твоего́,/ источа́еши бо исцеле́ний благода́ть,/ и́же с ве́рою притека́ющим ко свято́му твоему́ гро́бу,/ Иси́доре блаже́нне./ Моли́ Христа́ Бо́га,/ да спасе́т ду́ши на́ша.

Ин тропарь, глас тойже

От земли́ Воззва́вый тя на ве́чныя оби́тели,/ соблюда́ет и по сме́рти те́ло твое́ невреди́мо,/ свя́те Иси́доре,/ ты бо в целому́дрии и чистоте́ жития́ пожи́л еси́, блаже́нне,/ не оскверни́в своего́ телесе́,/ те́мже со дерзнове́нием Христа́ Бо́га моли́/ спасти́ся душа́м на́шим.

Ин тропарь, глас 1

Боже́ственною свы́ше просвети́вся благода́тию, Богому́дре,/ мно́гим терпе́нием во вре́менней жи́зни тече́ние соверши́л еси́,/ те́мже и по успе́нии источа́еши чудеса́,/ и́же с ве́рою приходя́щим к ра́це моще́й твои́х, Иси́доре всеблаже́нне./ Сла́ва Да́вшему ти кре́пость,/ сла́ва Просла́вльшему тя в чудесе́х,/ сла́ва Де́йствующему тобо́ю всем исцеле́ния.

Кондак, глас 8

Взбра́нному и ди́вному в пра́ведницех,/ и́же у́бо от Христа́ дар чуде́с прии́мшему,/ похва́льная ны́не принесе́м глаго́лы,/ но я́ко име́я дерзнове́ние ко Святе́й Тро́ице,/ ю́же моли́ изба́витися от бед рабо́м твои́м, да зове́м ти:/ ра́дуйся, Богому́дре Иси́доре.

Ин кондак, глас 4

Ве́рою па́мять твою́, блаже́нне, соверша́ющия,/ соблюда́й от вся́кия зло́бы и собла́зна змии́на,/ и́маши бо дерзнове́ние ко всех Влады́це, Христу́ Богу,/ Его́же моли́ изба́витися от бед и напа́стей рабо́м твои́м,/ Богому́дре Иси́доре.

Величание

Ублажа́ем тя,/ святы́й пра́ведный Иси́доре,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Никите, затворнику Печерскому, епископу Новгородскому, глас 2

Небе́снаго простра́нства жела́я,/ от ю́ности в те́сне ме́сте затвори́лся еси́,/ в не́мже прельще́н быв от врага́,/ па́ки смире́нием и послуша́нием победи́л еси́ преле́стника кре́пце, Ники́то,/ и ны́не, предстоя́ Христо́ви,/ моли́ спасти́ся душа́м на́шим.

Кондак, глас 1

Победи́в вра́жия ле́сти до́бле/ и све́тло доброде́тельми просия́в,/ святи́тельства оде́ждею обле́клся еси́, пресла́вне Ники́то,/ в не́мже све́том жития́ твоего́ и чудесы́ сия́я па́че со́лнца,/ мно́гих просвети́в, приве́л еси́ Христо́ви,/ Его́же моли́ о нас, пою́щих тя.

Величание

Велича́ем тя,/ святи́телю о́тче Ники́то,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Пахомию Великому, глас 8

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней,/ сия́я чудесы́, Пахо́мие о́тче наш,/ моли́ Христа́ Бо́га спасти́ся душа́м на́шим.

Кондак, глас 2

Свети́льник све́тел показа́лся еси́ в конца́х,/ пусты́ню же гра́ды сотвори́л еси́ мно́жествы мона́шескими,/ сам себе́ распе́н, крест твой на ра́мо взем/ и воздержа́нием те́ло изнури́л еси́,/ моля́ непреста́нно о всех нас.

Величание

Ублажа́ем тя,/ преподо́бне о́тче Пахо́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Исаии, епископу Ростовскому, глас 8

Правосла́вия наста́вниче,/ благоче́стия учи́телю и чистоты́,/ Росто́ву пресве́тлый свети́льниче,/ святи́телем Богодухнове́нное удобре́ние,/ Иса́ие прему́дре,/ уче́нием бо твои́м вся Росси́йския концы́ просвети́л еси́ благода́тию духо́вною,/ святи́телю блаже́нне,/ моли́ Христа́ Бо́га, да спасе́т ду́ши на́ша.

Ин тропарь, глас 2

В и́ноцех святы́я Ла́вры Пече́рския/ благоиску́сен показа́выйся/ и во архиере́йстем са́не добр па́стырь/ своему́ ста́ду, боголюбе́зне Иса́ие, бы́вый,/ моли́ о нас Пастыренача́льника Христа́ Бо́га,/ да поми́лует и спасе́т ду́ши на́ша.

Кондак, глас 3

Я́ко гром возгреме́л еси́, боже́ственными твои́ми уче́нии в Росси́йстей земли́,/ и яви́лся еси́ свети́льник пресве́тел,/ осия́я све́том богоразу́мия, Иса́ие блаже́нне./ Те́мже вопие́м ти:/ Христа́ Бо́га моли́ непреста́нно о всех нас.

Ин кондак, глас 4

Своего́ епи́скопска са́на тезоимени́тство храня́,/ си́рых, вдови́ц и всех, зле стра́ждущих,/ сам собо́ю посеща́л еси́ любе́зне/ и ми́лостынею дово́льне тех ущедря́я, я́ко оте́ц,/ сподо́бился еси́ а́нгелы на освяще́ние це́ркви Пече́рския, святи́телю Иса́ие,/ принесе́н бы́ти чу́дне,/ с ни́миже моли́ся Го́сподеви о душа́х на́ших.

Величание

Велича́ем тя,/ святи́телю о́тче Иса́ие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь благоверному царевичу Димитрию, Московскому и Угличскому, глас 4

Ца́рскую диади́му обагри́л еси́ кро́вию твое́ю,/ Богому́дре му́чениче,/ за скиптр крест в руку́ прии́м,/ яви́лся еси́ победоно́сец,/ и же́ртву непоро́чну Влады́це прине́ся еси́ себе́,/ я́ко бо а́гнец незло́бив от раба́ заколе́н еси́,/ и ны́не ра́дуяся предстои́ши Святе́й Тро́ице./ Моли́ся о держа́ве сро́дников твои́х богоуго́дней бы́ти/ и сыново́м росси́йским спасти́ся.

Ин тропарь, глас 2

Я́ко благочести́ваго ко́рене Боголюби́вый произы́де плод,/ я́ко а́гня незло́биво, непови́нно во младе́нстве за́клан бысть/ от властолю́бца вку́пе и зла́го раба́./ Тем, я́ко златы́ми кры́лы,/ душе́вною чистото́ю и младе́нческим незло́бием/ к Небе́сней высоте́ возлете́л еси́, страстоте́рпче Дими́трие./ И ны́не кровь твоя́ от земли́ та́йно вопие́т к Бо́гу,/ я́ко Авеля пра́веднаго./ Сего́ ра́ди покланя́емся ве́рою ти,/ сла́вяще просла́вльшаго тя Бо́га,/ Его́же моли́ стране́ на́шей богоуго́дней бы́ти/ и сыново́м ру́сским спасти́ся.

Ин тропарь, глас 1

Всеору́жеством Ду́ха благода́ти вооруже́н быв/ и необори́м столп и утвержде́ние оте́честву своему́ показа́ся,/ я́ко а́гнец незло́бивый, от врага́ непра́ведно закла́н быв и в же́ртву непоро́чну Го́сподеви принесе́ся./ И ны́не дар благода́ти от всех Подвигополо́жника прие́м,/ источа́вши всем исцеле́ние, достохва́льне благове́рный царе́виче кня́же Дими́трие./ Сла́ва Восприи́мшему тя от земны́х в Небе́сная,/ сла́ва Венча́вшему тя венце́м неувяда́емым,/ сла́ва Де́йствующему тобою́ всем исцеле́ния.

Кондак, глас 8

Возсия́ днесь в сла́вней па́мяти твое́й ве́рным весе́лие,/ я́ко бо доброра́сленный грезн* прозя́бл еси́/ и Христу́ красе́н плод прине́сл еси́ себе́;/ те́мже и по убие́нии твое́м соблюде́ те́ло твое́ нетле́нно,/ страда́льчески обагре́нное кро́вию,/ благоро́дне свя́те Дими́трие,/ соблюда́й оте́чество твое́ и град твой невреди́м,/ тому́ бо еси́ утвержде́ние.

Величание

Велича́ем тя,/ святы́й благове́рный царе́виче Дими́трие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Евфросину Псковскому, глас 4

Изволе́нием Боже́ственнаго Ра́зума в пусты́ню всели́лся еси́,/ преподо́бне о́тче Евфроси́не,/ и та́мо впери́в ум твой в Небе́сная,/ равноа́нгельное житие́ пожи́л еси́,/ в моли́твах, бде́ниих и поще́ниих о́браз быв твои́м ученико́м./ Те́мже и Христо́с Бог наш, ви́дяй твоя́ труды́ и по́двиги,/ в Небе́сная селе́ния прия́т тя./ Ны́не у́бо, я́ко име́яй ко Го́споду ве́лие дерзнове́ние,/ помина́й ста́до твое́,/ е́же собра́л еси́, Богому́дре,/ и моли́ Христа́ Бо́га спасти́ся душа́м на́шим.

Ин тропарь, глас тойже

Жите́йскую печа́ль и всяк мяте́ж ми́ра сего́/ любве́ ра́ди Христо́вы со дерзнове́нием отве́ргл еси́, блаже́нне,/ и повеле́нная распя́тым Го́сподем И́исусом Христо́м/ вся испра́вил еси́,/ и, Того́ яре́м взем, во всем во́ли Его́ повину́лся еси́,/ и, благочести́в де́латель, живо́тным* за́поведем Христо́вым/ благотру́дно прилежа́л еси́./ И сего́ ра́ди Бог просла́ви тя/ и по преставле́нии чудеса́ показа́ от честна́го гро́ба твоего́./ Те́мже и неоску́дно угобзи́ся* оби́тель твоя́,/ и ни́щим бысть бога́тное приста́нище и покро́в,/ о́тче наш преподо́бне Евфроси́не,/ моли́ Христа́ Бо́га, да спасе́т ду́ши на́ша.

Ин тропарь, глас тойже

Изволе́нием Боже́ственнаго Ра́зума всели́лся в пусты́ню/ и та́мо впери́в свой ум в Небе́сныя оби́тели/ и ра́вно а́нгелом житие́ пожи́в на земли́,/ в моли́твах, и в труде́х, и в поще́ниих о́браз быв свои́м ученико́м./ Те́мже Бог, ви́дев твое́ благое́ изволе́ние,/ умно́жи тебе́ ча́да в пусты́ни,/ слез твои́х ту́чами напая́ема,/ но, я́ко име́я дерзнове́ние к Бо́гу,/ помина́й ста́до свое́, е́же собра́л еси́, му́дре,/ и не забу́ди, я́коже обеща́лся еси́, посеща́я чад свои́х,/ Евфроси́не, преподо́бне о́тче наш.

Кондак, глас 8

Бо́жиим светоли́тием просвеще́н, о́тче,/ по́стническое стяжа́в жи́тельство, преподо́бне,/ и́ноком предо́брый наста́вниче и по́стником благо́е украше́ние./ Сего́ ра́ди Госпо́дь, труды́ твоя́ ви́дев, да́ром чуде́с обогати́ тя,/ источа́еши бо исцеле́ния./ Мы же, ра́дующеся, вопие́м ти:/ ра́дуйся, о́тче Евфроси́не, и́ноком удобре́ние.

Величание

Ублажа́ем тя,/ преподо́бне о́тче Евфроси́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Серапиону Псковскому, глас 8

Изря́дством жития́ чистоту́ де́вства прии́м, Серапио́не,/ и вся кра́сная ми́ра сего́ возненави́дев,/ Христа́ еди́наго возлюби́л еси́./ Сего́ ра́ди во вну́треннюю пусты́ню всели́вся и, со зверьми́ жи́вый,/ весь Христо́в спо́стник и друг Евфроси́на учи́теля твоего́ был еси́./ Те́мже и мо́лим тя: помина́й нас, чту́щих святу́ю па́мять твою́, да зове́м ти:/ ра́дуйся, пусты́нная похвале́, преподо́бне о́тче наш.

Кондак, глас 4

От высокоу́мия и́скус прии́м смиренному́дрия,/ благода́тию Бо́жиею яви́лся еси́ рачи́тель, Богоно́сне Серапио́не./ Жела́нием бо боже́ственныя любве́ вжига́емь,/ жите́йския молвы́ оста́вль,/ ревни́тель учи́телю твоему́ Евфроси́ну был еси́,/ безмо́лвием и жесто́ким пребыва́нием после́дуя Христу́/ бде́нием же и моли́твою и посто́м о́браз был еси́ спо́стником твои́м;/ ны́не же моли́ся Го́сподеви, Богоблаже́нне,/ спасти́ся душа́м на́шим.

Величание

Ублажа́ем тя,/ преподо́бне о́тче Серапио́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Пахомию Нерехтскому, глас 4

Жите́йских молв, преподо́бне, отве́ргся,/ и, я́ко птищ, обре́те себе́ в пусты́ни безмо́лвие,/ в моли́твах и бде́нии прилежа́ Бо́гови,/ преподо́бне о́тче Пахо́мие,/ и оста́ви дре́внее пребыва́ние,/ и оты́де в пусты́ню, и в ней водвори́ся,/ и соста́ви оби́тель во и́мя Пресвяты́я Тро́ицы,/ и процве́л еси, а́ки фи́никс,/ и бысть о́браз утеше́ния духо́внаго./ Те́мже, преподо́бне Пахо́мие,/ моли́ Пресвяту́ю Тро́ицу спасти́ся душа́м на́шим.

Кондак, глас тойже

В пусты́ни безмо́лвствуя,/ еди́нствующу тя, Богоно́се, взыску́ющу ти Го́спода,/ Бо́гу же тебе́ не оста́вльшу еди́ному бы́ти в пусты́ни,/ и Того́ повеле́нием снидо́шася к тебе́ не́колико* бра́тии,/ с ни́миже ти моля́щуся Го́сподеви,/ Тро́ице прече́стен храм воздви́же,/ в не́мже предстоя́ще, преподо́бне Пахо́мие,/ моли́ся о спасе́нии душ на́ших.

Величание

Ублажа́ем тя,/ преподо́бне о́тче Пахо́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Феодору Освященному, ученику преподобного Пахомия Великого, глас 1

Пусты́нный жи́тель и в телеси́ а́нгел,/ и чудотво́рец яви́лся еси́, Богоно́се о́тче наш Фео́доре,/ посто́м, бде́нием, моли́твою Небе́сная дарова́ния прии́м,/ исцеля́вши неду́жныя и ду́ши ве́рою притека́ющих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак, глас 2

В дому́ Бо́жии, я́ко фи́никc, процве́л еси́,/ плоды́ же доброде́телей Го́сподеви прине́сл поще́нием изря́дным,/ о́тче преподо́бне./ Те́мже и ублажа́ешися,/ я́ко безпло́тных равностоя́телен.

Величание

Ублажа́ем тя,/ преподо́бне о́тче Фео́доре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Ефрему Перекомскому, Новгородскому чудотворцу, глас 4

От ю́ности твоея́ весь Бо́гови порабо́тился еси́, блаже́нне,/ и Того́ ра́ди любве́, оте́чество и род оста́вил еси́,/ в пусты́ню всели́вся,/ в не́йже жесто́кое житие́ показа́в,/ чуде́с дарова́ния от Бо́га прия́л еси́,/ Ефре́ме преподо́бне,/ моли́ Христа́ Бо́га, да спасе́т ду́ши на́ша.

Кондак, глас 8

Ангельскому житию́ поревнова́в, преподо́бне,/ вся земна́я оста́вив, ко Христу́ прите́ки еси́,/ и Того́ за́поведьми огра́ждся,/ яви́лся еси́ столп непоколеби́м от вра́жиих нападе́ний./ Тем зове́м ти:/ ра́дуйся, Ефре́ме, свети́ло пресве́тлое.

Величание

Ублажа́ем тя,/ преподо́бне о́тче Ефре́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь апостолу Андронику и святой Иунии, глас 3

Апо́столи святи́и,/ моли́те Ми́лостиваго Бо́га,/да прегреше́ний оставле́ние/ пода́ст душа́м на́шим.

Кондак, глас 2

Звезду́ пресве́тлую,/ Богоразу́мия све́том просве́щшаго язы́ки,/ апо́стола Христо́ва Андрони́ка восхва́лим,/ и с ним во благове́стии потруди́вшуюся Иу́нию прему́друю, вопию́ще:/ моли́те Христа́ Бо́га непреста́нно о всех нас.

Величание

Велича́ем вас,/ апо́столе Христо́в Андрони́че с Иу́ниею прему́дрою,/ весь мир уче́ньми свои́ми просвети́вшия/ и вся концы́/ ко Христу́ приве́дшия.

Тропарь преподобной Евфросинии, в миру Евдокии, великой княгине Московской, глас 8

По земне́м вдовстве́ Небе́сному Жениху́ себе́ уневе́стивши,/ и в кня́жестем черто́зе подви́жнически пожи́вши,/ по́слежде и черто́г и чад твои́х Бо́га ра́ди оста́вила еси́,/ преподо́бная Евфроси́ние,/ и вше́дши во оби́тель тобо́ю созда́нную,/ и во и́ноческом о́бразе мно́ги по́двиги показа́ла еси́,/ и свято́е твое́ житие́ по благода́ти Бо́жией блаже́нною кончи́ною увенча́ла еси́./ И ны́не предстоя́щи Христу́ Бо́гу,/ моли́ спасти́ся душа́м на́шим.

Ин тропарь, глас 5

От ю́ности предизбра́нная Бо́гом уго́днице,/ оста́вльши све́тлый черто́г кня́жеский,/ уклони́лася еси́ во оби́тель, тобо́ю созда́нную,/ и, пучи́ну жите́йскаго мо́ря преплы́вше,/ ны́не со а́нгелы песносло́виши Христа́ Бо́га./ Ему́же непреста́нно моли́ся, преподо́бная,/ я́ко да сохраня́ет вы́ну оби́тель, тобо́ю созда́нную,/ и дару́ет нам мир и ве́лию ми́лость.

Кондак, глас 2

Вся кра́сная ми́ра сего́, я́ко су́етная, презре́вши,/ и те́ло твое́ посто́м и бде́нием изнури́вши,/ непреста́нными моли́твами Бо́гу угоди́ла еси́,/ преподо́бная Евфроси́ние,/ и дар исцеле́ний от Него́ прия́ти сподо́бльшися,/ слепо́му прозре́ние,/ и мно́гим неду́жным исцеле́ние дарова́ла еси́./ Те́мже ра́достно взыва́ем, глаго́люще:/ сла́ва Бо́гу, прославля́ющему святы́я Своя́.

Величание

Ублажа́ем тя,/ преподо́бная ма́ти Евфроси́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь мученику Николаю Болгарскому, Софийскому, глас 3

Заре́ю Ду́ха обогати́вся, сла́вне,/ и отту́ду восприи́м дерзнове́ние,/ испове́дал еси́ на суди́щи му́жески Тро́ицу Единосу́щную,/ те́мже и ка́мением побива́емь,/ не покори́лся еси́./ Огне́м же сожига́емь,/ обличи́л еси́ пре́лесть безбо́жных,/ многострада́льне свя́те Нико́лае./ Сего́ ра́ди мо́лим тя:/ испроси́ душа́м на́шим ве́лию ми́лость.

Кондак, глас 2

Благоче́стия и́стиннаго побо́рника/ и в беда́х непобеди́маго помо́щника,/ Боже́ственнаго Никола́я в пе́снех восхва́лим:/ сей бо яви́ся в после́дняя ле́та звезда́ пресве́тлая,/ просвеща́ющая ве́рных сердца́,/ и, со а́нгелы ны́не Тро́ице предстоя́,/ непреста́нно мо́лится о всех нас.

Величание

Велича́ем тя,/ страстоте́рпче святы́й Нико́лае,/ и чтим честна́я страда́ния твоя́,/ я́же за Христа́/ претерпе́л еси́.

Тропарь мученику Феодоту Анкирскому и иже с ним, глас 4

Му́ченицы Твои, Го́споди... (общий мученикам).

Кондак, глас 2

Страда́льчески подвиза́вся до́бре со сострада́льцы твои́ми, Феодо́те,/ и венцы́ по́чести прия́сте, с честны́ми страстоте́рпицами де́вами,/ те́мже Христа́ Бо́га моли́те непреста́нно о всех нас.

Величание

Велича́ем вас,/ страстоте́рпцы святи́и, Феодо́те со сострада́льцы твои́ми,/ и чтим честна́я страда́ния ваша,/ я́же за Христа́/ претерпе́ли есте́.

Тропарь святым отцам, глас 8

Препросла́влен еси́, Христе́ Бо́же наш,/ свети́ла на земли́ отцы́ на́ша основа́вый,/ и те́ми ко и́стинней ве́ре вся ны наста́вивый;/ Многоблагоутро́бне, сла́ва Тебе́.

Кондак, глас тойже

Апо́стол пропове́дание и оте́ц догма́ты/ Це́ркви еди́ну ве́ру запечатле́ша,/ я́же и ри́зу нося́щи и́стины,/ истка́ну от е́же свы́ше богосло́вия,/ исправля́ет и сла́вит благоче́стия вели́кое та́инство.

Тропарь священномученику Патрикию, епископу Прусскому, глас 4

И нра́вом прича́стник,/ и престо́лом наме́стник... (общий священномученику).

Кондак, глас тойже

Я́ко светосия́нен добро́тою свяще́нства,/ и муче́ния кро́вию преукра́шен/ с пострада́вшими с тобо́ю, Патри́кие, Христу́ предстоя́,/ о нас помина́й,/ я́ко страда́лец честны́й.

Величание

Велича́ем тя,/ священному́чениче Патри́кие со пострада́вшими с тобо́ю,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь преподобному Корнилию, чудотворцу Комельскому, глас 4

От ю́ности горя́щим жела́нием Боже́ственныя любве́ разжига́ем,/ жите́йския молвы́ оста́вил еси́, преподо́бне,/ ревни́тель Анто́нию Вели́кому бысть,/ безмо́лвием и жесто́ким пребыва́нием после́дуя Христу́,/ бде́нием и моли́твами и посто́м о́браз быв свои́м ученико́м;/ те́мже моли́ся Госпо́деви, Корни́лие блаже́нне,/ спасти́ся душа́м на́шим.

Ин тропарь, глас 8

По́стническими труды́ нетру́дную жизнь стяжа́, преподо́бне,/ слеза́ми же мы́сленнаго фарао́на потопи́л еси́/ и вме́сто ско́рби ра́дость обре́л еси́,/ предстоя́ Христо́ви в лице́ святы́х,/ помина́й, моля́щихся чад твои́х, Корни́лие, о́тче наш.

Кондак, глас тойже

Го́сподеви, от Святы́я Де́вы возсия́вшу ми́рови,/ и Тому́ измла́да, я́ко а́нгел, послужи́л еси́, блаже́нне,/ и си́лою Его́ пусты́ню, я́ко град, сотвори́л еси́,/ мно́жество же учени́к в ней собра́л еси́,/ и́хже богодухнове́нными уче́ньми просвети́л еси́;/ тем вопие́м ти:/ ра́дуйся, о́тче наш Корни́лие, и́ноком Боже́ственное удобре́ние.

Величание

Ублажа́ем тя,/ преподо́бне о́тче Корни́лие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь благоверному великому князю Димитрию Донскому, глас 3

Вели́ка обре́те в бе́дах тя побо́рника земля́ Ру́сская,/ язы́ки побежда́юща./ я́коже на До́не Мама́еву низложи́л еси́ горды́ню,/ на по́двиг сей прия́в благослове́ние преподо́бнаго Се́ргия./ Та́ко, кня́же Дими́трие,/ Христу́ Бо́гу моли́ся/ дарова́ти нам ве́лию ми́лость.

Кондак, глас 2

По́двиги твои́ми, свя́те Дими́трие,/ страну́ на́шу Бог сохрани́,/ да́вый тебе́ си́лу непобеди́мую./ И ны́не, предста́телю кре́пкий,/ соблюда́й моли́твами святы́ми град твой Москву́ невреди́м/ от всех наве́т вра́жиих.

Величание

Велича́ем тя,/ святы́й благове́рный кня́же Дими́трие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Корнилию, игумену Палеостровскому, Олонецкому, глас 5

От ю́ности, прему́дре, приле́жно подвиза́вся,/ от Бо́га наставля́емь,/ оте́чество твое́ град Псков оста́вил еси́,/ и всели́вся в пусты́ню,/ во ото́це вели́каго е́зера Оне́га,/ и́ноки му́дре собра́л еси́,/ и извеще́нием Свята́го Ду́ха оби́тель согради́л еси́,/ иде́же храм Пресвяте́й Богоро́дице в похвалу́ рождества́ Ея созда́л еси́,/ струя́ми же слез твои́х/ безпло́тныя враги́ потопи́в,/ жития́ твоего́ целому́дрием со а́нгельскими ли́ки совокупи́лся еси́,/ преподо́бне о́тче Корни́лие,/ с ни́миже Христа́ Бо́га моли́/ спасти́ся душа́м на́шим.

Кондак, глас 3

Я́ко а́нгел во пло́ти, на земли́ показа́ся,/ поще́нием насажде́н быв, преподо́бне о́тче Корни́лие,/ наста́вник и́ноком мно́гим был еси́./ Сего́ ра́ди вопие́м ти:/ моли́ Христа́ Бо́га спасти́ся душа́м на́шим.

Величание

Ублажа́ем тя,/ преподо́бне о́тче Корни́лие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Сергию Шухтомскому, глас 8

Бде́нными моли́твами и пото́ки сле́зными пусты́ню напои́л еси́/ и из глубины́ воздыха́ньми ю́ расплоди́л еси́,/ и бысть по́стнически ра́вно а́нгелом житие́ твое́,/ страда́льчески боре́ньми, я́ко от бесо́в и от ненака́занных челове́к, претерпе́л еси́,/ и а́нгелом собесе́дник яви́ся,/ Боже́ственнаго виногра́да насе́ятель быв,/ и, оста́вив вре́менное житие́, пресели́лся еси́ в жили́ще Небе́сное./ Темже тя почита́ем, преподо́бне о́тче наш Се́ргие,/ моли́ Христа́ Бо́га спасти́ся душа́м на́шим.

Кондак, глас 2

Чистото́ю душе́вною боже́ственно вооружи́вся... (общий преподобному).

Величание

Ублажа́ем тя,/ преподо́бне о́тче Се́ргие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь благоверному князю Иоанну Угличскому, в иночестве Игнатию, Вологодскому, глас 2

В житии́ свое́м мно́ги ско́рби претерпе́л еси́, блаже́нне,/ и терпе́ния ра́ди вене́ц от Бо́га прия́л еси́,/ и по сме́рти свое́й чудотво́рец показа́лся еси́./ Того́ ра́ди па́мять твою́ пе́сньми почита́ем,/ преподо́бне о́тче наш Игна́тие,/ моли́ся, предстоя́ Святе́й Тро́ице,/ держа́ве сро́дник твои́х богоуго́дней бы́ти,/ и сыново́м росси́йским спасти́ся.

Кондак, глас 8

Изря́дная о́трасле благочести́ваго ко́рене,/ ди́вный благоро́дный цве́те,/ избра́нный от пеле́н благода́тию Христо́вою,/ возлю́бленный от ю́ности Ду́хом Святы́м,/ де́вственное процвете́ние, Игна́тие блаже́нне,/днесь, соше́дшеся, ве́рнии, в па́мять твою́,/ похва́льными венцы́ честну́ю твою́ главу́ венча́юще, зове́м:/ ра́дуйся, преподо́бне, сосу́де Свята́го Ду́ха, всея́ Росси́йския земли́ удобре́ние.

Ин кондак, глас тойже

Чи́сто житие́ на земли́ пожи́л еси́,/ ду́шу и те́ло без скве́рны соблю́л еси́/ и терпе́ния ра́ди своего́ мзду восприя́л еси́./ И ны́не на Небесе́х со а́нгелы веселя́ся, преподо́бне о́тче Игна́тие,/ моли́ся непреста́нно Христу́ Бо́гу о всех нас, почита́ющих па́мять твою́/ и притека́ющих к ра́це моще́й твои́х.

Величание

Ублажа́ем тя,/ преподо́бне о́тче Игна́тие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь мученику Парфению, глас 4

Му́ченик Твой, Го́споди, Парфе́ний... (общий мученику).

Кондак, глас 2

Благочести́ваго и венцено́снаго му́ченика,/ на враги́ побе́ды взе́мшаго одоле́ние,/ соше́дшеся, досто́йно пе́сньми восхва́лим,/ Парфе́ния превели́каго в му́ченицех,/ чуде́с жа́теля пребога́таго,/ моли́тся бо Го́споду о всех нас.

Величание

Велича́ем тя,/ страстоте́рпче святы́й Парфе́ние,/ и чтим честна́я страда́ния твоя́,/ я́же за Христа́/ претерпе́л еси́.

Тропарь мученику Фалалею, глас 4

Му́ченик Твой, Го́споди... (общий мученику).

Кондак, глас 3

Му́чеником сострада́лец я́влься и ору́жник,/ во́ин изря́дный Царя́ сла́вы был еси́,/ искуше́ньми и му́кою возвыше́ние идолослужи́телей попра́л еси́./ Се́го ра́ди честну́ю твою́ пое́м па́мять,/ му́дре Фалале́е.

Величание

Велича́ем тя,/ страстоте́рпче святы́й Фалале́е,/ и чтим честна́я страда́ния твоя́,/ я́же за Христа́/ претерпе́л еси́.

Тропарь святителю Алексию, митрополиту Московскому, всея России чудотворцу, глас 2

Я́ко сокро́вище пребога́тое, многоле́тно в земли́ сокрове́нное,/ честны́я мо́щи твоя́ обрето́шася чудоточа́щия,/ всеблаже́нне о́тче, святи́телю Алекси́е,/ от ни́хже врачевство́ прие́млюще обогаща́емся,/ и Христа́ славослови́м, глаго́люще:/ сла́ва Прославля́ющему святы́я Своя́.

Ин тропарь, глас 4

А́постольских прее́мников, архиере́ев сопресто́льниче,/ Росси́и всея́ па́стырю и учи́телю,/ всеблаже́нне о́тче Алекси́е,/ Влады́це всех моли́ся,/ мир па́стве твое́й дарова́ти,/ и спасе́ние душа́м, и ве́лию ми́лость.

Ин тропарь, глас 3

Свы́ше от Бо́га глас глаго́лющ услы́шав,/ от ю́ности подвиза́вся, му́дре,/ в моли́твах и во умиле́нии, и слеза́х,/ во бде́ниих же и поще́ниих о́браз быв доброде́тели,/ отоню́дуже и дом Ду́ху Пречи́стому яви́ся./ Сего́ ра́ди Ру́сския митропо́лии архиере́йским са́ном почте́н быв,/ Христо́во ста́до упа́сл еси́ до́бре,/ ерети́ческая нападе́ния, не усумне́ся, отрази́/ и це́ркви воздви́же Христо́ви, святи́телю Алекси́е,/ и́ночествующих ли́ки собра́/ и сих Христо́ви приве́л еси́./ У́мре же, яви́ся, я́ко спящ,/ цел, соблюде́н бысть пред мно́гими ле́ты,/ подава́я цельбы́ боля́щим./ Тем мо́лим тя:/ моли́ Христа́ Бо́га спасти́ град твой Москву́ неврежде́н/ и страну́ и правосла́вныя лю́ди по вели́цей Его́ ми́лости.

Кондак, глас 8

Я́ко со́лнце незаходи́мое от гро́ба возсия́ нам,/ от мног лет сокрове́ны честны́я твоя́ мо́щи нетле́нны,/ святи́телю Алекси́е,/ тобо́ю благода́ть прие́млем:/ всю бо страну́ сию́, и вся ны чудесы́ и добро́тою обогаща́еши,/ де́йством благода́ти, да пое́м ти:/ ра́дуйся, о́тче, свети́ло Росси́и.

Ин кондак, глас 3

Я́ко светоно́сная па́мять святи́теля/ всем разруши́ уны́ние/ и свет облиста́ Небе́сных Даро́в,/ всех созыва́ющи на весе́лие:/ от Бо́га бо, святи́телю Алекси́е, благода́ть обре́те прогони́ти неду́ги/ и вся челове́ки исцеля́ти/ и мни́хом* же степе́нь* показа́ся.

Величание

Велича́ем тя,/ святи́телю о́тче Алекси́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь благоверному князю Довмонту (Доманту), во Святом Крещении Тимофею, Псковскому, глас 4

И́же о́тчее нече́стие возненави́дев,/ преблаже́нне кня́же Довмо́нте,/ и но́щи стра́стныя избе́г, е́же к и́долам тща́ние,/ прии́де мы́слию к Со́лнцу сла́вы – Христу́,/ озари́вся благода́тию Боже́ственнаго Креще́ния,/ и ны́не во све́те Пресвяты́я Тро́ицы предстоя́,/ моли́ Христа́ Бо́га сохрани́ти и спасти́ правосла́вныя лю́ди/ и град твой от безбо́жных ага́рян,/ и лати́н наше́ствия, и междоусо́бныя бра́ни/ и спасти́ся душа́м на́шим.

Ин тропарь, глас тойже

Ду́хом Бо́жиим наставля́ем,/ о́тчее нече́стие отве́ргл еси́,/ святы́й благове́рный кня́же Тимофе́е,/ потща́лся еси́ прийти́ в Богоспаса́емый град Псков,/ в не́мже ду́шу твою́ благода́тию Свята́го Креще́ния просвети́в,/ ве́рою и любо́вию оби́тель в себе́ сотвори́л еси́ Пресвяте́й Тро́ице,/ Е́йже непреста́нно моли́ся/ дарова́ти душа́м на́шим/ мир и ве́лию ми́лость.

Кондак, глас 8

Любо́вию Христо́вою уязви́ся, преблаже́нне кня́же Довмо́нте,/ ум впери́в заре́ю Ду́ха,/ и́дольскую пре́лесть оте́ческаго нече́стия возненави́дев,/ порожде́нием Святы́я Купе́ли Тимофе́й нарече́н еси́,/ слеза́ми и ми́лостынею ко Христу́ присво́ився,/ и жи́зни сей тече́ние до́бре сконча́в,/ ве́ру непоро́чну соблю́л,/ и ны́не мо́лим тя:/ моли́ Пресвяту́ю Тро́ицу и Пречи́стую Богоро́дицу/ за град Псков и за всех, притека́ющих к ра́це моще́й твои́х,/ изба́витися нам от вся́ких зол,/ да тебе́ вси, я́ко те́пла засту́пника, непреста́нно почита́ем.

Величание

Велича́ем тя,/ святы́й благове́рный кня́же Довмо́нте,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Божией Матери ради иконы Ее Владимирская, глас 4

Днесь све́тло красу́ется сла́внейший град Москва́,/ я́ко зарю́ со́лнечную восприи́мши, Влады́чице, чудотво́рную Твою́ ико́ну,/ к не́йже ны́не мы притека́юще и моля́щеся Тебе́, взыва́ем си́це:/ о Пречу́дная Влады́чице Богоро́дице,/ моли́ся из Тебе́ воплоще́нному Христу́ Бо́гу на́шему,/ да изба́вит град сей и вся гра́ды и страны́ христиа́нския невреди́мы от всех наве́т вра́жиих/ и спасе́т ду́ши на́ша, я́ко Милосе́рд.

Кондак, глас 8

Взбра́нной Воево́де победи́тельная,/ я́ко изба́вльшеся от злых прише́ствием Твоего́ честна́го о́браза,/ Влады́чице Богоро́дице,/ све́тло сотворя́ем пра́зднество сре́тения Твоего́/ и обы́чно зове́м Ти:/ ра́дуйся, Неве́сто Неневе́стная.

Ин кондак, глас тойже

К Взбра́нней Воево́де и Засту́пнице, Де́ве и Богоро́дице,/ в чи́стей со́вести, ве́рою утверди́вшеся, ру́сстии наро́ди,/ невозвра́тно наде́жду иму́ще, притеце́м,/ к чудотво́рному Ея́ и пречи́стому о́бразу, и возопие́м Ей:/ ра́дуйся, Неве́сто Неневе́стная.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

По полиелеи припев:

Досто́йно есть велича́ти Тя,/ Богоро́дице, честне́йшую Херуви́м и сла́внейшую без сравне́ния Серафи́м.

Тропарь равноапостольным царям Константину и Елене, глас 8

Креста́ Твоего́ о́браз на Небеси́ ви́дев/ и, я́коже Па́вел, зва́ние¹⁵ не от челове́к прие́м,/ в царе́х апо́стол Твой, Го́споди,/ ца́рствующий град в ру́це Твое́й положи́;/ его́же спаса́й всегда́ в ми́ре моли́твами Богоро́дицы,/ еди́не Человеколю́бче.

Кондак, глас 3

Константи́н днесь с ма́терию Еле́ною/ Крест явля́ют, всечестно́е дре́во,/ всех у́бо иуде́ев посрамле́ние су́ще,/ ору́жие же на проти́вныя ве́рных люде́й:/ нас бо ра́ди яви́ся зна́мение ве́лие,/ и во бране́х гро́зное.

Величание

Велича́ем вас,/ святи́и благове́рнии и равноапо́стольнии ца́рие Константи́не и Еле́но,/ и чтим святу́ю па́мять ва́шу,/ вы бо святы́м Кресто́м/ всю вселе́нную просвети́ли есте́.

Ино величание

Велича́ем вас,/ святи́и равноапо́стольнии Константи́не и Еле́но,/ и чтим боле́зни и труды́ ва́ша,/ и́миже труди́лися есте́/ во благове́стии Христо́ве.

В Часослове, изданном Киево-Печерской лаврой в 1642 году, находится такое Величание:

Величаем вас,/ святии благовернии и равноапостольнии царие, Константине и Елене,/ и чтим святую память вашу,/ святым крещением/ всю вселенную просветивших.

Тропарь благоверному князю Константину и чадам его Михаилу и Феодору, Муромским чудотворцам, глас 4

Константи́н днесь ве́село ликовству́ет*,/ предстоя́ престо́лу Святы́я Тро́ицы,/ ви́дя оте́чествие свое́ ма́стию духо́вною сия́ющее¹⁶,/ ему́же после́доваша Михаи́л и Фео́дор, сы́нове его́,/ и мо́лятся вси трие́ вку́пе о душа́х на́ших.

Кондак, глас 8

Изря́дному воево́де и правове́рному кня́зю Константи́ну, с сыно́ма его́ вку́пе,/ оте́чество его́ хва́лящися вопие́т,/ име́юще его́ нача́льника и засту́пника,/ я́ко изба́вльшеся им от пре́лести и скве́рны и́дольския./ Сего́ ра́ди вопие́м ему́ си́це:/ ра́дуйся, кня́же Константи́не преблаже́нне.

Величание

Велича́ем вас,/ святи́и благове́рнии кня́зие Константи́не, Михаи́ле и Фео́доре,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь преподобному Кассиану греку, Угличскому чудотворцу, глас 4

Днесь град У́глеч тобо́ю хва́лится/ в конца́х бо его́ пресве́тло, я́ко ве́лие со́лнце, возсия́л еси́/ и чудесы́ твои́ми вся озари́л еси́,/ и ны́не моли́ся Го́сподеви,/ Кассиа́не преподо́бне,/ за град У́глеч и оби́тель сию́,/ и всяк град, и страну́, и лю́ди,/ и́же ве́рою тебе́ почита́ющия,/ и о спасе́нии душ на́ших.

Ин тропарь, глас тойже

Днесь пресве́тло красу́ется сла́внейший У́глеч град,/ це́рковь же Бо́жия Ма́тере вельми́ ра́дуется,/ име́ющи многоцеле́бныя в себе́ мо́щи вели́каго чудотво́рца,/ преподо́бнаго Кассиа́на, возсия́вшаго от Ри́ма,/ я́коже со́лнце, всему́ ми́ру, издале́че просвеща́ющаго ве́рных сердца́,/ и́мже украси́ Бог це́рковь Ма́тере Своея́./ Те́мже ны́не мо́лим тя:/ бу́ди покрови́тель и засту́пник непобеди́мый/ от вся́ких бед гра́ду на́шему/ и всем ве́рным храни́лище,/ притека́ющим в дом Бо́жия Ма́тере и кла́няющимся тебе́,/ преподо́бне уго́дииче Христо́в Кассиа́не,/ моли́ Христа́ Бо́га спасти́ся душа́м на́шим.

Ин тропарь, глас тойже

Ве́тхаго Ри́ма имея́ воспита́ние,/ держа́ву оте́чества своего́, град Мангу́пский, оста́вль,/ и нивочто́же вмени́л еси́ княже́ние/ и сла́ву маловре́менную су́етнаго ве́ка Христа́ ра́ди,/ и па́че земна́го бога́тства избра́ бога́тство себе́ Небе́сное и сла́ву ве́чную,/ возвы́сив ум свой к Бо́гу/ и житие́ свое́ со а́нгелы вожделе́л* еси́ восприя́ти,/ промышле́нием Боже́ственнаго Ра́зума направля́ем,/ и Богоспаса́емаго У́глеча гра́да дости́гл еси́,/ и близ в преде́лах о́бласти его́, над Во́лгою реко́ю, в пусты́ню всели́вся,/ и оби́тель пресла́вну в честь Бо́жия Ма́тере воздви́гл еси́,/ и в ней те́ло свое́ предложи́в, я́ко дар освяще́н./ Тем мо́лим тя, о́тче Кассиа́не,/ моли́ Христа́ Бо́га,/ да спасе́т ду́ши на́ши.

Кондак, глас 8

Я́ко светоза́рная звезда́ прише́л еси́ от восто́ка на за́пад,/ оста́вль оте́чество и княже́ние твое́ Христа́ ра́ди,/ и в ца́рствующий град Москву́ прише́л еси́,/ и, промышле́нием Боже́ственнаго Ра́зума направля́ем,/ У́глеча гра́да дости́гл еси́,/ и, близ его́, над Во́лгою реко́ю, в пусты́ни У́чме всели́вся,/ оби́тель сотвори́л еси́, и це́рковь созда́,/ и созва́ мона́хов во спасе́ние;/ с ни́миже моли́ о нас, чту́щих па́мять твою́, да зове́м ти:/ ра́дуйся, преподо́бне о́тче Кассиа́не.

Ин кондак, глас 4

Я́коже пресве́тлое со́лнце,/ возсия́ нам от Ри́ма и к ца́рскому гра́ду дости́гл еси́,/ преблаже́нне о́тче Кассиа́не,/ и а́нгельски в Ру́сстей земли́ пожи́л еси́,/ и дре́вних по́стник на высоту́ воздержа́ния востече́,/ и в пусты́не У́чме, близ Богоспаса́емаго гра́да У́глеча,/ оби́тель пресла́вну и́ноком во спасе́ние сооружи́,/ и храм благоле́пен Пречи́стей Богома́тери Ду́хом Бо́жиим уясни́,/ и в ней тобо́ю Бог прославля́ется,/ и ны́не моли́тися Го́сподеви не преста́й о ста́де свое́м,/ и́же мно́гими по́ты и труды́ стяжа́л еси́/ изба́вити его́ от всех обстоя́ний лука́ваго,/ и от вся́ких скорбе́й и бед невреди́му сохрани́тися,/ и нам, рабо́м твои́м, грехо́в проще́ние моли́твами твои́ми получи́ти,/ и гра́ду твоему́ У́глечу от напа́стей вся́ческих/ и находя́щих паде́ний, гне́вом Бо́жиим пра́ведным, свободи́тися умоли́,/ преподо́бне и Богому́дре о́тче Кассиа́не.

Ин кондак, глас 5

Я́ко многосве́тлая звезда́,/ возсия́л еси́ в Ру́сстей земли́, о́тче Кассиане,/ и я́ко бога́тство драгоце́ннаго би́сера/ прии́де к нам от ве́тхаго Ри́ма/ и доше́д Богоспаса́емаго гра́да У́глеча,/ и близ его́ Боже́ственным смотре́нием/ оби́тель всече́стну возгради́л, и це́рковь Ма́тере Бо́жия чуднови́дну созда́,/ и созва́ инок мно́жества,/ с ни́миже моли́ся Христу́ Бо́гу/ изба́вити град сей от ва́рварскаго плене́ния,/ и междоусо́бныя бра́ни, и о́гненнаго запале́ния невреди́ма соблюди́,/ преподо́бне и Богому́дре отче Кассиа́не.

Величание

Ублажа́ем тя,/ преподо́бне о́тче Кассиа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее, именуемой Красногорская, глас 2

Ра́дуйся, свята́я горо́ Кра́сная,/ небеси́ подо́бная,/ сла́ва бо Бо́жия на тебе́ возсия́./ Взыгра́йте, го́ры и хо́лми, весе́лием,/ я́ко на сей горе́ ико́на Бо́жия Ма́тере,/ честна́го Ея́ умиле́ния, просла́вися./ Лику́йте, челове́цы, и весели́теся,/ я́ко нам дарова́ся бога́тство неотъе́млемое, исцеле́ний сокро́вище,/ гла́сы, я́коже тру́бы, возшуми́те,/ прославля́юще Ея́ чудеса́ пресла́вная./ И Ты, Чи́стая, ра́дуйся, я́ко с Тобо́ю Госпо́дь.

Кондак, глас 3

На горе́ святе́й видя́ще Твою́ святу́ю ико́ну,/ Богоро́дице, Ма́ти Де́во,/ пое́м Твоего́ светообра́знаго ли́ка изображе́ние,/ поклоня́емся Твое́й святе́й ико́не,/ почита́ем о́ную,/ и сла́вим тоя́ пресла́вная чудеса́,/ и си́це зове́м Тебе́:/ ра́дуйся, Неве́сто Неневе́стная.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь Божией Матери, ради иконы Ее «Умиление» Псково-Печерской, глас 4

Днесь све́тло красу́ется оби́тель сия́,/ я́ко зарю́ со́лнечную восприи́мши, Влады́чице,/ чудотво́рную Твою́ ико́ну,/ к не́йже мы ны́не притека́юще и моля́щеся Тебе́, взыва́ем сице:/ о Пречу́дная Влады́чице Богоро́дице!/ Моли́ся из Тебе́ воплоще́нному Христу́ Бо́гу на́шему,/ да изба́вит оби́тель сию́/ и вся гра́ды и страны́ христиа́нския невреди́мы от всех наве́т вра́жиих/ и спасе́т ду́ши на́ша, я́ко Милосе́рд.

Величание

Велича́ем Тя,/ Пресвята́я Де́во,/ Ма́ти Христа́ Бо́га на́шего,/ и чтим чудотво́рный о́браз Твой,/ и́мже спасла́ еси́/ нас от руки́ вра́жия.

Тропарь мученику Василиску, глас 4

Му́ченик Твой, Го́споди... (общий мученику).

Кондак, глас 8

Во страда́нии кре́пок и му́жествен яви́лся еси́, и в чудесе́х преди́вен,/ явле́нно Христо́во и́мя преднося́, мучи́теля посрами́л еси́./ Тем тя почита́ем, Васили́сче, при́сно зову́ще, всече́стне:/ ра́дуйся, му́чеников све́тлая добро́то.

Величание

Велича́ем тя,/ страстоте́рпче святы́й Васили́сче,/ и чтим честна́я страда́ния твоя́,/ я́же за Христа́/ претерпе́л еси́.

Тропарь мученику Иоанну – Владимиру, князю Сербскому, глас 4

Крест, я́вльшийся тебе́ с Небесе́, све́тел пропове́дал еси́,/ просвети́в язы́ки я́сно, Влади́мире сла́вне,/ обагре́ньми крове́й твои́х украси́вся,/ сподо́бился еси́ по́честей нетле́нных,/ предстоя́й Тро́ице,/ тем со дерзнове́нием/ моли́ спасти́ся нам.

Ин тропарь, глас тойже¹⁷

Крест, я́вльшийся тебе́ с Небе́с в блиста́нии, всем пропове́дал еси́,/ просвети́в язы́ки ве́рно, Влади́мире сла́вне./ Искупле́нием же, кровьми́ твои́ми возблиста́в,/ сподо́бился еси́ мзды́ неле́стныя, предстоя́ Тро́ице./ Те́мже дерзнове́нно моли́ Христа́ спасти́ся нам.

Кондак, глас 8

Я́ко сокро́вище многоце́нное/ и исто́чник, точа́щ земны́м то́ки,/ неду́ги очища́ющия,/ нам подаде́ся те́ло твое́ свяще́нное,/ боле́знем разли́чным подаю́ще исцеле́ние/ и благода́ть Боже́ственную притека́ющим к нему́, да зове́м ти:/ ра́дуйся, кня́же Влади́мире.

Величание

Велича́ем тя,/ страстоте́рпче святы́й кня́же Влади́мире,/ и чтим честна́я страда́ния твоя́,/ я́же за Христа́/ претерпе́л еси́.

Тропарь преподобному Иакову Боровичскому, Новгородскому чудотворцу, глас 1

Боже́ственною благода́тию просвети́вся,/ и по сме́рти да́руеши исцеле́ние/ притека́ющим к тебе́, прему́дре Иа́кове:/ те́мже и мы ны́не чтим честны́х моще́й пренесе́ние,/ веселя́ще вку́пе ду́ши и телеса́./ Тем вси вопие́м:/ сла́ва Да́вшему ти кре́пость!/ Сла́ва Венча́вшему тя!/ Сла́ва Де́йствующему тобо́ю всем исцеле́ния!

Кондак, глас 8

Ве́рою и любо́вию/ твое́ честно́е пренесе́ние пра́зднующих, блаже́нне,/ сохрани́ и соблюди́ от вся́кия зло́бы и собла́зна змии́на,/ и́маши бо дерзнове́ние ко Влады́це всех, Христу́ Бо́гу./ Его́же моли́ спасти́ правосла́вныя люди́,/ моля́щия тя, да вси вопие́м ти:/ ра́дуйся, о́тче Иа́кове,/ всея́ Росси́йския земли́ удобре́ние.

Ин кондак, глас тойже

Я́ко звезда́ многосве́тлая, о́тче, на восто́це возсия́,/ к за́паду прише́л еси́, блаже́нне, во твое́ пренесе́ние,/ я́ко со́лнечная луча́, испуща́еши исцеле́ния притека́ющим к ра́це моще́й твои́х;/ моли́ся Христу́ Бо́гу спасти́ правосла́вныя лю́ди, моля́щияся ти,/ да вси вопие́м ти:/ ра́дуйся, Богому́дре Иа́кове.

Величание

Ублажа́ем тя,/ преподо́бне о́тче Иа́кове,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Михаилу исповеднику, епископу Синадскому, глас 4

Пра́вило ве́ры и о́браз кро́тости... (общий святителю).

Кондак, глас 8

Я́ко архиере́й всече́стен, и благоче́стия священнострада́лец,/ преще́ния злоимени́таго не убоя́вся,/ ерети́ческое того́ противле́ние победи́л еси́,/ свобо́дным гла́сом велегла́сно* вопи́я:/ ико́не покланя́юся Христо́ве и Пречи́стыя Того́ Ма́тере;/ се́го ра́ди тя почита́ем, Михаи́ле.

Величание

Велича́ем тя,/ святи́телю о́тче Михаи́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Леонтию, епископу Ростовскому, глас 4

Апо́столом соприча́стник,/ и к Бо́гу моле́бник ве́рен,/ доброде́тельми возше́д на небе́сная,/ и любо́вь возложи́л еси́ к Лю́бящему тя,/ и неве́рныя лю́ди обрати́л еси́ в ве́ру;/ тем ны́не, со а́нгелы лику́я,/ предстои́ши престо́лу сла́вы всех Ца́ря Христа́ Бо́га./ Моли́ся, святи́телю Лео́нтие,/да спасе́т ду́ши на́ша.

Кондак, глас тойже

Жития́ ра́ди чистоты́,/ Всеви́дец Госпо́дь, све́т Сво́й насади́ в души́ твое́й,/ вразуми́ти лю́ди мно́гия/ твои́ми уче́нии,/ Лео́нтие преподо́бне.

Величание

Велича́ем тя,/ святи́телю о́тче Лео́нтие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Собору Ростово-Ярославских святых, глас 4

О, благочести́вый собо́ре,/ о лю́дие избра́ннии,/ святи́телие, преподо́бнии и пра́веднии,/ и благове́рнии гра́ждане росси́йстии,/ я́ко зве́зды на тве́рди церко́вней/ страны́ Росто́вския и Яросла́вския к Бо́гу предста́телие,/ велича́ем с любо́вию вас, по пло́ти на́ших сро́дников./ Вы же моли́теся дарова́ти мир стране́ и Це́ркви на́шей,/ благослове́ние и ми́лость Бо́жию всем лю́дем,/ всепроще́ние и спасе́ние,/ ходата́и бо есте́ при́сныя о нас ко Святе́й Тро́ице.

Тропарь святителям Ростовским, глас тойже

Святи́телие прему́дрии,/ па́ствы ва́шея учи́телие богопросвеще́ннии,/ ве́ру ева́нгельскую в лю́дях преумно́живший,/ любве́ Небе́сныя на земли́ достоподража́тельнии о́брази,/ лю́ди страны́ Росто́вския и Яросла́вския приобща́вший спасе́нию,/ служи́телие вои́стинну Бо́жии/ и соприча́стницы апо́столов досто́йнии яви́лися есте́,/ Лео́нтие священному́чениче, Иса́ие, Игна́тие, Иа́кове, Фео́доре/ и златослове́сниче Росси́йский Дими́трие,/ Христа́ Бо́га моли́те/ о архиере́ех, на престо́ле ва́шем прее́мницех,/ о лю́дех, благоче́стно вас почита́ющих,/ о стране́ на́шей правосла́вней/ и о всей Христо́вой Це́ркви.

Кондак, глас тойже

Но́ваго Заве́та Бо́га с челове́ки храни́телие,/ ева́нгельских за́поведей исполни́телие,/ в до́брых де́лех соверше́ннии,/ святи́телие му́дрии, преподо́бнии и праве́днии, богоно́снии,/ зе́млю Росто́вскую и Яросла́вскую/ облагоуха́вшия моли́твами,/ имену́емии вси и неимену́емии,/ явле́ннии и сокрове́ннии,/ предстоя́ще Живонача́льней Тро́ице,/ не отступа́йте от нас ду́хом/ и Боже́ственное милосе́рдие преклони́те к нам,/ да с дерзнове́нием сла́ву в Вы́шних Бо́гу вси прино́сим,/ да пребу́дет на земли́ мир неруши́мый,/ любо́вь же и благоволе́ние/ посреде́ всех челове́к.

Тропарь трем святителям Ростовским Леонтию, Исаии и Игнатию, глас 4

Апо́стольским преда́нием, и́стинней ве́ре пропове́дницы,/ и от тьмы к све́ту Богоразу́мия челове́ком наста́вницы,/ и за ны к Бо́гу моле́бницы,/ на Небе́сная любо́вь возложи́сте к Лю́бящему вы./ И ны́не на Небеси́ со а́нгелы и со все́ми святы́ми ликовству́юще/ у Престо́ла сла́вы всех Царя́, Христа́ Бо́га на́шего,/ святи́и чудотво́рцы Лео́нтие, и Иса́ие, и Игна́тие,/ моли́те дарова́ти стране́ на́шей мир,/ на враги́ одоле́ние,/ Це́ркви единомы́слие/ и душа́м на́шим ве́лию ми́лость.

Кондак, глас 8

Я́ко во вселе́нней трие́ вели́цыи святи́телие,/ бы́сте вы благоче́стием и доброде́телию наста́вницы Росто́ву/ и, благове́рием прии́мше па́ству, ста́до Христо́во упасо́сте/ и ве́чный поко́й насле́довасте./ Мо́лим вас, святи́и чудотво́рцы,/ пода́ти доброде́телем исправле́ние,/ и боле́знем на́шим исцеле́ние, и собла́зном избавле́ние,/ и душа́м спасе́ние, да зове́м вам:/ ра́дуйтеся, гра́ду на́шему Росто́ву похвала́ и утвержде́ние.

Величание

Велича́ем вас,/ вси святи́и земли́ Росто́вския и Яросла́вския,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь преподобной Евфросинии, игумении Полоцкой, глас 4

Подража́ющи дванадесятоле́тна дванадесятоле́тну Христу́,/ учи́вшему во святи́лищи, Бо́жию сло́ву/ после́довала еси́, Евфроси́ние,/ сла́ву вре́менную и земна́го обру́чника оста́вльши,/ и вся мирска́я презре́вши,/ красне́йшему па́че всех Христу́ себе́ уневе́стила еси́,/ крест взе́мши, путе́м а́нгельскаго жития́ ше́ствующи,/ и мно́гия к Нему́ наставля́ющи,/ во благоуха́нии ми́ра в Небе́сный черто́г востекла́ еси́,/ иде́же моли́, Его́же возлюби́ла еси́,/ о чту́щих благоче́стно па́мять твою́.

Ин тропарь, глас тойже

Бога́тство свое́ ни́щим расточи́вши,/ и сла́ву кня́жескую нивочто́же вмени́вше,/ обру́чника вре́меннаго, кра́сная де́во, возгнуша́лася еси́/ и, уневе́стившися Жениху́ Христу́,/ Тому́, я́коже ве́но*, чистоту́ душе́вную и теле́сную принесла́ еси́, Евфроси́ние,/ Ему́же ны́не в весе́лии предстоя́,/ помина́й нас, чту́щих па́мять твою́.

Кондак, глас 8

Избра́нней Бо́гом от самаго́ рожде́ния,/ и призва́нней на служе́ние Ему́,/ в чи́не а́нгельстем Го́сподеви послужи́вшей свя́то,/ и преподо́бно пожи́вшей,/ и ны́не с небе́сными си́лами Го́спода восхваля́ющей,/ о нас же гре́шных пред Го́сподем хода́тайствующей,/ с ра́достию и любо́вию воззове́м:/ ра́дуйся, Евфроси́ние, неве́сто Христо́ва всечестна́я.

Ин кондак, глас тойже

Чи́стое свое́ де́вство и честно́е/ ми́лостынею, я́ко свети́льник елее́м, украси́вшую,/ с му́дрыми де́вами в пресве́тлый черто́г Христо́в вше́дшую,/ Евфроси́нию сла́вную ублажи́м,/ и, припа́дше к честны́м ея́ мощем, наслади́мся ея́ благоуха́ния/ и уми́льне к ней возопии́м:/ я́ко име́я дерзнове́ние ко Христу́ Бо́гу,/ моли́ изба́витися злово́ния страсте́й и спасти́ся душа́м на́шим.

Ин кондак, глас 4

Превита́вши* от земли́ По́лотския,/ оте́чество свое́, я́ко Авраа́м, насле́довавши, Евфроси́ние,/ зе́млю высо́ку сообра́зну Го́рний Сио́н,/ те́мже те́ло твое́ душе́вным благому́жествием, страда́нием по́стным,/ я́ко же́ртву, приноси́ла еси́/ милосе́рдием Свои́м, Да́вшему Себе́ за челове́ки Же́ртву благоприя́тну.

Величание

Ублажа́ем тя,/ преподо́бная ма́ти Евфроси́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Паисию Галичскому, глас 8

Днесь возсия́ нам па́мять твоя́, сла́вне Паи́сие,/ я́ко со́лнце светоза́рное, луча́ми озаря́ющи весь мир,/ та́ко и ты, преподо́бне,/ чудесы́ свои́ми тьму но́щи злых ду́хов от нас отгоня́я./ Днесь Небе́сныя си́лы, и святы́х а́нгел,/ и ду́ши пра́ведных мы́сленно торжеству́ют, ра́дующеся./ Днесь и мы, гре́шнии, припа́дающе честно́му твоему́ о́бразу, мо́лимся:/ о преподо́бне Паи́сие,/ Христа́ Бо́га моли́ непреста́нно/ спасти́ град и лю́ди, и́же тебе́ почита́ющия.

Кондак, глас 3

Возсия́, Го́споди, гра́ду Твоему́ Га́личу,/ я́ко светоза́рное со́лнце, уго́дник Твой Паи́сий,/ ра́достно вселе́нную озаря́я свои́ми чудесы́,/ и приходя́щих с ве́рою ко гро́бу его́ свято́му./ Та́ко моли́твами Пречи́стыя Богородицы от бед всех нас изба́ви,/ и упраздни́ ва́рварская шата́ния,/ я́ко мы, лю́ди Твои́, Го́споди,/ и град наш и страна́ вельми́* Тобо́ю хва́лится,/ и спаса́ется моли́твами преподо́бнаго Паи́сия.

Величание

Ублажа́ем тя,/ преподо́бне о́тче Паи́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Симеону столпнику, Дивногорцу, глас 1

Пусты́нный жи́тель и в телеси́ а́нгел,/ и чудотво́рец яви́лся еси́, Богоно́се о́тче наш Симео́не,/ посто́м, бде́нием, моли́твою небе́сная дарова́ния прии́м,/ исцеля́еши неду́жныя и ду́ши ве́рою приходя́щих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеления.

Кондак, глас 2

Вы́шняя жела́я, до́льняя отложи́в,/ и я́ко не́бо столп соде́лавый,/ тем облиста́л еси́ чуде́с заре́ю, преподо́бне,/ и Христу́ всех Бо́гу мо́лишися непреста́нно о всех нас.

Величание

Ублажа́ем тя,/ преподо́бне о́тче Симео́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Никите Столпнику, Переславльскому чудотворцу, глас 4

Правосла́вным смы́слом ю́ношеская возжеле́ния возненави́дев/ и до́блественныя нра́вы восприи́м, врага́ победи́л еси́/ и во благоразу́мии Бо́гу угоди́л еси́,/ и свы́ше от Него́ прие́м дар чуде́с,/ бе́сы прогоня́ти, неду́ги исцеля́ти,/ Ники́то пресла́вне,/ моли́ Христа́ Бо́га, да спасе́т ду́ши на́ша.

Ин тропарь, глас тойже

Христо́ву му́ченику тезоимени́т был еси́, преподо́бне,/ мно́ги по́двиги и труды́ претерпе́л еси́ Христа́ ра́ди,/ Его́же ра́ди вери́ги носи́л еси́, блаже́нне./ Того́ ны́не о нас моли, Ники́то преподо́бне,/ душе́вныя на́ша и теле́сныя стра́сти уврачева́ти,/ и́же ве́рою и любо́вию/ почита́ющих при́сно па́мять твою́.

Кондак, глас 8

Христа́ ра́ди от твои́х рабо́в ну́ждную* смерть претерпе́л еси́,/ и вене́ц нетле́ния от Него́ восприя́л еси́,/ приходя́щим же с ве́рою от честна́го твоего́ гро́ба подае́ши цельбы́,/ о Ники́то преподо́бне,/ моли́твенниче о душа́х на́ших.

Величание

Ублажа́ем тя,/ преподо́бне о́тче Ники́то,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Предтече и Крестителю Господню Иоанну, глас 4

Я́ко Боже́ственное сокро́вище, сокрове́нное в земли́,/ Христо́с откры́ главу́ твою́ нам, Проро́че и Предте́че./ Вси у́бо соше́дшеся, в сея́ обре́тение,/ пе́сньми богоглаго́ливыми Спа́са воспои́м,/ Спаса́юща нас от тле́ния моли́твами твои́ми.

Кондак, глас 6

Светоявле́нный и Боже́ственный в ми́ре столп,/ со́лнца свети́льник,/ Предте́ча, главу́ светоно́сную и Боже́ственную свою́ показа́вый в конце́х,/ освяща́ет той ве́рно покланя́ющихся и взыва́ющих:/ Христо́в прему́дрый Крести́телю, спаси́ всех нас.

Величание

Велича́ем тя,/ Крести́телю Спа́сов Иоа́нне,/ и почита́ем вси честны́я твоея́ главы́ обре́тение.

Припев Иоанну Предтече

Святы́й вели́кий Иоа́нне Предте́че Госпо́день,/ моли́ Бо́га о нас.

Тропарь апостолу Карпу, глас 3

Апо́столе святы́й Ка́рпе,/ моли́ Ми́лостиваго Бо́га,/да прегреше́ний оставле́ние/ пода́ст душа́м на́шим.

Кондак, глас 4

Я́ко звезду́ пресве́тлую Це́рковь всегда́ стяжа́ тя, апо́столе Ка́рпе,/ чуде́с твои́х многоподава́нием просвеща́ема:/ спаси́ ве́рою чту́щих па́мять твою́.

Величание

Велича́ем тя,/ апо́столе Христо́в Ка́рпе,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Тропарь мученику Георгию Новому, Болгарскому, Софийскому, глас 4

Боже́ственным жела́нием от ю́наго во́зраста/ весь сам себе́ Го́сподеви возложи́в,/ в моли́твах и посте́х о́браз быв доброде́тели,/ бога́тство же и сла́ву, и доброро́дство теле́сное, я́ко не су́щее, презре́в,/ и Христа́ еди́наго от ду́ши возлюби́л еси́,/ и Того́ и́стиннаго су́ща Бо́га в Тро́ице покланя́ема,/ пред нечести́выми пропове́дал еси́,/ и срацы́нскую¹⁸ ве́ру, и зако́ны Моаме́фовы¹⁹ под нога́ми попра́в,/ и мучи́теля ужаси́в*,/ муче́ния венце́м украси́вся, сла́вне,/ к небе́сным восте́кл еси́ ликостоя́нием,/ прему́дре Гео́ргие./ Моли́ Христа́ Бо́га/ сохрани́ти оте́чество твое́, и спасти́ лю́ди и град,/ и́же твоя́ по́двиги при́сно почита́ющия.

Ин тропарь, глас тойже

Боже́ственною уя́звлен любо́вию,/ прему́дре Гео́ргие сла́вне,/ Христа́ Бо́га нечести́вым пропове́дал еси́/ и злоче́стие ту́рское нога́ми попра́л еси́;/ муче́ния же венце́м украси́вся,/ к Небе́сным восте́кл еси́ ликостоя́нием./ Моли́ Христа́ Бо́га/ сохрани́ти оте́чество твое́, град и лю́ди,/ по́двиги твоя́ при́сно почита́ющия.

Ин тропарь, глас тойже

В терпе́нии многоиску́снем, блаже́нне му́чениче Гео́ргие,/ огнеиску́сную смерть претерпе́л еси́/ и по кончи́не твое́й вене́ц от Христа́ нетле́нный/ с му́ченическими ли́ки прия́л еси́./ И ны́не, на земли́ кро́тких достойно водворя́лся,/ Христа́ Бо́га о нас непреста́нно моли́,/ и́же ве́рою покланя́ющихся ра́це моще́й твои́х.

Кондак, глас тойже

Я́ко звезда́ пресве́тлая яви́лся еси́ непреле́стная ми́рови,/ пра́веднаго Со́лнца Христа́ возвеща́ющи страда́нии твои́ми, страстоте́рпче/ вели́кий, му́чениче Христо́в Гео́ргие,/ и пре́лесть погаси́л еси́ срацы́нскую,/ и Моаме́фова преда́ния и зако́ны под нога́ми твои́ми попра́л еси́,/ и беззако́ннаго царя́ и мучи́телей ужаси́л еси́ кре́пким твои́м терпе́нием,/ и ве́рным подае́ши свет,/ моля́ся к Бо́гу непреста́нно о всех нас.

Ин кондак, глас 2

Вы́шния сла́вы жела́я, многострада́льне Гео́ргие,/ ага́рянскую пре́лесть поплева́в, попра́л еси́/ и побе́ды вене́ц прия́л еси́,/ а́нгелом же ны́не свеселя́ся и му́чеником соводворя́яся,/ с ни́миже Христу́ Бо́гу моли́ся непреста́нно о всех нас.

Величание

Велича́ем тя,/ страстоте́рпче святы́й Гео́ргие,/ и чтим честна́я страда́ния твоя́,/ я́же за Христа́/ претерпе́л еси́.

Тропарь преподобному Макарию Калязинскому, глас 8

Плотска́я мудрова́ния, о́тче Мака́рие,/ воздержа́нием и бде́нием умертви́л еси́,/ ме́сто бо, на не́мже по́ты твоя́ излия́л еси́,/ я́ко труба́, вопие́т к Бо́гу,/ пове́дающи твоя́ исправле́ния,/ и по сме́рти честны́я твоя́ мо́щи источа́ют исцеле́ния./ Те́мже вопие́м ти:/ моли́ Христа́ Бо́га, да спасе́т ду́ши на́ша.

Ин тропарь, глас 2

Я́ко дре́во насажде́нное при вода́х воздержа́ния,/ струя́ми слез твоих напоя́ем,/ преподо́бне о́тче Мака́рие,/ се́яв бо слеза́ми, в ра́дости жне́ши доброде́тельныя рукоя́ти;/ тем Вели́кий Мздода́вец плоды́ трудо́в твои́х прия́т/ и в жи́тницах Небе́сных тя сокро́вище положи́,/ но помина́й чту́щих любо́вию пресве́тлую па́мять твою́/ и моли́ Святу́ю Тро́ицу, преподо́бне Мака́рие,/ спасти́ся душа́м на́шим.

Ин тропарь, глас 8

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́, /и был еси́ свети́льник вселе́нней, сия́я чудесы́,/ Мака́рие о́тче наш, моли́ Христа́ Бо́га/ спасти́ся душа́м на́шим.

Кондак, глас 2

Вы́шних жела́я, воздержа́нием и труды́, и по́ты наслади́вся,/ жела́ние пло́ти твоея́ обузда́в,/ чуде́с дар прие́м от Христа́ Бо́га,/ свети́льник яви́лся еси́ пресве́тлый./ Те́мже Христо́ва Це́рковь пе́сньми сла́вит тя,/ преподо́бне Мака́рие, о́тче наш.

Ин кондак, глас 8

Я́ко фи́никс псало́мский во удо́лиих* по́стнических процве́л еси́,/ трудо́в свои́х по́ты, я́ко плоды́ духо́вными, возвели́чил еси́ над все́ми Бо́га,/ но я́ко име́я дерзнове́ние ко Свя́тей Тро́ице,/ помина́й нас, чту́щих любо́вию святу́ю па́мять твою́, да зове́м ти:/ ра́дуйся, преподо́бне Мака́рие, о́тче наш.

Величание

Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Нилу Столобенскому, глас 4

Я́ко свети́льник всесве́тел/ яви́лся еси́ во о́строве Селиге́ра е́зера,/ преподо́бне о́тче Ни́ле,/ ты бо крест Христо́в от ю́ности своея́ на ра́мо взем,/ усе́рдно Тому́ после́довал еси́,/ чистото́ю Бо́гови прибли́жився,/ отону́дуже и чуде́с дарова́нием обогати́лся еси́./ Тем и мы, притека́юще к ра́це моще́й твои́х, уми́льно глаго́лем:/ о́тче преподо́бне,/ моли́ Христа́ Бо́га/ спасти́ся душа́м на́шим.

Кондак, глас 8

Оте́чества, преподо́бне, удали́вся,/ в пусты́ню вселился еси́,/ и на о́стров Селиге́ра е́зера возше́д,/ же́стоко житие́ показа́л еси́,/ и мно́гих доброде́тельми удиви́в,/ дарова́ния чуде́с от Христа́ прия́л еси́./ Помина́й нас, чту́щих па́мять твою́, да зове́м ти:/ ра́дуйся, Ни́ле о́тче наш.

Величание

Ублажа́ем тя,/ преподо́бне о́тче Ни́ле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь праведному Иоанну Русскому, исповеднику, глас 4

На небеси́ предстоя́ Святе́й Тро́ице,/ пра́ведне блаже́нне Иоа́нне,/ земны́й а́нгеле, Бо́жий челове́че,/ с безпло́тными ли́ки славосло́виши Любо́вь Неизрече́нную,/ в Це́ркви перворо́дных со святы́ми водворя́лся,/ о нас, су́щих на земли́, возно́сиши моли́твы/ к Соде́телю всех и Спа́су,/ да пода́ст мир всему́ ми́ру,/ Це́рквам на земли́ благостоя́ние и соедине́ние всех,/ чту́щих Сы́на Бо́жия, во пло́ти прише́дша,/ во святе́м Те́ле Христа́ Иису́са,/ е́же есть Це́рковь Бо́га Жива́го,/ во спасе́ние ро́да челове́ческаго.

Ин тропарь, глас тойже

От земли́ плене́ния твоего́/ Воззва́вый тя к Небе́сным Селе́нием,/ Госпо́дь соблюда́ет невреди́мо и цельбоно́сно те́ло твое́,/ пра́ведне Иоа́нне,/ ты бо, в Росси́и я́тый* и во Аси́ю прода́нный,/ посреде́ ага́рянскаго злоче́стия благоче́стно пожи́л еси́ во мно́зе терпе́нии/ и, се́яв зде слеза́ми,/ жне́ши та́мо неизглаго́ланною ра́достию./ Те́мже моли́ Христа́ Бо́га спасти́ся душа́м на́шим.

Ин тропарь, глас тойже

От земли́ Призва́вший тя в Небе́сныя оби́тели/ сохраня́ет и по сме́рти нетле́нное те́ло твое́, свя́те,/ ты бо я́ко пле́нник приведе́н бысть в Азию,/ иде́же и уподо́бися Христу́./ Сего́ ра́ди моли́ Его́ спасти́ся душа́м на́шим.

Ин тропарь, глас тойже

От земли́ Призва́вый тя в Небе́сныя оби́тели/ соблюда́ет и по сме́рти нетле́нно те́ло твое́, пра́ведне,/ ты бо во Аси́ю я́коже пле́нник взят был еси́,/ иде́же и Христу́ пожи́л еси́, Иоа́нне,/ Его́же у́бо моли́ спасти́ся душа́м на́шим.

Кондак, глас 8

В честне́й па́мяти твое́й, свя́те,/ весели́тся о тебе́ Росси́я,/ во благоче́стии тя воспита́вшая,/ и целе́бным моще́м твои́м ра́дуется Аси́я,/ иде́же у́зкий путь проше́д страда́льческаго пле́на и по́стнических по́двигов,/ сосу́д че́стен яви́лся еси́ Бо́жия благода́ти,/ Ея́же проси́ и нам, чти́телем твои́м, да зове́м ти:/ ра́дуйся Иоа́нне, благода́ти тезоимени́те.

Ин кондак, глас 4

Ны́не приспе́ па́мять сла́вных, свя́те о́тче, дел твои́х/ веселя́ще благочести́выя ду́ши,/ верно чту́щия тя, Иоа́нне.

Ин кондак, глас тойже

Ева́нгельския любве́ служи́теля,/ пра́вды Бо́жия ревни́теля,/ чистоты́ душе́вныя и теле́сныя храни́теля,/ ве́ру Христо́ву испове́давша в страда́ниих,/ пра́веднаго Иоа́нна ублажа́ем и почита́ем днесь/ и, житие́м его́ назида́ющеся, пое́м:/ ра́дуйся, моли́твенниче наш, от Бо́га просла́вленный.

Тропарь на молебне, глас тойже

От земли́ Призва́вый тя в Небе́сныя оби́тели/ соблюда́ет и по сме́рти нетле́нно те́ло твое́, пра́ведне,/ ты бо во Аси́ю, я́коже пле́нник, взят был еси́,/ иде́же и Христу́ пожи́л еси́, Иоа́нне,/ Его́же у́бо моли́ спасти́ся душа́м на́шим.

Ин тропарь, глас тойже

Ко Иоа́нну, ве́рнии, ны́не притеце́м,/ су́щии в беда́х и напа́стех, и припаде́м,/ благоче́стно зову́ще из глубины́ души́:/ пра́ведне, помози́ нам, твои́м моли́твенником,/ потщи́ся и изба́ви належа́щия ну́жды,/ не пре́зри моли́твы ско́рбныя/ притека́ющих ко кро́ву твоему́, свя́те.

Кондак, глас 4

Ева́нгельския любве служи́теля,/ пра́вды Бо́жия ревни́теля,/ чистоты́ душе́вныя и теле́сныя храни́теля,/ ве́ру Христо́ву испове́давша в страда́ниих,/ пра́веднаго Иоа́нна ублажа́ем и почита́ем днесь/ и, житие́м его́ назида́ющеся, пое́м:/ ра́дуйся, моли́твенниче наш, от Бо́га просла́вленный.

Величание

Велича́ем тя,/ святы́й пра́ведный о́тче Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Ферапонту Белоезерскому, Можайскому, Лужецкому, глас 4

Житие́м чи́стым просвети́вся,/ в моли́твах и посте́х пусты́ни яви́лся еси́ до́брое прозябе́ние*/ и, духо́вному твоему́ учи́телю после́дствуя,/ ум свой к Небе́сному упра́вль,/ ста́ду твоему́ наста́вник был еси́./ Тем тя мо́лим, о́тче Ферапо́нте,/ моли́ Христа́ Бо́га спасти́ся душа́м на́шим.

Кондак, глас тойже

Преблаги́й Спас наш Христо́с/ умно́жил есть ми́лость Свою́ к нам,/ дарова́в нам засту́пника и цели́теля/ преподо́бнаго отца́ на́шего Ферапо́нта,/ и́же просвеща́ет нас о́бразом свята́го жития́ своего́/ и ны́не моли́твами свои́ми огражда́ет храм свой от враго́в и разруше́ния,/ страну́ сию́ от гла́да и напра́сныя сме́рти,/ чту́щих же па́мять его́ всех/ от боле́зней и лю́тых страсте́й.

Ин кондак, глас 8

Христо́вым жела́нием распали́вся,/ стра́сти плотски́я воздержа́нием оттря́с,/ по́стническое стяжа́в жи́тельство, преподо́бне./ Сего́ ра́ди Госпо́дь, труды́ твоя́ ви́дев,/ да́ром чуде́с обогати́ тя;/ источа́вши бо исцеле́ния и мо́лишися о нас к Бо́гу,/ мы же, ра́дующеся, вопие́м ти:/ ра́дуйся, Ферапо́нте, о́тче наш.

Величание

Ублажа́ем тя,/ преподо́бне о́тче Ферапо́нте,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителям Киприану, Фотию и Ионе, митрополитам Московским и всея Руси, глас 8

Я́ко Све́тлаго Со́лнца светоза́рныя зве́зды,/ Тро́ическим Све́том озаря́ете сердца́ ве́рных,/ пренесе́нием честны́х моще́й ва́ших,/ Тро́ицы сосу́ди яви́стеся чи́стии ва́шим житие́м,/ и научи́сте лю́ди тве́рдо ве́ре Христо́ве,/ и скве́рну отогна́сте ва́шими святы́ми за́поведьми,/ и упасо́сте до́бре Христо́во ста́до, пору́ченное вам,/ Богому́дре Киприа́не, со сла́вным Фо́тием и со Ио́ною тве́рдым,/ моли́теся Христу́ Бо́гу, да спасе́т ду́ши на́ша.

Кондак, глас тойже

Я́ко трие́ вели́чии свети́ла, яви́стеся,/ озаря́юще всю подсо́лнечную/ Богода́нною вам благода́тию чуде́с,/ и просвети́сте моли́твами свои́ми ве́рных сердца́,/ ва́шу па́мять чту́щих честна́го пренесе́ния./ И Влады́ку Христа́ всех Творца́ мо́лите/ стране́ на́шей на враги́ побе́ду пода́ти,/ я́ко иму́ще дерзнове́ние,/ и нам проси́те ве́лия ми́лости, вопию́щих к вам:/ ра́дуйтеся, побо́рницы по Христо́ве Це́ркви/ и многочестна́я свети́ла, святи́телие сла́внии.

Ин кондак, глас тойже

Я́ко крин, в пусты́ни дави́дски процве́тше, о́тцы святи́и,/ ны́не яви́стеся и к Вы́шнему тече́нию ра́достно устреми́стеся,/ иде́же с ли́ки святы́х Пресвяте́й Тро́ице предстоя́ще,/ мо́лите сохрани́тися гра́ду ва́шему от враг ви́димых и неви́димых./ Мы же, свято́е ва́ше обре́тение пра́зднующе, вопие́м:/ ра́дуйтеся, те́плии на́ши засту́пницы.

Тропарь святителю Киприану, митрополиту Московскому, всея России чудотворцу (память преставления 16 сентября), глас 4

И́же от Бо́га свы́ше Боже́ственною благода́тию соверше́н/ и благи́ми нра́вы укра́шен,/ Ду́хом Святы́м просвеще́н,/ соверши́в святы́ню в стра́се Бо́жии,/ сподо́блен бысть благода́ти Боже́ственнаго Ду́ха,/ пасы́й Це́рковь Бо́жию Ру́сский митропо́лиии,/ посто́м вся побора́я, волне́ние претерпе́,/ гоне́ние премену́в, свята́го Петра́ митрополи́та всегда́ себе́ в по́мощь призыва́я,/ и сего́ помо́щника име́я,/ и того́ стопа́м после́дуя./ Служи́тель благоприя́тный,/ за́поведи Бо́жия соблюда́я,/ Ду́хом Бо́жиим наставля́емь,/ просвеща́я ве́рныя лю́ди уче́нием слове́с твои́х,/ поще́нием украси́ житие́ свое́,/ яре́м Госпо́день измла́да восприи́м,/ и па́че всех Христа́ возлюби́./ Того́ ра́ди и архиере́йским седа́лищем почте́н,/ и, я́ко светоза́рное со́лнце, от Се́рбския земли́ происше́д,/ и по вся концы́ Ру́сския земли́ доброде́телию просия́в,/ свети́ло яви́ся ми́рови,/ и преста́вися ко Го́споду от сея́ жи́зни в ве́чный поко́й,/ вели́кий архиере́ю Бо́жий, Киприа́не митрополи́те,/ учи́телю и наста́вниче Ру́сския земли́,/ всегда́ предстоя́ Престо́лу Пресвяты́я Тро́ицы,/ моли́ Го́спода приле́жно об архиере́ех и о всех христиа́нех,/ да спасе́т тебе́ ра́ди ду́ши на́ша.

Кондак, глас 2

Необори́м столп Правосла́вия,/ ве́ре Христо́ве утвержде́ние,/ це́рквам украси́тель, прему́дрый учи́тель,/ се́рбское воспита́ние, ру́сское процвете́ние,/ Госпо́днею любо́вию распаля́емь,/ Ду́ху Пресвято́му дом яви́ся/ и ду́шу, я́ко же́ртву непоро́чну, Го́сподеви принесе́,/ досточу́дне и всече́стне Киприа́не, святи́телю Христо́в,/ сего́ ра́ди всели́ся в широту́ ра́йскую,/ предстоя́ Христу́ в ли́це святы́х,/ Ему́же моли́ся и спаса́й град и лю́ди от пога́ных нахожде́ния,/ я́ко да зове́м ти:/ ра́дуйся, о́тче Киприа́не, учи́телю прему́дрый.

Тропарь святителю Фотию, митрополиту Московскому, всея России чудотворцу (память преставления 2 июля), глас 4

Слове́с Ева́нгельских послу́шателю/ и Боже́ственных уче́ний рачи́телю,/ прему́дрый наказа́телю,/ всегда́ стра́ху Госпо́дню поуча́яйся,/ в моли́твах к Бо́гу простира́яйся,/ загради́телю усте́н кривоглаго́лющим сло́во Пра́выя ве́ры,/ я́ко апо́столом соприча́стниче,/ ве́ре Христо́вой утверди́телю,/ проро́чески веща́телю, святи́телю Фо́тие,/ моли́ Христа́ Бо́га/ умири́ти мир и спасти́ ду́ши на́ша.

Кондак, глас 8

Тро́ице сосу́д яви́ся честны́й твои́м житие́м,/ святи́телю Фо́тие, всегда́ зря́щий Святу́ю Тро́ицу,/ Е́йже предстои́ши, моли́ся непреста́нно о всех нас.

Тропарь святителю Ионе, митрополиту Московскому, всея России чудотворцу (память преставления 31 марта), глас 4

От ю́ности твоея́ весь сам себе́ Го́сподеви возложи́в,/ в моли́твах, и труде́х, и в посте́х о́браз быв доброде́тели,/ отону́дуже, ви́дев Бог твое́ благо́е произволе́ние,/ архиере́я тя и па́стыря Це́ркви Свое́й устроя́ет./ Те́мже и по преставле́нии честно́е те́ло твое́ це́ло и нетле́нно соблюде́ся,/ Ио́но святи́телю,/ моли́ Христа́ Бо́га да спасе́т ду́ши на́ша.

Кондак, глас 8

Я́ко от младе́нства Го́сподеви порабо́тив себе́, му́дре,/ посто́м и бде́нием те́ло твое́ удруча́я,/ те́мже сосу́д чист и дом Ду́ху Пресвято́му яви́лся еси́./ Сего́ ра́ди и Це́ркви Свое́й тебе́ архиере́я и па́стыря устроя́ет,/ ю́же до́бре упас, ко Го́споду отхо́диши, Его́же возлюби́л еси́./ Тем мо́лим тя:/ помина́й нас, ве́рою чту́щих святу́ю па́мять твою́, да вси зове́м ти:/ ра́дуйся, о́тче Ио́но, святи́телю всечестны́й.

Тропарь святителю Филиппу Первому, митрополиту Московскому, всея России чудотворцу (память преставления 5 апреля), глас 3

Чу́до яви́ся, извеще́нием и де́лы возсия́в,/ Ду́ха Свята́го произбра́нием святи́тельства па́ству прии́м,/ открове́нием Бо́жиим це́рковь разобра́/ и велича́йшую воздви́же,/ всече́стне Фили́ппе, святи́телю вели́кий,/ мир гра́ду да́руй на́шему Москве́/ и ве́лию ми́лость.

Кондак, глас 8

В успе́нии твое́м обрето́ша на телеси́ твое́м сокро́вище некра́домое:/ два креста́ и тягча́йшая желе́за, е́же есть вери́ги,/ посто́м и моли́твами Бо́гу угоди́л еси́, святи́телю Фили́ппе,/ моли́ Христа́ Бо́га о всех нас.

Величание

Велича́ем вас,/ святи́телие вели́ции Киприа́не, Фо́тие, Ио́но и Фили́ппе,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь преподобному Ферапонту Монзенскому, Галичскому, глас 8

Любо́вию Христо́вою, Богому́дре, просвети́вся и доброде́тельми,/ сожи́тельствовал еси́ Васи́лию блаже́нному,/ и, вся́кое наслажде́ние плотско́е возненави́дев,/ в пусты́ню всели́лся еси́,/ в не́йже вельми́ подвиза́лся еси́ в жи́зни сей вре́менней,/ плоть умерщвля́я Твою́ в пе́ниих, и во бде́ниих, и в поще́ниих./ Те́мже и Христо́с да́ром чуде́с обогати́ тя,/ но помина́й у́бо нас, чту́щих пресве́тлую па́мять твою́,/ преподо́бне о́тче Ферапо́нте,/ и моли́ Христа́ Бо́га спасти́ся душа́м на́шим.

Кондак, глас тойже

Возложи́в себе́ Бо́гу от ю́ности, преподо́бне,/ Того́ па́че всех возлюби́в,/ и Тому́ от всея́ души́ любо́вию после́довал еси́,/ тле́нная и кра́сная ми́ра нивочто́же вмени́в, в пусты́ню всели́вся,/ в не́йже до́бре подвиза́лся еси́ проти́ву неви́димых враго́в ко́зней/ и, я́ко светоза́рное со́лнце в конца́х Га́лическия земли́ возсия́л еси́,/ отону́дуже* веселя́ся прише́л еси́ к Небе́сным оби́телем./ И ны́не со а́нгелы Влады́чню престо́лу предстоя́,/ помина́й нас, чту́щих па́мять твою́, да зове́м ти:/ ра́дуйся, Ферапо́нте отче наш.

Величание

Ублажа́ем тя,/ преподо́бне о́тче Ферапо́нте,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Никите Исповеднику, епископу Халкидонскому, глас 4

Пра́вило ве́ры, и о́браз кро́тости... (общий святителю).

Кондак, глас 8

Све́тлостию дел твои́х просия́л еси́, преподо́бне,/ апо́стольскаго престо́ла насле́дник был еси́, Ники́то,/ и я́ко со́лнце облиста́л еси́ твое́й па́стве, о́тче,/ вся Боже́ственных уче́ний испо́лнь./ Те́мже зове́м ти:/ ра́дуйся, Халкидо́ну удобре́ние.

Величание

Велича́ем тя,/ святи́телю о́тче Ники́то,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Игнатию, епископу Ростовскому, глас 4

Благове́рия просве́щся уче́нии,/ святи́тельства прие́м па́ству,/ и апо́столом насле́дник быв,/ тем прия́л еси́ от Бо́га дар чуде́с,/ святи́телю о́тче Игна́тие,/ моли́ Христа́ Бо́га,/ да спасе́т ду́ши на́ша.

Кондак, глас тойже

Яви́ся днесь пресве́тлая па́мять твоя́,/ святи́телю преблаже́нне Игна́тие,/ в ми́ре све́тло сия́ющи и явля́ющи всем Боже́ственное сия́ние.

Величание

Велича́ем тя,/ святи́телю о́тче Игна́тие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Геронтию, митрополиту Московскому и всея Руси, глас 6

Днесь душа́ вся́ка весели́тся/ на па́мять успе́ния святи́теля Христо́ва Геро́нтия,/ прему́дрости ревни́теля/ и кро́тости учи́теля,/ смире́нию наказа́теля,/ уче́нием Боже́ственных слове́с ве́рный наслади́вшаго./ Ру́сскаго митрополи́та похва́лим,/ святи́тельства па́ству прии́мшаго,/ украси́вшаго Це́рковь Христо́ву./ Тем и Христо́с ви́дя твое́ благопроизволе́ние,/ причте́ тя в лик пра́ведных,/ святи́телю Геро́нтие,/ моли́ Христа́ Бо́га и Пречи́стую Богоро́дицу/ непреста́нно о всех нас.

Кондак, глас 2

Бо́жиим Ду́хом и́ночество вожделе́/ и восприя́ Ду́ха Свята́го благода́тию,/ и святи́тельства са́на сподо́бился еси́,/ содержа́ще престо́л Ру́сския Митропо́лии,/ и бысть па́стырь и учи́тель от ро́да ру́сскаго,/ пасы́й ста́до Христо́во слове́сных ове́ц,/ и обре́те благода́ть от Го́спода, Геро́нтие святи́телю,/ Ему́же всегда́ о нас непреста́нно моли́ся,/ спасти́ся душа́м на́шим.

Величание

Велича́ем тя,/ святи́телю о́тче Геро́нтие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Божией Матери ради иконы Ее, именуемой Никейская, глас 4

Бысть чре́во Твое́ свята́я трапе́за,/ иму́щи Небе́снаго Хле́ба, Христа́,/ от Него́же всяк яды́й не умира́ет,/ я́коже рече́ вся́ческих,/ Богоро́дице, Пита́тель.

Кондак, глас 6

Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас,/ ве́рно зову́щих Ти:/ ускори́ на моли́тву и потщи́ся на умоле́ние,/ предста́тельствующи при́сно, Богоро́дице, чту́щих Тя.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь преподобномученице Феодосии деве, Цареградской, глас 4

Доброде́тель благоприя́тно, му́ченице, пости́гла еси́,/ Христо́во прия́телище бы́вши чи́стое,/ и Свята́го Ду́ха дом возлю́блен;/ отню́дуже посрами́ла еси́ врага́, борю́щего род челове́ческий,/ до́бре страда́вшая,/ и посе́кла еси́ Копрони́ма, Феодо́сие, мече́м ве́ры,/ и к Черто́гу Небе́сному преста́вилася еси́, ра́дующися./ Тебе́ ве́рою чту́щим/ при́сно проси́ ве́лия ми́лости.

Кондак, глас 2

Труда́ми живо́т нетру́дный дости́гла еси́,/ кро́вию же Копрони́ма удави́ла еси́, му́ченице,/ скве́рнаго врага́ Христо́вы Це́ркве, всеблаже́нная Феодо́сие,/ и с Вы́шними ра́дующися во́инствы,/ чту́щих па́мять твою́ покрыва́ющи.

Ин кондак, глас 4

Боже́ственная па́мять твоя́, Феодо́сие,/ днесь возсия́вши,/ яви́ся ми́рови я́ко со́лнце,/ сказу́ющи житие́ твое́./ Ты бо воздержа́нием плотска́я двиза́ния разо́рши/ и страда́ния кро́вию уневе́стилася еси́ Христо́ви./ Те́мже хваля́щия тя изба́ви от вся́ких зол,/ да зове́м ти:/ ра́дуйся, ма́ти преподо́бная.

Величание

Велича́ем тя,/ страстоте́рпице свята́я Феодо́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь блаженному Иоанну, Христа ради юродивому, Устюжскому, глас 5

Нагото́ю теле́сною и терпе́нием/ обнажи́л еси́ вра́жия кова́рствия,/ облича́я неподо́бное его́ дея́ние,/ зе́льне стражда́ со́лнечный вар/ и ну́ждныя вели́кия сту́дени мра́за/ и огня́ не чул еси́,/ Бо́жиею по́мощию покрыва́емь,/ Иоа́нне прему́дре,/ моли́ о ве́рою творя́щих па́мять твою́ че́стно/ и усе́рдно притека́ющих к ра́це моще́й твои́х,/ изба́витися от бед и паде́ния избежа́ти.

Кондак, глас 8

Вы́шния красоты́ жела́я,/ ни́жния сла́дости, теле́сное яде́ние тща́тельно оста́вил еси́,/ нестяжа́нием су́етнаго мира, возлюби́л еси́ а́нгельское житие́,/ преходя́ сконча́вся, Иоа́нне блаже́нне;/ с ни́миже моли́ Христа́ Бо́га непреста́нно о всех нас.

Ин кондак, глас 1

Иоа́нне прему́дре,/ земны́я сла́вы не возлюби́в,/ того́ ра́ди я́ко неи́стовся* творя́,/ жела́я Ца́рство Небе́сное насле́довати,/ ударе́ния и укоре́ния прие́мля,/ наготу́ и зной терпя́,/ тем ны́не со а́нгелы лику́еши,/ моли́ Христа́ Бо́га о душа́х на́ших.

Величание

Ублажа́ем тя,/ святы́й пра́ведный Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Божией Матери ради иконы Ее «Споручница грешных», глас 4

Умолка́ет ны́не вся́кое уны́ние/ и страх отча́яния исчеза́ет,/ гре́шницы в ско́рби се́рдца обрета́ют утеше́ние/ и Небе́сною любо́вию озаря́ются све́тло:/ днесь бо Ма́терь Бо́жия простира́ет нам спаса́ющую ру́ку/ и от пречи́стаго о́браза Своего́ веща́ет, глаго́ля:/ Аз Спору́чница гре́шных к Моему́ Сы́ну,/ Сей дал Мне за них ру́це слы́шати Мя вы́ну./ Те́мже, лю́дие, обремене́ннии грехи́ мно́гими,/ припади́те к подно́жию ико́ны Ея́, со слеза́ми вопию́ще:/ Засту́пнице ми́ра, гре́шным Спору́чнице,/ умоли́ Ма́терними Твои́ми моли́твами Изба́вителя всех,/ да Боже́ственным всепроще́нием покры́ет грехи́ на́ша/ и све́тлый две́ри ра́йския отве́рзет нам,/ Ты бо еси́ предста́тельство и спасе́ние ро́да христиа́нскаго.

Ин тропарь, глас 3

Тебе́, милосе́рдия исто́чнику при́сно теку́щему и Спору́чнице гре́шных,/ недосто́йнии раби́ Твои́, Богоро́дице,/ припа́дающе, скорбя́ще, вопие́м Ти:/ спаса́й нас от бед, Влады́чице,/ и Ма́терним Твои́м хода́тайством испроси́ всем нам ве́чное спасе́ние.

Кондак, глас 1

Честно́е Жили́ще бы́вши/ неизрече́ннаго естества́ Боже́ственнаго/ вы́ше сло́ва и па́че ума́,/ и гре́шным еси́ Спору́чница,/ подава́еши благода́ть и исцеле́ния,/ я́ко Ма́ти всех Ца́рствующаго, моли́ Сы́на Твоего́,/ получи́ти нам ми́лость в день су́дный.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь святым отцам Первого Вселенского собора, глас 8

Препросла́влен еси́, Христе́ Бо́же наш,/ свети́ла на земли́ отцы́ на́ша основа́вый,/ и те́ми ко и́стинней ве́ре вся ны наста́вивый;/ Многоблагоутро́бне, сла́ва Тебе́.

Кондак, глас тойже

Апо́стол пропове́дание и оте́ц догма́ты/ Це́ркви еди́ну ве́ру запечатле́ша,/ я́же и ри́зу нося́щи и́стины,/ истка́ну от е́же свы́ше богосло́вия,/ исправля́ет и сла́вит благоче́стия вели́кое та́инство.

Тропарь преподобному Исаакию Исповеднику, игумену обители Далматской, глас 8

В тебе́, о́тче, изве́стно спасе́ся... (общий преподобному).

Кондак, глас тойже

Я́ко уго́дник Бо́жий ве́рный,/ по Христо́ве Це́ркви ре́вностию разже́гся,/ бразды́ Уа́лентовы удержа́в,/ проро́чески тому́ о затворе́нии це́ркви, па́губную смерть предре́кл еси́, преподо́бне./ Те́мже при́сно моли́ о нас, чту́щих тя, Исаа́кие преподо́бне.

Величание

Ублажа́ем тя,/ преподо́бне о́тче Исаа́кие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Филиппу Второму, митрополиту Московскому и всея Руси, глас 5

Ра́достный возсия́ день све́тлаго торжества́:/ днесь церко́вная расширя́ются не́дра,/ прие́млюще духо́вных даро́в неоскуде́емо боготво́рное сокро́вище,/ струю́ благода́тей неисчерпа́емую,/ исто́чника чудеса́м оби́льна,/ чудотвори́выя и свяще́нныя мо́щи твоя́,/ святи́телю Фили́ппе./ Те́мже моли́ просла́вившаго тя Дарода́теля Христа́ Бо́га/ о воспева́ющих тя/ и кла́няющихся свяще́нным моще́м твои́м.

Кондак, глас 3

Я́ко со́лнце, днесь от земны́х недр возсия́ша/ честны́я твоя́ мо́щи, святи́телю./ Зе́млю же и во́здух ше́ствием твои́м освети́л еси́/ и всех ве́рных чуде́с богозна́меньми облиста́л еси́,/ чудотво́рец преди́вен и моли́твенник к Бо́гу о ми́ре изя́щен яви́ся./ Сего́ ра́ди вопие́м ти:/ спаса́й нас те́плым свои́м предста́тельством,/ я́ко учени́к Бо́жия благода́ти.

Величание

Велича́ем тя,/ святи́телю о́тче Фили́ппе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь мученику Ермию, глас 4

Му́ченик Твой, Го́споди... (общий мученику).

Кондак, глас 6

И́же по Хри́сте усе́рдно подвиза́вся,/ в седи́нах до́блих му́жество стяжа́л еси́, му́чениче Ерми́е,/ беззако́нных злоумышле́ние попра́в Христо́вою си́лою,/ от чаро́вных напое́ний невреди́м пребы́сть, зовы́й:/ Бог есть со мно́ю, и никго́же на мя.

Величание

Велича́ем тя,/ страстоте́рпче святы́й Ерми́е,/ и чтим честна́я страда́ния твоя́,/ я́же за Христа́/ претерпе́л еси́.

Тропарь апостолу Ерму, глас 3

Апо́столе святы́й Ерми́е,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Кондак, глас 4

Я́ко звезда́, возсия́л еси вселенне́й,/ све́том просия́в со́лнца, блаже́нне,/ всесве́тлаго Па́вла,/ ми́ра просве́щшаго концы́,/ сего́ ра́ди тя чтим, Ерми́е.

Величание

Велича́ем тя,/ апо́столе Христо́в Ерми́е,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Тропарь Божией Матери ради иконы Ее «Нерушимая Стена», глас 4

Я́ко неруши́мую сте́ну/ и всемо́щный покро́в/ стяжа́хом Тя, раби́ Твои́, Влады́чице Богоро́дице,/ мрак грехо́в и скорбе́й отгоня́ющую./ Те́мже вопие́м Ти: мир ми́рови да́руй/ и душа́м на́шим свет и спасе́ние.

Тропарь мученику Иустину Философу, глас 4

Му́ченик Твой, Го́споди... (общий мученику).

Кондак, глас 2

Прему́дростию Боже́ственных твои́х слове́с,/ Иусти́не,/ Це́рковь Бо́жия вся украси́вшися,/ жития́ твоего́ све́тлостию мир освеща́ет,/ излия́ния же ра́ди кро́ве вене́ц прие́м,/ и со а́нгелы предстоя́ Христу́/ моли́ непреста́нно о всех нас.

Величание

Велича́ем тя,/ страстоте́рпче святы́й Иусти́не,/ и чтим честна́я страда́ния твоя́,/ я́же за Христа́/ претерпе́л еси́.

Тропарь преподобному Дионисию, игумену Глушицкому, глас 1

Боже́ственною любо́вию от ю́ности распаля́емь,/ Диони́сие преподо́бне,/ вся я́же в ми́ре кра́сная возненави́дев,/ Христа́ еди́наго возлюби́л еси́,/ и сего́ ра́ди во вну́треннюю пусты́ню всели́лся еси́,/ со зверьми́ живы́й, весь Христо́ви./ Отону́дуже и Всеви́дящее Око, твоя́ труды́ ви́дев,/ да́ром чуде́с и по преставле́нии обогати́л тя есть./ Те́мже вопие́м ти:/ моли́ непреста́нно о всех нас,/ честну́ю па́мять твою́ при́сно/ в пе́снех почита́ющих.

Кондак, глас 8

Все твое́ у́мное жела́ние к Бо́гу впери́в,/ Тому́ невозвра́тно от души́ после́довал е́си, в пусты́ню всели́вся,/ и та́мо а́нгельски пожи́в, мно́гим путь был еси́ ко спасе́нию,/ сего́ ра́ди и Христо́с тебе́ просла́ви и да́ром чуде́с обогати́./ Те́мже вси вопие́м ти:/ ра́дуйся, Диони́сие преподо́бне, пусты́нный жи́телю.

Величание

Ублажа́ем тя,/ преподо́бне о́тче Диони́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Агапиту Печерскому, врачу безмездному, в Ближних пещерах почивающему, глас 5

Богоно́снаго Анто́ния ревну́я смиренному́дрию,/ а́ки не́киим врачевство́м, зе́лием сне́дным/ исцеля́л еси́ боля́щия, преподо́бне Агапи́те,/ тем и врача́ неве́рна уве́рив,/ наста́вил еси́ на путь спасе́ния./ Уврачу́й и на́ша боле́зни/ и моли́ся Го́сподеви о воспева́ющих тя.

Кондак, глас 6

Врач сый изря́ден, чу́дне,/ явля́я несумне́нную твою́ ве́ру,/ облича́я же армени́ново неве́рие/ и приводя́ его́ к благоче́стию,/ себе́, близ сме́рти бы́вшу,/ испроси́л еси́ от Бо́га продолже́ние живота́/ и, сим чу́дом того́ уве́рив,/ приве́л еси́ Христо́ви,/ Ему́же в весе́лии предстоя́,/ моли́ся о нас, преподо́бне.

Величание

Ублажа́ем тя,/ преподо́бне о́тче Агапи́те,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Никифору Исповеднику, патриарху Константинопольскому, глас 4

Пра́вило ве́ры, и о́браз кро́тости... (общий святителю).

Ин тропарь, глас тойже

Иже перворо́днаго Ца́рства оте́ц,/ правове́рныя слу́жбы и́стинный па́стырь бысть, преподо́бне,/ Царя́ гра́да, Це́ркви всех ма́тере яви́ся свети́льник, Ники́форе,/ моли́ Христа́ Бо́га,/ да спасе́т ду́ши на́ша.

Кондак, глас тойже

Побе́ды вене́ц с небесе́, о Ники́форе пресла́вне, я́ко прие́м от Бо́га,/ спаса́й ве́рою почита́ющия тя,/ я́ко священнонача́льника Христо́ва и учи́теля.

Величание

Велича́ем тя,/ святи́телю о́тче Ники́форе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь великомученику Иоанну Новому, Сочавскому, глас 4

Житие́ на земли́ до́бре окормля́я, страда́льче,/ ми́лостынями, и ча́стыми моли́твами, и слеза́ми,/ па́ки же ко страда́нию му́жески устреми́вся,/ пе́рсское обличи́л еси́ нече́стие./ Те́мже Це́ркве был еси́ утвержде́ние/ и христиа́н похвале́,/ Иоа́нне приснопа́мятне.

Кондак, глас тойже

Морску́ю пла́вая пучи́ну ку́плею,/ от восто́ка тща́лся еси́ к се́веру,/ но Бо́гу призва́вшу тя,/ я́коже Матфе́й мы́тницу, ты же ку́плю оста́вль/ и Тому́ после́довал еси́ кро́вию муче́ния,/ вре́менными искупи́в непроходи́мая,/ и вене́ц прия́л еси́ непобеди́мый.

Величание

Величаем тя,/ страстоте́рпче святы́й Иоа́нне,/ и чтим честна́я страдания твоя́,/ я́же за Христа́/ претерпе́л еси́.

Тропарь праведной Иулиании, княгине Вяземской, Новоторжской, глас 2

Благоче́стно в зако́не пожи́вши/ и благи́ми де́лы украси́вшися,/ я́ко кре́пкий адама́нт*, яви́ся,/ целому́дренная свята́я благове́рная княги́не Иулиани́е,/ тле́нную сла́ву и добро́тство теле́сное презре́вши,/ злоко́зненнаго врага́ победи́ла еси́,/ целому́дрия ра́ди му́ченическую сме́рть прия́ла еси́./ Сего́ ра́ди от Христа́ Бо́га нетле́нным и ве́чным венце́м венча́вшися,/ ны́не с ли́ки му́ченик лику́еши/ и нам ве́лия чудеса́, приходя́щим ко гро́бу твоему́,/ оби́льно источа́еши./ Те́мже ти вопие́м:/ моли́ся Христу́ Бо́гу о всех нас,/ ве́рою и любо́вию страда́ния твоя́ почита́ющих.

Кондак, глас тойже

Воспое́м днесь Благоде́теля всех Бо́га,/ просла́вльшаго в Росси́и Иулиани́ю Богому́друю,/да моли́твами ея́ пода́ст душа́м на́шим/ грехо́в оставле́ние и ве́лию ми́лость.

Величание

Велича́ем тя,/ свята́я пра́ведная княги́не Иулиани́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь священномученику Еразму Охридскому, глас 4

Преподо́бно житие́ твое́ проше́д, му́дре,/ све́тлым украси́лся еси́ хито́ном свяще́нства./ Пролива́я же кровь му́ченичества, Ера́зме,/ сподо́бился еси́ свы́ше мздов* неле́стных/ и, предстоя́ Тро́ице, мо́лишися о нас, воспева́ющих тя.

Кондак, глас тойже

Во святи́телех благоче́стно пожи́в,/ и муче́ния путь проше́д... (общий священномученику).

Величание

Велича́ем тя,/ священному́чениче Ера́зме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь мученику Лукиллиану и иже с ним, глас 4

Му́ченицы Твои́, Го́споди... (общий мученикам).

Кондак, глас 8

Свети́льницы све́тлии я́вльшеся... (общий мученикам).

Величание

Велича́ем вас,/ страстоте́рпцы святи́и Лукиллиа́не, Клавди́е, Ипа́тие, Па́вле, Диони́сие и Па́вло де́во,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь благоверному царевичу Димитрию Угличскому и Московскому, глас 3

Днесь вельми́ хва́лится ца́рствующий град Москва́,/ име́я в себе́ пра́ведныя твоя́ мо́щи,/ благове́рне царе́виче Дими́трие,/ я́ко цве́ти благоуха́ннии,/ пребыва́еми во святе́м хра́ме,/ просвеще́ние подаю́т душа́м и те́лом на́шим./ Тем ра́достно тя восхваля́ем,/ и честно́е пренесе́ние моще́й твои́х ве́рно почита́ем, и мо́лим тя:/ моли́ Христа́ Бо́га/ дарова́ти нам ве́лию ми́лость.

Ин тропарь, глас 2

Я́ко благочести́ваго ца́рскаго ко́рене/ Боголюби́вый произы́де плод,/ я́ко а́гня незло́биво,/ непови́нно во младе́нчестве закла́н бысть от властолю́бца,/ вку́пе и от зла́го раба́,/ тем, я́ко златы́ми кри́лы душе́вною чистото́ю/ и младе́нческим незло́бием к Небе́сней высоте́ возлете́л еси́, Дими́трие,/ и ны́не кровь твоя́ от земли́ та́йно вопие́т к Бо́гу,/ я́ко Авеля пра́веднаго,/ и сего́ ра́ди покланя́емся ве́рою твои́х моще́й ра́це,/ из нея́же ре́ки чуде́с излива́еши,/ приходя́щим ти с ве́рою/ и любе́зно целу́ющим многоцеле́бныя твоя́ мо́щи,/ сла́вящим просла́вльша го тя Бо́га,/ Его́же моли́, держа́вный страстоте́рпче Дими́трие,/ правосла́вным сыново́м ру́сским спасти́ся.

Кондак, глас 4

Я́ко пресве́тлая звезда́,/ яви́лся еси́ днесь в ца́рствующем гра́де Москве́,/ благове́рне царе́виче Дими́трие,/ сия́я пра́ведными свои́ми мощми́./ К ни́мже притека́юще, исцеле́ния дар прие́млем и глаго́лем:/ ра́дуйся, всекра́сне душе́ю,/ благоро́дне Дими́трие,/ я́ко прия́л еси́ от Бо́га ве́лий сей дар/ и вене́ц нетле́нный.

Ин кондак, глас 8

Свети́ло пресве́тлое яви́ся днесь Боже́ственная па́мять твоя́:/ богодарова́нная ти чудеса́, я́ко ре́ки,/ от вся́ких многоразли́чных неду́г подае́ши исцеле́ние с ве́рою призыва́ющим тя,/ созыва́я нас к похвале́нию прославля́ющаго тя Бо́га./ Его́же моли́, страстоте́рпче Дими́трие,/ мир ми́рови дарова́ти,/ от ви́димых и неви́димых враг правосла́вныя лю́ди невреди́мы сохрани́ти, да зове́м ти: ра́дуйся,/ ты бо еси́ утвержде́ние гра́ду на́шему.

Величание

Велича́ем тя,/ благове́рне царе́виче Дими́трие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Димитрию Прилуцкому, Вологодскому чудотворцу, ради сретения его образа в Вологде, глас 4

Возсия́ днесь, я́ко со́лнце,/ пречестны́й о́браз священноле́пнаго твоего́ подо́бия,/ па́че со́лнца луча́ми чуде́с твои́х всех озаря́я,/ тьму бесо́вскую без ве́сти творя́,/ его́же ра́достно срета́ху,/ духо́вный ли́ки соста́вльше,/ непреста́нно вопие́м ти:/ Дими́трие, о́тче наш, моли́ Спа́са всех/ сохрани́ти град твой и страну́ на́шу,/ ста́ду твоему́ спасе́ние подава́я и ве́лию ми́лость.

Кондак, глас 8

Христа́ еди́наго в жи́зни сей во след идти́ возжела́л еси́/ и, Того́ любо́вию земна́я отри́нув, премину́в Небе́сными²⁰,/ с ли́ки Ангел водворя́яся, неотсту́пно предстои́ши Бо́гови,/ тем и ны́не пресвято́му твоему́ о́бразу сре́тения пра́здник ра́достно сотворя́юще,/ от неду́г исцеле́ние прие́млем, благода́рно вопию́ще:/ ра́дуйся, преподо́бне о́тче Дими́трие, по́стников удобре́ние.

Величание

Ублажа́ем тя,/ преподо́бне о́тче Дими́трие,/ и, чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее, именуемой Югская, глас 4

Днесь, я́ко со́лнце пресве́тлое,/ возсия́ нам на возду́се/ всечестна́я ико́на Твоя́, Влады́чице,/ луча́ми ми́лости мир просвеща́ющи,/ ю́же вели́кая Росси́я,/ я́ко не́кий дар Боже́ственный, свы́ше благогове́йне восприе́мши,/ прославля́ет Тя, Богома́ти, всех Влады́чицу,/ и от Тебе́ ро́ждшагося Христа́ Бо́га на́шего/ велича́ет ра́достно./ Ему́же моли́ся, о Госпоже́ Цари́це Богоро́дице,/ да сохрани́т вся гра́ды и страны́ христиа́нския/ невреди́мы от всех наве́т вра́жиих/ и спасе́т ве́рою покланя́ющихся/ Его́ Боже́ственному и Твоему́ Пречи́стому о́бразу,/ Де́во Неискусобра́чная.

Кондак, глас 8

Притеце́м, лю́дие, к Де́ве и Богоро́дице Цари́це,/ благодаря́ще Христа́, Бо́га на́шего,/ и, к Тоя́ чудотво́рней ико́не уми́льно взира́юще,/ припаде́м и возопие́м Ей:/ о Влады́чице Мари́е,/ присети́вши страну́ сию́ Твоего́ честна́го о́браза явле́нием чуде́сно,/ спаса́й в ми́ре и благовре́менстве страну́ на́шу, и вся христиа́ны,/ насле́дники показу́ющи Небе́сныя жи́зни,/ Тебе́ бо, ве́рно зове́м:/ ра́дуйся, Де́во, ми́ру спасе́ние.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь святителю Митрофану, патриарху Константинопольскому, глас 4

Пра́вило ве́ры, и о́браз кро́тости... (общий святителю).

Кондак, глас 2

Ве́ру Христо́ву я́сно ты пропове́дал еси́,/ и сию́ соблюда́я,/ во мно́жество вои́стинну возрасти́л еси́ ве́рное твое́ ста́до./ Те́мже со а́нгелы, Митрофа́не, сра́дуешися,/ Христу́ моля́ся непреста́нно о всех нас.

Ин кондак, глас 4

От младе́нства яви́лся еси́ че́стен сосу́д,/ святи́тель быв избра́н Бо́гу, Ему́же с весе́лием взыва́л еси́:/ ра́вен еси́, Христе́, Отцу́ и Ду́ху.

Величание

Велича́ем тя,/ святи́телю о́тче Митрофа́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Мефодию, игумену Пешношскому, глас 8

Боже́ственною любо́вию от ю́ности распаля́емь,/ вся я́же в ми́ре кра́сная возненави́дев,/ Христа́ еди́наго возлюби́л еси́,/ и сего́ ра́ди в пусты́ню всели́вся,/ в ней оби́тель сотвори́л еси́,/ и собра́в и́ноков мно́жество,/ прия́л еси́ от Бо́га чуде́с дар, о́тче Мефо́дие,/ и был еси́ о Христе́ собесе́дник и спо́стник преподо́бному Се́ргию,/ с ни́мже у Христа́ Бо́га испроси́ правосла́вным Христиа́ном здра́вие и спасе́ние,/ и душа́м на́шим ве́лию ми́лость.

Кондак, глас 4

Послуша́ния до́брый рачи́тель быв,/ безпло́тныя враги́ сле́зными моли́твами твои́ми кре́пко посрами́л еси́/ и яви́лся еси́ Пресвяты́я Тро́ицы жили́ще,/ Ю́же зря, блаже́нне, я́сно,/ Богому́дре Мефо́дие преподо́бне,/ чуде́с дар от Нея́ прия́л еси́./ Те́мже исцеля́вши с ве́рою приходя́щих неду́ги,/ утоля́еши ско́рби,/ и мо́лишися непреста́нно о всех нас.

Величание

Ублажа́ем тя,/ преподо́бне о́тче Мефо́дие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь праведным Марфе и Марии, сестрам праведного Лазаря, глас 3

Пра́веднаго Ла́заря Боголюби́выя се́стры,/ Ма́рфо и Мари́е пресла́вныя,/ чи́стым се́рдцем Христа́ в житии́ ва́шем возлюби́ли есте́,/ мироно́сиц взе́мше чин,/ и Его́, я́ко Сы́на Бо́жия, безбоя́зненно испове́дали есте́,/ сего́ ра́ди ны́не во оби́телех Отца́ Небе́снаго/ со а́нгелы и все́ми святы́ми сла́вно ца́рствуете./ Умоли́те, Его́же возлюби́ли есте́,/ и нам, гре́шным, в ве́ре и любви́ Христо́вой утверди́тися/ и Ца́рствия Небе́снаго сподо́битися.

Тропарь священномученику Дорофею, епископу Тирскому, глас 4

И нра́вом прича́стник,/ и престо́лом наме́стник... (общий священномученику).

Ин тропарь, глас 5

Нищелю́бием обогати́вся/ и ми́лость воздержа́ния источи́в,/ наслажде́ния Ца́рствия Небе́снаго сподо́бися,/ страда́льчески бе́ды прии́м по ста́де свое́м,/ и апо́столом обре́теся ссе́льник,/ о́тче священному́чениче Дорофе́е,/ моли́ Христа́ Бо́га спасти́ся душа́м на́шим.

Кондак, глас 5

Доброде́тельми сия́я и Боже́ственными уче́нии па́че со́лнца,/ и страда́нии, блаже́нне, облиста́л еси́:/ просвети́л еси́ зе́млю, Дорофе́е, отгна́в мглу многобо́жия и лю́тыя е́реси./ Сего́ ра́ди па́мять твою све́тло пра́зднуем.

Величание

Велича́ем тя,/ священному́чениче Дорофе́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобным Вассиану и Ионе Пертоминским, Соловецким, глас 8

Пре́жде отверже́нием ми́ра,/ я́ко морска́го треволне́ния, избего́сте, отцы́ преподо́бнии,/ по́слежде же изволе́нием Бо́жиим/ в вода́х морски́х кончи́ну блаже́нную прия́сте/ и к неболе́зненному поко́ю преста́вистеся от земли́ ра́дующеся./ Тем и по кончи́не от Христа́ Бо́га просла́вистеся чудесы́ оби́льно,/ те́плии в беда́х ве́рным помо́щницы показа́стеся./ И ны́не на Небесе́х предстоя́ще престо́лу Христо́ву,/ Вассиа́не преблаже́нне и Ио́но пресла́вне,/ моли́теся при́сно о душа́х на́ших.

Кондак, глас 2

Я́ко сокро́вище бога́тно*,/ ве́рным Боже́ственная благода́ть/ из морски́х недр издаде́ мо́щи ва́ша, отцы́ преблаже́ннии,/ и в ме́сте пу́сте це́лы и невреди́мы обрето́шася пресла́вно,/ и та́ко вас ра́ди ны́не сла́вится Бог,/ Ему́же со дерзнове́нием предстоя́ще ны́не на Небеса́х,/ Вассиа́не и Ио́но досточу́днии,/ моли́теся непреста́нно о всех нас.

Величание

Ублажа́ем вас,/ преподо́бнии отцы́ Вассиа́не и Ио́но,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь благоверному князю Феодору Ярославину, брату благоверного князя Александра Невского, Новгородскому, глас 8

От благочести́ваго ко́рене о́трасль благочести́вая прозя́бл* еси́,/ сконча́вся в ю́ности, ле́та до́лга твои́ми доброде́тельми исполнил еси́,/ благове́рный кня́же Фео́доре,/ сего́ ра́ди Владе́ющему времена́ми мо́лимся,/ да моли́твами твои́ми пода́ст нам долготу́ лет/ и низпосле́т стране́ на́шей ве́лию и бога́тую ми́лость.

Кондак, глас 4

В благоче́стии рожде́нна,/ в стра́се Бо́жии воспи́тана,/ в житии́ целому́дрие стяжа́вшаго,/ по успе́нии же нетле́нием телесе́ просиявшаго,/ благове́рнаго кня́зя Фео́дора во святы́х почита́я,/ смире́нно мо́лимся Тебе́, Всеси́льный Влады́ко,/ да и во ве́ки прославля́еши святы́ми Твои́ми/ стра́ны на́ша росси́йския.

Величание

Велича́ем тя,/ благове́рный кня́же Фео́доре,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь блаженному Константину, митрополиту Киевскому и всея России, глас 4

Апо́столов прее́мниче,/ архиере́ев сопресто́льниче,/ Росси́и всея́ па́стырю и учи́телю,/ всеблаже́нне о́тче Константи́не,/ Влады́це всех моли́ся/ мир па́стве твое́й дарова́ти/ и спасе́ние душа́м на́шим и ве́лию ми́лость.

Кондак, глас 8

Звезду́ росси́йскую,/ от Ки́ева возсия́вшую/ и Черни́гов блаже́нною кончи́ною свое́ю озари́вшую,/ всеблаже́ннаго святи́теля Константи́на почти́м,/ прося́ще его́ моли́тися Христу́,/ да пода́ст мир стране́ на́шей/ и душа́м на́шим ве́лию ми́лость.

Величание

Велича́ем тя,/ святи́телю о́тче Константи́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Петру Коришскому, глас 4

Любо́вию Христо́вою просвеще́н,/ измла́да возлюби́л еси́ мона́шеское житие́ и,/ возненави́дев вся́кое плотско́е наслажде́ние,/ житие́ твое́ испо́лнил еси́ терпе́нием, посто́м и моли́твами,/ просия́л бо еси́ доброде́тельми, я́ко све́тлое свети́ло,/ и ны́не усе́рдно мо́лим тя:/ моли́ Христа́ Бо́га/ сохрани́ти оте́често на́ше и весь крестоно́сный наро́д се́рбский/ и всем дарова́ти ве́лию ми́лость.

Кондак, глас 2

Вели́чием по́двиг твои́х возсия́л еси́/ и озари́л еси́, Богому́дре, вся концы́ земны́я./ Те́мже, и у́мер, преше́л еси́/ от све́та к Све́ту возсия́вшему./ Мы же ны́не вопие́м ти:/ просвети́ на́ша помышле́ния, Пе́тре, о́тче наш,/ и моли́ непреста́нно о всех нас.

Величание

Ублажа́ем тя,/ преподо́бне о́тче Пе́тре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь блаженному Игорю, великому князю Черниговскому и Киевскому, глас 4

Наста́ днесь всечестна́я па́мять страстоте́рпца благове́рнаго кня́зя И́горя,/ созыва́ющая лю́ди в пречестны́й храм Спа́сов,/ иде́же ра́достно соше́дшеся благочести́вых мно́жество/ моли́твенно пра́зднуют святу́ю па́мять твою́,/ и с ве́рою взыва́ют ти:/ моли́ся, свя́те, стране́ Росси́йстей, гра́ду Черни́гову и всем правосла́вным Христиа́ном/ в ми́ре и благоде́нствии спасти́ся.

Кондак, глас 6

Измени́л еси́ земна́го княже́ния сла́ву/ во и́ночества о́браз смире́нный/ и страда́льчески земно́е житие́ сконча́в,/ ны́не на Небесе́х ра́дуешися,/ усе́рдие моля́ся/ о чту́щих тя, И́горе, страда́льцев похвало́.

Величание

Велича́ем тя,/ страстоте́рпче святы́й кня́же И́горе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Мелетию, епископу Рязанскому и Зарайскому, глас 5

Це́ркве Христо́вы свети́льниче,/ земли́ Ряза́нстей и Сиби́рстей украше́ние,/ святи́телю Меле́тие,/ Влады́це всех моли́ся,/ мир вселе́нней дарова́ти/ и душа́м на́шим ве́лию ми́лость.

Кондак, глас 3

Днесь Собо́р Ряза́нских и Сиби́рских святы́х предстои́т в Це́ркви,/ и неви́димо за ны мо́лится Бо́гу./ Днесь Це́рковь Небе́сная и земна́я лико́вствует,/ а́нгел и и святи́и ра́дуются,/ ку́пно па́ства с ни́ми весели́тся,/ прославля́я обре́тение моще́й святи́теля Меле́тия,/ нас бо ра́ди мо́лят вси Преве́чнаго Бо́га.

Величание

Велича́ем тя,/ святи́телю о́тче Меле́тие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь благоверному князю Олегу, в иночестве Ионе, в схиме Иоакиму, Рязанскому, глас 5

Весели́ся и ра́дуйся, земле́ ряза́нская/ соверша́ется па́мять благове́рнаго кня́зя Оле́га,/ во свято́й схи́ме Иоаки́мом нарече́ннаго,/ возлюби́вшаго тебя́ па́че души́ своея́,/ о могу́ществе и сла́ве твоея́ тща́вшагося,/ и ны́не, предстоя́ престо́лу Вседержи́теля,/ с супру́жницею свое́ю му́дрою монахи́нею Евпракси́ею,/ умоля́ют беспреста́нно Влады́ку Христа́/ сохрани́ти оте́чество на́ше в ми́ре и благоде́нствии/ и спасти́ ду́ши на́ша.

Кондак, глас тойже

Любо́вь ко оте́честву в се́рдце свое́м всегда́ име́я,/ благове́рный кня́же Оле́же,/ попече́ние о ряза́нстей земли́ наипа́че прилага́л еси́,/ с преподо́бным Се́ргием сла́дце бесе́довав,/ ве́чный мир с моско́вским кня́зем святы́м Дими́трием заключи́л еси́/ и бра́ком сы́на своего́ Фео́дора с дще́рию его́ Софи́ею сою́з скрепи́л еси́./ Ты бо ряза́нския земли́ похвала́ и утвержде́ние.

Величание

Ублажа́ем тя́,/ святы́й благове́рный кня́же Оле́же,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобным Виссариону, чудотворцу Египетскому и Илариону Новому, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их в ми́ре упра́ви живо́т наш.

Кондак преподобному Виссариону, глас 2

Вы́шних сил подража́в, преподо́бне,/ о́бразом птиц житие́ пожи́л еси́:/ вре́менная в забы́тии положи́в,/ непреста́нным жела́нием влеко́м к небе́сным добро́там Христа́ Царя́,/ до́ндеже* Того́ дости́гл еси́, Виссарио́не;/ моли́ непреста́нно о всех нас.

Кондак преподобному Илариону, глас тойже

Огра́ды живоно́сныя твоея́ па́жити па́стырски невреди́мо ста́до соблю́л еси́,/ и яви́лся еси́ высото́ю дел вели́к, но́вый Иларио́не,/ по благоче́стии мно́ги му́ки и ско́рби прие́м./ Тем во всера́достный живо́т всели́лся еси́ Го́рняго Сио́на,/ моли́ за ны, преподо́бне.

Величание

Ублажа́ем вас,/ преподо́бнии о́тцы Виссарио́не и Иларио́не,/ и чтим святу́ю па́мять вашу,/ наста́вницы мона́хов/ и собесе́дницы а́нгелов.

Тропарь святителю Ионе, епископу Великопермскому, глас 4

Святи́телю Це́ркви Великопе́рмстей,/ и́стинный храни́телю апо́стольских преда́ний,/ столпе́ непоколеби́мый Правосла́вия,/ благоче́стия учи́телю,/ Ио́но святи́телю блаже́нне,/ Влады́ку всех моли́ мир па́стве твое́й и всей Ру́сстей земли́ дарова́ти/ и всем нам спасти́ся.

Кондак, глас 2

Боже́ственный гром, труба́ духо́вная... (общий святителю).

Величание

Велича́ем тя,/ святи́телю о́тче Ио́но,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Паисию Угличскому, глас 8

Христо́вы ра́ди любве́ оте́чество и род оста́вил еси́,/ и, а́нгельскому житию́ поревнова́в,/ в пусты́ню всели́лся еси́,/ в не́йже многотру́дное житие́ яви́л еси́/ и чуде́с дарова́ния от Бо́га прия́л еси́,/ Паи́сие преподо́бне,/ моли́ Христа́ Бо́га спасти́ся душа́м на́шим.

Ин тропарь, глас тойже

Христо́вы ра́ди любве́ оте́чество и род оста́вил еси́,/ и, а́нгельскому житию́ поревнова́в,/ духо́вному отцу́ твоему́, преподо́бному Мака́рию, подража́тель быв,/ гра́да У́глича дости́гл еси́,/ и близ того́ при вода́х в пусты́ню, а́нгелом показа́нную, всели́лся еси́,/ и оби́тель прекра́сну Ма́тери Бо́жией воздви́гл еси́,/ и мно́жество мона́хов собра́л еси́,/ и́мже и наста́вник ко спасе́нию быв,/ и чуде́с дарова́ния от Бо́га прия́л еси́,/ Паи́сие преподо́бне,/ моли́ Христа́ Бо́га спасти́ся душа́м на́шим.

Ин тропарь, глас тойже

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Паи́сие о́тче наш,/ моли́ Христа́ Бо́га/ спасти́ся душа́м на́шим.

Кондак, глас 2

Чистото́ю душе́вною боже́ственно вооружи́вся,/ и непреста́нныя моли́твы, я́ко ко́пие и́мый,/ кре́пко ссекл еси́ бесо́вское ополче́ние,/ Паи́сие о́тче наш,/ моли́ непреста́нно о всех нас.

Ин кондак, глас 8

Укра́шен доброде́тельми, преподо́бне Паи́сие Богодухнове́нне,/ Це́ркве Христо́вы красота́ был еси́,/ по́двигами бо и́ноческими украси́ ю, блаже́нне./ Те́мже мо́лим тя:/ моли́ся ко Го́споду свободи́ти нас от вся́кия бра́ни бори́теля, вопию́щих ти:/ ра́дуйся, о́тче преблаже́нне.

Величание

Ублажа́ем тя,/ преподо́бне о́тче Паи́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Ионе Климецкому, Олонецкому, глас 4

Ангельскому житию́ поревнова́в, блаже́нне Ио́но,/ оста́вил еси́ оте́чество твое́, вели́кий Но́вград,/ и, прише́д в преде́лы Олоне́цкия/ и в пусты́ню всели́вся,/ в труде́х, моли́твах и слеза́х подвиза́лся еси́,/ и, я́ко му́дрый купе́ц, Ца́рствие Небе́сное насле́довал еси́./ Те́мже любо́вию вопие́м ти:/ моли́ Христа́ Бо́га, да спасе́т ду́ши на́ша.

Кондак, глас 2

Христо́вым стопа́м после́дователь быв, блаже́нне Ио́но,/ ра́дуйся, всели́лся еси́ в пусты́ню,/ Вы́шняго Про́мыслом наставля́ем,/ и, не убоя́вся вра́жиих прираже́ний,/ я́коже столп непоколеби́м,/ угото́вил еси́ себе́ в жили́ще Ду́ху Пресвято́му;/ мы же, па́мять твою́ соверша́юще, вопие́м ра́достно:/ ра́дуйся, я́ко озаря́еши нас чудесы́ твои́ми,/ ра́дуйся, я́ко оста́вил еси́ вре́менная ра́ди бу́дущих благ,/ ра́дуйся, я́ко возставля́еши лени́вых ко спасе́нию./ Моли́ у́бо Христа́ Бо́га, о́тче преподо́бне,/ да спасе́т ду́ши на́ша в день су́дный.

Величание

Ублажа́ем тя,/ преподо́бне о́тче Ио́но,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь священномученику Феодоту Анкирскому, глас 4

И нра́вом прича́стник... (общий священномученику).

Кондак, глас 4

Во святи́телех благоче́стно пожи́в... (общий священномученику).

Величание

Велича́ем тя, священному́чениче Феодо́те, и чтим святу́ю па́мять твою́, ты бо мо́лиши за нас Христа́ Бо́га на́шего.

Тропарь великомученику Феодору Стратилату, глас 4

Воинствосло́вием и́стинным, страстоте́рпче,/ Небе́снаго Царя́ воево́да предо́брый был еси́, Фео́доре:/ ору́жиями бо ве́ры ополчи́лся еси́ му́дренно,/ и победи́л еси́ де́монов полки́,/ и победоно́сный яви́лся еси́ страда́лец./ Те́мже тя ве́рою при́сно ублажа́ем.

Кондак, глас 2

Му́жеством души́ в ве́ру оболки́йся,/ и глаго́л Бо́жий, а́ки копие́, в ру́ку взем, врага́ победи́л еси́,/ му́чеников преве́лий Фео́доре,/ с ни́ми Христу́ Бо́гу моля́ся не преста́й о всех нас.

Величание

Велича́ем тя,/ страстоте́рпче святы́й Фео́доре,/ и чтим честна́я страда́ния твоя́,/ я́же за Христа́/ претерпе́л еси́.

Тропарь святителю Феодору, епископу Суздальскому, глас 8

В моли́твах бдя*, се́рдцем же о ста́де твое́м вы́ну* боле́знуя,/ уче́нием свои́м всех просвети́л еси́, Фео́доре прему́дре./ Те́мже Христа́ Бо́га моли́,/ в день па́мяти твоея́ дарова́ти нам ве́лию ми́лость.

Ин тропарь, глас тойже

В моли́тве бдя, Го́рняя жела́я,/до́льняя* возненави́дел еси́,/ и, се́рдцем боле́знуя, вы́ну о ста́де свое́м пече́шися,/ уче́нием бо свои́м всех просвети́л еси́,/ Фео́доре прему́дре, Христа́ Бо́га моли́ в па́мяти твое́й/ дарова́ти нам ве́лию ми́лость.

Кондак, глас 3

Яко ве́лие со́лнце,/ возсия́ пресла́вная па́мять твоя́, прему́дре Фео́доре,/ в не́йже подава́еши в бедах су́щим спасе́ние,/ притека́ющим к тебе́ усе́рдно,/ благода́тию, е́юже облагодати́ тя Христо́с/ в жи́зни несконча́емой.

Величание

Велича́ем тя,/ святи́телю о́тче Фео́доре,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь благоверным князьям Василию и Константину Ярославским, глас 2

Ва́ше оте́чество хва́лится обагре́нием крове́й ва́ших,/ Це́рковь же Бо́жия ра́дуется,/ прие́мши телеса́ ва́ша,/ лю́дие, пе́сненный лик соста́вльше,/ духо́вною цевни́цею* вопию́т:/ лику́й, Васи́лие, ра́дуйся, Константи́не,/ Яросла́влю сла́ва и всей Росси́и ра́досте.

Ин тропарь, глас 8

Возвы́сившеся на доброде́тель, к жела́нию кра́йнему,/ и достиго́сте к Небе́сней высоте́,/ благове́рнии вели́ции кня́зи Васи́лие и Константи́не,/ и безстра́стным житие́м украси́сте ду́ши своя́,/ поще́нием же изря́дно победи́сте бесо́вския полки́/ и восприя́сте чи́стую со́весть,/ в моли́твах, я́ко безпло́тнии, пребы́сте,/ возсия́сте в ми́ре, а́ки со́лнце, пресла́внии,/ моли́те спасти́ся душа́м на́шим.

Кондак на преставление, глас 8

Я́ко цве́ти честни́и разли́чнии,/ в ра́йстей пе́щи процве́тше невеще́ственно,/ оте́честву своему́ сла́ву ве́лию/ и сро́дникам похвалу́ и честь я́вльше,/ всеи́стиннии побе́дницы, вели́кий Васи́лие и сла́вный Константи́не,/ но у́бо не преста́йте моля́щеся о гра́де на́шем и о всех рабе́х свои́х,/ изба́вити их от напа́стей, и бед, и всех лю́тых обхожде́ний, вопию́щих вам:/ ра́дуйтеся, гра́ду на́шему Яросла́влю вели́кое утвержде́ние.

Кондак на обретение мощей, глас 4

Днесь Це́рковь расширя́ет не́дра своя́/ и прие́млет многоцеле́бныя мо́щи ва́ша,/ добропобе́днии страда́льцы,/ Васи́лие сла́вне и Константи́не Богому́дре,/ и, я́ко шипо́к* благово́нный, напоя́ется пречу́дными арома́ты,/ бога́тными* чудодея́нии от неистощи́мых сокро́вищ,/ от пресла́вных моще́й ва́ших,/ и ра́достно чад свои́х созыва́ет вопи́ти, лю́дие:/ ра́дуйся, дво́ице пречу́дная, оте́честву своему́ стено́ необори́мая.

Величание

Велича́ем вас,/ страстоте́рпцы Христо́вы, благове́рнии кня́зи Васи́лие и Константи́не,/ и чтим честна́я страда́ния ва́ша,/ вы бо мо́лите за нас/ Христа́ Бо́га на́шего.

Тропарь Божией Матери ради иконы Ее, именуемой Урюпинская, глас 3

Яви́лася еси́ на дре́ве в Донско́й земли́,/ благода́тная Твоя́ ико́на, Богоро́дице,/ больны́я исцеля́ти, заблу́ждшия обраща́ти;/ те́мже уми́льно мо́лимся Тебе́:/ изба́ви град наш от вся́каго зла/ и спаси́ лю́ди, к Тебе́ притека́ющия.

Кондак, глас 5

Всеблага́я Чи́стая Богоро́дице,/ к Тебе́ прибега́ем, ве́рнии,/ Тобо́ю бо позна́хом ми́лость Бо́жию,/ чу́дную ико́ну Твою́,/ от нея́же вси здра́вие и спасе́ние прие́млем.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь святителю Кириллу, архиепископу Александрийскому, глас 8

Правосла́вия наста́вниче,/ благоче́стия учи́телю... (общий исповеднику).

Кондак, глас 6

Бе́здну нам уче́ний Богосло́вия источи́л еси́/ я́ве, от исто́чник Спа́совых,/ е́реси погружа́ющую, блаже́нне Кири́лле,/ и ста́до невреди́мо от треволне́ний спаса́ющую:/ страна́м бо всем наста́вник, преподо́бне,/ я́ко Боже́ственная явля́я.

Величание

Велича́ем тя,/ святи́телю о́тче Кири́лле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Кириллу, игумену Белоезерскому, глас 1

Я́ко крин в пусты́ни дави́дски процве́л еси́, о́тче Кири́лле,/ злостра́стия те́рние искореня́я,/ и собра́л еси́ в ней учени́к мно́жество,/ стра́хом Бо́жиим и уче́нием твои́м наставля́емых,/ и́хже и до конца́, я́ко чадолюби́вый оте́ц,/ не оста́вил еси́, посеща́я, да вси вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак, глас 8

Я́ко преоби́дев тле́нная и до́лу влеку́щая мудрова́ния, о́тче,/ к вы́шнему тече́нию ра́достно устреми́лся еси́,/ и та́мо со святы́ми Пресвяте́й Тро́ице предстоя́,/ моли́ от враг сохрани́тися ста́ду твоему́,/ я́ко да свято́е твое́ успе́ние пра́зднующе, вопие́м:/ ра́дуйся, преблаже́нне Кири́лле, о́тче наш.

Величание

Ублажа́ем тя,/ преподо́бне о́тче Кири́лле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Александру, игумену Куштскому, глас 4

И́же плотски́м дебе́льством Бо́гови рабо́тати изво́ли,/ в пусты́ню всели́вся,/ в не́йже мно́гими по́ты и труды́/ безтеле́снаго равноа́нгельнаго пребыва́ния возмо́же дости́гнути,/ та́кже от Бо́га узре́н быв,/ сподо́бися вели́ких чуде́с в жи́зни и по преставле́нии,/ на нечи́стыя ду́хи си́лу восприи́м,/ изго́ниши от приходя́щих к тебе́ с ве́рою,/ те́мже, о́тче Алекса́ндре,/ за вся ны моли́,/ спасти́ся душа́м на́шим.

Ин тропарь, глас 8

Во плоти́, я́ко а́нгел, на земли́ подвиза́ся,/жела́нием духо́вным в пусты́ню всели́лся/ и, со зверьми́ живы́й, весь Христо́ви быв,/ Тому́ невозвра́тно ше́ствовал еси́, ведо́м к Небеси́,/ после́дуя Боже́ственным стезя́м, о́тче блаже́нне Алекса́ндре,/ я́ко чу́ден, чудеса́ источа́еши/ и отгоня́еши неду́ги к тебе приходя́щих с ве́рою,/ но, я́ко име́я дерзнове́ние ко Го́споду,/ помина́й нас, чту́щих честну́ю па́мять твою́.

Кондак, глас тойже

И́же земна́я оста́вль,/ в пусты́ню всели́вся,/ Христо́вым стопа́м после́довал еси́, те́пле,/ и Того́, сла́вне, на ра́мо свое́ честны́й крест взем,/ умертви́л еси́ пло́ти взыгра́ния/ труды́ по́стническими и жела́нием духо́вным, всеблаже́нне,/ те́мже зове́м ти:/ ра́дуйся, Алекса́ндре, пусты́нный жи́телю.

Ин кондак, глас 6

Пусты́нный жи́телю,/ опусте́вшая ны от благотво́рных помышле́ний вра́жиими прило́гами*,/ презе́льным* твои́м к Бо́гу моле́нием сердца́ на́ша очи́сти,/ я́ко да благода́рственно вопие́м ти:/ ра́дуйся, я́ко земны́м пустынножи́тельствием, Алекса́ндре,/ доше́д Небе́снаго Ца́рствия.

Величание

Ублажа́ем тя,/ преподо́бне о́тче Алекса́ндре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Василию, епископу Рязанскому, глас 4

Пе́рвее в Му́роме святи́тельством почте́н был еси́,/ из него́же непра́ведно изгоня́емь,/ на ма́нтию, я́ко на ле́гкий кора́бль, взоше́л еси́,/ на не́йже па́че естества́, я́ко безпло́тен,/ по вода́м ше́ствие творя́,/ промышле́нием Вы́шняго и заступле́нием Богома́тере управля́емь,/ богоспаса́емаго гра́да Ряза́ни дости́гл еси́/ и в нем, архиере́йства престо́л восприи́м,/ богода́нную па́ству ряза́нскую до́бре упа́сл еси́,/ святи́телю о́тче наш Васи́лие,/ моли́ Христа́ Бо́га спасти́ся душа́м на́шим.

Кондак, глас 8

Я́ко многосве́тлая звезда́, от гра́да Му́рома возсия́л еси́,/ святи́телю Васи́лие,/ по вода́м же доше́д до гра́да Ряза́ни,/ Це́рковь Бо́жию до́бре упа́сл еси́,/ просвеща́я лю́ди уче́нием и житие́м твои́м./ Помина́й и ны́не ча́да твоя́, мо́лим тя,/ наста́вниче наш до́брый,/ и за ны Христу́ Бо́гу и Пречи́стей Его́ Ма́тери моли́ся,/ да благода́рною душе́ю зове́м ти:/ ра́дуйся, уго́дниче Христо́в и те́плый к Бо́гу о нас моли́твенниче.

Величание

Велича́ем тя,/ святи́телю о́тче Васи́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Иоанну, митрополиту Тобольскому, глас 8

Наста́вниче благоче́стия,/ сиротству́ющих пита́телю,/ скорбя́щих уте́шителю, неду́гующих врачу́ безме́здный,/ душе́ю стра́ждущим ско́рый помо́щниче,/ те́плый моли́твенниче ко Го́споду,/ святи́телю о́тче Иоа́нне,/ моли́ Христа́ Бо́га спасти́ся душа́м на́шим.

Кондак, глас 2

Яви́лся еси́ во тьме неве́дения пребыва́ющим просвети́тель,/ вдов и сиро́т уте́шитель,/ ди́вный врач немощству́ющих,/ младе́нцев и отроко́в наста́вник,/ роди́телем же пресве́тлое ра́дование,/ святи́телю о́тче Иоа́нне,/ моли́ Христа́ Бо́га, пода́ти стране́ на́шей в ве́ре утвержде́ние,/ во́инам на враги́ побе́ду и одоле́ние,/ лю́дем же свои́м ве́лию ми́лость.

Величание

Велича́ем тя,/ святи́телю о́тче Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Силуану, схимнику Печерскому, в Дальних пещерах почивающему, глас 3

Мно́гаго ти ра́ди воздержа́ния и безме́рнаго поще́ния/ прие́мый свы́ше благода́ть чудотворе́ния/ и к Бо́гу ве́лие дерзнове́ние стяжа́вый,/ по́стником удобре́ние, Силуа́не,/ Тому́ моли́ся,/ да пода́ст нам мир и ве́лию ми́лость.

Кондак, глас 8

В бде́нном и тре́звенном моле́нии/ и кре́пком всегда́шнем пребывая́ поще́нии,/ те́ло свое́ умерщвля́л еси́, Силуа́не преподо́бне,/ и мно́гих уче́нием твои́м, в та́яжде* доброде́тели наставля́я,/ приве́л еси́ Христо́ви./ Ему́же в весе́лии днесь предстоя́,/ помина́й нас, чту́щих па́мять твою́.

Величание

Ублажа́ем тя,/ преподо́бне о́тче Силуа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Собору Сибирских святых, глас 3

Це́ркве Христо́вы свети́льницы,/ всея́ Росси́и украше́ние,/ святи́и вси, в земли́ Сиби́рстей просия́вшии,/ Влады́ку всех моли́те/ мир вселе́нней дарова́ти/ и душа́м на́шим ве́лию ми́лость.

Ин тропарь, глас 4

Це́ркве Христо́вы свети́льницы,/ всея́ Росси́и украше́ние,/ страны́ Сиби́рския просвети́телие,/ от тьмы дре́вняго неве́рия и пре́лести и́дольския лю́ди изба́вльшии,/ наста́вницы благоче́стия, святи́телие Христо́вы:/ Дими́трие, Инноке́нтие, Иоа́нне,/ Софро́ние, Па́вле, Меле́тие/ и апо́столе Инноке́нтие/ с пра́ведным Васи́лием страстоте́рпцем и Симео́ном Верхоту́рским,/ престо́лу Го́спода Вседержи́теля предстоя́ще,/ Влады́ку всех моли́те/ мир вселе́нней дарова́ти/ и душа́м на́шим ве́лию ми́лость.

Кондак, глас 3

Днесь Собо́р Сиби́рских святы́х предстои́т в Це́ркви/ и неви́димо за ны мо́лится Бо́гу,/ а́нгел и со архиере́и славосло́вят,/ апо́столи же с му́чениками ликовству́ют,/ святи́и вси Це́ркве Христо́вы ра́дуются/ и па́ства Сиби́рская весели́тся:/ вси бо ку́пно мо́лят Преве́чнаго Бо́га.

Величание

Велича́ем вас,/ святи́и вси, в земли́ Сиби́рстей просия́вшии,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь Собору Рязанских святых, глас 8

Святи́и вси в земли́ Ряза́нстей и Му́ромстей просия́вшии,/ при́снии на́ши моли́твенницы и засту́пницы,/ моли́те Влады́ку Христа́ Бо́га на́шего/ мир вселе́нней дарова́ти/ и душа́м на́шим ве́лию ми́лость.

Кондак, глас тойже

Я́ко многосве́тлыя зве́зды, от гра́да Ряза́ни возсия́вшии,/ уго́дницы Христо́вы, Правосла́вия охрани́тели/ и благоче́стия учи́тели,/ при́сные на́ши засту́пницы мо́лим вас,/ за ны Христу Бо́гу и Пречи́стей Его́ Ма́тери моли́теся,/да благода́рною душе́ю зове́м:/ ра́дуйтеся, святи́и вси, в земли́ Ряза́нстей просия́вшии.

Величание

Велича́ем вас,/ святи́и вси, в земли́ Ряза́нстей просия́вшии,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь святителю Павлу, митрополиту Тобольскому, глас 3

Просла́вим, ве́рнии, благоче́стие возлюби́вшаго/ и от ю́ности и́го Христо́во усе́рдно восприи́мшаго,/ ре́вностнаго святи́теля Це́ркве Росси́йския,/ в Богоспаса́емом гра́де Тобо́льске подвиза́вшагося./ Ты же, Богому́дре о́тче Па́вле,/ те́лом у́бо в нетле́нии почива́я,/ ду́хом же Престо́лу Бо́жию предстоя́,/ моли́ спасти́ся всем нам.

Кондак, глас 8

Звезду́ церко́вную, от Ки́ево-Пече́рския ла́вры возсия́вшую,/ и чрез Но́вград в Сиби́рскую страну́ дости́гшую,/ иде́же ре́вностно служе́нием свои́м сия́ющую,/ святи́теля почти́м,/ Тобо́льския митропо́лии столе́тие венча́вшаго:/ ра́дуйся, о́тче Па́вле, всея́ Сиби́ри чудотво́рче.

Величание

Велича́ем тя,/ святи́телю о́тче Па́вле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь апостолам Варфоломею и Варнаве, глас 3

Апо́столи святи́и,/ Варфоломе́е и Варна́во,/ моли́те Ми́лостивого Бо́га,/ да прегреше́ний оставле́ние/ пода́ст душа́м на́шим.

Ин тропарь, глас тойже

Язы́к огнедохнове́н в си́ле Ду́ха прие́мше,/ во пло́ти прише́дшее Сло́во пропове́даете всю́ду,/ Его́же ра́ди ов* во главу́ усече́н,/ ов же ка́мением побие́н,/ и есте́ апо́стольскому ли́ку украше́ние,/ Варфоломе́е и Варна́во,/ те́мже па́мять ва́шу почита́ем и про́сим:/ моли́те Христа́ Бо́га пода́ти нам грехо́в оставле́ние.

Кондак апостолу Варфоломею, глас 4

Яви́лся еси́ вели́кое со́лнце вселе́нней,/ уче́ний сия́ньми и чуде́с стра́шных, световодя́ почита́ющия тя,/ Варфоломе́е, Госпо́день апо́столе.

Кондак апостолу Варнаве, глас 3

Госпо́день был еси́ всеи́стинный служи́тель,/ апо́столов же яви́лся седми́десятих пе́рвый,/ озари́л еси́ и с Па́влом про́поведь твою́,/ всем возвеща́яй Христа́ Спа́са:/ сего́ ра́ди песнопе́нии Боже́ственную па́мять твою́, Варна́во, соверша́ем.

Величание

Велича́ем вас,/ святи́и апо́столи Варфоломе́е и Варна́во,/ весь мир уче́ньми свои́ми просвети́вшия/ и вся концы́/ ко Христу́ приве́дшия.

Тропарь преподобному Варнаве Ветлужскому, глас 1

Жела́нием духо́вным распали́вся/ и мяте́жи мирски́я отри́нув,/ к Бо́гу любо́вию приле́жно присовокупи́ся./ И Того́ вседу́шне взыску́я,/ во вну́треннюю пусты́ню отше́л еси́,/ при вода́х всели́ся,/ иде́же во слеза́х и труде́х пребыва́я многоле́тное вре́мя,/ в терпе́ниих мно́зех житие́ а́нгельское проходи́л еси́/ в наставле́нии Боже́ственнаго Ра́зума/ и мно́жество мона́хов собра́л еси́, му́дре,/ и́хже посеща́я не оста́ви,/ Варна́во преподо́бне, о́тче наш,/ Пресвяте́й Тро́ице моля́ся/ от зол вся́ческих изба́вити и спасти́ ду́ши на́ша.

Кондак, глас 8

От ю́ности, преподо́бне, плоть твою́ в поста́х и моли́твах источи́л еси́/ и, крест твой взем, усе́рдно после́довал еси Христу́,/ те́мже и к Вы́шним тече́ние ра́достно соверши́л еси́,/ иде́же со все́ми святы́ми предстои́ши./ И ны́не ста́до твое́ посеща́й, помина́я чту́щих всесвяту́ю па́мять твою́,/ да вси благода́рственно вопие́м ти:/ ра́дуйся, Богому́дре Варна́во, наста́вниче пусты́нный.

Величание

Ублажа́ем тя,/ преподо́бне о́тче Варна́во,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Ефрему, архимандриту Новоторжскому, глас 1

Боже́ственною свы́ше благода́тию просвети́вся, Богому́дре,/ и по сме́рти яви́ тя све́тлость жития́ твоего́,/ те́мже источа́вши ми́рови благоуха́ние,/ и́же с ве́рою притека́ющим к ра́це моще́й твои́х, Ефре́ме преподо́бне./ Тем вопие́м ти:/ сла́ва Да́вшему ти чудеса́м благода́ть,/ сла́ва Просла́вльшему тя в чудеса́х,/ сла́ва Де́йствующему тобо́ю всем исцеле́ния.

Кондак, глас 8

Светоза́рную лучу́ похва́лим, преподо́бне,/ твою́ честну́ю ра́ку,/ многосве́тлою свеще́ю просвеща́ет бо Госпо́дь це́рковь твою́ от цельбоно́снаго гро́ба твоего́/ и озаря́ет омраче́нная на́ша сердца́./ Я́коже со́лнце незаходи́мое, о́тче,/ подо́бие о́браза твоего́ возсия́ нам,/ и град Торжо́к тобо́ю благода́ть прие́млет,/ обогаща́ющу ти всех нас добро́тою чуде́с,/ содея́нием благода́ти пою́щих ти: аллилу́ия.

Величание

Ублажа́ем тя,/ преподо́бне о́тче Ефре́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее, именуемой «Достойно есть» («Милующая»), глас 4

Притеце́м, ве́рнии, со дерзнове́нием/ к ми́лующей Ца́рице Богоро́дице/ и уми́льно воззове́м к Ней:/ низпосли́ на ны ми́лости Твоя́ бога́тый:/ Це́рковь на́шу сохрани́,/ лю́ди во благоде́нствии соблюди́,/ зе́млю на́шу изба́ви от вся́каго обстоя́ния,/ мир да́руй ми́рови/ и спасе́ние душа́м на́шим.

Ин тропарь, глас тойже

Отце́в все Афо́нское мно́жество,/ собери́теся, ве́рно пра́зднующе,/ днесь ра́дующеся и све́тло восклица́юще вси в весе́лии:/ Бо́жия бо Ма́ти ны́не от а́нгела пресла́вно воспева́ется./ Те́мже я́ко Богоро́дицу при́сно Сию́ сла́вим.

Кондак, глас 4

Пра́зднует днесь весь Афо́н,/ я́ко пе́снь прия́т от а́нгела чу́дно/ Тебе́, Чи́стей Богома́тери,/ ю́же вся тварь чтит, сла́вящи.

Ин кондак, глас 8

Арха́нгельский глас вопие́м Ти, Всецари́це:/ досто́йно есть, я́ко вои́стинну,/ блажи́ти Тя, Богоро́дицу,/ Присноблаже́нную и Пренепоро́чную/ и Ма́терь Бо́га на́шего.

Величание

Досто́йно есть/ велича́ти Тя,/ Богоро́дице,/ Честне́йшую Херуви́м/ и Сла́внейшую без сравне́ния Серафи́м.

Тропарь преподобному Онуфрию Великому, глас 1

Жела́нием духо́вным пусты́ни дости́гл еси́,/ Богому́дре Ону́фрие,/ и я́ко безпло́тен, в ней многоле́тне подвиза́лся еси́ трудолю́бне,/ соревну́я проро́ком Илии́ и Крести́телю,/ и, от руку́ а́нгельску Та́ин Боже́ственных наслади́вся,/ ны́не во све́те Святы́я Тро́ицы ку́пно с ни́ми весели́шися,/ моли́ спасти́ся нам,/ твою́ па́мять почита́ющим.

Кондак, глас 3

Сия́нием Ду́ха Пресвята́го,/ Богому́дре, просве́щься,/ оста́вил еси́ я́же в житии́ молвы́,/ пусты́ню же дости́г, преподо́бне о́тче,/ возвесели́л еси́ и́же над все́ми Бо́га и Зижди́теля./ Сего́ ра́ди прославля́ет тя Христо́с, блаже́нне,/ Вели́кий Дарода́тель.

Величание

Ублажа́ем тя,/ преподо́бне о́тче Ону́фрие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Петру Афонскому, глас 4

Мир оста́вил еси́, Пе́тре, Го́спода ра́ди своего́/ и крест восприи́м на ра́мо свое́,/ на го́ру дости́гл еси́ Афо́нскую,/ я́коже дре́вле фесвитя́нин Илия́./ И в ней пребы́в поще́нием, и моли́твами, и бде́нием,/ Бо́га ми́лостива творя́,/ и Пречи́стую Богоро́дицу Моле́бницу предлага́я,/ сего́ ра́ди вопие́м ти:/ моли́ Христа́ Бо́га, да спасе́т ду́ши на́ша.

Кондак, глас 2

Удали́в себе́ челове́ческаго сожи́тельства,/ в пеще́рах ка́менных и разсе́линах пожи́л еси́,/ жела́нием Боже́ственным и любо́вию, Пе́тре, Го́спода твоего́,/ от Него́же вене́ц прия́л еси́: /моли́ непреста́нно спасти́ся нам.

Величание

Ублажа́ем тя,/ преподо́бне о́тче Пе́тре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Арсению Коневскому, глас 1

Боже́ственною любо́вию возгоре́вся,/ мирска́я же пристра́стия от души́ отри́нув,/ те́сным путе́м по́стничества восле́д Христа́/ невозвра́тным умо́м ше́ствовал еси́, Арсе́ние преблаже́нне,/ от Него́же и мзду трудо́в твои́х на небесе́х восприи́м,/ помина́й нас, чту́щих святу́ю па́мять твою́ и вопию́щих:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Ин тропарь, глас 4

Ду́хом Бо́жиим наставля́ем,/ возлюби́л еси́ безмо́лвие,/ в не́мже ева́нгельски подвиза́ющуся,/ пречу́дный Афо́нский дар, Богома́тере ико́на, дарова́ся ти, преблаже́нне,/ и о́браз доброде́телей быв ста́ду твоему́,/ Арсе́ние, о́тче наш,/ к го́рнему торжеству́ воз- ше́л еси́,/ иде́же со а́нгелы ликовству́я,/ моли́ Христа́ Бо́га/ спасти́ся душа́м на́шим.

Кондак, глас 8

Трисия́тельнаго Божества́ сия́нием просвети́в се́рдце твое́, преподо́бне,/ светови́ден весь яви́лся еси́ доброде́тельми,/ я́ко и Го́ру Афо́нскую свет трудолю́бия твоего́ озари́,/ иде́же святу́ю ико́ну Со́лнца и́стиннаго,/ Христа́, и Его́ Пречи́стыя Ма́тере в дар прии́м,/ на о́стров Нева́ е́зера прише́д,/ оби́тель устро́ил еси́, всеблаже́нне./ Тем, ве́рою и любо́вию к тебе́ притека́юще, ра́достно вопие́м:/ ра́дуйся, всесве́тлый свети́льник, Арсе́ние о́тче наш.

Величание

Ублажа́ем тя,/ преподо́бне о́тче Арсе́ние,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь благоверной великой княгине Анне, в иночестве Евфросинии, Кашинской, Тверской, глас 3

Днесь восхваля́ем тя, преподо́бная ма́ти,/ вели́кая княги́не и́нокине А́нно,/ я́ко бо лоза́ плодови́та посреде́ те́рния,/ процвела́ еси́ во гра́де Ка́шине твои́ми доброде́тельми,/ всех удиви́ла еси́ чу́дным твои́м житие́м,/ те́мже Христу́ Бо́гу угоди́ла еси́,/ и ны́не ра́дующися и веселя́щися,/ пребыва́вши с ли́ки преподо́бных жен,/ наслажда́ющися ра́йския красоты́ и весе́лия./ Мо́лим у́бо тя,/ моли́ о нас Человеколю́бца Христа́ Бо́га на́шего,/ дарова́ти нам мир и ве́лию ми́лость.

Ин тропарь, глас 4

Просвети́вшися Боже́ственною благода́тию, преподо́бная,/ и пра́востию у́мною ду́шу твою́ привяза́вши в любо́вь Христо́ву,/ тле́нныя, и кра́сныя, и вре́менныя нивочто́же вмени́ла еси́./ Кре́стным зна́мением на мы́сленныя враги́ му́жески вооружи́вшися,/ по́стническими по́двиги, посто́м и моли́твами/ у́глие страсте́й угаси́ла еси́, достосла́вная Анно,/ и по сме́рти источа́вши благода́ть притека́ющим к моще́м твои́м./ И ны́не, в Небе́снем черто́зе с му́дрыми де́вами предстоя́щи Христу́,/ моли́ о нас, почита́ющих святу́ю па́мять твою́.

Кондак, глас 4

Я́ко пресве́тлая звезда́, яви́лася еси́ в Росси́йстей земли́,/ во гра́де Ка́шине, преподо́бная ма́ти Анно;/ во всех благочести́вых и ве́рных жена́х,/ а́ки крин*, процве́ла еси́ чи́стым и непоро́чным твои́м житие́м,/ во и́нокинях же соверше́нными твои́ми тру́ды и по́двиги,/ и возшла́ еси́ к Вы́шнему гра́ду, ра́дующися и веселя́щися,/ я́ко до́бре соверши́вши твое́ тече́ние./ И ны́не честны́я твоя́ мощи, а́ки би́серие драго́е,/ яви́шася на исцеле́ние всем, приходя́щим с ве́рою./ Тем и вопие́м ти:/ ра́дуйся, всекра́сная душе́ю, и моли́ Христа́ Бо́га о спасе́нии душ на́ших.

Ин кондак, глас 8

Скоропослу́шную помо́щницу вси, су́щии в беда́х,/ благоче́стно воспое́м, Анну святу́ю,/ днесь любо́вию соше́дшеся во обре́тение честны́х моще́й ея́./ Воспое́м песнь Еди́ному в Тро́ице Бо́гу, ра́дующеся,/ сподо́бльшему нас ви́дети пречи́стое сокро́вище честны́х моще́й ея́,/ от мног бо лет сокрове́нны бы́ша,/ напосле́док же нам явле́ны/ и источа́ют мно́га и разли́чна исцеле́ния,/ я́ко да моли́твами ея́ к Бо́гу/ от вся́ких находя́щих зол изба́вимся,/ ра́достною душе́ю и весе́лием се́рдца благода́рная воспое́м, глаго́люще:/ ра́дуйся, утвержде́ние гра́ду на́шему.

Величание

Ублажа́ем тя,/ преподо́бная ма́ти, вели́кая княги́не А́нно,/ и чтим святу́ю па́мять твою́,/ наста́внице и́нокиням/ и собесе́днице а́нгелом.

Тропарь преподобным Вассиану и Ионе Пертоминским, Соловецким, глас 8

Пре́жде отверже́нием ми́ра,/ я́ко морска́го треволне́ния, избего́сте, отцы́ преподо́бнии:/ по́слежде же изволе́нием Бо́жиим/ в вода́х морски́х кончи́ну блаже́нную прия́сте/ и к неболе́зненному поко́ю преста́вистеся от земли́ ра́дующеся./ Тем и по кончи́не от Христа́ Бо́га просла́вистеся чудесы́ оби́льно,/ те́плии в беда́х ве́рным помо́щницы показа́стеся./ И ны́не на Небесе́х предстоя́ще престо́лу Христо́ву,/ Вассиа́не преблаже́нне и Ио́но пресла́вне,/ моли́теся при́сно о душа́х на́ших.

Кондак, глас 2

Я́ко сокро́вище бога́тно,/ ве́рным Боже́ственная благода́ть/ из морски́х недр издаде́ мо́щи ва́ша, о́тцы преблаже́ннии,/ и в ме́сте пу́сте целы́ и невреди́мы обрето́шася пресла́вно,/ и та́ко вас ра́ди ны́не сла́вится Бог,/ Ему́же со дерзнове́нием предстоя́ще ны́не на Небесе́х,/ Вассиа́не и Ио́но досточу́днии,/ моли́теся непреста́нно о всех нас.

Величание

Ублажа́ем вас,/ преподо́бнии отцы́ Вассиа́не и Ио́но,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь преподобным Онуфрию и Авксентию Вологодским, глас 8

Правосла́вия наста́вницы,/ благоче́стия и чистоты́ учи́телие,/ Це́ркве Волого́дстей Богодаро́ванное украше́ние,/ преподо́бнии о́тцы на́ши Ону́фрие и Авксе́нтие,/ моли́те ми́лостиваго Бо́га,/ да ва́шим предста́тельством пода́ст благода́ть и мир стране́ на́шей/ и душа́м на́шим спасе́ние.

Кондак, глас 2

Волне́ний мно́жество невла́жно проходя́ще... (общий преподобным).

Величание

Ублажа́ем вас,/ преподо́бнии отцы́ Ону́фрие и Авксе́нтие,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь блаженному Иоанну, Христа ради юродивому, Московскому чудотворцу, глас 8

И́же Христа́ ра́ди, во́лею оста́вив свое́ оте́чество – град Во́логду/ и вся кра́сная ми́ра сего́ возненави́дев,/ жела́нием духо́вным всели́лся еси́ во град Росто́в/ и, я́ко в пусты́ни скита́яся в нем,/ гла́дом и жа́ждею и безме́рною тягото́ю плоть свою́ изнуря́я,/ и рабо́тая Го́сподеви день и нощь,/ в посте́ и моли́тве пребыва́я в притво́ре церко́внем,/ власы́ же главы́ своея́ пе́плом и смоло́ю удруча́я,/ и, ревну́я Васи́лию блаже́нному,/ прише́л еси́ в ца́рствующий град Москву́/ и в целому́дрии и терпе́нии тече́ние до́бре сконча́в,/ пресели́лся еси́ к ве́чным оби́телем,/ чуде́с лучи́ испуща́я,/ преблаже́нне Иоа́нне, о́тче наш,/ моли́ Христа́ Бо́га спасти́ся душа́м на́шим.

Кондак, глас тойже

И́же Христа́ ра́ди наложи́вый на себя́ му́дростию юро́дство,/ о́бразом бу́йства зрим от челове́к,/ у́мныма же крыло́ма горе́ возлета́я,/ все те́ло свое́ вери́гами обяза́я²¹,/ я́ко зла́то многоце́нное, соблюде́ся в наро́де,/ очи́стив ум от страсте́й,/ весе́лием духо́вным преше́л еси́ мо́ре мяте́жнаго сего́ жития́,/ обре́те све́тлость жи́зни ве́чныя,/ мо́лим тя, блаже́нне Иоа́нне,/ моли́ся приле́жно Христу́ Бо́гу на́шему/ сохрани́тся нам от вся́каго наве́та/ и злых обстоя́ний ви́димых и неви́димых враг, да зове́м ти:/ ра́дуйся, многострада́льне, я́ко да моли́твами твои́ми направля́еми,/ предстоя́ при́сно с на́ми,/ в Тро́ице сла́вимому Бо́гу пое́м Ему: аллилу́йя.

Величание

Ублажа́ем тя,/ святы́й пра́ведный Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь мученице Акидине, глас 4

Агница Твоя́, Иису́се... (общий мученице).

Кондак, глас 2

Де́вства твоего́ добро́тами предочи́стивши ду́шу твою́,/ и на высоту́ муче́нием востекла́ еси́, Акили́но всечестна́я,/ любо́вию Жениха́ твоего́ Христа́ уязви́вшися,/ Ему́же со а́нгелы предстои́ши, веселя́щися,/ с ни́миже не преста́й моля́ся о всех нас.

Величание

Велича́ем тя,/ страстоте́рпице Христо́ва Акили́но,/ и чтим честно́е страда́ние твое́,/ е́же за Христа́/ претерпе́ла еси́.

Тропарь святителю Трифиллию, епископу Левкусии Кипрской, глас 4

Пра́вило ве́ры, и о́браз кро́тости... (общий святителю).

Кондак, глас 8

Изря́дством жития́ чистоту́ де́вства прие́м, Трифи́ллие,/ первопресто́льник показа́лся еси́ Левкуси́и:/ яви́лся еси́ тем провозвести́тель и Богоразу́мия наста́вник./ Сего́ ра́ди ра́достно взыва́ем ти:/ ра́дуйся, святи́телей украше́ние.

Величание

Велича́ем тя,/ святи́телю о́тче Трифи́ллие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобным Андронику и Савве, Московским, глас 2

Плоды́ доброде́телей на земли́ прине́сши,/ преподо́бнии отцы́,/ в Небе́сных черто́зех ны́не благоуха́ете, я́ко ра́йстии цве́ти,/ и ли́цем к лицу́ зри́те Пресвяту́ю Тро́ицу, / ю́же* дерзнове́нно моли́те/ спасти́ся душа́м на́шим.

Ин тропарь, глас 8

От ю́ности своея́, преподо́бнии отцы́ Андрони́че и Са́вво,/ в пусты́ни всели́стеся Се́ргия вели́каго,/ того́ житию́ после́дующе,/ плоды́ смире́ния и послуша́ния возрасти́ли есте́./ Сего́ ра́ди сподо́бившеся бы́ти строи́тели и первона́чальники/ обе́тныя оби́тели святи́теля Алекси́я,/ с ни́мже испроси́те у Христа́ Бо́га ве́рным лю́дем здра́вие и спасе́ние/ и душа́м на́шим ве́лию ми́лость.

Ин тропарь, глас 1

Безмо́лвие от ю́ности возлюби́в,/ на го́ру Ма́ковец прише́л еси́, Андрони́че блаже́нне,/ оби́тель о́бщаго жития́ устро́ил еси́ в земне́м гра́де Москве́,/ во оби́тели Небе́снаго гра́да ны́не лико́вствуеши,/ моли́ся Христу́ Бо́гу/ спасти́ся душа́м на́шим.

Кондак, глас 3

Вас мо́лим, преподо́бнии отцы́ на́ши,/ те́лом почива́ющия на земли́,/ду́хом же Бо́жию престо́лу предстоя́щия;/ моли́теся о гра́де Москве́/ и о всех, почита́ющих честну́ю па́мять ва́шу.

Величание

Ублажа́ем вас,/ преподо́бнии отцы́ Андрони́че и Са́вво,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь блаженному Василию Кадомскому, глас 4

Моли́тва усе́рдная пи́ща и пити́е бысть, блаже́нне Васи́лие,/ в несе́нии креста́ жития́ стра́нническаго любо́вь Христо́ву позна́л еси́./ О́ком чи́стым бу́дущая я́ко настоя́щая прозрева́я,/ ра́дость и от бед избавле́ние/ тре́бующим твоея́ по́мощи дарова́л еси́./ Те́мже и нас, я́ко Бо́жий избра́нник,/ не забу́ди твои́ми ходата́йствы/ Христа́ Бо́га о нас умоля́ющи.

Кондак, глас 8

Вы́шния красоты́ жела́я,/ ни́жния сла́сти теле́сныя то́щно оста́вил еси́... (общий блаженным).

Величание

Ублажа́ем тя,/ святы́й пра́ведный Васи́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь пророку Елисею, глас 4

Во пло́ти а́нгел,/ проро́ков основа́ние,/ вторы́й Предте́ча прише́ствия Христо́ва, Илия́ сла́вный,/ свы́ше посла́вый Елисе́еви благода́ть,/ неду́ги отгоня́ти/ и прокаже́нныя очища́ти:/ те́мже и почита́ющим его́ то́чит исцеле́ния.

Ин тропарь, глас 4

И́же во пло́ти а́нгел/ и проро́ков нача́льнику свиде́тельствова, сла́вный Елисе́е,/ ди́вны чудеса́ соде́лал еси́, проро́че,/ поспе́шеством Свята́го Ду́ха;/ си́лою Илиино́ю исцели́в во́дное естество́,/ звери́ же погуби́ пожира́ющия,/ и Неема́на очи́сти,/ и вдови́ча сы́на воскреси́л еси́,/ и всем чту́щим тя да́руй благода́ть и исцеле́ние.

Кондак, глас 2

Проро́к Бо́жий яви́лся еси́,/ сугу́бую благода́ть прие́м,/ вои́стинну досто́йную тебе́, Елисе́е блаже́нне:/ Илии́ бо был еси́ совсе́льник,/ с ни́мже Христу́ Бо́гу моли́ся непреста́нно о всех нас.

Величание

Велича́ем тя,/ святый проро́че Бо́жий Елисе́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Мефодию, патриарху Константинопольскому, глас 4

Пра́вило ве́ры, и о́браз кро́тости... (общий святителю).

Кондак, глас 2

На земли́ подвиза́лся еси́, я́ко безпло́тный,/ и небеса́ насле́довал еси́, Мефо́дие,/ я́ко изъясни́вый в конце́х ико́н поклоне́ние,/ в труде́х бо и боле́знех вя́щше* пребы́в,/ не преста́л еси́ дерзнове́нием/ облича́я отмета́ющияся ико́ны Христо́вы.

Величание

Велича́ем тя,/ святи́телю о́тче Мефо́дие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь благоверному князю Мстиславу, во Святом Крещении Георгию, Храброму, Новгородскому, глас 4

Измла́да яви́лся еси́, Богому́дре кня́же Мстисла́ве,/ Боже́ственный сосу́д, избра́н Бо́гови,/ благоче́стием воспита́н,/ ве́ру непоро́чну соблю́л еси́./ Те́мже предстоя́ Святе́й Тро́ице,/ моли́ся стране́ Росси́йстей сохране́нной бы́ти/ и всем нам спасти́ся.

Кондак, глас 8

Многому́дренно пожи́в в княже́нии твое́м/ в Вели́ком Но́веграде сем,/ благове́рный кня́же Мстисла́ве,/ плод благи́й Бо́гови в жи́зни сей был еси́,/ присноцвету́щ доброде́тельми,/ того́ ра́ди получи́л еси́ жизнь ве́чную на Небесе́х,/ те́ло же твое́ нетле́нием просла́влено бысть на земли́./ Мы же, предстоя́ще ико́не твое́й, любо́вию вопие́м ти:/ радуйся, утвержде́ние гра́ду на́шему.

Величание

Велича́ем тя,/ святы́й благове́рный кня́же Мстисла́ве,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Мефодию, игумену Пешношскому, глас 8

Боже́ственною любо́вию от ю́ности распаля́ем,/ вся, я́же в ми́ре кра́сная, возненави́дев,/ Христа́ Еди́наго возлюби́л еси́,/ и, сего́ ра́ди в пусты́ню всели́вся,/ в ней оби́тель сотвори́л еси́,/ и, собра́в и́нок мно́жество,/ прия́л еси́ от Бо́га чуде́с дар, о́тче Мефо́дие,/ и был еси́ о Христе́ собесе́дник и спо́стник преподо́бному Се́ргию,/ с ни́мже у Христа́ Бо́га испроси́ правосла́вным Христиа́ном здра́вие, и спасе́ние,/ и душа́м на́шим ве́лию ми́лость.

Кондак, глас 4

Послуша́ния до́брый рачи́тель быв,/ безпло́тныя враги́ сле́зными моли́твами твои́ми кре́пко посрами́л еси́/ и яви́лся еси́ Пресвяты́я Тро́ицы жили́ще,/ ю́же зря, блаже́нне, я́сно,/ Богому́дре Мефо́дие преподо́бне,/ чуде́с дар от Нея́ прия́л еси́./ Те́мже исцеля́вши с ве́рою приходя́щих неду́ги,/ утоля́еши ско́рби,/ мо́лишися непреста́нно о всех нас.

Величание

Ублажа́ем тя,/ преподо́бне о́тче Мефо́дие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Ионе, митрополиту Московскому, всея России чудотворцу, глас 4

От ю́ности твоея́ весь сам себе́ Го́сподеви возложи́в,/ в моли́твах, и труде́х, и в посте́х о́браз быв доброде́тели,/ отону́дуже ви́дев Бог твое́ благо́е произволе́ние,/ архиере́я тя и па́стыря Це́ркви Свое́й устроя́ет./ Те́мже и по преставле́нии, честно́е те́ло твое́ це́ло и нетле́нно соблюде́ся,/ Ио́но святи́телю,/ моли́ Христа́ Бо́га, да спасе́т ду́ши на́ша.

Ин тропарь, глас 3

Яре́м Госпо́день измла́да восприи́м,/ и Того́ стопа́м невозвра́тным жела́нием после́довал еси́,/ и освяще́ннаго по́двига дости́же,/ святи́тельства па́ству прии́м и чуде́с от Бо́га дары́ прия́т,/ с ве́рою приходя́щим к ра́це моще́й твои́х/ подае́ши разли́чным неду́гом исцеле́ние неоску́дно,/ о́тче наш Ио́но, святи́телю Хри́стов,/ моли́ Христа́ Бо́га дарова́ти нам ве́лию ми́лость.

Ин тропарь, глас тойже

Боже́ственною благода́тию просвети́ вся/ и по сме́рти показу́я све́тлость жития́ твоего́,/ источа́вши ми́рови благоуха́ния,/ притека́ющим к ра́це моще́й твои́х,/ и наро́ди Моско́встии наставля́еши ко све́ту благоразу́мия,/ Ио́но, о́тче наш,/ моли́ Христа́ Бо́га/ дарова́ти нам ве́лию ми́лость.

Кондак, глас 8

Я́ко от младе́нства Го́сподеви порабо́тив себе́, му́дре,/ посто́м и бде́нием те́ло твое́ удруча́я;/ те́мже сосу́д чист и дом Ду́ху Пресвято́му яви́лся еси́./ Сего́ ра́ди и Це́ркви Свое́й тебе́ архиере́я и па́стыря устроя́ет,/ ю́же до́бре упа́сл, ко Го́споду отхо́диши, Его́же возлюби́л еси́./ Тем мо́лим тя:/ помина́й нас, ве́рою чту́щих святу́ю па́мять твою́, да вси зове́м ти:/ ра́дуйся, о́тче Ио́но, святи́телю всече́стный.

Ин кондак, глас 8

Жела́нием духо́вным по́стническое житие́ соверши́в/ и святи́тельства па́ству прии́м,/ чистоты́ ра́ди теле́сныя и те́ло твое́ Влады́ка Христо́с соблюде́ нетле́нно,/ и Петру́ чудотво́рцу насле́дника тя соде́ла,/ и того́ нра́ву после́довал еси́,/ и учи́теля тя Христо́с Своему́ ста́ду дарова́,/ иде́же лежа́т целе́бныя мо́щи твоя́,/ благоуха́ют, я́ко от кади́ла благово́нна,/ и подаю́т исцеле́ния немощны́м, ве́рою приходя́щим,/ святи́телю Ио́но, моли́ Христа́ Бо́га непреста́нно о всех нас.

Величание

Велича́ем тя,/ святи́телю о́тче Ио́но,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь пророку Амосу, глас 2

Проро́ка Твоего́ Амо́са па́мять, Го́споди, пра́зднующе,/ тем Тя мо́лим:/ спаси́ ду́ши на́ша.

Кондак, глас 4

Очи́стив ду́хом, проро́че,/твое́ светоза́рное се́рдце, сла́вный Амо́се,/ проро́чествия дар свы́ше прие́м,/ возопи́л еси́ велегла́сно в страна́х:/ се* Бог наш, и не преложи́тся ин к Нему́.

Величание

Велича́ем тя,/ проро́че Бо́жий Амо́се,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобным Григорию и Кассиану Авнежским, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви живо́т наш.

Ин тропарь, глас 8

Правосла́вия наста́вницы,/ благоче́стия и чистоты́ учи́телие,/ Це́ркви Волого́дстей богодаро́ванное украше́ние,/ преподо́бнии отцы́ на́ши Григо́рие и Кассиа́не,/ моли́те ми́лостиваго Бо́га,/ да ва́шим предста́тельством пода́ст благода́ть и мир стране́ на́шей/ и душа́м на́шим спасе́ние.

Кондак, глас 4

И́же пло́тская мудрова́ния Ду́хови повину́вше/ и вся, я́же на земли́, презре́вше,/ Христу́, Еди́ному Бо́гу, прилепи́вшеся, святи́и,/ и Того́ ра́ди в пусты́ню всели́шася,/ источа́ете ны́не исцеле́ние/ с ве́рою притека́ющим к моще́м ва́шим,/ поле́зная нам проси́те от Бо́га/ моли́твами ва́шими богоприя́тными,/ Григо́рие и Кассиа́не преподо́бнии.

Величание

Ублажа́ем вас,/ преподо́бнии отцы́ Григо́рие и Кассиа́не,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь блаженному Иерониму Стридонскому, глас 3

Вели́ка име́ет тя предста́теля, Богому́дре,/ правосла́вных собра́ние,/я́коже у́бо преподо́бных еси́ собесе́дник/ и Боже́ственныя прему́дрости соприча́стник,/ та́ко, пречу́дне Иерони́ме,/ Христу́ Бо́гу моли́ся/ дарова́ти нам ве́лию ми́лость.

Кондак, глас 8

В преподо́бных преподо́бнейшаго и в блаже́нных блаже́ннейшаго учи́теля,/ пе́сньми восхва́лим Иерони́ма достохва́льнаго,/ ве́рных наста́вника и засту́пника, любо́вию тому́ зову́ще:/ ра́дуйся, о́тче Богому́дре.

Величание

Ублажа́ем тя,/ святы́й пра́ведный Иерони́ме,/ и чти́м святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Ефрему II, патриарху Сербскому, глас 8

Патриа́рхов вели́кое удобре́ние,/ святи́телем красото́, мона́хом пра́вило,/ пусты́нником сла́ву, ми́лости пода́теля,/ разсужде́ния свети́льника,/ соше́дшеся, ве́рнии, восхва́лим,/ кро́тости учи́теля, Боже́ственнаго рачи́теля,/ прему́драго архипа́стыря, вели́каго святи́теля и отца́,/ Ефре́ма, Патриа́рха Се́рбскаго,/ звезду́, те́мныя лю́ди просвеща́ющую/ и вся ве́рныя озаря́ющую./ Те́мже, притека́юще к ра́це моще́й его́,/ любо́вию целу́ем я* и вопие́м:/ свя́те святы́й, непреста́й моли́ти Христа́ Бо́га/ спасти́ся душа́м на́шим.

Кондак, глас тойже

Я́ко благоче́стия учи́теля прекра́снаго/ и архиере́ом первопресто́льника прему́драго,/ и́ночествующим наста́вника и пра́вило,/ церко́вная ча́да, соше́дшеся, почти́м па́мять его́ пе́сньми, глаго́люще:/ ра́дуйся, о́тче, дея́ний и виде́ний у́ме соверше́нный.

Величание

Велича́ем тя,/ святи́телю о́тче Ефре́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь благоверному князю Сербскому Лазарю, глас 3

Красоту́ возжеле́в сла́вы Бо́жия,/ в земне́й Тому́ благоугоди́л еси́/ и, поруче́нный ти тала́нт до́бре возде́лав, усугуби́л еси́,/ о не́мже и подвиза́вся до кро́ве./ Отону́дуже и мзду боле́зней твои́х,/ я́ко му́ченик, прия́л еси́ от Христа́ Бо́га:/ Его́же моли́ спасти́ся/ пою́щим тя, Ла́заре.

Кондак, глас 8

Возбра́нника благоче́стия всеизря́дна/ и му́ченика о и́стине непосты́дна,/ че́стне и по до́лгу восхваля́ет тя ста́до твое́, Богому́дре,/ но я́ко име́я дерзнове́ние ко Христу́ Бо́гу,/ тебе́ сла́вящим смире́ние испроси́, да зове́м ти:/ ра́дуйся, Ла́заре приснопа́мятне.

Величание

Велича́ем тя,/ святы́й благове́рный кня́же Ла́заре,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Михаилу, первому митрополиту Киевскому и всея Руси, глас 4

Днесь проро́чествие во апо́столех Первозва́ннаго испо́лнися:/ се бо на сих гора́х возсия́ благода́ть и ве́ра умно́жися./ И и́же неве́рием обветша́вший/ Боже́ственною купе́лию отроди́шася/ и бы́ша лю́дие обновле́ния,/ ца́рское свяще́ние, язы́к свят, Христо́во ста́до,/ ему́же ты пе́рвый па́стырь яви́лся еси́,/ я́ко пе́рвее Креще́нием послужи́вый./ И ны́не, предстоя́ Влады́це Христу́ Бо́гу,/ моли́ всем сыно́м ру́сским спасти́ся:/ и́маши бо дерзнове́ние я́ко иера́рх Бо́жий и священнослужи́тель.

Кондак, глас 2

Моисе́й вторы́й Росси́и яви́лся еси́, о́тче,/ пренесы́й мы́сленный виногра́д от еги́петскаго идолослуже́ния/ в зе́млю проро́чествием предуви́дену./ Бу́дет, рече́, утвержде́ние ве́ры на земли́,/ и на ве́рсех гор Ки́евских превознесе́тся па́че Лива́на/ плод пита́ющ ми́ра всего́./ От него́же вкуси́вше,/ ублажа́ем тя, Михаи́ле, Бо́жий иера́рше.

Величание

Велича́ем тя,/ святи́телю о́тче Михаи́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Феодору Сикеоту, епископу Анастасиупольскому, глас 2

Позна́н быв от пеле́н освяще́н/ и я́влься благода́тей испо́лнен,/ чудесы́ мир озари́л еси́/ и де́монов мно́жество отгна́л еси́,/ священноде́телю Фео́доре,/ те́мже о нас мо́лится Го́сподеви.

Кондак, глас 3

Я́ко на о́гненную колесни́цу доброде́тельми, Богоно́се, возше́д,/ восте́кл еси́ на Небе́сная жили́ща,/ я́ко а́нгел, с челове́ки пожи́л еси́/ и я́ко челове́к со а́нгелы о́крест ликовству́еши./ Сего́ ра́ди показа́лся еси́/ чуде́с Боже́ственное прия́телище, Фео́доре преподо́бне.

Величание

Велича́ем тя,/ святи́телю о́тче Фео́доре,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Тихону, епископу Амафунтскому, глас 1

Пусты́нный жи́тель и в телеси́ а́нгел,/ и чудотво́рец яви́лся еси́, Богоно́се о́тче наш Ти́хоне;/ посто́м, бде́нием, моли́твою небе́сная дарова́ния прии́м,/ исцеля́вши неду́жныя и ду́ши ве́рою притека́ющих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеления.

Ин тропарь, глас 4

О́браз был еси́ воздержа́ния,/ Боже́ственным Ду́хом вся просвети́в,/ правове́рием тече́ние соверши́в, злове́рныя обличи́л еси́,/ о́тче наш святи́телю Ти́хоне,/ моли́ Христа́ Бо́га/ спасти́ся душа́м на́шим.

Кондак, глас 3

В по́стничестве, свя́те, боголюбе́зном пребы́в,/ Уте́шителеву си́лу с высоты́ прия́л еси́,/ и́дол низложи́ти пре́лести,/ лю́ди же спасти́,/ де́моны отгна́ти, неду́ги исцеля́ти./ С его́ ра́ди почита́ем тя,/ я́ко Бо́жия дру́га, Ти́хоне блаже́нне.

Ин кондак, глас 8

И́же Боже́ственнаго Ду́ха благода́тию избра́н святи́тель яви́ся/ и чудотво́рец показа́ся преди́вен./ Я́ко со́лнце, чудесы́ сия́я, Ти́хоне,/ па́мять твоя́ пресве́тлая./ Те́мже зове́м ти: ра́дуйся,/ преслову́щее* ми́ру свети́ло.

Величание

Велича́ем тя,/ святи́телю о́тче Ти́хоне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Тихону Медынскому, Калужскому, глас 4

Я́ко свети́льник пресве́тлый/ яви́лся еси́ в Росси́йстей земли́,/ преподо́бне о́тче наш Ти́хоне,/ в пусты́ни всели́вся,/ в не́йже преходя́ жесто́кое жи́тельство,/ я́ко безпло́тен пожи́л еси́;/ сего́ ра́ди и чуде́с дарова́нием обогати́ тя Бог./ Тем и мы, притека́юще к ра́це моще́й твои́х, уми́льно глаго́лем:/ о́тче преподо́бне,/ моли́ Христа́ Бо́га/ спасти́ся душа́м на́шим.

Кондак, глас 8

Оте́чества удали́вся, преподо́бне,/ в пусты́ню всели́лся еси́,/ иде́же жесто́кое житие́ твое́ показа́л еси́/ и мно́гих доброде́тельми удиви́в,/ дарова́ние чуде́с от Христа́ прия́л еси́./ Те́мже помина́й нас, чту́щих па́мять твою́, да зове́м ти:/ ра́дуйся, преподо́бне Ти́хоне, о́тче наш.

Величание

Ублажа́ем тя,/ преподо́бне о́тче Ти́хоне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Тихону Луховскому, Костромскому чудотворцу, глас 4

Жела́нием духо́вным в пусты́ню всели́лся еси́,/ и та́мо невозвра́тно ше́ствовав Боже́ственными стезя́ми,/ дости́гл еси́ в Небе́сныя оби́тели,/ и ны́не со а́нгелы предстои́ши/ у престо́ла всех Царя́ Христа́ Бо́га,/ Ему́же приле́жно моли́ся/ поми́ловати оби́тель сию́, град же и лю́ди,/ ве́рою пра́зднующий пречестну́ю па́мять твою́,/ Ти́хоне преподо́бне, о́тче наш.

Кондак, глас 8

Христо́вою любо́вию уязви́вся, преподо́бне,/ во след Его́ невозвра́тно ше́ствовал еси́,/ посто́м и воздержа́нием плотски́я стра́сти умертви́л еси́,/ бде́нием же и моли́твами вселука́ваго врага́ до конца́ низложи́л еси́/ и слеза́ми, я́ко елее́м, свещу́ све́тлу себе́ угото́вал еси́;/ те́мже в Небе́сныя оби́тели невозвра́тно вшел еси́,/ иде́же, ра́дуяся, Го́сподеви предстои́ши,/ Ему́же приле́жно моли́ся, мо́лим тя,/ я́ко да ми́лостив нам бу́дет в день стра́шнаго Его́ прише́ствия,/ и да не пребу́дем и мы вне черто́га Христо́ва,/ но да сподо́бит ны одесну́ю Себе ста́ти/ моли́твами твои́ми, преподо́бне, да зове́м ти:/ ра́дуйся, Богому́дре о́тче наш Ти́хоне.

Величание

Ублажа́ем тя,/ преподо́бне о́тче Ти́хоне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь мученикам Мануилу, Савелу и Исмаилу, глас 4

Му́ченицы Твои́, Го́споди... (общий мученикам).

Кондак, глас 2

Ве́рою Христо́вою уя́звлени, всеблаже́ннии,/ и Сего́ ве́рно испи́вше ча́шу,/ пе́рсская служе́ния и де́рзость на зе́млю низложи́сте,/ Тро́ицы равночи́сленнии,/ моли́твы творя́ще о всех нас.

Величание

Велича́ем вас,/ страстоте́рпцы святи́и Ману́иле, Саве́ле и Исма́иле,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобным Никите, Кириллу, Никифору, Клименту и Исааку, братий Алфановым, Новгородским (Сокольницким), глас 1

Послу́шаша Госпо́дня гла́са,/ до́брии рачи́тели бы́вше,/ благи́й Его яре́м на ся взе́мше,/ усе́рдно понесо́сте/ и по́стничества путь дости́гше,/ преподо́бнии отцы́, святи́и чудотво́рцы,/ во́ини Небе́снаго Царя́ Христа́,/ Ники́то, Кири́лле, Ники́форе, Кли́менте и Исаа́кие,/ сего́ ра́ди от Вседержи́тельныя десни́цы/ венцы́ неувяда́емыми увязо́стеся*, и Небе́сною сла́вою оде́ястеся,/ и чудотворе́нии обогати́стеся,/ те́мже и о нас моли́ти не преста́йте,/ да полу́чим ве́чных благ,/ мы же си́це взыва́ем:/ сла́ва Да́вшему вам к по́двигу кре́пость,/ сла́ва Венча́вшему вас,/ сла́ва Даю́щему ва́ми всем исцеле́ния.

Кондак, глас 8

Благода́ть прие́мше исцеле́нием,/ простира́ете здра́вие су́щим в боле́знех,/ преподо́бнии отцы́ и чудотво́рцы сла́внии,/ Ники́то чу́дне, и Кири́лле блаже́нне, и Ники́форе прече́стне,/ Кли́менте свя́те и Исаа́кие преподо́бне,/ но моли́твами ва́шими проти́вных шата́ние* разори́те,/ и боле́зни на́ша исцели́те,/ и грехо́в проще́ние испроси́те,/ да благода́рне воззове́м вам:/ ра́дуйтеся, Вели́кому Новугра́ду похвала́ и утвержде́ние.

Величание

Ублажа́ем вас,/ преподо́бнии отцы́ Ники́то, Кири́лле, Ники́форе, Кли́менте и Исаа́кие,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь мученику Леонтию, глас 4

Му́ченик Твой, Го́споди... (общий мученику).

Кондак, глас 3

Мучи́телей посрами́л еси́ лука́вая кова́рства/ и е́ллинов обличи́л еси́ безбо́жное служе́ние,/ возсия́л еси́ богоразу́мие всем челове́ком, уче́ньми благоче́стия,/ богому́дре му́чениче;/ сего́ ра́ди твою́ па́мять почита́ем любо́вию,/ прему́дре Лео́нтие.

Величание

Велича́ем тя,/ страстоте́рпче святы́й Лео́нтие,/ и чтим честна́я страда́ния твоя́,/ я́же за Христа́/ претерпе́л еси́.

Тропарь преподобному Леонтию, канонарху Печерскому, в Дальних пещерах почивающему, глас 3

Всечестны́й канона́рше Лео́нтие,/ правилонача́льный бы́вый в це́ркви/ и в пра́виле и́ночестем возсия́вший све́тло,/ моли́ Христа́ Бо́га,/ да прегреше́ний оставле́ние/ пода́ст душа́м на́шим.

Кондак, глас 1

Канона́ршествуя, честны́й канона́рше Лео́нтие,/ и пе́ние церко́вное пою́щим предводи́тельствуя в це́ркви,/ уподо́бился вои́стину а́нгелам,/ пою́щим Бо́га на Небеси́,/ и́хже и житию́ подража́я и с ни́ми лику́я,/ помина́й ны, любо́вию хва́лящих тя.

Ин тропарь, общий, преподобным Геронтию и Леонтию канонархам, в Дальних пещерах почивающим, глас 3

Дво́ице свята́я,/ правилонача́льная, бы́вшая в це́ркви/ и в пра́виле и́ночестем возсия́вшая све́тло,/ всечестни́и канона́рси,/ моли́те Христа́ Бо́га,/ да прегреше́ний оставле́ние пода́ст душа́м на́шим.

Ин кондак, общий, глас 1

Канона́ршествующе, честни́и канона́рси,/ и пе́ние церко́вное пою́щим предводи́тельствуще в це́ркви,/ уподо́бистеся вои́стинну а́нгелом,/ пою́щим Бо́га на Небеси́, и́хже житию́ подража́вше,/ и, с ни́ми ны́не лику́юще,/ помина́йте ны, любо́вию хва́лящих вас.

Величание

Ублажа́ем тя,/ преподо́бне о́тче Лео́нтие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее «Боголюбская» («Боголюбивая»), глас 1

Боголюби́вая Цари́це,/ Неискусому́жная Де́во, Богоро́дице Мари́е!/ Моли́ за ны Тебе́ Возлюби́вшаго/ и Ро́ждшагося от Тебе́ Сы́на Твоего́, Христа́ Бо́га на́шего,/ пода́ти нам оставле́ние прегреше́ний,/ ми́рови мир, земли́ плодо́в изоби́лие,/ па́стырем святы́ню/ и всему́ челове́чу ро́ду спасе́ние./ Гра́ды на́ша и всю зе́млю Росси́йскую от нахожде́ния иноплеме́нных заступи́/ и от междоусо́бныя бра́ни сохрани́./ О Ма́ти, Боголюби́вая Де́во!/ О Цари́це всепе́тая!/ Ри́зою Свое́ю покры́й нас от вся́каго зла,/ от ви́димых и неви́димых враг защити́/ и спаси́ ду́ши на́ша.

Ин тропарь, глас тойже

Всепе́тая и Всесла́вная Цари́це Богоро́дице,/ Ма́ти всея́ тва́ри Соде́теля,/ христиа́нская Наде́ждо и Засту́пнице,/ печа́льных Утеше́ние, ненаде́ющихся и отча́явшихся ско́рое Наде́яние!/ Мо́лим Тя, ми́лостива бу́ди нам, гре́шным,/ и не оста́ви раб Свои́х,/ и не отри́ни моле́ния ве́рных,/ в скорбе́х и бе́дах пред честны́м о́бразом Твои́м избавле́ния тре́бующих./ О Влады́чице, блага́я Помо́щнице!/ Ри́зою Твое́ю честно́ю нас защити́ и от всех зол изба́ви,/ моля́щи Сы́на Твоего́, Христа Бо́га на́шего,/ да спасе́т ду́ши на́ша, я́ко Милосе́рд.

Кондак, глас 3

Де́ва днесь предстои́т Сы́ну,/ ру́це Свои́ к Нему́ простира́ющи,/ святы́й князь Андре́й ра́дуется,/ и с ним Росси́йская страна́ торжеству́ет,/ нас бо ра́ди мо́лит Богоро́дица Преве́чнаго Бо́га.

Величание

Велича́ем Тя,/ Пресвята́я Де́во,/ и чтим о́браз Твой святы́й,/ его́же благове́рный князь Андре́й даде́ нам на враги́ в побе́ду/ и всем ве́рным во спасе́ние.

Тропарь Божией Матери ради иконы Ее, именуемой «Свято-Крестовская», глас 1

Чрез святу́ю Твою́ ико́ну, я́вленную на Кавка́зе, о Влады́чице,/ лю́ди гра́да Свята́го Креста́/ от стра́шнаго ага́рянскаго нападе́ния чуде́сно свободи́ла еси́,/ Блага́я Врата́рнице!/ Плене́ние, скорбь и у́зы/ в ра́дость и свобо́ду премени́ла еси́,/ Скоропослу́шнице на́ша./ Мо́лим Тя, Ма́терь Бо́жия,/ и на бу́дущее вре́мя защища́й всех,/ на Кавка́зе живу́щих чад Твои́х,/ от восстаю́щих и оби́дящих нас,/ непреста́нно моля́щеся у Креста́ Сы́на Твоего́, Всенепоро́чная.

Тропарь апостолу Иуде, брату Господню, глас 1

Христо́ва тя сро́дника, о Иу́до, ве́дуще, и му́ченика тве́рда,/ свяще́нно восхваля́ем, пре́лесть попра́вша, и ве́ру соблю́дша./ Те́мже днесь всесвяту́ю твою́ па́мять пра́зднующе,/ грехо́в разреше́ние моли́твами твои́ми прие́млем.

Ин тропарь, глас тойже

Чистоту́ душе́вную и житие́ непоро́чно стяжа́в,/ Пречи́стаго Све́та, нам прибли́жшагося, быв по пло́ти брат и учени́к,/ благоче́стия пропове́дник и язы́ком учи́тель и́стинный,/ Иу́до всехва́льне,/ моли́ Христа́ Бо́га,/ да спасе́т ду́ши на́ша.

Кондак, глас 2

Тве́рдым умо́м избра́н учени́к ты яви́лся еси́/ и столп необори́м Це́ркве Христо́вы,/ язы́ком пропове́дал еси́ сло́во Христо́во,/ ве́ровати глаго́ля во еди́но Божество́,/ от Него́же просла́вився, прия́л еси́ дар исцеле́ний,/ цели́ти неду́ги притека́ющим к тебе́,/ апо́столе Иу́до всехва́льне.

Ин кондак, глас тойже

Па́влу я́влься собесе́дник, апо́столе,/ с сим нам про́поведь возвести́л еси́ Боже́ственныя благода́ти,/ тайноглаго́льниче, Иу́до блаже́нне;/ сего́ ра́ди вопие́м ти:/ не преста́й моля́ся о всех нас.

Величание

Велича́ем тя,/ апо́столе Христо́в Иу́до,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Тропарь святителю Иову, первому патриарху Московскому и всея Руси, глас 3

Да торжеству́ет Це́рковь Христо́ва/ и да ра́дуется град Москва́,/ я́ко возсия́ свети́льник земли́ Росси́йския,/ во испове́дании и́стины непоколеби́мый И́ов патриа́рх,/ его́же моли́твами, Го́споди,/ вся собла́зны ми́ра сего́ и е́реси искорени́,/ лю́ди во благоче́стии наста́ви/ и утверди́ в Правосла́вии.

Ин тропарь, глас 5

Правосла́вия побо́рниче,/ ве́ры Христо́вы испове́дник был еси́,/ первоиера́рше Це́ркве Ру́сския,/ святи́телю о́тче И́ове;/ за ны Христа́ Бо́га моли́/ ве́ру оте́ческую утверди́ти,/ грехо́в оставле́ние нам дарова́ти/ и пода́ти ми́ру ве́лию ми́лость.

Кондак, глас 7

В годи́ну лю́тых искуше́ний/ многострада́льному И́ову подо́бяся,/ обрати́в па́ству к покая́нию,/ терпели́ве И́ове святи́телю,/ моли́ и нам за вся благодари́ти Го́спода/ и всегда́ воздава́ти/ сла́ву Бо́гови.

Ин кондак, глас 6

Свети́льник Це́ркве Ру́сския/ и па́стырь до́брый яви́лся еси́,/ святи́телю о́тче И́ове,/ моли́твою твое́ю ко Го́споду/ храни́ зе́млю Росси́йскую/ и спаси́ ду́ши на́ша.

Величание

Велича́ем тя,/ святи́телю о́тче И́ове,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Паисию Великому, глас 2

Боже́ственною любо́вию от ю́ности распаля́ем, преподо́бне,/ вся кра́сная, я́же в ми́ре, возненави́де,/ Христа́ еди́наго возлюби́л еси́,/ сего́ ра́ди в пусты́ню всели́ся,/ иде́же сподо́бися Боже́ственнаго посеще́ния,/ Его́же неудо́бь зре́ти и а́нгельскима о́чима,/ паде́, поклони́ся,/ Вели́кий же Дарода́тель, я́ко Человеколю́бец, рече́ к тебе́:/ не ужаса́йся, возлю́бленный Мой,/ дела́ твоя́ уго́дна Мне,/ се даю́ тебе́ дар:/ о ко́ем-ли́бо гре́шнице помо́лишися,/ отпу́стятся е́му греси́./ Ты же в чистоте́ се́рдца твоего́ возгоре́ся,/ прие́м во́ду и прикосну́ся Неприкоснове́нному,/ умы́ но́зе Его́/ и, во́ду пив, да́ром чуде́с обогати́ся,/ боля́щия исцеля́ти, бе́сы от челове́к отгоня́ти/ и гре́шники от му́ки моли́твою свое́ю избавля́ти./ О, преподо́бне о́тче Паи́сие,/ молю́ тя, да умо́лиши и о мне,/ я́коже тебе́ Бог обетова́,/ и́бо от сих гре́шник пе́рвый аз есмь,/ да даст ми Госпо́дь вре́мя покая́ния/ и прости́т мое́ согреше́ние,/ я́ко Благи́й и Человеколю́бец,/ да со все́ми и аз воспою́ Ему́: Аллилу́иа.

Ин тропарь, глас 1

Пусты́нный жи́тель и в телеси́ а́нгел... (общий преподобному).

Кондак, глас 2

Жите́йских молв оста́вль,/ безмо́лвное житие́ возлюби́л еси́,/ Крести́телю подобя́ся все́ми о́бразы,/ с ни́мже тя почита́ем,/ о́тче отце́в Паи́сие.

Ин кондак, глас 8

От мла́да зва́нию Го́спода твоего́ после́довал еси́ усе́рдно, блаже́нне,/ вся, я́же в ми́ре кра́сная, Его́ ра́ди оста́вив./ Крест твой на ра́мена взем,/ всели́лся еси́ в пусты́ню,/ и, та́мо а́нгельски пожи́в,/ те́ло твое́ посто́м и моли́твами изнури́л еси́,/ и мно́гим путь был еси́ ко спасе́нию,/ вся возводя́ к Боже́ственней высоте́,/ Паи́сие преподо́бне,/ отце́в и по́стников тве́рдое основа́ние.

Величание

Ублажа́ем тя,/ преподо́бне о́тче Паи́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Варлааму Пинежскому, Важскому, Шенкурскому, глас 3

И́же к доброде́телем прилежа́нием взыгра́ния пло́ти обузда́л еси́,/ благи́ми нра́вы ду́шу свою́ укра́сив,/ от земны́х Христу́ превозведе́ ум свой,/ тем от Него́ исцеле́нием струя́ незави́стна яви́ся,/ притека́ющим ве́рою к тебе́ и любе́зно зову́щим:/ Варлаа́ме о́тче наш,/ моли́ Христа́ Бо́га,/да спасе́т ду́ши на́ша.

Кондак, глас 8

Я́ко звезда́ светоза́рная,/ от Вели́каго Но́ваграда прише́д,/ в чужи́х, я́ко в за́падных стра́нах, за́йде,/ от восто́к чуде́с, я́ко со́лнце, возсия́,/ те́мже, и́же во тьме и се́ни сме́ртней, в неду́зех лежа́щий, свет исцеле́ния от Тебе́ прие́млюще,/ с на́ми, ча́ды твои́ми, непреста́нно вопию́т ти:/ ра́дуйся, Богому́дре Варлаа́ме о́тче наш.

Величание

Ублажа́ем тя,/ преподо́бне о́тче Варлаа́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Паисию Хилендарскому, Болгарскому, глас 4

Кири́лла равноапо́стольнаго язы́к,/ защити́в, обнови́л еси́/ и Патриарха Евфи́мия благослове́ние Тро́йческое, преднача́в,/ испо́лнил еси́./ Твои́м бо трудо́м болга́ром/ па́ки вня́тным их язы́ком благоче́стие воспропове́дася,/ и тобо́ю пе́рвее нача́т Про́мысл Тро́йческий – / де́ло освобожде́ния ро́да Болга́рскаго./ Сего́ ра́ди тя почита́ем,/ Паи́сие блаже́нне,/ и любо́вию соверша́ем честну́ю па́мять твою́.

Кондак, глас 8

Во брань вступи́л еси́ не ору́жием,/ но кни́жицею ма́лою, блаже́нне,/ ника́коже устраши́вся си́лы враго́в,/ но, заже́г свети́льник посреде́ сме́ртныя тьмы́,/ победи́л еси́ в коне́ц за лю́ди твоя́./ Сего́ ра́ди вопие́м ти:/ ра́дуйся, Паи́сие о́тче,/ денни́це све́тлая болга́рскаго но́ваго дне.

Величание

Ублажа́ем тя,/ преподо́бне о́тче Паи́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь священномученику Мефодию, епископу Патарскому, глас 1

Кровь твоя́, му́дре, та́йно вопие́т от земли́,/ я́коже Авелева к Бо́гу,/ богому́дре святи́телю Мефо́дие,/ я́сно пропове́давый Бо́жие вочелове́чение./ Те́мже и посрами́л еси́ Ориге́нову лесть,/ и преста́вился еси́ в Небе́сный Черто́г./ Моли́ Христа́ Бо́га,/ да спасе́т ду́ши на́ша.

Кондак, глас 4

Священнотаи́нник Святы́я Тро́ицы,/ и я́же па́че ума́ повеле́ний Боже́ственных пропове́дник,/ и правосла́вным утвержде́ние был еси́, Мефо́дие,/ злосла́вныя обличи́л еси́ смы́слы,/ правове́рия ра́ди кро́вию твое́ю священному́ченик я́влься,/ и Христу́ со а́нгелы предстоя́,/ моли́ спасти́ся нам.

Величание

Велича́ем тя,/ священному́чениче Мефо́дие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Гурию, первому архиепископу Казанскому, глас 4

Я́ко крин благово́нный,/ мироточи́выя твоя́ мо́щи/ от вертогра́да це́ркве Спа́совы/ в вертогра́д це́ркве Богоро́дичны че́стне принесо́шася,/ святи́телю Гу́рие,/ я́коже бо дар че́стен/ тя дарова́ Христо́с Пречи́стей Ма́тери Свое́й,/ и испо́лнися храм Ея́ святы́й благоуха́ния твоего́,/ и возра́довася архиере́йский престо́л,/ прие́мый тя первоседа́теля своего́./ Возвесели́ся же собо́р ве́рных со святи́телем и священнона́чальники/ о пресла́внем цельбоно́сных твои́х моще́й пренесе́нии,/ е́же мы ра́достно пра́зднующе мо́лим тя, уго́дниче Бо́жий,/ моли́ Христа́ Бо́га/ пода́ти душа́м на́шим ве́лию ми́лость.

Ин тропарь, глас 3

Доброде́тельнаго и благоро́днаго ра́ди твоего́ жития́,/ изве́л тя есть Преще́дрый Бог/ на первопресто́льство богоспаса́емаго ца́рства Каза́ни/ и просвети́л есть уче́нием твои́м бесерме́ньстии* язы́цы./ И мно́гия, святи́телю Гу́рие, во избра́нное Христо́во ста́до приве́л еси́,/ и нищелю́бием богоуго́дно пожи́л еси́,/ и по преставле́нии твое́м мно́го лет сокрове́нное твое́ те́ло/ от недр земны́х на удивле́ние яви́ся,/ и благоуха́ннаго ми́ра гроб напо́лнися приходя́щим с ве́рою,/ взима́ющим ми́ро от ра́ки честны́х моще́й твои́х,/ всем источа́вши исцеле́ния,/ святи́телю Христо́в Гу́рие,/ моли́ Христа́ Бо́га/ спасти́ся душа́м на́шим.

Кондак, глас 4

Чу́вственныя стра́сти победи́в,/ чистото́ю, я́ко со́лнце, возсия́л еси́,/ чи́сто житие́ до конца́ сохрани́в,/ и от неве́рия в ве́ру мно́гих ко Христу́ приве́л еси́,/ того́ ра́ди от Бо́га нетле́нием почте́н,/ чудесы́ твои́ми вся удиви́л еси́./ Мо́лим у́бо тя, святи́телю Гу́рие,/ моли́твами твои́ми от бед изба́ви нас, да зове́м ти:/ ра́дуйся, о́тче преди́вный, гра́ду Каза́ни похвало́ и утвержде́ние.

Ин кондак, глас 6

И́стине основа́ние, и ве́ры утвержде́ние,/ и в поуче́ниих преизря́днаго све́мы* тя, благоче́стию споспе́шника,/ апо́столом сопресто́льника, страстоте́рпцем соприча́стника,/ по́стником купноревни́теля похваля́ем тя, Гу́рие святи́телю,/ и ве́лия таи́нника Бо́жия благода́ти.

Величание

Велича́ем тя,/ святи́телю о́тче Гу́рие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному равноапостольному Науму Охридскому, глас 4

Мир оста́вил еси́, прилепи́вся Христу́/ плоть распя́л еси́, пожи́в Ду́ху,/ Нау́ме всеблаже́нне,/ потща́лся еси́ апо́стольским подвиза́тися тече́нием/ и улови́л еси́ к ве́ре Болга́рская неисче́тная мно́жества./ Те́мже моли́твами твои́ми/ изба́ви нас от искуше́ний.

Кондак, глас 3

Све́тлых твои́х по́двигов пречестна́я па́мять,/ я́ко ве́лие со́лнце, всем возсиява́ет,/ ли́ца воспева́ющих тя просвеща́ет,/ де́моны и вся́ку боле́знь отгоня́ет,/ сего́ ра́ди, соше́дшеся, любо́вию сию́ ве́рно восхва́лим.

Величание

Велича́ем тя,/ святы́й равноапо́стольный Нау́ме,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Тропарь благоверному князю Глебу Владимирскому, глас 4

Днесь све́тло красу́ется сла́внейший град Влади́мир,/ име́я в себе пребога́тое сокро́вище,/ чудоточа́щия честны́я мо́щи благове́рнаго кня́зя Гле́ба,/ и́миже украша́лся и хваля́ся,/ вселе́нную всю созыва́ет к весе́лию/ и велегла́сно вопие́т:/ о Влады́ко Христе́,/ дарова́вый такову́ю благода́ть уго́днику Твоему́,/ его́ моли́твами помина́й нас.

Кондак, глас 8

Взбра́нному* и кре́пкому в пра́ведницех,/ правосла́вною му́дростию сия́ющему, вели́кому чудотво́рцу,/ благода́рственная воспису́ем²² ти, благове́рный кня́же Гле́бе,/ я́ко име́я дерзнове́ние у престо́ла Христо́ва,/ ве́рою чту́щих тя, град и лю́ди сохраня́й моли́твами твои́ми,/ ты бо еси́ земли́ Росси́йския похвала́ и утвержде́ние.

Величание

Велича́ем тя,/ святы́й благове́рный кня́же Гле́бе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь мученику Иулиану Тарсийскому, глас 4

Му́ченик Твой, Го́споди... (общий мученику).

Кондак, глас 2

Благоче́стия непобеди́маго во́ина,/ и и́стины согла́сника* и ору́жника,/ вси досто́йно восхва́лим Иулиа́на днесь,/ и к нему́ возопии́м:/ моли́ Христа́ Бо́га о всех нас.

Величание

Велича́ем тя,/ страстоте́рпче святы́й Иулиа́не,/ и чтим честна́я страда́ния твоя́,/ я́же за Христа́/ претерпе́л еси́.

Тропарь мученику Иулиану Египетскому и иже с ним, глас 1

Све́тлыя по́стничества по́двиги,/ ра́дуяся, поне́сл еси́, Иулиа́не Богоблаже́нне, с преподо́бною Васили́ссою,/ и страда́ния до́бльственно претерпе́л еси́/ с честны́ми твои́ми сострада́льцы,/ с ни́миже моли́ Христа́ Бо́га/ спасти́ся душа́м на́шим.

Кондак, глас 8

И́же в преподо́бных и му́ченицех/ пресла́внаго Иулиа́на и сподви́жников его́/ любо́вию па́мять почита́ем днесь,/ я́ко просла́вивших Го́спода Боже́ственными де́лы/ и просла́вленных Го́сподом Боже́ственными чудесы́,/ и́хже пе́сньми увенча́им, зову́ще:/ ра́дуйтеся, во́ини Христо́вы непобеди́мии.

Величание

Велича́ем тя,/ страстоте́рпче святы́й Иулиа́не с честны́ми твои́ми сострада́льцы,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобной Анастасии, матери святителя Саввы, первого архиепископа и учителя Сербского, глас 4

Доброде́тельми бога́тая,/ кро́тостию и благоче́стием укра́шенная,/ возсия́ла еси́ чистото́ю жития́ твоего́,/ сего́ ра́ди Благи́й Бог благослови́ тя/ бы́ти ма́терию свети́льника ро́да се́рбскаго,/ те́мже вопие́м ти:/ ра́дуйся, преподо́бная ма́ти Анастаси́е.

Кондак, глас тойже

Во благослове́ннем бра́це пожи́вши,/ нескве́рно удержа́ла еси́ зако́нно целому́дрие,/ ча́да же твоя́ кро́тко учи́ла еси́/ па́че всех Христа́ люби́ти,/ Ему́же ны́не предстоя́щи и моля́щися,/ помяни́ и нас, вопию́щих ти:/ ра́дуйся, преподо́бная ма́ти Анастаси́е.

Величание

Ублажа́ем тя,/ преподо́бная ма́ти Анастаси́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь благоверному князю Феодору Стародубскому, глас 1

Боже́ственным жела́нием от ю́наго во́зраста/ весь сам себе́ Го́сподеви возложи́в,/ в моли́твах и посте́х о́браз был доброде́тели,/ бога́тство же, и сла́ву, и доброро́дство теле́сное, я́ко не су́щее, презре́в,/ Христа́ еди́наго от души́ возлюби́л еси́,/ и Того́ и́стиннаго Бо́га пред нечести́вым царе́м испове́дал еси́,/ и до́блестию терпе́ния своего́ сего́ ужаси́л/ и всех преудиви́л еси́./ Те́лом бо, я́ко розга́, обреза́емь,/ на ки́йждо соста́в, удеси́ ре́зания/ благода́рны моли́твы изре́к еси́ Го́сподеви./ Тем во страда́нии свое́м вене́ц прие́м,/ к Престо́лу возше́л еси́ сла́вы/ и со а́нгелы предстои́ши, всехва́льне Фео́доре,/ моли́ Христа́ Бо́га/ спасти́ся душа́м наши́м.

Кондак, глас 3

Здесь све́тло сия́ющая Це́рковь/ благоче́стно пра́зднует пра́здник/ пресве́тлой и светоно́сной твое́й па́мяти,/ вели́кий град и страну́ созыва́ющи,/ ра́дуется бо, я́ко иму́щи в себе́ сокро́вище ве́лие – / честны́я и многоцеле́бныя мо́щи твоя́,/ всехва́льне Фео́доре, му́чениче великоимени́тый/ и чуде́с пода́телю пребога́тый,/ моли́ Христа́ Бо́га/ спасти́ся душа́м на́шим.

Величание

Велича́ем тя,/ святы́й благове́рный кня́же и страстоте́рпче Фео́доре,/ и чтим честна́я страда́ния твоя́,/ я́же за Христа́/ претерпе́л еси́.

Тропарь преподобному Максиму Греку (на преставление), глас 8

Заре́ю Ду́ха облиста́емь,/ вити́йствующих богому́дренно сподо́бился еси́ разуме́ния,/ неве́дением омраче́нная сердца́ челове́ков све́том благоче́стия просвеща́я,/ пресве́тел яви́лся еси́ Правосла́вия свети́льник, Макси́ме преподо́бне,/ отону́дуже ре́вности ра́ди Всеви́дящаго/ оте́чества чу́жд и стра́нен, Росси́йския страны́ был еси́ пресе́льник,/ страда́ния темни́ц и заточе́ния от самодержа́внаго претерпе́в,/ десни́цею Вы́шняго венча́ешися и чудоде́йствуеши пресла́вная./ И о нас хода́тай бу́ди непрело́жен,/ чту́щих любо́вию святу́ю па́мять твою́.

Кондак, глас тойже

Богодухнове́нным Писа́нием и Богосло́вия пропове́данием/ неве́рствующих суему́дрие обличи́л еси́, всебога́те,/ па́че же, в Правосла́вии исправля́я, на стезю́ и́стиннаго позна́ния наста́вил еси́,/ я́коже свире́ль Богогла́сная, услажда́я слы́шащих ра́зумы,/ непреста́нно весели́ши, Макси́ме досточу́дне,/ сего́ ра́ди мо́лим тя:/ моли́ Христа́ Бо́га грехо́в оставле́ние низпосла́ти,/ ве́рою пою́щим всесвято́е твое́ успе́ние, Макси́ме, о́тче наш.

Величание

Ублажа́ем тя,/ преподо́бне о́тче Макси́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь священномученику Евсевию, епископу Самосатскому, глас 4

И нра́вом прича́стник,/ и престо́лом наме́стник... (общий священномученику).

Кондак, глас тойже

Благоче́стно во святи́тельстве пожи́в,/ и муче́ния путь проше́д,/ и́дольския угаси́л еси́ же́ртвы, святи́телю Евсе́вие,/ но я́ко име́яй дерзнове́ние ко Христу́ Бо́гу,/ моли́ спасти́ся душа́м на́шим.

Величание

Велича́ем тя,/ священному́чениче Евсе́вие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Божией Матери ради иконы Ее Владимирская, глас 4

Днесь све́тло красу́ется сла́внейший град Москва́,/ я́ко зарю́ со́лнечную восприи́мши, Влады́чице, чудотво́рную Твою́ ико́ну,/ к не́йже ны́не мы притека́ющие и моля́щеся Тебе́, взыва́ем си́це:/ о Пречу́дная Влады́чице Богоро́дице,/ моли́ся из Тебе́ воплоще́нному Христу́ Бо́гу на́шему,/ да изба́вит град сей и вся гра́ды и страны́ христиа́нския невреди́мы от всех на́вет вра́жиих/ и спасе́т ду́ши на́ша, я́ко Милосе́рд.

Кондак, глас 8

Взбра́нной Воево́де победи́тельная,/ я́ко изба́вльшеся от злых прише́ствием Твоего́ честна́го о́браза,/ Влады́чице Богоро́дице,/ све́тло сотворя́ем пра́зднество сре́тения Твоего́,/ и обы́чно зове́м Ти:/ ра́дуйся, Неве́сто Неневе́стная.

Ин кондак, глас тойже

К Взбра́нней Воево́де и Засту́пнице, Де́ве и Богоро́дице,/ в чи́стей со́вести, ве́рою утверди́вшеся, ру́сстии наро́ди,/ невозвра́тно наде́жду иму́ще, притеце́м,/ к чудотво́рному Ея и пречи́стому о́бразу, и возопие́м Ей:/ ра́дуйся Неве́сто Неневе́стная.

По полиелеи припев:

Досто́йно есть велича́ти Тя, Богоро́дице,/ честне́йшую Херуви́м/ и сла́внейшую без сравне́ния Серафи́м.

Или:

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь Собору Владимирских святых, глас 4

Днесь све́тло красу́ется Пресвяты́я Богоро́дицы избра́нный град/ и с ним вси концы́ земли́ Влади́мирския торжеству́ют,/ па́мять соверша́юще богопросла́вленнаго вели́каго ли́ка святы́х,/ в по́двизех Правосла́вныя ве́ры и́здревле во уде́ле сем Бо́гу угоди́вших,/ и к ним с любо́вию вопию́т:/ о преди́внии Христу́ Бо́гу моли́твенницы,/ венцы пресве́тлыми от Него́ увенча́нныя,/ мир и благоде́нствие оте́честву ва́шему испроси́те/ и душа́м на́шим ве́лию ми́лость.

Кондак, глас тойже

Я́ко зве́зды пресве́тлыя Це́ркве Росси́йския,/ испове́данием Правосла́вныя ве́ры в той возсия́вшии,/ вси святи́и земли́ Влади́мирския,/ Богому́дрии святи́телие и благове́рнии кня́зи,/ преподо́бнии отцы́ и ма́тери,/ страстоте́рпцы и пра́веднии,/ Христу́ Бо́гу усе́рдно моли́теся,/ грехо́в оставле́ние дарова́ти,/ любо́вию чту́щих святу́ю па́мять ва́шу.

Величание

Велича́ем вас,/ вси святи́и в земли́ Влади́мирской просия́вшии,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь мученице Агриппине, глас 4

Агница Твоя́, Иису́се... (общий мученице).

Кондак, глас тойже

Све́тлых по́двиг твои́х светоно́сный наста́ день,/ во́ньже* почита́ющи сих Боже́ственная Це́рковь вся созыва́ет ве́село вопи́ти тебе́:/ ра́дуйся, де́во и му́ченице, Агриппи́но всечестна́я.

Величание

Велича́ем тя,/ страстоте́рпице Христо́ва Агриппи́но,/ и чтим честно́е страда́ние твое́,/ е́же за Христа́/ претерпе́ла еси́.

Тропарь праведному Артемию Веркольскому, глас 2

Вы́шняго повеле́нием,/ тучено́сным о́блаком не́бо помрачи́вшим,/ и мо́лниям блиста́ющим,/ гро́му же возшуме́вшу с преще́нием,/ испусти́л еси́ ду́шу твою́ в ру́це Го́сподеви,/ прему́дре Арте́мие,/ и ны́не предстои́ши престо́лу Влады́ки всех,/ о и́же ве́рою и любо́вию приходя́щим к тебе́,/ подая́ исцеле́ния всем неотло́жно/ и моля́ся Христу́ Бо́гу/ спасти́ся душа́м на́шим.

Кондак, глас 8

Возсия́ днесь пресве́тлая па́мять прему́драго Арте́мия,/ богода́нная благода́ть, я́ко река́, излива́ет от святоцеле́бныя ра́ки моще́й его́ ди́вная исцеле́ния,/ и́миже от многоразли́чных неду́г избавля́емся,/ с ве́рою прие́млюще я́, и взыва́юще:/ ра́дуйся, Арте́мие Богому́дре.

Величание

Велича́ем тя,/ святы́й пра́ведный Арте́мие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Или:

Велича́ем тя,/ страстоте́рпче Христо́в Арте́мие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Герману, архиепископу Казанскому, глас 4

От ю́ности и́го Христо́во усе́рдно восприи́м,/ бде́нными по́двиги поста́ и моли́твы, просла́вился еси́./ Отону́дуже призыва́ющу тя Бо́гу на служе́ние Це́ркви/ в новопросвеще́ннем ца́рстве Каза́нстем,/ вку́пе со святи́телем Гу́рием воззва́н был еси́,/ иде́же, я́ко первонача́льник/ созда́нныя тобо́ю в гра́де Свия́жске оби́тели,/ и досто́йный первосвяти́телю прее́мник яви́лся еси́./ Ду́хом предстоя́ престо́лу Влады́чню,/ моли́ся, святи́телю Ге́рмане, со святи́телем Гу́рием,/ правосла́вней па́стве во благоче́стии преспе- ва́ти,/ и тьме инове́рия све́том ве́ры разгна́тися.

Ин тропарь, глас тойже

Я́ко вели́ким па́стырем единонра́вна/ и учи́телем вселе́нныя единомы́сленна,/ Це́ркве Бо́жия служи́теля усе́рдна,/ и строи́теля Та́ин Христо́вых благогове́йна,/ сте́кшеся, благове́рнии лю́дие,/ свия́жския оби́тели богому́драго основа́теля/ и каза́нския новопросвеще́нныя па́ствы святи́теля Ге́рмана/ пе́сньми и пе́нии восхва́лим, глаго́люще:/ не преста́й присеща́ти моли́твами твои́ми на оби́тель и на всю па́ству твою́,/ и оби́тель во святы́ни, па́ству же в ве́ре и благоче́стии, блюсти́ невреди́мо.

Кондак, глас тойже

До́блестями преподо́бия и пра́вды/ вруче́нное тебе́ слове́сное ста́до озаря́я,/ и на зла́чных сло́ва Христо́ва па́житех пита́я,/ на пра́вый путь за́поведей Госпо́дних/ си́лою ду́ха твоего́ наставля́л еси́ е́*./ Те́мже и ны́не осеня́емии цельбоно́сными чудотворе́нии твои́ми,/ в святу́ю па́мять твою́, зове́м тебе́:/ не преста́й, святи́телю, предста́тельствовати/ пред Пастыренача́льником о ста́де твое́м,/ я́ко па́ствы твоея́ утвержде́ние,/ и су́щим по тебе́ святи́телем удобре́ние.

Величание

Велича́ем тя,/ святи́телю о́тче Ге́рмане,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь благоверному князю Феодору Ярославичу Владимирскому, глас 8

В жи́зни сей утверди́ся ве́рою,/ в за́поведех Госпо́дних пребыва́ше непрекло́нен,/ благоугоди́х Тому́, я́ко благочести́в самоде́ржец/ Ему́же подо́бяся о вруче́нных ти христоимени́тых лю́дех,/ ду́шу свою́ положи́ти потща́вся,/ в зе́млю идя́ше всезлу́ю и безбо́жную/ и та́мо, пред нечести́вым мучи́телем Христа́ дерзнове́нно испове́дав,/ му́ченический вене́ц прия́т,/ те́мже, прему́дре Фео́доре Яросла́виче,/ Изба́вителя моли́ изба́вити от бед оте́чество твое́ и лю́ди,/ да тя вси непреста́нно почита́ем.

Кондак, глас 3

Ре́вностию Боже́ственною разже́гся,/ оплева́в ца́рство и сла́ву тле́ющую,/ изво́ли за Христа́ умре́ти,/ не́жели кро́ме Христа́ жи́ти,/ нечести́вых зако́ну не подчини́вся/ и сего́ ра́ди за Христо́ву ве́ру венча́вся,/ кро́вию прия́т вене́ц нетле́нный,/ Фео́доре Яросла́виче.

Величание

Велича́ем тя,/ святы́й благове́рный кня́же Фео́доре Яросла́виче,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Иосифу Заоникиевскому, Вологодскому чудотворцу, глас 4

Испе́рва житие́ твое́, преподо́бне,/ хи́тростию юро́дства от челове́ка утае́но на небесе́х пред а́нгелы явле́но,/ и а́ще на земли́ тмо́ю оче́с претыка́лся хожда́ше,/ но мы́сленными кри́лы на высоту́ возше́д,/ Присносу́щным Све́том облиста́ем,/ во оте́чествии насле́дова,/ и земны́х мня́щихся кра́сных хра́мов не тре́бовав,/ но в Небе́снех селе́х пресве́тлыя оби́тели стяжа́л еси́,/ ни ри́зами мя́гкими одея́ся,/ но па́че власяни́цу возлюби́л еси́,/ и сего́ ра́ди па́че всех име́ний земны́х Небе́сная сокро́вища приобре́л еси́/ и на земли́ плотя́н сый со безпло́тными совокупля́лся,/ Небе́сной Цари́це служа́ и Той приноси́мых а́нгельских пе́сней наслади́вся,/ и́хже мно́гие лю́дие жела́я наслади́тися не мо́гут./ Сего́ ра́ди Всевы́шний Творе́ц о́браз Свой/ и ро́ждшия Его́ Богома́тере/ с высоты́ возду́ха на ру́це твоя́,/ я́ко на Херуви́мская носи́ла дарова́ тебе́./ От Него́же Присносу́щным Све́том о́чи твои́ уясни́,/ и я́ко росоточа́щий о́блак моли́твами твои́ми весь мир ми́лованный напои́./ И ны́не в после́дняя времена́ святу́ю персть твою́, я́ко Еде́мский исто́чник, во исцеле́ние неду́гов устро́й,/ Его́же моли́, наста́вниче наш, чудоно́сче Ио́сифе,/ дарова́ти нам мир и ве́лию ми́лость.

Ин тропарь, глас 5

Смиренному́дрием наказа́ние благоду́шие прие́мля,/ и́же от Небе́с неизрече́нный дар прия́ти сподо́бися,/ и в пло́ти сый, преподо́бне,/ безпло́тен в служе́нии свое́м к Богома́тери трудолю́бие подвиза́ся,/ бде́нии, поще́нии, слеза́ми и моли́твами,/ и́миже и пусты́ню многожи́тельну устро́ил еси́,/ благоухищре́нным же юро́дством челове́ческия сла́вы избежа́./ Сего́ ра́ди Всевы́шний Мздовозда́тель/ в коне́ц ве́ка сего́ сугу́бо тя просла́ви,/ и гроб твой святы́й точе́нием чуде́с обогати́ся,/ Его́же моли́, преподо́бне о́тче наш Ио́сифе,/ дарова́ти нам отпуще́ние грехо́в и ве́лию ми́лость.

Кондак, глас 8

Вы́шних благ жела́яй,/ преоби́дел еси́ до́лу влеку́щая мудрова́ния,/ и́бо трудолюби́вое свое́ те́ло/ о́стрым власяны́м плете́нием стерл еси́,/ и бысть благоуго́ден служи́тель Богома́тере,/ стра́ждущим в неду́зех явля́лся, ско́ро помога́вши/ и с ве́рою притека́ющим к тебе́ неоску́дное здра́вие подае́ши./ Сего́ ра́ди зове́м ти:/ разреши́ на́ша боле́зни душе́вныя и теле́сныя,/ е́же к Бо́гу моли́твами твои́ми,/ началообра́зный смире́нию наста́вниче, о́тче наш Богому́дре Ио́сифе,/ мона́хом удобре́ние.

Ин кондак, глас тойже

От ю́ности Бо́га возлюби́в/ и просты́нею безгла́сие стяжа́л еси́, преподо́бне./ Сего́ ра́ди и с Небе́с сла́дкий Свет о́чию получи́л еси́/ и росоточа́щии ми́лости пресве́тлый о́браз Богома́тери/ с высоты́ возду́ха чрез святы́х безме́здников во объя́тие прия́л еси́,/ и Ей богоуго́дно послужи́л еси́./ И оби́тель соста́вил еси́,/ власяны́ми вери́гами те́ло свое́ удручи́л еси́,/ от него́же ка́плями кро́вными диа́вола потопи́л еси́./ Сего́ ра́ди и в после́дняя времена́/ гроб твой от Влады́ки на́шего Христа́ точе́нием чуде́с обогати́ся,/ тем и мы, ча́да твоя́, любо́вию притека́юще к тебе́,/ уми́льно глаго́лем:/ ра́дуйся, наста́вниче на́шего спасе́ния;/ ра́дуйся, исцеле́ний пода́телю;/ ра́дуйся, о́тче наш Ио́сифе, мона́хом удобре́ние.

Величание

Ублажа́ем тя,/ преподо́бне о́тче Ио́сифе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь блаженному Василию Кадомскому, глас 4

Моли́тва усе́рдная пи́ща и пити́е бысть, блаже́нне Васи́лие,/ в несе́нии креста́ жития́ стра́нническаго любо́вь Христо́ву позна́л еси́./ О́ком чи́стым бу́дущая я́ко настоя́щая прозрева́я,/ ра́дость и от бед избавле́ние тре́бующим твоея́ по́мощи дарова́л еси́./ Те́мже и нас, я́ко Бо́жий избра́нник,/ не забу́ди твои́ми ходата́йствы/ Христа́ Бо́га о нас умоля́ющи.

Кондак, глас 8

Вы́шния красоты́ жела́я,/ нижния сла́сти теле́сныя то́щно оста́вил еси́... (общий блаженным).

Величание

Ублажа́ем тя,/ святы́й пра́ведный Васи́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Божией Матери ради иконы Ее «Умиление» Псково-Печерской, глас 4

Днесь све́тло красу́ется оби́тель сия́,/ я́ко зарю́ со́лнечную восприи́мше, Влады́чице,/ чудотво́рную Твою́ ико́ну,/ к не́йже мы ны́не притека́юще и моля́щеся Тебе́, взыва́ем си́це: о Пречу́дная Влады́чице Богоро́дице!/ Моли́ся из Тебе́ воплоще́нному Христу́ Бо́гу на́шему,/ да изба́вит оби́тель сию́/ и вся гра́ды и страны́ христиа́нския невреди́мы от всех наве́т вра́жиих/ и спасе́т ду́ши на́ша, я́ко Милосе́рд.

Величание

Велича́ем Тя,/ Пресвята́я Де́во,/ Ма́ти Христа́ Бо́га на́шего,/ и чтим чудотво́рный о́браз Твой,/ и́мже спасла́ еси́/ нас от руки́ вра́жия.

Тропарь Предтече и Крестителю Господню Иоанну, глас 4

Проро́че и Предте́че прише́ствия Христо́ва,/ досто́йно восхвали́ти тя недоуме́ем мы, любо́вию чту́щия тя:/ непло́дство бо ро́ждшия и о́тчее безгла́сие разреши́ся/ сла́вным и честны́м твои́м рождество́м,/ и воплоще́ние Сы́на Бо́жия ми́рови пропове́дуется.

Кондак, глас 3

Пре́жде непло́ды днесь Христо́ва Предте́чу ражда́ет,/ и Той есть исполне́ние вся́каго проро́чества,/ Его́же бо проро́цы пропове́даша,/ на Сего́ во Иорда́не ру́ку положи́в,/ яви́ся Бо́жия Сло́ва проро́к, пропове́дник вку́пе и Предте́ча.

Величание

Велича́ем тя,/ Предте́че Спа́сов Иоа́нне,/ и чтим е́же от непло́дове пресла́вное рождество́ твое́.

Припев

Святы́й вели́кий Иоа́нне Предте́че Госпо́день,/ моли́ Бо́га о нас.

Тропарь преподобному Антонию Дымскому, Новгородскому, глас 4

Доброде́телей ревни́телю,/ пусты́нный жи́тель,/ подви́жник ве́ры Христа́ Бо́га на́шего,/ поще́нием и труды́ умертви́вый плотска́я вожделе́ния,/ тезоимени́те вели́кому Анто́нию,/ его́же житию́ поревнова́л еси́/ и во его́же и́мя Боже́ственный храм воздви́гл еси́,/ ку́пно с ним, преподо́бне Анто́ние, моли́ Спаси́теля всех,/ да и нас сотвори́т победи́тели плотски́х по́хотей/ и хра́мы Ду́ха Свята́го,/ по вели́цей Его́ ми́лости.

Кондак, глас 6

Све́рстник и подража́тель преподо́бному Варлаа́му,/ послуша́ние к нему́ и́стинное стяжа́в,/ досто́ин яви́лся ему́ прие́мник,/ упа́сши до вре́мене ста́до его́,/ доброде́телем же поревнова́в,/ в ту́южде ме́ру во́зраста дости́гл еси́,/ безмо́лвие пусты́нное возлюби́в,/ и уго́ден Го́сподеви показа́лся еси́,/ первонача́льник быв пусты́ни при е́зере Ды́мском;/ тем ти вопие́м:/ с преподо́бным Варлаа́мом, о́тче Анто́ние, моли́ о нас Бо́га,/ да даст нам та́кожде угоди́ти Ему́, я́коже и ты,/ о́бразе послуша́ния и безмо́лвия ти́хий рачи́телю.

Величание

Ублажа́ем тя,/ преподо́бне о́тче Анто́ние,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь праведным отрокам Иакову и Иоанну Менюжским, Новгородским, глас 1

Боле́зньми святы́х пра́ведных о́троков/ Иа́кова и Иоа́нна,/ и́миже о Тебе́ пострада́ша,/ умоле́н бу́ди, Го́споди,/ и вся́ на́ша боле́зни исцели́,/ Человеколю́бче, мо́лимся.

Тропарь преподобномученице Февронии деве, глас 4

Агница Твоя́, Иису́се... (общий мученице).

Кондак, глас 6

Женише́ мой сладча́йший Христе́, взыва́ше Февро́ния,/ не тру́дно ми тещи́ во след Тебе́,/ и́бо сла́дость любве́ Твоея́ ду́шу мою́ наде́ждею впери́,/ и красота́ ми́лости Твоея́ се́рдце мое́ услади́,/ испи́ти ча́шу страда́ний по Тебе́,/ да досто́йну мя в черто́зе с му́дрыми де́вами ликовствова́ти о Тебе́ сопричте́ши./ Те́мже, преподо́бная страстоте́рпице,/ почита́юще по́двиги трудо́в твои́х, мо́лим тя,/ моли́ не затвори́тися и нам черто́га две́рем.

Величание

Велича́ем тя,/ страстоте́рпице свята́я Февро́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь благоверным князю Петру, в иночестве Давиду, и княгине Февронии, в иночестве Евфросинии, Муромским, глас 8

Я́ко благочести́ваго ко́рене пречестна́я о́трасль был еси́,/ до́бре во благоче́стии пожи́в, блаже́нне Пе́тре,/ та́ко и с супру́жницею твое́ю прему́дрою Февро́ниею,/ в ми́ре Бо́гу угоди́вше, и преподо́бных житию́ сподо́бистеся./ С ни́миже моли́теся Го́сподеви,/ сохрани́ти без вреда́ оте́чество ва́ше,/ да вас непреста́нно почита́ем.

Кондак, глас тойже

Ми́ра сего́ княже́ние и сла́ву вре́менну помышля́я,/ сего́ ра́ди благоче́стно в ми́ре пожи́л еси́, Пе́тре,/ ку́пно и с супру́жницею твое́ю прему́дрою Февро́ниею,/ ми́лостынею и моли́твами Бо́гу угоди́вше./ Те́мже и по сме́рти неразлу́чно во гро́бе лежа́ще,/ исцеле́ние неви́димо подава́ете./ И ны́не Христу́ моли́теся/ сохрани́ти град же и лю́ди, и́же вас сла́вящих.

Величание

Ублажа́ем вас,/ святи́и чудотво́рцы Пе́тре и Февро́ние,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь Божией Матери ради иконы Ее Тихвинская, глас 4

Днесь, я́ко со́лнце пресве́тлое,/ возсия́ нам на возду́се всечестна́я ико́на Твоя́, Влады́чице,/ луча́ми ми́лости мир просвеща́ющи,/ ю́же вели́кая Росси́я,/ я́ко не́кий дар Боже́ственный, свы́ше благогове́йне восприе́мши,/ прославля́ет Тя, Богома́ти, всех Влады́чицу,/ и от Тебе́ ро́ждшагося Христа́ Бо́га на́шего велича́ет ра́достно./ Ему́же моли́ся, о Госпоже́ Цари́це Богоро́дице,/да сохрани́т вся гра́ды и страны́ христиа́нския/ невреди́мы от всех наве́т вра́жиих,/ и спасе́т ве́рою покланя́ющихся Его́ Боже́ственному/ и Твоему́ пречи́стому о́бразу,/ Де́во Неискусобра́чная.

Кондак, глас 8

Притеце́м, лю́дие, к Де́ве Богоро́дице Цари́це,/ благодаря́ще Христа́ Бо́га,/ и к Тоя́ чудотво́рней ико́не, уми́льно взира́юще, припаде́м, и возопие́м Ей:/ о Влады́чице Мари́е!/ Присети́вше страну́ сию́ Твоего́ честна́го о́браза явле́нием чуде́сно,/ спаса́й в ми́ре и благовре́менстве вся христиа́ны,/ насле́дники показу́ющи небе́сныя жи́зни./ Тебе́ бо ве́рно зове́м:/ ра́дуйся, Де́во, ми́ра спасе́ние.

Припев Богородице:

Досто́йно есть велича́ти Тя,/ Богоро́дице,/ честне́йшую Херуви́м/ и сла́внейшую без сравне́ния Серафи́м.

Или:

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь преподобному Давиду Солунскому, глас 8

В тебе́, о́тче, изве́стно спасе́ся е́же по о́бразу... (общий преподобному).

Кондак, глас 1

Сад присноцвету́щ доброде́телей плоды́ принося́й,/ яви́лся еси́ на садо́вне дре́ве, я́ко благопе́снивая пти́ца;/ рай же па́че, жи́зни дре́во Го́спода в се́рдцы твое́м прие́м,/ я́ко возде́лав, богому́дре,/ и́мже пита́еши нас благода́тию;/ при́сно моли́ о нас, Дави́де всеблаже́нне.

Величание

Ублажа́ем тя,/ преподо́бне о́тче Дави́де,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Дионисию, архиепископу Суздальскому, глас 8

Правосла́вия ревни́телю, благоче́стия наста́вниче,/ и́щущим спасе́ния до́брый ко́рмчий,/ мона́шествующих Богодухнове́нное украше́ние,/ Богоно́снаго Евфи́мия собесе́дниче, святи́телю Диони́сие,/ уче́ньми и доброде́тельми оте́чество твое́ просвети́л еси́,/ не забу́ди нас, чту́щих тя, но в ми́ре упра́ви живо́т наш.

Кондак, глас тойже

Звезду́ Росси́йскую от Ки́ева возсия́вшую/ чрез Ни́жний Новгра́д в Су́ждаль дости́гшую,/ и всю страну́ сию́ уче́нием озари́вшую,/ ублажи́м Богому́драго Диони́сия,/ той бо мо́лится Го́споду спасти́ся душа́м на́шим.

Величание

Велича́ем тя,/ святи́телю о́тче Диони́сие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Тихону Луховскому, Костромскому чудотворцу, глас 4

Жела́нием духо́вным в пусты́ню всели́лся еси́/ и, та́мо невозвра́тно ше́ствовав Боже́ственными стезя́ми,/ дости́гл еси́ в Небе́сныя оби́тели,/ и ны́не со а́нгелы предстои́ши/ у Престо́ла всех Царя́ Христа́ Бо́га,/ Ему́же приле́жно моли́ся/ поми́ловати град сей и лю́ди,/ ве́рою пра́зднующия пречестну́ю па́мять твою́,/ Ти́хоне преподо́бне, о́тче наш.

Кондак, глас 8

Христо́вою любо́вию уязви́вся, преподо́бне,/ во след Его́ невозвра́тно ше́ствовал еси́,/ посто́м и воздержа́нием плотски́я стра́сти умертви́л еси́,/ бде́нием же и моли́твами вселука́ваго врага́ до конца́ низложи́л еси́,/ и слеза́ми, яко еле́ем, свещу́ све́тлу себе́ угото́вал еси́;/ те́мже в Небе́сныя оби́тели невозбра́нно вшел еси́,/ иде́же, ра́дуяся, Го́сподеви предстои́ши,/ Ему́же приле́жно моли́ся, мо́лим тя,/ я́ко да ми́лостив нам бу́дет в день стра́шнаго Его́ прише́ствия,/ и да не пребу́дем и мы вне черто́га Христо́ва,/ но да сподо́бит ны одесну́ю Себе́ ста́ти/ моли́твами твои́ми, преподо́бне, да зове́м ти:/ ра́дуйся, Богому́дре о́тче наш Ти́хоне.

Величание

Ублажа́ем тя,/ преподо́бне о́тче Ти́хоне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Сампсону Странноприимцу, глас 8

В терпе́нии твое́м стяжа́л еси́ мзду твою́, о́тче преподо́бне,/ в моли́твах непреста́нно терпе́вый,/ ни́щия возлюби́вый, и сия́ удовли́вый,/ но моли́ся Христу́ Бо́гу, Сампсо́не ми́лостиве блаже́нне,/ спасти́ся душа́м на́шим.

Кондак, глас тойже

Я́ко врача́ всеизря́дна и моли́твенника благоприя́тна,/ к ра́це твое́й Боже́ственней притека́юще, Сампсо́не Богому́дре преподо́бне,/ соше́дшеся любо́вию, псалмы́ и пе́сньми ра́дующеся, Христа́ прославля́ем,/ такову́ю тебе́ благода́ть подава́юща исцеле́ний.

Величание

Ублажа́ем тя,/ преподо́бне о́тче Сампсо́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Господу Богу ради праздника победы, дарованной русским войскам над шведами, под Полтавою, глас 8

Препросла́влен еси́, Го́споди Бо́же наш,/ дарова́вый кре́пость на враги́ оте́честву на́шему,/ я́коже Дави́ду на прего́рдаго Голиа́фа,/ осени́л еси́ над главо́ю его́ в день бра́ни,/ препоя́сал еси́ немощны́я си́лою свы́ше,/ и теми́ всю де́рзость вра́жию низложи́л еси́,/ Многоми́лостиве, сла́ва Тебе́.

Кондак, глас 2

В Вы́шних живы́й и на смире́нныя призира́яй,/ И́же не дал еси́ ве́прю*, от дубра́вы озоба́ти*,/ и уедине́нному ди́вому поя́сти виногра́да Твоего́,/ утверди́, Бо́же, е́же соде́лал еси́ в нас,/ при́зри с Небесе́ и ви́ждь, и посети́ виногра́д сей, и соверши́ его́,/ его́же насади́ десни́ца Твоя́.

Величание

Велича́ем Тя,/ Триипоста́сный Бо́же,/ вознесе́нную го́рдость смири́вшаго/ и на Тя упова́ющим/ побе́ду дарова́вшаго.

Тропарь преподобному Амвросию Оптинскому, глас 5

Я́ко к целе́бному исто́чнику/ притека́ем к тебе́, Амвро́сие, о́тче наш,/ ты бо на путь спасе́ния нас ве́рно наставля́еши,/ моли́твами от бед и напа́стей охраня́еши,/ в теле́сных и душе́вных ско́рбех утеша́еши,/ па́че же смире́нию, терпе́нию и любо́ви науча́вши,/ моли́ Человеколю́бца Христа́/ и Засту́пницу усе́рдную/ спасти́ся душа́м на́шим.

Кондак, глас 2

Заве́т Пастыренача́льника испо́лнив,/ ста́рчества благода́ть насле́довал еси́,/ боле́знуя се́рдцем о всех с ве́рою притека́ющих к тебе́,/ те́мже и мы, ча́да твоя́, с любо́вию вопие́м ти:/ о́тче святы́й Амвро́сие,/ моли́ Христа́ Бо́га спасти́ся душа́м на́шим.

Величание

Ублажа́ем тя,/ преподо́бне о́тче Амвро́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Мартину Туровскому, глас 6

Тя́жким неду́гом стра́ждущий и людьми́ забы́тый,/ моли́л еси́ жа́жду утоли́ти, преподо́бне Марти́не,/ те́мже Христо́с посла́ с Небесе́ благове́рных Бори́са и Гле́ба/ тебе́ послужи́ти и неду́г исцели́ти,/ моли́ся ны́не ко Го́споду/ спасти́ся душа́м на́шим.

Кондак, глас 2

Чистото́ю душе́вною боже́ственно вооружи́вся... (общий преподобному).

Величание

Ублажа́ем тя,/ преподо́бне о́тче Марти́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь мученикам бессребреникам и чудотворцам Киру и Иоанну, глас 5

Чудеса́ святы́х Твои́х му́ченик,/ сте́ну необори́му нам дарова́вый, Христе́ Бо́же,/ тех моли́твами сове́ты язы́ков разори́,/ я́ко еди́н Благ и Человеколю́бец.

Ин тропарь, глас тойже

Святи́и сла́внии Ки́ре и Иоа́нне,/ безсре́бреницы, му́ченицы и чудотво́рцы,/ милосе́рдием свои́м, я́ко стено́ю необори́мою,/ нас огради́те от всех бед/ и от враго́в ви́димых и неви́димых сохрани́те/ непреста́нною ва́шею моли́твою ко Го́споду.

Ин тропарь, глас тойже

Прему́дрии вселе́нней вра́чеве,/ Ки́ре и Иоа́нне,/ от Бо́га прия́сте вла́сть цели́те неду́ги душе́вныя,/ вку́пе же и теле́сныя,/ и ны́не моли́теся/ сохрани́ти град и лю́ди от одержа́щих зол/ и спасти́ моли́твами ва́шими ду́ши на́ша.

Ин тропарь, глас тойже

Тро́ичная благода́ть все́льшися в честна́я сердца́ ва́ша,/ преблаже́ннии Ки́ре и Иоа́нне,/ на ду́хи нечи́стыя стра́шни прогони́телие яви́стеся./ И не то́чию явле́нным, но и та́йным/ неду́гом вра́чеве бысте,/ те́мже, дерзнове́ние иму́ще к Человеколю́бцу Бо́гу,/ непреста́нною моли́твою душе́вныя на́ша стра́сти исцели́те.

Кондак, глас 3

От Боже́ственныя благода́ти дар чуде́с прие́мше,/ святи́и, чудоде́йствуете непреста́нно,/ вся на́ша стра́сти рукоде́йством секу́ще неви́димо,/ Ки́ре Богому́дре со Иоа́нном сла́вным:/ вы бо Боже́ственнии вра́чеве есте́.

Ин кондак, глас 6

Вели́кое врачевство́ вселе́нней,/ супряже́ние Христо́во возлю́бленное,/ свети́льники сия́ющия, зарю́ исцеле́ний,/ воспое́м, ве́рнии, велегла́сно,/ внутрь це́ркве им вопию́ще:/ Ки́ре и Иоа́нне,/ пода́тели чудесе́м, вра́чеве неду́жным,/ освяща́ете вся стра́ны.

Величание

Велича́ем вас,/ чудотво́рцы сла́внии Ки́ре и Иоа́нне,/ и чтим честна́я страда́ния ва́ша,/ я́же за Христа́/ претерпе́ли есте́.

Ино величание

Велича́ем вас,/ чудотво́рцы сла́внии, Ки́ре и Иоа́нне,/ и чтим святу́ю па́мять ва́шу,/ наста́вницы заблу́ждшим, исцели́тели боля́щим/ и собесе́дницы а́нгелом.

Тропарь преподобным Сергию и Герману, Валаамским чудотворцам, глас 4

Ева́нгелия Христо́ва и́стиннии послу́шницы/ яви́стеся, преподо́бнии,/ мир и вся я́же в нем, я́ко не су́щая,/ преоби́девше любве́ ра́ди Христо́вы,/ и в морски́й о́стров всели́стеся/ и трудолю́бно в нем проти́ву ко́зней неви́димых враго́в подвиза́стеся,/ посто́м, бде́нием же и всено́щным стоя́нием/ пло́ти своя́ ду́ху му́дре повину́ли есте́:/ сего́ ра́ди от Вседержи́тельныя десни́цы досто́йныя венцы́ прия́ли есте́./ И ны́не Пресвя́тей Тро́ице предстоя́ще, моли́теся,/ всеблаже́ннии отцы́ Се́ргие и Ге́рмане,/ сохранится в ми́ре оте́честву на́шему/ и спасти́ся душа́м на́шим.

Ин тропарь, глас 1

От мирски́я мо́лвы бе́гающе,/ безмо́лвия и благоче́стия рачи́тели,/ в ти́хое приста́нище Валаа́ма от восто́ка приидо́сте/ и в нем ева́нгельски Христу́ доброде́тельми после́довавше,/ на верх соверше́нства востекли́ есте́:/ и ны́не в торжестве́ преми́рном богозре́нием наслажда́ющеся,/ всеблаже́ннии о́тцы Се́ргие и Ге́рмане,/ Человеколю́бца Бо́га моли́те,/ е́же спасти́ всех нас,/ благоче́стно вас почита́ющих.

Кондак, глас 4

От мирска́го жития́ изше́дше,/ отверже́нием ми́ра Христу́ после́довасте,/ и достиго́сте вели́каго Нева́ е́зера,/ и в нем на о́строве Валаа́ме все́льшеся,/ равноа́нгельное житие́ пожи́ли есте́:/ отону́дуже, веселя́щеся, прешли́ есте́ к Небе́сным черто́гом./ И ны́не со а́нгелы Влады́чню престо́лу предстоя́ще,/ помина́йте нас, чад свои́х,/ я́же собра́ли есте́, богому́дрии,/ да ра́достно от души́ вопие́м:/ ра́дуйтеся, Се́ргие и Ге́рмане, отцы́ преблаже́ннии.

Величание

Ублажа́ем вас,/ преподо́бнии отцы́ Се́ргие и Ге́рмане,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь преподобному Ксенофонту Робейскому, глас 4

Пусты́ни яви́лся еси́ до́брое прозябе́ние,/ о́тче преподо́бне,/ от ю́ности бо чи́стое житие́ изво́лил еси́,/ духо́вному учи́телю после́дуя,/ и того́ уче́нием ум твой к Небе́сным впери́в,/ в пусты́ню всели́лся еси́,/ и в ней оби́тель созда́л еси́,/ и ста́ду твоему́ прему́др наста́вник показа́лся еси́,/ Вели́кому же Нову́граду похвала́ и утвержде́ние./ Те́мже и Христо́с, я́ко пресве́тла свети́льника,/ чудесы́ обогати́ и просла́ви тя./ Ксенофо́нте о́тче наш,/ моли́ Христа́ Бо́га спасти́ся душа́м на́шим.

Кондак, глас 2

Чистото́ю душе́вною боже́ственно вооружи́вся... (общий преподобному).

Величание

Ублажа́ем тя,/ преподо́бне о́тче Ксенофо́нте,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее «Троеручица», глас 4

Днесь всеми́рная ра́дость возсия́ нам ве́лия,/ дарова́ся святе́й горе́ Афо́нстей/ цельбоно́сная Твоя́, Влады́чице Богоро́дице, ико́на,/ со изображе́нием тричи́сленно и неразде́льно Пречи́стых рук Твои́х,/ в прославле́ние Святы́я Тро́ицы:/ созыва́еши бо ве́рных и моля́щихся Тебе́ о сем позна́ти,/ я́ко двема́ Сы́на и Го́спода де́ржиши,/ тре́тию же яви́ на прибе́жище и покро́в чту́щих Тя/ от вся́ких напа́стей и бед избавля́ти,/ да вси, притека́ющий к Тебе́ ве́рою, прие́млют от всех зол свобожде́ние,/ от враго́в защище́ние./ Сего́ ра́ди и мы вку́пе со Афо́ном вопие́м:/ ра́дуйся, Благода́тная, Го́сподь с Тобо́ю.

Ин тропарь, глас тойже

Я́ко звезда́ светозаря́ющая,/ из Се́рбии на Афо́н чуде́сно прии́де/ всечестна́я ико́на Твоя́ Троеру́чица,/ ю́же оби́тель Хиланда́рская благогове́йно восприе́мши,/ я́ко Боже́ственный дар свы́ше,/ прославля́ет Тя, Влады́чицу,/ и уми́льно вопие́т:/ не оста́ви ми́лость Твою́ от нас,/ но пребу́ди с на́ми во ве́ки.

Тропарь на молебне, глас 4

Днесь све́тло красу́ется славне́йший град Москва́,/ име́ющи в себе́, о Всеми́лостивейшая, всея́ тва́ри Честне́йшая,/ Засту́пнице на́ша Де́во Богоро́дице,/ честны́й о́браз Твой,/ и́мже подсо́лнечныя концы́ земли́ удивля́еши/ и мир ми́рови да́руеши;/ во о́браз бо Святы́я Тро́ицы явля́еши трие́ ру́це:/ двема́ у́бо Сы́на Своего́, Христа́ Бо́га на́шего, но́сиши,/ тре́тиею же от напа́стей и бед/ ве́рно к Тебе́ прибега́ющих избавля́еши,/ и от потопле́ния изыма́еши,/ и всем поле́зная да́руеши,/ и преподо́бному Михаи́лу Малео́нскую го́ру показа́,/ и всех всегда́ ми́луеши;/ честно́ю ри́зою Свое́ю покрыва́еши жи́тельство сие́/ и вся гра́ды и стра́ны на́ша, да зове́м Ти:/ ра́дуйся, Обра́дованная.

Кондак, глас 8

Днесь весе́лое наста́ ны́не Твое́ торжество́,/ Богома́ти Пречи́стая,/ вси ве́рнии испо́лнишася ра́дости и весе́лия,/ я́ко сподо́бльшеся изря́дно воспе́та/ преди́вное явле́ние честна́го о́браза Твоего́/ и Рождша́гося из Тебе́ Младе́нца, и́стинна же Бо́га,/ Его́же двема́ рука́ма объе́млеши,/ и тре́тиею от на́пастей и бед нас изыма́еши/ и избавля́еши от всех зол и обстоя́ний.

Ин кондак, глас 3

Де́ва днесь благоволе́ние к нам явля́ет,/ гора́ же Афо́н благодаре́ние Ей прино́сит,/ а́нгел и и и́ноцы славосло́вят,/ Троеру́чица из Се́рбии чуде́сно путеше́ствует:/ нас бо ра́ди прии́де/ и всели́ся во святу́ю оби́тель Хиланда́рскую.

Кондак на молебне, глас 8

Взбра́нной Воево́де победи́тельная,/ я́ко изба́вльшеся от злых,/ благода́рственная воспису́ем Ти, раби́ Твои́, Богоро́дице,/ но, я́ко иму́щая держа́ву непобеди́мую,/ от вся́ких нас бед свободи́, да зове́м Ти:/ ра́дуйся, Неве́сто Неневе́стная.

Величание

Велича́ем Тя,/ Пренепоро́чная Де́во,/ и чтим чудеса́ о́браза свята́го Твоего́,/ трех пречи́стых рук Твои́х явле́ние/ в сла́ву Божества́, в Тро́ице Бо́га на́шего.

Ино величание

Велича́ем Тя,/ Пресвята́я Де́во,/ и чтим тричи́сленное изображе́ние пречи́стых рук Твои́х,/ Ты бо двема́ Сы́на и Го́спода де́ржиши,/ тре́тиею от напа́стей и бед нас избавля́еши.

Тропарь первоверховным апостолам Петру и Павлу, глас 4

Апо́столов первопресто́льницы,/ и вселе́нныя учи́телие,/ Влады́ку всех моли́те,/ мир вселе́нней дарова́ти/ и душа́м на́шим ве́лию ми́лость.

Тве́рдыя и боговеща́нныя пропове́датели,/ верх апо́столов Твои́х, Го́споди,/ прия́л еси́ в наслажде́ние благи́х Твои́х и поко́й:/ боле́зни бо о́нех и смерть прия́л еси́ па́че вся́каго всепло́дия,/ Еди́не све́дый серде́чная.

Величание

Велича́ем вас,/ апо́столи Христо́вы Пе́тре и Па́вле,/ весь мир уче́ньми свои́ми просвети́вшия/ и вся концы́/ ко Христу́ приве́дшия.

Тропарь Собору 12-ти апостолов, глас 4

Апо́столов первопресто́льницы,/ и вселе́нныя учи́телие,/ Влады́ку всех моли́те,/ мир вселе́нней дарова́ти/ и душа́м на́шим ве́лию ми́лость.

Кондак, глас 2

Ка́мень Христо́с ка́меня ве́ры прославля́ет све́тло,/ ученико́в преизря́дна,/ и с Па́влом весь дванадесяточи́сленный собо́р днесь:/ и́хже па́мять соверша́юще ве́рно,/ сих Просла́вльшаго прославля́ем.

Ин кондак, глас тойже

Петра́, ве́рнии, ка́меня ве́ры, похва́лим/ и Па́вла Богому́драго,/ созыва́ют бо всех пра́здновати ве́рою,/ собо́рне вку́пе вся двана́десяте, яко пропове́дники ве́ре,/ прося́ща грехо́в оста́вления.

Величание

Велича́ем вас,/ святи́и дванадесяточи́сленнии апо́столи,/ весь мир уче́ньми свои́ми просвети́вшия/ и вся концы́/ ко Христу́ приве́дшия.

Тропарь преподобному Петру, царевичу Ордынскому (Ростовскому), глас 8

Оте́чества своего́, блаже́нне Пе́тре, удали́вся,/ и богоме́рзкую ве́ру отню́д возненави́дев,/ и от мглы грехо́вныя изше́д,/ и от тьмы во свет прии́де,/ и всели́ся еси́ во сла́вный и многонаро́дный град Росто́в,/ в не́мже житие́ че́стно пожи́в,/ це́рковь во и́мя святы́х апо́стол Пе́тра и Па́вла воздви́г Христо́вою благода́тию,/ и сию́ чу́дными ико́нами, я́ко неве́сту, украси́в,/ святи́теля же и кня́зя и вся лю́ди житие́м свои́м удиви́в./ Те́мже и по сме́рти твое́й Христо́с да́ром чу́дес обогати́ тя./ Помина́й нас, чту́щих пресве́тлую па́мять твою́, преподо́бне о́тче Пе́тре,/ и моли́ Христа́ Бо́га спасти́ся душа́м на́шим.

Кондак, глас 4

Яви́ся ве́лие со́лнце Христо́вой Це́ркви,/ просвеща́я уче́ния светлостьми́, всече́стне,/ я́ко черпа́лом златы́м,/ от кла́дезя неиско́паннаго чуде́с поче́рпл еси́,/ от исто́чника неистощи́маго,/ на па́мять успе́ния твоего́ прише́дшим, всеблаже́нне Пе́тре,/ ны́не всем подава́еши грехо́в проще́ние, сла́во преподо́бным.

Величание

Ублажа́ем тя,/ преподо́бне о́тче Пе́тре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Софронию, епископу Иркутскому, глас 4

От ю́ности Христа́ возлюби́л еси́, блаже́нне Софро́ние,/ до́бре упра́вил еси́ и́ноческия оби́тели,/ и архиере́йства са́ном почте́н быв,/ упа́сл еси Ирку́тскую па́ству./ Те́мже и по преставле́нии дарова́ния чуде́с от Бо́га прия́л еси,/ и мо́лиши Христа́ Бо́га/ изба́вити нас от бед и спасти́ ду́ши на́ша.

Ин тропарь, глас 1

Ско́рый в беда́х и ско́рбех засту́пниче,/ о́тче иера́рше страны́ Сиби́рския,/ святи́телю Софро́ние,/ на Небеси́ предстоя́й с первоиера́рхом Ирку́тския Це́ркве и все́ми святы́ми,/ вы́ну и́маши благоволе́ние Го́спода сла́вы,/ при́зри на лю́ди, притека́ющия к честны́м оста́нкам святы́х моще́й твои́х,/ ве́рою и любо́вию сле́зно прося́щия твоея́ по́мощи и заступле́ния,/ моли́, Его́же пропове́дал еси́ лю́дем Сиби́ри,/ изба́вити я от находя́щих зол и наве́тов вра́жиих,/ просвети́ти люде́й олядене́вшая* дре́вле неве́рием сердца́,/ дарова́ти утвержде́ние ве́ры Христо́вы/ и спасти́ ду́ши на́ша.

Кондак, глас тойже

Соиме́ннаго му́дрости иера́рха,/ изря́дное Це́ркве Ирку́тския украше́ние,/ отца́ на́шего святи́теля Софро́ния любо́вию восхва́лим вси ве́рнии,/ той бо есть храни́тель гра́да и страны́ сея́/ и моли́твенник о душа́х на́ших.

Ин кондак, глас 3

Па́стырей Нача́льнику, Христу́,/ труди́лся еси́, святи́телю Софро́ние,/ на па́жити духо́вней се́верныя страны́ на́шея,/ язы́цы монго́льстии от пре́лести и скве́рны* и́дольския избавля́я,/ приве́л еси́ я к све́ту ве́ры Христо́вы,/ и ны́не, со а́нгелы Влады́чню Престо́лу предстоя́,/ моли́ непреста́нно о всех нас,/ изба́вити ны от бед и спасти́ ду́ши на́ша.

Величание

Велича́ем тя,/ святи́телю о́тче Софро́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь благоверному царю великомученику Стефану Урошу III, Сербскому, глас 8

Ца́рскую диади́му обагри́л еси́ кро́вию твое́ю, Богому́дре великому́чениче,/ за скиптр крест в ру́ку прии́м,/ яви́лся еси́ победоно́сец/ и я́ко же́ртву непоро́чну прине́ся еси́ себе́ Бо́гу./ От роди́телей твои́х о́чию зе́ницы лише́н был еси́,/ и в заточе́нии пребы́л еси́,/ и от свои́х уда́влен еси́./ И ны́не, ра́дуяся, предстои́ши Святе́й Тро́ице./ Тем пра́зднуем здесь пренесе́ние честны́х моще́й твои́х/ и обновле́ние честна́го киво́та,/ блаже́нне Стефа́не, моли́ся о держа́ве сро́дник твои́х,/ благоуго́дней бы́ти ей/ и сыново́м се́рбским спасти́ся.

Кондак, глас тойже

Я́ко звезду́ тя пресве́тлу, Це́рковь похваля́ет и почита́ет,/ от восто́ка возсия́вшую/ и на за́пад прише́дшую,/ всю бо страну́ Се́рбскую чудесы́ и добро́тою обогаща́еши и просвеща́еши,/ и ве́рою чту́щия пренесе́ние моще́й и обновле́ние честна́го киво́та,/ великому́чениче, царю́ Се́рбский Стефа́не,/ моли́ спасти́ оте́чество твое́ и вся правосла́вныя христиа́ны,/ притека́ющия к ра́це моще́й твои́х и ве́рою вопию́щия ти:/ ра́дуйся, Стефа́не, му́чеников украше́ние.

Величание

Велича́ем тя,/ великому́чениче святы́й царю́ Се́рбский Стефа́не,/ и чтим честна́я страда́ния твоя́,/ я́же за Христа́/ претерпе́л еси́.

Тропарь благоверному князю Олегу, в иночестве Ионе, в схиме Иоакиму, Рязанскому, глас 5

Весели́ся и ра́дуйся, земле́ Ряза́нская/ соверша́ется па́мять благове́рнаго кня́зя Оле́га,/ во свято́й схи́ме Иоаки́мом нарече́ннаго,/ возлюби́вшаго тебя́ па́че души́ своея́,/ о могу́ществе и сла́ве твоея́ тща́вшагося,/ и ны́не, предстоя́ престо́лу Вседержи́теля,/ с супру́жницею свое́ю му́дрою монахи́нею Евпракси́ею,/ умоля́ют беспреста́нно Влады́ку Христа́/ сохрани́ти оте́чество на́ше в ми́ре и благоде́нствии/ и спасти́ ду́ши на́ша.

Кондак, глас тойже

Любо́вь ко оте́честву в се́рдце свое́м всегда́ име́я,/ благове́рный кня́же Оле́же,/ попече́ние о Ряза́нстей земли́ наипа́че прилага́л еси́,/ с преподо́бным Се́ргием сла́дце бесе́довав,/ ве́чный мир с моско́вским кня́зем святы́м Дими́трием заключи́л еси́/ и бра́ком сы́на своего́ Фео́дора с дще́рию его́ Софи́ею сою́з скрепи́л еси́./ Ты бо Ряза́нския земли́ похвала́ и утвержде́ние.

Величание

Ублажа́ем тя́,/ святы́й благове́рный кня́же Оле́же,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Божией Матери ради иконы Ее Волынская, глас 4

Засту́пнице земли́ Росси́йския/ от наше́ствия све́йскаго и непреста́нная за нас Моли́твеннице,/ мир земли́ и душа́м на́шим у Го́спода испроси́,/ да святи́тся в нас и́мя Бо́жие во ве́ки.

Кондак, глас 8

Взбра́нной Воево́де победи́тельная... (общий Божией Матери).

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь бессребреникам Косме и Дамиану, в Риме пострадавшим, глас 8

Святи́и безсре́бреницы и чудотво́рцы Космо́ и Дамиа́не,/ посети́те не́мощи на́ша:/ ту́не* прия́сте*, ту́не дади́те нам.

Кондак, глас 2

Благода́ть прии́мше исцеле́ний,/ простира́ете здра́вие су́щим в ну́ждах, вра́чеве,/ чудотво́рцы пресла́внии,/ но ва́шим посеще́нием ра́тников дерзо́сти низложи́те,/ мир исцеля́ющи чудесы́.

Величание

Велича́ем вас,/ чудотво́рцы сла́внии Космо́ и Дамиа́не,/ и чтим честна́я страда́ния ва́ша,/ я́же за Христа́/ претерпе́ли есте́.

Ино величание

Велича́ем вас,/ чудотво́рцы сла́внии, Космо́ и Дамиа́не,/ и чтим святу́ю па́мять ва́шу,/ наста́вницы заблу́ждшим,/ исцели́тели боля́щим/ и собесе́дницы а́нгелом.

Тропарь преподобному Никодиму Святогорцу, глас 3

Му́дрости благода́тию, о́тче, укра́шенный,/ труба́ богогла́сная показа́лся еси́ Ду́ха/ и доброде́телей наста́вник, Никоди́ме Богоглаго́ливый,/ всем бо подае́ши спаси́тельная уче́ния,/ жития́ чи́стаго показу́я сия́ние/ бога́тством Боже́ственных твои́х слове́с,/ и́миже, я́ко свет, ми́рови возсия́л еси́.

Ин тропарь, глас 1

Свети́ло Афо́нское, и На́ксии о́трасль,/ и Це́ркве всея́ богодухнове́ннаго учи́теля,/ Никоди́ма, ве́рнии, да почти́м,/ и́же, исполня́яся му́дрости Боже́ственныя,/уче́ния бо небе́сная и оби́льная излива́ет вопию́щим:/ сла́ва просла́вльшему тя Христу́/ сла́ва Венча́вшему тя,/ сла́ва Подаю́щему тобо́ю нам по́мощь.

Кондак, глас 8

Я́ко таи́нника изря́днейшаго доброде́тельнаго жития́ и благоче́стия,/ богоно́снаго учи́теля Правосла́вия, пра́зднует тя Це́рковь,/ с Небе́с бо дарова́ния прие́мый,/ озаря́еши Боже́ственными твои́ми писа́нии вопию́щих ти:/ ра́дуйся, о́тче Никоди́ме.

Величание

Ублажа́ем тя,/ преподо́бне о́тче Никоди́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Иоанну Рыльскому, глас 4

Твои́х моще́й возвраще́нием/ оби́тель твоя́ обогати́ся,/ це́рковь же твоя́, прие́мши я, просвети́ся/ и, крася́щися, ве́рных созыва́ет с весе́лием/ светоно́сный твой све́тло пра́здновати день,/ гряди́те, глаго́лющи,/ и приими́те благода́тей дарова́ния.

Ин тропарь, глас тойже

Те́ло смири́в поще́нием,/ ду́шу же возвы́сив пе́нием, сосу́д яви́ся избра́н Свято́му Ду́ху,/ Иоа́нне, о́тче наш,/ в чистоте́ се́рдца твоего́, преподо́бне, пожи́в./ Тем, дерзнове́ние име́я ко Го́споду,/ моли́ спасти́ся душа́м на́шим.

Кондак, глас 2

Тве́рдым умо́м и непреста́нными моли́твами/ бори́теля врага́ си́лу всегуби́тельную до конца́ побори́в,/ досто́йно от Христа́ просла́вился еси́,/ Иоа́нне всеблаже́нне./ Тем твои́х днесь моще́й возвраще́ния/ све́тлый соверша́юще пра́здник в весе́лии,/ согла́сно вопие́м ти:/ ста́ду и лю́дем твои́м ты еси́ с Бо́гом, о́тче преподо́бне,/ похвала́ и утвержде́ние.

Ин кондак, глас 6

Благода́тию Бо́жиею нас обогати́л еси́/ и де́лы благи́ми извести́л еси́,/ зва́нием яви́ся, Иоа́нне, уго́дник Христа́ Бо́га./ В моли́твах и посте́х дарова́ний Бо́жия Ду́ха испо́лнися/ бысть неду́гом прогони́тель/ и засту́пник душа́м на́шим.

Величание

Ублажа́ем тя,/ преподо́бне о́тче Иоа́нне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь положению ризы Пресвятой Богородицы, глас 8

Богоро́дице Присноде́во, челове́ков Покро́ве,/ ри́зу и по́яс пречи́стаго Твоего́ телесе́,/ держа́вное гра́ду Твоему́ обложе́ние дарова́ла еси́,/ безсе́менным рождество́м Твои́м нетле́нна пребыва́ющи,/ о Тебе́ бо и естество́ обновля́ется и вре́мя./ Те́мже мо́лим Тя, мир гра́ду Твоему́ дарова́ти/ и душа́м на́шим ве́лию ми́лость.

Кондак, глас 4

Одея́ние всем ве́рным нетле́ния,/ Богоблагода́тная Чи́стая,/ дарова́ла еси́ свяще́нную ри́зу Твою́,/ е́юже свяще́нное те́ло Твое́ покрыва́ла еси́,/ Покро́ве всех челове́ков,/ е́яже положе́ние пра́зднуем любо́вию/ и вопие́м со стра́хом Ти, Чи́стая:/ ра́дуйся, Де́во, христиа́н Похвало́.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим святы́я ри́зы Твоея́ честно́е положе́ние.

Тропарь святителю Фотию, митрополиту Киевскому и всея Руси, глас 4

Слове́с Ева́нгельских послу́шателю/ и Боже́ственных уче́ний рачи́телю,/ прему́дрый наказа́телю*,/ всегда́ стра́ху Госпо́дню поуча́яйся,/ в моли́твах к Богу простира́яйся,/ загради́телю у́стен кривоглаго́лющим сло́во Пра́выя ве́ры,/ я́ко апо́столом соприча́стниче,/ ве́ре Христо́вой утверди́телю,/ проро́чески веща́телю, святи́телю Фо́тие,/ моли́ Христа́ Бо́га/ умири́ти мир и спасти́ ду́ши на́ша.

Кондак, глас 8

Тро́ице сосу́д яви́лся честны́й твои́м житие́м, святи́телю Фо́тие,/ всегда́ зря́й Святу́ю Тро́ицу,/ Е́йже предстои́ши, моли́ся непреста́нно о всех нас.

Величание

Велича́ем тя,/ святи́телю о́тче Фо́тие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Арсению, епископу Тверскому, глас 1

Боже́ственною свы́ше просвети́вся благода́тию, святи́телю,/ и мно́гим терпе́нием во вре́менней жи́зни по́двиг соверши́л еси́./ Те́мже источа́еши чуде́с благода́ть/ и́же с ве́рою приходя́щим к честне́й ра́це моще́й твои́х, Арсе́ние преблаже́нне./ Мы же вопие́м ти:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак, глас 8

Я́ко богоявле́нная, росси́йская звезда́,/ днесь сия́я чудесы́,/ яви́лся еси́, святи́телю Арсе́ние./ Тем непреста́нно моли́ся Христу́ Бо́гу о ста́де твое́м/ и сохраня́й оте́чество твое́, град же и лю́ди,/ и́же ве́рою почита́ющих честно́е пренесе́ние твое́/ и к честны́м моще́м твои́м припа́дающих со стра́хом и любо́вию целу́ющих я./ Да вси велегла́сно зове́м ти:/ ра́дуйся, Богому́дре святи́телю Арсе́ние, о́тче наш.

Величание

Велича́ем тя,/ святи́телю о́тче Арсе́ние,/ и чтим святу́ю па́мять твою́;/ ты бо мо́лиши за нас/ Христа́ Бо́га на́шего.

Тропарь святителю Иувеналию, патриарху Иерусалимскому, глас 4

Бра́та Бо́жия на престо́ле архиере́йства прее́мниче,/ свята́го гра́да Иерусали́ма иера́рше достохва́льне,/ с богому́дрыми отцы́ в Халкидо́не изъясни́л еси́ воплоще́ние Сы́на Бо́жия,/ прише́дшаго мир обнови́ти и обожи́ти вся челове́ки,/ в Це́ркви Его́ с Ним сочета́вшияся,/ святи́телю о́тче Ювена́лие,/ предстоя́ ны́не во Ца́рствии Отца́ све́тов,/ о почита́ющих тя любо́вию моли́ся,/ да мир и ми́лость Спа́сова бу́дет с на́ми.

Кондак, глас 2

Боже́ственный гром, труба́ духо́вная... (общий святителю).

Величание

Велича́ем тя,/ святи́телю о́тче Ювена́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь священномученику Иувеналию, архиепископу Рязанскому и Шацкому, глас 5

Люби́миче па́ствы ряза́нския,/ ю́же от нече́стия и безве́рия огражда́я,/ пострада́л еси́ да́же до кро́ве,/ священному́чениче Иувена́лие,/ моли́ся о нас Влады́це Христу́,/ да сохрани́т держа́ву Росси́йскую в ми́ре и благоде́нствии/ и спасе́т души́ на́ша.

Кондак, глас 2

Роди́лся еси́ во гра́де Ли́вны,/ обуче́ние восприя́л еси́ во гра́де Каза́ни,/ епи́скопствовал еси́ в Ка́шине, Ту́ле и Ряза́ни,/ сконча́лся еси́ му́ченически в То́мске./ Ны́не жи́тельствуеши во гра́де Небе́снем./ Моли́ся за ны святи́телю Иувена́лие/ да спасе́т Госпо́дь ду́ши на́ша.

Величание

Велича́ем тя,/ священному́чениче Иувена́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Божией Матери ради иконы Ее, именуемой Ахтырская, глас 4

Преблагослове́нная Де́во, Богороди́тельнице Чи́стая,/ у Креста́ Сы́на Твоего́ и Бо́га на́шего предстоя́щи,/ скорбь ве́лию претерпе́ла еси́/ и благода́ть от Него́ прияла́ еси́ су́щия в ско́рбех утеша́ти./ Те́мже на пречи́стый о́браз Твой благогове́йно взира́юще/ и изображе́нную Тя на нем пред Кресто́м Спа́са на́шего ви́дяще,/ умиле́нно к Тебе́ вопие́м:/ Засту́пнице усе́рдная, блага́я и ми́лостивая!/ Ускори́ изба́вити ны от вся́кия ско́рби, ну́жды и боле́зни/ и спаси́ ду́ши на́ша,/ да Тя со благодаре́нием сла́вим во ве́ки.

Кондак, глас 8

Притеце́м, ве́рнии, к благода́тному ми́лостей и щедро́т исто́чнику – / чудотво́рному Пречи́стыя Де́вы о́бразу:/ сей бо нам свы́ше дарова́ся,/ душа́м и телесе́м во спасе́ние,/ ему́же покланя́ющеся с любо́вию, возопие́м к Богоро́дице:/ о Всепе́тая Ма́ти, о Цари́це Всеми́лостивая,/ покры́й и соблюди́ нас от вся́каго зла/ Твои́м к Бо́гу ма́терним предста́тельством.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь Божией Матери ради иконы Ее, именуемой Федотьевская, глас 4

Весели́ся и ра́дуйся сла́вный гра́де Ряза́нь,/ соверша́я па́мять пренесе́ния ико́ны Богома́тере/ из села́ Федо́тьева в Собо́рный храм,/ ю́же преосвяще́нный архиепи́скоп Феодори́т дарова́ народу́ правосла́вному,/ указу́я в ней исто́чник исцеле́ний,/ супру́жеству благослове́ние,/ си́ротам и вдови́цам заступле́ние,/ и́ноком отра́ду и утеше́ние./ И мы к ней притека́юще зове́м:/ Пресвята́я Де́во Богоро́дице,/ ве́рно Тя сла́вящих спаса́й,/ оте́чество на́ше и архиере́ев и вся росси́йския наро́ды от всех бед избавля́й,/ по вели́цей Твое́й ми́лости.

Кондак, глас ?

Не и́мамы ины́я по́мощи... (общий Божией Матери).

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь мученику Иакинфу, глас 4

Му́ченик Твой, Го́споди... (общий мученику).

Кондак, глас 6

Дре́во жи́зни посреде́ души́ своея́,/ ве́ру Твою́, Христе́, стяжа́вый Твой му́ченик,/ Еде́мскаго ра́я честне́йший бысть,/ дре́во пре́лести зми́евы погуби́в дерзнове́нно ду́хом,/ венча́ся сла́вою Твое́ю, Многоми́лостиве.

Ин кондак, глас 4

Ка́мень че́стен показа́ся, Иаки́нфе,/ в Го́рнем о́ном све́тлем гра́де водрузи́ся,/ в разу́мнем Сио́не блиста́я све́тло,/ освеща́я вся, чту́щия честно́е твое́ страда́ние,/ моли́ спасти́ся нам, твою́ па́мять почита́ющим.

Величание

Велича́ем тя,/ страстоте́рпче святы́й Иаки́нфе,/ и чтим честна́я страда́ния твоя́,/ я́же за Христа́/ претерпе́л еси́.

Тропарь святителю Филиппу, митрополиту Московскому, всея России чудотворцу, глас 8

Первопресто́льников прее́мниче,/ сто́лпе Правосла́вия, и́стины побо́рниче,/ но́вый испове́дниче, святи́телю Фили́ппе,/ положи́вый ду́шу за па́ству твою́./ Те́мже, я́ко име́я дерзнове́ние ко Христу́,/ моли́ за град же и лю́ди,/ чту́щия досто́йно святу́ю па́мять твою́.

Ин тропарь, глас 5

Ра́достный возсия́ день све́тлаго торжества́:/ днесь церко́вная расширя́ются не́дра,/ прие́млюще духо́вных даро́в неоскуде́емо боготво́рное сокро́вище,/ струю́ благода́тей неисчерпа́емую,/ исто́чника чудесе́м оби́льна,/ чудотвори́выя и свяще́нныя мо́щи твоя́, святи́телю Фили́ппе./ Те́мже моли́ просла́вившаго тя Дарода́теля Христа́ Бо́га/ о воспева́ющих тя/ и кла́няющихся свяще́нным моще́м твои́м.

Кондак, глас 3

Правосла́вия наста́вника и и́стины провозве́стника,/ Златоу́стаго ревни́теля, росси́йскаго свети́льника,/ Фили́ппа прему́драго восхва́лим,/ пи́щею слове́с свои́х разу́мно ча́да своя́ пита́юща,/ той бо язы́ком хвале́ния поя́ше,/ устна́ма же пе́ние веща́ше,/ я́ко таи́нник Бо́жия благода́ти.

Величание

Велича́ем тя,/ святи́телю о́тче Фили́ппе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобным Анатолию, в Ближних пещерах почивающему, и Анатолию затворнику, в Дальних пещерах почивающему, Киево-Печерским, глас 3

Преблаже́ннии и Богоно́снии отцы́ на́ши, Анато́лие и Анато́лие Затво́рниче,/ я́ко стяжа́вший дерзнове́ние ко Го́споду/ равноа́нгельным свои́м житие́м,/ его́же ра́ди обогати́ Христо́с нетле́нием и чудесы́ мо́щи ва́ша,/ мо́лим вас приле́жно:/ испроси́те душа́м на́шим очище́ние/ и ве́лию и бога́тую ми́лость.

Кондак, глас 4

Бога́тство благода́ти и сыноположе́ния/ стяжа́вше мно́гими по́двиги и доброде́тельми,/ и́хже ра́ди Христо́с всели́ ду́ши ва́ша в Небе́сная селе́ния Своя́,/ дарова́в благода́ть нетле́ния и чуде́с моще́м ва́шим,/ к ни́мже притека́юще, вопие́м:/ ра́дуйтеся, Анато́лие и Анато́лие Затво́рниче,/ ли́ков и́ночествующих похвало́ и украше́ние.

Величание

Ублажа́ем вас,/ преподо́бнии отцы́ Анато́лие и Анато́лие Затво́рниче,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь благоверным князьям Василию и Константину, Ярославским, глас 2

Ва́ше оте́чество хва́лится обагре́нием крове́й ва́ших,/ Це́рковь же Бо́жия ра́дуется,/ прие́мши телеса́ ва́ша,/ лю́дие, пе́сненный лик соста́вльше,/ духо́вною цевни́цею* вопию́т:/ лику́й, Васи́лие, ра́дуйся, Константи́не,/ Яросла́влю сла́во и всей Росси́и ра́досте.

Ин тропарь, глас 8

Возвы́сившийся на доброде́тель, к жела́нию кра́йнему,/ и достиго́сте к Небе́сней высоте́,/ благове́рнии вели́цыи кня́зи Васи́лие и Константи́не,/ и безстра́стным житие́м украси́сте ду́ши своя́,/ поще́нием же изря́дно победи́сте бесо́вския полки́,/ и восприя́сте чи́стую со́весть,/ в моли́твах, я́ко безпло́тнии, пребы́сте,/ возсия́сте в ми́ре, а́ки со́лнце, пресла́внии,/ моли́те спасти́ся душа́м на́шим.

Кондак, глас 8

Я́ко цве́ти честни́и разли́чнии,/ в ра́йстей пи́щи процве́тше невеще́ственно,/ оте́честву своему́ сла́ву ве́лию/ и сро́дником похвалу́ и честь я́вльше,/ всеи́стиннии побе́дницы, вели́кий Васи́лие и сла́вный Константи́не,/ но у́бо не преста́йте моля́щеся о гра́де ва́шем и о всех рабе́х свои́х,/ изба́вити их от напа́стей и бед и вся́ких лю́тых обхожде́ний, вопию́щих вам:/ ра́дуйтеся, гра́ду на́шему Яросла́влю вели́кое утвержде́ние.

Кондак на обретение мощей, глас 4

Днесь Це́рковь разширя́ет не́дра своя́/ и прие́млет многоцеле́бныя мо́щи ва́ши,/ добропобе́днии страда́льцы,/ Васи́лие сла́вне и Константи́не Богому́дре,/ и, я́ко шипо́к* благово́нный, напоя́ется пречу́дными арома́ты,/ бога́тными чудодея́нии от неистощи́мых сокро́вищ,/ от пресла́вных моще́й ва́ших,/ и ра́достно чад свои́х созыва́ет вопи́ти:/ ра́дуйся, дво́ице пречу́дная, оте́честву своему́ стено́ необори́мая.

Величание

Велича́ем вас,/ благове́рнии кня́зи Васи́лие и Константи́не,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Или:

Велича́ем вас,/ страстоте́рпцы Христо́вы,/ благове́рнии кня́зи Васи́лие и Константи́не,/ и чтим честна́я страда́ния ва́ша,/ вы бо мо́лите за нас/ Христа́ Бо́га на́шего.

Тропарь святителю Василию, епископу Рязанскому, глас 4

Пе́рвее в Му́роме святи́тельством почте́н был еси́,/ из него́же непра́ведно изгоня́ем,/ я́ко на ле́гкий кора́бль на ма́нтию возше́л еси́,/ на не́йже па́че естества́, я́ко безпло́тен, по вода́м ше́ствие творя́,/ промышле́нием Вы́шняго и заступле́нием Богома́тере управля́ем,/ Богоспаса́емаго гра́да Ряза́ни дости́гл еси́/ и, в нем архиере́йства престо́л восприи́м,/ Богода́нную па́ству ряза́нскую до́бре упа́сл еси́./ Святи́телю о́тче наш Васи́лие,/ моли́ Христа́ Бо́га спасти́ся душа́м на́шим.

Кондак, глас 8

Я́ко многосве́тлая звезда́, от гра́да Му́рома возсия́л еси́, святи́телю Васи́лие,/ по вода́м же доше́д до гра́да на́шего Ряза́ни,/ Це́рковь Бо́жию до́бре упа́сл еси́,/ просвеща́я лю́ди уче́нием и житие́м твои́м./ Помина́й и ны́не ча́да твоя́, мо́лим тя, наста́вниче наш до́брый,/ и за ны Христу́ Бо́гу и Пречи́стей Его́ Ма́тери моли́ся,/ да благода́рною душе́ю зове́м ти:/ ра́дуйся, уго́дниче Христо́в и те́плый к Бо́гу о нас моли́твенниче.

Величание

Велича́ем тя,/ святи́телю о́тче Васи́лие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь общий преподобным Иоанну и Лонгину, Яренгским, глас 8

Я́ко зве́зды многосве́тлыя, от ю́ности возсия́вше,/ освяти́ли есте́ сердца́ ве́рных пренесе́нием честны́х моще́й ва́ших,/ доброде́тельми чуде́с ва́ших, во пло́ти, я́ко бо а́нгел и на земли́, показа́стеся,/ поще́нием насажде́ни бы́сте, я́ко дре́во при вода́х воздержа́ния,/ напое́ни струя́ми слез ва́ших, и скве́рну омы́сте,/ сего́ ра́ди яви́стеся прия́телище Бо́жия Ду́ха, Иоа́нне и Ло́нгине,/ моли́те Христа́ Бо́га спасти́ся душа́м на́шим.

Тропарь преподобному Иоанну Яренгскому, глас 4

От земли́ Возве́дый тя к ве́чным оби́телем/ соблюда́ет и по сме́рти невреди́мо те́ло твое́, свя́те Иоа́нне,/ ты бо в целому́дрии и чистоте́ жития́, блаже́нне, пожи́л еси́,/ не оскверни́в те́ло,/те́мже со дерзнове́нием моли́ Христа́ Бо́га спасти́ся душа́м на́шим.

Тропарь преподобному Лонгину Яренгскому, глас 1

Свы́ше Боже́ственною благода́тию просвети́вся, Богому́дре,/ мно́гим терпе́нием во вре́менней жи́зни тече́ние соверши́л еси́,/ те́мже и по успе́нии источа́вши чуде́с благода́ть,/ и́же с ве́рою приходя́щим к тебе́, Ло́нгине всеблаже́нне./ Сла́ва Да́вшему ти кре́пость,/ сла́ва Просла́вльшему тя в чудесе́х,/ сла́ва Де́йствующему тобо́ю всем исцеле́ния.

Кондак общий преподобным Иоанну и Лонгину, Яренгским, глас 8

Яви́стеся свети́льницы всесве́тлии, во пло́ти а́нгели,/ я́ко Живота́ дре́во ра́йское,/ поще́нием, и бде́нием, и ве́рою возраща́еми, процвели́ есте́./ Моли́твами свои́ми Небе́сную благода́ть прие́мше,/ вра́чеве же кре́пции я́вльшеся,/ исцеля́ете неду́жныя и ду́ши с ве́рою притека́ющих к ра́це моще́й ва́ших,/ чудотво́рцы сла́внии Иоа́нне и Ло́нгине,/ сего́ ра́ди вси ве́рою и любо́вию вопие́м:/ ра́дуйтеся, помо́рстей стране́ похвале́ и утвержде́ние.

Величание

Ублажа́ем вас,/ преподо́бнии отцы́ Иоа́нне и Ло́нгине,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь блаженному Иоанну, Христа ради юродивому, Московскому, глас 8

И́же Христа́ ра́ди во́лею оста́вив твое́ оте́чество, град Во́логду,/ и вся кра́сная ми́ра сего́ возненави́дев,/ жела́нием духо́вным всели́лся еси́ во град Росто́в,/ я́ко в пусты́ни скита́лся в нем,/ гла́дом и жа́ждею и безме́рною тягото́ю плоть твою́ изнуря́я/ и рабо́тая Го́сподеви день и нощь,/ в посте́ и моли́тве пребыва́я в притво́ре церко́внем,/ власы́ же главы́ твоея́ пе́плом и смоло́ю удруча́я,/ и, ревну́я Васи́лию блаже́нному,/ прише́л еси́ в ца́рствующий град Москву́/ и, в целому́дрии и терпе́нии тече́ние до́бре сконча́в,/ пресели́лся еси́ к ве́чным оби́телем,/ чуде́с лучи́ испуща́я,/ преблаже́нне Иоа́нне, о́тче наш,/ моли́ Христа́ Бо́га спасти́ся душа́м на́шим.

Ин тропарь, глас 4

Житие́ твое́ воздержа́нием и терпе́нием,/ благоюро́де Иоа́нне, украси́л еси́,/ и ча́стыми моли́твами и все́нощным стоя́нием/ ду́шу твою́ просвети́л еси́,/ и обяза́ те́ло твое́ и власы́, и кресты́ с вери́гами тя́жкими,/ мно́га ле́та тружда́яся до исхо́да души́ твоея́,/ и прии́де на твое́ преставле́ние из Росто́ва гра́да/ в ца́рствующий град Москву́,/ к Пресвяте́й Тро́ице и Пречи́стей Бо́жией Ма́тери,/ и ту погребо́ша тя святи́телие,/ и ны́не у гро́ба твоего́ то́чиши исцеле́ния приходя́щим ти с ве́рою./ Моли́ Бо́га приле́жно с пра́ведным Васи́лием о правосла́вных лю́дех./ Сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Ин тропарь, глас 1

Любве́ ра́ди Христо́вы/ возненави́дев ми́ра сего́ вся преле́стныя красоты́,/ в ми́ре живы́й, подвиза́ся до́бре, я́ко а́нгел на земли́,/ ве́чныя ра́ди жи́зни,/ и, от земны́х досто́инств таковы́х ду́шу воскреси́в ду́хом,/ плоть же порабо́тив и повину́в во всем ду́ху,/ Христо́ви распя́ся и к Боже́ственней высоте́ пресве́тло взя́тся благода́тию,/ прии́де в Небе́сный черто́г,/ иде́же ны́не Пресвяте́й Тро́ице со а́нгелы предстоя́,/ во све́те неизрече́нныя ра́дости весели́шися, преблаже́нне Иоа́нне,/ тем благода́рственно вопие́м ти:/ сла́ва Избра́вшему тя в Руси́, блаже́нне, уста́ва изря́дна,/ сла́ва Укре́пльшему тя в наро́де,/ сла́ва моли́твами твои́ми и нас Спаса́ющему.

Кондак, глас 8

Свято́е и пренепоро́чное поне́сл еси́ самово́льное муче́ние,/ я́ко ве́но* пречестно́е, прине́сл еси́ те́ло твое́ к Пресвяте́й Тро́ице и Пречи́стей Богоро́дице/ и ту сотвори́л еси́ честно́е твое́ преставле́ние./ Терпе́нием твои́м и смире́нием а́нгельския ли́ки удиви́л еси́/ и диа́вола мучи́теля посрами́л еси́,/ от челове́к отгоня́еши ду́хи те́мныя,/ разли́чная исцеле́ния подава́я./ Ра́дуйся, благоюро́де Иоа́нне, с блаже́нным Васи́лием,/ и печа́ль на́шу на ра́дость преложи́,/ моли́ся приле́жно стране́ Росси́йстей от междоусо́бныя бра́ни и от безбо́жных язык изба́витися./ Ра́дуйся, земли́ Росси́йския удобре́ние и гра́да на́шего Москвы́ вели́кое утвержде́ние.

Ин кондак, глас тойже

Иже Христа́ ра́ди наложи́вый на ся му́дростию юро́дство,/ о́бразом бу́йства зрим от челове́к,/ у́мныма же крыло́ма горе́ возлета́я,/ все те́ло твое́ вери́гами обяза́я*,/ я́ко зла́то многоце́нное, соблюде́ся в наро́де,/ очи́стив ум от страсте́й,/ веселе́нием духо́вным преше́л еси́ мо́ре мяте́жнаго сего́ жития́,/ обре́тя све́тлость жи́зни ве́чныя./ Мо́лим тя, блаже́нне Иоа́нне,/ моли́ся приле́жно Христу́ Бо́гу на́шему/ сохранится нам от вся́каго наве́та/ и злых обстоя́ний ви́димых и неви́димых враг, да зове́м ти:/ ра́дуйся, многострада́льне, я́ко да моли́твами твои́ми направля́еми,/ предстоя́ще при́сно с тобо́ю в Тро́ице сла́вимому Бо́гу,/ пое́м Ему́: Аллилу́иа.

Величание

Ублажа́ем тя,/ святы́й пра́ведный Иоа́нне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Никодиму Кожеезерскому, Хозьюгскому пустыннику, глас 8

От ца́рствующаго гра́да и су́щия в нем вели́кия оби́тели/ пресе́льник яви́лся еси́,/ и промышле́нием Боже́ственнаго Ра́зума наставля́ем,/ к морски́м страна́м устреми́лся еси́,/ и та́мо в пусты́ню всели́лся еси́,/ уклоня́яся мирски́я молвы́,/ си́лою же Свята́го Ду́ха вооружи́вся,/ кре́стным ору́жием враги́ твоя́ прогоня́л еси́,/ посто́м и непреста́нною моли́твою жизнь твою́ соверша́я,/ ревну́я вели́ким отце́м Анто́нию и Ону́фрию и Па́влу Фиве́йскому;/ с ни́миже Го́сподеви моли́ся,/ о́тче Никоди́ме, спасти́ся душа́м на́шим.

Ин тропарь, глас 4

Я́ко безпло́тен, о́тче, пожи́л еси́ на земли́,/ смире́нием и в я́ме пребыва́нием с моли́твами превознося́щагося врага́ смири́л еси́,/ я́ко крин, вои́стину процве́л еси́,/ избра́нный кинамо́н*, и высо́кий кипари́с,/ и плодови́тая ма́слина, и фи́никс* сла́дкий,/ и кедр благоуха́нный, и валса́м* чи́стый,/ те́рние злостра́стия искорени́л еси́/ и жили́ще Всесвята́го Ду́ха был еси́,/ те́мже помина́ем па́мять твою́ днесь пра́зднующе, Никоди́ме чудотво́рче,/ да вси ра́достными гла́сы воспева́ем Христа́ Бо́га на́шего,/ И́же тебе́ дарова́вшаго исцеле́ний благода́ть.

Кондак, глас 2

Пусты́ню, я́ко ца́рский черто́г,/ усе́рдно возлюби́л еси́,/ в не́йже жесто́кое показа́ житие́/ многоле́тным пребыва́нием, очи́стив свою́ ду́шу и ум от страсте́й,/ и сего́ ра́ди Свята́го Ду́ха преди́вно прия́телище бысть,/ Никоди́ме преподо́бне,/ Его́же де́йствием и чудесы́ обогати́лся еси́;/ те́мже и мы почита́ем по́двиги твоя́, всеблаже́нне,/ но, я́ко име́яй дерзнове́ние ко Пресвяте́й Тро́ице,/ моли́ся непреста́нно о всех нас.

Ин кондак, глас 8

Укрепля́ем си́лою Креста́ и благода́тию,/ преоби́дев тле́нная и до́лу влеку́щая мудрова́ния, о́тче,/ бесо́в посрами́л еси́,/ к Вы́шнему тече́ние получи́л еси́,/ устреми́лся еси́ в Хозью́гу пусты́ню,/ Пресвяте́й Тро́ице жили́ще был еси́,/ Е́йже предстоя́, моли́ся о нас, почита́ющих тя,/ да возопии́м ти:/ ра́дуйся, преблаже́нне Никоди́ме о́тче наш.

Величание

Ублажа́ем тя,/ преподо́бне о́тче Никоди́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Андрею, архиепископу Критскому, глас 1

Христо́ву Це́рковь цевни́цею языка́ твоего́,/ песносло́вя уми́льно, возвесели́л еси́,/ богосло́вием же Препе́тыя Тро́ицы/ сла́ву всем сказа́л еси́ я́сно,/ тем тя, я́ко тайноглаго́льника, пое́м,/ Андре́е, па́стырю Кри́тский,/ и велича́ем па́мять твою́,/ Христа́ сла́вяще ди́внаго во святы́х Свои́х.

Ин тропарь, глас 4

Пра́вило ве́ры и о́браз кро́тости,/ воздержа́ния учи́теля,/ яви́ тя ста́ду твоему́,/ я́же веще́й и́стина./ Сего́ ра́ди стяжа́л еси́ смире́нием высо́кая,/ нището́ю бога́тая,/ о́тче Андре́е,/ моли́ Христа́ Бо́га/ спасти́ся душа́м на́шим.

Кондак, глас 2

Воструби́в я́сно Боже́ственная сладкопе́ния,/ яви́лся еси́ свети́льник ми́ра светле́йший,/ све́том сия́я Тро́ицы, Андре́е преподо́бне./ Те́мже вси вопие́м ти:/ не преста́й моля́ся о всех нас.

Величание

Велича́ем тя,/ святи́телю о́тче Андре́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобной Марфе, Антиохийской, Едесской, матери Симеона Дивногорца, глас 4

Житие́м чи́стым и любо́вию, я́же ко Пречи́стей Бо́жией Ма́тери,/ стяжа́ла еси́ дар чадоро́дия пресла́вный,/ свети́льника ми́ру, ди́внаго Симео́на,/ тем тя, Ма́рфо, я́ко ма́терь, о ча́де веселя́щуюся, пе́сньми ублажа́ем.

Ин тропарь, глас 8

В тебе́, ма́ти, изве́стно спасе́ся... (общий преподобной жене).

Кондак, глас 2

В моли́твах Го́сподеви предстоя́щи,/ Пречи́стей Де́ве Богоро́дице пе́ние и хвалы́ принося́щи,/ Ма́рфо честна́я,/ породи́ла еси́ свяще́нное отроча́,/ Симео́на преди́внаго, свети́льника всеми́рнаго,/ с ни́мже моли́ при́сно о всех нас.

Величание

Ублажа́ем тя,/ преподо́бная ма́ти Ма́рфо,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Андрею Рублеву, иконописцу, глас 3

Боже́ственнаго све́та луча́ми облиста́емый,/ преподо́бне Андре́е,/ Христа́ позна́л еси́ – Бо́жию Прему́дрость и Си́лу/ и ико́ною Святы́я Тро́ицы всему́ ми́ру пропове́дал еси́/ еди́нство во Святе́й Тро́ице./ Мы же со удивле́нием и ра́достию вопие́м ти:/ име́яй дерзнове́ние ко Пресвяте́й Тро́ице, моли́ просвети́ти ду́ши на́ша.

Кондак, глас 8

От ю́ности к Боже́ственней красоте́ устремля́лся,/ чу́дный иконопи́сец в земли́ Росси́йстей был еси́,/ и, богоно́сным твои́м учи́телем поревнова́в,/ сия́нием доброде́телей укра́сился еси́, преподо́бне Андре́е,/ те́мже и яви́ся Це́ркве на́шея похвала́ и ра́дование.

Величание

Ублажа́ем тя,/ преподо́бне о́тче Андре́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь благоверному великому князю Андрею Боголюбскому, Владимирскому чудотворцу, глас 8

Я́ко благове́рен и пра́веден,/ за любо́вь Христа́ Бо́га от свои́х смерть прия́л еси́,/ кровь свою́ пролия́в,/ я́коже пре́жде сро́дницы твои́ и страстоте́рпцы Бори́с и Глеб,/ и́хже кро́вем совопие́т и твоя́ кровь, свя́те, к Бо́гу,/ я́коже Авеля и Заха́рии пра́ведных,/ благове́рный страстоте́рпче, вели́кий кня́же Андре́е,/ с ни́миже Христа́ Бо́га моли́ о стране́ на́шей, е́же Богоуго́дней бы́ти/ и сыново́м росси́йским спасти́ся.

Ин тропарь, глас 3

Е́же во плоти́ житию́ твоему́ удиви́шася а́нгельстии чи́ни:/ ка́ко с те́лом к неви́димым сплете́нием изше́л еси́, пресла́вне,/ и уязви́л еси́ де́монския полки́./ Отону́дуже, Андре́е, Христо́с тебе́ воздаде́ бога́тыми дарова́ньми,/ сего́ ра́ди, о́тче, моли́ спасти́ся душа́м на́шим.

Кондак, глас 8

В ми́ре сем благоче́стно и пра́ведно пожи́в,/ моли́твою, ми́лостынею и благострада́нием Бо́гу угоди́л еси́./ Сего́ ра́ди и Бог по убие́нии твое́м просла́ви тя нетле́нием и чудесы́,/ Его́же, свя́те Андре́е, моли́ сохрани́ти оте́чество твое́/ и всех люде́й, благоче́стно тебе́ почитаю́щих.

Величание

Велича́ем тя,/ благове́рный вели́кий кня́же Андре́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Евфимию, Суздальскому чудотворцу, глас 3

Я́ко светоза́рная звезда́, прише́л еси́ от восто́ка на за́пад,/ оста́вив оте́чество твое́, Ни́жний Но́вград,/ и, доше́д богоспаса́емаго гра́да Су́ждаля,/ в нем оби́тель сотвори́л еси́,/ и собра́л еси́ мона́хов мно́жества,/ и, прие́м дар чуде́с от Бо́га, о́тче Евфи́мие,/ был еси́ о Христе́ собесе́дник/ и спо́стник преподо́бному Се́ргию./ С ни́мже у Христа́ Бо́га испроси́ нам здра́вие, и спасе́ние,/ и душа́м на́шим ве́лию ми́лость.

Кондак, глас 2

Волне́ний мно́жество невла́жно проходя́,/ безпло́тныя враги́ струя́ми слез твои́х погрузи́л еси́,/ Богому́дре Евфи́мие преподо́бне,/ тем и чуде́с дар прия́л еси́,/ моли́ непреста́нно о всех нас.

Ин кондак, глас тойже

Восприи́м Авраа́млю до́блесть,/ о́тче преподо́бне Евфи́мие,/ оста́вль оте́чество свое́, Ни́жний Но́вград,/ и доше́д Богоспаса́емаго гра́да Су́ждаля,/ обре́л еси́ ме́сто благоуго́дно,/ на не́мже оби́тель ве́лию соста́вил еси́/ и в ней пожи́л еси́ в моли́твах, в поста́х и во бде́ниих./ Тем прии́м чуде́с дар от Бо́га,/ собра́л еси́ и́ноков мно́жества,/ с ни́миже Христа́ Бо́га моли́ непреста́нно о всех нас.

Величание

Ублажа́ем тя,/ преподо́бне о́тче Евфи́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь благоверному императору Российскому, страстотерпцу, Николаю II и иже с ним убиенным, глас 5

Ца́рства земна́го лише́ние,/ у́зы и страда́ния многоразли́чныя,/ кро́тко претерпе́л еси,/ свиде́тельствовав о Христе́, да́же до сме́рти от богобо́рцев,/ страстоте́рпче вели́кий Боговенча́нный царю́ Нико́лае,/ сего́ ра́ди му́ченическим венце́м на Небесе́х/ венча́ тя с цари́цею, и ча́ды, и слу́ги твои́ми Христо́с Бог,/ Его́же моли́ поми́ловати страну́ Росси́йскую/ и спасти́ ду́ши на́ша.

Кондак, глас 3

Мирлики́йскому предста́телю, благове́рный царю́,/ подража́тель показа́лся еси́,/ Христо́во бо Ева́нгелие испо́лнив./ Положи́л еси́ ду́шу твою́ за лю́ди твоя́/ и спасл еси́ пови́нныя,/ па́че же непови́нныя от сме́рти,/ сих ра́ди му́ченническою кро́вию освяти́лся еси́,/ я́ко великому́ченик Це́ркве Христо́вы.

Ин кондак, глас 6

Наде́жда царя́ му́ченика с цари́цею, и ча́ды, и слу́ги укрепи́,/ и к Твое́й любви́ окрыли́,/ бу́дущий им поко́й предвозвести́вши,/ тех моли́твами, Го́споди, поми́луй нас.

Величание

Велича́ем тя,/ страстоте́рпче святы́й царю́ Нико́лае,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Афанасию Афонскому, глас 3

Е́же во пло́ти житию́ твоему́/ удиви́шася а́нгельстии чи́ни,/ ка́ко с те́лом к неви́димым сплете́нием изше́л еси́, присносла́вне,/ и уязви́л еси де́монския полки́./ Отону́дуже, Афана́сие,/ Христо́с тебе́ воздаде́ бога́тыми дарова́ньми;/ сего́ ра́ди, о́тче, моли́/ спасти́ся душа́м на́шим.

Кондак, глас 8

Я́ко невеще́ственных суще́ств зри́теля изря́дна,/ и де́ятельна сказа́теля всеи́стинна,/ взыва́ет тя ста́до твое́, Богоглаго́льниче:/ не оскуде́й моля́ о рабе́х твои́х,/ изба́витися напа́стей и обхожде́ний, вопию́щим ти:/ ра́дуйся, о́тче Афана́сие.

Величание

Ублажа́ем тя,/ преподо́бне о́тче Афана́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Сергию, игумену Радонежскому, всея России чудотворцу, глас 8

От ю́ности восприя́л еси́ Христа́ в души́ твое́й, преподо́бне,/ и па́че всего́ вожделе́л еси́ мирска́го мяте́жа уклони́тися,/ му́жески в пусты́ню всели́лся еси́,/ и ча́да послуша́ния в ней, плоды́ смире́ния, возрасти́л еси́./ Тем быв Тро́ице вселе́ние,/ чудесы́ твои́ми всех просве́тил еси́ приходя́щих к тебе́ ве́рою,/ и исцеле́ния всем подая́ оби́льно,/ о́тче наш Сергие, моли́ Христа́ Бо́га, да спасе́т ду́ши на́ша.

Ин тропарь, глас 4

Днесь пресве́тло красу́ется ца́рствующий град Москва́,/ я́ко светолу́чными заря́ми, мо́лниями чуде́с твои́х осия́ем,/ всю вселе́нную созыва́ет/ похвали́ти тя, Богому́дре Се́ргие;/ пречестна́я же и сла́вная оби́тель твоя́,/ ю́же во и́мя Святы́я Тро́ицы мно́гими труды́ твои́ми созда́л еси́, о́тче,/ иму́щи в себе́ стада́ учени́к твои́х,/ весе́лия и ра́дости исполня́ется./ Мы же, пра́зднующе пресла́вное обре́тение честны́х моще́й твои́х, в земли́ сокрове́нных,/ я́ко цвет благоуха́нен и кади́ло благово́нно,/ любе́зно я лобыза́юще, разли́чная исцеле́ния прие́мля/ и твои́ми моли́твами грехо́в проще́ния сподобля́емся,/ о́тче преподо́бне Се́ргие,/ моли́ Святу́ю Тро́ицу/ спасти́ ду́ши на́ша.

Кондак, глас 8

Днесь, я́ко со́лнце пресве́тло,/ возсия́вше от земли́, честны́я мо́щи твоя́ нетле́нны обрето́шася,/ я́ко благоуха́нный цвет, мно́жеством чуде́с сия́юще,/ и всем ве́рным источа́юще разли́чная исцеле́ния,/ и веселя́ще избра́нное твое́ ста́до,/ е́же му́дре собра́в, до́бре па́ствил еси́./ О ни́хже и ны́не Тро́ице предстои́ши, моля́ся,/ да вси вопие́м ти:/ ра́дуйся, Се́ргие Богому́дре.

Ин кондак, глас тойже

Взира́юще на предлежа́щий честны́й твой гроб,/ в не́мже скры́ся, я́ко многоце́нное сокро́вище, свято́е трудолю́бное твое́ те́ло чистоты́,/ мы, ча́да твоя́ су́ще жа́лостная,/ в удивле́нии еди́н со еди́нем веща́юще, вопие́м:/ о́тче наш Се́ргие, моли́ Святу́ю Тро́ицу/ и нам спасти́ся, твои́м ча́дом.

Величание

Ублажа́ем тя,/ преподо́бне о́тче Се́ргие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобномученице великой княгине Елисавете Феодоровне, Алапаевской, Московской, глас 1

Смире́нием досто́инство кня́жеское сокры́вши,/ богому́драя Елисаве́то,/ сугу́бым служе́нием Ма́рфы и Мари́и Христа́ почти́ла еси́./ Милосе́рдием, терпе́нием и любо́вию себе́ предочи́стивши,/ я́ко же́ртва пра́ведная Бо́гу принесла́ся еси́./ Мы же, чту́ще доброде́тельное житие́ и страда́ния твоя́,/ я́ко и́стинную наста́вницу усе́рдно про́сим тя:/ свята́я му́ченице вели́кая княги́не Елисаве́то,/ моли́ Христа́ Бо́га/ спасти́ и просвети́ти ду́ши на́ша.

Кондак, глас 2

Вели́чие по́двига ве́ры кто пове́сть?/ Во глубине́ земли́, я́ко в рай све́тлости,/ страстоте́рпица вели́кая княги́ня Елисаве́та/ со а́нгелы во псалме́х и пе́ниих ра́довашеся/ и, убие́ние претерпева́ющи,/ о безбо́жных му́чителех взыва́ше:/ Го́споди, прости́ им грех сей,/ не ве́дят бо, что творя́т./ Тоя́ молитвами, Христе́ Бо́же,/ поми́луй и спаси́ ду́ши на́ша.

Ин кондак, глас 5

От сла́вы ца́рственныя, взе́мши Крест Христо́в,/ прешла́ еси́ к сла́ве небе́сней, моля́щи враго́в,/ и обрела́ ее́и ра́дость ве́чную,/ свята́я му́ченице княги́не Елисаве́то,/ с Варва́рою му́ченицею./ Те́мже мо́лим вас: моли́те о душа́х на́ших.

Величание

Велича́ем тя,/ страстоте́рпице свята́я вели́кая княги́не Елисаве́то,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Ино величание

Велича́ем тя,/ свята́я преподобному́ченице Елисаве́то,/ и чтим честна́я страда́ния твоя́,/ я́же за Христа́/ претерпе́ла еси́.

Тропарь Божией Матери ради иконы Ее, именуемой «Экономисса», или «Домостроительница», глас 4

Предста́тельство стра́шное и непосты́дное,/ не пре́зри, Блага́я, моли́тв на́ших,/ Всепе́тая Богоро́дице, Ми́лостивая ве́рных Домострои́тельнице,/ утверди́ правосла́вных жи́тельство,/ спаси́ страну́ на́шу/ и всех правосла́вно живу́щих в ней защити́,/ зане́ родила́ еси́ Бога́, Еди́на Благослове́нная.

Кондак, глас 8

Взбра́нной Воево́де победи́тельная... (общий Божией Матери).

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь преподобному Сисою Великому, глас 2

Плотски́я стра́сти умертви́в воздержа́нием,/ ми́ру распя́лся еси́/ и, в пусты́ни живы́й, всех по́хотей отсече́нием/ а́нгел земны́й и Небе́сный челове́к показа́лся еси́,/ сего́ ра́ди тя, я́ко наста́вника и́ноком, пое́м, Сисо́е о́тче наш, и про́сим:/ моли́ Христа́ Бо́га, да спасе́т ду́ши на́ша.

Ин тропарь, глас 1

Пусты́нный жи́тель и в телеси́ а́нгел,/ и чудотво́рец яви́лся еси́, Богоно́се о́тче наш Сисо́е,/ посто́м, бде́нием, моли́твою небе́сныя дарова́ния прии́м,/ исцеля́еши неду́жныя и ду́ши ве́рою притека́ющих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеления.

Кондак, глас 4

Подвиза́вся, а́нгел на земли́ ви́ден был еси́,/ озаря́я, преподо́бне, помышле́ния ве́рных Богозна́меньми всегда́./ Те́мже тя ве́рою, Сисо́е, почита́ем.

Ин кондак, глас 8

Я́ко безпло́тным единожи́тель/ и всем преподо́бным соприча́стник,/ по́стническими труды́ и бде́нии моли́твенными непреста́нно себе́ вооружа́я, му́дре,/ тем и дар прия́л еси́ от Бо́га/ исцеля́ти неду́ги и прогоня́ти бе́сы./ Того́ ра́ди вопие́м ти:/ ра́дуйся о́тче наш Сисо́е преподо́бне.

Величание

Ублажа́ем тя,/ преподо́бне о́тче Сисо́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Собору Радонежских святых, глас 4

Днесь све́тло пра́зднуем, ве́рнии лю́дие,/ пресла́вныя Тро́ицкия оби́тели торжество́,/ се бо вели́кий собо́р святы́х чудотво́рцев Ра́донежских, я́ко ди́вныя пти́цы небе́сныя,/ явля́ет нам Це́рковь Росси́йская,/ стезя́ми честна́го их жития́ ше́ствовати всех призыва́ющи,/ к ни́мже, с ве́рою и любо́вию притека́юще, воззове́м:/ моли́теся о нас ко Пресвяте́й Тро́ице,/ преподо́бнии отцы́ на́ши с Богоно́сным а́ввою Се́ргием,/ мир ми́рови дарова́ти и/ душа́м на́шим ве́лию ми́лость.

Ин тропарь, глас 2

Плоды́ доброде́телей на земли́ прине́сше,/ преподо́бнии отцы́,/ в Небе́сных черто́зех ны́не благоуха́ете, я́ко ра́йстии цве́ти,/ и лице́м к ли́цу зри́те Пресвяту́ю Тро́ицу,/ ю́же дерзнове́нно моли́те,/ спасти́ся душа́м на́шим.

Кондак, глас 8

Прииди́те, вси концы́ оте́чества на́шего,/ просла́вим святы́й лик уго́дников Ра́донежских,/ я́ко зве́зды, украси́вших не́бо церко́вное по́двиги земна́го жи́тельства,/ тех бо предста́тельством те́плым ко Го́споду/ мно́гия нам ми́лости Его́ низпосыла́ются,/ бе́дствия отгоня́ются и злы́е стра́сти укроща́ются./ И́хже всесвяту́ю па́мять ны́не пра́зднующе, та́ко возопии́м:/ ра́дуйтеся, Се́ргие и Ни́коне и вси Ра́донежстии чудотво́рцы,/ усе́рднии служи́телие Живонача́льныя Тро́ицы.

Величание

Велича́ем вас,/ вси святи́и, земли́ Ра́донежския,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь преподобному Сисою, схимнику Печерскому, глас 1

Пусты́нный жи́тель, и в телеси́ а́нгел,/ и чудотво́рец яви́лся еси́, Богоно́се о́тче наш Сисо́е,/ посто́м, бде́нием, моли́твою небе́сныя дарова́ния прии́м,/ исцеля́еши неду́жныя и ду́ши ве́рою приходя́щих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеления.

Кондак, глас тойже

Сисо́е чу́дне,/ на стра́сти вельми́ подвиза́выйся/ и посто́м и но́щными моли́твами сия́ успи́вый,/ благода́ть от Христа́ прия́л еси́/ в страсте́х бе́дствующим посо́бствовати./ Тем и на́ша стра́сти пло́ти и ду́ха исцели́, мо́лимся.

Величание

Ублажа́ем тя,/ преподо́бне о́тче Сисо́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь праведной деве Иулиании, княгине Ольшанской, глас 8

Я́ко непоро́чная неве́ста Нетле́ннаго Жениха́ Христа́,/ пра́ведная де́во Иулиани́е,/ с све́тлою свеще́ю до́брых дел вошла́ еси́ в черто́г Его́ Небе́сный/ и та́мо со святы́ми блаже́нства ве́чнаго наслажда́ешися./ Те́мже моли́, Его́же возлюби́ла еси́/ и Ему́же де́вство твое́ обручи́ла еси́,/ спасти́ ду́ши на́ша.

Ин тропарь, глас 2

Де́вства доброта́ми преочище́на/ и целому́дрия цветы́ венча́вшися,/ Богоблаже́нная де́во Иулиани́е,/ яви́лася еси́ ми́ру в нетле́нием телеси́ твое́м,/ исто́чник исцеле́ний и даро́в духо́вных подаю́ще всем к тебе́ притека́ющим,/ и ны́не, я́ко свеща́ те́плая, благода́ти еле́ем возже́нная,/ предстоя́ще престо́лу Го́спода и Жениха́ твоего́ Небе́снаго,/ Того́ моли́, де́во чи́стая,/ изба́вити нас от вся́каго зла,/ чту́щих па́мять твою́ ве́рою и любо́вию.

Кондак, глас 8

Храм Бо́жий одушевле́нный,/ де́вственною чистото́ю благоукра́шенный,/ ве́мы* тя, свята́я и пра́ведная де́во, княжно́ Иулиани́е./ Те́мже с любо́вию пра́зднующе/ святы́х твои́х моще́й обре́тение, мо́лим тя,/ изве́стная жела́ний на́ших хода́таице:/ принеси́ за нас моли́твы твоя́ ко Го́споду/ и от вся́ких бед свобожда́й нас/ предста́тельством твои́м у престо́ла Всевы́шняго,/ да зове́м ти:/ ра́дуйся, де́во свята́я Иулиани́е, неве́сто Христо́ва прекра́сная.

Ин кондак, глас тойже

Приво́дим Ти, о Всеще́дре, Иулиани́ю,/ присносветя́щую свещу́, еле́ем благода́ти обдержи́мую,/ немощны́м цельбу́/ Ея́же моли́твами от вся́каго зла свободи́ нас и спаси́ всех,/ и́же Тя с поклоне́нием велича́ют.

Величание

Велича́ем тя,/ свята́я пра́ведная де́во Иулиани́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь благоверному князю Глебу Всеволодовичу Городенскому, иже в Киеве, глас 2

В по́стничестве от ю́ности до́бре подвиза́вся, Богому́дре,/ ум на враги́ му́жески вооружи́в,/ оружием кре́стным сих победи́л еси́,/ твердому́дростная повлача́²⁷, в ду́шу вложи́ свою́./ Те́мже похваля́ем тя, кня́же наш Гле́бе,/ я́ко по́стником ты еси́ удобре́ние,/ Ки́еву – сла́ва/ и всей Ру́сстей земли́ – утвержде́ние.

Кондак, глас 1

Госпо́днею благода́тию вооружи́ся/ и непреста́нными моли́твами, воздержа́нием, поще́нием и труды́/ духо́внаго дарова́ния от Бо́жия Ду́ха испо́лнися,/ сего́ ра́ди чудотво́рец показа́ся,/ исцеля́я неду́ги и бе́сы прогоня́я,/ кня́же наш Гле́бе,/ моли́ Христа́ Бо́га непреста́нно о всех нас.

Величание

Велича́ем тя,/ святы́й благове́рный кня́же Гле́бе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Божией Матери ради иконы Ее, именуемой Богородско-Уфимская, глас 4

Засту́пнице Усе́рдная,/ Наде́ждо ненаде́жных,/ Помо́щнице ни́щих и си́рых,/ пла́чущих Утеше́ние,/ согреша́ющих очище́ние,/ Путеводи́тельнице заблу́ждших,/ боля́щих Целе́бнице/ и испра́вление па́дающих,/ Ты бо еси́ Похвало́ земли́ Уфимския, Де́во Богоро́дице.

Кондак, глас 5

О, Милосе́рдная Ма́ти,/ не отри́ни слез и воздыха́ний на́ших, с ве́рою и любо́вию к Тебе́ приноси́мых:/ пред ико́ною Богоро́дскою услы́ши ны́не моля́щихся/ и на путь спасе́ния наста́ви,/ и душ на́ших грехи́ исцели́,/ от земли́ Уфи́мския вся па́губи потреби́*,/ Ты бо еси́ лю́дем сокро́вище ве́чнаго спасе́ния/ и исто́чниче Боже́ственныя благода́ти.

Величание

Досто́йно есть велича́ти Тя,/ Богоро́дице, честне́йшую Херуви́м и сла́внейшую без сравне́ния Серафи́м.

Ино величание (храмовое)

Велича́ем Тя,/ Богоро́дице Де́во,/ и почита́ем чудотво́рную ико́ну Твою́,/ е́юже благоволи́ла еси́ спасти́ зе́млю Уфи́мскую/ от всегуби́тельных боле́зней и людски́х нестрое́ний.

Тропарь преподобным Фоме Малеину и Акакию, иже в Лествице, глас 1

Свети́ла Богосия́нная ми́ру/ и и́ноков одушевле́нныя зари́,/ Фома́ чудесы́, Ака́кий же послуша́нием,/ возсия́сте све́тло;/ сих, я́ко иму́щих дерзнове́ние к Бо́гу,/ моли́твами во бра́нех посо́бствовати мо́лим,/ да про́сят от Христа́ Бо́га дарова́ти проще́ние согреше́ний/ чту́щих их святу́ю па́мять.

Ин тропарь, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви живо́т наш.

Кондак преподобному Фоме Малеину, глас 4

Ве́лию побе́ду му́жески показа́л еси́,/ отону́дуже Боже́ственною любо́вию разгоре́вся,/ царя́ тле́ннаго и вся кра́сная преоби́дел еси́,/ на горе́ Мале́йстей вселе́ние соверши́в,/ от нея́же в Небе́сная/ возше́л еси́ к Царю́ царе́й, Фо́мо,/ моли́ непреста́нно о всех нас.

Кондак преподобному Акакию, иже в Лествице, глас 2

Мир оста́вль, Христу́ после́довал еси́ от младе́нства,/ прему́дре Ака́кие преподо́бне,/ Того́ подража́я во́льное смире́ние,/ низве́ргл еси́ го́рдостнаго мучи́теля:/ моли́ непреста́нно о всех нас.

Величание преподобным Фоме и Акакию

Ублажа́ем вас,/ преподо́бнии отцы́ Фомо́ и Ака́кие,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь преподобной Евдокии, в иночестве Евфросинии, княгине Московской, глас 8

По земне́м вдовстве́ Небе́сному Жениху́ себе́ уневе́стивши/ и в кня́жестем черто́зе подви́жнически пожи́вши,/ по́слежде же и черто́г и чад твои́х/ Бо́га ра́ди оста́вила еси́, преподо́бная Евфроси́ние,/ и вше́дши во оби́тель, тобо́ю созда́нную,/ и во и́ночестем о́бразе мно́ги по́двиги показа́ла еси́,/ и свято́е твое́ житие́ по благода́ти Бо́жией блаже́нною кончи́ною увенча́ла еси́./ И ны́не, предстоя́щи Христу́ Бо́гу,/ моли́ спасти́ся душа́м на́шим.

Ин тропарь, глас 5

От ю́ности предызбра́нная Бо́гом уго́днице,/ оста́вльши све́тлый черто́г кня́жеский,/ уклони́лася еси́ во оби́тель, тобо́ю созда́нную,/ и, пучи́ну жите́йскаго мо́ря преплы́вши,/ ны́не со а́нгелы песносло́виши Христа́ Бо́га,/ Ему́же непреста́нно моли́ся, преподо́бная,/ я́ко да сохраня́ет вы́ну оби́тель, тобо́ю созда́нную,/ и да́рует нам мир и ве́лию ми́лость.

Кондак, глас 2

Вся кра́сная ми́ра сего́, я́ко су́етная, презре́вши/ и те́ло твое́ посто́м и бде́нием изнури́вши,/ непреста́нными моли́твами Бо́гу угоди́ла еси́,/ преподо́бная Евфроси́ние,/ и, дар исцеле́ний от Него́ прия́ти сподо́бльшися,/ слепо́му прозре́ние и мно́гим неду́жным исцеле́ние дарова́ла еси́./ Те́мже ра́достно взыва́ем, глаго́люще:/ сла́ва Бо́гу, прославля́ющему святы́я Своя́.

Величание

Ублажа́ем тя,/ преподо́бная ма́ти Евфроси́ние,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь общий преподобным Сергию и Никону, игуменам Радонежским, всея России чудотворцам, глас 8

Я́ко трисве́тлаго со́лнца светоза́рныя зве́зды,/ Тро́йческим све́том озаря́ете сердца́ ве́рных,/ сосу́ди Све́та Пресвяты́я Тро́ицы я́вльшеся,/ и преди́вным ва́шим житие́м и́ноком бы́сте тве́рдии законоположи́телие/ и це́рквам благоле́пие, и благове́рным, и святи́телем, и всем лю́дем,/ вся бо де́монския скве́рны отгна́вше отсю́ду/ ва́шими чи́стыми уче́нии и де́лы,/ до́бре упасо́сте ста́до, со́бранное ва́ми,/ но и ны́не мо́лим вас:/ посеща́йте чад свои́х, я́ко иму́щии дерзнове́ние ко Святе́й Тро́ице,/ Богому́дре Се́ргие с чу́дным ученико́м свои́м Ни́коном,/ и моли́те Христа́ Бо́га, да спасе́т ду́ши на́ша.

Тропарь преподобному Сергию Радонежскому, глас тойже

От ю́ности восприя́л еси́ Христа́ в души́ твое́й, преподо́бне,/ и па́че всего́ вожделе́л еси́ мирска́го мяте́жа уклони́тися,/ му́жески в пусты́ню всели́лся еси́/ и ча́да послуша́ния в ней, плоды́ смире́ния, возрасти́л еси́./ Тем быв Тро́ице вселе́ние,/ чудесы́ твои́ми всех просвети́л еси́, приходя́щих к тебе́ ве́рою,/ и исцеле́ния всем подая́ оби́льно./ Отче наш Се́ргие, моли́ Христа́ Бо́га, да спасе́т ду́ши на́ша.

Тропарь преподобному Никону Радонежскому, глас 1

Послуша́ния до́брый рачи́тель быв,/ преподо́бне Ни́коне приснопа́мятне,/ Це́рковь бо прекра́сну Святы́я Тро́ицы/ в похвалу́ отцу́ твоему́ воздви́гл еси́./ Те́мже и мы, ча́да твоя́, любо́вию вопие́м ти:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак общий преподобным Сергию и Никону Радонежским, глас 8

В по́стницех приобщи́вшеся Вели́кому Анто́нию/ и Евфи́мию Иерусали́мскому поревнова́вше в по́двизех,/ я́ко а́нгели, на земли́ яви́стеся,/ просвеща́юще, преподо́бнии, ве́рных сердца́/ Боже́ственными зна́мении и чудесы́ повсегда́,/ сего́ ра́ди ра́достно вас почита́ем и любо́вию вопие́м вам:/ ра́дуйтеся, преподо́бнии отцы́ Се́ргие и Ни́коне,/ по́стником удобре́ние и всея́ Росси́йския земли́ вели́кое утвержде́ние.

Величание

Ублажа́ем вас,/ преподо́бнии отцы́ Се́ргие и Ни́коне,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь мученице Кириаки́и (Неде́ле), глас 3

Одоле́нием чуде́сным/ победи́ла еси́ вра́жия си́лы до конца́,/ Неде́ло пресла́вная,/ идоложре́ния бо тьму/ дале́че Креста́ Честна́го све́тлостию прогнала́ еси́./ Му́ченице всехва́льная,/ Христу́ Бо́гу моли́ся/ дарова́ти нам ве́лию ми́лость.

Кондак, глас 2

Храм твой всечестны́й,/ я́ко цельбу́ душе́вную обре́тше... (общий мученице).

Величание

Велича́ем тя,/ страстоте́рпице Христо́ва Неде́ло,/ и чтим честно́е страда́ние твое́,/ е́же за Христа́/ претерпе́ла еси́.

Тропарь Божией Матери ради иконы Ее Казанская, глас 4

Засту́пнице усе́рдная,/ Ма́ти Го́спода Вы́шняго,/ за всех мо́лиши Сы́на Твоего́ Христа́ Бо́га на́шего,/ и всем твори́ши спасти́ся,/ в держа́вный Твой Покро́в прибега́ющим./ Всех нас заступи́, о Госпоже́, Цари́це и Влады́чице,/ и́же в напа́стех и в ско́рбех и в боле́знех, обремене́нных грехи́ мно́гими,/ предстоя́щих и моля́щихся Тебе́ умиле́нною душе́ю/ и сокруше́нным се́рдцем/ пред пречи́стым Твои́м о́бразом со слеза́ми,/ и невозвра́тно наде́жду иму́щих на Тя,/ избавле́ния всех зол,/ всем поле́зная да́руй/ и вся спаси́, Богоро́дице Де́во:/ Ты бо еси Боже́ственный Покро́в рабо́м Твои́м.

Кондак, глас 8

Притеце́м, лю́дие, к ти́хому сему́ и до́брому приста́нищу,/ ско́рой Помо́щнице, гото́вому и те́плому спасе́нию, Покрову́ Де́вы,/ ускори́м на моли́тву и потщи́мся* на покая́ние:/ источа́ет бо нам неоску́дныя ми́лости Пречи́стая Богоро́дица,/ предваря́ет на по́мощь и избавля́ет от вели́ких бед и зол/ благонра́вныя и богобоя́щияся рабы́ Своя́.

Величание

Велича́ем Тя,/ Пресвята́я Де́во,/ и чтим о́браз Твой святы́й,/ от него́же истека́ет благода́тная по́мощь/ всем, с ве́рою притека́ющим к нему́.

Тропарь великомученику Прокопию, глас 4

Му́ченик Твой, Го́споди... (общий мученику).

Кондак, глас 2

Ре́вностию ко Христу́ Боже́ственною распаля́емь,/ и Креста́ кре́постию огражда́емь,/ враго́в шата́ние и де́рзость низложи́л еси́, Проко́пие,/ и честну́ю Це́рковь возвы́сил еси́,/ ве́рою преуспева́я и просвеща́я нас.

Величание

Велича́ем тя,/ страстоте́рпче святы́й Проко́пие,/ и чтим честна́я страда́ния твоя́,/ я́же за Христа́/ претерпе́л еси́.

Тропарь праведному Прокопию, Христа ради юродивому, Устюжскому чудотворцу, глас 4

Просвети́вся Боже́ственною благода́тию, Богому́дре,/ и весь ра́зум и се́рдце от су́етнаго ми́ра сего́ к Зижди́телю неукло́нно возложи́в,/ целому́дрием и мно́гим терпе́нием,/ во вре́менней жи́зни тече́ние до́бре сконча́л еси́,/ и ве́ру соблю́л еси́ непоро́чну./ Те́мже и по сме́рти яви́ся све́тлость жития́ твоего́:/ источа́еши бо чуде́с исто́чник неисчерпа́емый,/ ве́рою притека́ющим ко свято́му твоему́ гро́бу,/ Проко́пие всеблаже́нне,/ моли́ Христа́ Бо́га,/ да спасе́т ду́ши на́ша.

Ин тропарь, глас тойже

В терпе́нии твое́м от Бо́га мзду дарова́ний проро́чества/ прия́л еси́, блаже́нне,/ моли́твами, бде́нием и поще́нием/ те́ло свое́ изнури́в,/ ду́шу же возвы́сив на Небе́сная,/ Царя́ всех Христа́ Бо́га сла́вы зре́ти сподо́бися/ и неувяда́емым венце́м увязе́ся./ Ему́же с ли́ки святы́х предстоя́,/ за лю́ди своя́ моле́ние предлага́я,/ те́пле проли́я слез исто́чник,/ изба́вил еси́ град Вели́кий У́стюг и лю́ди своя́/ от тру́са* стра́шнаго, и огня́, и напра́сныя сме́рти./ Те́мже и мы, честне́й ра́це твое́й припа́дающе, вопие́м ти:/ о, Проко́пие чудоно́сче,/ хода́тай бу́ди и моли́твенник ко Го́споду/ о рабе́х твои́х и засту́пник гра́ду на́шему/ во дни наше́дших печа́лей/ и моли́ся ко Го́споду о спасе́нии душ на́ших.

Ин тропарь, глас тойже

От земли́ Воззва́вый тя к ве́чным оби́телем/ соблюда́ет и по сме́рти неврежде́нно те́ло твое́, свя́те,/ ты бо, в целому́дрии и чистоте́ житие́ пожи́в, блаже́нне,/ не оскверни́л еси́ пло́ти нетле́нием сме́ртным./ Те́мже тя любо́вию чти́м, Проко́пие.

Ин тропарь, глас 2

В терпе́нии твое́м, свя́тче Бо́жий,/ от Го́спода мзду восприя́л еси́/ и пожа́л еси́ ни́ву пи́щи ра́йския,/ безсо́нным бде́нием и юро́дством те́ло твое́ изнури́л еси́/ и му́дростию ду́шу твою́ спасл еси́,/ живота́ земна́го небре́гл еси́,/ но Небе́снаго Ца́рствия зре́ти возжеле́л еси́,/ и Небе́снаго Царя́ ви́дети сподо́бился еси́,/ и Тому́ поклони́лся еси́./ Мы же, недосто́йнии раби́ твои́, ко гро́бу твоему́ уми́льно припа́дающе/ и сокруше́нным се́рдцем взира́юще на о́браз ико́ны твоея́, си́це вопие́м:/ о Проко́пие чу́дный,/ хода́тай бу́ди и моли́твенник ко Го́споду о рабе́х твои́х/ и засту́пник гра́ду на́шему/ во дни наше́дших печа́лей/ и моли́ся ко Го́споду о спасе́нии душ на́ших.

Кондак, глас тойже

Христа́ ра́ди юро́дством/ возду́шная мыта́рства на рука́х а́нгельских неприкоснове́нно преше́д,/ ца́рскаго дости́гл еси́ престо́ла/ и от Царя́ всех Христа́ Бо́га дар прие́м, благода́ть исцеле́ний,/ мно́гими бо чудесы́ твои́ми и зна́мением стра́шным/ удиви́л еси́ град твой Вели́кий У́стюг:/ лю́дем твои́м ми́лость испроси́в,/ ми́ро от честна́го о́браза Пресвяты́я Богоро́дицы моли́твою изве́л еси́,/ и неду́жным по́дал еси́ цельбы́./ Те́мже мо́лим тя, чудоно́сче Проко́пие,/ моли́ Христа́ Бо́га непреста́нно пода́ти грехо́в на́ших проще́ние.

Ин кондак, глас тойже

Ве́рою па́мять твою́, блаже́нне, соверша́ющих/ и любо́вию пра́зднующих свято́е торжество́ твое́/ соблюда́й от вся́кия зло́бы и собла́зна змии́на,/ и́маши бо дерзнове́ние ко всех Влады́це,/ Его́же моли́ изба́витися от бед рабо́м твои́м, Богому́дре Проко́пие.

Величание

Ублажа́ем тя,/ святы́й пра́ведный Проко́пие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь праведному Прокопию Устьинскому, глас 1

Боже́ственною благода́тию просвети́вся,/ и по сме́рти да́руеши исцеле́ния/ притека́ющим к ра́це моще́й твои́х, прему́дре Проко́пие;/ те́мже и мы ны́не чтим честны́х моще́й твои́х явле́ние,/ веселя́ще вку́пе ду́ши и телеса́./ Тем вси вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцелеи́ия.

Кондак, глас 8

Ве́рою и любо́вию/ твое́ честно́е явле́ние пра́зднующих, блаже́нне,/ сохрани́ и соблюди́ от вся́кия зло́бы и собла́зна змии́на,/ и́маши бо дерзнове́ние ко Влады́це всех, Христу́ Бо́гу./ Его́же моли́ спасти́ правосла́вныя лю́ди,/ моля́щия тя, да вси вопие́м ти:/ ра́дуйся, о́тче Проко́пие,/ всея́ Росси́йския земли́ удобре́ние.

Величание

Велича́ем тя,/ святы́й пра́ведный Проко́пие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь знамению от иконы Божией Матери Благовещения, яже во граде Устюге, глас 4

Всепе́тая и Всесла́вная Цари́це Богоро́дице,/ Ма́ти всея́ тва́ри Соде́теля,/ христиа́нская Наде́ждо и Засту́пнице,/ печа́льным утеше́ние, ненаде́ющимся и отча́явшимся ско́рое наде́яние, мо́лим Тя:/ ми́лостива бу́ди нам, гре́шным,/ не оста́ви раб Твои́х/ и не отри́ни моле́ния недосто́йных./ Мо́лимтися, взира́юще ко о́бразу Твоему́ честно́му/ святы́я и чудотво́рныя ико́ны Твоея́/ и вопию́ще с пла́вающими и путь ше́ствующими,/ да пребу́дет ми́лость Твоя́./ О Влады́чице, ри́зою честно́ю защити́,/ и во вся́цех ме́стех злых соблюди́,/ и моли́ся к ро́ждшемуся из Тебе́ Христу́ Бо́гу на́шему,/ да спасе́т от грех ду́ши на́ша.

Тропарь Божией Матери ради иконы Ее, именуемой Тамбовская (Казанская), глас 4

Днесь све́тло красу́ется град Тамбо́в/ и святи́тель Христо́в Питири́м ра́дуется./ Сия́ет бо ны́не чудесы́ ико́на Твоя́, Влады́чице,/ ю́же из первопресто́льнаго гра́да Москвы́ святи́тель принесе́,/ и ди́вное лю́дем явля́ет Твое́ заступле́ние,/ подаю́щи исцеле́ние всем, с ве́рою к Тебе́ притека́ющим./ Тем уми́льно вопие́м Ти:/ спаса́й нас ико́ною Твое́ю,/ Де́во Всепе́тая.

Тропарь Божией Матери ради иконы Ее, именуемой Казанская-Пензенская, глас 4

Засту́пнице усе́рдная,/ Ма́ти Го́спода Вы́шняго,/ за всех мо́лиши Сы́на Твоего́, Христа́ Бо́га на́шего,/ и всем твори́ши спасти́ся,/ в держа́вный Твой покро́в прибега́ющим./ Всех нас заступи́, о Госпоже́, Цари́це и Влады́чице,/ и́же в напа́стех, и ско́рбех, и в боле́знех обремене́нных грехи́ мно́гими,/ предстоя́щих и моля́щихся Тебе́ умиле́нною душе́ю/ и сокруше́нным се́рдцем/ пред пречи́стым Твои́м о́бразом со слеза́ми/ и невозвра́тно наде́жду иму́щих на Тя,/ избавле́ния всех зол,/ всем поле́зная да́руй/ и вся спаси́, Богоро́дице Де́во:/ Ты бо еси́ Боже́ственный покро́в рабо́м Твои́м.

Кондак, глас 8

Притеце́м, лю́дие, к ти́хому сему́ и до́брому приста́нищу,/ ско́рой Помо́щнице, гото́вому и те́плому спасе́нию, покрову́ Де́вы,/ ускори́м на моли́тву и потщи́мся на покая́ние:/ источа́ет бо нам неоску́дныя ми́лости Пречи́стая Богоро́дица,/ предваря́ет на по́мощь и избавля́ет от вели́ких бед и зол/ благонра́вныя и богобоя́щияся рабы́ Своя́.

Величание

Велича́ем Тя,/ Пресвята́я Де́во,/ и чтим о́браз Твой святы́й,/ и́мже изба́вихомся/ от пога́ных наше́ствия.

Тропарь Божией Матери ради иконы Ее Казанская-Песчанская, глас 4

О Пречу́дная, Преблагослове́нная Ма́ти Христа́ Бо́га на́шего,/ све́том небе́сным от ико́ны Твоея́ лю́ди страны́ Росси́йския при́сно озаря́ющая,/ Ты бо еси́ преизоби́льная река́ Благода́ти Боже́ственныя./ Сего́ ра́ди к Сы́ну Твоему́ моли́твами от вся́ких нас бед защити́,/ покро́вом ми́лости Твоея́ огради́/ и в Го́рний Иерусали́м, Ца́рствие Небе́сное, возведи́.

Кондак, глас 8

Взбра́нной Воево́де и Покрови́тельнице страны́ Росси́йския,/ мно́гие чудеса́ от ико́ны Твоея́ преди́вныя прие́мше,/ похва́льная воспева́ем Ти, Цари́це Богоро́дице;/ Ты же я́ко иму́щая благода́ть от вся́ких нас бед свобожда́ти,/ спаси́ ду́ши на́ша,/ да зове́м Ти:/ ра́дуйся, Влады́чице ми́ра,/ ико́ною Твое́ю Песча́нскою сердца́ на́ша утеша́ющая.

Величание

Вели́чаем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь священномученику Панкратию, епископу Тавроменийскому, глас 8

Я́ко стрела́ огнезра́чная,/ от Верхо́внаго по́слан был еси́ Тавромени́йскому престо́лу/ уязвля́ти безбо́жных злоче́стие,/ ве́рных же сердца́ просвеща́ти,/ я́же боговеща́нными твои́ми словесы́ в ве́ре утверди́в/ и тече́ние соверши́в, пострада́л еси́ до кро́ве,/ священному́чениче Панкра́тие,/ моли́ за вся, пою́щия па́мять твою́.

Ин тропарь, глас 4

И нра́вом прича́стник... (общий священномученику).

Кондак, глас 4

Све́тлая Тавромени́ом, Панкра́тие, звезда́ пока́зался еси́/ и священнострада́лец яви́лся еси́ за Христа́:/ Ему́же ны́не предстоя́, моли́ за чту́щия тя, блаже́нне.

Величание

Велича́ем тя,/ священному́чениче Панкра́тие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Феодору, епископу Едесскому, глас 4

Апо́столом подража́тель/ и боже́ственных уче́ний столп бысть,/ тем ко Христу́ притече́,/ моле́нием, блаже́нне, Моа́вия царя́ све́том Креще́ния просвеще́на показа́, Фео́доре,/ и испове́дания ра́ди кровь свою́ излия́л есть,/ исхода́тайствен тому́ яви́ся вене́ц от Христа́ Царя́,/ Его́же моли́ спасти́ ду́ши на́ша.

Ин тропарь, глас тойже

Нево́лею па́ству святи́тельскую прии́м,/ но во́лею подви́гнувся о Бо́жии Це́ркви,/ и пе́рстню Христо́ва гро́ба неве́рнаго Моа́вия царя́ уве́рив,/ и с теле́сною слепото́ю вку́пе и душе́вную ему́ исцели́в, благове́рна показа́,/ с ни́мже и еретики́ от Бо́жия Це́ркве, я́ко во́лки, отгна́в,/ честны́й святи́телю Фео́доре,/ моли́ спасти́ся душа́м на́шим.

Кондак, глас 4

Я́ко со́лнце, осиява́я све́тлым житие́м, Фео́доре, я́ве,/ вавило́нскому царю́ яви́ся чудесы́/ и сего́ уго́дника Христу́, святи́телю, показа́,/ с ни́мже ны́не Тро́ице предстоя́,/ нас помина́й, све́тло торжеству́ющих па́мять твою́.

Ин кондак, глас тойже

Благохоте́ния ра́ди/ просвеще́ннаго тобо́ю по благода́ти ча́да, честна́го Моа́вия,/ животворя́щаго дре́ва получе́ния,/ подви́гнуся во ца́рствующий град,/ и та́мо Христо́вою пе́рстию до́блей цари́це Феодо́ре о́ка зре́ние очи́сти,/ и отту́ду с жела́емым сокро́вищем па́ки в Вавило́не честна́го Моа́вия по Христе́ на муче́ние утверди́,/ сего́ ра́ди ти вопие́м:/ ра́дуйся, честны́й Фео́доре,/ учениче́ Христо́в, пасту́ше до́брый.

Величание

Велича́ем тя,/ святи́телю о́тче Фео́доре,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Иоанну Пещернику, иже в страна́х Вавилонских, глас 2

Несумне́нно Христа́ иски́й,/ Христо́во бога́тство прия́ти наде́явся,/ зла́та грома́ду безнаде́жну сотво́рь,/ ско́ро прескочи́, я́ко я́же посреди́ Ла́заря и бога́таго про́пасть,/ и легко́ воспря́ну во авраа́мское не́дро,/ пусты́нный Иоа́нне, тезоимени́те благода́ти и прозра́чному го́луби,/ тем и от Бо́га прии́мый прозре́ния дар/ и честно́му Фео́дору епи́скопу изреки́й неви́денное писа́ние/ и благочести́ву царю́ Моа́вию му́ченический по́двиг./ Те́мже мо́лим тя, о́тче:/ умоли́ Христа́ за ны, чту́щия тя.

Кондак, глас тойже

Неявле́н бра́ту быв по взя́тии зла́та,/ но ничто́же утае́но ти бысть о житии́ его́/ от Бо́га да́нным ти прозре́ния да́ром,/ целому́дренный Иоа́нне,/ живя́ше бо не себе́, но Христу́,/ тем и я́ди своея́ сла́достию царя́ честна́го Моа́вия преудиви́./ Сего́ ра́ди зове́м ти:/ ра́дуйся, обреты́й наде́жду в небе́снем Христо́ве бога́тстве.

Величание

Ублажа́ем тя,/ преподо́бне о́тче Иоа́нне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Феодосию, столпнику Едесскому, брату преподобного Иоанна Пещерника, глас 3

Пре́жде запе́нся* бога́тственною се́тию, я́ко челове́к,/ но последи́ нището́ю нестяжа́ния посрами́л еси́ врага́/ и моли́твами твои́ми, честны́й Феодо́сие,/ прия́т от Бо́га прозре́ния дар./ Тем и честно́му епи́скопу Фео́дору прорече́ о Святе́й Це́ркви,/ е́же на враги́ одоле́ние,/ и ны́не моли́ся Христо́ви за чту́щих тя.

Кондак, глас тойже

Прему́дрости Бо́жия науче́нием/ недомы́слимо веща́ние столпа́ глаго́ля,/ от неразу́мных челове́к немы́слен мня́шеся*,/ но от Бо́га па́че прему́др проявля́шеся,/ ди́вный Феодо́сие,/ честна́го бо епи́скопа Фео́дора/ свои́ми словесы́ кре́пце вооружи́в, я́ко во́ина, на це́рковныя враги́,/ сего́ ра́ди от Бо́га на Небесе́х прии́м честны́х твои́х трудо́в воздая́ние.

Величание

Ублажа́ем тя,/ преподо́бне о́тче Феодо́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь мученику Михаилу, сновидцу, ученику и сроднику святителя Феодора, епископа Едесского, глас 5

От до́бляго наста́вника Фео́дора/ чистоту́ тве́рдо извы́че*,/ и от нече́стия цари́цы Сеи́ды/ целому́дрием по о́бразу Ио́сифа сохрани́ся,/ та́коже и нечести́ваго царя́ Адрамеле́ха/ прему́дрыми твои́ми глаго́лы пре́ния* и ласка́ния низложи́в,/ и по Христе́ муче́ния венце́м увязе́ся,/ Богому́дрый Михаи́ле,/ Его́же моли́ спасти́ ду́ши на́ша.

Кондак, глас тойже

В ю́ности цве́та свет небе́сный получи́л еси́,/ му́чениче Михаи́ле,/ наказа́нием честна́го твоего наста́вника Фео́дора,/ богода́нною же твое́ю си́лою/ в погребе́нии твое́м разсла́бленнаго стягну́л* еси́,/ те́мже хваля́ще твоя́ страда́ния,/ Бо́гу сла́ву возсыла́ем.

Величание

Велича́ем тя,/ страстоте́рпче святы́й Михаи́ле,/ и чтим честна́я страда́ния твоя́,/ я́же за Христа́/ претерпе́л еси́.

Тропарь мученику Иоанну, прежде Святого Крещения Моавию (Муавии), царю Персидскому (Багдадскому) и с ним трем отрокам мученикам, глас 6

И́же ко Христу́ ве́рою/ боле́знь теле́сную исцели́, с не́юже и душе́вную,/ наставля́емь от честна́го твоего́ учи́теля Фео́дора,/ сла́вный царю́ Моа́вие Иоа́нне,/ и, страда́ние по Христе́ ку́пно с ве́рными твои́ми треми́ о́троки сконча́в,/ яви́ся в царе́х му́ченик, в му́ченицех же ца́рь,/ по Христе́ тече́ние сконча́в, от свои́х раб во́лею пострада́,/ и, сугу́бу честь от Бо́га прии́м,/ Его́же моли́ ку́пно с треми́ ве́рными твои́ми о́троки/ спасти́ся душа́м на́шим.

Кондак, глас 2

Звезда́ све́тлая яви́лся еси́... (общий мученику).

Величание

Велича́ем тя,/ страстоте́рпче святы́й царю́ Моа́вие Иоа́нне с треми́ ве́рными твои́ми о́троки,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь священномученику Кириллу, епископу Гортинскому, глас 3

Гла́сом боже́ственным от темни́цы изведе́н,/ в Ри́ме бра́тию в боже́ственней ве́ре утверди́л еси́,/ и, от а́нгела глаго́лы прии́м о святи́тельстей па́стве,/ во страда́нии свое́м па́ки гла́су с Небесе́ сподо́бися,/ богоповеле́нный святи́телю и страда́льче Кири́лле,/ моли́ за ду́ши на́ша.

Кондак, глас тойже

Виде́в себе́ ра́ди темни́чныя две́ри отве́рсты в полу́нощи/ и и́долы сокруше́ны,/ и Горти́нскую па́ству святи́тельскую,/ от Бо́га повеле́нную, до́бре упа́с,/ и по Христе́ наде́ждно пострада́в,/ священному́чениче Кири́лле,/ моли́ся за чту́щия тя.

Величание

Велича́ем тя,/ священному́чениче Кири́лле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Положению Ризы Господа Иисуса Христа, глас 4

Днесь притеце́м, ве́рнии,/ к Боже́ственней и цельбоно́сней ри́зе Спаси́теля на́шего Бо́га,/ благоизво́лившаго сию́ пло́тию носи́ти,/ и на Кресте́ Святу́ю Свою́ Кровь излия́ти,/ е́юже искупи́ нас от рабо́ты вра́жия./ Тем благодаря́ще вопие́м Ему́:/ спаси́ оте́чество на́ше,/ и архиере́ев, и град, и вся лю́ди/ честно́ю Твое́ю ри́зою защити́/ и спаси́ ду́ши на́ша,/ я́ко Человеколю́бец.

Кондак, глас тойже

Одея́ние нетле́ния, спаси́тельнаго целе́ния/ всем челове́ком, Влады́ко, дарова́л еси/ Твое́ Боже́ственное сокро́вище, честну́ю ри́зу,/ я́же есть хито́н*,/ е́юже живоно́сную и святу́ю плоть вочелове́чения Твоего́ одея́ти благоволи́л еси́./ Сию́ жела́нием прие́млюще, све́тло пра́зднуем,/ стра́хом же и любо́вию, я́ко Благода́телю воспева́юще, зове́м Ти, Христе́:/ сохрани́ в мире оте́чество на́ше, и архиере́ев, и вся лю́ди,/ по вели́цей Твое́й ми́лости.

Величание

Велича́ем Тя,/ Живода́вче Христе́,/ и почита́ем вси Боже́ственныя ри́зы Твоея́ честно́е положе́ние.

Тропарь 45-ти мученикам, в Никополе Армянском пострадавшим, глас 1

Единоу́мне душе́ю свя́зани бы́вше,/ четы́редесять с пятьми́ страда́льцы святи́и,/ на врага́ ополчи́стеся,/ победи́телие же я́вльшеся,/ прия́сте венцы́ от Христа́ Бо́га/ и ве́чное муче́ний ва́ших воздая́ние,/ ты́я и нам улучи́ти моли́те,/ благоче́стно пе́сньми вас велича́ющим.

Ин тропарь, глас 4

Му́ченицы Твои́, Го́споди... (общий мученикам).

Кондак, глас 8

Христа́ ра́ди, му́ченицы, мно́гия му́ки подъя́сте*/ и многобо́жие низложи́сте все и́дольское,/ разруши́сте безбо́жие вся́кия пре́лести,/ Христо́вою си́лою сия́ попра́вше,/ нас всех ве́рно науча́ете вопи́ти я́ве: Аллилу́иа.

Величание

Велича́ем вас,/ страстоте́рпцы святи́и четыреде́сять с пятьми́ страда́льцы,/ в Нико́поле Армя́нском пострада́вший,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Антонию Печерскому, Киевскому, начальнику всех русских монахов, в Ближних пещерах почивающему, глас 4

От мирска́го мяте́жа изше́д,/ отверже́нием же ми́ра ева́нгельски Христу́ после́довал еси́,/ и равноа́нгельное житие́ пожи́в,/ в ти́хое приста́нище Святы́я Горы́ Афо́на дости́гл еси́./ Отону́дуже благослове́нием отце́в в го́ру Ки́ева прише́д,/ и та́мо трудолю́бно жизнь соверши́в,/ оте́чество свое́ просвети́л еси́,/ и мно́жеству мона́шествующих стезю́, веду́щую к Небе́сному Ца́рствию, показа́в,/ Христу́ сия́ приве́л еси́,/ Его́же моли́, Анто́ние преподо́бне,/ да спасе́т ду́ши на́ша.

Кондак, глас 8

Возложи́в себе́ Бо́гу, па́че всех возлю́бленному от ю́ности, преподо́бне,/ Тому́ от всея́ ду́ши любо́вию после́довал еси́,/ ми́ра же тле́нная нивочто́же вмени́в,/ в земли́ пеще́ру соде́лал еси́,/ и в ней до́бре проти́ву неви́димаго врага́ ко́зней подвиза́вся,/ я́ко светоза́рное со́лнце во вся концы́ земли́ возсия́л еси,/ отону́дуже веселя́ся преше́л еси́ к Небе́сным Черто́гом./ И ны́не со а́нгелы Влады́чню престо́лу предстоя́,/ помина́й нас, чту́щих па́мять твою́, да зове́м ти:/ ра́дуйся, Анто́ние, о́тче наш.

Ин кондак, глас тойже

В ми́ре я́ко а́нгел, о́тче, пожи́л еси́,/ в земли́ пеще́ру себе́ соде́лав,/ в не́йже до́бре подвиза́вся проти́ву неви́димаго врага́ ко́зней,/ и отту́ду, веселя́ся, преше́л еси́ к Небе́сным Черто́гом./ Помина́й нас, чту́щих па́мять твою́, да зове́м ти́:/ ра́дуйся, Анто́ние, о́тче наш.

Величание

Ублажа́ем тя,/ преподо́бне о́тче Анто́ние,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Силуану, схимнику Печерскому, в Дальних пещерах почивающему, глас 3

Мно́гаго ти ра́ди воздержа́ния и безме́рнаго поще́ния/ прие́мый свы́ше благода́ть чудотворе́ния/ и к Бо́гу ве́лие дерзнове́ние стяжа́вый,/ по́стником удобре́ние*, Силуа́не,/ Тому́ моли́ся,/ да пода́ст нам мир и ве́лию ми́лость.

Кондак, глас 8

В бде́нном и тре́звенном моле́нии/ и кре́пком всегда́шнем пребыва́я поще́нии,/ те́ло свое́ умерщвля́л еси́, Силуа́не преподо́бне,/ и мно́гих уче́нием твои́м, в та́яжде* доброде́тели наставля́я,/ приве́л еси́ Христо́ви,/ Ему́же в весе́лии днесь предстоя́,/ помина́й нас, чту́щих па́мять твою́.

Величание

Ублажа́ем тя,/ преподо́бне о́тче Силуа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее Коневская, глас 1

Возсия́ нам, я́ко со́лнце светоза́рное от восто́ка в велеле́пии*,/ Твоя́, Влады́чице, ико́на,/ озаря́ющи чуде́с сия́нием пресла́вно/ всех, непреста́нно приходя́щих к ней с ве́рою и любо́вию,/ и моля́щихся усе́рдно Твоему́ е́же о Сы́не Твое́м и Бо́зе вели́чию./ Сла́ва Бо́гу, Арсе́нием сию́ да́вшему нам,/ сла́ва Возврати́вшему ю́ от Нова́града,/ сла́ва Де́йствующему тою́ всем исцеления.

Кондак, глас 8

Препросла́вленная Вы́шняго Ма́ти созыва́ет к песнопе́нию нас/ Своего́ о́браза прише́ствием от Нова́града/ и возбужда́ет зре́нием того́ на по́двиг,/ побежда́ти сопроти́вных си́лу,/ и к Ней, я́ко на́шея ра́дости вино́вней, пе́ти:/ ра́дуйся, Неве́сто Неневе́стная.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь великомученице Евфимии всехвальной, глас 4

Агница Твоя́, Иису́се, Евфи́мия... (общий великомученице).

Ин тропарь, глас тойже

Жениха́ твоего́ Христа́ возлюби́вши,/ и свещу́ твою́ све́тлу угото́вльши,/ доброде́тельми возсия́вши, всехва́льная Евфи́мие,/ тем возшла́ еси́ с Ним на брак,/ вене́ц страда́ния от Него́ прие́мши,/ но от бед изба́ви нас,/ чту́щих ве́рою па́мять твою́.

Кондак, глас 6

По́двиги во страда́льчестве, по́двиги в ве́ре/ положи́ла еси́ те́пле за Христа́, Жениха́ твоего́,/ но и ны́не я́коже е́реси, и враго́в шата́ние/ под но́ги правосла́вных царе́й покори́ти моли́ Богоро́дицею,/ я́же от шестисо́т три́десяти Богоно́сных о́тец/ преде́л прие́мшая,/ и храня́щая, всехва́льная.

Ин кондак, глас 4

Во страда́нии свое́м до́бре подвиза́ся/ и по сме́рти нас освяща́вши чуде́с тече́нием, всехва́льная./ Тем твое́ успе́ние пое́м,/ ве́рою прибега́юще в Боже́ственную твою́ це́рковь,/ да изба́вимся неду́г душе́вных и чу́дес благода́ть почерпе́м.

Величание

Велича́ем тя,/ страстоте́рпице Христо́ва Евфи́мие,/ и чтим честно́е страда́ние твое́,/ е́же за Христа́/ претерпе́ла еси́.

Тропарь равноапостольной Ольге, великой княгине Российской, во Святом Крещении Елене, глас 1

Крила́ми богоразу́мия впери́вши твой ум,/ возлете́ла еси́ превы́ше ви́димыя тва́ри,/ взыска́вши Бо́га и Творца́ вся́ческих,/ и Того́ обре́тши, па́ки рожде́ние креще́нием прия́ла еси́,/ дре́ва живо́тнаго наслажда́ющися, нетле́нна во ве́ки пребыва́вши,/ О́льго присносла́вная.

Ин тропарь, глас 8

В тебе́, Богому́драя Еле́но, изве́стен спасе́ния о́браз бысть в Ру́сстей стране́,/ я́ко, прии́мши ба́ню Свята́го Креще́ния, после́довала еси́ Христу́,/ творя́щи же и уча́щи, е́же оста́вити и́дольскую пре́лесть,/ восприя́ти же попече́ние о души́, ве́щи безсме́ртней,/ те́мже и со а́нгелы ра́дуется, равноапо́стольная, дух твой.

Ин тропарь, глас 4

Оста́вивши лесть и́дольскую,/ после́довала еси́ Христу́, Безсме́ртному Жениху́, Ольго Богому́драя,/ в Его́же черто́зе ра́дующися,/ непреста́нно моли́ся/ о чту́щих ве́рою и любо́вию святу́ю па́мять твою́.

Ин тропарь, глас 3

Свята́я равноапо́стольная избра́ннице Христо́ва, княги́не Ольго,/ наро́д твой слове́сным и чи́стым Христо́вым мле́ком напои́вшая,/ моли́ся ми́лостивому Бо́гу,/ да прегреше́ний оставле́ние/ пода́ст душа́м на́шим.

Кондак, глас 4

Воспое́м днесь Благоде́теля всех Бо́га,/ просла́вльшаго в Росси́и Ольгу Богому́друю,/ да моли́твами ея́/ пода́ст душа́м на́шим/ грехо́в оставле́ние.

Ин кондак, глас тойже

Яви́ся днесь благода́ть всех Бо́га,/ просла́вльши в Руси́ Ольгу Богому́друю,/ моли́твами ея́, Го́споди,/ лю́дем пода́ждь/ грехо́в оставле́ние.

Величание

Велича́ем тя,/ блаже́нная и равноапо́стольная княги́не Ольго,/ и чтим святу́ю па́мять твою́,/ и́долы попра́вшую/ и мно́гия лю́ди росси́йския Святы́м Креще́нием просвети́вшую.

Ино величание

Велича́ем тя,/ свята́я равноапо́стольная княги́не Ольго,/ я́ко зарю́ у́треннюю в земли́ на́шей возсия́вшую/ и свет ве́ры Правосла́вныя/ наро́ду своему́ предвозвести́вшую.

Тропарь преподобному Аркадию, Вяземскому и Новоторжскому, глас 4

От духо́внаго наста́вника, о́тца преподо́бнаго Ефре́ма, наставля́емь,/ послуша́ния до́брый рачи́телю, о́тче Арка́дие,/ от мирска́го мяте́жа удали́лся еси́/ и, и́нок быв изря́дный,/ до́брым по́двигом ревнуя́й,/ от Христа́ Бо́га прия́л еси́ вене́ц сла́вы Небе́сныя;/ и ны́не вку́пе с преподо́бным отце́м Ефре́мом у Престо́ла Вы́шняго предстоя́,/ о нас моли́ся, изба́витися нам от всех бед и скорбе́й/ и спасти́ся душа́м на́шим.

Кондак, глас 2

К глубина́м Боже́ственнаго Ра́зума впери́в ум свой,/ в Небе́сныя оби́тели воете́кл еси́,/ и равноа́нгельно житие́, о́тче Арка́дие, на земли́ пожи́л еси́,/ и во всем повину́лся еси́ духо́вному своему́ настоя́телю и наста́внику, преподо́бному отцу́ Ефре́му,/ и ны́не, вку́пе предстоя́ще у Престо́ла Влады́ки Христа́,/ моли́ся непреста́нно о всех нас.

Величание

Ублажа́ем тя,/ преподо́бне о́тче Арка́дие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее, именуемой Рудненская, глас 4

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи:/ Тя бо и еди́ну наде́жду и́мамы.

Или сей тропарь, глас тойже

Не умолчи́м никогда́, Богоро́дице,/ си́лы Твоя́ глаго́лати, недосто́йнии:/ а́ще бо Ты не бы предстоя́ла моля́щи,/ кто бы нас изба́вил от толи́ких бед?/ Кто же бы сохрани́л до ны́не свобо́дны?/ Не отсту́пим, Влады́чице, от Тебе́:/ Твоя́ бо рабы́ спаса́вши при́сно от вся́ких лю́тых.

Кондак, глас 6

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице,/ Ты нам помози́:/ на Тебе́ наде́емся/ и Тобо́ю хва́лимся,/ Твои́ бо есмы́ раби́,/ да не постыди́мся.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь мученикам Проклу и Иларию, глас 4

Му́ченицы Твои́, Го́споди... (общий мученикам).

Кондак, глас тойже

Я́ко денни́ца звезда́ возсия́/ му́чеников Про́кла и Ила́рия честно́е страда́ние,/ предозаря́ющи нас чуде́с све́тлостьми./ Те́мже пра́зднуем па́мять ва́шу,/ Христа́ Бога моли́те, да спасе́т ду́ши на́ша.

Величание

Велича́ем вас,/ страстоте́рпцы святи́и Про́кло и Ила́рие,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Михаилу Малеину, глас 8

В тебе́, о́тче, изве́стно спасе́ся... (общий преподобному).

Ин тропарь, глас тойже

Крила́ми мы́сленными к Богове́дению возлете́в разу́мно,/ мяте́ж ми́ра оста́вил еси́, блаже́нне,/ презре́в пло́ти мудрова́ния,/ му́дрость Вы́шнюю взыска́л еси́, е́же жи́ти с Бо́гом,/ и всем о́браз дав собо́ю, глаго́ля:/ добро́ есть с Бо́гом жи́ти, Михаи́ле преподо́бне.

Кондак, глас 2

Пло́тскую тяготу́ утончи́л еси́ делы́,/ душе́вную же бы́стрость впери́л еси́ просвеще́нием, Михаи́ле,/ и яви́лся еси́ Тро́ице жили́ще,/ ю́же зря, блаже́нне, я́сно,/ моли́ непреста́нно о всех нас.

Величание

Ублажа́ем тя,/ преподо́бне о́тче Михаи́ле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Арсению Новгородскому, глас 1

Боже́ственною любо́вию возгоре́вся,/ вся мирска́я пристра́стия отри́нул еси́,/ крест же Христо́в на ра́мо взем,/ во след Его́ изво́лил еси́ ходи́ти:/ оте́чество твое́ оста́вив, Вели́каго Новагра́да дости́гл еси́,/ и рабо́тая Бо́гови невозвра́тным по́мыслом,/ дарова́ния чудотво́рений сподо́бился еси́./ Те́мже, чту́ще тя, преподо́бне Арсе́ние, вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеления.

Ин тропарь, глас 4

Оте́чество свое́ и род оста́вил еси́,/ Христу́ прилепи́ся,/ и Вели́каго Новагра́да дости́гл еси́,/ и в нем во юро́дстве трудолю́бное твое́ те́ло изнури́л еси́/ мно́гим посто́м и воздержа́нием,/ и проро́чествия дар прия́ти сподо́бися,/ и многошве́нныя* ри́зы изво́лил еси́ на себе́ носи́ти,/ и, те́ло в нем предложи́в,/ оби́тель себе́ в преми́рнем Ца́рствии у Христа́ всех Бо́га сотвори́л еси́./ Его́же моли́, свя́те Арсе́ние преподо́бне,/ Це́ркви и стране́ на́шей в ми́ре пребыва́ти от всех наве́т вра́жиих,/ уще́дрити нас, почита́ющих твое́ торжество́,/ и спасти́ ду́ши на́ша.

Кондак, глас тойже

Тяжелоно́сныя во́лны тиме́ния отгна́,/ и вся плотска́я двиза́ния/ и по́хоти паля́щия нивочто́же вмени́в,/ взем крест и по́йде в след Христа́,/ И́мже наставля́ем,/ лука́выя се́ти до конца́ раздра́/ и под нога́ми предложи́,/ мо́лимтися, преподо́бне о́тче Арсе́ние,/ изба́ви нас от належа́щих на ны собла́зн,/ ты бо еси Вели́кому Новугра́ду похвала́ и утвержде́ние/ и су́щим в печа́лех ра́дость.

Величание

Ублажа́ем тя,/ преподо́бне о́тче Арсе́ние,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь первомученикам Российским Феодору варягу и сыну его Иоанну, глас 2

Страстоте́рпцы Госпо́дни,/ Фео́доре со Иоа́нном о́троком, сла́внии!/ Блаже́нна земля́ Ру́сская, напи́вшаяся кровьми́ ва́шими,/ и ра́дуется оте́чество на́ше,/ в не́мже вы пе́рвии, и́долы посрами́вше,/ Христа́ со дерзнове́нием испове́даете и за Него́ пострада́ете./ Того́, я́ко Бла́га, моли́те,/ до сконча́ния ве́ка в стране́ на́шей Це́рковь Правосла́вную непоколеби́му утверди́ти/ и всех ру́сских люде́й во и́стинней ве́ре и благоче́стии сохрани́ти.

Кондак, глас 8

Свети́льницы све́тлии я́вльшеся,/ Боже́ственнии му́ченицы ... (общий мученикам).

Величание

Велича́ем вас,/ страстоте́рпцы святи́и, Фео́доре со Иоа́нном о́троком,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Симону Воломскому, глас 4

От ю́ности твоея́ впери́в ум твой к Бо́гу, блаже́нне Си́моне,/ ми́ра же отве́ргся, всели́лся еси́ в пусты́ню непроходи́мую,/ и та́мо, от Го́спода укрепля́емь,/ в моли́твах и поще́ниих до́блественне пожи́л еси́,/ и жизнь твою́ страда́льчески убие́нием от сыно́в противле́ния сконча́л еси́./ Сего́ ра́ди со преподо́бными и му́ченики венча́лся еси́,/ с ни́миже и ны́не предстои́ши престо́лу Пресвяты́я Тро́ицы,/ Сию́ моли́, мо́лим тя, оставле́ние пода́ти согреше́ний на́ших/ и дарова́ти нам ве́лию ми́лость.

Кондак, глас 8

Возложи́в себе́ Бо́гу, па́че всех возлю́бленному,/ от ю́ности, преподобному́чениче, Тому́ от всея́ души́ любо́вию после́довал еси́,/ ми́ра же тле́нная нивочто́же вмени́в,/ и в непроходи́мую пусты́ню всели́лся еси́,/ и в ней до́бре проти́ву неви́димаго врага́ подвиза́вся,/ и, я́ко светоза́рное со́лнце, во вся концы́ возсия́л еси́,/ и от челове́ков ненави́стных ну́ждную смерть и ме́чное посече́ние,/ и ножи́ разбоде́ние*, и о́гненное опале́ние прия́л еси́,/ и, ра́дуяся, прише́л еси́ к Небе́сным Черто́гом./ И ны́не со безпло́тными ли́ки Влады́чнему престо́лу предстоя́,/ помина́й нас, чту́щих па́мять твою́, да зове́м ти:/ ра́дуйся, Си́моне преподо́бне, пусты́нный жи́телю.

Величание

Ублажа́ем тя,/ преподобному́чениче Си́моне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее «Троеручица», глас 4

Дне́сь всеми́рная ра́дость возсия́ нам ве́лия,/ дарова́ся святе́й горе́ Афо́нстей/ цельбоно́сная Твоя́, Влады́чице Богоро́дице, ико́на,/ со изображе́нием тричи́сленно и неразде́льно Пречи́стых рук Твои́х,/ в прославле́ние Святы́я Тро́ицы:/ созыва́еши бо ве́рных и моля́щихся Тебе́ о сем позна́ти,/ я́ко двема́ Сы́на и Го́спода де́ржиши,/ тре́тию же я́ви на прибе́жище и покро́в чту́щим Тя/ от вся́ких напа́стей и бед избавля́ти,/ да вси, притека́ющии к Тебе́ ве́рою, прие́млют от всех зол свобожде́ние,/ от враго́в защище́ние./ Сего́ ра́ди и мы вку́пе со Афо́ном вопие́м:/ ра́дуйся, Благода́тная, Госпо́дь с Тобо́ю.

Тропарь на молебне, глас 4

Днесь све́тло красу́ется сла́внейший град Москва́,/ имею́щи в себе́, о Всеми́лостивейшая, всея́ тва́ри Честне́йшая,/ Засту́пнице на́ша Де́во Богоро́дице,/ честны́й о́браз Твой,/ и́мже подсо́лнечныя концы́ земли́ удивля́вши/ и мир ми́рови да́руеши;/ во о́браз бо Святы́я Тро́ицы явля́еши трие́ ру́це:/ двема́ у́бо Сы́на Своего́, Христа́ Бо́га на́шего, но́сиши,/ тре́тиею от напа́стей и бед/ ве́рно к Тебе́ прибега́ющих избавля́еши/ и от потопле́ния изыма́еши,/ и всем поле́зная да́руеши,/ и преподо́бному Михаи́лу Малео́нскую го́ру показа́,/ и всех всегда́ ми́луеши;/ честно́ю ри́зою Свое́ю покрыва́еши жи́тельство сие́/ и вся гра́ды и страны́ на́ша, да зове́м Ти:/ ра́дуйся, Обра́дованная.

Ин тропарь, глас тойже

Я́ко звезда́ светозаря́ющая,/ из Се́рбии на Афо́н чуде́сно прии́де/ всечестна́я ико́на Твоя́ Троеру́чица,/ ю́же оби́тель Хиланда́рская благогове́йно восприе́мши,/ я́ко Боже́ственный дар свы́ше,/ прославля́ет Тя, Влады́чицу,/ и уми́льно вопие́т:/ не оста́ви ми́лость Твою́ от нас,/ но пребу́ди с на́ми во ве́ки.

Кондак, глас 8

Днесь весе́лое наста́ ны́не Твое́ торжество́,/ Богома́ти Пречи́стая,/ вси ве́рнии испо́лнишася ра́дости и весе́лия,/ я́ко сподо́бльшеся изря́дно воспе́та/ преди́вное явле́ние честна́го о́браза Твоего́/ и Ро́ждшагося из Тебе́ Младе́нца, и́стинна же Бо́га,/ Его́же двема́ рука́ма объе́млеши/ и тре́тиею от напа́стей и бед нас изыма́еши/ и избавля́еши от всех зол и обстоя́ний.

Ин кондак, глас 3

Де́ва днесь благоволе́ние к нам явля́ет,/ гора́ же Афо́н благодаре́ние Ей прино́сит,/ а́нгели и и́ноцы славосло́вят,/ Троеру́чица из Се́рбии чуде́сно путеше́ствует:/ нас бо ра́ди прии́де/ и всели́ся во святу́ю оби́тель Хиланда́рскую.

Кондак на молебне, глас 8

Взбра́нной Воево́де победи́тельная,/ я́ко изба́вльшеся от злых,/ благода́рственная воспису́ем Ти, раби́ Твои́, Богоро́дице,/ но, я́ко иму́щая держа́ву непобеди́мую,/ от вся́ких нас бед свободи́, да зове́м Ти:/ ра́дуйся, Неве́сто Неневе́стная.

Величание

Велича́ем Тя,/ Пренепоро́чная Де́во,/ и чтим чудеса́ о́браза свята́го Твоего́,/ трех пречи́стых рук Твои́х явле́ние/ в сла́ву Божества́, в Тро́ице Бо́га на́шего.

Ино величание

Велича́ем Тя,/ Пресвята́я Де́во,/ и чтим тричи́сленное изображе́ние пречи́стых рук Твои́х,/ Ты бо двема́ Сы́на и Го́спода де́ржиши,/ тре́тиею от напа́стей и бед нас избавля́еши.

Тропарь Божией Матери ради иконы Ее, именуемой «Самонаписавшаяся», глас 1

Чудотво́рней Твое́й ико́не, Богоро́дице Де́во,/ всеблагогове́йно покланя́емся и лобыза́ем ю,/ подае́ши бо то́ю исцеле́ния,/ здра́вие же и кре́пость душа́м и телесе́м вои́стинну./ Те́мже любо́вию Тебе́ взыва́ем:/ сла́ва промышле́нию Твоему́ о нас, Чи́стая,/ сла́ва милосе́рдию Твоему́ к ве́рным,/ сла́ва Тебе́, самоизобрази́вшейся, Всеблага́я Влады́чице.

Кондак, глас 8

Богома́тери воспои́м боже́ственне,/ припа́дающе Боже́ственному о́бразу Ея́,/ пресла́вно бо на том самонаписа́ся,/ и источа́ет чуде́с струи́ с ве́рою притека́ющим,/ и избавля́ет от зол зову́щих Ей:/ ра́дуйся, Неве́сто Неневе́стная.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь Архангелу Гавриилу, глас 4

Небе́сных во́инств Архистрати́же,/ мо́лим тя при́сно мы недосто́йнии,/ да твои́ми моли́твами огради́ши нас/ кро́вом крил невеще́ственныя твоея́ сла́вы,/ сохраня́я нас припа́дающих приле́жно и вопию́щих:/ от бед изба́ви нас,/ я́ко чинонача́льник Вы́шних сил.

Кондак, глас 2

На Небесе́х зря Бо́жию сла́ву и на земли́ с высоты́ подая́ благода́ть,/ нача́льниче а́нгелов, му́дре Гаврии́ле, Бо́жия сла́вы служи́телю/ и ми́ра Боже́ственный побо́рниче,/ спаса́й, соблюда́й вопию́щия ти:/ сам бу́ди помо́щник, и никто́же на ны.

Ин кондак, глас тойже

Архистрати́же Бо́жий, служи́телю Боже́ственныя сла́вы,/ а́нгелов нача́льниче и челове́ков наста́вниче,/ поле́зное нам проси́ и ве́лию ми́лость,/ я́ко безпло́тных Архистрати́г.

Тропарь преподобным отцам обители Хиландарской, на Святой Горе Афонской просиявших, глас 4

Отцы́ на́ши Богоблаже́ннии,/ Афо́нстии подви́жницы,/ Хиланда́рстии свети́льницы,/ непоколеби́мии столпи́ Правосла́вия,/ и́стиннии наста́вницы ева́нгельских преда́ний,/ Влады́ку всех, Христа́, моли́те/ мир вселе́нней дарова́ти/ и душа́м на́шим ве́лию ми́лость.

Кондак, глас тойже

Благоче́стно на земли́ пожи́сте,/ ева́нгельския и́стины на Афо́не напои́вшеся,/ кре́постию Ду́ха Свята́го просия́ете/ и ны́не на Небесе́х весели́теся,/те́мже мо́лим вас мы, недосто́йнии:/ моли́твами ва́шими святы́ми/ изба́вите нас от всех бед и печа́ли.

Величание

Велича́ем вас,/ святи́телие Христо́вы,/ и чтим всечестны́й собо́р ваш,/ вы бо мо́лите за нас/ Христа́ Бо́га на́шего.

Тропарь апостолу Акиле, глас 3

Апо́столе святы́й Аки́ло,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Кондак, глас 4

Я́ко ве́лие со́лнце Це́рковь тя стяжа́вши, сла́вне Аки́ло,/ све́тлостьми уче́ния твоего́ просвеща́ет ве́рно/ чту́щия тя,/ Госпо́день апо́столе.

Величание

Велича́ем тя,/ апо́столе Христо́в Аки́ло,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Тропарь преподобному Стефану Махрищскому, глас 8

Правосла́вия ревни́телю,/ благоче́стия наста́вниче и чистоты́,/ и́щущим спасе́ния путеводи́тельный свети́льниче,/ мона́шествующих богодухнове́нное удобре́ние,/ преподо́бнаго Се́ргия духо́вный собесе́дниче,/ Стефа́не прему́дре,/ уче́ньми и добродея́ньми твои́ми ду́ши просвети́л еси́/ и пусты́ни насели́л еси́./ Моли́ Христа́ Бо́га спасти́ся душа́м на́шим.

Кондак, глас тойже

Чистото́ю душе́вною Боже́ственно вооружи́вся,/ блаже́нную жизнь соверши́л еси́,/ в пусты́ню, я́ко во град, всели́вся,/ благода́ть прия́л еси́ от Бо́га/ исцеля́ти неду́ги приходя́щим к честне́й твое́й ра́це,/ и всех возвыша́ти к Боже́ственней высоте́./ Те́мже имея́ дерзнове́ние ко Святе́й Тро́ице,/ помина́й нас, чту́щих святу́ю па́мять твою́, да зове́м ти:/ ра́дуйся, преподо́бне Стефа́не, по́стников удобре́ние.

Величание

Ублажа́ем тя,/ преподо́бне о́тче Стефа́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь благоверному князю Владимиру и благоверной княгине Агриппине, Ржевским чудотворцам, глас 8

Я́ко благочести́ваго ко́рене пречестна́я о́трасль был еси́,/ до́бре во благоче́стии пожи́в, блаже́нне Влади́мире,/ та́ко и с супру́жницею твое́ю, пре́хва́льною Агриппи́ною,/ в ми́ре Бо́гу угоди́вше, и преподо́бных житию́ сподо́бистеся./ С ни́миже моли́теся Го́сподеви/ сохрани́ти без вреда́ оте́чество ва́ше,/ да вас непреста́нно почита́ем.

Кондак, глас тойже

Ми́ра сего́ княже́ние и сла́ву вре́менну помышля́я,/ сего́ ра́ди благоче́стно в ми́ре пожи́л еси́, Влади́мире,/ ку́пно и с супру́жницею твое́ю, прему́дрою Агриппи́ною,/ ми́лостынею и моли́твами Бо́гу угоди́вше./ Те́мже, и по сме́рти неразлу́чно во гро́бе лежа́ще,/ исцеле́ние неви́димо подава́ете,/ и ны́не Христу́ моли́теся/ сохрани́ти град же и лю́ди, и́же вас сла́вящих.

Величание

Ублажа́ем вас,/ святи́и чудотво́рцы Влади́мире и Агриппи́но,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь мученикам Кирику и Иулитте, глас 4

Му́ченицы Твои́, Го́споди... (общий мученикам).

Ин тропарь, глас 8

Яко лоза́ благопло́дная, Иули́тто честна́я,/ грозд зрел принесла́ еси́ Царе́ви, всех Бо́гу,/ сы́на твоего́ Ки́рика сла́внаго,/ муче́нием того́ бога́тно украси́вши/ и твое́ю кро́вию наверши́вши³⁰,/ тем и дарова́ тебе́ Вы́шний возме́здие в Вы́шних,/ иде́же лику́юще, помяни́те нас, му́ченицы терпеливоду́шнии.

Кондак, глас тойже

Во объя́тиях нося́щи христому́ченица Иули́тта Ки́рика,/ на по́двизе му́жески веселя́щися взыва́ше:/ Христо́с есть му́чеников Похвала́.

Ин кондак, глас 2

Же́ртва прия́тна, Бо́гови приноси́ма,/ и свиде́тель ве́рен Христо́в явля́емь,/ с ма́терию пострада́л еси́ Иули́ттою, Ки́риче сла́вне,/ с не́юже Христа́ Бо́га моли́ти не преста́й о всех нас.

Величание

Велича́ем вас,/ страстоте́рпцы святи́и Ки́риче и Иули́тто,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь равноапостольному великому князю Владимиру, во Святом Крещении Василию, Крестителю Руси, глас 4

Уподо́бился еси́ купцу́, и́щущему до́браго би́сера,/ славнодержа́вный Влади́мире,/ на высоте́ стола́ седя́³¹ ма́тере гра́дов, богоспаса́емаго Ки́ева,/ испыту́я же и посыла́я к Ца́рскому гра́ду уве́дети Правосла́вную ве́ру,/ обре́л еси́ безце́нный би́сер Христа́,/ избра́вшаго тя, я́ко втора́го Па́вла,/ и оттря́сшаго слепоту́ во святе́й купе́ли/ душе́вную, вку́пе и теле́сную./ Те́мже пра́зднуем твое́ успе́ние,/ лю́дие твои́ су́ще:/ моли́ спасти́ся держа́вы твоея́ Росси́йския нача́льником и мно́жеству владо́мых.

Ин тропарь, глас 1

Я́ко нача́льнику Креще́ния/ и ко́реню ве́ры Боже́ственныя,/ и́долов разруши́телю,/ блаже́нне кня́же Васи́лие равноапо́стольне, вопие́м ти:/ сла́ва Вразу́мльшему тя Христу́ Бо́гу,/ сла́ва Освяти́вшему тя Креще́нием Свои́м,/ сла́ва Просвети́вшему тобо́ю всю страну́ Ру́сскую.

Ин тропарь, глас 8

Правове́рия наста́вниче/ и всея́ Руси́ просвети́телю,/ благочести́вый вели́кий кня́же Влади́мире,/ Святы́м Креще́нием всех просвети́л еси́/ и це́ркви мно́ги сла́вны украси́л еси́,/ о прему́дре Васи́лие,/ Христа́ Бо́га моли́ спасти́ся душа́м на́шим.

Кондак, глас тойже

Подо́бствовав вели́кому апо́столу Па́влу в седи́нах³², всесла́вне Влади́мире,/ вся я́ко младе́нческая мудрова́ния, я́же о и́долех тща́ния, оста́вль,/ я́ко муж соверше́нный украси́лся еси́ Боже́ственнаго Креще́ния багряни́цею./ И ны́не, Спа́су Христу́ в весе́лии предстоя́,/ моли́ спасти́ся держа́вы Росси́йския нача́льником и мно́жеству владо́мых.

Ин кондак, глас тойже

Изря́дному воево́де и правове́рному,/ благода́рственная воспису́ет ти вся Русь, Васи́лие, иму́щи тя нача́льника и засту́пника,/ я́ко изба́вил еси́ нас от вся́кия скве́рны и ле́сти, те́мже ти вопие́м:/ ра́дуйся, вели́кий кня́же Влади́мире преблаже́нне.

Ин кондак, глас 4

Оте́ческу пре́лесть, и́долы, я́ко су́етни, отве́рг,/ Христа́, всех и́стиннаго Бо́га, Царя́ и Благоде́теля, позна́л еси́./ Те́мже и лю́ди, изря́дны* Тому́, Святы́м Креще́нием просвети́л еси́,/ пресла́вне Влади́мире./ Сего́ ра́ди почита́ем тя,/ я́ко Тро́ице служи́теля,/ Христа́ моли́ дарова́ти нам ве́лию ми́лость.

Величание

Велича́ем тя,/ святы́й равноапо́стольный вели́кий кня́же Влади́мире,/ и чтим святу́ю па́мять твою́,/ и́долы попра́вшаго и всю Росси́йскую зе́млю Святы́м Креще́нием просвети́вшаго.

Тропарь священномученику Афиногену епископу и десяти ученикам его, глас 8

Свяще́нный Бо́гу Афиноге́н, в же́ртве служи́тель,/ свяще́нное учени́к свои́х принесе́ Христу́ заколе́ние,/ па́стырь со слове́сными о́вцами и́де в Небе́сную огра́ду,/ победи́в свере́пеющия неве́рием язы́ки./ Му́ченик Твои́х моли́твами, Христе́ Бо́же,/ спаси́ ста́до Твое́ от волко́в, губя́щих е́.

Кондак, глас 4

Влады́чню рече́нию после́довав, я́ко па́стырь изря́дный,/ ду́шу твою́ положи́л еси́ за Христо́вы о́вцы, священному́чениче Афиноге́не./ Сего́ ра́ди восхваля́ем тя/ и с тобо́ю десяти́цу учени́к твои́х,/ и́же пострада́ша, стра́хом Бо́жиим и твои́м уче́нием наставля́еми./ Тем угоди́вших Влады́ка венча́ вас живонача́льною десни́цею,/ Его́же о всех нас моли́те.

Величание

Велича́ем тя,/ священному́чениче Афиноге́не со десяти́цею учени́к твои́х,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь святым отцам шести Вселенских соборов, глас 8

Препросла́влен еси́, Христе́ Бо́же наш,/ свети́ла на земли́ отцы́ на́ша основа́вый,/ и те́ми ко и́стинней ве́ре вся ны наста́вивый,/ Многоблагоутро́бне, сла́ва Тебе́.

Кондак, глас тойже

Апо́стол пропове́дание и оте́ц догма́ты,/ Це́ркве еди́ну ве́ру запечатле́ша,/ я́же и ри́зу нося́щи и́стины, истка́нну от е́же свы́ше Богосло́вия,/ исправля́ет и сла́вит благоче́стия вели́кое та́инство.

Тропарь Собору Российских чудотворцев, прославленных святителем Макарием, митрополитом Московским и всея Руси, глас 3

Пречестна́я версто́, Бо́гом возлю́бленная,/ отцы́ преблаже́ннии, правосла́вию наста́вницы,/ в Небе́сныя оби́тели, я́ко на колесни́це, доброде́тельми взыдо́сте,/ те́плии засту́пницы Ру́сския земли́/ и всем ве́рным стено́ и утвержде́ние,/ Христу́ моли́теся/ дарова́ти нам ве́лию ми́лость.

Кондак, глас 8

Я́ко благоче́стия пропове́дники/ и нече́стия обузда́тели, Го́споди,/ Богоно́сных собо́р уясни́л еси́,/ Ру́сскую зе́млю озаря́я тех моли́твами, в ми́ре соверше́ние./ И Тебе́ сла́вящия и велича́ющия сохрани́,/ пою́щия Ти: аллилу́йя.

Величание

Велича́ем вас,/ святи́и вси ру́сстии чудотво́рцы,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь блаженной Матроне Анемнясевской, Касимовской, глас 8

Я́ко зарни́ца небе́снаго огня́/ возсия́ в ряза́нстей стране́ блаже́нная ста́рица Матро́на,/ ея́же па́мять днесь творя́ще,/ воспои́м Христа́ Бо́га,/ моля́ще Его́ дарова́ти нам то́я предста́тельством/ в боле́знех, бе́дах и ско́рбех терпе́ние,/ и душа́м на́шим ве́лию ми́лость.

Кондак, глас тойже

В не́мощех си́лу, в слепоте́ о́чи нетле́нныя обрела́ еси́,/ пребыва́ющи на о́дре боле́зни,/ всю́ду я́ко пти́ца ду́хом носи́лася еси́,/ младе́нствующи те́лом, была́ еси́ ма́ти скорбя́щим и обурева́емым./ Те́мже чту́щих твою́ па́мять не оста́ви в моли́твах,/ и помози́ нам изба́витися от грехо́в покая́нием,/ и улучи́ти с тобо́ю Ца́рство Небе́сное.

Величание

Ублажа́ем тя,/ свята́я пра́ведная ста́рице Матро́но,/ и чтим святу́ю па́мять твою́;/ ты бо мо́лиши за нас/ Христа́ Бо́га наше́го.

Тропарь Божией Матери ради иконы Ее, именуемой Чирская (Псковская), глас 4

Я́ко необори́мую сте́ну и исто́чник чуде́с,/ стяжа́вше Тя, раби́ Твои́,/ Богоро́дице Пречи́стая,/ сопроти́вных ополче́ния низлага́ем./ Те́мже мо́лим Тя:/ мир гра́ду Твоему́ да́руй/ и душа́м на́шим ве́лию ми́лость.

Кондак, глас тойже

Честна́го о́браза Твоего́ зна́мение пра́зднующе,/ лю́дие Твои́, Богороди́тельнице,/ и́мже ди́вную побе́ду на сопроти́вныя гра́ду Твоему́ дарова́ла еси́,/ те́мже Тебе́ ве́рою взыва́ем:/ ра́дуйся, Де́во, христиа́н похвало́.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь великомученице Марине (Маргарите), глас 4

Агница Твоя́, Иису́се... (общий мученице).

Кондак, глас 3

Де́вства добро́тами преиспещре́на*, де́во,/ нетле́нными венцы́ венча́лася еси́, Мари́но,/ кровьми́ же му́ченичества обагре́на,/ чудесы́ просвети́вшися³³ исцеле́ний,/ благоче́стно, му́ченице, прия́ла еси́ по́честь побе́ды твоего́ страда́ния.

Ин кондак, глас тойже

Мари́на днесь вра́жию главу́ сокруша́ет,/ побе́ды вене́ц с Небесе́ прие́мши./ Его́же бо проро́цы удержа́ти не возмого́ша,/ того́ она́, связа́вши, уязви́./ Сего́ ра́ди показа́ся му́чеником украше́ние, вку́пе же и похвала́.

Величание

Велича́ем тя,/ страстоте́рпице Христо́ва Мари́но,/ и чтим честно́е страда́ние твое́,/ е́же за Христа́/ претерпе́ла еси́.

Тропарь преподобному Иринарху Соловецкому, глас 4

По́стническое по Бо́зе житие́ возлюби́в,/ вся плотска́я мудрова́ния ду́ху покори́л еси́/ и воздержа́нием стра́сти умертви́л еси́,/ во труде́х и бде́ниих и моли́твах о́браз быв доброде́тели,/ тем мона́шескаго жития́ наста́вник показа́лся еси́,/ о́тче преподо́бне Ирина́рше./ Моли́ Христа́ Бо́га спасти́ся душа́м на́шим.

Ин тропарь, глас 8

Бо́дростию ума́ жизнь твою́ управля́я,/ прилежа́нием Бо́га взыску́я,/ отону́дуже и ста́ду мона́хов предста́тель показа́лся еси́,/ и, благода́ть прие́м цели́ти ду́ши и телеса́/ приходя́щим с ве́рою к честно́му гро́бу твоему́,/ Ирина́рше, о́тче наш,/ моли́ Христа́ Бо́га спасти́ся душа́м на́шим.

Кондак, глас тойже

Чистото́ю душе́вною Боже́ственныя благода́ти да́ры стяжа́в,/ блаже́нную жизнь соверши́л еси́,/ и путь ко спасе́нию всем показа́л еси́,/ и Богому́дрый нача́льник мона́хов яви́лся еси́./ Те́мже име́я дерзнове́ние ко Святе́й Тро́ице,/ помина́й нас, чту́щих па́мять твою́, да зове́м ти:/ ра́дуйся, преподо́бне Ирина́рше, мона́шествующих похвало́.

Величание

Ублажа́ем тя,/ преподо́бне о́тче Ирина́рше,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Леониду Устьнедумскому, глас 1

Боже́ственною любо́вию и житие́м духо́вным/ от ю́ности распали́вся, преподо́бне,/ и вся, я́же в ми́ре кра́сная, возненави́дев,/ Христа́ еди́наго от души́ возлюби́л еси́, о́тче,/ ле́гкое и́го на ра́мо взем,/ Боже́ственным Про́мыслом и Пречи́стыя Богоро́дицы чу́дным явле́нием направля́ем,/ дости́же пусты́ни/ и в ней многоле́тне подвиза́лся еси́/ в труде́х мно́гих и слеза́х,/ вся́ким злострада́нием плоть свою́ изнуря́я./ Отону́дуже Бог, твоя́ труды́ ви́дев,/ умно́жи тебе́ ча́да в пусты́ни,/ но я́ко име́я дерзнове́ние к Бо́гу,/ моли́ о нас, рабе́х твои́х, о́тче преподо́бне Леони́де,/ да изба́вит нас от всех наве́т вра́жиих/ и спасе́т ду́ши на́ша.

Кондак, глас 8

Все свое́ у́мное жела́ние к Бо́гу впери́в/ и Тому́ невозвра́тно от души́ после́довав,/ в пусты́ню всели́лся и в ней мно́гия труды́ в Бо́зе показа́л еси́./ В непрохо́днех месте́х исто́чники во́дныя ископа́л еси́/ и умертви́л еси́ по́двиги твои́ми теле́сная мудрова́ния,/ мно́гим путь был еси́ ко спасе́нию./ Те́мже мо́лим тя:/ спаси́ нас и я́же собра́, му́дре, да зове́м ти:/ ра́дуйся, Леони́де преподо́бне, пусты́нный жи́телю.

Величание

Ублажа́ем тя,/ преподо́бне о́тче Леони́де,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Лазарю Галисийскому, глас 8

Еде́нными моли́твами,/ тече́ньми сле́зными столп омочи́л еси́,/ и из глубины́ воздыха́ньми/ во сто трудо́в уплодоноси́л еси́,/ и был еси́ па́стырь, всем подая́ проще́ние,/ преподо́бне о́тче наш Ла́заре:/ моли́ся Христу́ Бо́гу спасти́ся душа́м на́шим.

Кондак, глас 4

Я́ко свети́льника превели́каго/ Це́рковь Христо́ва сла́вит тя с весе́лием псало́мски./ Те́мже не преста́й моля́ся Христу́/ да́та всем прегреше́ний проще́ние.

Ублажа́ем тя,/ преподо́бне о́тче Ла́заре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь мученику Емилиану, глас 4

Му́ченик Твой, Го́споди... (общий мученику).

Кондак, глас 3

Боже́ственною ре́вностию распаля́емь,/ огня́ сослужа́щаго не устраши́лся еси́,/ но возше́д небоя́зненно во́лею,/ возгнеща́ющим* огне́м всесожже́гся,/ и Влады́це, я́ко же́ртва, прине́слся еси́,/ му́чениче сла́вне Емилиа́не,/ Христа́ Бо́га моли́/ дарова́ти нам ве́лию ми́лость.

Величание

Велича́ем тя,/ страстоте́рпче святы́й Емилиа́не,/ и чтим честна́я страда́ния твоя́,/ я́же за Христа́/ претерпе́л еси́.

Тропарь преподобному Иоанну Многострадальному, Печерскому, в Ближних пещерах почивающему, глас 1

Терпе́ния столп вои́стинну непоколеби́мый,/ и забра́ло* от вра́жиих стреля́ний необори́мо,/ равноа́нгельне и многострада́льне о́тче наш Иоа́нне,/ иму́ще тя, мы, недосто́йнии, мо́лимся,/ припа́дающе к честны́м твои́м моще́м те́пле:/ изба́ви нас душетле́нных страсте́й плотски́х и спаси́ твои́ми моли́твами.

Кондак, глас 2

Столп целому́дрия, вра́жиими боре́ньми непобеди́м сый,/ а́ки столп, многострада́льное водруже́нно³⁴ оста́вил еси́ нам те́ло твое́,/ всече́стне Иоа́нне,/ ему́же в не́мощех душе́вных и теле́сных покланя́ющеся,/ мо́лим тя, преподо́бне:/ моли́ Христа́ Бо́га непреста́нно о всех нас.

Величание

Ублажа́ем тя,/ преподо́бне о́тче Иоа́нне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Памве, затворнику Печерскому, в Дальних пещерах почивающему, глас 1

Неле́ностным послуша́нием/ и отверже́нием во́ли своея́/ кре́пко себе́ обузда́в,/ вда́лся еси́ за Христа́ Бо́га на му́ки и ра́ны,/ от Него́же сугу́бо, всече́стне о́тче Па́мво, венча́вся,/ моли́ся о душа́х на́ших.

Кондак, глас 2

Послуша́ние и́ноческое кро́вию муче́ния обагри́ша,/ ублажа́ем тя, любе́зне,/ преподобному́чениче Па́мво,/ и, покланя́ющеся честны́м моще́м, ве́рно мо́лим:/ моли́ся Го́сподеви непреста́нно о всех нас.

Величание

Ублажа́ем тя,/ преподо́бне о́тче Па́мво,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Памве, пустыннику Нитрийскому, глас 5

В пусты́ни живы́й в то́лстинных* и многошве́нных* твои́х ри́зах,/ и без тщесла́вия и мяте́жа внутрь поя́ Бо́гови,/ и челове́ча дея́ния собо́ю прообразова́в в наказа́ние, о́тче Па́мво,/ моли́ Христа́ Бо́га, да спасе́т ду́ши на́ша.

Кондак, глас тойже

Ми́ра сего́ уче́ние отри́ну,/ и, в се́рдцы смире́нием сподо́бився Бо́гу угоди́ти,/ киче́ния* ненавиде́ние стяжа́,/ тем и ученика́ своего́ о стра́се Бо́жии обличи́,/ и наказа́ без ликова́ния умоля́ти Бо́га,/ и́стиннаго смире́ния, Христо́вы нищеты́ подража́телю,/ пусты́нная красото́, о́тче наш Па́мво,/ не преста́й моля́ о чту́щих тя.

Величание

Ублажа́ем тя,/ преподо́бне о́тче Па́вмо,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее, именуемой Калужская, глас 4

Засту́пнице от враг иноплеме́нных Необори́мая Калу́жския земли́/ и Изба́вительнице от смертоно́сныя я́звы Ми́лостивая!/ Изба́ви рабы́ Твоя́ от вся́ких бед и боле́зней,/ с ве́рою и любо́вию прибега́ющия к чудотво́рней ико́не Твое́й,/ и спаси́ ду́ши на́ша.

Кондак, глас 8

Не и́мамы пе́сней, ниже́ слове́с,/ ка́ко досто́йно восхвали́ти Тя,/ Ма́ти Христа́ Бо́га на́шего,/ явле́ния ра́ди чудотво́рныя ико́ны Твоея́ земли́ Калу́жстей,/ то́кмо мо́жем вопи́ти Тебе́:/ не отврати́ ми́лости Твоея́ от нас/ и низпосли́ ю всем, притека́ющим к цельбоно́сней ико́не Твое́й.

Величание

Велича́ем Тя,/ Богоро́дице Де́во,/ и почита́ем чудотво́рную ико́ну Твою́,/ е́юже благоволи́ла еси́ спасти́ зе́млю Калу́жскую/ от наше́ствий вра́жиих и всегуби́тельных боле́зней.

Тропарь преподобной Макрине, сестре святителя Василия Великого, глас 2

Жениха́ твоего́ сме́рть виде́вши,/ разсмотре́ла еси́ тле́нную жизнь и су́етие ми́ра,/ отвсю́ду вину́ прии́мши,/ Нетле́нному Обру́чнику уневе́стилася еси́,/ посто́м и смире́нием любо́вь Того́ постига́ющи./ Тем ны́не ра́дуется со а́нгелы, преподо́бная Макри́но, дух твой.

Ин тропарь, глас 8

В тебе́, ма́ти, изве́стно спасе́ся... (общий преподобной жене).

Кондак, глас 4

Бо́га Блага́го всем се́рдцем возлюби́ла еси́,/ Макри́но преподо́бная,/ и, Сего́ Крест Честны́й на ра́мо прие́мши,/ усе́рдно после́довала еси́ Ему́:/ отону́дуже согреше́ний обрела́ еси́ проще́ние.

Величание

Ублажа́ем тя,/ преподо́бная ма́ти Макри́но,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Дию Константинопольскому, глас 1

Пусты́нный жи́тель и в телеси́ а́нгел,/ и чудотво́рец яви́лся еси́, Богоно́се о́тче наш Ди́е,/ посто́м, бде́нием, моли́твою небе́сныя дарова́ния прии́м,/ исцеля́еши неду́жныя и ду́ши ве́рою приходя́щих ти./ Сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеления.

Кондак, глас 2

Чистото́ю души́ Боже́ственне вооружи́вся,/ непреста́нную моли́тву, я́ко ко́пие прии́м держа́вно,/ разсе́кл еси́ де́монов полки́,/ чудотво́рче о́тче наш Ди́е,/ моли́ непреста́нно о всех нас.

Величание

Ублажа́ем тя,/ преподо́бне о́тче Ди́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь на прославление преподобному Серафиму, Саровскому и всея Руси чудотворцу, глас 4

От ю́ности Христа́ возлюби́л еси́, преподо́бне,/ и Тому́ Еди́ному порабо́тати пла́менне вожделе́л еси́,/ в пусты́ннем житии́ твое́м непреста́нною моли́твою и трудо́м подвиза́лся еси́,/ умиле́нным се́рдцем любо́вь Христо́ву стяжа́в,/ Небе́сным Серафи́мом в песносло́вии спобо́рниче,/ в любви́ притека́ющим к тебе́ Христу́ подража́телю,/ те́мже избра́нник возлю́блен Бо́жия Ма́тере яви́лся еси́,/ сего́ ра́ди вопие́м ти:/ спаса́й нас моли́твами твои́ми, ра́досте на́ша,/ те́плый пред Бо́гом засту́пниче,/ Серафи́ме блаже́нне.

Ин тропарь на преставление, глас тойже

От ю́ности Христа́ возлюби́л еси́, блаже́нне,/ и Тому́ еди́ному рабо́тати пла́менне вожделе́в,/ непреста́нною моли́твою и трудо́м в пусты́ни подвиза́лся еси́,/ умиле́нным же се́рдцем любо́вь Христо́ву стяжа́в,/ избра́нник возлю́блен Бо́жия Ма́тере яви́лся еси́./ Сего́ ра́ди вопие́м ти:/ спаса́й нас моли́твами твои́ми, Серафи́ме преподо́бне, о́тче наш.

Кондак, глас 2

Ми́ра красоту́ и я́же в нем тле́нная оста́вив, преподо́бне,/ в Саро́вскую оби́тель всели́лся еси́,/ и та́мо а́нгельски пожи́в,/ мно́гим путь был еси́ ко спасе́нию./ Сего́ ра́ди и Христо́с тебе́, о́тче Серафи́ме, просла́ви,/ и да́ром исцеле́ний и чуде́с обогати́,/ те́мже вопие́м ти:/ ра́дуйся, Серафи́ме преподо́бне, о́тче наш.

Величание

Ублажа́ем тя,/ преподо́бне о́тче Серафи́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Паисию Печерскому, в Дальних пещерах почивающему, глас 4

Вели́каго во отце́х подража́я Паи́сия,/ я́коже он в пусты́ню, та́ко и ты в пеще́ру всели́лся еси́,/ иде́же труды́ прилага́я, блаже́нне, ко трудо́м,/ и псало́мскому пе́нию вы́ну прилежа́л еси́,/ моли́ о нас, пою́щих тя.

Кондак, глас 5

Все́ю душе́ю и помышле́нием, Паи́сие, Христа́ возлюби́в,/ Тому́ вседу́шне вся дни живота́ твоего́ служи́л еси́, Богому́дре,/ тем по кончи́не твое́й/ насле́дил еси́ ра́дость и ве́чное наслажде́ние.

Величание

Ублажа́ем тя,/ преподо́бне о́тче Паи́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь благоверному князю Роману Олеговичу, Рязанскому, глас 1

Муче́ньми странноужа́сными/ и до́блестию терпе́ния/ всех преудиви́л еси́, кня́же Рома́не,/ честны́х бо чле́нов твои́х по соста́вам ре́зание/ и всего́ телесе́ твоего́ раздробле́ние/ претерпе́л еси́ за ве́ру Христо́ву,/ те́мже и возше́л еси́ к престо́лу Царя́ Христа́ Бо́га/ и яви́лся еси́ но́вый предста́тель Це́ркве Ряза́нския./ Моли́ся у́бо ко Го́споду,/ да мир и благоде́нствие да́рует гра́ду на́шему,/ и испроси́ у Него́ ми́лость и спасе́ние/ чту́щим свяще́нную па́мять твою́, многострада́льне.

Кондак, глас 2

Оклевета́нный пред ха́ном в хуле́нии злове́рия его́,/ дерзнове́нно предста́л еси́ суди́щу нечести́вому,/ убоя́вся же Стра́шнаго Суда́ Христо́ва,/ ха́нское повеле́ние и страх поплева́л еси́, святы́й Рома́не./ Те́лом, я́ко ро́зга, ре́жемый,/ в страда́ниих уподо́бился еси́ Иа́кову Перся́нину/ и яви́лся еси́ великому́ченик изря́дный,/ столп и утвержде́ние Це́ркве Ряза́нстей,/ засту́пник и воево́да росси́йский пресла́вный.

Величание

Велича́ем тя,/ святы́й благове́рный кня́же Рома́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь блаженному Стефану Высокому, деспоту* Сербскому, глас 8

С высоты́ восприя́в увеща́ние,/ оте́честву твоему́ был еси́ предста́тель и просвети́тель,/ святы́й пра́ведный де́споте Стефа́не,/ супоста́ты* побежда́яй, и лю́ди своя́ просвеща́яй,/ и мно́гия хра́мы устроя́яй,/ сего́ ра́ди чту́ще тя, мо́лим:/ моли́ Христа́ Бо́га о спасе́нии наро́да се́рбскаго.

Кондак, глас 4

Ве́рнаго Твоего́ во́ина Стефа́на Высо́каго возлюби́в,/ низпосла́л еси́ ему́ си́лы благода́ти, Христе́ Бо́же,/ во е́же уве́дети* тайны Небе́сныя/ и ревнова́ти о сла́ве Твое́й,/ е́йже кла́няющеся и мы,/ всегда́ мо́лим Тя:/ поми́луй нас, Спа́се, во Ца́рствии Твое́м.

Величание

Велича́ем тя,/ святы́й пра́ведный де́споте Стефа́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь трем святителям: Димитрию Ростовскому, Митрофану и Тихону Воронежским, глас 8

Я́коже дре́вле на Восто́цех трие́ вели́цыи святи́телие,/ си́льный сло́вом Ва́силий,/ глубина́ Богосло́вия Григо́рий и Златоу́стый Иоа́нн,/ та́ко и днесь в стране́ полу́нощней/ трие́ новоявле́нная свети́ла ве́ры на тве́рди церко́вней востеко́ша:/ столп ве́ры Митрофа́н,/ сло́во и́стины в лице́ царю́ испове́давый,/ и обличи́тель раско́ла Дими́трий,/ мече́м обою́ду о́стрым вся ко́зни его́ разсеки́й,/ и пома́зания по́лный сосу́д Ти́хон,/ ти́хостию слове́с свои́х гре́шника к покая́нию призва́вый./ О вели́цыи трие́ святи́телие земли́ Росси́йския,/ моли́те Христа́ Бо́га, Ему́же уго́дни бы́сте,/ спасти́ся душа́м на́шим.

Кондак, глас 3

И́же в по́здния на́ша ро́ды и в после́дняя времена́/ обурева́емых треволне́нием жите́йских страсте́й и хла́дом безве́рия неду́гующих/ в ско́рби душе́вней уте́шивший и теплото́ю ва́шея ве́ры согрева́вший,/ трие́ новоявле́ннии святи́телие Росси́йстии,/ Дими́трие, Митрофа́не и Ти́хоне,/ на ка́мени Правосла́вия утверди́те ны/ и, я́ко чадолюби́вии отцы́,/духо́вная ча́да ва́ша стезе́ю за́поведей оте́ческих в Ца́рствие Христо́во вслед себе́ руководи́те.

Величание

Велича́ем вас,/ святи́телие вели́цыи Дими́трие, Митрофа́не и Ти́хоне,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь Божией Матери ради иконы Ее, именуемой «Умиление» или «Радость всех радостей», глас 4

К Богоро́дице со умиле́нием припаде́м,/ вси, грехми́ обремене́ннии,/ чудотво́рную Ея́ ико́ну Умиле́ния облобыза́юще/ и вопию́ще со слеза́ми:/ Влады́чице, приими́ моле́ние недосто́йных раб Твои́х/ и пода́ждь нам, прося́щим,/ ве́лию Твою́ ми́лость.

Кондак, глас 3

Ю́же подража́я непло́дную смоко́вницу,/ аз, окая́нный, умиле́ния плода́ отню́д не приношу́ и посече́ния страшу́ся,/ но, взира́я к чудотво́рней ико́не Твое́й Умиле́ния, Влады́чице,/ стеню́ от се́рдца и вопию́:/ умили́ся, Благосе́рдая,/ и мне, окамене́нному се́рдцем,/ благоволи́ пода́ти душе́вное и серде́чное умиле́ние.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь пророку Илии, глас 4

Во пло́ти а́нгел,/ проро́ков основа́ние,/ вторы́й Предте́ча прише́ствия Христо́ва, Илия́ сла́вный,/ свы́ше посла́вый Елисе́еви благода́ть/ неду́ги отгоня́ти/ и прокаже́нныя очища́ти./ Те́мже и почита́ющим его́ то́чит исцеле́ния.

Кондак, глас 2

Проро́че и прови́дче вели́ких дел Бо́га на́шего,/ Илие́ великоимени́те,/ веща́нием твои́м устави́вый водото́чныя о́блаки³⁵,/ моли́ о нас Еди́наго Человеколю́бца.

Величание

Велича́ем тя,/ святы́й проро́че Бо́жий Илие́,/ и почита́ем е́же на колесни́це о́гненней/ пресла́вное восхожде́ние твое.

Или:

Велича́ем тя,/ святы́й сла́вный проро́че Бо́жий Илие́,/ и чтим, е́же на Небе́са/ на колесни́це о́гненней,/ пресла́вное восхожде́ние твое́.

В Анфологионе, изданном во Львове в 1686 году, есть особое величание пророку Илии:

Велича́ем тя,/ Проро́че и Предте́че прише́ствия Госпо́дня, Илие́ сла́вный,/ и чтим, я́ко на не́бо с пло́тиею/ о́гненное восхожде́ние твое́.

В изданной в 1763 году в Почаевской лавре книге, содержащей в себе величания, певаемые на полиелеях праздников, находится на этот день такое величание:

Велича́ем тя,/ Проро́че Бо́жий Илие́ сла́вне,/ и почита́ем, е́же на небеса́ с пло́тию/ о́гненное восхожде́ние твое́.

В Круге церковных песнопений указано общее величание пророку Илии:

Велича́ем тя,/ проро́че Бо́жий Илие́,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Аврамию, игумену Городецкому, Галичскому, Чухломскому, глас 4

От мирска́го мяте́жа изше́д,/ в ти́хое приста́нище, преподо́бнаго Се́ргия оби́тель, прите́кл еси́,/ и та́мо равноа́нгельное житие́ пожи́в,/ во страну́ Га́личскую прише́л еси́,/ иде́же ве́ру Христо́ву насажда́я/ и новокреще́нныя лю́ди от суеве́рий пога́нских очища́я,/ мно́ги и вели́ки по́двиги подъял еси́,/ и оби́тели четы́ри созда́в,/ и́ноков ли́ки до́бре упа́сл еси́/ и ко Христу́ Спа́су приве́л еси́,/ Его́же моли́, преподо́бне о́тче Авраа́мие, спасти́ ду́ши на́ша.

Кондак, глас 8

В оби́тели Се́ргия преподо́бнаго житию́ и́ноческому до́бре навы́к,/ вя́щшаго* ра́ди безмо́лвия и по́двига/ в пусты́ню удали́тися возжеле́л еси́,/ и, Ду́хом Бо́жиим води́м,/ в преде́лы земли́ Га́личския прише́л еси́,/ и та́мо в пусты́ни ико́ну Ма́тере Госпо́дни чуде́сно обре́л еси́,/ с Не́юже вели́кая и сла́вная соверши́в,/ да́же до преде́л Чухло́мских дости́гл еси́/ и отсю́ду в ра́йския оби́тели всели́лся еси́,/ Авраа́мие Богоно́се, о́тче наш.

Величание

Ублажа́ем тя,/ преподо́бне о́тче Авра́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобномученику Афанасию Брестскому, глас 2

Блаже́н еси́, о́тче наш Афана́сие,/ я́ко ве́рно пожи́л еси́, стоя́ бо́дренно за Святу́ю Правосла́вную ве́ру,/ со умиле́нием при́сно поя́ неседа́льное Пречи́стей,/ запове́дуя никому́же наруша́ти Правосла́вныя ве́ры святы́я,/ пострада́в за свиде́тельство и́стины да́же до сме́рти./ Мы же, чту́ще святы́ню твою́,/ со дерзнове́нием взыва́ем ти: о́тче наш, преподобному́чениче Афана́сие, похвало́ и украше́ние на́ше.

Кондак, глас 4

Мона́шескаго жития́ украше́ние и му́чеников красоту́ яви́л себе́ житие́м твои́м, Афана́сие,/ и я́ко со́лнце пресве́тлое лю́дям правосла́вным возсия́л еси́./ Те́мже и Христо́с да́ром чуде́с обогати́ тя;/ да чту́ще пресве́тлую па́мять твою́, зове́м ти:/ помина́й ста́до твое́ моли́твами твои́ми, преподо́бне.

Ин кондак, глас 2

Я́ко по́стника благоче́стна и иску́сна,/ и страда́льца произволе́нием че́стна,/ и пусты́ни жи́теля сообра́зна,/ в пе́снех досто́йно хва́лим Афана́сия приснохва́льнаго,/ той бо зми́я попра́л есть.

Величание

Ублажа́ем тя,/ преподобному́чениче Афана́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь праведному Аарону первосвященнику, глас 3

Сте́блю Леви́ина ко́рене,/ приимы́й чин дре́вняго Мафусаи́ла,/ он бо о́тча ра́ди к Бо́гу вознесе́ния,/ ты же бра́тня ра́ди с Бо́гом бесе́дования,/ первосвяще́нный во Изра́или моле́бниче о всех,/ умоли́ Бо́га ку́пно с бра́том свои́м богови́дцем,/ да изба́вимся от вся́кия ско́рби.

Кондак, глас тойже

Преиспещре́но имы́й одея́ние от честны́х ка́мений,/ процвете́нный свяще́нством, Ааро́не,/ твой сухи́й жезл процвету́щий/ прообразова́ше от Нескве́рныя Пречи́стыя Де́вы Сы́на Бо́жия рождество́,/ и́стиннаго Священнопа́стыря старе́йшаго,/ Его́же моли́ со всеми́ освяще́нными ли́ки,/ да спасе́т ны по вели́цей Его́ ми́лости.

Величание

Велича́ем тя,/ святы́й пра́ведный первосвяще́нниче Ааро́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Божией Матери ради иконы Ее Абалацкой («Знамение»), глас 4

Я́ко необори́мую сте́ну и исто́чник чуде́с/ стяжа́вше Тя раби́ Твои́,/ Богоро́дице Пречи́стая,/ сопроти́вных ополче́ния низлага́ем./ Те́мже мо́лим Тя:/ мир гра́ду Твоему́ да́руй/ и душа́м на́шим ве́лию ми́лость.

Кондак, глас тойже

Честна́го о́браза Твоего́ зна́мение/ пра́зднующе лю́дие Твои́, Богороди́тельнице,/ и́мже ди́вную побе́ду на сопроти́вныя гра́ду Твоему́ дарова́ла еси́./ Те́мже Тебе́ ве́рою взыва́ем:/ ра́дуйся, Де́во, христиа́н похвало́.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Ино величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже ди́вную побе́ду на сопроти́вныя/ гра́ду Твоему́ дарова́ла еси́.

Тропарь пророку Иезекиилю, глас 2

Проро́че Бо́жий Иезеки́иле,/ предзре́вый затворе́нная Ду́хом врата́/ и Плотоно́сца, во исхо́де сих, Еди́наго сказа́вый Бо́га,/ Того́ моли́, мо́лимся,/ да отве́рзет дверь ми́лости Своея́/ и спасе́т ду́ши благоче́стно пою́щих па́мять твою́.

Ин тропарь, глас тойже

Проро́ка Твоего́ Иезеки́иля па́мять, Го́споди, пра́зднующе,/ тем Тя мо́лим,/ спаси́ ду́ши на́ша.

Кондак, глас 4

Бо́жий яви́лся еси́ проро́к, Иезеки́иле чу́дне,/ Госпо́дне воплоще́ние всем провозвести́л еси́,/ Сего́ Агнца и Зижди́теля Сы́на Бо́жия я́вльшася во ве́ки.

Величание

Велича́ем тя,/ проро́че Бо́жий Иезеки́иле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобным Симеону, Христа ради юродивому, и Иоанну, спостнику его, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви живо́т наш.

Кондак, глас 2

Во пло́ти я́вльшася безпло́тнаго, и доброде́тельми, преми́рно просия́вшаго,/ Симео́на равноа́нгельнаго и Богоно́снаго восхва́лим,/ с ни́мже Иоа́нна приснопа́мятнаго, ве́рою и любо́вию,/ я́ко моля́щияся Го́споду непреста́нно о всех нас.

Ин кондак, глас 8

Христо́вою любо́вию распаля́еми, сла́внии,/ вся, я́же в житии́, преподо́бнии, оста́висте/ и, яре́м Его́ прие́мше и свой крест на ра́мо взе́мше,/ подража́тели Того́ житию́ бы́сте/ и Боже́ственныя Его́ сла́вы прича́стницы,/ Иоа́нне Богому́дре с Симео́ном чу́дным,/ непреста́нно моли́теся о всех нас.

Величание

Ублажа́ем вас,/ преподо́бнии отцы́ Симео́не и Иоа́нне,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь преподобным Онуфрию молчаливому и Онисиму затворнику, Печерским, в Ближних пещерах почивающим, глас 3

Преблаже́ннии и Богоно́снии отцы́ на́ши Ону́фрие и Они́симе,/ я́ко стяжа́вшии дерзнове́ние ко Го́споду/ равноа́нгельным свои́м житие́м,/ его́же ра́ди обогати́ Христо́с нетле́нием и чудесы́ мо́щи ва́ша,/ мо́лим вас приле́жно:/ испроси́те душа́м на́шим очище́ние/ и ве́лию и бога́тую ми́лость.

Кондак, глас 4

Бога́тство благода́ти и сыноположе́ния/ стяжа́вше мно́гими по́двиги и доброде́тельми,/ и́хже ра́ди Христо́с всели́ ду́ши ва́ша в Небе́сная селе́ния Своя́,/ дарова́в благода́ть нетле́ния и чуде́с моще́м ва́шим,/ к ни́мже притека́юще, вопие́м:/ ра́дуйтеся, Ону́фрие и Они́симе, отцы́ на́ши,/ лико́в и́ночествующих похвало́ и удобре́ние.

Величание

Ублажа́ем вас,/ преподо́бнии отцы́ Ону́фрие и Они́симе,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь благоверной княгине Анне, в иночестве Евфросинии, Кашинской, Тверской, глас 3

Днесь восхваля́ем тя, преподо́бная ма́ти,/ вели́кая княги́не и́нокине Анно:/ я́ко бо лоза́ плодови́та посреде́ те́рния,/ процвела́ еси́ во гра́де Ка́шине твои́ми доброде́тельми,/ всех удиви́ла еси́ чу́дным твои́м житие́м,/ те́мже Христу́ Бо́гу угоди́ла еси́,/ и ны́не, ра́дующися и веселя́щися,/ пребыва́вши с ли́ки преподо́бных жен,/ наслажда́ющися ра́йския красоты́ и весе́лия./ Мо́лим у́бо тя:/ моли́ о нас Человеколю́бца Христа́, Бо́га на́шего,/ дарова́ти нам мир и ве́лию ми́лость.

Ин тропарь, глас 4

Просвети́вшися Боже́ственною благода́тию, преподо́бная,/ и пра́востию у́мною ду́шу твою́ привяза́вши в любо́вь Христо́ву,/ тле́нная, и кра́сная, и вре́менная нивочто́же вмени́ла еси́./ Кре́стным зна́мением на мы́сленныя враги́ му́жески вооружи́вшися,/ по́стническими по́двиги, посто́м и моли́твами/ у́глие страсте́й угаси́ла еси́, достосла́вная А́нно,/ и по сме́рти источа́вши благода́ть притека́ющим к моще́м твои́м./ И ны́не, в Небе́снем черто́зе с му́дрыми де́вами предстоя́щи Христу́,/ моли́ о нас, почита́ющих святу́ю па́мять твою́.

Кондак, глас 8

Скоропослу́шную помо́щницу вси, су́щии в беда́х,/ благоче́стно воспое́м, А́нну святу́ю,/ днесь любо́вию соше́дшеся во обре́тение честны́х моще́й ея́./ Воспое́м пе́снь Еди́ному в Тро́ице Бо́гу, ра́дующеся,/ сподо́бльшему нас ви́дети пречи́стое сокро́вище честны́х моще́й ея́:/ от мног бо лет сокрове́ны бы́ша,/ напосле́док же нам явле́ны/ и источа́ют мно́га и разли́чна исцеле́ния./ Я́ко да моли́твами ея́ к Бо́гу/ от вся́ких находя́щих зол изба́вимся,/ ра́достною душе́ю и весе́лием се́рдца благода́рная воспое́м, глаго́люще:/ ра́дуйся, утвержде́ние гра́ду на́шему.

Ин кондак, глас 4

Я́ко пресве́тлая звезда́, яви́лася еси́ в Росси́йстей земли́,/ во гра́де Ка́шине, преподо́бная ма́ти А́нно,/ во всех благочести́вых и ве́рных жена́х,/ а́ки крин, процвела́ еси́ чи́стым и непоро́чным твои́м житие́м,/ во и́нокинях же соверше́нными твои́ми труды́ и по́двиги,/ и взошла́ еси́ к Вы́шнему гра́ду, ра́дующися и веселя́щися,/ я́ко до́бре соверши́вши твое́ тече́ние,/ и ны́не честны́я твоя́ мо́щи, а́ки би́серие драго́е,/ яви́шася, на исцеле́ние всем, приходя́щим с ве́рою./ Тем и вопие́м ти:/ ра́дуйся, всекра́сная душе́ю, и моли́ Христа́ Бо́га о спасе́нии душ на́ших.

Величание

Ублажа́ем тя,/ преподо́бная ма́ти, вели́кая княги́не А́нно,/ и чтим святу́ю па́мять твою́,/ наста́внице и́нокиням/ и собесе́днице а́нгелом.

Тропарь мироносице равноапостольной Марии Магдалине, глас 1

Христу́ нас ра́ди от Де́вы ро́ждшемуся,/ честна́я Магдали́но Мари́е, после́довала еси́,/ Того́ оправда́ния и зако́ны храня́щи;/ те́мже днесь всесвяту́ю твою́ па́мять пра́зднующе,/ грехо́в разреше́ние/ моли́твами твои́ми прие́млем.

Кондак, глас 3

Предстоя́щи, пресла́вная, у Креста́ Спа́сова со ины́ми мно́гими,/ и Ма́тери Госпо́дни состра́ждущи, и сле́зы точа́щи,/ сие́ в похвалу́ приноша́ше, глаго́лющи:/ что сие́ есть стра́нное чу́до,/ Содержа́й всю тварь, пострада́ти изво́ди:/ сла́ва держа́ве Твое́й.

Величание

Велича́ем тя,/ мироно́сице свята́я равноапо́стольная Мари́е Магдали́но,/ и чтим боле́зни и труды́ твоя́,/ и́миже труди́лася еси́/ во благове́стии Христо́ве.

Тропарь священномученику Фоке, глас 4

И нра́вом прича́стник,/ и престо́лом наме́стник... (общий священномученику).

Кондак, глас 6

Я́ко святи́тель принося́, о́тче, же́ртвы,/ наконе́ц себе́ прине́сл еси́ же́ртву жи́ву:/ свиде́тельствовав зако́нно о Христе́ Бо́зе,/ от а́нгел укрепля́емь,/ и смерть изволя́я,/ сый с вопию́щими тебе́:/ прииди́, Фо́ко, с на́ми, и никто́же на ны.

Величание

Велича́ем тя,/ священному́чениче Фо́ко,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Корнилию Переяславскому, глас 8

Новоявле́ннаго уго́дника Бо́жия почти́м,/ Корни́лия преподо́бнаго,/ крест на ра́мо взе́мшаго,/ и́го Христо́во усе́рдно поне́сшаго,/ и́же на неви́димыя враги́ му́жественно подвиза́вся/ и ко́зни их попра́в, я́ко добр во́ин,/ Влады́це Христу́ предста́ и мо́лится о душа́х на́ших.

Кондак, глас 2

Вы́шняя получи́ти жела́я,/ в Вы́шних Живу́щему неле́ностно порабо́тал еси́, блаже́нне,/ да насле́диши Го́рняя, презре́л еси́ до́льняя,/ не то́кмо о́чи отврати́в, не ви́дети суеты́,/ но и устна́ма твои́ма молча́ние наложи́в, не глаго́лати су́етная,/ оба́че немо́лчным се́рдцем воспе́л еси́ Бо́гу./ Не умолчи́ у́бо и ны́не, о нас моля́ся,/ Корни́лие преподо́бне.

Величание

Ублажа́ем тя,/ преподо́бне о́тче Корни́лие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее «Почаевская», глас 5

Пред свято́ю Твое́ю ико́ною, Влады́чице,/ моля́щиися исцеле́ний сподобля́ются,/ ве́ры и́стинныя позна́ние прие́млют/ и ага́рянская наше́ствия отража́ют./ Те́мже и нам, к Тебе́ припа́дающим,/ грехо́в оставле́ние испроси́,/ по́мыслы благоче́стия сердца́ на́ша просвети́,/ и к Сы́ну Твоему́ моли́тву вознеси́/ о спасе́нии душ на́ших.

Ин тропарь, глас 4

К Богоро́дице приле́жно ны́не притеце́м,/ гре́шнии и смире́ннии, и припаде́м/ к ди́вному о́бразу Ея́, и́же на горе́ Поча́евстей,/ к нему́же уми́льно взира́юще и моля́щеся, Цари́це и Влады́чице,/ из глубины́ души́ вопие́м:/ о Пречу́дная Де́во, Ма́ти Го́спода Вы́шняго,/ от лет дре́вних избра́вшая оби́тель Поча́евскую в ме́сто селе́ния Своего́!/ Зе́млю оте́чественную на́шу в Правосла́вии и ми́ре утверди́,/ христолюби́вому во́инству спобо́рствуй/ и спаси́ всех предстоя́щих и моля́щихся Тебе́ умиле́нною душе́ю и сокруше́нным се́рдцем/ пред пречи́стым Твои́м о́бразом со слеза́ми./ Не отврати́ рабы́ Твоя́ тщи,/ Тя бо и еди́ну наде́жду и́мамы.

Кондак, глас 1

Исто́чник исцеле́ний и ве́ры Правосла́вныя утвержде́ние/ Поча́евская Твоя́ ико́на, Богоро́дице, яви́ся,/те́мже и нас, к ней притека́ющих,/ от бед и искуше́ний свободи́,/ Ла́вру Твою́ невреди́му сохрани́,/ Правосла́вие во о́крест стоя́щих стра́нах утверди́,/ и грехи́ разреши́ моли́твенник Твои́х:/ ели́ка бо хо́щещи, мо́жеши.

Величание

Велича́ем Тя,/ Пресвята́я Де́во,/ и почита́ем честну́ю и́кону Твою́,/ ю́же от лет дре́вних/ на горе́ Поча́евстей просла́вила еси́.

Тропарь мученикам Трофиму, Феофилу и иже с ними, глас 4

Я́ко во́ини, му́ченицы непобеди́мии,/ тече́нием невозбра́нным в суди́лище неве́рных внидо́сте/ и ве́ры ра́ди мно́гия му́ки претерпе́сте,/ Христа́ испове́дающе Еди́наго со дерзнове́нием./ Того́ моли́те, Трофи́ме и Фео́филе с про́чими,/ я́ко да тяготу́ страсте́й отло́жше,/ ва́ше ны́не страда́ние пое́м, страстоте́рпцы непреобори́мии.

Ин тропарь, глас тойже

Му́ченицы Твои́, Го́споди... (общий мученикам).

Кондак, глас 8

Свети́льницы све́тлии я́вльшеся,/ Боже́ственнии му́ченицы,/ тварь всю све́тлостию чуде́с озаря́ете,/ неду́ги разреша́юще,/ и глубо́кую тьму всегда́ отгоня́юще,/ Христу́ Бо́гу моля́щеся непреста́нно о всех нас.

Величание

Велича́ем вас,/ страстоте́рпцы святи́и Трофи́ме и Фео́филе со пострада́вшими,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь Божией Матери ради иконы Ее «Всех скорбящих Радость», глас 8

Ко исто́чнику приснотеку́щему милосе́рдия,/ Пречи́стей Де́ве Богоро́дице,/ притеце́м лю́дие вси, ца́рие и кня́зи, свяще́нницы же и и́ноцы,/ му́жие и же́ны и ча́да, бога́тии и ни́щии, здра́вии и боля́щии,/ в покая́нии вопию́ще и уми́льно глаго́люще:/ Влады́чице, помози́ гре́шным рабо́м Твои́м,/ яви́, я́ко Блага́я, сла́ву Твою́,/ при́сно потщи́ся умилосе́рдитися на ны,/ испроси́ти очище́ние душ и теле́с на́ших/ от Исто́чника жи́зни на́шея, Бо́га,/ Его́же родила́ еси́, еди́на Благослове́нная.

Кондак, глас 6

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице,/ Ты нам помози́,/ на Тебе́ наде́емся, и Тобо́ю хва́лимся,/ Твои́ бо есмы́ раби́,/ да не постыди́мся.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь мученице Христине, глас 4

Зва́нием ева́нгельски Христу́ уневе́стившися,/ Христи́но сла́вная,/ сла́ву ми́ра сего́ и по́хоть бре́нную вмени́ла еси́ нивочто́же,/ о само́м телеси́ небрегу́щи,/ му́ки претерпе́ла еси́ до́блественно,/ тем твое́ страда́ние хвала́ми почита́ем,/ му́ченице, Христу́ тезоимени́тая³⁶.

Ин тропарь, глас тойже

Агница Твоя́, Иису́се... (общий мученице).

Кондак, глас тойже

Светови́дная голуби́ца позна́лася еси́, криле́ иму́щи зла́те,/ и к высоте́ небе́сней возлете́ла еси́, Христи́но честна́я,/ те́мже твой сла́вный пра́здник соверша́ем,/ ве́рою покланя́ющеся твои́х моще́й ра́це,/ из нея́же истека́ет всем оби́льно/ исцеле́ние Боже́ственное,/ душа́м же и тело́м.

Величание

Велича́ем тя,/ страстоте́рпице Христо́ва Христи́но,/ и чтим честно́е страда́ние твое́,/ е́же за Христа́/ претерпе́ла еси́.

Тропарь мученикам благоверным князьям Борису и Глебу, во Святом Крещении Роману и Давиду, глас 2

Правди́вая страстоте́рпца/ и и́стинная Ева́нгелия Христо́ва послу́шателя*,/ целому́дренный Рома́не с незло́бивым Дави́дом,/ не сопроти́в ста́ста врагу́ су́щу брату́,/ убива́ющему телеса́ ва́ша,/ душа́м же косну́тися не могу́щу./ Да пла́чется у́бо злый властолю́бец,/ вы же ра́дующеся с ли́ки а́нгельскими,/ предстоя́ще Святе́й Тро́ице,/ моли́теся о держа́ве сро́дников ва́ших, Богоуго́дней бы́ти,/ и сыново́м росси́йским спасти́ся.

Ин тропарь, глас 4

Я́ко плодови́та виногра́да,/ о́трасли доброде́телей су́ще,/ Небе́сный дождь Христо́в прия́сте,/ источа́юще оте́честву своему́ струю́ Правосла́вия,/ Бори́се пречу́дне с до́блим Гле́бом,/ вку́пе моли́теся Го́сподеви сохрани́ти град и лю́ди,/ и на враги́ посо́бствовати,/ и душа́м на́шим дарова́ти ве́лию ми́лость.

Ин тропарь, глас тойже

Му́ченическою кро́вию порфи́ру окропи́вше све́тло,/ укра́шени предстои́те, страда́льцы сла́внии, Царю́ Безсме́ртному,/ и, венцы́ сла́вы от Него́ прии́мше/ моли́теся стране́ на́шей пода́ти на враги́ одоле́ние/ и душа́м на́шим ве́лию ми́лость.

Ин тропарь, глас 2

Пречестни́и и целому́дреннии, и незло́бивии страстоте́рпцы,/ Рома́не сла́вный и Дави́де чу́дный,/ и́го бо Госпо́дне ева́нгельски на ра́мо взе́мше,/ после́довасте Христу́/ и, крест Его́, я́ко ски́петр, в руку́ иму́ще,/ врага́ бра́та и зла́го властолю́бца соодоле́сте,/ и той ны́не в гее́не му́чится,/ вы же ра́дуетеся, с ли́ки а́нгельскими предстоя́ще Святе́й Тро́ице,/ моли́теся о держа́ве сро́дник ва́ших, Богоуго́дней бы́ти/ и сыново́м ру́сским спасти́ся.

Кондак, глас 3

Возсия́ днесь пресла́вная па́мять ва́ша,/ благоро́днии страстоте́рпцы Христо́вы, Рома́не и Дави́де,/ созыва́ющи нас к похвале́нию Христа́ Бо́га на́шего./ Тем притека́юще к ра́це мо́щей ва́ших,/ исцеле́ния дар прие́млем, моли́твами ва́шими, святи́и:/ вы бо Боже́ственнии вра́чеве есте́.

Ин кондак, глас 8

Аще и убие́ни бы́сте и во гробе́х положе́ни,/ но на Вы́шнее Ца́рство преидо́сте,/ о́ваго бо ко́пии насу́нута*,/ друга́го же, я́ко а́гнца незло́бива, ноже́м заре́заша,/ тем и кровь ва́ша бысть исцеле́ние ми́ру,/ ве́рою призыва́ющим вас, святи́и, на по́мощь.

Ин кондак, глас 3

Прииди́те, вси ру́сстии собо́ри,/ чудотво́рцу и му́ченику Бори́са и Гле́ба восхва́лим,/ зако́нно бо пострада́вше,/ победи́ста сопроти́внаго врага́,/ тем святы́м заступле́нием кня́зи ру́сстии враги́ побежда́ют,/ тем па́мять е́ю ве́село и любо́вию похва́лим, вопию́ще:/ за ны моли́те Святу́ю Тро́ицу,/ умири́ти мир и спасти́ ду́ши на́ша.

Ин кондак, глас 4

Яви́ся днесь в стране́ Ру́сстей благода́ть исцеле́ния всем,/ к вам, блаже́ннии, приходя́щим и вопию́щим:/ ра́дуйтеся, засту́пницы те́плии.

Величание

Велича́ем вас,/ страстоте́рпцы святи́и Бори́се и Глебе,/ и чтим честна́я страда́ния ва́ша,/ я́же за Христа́/ претерпе́ли есте́.

Ино величание

Велича́ем вас,/ святи́и благове́рнии кня́зие страстоте́рпцы Христо́вы Рома́не и Дави́де,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Поликарпу, архимандриту Печерскому, в Ближних пещерах почивающему, глас 4

Тезоимени́т зва́нию твоему́³⁷,/ я́ко многопло́дное дре́во,/ насажде́н сый во оби́тели Бо́жия Ма́тере,/ мно́гая и чу́дная тща́нием твои́м исправле́ния показа́вый,/ му́дре Полика́рпе,/ моли́ Христа́ Бо́га о нас,/ я́ко да и мы, мно́гия плоды́ доброде́телей Ему́ прине́сше, спасе́мся.

Кондак, глас 8

Я́ко преподо́бным Пече́рским совсе́льника/ и жити́й их в себе́ де́лом и писа́нием изобрази́теля нело́жна,/ вку́пе же сла́вы Небе́сныя с те́ми о́бщника я́вльшагося,/ прииди́те, ве́рнии, пе́сньми свяще́нными преподо́бнаго Полика́рпа ублажи́м, зову́ще:/ ра́дуйся, архимандри́тов Пече́рских похвале́.

Величание

Ублажа́ем тя,/ преподо́бне о́тче Полика́рпе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному отроку схимонаху Боголепу Черноярскому, Астраханскому, глас 4

От ю́ности освяще́н бысть Го́сподеви,/ преподо́бне о́тче Боголе́пе,/ ми́ра сего́ красоту́ оста́вил еси́,/ жела́я дре́внему оте́честву насле́довати,/ сохраня́й град сей и лю́ди,/ с ве́рою притека́ющия ко гро́бу твоему́ целе́бному,/ прося́ще по́мощи и заступле́ния,/да вси воспои́м ти:/ ра́дуйся, о́тче Боголе́пе.

Кондак, глас 8

Изво́ли Го́сподеви от ю́ности рабо́тати, о́тче Боголе́пе,/ Крест Христо́в на ра́мо взем, и понесе́,/ моли́ся Пресвяте́й Тро́ице/ о ве́рою прося́щих в ско́рбех исцеле́ний/ и в напа́стех свобожде́ний,/ всей Росси́йстей земли́ похвале́ и утвержде́ние.

Величание

Ублажа́ем тя,/ преподо́бне о́тче Боголе́пе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь праведной Анне, матери Пресвятой Богородицы, глас 4

Жи́знь ро́ждшую, во чре́ве носи́ла еси́ Чи́стую Богома́терь,/ богому́драя Анно,/ те́мже к прия́тию небе́сному, иде́же веселя́щихся жили́ще,/ в сла́ве ра́дующися, ны́не преста́вилася еси́,/ чту́щим тя любо́вию/ прегреше́ний прося́щи очище́ние,/ присноблаже́нная.

Кондак, глас 2

Прароди́телей Христо́вых па́мять пра́зднуем,/ тех ве́рно прося́ще по́мощи/ избави́тися всем от вся́кия ско́рби, зову́щим:/ Бог наш с на́ми, сих прославле́й, я́коже благоволи́.

Величание

Велича́ем тя,/ свята́я пра́ведная Анно,/ прама́ти Христа́ Бо́га на́шего,/ и всечестно́е сла́вим/ успе́ние твое́.

Тропарь преподобному Макарию Желтоводскому, Унженскому, глас 4

Богому́дрый Желтово́дския оби́тели первозда́телю,/ Бо́гом поста́вленный мона́шескаго жития́ сто́лпе,/ благопи́санный досточу́днаго по́стничества о́бразе,/ Богозда́нный Ду́ха Свята́го сосу́де,/златоза́рное Ру́сския земли́ свети́ло всесве́тлое,/ мо́лим тя, о́тче Мака́рие,/ светоза́рною моли́тв твои́х луче́ю разреша́й мра́чных страсте́й на́ших о́блак.

Ин тропарь, глас 5

Днесь град твой Га́лич тобо́ю хва́лится:/ в конце́х бо его́ пресве́тло,/ я́ко ве́лие со́лнце, возсия́л еси/ и чудесы́ твои́ми, преподо́бне Мака́рие, вся озари́л еси́./ И ны́не моли́ся Го́сподеви/ изба́витися душа́м на́шим от пре́лести вра́жия/ и спасти́ся гра́ду твоему́ от пога́нскаго* наи́тия*.

Кондак, глас 2

Вторы́й Моисе́й яви́лся еси́, преподо́бне:/ он бо жезло́м мо́ре раздели́,/ ты же стра́сти, я́ко Амали́ка³⁸, победи́л еси́,/ и непрохо́дную пусты́ню немяте́жным умо́м проше́л еси́,/ в не́йже моли́твами твои́ми ве́лие чу́до сотвори́л еси́,/ гла́дныя лю́ди до изоби́лия прекорми́л еси́./ И ны́не моли́ся Го́сподеви/ пода́ти всем печа́льным утеше́ние,/ Мака́рие, о́тче приснопа́мятне,/ и́же Га́личестей стране́ и всей Росси́йстей земли́/ похвала́ и утвержде́ние.

Величание

Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь священномученику Ермолаю, иерею Никомидийскому, глас 1

Ми́ром благода́ти пома́зан,/ преблаже́нне о́тче Ермола́е,/ иере́й Бо́га Вы́шняго яви́лся еси́/ и благоче́стия све́тлый пропове́дник,/ му́ченик же тве́рдый и безме́здный врач притека́ющих к тебе́./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак, глас 4

Я́ко святи́тель благоче́стно пожи́в,/ и священномуче́ния вене́ц прия́л еси́,/ и́дольския же́ртвы погаси́в,/ до́брый па́стырь Христо́ва ста́да был еси́, прему́дре,/ и Пантелеи́мону и́стинный учи́тель./ Сего́ ра́ди почита́ем тя, пе́сньми вопию́ще:/ от бед изба́ви нас при́сно моли́твами твои́ми, Ермола́е, о́тче наш.

Тропарь общий священномученикам Ермолаю, Ермиппу и Ермократу, иереям Никомидийским, глас 8

Тро́ицы провозве́стницы,/ тро́ице му́чеников честна́я,/ и́дольское нече́стие обличи́вший/ и тьмочи́сленнаго врага́ сокруши́вший,/ ны́не, со Христо́м ца́рствующе, моли́те,/ свяще́нный Ермола́е со Ерми́ппом и Ермокра́том сла́вным,/ я́ко да и на́ша враги́ победи́м/ и прии́мем от Ца́ря всех, Бо́га, ве́чный живо́т/ и вене́ц нетле́нный.

Ин тропарь святых, общий, глас 4

Му́ченицы Твои́, Го́споди... (общий мученикам).

Величание

Велича́ем вас,/ священному́ченицы Христо́вы Ермола́е, Ерми́ппе и Ермокра́те,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь преподобному Моисею Угрину, Печерскому, в Ближних пещерах почивающему, глас 3

Друга́го тя Ио́сифа,/ вели́кий чистоты́ и целому́дрия рачи́телю,/ всече́стне и равноа́нгельне Моисе́е,/ свяще́нными пе́сньми восхваля́юще, гре́шнии,/ мо́лимтися приле́жно:/ моли́ Христа́ Бо́га,/ я́ко да исцели́т вся на́ша стра́сти/ и пода́ст ве́лию ми́лость.

Ин тропарь, глас тойже

Труды́ и по́двиги со страстьми́ по чистоте́ твое́й видя, свя́те,/ кто не удиви́тся?/ Глад бо, темни́цу и ра́ны прие́мля,/ не поработи́лся еси́ сласте́м ляхови́цы*,/ но, я́ко царь, страстьми́ облада́яй,/ ны́не и тогда́ возпросла́вился еси́ от Всеви́дящаго челове́ческая сердца́,/ от Него́же во искуше́ниих всем посо́бствовати благода́ть прие́м,/ посо́бствуй и нам, твою́ па́мять чту́щим, Моисе́е преподо́бне.

Кондак, глас тойже

В Вы́шних еди́наго Бо́га ища́,/ земна́я вся презре́л еси́,/ о телеси́ свое́м неради́в,/ на му́ки му́жески себе́ вдал еси́,/ глад, жа́жду, у́зы, в темни́це затворя́ем, до́блественно претерпе́л еси́,/ бие́ния, кро́ве излия́ние и у́дов* отреза́ние,/ чи́стаго ра́ди де́вства твоего́,/ му́жески поне́сл еси́./ И ны́не с де́вственными ли́ки предстоя́ Пресвяте́й Тро́ице,/ от всех искуше́ний моли́ изба́витися вопию́щим ти:/ ра́дуйся, Моисе́е, о́тче блаже́ннейший.

Величание

Ублажа́ем тя,/ преподо́бне о́тче Моисе́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобномученице Параскеве, глас 8

Тща́ние твое́ зва́нию прили́чно соде́лавши, тезоимени́тая,/ единоиме́нную твою́ ве́ру в жили́ще насле́довала еси́,/ Параске́во страстоте́рпице:/ отону́дуже излива́вши исцеле́ния и мо́лишися о душа́х на́ших.

Ин тропарь, глас 1

Тща́ние и́мущи сообра́зно и́мени твоему́, тезоимени́тая,/ равноимя́нную тебе́ ве́ру в сожи́тельство избра́ла еси́,/ Параске́во победоно́сная³⁹,/ те́мже излива́вши исцеле́ния и мо́лишися о душа́х на́ших.

Кондак, глас 4

Хра́м тво́й, всечестна́я,/ я́ко враче́бницу душе́вную обре́тше,/ в не́м вси́ ве́рнии/ велегла́сно почита́ем тя,/ преподобному́ченице Параске́во сла́вная.

Ин кондак, глас 8

Страстоте́рпице, ве́рнии, песнь Параске́ве прииди́те согла́сно воспои́м:/ облистава́ет бо чудесы́ в ми́ре,/ отгоня́ющи пре́лести тму,/ и подаю́щи ве́рным благода́ть незави́стную, зову́щим:/ ра́дуйся, му́ченице многострада́льная.

Величание

Велича́ем тя,/ страстоте́рпице Христо́ва Параске́во,/ и чтим честно́е страда́ние твое́,/ е́же за Христа́/ претерпе́ла еси́.

Тропарь преподобному Моисею, чудотворцу Печерскому, в Дальних пещерах почивающему, глас 1

Ве́лия исправле́ния и кре́пкия по́двиги/ во псалмопе́ниих же и коленопреклоне́ниих безчи́сленных показа́вый/ и мно́гими труды́ и чудоде́йствии,/ Богоно́се Моисе́е, просия́вый,/ моли́ Христа́ Бо́га/ во е́же спасти́ся нам.

Кондак, глас тойже

Явля́я тве́рдую и неразори́мую свою́ любо́вь ко Го́споду,/ по́ясом желе́зным Его́ ра́ди поя́сался еси́,/ к сему́ и крест желе́зен/ при́сно на себе́ носи́л еси́ ве́лий,/ преподо́бне Моисе́е,/ в ко́ем стесне́нии сый,/ е́же и де́лы ручны́ми удруча́лся еси́,/ за е́же вели́кими чудесы́ обога́щся/ и Ца́рствию Христо́ву о́бщник я́влься,/ моли́ и нам в то́жде всели́тися.

Величание

Ублажа́ем тя,/ преподо́бне о́тче, Моисе́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь великомученику и целителю Пантелеимону, глас 3

Страстоте́рпче свя́тый и целе́бниче Пантелеи́моне,/ моли́ Ми́лостивого Бо́га,/да прегреше́ний оставле́ние/ пода́ст душа́м на́шим.

Кондак, глас 5

Подража́тель сый Ми́лостиваго,/ и исцеле́ний благода́ть от Него́ прие́м,/ страстоте́рпче и му́чениче Христа́ Бо́га,/ моли́твами твои́ми душе́вныя на́ша неду́ги исцели́,/ отгоня́ при́сно борца́ собла́зны⁴⁰ от вопию́щих ве́рно:/ спаса́й ны, Го́споди.

Величание

Велича́ем тя,/ страстоте́рпче святы́й, великому́чениче и целе́бниче Пантелеи́моне,/ и чтим честна́я страда́ния твоя́,/ я́же за Христа́/ претерпе́л еси́.

Тропарь преподобному Герману Аляскинскому, всея Америки чудотворцу, глас 7

Зве́здо пресве́тлая Це́ркве Христо́вы,/ на се́вере просия́вшая,/ вся к Ца́рствию Небе́сному путеводя́щая,/ учи́телю и апо́столе и́стинныя ве́ры,/ предста́телю и засту́пниче гони́мых,/ украше́ние изя́щное Святы́я Це́ркве во Аме́рице,/ преподо́бне о́тче Ге́рмане Аля́скинский,/ моли́ся ко Го́споду, Спа́су на́шему,/ спасти́ся душа́м на́шим.

Ин тропарь, поемый во Америце, глас 3

Преподо́бне о́тче наш Ге́рмане,/ пе́рвый свети́льниче в земли́ на́шей просия́вый,/ прино́сим вси тебе́ похвалы́ сия́,/ты же, я́ко име́я дерзнове́ние ко Го́споду,/ бу́ди нам засту́пник и уте́шитель/ и Це́ркве на́шея покрови́тель ди́вный,/ да вси со умиле́нием зове́м ти:/ ра́дуйся, о́тче наш Ге́рмане, Аля́ски и всея́ Аме́рики пресля́вный чудотво́рче.

Ин тропарь, глас 1

Ло́зу Правосла́вия прине́ся еси́ в Аме́рику из Росси́и благочести́выя/ и, удобри́в ко́рень по́стническими труда́ми/ и напои́в оби́льне моли́твенными слеза́ми,/ плоды́ прине́сл еси́ виногра́д возлю́бленный,/ Ге́рмане, преблаже́нне о́тче наш./ Те́мже и Бог тя просла́ви,/ я́ко апо́стола преподо́бнаго, нетле́нием моще́й и благода́тию чуде́с,/ от ни́хже почерпа́юще благодея́ния, восхваля́ем тя:/ сла́ва Да́вшему ти кре́пость,/ сла́ва Венча́вшему тя,/ сла́ва Дарова́вшему тя Аме́рице, свети́ло Правосла́вия.

Кондак, глас 8

Взбра́нному Воево́де свои́нствовався,/ в брань вступи́л еси́ на ду́ха зло́бы в по́ле преподо́бия и апо́стольства./ И, пожа́в побе́ды обою́дныя, воздвиза́еши нас вопи́ти тебе́:/ ра́дуйся, свя́те Ге́рмане, апо́столе преподо́бный.

Ин кондак, глас 3

Свет ве́чный Христа́, Спа́са на́шего,/ тя на путь ева́нгельский во Аме́рику наста́ви,/ возвести́ти весть о ми́ре ева́нгельскую./ Днесь Престо́лу Сла́вы предстоя́,/ моли́ся о стране́ твое́й и лю́дех ея́,/ о ми́ре всего́ ми́ра/ и спасе́нии душ на́ших.

Ин кондак, глас 8

Валаа́ма постри́женник честны́й,/ возлю́бленник Бо́жия Ма́тери бы́вый,/ ревни́тель по́двигов дре́вних, подви́жник но́вый,/ моли́тву, я́ко копие́ и щит, прие́мый,/ стра́шен де́моном и тьме язы́ческой ста́вый,/ Ге́рмане преподо́бне, моли́ Христа́ Бо́га спасти́ ду́ши на́ши.

Величание

Ублажа́ем тя,/ преподо́бне о́тче Ге́рмане,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь блаженному Николаю Кочанову, Христа ради юродивому, Новгородскому чудотворцу, глас 8

Го́рняя му́дрствуя,/ свя́то жи́тельствуя и сла́вы ми́ра отбега́я,/ юро́дство Христа́ ра́ди избра́л еси́, блаже́нне Нико́лае,/ и ны́не в Вы́шних Тро́ице предстоя́,/ нам, честну́ю па́мять твою́ сла́вящим/ и с ве́рою к ра́це моще́й твои́х приходя́щим,/ исцеле́ние подае́ши,/ и мо́лиши Христа́ Бо́га спасти́ся душа́м на́шим.

Ин тропарь, глас тойже

Терпе́нием свои́м и му́жеством/ Христа́ ра́ди во юро́дство притвори́вся, блаже́нне Нико́лае,/ ху́дость ри́зную име́я,/ тя́гость ва́ра дневна́го поне́сл еси́/ и мра́зы зи́мныя терпе́л еси́./ И ны́не, в Вы́шних Тро́ице предстоя́,/ нам, приходя́щим с ве́рою к ра́це моще́й твои́х,/ исцеле́ние подае́ши, твое́ успе́ние че́стно сла́вящим,/ и мо́лиши Христа́ Бо́га спасти́ся душа́м на́шим.

Кондак, глас 4

Я́ко Андре́я блаже́ннаго учени́к и насле́дник был еси́,/ того́ же стопа́м после́дуя, юро́диве Нико́лае Коча́нов,/ и па́ки от мирски́я ча́ди* униже́ние и пха́ние* прие́мля,/ о и́хже согреше́ниих Христу́ Бо́гу моля́ся./ По честно́м же твое́м успе́нии Вели́кий Но́вград и́мать мо́щи твоя́ в себе́,/ я́ко неистощи́мое сокро́вище,/ подае́ши бо исцеле́ние/ ве́рою к ра́це моще́й твои́х приходя́щим/ и успе́ние твое́ че́стно сла́вящим.

Величание

Ублажа́ем тя,/ святы́й пра́ведный Никола́е,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Собору святых равноапостольных седмочисленных славяноболгарских просветителей, глас 1

Венцы́ хвале́ния увенча́ем седмочи́сленники сла́вныя,/ Кири́лла со Мефо́дием, Кли́мента, Нау́ма со Са́ввою/ и Гора́зда со Ангела́рием,/ я́ко свети́ла возсия́вшия/ и Триеди́наго Бо́га нам благовести́вшия,/ столпы́ незы́блемии Це́ркве Болга́рския/ и Богодухнове́нныя побо́рники сло́ва на́шего,/ бесо́вское и́долом поклоне́ние упраздни́вшия/ и Христу́ Бо́гу моля́щияся/ Це́рковь на́шу утверди́ти/ и душа́м на́шим дарова́ти/ мир и ве́лию ми́лость.

Кондак, глас 4

Непобеди́ми в по́стничестве я́вльшеся,/ ко́зни неви́димых враго́в Боже́ственною си́лою победи́сте,/ мно́жества же научи́вше непросвеще́нных болга́р/ Правосла́вней ве́ре,/ восприя́сте венцы́./ О нас моли́теся Христу́, седмочи́сленницы,/ да́ти прегреше́ний оставле́ние.

Тропарь святителю Горазду, архиепископу Моравскому, глас 2

Досто́йнейший прее́мник учи́теля своего́ Мефо́дия,/ Мора́вския Це́ркве первопресто́льника,/ был еси́, святи́телю о́тче наш Гора́зде,/ столп Правосла́вия преди́вен,/ му́ченик без кро́ве,/ и изгна́ние от своего́ ста́да кова́рными му́жи претерпе́в,/дале́че от своего́ оте́чества, Мора́вския земли́,/ утверди́в про́поведию догма́ты Боже́ственныя и́стины,/ ду́хом соедини́лся еси́ со святы́ми учи́тели свои́ми Кири́ллом и Мефо́дием в Ца́рстве Небе́снем./ Моли́ о нас, блаже́нне,/ ве́рою почита́ющих па́мять твою́,/ умири́ти мир и спасти́ ду́ши на́ша.

Тропарь равноапостольному Клименту, архиепископу Охридскому, глас 4

Словесы́ наста́вил еси́ язы́ки в ве́ру Христо́ву,/ де́лы же возвы́сил еси́ себе́ к Боже́ственней жи́зни,/ святи́телю Кли́менте равноапо́стольне,/ чудесы́ сия́я приступа́ющим к тебе́ ве́рою/ и зна́меньми озаря́я Це́рковь пресла́вно,/ сего́ ра́ди честну́ю твою́ па́мять сла́вим.

Ин тропарь, глас тойже

Я́ко труба́ Арха́нгела Бо́жия/ оглаша́вши ро́ди слове́нстии на вся ве́ки/ и к чудеси́ пресла́вному утвержде́ния люде́й твои́х в Правосла́вии/ приглаша́еши неиждива́емо* чудеса́ ве́лия да́же доны́не./ Те́мже с любо́вию почита́ем присночестну́ю па́мять твою́,/ святи́телю Кли́менте равноапо́стольне,/ и мо́лим:/ моли́ся о душа́х на́ших.

Кондак, глас 3

Храм твой, свя́те, врачевство́ духо́вное/ пресла́вно показу́ется ве́рою приступа́ющим,/ всех бо разли́чных боле́зней избавля́ет,/ стра́сти же душ вся́ческия усыпа́ет./ Сего́ ра́ди тя, всеблаже́нне,/ те́пла предста́теля имену́ем.

Тропарь равноапостольному Науму Охридскому, глас 4

Мир оста́вил еси́, прилепи́вся Христу́/ плоть распя́л еси́, пожи́в Ду́ху,/ Нау́ме всеблаже́нне,/ потща́лся еси́ апо́стольским подвиза́тися тече́нием/ и улови́л еси́ к ве́ре болга́рская неисче́тная мно́жества./Те́мже моли́твами твои́ми/ изба́ви нас от искуше́ний.

Кондак, глас 3

Све́тлых твои́х по́двигов пречестна́я па́мять,/ я́ко ве́лие со́лнце,/ всем возсиява́ет,/ ли́ца воспева́ющих тя просвеща́ет,/ де́моны и вся́ку боле́знь отгоня́ет:/ сего́ ра́ди, соше́дшеся, любо́вию/ сию́ ве́рно восхва́лим.

Тропари и Кондаки равноапостольным Кириллу и Мефодию, учителям Словенским

См. 14 февраля, 6 апреля и 11 мая ст. ст.

Величание

Велича́ем вас,/ святи́и равноапо́столи седмочи́сленнии,/ Кири́лле, Мефо́дие, Кли́менте, Нау́ме, Са́вво, Гора́зде и Ангиля́рие,/ вся слове́нския страны́ уче́ньми свои́ми просвети́вшии/ и ко Христу́ приве́дшии.

Тропарь Собору Смоленских святых, глас 4

Собо́ре святы́х земли́ Смоле́нския,/ вода́ми свяще́ннаго Днепра́ омове́нныя,/ святи́телие, преподо́бнии, страстоте́рпцы и благове́рнии,/ апо́стольскую ве́ру соблю́дшии,/ се ны́не Святе́й Тро́ице с Богоро́дицею и ли́ки Безпло́тных предстоя́ще,/ вода́ми благоче́стия зе́млю Ру́сскую напая́ете,/ да́рующе правосла́вным по́мощь Небе́сную/ во утвержде́ние ве́ры/ и спасе́ние душ на́ших.

Кондак, глас 3

Небе́сныя Цари́цы путеводи́тельством,/ подвигополо́жницы земли́ Смоле́нския,/ земны́й путь в Правосла́вней ве́ре проше́дшии/ и святы́х оте́ц преда́ния сохра́ншии,/ моли́те путь ве́ры и нам соблюсти́,/ смире́нно смири́вшагося до сме́рти кре́стныя Сы́на Бо́жия подража́юще,/ моли́твами Богоро́дицы,/ и спасти́ся душа́м на́шим.

Величание

Велича́ем вас,/ вси святи́и, в земли Смоле́нской просия́вшии,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь Божией Матери ради иконы Ее, именуемой «Одигитрия» («Путеводительница»), глас 4

К Богоро́дице приле́жно ны́не притеце́м,/ гре́шнии и смире́ннии, и припаде́м/ в покая́нии зову́щи из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи,/ Тя бо и еди́ну наде́жду и́мамы.

Слава и ныне:

Не умолчи́м никогда́, Богоро́дице,/ си́лы Твоя́ глаго́лати, недосто́йнии:/ а́ще бо Ты не бы предстоя́ла моля́щи,/ кто бы нас изба́вил от толи́ких бед?/ Кто же бы сохрани́л до ны́не свобо́дны?/ Не отсту́пим, Влады́чице, от Тебе́:/ Твоя́ бо рабы́ спаса́еши при́сно от вся́ких лю́тых.

Кондак, глас 6

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице,/ Ты нам помози́,/ на Тебе́ наде́емся,/ и Тобо́ю хва́лимся:/ Твои́ бо есмы́ раби́,/ да не постыди́мся.

Ин кондак, глас тойже

Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас,/ ве́рно зову́щих Ти:/ ускори́ на моли́тву и потщи́ся на умоле́ние,/ предста́тельствующи при́сно, Богоро́дице, чту́щих Тя.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь апостолам и диаконам Прохору, Никанору, Тимону и Пармену, глас 3

Апо́столи святи́и Про́хоре, Никано́ре, Ти́моне и Парме́не,/ моли́те Ми́лостиваго Бо́га/ да прегреше́ний оставле́ние/ пода́ст душа́м на́шим.

Кондак, глас 1

Диа́кони че́стнии/ и самови́дцы Сло́ва,/ и сосу́ди избра́ннии яви́стеся ве́ры,/ Никано́р, Про́хор, Парме́н и Ти́мон, сла́внии;/ те́мже днесь свяще́нную па́мять ва́шу пра́зднуем,/ в весе́лии се́рдца вас ублажа́юще.

Величание

Велича́ем вас,/ святи́и апо́столи Про́хоре, Никано́ре, Ти́моне и Парме́не,/ весь мир уче́ньми свои́ми просвети́вшия/ и вся концы́/ ко Христу́ приве́дший.

Тропарь святителю Питириму, епископу Тамбовскому, глас 4

Ве́ры и благоче́стия наста́вниче,/ Це́ркве свети́льниче, мона́шествующих о́бразе,/ святи́телю Питири́ме прему́дре,/ ста́до твое́ благоче́стно упа́сл еси́/ и ко Христу́ приве́л еси́./ Те́мже в Вы́шних ве́нцем сла́вы укра́шен,/ с на́ми на земли́ ду́хом пребыва́еши, сия́я чудесы́./ Моли́ Христа́ Бо́га/ спасти́ся душа́м на́шим.

Кондак, глас 8

Мона́хов наста́вника изря́дна и святи́теля всем лю́дем ми́лостива,/ чудотво́рца преди́вна и моли́твенника о нас неусы́пна,/ соше́дшеся воспои́м Питири́ма, Тамбо́вския земли́ похвалу́.

Величание

Велича́ем тя,/ святи́телю о́тче Питири́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Моисею, чудотворцу Печерскому, в Дальних пещерах почивающему, глас 1

Ве́лия исправле́ния и кре́пкия по́двиги/ во псалмопе́ниих же и коленопреклоне́ниих безчи́сленных показа́вый/ и мно́гими труды́ и чудоде́йствии,/ Богоно́се Моисе́е, просия́вый,/ моли́ Христа́ Бо́га/ во е́же спасти́ся нам.

Кондак, глас тойже

Явля́я тве́рдую и неразори́мую свою́ любо́вь ко Го́споду,/ по́ясом желе́зным Его́ ра́ди поя́сался еси́,/ к сему́ и крест желе́зен при́сно на себе́ носи́л еси́ ве́лий,/ преподо́бне Моисе́е,/ в ко́ем стесне́нии сый, е́же и де́лы ручны́ми удруча́лся еси́,/ за е́же вели́кими чудесы́ обога́щся и Ца́рствию Христо́ву о́бщник я́влься,/ моли́ и нам в то́жде всели́тися.

Величание

Ублажа́ем тя,/ преподо́бне о́тче Моисе́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее Гребневская, глас 8

Днесь, я́ко со́лнце пресве́тло,/ просия́ в Росси́йстей стране́, в конце́ ея́ полу́деннем,/ всечестна́я ико́на Твоя́, Влады́чице,/ ю́же благове́рный вели́кий князь Дими́трий в ца́рствующий град Москву́ принесе́./ Све́тло пра́зднуем, благове́рнии лю́дие, честна́го о́браза прише́ствие,/ моля́щеся приле́жно:/ Влады́чице Богоро́дице, моли́ся Сы́ну Твоему́, Христу́ Бо́гу на́шему,/ изба́вити ца́рствующий град Москву́ невреди́мо, и вся правосла́вныя христиа́ны/ от ва́рварскаго плене́ния и междоусо́бныя бра́ни, и всех наве́т вра́жиих:/ Тебе́ бо Еди́ну Засту́пницу и́мамы.

Кондак, глас тойже

От святы́я ико́ны Твоея́, Богоро́дице Де́во,/ источа́ются исцеле́ния, я́ко ре́ки мно́ги,/ я́же ви́девше росси́йстии лю́дие, си́це глаго́лем:/о Пресвята́я Влады́чице Богоро́дице!/ Не забу́ди гре́шных раб Твои́х,/ моля́щихся Христу́ Бо́гу на́шему, спасти́ся нам.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь Божией Матери ради иконы Ее «Умиление», или «Радость всех радостей», Серафимо-Дивеевской, глас 4

К Богоро́дице со умиле́нием припаде́м,/ вси грехми́ обремене́ннии,/ чудотво́рную Ея́ ико́ну Умиле́ния облобыза́юще/ и вопию́ще со слеза́ми:/ Влады́чице, прии́ми моле́ние недосто́йных раб Твои́х/ и пода́ждь нам, прося́щим,/ ве́лию Твою́ ми́лость.

Кондак, глас 3

Ю́же подража́я непло́дную смоко́вницу,/ аз, окая́нный, умиле́ния плода́ отню́д не приношу́ и посече́ния страшу́ся,/ но, взира́я к чудотво́рней ико́не Твое́й Умиле́ния, Влады́чице,/ стеню́ от се́рдца и вопию́:/ умили́ся, Благосе́рдая,/ и мне, окамене́нному се́рдцем,/ благоволи́ пода́ти душе́вное и серде́чное умиле́ние.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь Божией Матери ради иконы Ее, именуемой Тамбовская-Смоленская, глас 4

Днесь све́тло красу́ется град Тамбо́в,/ и святи́тель Христо́в Питири́м ра́дуется./ Сия́ет бо ны́не чудесы́ ико́на Твоя́, Влады́чице,/ ю́же из первопресто́льнаго гра́да Москвы́ святи́тель принесе́,/ и ди́вное лю́дем явля́ет Твое́ заступле́ние,/ подаю́щи исцеле́ние всем, с ве́рою к Тебе́ притека́ющим./ Те́мже уми́льно вопие́м Ти:/ спаса́й нас ико́ною Твое́ю,/ Де́во Всепе́тая.

Кондак, глас 3

Ангели Бо́жии и вси святи́и на Небеси́ ны́не ра́дуются,/ ви́дяще сла́ву Твою́, Пречи́стая Де́во./ Ве́рнии бо лю́дие пред ико́ною Твое́ю/ прино́сят Тебе́ благода́рственныя моли́твы,/ ра́ди ми́лости и щедро́т, явле́нных всем нам,/ наипа́че же граду на́шему./ Потщи́ся, Богоро́дице Де́во,/ и в пре́дния* дни спаса́ти нас Твои́м заступле́нием.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь Божией Матери ради иконы Ее, именуемой Шуйская-Смоленская, глас 4

Я́ко многоце́нное сокро́вище прия́т град Шу́я/ чуде́сно напи́санную ико́ну Твою́,/ Пресвята́я Влады́чице, Де́во Богоро́дице,/ во исцеле́ние лю́тыя я́звы и во утеше́ние правосла́вных Тобо́ю дарова́нную,/ от нея́же исто́чники благода́тныя и до ны́не оби́льно излива́ются./ Проба́ви, Пречи́стая, и на бу́дущее вре́мя ми́лости Твоя́ ве́дущим Тя,/ храни́ град Твой и всю Ру́сскую зе́млю/ и спаса́й люде́й, к Тебе́ с ве́рою и любо́вию притека́ющих.

Ин тропарь, глас тойже

Всеблага́я и преми́лостивая Засту́пнице ро́да христиа́нскаго,/ Пречи́стая Де́во Богоро́дице,/ припа́дающе пред свя́тым и чудотво́рным Твои́м о́бразом,/ и́мже от лю́таго смертоно́сия град Шу́ю дре́вле изба́вила еси́,/ уми́льно взыва́ем Ти:/ не преста́й под кро́вом Своея́ бла́гости/ сохраня́ти от бед и обстоя́ний град Твой/ и вся гра́ды и ве́си страны́ Росси́йския/ и моли́ти Сы́на Твоего́, Христа́ Бо́га на́шего,/ да спасе́т ду́ши на́ша.

Кондак, глас 6

Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́ я́ко Блага́я,/ на по́мощь нас, ве́рно зову́щих Ти,/ ускори́ на моли́тву и потщи́ся на умоле́ние,/ предста́тельствующи при́сно, Богоро́дице, чту́щих Тя.

Ин кондак, глас 3

Ма́ти Бо́жия Пресвята́я,/ стено́ Христиа́ном, гра́да на́шего Шу́и покро́в и заступле́ние!/ Моли́твы раб Твои́х, ко ико́не Твое́й припа́дающих,/ приими́, во испове́дании Правосла́вныя ве́ры укрепи́,/ от вся́кия напа́сти и беды́ изба́ви,/ ско́рби земны́я на ра́дость преложи́/ и Сы́на Твоего́ моли́ гра́ду и лю́дем Твои́м в ми́ре спасти́ся.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь Божией Матери ради иконы Ее, именуемой Югская-Смоленская, глас 4

Днесь, я́ко со́лнце пресве́тлое,/ возсия́ нам на возду́се/ всечестна́я ико́на Твоя́, Влады́чице,/ луча́ми ми́лости мир просвеща́ющи,/ ю́же вели́кая Росси́я,/ я́ко не́кий дар Боже́ственный, свы́ше благогове́йне восприе́мши,/ прославля́ет Тя, Богома́ти, всех Влады́чицу,/ и от Тебе́ ро́ждшагося Христа́ Бо́га на́шего/ велича́ет ра́достно./ Ему́же моли́ся, о Госпоже́ Цари́це Богоро́дице,/да сохрани́т вся гра́ды и страны́ христиа́нския/ невреди́мы от всех наве́т* вра́жиих/ и спасе́т ве́рою покланя́ющихся/ Его́ Боже́ственному и Твоему́ Пречи́стому о́бразу,/ Де́во Неискусобра́чная.

Тропарь мученику Каллинику, глас 4

Му́ченик Твой, Го́споди... (общий мученику).

Кондак, глас 2

Го́рняя кра́сная досто́йно ны́не насле́довал еси́,/ Христо́вою бо зело́ любо́вию разже́гся,/ на о́гнь, Каллини́че, тем му́жественно дерзну́л еси́,/ Ему́же и ны́не предстоя́,/ не преста́й моля́ о всех нас.

Величание

Велича́ем тя,/ страстоте́рпче святы́й Каллини́че,/ и чтим честна́я страда́ния твоя́,/ я́же за Христа́ претерпе́л еси́.

Тропарь преподобным Константину и Косме Косинским, Старорусским, глас 3

Я́ко вели́каго во отце́х Варлаа́ма учени́к,/ прехва́льне Константи́не,/ и сам ча́до послуша́ния, блаже́ннаго Косму́ возрасти́л еси́,/ те́мже, преподо́бнии, вку́пе престо́лу Влады́чню предстоя́щий,/ моли́твами ва́шими в ве́ре Правосла́вней нас утверди́те,/ в послуша́нии Це́ркви Святе́й укрепи́те/ и вся поле́зная душа́м на́шим испроси́те.

Кондак, глас 2

Волне́ний мно́жество невла́жно проходя́ще... (общий преподобным).

Величание

Ублажа́ем вас,/ преподо́бнии отцы́ Константи́не и Космо́,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь мученице Серафиме деве, глас 8

Неве́сто Христо́ва возлю́бленная, Серафи́мо,/ насле́днице Ца́рствия Небе́снаго,/ до́бре за Го́спода пострада́вшая/ и кро́вию твое́ю обагре́нная,/ и а́ки ца́рскою багряни́цею, украше́нная,/ помина́й нас, соверша́ющих святу́ю па́мять твою́.

Кондак, глас 2

Серафи́мскою любо́вию Го́спода возлюби́ла еси́,/ свята́я де́во Серафи́ме,/ и всю себе́ за Го́спода на муче́ние предаде́,/до́ндеже дости́гла еси́ Ца́рствия Небе́снаго.

Величание

Велича́ем тя,/ страстоте́рпице Христо́ва Серафи́ме,/ и чтим честно́е страда́ние твое́,/ е́же за Христа́/ претерпе́ла еси́.

Тропарь святителю Николаю Чудотворцу, архиепископу Мир Ликийских, глас 4

Чу́дное и сла́вное рождество́ твое́, святи́телю Нико́лае,/ Це́рковь днесь правосла́вных све́тло пра́зднует,/ и́бо стоя́нием ногу́ твое́ю/ яви́ тя Госпо́дь и провозвести́* бы́ти свети́льника и учи́теля миря́ном,/ весь мир обогаща́юща и просвеща́юща чудесы́./ Тем вопие́м ти:/ моли́ Христа́ Бо́га спасти́ся душа́м на́шим.

Кондак, глас 2

В Ми́рех ро́ждься, свя́те Нико́лае,/ от благоро́дна ко́рене,/ я́ко благопло́дна ветвь, прозя́бл еси́,/ испо́лнь бо быв Боже́ственных даро́в,/ я́ко со́лнце заря́ми, весь мир чудесы́ просвети́л еси́./ Сего́ ра́ди прославля́ем тя,/ я́ко ученика́ и таи́нника Бо́жия благода́ти.

Величание

Велича́ем тя,/ святи́телю о́тче Нико́лае,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Роману Киржачскому, глас 4

От ю́ности горя́чим жела́нием Боже́ственныя любве́ разжига́емь,/ жите́йския молвы́ оста́вль, преподо́бне,/ учени́к вели́каго Се́ргия был еси́,/ безмо́лвием и жесто́ким пребыва́нием,/ бде́нием и моли́твою, посто́м после́дуя Христу́;/ сего́ ра́ди избра́нием учи́теля твоего́ свяще́нства сподобля́ешися/ от руки́ блаже́ннаго Алекси́я/ и па́стырь поставля́ешися оби́тели, я́же на Киржаче́,/ в не́йже трудолю́бно пожи́в, ко Го́споду отхо́диши,/ Рома́не преподо́бне,/ моли́ о нас Христа́ Бо́га,/ со учи́телем твои́м преподо́бным Се́ргием,/ спасти́ся душа́м на́шим.

Кондак, глас 8

Жития́ треволне́ния и мяте́ж мирски́й/ и страстна́я взыгра́ния в ничто́же вмени́в,/ пусты́нный трудолю́бник показа́лся еси́,/ мона́хов наста́вник, Рома́не преподо́бне,/ и́ноков собира́тель и моле́бный ко Го́споду честны́й рачи́тель,/ моли́ о нас Христа́ Бо́га, со учи́телем твои́м преподо́бным Се́ргием,/ спасти́ся душа́м на́шим.

Величание

Ублажа́ем тя,/ преподо́бне о́тче Рома́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь новомученикам и исповедникам Христовым, иеромонахам Серафиму и Феогносту, в земле Казахской просиявшим, глас 1

Любве́ ра́ди Христо́вы оте́чество свое́ оста́вльше,/ вся ми́ра сего́ кра́сная, я́ко скороисчеза́ющая, презре́вше,/ го́рняго Иерусали́ма взыску́юще,/ на гора́х Тянь-Ша́ня в по́двизех благоче́стия Святу́ю Тро́ицу просла́вили есте́./ И венца́ми добропобе́днаго му́ченичества украси́вшеся,/ гра́ду Алма-Ате́ богодарова́ннии покрови́телие яви́лися есте́,/ преподобному́ченицы Серафи́ме и Феогно́сте,/ Правосла́вия му́жественнии испове́дницы./ Те́мже и мы, духо́вная ча́да ва́ша, любо́вию вопие́м:/ сла́ва Да́вшему вам кре́пость,/ сла́ва Венча́вшему вас,/ сла́ва Подаю́щему ва́ми ми́лости и исцеле́ния.

Кондак, глас 2

Благо́е и́го Христо́во на себе́ восприе́мше,/ и ле́гкое бре́мя Его́ любо́вию облобыза́вше,/ житие́м свои́м а́гнца Бо́жия пропове́давше,/ за и́стину, ра́дующеся, пострада́ли есте́,/ и в поко́й Небе́сный преше́дше,/ с ли́ки святы́х Престо́лу Бо́жию предстои́те,/ преподобному́ченицы Серафи́ме и Феогно́сте,/ гра́ду Алма-Ате́ испроси́те ми́ра и всем чту́щим вас ве́лию ми́лость.

Величание

Ублажа́ем вас,/ преподобному́ченицы Серафи́ме и Феогно́сте,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь святителю Николаю ради иконы его Великорецкой, глас 3

Ако драгоце́нное бога́тство,/ прии́де к нам от Вели́кия реки́ Вя́тки/ в ца́рствующий сей град наш Москву́/ честна́я ико́на о́браза твоего́, святи́телю Нико́лае,/ и мно́гая у́бо чудеса́ в прише́ствии свое́м сотвори́,/ боля́щия исцели́ и вся челове́ки удиви́./ Сего́ ра́ди повеле́нием самоде́ржца царя́/ списа́ся с нея́ сия́ честна́я ико́на твоя́/ на просвеще́ние и моле́ние всем лю́дем ца́рска гра́да,/ ю́же днесь зрим и покланя́емся ей,/ моля́ще тя, таи́нника Христо́ва: / моли́, свя́те, о всех нас,/ дарова́ти нам мир и ве́лию ми́лость.

Кондак, глас 4

Днесь всеусе́рдне восхваля́ем тя, святи́телю о́тче Нико́лае,/ и честны́й сей о́браз твой ве́рно почита́ем,/ и любе́зно целу́ем и*,/ я́ко ве́лие таково́е дарова́ние нам от Христа́ Бо́га дарова́ся,/ па́че бо сапфи́ра и топа́зия,/ принесе́ся к нам от ме́ста, реко́маго* Вя́тка, в ца́рский град,/ на исцеле́ние всем приходя́щим к нему́ с ве́рою./ Тем спрославля́ем твою́ святу́ю па́мять,/ моли́ спасти́ся душа́м на́шим.

Величание

Велича́ем тя,/ святителю о́тче Нико́лае,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Николаю ради иконы его Зарайской, глас 2

Пресве́тлый хра́ме Свята́го Ду́ха,/ Богому́дре о́тче Нико́лае,/ благода́тию небе́с освяти́ ду́ши на́ша,/ заступи́ и покры́й всечестны́м твои́м омофо́ром,/ его́же прия́л еси́ от рук Пречи́стой Де́вы,/ просвети́ нас све́том за́поведей Христа́,/ от Него́же прия́л еси́ глаго́лы жи́зни./ Моли́ бла́гость Отца́ Небе́снаго/ спасти́ся правосла́вно чту́щим тя/, да́руя нам ве́лию ми́лость.

Тропарь апостолам Силе, Силуану, Крискенту, Епенету и Андронику, глас 3

Лик пяточи́сленный апо́стол Христо́вых пе́сньми восхва́лим,/ Си́лу, Силуа́на, Криске́нта, Андрони́ка со Епене́том,/ си́и бо и́дольскую лесть обличи́ша/ и, неве́рныя в ве́ру улови́вше,/ мо́лят непреста́нно о всех, па́мять их велича́ющих.

Ин тропарь, глас тойже

Апо́столи святи́и, Си́ле, Силуа́не, Криске́нте, Епене́те и Андрони́че,/ моли́те Ми́лостиваго Бо́га,/ да прегреше́ний оставле́ние пода́ст душа́м на́шим.

Кондак, глас 4

Ло́зие яви́стеся Христо́ва виногра́да,/ гро́здие принося́ще, му́дрии, в доброде́телех,/ вино́ нам спасе́ния источа́юще,/ е́же прие́млюще, весе́лия исполня́емся,/ пра́зднующе всечестну́ю ва́шу па́мять,/ в ню́же моли́теся о оставле́нии грехо́в на́ших,/ Госпо́дни апо́столи.

Величание

Велича́ем вас,/ святи́и апо́столи Си́ле, Силуа́не, Криске́нте, Епене́те и Андрони́че,/ весь мир уче́ньми свои́ми просвети́вшия/ и вся концы́/ ко Христу́ приве́дшия.

Тропарь мученику Иоанну Воину, глас 4

Всеблага́го Бо́га и Царя́/ благове́рный раб и во́ин яви́лся еси́, Иоа́нне чудоде́телю,/ пострада́в бо ра́ди ве́ры му́жески,/ блаже́нно же сконча́в тече́ние,/ зри́ши Всетворца́ Го́спода в небесе́х светле́йше,/ от Него́же прие́м дарова́ние чуде́с,/ стра́ждущим челове́ком во вся́ких напа́стех помога́еши:/ укрепля́еши во́ины в ра́тех,/ от враго́в плене́ния, ран же и внеза́пных смерте́й и от бед лю́тых изыма́еши*./ Те́мже моли́ Влады́ку Христа́, приснопа́мятне,/ да во вся́ком обстоя́нии сотвори́т нам ми́лость,/ и не введе́т нас во искуше́ния,/ но спасе́т ду́ши на́ша, я́ко Человеколю́бец.

Ин тропарь, глас 8

Блаже́нство ева́нгельское возлюби́в, Богому́дре Иоа́нне,/ чистоту́ се́рдца де́вством почти́л еси́./ Те́мже суету́ ми́ра сего́ пренебре́г,/ устреми́лся еси́ зре́ти Бо́га,/ И́же тя просла́ви чудесы́ во врачева́нии разли́чне стра́ждущих./ Сего́ ра́ди мо́лим тя,/ проси́ нам у Христа́ Го́спода от вся́ких скорбе́й избавле́ния/ и получе́ния Ца́рства Небе́снаго.

Кондак, глас 6

Благочести́ваго во́ина Христо́ва,/ победи́вшаго враги́ душе́вныя и теле́сныя Богому́дренно,/ Иоа́нна му́ченика достодо́лжно пе́сньми восхва́лим:/ чудоде́йствуя бо врачу́ет богатода́рно скорбя́щия лю́ди,/ и мо́лится Го́споду Бо́гу/ от вся́ких бед спасти́ правове́рныя.

Ин кондак, глас 3

Вели́кая ско́рбным лю́дем ра́дость в беда́х обрета́ешися, чудотво́рче Иоа́нне:/ вся́кия бо стра́сти моля́щим тя врачу́еши,/ исполня́я их проше́ния./ Те́мже и ны́не моли́ Го́спода,/ да спасе́т ны в ми́лости Свое́й.

Величание

Велича́ем тя,/ страстоте́рпче святы́й Иоа́нне, / и чтим честна́я страда́ния твоя́,/ я́же за Христа́/ претерпе́л еси́.

Тропарь преподобному Герману Соловецкому, глас 8

Жела́нием духо́вным от ю́ности распаля́емь, преподо́бне Ге́рмане,/ Христу́ те́сным жития́ путе́м после́довал еси́,/ и в морски́й пусты́нный о́стров, а́ки в ти́хое приста́нище, всели́вся,/ в нем мно́га ле́та по́стнически пожи́л еси́,/ иде́же блаже́нным отце́м Зоси́ме и Савва́тию сожи́тель был еси́./ С ни́миже моли́ Христа́ Бо́га о нас,/ любо́вию чту́щих святу́ю па́мять твою́.

Ин тропарь, древний, глас тойже

Украси́вся, прему́дре, по́стническим житие́м,/ спо́стник был еси́ и сожи́тель в морсте́м ото́це/ преподо́бным отце́м Зоси́ме и Савва́тию,/ сподвиза́вся в моли́твах, в труде́х и в поще́ниих,/ преподо́бне о́тче Ге́рмане,/ но я́ко име́я дерзнове́ние к Бо́гу,/ моли́ изба́вити нас от враг и спасти́ ду́ши на́ша.

Кондак, глас 4

Вы́шних жела́я,/ вся до́лу влеку́щая возненави́дел еси́/ и, оте́чество свое́ оста́вль,/ в помо́рие пусты́нное отше́л еси́,/ та́же в мо́рский о́стров удали́вся,/ в нем мно́га ле́та Го́сподеви порабо́тал еси́./ Те́мже, па́мять твою́ пра́зднующе,/ любо́вию вопие́м ти:/ ра́дуйся, Ге́рмане Богому́дре, о́тче наш.

Величание

Ублажа́ем тя,/ преподо́бне о́тче Ге́рмане,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь праведной Ангелине, деспотиссе* Сербской, глас 8

В тебе́ ма́ти изве́стно спасе́ся, е́же по о́бразу,/ прии́мши бо крест, после́довала еси́ Христу́/ и, де́ющи, учи́ла еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со а́нгелы сра́дуется, преподо́бная Ангели́но, дух твой.

Кондак, глас тойже

Вы́шняго живота́ жела́ющи сподо́битися,/ ни́жнюю пи́щу тща́тельно оста́вила еси́,/ и бога́тство твое́ росточи́ла еси́ ни́щим,/ и Небе́сное бога́тство прия́ла еси́,/ и по сме́рти нас освяща́еши,/ и чудеса́ твоя́, всехва́льная Ангели́но, источа́вши./ Те́мже твое́ успе́ние свято́е почита́ем, взыва́юще:/ ра́дуйся, ма́ти прехва́льная.

Величание

Ублажа́ем тя,/ преподо́бная ма́ти Ангели́но,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Кресту, глас 1

Спаси́, Го́споди, лю́ди Твоя́,/ и благослови́ достоя́ние Твое́,/ побе́ды на сопроти́вныя да́руя,/ и Твое́ сохраня́я Кресто́м Твои́м жи́тельство.

Тропарь священномученику Вениамину, митрополиту Петроградскому и Гдовскому, глас 1

Свети́льник всесве́тлый/ во гра́де свята́го Петра́ яви́лся еси́,/ па́стырю до́брый, священному́чениче о́тче Вениами́не./ Любо́вь и милосе́рдие в сердца́х ве́рных насажда́я,/ благотвори́ти призыва́л еси́ терпя́щим глад и нищету́./ Сего́ ра́ди и мы к тебе́ прибега́ем,/ и с ве́рою вопие́м ти:/ моли́ Ми́лостиваго Бо́га/ оте́чество на́ше в Правосла́вии и благоче́стии утверди́ти,/ мир Це́ркви дарова́ти/ и душа́м на́шим ве́лию ми́лость.

Кондак, глас 6

От ю́ности и́го Христо́во на ра́мо взем,/ и́стинный страж Правосла́вныя Це́ркве яви́лся еси́,/ священному́чениче Вениами́не./ Клевету́, у́зы, страда́ния и суд непра́ведный/ от беззако́нных му́жественне претерпева́я,/ святы́ню церко́вную на поруга́ние не преда́л еси́./ Те́мже и Христо́с да́ром терпе́ния и любве́ тя испо́лни,/ во е́же пред му́ченическою кончи́ною со благодаре́нием взыва́ти:/ за вся, Го́споди, сла́ва Тебе́.

Величание

Велича́ем тя,/ священному́чениче Вениами́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь праведному Евдокиму Каппадокиянину, глас 4

От земли́ Воззва́вый тя к Небе́сным селе́нием,/ соблюда́ет и по сме́рти невреди́мо те́ло твое́, свя́те Евдоки́ме:/ ты бо в целому́дрии и чи́стом жи́тельстве, блаже́нне,/ жи́тельствовал еси́, не оскверни́в пло́ти./ Те́мже со дерзнове́нием моли́ Христа́ Бо́га спасти́ся нам.

Кондак, глас 2

Вы́шних жела́я, с вы́шними совокупля́яся,/ и колесни́цу о́гненную, Боже́ственными восхожде́ньми доброде́телей, соверши́л еси́ ду́шу,/ преблаже́нне Евдоки́ме,/ на земли́ пожи́в я́ко безпло́тен,/ Зижди́телю всех благоугоди́л еси́.

Величание

Велича́ем тя,/ святы́й пра́ведный Евдоки́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Кресту, глас 1

Спаси́, Го́споди, лю́ди Твоя́,/ и благослови́ достоя́ние Твое́,/ побе́ды на сопроти́вныя да́руя,/ и Твое́ сохраня́я Кресто́м Твои́м жи́тельство.

Кондак, глас 4

Вознесы́йся на Крест во́лею,/ тезоимени́тому Твоему́ но́вому жи́тельству⁴¹/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,/ непобеди́мую побе́ду.

Величание

Велича́ем Тя,/ Живода́вче Христе́,/ и чтим Крест Твой святы́й,/ и́мже нас спасл еси́/ от рабо́ты вра́жия⁴².

Тропарь Всемилостивому Спасу, глас 8

С вы́шних призира́я, убо́гия прие́мля,/ посети́ нас, озло́бленныя грехи́, Влады́ко Всеми́лостиве,/ моли́твами Богоро́дицы да́руй душа́м на́шим ве́лию ми́лость.

Ин тропарь, глас 4

Свети́льниче со́лнечный, Всеми́лостивый Спа́се,/ просвеще́нием сия́ния Твоего́ пода́й и нам сло́во,/ да восхва́лим чи́стою со́вестию/ Твое́ пребоже́ственное пра́зднество,/ Тебе́ же, Единаро́днаго Сы́на,/ единосу́щна с Ду́хом, сла́вяще,/ да́руеши бо нам мир и ве́лию ми́лость.

Кондак, глас 4

Вся́кия скве́рны, Всеми́лостиве Спа́се, аз бых де́латель,/ и во отча́яния ров впа́дся,/ но стеню́* от се́рдца и вопию́ к Тебе́, Сло́ве:/ уско́ри, Ще́дрый, и потщи́ся на по́мощь на́шу,/ я́ко Ми́лостив.

Тропарь семи мученикам Маккавеям, глас 1

Боле́зньми святы́х, и́миже о Тебе́ пострада́ша,/ умоле́н бу́ди, Го́споди,/ и вся на́ша боле́зни исцели́,/ Человеколю́бче, мо́лимся.

Кондак, глас 2

Прему́дрости Бо́жия столпи́ седмочи́сленнии,/ и Боже́ственнаго Све́та свети́льницы седмосве́щнии,/ Маккаве́и всему́дрии,/ пре́жде му́чеников преве́лии му́ченицы;/ с ни́миже всех Бо́гу моли́теся/ спасти́ся почита́ющим вас.

Тропарь первомученику и архидиакону Стефану, глас 4

Ца́рским венце́м венча́ся/ твой верх от страда́ний,/ я́же претерпе́л еси́ по Христе́ Бо́зе,/ му́чеников первострада́льче Стефа́не:/ ты бо иуде́йское обличи́вый неи́стовство,/ ви́дел еси́ твоего́ Спа́са одесну́ю Отца́,/ Того́ у́бо моли́ о душа́х на́ших.

Ин тропарь, глас 3

Апо́столом совсе́льник/ и страстоте́рпцем первострада́лец,/ Христо́в служи́тель, прехва́льне Стефа́не,/ пе́рвее бо соверши́в муче́ния тече́ние,/ безчи́сленныя ро́ды челове́к ра́вно Подвигополо́жнику Христу́ приведе́./ Те́мже, я́ко апо́стола и страда́льца верхо́внаго/ чту́ще тя, мо́лим:/ моли́ Христа́ Бо́га/дарова́ти нам ве́лию ми́лость.

Ин тропарь, глас 4

По́двигом до́брым подвиза́лся еси́,/ первому́чениче Христо́в и апо́столе, и архидиа́коне Стефа́не,/ и мучи́телей обличи́л еси́ нече́стие,/ ка́мением бо побие́н от рук беззако́нных, вене́ц от я́же свы́ше десни́цы прия́л еси́,/ и к Бо́гу взыва́л еси́, вопия́:/ Го́споди, не поста́ви им греха́ сего́.

Кондак, глас 6

Пе́рвый се́ялся еси́ на земли́ Небе́сным Де́лателем,/ всехва́льне Стефа́не,/ пе́рвый на земли́ за Христа́ кровь излия́л еси́, блаже́нне,/ пе́рвый от Него́ побе́ды венце́м увя́злся еси́ на небесе́х,/ страда́льцев нача́ло,/ вене́чниче му́чеников, первострада́льне.

Ин кондак, глас 3

Влады́ка вчера́ нам пло́тию прихожда́ше,/ и раб днесь от пло́ти исхожда́ше;/ вчера́ Ца́рствуяй пло́тию роди́ся,/ днесь раб ка́мением побива́ется:/ Того́ ра́ди и скончава́ется первому́ченик и Боже́ственный Стефа́н.

Величание

Велича́ем тя,/ страстоте́рпче святы́й первому́чениче архидиа́коне Стефа́не,/ и чтим честна́я страда́ния твоя́,/ я́же за Христа́/ претерпе́л еси́.

Тропарь блаженному Василию, Христа ради юродивому, Московскому, глас 8

Житие́ твое́, Васи́лие, нело́жное, и чистота́ нескве́рна,/ Христа́ ра́ди те́ло твое́ изнури́л еси́ посто́м и бде́нием,/ и мра́зом и теплото́ю со́лнечною,/ и слото́ю* и дожде́вным о́блаком,/ и просвети́ся ли́це твое́, я́ко со́лнце,/ и ны́не прихо́дят к тебе́ Росси́йстии наро́ди и вси лю́дие,/ прославля́юще свято́е твое́ успе́ние./ Тем Христа́ Бо́га моли́,/ да изба́вит ны от ва́рварскаго плене́ния и междоусо́бныя бра́ни/ и мир ми́рови пода́ст и душа́м на́шим ве́лию ми́лость.

Ин тропарь, глас тойже

Якоже бо со́лнце и луна́ нагото́ю свое́ю не срамля́ются,/ та́ко и ты, уго́дниче Христо́в Васи́лие, наг сый, не срамля́шеся,/ восприя́т бо ри́зу Ада́ма первозда́ннаго,/ ю́же он ноша́ше пре́жде в рай,/ ты же сию́ на земли́ поноси́л еси́,/ и был еси́ до́брый купе́ц,/ ели́ко име́яше, вся оста́ви/ и купи́ мздо́ю* терпе́ния своего́ село́,/ на не́мже сокрове́н безце́нный Би́сер, Христо́с./ Сего́ ра́ди яви́ся всем гре́шным о́браз покая́ния/ и всели́ся в ра́йскую широту́,/ и, предстоя́ Христо́ви,/ не забу́ди град, в не́мже обита́, и лю́ди, преблаже́нне,/ и моли́ спасти́ ду́ши на́ши.

Ин тропарь, глас 1

Плоть удручи́вшу тя злострада́нием,/ду́шу же просвети́вша чистото́ю се́рдца,/ обогати́лся еси́ благода́тию Пресвята́го Ду́ха, Васи́лие,/ дарова́ти тре́бующим поле́зная./ Сего́ ра́ди неду́жнии, притека́юще к цельбопода́тельному твоему́ гро́бу, премудроюро́де,/ незави́стно прие́млют боле́зней отложе́ние/ и благода́рственно воспева́ют Просла́вльшаго тя/ Еди́наго Человеколю́бца.

Кондак, глас 4

Ду́хом Бо́жиим води́м, преблаже́нне Васи́лие,/ отрясл еси́ мирски́й мяте́ж,/ и жития́ треволне́ния возгнуша́лся еси́,/ и, совле́кся одея́ний тле́нных и обле́кся в ри́зу бесстра́стия,/ убежа́л еси́ ловле́ния льсти́ваго мироде́ржца,/ и был еси́ стра́нен во твое́м язы́це,/ и, па́че земна́го бога́тства избра́в бога́тство Небе́сное,/ увя́злся еси́ венце́м терпе́ния./ И ны́не, преблаже́нне Васи́лие, моли́ Христа́ Бо́га/ о творя́щих святу́ю па́мять твою́, да зове́м ти:/ ра́дуйся, преблаже́нне Васи́лие.

Ин кондак, глас тойже

Яви́л тя есть Госпо́дь ны́нешнему ро́ду/ исцели́теля боле́знем и прогони́теля неду́гом,/любо́вию, Васи́лие, притека́ющим к тебе́/ и призыва́ющим ве́рою моли́твы твоя́.

Величание

Велича́ем тя,/ святы́й пра́ведный Василие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобным Исаакию, Далмату и Фавсту, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви ми́лость Твою́ от нас,/ но моли́твами их/ в ми́ре упра́ви живо́т наш.

Кондак, глас 2

Поще́нием возсия́вшия, я́ко свети́ла,/ и е́реси разврати́вшия ве́рою,/ пе́сньми Исаа́кия восхва́лим и с Далма́том Фа́вста,/ я́ко Христо́вы уго́дники,/ Того́ моля́щия о всех нас.

Величание

Ублажа́ем вас,/ преподо́бнии отцы́ Исаа́кие, Далма́те и Фа́всте,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь преподобному Антонию Римлянину, Новгородскому чудотворцу, глас 4

Ве́тхий Рим, оте́чество твое́, оста́вив,/ на ка́мень, я́ко на ле́гкий кора́бль, возше́л е́си,/ и на нем па́че естества́, а́ки безпло́тен, по вода́м ше́ствовал еси́,/ промышле́нием Боже́ственнаго Ра́зума направля́ем,/ Вели́каго Нова́града дости́гл еси́,/ и оби́тель в нем сотвори́в,/ те́ло твое́ в ней предложи́л еси́, я́ко дар освяще́н./ Тем мо́лим тя, о́тче Анто́ние,/ моли́ Христа́ Бо́га, да спасе́т ду́ши на́ша.

Кондак, глас 8

Ри́мское воспита́ние, Вели́кому же Нову́граду благода́тное процвете́ние,/ мно́гими бо труды́ и по́двиги в нем Бо́гу угоди́л еси́./ Сего́ ра́ди чуде́с дарова́ний от Него́ сподо́бился еси́,/ и те́ло твое́ мно́гими ле́ты соблюде́ нетле́нно./ Мы же сие́ лобыза́юще, ра́достно от души́ вопие́м ти:/ ра́дуйся, о́тче Анто́ние.

Ин кондак, глас 2

Я́ко звезда́, воссия́л еси́ от Ри́ма,/ и, доше́д Богоспаса́емаго Вели́каго Нова́града,/ ту в нем оби́тель сотвори́л еси́,/ и, це́рковь поста́вив,/ созва́ и́нок мно́жество./ С ни́миже моли́ о нас, чту́щих па́мять твою́, да зове́м ти:/ ра́дуйся, преподо́бне о́тче Анто́ние.

Величание

Ублажа́ем тя,/ преподо́бне о́тче Анто́ние,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь семи отрокам, иже во Ефесе, глас 4

Ве́лия ве́ры чудесе́,/ в пеще́ре, я́ко в черто́зе ца́рском,/ святи́и седмь о́троцы пребы́ша,/ и умро́ша без тли,/ и по мно́зех времене́х воста́ша я́ко от сна,/ во увере́ние воскресе́ния всех челове́ков./ Тех моли́твами, Христе́ Бо́же, поми́луй нас.

Ин тропарь, глас 8

Благоче́стия пропове́дники и воскресе́ния уме́рших изобрази́тели,/ Це́ркви столпи́ седмочи́сленныя,/ о́троки всеблаже́нныя пе́сньми восхвали́м:/ ти́и бо по мно́гих ле́тех нетле́ния, а́ки от сна воста́вше,/ всем возвести́ша Я́ве ме́ртвых воста́ние.

Кондак, глас 4

Ми́ра су́щая тле́нная презре́вше,/ и нетле́нныя да́ры прие́мше,/ уме́рше, кроме́ тле́ния пребы́ша./ Те́мже востаю́т по мно́гих ле́тех,/ все погре́бше лю́тых неве́рие,/ я́же во хвале́нии днесь, ве́рнии, восхваля́юще, Христа́ воспои́м.

Ин кондак, глас тойже

Просла́вивый на земли́ святы́я Твоя́,/ пре́жде Втора́го и стра́шнаго прише́ствия Твоего́, Христе́,/ пресла́вным воста́нием о́троков/ показа́л еси́ Воскресе́ние неве́дящим е́,/ нетле́нна одея́ния и телеса́ яви́в,/ и царя́ уве́рил еси́ вопи́ти:/ вои́стинну есть ме́ртвых воста́ние.

Величание

Велича́ем вас,/ святи́и седмь о́троцы, и́же во Ефе́се,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь Божией Матери ради иконы Ее, именуемой Казанская-Пензенская, глас 4

Засту́пнице усе́рдная,/ Ма́ти Го́спода Вы́шняго,/ за всех мо́лиши Сы́на Твоего́, Христа́ Бо́га на́шего,/ и всем твори́ши спасти́ся,/ в держа́вный Твой покро́в прибега́ющим./ Всех нас заступи́, о Госпоже́, Цари́це и Влады́чице,/ и́же в напа́стех, и ско́рбех, и в боле́знех обремене́нных грехи́ многи́ми,/ предстоя́щих и моля́щихся Тебе́ умиле́нною душе́ю/ и сокруше́нным се́рдцем/ пред пречи́стым Твои́м о́бразом со сле́зами/ и невозвра́тно наде́жду иму́щих на Тя,/ избавле́ния всех зол,/ всем поле́зная да́руй/ и вся спаси́, Богоро́дице Де́во:/ Ты бо еси́ Боже́ственный покро́в рабо́м Твои́м.

Кондак, глас 8

Притеце́м, лю́дие, к ти́хому сему́ и до́брому приста́нищу,/ ско́рой Помо́щнице, гото́вому и те́плому спасе́нию, покрову́ Де́вы,/ ускори́м на моли́тву и потщи́мся на покая́ние:/ источа́ет бо нам неоску́дныя ми́лости Пречи́стая Богоро́дица,/ предваря́ет на по́мощь и избавля́ет от вели́ких бед и зол/ благонра́вныя и богобоя́щияся рабы́ Своя́.

Величание

Велича́ем Тя,/ Пресвята́я Де́во,/ и чтим о́браз Твой святы́й,/ и́мже изба́вихомся/ от пога́ных наше́ствия.

Тропарь предпразднству Преображения Господня, глас 4

Христо́во Преображе́ние предусря́щем*,/ све́тло торжеству́юще предпра́зднственная, ве́рнии, и возопии́м:/ приспе́ день Боже́ственнаго весе́лия,/ восхо́дит на го́ру Фаво́рскую Влады́ка,/ Божества́ Своего́ облиста́ти красоту́.

Кондак, глас тойже

Боже́ственным днесь Преображе́нием/ челове́ческое все естество́ просиява́ет Боже́ственно, в весе́лии зову́щее:/ преобразу́ется Христо́с, спаса́яй вся.

Тропарь празднику Преображения Господня, глас 7

Преобрази́лся еси́ на горе́ Христе́ Бо́же,/ показа́вый ученико́м Твои́м сла́ву Твою́,/ я́коже можа́ху, /да возсия́ет и нам, гре́шным,/ Свет Твой присносу́щный/ моли́твами Богоро́дицы,/ Светода́вче, сла́ва Тебе́.

Кондак, глас тойже

На горе́ преобрази́лся еси́/ и, я́коже вмеща́ху, ученицы́ Твои́/ сла́ву Твою́, Христе́ Бо́же, ви́деша,/ да егда́* Тя у́зрят распина́ема,/ страда́ние у́бо уразуме́ют во́льное,/ ми́рови же пропове́дят,/ я́ко Ты еси́ вои́стину о́тчее сия́ние.

Величание

Велича́ем Тя,/ Живода́вче Христе́,/ и почита́ем Пречи́стыя Пло́ти Твоея́/ пресла́вное преображе́ние.

Тропарь преподобному Матфею Чернеевскому, глас 5

Преподо́бне всеблаже́нне Матфе́е,/ Богому́дрым уче́нием и святы́м житие́м твои́м/ до́бре упасл еси́ ста́до слове́сных ове́ц./ Моли́ся за ны и оби́тель твою́ ко Го́споду,/ да сохрани́т ю и оте́чество на́ше в ми́ре и благоде́нствии/ и спасе́т ду́ши на́ша.

Кондак, глас 2

Чистото́ю душе́вною боже́ственно вооружи́вся,/... (общий преподобному).

Величание

Ублажа́ем тя,/ преподо́бне о́тче Матфе́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобномученику Дометию Персянину, глас 4

По́стнически предподвиза́вся на горе́,/ у́мная враго́в ополче́ния/ всеору́жием Креста́ погуби́л еси́, всеблаже́нне./ Па́ки же ко страда́льчеству му́жески обле́клся еси́,/ уби́в Копрони́ма мече́м ве́ры,/ и обои́х ра́ди венча́лся еси́ от Бо́га,/ преподобному́чениче Домети́е, приснопа́мятне.

Кондак, глас 6

Я́ко преоби́дев* тле́нная и до́лу влеку́щая мудрова́ния,/ преподобному́чениче Домети́е,/ вели́к наста́вник мона́хом показа́лся еси́,/ не устраши́вся я́рости царя́, не хотя́ща чти́ти Христа́, и́стиннаго Бо́га./ Сего́ ра́ди и сконча́лся еси́, воспева́я песнь:/ Бог есть со мно́ю, и никто́же на мя.

Величание

Ублажа́ем тя,/ преподобному́чениче Домети́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Меркурию Печерскому, епископу Смоленскому, в Ближних пещерах почивающему, глас 8

Посто́м ду́шу твою́ просвети́л еси́,/ моли́твами непреста́нными се́рдце твое́ сосу́д Ду́ха Свята́го соде́лал еси́,/ преподо́бне о́тче наш Мерку́рие,/ те́мже вся вра́жия ополче́ния кре́пко посрами́л еси́/ и, я́ко победоно́сец и́стинный,/ воздая́ние получи́л еси́ от Христа́ Бо́га./ Тому́ помоли́ся о душа́х на́ших.

Кондак, глас тойже

Любо́вию ко Христу́ уязви́в твою́ ду́шу,/ преподо́бне о́тче наш Мерку́рие,/ в пеще́рнем мра́це свет спасе́ния обре́л еси́/ и, я́ко ча́до избра́нное вели́ких отце́в Пече́рских Анто́ния и Феодо́сия,/ вку́пе с ни́ми оби́тель ра́йскую насле́довал еси́,/ отону́дуже призира́й ны́не на оби́тель земну́ю,/ в не́йже подвиза́лся еси́,/ и моли́ о чту́щих па́мять твою́.

Величание

Ублажа́ем тя,/ преподо́бне о́тче Мерку́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Пимену Многоболезненному, Печерскому, в Ближних пещерах почивающему, глас 5

Богоно́снаго Анто́ния смиренному́дрием подража́я,/ терпе́нием И́ову подобя́ся,/ не исцеле́ния от боле́зни, но па́че протяже́ния тоя́/ жела́л еси́ себе́, терпеливоду́шне Пи́мене,/ да не ка́ко здрав быв,/ и от ме́ста сего́ роди́тельми исто́ржен,/ сожи́тия преподо́бных и чи́на их лиши́шися,/ тем па́че наде́жды от сами́х а́нгел постри́жен был еси́,/ с ни́миже моли́ Христа́ Бо́га/ спасти́ся душа́м на́шим.

Кондак, глас 6

Долговре́менную боле́знь благода́рне претерпе́вшаго,/ прииди́те соше́дшеся восхва́лим Пи́мена многотерпели́ваго,/ и́же бо иногда́ за смрад боле́зни бе гнуша́ем,/ сей ны́не благоуха́ние испуща́ет,/ с ве́рою к ра́це моще́й его́ приходя́щим,/ и прого́нит злосмра́дие страсте́й от вопию́щих:/ прииди́, Пи́мене, к нам, и ничто́же успе́ет враг на ны.

Величание

Ублажа́ем тя,/ преподо́бне о́тче Пи́мене,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Пимену, постнику Печерскому, в Дальних пещерах почивающему, глас 8

Посто́м ду́шу твою́ просвети́л еси́,/ моли́твами непреста́нными се́рдце твое́ сосу́д Ду́ха Свята́го соде́лал еси́,/ преподо́бне о́тче наш Пи́мене;/ те́мже вра́жия ополче́ния кре́пко посрами́л еси́/ и, я́ко победоно́сец и́стинный,/ воздая́ние получи́л еси́ от Христа́ Бо́га./ Тому́ помоли́ся о душа́х на́ших.

Кондак, глас тойже

Пи́мене преподо́бне,/ по́стником единонра́вне,/ послуша́ния о́бразе и трудолю́бия пра́вило,/ во бде́нии и моли́твах неусы́пне,/ не преста́й моля́ся о нас ко Го́споду.

Величание

Ублажа́ем тя,/ преподо́бне о́тче Пи́мене,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Митрофану, первому епископу Воронежскому, глас 4

Пра́вило ве́ры и о́браз кро́тости,/ сло́вом и житие́м па́стве твое́й, о́тче смиренному́дре Митрофа́не, был еси́./ Те́мже и во све́тлостех святы́х/ со́лнца светле́йше возсия́л еси́,/ венце́м нетле́ния и сла́вы украша́ем./ Моли́ Христа́ Бо́га,/ стране́ на́шей и гра́ду твоему́ в ми́ре спасти́ся.

Кондак, глас 8

Воздержа́нием те́ло ду́ху порабо́тив,/ ду́шу же равноа́нгельну сотвори́в,/ святи́тельскою оде́ялся еси́ оде́ждею, я́ко вене́ц свяще́нства,/ и ны́не всех Влады́це предстоя́,/ моли́, всеблаже́нне Митрофа́не, умири́ти и спасти́ ду́ши на́ша.

Величание

Велича́ем тя,/ святи́телю о́тче Митрофа́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Емилиану Исповеднику, епископу Кизическому, глас 8

Правосла́вия наста́вниче,/ благоче́стия учи́телю... (общий исповеднику).

Кондак, глас 3

До́бляго Тя побо́рника по Тро́ице я́вльшася,/ Це́рковь сла́вит пою́щи, Емилиа́не,/ за ню́же пострада́л еси́;/ сего́ ра́ди почита́ем па́мять твою́,/ язы́ческаго наше́ствия изба́ви рабы́ твоя́.

Величание

Велича́ем тя,/ святи́телю о́тче Емилиа́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Григорию, иконописцу Печерскому, в Ближних пещерах почивающему, глас 8

В тебе́, о́тче, изве́стно спасе́ся... (общий преподобному).

Кондак, глас 2

Чистото́ю душе́вною Боже́ственно вооружи́вся,/ и непреста́нныя моли́твы,/ я́ко копие́ вручи́в кре́пко,/ пробо́л еси́ бесо́вская ополче́ния,/ Григо́рие о́тче наш,/ моли́ непреста́нно о всех нас.

Величание

Ублажа́ем тя,/ преподо́бне о́тче Григо́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобным Зосиме и Савватию Соловецким, глас 4

По́стническое и равноа́нгельное житие́ ва́ше,/ преподо́бнии о́тцы Зоси́мо и Савва́тие,/ вселе́нней позна́ны сотвори́ вас:/ чудодея́нии разли́чными, Богоно́снии, просвеща́ете/ ве́рою призыва́ющия вы и чту́щия честну́ю па́мять ва́шу.

Ин тропарь, глас 8

Я́ко свети́льницы яви́стеся всесве́тлии,/ во ото́це окиа́на мо́ря,/ преподо́бнии отцы́ Зоси́мо и Савва́тие:/ вы бо крест Христо́в на ра́мо взе́мше,/ усе́рдно Тому́ после́довасте,/ и чистото́ю Бо́гови прибли́жившися,/ отону́ду си́лами чуде́с обогати́стеся./ Те́мже и мы любе́зно притека́ем к ра́кам честны́х моще́й ва́ших,/ и уми́льно глаго́лем:/ о преподо́бнии, моли́те Христа́ Бо́га спасти́ся душа́м на́шим.

Кондак, глас 2

Христо́вою любо́вию уязви́вшеся, преподо́бнии,/ и Того́ крест на ра́мо взе́мше, понесли́ есте́,/ Боже́ственне вооружи́вшеся на неви́димыя враги́,/ и непреста́нныя моли́твы, я́ко копие́ в рука́х, иму́ще,/ кре́пко победи́ли есте́ бесо́вския ополче́ния;/ благода́ть Госпо́дню прие́мше цели́ти неду́ги душ и теле́с/ притека́ющих к ра́кам честны́х моще́й ва́ших,/ чуде́с лучи́ испуща́ете всю́ду./ Тем зове́м вам:/ ра́дуйтеся, преподо́бнии отцы́ Зоси́мо и Савва́тие,/ мона́хов удобре́ние.

Величание

Ублажа́ем вас,/ преподо́бнии отцы́ Зоси́мо и Савва́тие,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь Божией Матери ради иконы Ее Толгская, глас 4

Днесь све́тло сия́ет на То́лге/ о́браз Твой, Пречи́стая Де́во Богоро́дице,/ и, я́ко со́лнце незаходи́мое,/ всегда́ ве́рным подаде́ся./ Его́же ви́дев на возду́се,/ неви́димо а́нгелы, я́ко ники́м держи́ма,/ преосвяще́нный епи́скоп гра́да Росто́ва Три́фон/ тече́ ко явле́нному светя́щемуся столпу́ о́гненну,/ и по вода́м, я́ко по су́ху, пре́йде,/ и моля́щеся Ти ве́рно о па́стве и о лю́дех./ И мы, к Тебе́ притека́юще, зове́м:/ Пресвята́я Де́во Богоро́дице, ве́рно Тя сла́вящих спаса́й,/ страну́ на́шу, архиере́ев/ и вся росси́йския лю́ди от всех бед избавля́й/ по вели́цей Твое́й ми́лости.

Кондак, глас 8

Чу́дное и богоприя́тное светоно́снаго зра́ка Твоего́ явле́ние, Пречи́стая Де́во,/ с ве́рою взира́ющим быва́ет изве́стное ча́яние спасе́ния,/ столпо́м бо о́гненным явля́ющи предста́тельство,/ неусы́пное и те́плое за ны к Бо́гу возсыла́еши моле́ние,/ и́мже страну́ Росси́йскую от вся́ких бед изба́ви, мо́лимся,/ да ра́достными усты́ вопие́м Ти вси:/ ра́дуйся, Предводи́тельнице ве́чнаго блаже́нства.

Ин кондак, глас тойже

Стра́нное и богоприя́тное светоно́снаго зра́ка Твоего́ явле́ние,/ Пречи́стая Де́во,/ с ве́рою взира́ющим быва́ет изве́стное ча́яние спасе́ния,/ столпо́м бо о́гненным явля́ющи предста́тельство,/ неусы́пное и те́плое за ны к Бо́гу возсыла́еши моле́ние,/ и́мже от вся́ких бед изба́ви, мо́лимся,/ да ра́достными усты́ вопие́м Ти вси:/ ра́дуйся, Хода́таице ве́чнаго блаже́нства.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь апостолу Матфию, глас 3

Апо́столе святы́й Матфи́е,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Кондак, глас 4

Светоза́рное, я́ко со́лнце, во весь мир изше́дшее веща́ние твое́,/ просвеща́ет язы́ческую це́рковь благода́тию,/ чудоно́сче Матфи́е апо́столе.

Величание

Велича́ем тя,/ апо́столе Христо́в Матфи́е,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Тропарь преподобному Макарию Оредежскому, Новгородскому, глас 8

Слез твоих тече́ньми пусты́ни безпло́дное возде́лал еси́,/ и я́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Мака́рие, о́тче наш,/ моли́ Христа́ Бо́га спасти́ся душа́м на́шим.

Кондак, глас 2

Чистото́ю душе́вною боже́ственно вооружи́вся/ и непреста́нныя моли́твы, я́ко копие́, вручи́в кре́пко,/ пробо́л еси́ бесо́вская ополче́ния, Мака́рие, о́тче наш,/ моли́ непреста́нно о всех нас.

Величание

Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь мученику архидиакону Лаврентию Римскому, глас 4

Му́ченик Твой, Го́споди... (общий мученику).

Кондак, глас 2

Огне́м Боже́ственным распали́в се́рдце твое́,/ огнь страсте́й до конца́ испепели́л еси́,/ страда́льцев утвержде́ние, Богоно́се му́чениче Лавре́нтие,/ и в страда́ниих вопия́л еси́ ве́рно:/ ничто́же мя разлучи́т любве́ Христо́вы.

Величание

Велича́ем тя,/ страстоте́рпче святы́й Лавре́нтие,/ и чтим честна́я страда́ния твоя́,/ я́же за Христа́/ претерпе́л еси́.

Тропарь блаженному Лаврентию, Христа ради юродивому, Калужскому, глас 4

Просвети́вся Боже́ственною благода́тию, Богому́дре,/ и весь ра́зум и се́рдце от су́етнаго ми́ра сего́/ к Зижди́телю неукло́нно возложи́в,/ целому́дрием и мно́гим терпе́нием во вре́менней жи́зни тече́ние до́бре сконча́л еси́/ и ве́ру соблю́л еси́ непоро́чну./ Те́мже и по сме́рти яви́ся све́тлость жития́ твоего́,/ источа́еши бо чудесе́м исто́чник неисчерпа́емый/ ве́рою притека́ющим ко свято́му твоему́ гро́бу, Лавре́нтие всеблаже́нне,/ моли́ Христа́ Бо́га, да спасе́т ду́ши на́ша.

Ин тропарь, глас 3

Свя́тый пра́ведный Лавре́нтие,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Кондак, глас 8

Избра́нному и ди́вному в пра́ведницех,/ и́же у́бо от Христа́ дар чуде́с прии́мшему,/ похва́льныя ны́не принесе́м глаго́лы,/ но я́ко име́я дерзнове́ние ко Святе́й Тро́ице,/ ю́же моли́ изба́витися от бед рабо́м твои́м, да зове́м ти:/ ра́дуйся, Богому́дре Лавре́нтие.

Величание

Велича́ем тя,/ святы́й пра́ведный Лавре́нтие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь мученику архидиакону Евплу, глас 4

Му́ченик Твой, Го́споди... (общиймученику).

Кондак, глас 1

Зако́ны Христо́вы в руку́ обнося́,/ предста́л еси́ вопия́ враго́м в по́двизе:/ самозва́н есмь страда́льчествовати тверде́йши./ Те́мже приклони́в ра́достно вы́ю* твою́,/ подъя́л еси́ усече́ние мече́м,/ сконча́вый тече́ние твое́.

Величание

Велича́ем тя,/ страстоте́рпче святы́й Е́впле,/ и чтим честна́я страда́ния твоя́,/ я́же за Христа́/ претерпе́л еси́.

Тропарь преподобному Феодору, в иночестве Феодосию, князю Острожскому, Печерскому, в Дальних пещерах почивающему, глас 7

Преобрази́л еси́ земна́го княже́ния сла́ву/ во и́ночества о́браз смире́нный,/ и вме́сто враго́в ви́димых/ на неви́димыя ополчи́лся еси́,/ и обою́ победи́тель кра́сен явля́лся,/ еди́н от чудотво́рец Пече́рских показа́лся еси́./ Те́мже и нам ре́вности Бо́жия дар испроси́,/ братолю́бием сердца́ на́ша просвети́/ и ко спасе́нию ве́чному стези́ на́ша, Фео́доре блаже́нне, напра́ви.

Ин тропарь, глас 4

Кня́жеских дароноше́ний и всего́ суе́тствия мирска́го спе́шне отве́ргся,/ Бо́жиих же дарова́ний, прему́дре Фео́доре, преи́скренне сподо́битися жела́я,/ прия́л еси́ и́ноческий о́браз,/ и в нем смире́нным послуша́нием и безмо́лвным житие́м Царю́ Небе́сному благоугожда́я,/ получи́л еси́ от Него́ безсме́ртныя да́ры,/ и́хже и нам, чту́щим тя, получи́ти мо́лися.

Ин тропарь, глас тойже

Яко благочести́ваго ко́рене пречестна́я о́трасль был еси́,/ блаже́нне Фео́доре,/ яви́ бо тя Христо́с,/ я́ко вои́стинну Богодарова́нное сокро́вище Волы́нстей земли́,/ но́ваго побо́рника Правосла́вия,/ и наро́ду росси́йскому пресла́вна и благоприя́тна./ Те́мже ны́не, плоды́ светоно́сных трудо́в твои́х/ в стране́ на́шей под се́нию Святы́я Це́ркве Правосла́вныя наслажда́ющеся,/ хва́лим Го́спода,/ дарова́вшаго тебе́ си́лу и кре́пость на сопроти́вныя./ Его́же моли́ спасти́ оте́чество твое́,/ и держа́ве сро́дник твои́х Богоуго́дней бы́ти,/ и сыново́м росси́йским спасти́ся.

Кондак, глас тойже

Красоты́ ри́зныя возгнуша́вшагося/ и бога́тства тле́ннаго со благодаре́нием отве́ргшагося,/ в ри́зу же безстра́стия обле́кшагося/ и богатому в щедро́тах Христу́ возсле́довавшаго,/ прииди́те, ве́рнии, восхва́лим Фео́дора достосла́вна,/ я́ко моля́щася непреста́нно/ о душа́х на́ших.

Величание

Ублажа́ем тя,/ преподо́бне о́тче Фео́доре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобномученикам Феодору и Василию Печерским, в Ближних пещерах почивающим, глас 1

Сою́зом любве́ связа́вшеся, преподо́бнии,/ всяк сою́з ко́зней вра́жиих попра́сте,/ страда́ние же и смерть непови́нне/ от сребролюби́ваго кня́зя претерпе́сте до́бле,/ тем мо́лим вас, вку́пе пожи́вших/ и венцы́ муче́ния прие́мших,/ моли́теся Го́сподеви о нас,/ я́ко да во мно́зей любви́, ве́ре и наде́жди до́бле пожи́вше,/ всегда́ ублажа́ем вас,/ Фео́доре и Васи́лие добропобе́днии.

Кондак, глас 2

Добр сове́тник я́влься блаже́нному Фео́дору, Богому́дре Васи́лие,/ изба́вил еси́ того́ сове́том свои́м от пре́лести диа́воли/ и ко све́ту Богоразу́мия наста́вль./ С те́мже по́слежде блаже́нную прия́л еси́ кончи́ну,/ устреле́н непра́ведно быв во утро́бу от сребролюби́ваго кня́зя./ И ны́не предстоя́ Го́сподеви,/ моли́ся непреста́нно о всех нас.

Величание

Ублажа́ем вас,/ преподобному́ченицы Фео́доре и Васи́лие,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь святителю Нифонту, патриарху Константинопольскому, глас 3

Делы́ просия́л еси́ благоче́стия,/ высокотво́рным смире́нием украша́емь,/ Афо́на похвало́, патриа́рхов удобре́ние,/ Ни́фонте сла́вне,/ моли́ся о нас, любо́вию сла́вящих тя.

Кондак, глас 8

Сла́вных по́двигов твои́х, святи́телю Христо́в,/ светоно́сная па́мять возсия́ днесь,/ услажда́ющи ду́ши и освяща́ющи/ лобыза́ющих твоя́ честны́я мо́щи./ Те́мже с весе́лием зове́м ти:/ ра́дуйся, Ни́фонте Богому́дре.

Величание

Велича́ем тя,/ святи́телю о́тче Ни́фонте,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь мученикам Фотию и Аниките, глас 4

Му́ченицы Твои, Го́споди... (общий мученикам).

Кондак, глас 2

Боже́ственныя, ве́рнии и хра́брыя/ ублажи́м супру́ги Христо́вы сла́вныя,/ и похва́лим, я́ко тве́рдыя пропове́дники благоче́стию/ и су́ща рачи́тели, Фо́тия и Аники́ту,/ и пе́сньми и хвала́ми венча́ем.

Величание

Велича́ем вас,/ страстоте́рпцы святи́и Фо́тие и Аники́то,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Максиму Исповеднику, глас 8

Правосла́вия наста́вниче,/ благоче́стия учи́телю и чистоты́,/ вселе́нным свети́льниче,/ мона́шествующих Богодухнове́нное удобре́ние,/ Макси́ме прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.

Кондак, глас 6

Свет Трисия́нный, все́льшийся в ду́шу твою́,/ сосу́д избра́н показа́ тя, всеблаже́нне, явля́юща Боже́ственная конце́м,/ неудобопости́жных разуме́ний ты сказу́яй, блаже́нне,/ и Тро́ицу всем, Макси́ме, воспропове́дуяй я́сно,/ Пресу́щную Безнача́льную.

Величание

Ублажа́ем тя,/ преподо́бне о́тче Макси́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь блаженному Максиму, Христа ради юродивому, Московскому, глас 4

Терпе́нием свои́м ве́лию мзду́ на Небесе́х стяжа́л еси́,/ в бу́йство во́лею Христа́ ра́ди преложи́ся/ и на Не́бо мы́сленное, я́ко на колесни́це о́гненней,/ возше́л еси́, прему́дре Макси́ме./Днесь мы ны́не чтим честны́х моще́й твои́х о́бретение/ вку́пе с благочести́выми и ве́рными людьми́ ца́рствующаго гра́да Москвы́,/ да вси вопие́м ти:/ моли́ Христа́ Бо́га/ спасти́ся душа́м на́шим.

Кондак, глас 8

Ве́рою и любо́вию твое́ честно́е о́бретение пра́зднующих, блаже́нне,/ сохрани́ и соблюди́ от вся́кия зло́бы и со́блазна змии́на,/ и́маши бо дерзнове́ние ко Влады́це всех Христу́,/ Его́же моли́ спасти́ лю́ди, моля́щия ти ся,/ да вси вопие́м ти:/ ра́дуйся, о́тче Макси́ме, ца́рствующему гра́ду Москве́ похвало́.

Величание

Ублажа́ем тя,/ святы́й пра́ведный Макси́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Тихону, епископу Воронежскому, Задонскому чудотворцу, глас 8

От ю́ности возлюби́л еси́ Христа́, блаже́нне,/ о́браз всем был еси́ сло́вом, житие́м, любо́вию,/ ду́хом, ве́рою, чистото́ю и смире́нием./ Те́мже и всели́лся еси́ в Небе́сныя оби́тели,/ иде́же предстоя́ престо́лу Пресвяты́я Тро́ицы,/ моли́, святи́телю Ти́хоне,/ спасти́ся душа́м на́шим.

Ин тропарь, глас 4

Правосла́вия наста́вниче, благоче́стия учи́телю,/ покая́ния пропове́дниче, Златоу́стаго ревни́телю,/ па́стырю предо́брый,/ но́вый Росси́и свети́льниче/ и чудотво́рче, па́ству твою́ до́бре упа́сл еси́/ и писа́ньми твои́ми вся ны наста́вил еси́,/ те́мже венце́м нетле́ния/ укра́шен от Пастырена́чальника,/ моли́ Его́ спасти́ся душа́м на́шим.

Кондак, глас 8

Апо́столов прее́мниче,/ святи́телей украше́ние,/ Правосла́вныя Це́ркве учи́телю,/ Влады́це всех моли́ся/ мир вселе́нней дарова́ти/ и душа́м на́шим ве́лию ми́лость.

Величание

Велича́ем тя,/ святи́телю о́тче Ти́хоне,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Божией Матери ради иконы Ее «Страстная», глас 4

Днесь возсия́ неизрече́нно ца́рствующему гра́ду на́шему Москве́,/ ико́на Богома́тере,/ и, я́ко светоза́рным со́лнцем, прише́ствием тоя́ озари́ся весь мир./ Небе́сныя си́лы и ду́ши пра́ведных мы́сленно торжеству́ют, ра́дующеся,/ мы же, на ню взира́юще, к Богоро́дице со слеза́ми вопие́м:/ о Всеми́лостивая Госпоже́, Влады́чице Богоро́дице,/ моли́ся из Тебе́ воплоще́нному Христу́, Бо́гу на́шему,/ да пода́ст мир и здра́вие всем Христиа́ном/ по вели́цей и неизрече́нней Свое́й ми́лости.

Ин тропарь, глас тойже

Животворя́щей Прему́дрости исто́чник чуде́с/ честны́й о́браз Твой, Богоро́дице Де́во,/ моля́щеся, к нему́ любо́вию усе́рдно притека́юще, све́тло пра́зднуем/ и из глубины́ души́ вопи́ем Ти:/ спаси́, Влады́чице, ве́рою покланя́ющихся цельбоно́сному Твоему́ свято́му о́бразу,/ тем, благодаря́ще, Тя велича́ем, я́ко Ма́терь Бо́жию,/ спаси́ архиере́и правосла́вныя,/ и сохрани́ зе́млю Ру́сскую/ и вся лю́ди, и́же Тебе́ чту́щия, соблюди́,/да хвале́бныя Ти да́ры, гре́шнии, прино́сим, Благода́тная:/ ра́дуйся, Де́во, христиа́н похвале́.

Кондак, глас 3

Благода́ть прия́хом нетле́ния,/ е́же дарова́ла еси́ нам, спаси́тельнаго Твоего́ целе́ния/ чудотво́рным Твои́м о́бразом честны́м, Богоро́дице Де́во,/ те́мже вопие́м Ти и с ра́достию зове́м, Госпоже́ Цари́це,/ мо́лимтися уми́льно, гре́шнии, со слеза́ми глаго́люще:/ о Пресвята́я Влады́чице,/ ско́рое нам яви́ заступле́ние и по́мощь,/ спаси́ ны от супоста́т на́ших/ и от вся́кия ско́рби соблюди́,/ зе́млю на́шу ми́ром огради́,/ и вся лю́ди Твоя́ покры́й,/ и соблюди́ на Тя упова́ющия,/ потщи́ся изба́вити,/да не поги́бнем зле, раби́ Твои́,/ но да зове́м Ти:/ ра́дуйся, Неве́сто Неневе́стная.

Величание

Велича́ем Тя,/ Пресвята́я Дево,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь Божией Матери ради иконы Ее, именуемой «Семистрельная» или «Умягчение злых сердец», глас 5

Умягчи́ на́ша зла́я сердца́, Богоро́дице,/ и напа́сти ненави́дящих нас угаси́,/ и вся́кую тесноту́ души́ на́шея разреши́,/ на Твой бо святы́й о́браз взира́юще,/ Твои́м страда́нием и милосе́рдием о нас умиля́емся/ и ра́ны Твоя́ лобыза́ем,/ стрел же на́ших, Тя терза́ющих, ужаса́емся./ Не да́ждь нам, Ма́ти Благосе́рдная,/ в жестокосе́рдии на́шем и от жестокосе́рдия бли́жних поги́бнути,/ Ты бо еси́ вои́стину злых серде́ц умягче́ние.

Кондак, глас 2

Благода́тию Твое́ю, Влады́чице,/ умягчи́ сердца́ злоде́ев,/ низпосли́ благоде́телей,/ соблюда́ющи их от вся́каго зла,/ благомоля́щимся Ти усе́рдно/ пред честны́ми ико́нами Твои́ми.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь Божией Матери ради иконы Ее, именуемой Минская, глас 5

На дре́ве кре́стнем яви́лася еси́, Пренепоро́чная Отрокови́це,/ от Царьгра́да и Ки́ева/ Богоспаса́емому гра́ду Ми́нску ми́лость показа́вши./ Просвети́ нас, гре́шных, сия́нием Свои́м,/ яви́, я́ко при́сно, си́лу Свою́,/ спаси́ на́с предста́тельством Свои́м/ и избавля́й от наве́т вра́жиих,/ Тя бо Необори́мую Сте́ну и еди́ну Наде́жду и́мамы.

Тропарь предпразднству Успения Пресвятой Богородицы, глас 4

Лю́дие предыгра́йте,/ рука́ми пле́щуще ве́рно,/ и любо́вию собери́теся/ днесь ра́дующеся,/ и све́тло восклица́юще вси весе́лием:/ Бо́жия бо Ма́ти и́мать от земны́х к Вы́шним прейти́ сла́вно,/ ю́же пе́сньми при́сно я́ко Богоро́дицу сла́вим.

Кондак, глас тойже

В сла́вней па́мяти Твое́й/ вселе́нная, невеще́ственным ду́хом испещре́на,/ у́мно с весе́лием зове́т Тебе́:/ ра́дуйся, Де́во,/ христиа́н похвале́.

Тропарь преподобному Феодосию, игумену Печерскому, в Дальних пещерах почивающему, глас 8

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ архиере́ев Богодухнове́нное удобре́ние,/ Феодо́сие прему́дре,/ уче́ньми твои́ми вся просвети́л еси́, цевни́це духо́вная;/ моли́ Христа́ Бо́га спасти́ся душа́м на́шим.

Кондак, глас тойже

Насле́дник отце́в быв, преподо́бне,/ те́х после́дуя житию́ и уче́нию,/ нра́ву и воздержа́нию,/ моли́тве же и предстоя́нию./ Тем, я́ко име́я дерзнове́ние ко Го́споду,/ проще́ние прегреше́ний и спасе́ние испроси́ вопию́щим ти:/ ра́дуйся, о́тче Феодо́сие.

Величание

Ублажа́ем тя,/ преподо́бне о́тче Феодо́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Аркадию Новоторжскому, Вяземскому, глас 4

От духо́внаго наста́вника, отца́ преподо́бнаго Ефре́ма, наставля́емь,/ послуша́ния до́брый рачи́телю, о́тче Арка́дие,/ от мирска́го мяте́жа удали́лся еси́/ и, и́нок быв изря́дный,/до́брым по́двигом ревну́яй,/ от Христа́ Бо́га прия́л еси́ вене́ц сла́вы Небе́сныя;/ и ны́не, вку́пе с преподо́бным отце́м Ефре́мом у Престо́ла Вы́шняго предстоя́,/ о нас моли́ся, изба́витися нам от всех бед и скорбе́й/ и спасти́ся душа́м на́шим.

Кондак, глас 2

К глубина́м Боже́ственнаго Ра́зума впери́в ум свой,/ в Небе́сныя оби́тели восте́кл еси́,/ и равноа́нгельно житие́, о́тче Арка́дие, на земли́ пожи́л еси́,/ и во всем повину́лся еси́ духо́вному своему́ настоя́телю и наста́внику,/ преподо́бному отцу́ Ефре́му,/ и ны́не, вку́пе предстоя́ у Престо́ла Влады́ки Христа́,/ моли́ся непреста́нно о всех нас.

Величание

Ублажа́ем тя,/ преподо́бне о́тче Арка́дие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь празднику Успения Богородицы, глас 1

В рождестве́ де́вство сохрани́ла еси́,/ во успе́нии ми́ра не оста́вила еси́, Богоро́дице,/ преста́вилася еси́ к животу́, Ма́ти су́щи Живота́,/ и моли́твами Твои́ми избавля́еши от сме́рти ду́ши на́ша.

Кондак, глас 2

В моли́твах Неусыпа́ющую Богоро́дицу,/ и в предста́тельствах непрело́жное упова́ние,/ гроб и умерщвле́ние не удержа́ста:/ я́коже бо Живота́ Ма́терь,/ к животу́ преста́ви,/ во утро́бу Всели́выйся Присноде́вственную.

Величание

Велича́ем Тя,/ Пренепоро́чная Ма́ти Христа́ Бо́га на́шего,/ и всесла́вное сла́вим/ Успе́ние Твое́.

Тропарь ради иконы Софии, Премудрости Божией, глас 4

Ве́лия и неизрече́нная Прему́дрости Бо́жии си́ла/ смотре́ния плотска́го та́инства!/ Софи́я Преимени́тая,/ де́вственных душе́ и неизглаго́ланнаго де́вства чистото́,/ смире́нныя му́дрости и́стино,/ поко́ище Свята́го Ду́ха,/ пречестны́й хра́ме непостижи́мыя сла́вы Его́,/ огнезра́чный престо́ле Христа́ Бо́га на́шего,/ в Тя бо всели́ся неизрече́нно Сло́во Бо́жие, и плоть бысть,/ Неви́димый яви́ся,/ и неприкоснове́нный из Тебе́ изы́де,/ и с челове́ки поживе́, врага́ иско́ннаго уловля́я/ и челове́ки от кля́твы дре́вния свобожда́я,/ возводя́ па́ки, отню́дуже испадо́хом./ Мо́лимтися, Влады́чице,/ отягче́нныя ны во гресе́х лю́тых поми́ловати/ и спасти́ ду́ши на́ша,/ и, я́ко человеколюби́вая и милосе́рдая Цари́ца,/ Ма́ти Прему́дрости Бо́жия Сло́ва,/ при́зри на ны, гре́шным лю́ди Твоя́,/ и умилосе́рдися, заступи́ от напа́стей и скорбе́й лю́тых/ и гра́ды на́ша невреди́мы сохрани́,/ иде́же ны́не и́мя Твое́ пресвято́е боголе́пно сла́вится.

Ин тропарь, глас 1

Преве́чная Прему́дросте, Христе́ Бо́же наш!/ Боже́ственным смотре́нием Свои́м преклони́вый Небеса́,/ благоволи́л еси́ всели́тися во утро́бу Чи́стыя Отрокови́цы,/ средосте́ние* вражды́ разруши́в,/ освяти́л еси́ естество́ на́ше/ и Ца́рствие Твое́ нам отве́рзл еси́;/ сего́ ра́ди Тебе́, Творца́ на́шего и Изба́вителя,/ и ро́ждшую Тя, спасе́ния на́шего та́йне послужи́вшую Де́ву Чи́стую,/ правосла́вно велича́ем.

Кондак, глас 8

Притеце́м, лю́дие, к чу́дному о́бразу Прему́дрости Бо́жии,/ Цари́цы и Богоро́дицы:/ Царя́ Небе́снаго Ма́ти, Христа́ Бо́га на́шего,/ услы́ши нас гре́шных и недосто́йных раб Твои́х,/ в час сей припа́дающих и моля́щихся с воздыха́нием и слеза́ми,/ уми́льно глаго́лющих и приле́жно вопию́щих:/ от бед изба́ви нас, Влады́чице, и заступи́,/ и не пре́зри воздыха́ния на́шего и слез,/ и изми́ нас от вся́кия ско́рби и напа́сти,/ я́ко мо́жеши, хотя́щи,/ ра́зве Тебе́ Предста́тельницы ины́я и хода́тая те́пла не и́мамы/ к Сы́ну Твоему́ и Бо́гу на́шему,/ да спасе́т Тебе́ ра́ди ду́ши на́ша.

Ин кондак, глас 4

Притеце́м, правосла́внии лю́дие,/ к Прему́дрости Бо́жии/ и ви́дим чудотво́рную ико́ну Пречи́стыя Богома́тере,/ ю́же имену́ем по явле́нию Софи́ю, Прему́дрость Бо́жию,/ зане́ храм бысть одушевле́н Единоро́днаго Сы́на и Сло́ва Бо́жия,/ Сия́ у́бо светолу́чно сия́ет в пречестне́м хра́ме Свое́м/ и сердца́ на́ша весели́т, приходя́щих с ве́рою/ и взира́ющих со стра́хом и благогове́нием на пречи́стую сию́ ико́ну,/ помышля́юще в сердца́х на́ших,/ я́ко вои́стинну Прему́дрости Бо́жия есть селе́ние/ и та́инства Его́ смотре́ние,/ на упова́ние бо ве́рным/ вообра́жение огнезра́чное Ея́ зрим/ и покланя́емся, я́ко и́стинному и пренепоро́чному Ея́ де́вству/ в рождестве́ и по рождестве́ па́ки;/ от Нея́же изы́де Огнь Боже́ственный,/ попаля́я тле́нныя стра́сти/ и просвеща́я ду́ши на́ша и чи́сты сотворя́я,/ И́мже и ве́ки сотвори́ Оте́ц,/ Той же и Му́дрость, Сло́во и Си́ла нарече́тся,/ сия́ние сла́вы и о́браз О́тчи Ипоста́си./ И па́ки у́бо мо́лим/ и, припа́дающе, лобыза́ем пречестну́ю ико́ну Прему́дрости Бо́жия Ма́тере/ и велегла́сно вопие́м:/ о Милосе́рдая Влады́чице,/ спаси́ рабы́ Своя́ от наси́лия диа́воля,/ от нахожде́ния иноплеме́нных и междоусо́бныя бра́ни,/ я́ко Ты еси́ всех благи́х Пода́тельница и Покрови́тельница/ притека́ющим к Тебе́ с ве́рою и прося́щим ве́лия ми́лости.

Тропарь Божией Матери ради иконы Ее, именуемой «Подательница ума», или «Прибавление ума», глас 3

Во́лею Отца́ Небе́снаго зачала́ Сы́на Бо́жия,/ без се́мени земна́го отца́,/ пре́жде творе́ния ми́ра от Отца́ без ма́тери рожде́ннаго/ пло́тию родила́ еси́,/ и Его́же моли́ о дарова́нии нам ума́/ ко спасе́нию душ на́ших.

Кондак, глас 6

Рожде́ннаго Ду́хом от Отца́ Небе́снаго,/ пре́жде сотворе́ния денни́цы,/ Тобо́ю пло́тию Рожде́ннаго без отца́,/ не наруши́в де́вства,/ Того́ умоли́ помо́чь нам победи́ть/ за́вистию одержи́маго па́дшаго денни́цу./ Да оде́ржим по́лную побе́ду/ над диа́волом, ми́ром и пло́тию,/Твои́ми моли́твами, Богоневе́стная.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим образ Твой святы́й,/ и́мже то́чиши исцеле́ния/ всем с ве́рою притека́ющим.

Тропарь Образу Нерукотворенному, глас 2

Пречи́стому Твоему́ о́бразу покланя́емся, Благи́й,/ прося́ще проще́ния прегреше́ний на́ших, Христе́ Бо́же:/ во́лею бо благоволи́л еси́ пло́тию взы́ти на Крест,/ да изба́виши, я́же созда́л еси́, от рабо́ты вра́жия./ Тем благода́рственно вопи́ем Ти:/ ра́дости испо́лнил еси́ вся, Спа́се наш,/ прише́дый спасти́ мир.

Кондак, глас тойже

Неизрече́ннаго и Боже́ственнаго Твоего́ к челове́ком смотре́ния,/ неопи́санное Сло́во о́тчее,/ и о́браз, непи́санный и Богопи́санный, победи́телен/ ве́дуще нело́жнаго Твоего́ воплоще́ния,/ почита́ем, того́ лобыза́юще.

Величание

Велича́ем Тя,/ Живода́вче Христе́/ и почита́ем вси Пречи́стаго Ли́ка Твоего́/ пресла́вное изображе́ние.

Ино величание:

Велича́ем Тя,/ Живода́вче Христе́,/ и чтим о́браз Твой святы́й,/ и́мже нас спасл еси́/ от рабо́ты вра́жия.

В изданном Киево-Печерской лаврой в 1742 году Часослове на 16 августа находится такое величание:

Велича́ем Тя,/ Живода́вче Христе́,/ и почита́ем пречи́стаго зра́ка Твоего́ непи́санное изображе́ние.

Тропарь Ипостасной Премудрости Божией, Спасителю нашему Господу Иисусу Христу, глас 1

На Престо́ле огнезра́чнем/ в Вы́шних седя́й со Отце́м Безнача́льным и Боже́ственным Твои́м Ду́хом,/ благоволи́л еси́ яви́тися на земли́, я́ко челове́к,/ исполня́я предве́чный о нас Сове́т Святы́я Тро́ицы, Христе́ Иису́се;/ сего́ ра́ди и пострада́л еси́ пло́тию,/ да спасе́ши мир и вознесе́ши избра́нный Твоя́,/ иде́же при́сно, я́ко Бо́г, во сла́ве ца́рствуеши./ Сла́ва всеблаго́му Твоему́ Сове́ту,/ сла́ва прему́дрому смотре́нию Твоему́,/ сла́ва неизрече́нному снизхожде́нию Твоему́, Еди́не Человеколю́бче.

Ин тропарь, глас 8

Прему́дрсть о́тчая,/ Сия́ние сла́вы и о́бразе Ипоста́си Его́,/ в нача́ле Небеса́ и зе́млю основа́вый,/ благослови́ достоя́ние Твое́,/ сохрани́ в ми́ре Це́рковь и град Твой и лю́ди Твоя́ спаси́.

Кондак, глас тойже

Избра́нному пре́жде век соде́лати спасе́ние ми́ра,/ Вели́каго Сове́та А́нгелу, Сы́ну Бо́жию, Иису́су Христу́/ прииди́те, ве́рнии, поклони́мся и припаде́м Ему́/ сла́вяще неизрече́нное о нас Боже́ственное смотре́ние,/ и, я́ко изба́вленнии от ве́чныя сме́рти,/ вознесе́м Ему́, Спаси́телю на́шему и Бо́гу, благода́рственную пе́снь,/ душа́ми чи́стыми и нескве́рными устна́ми взыва́юще:/ сла́ва Тебе́, Го́споди, сла́ва Тебе́.

Величание

Велича́ем тя,/ Единоро́дный Сы́не Бо́жий, Иису́се Христе́,/ вся прему́дростию Твое́ю в нача́ле сотво́ршаго/ и челове́ческий па́дший род от ве́чныя сме́рти/ всеми́лостивно искупи́вшаго.

Тропарь мученику Диомиду врачу, глас 3

Мучи́тельнии сосу́ди устро́иша ти путь к Небесе́м,/ Христо́в во́ине Диоми́де,/ победи́в диа́вольския ко́зни,/ и на Небесе́х у Христа́ просла́вися,/ моли́ся за творя́щих ве́рою па́мять твою́.

Кондак, глас 2

И́стинный и непобеди́мый страстоте́рпец,/ благоче́стия и благода́ти Небе́сный таи́нник я́влься,/ Диоми́де пресла́вне,/ победи́в мучи́теля и победоно́сец быв,/ венцы́ побе́дными просла́вися.

Величание

Велича́ем тя,/ страстоте́рпче святы́й Диоми́де,/ и чтим честна́я страда́ния твоя́,/ я́же за Христа́ претерпе́л еси́.

Тропарь преподобному Иоакиму Сарандопо́рскому, Осого́вскому, глас 1

Пусты́нный жи́тель, и в телеси́ а́нгел,/ и чудотво́рец яви́лся еси́, Богоно́се о́тче наш Иоаки́ме,/ посто́м, бде́нием, моли́твою/ Небе́сная дарова́ния прии́м,/ исцеля́еши неду́жныя и ду́ши ве́рою притека́ющих ти./ Сла́ва Да́вшему тебе́ кре́пость;/ сла́ва Венча́вшему тя;/ сла́ва Де́йствующему тобо́ю всем исцеле́ния.

Кондак, глас 2

В моли́твах не усыпа́я, преподо́бне,/ восприе́м си́лу на сопроти́внаго врага́,/ терпе́нием бо свои́м, о́тче Иоаки́ме преподо́бне,/ возше́д на Небеса́/ и жизнь тле́нную оста́вив на земли́,/ на нетле́ние пресели́лся еси́ Небе́сное./ Те́мже тя хвала́ми вси прославля́ем.

Величание

Ублажа́ем тя,/ преподо́бне о́тче Иоаки́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее Феодоровская, глас 4

Прише́ствием честны́я Твоея́ ико́ны, Богоотрокови́це,/ обра́дованный днесь Богохрани́мый град Кострома́,/ я́коже дре́вний Изра́иль к киво́ту Заве́та,/ притека́ет ко изображе́нию лица́ Твоего́/ и воплоти́вшагося от Тебе́ Бо́га на́шего,/ да Твои́м Ма́терним к Нему́ предста́тельством/ при́сно хода́тайствуеши всем,/ под сень кро́ва Твоего́ прибега́ющим,/ мир и ве́лию ми́лость.

Ин тропарь, глас тойже

Днесь све́тло красу́ется преимени́тый град Кострома́/ и вся Ру́сская страна́,/ созыва́ющи к весе́лию вся Боголюби́выя наро́ды христиа́нския,/ на пресла́вное торжество́ Бо́жия Ма́тере,/ прише́ствия ра́ди чудотво́рнаго Ея́ и многоцеле́бнаго о́браза,/ днесь бо яви́ся нам пресве́тлое вели́кое со́лнце,/ прииди́те, вси Богоизбра́ннии лю́дие, но́вый Изра́иль,/ ко исто́чнику цельбоно́сному,/ источа́ет бо нам неоску́дныя ми́лости Пресвята́я Богоро́дица/ и избавля́ет вся гра́ды и страны́ христиа́нския/ невреди́мы от всех наве́т вра́жиих./ Но, о Всеми́лостивая Госпо́же, Де́во Богоро́дице, Влады́чице,/ спаси́ страну́ на́шу, и архиере́и, и вся лю́ди Твоего́ достоя́ния от всех бед/ по вели́цей Твое́й ми́лости, да зове́м Ти:/ ра́дуйся, Де́во, Христиа́ном похвало́.

Кондак, глас 8

Притеце́м, лю́дие, вси к ти́хому и до́брому приста́нищу,/ в дом Бо́жия Ма́тере,/ чу́дному о́бразу Цари́цы и Богоро́дицы,/ за неизрече́нную ми́лость Ея́ явле́нному,/ ве́рно припа́дающе и вопию́ще:/ о Всеми́лостивая Влады́чице,/ за спаси́тельное Твое́ смотре́ние,/ чу́днаго о́браза к нам прише́ствие,/ посети́ нас, гре́шных, све́тло сотворя́ющих пра́зднество Твое́,/ укрепи́ страну́ на́шу,/ ди́вно на враги́ побе́ду подаю́щи, и ве́ру утверди́./ Це́рковь Сы́на Твоего́ непоколеби́му соблюди́,/ притека́ющих к Тебе́ спаси́, от вся́ких напа́стей изба́ви,/ сохраня́ющи в ми́ре все Правосла́вие, да зове́м Ти:/ ра́дуйся, Неве́сто Неневе́стная.

Ин кондак, глас тойже

Благода́рственная принося́ще Ти раби́ Твои́, Богороди́тельнице, о всех,/ и́миже благоде́яла еси́ гра́ду на́шему,/ из глубины́ души́ взыва́ем к Тебе́ и ми́ли ся де́ем⁴⁴,/ не преста́ни, Влады́чице,/ Ма́терними к Сы́ну Твоему́ и Бо́гу на́шему моли́твами/ подава́ти вся блага́я и спаси́тельная всем,/ ве́рою и любо́вию вопию́щим Ти:/ ра́дуйся, Де́во, христиа́н похвало́.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь мученику Мирону пресвитеру, глас 4

Му́ченик Твой, Го́споди... (общий мученику).

Кондак, глас тойже

Измла́да Христа́ возлюби́в, пресла́вне,/ и Того́ соблюда́я Боже́ственныя за́поведи,/ к Тому́ прите́кл еси́ весь цел,/ Ми́роне всече́стне,/ и со а́нгелы мо́лишися приле́жно;/ проси́ всем почита́ющим па́мять твою́/ оставле́ния грехо́в.

Величание

Велича́ем тя,/ страстоте́рпче святы́й Ми́роне,/ и чтим честна́я страда́ния твоя́,/ я́же за Христа́/ претерпе́л еси́.

Тропарь преподобному Алипию, иконописцу Печерскому, в Ближних пещерах почивающему, глас 8

Зра́ки изобразу́я святы́х на дщи́цах,/ сих благодея́ния спе́шно,/ я́ко иску́сен худо́жник, всехва́льне Али́пие,/ написова́л еси́ на скрижа́лех⁴⁵ твоего́ се́рдца/ и сего́ ра́ди, а́ки о́браз, благоле́пие укра́шен,/ свяще́нства благода́тию, а́ки зла́том, обложи́лся еси́/ от Христа́ Бо́га и Спа́са душ на́ших.

Кондак, глас 2

От ю́ности Боже́ственное в себе́ имея́ начерта́ние,/ вдан был еси́ в науче́ние ико́ннаго писа́ния;/ и внегда́ небеси́ подо́бная Богоро́дицы писа́шеся Це́рковь,/ ты та́можде посо́бствовал/ и ви́дел еси́ Ду́ха Свята́го осия́ние,/ от Него́же прия́л еси чуде́с де́йство,/ я́ко ико́ны твоя́ чудотворя́ху,/ тем тя чтим и ублажа́ем, чу́дне Али́пие.

Величание

Ублажа́ем тя,/ преподо́бне о́тче Али́пие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Божией Матери ради иконы Ее, именуемой Свенская-Печерская, глас 4

Днесь све́тло торжеству́ет Пече́рская оби́тель/ и ра́дуется явле́нием о́браза Богома́тере/ безме́рный лик Пече́рских отце́в,/ с ни́миже и мы непреста́нно вопие́м:/ ра́дуйся, Благода́тная, Пече́рская похвало́.

Кондак, глас 3

Де́ва днесь неви́димо предстои́т в це́ркви/ и с ли́ки Пече́рских отце́в мо́лится о нас,/ благогове́йно велича́ющих Ея́ безме́рную ми́лость к ро́ду на́шему,/ я́вльшуюся в чу́дном о́бразе Ея́,/ оби́тель Пече́рскую украша́ющем.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь мученикам Флору и Лавру, глас 4

Преудо́бренную* и Богому́друю дво́ицу пресве́тлую/ восхва́лим, ве́рнии, по достоя́нию,/ Фло́ра преблаже́ннаго и Ла́вра всечестна́го,/ и́же усе́рдно Тро́ицу Несозда́нную я́сно пропове́даста всем./ Те́мже пострада́вше до кро́ве/ и венцы́ пресве́тлыми увязо́стеся*:/ моли́теся Христу́ Бо́гу, да спасе́т ду́ши на́ша.

Кондак, глас 8

Я́ко благоче́стия му́ченики и страда́льцы Христо́вы Богому́дренны,/ вселе́нная пресла́вно почита́ет Фло́ра и Ла́вра днесь:/ я́ко да улучи́м* благода́ть и ми́лость моли́твами их/ и изба́вимся бед и напа́стей, гне́ва же и ско́рби в день су́дный.

Величание

Велича́ем вас,/ страстоте́рпцы святи́и Фло́ре и Ла́вре,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь преподобному Иоанну Рыльскому, глас 1

Покая́ния основа́ние, прописа́ние умиле́ния,/ о́браз утеше́ния, духо́внаго соверше́ния,/ ра́вно а́нгелом житие́ твое́ бысть, преподо́бне:/ в моли́твах у́бо и поще́ниих, и в слеза́х пребыва́я,/ о́тче Иоа́нне,/ моли́ Христа́ Бо́га о душа́х на́ших.

Кондак, глас 2

В моли́твах бо́дренно не усыпа́я/ и в пе́ниих непреста́нных а́нгелом подо́бяся,/ в гроб вшел еси́, тле́нную жизнь оста́вив,/ и к Небеси́ преше́л еси́/ на нетле́ние, Иоа́нне о́тче,/ от сме́рти бо к животу́ ве́чному/ тя пресели́ Христо́с Бо́г, я́ко Своего́ уго́дника.

Ин кондак, глас тойже

Моля́щим тя тепле́йший засту́пниче/ и прося́щим скоре́йший послу́шателю,/ преподо́бне о́тче Иоа́нне,/ приими́ моле́ние на́ше/ и Христа́ умоли́ поми́ловати нас,/ Еди́наго Преблага́го и Многоми́лостиваго.

Ин кондак, глас 8

Ангельскому житию́ поревнова́в, преподо́бне,/ вся земна́я оста́вив, ко Христу́ прите́кл еси́,/ и Того́ за́поведьми огражда́лся, яви́лся еси́ столп непоколеби́м от вра́жиих нападе́ний. Тем зове́м ти:/ ра́дуйся, о́тче Иоа́нне, свети́ло пресве́тлое.

Величание

Ублажа́ем тя,/ преподо́бне о́тче Иоа́нне,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь мученику Андрею Стратилату и иже с ним, глас 5

Земна́го са́на сла́ву оста́вив,/ Небе́сное Ца́рство насле́довал еси́,/ кро́вными ка́плями, я́ко пречу́дным ка́мением,/ нетле́нныя венцы́ укра́сил еси́,/ и ко Христу́ приве́л еси́ собо́р страстоте́рпец,/ с ли́ки а́нгельскими в невече́рнем све́те/ незаходи́маго Со́лнца Христа́ обре́л еси́,/ свя́те Андре́е Стратила́те*;/ Его́же моли́ с пострада́вшими с тобо́ю при́сно,/да спасе́т ду́ши на́ша.

Кондак, глас 4

В моли́твах Го́сподеви предстоя́,/ я́коже звезда́ со́лнцу предтеки́й,/ и жела́емое сокро́вище Ца́рствия узре́л еси́,/ ра́дости неизрече́нныя исполня́яся,/ Безсме́ртному Царю́ в безконе́чныя ве́ки/ от а́нгел безпреста́ни хвали́мому пое́ши, Андре́е Стратила́те:/ с ни́миже моли́ся непреста́нно о всех нас.

Величание

Велича́ем тя,/ страстоте́рпче святы́й Андре́е,/ и чтим честна́я страда́ния твоя́,/ я́же за Христа́/ претерпе́л еси́.

Тропарь святителю Питириму, епископу Великопермскому, глас 8

Правосла́вия наста́вниче,/ благоче́стия учи́телю и ми́лости сокро́вище,/ архиере́ев украше́ние,/ люде́й зыря́нских наста́вниче,/ святи́телю Питири́ме,/ ду́шу свою́ за Христа́ положи́вый,/ моли́ Еди́наго Человеколю́бца о па́стве твое́й и о всех/ любо́вию чту́щих па́мять твою́.

Кондак, глас 3

Мона́шескими доброде́тельми/ во оби́тели святи́теля Алекси́я пе́рвее украси́вся/ и прославле́нию того́ послужи́в,/ па́стырь яви́лся еси́ лю́дем зыря́нским и,/ я́ко а́гнец чи́ст, прине́слся еси́ Сло́ву Началопа́стырю,/ му́ченик быв, Питири́ме святи́телю всехва́льне./ Те́мже торжеству́ем вси любо́вию/ Боже́ственную па́мять твою́.

Величание

Велича́ем тя,/ святи́телю о́тче Питири́ме,/ и чтим святу́ю па́мять твою́,/ ты бо́ мо́лиши за нас/ Христа́ Бо́га на́шего.

Тропарь Божией Матери ради иконы Ее Донская, глас 4

Засту́пнице ве́рных Преблага́я и Ско́рая,/ Пречи́стая Богоро́дице Де́во!/ Мо́лим Тя пред святы́м и чудотво́рным о́бразом Твои́м,/ да, я́коже дре́вле от него́ заступле́ние Твое́/ гра́ду Москве́ дарова́ла еси́,/ та́ко и ны́не нас от вся́ких бед и напа́стей ми́лостивно изба́ви/ и спаси́ ду́ши на́ша, я́ко Милосе́рдая.

Ин тропарь, глас тойже

Всепе́тая и Всесла́вная Цари́це Богоро́дице,/ Ма́ти всей тва́ри Соде́теля,/ христиа́нская Наде́ждо и Засту́пнице,/ ненаде́ющимся и отча́явшимся ско́рое наде́яние, мо́лим Тя:/ ми́лостива бу́ди нам, гре́шным,/ не оста́ви раб Твои́х и не отри́ни моле́ния недосто́йных./ Мо́лимся, взира́юще ко о́бразу Твоему́ честно́му/ святы́я и чудотво́рныя ико́ны Твоей и вопию́ще:/ с пла́вающими и путеше́ствующими да пребу́дет ми́лость Твой./ О Влады́чице, ри́зою Твое́ю честно́ю защити́/ и во вся́ких ме́стех злых ве́рнии соблюди́,/ и моли́ся к ро́ждшемуся из Тебе́ Христу́ Бо́гу на́шему,/ да спасе́т от грех ду́ши на́ша.

Кондак, глас 8

Взбра́нной Воево́де победи́тельная,/ я́ко изба́вльшеся от злых/ благода́рственная воспису́ем Ти, раби́ Твои́, Богоро́дице,/ но, я́ко иму́щая держа́ву непобеди́мую,/ от вся́ких нас бед свободи́, да зове́м Ти:/ ра́дуйся, Неве́сто Неневе́стная.

Ин кондак, глас 2

В Небе́сныя оби́тели пресели́вшаяся с пло́тию,/ су́щия на земли́ ника́коже оста́вила еси́, Богоро́дице,/ о́браз Боже́ственный и многочуде́сный Пречи́стаго Лица́ Твоего́/ зре́ти лю́бящим Тя и покланя́тися дарова́ла еси́,/ я́ко зна́мение Твоея́ благода́ти;/ чтим его́, лобыза́юще.

Величание

Велича́ем Тя,/ Пресвята́я Де́во, / и чтим о́браз Твой святы́й,/ и́мже ди́вную побе́ду на ага́ряны/ правосла́вным дарова́ла еси́.

Ино величание

Велича́ем Тя,/ Пресвята́я Де́во,/ и чтим о́браз Твой святы́й,/ и́мже заступле́ние ди́вное/ гра́ду Твоему́ дарова́ла еси́.

Тропарь пророку Самуилу, глас 2

Дар мноче́стен дан бысть непло́дней утро́бе/ и принесе́н в же́ртву, я́ко всесожже́ние благоприя́тно, Го́сподеви своему́,/ послужи́в Тому́ в преподо́бии и пра́вде,/ тем тя почита́ем, проро́че Бо́жий Саму́иле,/ я́ко моли́твенника о душа́х на́ших.

Ин тропарь, глас 5

От ма́тере умоле́нный, тезоимени́те да́ния Бо́жия⁴⁶,/ от Бо́га зва́ния во младе́нчестве сподо́бися,/ честны́й проро́че Саму́иле,/ до́бре пасы́й непокори́выя лю́ди/ и царе́м яви́выйся устрои́тель,/ и о нас, ве́рно чту́щих тя, моли́ и́стиннаго Бо́га,/да спасе́т ду́ши на́ша.

Ин тропарь, общий, глас 2

Проро́ка Твоего́ Саму́ила па́мять, Го́споди, пра́зднующе,/ тем Тя мо́лим:/ спаси́ ду́ши на́ша.

Кондак, глас 8

Я́ко многоче́стный дар⁴⁷, пре́жде зача́тия вдан Бо́гу,/ и измла́да Тому́ я́ко а́нгел послужи́л еси́, всеблаже́нне,/ и сподо́бился еси́ предбу́дущая веща́ти;/ те́мже вопие́м ти:/ ра́дуйся, проро́че Бо́жий Самуи́ле, архиере́ю вели́кий.

Ин кондак, глас 5

Пома́зателю ца́рский,/ па́че же свята́го богови́дца Дави́да,/ вели́кий Саму́иле,/ потщи́ся умоли́ти о нас,/ да пома́жемся Свята́го Ду́ха ма́стию/ и бу́дем стра́нни неприя́зни,/ я́коже Дави́д нечи́стому ду́ху Сау́лову.

Величание

Велича́ем тя,/ проро́че Бо́жий Саму́иле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителям Феодору, епископу Ростовскому, и Иоанну, епископу Суздальскому, глас 8

Я́ко апо́столом единонра́вных учи́телей Су́ждальския страны́,/ и цели́телей душ и теле́с прему́дрых,/ и служи́телей Бо́гу благоприя́тных,/ к ра́кам честны́х моще́й ва́ших притека́юще,/ ублажа́ем вас, святи́телие Богоблаже́ннии, Фео́доре и Иоа́нне,/ в пе́снех же и в пе́ниих, ра́дующеся, сла́вим Христа́,/ дарова́вшаго вам благода́ть исцеле́ний/ и гра́ду на́шему Су́ждалю вели́кое в вас утвержде́ние.

Ин тропарь, древний, глас тойже

Я́ко апо́столом единонра́внии,/ и учи́телие Су́ждальстей стране́,/ и цели́телие душа́м и телесе́м предо́брии,/ и служи́телие Бо́жии благоприя́тнии,/ к ра́кам честны́х моще́й ва́ших притека́юще,/ святи́телю вели́кий Иоа́нне и Фео́доре Богоблаже́ннии,/ соше́дшеся днесь, любо́вию па́мять ва́шу све́тло пра́зднуем в пе́снех и пе́ниих,/ ра́дующеся и Христа́ сла́вяще,/ И́же такову́ю благода́ть дарова́вшаго исцеле́ний/ и гра́ду Су́ждалю вели́кое утвержде́ние.

Кондак, глас 8

Боже́ственных и пречестны́х святи́телей Христо́вых и чудотво́рцев Иоа́нна и Фео́дора,/ ве́рнии, пою́ще, да ублажи́м,/ я́ко днесь, в па́мять их притека́юще к ра́кам моще́й их,/ мо́лим многообра́зных нас обстоя́ний изба́вити,/да вопие́м вам:/ ра́дуйтеся, гра́ду на́шему и Це́ркви Христо́вей вели́кое утвержде́ние.

Ин кондак, глас тойже

Я́ко доброде́телей учи́тели,/ моли́твами ва́шими подае́те чту́щим вас любо́вию/ доброде́телей исправле́ние/ и собла́знов избавле́ние.

Величание

Велича́ем вас,/ святи́телие вели́ции Фео́доре и Иоа́нне,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь апостолу Фаддею, глас 2

Днесь Еде́с град весели́тся,/ прие́м тобо́ю Креще́ния ба́ню,/ и Авга́рь, страсте́й премене́н, твою́ па́мять сла́вит./ С ни́миже пое́м и мы:/ весе́лия духо́внаго испо́лни живо́т наш/ и стра́сти исцели́,/ Фадде́е апо́столе, моли́твами твои́ми.

Ин тропарь, общий, глас 3

Апо́столе святы́й Фадде́е,/ моли́ Ми́лостиваго Бо́га,/да прегреше́ний оставле́ние/ пода́ст душа́м на́шим.

Кондак, глас 4

Я́ко звезду́ пресве́тлую/ Це́рковь тя стяжа́,/ апо́столе Фадде́е,/ чудесы́ твои́ми всегда́ просвеща́ема,/ спаси́ ве́рою чту́щия па́мять твою.

Величание

Велича́ем тя,/ апо́столе Христо́в Фадде́е,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Тропарь преподобному Аврамию Смоленскому, глас 8

Днесь возсия́ нам па́мять твоя́, сла́вне, я́ко со́лнце/ светоза́рно луча́ми озаря́ющая мир,/ и тьму но́щи злых ду́хов от нас отгоня́ющая./ Днесь небе́сныя си́лы святы́х а́нгел,/ и ду́ши пра́ведных мы́сленно торжеству́ют, ра́дующеся./ Днесь и мы, гре́шнии, припа́дающе, мо́лимся:/ о́тче преподо́бне Авра́мие,/ Христа́ Бо́га моли́ непреста́нно,/ спасти́ град и лю́ди, любе́зно тебе́ почита́ющия.

Кондак, глас 3

Возсия́, Го́споди, гра́ду Твоему́/ па́мять Твоего́ уго́дника,/ я́ко све́тлое со́лнце,/ ра́достно всех я́ко луча́ми озаря́ющи,/ па́че же моли́твы Пречи́стый Твоея́ Ма́тере/ от всех бед избавля́ют нас,/ и упраждня́ют ва́рварская шата́ния./ Тем мы, лю́дие Твои́, и град наш вельми́* хва́лимся,/ и спаса́емся моли́твами/ Твоего́ уго́дника Авра́мия, преподо́бнаго о́тца.

Величание

Ублажа́ем тя,/ преподо́бне о́тче Авра́мие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Корнилию Палеостровскому, глас 5

От ю́ности, прему́дре, приле́жно подвиза́вся,/ от Бо́га наставля́емь,/ оте́чество свое́ оста́вль, град Псков,/ и всели́ся в пусты́ню,/ во ото́це вели́каго е́зера Оне́га,/ и́ноки собра́ му́дре/ и извеще́нием Свята́го Ду́ха оби́тель согради́/ и храм созда́ Пресвяте́й Богоро́дице/ в похвалу́ Рождества́ Ея́,/ струя́ми же слез твои́х/ безпло́тныя враги́ погрузи́л еси́/ и жития́ твоего́ целому́дрием со а́нгельскими ли́ки совокупи́ся,/ преподо́бне о́тче Корни́лие,/ с ни́миже Христа́ Бо́га моли́/ спасти́ся душа́м на́шим.

Ин тропарь, глас 4

От ю́ности горя́щим жела́нием Боже́ственныя любве́ разжига́емь,/ жите́йския молвы́ оста́вил еси́, преподо́бне,/ ревни́тель Анто́нию Вели́кому быв,/ безмо́лвием и жесто́ким пребыва́нием после́дуя Христу́,/ бде́нием и моли́твами, и посто́м о́браз был еси́ твои́м ученико́м./ Те́мже моли́ся Го́сподеви, Корни́лие блаже́нне,/ спасти́ся душа́м на́шим.

Ин тропарь, глас 8

По́стническими труды́ нетру́дную жизнь стяжа́, преподо́бне,/ слеза́ми же мы́сленнаго фарао́на потопи́л еси́/ и вме́сто ско́рби ра́дость обре́л еси́,/ предстоя́ Христо́ви в лице́ святы́х,/ помина́й моля́щихся чад твои́х, Корнилие, о́тче наш.

Кондак, глас 3

Я́ко а́нгел во пло́ти на земли́ показа́ся,/ поще́нием насажде́н быв, преподо́бне о́тче Корни́лие,/ наста́вник и́ноком мно́гим был еси́;/ сего́ ра́ди вопие́м ти:/ моли́ Христа́ Бо́га спасти́ся душа́м на́шим.

Ин кондак, глас 8

Го́сподеви, от Святы́я Де́вы возсия́вшу ми́рови/ и Тому́ измла́да, я́ко а́нгел, послужи́л еси́,/ блаже́нне,/ и си́лою Его́ пусты́ню, я́ко град, сотвори́л еси́,/ мно́жество же учени́к в ней собра́л еси́,/ и́хже Богодохнове́нными уче́ньми просвети́л еси́./ Тем вопие́м ти:/ ра́дуйся, о́тче наш Корни́лие, и́ноком Боже́ственное удобре́ние.

Величание

Ублажа́ем тя,/ преподо́бне о́тче Корни́лие,/ и чтим святу́ю па́мять твою́,/ наста́внице мона́хов/ и собесе́дниче а́нгелов.

Тропарь мученику Агафонику и иже с ним, глас 4

Му́ченицы Твои, Го́споди... (общий мученику).

Кондак, глас 1

Зва́ние благо́е стяжа́в, богому́дре,/ муже́й лука́вых отврати́лся еси́ ве́ры,/ не убоя́вся мук, Агафони́че сла́вне;/те́мже благи́м был еси́ насле́дник,/ и прия́л еси́ со стра́ждущими с тобо́ю/ досто́йный венцы́.

Величание

Велича́ем тя,/ страстоте́рпче святы́й Агафони́че,/ и чтим честна́я страда́ния твоя́,/ я́же за Христа́/ претерпе́л еси́.

Тропарь Божией Матери ради иконы Ее Грузинская, глас 4

Днесь све́тло красу́ется оби́тель Красного́рская,/ и с не́ю ликовству́ет Раи́фская пу́стыня,/ я́ко зарю́ со́лнечную, от восто́ка возсия́вшую, восприи́мши, Влады́чице,/ чудотво́рную Твою́ ико́ну,/ е́юже разгоня́еши мглу искуше́ний и бед от вопию́щих ве́рно:/ изба́ви оби́тель на́шу и вся страны́ христиа́нския от всех наве́т вра́жиих,/ и спаси́ ду́ши на́ша, я́ко Милосе́рдая Засту́пница ро́да христиа́нскаго.

Ин тропарь, глас 5

Веселя́тся правосла́внии наро́ди,/ ви́дяще, Влады́чице Де́во Богоро́дице,/ Твою́ пречу́дную и чудотво́рную ико́ну,/ и прие́млют врачевство́ душе́вное и теле́сное Твое́ю ми́лостию всегда́./ Те́мже и мы, покланя́ющеся о́ней*, усе́рдно Тебе́ вопие́м:/ поми́луй, Блага́я Ма́ти, смире́нныя рабы́ Твоя́,/ и изба́ви нас от вся́каго зла и наве́та вра́жия,/ моля́щи Сы́на Твоего́ Го́спода Иису́са,/да, спа́сшеся зде, небе́сное жи́тельство получи́м/ человеколю́бием и благода́тию Его́.

Кондак, глас 8

Тебе́, Избра́нней от всех родо́в, Бо́жией Ма́тери,/ благода́рственная пе́ния прино́сим,/ прише́ствием честны́я Твоея́ ико́ны, раби́ Твои́, Богоро́дице, озаря́еми,/ но, я́ко иму́щая держа́ву непобеди́мую,/ от вся́ких нас бед свободи́, да зове́м Ти:/ ра́дуйся, Неве́сто Неневе́стная.

Ин кондак, глас 6

Аще попуще́нием Боже́ственным/ от рук неве́рных честна́я Твоя́, Влады́чице, ико́на/ поруга́нию подве́ржеся/ и копие́м ва́рвар пробода́на бысть,/ оба́че во стране́ на́шей Правосла́вней/ любоче́стно все́ми прославля́ется/ и благогове́йно почита́ется,/ сего́ ра́ди Тобо́ю явля́ет слепы́м зре́ние,/ глухи́м слы́шание, немы́м глаго́лание,/ хромы́м хожде́ние, разсла́бленным укрепле́ние,/ ско́рбным утеше́ние и отра́ду./ Сих ра́ди мо́лим Тя, Милосе́рдная Ма́ти,/ до конца́ проба́ви ми́лости Твоя́ на нас, я́ко Блага́я.

Величание

Велича́ем Тя,/ Пресвята́я Де́во,/ Ма́ти Христа́ Бо́га на́шего,/ и чтим о́браз Твой святы́й,/ от него́же источа́вши исцеле́ния/ всем с ве́рою к Тебе́ притека́ющим.

Тропарь Успению Богородицы, глас 1

В рождестве́ де́вство сохрани́ла еси́,/ во успе́нии ми́ра не оста́вила еси́, Богоро́дице,/ преста́вилася еси́ к животу́, Ма́ти су́щи Живота́,/ и моли́твами Твои́ми избавля́вши от сме́рти ду́ши на́ша.

Кондак, глас 2

В моли́твах неусыпа́ющую Богоро́дицу/ и в предста́тельствах непрело́жное упова́ние,/ гроб и умерщвле́ние не удержа́ста:/ я́коже бо Живота́ Ма́терь/ к животу́ преста́ви/ во утро́бу Всели́выйся присноде́вственную.

Величание

Велича́ем Тя,/ Пренепоро́чная Ма́ти Христа́ Бо́га на́шего,/ и всесла́вное сла́вим/ Успе́ние Твое́.

Тропарь мученику Луппу, глас 4

Му́ченик Твой, Го́споди... (общий мученику).

Кондак, глас 2

Звезда́ све́тлая яви́лся еси́/ непреле́стная ми́рови,/ Со́лнца Христа́ возвеща́ющи,/ заря́ми твои́ми, страстоте́рпче Лу́ппе,/ и пре́лесть погаси́л еси́ всю,/ нам же пода́еши свет, моля́ся непреста́нно о всех нас.

Величание

Велича́ем тя,/ страстоте́рпче святы́й Лу́ппе,/ и чтим честна́я страда́ния твоя́,/ я́же за Христа́/ претерпе́л еси́.

Тропарь священномученику Евтихию, ученику апостола Иоанна Богослова, глас 4

И нра́вом прича́стник,/ И престо́лом наме́стник... (общий священномученику).

Кондак, глас 3

Апо́столов сопресто́льник/ и святи́телей красота́ быв, Евти́хе,/ му́ченически просла́вился еси́,/ просия́л еси́ я́ко со́лнце, всех просвеща́я,/ и разори́л еси́ безбо́жия нощь глубо́кую./ Сего́ ра́ди тя почита́ем,/ я́ко Боже́ственнаго вои́стину/ священнотаи́нника Христо́ва.

Величание

Велича́ем тя,/ священному́чениче Евти́хе,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святителю Петру, митрополиту Московскому, всея России чудотворцу, глас 4

Наста́ день всечестны́й пра́здник/ пренесе́ния честны́х моще́й твои́х, святи́телю Пе́тре,/ веселя́ изря́дно твое́ ста́до,/и ве́рное оте́чество, и лю́ди,/ о ни́хже не оскудева́й моля́ся Христу́ Бо́гу,/ е́же от Него́ дарова́нней ти па́стве сохрани́тися от враг ненаве́тованней,/ и спасти́ся душа́м на́шим.

Ин тропарь, глас тойже

Благове́рно пожи́в в ми́ре,/ житие́м чи́стым просвети́вся,/ уче́нием святи́тельства прия́т па́ству,/ апо́столом насле́дниче./ Тем прие́м дар чуде́с от Бо́га, о́тче Пе́тре,/ моли́ Христа́ Бо́га,/ да спасе́т ду́ши на́ша.

Кондак, глас 8

Я́ко врача́ преизря́дна и исто́чника чудесе́м оби́льна,/ днесь соше́дшеся любо́вию, духо́вная твоя́ ча́да,/ в пренесе́ние честны́х моще́й твои́х,/ архиере́ю Пе́тре, мо́лим тя:/ моли́ Христа́ Бо́га дарова́ти честны́м твои́м пренесе́нием/ ве́рному во́инству на́шему на враги́ победи́тельная,/ да твои́ми к Бо́гу моли́твами находя́щих зол изба́вльшеся,/ ра́достною душе́ю и весе́лием се́рдца/ благода́рная ти воспое́м, глаго́люще:/ ра́дуйся, о́тче Пе́тре, архиере́ев и всея Росси́йския земли́ удобре́ние.

Ин кондак, глас 4

Яви́ся днесь пресве́тлая па́мять твоя́,/ святи́телю преблаже́нне Пе́тре,/ в ми́ре све́тло сия́ющи/ и явля́ющи всем/ Боже́ственное сия́ние.

Величание

Велича́ем тя,/ святи́телю о́тче Пе́тре,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Арсению Комельскому, Вологодскому, глас 4

Удали́вся ми́ра, водвори́лся еси́ в пусты́ню,/ и та́мо подвиза́лся еси́ до́брым по́двигом,/ посто́м и моли́твами и мно́гим терпе́нием,/ и жив показа́л еси́ мно́гая чудеса́,/ и по преставле́нии твое́м источа́еши разли́чныя исцеле́ния/ с ве́рою приходя́щим к честно́му гробу твоему́,/ Арсе́ние о́тче наш./ Моли́ Христа́ Бо́га/ спасти́ся душа́м на́шим.

Кондак, глас 8

Жите́йския молвы́ отбе́г,/ в пусты́ню всели́лся еси́,/ и та́мо житие́м жесто́ким пожи́л еси́,/ и зве́ря свире́паго а́ркуда* моли́твами укроти́л еси́/ и мно́гим был еси́ наста́вник ко спасе́нию,/ и того́ ра́ди получи́л еси́ жизнь ве́чную на Небесе́х./ Всегда́ зря Святу́ю Тро́ицу,/ моли́ изба́витися нам от бед, да зове́м ти:/ радуйся, о́тче наш Арсе́ние, пусты́нный жи́телю.

Величание

Ублажа́ем тя,/ преподо́бне о́тче Арсе́ние,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Пресвятой Богородице ради Ея явления преподобному Сергию Радонежскому, глас 4

В пресла́внем явле́нии Твое́м, Де́во Богоро́дице,/ припаде́ к стопа́м Твои́м преподо́бный а́вва Се́ргий/ и мольбу́ о святе́й оби́тели изря́дно сотвори́,/да Твои́м Ма́терним ко Христу́ предста́тельством/ усе́рдно при́сно хода́тайствуеши/ о всех под свяще́нный покро́в Твой прибега́ющих,/ прося́щи нам оставле́ния грехо́в и ве́лия ми́лости.

Ин тропарь, глас тойже

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи́,/ Тя бо и еди́ну наде́жду и́мамы.

Кондак, глас 1

Исто́чник исцеле́ний и ве́ры Правосла́вныя утвержде́ние/ посеще́ние Твое́, Богоро́дице, яви́ся,/ те́мже и нас, к Тебе́ притека́ющих,/ от бед и искуше́ний свободи́,/ Ла́вру сию́ невреди́му сохрани́,/ Правосла́вие во о́крест живу́щих утверди́/ и грехи́ разреши́ моли́твенник Твои́х,/ ели́ка бо хо́щеши, мо́жеши.

Ин кондак, глас 6

Освяти́ся Твои́м посеще́нием,/ Де́во Пречи́стая,/ оби́тель Пресвяты́я Тро́ицы,/ и возра́довася возлю́бленный избра́нник Твой,/ Се́ргий Богоно́сный,/ благослове́нному обетова́нию/ Твоего́ неотсту́пнаго заступле́ния.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим явле́ние Твое́,/ и́мже то́чиши обетова́ние/ покрыва́ти при́сно ме́сто сие́.

Тропарь апостолам Варфоломею и Титу, глас 3

Апо́столи святи́и Варфоломе́е и Ти́те,/ моли́те Ми́лостиваго Бо́га,/ да прегреше́ний оставле́ние/ пода́ст душа́м на́шим.

Кондак апостолу Варфоломею, глас 4

Яви́лся еси́ ве́лие со́лнце Це́ркви,/ уче́ний сия́нием и чудесы́ стра́шными,/ просвеща́я пою́щия тя, Варфоломе́е, Госпо́день апо́столе.

Кондак апостолу Титу, глас 2

Па́влов яви́вся собесе́дник, апо́столе,/ с ним нам сло́во предвозвести́л еси́ Боже́ственныя благода́ти,/ тайноглаго́льниче Ти́те приснопа́мятне./ Сего́ ра́ди вопие́м ти:/ не преста́й моля́ся о всех нас.

Величание

Велича́ем вас,/ святи́и апо́столи Варфоломе́е и Ти́те,/ весь мир уче́ньми свои́ми просвети́вшия/ и вся концы́/ ко Христу́ приве́дшия.

Тропарь Божией Матери ради иконы Ее Владимирская, глас 4

Днесь све́тло красу́ется славне́йший град Москва́,/ я́ко зарю́ со́лнечную восприе́мши, Влады́чице,/ чудотво́рную Твою́ ико́ну,/ к не́йже ны́не мы притека́юще и моля́щеся Тебе́ взыва́ем си́це:/ о Пречу́дная Влады́чице Богоро́дице,/ моли́ся из Тебе́ воплоще́нному Христу́ Бо́гу на́шему,/ да изба́вит град сей, и вся гра́ды и страны́ христиа́нския/ невреди́мы от всех наве́т вра́жиих/ и спасе́т ду́ши на́ша, я́ко Милосе́рд.

Кондак, глас 8

Взбра́нной Воево́де победи́тельная,/ я́ко изба́вльшеся от злых/ прише́ствием Твоего́ честна́го о́браза, Влады́чице Богоро́дице,/ све́тло сотворя́ем пра́зднество сре́тения Твоего́, и обы́чно зове́м Ти:/ ра́дуйся, Неве́сто Неневе́стная.

Ин кондак, глас тойже

К Взбра́нней Воево́де и Засту́пнице, Де́ве и Богоро́дице,/ в чи́стей со́вести, ве́рою утверди́вшеся, ру́сстии наро́ди,/ невозвра́тно наде́жду иму́ще, притеце́м,/ к чудотво́рному Ея́ и пречи́стому о́бразу, и возопие́м Ей:/ ра́дуйся, Неве́сто Неневе́стная.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

Тропарь мученикам Адриану и Наталии, глас 4

Му́ченицы Твои́, Го́споди... (общий мученикам).

Ин тропарь мученику Адриану, глас 3

Бога́тство неиждиву́щее вмени́л еси́/ ве́ру спасе́нную, треблаже́нне,/ оста́вль оте́ческое нече́стие/ и Влады́ки стопа́ми ше́ствуя,/ Боже́ственными дарова́нии обогати́лся еси́,/ Адриа́не сла́вне;/ Христа́ Бо́га моли́/ спасти́ся душа́м на́шим.

Кондак, глас 4

Му́ченик возсия́ Боже́ственная па́мять,/ и земны́я озари́ вся концы́ све́тло, с весе́лием зову́щих:/ Ты еси́ му́чеников, Христе́, ра́дование.

Ин кондак, глас тойже

Жены́ Богому́дрыя Боже́ственная словеса́ в се́рдце положи́в,/ Адриа́не му́чениче Христо́в, к муче́нием усе́рдно устреми́лся еси́,/ с супру́гою вене́ц прие́мь.

Величание

Велича́ем вас,/ страстоте́рпцы святи́и Адриа́не и Ната́лие,/ и чтим честна́я страда́ния ва́ша,/ я́же за Христа́/ претерпе́ли есте́.

Тропарь Божией Матери ради иконы Ее «Умиление» Псково-Печерской, глас 4

Днесь све́тло красу́ется оби́тель сия́,/ я́ко зарю́ со́лнечную восприе́мши, Влады́чице,/ чудотво́рную Твою́ ико́ну,/ к не́йже мы ны́не притека́юще и моля́щеся Тебе́, взыва́ем си́це:/ о Пречу́дная Влады́чице Богоро́дице!/ Моли́ся из Тебе́ воплоще́нному Христу́ Бо́гу на́шему,/ да изба́вит оби́тель сию́/ и вся гра́ды и страны́ христиа́нския невреди́мы от всех наве́т вра́жиих/ и спасе́т ду́ши на́ша, я́ко Милосе́рд.

Величание

Велича́ем Тя,/ Пресвята́я Де́во,/ Ма́ти Христа́ Бо́га на́шего,/ и чтим чудотво́рный о́браз Твой,/ и́мже спасла́ еси́/ нас от руки́ вра́жия.

Тропарь Божией Матери ради иконы Ее, именуемой Елецкая-Владимирская, глас 4

Днесь све́тло красу́ется дре́вний град Еле́ц,/ помина́юще сла́вное чу́до Пресвяты́я Богоро́дицы:/ егда́ бо на сто́гнах⁴⁸ Первопресто́льныя Москвы́/ ико́ну Ея́ чу́дную лю́дие моско́встии срета́ху,/ тогда́ Сама́, Влады́чице, на горе́ Аргама́чстей во гра́де Ельце́,/ на сре́тение нечести́вому Тамерла́ну изше́дше,/ гро́зное его́ наше́ствие вспя́ть обрати́./ Сего́ ди́внаго явле́ния изображе́ние на новопи́санней ико́не зря́ще/ и Засту́пницу на́шу за вся благодея́ния Ея́ благодаря́ще,/ уми́льно Ей взыва́ем:/ в пре́дняя не оста́ви нас, о Ма́ти Милосе́рдая.

Тропарь преподобному Пимену Великому, глас 8

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Пи́мене о́тче наш,/ моли́ Христа́ Бо́га спасти́ся душа́м на́шим.

Кондак, глас 4

Све́тлых по́двиг твои́х, преподо́бне о́тче,/ наста́ днесь свята́я па́мять твоя́,/ ду́ши благочести́вых веселя́щи,/ Пи́мене Богому́дре,/ о́тче наш преподо́бне.

Величание

Ублажа́ем тя,/ преподо́бне о́тче Пи́мене,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобным священномученику Кукше, ученику его Никону и Пимену постнику, Печерским, в Ближних пещерах почивающим, глас 3

Му́ченическою кро́вию, свяще́нне Ку́кше,/ в про́поведи Ева́нгелия со ученико́м ти, блаже́нным Ни́коном,/ честне́ украси́выйся,/ и Пи́мене, в по́стничестве светоза́рне просия́вый,/ в еди́н день и час вни́досте в свет незаходи́мый,/ иде́же моли́теся Го́сподеви,/ да пода́ст нам ве́лию ми́лость.

Кондак, глас 4

Свети́ла разу́мная, соше́дшеся, хвала́ми воспое́м, лю́дие,/ просия́ли бо суть в ми́ре сем:/ Пи́мен мно́гими по́двиги,/ Ку́кша же со ученико́м Ни́коном про́поведию Сло́ва,/ и си́и трие́, единоу́мно предстоя́ще Свя́тей Тро́ице,/ я́ко со́лнце сия́ют и просвеща́ют/ любо́вию па́мять их восхваля́ющих.

Величание

Ублажа́ем вас,/ преподо́бнии отцы́ Ку́кше, Пи́мене, и Ни́коне,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь преподобному Моисею Мурину, глас 1

Пусты́нный жи́тель, и в телеси́ а́нгел,/ и чудотво́рец яви́лся еси́, Богоно́се о́тче наш Моисе́е,/ посто́м, бде́нием, моли́твою небе́сная дарова́ния прии́м,/ исцеля́вши неду́жныя и ду́ши ве́рою притекаю́щих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеления.

Кондак, глас 4

Му́рины зауши́в и лица́ де́монов поплева́в,/ мы́сленно просия́л еси́,/ я́коже со́лнце све́тлое,/ све́том жития́ твоего́/ и уче́нием наставля́я ду́ши на́ша.

Величание

Ублажа́ем тя,/ преподо́бне о́тче Моисе́е,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Иову Почаевскому, глас 4

Возло́жь на ся и́го Христо́во от ю́ности,/ преподо́бне о́тче И́ове,/ многоле́тне свя́то подвиза́лся еси́/ на по́прище благоче́стия во оби́тели Уго́рницстей/ и на о́строве Ду́бенстем:/ и, прише́д к горе́ Поча́евстей,/ зна́менанней цельбоно́сною стопо́ю Пресвяты́я Богоро́дицы,/ и в те́сней пеще́ре ка́менней/ богомы́слия ра́ди и моли́твы многокра́тно заключа́лся еси́,/ и, благода́тию Бо́жиею укрепля́яся,/ му́жественно потруди́лся еси́/ на по́льзу Це́ркве Христо́вы и оби́тели твоея́,/ ку́пно же и проти́ву враго́в Правосла́вия/ и благоче́стия христиа́нскаго,/ и, наста́вив сицево́му* ополче́нию и́ночествующих,/ победи́тели тех предста́вил еси́ Влады́це своему́ и Бо́гу:/ Того́ моли́ спасти́ся душа́м на́шим.

Кондак, глас 8

Возсия́ от спу́да земна́го сокро́вище нетле́нное моще́й твои́х,/ уго́дниче Бо́жий,/ я́ко, благоче́стно пожи́в в ве́ре Христа́ Бо́га на́шего,/ дости́гл еси́ доброде́телей соверше́нства,/ и, оста́вль сла́дость жития́ преходя́щаго,/ в пеще́ре горы́ Поча́евския в поще́ниих, моли́твах и труде́х свя́то подвиза́лся еси́/ и те́ми те́ло твое́ увяди́л еси́./ Ны́не же, прише́д к Бо́гу в безмяте́жный и ве́чный поко́й,/ мо́лишися о всех с ве́рою к тебе́ прибега́ющих./ Те́мже благода́рно вопие́м ти:/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.

Величание

Ублажа́ем тя,/ преподо́бне о́тче И́ове,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь Собору преподобных отцев Киево-Печерских, в Дальних пещерах (преподобного Феодосия) почивающих, глас 4

Мы́сленное со́лнце и све́тлую луну́/ первонача́льных Пече́рских,/ со всем собо́ром преподо́бных днесь почти́м:/ ти́и бо це́рковную твердь озаря́юще,/ просвеща́ют во тьме страсте́й бе́дствующих,/ и подаю́т от Христа́ Бо́га моли́твами свои́ми по́мощь во всех ско́рбех/ и душа́м на́шим про́сят избавле́ния.

Кондак, глас 8

Избра́ннии от ро́дов уго́дницы Бо́жии,/ святи́и преподо́бнии Пече́рстии,/ на сих гора́х доброде́тельми просия́вшии,/ и вас земля́ не потаи́ла есть,/ но не́бо отве́рзеся вам и ра́йское селе́ние./ Те́мже мы похва́льныя пе́сни Бо́гу просла́вльшему вас/ в па́мяти ва́шей прино́сим:/ вы же, я́ко иму́щии дерзнове́ние,/ ваш собо́р почита́ющих от всех бед моли́твами ва́шими заступа́йте,/ я́ко засту́пницы на́ши и к Бо́гу хода́таи.

Величание

Велича́ем вас,/ преподо́бнии отцы́ на́ши Пече́рстии,/ и чтим святу́ю па́мять ва́шу,/ вы бо мо́лите о нас/ Христа́ Бо́га на́шего.

Тропарь преподобному Савве Крыпецкому, Псковскому, глас 8

Пусты́ни яви́лся еси́ до́брое насажде́ние, преподо́бне,/ от ю́ности бо в ми́ре изво́лил еси́ чи́стое житие́;/ ревну́я же бо́льшему, и дом оте́ческий оста́вил еси́,/ и вся кра́сная ми́ра сего́ презре́в,/ от чу́ждых стран прише́л еси́/ во оби́тели Богоспаса́емаго гра́да Пско́ва/ и послуша́нию преподо́бнаго Евфроси́на преда́лся еси́;/ та́же простира́лся умо́м еще́ к вя́щшему*,/ всели́лся еси́ в пусты́ню,/ в не́йже оби́тель прече́стну воздви́гл еси́/ и мно́жество и́нок собра́л еси́,/ и их настави́л еси́ на путь и́стинный./ Те́мже и Христо́с, Ему́же в же́ртву себе́ прине́сл еси́,/ ви́дев твоя́ благи́я труды́,/ я́ко пресве́тла тя свети́льника/ и по преставле́нии чудесы́ обогати́, Са́вво, о́тче наш,/ моли́ся у́бо при́сно Ему́ о стране́ на́шей,/ е́же дарова́тися ей на враги́ побе́дам,/ ста́ду же твоему́ от враг ненаве́тну* пребы́ти/ и всем нам спасти́ся.

Ин тропарь, глас 7

От мирска́го жития́ изше́д,/ отверже́нием же ми́ра Христу́ после́довал еси́/ и, в пусты́ню все́лься,/ равноа́нгельное житие́ пожи́л еси́,/ отону́дуже, веселя́ся, преше́л еси́ к Небе́сным черто́гом,/ и ны́не, со а́нгелы, Влады́чню престо́лу предстоя́,/ помина́й, нас, чад свои́х,/ я́же собра́л еси́, Богому́дре,/ да ра́достию от души́ вопие́м:/ ра́дуйся, Са́вво,/ о́тче преблаже́ннейший.

Кондак, глас 1

Возсия́ от пусты́ни сла́вному гра́ду Пско́ву/ но́вое све́тлое со́лнце,/ чуде́с луча́ми всех озаря́ющее/ и благода́тне согрева́ющее,/ тьму же вся́ких искуше́ний и наве́тов/ и хлад грехо́вных отженя́ющее./ Прииди́те у́бо, пра́зднующе блаже́нную па́мять/ сего́ свети́льника на́шего воспои́м:/ сла́ва Бо́гу, та́ко промышля́ющему о нас,/ сла́ва уго́днику Его́, сохраня́ющу нас!/ Ты же, преподо́бне о́тче Са́вво,/ о и́же твою́ при́сно па́мять почита́ющих/ моли́ Христа́ Бо́га,/ я́ко да ми́лостив будет нам и в день су́дный.

Величание

Ублажа́ем тя,/ преподо́бне о́тче Са́вво,/ и чтим святу́ю па́мять твою́,/ наста́вниче мона́хов/ и собесе́дниче ангелов.

Тропарь общий преподобному Печерскому единому, глас 8

Посто́м ду́шу твою́ просвети́л еси́,/ моли́твами непреста́нными се́рдце твое́ сосу́д Ду́ха Свята́го соде́лал еси́,/ преподо́бне о́тче наш (имя рек),/ те́мже вся вра́жия ополче́ния кре́пко посрами́л еси́/ и, я́ко победоно́сец и́стинный, воздая́ния получи́л еси́ от Христа́ Бо́га./ Тому́ помоли́ся о душа́х на́ших.

Тропарь общий затворнику Печерскому единому, глас 2

Ве́лия ве́ры исправле́ния,/ в пеще́рнем затво́ре, я́ко на воде́ упокое́ния,/ преподо́бне о́тче (имя рек), ра́довался еси,/ огне́м бо любве́ Боже́ственныя распаля́емь,/ бде́нием и моли́твою безстра́стия дости́гл еси́/ и яви́лся еси́ равноа́нгельный на земли́./ Того́ моли́твами, Христе́ Бо́же, спаси́ ду́ши на́ша.

Кондак, глас 8

Христо́вою любо́вию уязви́в ду́шу,/ преподо́бне о́тче наш (имя рек),/ в пеще́рнем мра́це свет спасе́ния обре́л еси́/ и, я́ко ча́до избра́нное вели́ких отце́в Пече́рских Анто́ния и Феодо́сия,/ вку́пе с ни́ми оби́тель ра́йскую унасле́довал еси́,/ отону́дуже призира́й ны́не на оби́тель земну́ю, в не́йже подвиза́лся еси́,/ и моли́ся о чту́щих па́мять твою́, да зове́м ти:/ ра́дуйся (имя рек), моли́твенниче о душа́х на́ших.

Величание

Ублажа́ем тя,/ преподо́бне о́тче (имя рек),/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь общий преподобным Печерским, двум или многим, глас 3

Преблаже́ннии и Богоно́снии отцы́ на́ши (имя рек),/ я́ко стяжа́вшии дерзнове́ние ко Го́споду/ равноа́нгельным свои́м житие́м,/ его́же ра́ди обогати́ Христо́с нетле́нием и чудесы́ мо́щи ва́ша,/ мо́лим вас приле́жно:/ испроси́те душа́м на́шим очище́ние/ и ве́лию и бога́тую ми́лость.

Кондак, глас 4

Бога́тство благода́ти и сыноположе́ния стяжа́вше мно́гими по́двиги и доброде́тельми,/ и́хже ра́ди Христо́с всели́ ду́ши ва́ша/ в Небе́сная селе́ния Своя́,/ дарова́в благода́ть нетле́ния и чуде́с моще́м ва́шим./ К ни́мже притека́юще, вопие́м:/ ра́дуйтеся (имя рек), отцы́ на́ши,/ ли́ков и́ночествующих похвале́ и удобре́ние.

Величание

Ублажа́ем вас,/ преподо́бнии отцы́ (имя рек),/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.

Тропарь Предтече, глас 2

Па́мять пра́веднаго с похвала́ми,/ тебе́ же довле́ет⁴⁹ свидете́льство Госпо́дне, Предте́че:/ показа́л бо ся еси́ вои́стинну и проро́ков честне́йший,/ я́ко и в струя́х крести́ти сподо́бился еси́ Пропове́данного./ Те́мже за и́стину пострада́в, ра́дуяся,/ благовести́л еси́ и су́щим во а́де Бо́га я́вльшагося Пло́тию,/ взе́млющаго грех ми́ра,/ и подаю́щаго нам ве́лию ми́лость.

Кондак, глас 5

Предте́чево сла́вное усекнове́ние,/ смотре́ние бысть не́кое* Боже́ственное:/ да и су́щим во а́де Спа́сово пропове́сть прише́ствие./ Да рыда́ет у́бо Ироди́а,/ беззако́нное уби́йство испроси́вши:/ не зако́н бо Бо́жий, ни живы́й век возлюби́,/ но притво́рный, привре́менный⁵⁰.

Ин кондак, глас 4

И́род, Предте́че, беззако́нновав,/ жене́ подаде́ главу́ твою́ честну́ю,/ е́йже покланя́ющеся, весели́мся;/ Ироди́я же пла́чет и рыда́ет,/ и И́род, и пляса́вшая.

Величание

Велича́ем тя,/ Крести́телю Спа́сов Иоа́нне,/ и почита́ем вси честны́я твоей главы́ усекнове́ние.

Припев

Святый вели́кий Иоа́нне Предте́че Госпо́день,/ моли́ Бо́га о нас.

Тропарь Иоанну Предтече, глас 4

Па́мять пра́веднаго с похвала́ми... (вчерашний).

Кондак, глас тойже

И́род, Предте́че, беззако́нновав,/ жене́ подаде́ главу́ твою́ честну́ю,/ е́йже покланя́ющеся, весели́мся;/ Ироди́я же пла́чет и рыда́ет,/ и И́род, и пляса́вшая.

Тропарь святителям Александру, Иоанну и Павлу Новому, патриархам Константинопольским, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не оста́ви, ми́лость Твою́, от нас,/ но моли́твами их/ в ми́ре упра́ви живо́т наш.

Кондак, глас 8

Христо́вою любо́вию распала́еми, сла́внии,/ и яре́м Его́ прие́мшии, крест честны́й,/ подража́тели Того́ жития́ яви́стеся,/ и Боже́ственныя сла́вы Его́ прича́стницы бы́сте,/Алекса́ндре Богому́дре со Иоа́нном чу́дным и Па́влом сла́вным./ Те́мже престо́лу Его́ предстоя́ще,/ приле́жно моли́теся за ду́ши на́ша.

Величание

Велича́ем вас,/ святи́телие вели́ции Алекса́ндре, Иоа́нне и Па́вле,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь преподобному Александру Свирскому, глас 4

От ю́ности, Богому́дре, жела́нием духо́вным в пусты́ню всели́вся,/ еди́наго Христа́ возжела́л еси́ усе́рдно стопа́м в след ходи́ти./ Те́мже и а́нгельстии чи́ни зря́ще тя удиви́шася,/ ка́ко с пло́тию к неви́димым ко́знем подвиза́вся, прему́дре,/ победи́л еси́ полки́ страсте́й воздержа́нием,/ и яви́лся еси́ равноа́нгелен на земли́,/ Алекса́ндре преподо́бне./ Моли́ Христа́ Бо́га/да спасе́т ду́ши на́ша.

Кондак, глас 8

Я́ко многосве́тлая звезда́/ днесь в страна́х Росси́йских возсия́л еси́, о́тче,/ всели́вся в пусты́ню,/ Христо́вым стопа́м после́довати усе́рдно возжела́л еси́,/ и Того́ свято́е и́го на ра́мо твое́ взем, честны́й крест,/ умертви́л еси́, труды́ по́двиг твои́х, теле́сная взыгра́ния⁵¹./ Те́мже вопие́м ти:/ спаси́ ста́до твое́, е́же собра́л еси́, му́дре, да зове́м ти:/ ра́дуйся, преподо́бне Алекса́ндре, о́тче наш.

Величание

Ублажа́ем тя,/ преподо́бне о́тче Алекса́ндре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь благоверному князю Александру Невскому, глас 4

Позна́й свою́ бра́тию росси́йский Ио́сифе,/ не в Еги́пте, но на небеси́ ца́рствующий,/ благове́рный кня́же Алекса́ндре,/ и приими́ моле́ния их,/ умножа́я жи́та лю́дем плодоно́сием земли́ твоея́,/ гра́ды влады́чествия твоего́ огражда́я моле́нием,/ и насле́дником твои́м благове́рным на сопроти́вныя спобо́рствуя.

Кондак, глас тойже

Я́коже сро́дницы твои́, Бо́рис и Глеб,/ яви́шася тебе́ с небесе́ в по́мощь,/ подвиза́ющемуся на Ве́йлгера Све́йскаго и во́ев его́,/ та́ко и ты ны́не,/ блаже́нне Алекса́ндре,/ прииди́ в по́мощь твои́м сро́дником/ и побори́ борю́щия ны.

Величание

Ублажа́ем тя,/ святы́й благове́рный кня́же Алекса́ндре,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь благоверному князю Даниилу Московскому, глас 3

Яви́лся еси в стране́ на́шей,/ я́ко звезда́ пресве́тлая,/ благове́рный кня́же Дании́ле,/ луча́ми све́та твоего́ озаря́я град твой и оби́тель твою́,/ лю́дем правосла́вным побо́рник еси́,/ пле́нным свободи́тель и ни́щим защи́титель,/ моли́ Христа́ Бо́га/ держа́ве Росси́йстей дарова́ти мир/ и спасти́ ду́ши на́ша.

Ин тропарь, глас 4

Яви́лся, я́ко звезда́ пресве́тлая,/ благове́рне и преподо́бне кня́же Дании́ле,/ в богопоруче́ннем твое́м гра́де Москве́ в жи́зни вре́менней/ и просвети́ся воздержа́нием, и всено́щным стоя́нием, и посто́м,/ и моли́твою, и слеза́ми ко Всеми́лостивому Спа́су/ за град свой Москву́ и за вся стра́ны Росси́йския земли́./ И по преставле́нии твое́м честны́я твоя́ мо́щи/ источа́ют исцеле́ния неоску́дно приходя́щим с ве́рою,/ те́мже вопие́м ти:/ моли́ Христа́ Бо́га/ спасти́ся душа́м на́шим.

Иде́же пое́тся Слу́жба вку́пе обои́м преподо́бным и благове́рным князьям Александру Невскому и сыну его Даниилу Московскому, тропарь, глас 3:

Преподо́бнии и благове́рнии кня́зие Алекса́ндре и Дании́ле,/ моли́те Ми́лостиваго Бо́га/ оте́честву ва́шему земно́му/ всегда́ в Правосла́вии и благоче́стии пребыва́ти/ и всем ру́сским лю́дем в ми́ре спасти́ся.

Кондак, глас 6

Е́же по о́бразу соблю́л непрело́жно/ и я́же в ми́ре тле́нное оста́вив,/ со а́нгельскими ли́ки предстои́ши Христу́,/ преподо́бне кня́же Дании́ле,/ ника́коже забыва́й чад твои́х,/ но ми́лостивно посеща́й, глаго́ля им:/ аз есмь с ва́ми и никто́же на вы.

Ин кондак, глас 8

Красоту́ ми́ра сего́, княже́ние и сла́ву я́ко вре́менная помышля́я,/ и сего́ ра́ди благоче́стно в ми́ре пожи́л еси́, блаже́нне кня́же Дании́ле,/ ми́лостию и моли́твами, и и́ночеством Бо́гу угоди́в,/ и по преставле́нии свое́м чуде́с дар прии́м от Христа́ Бо́га,/ и свети́льник яви́лся пресве́тлый, просвеща́я свои́ми чудесы́,/ приходя́щим с ве́рою подае́ши ско́рое здра́вие и от бед избавля́еши./ Те́мже Христо́ва Це́рковь пе́сньми сла́вит тя, благочести́вый кня́же Дании́ле,/ ца́рствующему твоему́ гра́ду Москве́ вели́кое утвержде́ние.

Идеже поется служба вкупе обоим преподобным и благоверным князьям Александру Невскому и сыну его Даниилу Московскому, кондак, глас 3:

Возсия́ днесь пресве́тлая па́мять ва́ша,/ преподо́бнии и благове́рнии Алекса́ндре и Дании́ле,/ и, сию́ соверша́юще с любо́вию,/ ва́шея по́мощи и предста́тельства пред Го́сподем про́сим,/ вас бо Ру́сстей земли́ и всем нам/ я́ко предста́тели и засту́пники дарова́ Бог.

Величание

Ублажа́ем тя,/ святы́й благове́рный кня́же Дании́ле,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь Собору святых Сербских просветителей и учителей, глас 4

Первосвяти́телие Богоно́снии, отцы́ на́ши,/я́ко просвети́телие се́рбстии,/ святи́и первопа́стырие и патриа́рси,/ и́стиннии храни́телие апо́стольских преда́ний,/ столпи́ непоколеби́мии,/ Правосла́вия наста́вницы,/ Влады́ку всех Христа́ моли́те/ мир вселе́нней дарова́ти/ и душа́м на́шим ве́лию ми́лость.

Кондак, глас 3

На престо́лех святи́тельских благоче́стно пожи́сте/ и лю́ди своя́ к богоразу́мию наста́висте,/ до́бре Бо́гу угожда́юще,/ сего́ ра́ди от Него́ нетле́нием и чудесы́ просла́влени бы́сте,/ я́ко ученицы́ Бо́жия благода́ти.

Величание

Велича́ем вас,/ святи́телие вели́ции, просвети́телие и учи́телие земли́ Се́рбския,/ и чтим святу́ю па́мять ва́шу,/ вы бо мо́лите о нас/ Христа́ Бо́га на́шего.

Тропарь положению честного пояса Пресвятой Богородицы, глас 8

Богоро́дице Присноде́во, челове́ков Покро́ве,/ ри́зу и по́яс пречи́стаго Твоего́ телесе́,/ держа́вное гра́ду Твоему́ обложе́ние дарова́ла еси́,/ безсе́менным рождество́м Твои́м, нетле́нна пребыва́ющи,/ о Тебе́ бо и естество́ обновля́ется и вре́мя./ Те́мже мо́лим Тя, мир гра́ду Твоему́ дарова́ти/ и душа́м на́шим ве́лию ми́лость.

Кондак, глас 2

Богоприя́тное Твое́ чре́во, Богоро́дице,/ объе́мший по́яс Твой честны́й,/ держа́ва граду Твоему́ необори́ма/ и сокро́вище есть благи́х неоску́дно,/ еди́на ро́ждшая, Присноде́во.

Ин кондак, глас 4

Честна́го по́яса Твоего́ положе́ние/ пра́зднует днесь Твой, Препе́тая, храм/ и приле́жно взыва́ет Ти:/ ра́дуйся, Де́во,/ христиа́н похвало́.