Месяца ноября в 8-й день

Аще храм собора святаго Архистратига Михаила, или изволит настоятель, творити бдение.

На Го́споди воззва́х, стихиры на 4, глас 1.

Подобен: Всехва́льнии му́ченицы:

Безпло́тнии А́нгели, Бо́жию Престо́лу предстоя́ще, / и отону́дными светлостьми́ облиста́еми, / и светоли́тии ве́чно сия́юще, и све́ти быва́юще втори́и, / Христу́ моли́теся / дарова́ти душа́м на́шим / мир и ве́лию ми́лость. [Дважды.]

Безсме́ртнии А́нгели, / жи́зни и́стинно неги́бельныя от пе́рвыя прие́мше Жи́зни, всеблаже́ннии, / присносу́щныя сла́вы, и святи́и зри́телие му́дрости ве́чныя бы́сте, / све́та исполня́еми и свещи́ сообраща́емыя, / прили́чно показу́емии.

Арха́нгели, А́нгели, / Нача́ла, Престо́ли, / Госпо́дствия и Серафи́ми шестокрила́тии, / и многоочи́тии Херуви́ми Боже́ственнии, / му́дрости орга́ни, / Си́лы и Вла́сти Боже́ственнейшии, / Христу́ моли́теся / дарова́ти душа́м на́шим / мир и ве́лию ми́лость.

Слава, глас 4: А́нгельских лико́в чинонача́льниче, / на Небесе́х Престо́лу предстоя́ трисо́лнечнаго Божества́ / и бога́тно осиява́емь Боже́ственными светлостьми́, / испуща́емыми непреста́нно отту́ду, / и нас, су́щих на земли́, трисвято́е пе́ние ра́достно пою́щих, / страсте́й мглы изба́ви / и просвеще́нием уясни́, Михаи́ле Архистрати́же, / моли́твенниче о душа́х на́ших.

И ныне, Богородичен.

На стиховне стихиры, глас 6.

Подобен: Тридне́вен:

Арха́нгельския си́лы, Христе́, / Престо́лу предстоя́ще Твоему́, / мо́лятся о ро́де челове́честем. / Тех у́бо мольба́ми / язы́ков де́рзость низложи́, / мир всем ве́рным подая́.

Стих: Творя́й А́нгелы Своя́ ду́хи, / и слуги́ Своя́ пла́мень о́гненный.

Окру́г Престо́ла всех Царя́ / при́сно лику́юще, / А́нгелов чи́ни, нас сохраня́йте, / ве́рою вас призыва́ющия, / и муче́ния всех изба́вите.

Стих: Хвали́те Его́ вси А́нгели Его́, / хвали́те Его́ вся си́лы Его́.

Оте́ц, И́же над все́ми Бог, / си́лы Небе́сных умо́в, / безо́бразны и невеще́ственны, / певцы́ трисо́лнечныя сла́вы Своея́, / и еди́нственное Сло́во, и Дух приведе́.

Слава, глас 6, самогласен: А́нгели Твои́, Христе́, / Престо́лу вели́чествия в стра́се предстоя́ще, / Твои́м светода́нием при́сно просвеща́еми, / в Вы́шних певцы́ / и Све́та Твоего́ служи́тели, от Тебе́ посыла́еми, / даю́т просвеще́ние душа́м на́шим.

И ныне, Богородичен, подобен тойже: Ра́дуйся, Богоро́дице Де́во, / с Гаврии́лом согласно Тебе́ вопие́м: / Ты бо ра́дость пе́рвую свы́ше прии́мши, / ра́дости вся ны испо́лни.

Тропарь, глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил.

Слава и ныне, Богородичен 1-й гласа.

На Го́споди воззва́х, стихиры на 8. Глас 4.

Подобен: Я́ко до́бля:

Трисо́лнечнаго Божества́ предста́тель светле́йший / Михаи́ле, явля́яся, Архистрати́же, / с Го́рними си́лами зове́ши, ра́дуяся: / Свят еси́, О́тче, / Свят еси́, собезнача́льное Сло́во, / Свят еси́ и Святы́й Ду́ше, / еди́на сла́ва, еди́но ца́рство и естество́, / еди́но Божество́ и си́ла. [Дважды.]

И вид твой о́гнен, и добро́та чу́дна, / Михаи́ле первоа́нгеле, / невеще́ственным бо естество́м прехо́диши концы́, / исполня́я повеле́ния всех Творца́, / си́лен в кре́пости твое́й познава́емь, / и исто́чник исцеле́ний храм твой соде́ловая, / зва́нием твои́м святы́м почита́емый. [Дважды.]

Творя́й А́нгелы Твоя́, я́коже писа́ся, ду́хи / и служа́щия Тебе́ пла́мень о́гненный, / посреде́ чино́в пе́рвенствующа показа́л еси́, Го́споди, Твои́х Арха́нгельских / Михаи́ла Архистрати́га, / Твои́м манове́нием повину́ющася, Сло́ве, / и песнь трисвяту́ю / со стра́хом возглаша́юща сла́ве Твое́й.

Ины стихиры, глас 4.

Подобен: Дал еси́ зна́мение:

Ум Предве́чный, свет соста́ви вторы́й, / Гаврии́ла, Тебе́ прича́стии Боже́ственными просвеща́ющаго всю вселе́нную / и ю́же от ве́ка открыва́ющаго нам / Боже́ственную и вели́кую и́стинно та́йну: / во утро́бе Воплоща́емаго де́вственней, / су́ща Безтеле́снаго и бы́вша Челове́ка, / во е́же спасти́ челове́ка.

Престо́лу предстоя́ трисо́лнечнаго Божества́ / и бога́тно осия́емь Боже́ственными светлостьми́, / испуща́емыми непреста́нно отту́ду, / су́щия на земли́, ра́достно лику́ющия и благохва́лящия тя, / страсте́й мглы изба́ви и просвеще́нием уясни́, / Гаврии́ле Архистрати́же, / моли́твенниче о душа́х на́ших.

Сокруши́ свере́пства Ага́рянская, / на ста́до твое́ ча́сто находя́щая, / уста́ви раздо́ры Церкве́й, / укроти́ бу́рю безме́рных искуше́ний, / изба́ви бед и обстоя́ний любо́вию чту́щия тя

/ и под кров твой прибега́ющия, / Гаврии́ле Архистрати́же, / моли́твенниче о душа́х на́ших.

Слава, глас 6. Византиево: Сра́дуйтеся нам, вся А́нгельская чинонача́лия, / первостоя́тель бо ваш и наш предста́тель, / вели́кий Архистрати́г, / в дне́шний день в честне́м его́ хра́ме / пресла́вно явля́яся, освяща́ет. / Те́мже, по до́лгу воспева́юще, тому́ возопии́м: / покры́й нас кро́вом крил твои́х, / велича́йший Михаи́ле Арха́нгеле.

И ныне, Богородичен: Сра́дуйтеся нам, вся де́вственных ликостоя́ния, / Предста́тельница бо на́ша, и Хода́таица, / и Покро́в, и вели́кое Прибе́жище / в дне́шний день в честне́м Ея́ и Боже́ственнем хра́ме / скорбя́щия утеша́ет. / Те́мже, по до́лгу воспева́юще Сию́, возопии́м: / покры́й ны Боже́ственным предста́тельством Твои́м, / Пречи́стая Богоро́дице Влады́чице.

Вход. Прокимен дне.

Иису́са Нави́на чте́ние

Бысть, егда́ бя́ше Иису́с от Иерихо́на, и воззре́в очи́ма свои́ма, ви́де челове́ка стоя́ща пред ним, и меч его́ обнаже́н в руце́ его́. И прише́д Иису́с рече́ ему́: наш ли еси́ или́ от сопроти́вных на́ших? Он же рече́ ему́: аз Архистрати́г си́лы Госпо́дни, ны́не приидо́х се́мо. И Иису́с паде́ лице́м свои́м на зе́млю и рече́ ему́: влады́ко, что повелева́еши твоему́ рабу́? И рече́ Архистрати́г Госпо́день ко Иису́су: разреши́ сапо́г твой от ног твои́х, ме́сто бо, на не́мже ты стои́ши, свя́то есть. И сотвори́ Иису́с та́ко.

Ис.Нав.5:13–15

Суде́й Изра́илевых чте́ние

Бысть во дни о́ны, укрепи́ся Мадиа́м на сы́ны Изра́илевы, и ти́и возопи́ша ко Го́споду Бо́гу; и се А́нгел Госпо́день прии́де и се́де под ду́бом, и́же во Евфра́фе, в земли́ Иоа́са, отца́ Езри́мова, и Гедео́н, сын его́, млатя́ше пшени́цу на гумне́, е́же бежа́ти с не́ю от лица́ Мадиа́мля. И яви́ся ему́ А́нгел Госпо́день и рече́ к нему́: Госпо́дь с тобо́ю, си́льный кре́постию. И рече́ к нему́ Гедео́н: во мне, Го́споди мой, и а́ще есть Госпо́дь с на́ми, и чесо́ ра́ди обрето́ша ны вся зла́я сия́? И где суть вся чудеса́ Его́, ели́ка пове́даша нам отцы́ на́ши, глаго́люще: не из Еги́пта ли изведе́ нас Госпо́дь? И ны́не отве́рже ны Госпо́дь и предаде́ ны в ру́ку Мадиа́млю. И воззре́ на него́ А́нгел Госпо́день и рече́ ему́: иди́ в кре́пости твое́й сей и спасе́ши Изра́иля от руки́ Мадиа́мли, и се посла́х тя. И рече́ к Нему́ Гедео́н: во мне, Го́споди, в чесо́м спасу́ Изра́иля? Се ты́сяща моя́ ху́ждша в Манасси́и, и аз есмь мний в дому́ отца́ моего́. И рече́ к нему́ Госпо́дь: поне́же Аз бу́ду с тобо́ю, и избие́ши Мадиа́ма, я́ко му́жа еди́наго. И рече́ к Нему́ Гедео́н: и а́ще обрето́х благода́ть пред очи́ма Твои́ма, и да сотвори́ши мне днесь зна́мение, я́ко Ты глаго́леши со мно́ю. Не отыди́ отсю́ду, до́ндеже приити́ мне к Тебе́, и принесу́ же́ртву мою́, и пожру́ пред Тобо́ю. И рече́ к нему́ А́нгел Госпо́день: Аз есмь, и преме́длю, до́ндеже обрати́шися ты. Гедео́н же вни́де и сотвори́ ко́злище от коз и че́тверть муки́ опресно́ков, и вложи́ с мя́сом в ко́шницу, и юху́ влия́ в горне́ц, и изнесе́ к Нему́ под дуб, и поклони́ся. И рече́ к нему́ А́нгел Госпо́день: возми́ мяса́ и хле́бы пре́сныя, и положи́ у ка́мене о́наго и юху́ изли́й. И сотвори́ та́ко. И простре́ А́нгел Госпо́день коне́ц жезла́, су́щаго в руце́ Его́, и косне́ся мясо́м и хле́бом пре́сным, и возгоре́ся огнь из ка́мене, и пояде́ мяса́ и опресно́ки, и А́нгел Госпо́день оты́де от оче́й его́. И ви́де Гедео́н, я́ко А́нгел есть Госпо́день, и рече́ Гедео́н: увы мне, Го́споди, Го́споди, я́ко ви́дех А́нгела Госпо́дня лице́м к лицу́. И рече́ ему́ Госпо́дь: мир тебе́, не бо́йся, не у́мреши. И созда́ та́мо Гедео́н же́ртвенник Го́споду и

назва́ его́ мир Госпо́день, да́же до дне сего́.

Суд.6:2, 7, 11–24

Проро́чества Иса́иина чте́ние

Та́ко глаго́лет Госпо́дь: вся земля́ да вопие́т с весе́лием. И древа́ Лива́нова да возвеселя́тся о тебе́, и ке́дри Лива́новы реку́т: отне́леже ты усну́л еси́, не взы́де секи́й нас. Ад до́ле огорчи́ся, сре́тив тебе́, гряду́щу ти, воздви́же на тя исполи́ны вся, нача́льствовавшия земле́ю. А́ще воста́ли бы́ша от престо́л свои́х вси ца́рие язы́честии, вси отвеща́ют и реку́т тебе́: и ты плене́н еси́ я́коже и мы, с на́ми же причта́лся еси́. Сни́де во ад сла́ва твоя́ и мно́гое твое́ весе́лие, под тобо́ю посте́лют гни́лость, и покро́в твой – че́рви. Ка́ко спаде́ с Небесе́ денни́ца, зау́тра возсиява́ющая, сокруши́ся на зе́млю, посыла́я ко всем язы́ком. Ты бо рекл еси́ в помышле́нии твое́м: на Не́бо взы́ду, верху́ звезд небе́сных поста́влю престо́л мой и ся́ду на горе́ высо́цей, на гора́х высо́ких, су́щих к се́веру. И взы́ду вы́шше облако́в, и бу́ду подо́бен Вы́шнему. Ны́не же во ад сни́деши, во основа́ния земли́. И ви́девшии тя почудя́тся, и реку́т о тебе́: сей челове́к, смуща́яй зе́млю, потряса́яй цари́, положи́вый вселе́нную всю пу́сту, и гра́ды ея́ низложи́, и плене́нных не разреши́ в до́мы их. Вси ца́рие язы́честии успо́ша в чести́, челове́к в дому́ свое́м, ты же отве́ржен бу́деши в гора́х, я́ко мертве́ц возгнуше́н со мно́гими мертвецы́, избоде́ными мече́м, низходя́щими во ад. И́мже о́бразом ри́за, кро́вию намоче́на, не бу́дет чиста́, си́це ниже́ ты бу́деши чист, зане́ зе́млю мою́ погуби́л еси́, и лю́ди моя́ порази́л еси́, и не пребу́деши в ве́чное вре́мя.

Ис.14:7–20

На литии стихиры, глас 1

Киприаново: У́мных сил Архистрати́зи, / предстоя́ще непреста́нно Влады́чню Престо́лу, / моли́теся ко Го́споду / мир ми́ру дарова́ти / и душа́м на́шим ве́лию ми́лость.

Арсениево: Чинонача́льник вы́шних сил, / Михаи́л, первостоя́тель Боже́ственных чино́в, / днесь нас к торжеству́ созва́, / и́же всегда́ с на́ми ходя́й / и сохраня́й вся от вся́каго диа́воля обстоя́ния. / Прииди́те у́бо, празднолю́бцы и христолю́бцы, / цве́ты доброде́телей взе́мше, / чи́стыми по́мыслы и со́вестию благостоя́нною / Арха́нгелов собо́р почти́м: / той бо, непреста́нно Бо́гу предстоя́ / и трисвяту́ю песнь воспева́я, / мо́лит спасти́ся душа́м на́шим.

Глас 2. Студитово: Невеще́ственное существо́, / У́мных Сил предста́тельствующе / и трисо́лнечныя сла́вы блиста́ньми / светодаю́ще вселе́нней, Архистрати́зи, / непреста́нным гла́сом трисвяту́ю песнь воспева́ете. / Те́мже моли́теся спасти́ся душа́м на́шим.

Глас тойже. Арсениево: Невеще́ственный Престо́л окружа́юще, / у́мная существа́, Боже́ственнии, безтеле́снии, / трисвяту́ю песнь прави́телю Бо́гу / пла́менными устна́ми поете́:

/ Святы́й Бо́же, О́тче безнача́льный, / Святы́й Кре́пкий, Сы́не собезнача́льный, / Святы́й Безсме́ртный, Единосу́щный Ду́ше, / Отцу́ и Сы́ну спрославля́емый.

Анатолия: Безтеле́сными устна́ми и у́мными усты́ / А́нгельстии чи́ни непреста́нное пе́ние / прино́сят Твоему́ непристу́пному Божеству́, Го́споди, / и У́ми чи́стии и служи́телие Твоея́ сла́вы / хва́лят Тя, Го́споди. / С ни́миже Михаи́л безтеле́сный, / и Гаврии́л зело́ благоле́пнейший, / и первостоя́телие Го́рних сил, / Архистрати́зи А́нгельстии, / учреди́телие на́ши днесь бы́ша, / пе́сни пе́сней повелева́юще нам пе́ти / непристу́пней сла́ве Твое́й, Человеколю́бче, / Е́йже мо́лятся непреста́нно за ду́ши на́ша.

Слава, глас 4: О́гненными устна́ми / пою́т Тя Херуви́ми, Христе́ Бо́же, / безтеле́сными же усты́ немо́лчно славосло́вит Тя Арха́нгельский лик, / Михаи́л же, Архистрати́г Вы́шних сил, / побе́дную песнь непреста́нно прино́сит сла́ве Твое́й. / Той бо нас днесь озари́ к торжеству́ све́тлому / возбряца́ти досто́йне псало́мски хвалу́ трисвяту́ю бре́нными устна́ми, / я́ко вся́ческая Твоего́ хвале́ния испо́лнишася, / и подае́ши ми́ру тем ве́лию ми́лость.

И ныне, глас тойже. Георгия Никомидийскаго: Днесь Боговмести́мый храм – Богоро́дица,

/ в храм Госпо́день приво́дится / и Заха́рия Сию́ подъе́млет. / Днесь свята́я святы́х ра́дуются, / и лик А́нгельский та́инственно торжеству́ет. / С ни́миже и мы, пра́зднующе, днесь с Гаврии́лом возопии́м: / ра́дуйся, Благода́тная, Госпо́дь с Тобо́ю, / име́яй ве́лию ми́лость.

На стиховне стихиры, глас 1.

Подобен: Небе́сных чино́в:

А́нгельски в ми́ре торжеству́юще, / су́щему на Престо́ле сла́вы Бо́гу седя́щему возопии́м песнь: / Свят еси́, О́тче Небе́сный, / Свят еси́, соприсносу́щное Сло́во, / Свят еси́ и Ду́ше всесвяты́й.

Стих: Творя́й А́нгелы Своя́ ду́хи, / и слуги́ Своя́ пла́мень о́гненный.

Небе́сным пе́рвствуя в дерзнове́нии мно́зем / и предстоя́ Престо́лу стра́шному в сла́ве, / самови́дче неизрече́нных, / спаси́ ны, Михаи́ле Архистрати́же, / су́щия в ну́ждах бед и напа́стей / моли́твами твои́ми, мо́лимся.

Стих: Хвали́те Его́ вси А́нгели Его́, / хвали́те Его́ вся си́лы Его́.

Безпло́тных А́нгелов пе́рвый еси́ / и служи́тель Боже́ственнаго светозаре́ния о́наго, / самови́дец же и таи́нник, / спаси́ ны, Михаи́ле Архистрати́же, / ле́тно чту́щия тя благоче́стно / и пою́щия Тро́ицу ве́рно.

Слава, и ныне, глас 8. Иоанна монаха: Я́ко чинонача́льник и побо́рник, / и А́нгелов началово́ждь, Архистрати́же, / вся́кия ну́жды и ско́рби, / неду́гов и лю́тых грехо́в свободи́ / ве́рно воспева́ющия и моля́щия тя, сла́вне, / я́ве, я́ко невеще́ствен, Невеще́ственнаго зря, / и непристу́пным Све́том Влады́чния сла́вы осия́емь: / Той бо человеколю́бно плоть нас ра́ди от Де́вы прия́т, / спасти́ восхоте́в челове́чество.

Тропарь дважды, глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил.

И Богоро́дице Де́во: единожды.

На Бог Госпо́дь, тропарь дважды, глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил.

Слава, и ныне, Богородичен: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́емь, / и Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

По 1-м стихословии седален, глас 1.

Подобен: Гроб Твой, Спа́се:

Престо́лу стра́шному предстоя́ще при́сно / и све́тлыми заря́ми трисо́лнечнаго Божества́ осия́еми, / просвети́те ны, грехо́вный мрак отгоня́юще, / ваш собо́р пра́зднующия све́тло, / и приле́жно моли́те изба́витися нам от бед, пресве́тлии моли́твенницы.

Слава, глас тойже.

Подобен: Лик А́нгельский:

Лик А́нгельский, Архистрати́га име́я, Боже́ственнаго Михаи́ла, / с ним Святе́й Тро́ице приноша́ет пе́ние, / от не су́щих бо Соде́тель вся́ческих во́инства огнезра́чных чино́в сло́вом приведе́.

И ныне, Богородичен: Упова́ние христиа́н, Пресвята́я Де́во, / Его́же родила́ еси́, Бо́га, па́че ума́ и сло́ва, / непреста́нно моли́ с Го́рними си́лами пода́ти оставле́ние грехо́в на́ших всех / и исправле́ние жития́ ве́рою и любо́вию при́сно сла́вящим Тя.

По 2-м стихословии седален, глас 2.

Подобен: Егда́ снизше́л еси́:

Посреде́ полко́в А́нгельских старе́йший яви́лся еси́, / Михаи́ле Архистрати́же, / Вы́шняго Царя́ непреста́нно моли́ / до́льних мучи́телей горды́ню низложи́ти. / И, я́ко име́я дерзнове́ние у Престо́ла огнезра́чнаго, / моли́ за ны непреста́нно, рабы́ твоя́.

Слава, глас 4.

Подобен: Ско́ро предвари́:

Херуви́ми и Серафи́ми, многоочи́тая Арха́нгелов служи́телей во́инства, / со Властьми́ Престо́ли, Госпо́дьства, А́нгели, Си́лы же и Нача́ла / мо́лят Тя, Творца́ на́шего, и Бо́га, и Влады́ку, / да не пре́зриши моле́ния люде́й согреши́вших, Бо́же Многоми́лостиве.

И ныне, Богородичен: Де́во Всенепоро́чная, Я́же пресу́щнаго Бо́га ро́ждшая, / со Безпло́тными Того́ непреста́нно моли́ / оставле́ние прегреше́ний и исправле́ние жития́ да́ти нам пре́жде конца́, / ве́рою и любо́вию пою́щим Тя по до́лгу, еди́на Всепе́тая.

Величание:

Велича́ем вас, / Арха́нгели, и А́нгели, и вся Во́инства, / Херуви́ми и Серафи́ми, / сла́вящии Го́спода.

Псалом избранный

Лик 1: Испове́мся Тебе́, Го́споди, всем се́рдцем мои́м. 2: И пред А́нгелы воспою́ Тебе́. 1: Творя́й А́нгелы Своя́ ду́хи и слуги́ Своя́ пла́мень о́гненный. 2: Благослови́те Го́спода вси А́нгели Его́. 1: Благослови́те Го́спода вся Си́лы Его́. 2: Поклони́теся Ему́ вси А́нгели Его́. 1: Седя́й на Херуви́мех, яви́ся. 2: Ополчи́тся А́нгел Госпо́день о́крест боя́щихся Его́. 1: Сло́вом Госпо́дним небеса́ утверди́шася. 2: И ду́хом уст Его́ вся си́ла их. 1: И се́де на Херуви́мы, и лете́. 2: Сла́вою и че́стью венча́л еси́ его́. 1: Хвали́те Го́спода с небе́с, хвали́те Его́ в вы́шних. 2: Хвали́те Его́, вси А́нгели Его́. 1: Хвали́те Его́, вся Си́лы Его́. 2: Вся́кое дыха́ние да хва́лит Го́спода.

Сла́ва, и ны́не: Аллилу́иа, трижды.

По полиелеи седален, глас 8.

Подобен: Прему́дрости:

Небе́сных чино́в наста́вник, / служи́тель же сла́вы Боже́ственныя досто́йно быв повеле́нием Зижди́теля твоего́, / христиа́ном еси́ хода́тай спасе́нный, / невеще́ственною твое́ю сла́вою земны́я назира́я. / Те́мже по до́лгу восхваля́ем тя вси, / Боже́ственное твое́ днесь воспева́юще торжество́, Михаи́ле Архистрати́же, / моли́ Христа́ Бо́га грехо́в оставле́ние дарова́ти / пра́зднующим любо́вию свято́е твое́ торжество́.

Слава, глас 4.

Подобен: Ско́ро предвари́:

А́нгельстии чи́ни со стра́хом предстоя́т Престо́лу Твоему́, Влады́ко Христе́ Бо́же, / и и́же отту́ду заря́ми при́сно просвеща́еми, песнь Ти немо́лчно побе́дную воспева́ют, / и́хже свяще́нными моли́твами мир ми́ру да́руй / и душа́м на́шим ве́лию ми́лость.

И ныне, Богородичен: Чи́стая, и Всенепоро́чная, и Неискусому́жная Де́во Ма́ти, / Я́же еди́на безле́тнаго Сы́на и Сло́ва Бо́жия в ле́то поро́ждши, / Сего́ со Безпло́тными честны́ми Небе́сными си́лами моли́ / дарова́ти нам очище́ние грехо́в и ве́лию ми́лость.

Степенна, 1-й антифон 4-го гласа:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой. Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Прокимен, глас 4:

Творя́й А́нгелы Своя́ ду́хи, / и слуги́ Своя́ пла́мень о́гненный. Стих: Благослови́, душе́ моя́, Го́спода, Го́споди Бо́же мой, возвели́чился еси́ зело́.

Другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Евангелие Матфея, зачало 52

Рече́ Госпо́дь при́тчу сию́: уподо́бися Ца́рствие Небе́сное челове́ку, се́явшу до́брое се́мя на селе́ свое́м. Спя́щим же челове́ком, прии́де враг его́, и все́я пле́велы посреде́ пшени́цы, и оты́де. Егда́ же прозябе́ трава́ и плод сотвори́, тогда́ яви́шася и пле́велие. Прише́дше же раби́ господи́на, ре́ша ему́: го́споди, не до́брое ли се́мя се́ял еси́ на селе́ твое́м? Отку́ду у́бо и́мать пле́велы? Oн же рече́ им: враг челове́к сие́ сотвори́. Раби́ же ре́ша ему́: хо́щеши ли у́бо, да ше́дше исплеве́м я́? Oн же рече́ им: ни, да не когда́ восторга́юще пле́велы, восто́ргнете ку́пно с ни́ми пшени́цу. Оста́вите расти́ oбое́ ку́пно до жа́твы, и во вре́мя жа́твы реку́ жа́телем: собери́те пе́рвее пле́велы и свяжи́те их в снопы́, я́ко сожещи́ я́, а пшени́цу собери́те в жи́тницу мою́. И приступи́ша к Нему́ ученицы́ Его́, глаго́люще: скажи́ нам при́тчу пле́вел се́льных. Oн же отвеща́в, рече́ им: се́явый до́брое се́мя есть Сын Челове́ческий, а село́ есть мир. До́брое же се́мя, си́и суть сы́нове Ца́рствия, а пле́велие суть сы́нове неприя́зненнии, а враг все́явый их есть диа́вол, а жа́тва – кончи́на ве́ка есть, а жа́тели – А́нгели суть. Я́коже у́бо собира́ют пле́велы и oгне́м сожига́ют, та́ко бу́дет в сконча́ние ве́ка сего́. По́слет Сын Челове́ческий А́нгелы Своя́, и соберу́т от Ца́рствия Его́ вся собла́зны и творя́щия беззако́ние, и вве́ргут их в пещь óгненну. Ту бу́дет плач и скре́жет зубо́м. Тогда́ пра́ведницы просветя́тся, я́ко со́лнце, в Ца́рствии Oтца́ их. Име́яй у́ши слы́шати да слы́шит.

Мф.13:24–30, 36Б–43

По 50-м псалме

Слава: Моли́твами Арха́нгелов, / Ми́лостиве, очи́сти / мно́жества согреше́ний на́ших.

И ныне: Моли́твами Богоро́дицы, / Ми́лостиве, очи́сти / мно́жества согреше́ний на́ших.

Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихира, глас 6:

А́нгели Твои́, Христе́, / Престо́лу вели́чества во стра́се предстоя́ще / и Твои́м светоли́тием при́сно осиява́еми, / в вы́шних песнопе́вцы Твои́ / и сове́та Твоего́ служи́телие, / от Тебе́ низпосыла́еми, / даю́т просвеще́ния душа́м на́шим.

Канон Богородицы, со ирмосом на 6. Глас 8. Ирмос по дважды: Пои́м Го́сподеви, прове́дшему лю́ди Своя́: писан во Октоихе, во осмом гласе. В неделю на утрени третий канон. И Безплотных два канона, на 8.

Первый канон, творение Иоанна монаха,

егоже краегранесие: Да торжеству́ем, Богому́дрии,

похвалу́ собо́ру Безпло́тных. Глас 8.

Песнь 1

Ирмос: Песнь возсле́м, лю́дие, / чу́дному Бо́гу на́шему, / свободи́вшему Изра́иля от рабо́ты, / песнь побе́дную пою́ще и вопию́ще: / пои́м Тебе́, Еди́ному Влады́це.

Вси воспои́м, вернии, / вся управля́ющую невеще́ственныя Го́рних лико́в чинонача́лия, Тро́ицу несозда́нную: / Свят, Свят, Свят еси́, вопию́ще, Бо́же Вседержи́телю.

Положи́л еси́ тва́рей Нача́ло, существо́ Безпло́тное, Тво́рче А́нгелов, / пречи́стый Твой Престо́л окружа́ющее, зва́ти Тебе́: / Свят, Свят, Свят еси́, Бо́же Вседержи́телю.

Ра́дуйся, Гаврии́ле, тайнови́дче Бо́жия воплоще́ния, / Михаи́ле же, чино́в невеще́ственных первостоя́телю, непреста́нно зову́ще: / Свят, Свят, Свят еси́, Бо́же Вседержи́телю.

Богородичен: Трепе́щу та́инства, Христе́, Твоего́ снизхожде́ния, / я́ко И́же естество́м Бог, прия́л еси́ от Де́вы роди́тися я́ко Челове́к, / да спасе́ши мир от рабо́ты проти́внаго.

Другий канон, творение тогожде Иоанна монаха.

Глас тойже. Песнь 1

Ирмос: Колесницегони́теля фарао́ня погрузи́ / чудотворя́й иногда́ / Моисе́йский жезл, крестообра́зно порази́в / и раздели́в мо́ре, / Изра́иля же беглеца́, пешехо́дца спасе́, / песнь Бо́гови воспева́юща.

У́мная Безпло́тных чино́в ли́ки / пе́сньми, я́ко служи́тели Боже́ственныя, прииди́те, восхва́лим, лик совоку́пльше, / о на́шем спасе́нии непреста́нно моля́щияся и о покая́нии на́шем сра́дующияся.

И́же А́нгелов началовожди́, и предъизбра́ннии, и чинонача́льницы све́тлии, / Безпло́тныя умы́ днесь воздви́жут к наверше́нию пра́здника све́тлыя их па́мяти, / с ни́миже ку́пно ра́дуются челове́цы, пе́ние Тро́ице принося́ще.

Да возвесели́мся со А́нгелы днесь, челове́цы, духо́вне в ра́дости: / Гаврии́л бо па́ки ны́не благовеству́ет Це́рквей соедине́ние / и низложе́ние вся́кия проти́вныя е́реси / в па́мяти Архистрати́гов.

Богородичен: Ражда́еши су́щее па́че естества́, Пречи́стая, / в Тебе́ все́льшееся О́тчее Сло́во Ду́хом Святы́м, / во дву у́бо естества́х и хоте́ниих су́ща, / во Ипоста́си же непрело́жно еди́ней, / Ея́же и зрак целу́ем.

Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Песнь 3

Ирмос: Страх Твой, Го́споди, / всади́ в сердца́ раб Твои́х / и бу́ди нам утвержде́ние, / Тя во и́стине призыва́ющих.

Кре́постию поста́вил еси́, Безсме́ртне, си́льныя, / соверша́ющия всесвяту́ю Твою́ во́лю, / Тебе́ в вы́шних всегда́ предстоя́щия.

Таи́нники Твоего́ вочелове́чения и честна́го воста́ния, / А́нгельския чинонача́льники, Христе́, за ны приими́ моля́щияся.

А́нгелы приста́вил еси́ храни́тели челове́ком, я́ко Благоутро́бен, / служи́тели же показа́л еси́, Христе́, спасе́ния Твои́х уго́дников.

Богородичен: Неизрече́нно зачала́ еси́ Го́спода и Спа́са, Богоневе́сто, / избавля́ющаго ны от лю́тых, Тя вои́стинне призыва́ющия.

Ин. Ирмос: Ты еси́ утвержде́ние / притека́ющих к Тебе́, Го́споди, / Ты еси́ свет омраче́нных, / и пое́т Тя дух мой.

А́нгелов перве́йший и Тро́ицы свет вторы́й / яви́лся еси́ нам, Михаи́ле нача́льниче, / ве́рно благохва́лящим тя.

Заре́ю Боже́ственныя благода́ти Гаврии́л ве́рно испо́лни всю зе́млю, / Бо́жие пропове́дав в пло́ти прише́ствие.

Сопру́г приснопева́емый и светоза́рная дво́ице невеще́ственная, све́ты Бо́жия, / ве́рно соверша́ющия ва́шу па́мять покажи́те.

Богородичен: Воспе́ Иса́ия Твое́, е́же па́че ума́, Чи́стая, рождество́, / пою́ и аз, да о́наго получу́ очище́ния.

Катавасия: Твоя́ песносло́вцы, Богоро́дице, / живы́й и незави́стный Исто́чниче, / лик себе совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

Седален, глас 8.

Подобен: Повеле́нное:

Небе́сных нача́льницы и первостоя́телие высокопресто́льных и стра́шных, / Боже́ственныя сла́вы, Михаи́ле и Гаврии́ле Архистрати́зи, / А́нгелов чинонача́льницы, со все́ми Безпло́тными, / о служи́телие Влады́чни! / О ми́ре непреста́нно моля́щеся, / испроси́те оставле́ние прегреше́нных на́ми, / и ми́лость, и благода́ть обрести́ в день су́дный. [Дважды.]

Слава, и ныне, Богородичен: Богоблагода́тная, Чи́стая, Благослове́нная, / благоутро́бия ра́ди щедро́т из Тебе́ Ро́ждшагося / с вы́шними Си́лами, и Арха́нгелы, и все́ми Безпло́тными моли́ непреста́нно / пода́ти нам пре́жде конца́ ми́лостивно проще́ние грехо́в / и жития́ исправле́ние, я́ко да обря́щем ми́лость.

Песнь 4

Ирмос: Всел еси́ на ко́ни, апо́столы Твоя́, Го́споди, / и прия́л еси́ рука́ма Твои́ма узды́ их, /

и спасе́ние быстъ ежде́ние Твое́ / ве́рно пою́щим: / сла́ва си́ле Твое́й, Го́споди.

Всел еси́ на А́нгелы, я́коже на ко́ни, Человеколю́бче, / и прия́л еси́ руко́ю Твое́ю брозды́ их, / и спасе́ние бысть ежде́ние Твое́ непреста́нно вопию́щим: / сла́ва си́ле Твое́й, Го́споди.

Покрыва́ет А́нгелы доброде́тель Твоя́, Человеколю́бче, / и земли́ исполня́ет концы́ Твоего́ сла́внаго, Безнача́льне, Боже́ственнаго хвале́ния, / с ни́ми Тебе́ вопию́щи: / сла́ва си́ле Твое́й, Го́споди.

Изше́л еси́, Ще́дре, на спасе́ние люде́й Твои́ х, Христе́, / созыва́еши же дру́ги, Си́лы Твоя́, / и весе́лие бысть прише́ствие Твое́ ве́рно Тебе́ вопию́щим: / сла́ва си́ле Твое́й, Го́споди.

Богородичен: Де́ва и Ма́ти преесте́ственно яви́лася еси́, Всечи́стая, / я́ко Бо́га, Того́жде и Челове́ка Христа́, ро́ждшая. / Ему́же со стра́хом вопию́т А́нгельстии чи́ни: / сла́ва си́ле Твое́й, Го́споди.

Ин. Ирмос: Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.

Во Иерихо́не яви́ся си́лы Госпо́дни Архистрати́г вою́ющему дре́вле Иису́су Нави́ну, / победотворя́ и побо́рствуя, Михаи́л вели́кий, Безпло́тных нача́льник сый, / от него́же прие́м си́лу, слуга́ Госпо́день, / копие́м плени́в, ят сопоста́ты.

Нача́льник не́когда Безпло́тных сил яви́ся, нося́ ча́да благове́щения, / Заха́рии иере́ю Гаврии́л вели́кий и Боже́ственный и́стинно Арха́нгел, / те́мже глас Словесе́ роди́выйся Иоа́нн отцу́ своему́ глас проглаго́лания отдае́т.

Ра́дуются ра́достию вси концы́ земни́и днесь, / честну́ю па́мять пра́зднующе Арха́нгелов Твои́х, Бо́же, / Михаи́ла Боже́ственнаго и Гаврии́ла Богому́драго; / сра́дуется же ку́пно и весь А́нгельский чин, / я́ко сохраня́ется мир покро́вом их.

Богородичен: Еди́на Чи́стая пребыла́ еси́ и по рождестве́, / еди́на то́кмо яви́лася еси́ Безму́жная, млеко́м пита́ющая Сло́во О́тчее и́стинное, / Ду́хом Святы́м прие́мшее ра́бий зрак по нам, Де́во Богоро́дице, / Его́же, Боже́ственное чту́ще зра́ка подо́бие, почита́ем.

Катавасия: Седя́й в Сла́ве / на Престо́ле Божества́ / во о́блаце ле́гце, / прии́де Иису́с Пребоже́ственный, / Нетле́нною Дла́нию / и спасе́ зову́щия: / сла́ва, Христе́, си́ле Твое́й.

Песнь 5

Ирмос: От но́щи неве́дения / по душелови́тельному пути́ при́сно блудя́щаго, / све́том ра́зума Твоего́, Го́споди, преднаставля́я мя, / на стезю́ за́поведей Твои́х напра́ви.

Невозвра́тным жела́нием при́сно к высоте́, / к Тебе́, Христе́, носи́ми, кра́йнейшему всех жела́ний, / А́нгельския си́лы непреста́нно Тя сла́вят.

Ты у́мныя по существу́, нетле́нныя благода́тию Твое́ю, Христе́, / устрои́л еси́ песнопе́вцы Твоего́ вели́чества, / А́нгелы Твоя́ по о́бразу соде́лав, Непостижи́ме.

Ты непрекло́нны на го́ршее к Тебе́ приближе́нием, Христе́, / сохрани́л еси́ Твоя́ слуги́, / исто́чник бо бла́гости Ты еси́, / благотвори́ши досто́йно Тебе́ служа́щия.

Богородичен: Умерщвле́нную мою́ ду́шу страстьми́ ме́рзкими, Всенепоро́чная, оживи́, / жи́зни Храни́теля ро́ждшая, / и к стези́ ве́чней, и блаже́нней жи́зни упра́ви.

Ирмос: Вску́ю мя отри́нул еси́ / от лица́ Твоего́, Све́те Незаходи́мый, / и покры́ла мя есть чужда́я тьма, окая́ннаго, / но обрати́ мя и к све́ту за́поведей Твои́х / пути́ моя́ напра́ви, молю́ся.

Непокаря́ющуся дре́вле Бо́жиим неизрече́нным / и Боже́ственным чудесе́м Валаа́му волхву́, / на распу́тии А́нгел, ослу́ яви́вся, стра́шно обличи́ / и, слове́сно живо́тное показа́в, естества́ премени́ позна́ние.

Я́ту бы́вшу Петру́ и в темни́це пребыва́ющу, / А́нгел яви́ся Бо́жий, от рук И́родовых, и уз, и сме́рти избавля́я. / Те́мже, прииди́те вси, я́ко душ храни́телю Боже́ственныя, / му́дрыя Арха́нгелы да почти́м.

Бра́ней крамолы́, А́нгели, Арха́нгели, Боже́ственныя си́лы Бо́жия, / и церко́вныя е́реси, и вся собла́зны ва́шими разреши́те к Бо́гу при́сными мольба́ми / и нас в ми́ре соблюди́те.

Богородичен: Во дву существа́х Еди́наго Тя ве́мы, Бо́га тва́ри, / де́йствы обе́ма и хоте́нии су́ща несли́тна, Сы́на Бо́жия, от Жены́ плоть прии́мша, / Ея́же о́браз почита́ем на дщи́цах.

Катавасия: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.

Песнь 6

Ирмос: Ио́ну в ки́те, Го́споди, / еди́наго всели́л еси́, / мене́ же, свя́заннаго мре́жами вра́жиями, / я́ко от тли о́наго, спаси́.

Боголе́пне от не су́щих, Го́споди, / сло́вом Твои́м приве́л еси́ существа́ Небе́сных безсме́ртных во́инств, / светови́дны ты́я соде́ловая.

Таи́нницы честни́и Бо́жия хвале́ния бы́сте, Безпло́тнии, / гра́ждане Небе́сныя и Боже́ственныя и́стинно ски́нии, / Творцу́ досто́йно служа́ще.

Безпло́тных чи́ни у́мнии / Тя, Сы́не Бо́жий пребезнача́льный, хва́лят непреста́нно / и славосло́вят, я́ко Творца́ и Созда́теля вся́ческих.

Богородичен: Со Отце́м в вы́шних, Пречи́стая, безнача́льне седя́щаго, / на объя́тиих Твои́х восклони́ти сподо́билася еси́: / Его́же нам пода́ждь, Чи́стая, рабо́м Твои́м, Ми́лостива.

Ин. Ирмос: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся, / к Тебе́ бо возопи́х, и услы́ши мя, / Бо́же спасе́ния моего́.

Я́ко огнь, и пла́мень, и свет, Безпло́тныя су́щия, / от веще́ственныя тли умо́м восперя́еми, / бре́нными устна́ми невеще́ственныя со стра́хом пе́сньми да почти́м.

Умертви́те страсте́й бу́ри, Арха́нгели, / и утиши́те с ни́ми возмуще́ния вся на ве́ру, / святи́и Тро́ицы су́ще огнезра́чнии Архистрати́зи.

Арха́нгели Бо́жии, Безпло́тных нача́льницы, / предста́тельством ва́шим от вся́кия е́реси нас сохрани́те, / Михаи́ле нача́льниче и Гаврии́ле, Архистрати́зи.

Богородичен: Из утро́бы яви́лся еси́ во́лею, от Неискусому́жныя воплоща́емь, / безпло́тен сый, я́ко Бог, Христе́, / плотоно́сец же, я́ко Человек был еси́. / Его́же подо́бия, ве́рнии, вид почита́ем.

Катавасия: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Кондак, глас 2:

Архистрати́зи Бо́жии, / служи́телие Боже́ственныя сла́вы, / А́нгелов нача́льницы и челове́ков наста́вницы, / поле́зное нам проси́те и ве́лию ми́лость, / я́ко Безпло́тных Архистрати́зи.

Икос: Рекл еси́, Человеколю́бче, в писа́ниих Твои́х / мно́жеству ра́доватися А́нгелов на Небеси́ / о челове́це еди́ном ка́ющемся, Безсме́ртне. / Те́мже мы, и́же в беззако́ниих, Безгре́шне, / еди́не Сердцеве́дче, / Тя моли́ти всегда́ дерза́ем, я́ко Благоутро́бнаго, / уще́дрити, и низпосла́ти недосто́йным умиле́ние, Влады́ко, / подая́й нам проще́ние: / о всех бо нас мо́лятся Тебе́ Безпло́тных Архистрати́зи.

Песнь 7

Ирмос: О́троцы евре́йстии в пещи́ / попра́ша пла́мень дерзнове́нно / и на ро́су огнь преложи́ша, вопию́ще: / благослове́н еси́, Го́споди Бо́же, во ве́ки.

Све́ты яви́л еси́, Ще́дре, А́нгелов Твои́х невеще́ственное существо́, / неизрече́ннаго све́та исполня́еми непреста́нно, / благослове́н еси́, зову́щия, Бо́же, во ве́ки.

Ему́же предстоя́т непреста́нно служа́ще тьмы А́нгелов, / ли́ца же зре́ти не терпя́т зре́ния, / благослове́н еси́, зову́ще, Го́споди Бо́же, во ве́ки.

Сло́вом Твои́м Ипоста́сным А́нгельское естество́ соде́лал еси́, / освяти́в же Боже́ственным Ду́хом, / Тро́ицу Богосло́вити научи́л еси́, Бо́же, во ве́ки.

Троичен: Три у́бо у́мствующе Ипоста́си, неопи́санное сла́вим Существо́, / Отца́, Сло́ва со Ду́хом, вопию́ще: / благослове́н еси́, Го́споди Бо́же, во ве́ки.

Ин. Ирмос: От Иуде́и доше́дше, о́троцы / в Вавило́не иногда́ / ве́рою Тро́ическою пла́мень пе́щный попра́ша, пою́ще: / отце́в Бо́же, благослове́н еси́.

С ли́ки Безпло́тных и челове́ческий род, / прииди́те, поклони́мся в благознамени́тый день сей, / па́мять соверша́юще му́дрых Арха́нгелов Христо́вых, / Свят, Свят, Свят, пою́ще, Бо́же оте́ц на́ших.

Я́ко страннолюби́вии дре́вле, Авраа́м Богови́дец и Лот сла́вный, учреди́ша А́нгелы, / и обрето́ша обще́ние со А́нгелы, зову́ще: / Свят, Свят, Свят еси́, Бо́же оте́ц на́ших.

Мано́ю до́блественному и Тови́ту прему́дрому яви́шася А́нгели, / воздаю́ще натрижне́ния жития́ по досто́инству; / и отроко́в А́нгел угаси́ пла́мень иногда́, / в пещи́ о́гненней су́щих.

Богородичен: Все на́ше по существу́ от Де́вы поне́сл еси́, кроме́ измене́ния, Иису́се, / естествы́ сугу́ба, но еди́наго Ипоста́сию, оте́чески Тя пропове́дуем, / Его́же и вид ве́рно почита́ем, изобразу́юще.

Катавасия: Не послужи́ша тва́ри Богому́дрии, / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.

Песнь 8

Ирмос: На горе́ святе́й просла́вльшася, / и в купине́ огне́м / Присноде́вы Моисе́ови та́йну я́вльшаго, / Го́спода по́йте / и превозноси́те во вся ве́ки.

А́нгельскому поревну́ем житию́, и мы́сли впери́м к высоте́, / и с ни́ми невеще́ственно воспои́м Го́спода, / пою́ще и превознося́ще во вся ве́ки.

Лико́вственницы ликова́ния Небе́снии, / Престо́л обстоя́ще сла́вы, / о́крест Бо́га же всегда́ обраща́ющеся, / А́нгели пою́т и превозно́сят Его́ во вся ве́ки.

Невеще́ственнаго огня́ творя́щей пла́мень, / на высоте́ непреста́нно служа́щия, и А́нгелы ду́хи явля́ющей, / Тро́ице покланя́емся и славосло́вим во вся ве́ки.

Богородичен: Ему́же на Небеси́ предстоя́т с тре́петом тьмы А́нгел и Арха́нгел, / Того́ на объя́тиих носи́ти сподо́билася еси́, Богоро́дице, / моли́ спасти́ся славосло́вящим Его́ во вся ве́ки.

Ин. Ирмос: Седмери́цею пещь / халде́йский мучи́тель / Богочести́вым неи́стовно разжже́, / си́лою же лу́чшею спасе́ны сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Нача́льник А́нгелов бысть Михаи́л Арха́нгел, / но сла́вится с ним светле́е таи́нник благода́ти и Де́вы обручи́тель честны́й, / воево́да Безпло́тных, досто́йно ра́дость предвозвеща́я, Гаврии́л, вопию́щим: / лю́дие, превозноси́ те Христа́ во вся ве́ки.

А́нгельския чи́ны в разли́чном зра́це уви́дев, / Иезеки́иль, предсказу́я пропове́даше: / в ни́хже шестокри́льнии Серафи́ми предстоя́ху, / и Херуви́ми многоочи́тии окружа́ху, / с ни́миже Арха́нгелы пресве́тлыя зря́ше, / Христа́ славосло́вящия во вся ве́ки.

Я́ко стра́шно прише́ствие втора́го седа́лища Твоего́ явленнотворя́, / Дании́л предглаго́лаше: / я́ко престо́ли поста́вишася, и Ве́тхий седя́ше, и тьмы А́нгелов ввожда́ше, / со стра́хом предстоя́щия и гла́сы немо́лчными вопию́щия Тро́ице во вся ве́ки.

Богородичен: Отцу́ и Ду́ху Единосу́щное, Сло́во во́лею яви́ся, / и нам, из Де́вы, сообра́зен, / не смеси́в в друг дру́га, я́же стра́шнаго соедине́ния: / Еди́н бо и То́йжде во обои́х показу́ется, / в дву существа́х и Еди́ной Ипоста́си. / Его́же ны́не подо́бия о́бразу покланя́емся.

Катавасия: О́троки благочести́выя в пещи́ / Рождество́ Богоро́дичо спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.

Песнь 9

Ирмос: Уста́вы прешла́ еси́ естества́, / Соде́теля заче́нши и Го́спода, / и дверь спасе́ния ми́рови была́ еси́. / Тем Тя, Богоро́дице, / непреста́нно велича́ем.

Тя, неизрече́нно соедини́вшаго небе́сным, Христе́, земна́я / и еди́ну Це́рковь соверши́вша А́нгелов и челове́ков, / непреста́нно велича́ем.

А́нгели же и Арха́нгели, / Престо́ли, Вла́сти и Госпо́дьства, / Нача́ла же и Си́лы, Херуви́ми и Серафи́ми, / с Богоро́дицею о ми́ре моли́теся.

Всех предста́телие показу́ющиися, Михаи́л с Гаврии́лом, / посети́те от любве́ чту́щия всепра́зднственную па́мять ва́шу и ве́рно воспева́ющия: / спаса́йте от вся́каго обстоя́ния.

Богородичен: Ра́дуйся, свята́я Богоневе́сто! / Ра́дуйся, Свет ми́ру ро́ждшая ве́рным! / Ра́дуйся, стено́ и покро́ве всех нас: / Бо́га, я́ко Благоде́теля, за ны непреста́нно моли́.

Ин. Ирмос: Вои́стинну Богоро́дицу, / Тя испове́дуем, / спасе́ннии Тобо́ю, Де́во Чи́стая, / с Безпло́тными ли́ки Тя велича́юще.

Неду́гующих, и пла́вающих, и су́щих в ну́ждах / ко спасе́нию побо́рницы яви́стеся, / Безпло́тных пе́рвии, Михаи́ле и Гаврии́ле.

Сил и Престо́лов Боже́ственных слико́вственник, / я́ко Воево́да А́нгельский и таи́нник Бо́жий, / о нас Спа́су, Гаврии́ле, моли́ся.

Я́ко храни́телие ми́ра и Це́ркве / и чинонача́льницы Вы́шних сил, / о нас Спа́са умоли́те.

Богородичен: Согла́сно, Богоро́дице, Тя славосло́вим, / я́ко от страсте́й и бед спаса́еши ны / и на́ша моле́ния во благи́х исполня́еши.

Катавасия: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице Чи́стая Присноде́во.

Светилен.

Подобен: Ду́хом во святи́лищи:

О́гненных, Архистрати́же, слуг предста́тельство от Отца́ прия́л еси́, Михаи́ле, светов, / тем и сия́ние Того́ сла́вы сия́ющее и́маши, / окру́г пречи́стаго Престо́ла ты предстоя́, / я́ко пе́рвый Невеще́ственных чино́в.

Слава. Подобен: Со ученики́:

Невеще́ственных Сил, Арха́нгел и А́нгел, / Госпо́дьств и Престо́л, и Нача́л предста́тель пред Бо́гом постоя́нный, / Архистрати́же Боже́ственне, Михаи́ле пресла́вне, / нестерпи́мому бо Престо́лу предстоя́й, / покры́й, соблюди́, сохрани́ и спаси́ вся ве́рою тя почита́ющия, / мирска́го предста́теля.

И ныне, Богородичен: Честне́йшая еси́ Херуви́м сла́вных и Серафи́м, Всепе́тая, / стра́шных без сравне́ния сла́внейшая / и всех святы́х А́нгел святе́йшая, Пречи́стая: / Зижди́теля бо всех пло́тски неизрече́нно родила́ еси́, Богоро́дице. / Его́же моли́ рабо́м Твои́м разреше́ние дарова́ти прегреше́ний.

На хвалитех стихиры на 4, глас 1.

Подобен: Небе́сных чино́в:

Небе́сных чино́в я́ко преднача́льника / и су́щих на земли́ челове́ков кре́пкаго тя предста́теля, / храни́теля же и изба́вителя / воспева́ем ве́рно, Михаи́ле Архистрати́же, / моля́щеся вся́кия тлетво́рныя боле́зни нас изба́вити.

Чинонача́льник сый го́рних Боже́ственных сил / днесь созыва́ет челове́ческия ли́ки / еди́н со А́нгелы све́тлый пра́здник соста́вити / собо́ра их Боже́ственнаго / и ку́пно песнь Бо́гу воспе́ти трисвяту́ю.

Под кров Боже́ственных ны крил твои́х прибега́ющия ве́рою, / Михаи́ле, Боже́ственный у́ме, / соблюда́й и покрыва́й чрез все житие́. / И в час, Арха́нгеле, сме́ртный, стра́шный / ты предста́ни помо́щник всем нам благоприе́мнейший.

Глас 4. Ефрема Карийскаго: Трисо́лнечныя лучи́, / Боже́ственным Све́том осиява́еми, Архистрати́зи, / невеще́ственных озаря́ете чинонача́лия, / я́коже свет, белообра́зне показу́ющеся в вы́шних, / огнь облиста́ете в ми́ре непристу́пнаго Божества́. / Тем и трисвяту́ю песнь пла́менными устна́ми непреста́нно пое́те: / Свят, Свят, Свят еси́, Бо́же наш, сла́ва Тебе́.

Слава, глас 5: Иде́же осеня́ет благода́ть твоя́, Арха́нгеле, / отту́ду диа́воля прого́нится си́ла, / не терпи́т бо све́та твоего́ ви́дети спады́й денни́ца. / Тем мо́лим тя, / огнено́сныя его́ стре́лы, я́же на ны дви́жимыя, / угаси́ хода́тайством твои́м, / избавля́я нас от собла́знов его́, / достохва́льный Михаи́ле Архистрати́же.

И ныне, Богородичен: Блажи́м Тя, Богоро́дице Де́во, / и сла́вим Тя, ве́рнии, по до́лгу, / град непоколеби́мый, сте́ну необори́мую, / тве́рдую предста́тельницу / и прибе́жище душ на́ших.

Славословие вели́кое, и отпуст.

Блаженна 1-го канона, песнь 3-я на 4, и 2-го, песнь 6-я на 4.

Тропарь Безплотных, глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил.

Кондак Безплотных, глас 2:

Архистрати́зи Бо́жии, / служи́телие Боже́ственныя сла́вы, / А́нгелов нача́льницы и челове́ков наста́вницы, / поле́зное нам проси́те и ве́лию ми́лость, / я́ко Безпло́тных Архистрати́зи.

Прокимен, глас 4:

Творя́й А́нгелы Своя́ ду́хи / и слуги́ Своя́ пла́мень о́гненный. Стих: Благослови, душе моя́, Го́спода, Го́споди Бо́же мой, возвеличился еси́ зело.

Апостол ко Евреем, зачало 305

Бра́тие, а́ще глаго́ланное А́нгелы сло́во бысть изве́стно, и вся́ко преступле́ние и ослуша́ние пра́ведное прия́т мздовоздая́ние, ка́ко мы убежи́м о толи́цем неради́вше спасе́нии, е́же зача́ло прие́мше глаго́латися от Го́спода, слы́шавшими в нас извести́ся, сосвиде́тельствующу Бо́гу зна́меньми же и чудесы́, и разли́чными си́лами, и Ду́ха Свята́го разделе́ньми, по Свое́й Ему́ во́ли? Не А́нгелом бо покори́ Бог вселе́нную гряду́щую, о не́йже глаго́лем. Засвиде́тельствова же не́где не́кто, глаго́ля: что есть челове́к, я́ко по́мниши его́? Или́ сын челове́ческий, я́ко посеща́еши и́? Ума́лил еси́ его́ ма́лым не́чим от А́нгел: сла́вою и че́стию венча́л еси́ его́ и поста́вил еси́ его́ над де́лы руку́ Твое́ю, вся покори́л еси́ под но́зе его́. Внегда́ же покори́ти ему́ вся́ческая, ничто́же оста́ви ему́ непокоре́но. Ны́не же не уви́дим Ему́ вся́ческая покоре́на, а ума́ленаго ма́лымъ чим от А́нгел ви́дим Иису́са, за прия́тие сме́рти сла́вою и че́стию венча́нна, я́ко да благода́тию Бо́жиею за всех вку́сит сме́рти. Подоба́ше бо Ему́, Его́же ра́ди вся́ческая и И́мже вся́ческая, приве́дшу мно́ги сы́ны в сла́ву, нача́льника спасе́ния их страда́ньми соверши́ти.

Евр.2:2–10

Аллилуиа, глас 5

Стих: Хвали́те Го́спода вси А́нгели Его́, хвали́те Его́ вся си́лы Его́. Стих: Я́ко Той рече́ и бы́ша, Той повеле́ и созда́шася.

Евангелие Луки, зачало 51

Рече́ Госпо́дь Свои́м ученико́м: слу́шаяй вас, Мене́ слу́шает, и отмета́яйся вас, Мене́ отметается, отмета́яйся же Мене́, отмета́ется Посла́вшаго Мя. Возврати́шася же се́дмьдесят с ра́достию, глаго́люще: Го́споди, и бе́си повину́ются нам о и́мени Твое́м. Рече́ же им: ви́дех сатану́, я́ко мо́лнию с Небесе́ спа́дша. Се даю́ вам власть наступа́ти на змию́, и на скорпи́ю, и на всю си́лу вра́жию, и ничесо́же вас вреди́т. Oба́че о сем не ра́дуйтеся, я́ко ду́си вам повину́ются, ра́дуйтеся же, я́ко имена́ ва́ша напи́сана суть на Небесе́х. В той час возра́довася ду́хом Иису́с и рече́: испове́даю Ти ся, Óтче, Го́споди небесе́ и земли́, я́ко утаи́л еси́ сия́ от прему́дрых и разу́мных, и откры́л еси́ та младе́нцем. Ей, Oтче, я́ко та́ко бысть благоволе́ние пред Тобо́ю.

Лк.10:16–21

Причастен:

Творя́й А́нгелы Своя́ ду́хи / и слуги́ Своя́ пла́мень о́гненный. / Аллилу́иа, трижды.