Месяца октября в 26-й день

Аще хощет настоятель, творит бдение.

Стихиры на 4, глас 1:

Подобен: Небе́сных чино́в:

И́же основа́ния всея́ земли́ колеба́яй Бог, / стряса́яй Еди́н морско́е ло́же, / я́ко Созда́тель всех / изба́ви ны пра́веднаго гне́ва трясе́ния / Твои́м милосе́рдием, Человеколю́бче, / при́сно умоля́ем. (2)

Фессалони́ка лику́ет о па́мяти твое́й / и созыва́ет вся окре́стныя гра́ды, / Дими́трие треблаже́нне, / соверши́ти твое́ светоно́сное торжество́. / С ни́миже, соше́дшеся, и мы / пе́сненно похваля́ем по́двиги твоя́.

Прииди́те, ве́рнии, соше́дшеся, / похва́лим Христо́ва ору́жника / и до́бляго свети́льника Дими́трия, / все вра́жие наси́лие попра́вша, / сему́ вопию́ще ве́рою: / о нас Христу́, му́чениче, моли́ся.

Слава, глас 6: Днесь вселе́нная вся страстоно́сца просвеща́ется заря́ми / и Бо́жия Це́рковь, цветы́ украша́ема, Дими́трие, вопие́т ти: / уго́дниче Христо́в и предста́телю тепле́йший, / не преста́й моли́ти о рабе́х твоих.

И ныне, Богородичен, глас тойже: Богоро́дице, Ты еси́ лоза́ и́стинная, / возрасти́вшая нам Плод живота́, / Тебе́ мо́лимся: / моли́ся, Влады́чице, со святы́ми апо́столы / поми́ловати ду́ши на́ша.

На стиховне стихиры, глас 2.

Подобен: До́ме Евфра́фов:

И́мамы тя мно́гих / да́теля дарова́ний, / уго́дниче Госпо́день, / исполня́еши бо проше́ния, / я́же и́мамы всегда́.

Стих: Пра́ведник, я́ко фи́никс, процвете́т, / я́ко кедр, и́же в Лива́не, умно́жится.

Пе́ния сла́дкая, / страсте́й похвале́ния, / благода́тей возда́ния, / предложе́ния, блаже́нне, / приими́, Дими́трие.

Стих: Насажде́ни в дому́ Госпо́дни, / во дво́рех Бо́га на́шего процвету́т.

Добро́та страда́льцев, / благоле́пие му́чеников, / благове́рных храни́телю, / приими́ ны́не похвалу́ / любо́вию сла́вящих тя.

Слава, и ныне, Богородичен,

глас тойже:

Де́ло Боголе́пно: / Де́ва по рождестве́, / Рожде́нное – Бог Сло́во, / челове́чо естество́ име́я / и явля́я веще́ственная.

Тропарь, глас 3:

Вели́ка обре́те в беда́х тя побо́рника вселе́нная, страстоте́рпче, / язы́ки побежда́юща. / Я́коже у́бо Ли́еву низложи́л еси́ горды́ню, / и на по́двиг дерзнове́нна сотвори́в Не́стора, / та́ко, свя́те Дими́трие, / Христу́ Бо́гу моли́ся / дарова́ти нам ве́лию ми́лость.

Слава, и ныне, трясения, глас 8:

Призира́яй на зе́млю и творя́й ю́ трясти́ся, / изба́ви ны стра́шнаго тру́са преще́ния, Христе́ Бо́же наш, / и низпосли́ нам бога́тыя ми́лости Твоя́ / моли́твами Богоро́дицы, и спаси́ ны.

Блаже́н муж: 1-й антифон.

На Го́споди, воззва́х: стихиры на 8, глас 2:

Подобен: Егда́ от Дре́ва:

Све́тиши оте́честву твоему́ всегда́, сла́вный Дими́трие му́чениче, / я́коже звезда́ све́тлая, / покрыва́еши бо при́сно сие́ от па́губы враго́в / и избавля́еши озлобле́ния и бу́ри вся́кия; / те́мже ра́достно прино́сит, ле́тнюю па́мять, блаже́нне, соверша́я, / ве́рою же и лю́бовию поя́ Го́спода, тя просла́вльшаго. (2)

Му́чениче страстоте́рпче Христо́в, / чудесы́ све́тиши мiру, / я́коже со́лнце, свя́те Дими́трие. / Те́мже в па́мяти твое́й наслажда́емся вси твои́х чуде́с, блаже́нне, / изря́дная торжеству́юще ве́рою. / Дерзнове́ние у́бо име́я, / моли́ся ко Го́споду спасти́ от тли и скорбе́й рабы́ твоя́.

Ко́пиями прободе́н в ре́бра, / пробо́дшаго ра́ди Спа́са на Кресте́ ре́бра; / Того́ бо уязвле́нием / любо́вию поревнова́л еси́, страстоте́рпче Дими́трие, / явля́я всем непобеди́мое свиде́тельства твоего́. / Те́мже и уя́звлен гони́тель низпаде́, / прие́м твоего́ иску́с испове́дания, страда́льче Христо́в.

Ины стихиры, глас 8.

Подобен: О, пресла́внаго чудесе́!

О, пресла́внаго чудесе́! / на Небеси́ и на земли́ ра́дость / днесь в па́мяти возси́я Дими́трия му́ченика. / От А́нгел хвала́ми венча́ется / и от челове́к пе́ния прие́млет. / О, ка́ко пострада́! / Ка́ко до́бре подвиза́ся! / И́мже враг паде́ лука́вый, / Христу́ побе́ждшу того́. (2)

О, пресла́внаго чудесе́! / чуде́с светлостьми́, со́лнца светле́йше, / при́сно Дими́трий све́тит конце́м, / от невече́рняго Све́та облиста́емый / и в незаходи́мем Све́те красу́яся. / Его́же сия́ньми о́блацы отгна́ни бы́ша ва́рварстии, / неду́зи прогна́шася / и де́мони победи́шася.

О, пресла́внаго чудесе́! / Христа́ ради прободе́н треблаженный Дими́трий, / ко враго́м всегда́ яви́ся ору́жие обоюдуо́строе, / пожина́я враго́в выше́ния / и низлага́я де́монская свере́пства. / Ему́же возопи́им: / святы́й Дими́трие, покры́й ны, / ве́рно почита́ющия тя от любве́ всегда́.

Слава, глас 6. Византиево: Днесь созыва́ет нас страстоте́рпца всемiрное торжество́. / Прииди́те у́бо, празднолю́бцы, / све́тло пра́зднуим па́мять его́, глаго́люще: / ра́дуйся, и́же ри́зу нече́стия раздра́в ве́рою, / му́жеством же ду́ха себе́ обложи́в. / Ра́дуйся, упраздни́вый козноде́йства чужда́го, / кре́постию, да́нною тебе́ от Еди́наго Бо́га. / Ра́дуйся, и́же прободе́нными удесы́ / блаже́нную страсть Христо́ву духо́вне нам возживописа́в. / Его́же моли́, страда́льцев удо́брение Дими́трие, / изба́витися нам ви́димых и неви́димых враг / и спасти́ся душа́м на́шим.

И ныне, Богородичен, глас тойже: Кто Тебе́ не ублажи́т, Пресвята́я Де́во; / кто ли не воспое́т Твоего́ Пречи́стаго Рождества́; / безле́тно бо от Отца́ возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щься, / естество́м Бог Сый, / и естество́м быв Челове́к нас ра́ди; / не во двою́ лицу́ разделя́емый, / но во двою́ естеству́ / несли́тно познава́емый. / Того́ моли́, Чи́стая Всеблаже́нная, / поми́ловатися душа́м на́шим.

Вход. Прокимен дне.

Проро́чества Иса́иина чте́ние

Обрати́ся от небесе́, Го́споди, и виждь от до́му свята́го Твоего́ и сла́вы Твоея́: где есть ре́вность Твоя́ и кре́пость Твоя́? Где есть мно́жество ми́лости Твоея́ и щедро́т Твои́х, я́ко терпе́л еси́ нам, Го́споди? Ты бо еси́ Оте́ц наш, я́ко Авраа́м не уве́де нас, и Изра́иль не позна́ нас, но Ты, Го́споди, Оте́ц наш, изба́ви ны, я́ко изнача́ла И́мя Твое́ на нас есть. Почто́ уклони́л еси́ нас, Го́споди, заблуди́ти от пути́ Твоего́? Ожесточи́л еси́ сердца́ на́ша, е́же не боя́тися Тебе́? Обрати́ся раб Твои́х ра́ди, племе́н ра́ди насле́дия Твоего́. Да пома́ле насле́дствим го́ру святу́ю Твою́. Проти́вницы на́ши попра́ша святы́ню Твою́. Бы́хом я́ко от нача́ла, егда́ не владе́л еси́ на́ми, ниже́ назва́ся И́мя Твое́ на нас. А́ще отве́рзеши не́бо, тре́пет прии́мут от Тебе́ го́ры и раста́ются, я́ко воск от лица́ огня́ та́ет. И попали́т огнь супоста́ты Твоя́, и явле́но бу́дет И́мя Твое́ проти́вным Твои́м. От лица́ Твоего́ язы́цы возмяту́тся. Егда́ сотвори́ши сла́вная, тре́пет прии́мут от Тебе́ го́ры. От ве́ка не слы́шахом, ниже́ о́чи на́ши ви́деша Бо́га, ра́зве Тебе́, и дела́ Твоя́ и́стинна, и сотвори́ши терпя́щим Тя ми́лость. Сря́щет бо ми́лость творя́щия пра́вду, и пути́ Твои́ помя́нут. И ны́не, Го́споди, Оте́ц наш Ты еси́, мы же бре́ние; и Ты Созда́тель наш, и дела́ рук Твои́х вси мы. Не прогне́вайся на ны, Го́споди, зело́, и да не помяне́ши во вре́мя грехо́в на́ших; и ны́не при́зри, Го́споди, я́ко лю́дие Твои́ вси мы.

Ис.63:15–19, 64:1–5А, 8–9

Проро́чества Иереми́ина чте́ние

Сия́ глаго́лет Госпо́дь: помяну́х ми́лость ю́ности твоея́ и любо́вь соверше́нства твоего́, е́же после́довати тебе́ Свято́му Изра́илеву; глаго́лет Госпо́дь Святы́й Изра́илев: Го́споду нача́ток рожде́ний его́, вси снеда́ющии его́ прегреша́т, зла́я прии́дут на ты́я; глаго́лет Госпо́дь: услы́шите сло́во Госпо́дне, до́ме Иа́ковль и все оте́чество до́му Изра́илева. Сия́ глаго́лет Госпо́дь: ко́е обрето́ша отцы́ ва́ши во Мне прегреше́ние, я́ко отступи́ша дале́че от Мене́, и ходи́ша в след суе́тных и осуети́шася. И не реко́ша; где есть Госпо́дь, возведы́й нас из земли́ еги́петския и путеводи́вый нас в пусты́ни, в земли́ сухо́й и нехо́дней, в земли́ безво́дней и непло́дней, и в се́ни сме́ртней, в земли́, по не́йже не про́йде когда́ муж, ниже́ всели́ся сын челове́чь та́мо. И возведо́х вы на Карми́л, е́же я́сти вам плоды́ его́ и блага́я его́; и внидо́сте и оскверни́сте зе́млю Мою́ и насле́дие Мое́ положи́сте в ме́рзость. Иере́е не ре́ша: где есть Госпо́дь; и держа́щиися зако́на не ве́деша Мя; и па́стырие нече́ствоваху в Мя; и проро́цы проро́чествоваху Ваа́лом и в след неполе́зных ходи́ша. Сего́ ра́ди еще́ возсужду́ся к вам, глаго́лет Госпо́дь, и к сыно́м сыно́в ва́ших возсужду́ся. Прейди́те во о́стровы Хеттии́м, и уви́дите, и в Кида́р посли́те, и уразуме́йте вельми́, и уви́дите, а́ще бя́ху такова́я. А́ще изменя́т язы́цы бо́ги своя́, и сии́ не суть бо́зи. Лю́дие же Мои́ премени́ша сла́ву его́, от нея́же не прии́мут по́льзы. Ужасе́ся не́бо о сем и вострепета́ на мно́зе зело́, глаго́лет Госпо́дь.

Иер.2:2–12

Прему́дрости Соломо́новы чте́ние

Пра́ведник, а́ще пости́гнет сконча́тися, в поко́и бу́дет. Ста́рость бо честна́, не многоле́тна, ниже́ в числе́ лет исчита́ется. Седи́на же есть му́дрость челове́ком, и во́зраст ста́рости – житие́ нескве́рное. Благоуго́ден Бо́гови быв, возлю́блен бысть и живы́й посреде́ гре́шник преста́влен бысть, восхище́н бысть, да не зло́ба измени́т ра́зума его́ или́ лесть прельсти́т ду́шу его́. Раче́ние бо зло́бы помрача́ет до́брая и паре́ние по́хоти пременя́ет ум незло́бив. Сконча́вся вма́ле, испо́лни ле́та до́лга, уго́дна бо бе Го́сподеви душа́ его́, сего́ ра́ди потща́ся от среды́ лука́вствия. Лю́дие же ви́девше, и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́, и посеще́ние во избра́нных Его́.

Прем.4:7–15

На литии стихира храма

и святаго стихиры самогласны, глас 1.

Георгия Сикелиота:

Весели́ся в Го́споде, гра́де Фессалони́ки, / ра́дуйся и лику́й ве́рою светлооде́явся, / Дими́трия всесла́внаго страда́льца / и свиде́теля И́стины в не́дрех име́я, я́ко сокро́вище; / наслади́ся чуде́с, исцеле́ния зря, / и виждь низлага́юща иноплеме́нников де́рзости, / и благода́рно Спа́су возопи́й: / Го́споди, сла́ва Тебе́.

Анатолия: Пе́сней красото́ю настоя́щий уясни́м день / и возгласи́м му́ченика по́двиги, / предлежи́т бо нам во благохвале́ние вели́кий Дими́трий. / И́бо де́монская нахожде́ния му́жески погуби́в, к три́знищу усе́рдно прии́де, / и победи́тельная сла́вно отне́с, / Спа́су мо́лится спасти́ся душа́м на́шим.

Глас 2. Германово: В премiрная селе́ния дух твой, Дими́трие му́чениче му́дре, / Христо́с Бог положи́ непоро́чно, / ты бо Тро́ицы был еси́ побо́рник / и в три́знищи му́жески пострада́л еси́, я́ко адама́нт тве́рдый, / прободе́н же быв в ре́бра нетле́нная твоя́, всече́стне, / подо́бяся на Дре́ве Прободе́нному на спасе́ние всего́ мiра, / чуде́с прия́л еси́ де́йство, челове́ком подая́ исцеле́ния оби́льно. / Те́мже твое́ днесь успе́ние пра́зднуем по достоя́нию, / сла́вяще тя просла́вльшаго Го́спода.

Слава, глас 5. Подобен: Воструби́м:

Стеце́мся ве́рою и любо́вию, / возопии́м пра́зднственная и воспле́щем рука́ми вси / в настоя́щее торжество́ первонача́льника на́шего, / во́инства Небе́сная да веселя́тся, / и пробо́дшагося за Прободе́ннаго копие́м Царя́ Го́спода, / и горды́ню Ли́еву низложи́вшаго де́рзостне. / Да чудя́тся земля́ же и мо́ре / све́тлаго све́тильника пресла́вным зна́мением. / По до́лгу да восхва́лят ю́нии ю́ности обузда́теля, / в ста́рости жезл, в беда́х предста́теля, / ни́щии обогати́теля, во благоше́ствии строи́теля, / спобо́рника во́ини / и в пучи́не спла́вателя, / со все́ми своего́ тве́рдаго побо́рника, гра́де Фессалони́ки, / моля́щеся си́це, рцем: / пресла́вне Дими́трие, предвари́ и изми́ ны от вся́кия ну́жды / и спаси́ рабы́ твоя́ моли́твами твои́ми.

И ныне, Богородичен, глас тойже.

Творение Германа Патриарха:

Воструби́м трубо́ю пе́сней, / прекло́ншися бо свы́ше, Всецари́ца Ма́ти Де́ва / благослове́ньми венчава́ет воспева́ющия Ю́. / Ве́рнии лю́дие да стеку́тся, / и Цари́це да воспле́щут в пе́снех, Царя́ ро́ждшей, / сме́ртию одержи́мыя пе́рве разреши́ти человеколю́бно Благоволи́вшаго. / Па́стырие и учи́телие, / до́браго Па́стыря, Пречи́стую Ма́терь, соше́дшеся, восхва́лим: / све́щник златоза́рный, светоно́сный о́блак, / небе́с Простра́ннейшую, / одушевле́нный киво́т, огнезра́чный Влады́чень Престо́л, / манноприе́мную злату́ю ста́мну, / заключе́нную Сло́ва дверь, / всех христиа́н прибе́жище. / Пе́сньми Богоглаго́ливыми похваля́юще, си́це рцем: / Пала́то Сло́ва, сподо́би смире́нныя ны Небе́снаго Ца́рствия, / ничто́же бо невозмо́жно хода́тайству Твоему́.

На стиховне стихиры

самогласны, трясения, глас 2.

Симеона Дивногорца:

Земли́ смуща́емей гне́ва Твоего́ стра́хом, / хо́лми и го́ры трясу́тся, Го́споди, / но благоутро́бия о́ком на ны призре́в, / не я́ростию Твое́ю прогне́вайся на ны, / но умилосе́рдився на дела́ рук Твои́х, / стра́шнаго ны преще́ния тру́са свободи́, / я́ко Благ и Человеколю́бец.

Стих, глас 6: Призира́яй на зе́млю / и творя́й ю́ трясти́ся.

Стра́шен еси́, Го́споди, / и кто стерпи́т пра́веднаго Твоего́ гне́ва, / или́ кто Тя умо́лит, или́ кто укроти́т, Благи́й, / о лю́дех согреши́вших и отча́явшихся? / Небе́снии чи́ни, А́нгели, Нача́ла и Вла́сти, / Престо́ли, Госпо́дства, Херуви́ми и Серафи́ми / о нас Тебе́ вопию́т: / Свят, Свят, Свят еси́, Го́споди, / дел рук Твои́х не пре́зри, Бла́же, / за утро́бы ми́лости спаси́ град бе́дствующий.

Стих: Стрясл еси́ зе́млю / и смути́л еси́ ю́.

Ниневи́тяне согреше́ний ра́ди / тру́сом преще́ния поги́бель слы́шаху, / в сре́дственном же зна́мении ки́та, / чрез воста́ние Ио́ны, покая́ние умоля́ет. / Но я́ко о́ныя вопль люде́й Твои́х со младе́нцы и скоты́, уще́дрив, прия́л еси́, / и нас, наказу́емыя, / тридне́внаго ра́ди Воста́ния пощади́ и поми́луй.

Слава, глас 8. Анатолия: Име́ет у́бо Боже́ственнейшая твоя́ душа́ и непоро́чная, / приснопа́мятне Дими́трие, / Небе́сный Иерусали́м жили́ще, / его́же сте́ны пречи́стыма рука́ма Неви́димаго Бо́га живописа́шася. / И́мать же всечестно́е, и многострада́льнейшее твое́ те́ло / преизря́дный сей храм на земли́, / сокро́вище некра́домое чуде́с и неду́гов врачевство́, / иде́же притека́юще, цельбы́ почерпа́ем. / Соблюди́, всехва́льне, тя велича́ющий град / от проти́вных прираже́ний, / дерзнове́ние я́ко име́я ко Христу́, тя просла́вльшему.

И ныне, Богородичен, глас тойже: Безневе́стная Де́во, / я́же Бо́га неизрече́нно заче́нши пло́тию, / Ма́ти Бо́га Вы́шняго, / Твои́х рабо́в мольбы́ приими́, Всенепоро́чная, / всем подаю́щи очище́ние прегреше́ний, / ны́не на́ша моле́ния прие́млющи, / моли́ спасти́ся всем нам.

На благословении хлебов,

тропарь Димитрия дважды, глас 3:

Вели́ка обре́те в беда́х тя побо́рника вселе́нная, страстоте́рпче, / язы́ки побежда́юща. / Я́коже у́бо Ли́еву низложи́л еси́ горды́ню, / и на по́двиг дерзнове́нна сотвори́в Не́стора, / та́ко, свя́те Дими́трие, / Христу́ Бо́гу моли́ся / дарова́ти нам ве́лию ми́лость.

И Богоро́дице Де́во: единожды.

На Бог Госпо́дь: тропарь трясения, глас 8:

Призира́яй на зе́млю и творя́й ю́ трясти́ся, / изба́ви ны стра́шнаго тру́са преще́ния, Христе́ Бо́же наш, / и низпосли́ нам бога́тыя ми́лости Твоя́ / моли́твами Богоро́дицы, и спаси́ ны. Дважды.

Слава, тропарь Димитрия, глас 3:

Вели́ка обре́те в беда́х тя побо́рника вселе́нная, страстоте́рпче, / язы́ки побежда́юща. / Я́коже у́бо Ли́еву низложи́л еси́ горды́ню, / и на по́двиг дерзнове́нна сотвори́в Не́стора, / та́ко, свя́те Дими́трие, / Христу́ Бо́гу моли́ся / дарова́ти нам ве́лию ми́лость.

И ныне, трясения.

По 1-м стихословии седален, глас 4.

Подобен: Яви́лся еси́ днесь:

Дими́трия днесь страстоте́рпца / пра́здник соверша́ем благочестивому́дренно, / я́ко Христу́ непреста́нно моля́щася / всем да́ти мир и ми́лость. (2)

Слава, и ныне, Богородичен: Те́плое заступле́ние су́щим в беда́х / и Помо́щницу на́шу, и к Бо́гу премене́ние, / Е́юже тли изба́вихомся, / Богоро́дицу ве́рнии ублажа́ем.

По 2-м стихословии седален, глас 4.

Подобен: Ско́ро предвари́:

Па́мять твоя́, сла́вне му́чениче Дими́трие, / уясни́ днесь Це́рковь Христо́ву / и вся собра́ пе́сньми досто́йно восхвали́ти тя, Богому́дре, / я́ко и́стинно во́ина и враго́в потреби́теля. / Те́мже мольба́ми твои́ми изба́ви ны от искуше́ний. (2)

Слава, и ныне, Богородичен: Пое́м Тя, Богоневе́сто, Ма́ти Христа́ Бо́га, / сла́вяще Рождество́ Твое́ непости́жное, / и́мже изба́вихомся от ле́сти диа́воли и вся́ческих бед, Влады́чице Богоро́дице, / и ве́рно взыва́ем: / поми́луй ста́до Твое́, Еди́на Всепе́тая.

Полиелей и величание:

Велича́ем тя, / страстоте́рпче святы́й Дими́трие, / и чтем честна́я страда́ния твоя́, / я́же за Христа́ / претерпе́л еси́.

Псалом избранный

1 лик Бог нам Прибе́жище и Си́ла. 2 Помо́щник в ско́рбех обре́тших ны зело́. 1 Сего́ ра́ди не убои́мся, внегда́ смуща́ется земля́. 2 Бо́же, кто уподо́бится Тебе́; да не премолчи́ши, ниже́ укроти́ши, Бо́же. 1 Я́ко се врази́ Твои́ возшуме́ша, и ненави́дящии Тя воздвиго́ша главу́. 2 На лю́ди Твоя́ лука́вноваша во́лею, и совеща́ша на святы́я Твоя́. 1 Положи́ша тру́пия рабо́в Твои́х, бра́шна пти́цам небе́сным. 2 Пло́ти преподо́бных Твои́х звере́м земны́м. 1 Пролия́ша кровь их я́ко во́ду. 2 Я́ко Тебе́ ра́ди умерщвля́еми есмы́ весь день. 1 Вмени́хомся я́ко о́вцы заколе́ния. 2 Положи́л еси́ нас в при́тчу во язы́цех. 1 И бых я́звен весь день. 2 Разже́гл еси́ ны, я́коже разжиза́ется сребро́. 1 Проидо́хом сквозе́ огнь и во́ду, и изве́л еси́ нас в поко́й. 2 Весели́теся о Го́споде, и ра́дуйтеся пра́веднии. 1 Я́ко Госпо́дь в ро́де пра́ведных. 2 И насле́дие их в век бу́дет. 1 Воззва́ша пра́веднии и Госпо́дь услы́ша их. 2 Свет возсия́ пра́веднику и пра́вым се́рдцем весе́лие. 1 В па́мять ве́чную бу́дет пра́ведник. 2 Святы́м, и́же суть на земли́ Его́, удиви́ Госпо́дь вся хоте́ния Своя́ в них. 1 Ди́вен Бог во святы́х Свои́х. 2 Пра́ведник я́ко фи́никс процвете́т, я́ко кедр, и́же в Лива́не, умно́жится. 1 Возвесели́тся пра́ведник о Го́споде и упова́ет на Него́. 2 И похва́лятся вси пра́вии се́рдцем.

Сла́ва, и ны́не: Аллилу́иа, трижды.

По полиелеи седален, глас 8.

Подобен: Прему́дрости:

Сия́ния чуде́с, я́ко лучи́, облиста́еши / и вся просвеща́еши мiра концы́, я́ко звезда́ пресве́тлая, / и ве́село благово́нствуеши, я́коже други́й рай, / и ду́ши весели́ши, и уставля́еши неду́ги: / те́мже тя, всеблаже́нне, по до́лгу пое́м / и любо́вию почита́ем честну́ю па́мять твою́, страстоте́рпче Дими́трие, / моли́ Христа́ Бо́га согреше́ний оставле́ние / дарова́ти чту́щим любо́вию святу́ю па́мять твою́. (2)

Слава, и ныне, Богородичен: Я́ко Де́ву и Еди́ну в жена́х, / Тя, безсе́менно ро́ждшую Бо́га пло́тию, / вси блажи́м ро́ди челове́честии. / Огнь бо всели́ся в Тя Божества́ / и, я́ко Младе́нца, дои́ши Зижди́теля и Го́спода. / Тем, А́нгельский и челове́ческий род, / досто́йно сла́вим пресвято́е Рождество́ Твое́ и согла́сно вопие́м Ти: / моли́ Христа́ Бо́га согреше́ний оставле́ние дарова́ти / покланя́ющимся ве́рою пресвято́му Рождеству́ Твоему́.

Степенна, 1-й антифон 4-го гласа:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой.

Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Прокимен, глас 4:

Ди́вен Бог во святы́х Свои́х, / Бог Изра́илев. Стих: Святы́м, и́же суть на земли́ Его́, удиви́ Госпо́дь вся хоте́ния Своя́ в них.

Другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Евангелие от Матфея, зачало 36

Рече́ Госпо́дь Свои́м ученико́м: Се, Аз посыла́ю вас я́ко о́вцы посреде́ волко́в: бу́дите у́бо му́дри я́ко змия́, и це́ли я́ко го́лубие. Внемли́те же от челове́к: предадя́т бо вы на со́нмы, и на собо́рищах их бию́т вас. И пред влады́ки же и цари́ веде́ни бу́дете Мене́ ра́ди, во свиде́тельство им и язы́ком. Егда́ же предаю́т вы, не пецы́теся, ка́ко или́ что возглаго́лете. Не вы бо бу́дете глаго́лющии, но Дух Отца́ ва́шего глаго́ляй в вас. Преда́ст же брат бра́та на смерть и оте́ц ча́до: и воста́нут ча́да на роди́тели и убию́т их. И бу́дете ненави́дими все́ми и́мени Моего́ ра́ди: претерпе́вый же до конца́, той спасе́н бу́дет.

Мф.10:16–22

По 50-м псалме

Слава: Моли́твами свята́го великому́ченика Дими́трия, / Ми́лостиве, очи́сти / мно́жества согреше́ний на́ших.

И ныне: Моли́твами Богоро́дицы, / Ми́лостиве, очи́сти / мно́жества согреше́ний на́ших.

Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихира, глас 6:

Днесь созыва́ет нас страстоте́рпца всемiрное торжество́. / Прииди́те у́бо, празднолю́бцы, / све́тло пра́зднуим па́мять его́, глаго́люще: / ра́дуйся, ри́зу нече́стия раздра́в ве́рою, / му́жеством же ду́ха себе́ обложи́в. / Ра́дуйся, упраздни́вый козноде́йства чужда́го, / кре́постию да́нною тебе́ от Еди́наго Бо́га. / Ра́дуйся, и́же прободе́нными удесы́ / блаже́нную страсть Христо́ву духо́вне нам возживописа́в. / Его́же моли́, страда́льцев удобре́ние Дими́трие, / изба́витися нам ви́димых и неви́димых враг / и спасти́ся душа́м на́шим.

Канон трясения, со ирмосом на 6, глас 6.

Егоже краегранесие: О Христе́, земли́ колеба́ние уста́ви вско́ре.

Иосиф. Песнь 1

Ирмос: Я́ко по су́ху, пешеше́ствовав Изра́иль / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь пои́м, вопия́ше.

Я́ко стра́шен гнев Твой, / от него́же нас изба́вил еси́, Го́споди, / не погре́б в земли́ все движе́ние на́ше. / Тем благода́рственно Тя при́сно сла́вим.

Ра́дуяся нашему всегда всеконе́чному исправле́нию, Влады́ко, / я́коже лист худ, коле́блеши всю зе́млю, / в страх Твой ве́рныя утвержда́я, Го́споди.

Изба́ви тру́са тяжча́йшаго вся ны / и не даждь, Го́споди, поги́бнути всеконе́чно насле́дию Твоему́, / мно́гими прогне́вавшему злы́ми Твое́ долготе́рпение.

Богородичен: Ра́бски Тебе́ вопие́м, / Ма́ти Бо́жия, обы́чныя ми́лости Твоя́ на град и лю́ди ми́лостивно показу́ющи, / тру́са тяжча́йшаго и тли нас измени́.

И святаго два канона, на 8.

Первый канон, глас 4, егоже краегранесие:

Добропобе́дному приглаго́лю Дими́трию.

Феофаново. Песнь 1

Ирмос: Мо́ря чермну́ю пучи́ну / невла́жными стопа́ми / дре́вний пешеше́ствовав Изра́иль, / крестообра́зныма Моисе́овыма рука́ма / Амали́кову си́лу в пусты́ни победи́л есть.

Боже́ственным муче́ния венце́м увязе́н, / при Бо́зе лику́еши, / блиста́нии отону́дными сияя́ и просвеще́ния исполня́ем, / великому́чениче досточу́дне.

Я́ко су́ща И́стины свиде́теля, / и да́же до кро́ве подви́гшася, блаже́нне, терпели́вно; / тве́рдо же противле́ние к мучи́телем показа́вша, / тя Влады́ка прия́т.

Зло́бы обрета́теля низложи́л еси́ на зе́млю, Дими́трие, / му́ченическим твои́м копие́м уби́в, / Боже́ственною бла́гостию, па́че ума́ си́лою, на сие́, блаже́нне, укрепля́ем.

Богородичен: Безма́терен Бог пе́рвее Сый, / бысть е́же по нам Безо́тчий из Тебе́, Богоро́дице Всепе́тая, / плоть прие́м по едине́нию, / е́же па́че сло́ва и ра́зума.

Другий канон, глас 8.

Егоже краегранесие: Мv́ра честву́ю благода́ть Дими́трия.

Георгий Скилица. Песнь 1

Ирмос: Колесницегони́теля фарао́ня погрузи́ / чудотворя́й иногда́ / Моисе́йский жезл, крестообра́зно порази́в / и раздели́в мо́ре: / Изра́иля же беглеца́, пешехо́дца спасе́, / песнь Бо́гови воспева́юща.

Мv́ра благово́нна и че́стна, Дими́трие, / отве́рзеный исто́чниче, / страсте́й скве́рны се́рдце мое́ омы́й / и, доброде́телей дея́нием благово́ние мя показа́в Христо́во, / ум мой облагода́тстви, / благода́ти твоя́ Боже́ственныя пе́ти.

Воды́ живы́я ре́ки / истека́ти от чре́ва ве́рных, / Сло́во Бо́жие глаго́лет. / Те́мже твоего́ пролива́ются мv́ра исто́чницы приснотеку́щии, / и́хже струи́ веселя́т Бо́жий град, / сла́вящий му́ченическое дерзнове́ние твое́.

Жезл у́бо дре́вле Моисе́ев, / уда́рив ка́мень в земли́ пусты́нней, / отве́рзе струи́ рек многоте́чныя; / те́ло же твое́, Дими́трие, прободе́нное копие́м, / мv́ра исто́чник показа́, / но́ваго Изра́иля прохлажда́ющее.

Я́же у́бо и́маши воздая́ния, Дими́трие, / му́ченических твои́х язв, / ниже́ око ви́де, ниже́ у́хо слы́ша; / ны́не же мv́ра мо́ре, воздая́ния чистоты́ пролива́еши мiра конце́м, / стра́сти душ очища́ющее.

Богородичен: Пренескве́рно прия́телище, Всечи́стая, / Сло́во обре́т Тя Бо́жие, / в Твоя́ всели́ся ложесна́: / и е́же из Тебе́ прия́тие пома́зав Свои́м Божество́м, / Еди́н про́йде от двою́, / и истоще́нное мv́ро нарече́ся, / Христо́с бо Бог же и Челове́к.

Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Песнь 3

Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

Земля́ уязвля́ется, нам зле залежа́щим, / и при́сно гнев Твой сподвиза́ющим на ны, Ще́дре Всецарю́, / но поща́ди, Влады́ко, ра́бы Твоя́.

Стряс, Го́споди, зе́млю, утверди́л еси́ па́ки, / наказу́я и обраща́я не́мощь на́шу, / утвержда́тися Твои́м Боже́ственным стра́хом хотя́, Преблаги́й.

Ро́ждшаго смерть го́рькую, / и тру́сы тяжча́йшия, и я́звы нестерпи́мыя, / греха́, бра́тие, убежи́м / и Бо́гу покая́ния о́бразы угоди́м.

Богородичен: Еди́на су́щи Блага́я, / Преблаго́е Сло́во умоли́ приле́жно, / настоя́щаго тру́са всем изба́витися и гне́ва, / Богоро́дице Чи́стая, мо́лимся.

Ин. Ирмос: Весели́тся о Тебе́ Це́рковь Твоя́, Христе́, зову́щи: / Ты моя́ кре́пость, Го́споди, / и прибе́жище, и утвержде́ние.

Вмени́ся в ничто́же мучи́телей от Тебе́ повеле́ние; / Сло́во бо Бо́жие па́че всех, страстоте́рпче, / предче́ствовал еси́.

Све́щник светови́ден муче́ния в ски́нии был еси́, / Боже́ственным Све́том сия́ющ, / му́чениче страстоте́рпче Дими́трие.

Врачева́ний тя исто́чник свяще́нный и ди́вный, / град твой и сокро́вище некра́домо стяжа́в, / вся́ким весе́лием обогати́ся.

Богородичен: Врачу́я о́браз истле́вший земны́х, Пречи́стая, / сим из Тебе́ облачи́тся, / пребы́в я́коже бе Человеколю́бец.

Ин. Ирмос: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.

Роди́вся с Небе́с от Бо́га, / был еси́ Боже́ственных благ насле́дник, / сын нарица́емь, снасле́дник Христо́в, / ца́рствуеши же с Ним, / мv́ро бо о́браз сего́, Дими́трие.

Вкорени́ вся, я́коже дре́во Дави́дски, сла́вне, / при исхо́дищих вод, / вели́к возда́л еси́ муче́ния плод и ны́не исто́чник показа́лся еси́ мv́ра, / проходя́щ, земли́ концы́.

Поче́рп благода́ть Христо́ву, / ребра́ с Кро́вию источи́вшаго во́ду, / кровь излия́л еси́ твою́, Его́ ра́ди пробо́дся; / и ны́не, я́ко во́ду, пролива́еши сердца́м благово́нное мv́ро, Дими́трие.

Богородичен: Свяще́ннии Твои́ сосу́ди душе́внии, Пречи́стая, / по́лны арома́т и мv́ра Боже́ственнаго Ду́ха, наше́дшаго на Тя, / и́бо Бо́га ро́ждши, ве́рныя измени́ла еси́ от злово́ния страсте́й.

Катавасия: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

Кондак трясения, глас 6.

Подобен: Е́же о нас:

Изба́ви тру́са тя́жкаго всех нас, Го́споди, / и я́звы нестерпи́мыя грех ра́ди на́ших, / пощади́, Го́споди, правосла́вныя лю́ди Твоя́, / я́же стяжа́л еси́ Твое́ю Кро́вию, Влады́ко; / и град не преда́ждь в поги́бель тру́сом стра́шным, / ино́го бо, ра́зве Тебе́, Бо́га не ве́мы, / и воззови́ пою́щим: / Аз есмь с ва́ми, и никто́же на вы.

Седален мученика, глас 4.

Подобен: Удиви́ся Ио́сиф:

Я́ко до́блему страда́льцу / и во́ину кре́пку Всецарю́ющаго Христа́, / взыва́ем псало́мски: / ра́дуйся, му́чеников украше́ние и ле́пота; / ра́дуйся, све́тлая Це́ркве звездо́ / и стено́, и приста́нище прибега́ющих к тебе́, / великому́чениче сла́вне Дими́трие, / тя пою́щия спаса́й / от вся́каго вре́да чужда́го и озлобле́ния вся. (2)

Слава, и ныне, трясения, глас тойже.

Подобен: Вознесы́йся:

Согреши́вшия Тебе́ мно́го не презре́л еси́, / но, наказа́в, ми́лостивно испра́вил еси́; / Боже́ственным призира́нием Твои́м потря́с зе́млю, Влады́ко Долготерпели́ве, / ника́коже повреди́в вся рабы́ Твоя́ за милосе́рдие мно́гое. / Тем благода́рственными Тя гла́сы славосло́вим / и со стра́хом сла́вим.

Песнь 4

Ирмос: Христо́с моя́ си́ла, / Бог и Госпо́дь, / честна́я Це́рковь / боголе́пно пое́т, взыва́ющи, / от смы́сла чи́ста, о Го́споде пра́зднующи.

Коле́блеши, Го́споди, зе́млю, / хотя́й стра́хом и́стинным всем нам, Влады́ко, утвержда́тися, / коле́блемым прило́ги льсти́ваго борца́.

Боже́ственным манове́нием Твои́м коле́блеши вся́ческая / и ужаса́еши сердца́ на земли́ живу́щих, Влады́ко; / пра́веднаго у́бо Твоего́ гне́ва осла́би, Го́споди, во́лны.

Ника́коже иму́щия во уме́ стра́ха Твое́го, / устраша́еши двиза́нием всея́ земли́, Еди́не Ми́лостиве, / но обы́чно на нас ми́лости Твоя́ удиви́.

Богородичен: Храм Тя, Влады́чице, Бо́жий ве́дяще, / во святе́м хра́ме Твое́м ру́ки уми́льныя подно́сим на моле́ние; / виждь озлобле́ние на́ше и пода́ждь по́мощь.

Ин. Ирмос: Вознесе́на Тя ви́девши Це́рковь на Кресте́, / Со́лнце Пра́ведное, / ста в чи́не свое́м, / досто́йно взыва́ющи: / сла́ва си́ле Твое́й, Го́споди.

Победи́вшаго лжу нече́стия, / Бо́жие Всевысоча́йшее ви́дев Сло́во, / сла́вою венча́ тя, Дими́трие, пою́ща: / сла́ва си́ле Твое́й, Го́споди.

На лесть побе́ду возста́вив, / победи́тельный вене́ц пра́вды прия́л еси́, Дими́трие, / зовя́ Зижди́телю твоему́: / сла́ва си́ле Твое́й, Го́споди.

Направля́ем дла́нию жизноно́сною, / к приста́нищем дости́гл еси́ тиша́йшим, / иде́же, ны́не ра́дуяся, зове́ши, Дими́трие: / сла́ва си́ле Твое́й, Го́споди.

Богородичен: Я́ко тва́рей всех Свяще́ннейшая, / Ма́ти Бо́га бы́ти Еди́на сподо́билася еси́, / Сего́ бо ро́ждши, / мiр благода́тию Богозна́ния просвети́ла еси́.

Ин. Ирмос: Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.

Скве́рну вся́ку отве́рг рожде́ния ба́нею порожде́ния, / чистоту́, яви́лся еси́, соблюда́я да́же до кончи́ны. / Те́мже Христо́с тебе́, Дими́трие, / есте́ственную вла́гу претворя́ет в мv́ро, / я́коже и во́ду в вино́ преложи́.

Я́коже огня́ естество́ всему́ преподае́тся, / це́лу спаса́ющ си́лу; / та́ко твое́ мv́ро, страда́льче, все́ми у́бо почерпа́ется, / оба́че же пребыва́ет неума́лено. / Те́мже ны́не благоче́ствующии, покланя́ющеся, пое́м Бо́га, / И́же благода́ть тебе́ даде́.

Кто слы́шаны Твоя́ хвалы́ сотвори́т, Христе́ Сло́ве, / ви́дя Твоя́ благода́ти, я́же страда́льцем Твои́м по́дал еси́; / Дими́трия бо се мv́ро му́ченика, / я́ко исто́чник, у́бо истека́ет, / благово́ние же ды́шет и разоря́ет зол омраче́ние.

Напая́ше у́бо исто́чник, от земли́ восходя́щий, / пе́рвее, не́же одожди́ти все сея́ лице́, / ты же сокры́вся, му́чениче, под зе́млю, / исто́чник яви́лся еси́ благово́нна мv́ра, Дими́трие; / ко́пий бо мно́жество отверзо́ша жи́лы / и ны́не мiра напоя́еши концы́.

Богородичен: Неве́сту Бо́жию Тя и Ма́терь ве́мы, Богоро́дице, / Тебе́ бо, я́ко мvродохнове́нный ши́пок, обре́т Сло́во Бо́жие, цвету́щ во удо́ле смире́ннем челове́честве, / возжеле́ Твоея́ добро́ты, / из Тебе́ Плотоно́сец проше́д, ве́рныя облагово́нствоваше.

Катавасия: Седя́й в Сла́ве / на Престо́ле Божества́ / во о́блаце ле́гце, / прии́де Иису́с Пребоже́ственный, / Нетле́нною Дла́нию / и спасе́ зову́щия: / сла́ва, Христе́, си́ле Твое́й.

Песнь 5

Ирмос: Бо́жиим све́том Твои́м, Бла́же, / у́тренюющих Ти ду́ши любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.

И ты, се́рдце, поколе́блися ны́не, / ви́дя Бо́жие преще́ние належа́щее, и возопи́й: / пощади́ лю́ди Твоя́, Влады́ко Го́споди, / и уста́ви пра́ведный гнев Твой, Благоутро́бне.

Лю́ди и град, я́же Твое́ю кро́вию стяжа́л еси́, Иису́се, / не преда́ждь в поги́бель, / во е́же смуща́тися земли́ тру́сом стра́шным, / лик апо́стол мо́лит Тя.

От путе́й Твои́х, Влады́ко, пра́вых / нра́вом укло́ншеся развраще́нным, / в негодова́ние преложихом Тя, Ми́лостиваго и Непамятозло́бнаго, / но ми́лостив и щедр бу́ди Твои́м рабо́м.

Богородичен: Ны́не по́мощи прии́де вре́мя, / ны́не премене́нию потре́ба, Чи́стая, / к Сы́ну Твоему́ и Го́споду, / я́ко да уще́дрит согре́шшия ны / и належа́щаго гне́ва изба́вит.

Ин. Ирмос: Ты, Го́споди мой, Свет в мiр прише́л еси́, / Свет Святы́й, обраща́яй из мра́чна неве́дения / ве́рою воспева́ющия Тя.

Огнь любве́ Боже́ственный в се́рдцы прие́м, / огнь угаси́ л еси́ безбо́жнаго идолонеи́стовства, / сла́вне Дими́трие.

Избавля́я ны от бед, яви́ся, Дими́трие, / моли́твами твои́ми покрыва́я / ве́рою и любо́вию восхваля́ющия тя.

И́же ве́рою к твоему́ усе́рдно притека́юще хра́му, Дими́трие, / неду́гов и страсте́й душетле́нных / вско́ре избавля́ются.

Богородичен: Сло́во Бо́жие, Отцу́ Единосу́щное, / Твой быва́ет, Богома́ти, па́че ума́ же и сло́ва, Сын, / Тебе́ Единосу́щен.

Ин. Ирмос: Вску́ю мя отри́нул еси́ / от лица́ Твоего́, Све́те незаходи́мый, / и покры́ла мя есть чужда́я тьма, окая́ннаго? / Но обрати́ мя и к све́ту за́поведей Твои́х / пути́ моя́ напра́ви, молю́ся.

Был еси́ прия́телище с Небе́с Снизше́дшаго за ми́лость, / я́коже дождя́ или́ ка́пли, ка́плющия кро́тко, / упои́л еси́ та́инственными дарова́нии / и ны́не из гро́ба мv́ра исто́чник то́чиши, Дими́трие.

Страда́льцем, я́коже зако́н, вся́кия мiрски́я обнажи́вся любве́, / упита́лся еси́, му́чениче, еле́ем благода́тей Ду́ха. / Победи́в же тьмы нача́ла, / мзду прия́л еси́ точи́ти мv́ро сладково́нное, Дими́трие.

Ши́пок яви́лся еси́, процветы́й внутрь злачника́ Госпо́дня, Дими́трие, / обагре́н кро́вию муче́ния и ра́нами сече́ний, / и боле́зньми страда́льческими, и разжже́нием пе́щи, / и ны́не мv́ро источае́ши приснотеку́щее.

Се па́ки зри́тся Боже́ственный ковче́г храм му́ченика, / иде́же све́щник внутрь, гроб, нося́й мv́ро и еле́й, / его́же о́крест взыгра́им духо́вно, / и, лику́юще, восхва́лим вели́каго Дими́трия.

Но́вый я́коже Илия́, ре́вностию уя́звлен Христо́вы любве́, / царя́ обличае́ши и тебе́ самаго́ предае́ши на смерть. / Оба́че живе́ши, и еще́ мv́ра исто́чник показа́в гроб, / я́коже скуде́льник елея́ неистоще́н.

Богородичен: Напису́ет Твое́, Де́во, дре́вле та́инство, / поя́ пра́отец Твой, / Царе́вы Дще́ре сла́ва вся внутрьу́ду, / и́же и Тя просла́вив, я́ко Блаже́нную челове́ком. / Ра́дуйся, мiра всего́ воззва́ние.

Катавасия: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.

Песнь 6

Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.

Не иму́ще, Влады́ко, / дерзнове́ния моли́тися, смире́ннии, высоте́ Твое́й, / избра́нныя А́нгелы Твоя́ в те́плую подвиза́ем моли́тву. / Тех ра́ди гне́ва Твоего́ изми́ ны.

Ны́не позна́хом, Го́споди, я́ко восхоте́л еси́ нас, / и ника́коже покры́л еси́ под зе́млю с согреше́нии лю́тыми / мно́го согреши́вшия. / Тем Тя благода́рно сла́вим.

Повелева́еши колеба́тися основа́нием земли́, / я́ко да мы преста́нем, смире́ннии, колеба́тися / доброде́телей лу́чшаго стоя́ния / и стра́хом Твои́м, Сло́ве, утверди́мся.

Богородичен: Свята́я Богоневе́сто, недоуме́нныя ны́не лю́ди уще́дри / и ма́терними Твои́ми моли́ твами, / е́же на ны Бо́жие негодова́ние претвори́ вско́ре, мо́лим Тя.

Ин. Ирмос: Пожру́ Ти со гла́сом хвале́ния, Го́споди, / Це́рковь вопие́т Ти, / от бесо́вския кро́ве очи́щшися / ра́ди ми́лости от ребр Твои́х / исте́кшею Кро́вию.

Согла́сно соше́дшеся, пое́м сла́вную и светоно́сную твою́ па́мять, / и чуде́с по́лную, / и дарова́ний Свята́го и Честна́го, всеблаже́нне, Ду́ха.

Разреши́ моя́ плени́цы согреше́ний моли́твами твои́ми, / я́ко бо непобеди́м му́ченик дерзнове́ние и́маши ко Влады́це, / и бу́ди ми прибе́жище и покро́в, Дими́трие.

Богородичен: Чи́сту Тя посреде́ те́рния обре́т, я́ко чисте́йший крин / и удо́льный цвет, о Богома́ти! / Жени́х во утро́бу Твою́ Сло́во всели́ся.

Ин. Ирмос: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся, / к Тебе́ бо возопи́х, и услы́ши мя, / Бо́же спасе́ния моего́.

Процве́л еси́ духо́вно, я́коже ма́слина плодови́тая, / и копиено́сными рука́ми ну́ждно изгнете́ся. / Ве́рных же утешае́ши, / мv́ро ны́не точа́ из Боже́ственнаго гро́ба твоего́, Дими́трие.

Пчелы́ о́бразом тебе́ сама́го / де́лателя вся́кия показа́л еси́ Боготво́рныя доброде́тели, / ду́шу, блаже́нне, непоро́чну, я́ко со́тову телеси́, соблюда́я, / и мv́ро ны́не источа́еши, услажда́ющее ду́ши.

Возлюби́л еси́ от души́ Христа́, / и Сему́ после́довал еси́ к мiру благово́ния, / и Сего́ причасти́лся еси́ срастворе́нием лу́чшим. / И ны́не мv́ра струи́ то́чиши непреста́нныя, Дими́трие.

Ка́пли страда́льческих на зе́млю крове́й твои́х ка́плюще, / благово́ния исто́чник мv́ра ту́ю соде́лаша. / И ны́не сие́ непреста́нно / почерпа́ющим источа́еши, Дими́трие.

По́том твои́х, му́дре, крове́й облия́н, / я́коже ин но́вый исто́чник ре́чно, / тре́бующим бога́тно подае́ши во исцеле́ние твое́ мv́ро, / блаже́нне, усе́рдно приходя́щим.

Богородичен: Зря́ще златови́дный све́та Све́щник неугаси́мый, / мно́жеством грехо́в ду́ши омрачи́вшии, присту́пим; / дае́т бо просвеще́ние / и вся́кое отгоня́ет омраче́ние.

Катавасия: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Кондак мученика, глас 2:

Крове́й твои́х струя́ми, Дими́трие, / Це́рковь Бог обагри́, / да́вый тебе́ кре́пость непобеди́мую / и соблюда́я град твой невреди́м; / того́ бо еси́ утвержде́ние.

Икос: Сего́ вели́каго вси воспои́м, соше́дшеся ве́рою, / я́ко ору́жника Христо́ва и му́ченика, Дими́трия, / в пе́снех и пе́ниих совзыва́юще Влады́це и Зижди́телю вселе́нныя: / изба́ви ны тру́са и ну́жды, Человеколю́бче, / моли́твами Богоро́дицы и всех святы́х му́чеников Твои́х. / На Тя бо вси наде́емся изба́витися бед и скорбе́й, / Ты бо еси́ на́ше утвержде́ние.

Песнь 7

Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие мучи́теля увеща́ вопи́ти: / благослове́н еси́, Бо́же оте́ц на́ших.

Препе́т еси́, Го́споди Долготерпели́ве, / я́ко не умори́л еси́ рабо́в Твои́х тру́сом и колеба́нием стра́шным земли́, / но устраши́л еси́, ища́й обрати́тися от зол, и жи́ти всем нам.

Стена́ние от се́рдца воспу́стим и сле́зы пролие́м, / я́ко да ми́лостива Влады́ку обря́щем Христа́, / сокруши́ти тру́сом вся ны за умноже́ние грехо́в претя́ща нам.

Увы́, воззове́м, и ру́це воспростре́м к Бо́гу Высоча́йшему, / и преста́нем про́чее твори́ти зло́е; / се Спас, негоду́я, коле́блет всю зе́млю, утверди́ти хотя́ ны.

Богородичен: При́зри, Чи́стая, и спаси́ вся пою́щия Тя, / потреби́тися иму́щия во гне́ве Бо́жии, / и я́ростию вели́кою и стра́шною ны́не наше́дшаго преще́ния, / за мно́жества мно́гих грехо́в на́ших.

Ин. Ирмос: В пещи́ Авраа́мстии о́троцы перси́дстей, / любо́вию благоче́стия па́че, / не́жели пла́менем, опаля́еми, взыва́ху: / благослове́н еси́ в хра́ме сла́вы Твоея́, Го́споди.

Преукра́шен Боже́ственною сла́вою и благода́тию, / му́чениче страстоте́рпче, сия́еши светови́дно и просвеща́еши зову́щия: / благослове́н еси́ в хра́ме сла́вы Твоея́, Го́споди.

Я́ко багряни́цею, укра́шен твое́ю кро́вию, име́я вме́сто ски́птра, сла́вне, крест; / со Христо́м ца́рствуеши ны́не, му́чениче Дими́трие, / благослове́н еси́, зовы́й, в хра́ме сла́вы Твоея́, Го́споди.

Богородичен: Препросла́вленная, Просвеще́нная, Ма́ти Де́во, / вся, чту́щия Тя Всеи́стинную Богоро́дицу, огради́; / благослове́на Ты в жена́х, Всенепоро́чная Влады́чице.

Ин. Ирмос: О́троцы евре́йстии в пещи́ / попра́ша пла́мень дерзнове́нно / и на ро́су огнь преложи́ша, вопию́ще: / благослове́н еси́, Го́споди Бо́же, во ве́ки.

Во́ду почерпсти́ Исаи́я жа́ждущим, Дими́трие, предповелева́ет. / А́ще бы ви́дел твой гроб, возопи́л бы вся́ко: / мv́ра исто́чнику приходи́те и почерпи́те спасе́ние.

Земли́ у́бо поро́д был еси́, / всели́лся же еси́ в земли́ кро́тких, / иде́же вода́ сла́дости; / ея́же напи́вся в сы́тость, / мv́ра исто́чник при́сный ны́не, Дими́трие, проливае́ши.

Возра́сл еси́, я́ко розга́ в виногра́де, / пребыва́я неотсе́чен Бо́гу и совокупле́н; / и Сего́ испо́лнився ту́ка неизрече́ннаго, / мv́ро, я́ко струи́, всем ны́не, Дими́трие, то́чиши.

О, но́вых твои́ х боре́ний! О, стра́нных му́ченических страда́ний! / Твоя́ бо по́ты, за Него́ пролия́нныя, блаже́нне, / Христо́с прии́м, исто́чник мv́ра тя показу́ет.

Струю́ мv́ра твоего́ проли́вая, / ве́лию пучи́ну просте́рл еси́ чудес, / и душ, и теле́с неду́ги потопля́еши, / и напа́стей, Дими́трие, вся́ку бу́рю успову́я.

Богородичен: Млеко́м пита́ла еси́, Де́во, / Плотоно́сца, Твоего́ Бо́га рожде́ннаго, / я́ко да боле́знь Ада́мову су́щую во а́де облегчи́т, / от дре́ва сне́дша зна́ния, и за́поведи преслу́шавша.

Катавасия: Не послужи́ша тва́ри Богому́дрии, / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.

Песнь 8

Ирмос: Из пла́мене преподо́бным ро́су источи́л еси́, / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Пра́ведному Твоему́ сему́ гне́ву, Человеколю́бче, / наше́дшу внеза́пно, смути́хомся / и отча́янием всеконе́чным объя́хомся, / негодова́вша на ны зря́ще Тебе́.

Возпростре́м ру́ки, ве́рнии, / и о́чи к Еди́ному Влады́це, спаса́ти могу́щему, зову́ще: / Христе́, я́рость Твою́ отврати́ от нас вско́ре, / Человеколю́бец сый.

Ты́сящи А́нгел, му́чеников сосло́вие, / проро́к и апо́столов, преподо́бных, иера́рхов святы́й лик / мо́лит Тя, Влады́ко: / пощади́ лю́ди Твоя́ смире́нныя.

Ве́дый, Ще́дре, не́мощь на́шу, / и удобопоползнове́нное всех и неиспра́вленное, / осла́би гнев, и смуще́ние ути́ши, / Твое́ю ми́лостию уще́дри мiр.

Богородичен: Ми́лостивая Богоро́дице, / Ми́лостиваго ро́ждшая Спа́са, / виждь озлобле́ние и стена́ние люде́й Твои́х, / и ускори́ умоли́ти, е́же уще́дрити ны.

Ин. Ирмос: Ру́це распросте́р Дании́л, / львов зия́ния в ро́ве затче́, / о́гненную же си́лу угаси́ша, / доброде́телию препоя́савшеся, / благоче́стия рачи́тели, о́троцы, взыва́юще: / благослови́те, вся дела́ Госпо́дня, Го́спода.

Омрачи́л еси́ весь вра́жий гнев, сла́вне, / и, боре́ния неотъе́млемою си́лою Христа́ облече́н / и победоно́сец быв, му́чениче Дими́трие, вопия́л еси́: / благослови́те вся дела́ Госпо́дня Го́спода.

Му́чеников благостоя́ние показа́в, / му́чеников благозва́ние, му́чениче, насле́довал еси́; / ба́нею омы́вся свято́ю, / я́же вторы́ми не оскверня́ется грехо́вными прило́ги, / копие́м пробода́ем, и зовы́й: / благослови́те вся дела́ Госпо́дня Го́спода.

Чуде́с твои́х мно́жество, па́че у́ма дарова́ний, / и́хже тебе́ подаде́ Христо́с, всем показу́ет, сла́вне, / и благода́ть исцеле́ний, я́же па́че сло́ва, / я́ве твою́ благода́ть пропове́дает нам, вопию́щим: / благослови́те вся дела́ Госпо́дня Го́спода.

Богородичен: Еди́ну во всех роде́х, Де́ву Ма́терь и Богоро́дицу Чи́стую, песносло́вим: / Та бо спасе́ния на́шего Хода́таица, / я́ко мiра Изба́вителя, Сло́во ро́ждшая, Ему́же вопие́м: / благослови́те вся дела́ Госпо́дня Го́спода.

Ин. Ирмос: Седмери́цею пещь / халде́йский мучи́тель / богочести́вым неи́стовно разжже́, / си́лою же лу́чшею спасе́ны сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Да Бог явле́нна / сотвори́т тя су́щим в мiре, Дими́трие, / негаси́му свещу́ душе́вную сохра́нша, / еле́ем дея́ний умаще́ну всегда́, / и, я́ко черто́га, тебе́ отверзо́шася две́ри, / приснотеку́щ исто́чник тя мv́ра Боже́ственнаго показу́ет, / возме́здие чистоты́ сию́ дая́ благода́ть.

Не из крове́й, я́коже рече́ честно́е Ева́нгелие, / ниже́ из по́хоти пло́ти, Дими́трие, / Бо́гом же роди́лся еси́, / Воплоще́ннаго почита́я Бо́га; / кровь же усе́рдно Того́ ра́ди твою́ истощи́в, / восприя́л еси́ свы́ше чуде́сную благода́ть, / источа́еши Боже́ственное мv́ро, ду́ши благоуха́яй.

Ты ле́ствица яви́лся еси́ одушевле́нная, / на земли́ у́бо утвержде́нная стопа́ми пло́ти, / до Небе́с же дося́жущая; / Бо́гом бо обогати́лся еси́, утвержде́нным, му́чениче, в тебе́. / Столп же яви́вся, / пома́зан еле́ем по́двигов муче́ния, / и ны́не источа́еши / ве́рою приступа́ющим исто́чник Боже́ственнаго мv́ра.

Тя реку́ прописа́ Бо́жию наводне́ну, / поя́ Дави́д проро́чески, Дими́трие; / се бо неистоща́емо прихожде́ние мv́ра твоего́. / Тем и мно́жество рек, наводня́ющеся, / гла́сы своя́ возвыша́ют, / рука́ми же пле́щут / в сла́ву си́ми все́ми просла́вльшаго тя Бо́га.

Госпо́дь Еди́н Трисвяты́й, / Ты, Бо́же Всемо́щнейше, Его́же Богосло́вствуяй страда́лец Дими́трий в темни́це заключа́ется, / и с скорпи́ею чу́вственною зми́я умори́в мы́сленнаго, / и горды́ню Ли́еву низложи́в чрез Не́стора Боже́ственнаго, / копие́м пробода́ется, / и мv́ро ны́не из гро́ба то́чит.

Богородичен: За Ада́ма – Госпо́дь, за Е́ву – Ты, Всечи́стая, / Гаврии́л же – за льсти́внаго зми́я, / Крест же – за дре́во, вертогра́д гро́ба – вме́сто Еде́ма, / ра́дуйся – вме́сто печа́ли, / копие́ – вме́сто пла́меннаго ору́жия, / и багряни́ца – вме́сто смоко́внаго ли́ствия: / Тя у́бо пое́м, Отрокови́це, я́ко всех вино́вну.

Катавасия: О́троки благочести́выя в пещи́ / Рождество́ Богоро́дичо спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.

Песнь 9

Ирмос: Бо́га / челове́ком невозмо́жно ви́дети, / на Него́ же не сме́ют чи́ни А́нгельстии взира́ти; / Тобо́ю же, Всечи́стая, яви́ся челове́ком / Сло́во воплоще́нно, / Его́же велича́юще, / с Небе́сными во́и / Тя ублажа́ем.

Се вси мы согреши́хом, / и стра́шно у́бо земля́, не согре́шши, му́чится; / наказу́я бо нас, Человеколю́бец всю ту́ю коле́блет; / прии́мем чу́вство / и о спасе́нии свое́м попеце́мся.

Часо́в и лет сый Госпо́дь, / в еди́ном мгнове́нии о́ка восхоте́в сте́рти рабы́ Твоя́, / от мно́гаго же благоутро́бия Твоего́, Влады́ко, возбрани́лся еси́. / Благодари́м Тебе́, безотве́тнии мы, / Еди́не Человеколю́бче.

Тру́са, меча́, го́рькаго плене́ния, / и язы́ческаго, Христе́, наше́ствия, / паде́ния, и гла́да, па́губы, и озлобле́ния вся́каго ина́го, Ще́дре, / изба́ви град Твой и вся́ку страну́, / ве́рно песносло́вящую Тя.

Земля́ безъязы́чне вопие́т, стеня́щи: / почто́ мя злы́ми оскверня́ете мно́гими, вси челове́цы? / Вас бо Влады́ка щадя́, / еди́ну мене́ уязвля́ет. / Приими́те чу́вство и покая́нием Бо́га уми́лостивите.

Богородичен: Тли в рождестве́ не прии́мши, / тле́ния, Де́во, измени́ вся ны, / и тру́са тяжча́йшаго, и ско́рби, / утоля́ющи Влады́чнее негодова́ние / Твои́м ма́терним премене́нием, Богора́дованная.

Ин. Ирмос: Ка́мень нерукосе́чный / от несеко́мыя горы́ Тебе́, Де́во, / краеуго́льный отсече́ся, / Христо́с, совокупи́вый разстоя́щаяся естества́. / Тем веселя́щеся Тя, Богоро́дице, велича́ем.

Раздери́ у́зы прегреше́ний тя пою́щих, страстоте́рпче, / уста́ви страсте́й прило́ги, / молву́ разори́ ересе́й / и напа́стей утиши́ бу́рю моли́твами твои́ми.

Напра́ви к стезя́м пра́вым Небе́снаго Ца́рствия / свяще́ннейшую твою́ па́ству, венцено́сче му́чениче Дими́трие, / на па́жить спаси́тельную, на ме́сто ве́чное.

Да венце́в сла́вы и Небе́снаго Ца́рствия получе́ния / пою́щим тя сего́ улучи́ти моли́, му́чениче Дими́трие, / Жизнода́вца Го́спода и Царя́ Сил.

Богородичен: Я́ко ко́рень, исто́чник и вину́ нетле́ния Тя, Де́во, / вси ве́рнии, наде́ющеся, хвала́ми почита́ем; / Ты бо Ипоста́сное нам Безсме́ртие источи́ла еси́.

Ин. Ирмос: Ужасе́ся о сем Не́бо, / и земли́ удиви́шася концы́, / я́ко Бог яви́ся челове́ком пло́тски / и чре́во Твое́ бысть простра́ннейшее Небе́с. / Тем Тя, Богоро́дицу, / А́нгелов и челове́к чинонача́лия велича́ют.

Прие́м твой алава́стр душе́вный, доброде́телей Боже́ственнаго мv́ра испо́лнен, / име́я же Христа́, прекло́нша тебе́, му́чениче, главу́, / я́ко упоко́ившася жити́я твоего́ све́тлостию чистоты́. / Тем ублажи́лся еси́ и благода́ти испо́лнился еси́, мvроточи́ти мiра конце́м.

Се ожида́ющих тя воздая́ний неизрече́нных све́тлая проображе́ния, / се источник мv́ра приснотеку́щаго, о страда́льче! / Бо́гу у́бо предстоя́ со дерзнове́нием му́ченическим, / во́инству на́шему испроси́ на враги́ побе́ду, / и мир стране́ неотъе́млем.

О́бразом Креста́ Победотво́рца / победи́л еси́ Ли́ево суровство́, / и победи́теля Не́стора, и сострада́льца поста́вив; / и ны́не всяк язы́к ва́рварский рабо́тен покори́ правосла́вным, / соде́йствуя, сво́инствуя, укрепля́я, / велича́яй земны́я концы́, Дими́трие.

Те́плою от се́рдца любо́вию / к твоему́ честно́му ковче́гу прибега́ющия, му́чениче Христо́в, / мv́ро пролива́ющему река́ми, / твои́ми моли́твами изба́ви дел душетле́нных / и пото́па страсте́й злосмра́дия; / обоня́ния же покажи́ сия́ Го́споду благово́ннейша.

День ра́дости духо́вныя соверша́ем, Дими́трие, / ви́дяще мv́ра твоего́ непреста́нно точа́щ исто́чник. / Ты же страсте́й омраче́ние разоря́я, / я́ко Боже́ственнаго испо́лнен све́та, / я́ко во дне дава́й ходи́ти благообра́зно, / Бо́жий же ви́дети Свет непристу́пный.

Богородичен: Ты, Всечи́стая, злата́я голуби́ца еси́, / я́ко суче́ц ма́сличный, нося́щая Сло́во Бо́жие, / пома́завшее плоть Свою́ еле́ем Божества́. / Его́же в се́рдцы, я́ко ковче́г, прие́м страда́лец, / из гро́ба мv́ро то́чит, и умаща́ет ве́рных ли́ца.

Катавасия: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице Чи́стая Присноде́во.

Светилен.

Подобен: Све́те неизме́нный:

Кресто́м вооружи́л еси́ Не́стора, / чрез о́наго Ли́еву разори́в горды́ню, Дими́трие, / на три́знищи, я́коже Христо́с, отверзае́ши копие́м ре́бра твоя́, / и́миже ста́до твое́ храни́. (2)

Слава, и ныне: Го́споди, призира́яй на зе́млю с небесе́ / и творя́й всю трясти́ся, / изба́ви ны от тру́са Богоро́дицы моли́твами, / Ю́же дарова́л еси́ христиа́ном Предста́тельницу.

На хвалитех стихиры мученика, на 6, глас 4.

Подобен: Я́ко до́бля:

Прободе́н быв, борца́ твои́ми ко́пиями уязви́л еси́ / и ме́ртва сотвори́л еси́, и неде́йственна, / его́же зло́бы, Дими́трие, нас изба́ви, / кре́пки на стра́сти му́чащия всегда́ содева́я свяще́нными твои́ми моли́твами, / Боже́ственным стра́хом умиля́я сердца́ / и ду́ши на́ша, свя́те.

Реку́ тя, испо́лнену вод духо́вных, ве́дяще, свя́те, / мо́лим, иста́явшия ду́ши на́ша страсте́й преступле́ньми / ми́лостию твое́ю мно́гою свяще́нно ороси́, / и омы́й су́щия в скве́рне, / и премно́гих изба́ви бед и ве́чнаго муче́ния.

Я́ко звезда́ светле́йшая, на земли́ показа́лся еси́, / чуде́с сия́ньми подсо́лнечную просвещае́ши всегда́, Дими́трие сла́вне, / мглы омраче́ния отгоня́ моли́твами твои́ми душ на́ших, / и неду́ги исцели́ от любве́ соверша́ющих твою́ па́мять, / сла́ва му́чеников и похвала.

Ины стихиры, глас 5.

Подобен: Ра́дуйся, по́стников:

Прииди́, му́чениче Христо́в, к нам, / твоего́ тре́бующим ми́лостивнаго посеще́ния, / и изба́ви озло́бленны мучи́тельскими преще́нии и лю́таго неи́стовства ерети́ческаго. / От ни́хже, я́ко пле́нницы и на́зи, гони́ми есмы́, / от ме́ста на ме́сто ча́сто преходя́ще, и заблужда́юще в верте́пех и гора́х. / Уще́дри у́бо, прехва́льне, и даждь нам осла́бу, / утоли́ бу́рю и угаси́, е́же на ны, негодова́ние, / Бо́га моля́, подаю́щаго мiру ве́лию ми́лость.

Стена́ тве́рдая нам, / плене́ния вра́жия не убоя́вся, дан еси́, / ва́рварская наше́ствия упражня́я и неду́ги утоля́я, / степе́нь неразруши́мый, и основа́ние необори́мое, / и градоде́ржец, насели́тель и побо́рник был еси́ твоему́ гра́ду, Дими́трие; / его́же и ны́не, всеблаже́нне, лю́те бе́дствующаго и обтяже́нна окая́нне, / твои́ми моли́твами спаси́, / Христа́ моля́, подаю́щаго мiру ве́лию ми́ лость.

Вся́ку доброде́тель восприи́м, страстоте́рпческий лик яви́ся, / отону́дуже нетле́нныя и блаже́нныя жи́зни наслажде́ние досто́йне насле́дова. / В не́мже досточу́дне украша́ем, Дими́трие, / и подража́нием Христо́вым почита́яся, / и хваля́ся ра́венством копия́, / проси́ приле́жнее / нас, почита́ющих тя, изба́вити от страсте́й и лю́тых обстоя́ний, / те́пле моля́ Подаю́щаго мiру ве́лию ми́лость.

Слава, глас 4. Самогласен, Андрея Иеросолимита: Ко́пиями насле́довавшаго Спа́совых ребр благода́ть, / прободе́нных копие́м, / из ни́хже нам источа́ет Спас жи́зни и нетле́ния во́ды, / Дими́трия почти́м, прему́драго во уче́ниих и вене́чника в му́ченицех, / кро́вию сконча́вшаго страда́ния тече́ние / и чудесы́ просия́вша всей вселе́нней, / ревни́теля Влады́чня и ми́лостива нищелю́бца, / во мно́гих и мнóгащи беда́х лю́тых фессало́няном предста́теля. / Его́же и ле́тнюю па́мять почита́юще, / сла́вим Христа́ Бо́га, / де́йствующа его́ ра́ди всем исцеле́ния.

И ныне, Богородичен: Изба́ви ны от нужд на́ших, Ма́ти Христа́ Бо́га, / ро́ждшая всех Творца́, / да вси зове́м Ти: / ра́дуйся, еди́но Предста́тельство душ на́ших.

Славословие великое. И отпуст.

Блаженны от канона трясения, песнь 3-я на 4, и святаго, песнь 6-я на 4.

Тропарь трясения, глас 8:

Призира́яй на зе́млю и творя́й ю́ трясти́ся, / изба́ви ны стра́шнаго тру́са преще́ния, Христе́ Бо́же наш, / и низпосли́ нам бога́тыя ми́лости Твоя́ / моли́твами Богоро́дицы, и спаси́ ны.

Кондак трясения, глас 6.

Подобен: Е́же о нас:

Изба́ви тру́са тя́жкаго всех нас, Го́споди, / и я́звы нестерпи́мыя грех ра́ди на́ших, / пощади́, Го́споди, правосла́вныя лю́ди Твоя́, / я́же стяжа́л еси́ Твое́ю Кро́вию, Влады́ко; / и град не преда́ждь в поги́бель тру́сом стра́шным, / ино́го бо, ра́зве Тебе́, Бо́га не ве́мы, / и воззови́ пою́щим: / Аз есмь с ва́ми, и никто́же на вы.

Тропарь мученика Димитрия, глас 3:

Вели́ка обре́те в беда́х тя побо́рника вселе́нная, страстоте́рпче, / язы́ки побежда́юща. / Я́коже у́бо Ли́еву низложи́л еси́ горды́ню, / и на по́двиг дерзнове́нна сотвори́в Не́стора, / та́ко, свя́те Дими́трие, / Христу́ Бо́гу моли́ся / дарова́ти нам ве́лию ми́лость.

Кондак мученика, глас 2:

Крове́й твои́х струя́ми, Дими́трие, / Це́рковь Бог обагри́, / да́вый тебе́ кре́пость непобеди́мую / и соблюда́я град твой невреди́м; / того́ бо еси́ утвержде́ние.

Прокимен, глас 6:

Спаси́, Го́споди, лю́ди Твоя́ / и благосло́ви достоя́ние Твое́. Стих: К Тебе́, Го́споди, воззову́, Бо́же мой, да не премолчи́ши от Мене́.

И святаго, глас 7: Возвесели́тся пра́ведник о Го́споде и упова́ет на Него́.

Апостол трясения, к Евреем, зачало 331, от полу

Бра́тие, его́же лю́бит Госпо́дь, наказу́ет: бие́т же вся́каго сы́на, его́же прие́млет. А́ще наказа́ние терпите́, я́коже сыново́м обрета́ется вам Бог. Кото́рый бо есть сын, его́же не наказу́ет оте́ц? А́ще же без наказа́ния есте́, ему́же прича́стницы бы́ша вси, у́бо прелюбоде́йчищи есте́, а не сы́нове. К сим, пло́ти на́шей отцы́ име́хом наказа́тели, и срамля́хомся: не мно́го ли па́че повине́мся Отцу́ духово́м, и жи́ви бу́дем? Они́ бо в ма́ло дней, я́коже го́де им бе, нака́зоваху нас, а Сей на по́льзу, да причасти́мся святы́ни Его́. Вся́кое бо наказа́ние в настоя́щее вре́мя не мни́тся ра́дость бы́ти, но печа́ль: последи́ же плод ми́рен науче́ным тем воздае́т пра́вды. Те́мже осла́бленныя ру́ки и осла́бленная коле́на испра́вите. И стези́ пра́вы сотвори́те нога́ми ва́шими, да не хро́мое соврати́тся, но па́че да исцеле́ет. Блюди́те же, да не отрече́теся Глаго́лющаго, а́ще бо не избежа́ша они́, отре́кшиися проро́чествующаго на земли́, мно́жае па́че мы отрица́ющиися Небе́снаго. Его́же глас зе́млю тогда́ поколеба́, ны́не же обетова́, глаго́ля: еще́ еди́ною Аз потрясу́ не то́кмо земле́ю, но и не́бом. А е́же, еще́ еди́ною, сказу́ет коле́блемых преложе́ние, а́ки сотворе́нных, да пребу́дут, я́же суть не подви́жимая.

Евр.12:6–13, 25–27

И святаго Апостол,

к Тимофею, зачало 292

Ча́до Тимофе́е, возмога́й во благода́ти, я́же о Христе́ Иису́се, и я́же слы́шал еси́ от Мене́ мно́гими свиде́тели, сия́ преда́ждь ве́рным челове́ком, и́же дово́льни бу́дут и ины́х научи́ти. Ты у́бо злопостражди́ я́ко добр во́ин Иису́с Христо́в. Никто́же бо во́ин быва́я обязу́ется ку́плями жите́йскими, да воево́де уго́ден бу́дет. А́ще же и постра́ждет кто, не венча́ется, а́ще не зако́нно му́чен бу́дет. Тружда́ющемуся де́лателю пре́жде подоба́ет от плода́ вкуси́ти. Разуме́й, я́же глаго́лю: да даст у́бо тебе́ Госпо́дь ра́зум о всем. Помина́й Го́спода Иису́са Христа́ воста́вшаго от ме́ртвых, от се́мене Дави́дова, по благовествова́нию моему́, в не́мже злостражду́ да́же до уз, я́ко злоде́й, но сло́во Бо́жие не вя́жется. Сего́ ра́ди вся терплю́ избра́нных ра́ди, да и ти́и спасе́ние улуча́т е́же о Христе́ Иису́се, со сла́вою ве́чною.

2Тим.2:1–10

Аллилуиа, глас 4

Стих: Бо́же, отри́нул ны еси́ и низложи́л еси́ нас. Стих: Стрясл еси́ зе́млю и смути́л еси́ ю́, исцели́ сокруше́ние ея́, я́ко подви́жеся. И святаго: Пра́ведник, я́ко фи́никс, процвете́т, я́ко кедр, и́же в Лива́не, умно́жится.

Евангелие трясения, Матфея, зачало 27

Во вре́мя о́но, вле́зшу Иису́су в кора́бль, по Нем идо́ша ученицы́ Его́. И се трус вели́к бысть в мо́ри, я́коже кораблю́ покрыва́тися волна́ми: То́йже же спа́ше. И прише́дше ученицы́ Его́ возбуди́ша Его́, глаго́люще: Го́споди, спаси́ ны, погиба́ем. И глаго́ла им: что страшли́ви есте́, малове́ри? Тогда́ воста́в запрети́ ве́тром и мо́рю, и бысть тишина́ ве́лия. Челове́цы же чуди́шася, глаго́люще: кто есть Сей, я́ко и ве́три и мо́ре послу́шают Его́?

Мф.8:23–27

И святаго, от Иоанна, зачало 52

Рече́ Госпо́дь Свои́м ученико́м: сия́ запове́даю вам, да лю́бите друг дру́га. А́ще мир вас ненави́дит, ве́дите, я́ко Мене́ пре́жде вас возненави́де. А́ще от ми́ра бы́сте бы́ли, мир у́бо свое́ люби́л бы: я́коже от ми́ра не́сте, но Аз избра́х вы от ми́ра, сего́ ра́ди ненави́дит вас мир. Помина́йте сло́во, е́же Аз рех вам: несть раб бо́лий го́спода своего́. А́ще Мене́ изгна́ша, и вас изжену́т: а́ще сло́во Мое́ соблюдо́ша, и ва́ше соблюду́т. Но сия́ вся творя́т вам за и́мя Мое́, я́ко не ве́дят Посла́вшаго Мя. А́ще не бых прише́л и глаго́лал им, греха́ не бы́ша име́ли: ны́не же вины́ не и́мут о гресе́ свое́м. Ненави́дяй Мене́, и Отца́ Моего́ ненави́дит. А́ще дел не бых сотвори́л в них, и́хже ин никто́же сотвори́, греха́ не бы́ша име́ли: ны́не же и ви́деша, и возненавидеша Мене́ и Отца́ Моего́. Но да сбу́дется сло́во, пи́санное в зако́не их, я́ко возненави́деша Мя ту́не. Егда́ же прии́дет Уте́шитель, Его́же Аз послю́ вам от Отца́, Дух и́стины, И́же от Отца́ исхо́дит, Той свиде́тельствует о Мне. И вы же свиде́тельствуете, я́ко искони́ со Мно́ю есте́. Сия́ глаго́лах вам, да не соблазните́ся. От со́нмищ иждену́т вы, но прии́дет час, да всяк, и́же убие́т вы, мни́тся слу́жбу приноси́ти Бо́гу.

Ин.15:17–16:2

Причастен:

Хвали́те Го́спода с Небе́с, / хвали́те Его́ в Вы́шних. Другий: В па́мять ве́чную бу́дет пра́ведник, / от слу́ха зла не убои́тся. Аллилу́иа, трижды.