8-й день

Преподо́бныя матере нашея Пелаги́и

Преподобнаго Три́фона, архимандрита Успенскаго монастыря, и́же в Хлы́нове, Вя́тскаго чудотворца

Преподобнаго Досифе́я Верхнеостро́вскаго

На Го́споди, воззва́х: стихи́ры, глас 8.

Подо́бен: О пресла́внаго чудесе́́:

О пресла́внаго чудесе́!/ Вмужи́вшися, жена врага попра́/ и стра́сти угаси́ теле́сныя воздержа́нием многим/ и, на ра́мех Госпо́день Крест восприе́мши Пелаги́я те́пле,/ тя́гость отложи́ житейскаго имения,/ мудраго Но́на ученьми последова Христу.

Новая Фекла нам яви́лася еси́,/ я́коже бо ино́го Павла,/ обре́тши Но́на учи́теля,/ и того поревнова́ла еси́ учением, сла́вная,/ приложи́вшися покаянию те́пле,/ и совокупи́лася еси́ воздержа́нием Христу,/ о преблаженная Пелагие́ всечестна́я,/ тем Христа́ не преста́й моля́щи/ спасти́ся нам.

Ра́дуйся, Пелагие всечестна́я,/ ты бо Боже́ственною ревностию разже́гшися всече́стне,/ блу́дную отве́ргла еси́ сласть, преблаженная,/ и притекше к Но́ну, взывала еси́:/ ответ возда́си о дея́ниих моих,/ аще не зна́менаеши мя зна́мением, славне, Христовым,/ Креще́нием одева́я мя/ чи́стыя одежды.

Сла́ва, глас 4. Иоа́нна мона́ха:

Иде́же умно́жися грех,/ преизли́шествова благода́ть, я́коже учи́т апостол;/ в моли́твах бо и слеза́х многих согрешений, Пелагие,/ пучи́ну изсуши́ла еси́,/ и наконец благоприятное покая́ние Господу принесла еси́,/ и в сем мо́лишися о душа́х на́ших.

И ны́не, Богоро́дичен или́ Крестобогоро́дичен.

Подо́бен: Я́ко до́бля:

А́гнца и Пастыря, Тя на Древе я́ко виде,/ А́гница рождшая рыда́ше и ма́терски Ти веща́ше:/ Сы́не Возжеленне,/ како на Древе Кре́стнем пове́шен еси́, Долготерпели́ве?/ ка́ко ру́це и но́зе Твои, Сло́ве,/ пригвозди́шася от беззаконных,/ и Кровь Твою́ излия́л еси́, Владыко?

На стиховне Окто́иха.

Тропа́рь, глас 8:

В тебе́ мати известно спасе́ся, еже по о́бразу:/ прии́мши бо крест, последовала еси́ Христу,/ и, де́ющи, учила еси́ презира́ти убо плоть, прехо́дит бо,/ прилежа́ти же о души́, ве́щи безсмертней./ Темже и со А́нгелы сра́дуется, преподобная Пелагие, дух твой.

НА У́ТРЕНИ

Оба кано́на Окто́иха и святыя на 4, егóже краегране́сие: Любовию честву́ю мудрую Пелагию. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ древний пешеше́ствовав Израиль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Предложи́вши я́ко многопи́ршественную днесь Божественную па́мять свою/ вселе́нней всей та́инственно Пелагия,/ повелевает напита́тися всем сне́дей по́двигов ея.

Желание, еже па́че всякаго хоте́ния/ вселившееся в душу Твою́, честна́я, озари́ ум/ и пла́мень Духа, вжег тебе́, просвети́ и страсте́й ти́ну попали́.

Мо́ря греховнаго волнения избе́гши, честна́я,/ к тихому пристанищу Христову, Пелагие, приста́ла еси́,/ тем покаянием твои́м наследовала еси́ кротких землю.

Богоро́дичен: Тишина́ су́щих в жити́и, Чи́стая, вла́ющихся земны́х,/ Ты, тве́рдая и крепкая анки́ра, и приста́нище, и окормле́ние еси́,/ всегда к Тебе́ руководя́щи и спасающи.

Песнь 3

Ирмо́с: Весели́тся о Тебе́ Це́рковь Твоя́́, Христе́́, зову́щи:/ Ты моя кре́пость, Го́споди,/ и прибе́жище, и утвержде́ние.

Возлете́ла еси́ на Небеса́, Христова голуби́це,/ крила́ми воздержа́ния и боле́зньми мно́гими возвы́сившися.

Тины страстны́я ты злосмра́дное Христовою водою омы́вши, честна́я,/ ми́ро, Пелагие, яви́лася еси́ Ему.

Оружие врагу́ смертоно́сное/ и́стинно бысть к Бо́гу твоя́́, честна́я, разжже́нная любовь и жела́ние.

Богоро́дичен: Я́ко роса́ утренняя, веселие Твое́, Чи́стая, ка́плющи,/ страсте́й пещь Тебе́ пою́щим угашает всегда.

Седа́лен, глас 8.

Подо́бен: Прему́дрости:

Покая́ния росо́ю страсте́й угасивши пламень,/ твой живот возложи́ла еси́ Христу́ и Спасу твое́му/ и, Его́ ради мира избе́гши, уединилася еси́ в пусты́ни,/ житие А́нгельское доше́дши./ Тем и, кончину со славою великою обре́тши от Бо́га почита́ему,/ позна́лася еси́ концем, Пелагие равноангельная,/ моли́ Христа́ Бо́га грехо́в оставле́ние пода́ти/ пра́зднующим любо́вию святу́ю па́мять Твою́.

Сла́ва, и ны́не, Богоро́дичен:

В напа́сти многоплете́нныя впад от враг видимых и невидимых,/ бурею одержи́м безчисленных согрешений моих,/ и, я́ко к теплому заступле́нию и покро́ву моему, Чи́стая,/ ко пристанищу притекаю твоея́ благости./ Темже, Пречистая, из тебе́ Воплощенному безсе́менно/ моли́ся прилежно о всех рабе́х Твоих,/ непрестанно моля́щихтися, Богоро́дице Пречистая,/ моля́щи Его́ при́сно согрешений оставле́ние дарова́ти/ воспева́ющим досто́йно славу Твою́.

Крестобогоро́дичен:

А́гнца, и Пастыря, и Изба́вителя/ А́гница зря́щи на Кресте неправедно воздви́жена,/ пла́чущися горько, взыва́ше:/ мир убо радуется, прие́мля Тобо́ю избавле́ние,/ утроба же Моя горит, зря́щи Твое́ распятие,/ еже терпи́ши за милосердие милости, Боже Преблаги́й, Безгрешне Го́споди./ Ейже верно возопии́м:/ благоутробие покажи, Де́во, на ны и согрешений оставле́ние даруй/ покланя́ющимся Того страданием.

Песнь 4

Ирмо́с: Вознесе́на Тя ви́девши Церковь на Кресте́,/ Солнце пра́ведное,/ ста в чи́не своем,/ досто́йно взыва́ющи:/ сла́ва си́ле Твое́й, Го́споди.

Я́ко кадило пречестне́е, Пелагие,/ воздержа́ния у́глием всесожега́емо благово́ние была еси́ Христу, Бо́гу нашему,/ в воню́ те́кши мира Его́.

Теле́сное благолепие, Пелагие,/ греховныя тины прежде бывшее, все преложи́ла еси́ в добро́ту нескве́рную,/ ея́же твой Жених восхоте́, Христос.

Духа все́льшаяся, Пелагие,/ благода́ть в души́ твое́й, я́ко и́скра Слова, пла́мень высо́к возжже́ веры/ и грех извари́.

Богоро́дичен: Жезл прозябла́ еси́, Богоро́дице,/ из Негoже Цвет мысленный возрасте́,/ Божественнаго благово́ния исполнив всяческая,/ Христос Бог наш, ми́ро сый неистоще́нное честно́е.

Песнь 5

Ирмо́с: Ты, Го́споди, мой свет/ в мир прише́л еси́,/ Свет Святый, обращаяй из мра́чна неве́дения/ верою воспева́ющия Тя.

Вода́ми та́инственными умасти́вшися Духа,/ процвела́ еси́ в вере доброде́телей благопло́дием/ и боле́зньми поще́ния.

Ты, Го́споди, Свет во тьме лежа́щих человеков,/ Ты возсиял еси́ в се́рдцы преподобныя,/ светлость Божественнаго разуме́ния.

Болезни твоя́, честна́я Пелагие, со слеза́ми се́емы,/ веселием и радостию оби́лия на Небесех собрашася.

Богоро́дичен: Удивле́на истинно благода́ть Твоя́ показа́ся, Пречистая,/ пресла́вно де́йствующи силы и чудеса́ по всей земли.

Песнь 6

Ирмо́с: Пожру́ Ти со гла́сом хвале́ния, Го́споди,/ Церковь вопие́т Ти,/ от бесо́вския кро́ве очи́щшися,/ ради милости от ребр Твоих/ исте́кшею Кровию.

Я́вльшейся невече́рней зари Христа́ Бо́га на́шего в души́ Пелагии, тьмы князь отгна́н бысть,/ и вселися Ду́ха благода́ть и вера Его́.

Дре́вле уловле́ная зми́ем, сеть ему показа́ся,/ си́лу его обдержа́щи/ и попира́ющи того лукавствие силою Божиею.

Жениха Христа́ возлюби́вши и Бога,/ доброде́тельми украси́лася еси́ и, упещре́на труды́ Божественными,/ Чертога Его́, Пелагие, сподо́билася еси́.

Богоро́дичен: Ви́дети, Богоро́дице, славу Твою́ неизрече́нную/ древле возжеле́ша Божественнии пророцы вси,/ но напоследок нам яви́лася еси́, лю́бящим Тя,/ всех пребо́льши.

Конда́к, глас 2:

Подобен: Вышних ища́:

Тело твое́ постами изнури́вши,/ бде́нными моли́твами Творца умоли́ла еси́ о дея́ниих твои́х,/ я́ко да прии́меши совершенное оставле́ние,/ еже и обрела́ еси́, мати, я́ве,/ путь покая́ния показа́вши.

Ели́цы в житии́ во гресе́х оскверни́стеся, приидите со мною/ и, потщавшеся, поревну́им покаянию,/ слезам и подвиго́м преподобныя матере нашея Пелагии,/ да вскоре от Бо́га прощение прии́мем, я́коже блаже́нная,/ еще жива́ су́щи, скверну отмы́ греха́/ и прият от Бо́га совершенное прощение,/ путь покая́ния показавши.

Песнь 7

Ирмо́с: В пещи́ Авраа́мстии о́троцы перси́дстей/ любо́вию благоче́стия па́че,/ нежели пла́менем опаля́еми, взыва́ху:/ благословен еси́ в храме славы Твоея́, Го́споди.

Пучи́на показалася еси́ Боже́ственных исправле́ний ты и́стинно,/ всю вра́жию погрузи́вши в ней кре́пость,/ тем воспевала еси́:/ благословен еси́ в храме славы Твоея́, Го́споди.

В пещи́ воздержа́ния тело и душу Боже́ственно, я́ко зла́то, чи́сто извари́вши,/ и первую добро́ту показала еси́ светле́йшу, честна́я Пелагие,/ крайним воздержа́нием.

Ба́нею Боже́ственною совле́кшися, ты и́стинно перваго одея́ния страсте́й/ и тлеющаго тя человека,/ в новаго же, славная, оде́яся, Христу́ сообразу́ющися.

Богоро́дичен: На Престо́ле Оте́честем седя́й Слово Божие,/ странно в Тя вселися и страшно, Богоро́дице,/ и возведе́ наше смеше́ние, в Себе возвы́сив,/ я́ко Благоутробен.

Песнь 8

Ирмо́с: Ру́це распросте́р Дании́л,/ львов зия́ния в ро́ве затче́,/ огненную же си́лу угаси́ша, доброде́телию препоя́савшеся,/ благоче́стия рачи́тели/ о́троцы, взыва́юще:/ благослови́те вся дела Господня Го́спода.

Све́тятся лучи́ све́тло чудес твои́х, я́коже солнце,/ и жития твоего́ всю явля́ют светлость/ и сия́ющую в тебе́ Божественную ве́ру, и вопию́т:/ вся дела Господня Го́спода пойте и превозноси́те Его́ во веки.

Неразреши́мым союзом ко Христу́ верно привяза́вшися,/ прилепи́лася еси́ к Нему́ и неотлу́чна пребыла́ еси́ единением любве́ Его́,/ Емуже сочлени́лася еси́ мысленно, верою Его́, Пелагие,/ неразлучне Тому пребы́вши.

Разум прие́мши истинный в се́рдцы твое́м,/ я́ве духом оставила еси́ всю житейскую суету́,/ тем удивила еси́ земны́я внезапным, честна́я, преложе́нием/ и Небеса весе́лия испо́лнила еси́.

Богоро́дичен: Поют, Пречистая Де́во, вели́чия Твоя́ Умная во́инства,/ пропове́дуют вси патриа́рси и пророцы ясно со апостолы,/ такоже и мученик ли́цы и преподобных все множество:/ с нимиже покланя́емся Тебе́.

Песнь 9

Ирмо́с: Камень нерукосе́чный/ от несеко́мыя горы́, Тебе́, Де́во,/ краеуго́льный отсече́ся, Христос,/ совокупи́вый разстоя́щаяся естества́,/ тем веселя́щеся, Тя, Богоро́дице, величаем.

Ви́дети восхотела еси́ истинно Рачи́теля Христа́ добро́ту,/ Егóже ра́ди распя́лася еси́ миру, и красный цвет телесный, преподобная, изсуши́ла еси́,/ и житейскую возненави́дела еси́ любовь.

Всю теле́сную тягость отло́жши, Пелагие, воздержа́нием и болезньми,/ к Небе́сным оби́телем востекла́ еси́,/ в нихже любимыя тебе́ наслажда́ешися добро́ты, сла́вная.

Ны́не тебе́ почита́ющих любо́вию всех, преподобная, назира́еши,/ и ле́тнюю совершающих Твою́ па́мять сию,/ моли́ся Творцу и Создателю твое́му причастником быти и нам Славы Его́.

Богоро́дичен: Пою Твою́ благода́ть, Де́во, велича́ю славу Твою́:/ Ты бо просвещение души́ моея́ еси́ и́стинно,/ и утеше́ние, и скорая помощница,/ и спасе́ние, и защище́ние.

Преподобная Пелагия

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4 глас 1

Подо́бен: Небе́сных чино́в:

Наста́, Богоносне,/ солнца светлейший твой праздник,/ озаря́я приходя́щия к тебе́ верою/ и источа́я исцеления,/ Трифоне преподо́бне,/ молитвенниче о душа́х на́ших.

Чувственныя стра́сти телесныя/ победил еси́ воздержа́ния силою,/ и, Безплотных житие на земли подражав,/ вся плотска́я желания ду́хови повину́л еси́,/ тем ны́не в Небесных селениих водворя́ешися, Трифоне преподо́бне,/ и мо́лишися о душа́х на́ших.

Блаженне Трифоне,/ основания положив подвигу твое́му на земли́ добрая,/ ве́тхаго человека со страстьми́ и похотьми́ совлеклся/ и во Христа́ воистину облеклся,/ благода́тию Божиею укрепля́ем, А́нгельскаго чина достигл еси́/ и соделался еси́ наставник иноком,/ те́мже моли́ спасти́́ся душа́м нашим.

Сла́ва, глас 4:

Иночествующих множество и христоно́снии лю́дие,/ соше́дшеся праздник днесь соста́вим/ и, почита́юще честну́ю па́мять отца на́шего Трифона,/ сему согласно воспое́м:/ радуйся, верный ра́бе Христа́ Бога,/ радуйся, по́стником светлая похвало́,/ радуйся, иночествующим наставниче,/ радуйся, исцелений источниче;/ о нас, преподо́бне, моли́ всех Царя Христа́ Бога/ изба́витися нам от лука́ваго и спасти́́ся душа́м нашим.

И ны́не, Богоро́дичен.

На стихо́вне стихи́ры, глас 6.

Подо́бен: Тридневен:

На го́ру доброде́телей восходя,/ до́лу влекущая помышления отряса́я,/ и крест Спаса на рамо взем,/ усердно Тому последовал еси́,/ и ны́не, добро́ты Его́ наслаждаяся,/ поминай нас, чту́щих тя.

Стих: Честна́ пред Го́сподем/ смерть преподо́бных Его́́.

Небесных благ желая,/ мирская сла́дости отвергл еси́,/ постом бо себе изнуря́л еси́, преподо́бне,/ Небесныя добро́ты рачи́тель был еси́,/ юже ны́не воистину обрел еси́,/ Трифоне о́тче наш.

Стих: Блажен муж, боя́йся Го́спода,/ в заповедех Его́ восхо́щет зело́.

Воздержанием пла́мень страсте́й угаша́я/ в житии земнем,/ тем ны́не кро́тких землю наследовал еси́/ и свесели́шися с преподобными и праведными,/ о́тче наш Трифоне.

Сла́ва, глас 8:

Преподобне о́тче Трифоне,/ мира сего кра́сная и сла́дости вре́менныя презре́в,/ иноческое же житие возлюби́в,/ А́нгелом собеседник быти сподо́бился еси́/ и светильник многосве́тлый Пе́рмския же и Вя́тския страны явился еси́,/ чудесы́ твои́ми, я́ко солнце, сияя;/ всех нас поминай, совершающих священную па́мять Твою́,/ мы бо, чада твоя́ су́ще,/ тя в помощь призываем,/ прося́ще тобо́ю прия́ти мир и ве́лию ми́лость.

И ны́не, Богоро́дичен.

Тропа́рь, глас 4:

От земны́х на Небе́сная помы́слив,/ иноческое житие измла́да, преподо́бне, возлюбив,/ и делом соверши́в ко Господу любовь,/ и твердым умом Его́ Духновенным учением озаряя мир,/ и, возлюбив, блаже́нне, всенощное бдение/ и молитву непрестанну, и наставле́ния Божественнаго разума,/ инок стадо собра́, мудре,/ и наставил еси́ ко свету Богоразумия, Трифоне о́тче наш,/ Христа́ Бо́га моли́ дарова́ти душа́м нашим ве́лию ми́лость.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 8.

Подо́бен: О пресла́внаго чудесе́́:

Отче преподо́бне Трифоне,/ впери́в ум твой к Бо́гу верою,/ мира кра́сная возненавидел еси́/ и, покори́в плоть свою силою Божественнаго Духа,/ последовал еси́ Всевидцу Христу,/ Того моли́ о спасении душ на́ших.

Отче Богому́дре Трифоне,/ ты, от утробы ма́терни Христови прибли́жився,/ всем по́мыслом Тому прилежал еси́,/ и от по́двигов веры и жития твоего́ Вседержителю плоды́ достойны принесл,/ от Него духовныя славы благолепием укра́шен был еси́/ и благих наслаждение восприя́л еси́, досточу́дне.

Преподобне о́тче Трифоне,/ неду́гующим исцеле́ние и хромы́м хождение/ милостивно сотворя́еши,/ и всем, притекающим к тебе́ с верою,/ милости неоскудно подаваеши,/ те́мже и нам от Бо́га подаждь мир и ве́лию ми́лость.

И́ны стихи́ры, глас 2.

Подо́бен: Ки́ими похва́льными:

Ки́ими похва́льными венцы́ увязе́м тя, преподо́бне о́тче наш Трифоне,/ доброде́телей сокровище, сосу́де чистоты́,/ приятелище благода́ти, исцелений источниче?/ Ты же, о святче, моли́ Христа́ Бога/ дарова́ти нам ве́лию ми́лость.

Ки́ими пе́сньми восхва́лим тя, преподо́бне отче,/ иноком наста́вника, пустыннаго жителя,/ целомудрия хранителя, болящим врача безмезднаго?/ Ты же, я́ко имеяй дерзновение ко Господу,/ моли́ Его́ дарова́ти нам мир и ве́лию ми́лость.

Ки́ими устнами ублажи́м тя, преподо́бне,/ до́брых рачи́теля, постника и́стинна, бедным помощника,/ душевре́дными страстьми́ обурева́емым скорое пристанище?/ Ты же, угодниче Божий,/ Христа́ Бо́га моли́ дарова́ти нам ве́лию ми́лость.

Сла́ва, глас 6. Самогла́сен:

Прииди́те, постническое сословие и празднолюбцы вси,/ лик духовный составим/ и к преподобному отцу́ на́шему Трифону си́це возопии́м:/ радуйся, подвижниче, любве ради Христовы мир оставивый;/ радуйся, тело твое́, вечныя ради и блаженныя жизни, поще́нием и труды́ изнури́вый;/ радуйся, и́же чистотою тела и духа славу Христа́ Бо́га вообрази́вый./ Моли убо, о еже и творя́щим честну́ю па́мять Твою́/ изба́витися всякаго греха́ и осуждения, блаже́нне.

И ны́не, Богоро́дичен: Кто Тебе́ не ублажит:

Вход. Проки́мен дне. Паремии преподобническия.

Прему́дрости Соломоновы чтение (главы́ 5 и 6):

Праведницы во веки живут, и в Го́споде мзда их, и попече́ние их у Вы́шняго./ Сего ради прии́мут Ца́рствие благоле́пия и венец добро́ты от руки́ Господни:/ зане́ десни́цею покры́ет я и мы́шцею защити́т их./ Прии́мет всеору́жие рвение свое, и вооружи́т тварь в месть враго́м./ Облече́тся в броня́ правды и возложи́т шлем, суд нелицеме́рен./ Прии́мет щит непобедимый, преподо́бие;/ поостри́т же напрасный гнев, во оружие: спобо́рет же с ним мир на безу́мныя./ По́йдут праволу́чныя стре́лы мо́лниины,/ и я́ко от благокру́гла лу́ка облако́в на наме́рение полетят./ И от каменоме́тныя ярости испо́лнь падут гра́ды,/ вознегоду́ет на них вода морская, ре́ки же потопя́т я на́гло./ Сопроти́в ста́нет им дух силы, и я́ко ви́хор разве́ет их,/ и опустоши́т всю зе́млю беззаконие, и злодейство преврати́т престо́лы сильных./ Слы́шите у́бо, ца́рие, и разуме́йте, навы́кните судии́ концев земли́./ Внуши́те держа́щии мно́жества и гордя́щиися о наро́дех язы́ков:/ я́ко дана есть от Го́спода держа́ва вам и сила от Вы́шняго.

Прему́дрости Соломо́новы чтение (глава́ 3):

Праведных души в руце́ Божией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исход их:/ и еже от нас ше́ствие сокруше́ние, они же суть в мире./ Ибо пред лице́м человеческим, аще и му́ку прии́мут, упова́ние их безсмертия испо́лнено./ И вма́ле нака́зани бывше, великими благоде́тельствовани будут,/ я́ко Бог искуси́ я и обре́те их достойны Себе./ Я́ко злато в горни́ле искуси́ их, и я́ко всепло́дие же́ртвенное прия́т я./ И во время посещения их возсияют и я́ко и́скры по сте́блию потекут./ Су́дят язы́ком и обладают людьми, и воцари́тся Господь в них во веки./ Надеющиися Нань разумеют истину, и ве́рнии в любви пребу́дут Ему./ Я́ко благода́ть и ми́лость в преподо́бных Его́́,/ и посещение во избра́нных Его́.

Прему́дрости Соломо́новы чтение (глава́ 4):

Праведник, аще пости́гнет сконча́тися, в поко́и будет./ Старость бо честна́, не многоле́тна, ниже́ в числе лет исчита́ется./ Седина же есть мудрость челове́ком, и возраст старости, житие́ нескверное./ Благоуго́ден Бо́гови быв, возлю́блен бысть,/ и живы́й посреде́ грешников, преста́влен бысть./ Восхище́н бысть, да не злоба измени́т разума его,/ или́ лесть прельсти́т душу его./ Раче́ние бо злобы помрачает добрая, и паре́ние по́хоти пременя́ет ум незло́бив./ Сконча́вся вма́ле испо́лни ле́та до́лга:/ угодна бо бе Господу душа его: сего ради потща́ся от среды́ лука́вствия./ Лю́дие же ви́девше и не разуме́вше, ниже́ положиша в помышле́нии таковое:/ я́ко благода́ть и ми́лость в преподо́бных Его́́,/ и посещение во избра́нных Его́.

На лити́и стихи́ры самогласны, глас 1:

Память успе́ния твоего, преподо́бне о́тче Трифоне,/ сердца́ на́ша просвеща́ет,/ сию бо пра́зднующе, врачество от страсте́й прие́млем,/ сла́вим Го́спода, труды твоя́ и по́двиги венча́вша,/ и, тем усердно подража́юще,/ твое́ю стезе́ю ко Христу́ Бо́гу ходи́ти поучаемся,/ Его́ же моли́ спасти́ и просвети́ти ду́ши на́ша.

Глас 2:

Празднолю́бцы вси и по́стников сосло́вие,/ верою соше́дшеся днесь,/ и́стиннаго постника почти́м, отца на́шего Трифона,/ по́двигом добрым на земли подвиза́вшася/ и нетле́нную славу на Небеси́ улучити сподо́бльшася,/ и тому с веселием возопии́м:/ о священная главо,/ о нас моли́ся ко Господу,/ помиловатися душа́м нашим.

Глас 8:

Преподобне всече́стне Трифоне,/ доброде́тельми к Бо́гу возше́д и, я́ко на колесни́це восте́к,/ побе́дныя венцы́ от Него прия́л еси́;/ тело же твое́ нетленное,/ я́ко иногда ми́лоть Илия, на земли оставил еси́,/ источа́я тем исцеления и прогоняя ду́хи лукавыя;/ тем же, покланяющеся Бо́гу,/ тя ублажаем, досточу́дне.

И́ны стихи́ры, глас 2:

Во успении твое́м, блаже́нне,/ учительница нам бывает твоя́ рака,/ при́сно бо излива́ющимися чудесы́ вопие́т,/ возводя к трудом и подвигом, глаголя:/ возлюби́те Го́спода, да обрящете благода́ть вечную/ и ничтоже предпочтите па́че любве́ Его́,/ да егда прии́дет,/ обрящете покой со всеми святыми избра́нными Его́,/ егóже и мы улучи́ти сподо́бимся/ твои́ми моли́твами, Трифоне преподо́бне.

Глас 6:

Любовию Христовою, Богомудре, просвеща́ем,/ душетле́нныя стра́сти победи́в,/ я́ко пастырь истинный упа́сл еси́ слове́сное стадо,/ ко отцем преста́вися в до́брей старости/ и Бо́гови со А́нгелы, Трифоне, предстои́ши,/ Того моли́ помиловати ду́ши на́ша.

Сла́ва, глас 8:

И́ночествующих множества/ наставника тя почитаем, о́тче наш Трифоне,/ истинно бо Христу́ рабо́тав/ и вражию обличив си́лу,/ был еси́ А́нгелом собеседник/ и преподобных соприча́стник,/ с ними же моли́ся Го́сподеви/ поми́ловатися душа́м нашим.

И ны́не, Богоро́дичен: Безневе́стная Де́во:

На стихо́вне стихи́ры, глас 8:

Имея Божественную благода́ть,/ наставляющую тя к желанию святому,/ мирска́го мяте́жа отреклся еси́/ и, церковными Писании себе умудри́в,/ ко И́стинному Разуму востекл еси́;/ темже, Трифоне преподо́бне,/ моли́ спасти́ся нам.

Стих: Честна́ пред Го́сподем/ смерть преподо́бных Его́́.

Добродетелей стезе́ю ше́ствуя,/ Бо́гови прибли́жился еси́,/ Егóже и светоли́тие прие́мля,/ хода́тайствуй о нас, рабе́х твои́х,/ во еже спасти́ся нам от собла́зн лукаваго,/ ми́рно житие́ свое́ сконча́ти/ и желаемаго блаженства твои́ми к Бо́гу моли́твами улучи́ти.

Стих: Блажен муж, боя́йся Го́спода,/ в заповедех Его́ восхо́щет зело́.

Вечныя радости о́бщники нас быти/ твои́ми моли́твами сподо́би, преподо́бне о́тче Трифоне,/ с верою приходя́щих к тебе́,/ и прося́щих твоея́ по́мощи и заступления,/ и испроси́ нам у Христа́ Бо́га ве́лию ми́лость.

Сла́ва, глас 6:

Преподобне отче,/ во всю страну Вя́тскую же и Пе́рмскую/ изыде веща́ние исправле́ний твои́х,/ тем же на Небесех обре́л еси́ мзду трудо́в твои́х,/ бесо́вския погуби́л еси́ полки́/ и А́нгельския достигл еси́ чины ,/ ихже житию непорочно поревнова́л еси́;/ дерзновение имеяй ко Господу,/ мир испроси́ нам и ве́лию ми́лость.

И ны́не, Богоро́дичен, глас то́йже: Творе́ц:

Тропа́рь, глас 4:

Я́ко светоза́рная звезда,/ возсиял еси́ от востока до запада,/ оста́вль бо свое́ отечество,/ дошел еси́ Вятския страны́ и Богоспаса́емаго гра́да Хлы́нова,/ в немже оби́тель во славу Пресвятыя Богоро́дицы созда́в,/ и, тамо на добродетель впери́вся,/ собрал еси́ и́ночествующих множество,/ и, сих наставля́я на путь спасения,/ был еси́ А́нгелом собеседник,/ и по́стником сопричастник, Трифоне преподо́бне,/ с ними Христа́ Бо́га моли́ спасти́ся душа́м нашим.

НА У́ТРЕНИ

По 1-й кафизме седа́лен, глас 5:

По́стника Господня пе́сньми почтим,/ умертви́вша вся прило́ги страсте́й,/ воздержа́нием бо и крепким воистину терпением/ зело́ посрами́ гордыню сопротивнаго,/ и ны́не мо́лится о нас Го́сподеви, поми́ловатися душа́м нашим.

Сла́ва и ны́не, Богоро́дичен:

Стра́нное чудо зача́тия и неизреченный образ рождества на Тебе́ верою ви́девше, Чи́стая Приснодево,/ всепра́зднственно сла́вим Тя/ я́ко неоску́дное сокровище во спасе́ние душ на́ших.

По 2-й кафизме седа́лен, глас 4:

Победи́л еси́ прило́ги вражия, Боже́ственною благода́тию оживля́ем,/ посто́м и бдением ум очищая, и непрестанною молитвою к Бо́гу приближа́яся,/ те́мже и бесо́м страшен явился еси́, Трифоне преподо́бне,/ моли́ спасти́ся душа́м нашим.

Сла́ва и ны́не, Богоро́дичен:

Обнови́ла еси́, Чи́стая, Боже́ственным Рождеством Твоим/ истле́вшее страстьми́ человеческое естество/ и воставила еси́ сие от смерти к жизни нетления,/ те́мже Тя по до́лгу, Препросла́вленная, я́коже прорекла́ еси́, ро́ди вси ублажаем.

По полиеле́и седа́лен, глас 8:

Посту́ и бдению прилежа́,/ незлобием и кро́тостию украша́яся,/ и́ноков чины собра́л еси́/ и, доброде́телей о́бразы тем предлагая,/ к Разуму Боже́ственному сих возводи́л еси́, Трифоне преподо́бне;/ моли́ Христа́ Бо́га грехо́в нам оставле́ние дарова́ти,/ чту́щим любо́вию святу́ю па́мять Твою́.

Сла́ва и ны́не, Богоро́дичен:

Я́ко Де́ву едину в жена́х,/ Тя, безсе́менно рождшую Бо́га плотию,/ вси ублажа́ем ро́ди человечестии,/ Огнь бо всели́ся в Тя Боже́ственный,/ те́мже со А́нгельскими чи́нми досто́йно сла́вим пресвятое Рождество Твое́ и согласно вопие́м Ти:/ моли́ Христа́ Бо́га грехо́в оставле́ние дарова́ти воспева́ющим досто́йно славу Твою́.

Степе́нна. Проки́мен: Честна́ пред Го́сподем: Стих: Что воздам: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподобне отче,/ слух твой прилежно Евангелию вдав,/ услышал еси́ Боже́ственный глас,/ зову́щий тя в Небесное Царствие,/ и до́бре сему последовал еси́,/ мира сего́ кра́сная, я́ко уме́ты, вмени́в,/ Единаго добро́ты па́че всех желая Христа,/ Емуже прилежно моли́ся:/ ми́рови низпосла́ти мир,/ Це́рквам утверждение,/ правосла́вным на сопроти́вныя победу и одоле́ние/ и душа́м нашим ве́лию ми́лость.

Канон Пресвятой Богоро́дице со ирмо́сом на 6 и преподобному два кано́на на 8.

Кано́н преподо́бному Трифону, глас 2.

Песнь 1

Ирмо́с: Гряди́те, лю́дие, поим песнь Христу́ Бо́гу,/ разде́льшему море и наста́вльшему люди,/ яже изведе́ из рабо́ты еги́петския,/ я́ко просла́вися.

Ра́дуйся, источниче кипя́щий струи́ спасения,/ от них же почерпа́ем целе́бную благода́ть, и прегрешений избавля́емся,/ любо́вию приходя́щии к тебе́, приснопа́мятне Трифоне.

От утробы ма́терне, славне, явился еси́ избра́нный сосу́д,/ духо́вную благода́ть от Христа́ Бо́га прие́мый.

Да живота нетленнаго прича́стник яви́шися,/ вре́менных, о́тче премудре, небре́гл еси́/ и, к Бо́гу преше́д, непрестанно мо́лишися, спасти́ся всем нам.

Богоро́дичен: Словесе́м премудрым Твоих усте́н после́дующе,/ ра́дующеся, Всенепоро́чная, Тя ублажа́ем,/ нам виновницу неизрече́ннаго блаженства.

Ин кано́н преподобному, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ древний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Боже́ственнаго Пресвята́го Ду́ха блиста́яся благода́тию,/ светоно́сное и честно́е твое́ успение пра́зднующих, Трифоне преподо́бне,/ светлою молитвою твое́ю от страсте́й мглы очисти.

Преподобне отче, крест свой взем,/ последовал еси́ Слову, распе́ншемуся нас ради,/ и плотския стра́сти воздержа́нием, преподо́бне, и низу лега́нием умертви́л еси́.

Поще́нием, моли́твами и слеза́ми Бо́гови приближа́яся,/ приял еси́ от Него благода́ть цели́ти неду́ги и отгоня́ти лукавыя ду́хи,/ Трифоне Богому́дре преблаже́нне.

Богоро́дичен: Облече́ся из Тебе́, Чи́стая Де́во, Бог в Человека,/ спасения ра́ди человеков,/ Егóже моли́ просвети́ти пою́щия Тя.

Песнь 3

Ирмо́с: На ка́мени мя веры утверди́в,/ разшири́л еси́ уста моя на враги́ моя,/ возвесели́бося дух мой, внегда пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Всесветлый, Богомудре, показа́ся столп, наставляющ чины и́нок,/ и облак, осеня́ющ жребий Божий, и ли́ца невидимых враго́в помрача́ющ,/ благода́тию всех Царя и Бога.

Предстоя́ своему́ Влады́це и Господу,/ моли́ся изба́витися стаду твое́му от рабо́ты темныя, преподо́бне,/ и мучи́тельства страсте́й избежа́ти, ибо твои́х молитв послу́шает Бог.

Пло́ти своея стра́сти умертви́в крепким поще́нием, Богоглаго́льниче,/ и быв оби́тель Влады́чня,/ моли́ изба́витися скорбе́й и страсте́й смуще́ния избежа́ти всем, к тебе́ прибега́ющим.

Богоро́дичен: Сви́ток Тя нарече́ Исаия, в немже Слово плотски назна́менася,/ да раздра́в долго́в древних рукописа́ние,/ подаст оставле́ние рабо́ты всем нам.

Ин

Ирмо́с: Весели́тся о Тебе́ Це́рковь Твоя́́, Христе́́, зову́щи:/ Ты моя кре́пость, Го́споди,/ и прибе́жище, и утвержде́ние.

Я́ко же солнце на земли, светом доброде́телей просия́л еси́,/ всех ду́ши, преподо́бне, благода́тию просвеща́я духо́вною.

Железом чре́сла своя препоя́сана имел еси́ страсте́й на умерщвле́ние,/ и телесе́ озлобление претерпе́л еси́, Трифоне преподо́бне,/ безстра́стием я́ве оде́яся.

Человеколюби́в быв немощны́м в житии твое́м,/ сего ради прия́л еси́ от Бо́га многую благода́ть, преподо́бне,/ цели́ти стра́сти неисце́льныя.

Богоро́дичен: Слово Божие во утробу Твою́, Приснодево, всели́ся,/ и земноро́дных вся́кия грехи́ отъя́ло есть Своею бла́гостию.

Конда́к, глас 2:

Подо́бен: Вышних ища:

Волне́ний мно́жество невла́жно преходя́,/ безплотныя враги струя́ми слез твои́х крепко погрузи́л еси́,/ Богому́дре Трифоне,/ и чуде́с дар прие́м,/ моли́ непреста́нно о всех нас.

Седа́лен, глас 8.

Подо́бен: Прему́дрости:

Отре́кся плоти сладостра́стия Христа́ ради,/ духо́вный пастырь людем явился еси́,/ словеса́ учения Христова сказу́я и́ноком и собою явля́я правды правило,/ стра́сти же вся крепко попра́л еси́, тем и вра́жия кова́рства до конца потребил еси́,/ к Бо́гу взира́я всегда, блаже́нне Трифоне./ Егóже моли́ грехо́в оставле́ние пода́ти чту́щим любо́вию святу́ю па́мять Твою́.

Другий седа́лен преподобному, глас и подобен то́йже:

Я́ко звезду́ незаходи́мую светови́дну,/ вси тя почитаем, доброде́телей сиянием и чудес зарями мир просвеща́юща,/ и восхваля́ем, блаже́нне Трифоне,/ причастник бо явися Божественныя све́тлости и незаходи́маго светоли́тия зри́тель показа́ся, к немуже и востече́./ Темже и мы светоно́сную и святу́ю па́мять Твою́ совершаем, Спаса сла́вяще, и верно вопию́ще:/ моли́ Христа́ Бо́га грехо́в оставле́ние пода́ти чту́щим любо́вию святу́ю па́мять Твою́.

Сла́ва и ны́не, Богоро́дичен:

Солнца о́блаче светле́йший,/ Боже́ственнаго Света све́щниче златокова́нный, Непорочная Пречистая Влады́чице,/ омраче́нную душу мою слепото́ю страсте́й безстра́стия заре́ю просвети́, молюся,/ и оскверне́нное се́рдце мое омы́й умиле́нием покая́ния,/ пла́чем же от скверных мя очисти дел моих, да любо́вию зову́ Ти:/ Богоро́дице Приснодево, моли́ Христа́ Бога,/ прегреше́ний оставле́ние дарова́ти ми, к Тебе́ бо и́мам надежду, раб Твой.

Песнь 4

Ирмо́с: Пою́ Тя, слухом бо, Го́споди, услышах и ужасо́хся,/ до мене бо и́деши, мене ища́ заблу́ждшаго./ Тем многое Твое́ снизхожде́ние, еже на мя,/ прославля́ю, Многоми́лостиве.

Желание тя Боже́ственное распали́, огнем бо святы́м согре́я твое́ сердце,/ сего ради и жела́нная дости́гл еси́ до конца, Богомудре,/ оста́вль земны́х пристра́стие и единожи́тель быв Вы́шнем служи́телем.

Ласка́ния све́рстник твои́х попра́л еси́, преподо́бне, всеобразно,/ вни́де бо раче́ние Содетеля в тя, Богомудре, те́пле,/ и за́дних мрачная желания до конца отри́нул еси́.

Житейския сла́дости отверг, преподо́бне,/ и, Христа́ Единаго возлюби́в, родительский кров тайно оставил еси́,/ и я́ко пришлец во страна́х чужди́х явился еси́, спасе́ния иски́й.

На па́жить чистую воздержа́ния возве́л еси́ стадо твое́, отче,/ ко исто́чником спасения нему́тнаго безстра́стия,/ разумныя звери побеждая твои́ми к Бо́гу моли́твами.

Богоро́дичен: Се сла́вят Тебе́ ро́ди родо́в, Богомати, я́коже прорекла́ еси́, Отроковице,/ Создателя бо бе палата и храм Боже́ственный,/ в немже всели́ся Вышний, пло́тию оде́яся, да спасе́т нас.

Ин

Ирмо́с: Вознесе́на Тя ви́девши Церковь на Кресте́,/ Солнце пра́ведное,/ ста в чи́не своем,/ досто́йно взыва́ющи:/ сла́ва си́ле Твое́й, Го́споди.

Струя́ми сле́зными се́рдце свое́ очищая,/ моли́твами твои́ми на безво́днем месте воде истека́ти устро́ил еси́,/ Бо́гу тя прославля́ющу, Трифоне преподо́бне, я́ко Своего́ уго́дника.

Пресла́вным житием твои́м, я́ко звезда, сия́я,/ священными чудесы, я́ко другое Небо, показа́ся, блаже́нне, ве́рою зову́щим:/ сла́ва си́ле Твое́й, Го́споди.

Законом повину́яся, преподо́бне, Владычним,/ яже в па́стве твое́й су́щия наставил еси́ к свету Богоразумия,/ усугу́бив данный ти талант, я́ко раб послушли́в своему́ Влады́це Христу.

Богоро́дичен: Привлече́нный ум мой, Богородительнице, к теле́сным сла́достем,/ Твоим хода́тайством, молюся, утверди́,/ Яже Едина рождшая Благодетеля Бо́га на́шего в Вы́шних.

Песнь 5

Ирмо́с: Просвеще́ние во тьме лежащих,/ спасе́ние отча́янных, Христе́́ Спасе мой,/ к Тебе́ у́тренюю, Царю мира,/ просвети́ мя сия́нием Твоим:/ иного бо ра́зве Тебе́ Бо́га не зна́ю.

Весь Бо́гови предався, преподо́бне,/ в пусты́нях мраз зимний претерпе́л еси́, и до́блественне зной понесл еси́,/ и сподо́бися причастник Прему́дрости Бо́жия быти, доброде́тельным сиянием благоукраша́ем.

От ю́ности прилежа́в поще́нию мно́гу, чревоугодия зми́я отри́нул еси́ сове́тника, о́тче преподо́бне,/ а́лчбою, и жа́ждею, и непреста́нными моли́твами, и чистотою Бо́гови соедини́лся/ и прича́стник быти сподо́бился еси́ пи́щи Небесныя.

Доброде́тельми на Го́рняя восшед,/ и́ночествующих стадо научил еси́ чувственных дея́ний огреба́тися,/ возводя́ их на го́ру Боже́ственнаго разума.

Богоро́дичен: Явися, Чи́стая, дре́вле пра́отца ле́ствица, Небес вы́сшая, иму́щая твердый восход,/ из Тебе́ бо сошед Слово Отчее пло́тию, совокупи́ разстоя́щаяся естества́,/ те́мже вси Тя, Богороди́тельнице, сла́вим.

Ин

Ирмо́с: Ты, Го́споди, мой свет/ в мир прише́л еси́,/ Свет Святый, обраща́яй из мра́чна неве́дения/ верою воспева́ющия Тя.

Ум твой, преподо́бне, чи́стыми к Бо́гу манове́нии⁷ весь укрепля́ем явися/ и плотски́х сладостра́стий превы́шши показа́ся.

Сый врач душа́м и телесе́м, пребога́те,/ отжени плотски́я и душевре́дныя болезни благода́тию Божественнаго Духа.

Блажен еси́, преподо́бне, я́ко всю зло́бу вра́жию победил еси́/ и теле́сныя стра́сти до конца умертви́л еси́.

Богоро́дичен: Родила́ еси́ Преблага́го Бо́га и по рождестве Де́вая пребысть, Богоневесто,/ сего ра́ди Тя вси ро́ди челове́честии ублажа́ют.

Песнь 6

Ирмо́с: Ко Господу от ки́та Ио́на возопи́:/ Ты мя возведи́ из глубины́ а́да, молюся,/ да я́ко Изба́вителю во гла́се хвале́ния/ истины же духом пожру́ тебе́.

Влады́чнею любо́вию вжиля́ем,/ вся кра́сная мира сего оставив, единому Христу́ после́довал еси́/ и, благи́й яре́м на ра́мо взем, му́жески понесл еси́.

Пастырь сый, от Ду́ха Бо́жия науче́нный, блаже́нне,/ наставля́л еси́ стадо твое́ Небе́сная разумева́ти и страсте́й нашествия отгоня́ти,/ Царствия же Бо́жия и правды Его́ иска́ти.

Житие́ твое́ А́нгельскому подо́бно бысть, преподо́бне,/ я́ко дерзновение от Бога, вся содержащаго, име́яй,/ моли́ся, о еже от страсте́й лука́вых христоимени́тому стаду твое́му изба́витися.

Богоро́дичен: Прови́дев Твое́ неизрече́нное, Чи́стая, духом та́инство,/ Авваку́м иногда́ предвозвести́́, гору Тя нарече́ приосене́нную,/ из Тебе́ бо всех Содетель вопло́щься, спасе́ нас.

Ин

Ирмо́с: Пожру́ Ти со гла́сом хвале́ния, Го́споди,/ Церковь вопие́т Ти,/ от бесо́вския кро́ве очищшися,/ ради милости от ребр Твоих/ исте́кшею Кровию.

Единым то́чию призыванием свята́го твоего́ и́мене/ и омы́тием воды́, исходя́щия во обители твое́й,/ тряса́вичная болезнь от человек отгоня́ется и вред бесо́вский моли́твами твои́ми потребля́ется.

Победи́в плотскаго наве́та мудрование,/ Ду́ха Свята́го благода́ть прия́л еси́/ отгоня́ти плотски́я неду́ги и цели́ти душевныя стра́сти, Трифоне преблаже́нне.

О, чудо преди́вное,/ ка́ко от еди́наго то́кмо призыва́ния боля́щии прие́млют исцеле́ние твои́м явлением, пресла́вне Трифоне,/ и бед и напа́стей свобожда́ются твои́ми к Бо́гу моли́твами.

Богоро́дичен: Умертви́ пло́ти моея мудрова́ние, Приснодево,/ Умертви́теля смерти заче́ншая/ и ро́ждшая Жизнодавца па́че сло́ва и разума.

Конда́к, глас 8:

Днесь в начале основания добродетелей, блаже́нне,/ положил еси́ в души́ своей страх Божий,/ от юности взем крест свой,/ благоче́стно Христови последовал еси́,/ А́нгельским о́бразом облече́ся и бысть монах преди́вен,/ в добродетелех цветяше, к будущим Бо́гови простира́лся./ И своей пло́ти, я́ко врагу, немилостив, отче, был еси́,/ терпением явися, блаже́нне, я́ко зла́то искуше́но в горни́ле,/ но и ны́не не забуди посещати чад своих,/ поминай нас, чту́щих пресвятую па́мять твою́́,/ да вси благода́рне вопие́м ти:/ радуйся, прему́дре Трифоне, наставниче мона́хом.

И́кос:

Отве́рзи ми устне́ Богоприя́тными твои́ми к Бо́гу моли́твами, преблаже́нне,/ да воспою́ равноа́нгельное житие́ твое́ и возглаго́лю досто́йно вся доброде́тели твоя́,/ столп бо и забра́ло явися и́ноком и правды пра́вило пресветлое,/ те́мже и просла́вльшему тя Господу моли́ся непреста́нно о всех нас.

Песнь 7

Ирмо́с: Купина́ в горе́ огненеопа́льная/ и росоно́сная пещь халде́йская/ яве предписа́ Тя, Богоневе́сто:/ Боже́ственный бо невеще́ственный/ в веще́ственнем чре́ве Огнь неопа́льно прия́ла еси́./ Те́мже из Тебе́ Ро́ждшемуся/ пое́м: благослове́н еси́, Боже отец на́ших.

Авраа́му уподо́бился еси́, преблаже́нне,/ от земли бо оте́чествия твоего́ изве́д, пресе́льника сотвори тя Господь в Вя́тстей стране́,/ идеже Сего узре́л еси́, обещава́юща ти воздая́ние бога́тно,/ Емуже, веселяся, усердно воспева́л еси́:/ благословен Бог отец на́ших.

Распаля́ем Святым Духом, преподо́бне, ко́зни вражия разори́л еси́,/ Кре́стным оружием ограждаяся нас ради волею пригвождшагося Сы́на Бо́жия,/ Емуже, веселя́ся, усердно поя́ше:/ благословен Бог отец на́ших.

В Го́рняя Небеса к Бо́гу моли́твами твои́ми приступил еси́,/ вшед в пресве́тлый о́блак, незаходи́мыя сподо́бися Бо́жия Славы виде́ния,/ Емуже прилежно, веселя́ся, поя́ше:/ благословен Бог отец на́ших.

Богоро́дичен: Закона исполне́ние родила́ еси́, Сына, Преве́чнаго всяческих Бо́га и Го́спода,/ премудрости наказа́теля земноро́дных, Емуже усе́рдно поем:/ благословен Бог отец на́ших.

Ин

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благословен еси́ в храме славы Твоея́, Го́споди.

Сле́зными тучами пла́мень страсте́й погаси́л еси́,/ ны́не же огне́м молитв твои́х, блаже́нне, и Боже́ственною благода́тию/ попаляеши вся душетле́нныя неду́ги.

Всеусе́рдно Творца твоего, блаже́нне, возлюби́л еси́,/ Емуже сам служа́ и ины науча́я, Трифоне мудре, взыва́л еси́:/ благословен еси́ в храме славы Твоея́, Го́споди.

Я́коже древо при исхо́дищах вод, воздержа́нием, отче, насажде́н быв,/ воздал еси́ плоды́ чудес действо от честна́го ти о́браза, Трифоне пребогате,/ благовре́менно всегда изоби́луяся.

Богоро́дичен: Бу́ри безме́рных моих прегрешений, Отроковице, избави мя,/ едина смире́нных помощь кре́пкая и грешных очищение, зовущих:/ благословенна Ты в жена́х еси́, Всенепоро́чная Влады́чице.

Песнь 8

Ирмо́с: В пещь о́гненную ко отроко́м еврейским снизше́дшаго/ и пла́мень в ро́су прело́жшаго Бога/ по́йте дела́ я́ко Го́спода/ и превозноси́те во вся ве́ки.

Твоими, яже к Бо́гу, сле́зными тече́нии огнепа́льныя стра́сти потопи́л еси́,/ гее́нского пла́мене страх погаси́в, о́тче мудре, совершенною любо́вию Го́спода своего,/ при́сно поя́ во вся ве́ки.

Я́коже вторы́й Ено́х к Бо́гу преше́д,/ от Него прия́т бысть, отче, и с Вы́шними ликостоя́нии водворя́яся пое́ши:/ вся дела́ Го́спода пойте и превозноси́те во вся ве́ки.

Ны́не на Небесех нетле́нных даро́в от Бо́га наслаждаяся/ и Трисо́лнечныя Его́ светлости исполняяся, Трифоне блаже́нне,/ певцы́ своя моли́твами твои́ми страстныя мглы избави,/ пою́щия и превознося́щия Го́спода во вся ве́ки.

Богоро́дичен: Древнюю клятву разреши́ла еси́, Пречистая, неизрече́нным словом Бо́га Слова заче́ншая,/ воплоще́нна из Тебе́ за милосердие, Влады́чице, земноро́дных спасе́ние,/ Eгoже превозно́сим во вся ве́ки.

Ин

Ирмо́с: Ру́це распросте́р Дании́л,/ львов зия́ния в ро́ве затче́,/ огненную же си́лу угаси́ша, доброде́телию препоя́савшеся,/ благоче́стия рачи́тели/ о́троцы, взыва́юще:/ благословите вся дела Господня Го́спода.

Я́ко пресве́тлое у́тро, просия́л еси́,/ я́ко светоза́рная звезда, и я́ко вели́кое солнце, озари́л еси́ верных сердца́ чудесы́ твои́ми, Трифоне Богодухнове́нне,/ и души всех просвети́л еси́ Боже́ственною благода́тию, вопию́щих:/ вся дела благослови́те Господня Го́спода.

Глубоку я́зву врагу, ражда́ющу смерть, преблаже́нне, дал еси́,/ егда благода́тию Свята́го Ду́ха смиренну стяжа́л еси́ мудрость,/ высокому́дрый того нрав в землю смиря́я и се́ти душетле́нныя его попира́я.

Ви́дети ра́йскаго блаженства и ве́чнующаго наслаждения, святе, сподо́бився,/ святы́х све́тлости зри́ши и радостно с ними всегда пое́ши:/ вся дела благослови́те Господня Го́спода.

Место во обители твое́й безво́дное, я́коже вторы́й Моисе́й, моли́твами твои́ми многово́дно сотвори́л еси́/ и цельбоно́сно показа́л еси́ приходя́щим с верою, че́рплющим, пию́щим и Христу́ зову́щим:/ вся дела благословите Господня Го́спода.

Богоро́дичен: Неду́говавшую тягото́ю лю́тых, смире́нную мою душу жаждою пали́му,/ Богоблагода́тная Влады́чице Чи́стая, напо́й водою спасения и здраву до конца покажи́, зову́щу:/ вся дела благословите Господня Го́спода.

Песнь 9

Ирмо́с: От Бо́га Бо́га Сло́ва,/ неизреченною му́дростию пришедшаго обнови́ти Ада́ма,/ я́дию в тле́ние па́дшаго лю́те,/ от святыя Девы неизреченно воплоти́вшагося нас ра́ди,/ ве́рнии, единому́дренно пе́сньми величаем.

Просвети́вся от Бо́га Слова по́стническою добро́тою, о́тче Три́фоне,/ оде́ян ри́зою нетле́ния и венча́н дарова́нии па́че ума челове́ча,/ ны́не предстои́ши Го́сподеви, ра́дуяся.

Во обители присноживо́тныя Го́спода своего́ всели́лся еси́, преблаже́нне,/ иде́же апо́стольстии престо́ли, му́ченичестии собо́ри, преподобных собра́ния, пророческая ликования:/ с ними же тя величаем.

Всесве́тел показа́ся, Богоглагольниче, зарями Трисолнечнаго света озаряем,/ испроси́ от Христа́ Бо́га прегрешений разреше́ние и лю́тых избавление, и злых измене́ние,/ любо́вию тебе́ почитающим.

Богоро́дичен: Воплоти́тися благоизво́ли неизреченно Владыка всяческих из Тебе́, Богородительнице Марие,/ соверше́н Бог и Человек, сохранив Тя прежде рождества, и в рождестве, и по рождестве Де́вою:/ Его́ в сугу́бом естестве́ величаем.

Ин

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся, Христос,/ совокупи́вый разстоя́щаяся естества́,/ тем, веселя́щеся, Тя, Богоро́дице, велича́ем.

Возмо́гл еси́ о укрепля́ющем тя Го́споде, Трифоне Богомудре,/ вся вра́жия силы попра́ти и неверныя посрами́ти,/ те́мже и венец я́ко победоно́сец прия́л еси́,/ и дерзнове́ние моли́тися Господу о нас, чту́щих па́мять твою́́ че́стно.

Я́коже от неистощи́маго источника, струи́ исцелений источа́еши, преподо́бне,/ и всякия болезни плотски́я и душе́вныя скве́рны силою Божественнаго Ду́ха очищаеши,/ и благоче́стно на́ша напая́еши сердца и помышления, почита́ющих Тя.

Днесь всечестну́ю твою́́ память, о́тче преподо́бне Трифоне, соверша́юще,/ соше́дшеся всяк во́зраст, тре́бующе твоея́ помощи и заступления, усе́рдно просим:/ поминай нас у Престола Го́спода Славы, чту́щих священную па́мять твою́́.

Троичен:

Взят еси́ ко оби́телем вечным Единосущныя Троицы, преподо́бне отче,/ и, взира́я у́мныма очи́ма, по достоя́нию к лико́м преподобных причте́ся,/ с ними же нас поминай, и́же на земли тебе́ поминающих и пе́сньми всегда почита́ющих.

Богоро́дичен: Глас Арха́нгельский вопие́м Ти, Чи́стая Де́во:/ радуйся, клятвы разрушение, преподобных славо и мучеником похвало,/ пророков проповедание и человеков спасе́ние.

Свети́лен:

Мирска́го сладостра́стия я́ко многомяте́жна избе́г, и неяде́нием плоть свою увядив,/ обнови́в же душе́вную кре́пость и славою Небесною обогати́вся, приснопа́мятне Трифоне,/ моли́ся о нас непреста́нно ко Господу.

Сла́ва и ны́не, Богоро́дичен:

Кре́пкое Твое́ предстательство, Марие Богоукра́шенная,/ и све́тлая Твоя́ сла́ва по всей земли показася,/ о Тебе́ ны́не хва́лимся и весели́мся, иму́ще Тя к Сыну и Бо́гу Твое́му Хода́таицу неусы́пную,/ моли́твами Твоими спасемся.

На хвалитех стихи́ры на 4, глас 8.

Подо́бен: О пресла́внаго чудесе́́:

Преподобне о́тче Трифоне,/ дар Богови избра́н сам себе принесл еси́,/ бде́ние всено́щное и умиле́ние стяжа́в,/ поуче́ние Боже́ственно,/ конечное смирение,/ ве́ру, надежду и любовь нелицеме́рну,/ трезве́ние и милосе́рдие,/ и́стинное безстра́стие/ и молитву показав светови́днейшу.

Преподобне о́тче Трифоне,/ во одея́ние и́стинное/ и спасения одежду/ благочестивым ра́зумом иски́й оде́ятися,/ худы́ми ру́бищи всегда/ свое́ тело покрывати не преста́л еси́/ и обнажи́л еси́ нас обнажи́вшаго ко́зни,/ силою укрепляем Божественнаго Духа.

Преподобне отче, Трифоне блаже́нне,/ предочи́стив свою душу воздержа́нием,/ бысть честно́е и кра́сное/ Святому Духу обита́лище./ Темже лукавыя ду́хи отгоня́еши/ и неду́ги исцеля́еши,/ всегда притека́ющим к тебе́:/ о нас, восхваляющих тя,/ Христови помоли́ся.

Преподобне отче, Трифоне славне,/ облада́в страстьми́ душе́вными,/ начальник мнихом⁸ бысть,/ ко трудо́м воздержа́ния сих наказу́я усердно,/ ихже и предста́вил еси́ Всеви́дцу, Слову Вседержителю,/ пожи́в житие нескве́рно, блаже́нне,/ с ними же нас всегда поминай,/ восхваля́ющих тя.

Сла́ва, глас то́йже. Самогла́сен:

Вопло́щшемуся Бо́гу на́шему от Девы Матере нас ради/ и обнищавшему, я́ко нищ,/ ду́хом себе самого́ принесл еси́ жертву жи́ву,/ и всесожже́ние приятно, всеблаженне, и дар че́стен,/ те́мже и прия́т Небесное наслаждение от Христа́ Бога,/ к Нему́ же при́сно моли́ся, мо́лимся, поми́ловати нас.

И́на стихи́ра на славе, глас 8.

Самогласен:

Поем в пе́снех и све́тлостех,/ па́мять твою́́, почита́юще, о́тче Трифоне,/ я́ко многосве́тлая звезда возсия́ от востока/ и озари́л еси́ Вятскую страну́,/ от юности, премудре, мирски́й мяте́ж оставил еси́/ и на ра́мо и́го ле́гкое восприя́л еси́,/ я́ко преоби́дев тле́нная и долу влеку́щая мудрова́ния,/ и по Вы́шнему течению, преблаже́нне, радостно устреми́ся,/ в Незаходимая всели́ся Богосия́нно наш пастырь и́стинный,/ моли́ Христа́ Бо́га спасти́́ся душа́м нашим.

И ны́не, Богоро́дичен, глас то́йже:

Влады́чице, приими́ молитвы раб Твоих/ и изба́ви нас/ от всякия ну́жды и печа́ли.

Славословие великое и отпуст.

НА ЛИТУРГИ́И

Блаженны 1-го кано́на песнь 3-я на 4 и 2-го кано́на песнь 6-я на 4. Проки́мен, Апостол, Ева́нгелие и причастен и вся служба преподо́бническая.

Преподобный Трифон, архимандрит Вятский

Тропа́рь, глас 4:

Я́ко свети́льник всесве́тел яви́лся еси́/ во о́строве Псковскаго о́зера,/ преподо́бне о́тче наш Досифе́е./ Ты бо крест Христо́в от ю́ности своея́ на ра́мо взем,/ усе́рдно Тому после́довал еси́,/ чистото́ю Бо́гови прибли́жився,/ отону́дуже и чудес дарова́нием обогатился еси́./ Темже и мы, притека́юще ко святей ико́не твое́й, уми́льно глаго́лем:/ о́тче преподо́бне, моли́ Христа́ Бога/ спасти́́ся душам нашим.

Конда́к, глас 2:

Чисто́тою душе́вною Боже́ственно вооружи́вся/ и непрестанныя моли́твы, я́ко копие́, вручи́в,/ крепко пробо́л еси́ бесо́вская ополче́ния,/ Досифе́е, о́тче наш,/ моли́ непрестанно о всех нас.

Преподобный Досифей Верхнеостровский, Псковский